TBP Balochi

نبشتانک: منی ستکگ ءُ ویرانیں دیار

نبشتکار: ناکو دلدار

دی بلوچستان پوسٹ

وھدے کہ من کسان اِت آں منی ھلک ءُ دیار سک زیبا ءُ ڈولدار اِت اَنت۔ ھر نیمگ ءَ ایمنی، وشی ءُ شاتکامی اَت ، من گوں گونڈواں مُدامی لیب ءُ گْوازی کُت۔ یکروچے شام ءِ ورگ ءِ سر ءَ منی ابّا جان ءَ گوں پُرمھریں گالوارے ءَ منی مکھیں مات ءَ را گْوشت ئے کہ منی چُک ءَ سُھبی تیار بہ کن من وانگجاہ ءَ بران ءُ سرِکنان ئے۔ من پہ زھر ءَ گْوشت زان ءَ پرچی منی ابّا جان! من وانگجاہ ءَ نہ روان ءُ وانگجاہ ءَ من چی کن آں۔ پِت ءَ گوں پُرمِھریں بچکندے ءَ گْوشت نا منی لاڑُکیں بچّ وانگجاہ ءَ روئے تو وان ئے ءُ یک زانتکار ءُ لائِک ، دانا ءُ سرپدیں مردُمے جوڑ بہ ئے۔ نی تو مزن ئے، تئی وانگ ءِ وھد اِنت ۔من گوں گریتگیں چمّاں پسّو دات نہ نہ ابُا ماسٹر لٹّ جنَ اَنت، من وانگجاہ ءَ نہ رواں۔ من گوں وتی ھمسروئیں زھگ ءُ چوریگاں لیب ءُ گْوازی ءَ رواں بس اِنت تو ونتگ ءُ منی ناکواں ونتگ، من نہ وانان ءُ بس لیب کن آں۔ منی پت ءَ گوں پُرمھریں کندگاں من ءَ وتی امبازاں زُرت ءُ بگل ءَ کت ءُ گْوشت ئے کہ نہ نہ منی چُکّ ماسٹر نہ جن اَنت، بلکیں چہ ما گیشتر مِھر دے اَنت ءُ وانین اَنت۔

یک شرّیں انسانے جوڑ کن اَنت ابّا زان ءَ شرّیں اِنسان کُجام اَنت؟ من گوں ھیرانی ئیں چمان جُست کت۔ اَبّا جان ءَ پسّو دات کہ منی چُک شرّیں انسان ھما اَنت کہ زانتکار ءُ سرپدیں وانوک بَہ اَنت، پہ وتی ھلک ءُ دیار ءِ مردُمانی زِند ءُ وتی آیوکیں پدریچ ءِ وشھالی ءِ ھاتر ءَ وتی باندات ءَ ندْر ءُ کولیگ کن اَنت۔ یک نامے پہ وت ءُ پہ وتی پیرینان درکار اَنت انچو کہ بازیں مردماں دُگنیا ءِ تہ ءَ پہ وتی پدریچ ءُ گُلیں راج ءِ ھاتر ءَ کِسّہ ءُ شئیرانی دْروشم ءَ مرچی مئے دیم ءَ آھگ ءَ اَنت مرچی ما پہ پھر وتی ھلک ءُ دمگاں گْوش اِیں ما ملّا پازُل ءِ ھلک ءُ دیار ءِ مردُم اِیں ، بازیں میتگ ءُ بازار ھَست کہ ما گْوش اِیں کہ ملا گُلام مھمد ءِ بازار ، میر اُزمان ءِ بازار ،میر نواب ءُ میر ولی مھمد بازار، انچو شابان ءُ ملا داؤد ءِ بازار زانگ بَہ اَنت ھاں ھاں ابّا جان من الم ءَ واناں! گُڑا وت ءَ یک انچیں انسانے جوڑ کن آں کہ پہ شرپ منی ءُ تئی نام ھم ھرکُنڈ ءُ دمگاں آشکار بہ بیت۔ من ءُ پت ھمے گپّ ءُ تران ءَ اِتیں کہ اناگاہ ءَ ڈنّ ءَ ریڈیو ءَ چہ ھبر نامہ شنگ بوت کہ جنرل ایوب ھان ءَ پاکستان ءِ سر ءَ مارشل لا جَتگ، من ھیران بیت آں کہ مارشل لا چے آپت ءُ بلایے ، من پِت جُست گیپت کہ اَبّا اے مارشل لا چی یے؟ ابا جانءَ دِرُائینت کہ اے پوجی ھُکومتے کہ نی مئے سر ءَ پوجیانی ھاکمی برجاہ بیت ءُ آ گیشتر مئے سر ءَ زُلم ءُ زُوراکی بہ کن اَنت انچوکہ مئے مُلک بلوچستان ءِ سر ءَ 1948ءَ پہ زُور ءُ تاکت کبزہ اِش کُتگ، ما روچ ء مروچی پنچاپ ءِ زیر دست ءُ گُلام اِیں مئے کُلیں مڈّی، مال ءُ متاہ ھمائی ءِ دست ءَ اَنت ما بزّگ درتہ پُچّ اِیں۔

اَبّا جان گُڑا پرچی شِما وتی دیار ءِ پچگرگ ءِ جُھد نہ کتگ؟ دمانے ءِ بے تواری ءَ پد منی پت ءِ چم گوں ارساں سُھر سُھر اِت اَنت ءُ گْوشت ئے کہ منی بابُل! چہ مئے نابودی ءُ نازانتی ءُ کور پھمی ءَ بیتگ ، بلے من شُمارا وانندگ ءُ زانتکار جوڑ کناں تاں شما مزن ءُ لائک بہ بَہ اِت ءُ وتی دیار ءِ پچگرِگ ءِ جُھد ءَ بہ کن اِت۔ پہ راج ءَ نوکیں ءُ وشھالیں بانداتے بیار اِت کہ شُمئے راج یک نامداریں راجے ءُ وت یک پجّارے ءِ واھند بیتگ مروچی شمئے ھمے پجّار ءِ گار ءُ بیگواہ کنگ ءِ سَوَب مئے نابودی نزوری اِنت، اگاں انچو مئے پیم ءَ شُما ھم نابود ءُ نالائک جوڑ بوت ئے گُڑا روچے کَیت کہ شمئے راج ءِ نام ءُ توار یک کْوھنیں ءُ گیدی کِسّھے جوڑ بیت ھو ھو ابّا جان! من وان آں ءُ وتی ڈیھ ءُ راج ءِ ھکاّنی پچگِرگ ءِ ھاتر ءَ جُھد کن آں وھد گوں وتی تْرندیں گاماں جُنزان اَت۔ منی زند ھم ھمے جیڑگ ءِ آس ءَ سُچان ءُ مزن بیان بوت۔یکروچے مئے وانگجاہ ءَ لھتیں سنگت تر ءُ تاب ءَ اتک ءُ مارا سرپدی دات کہ ما وانندہ گل بی ایس او ءِ سنگت اِیں۔

پہ شمئے راجی سِنچ ءُ سما ءِ ھاتر ءِ وانگجاہ ءَ ھمے گل ءِ بُنھِشت ءَ ایر کن یں دانکہ ما شُما کُل ھور ءُ تِپاکی ءَ دیم ءَ بِہ جُنز اِیں ءُ وتی راج ءِ راجی ھکّاں پد بِہ جن اِیں ھاھاھا ھو بلے! اے گل پہ ما چے شرّی کنت؟ من چہ سنگتان جُست کت ، سنگتے ءَ گوں لھمیں بچکندے ءَ من ءَ پسّو دات ءُ گْوشت اے گل پہ مئے شُمئے راجی آکبت ءِ وشھالی ءَ جُھد کنت دانکہ بلوچ پُسّگ وتی جِند ءِ گُلزمین ءِ سر ءَ درآمد ءُ چمدار مہ بیت پمیشکا مئے شمئے کلانی کار ھمیش اِنت کہ وتی راج ءَ ایردستی ءِ ھلاپ ءَ جھد کنگ ءِ سکین ءَ بِہ دے اِیں کہ مئے ایردستی ءُ گُلامی ءِ سَوَب چی اِنت تاں ما وتی ایردستی ءُ بزگی ءِ ھلاپ ءَ پاد میا اِیں ءُ یکمُشت مہ بَہ اِیں ءُ جھد مہ کن اِیں ، گُڑا مئے بدّیں روچ کدی ھم ھلاس نہ بَہ اَنت۔

گُڑا ھما روچ ءَ چہ پد من ایردستی ءِ ھلاپ ءَ وتی زند ءِ مزنیں اُمرے گوں راجی جُھد ءِ گُلائیشی ءَ گْوازینت، بلے مئے ھلک ءُ دمگاں یک آشوبے ودی بوت کہ اے آشوب پہ منی دیار ءُ راج ءِ وشیں باندات ءِ ھاتر ءَ ، پہ مئے اینمی ، زیبا ءُ شادابیں ھما دیار ءَ کہ گُلامی ءَ انچو سوتکگ مروچی ویراں گِندگ ءَ کَیت من ءُ بازیں ورنا، پیر ءُ کماش چہ ھما دیار ءَ دور درانڈیھیں زند ءِ گْوازینگ ءَ لاچار بلے بازین ڈیھ بامرد وتی ڈیھ ءِ رکّینگ ءَ وتی سر ءُ ساہ اِش ندْر کُرتگ ءُ وتی ماتیں سرڈگار ءِ امبازان واب اَنت۔

پمیشکا مرچی مُلّا پازُل ءِ ھنکین شھدائے مرگاپ ھنکیں ءِ نام ءَ گوں شرپ گِرگ ءُ زانگ بیت، چی ءَ کہ داتگیں دیمونیانی مُزّ اِنت کہ ما آیانی سر ءَ پھر بند اِیں ، گُڑا مارا ھم ھمے داب ءَ انچیں دیمونی دَیگی اِنت دانکہ باندا چو ھما بامردانی وڑ ءَ پہ دائِمی زِندگ بِہ مان اِیں ءُ گیر آرگ بِہ بَہ اِیں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءَ سے مردم پاکستانی پوج ءِ دست ءَ آوار جنگ ءَ پد بیگواہ کنگ بیتگ اَنت –

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ کیچ تجابان ءَ پاکستانی پوج ءَ یک لوگے ءِ سر ءَ بیست ءُ ھشت مارچ دوھزار ءُ بیست ءُ یک ءَ بیڑ برتگ ءُ اود ءَ سَے کس آوار جنگ ءَ پد بیگواہ کرتگ اَنت –

آوار جنگ بیتگیں مردمانی پجار جھانزیب ء علی بخش جھمنند تربت سنگانی سر، عیسیٰ ء میر دوست جھمنند سنگانی سر تربت، جلال ء پُلین جھمنند تجابان کیچ ءِ ناماں زانگ بیتگ اَنت –

اشانی تہ ءَ جھانزیب نُھ اپریل دوھزار ءُ بیست ءُ یک ءَ آوار جنگ بیتگ ءُ آ دوئیں کس بیست ءُ ھشت مارچ ءَ آوار جنگ بیتگ اَنت –

آوار جنگ بیتگیں مردمانی نزیکیں مردمے ءَ ٹی بی پی ءَ گپ کنان ءَ گُشتگ کہ اے مردمانی کھولانی گوشگ اِنت کہ ما ھال پیسر ءَ نہ کش اِتگ بلکیں مئے مردم یل کنگ بنت بلے بازیں وھدانی گوزگ ءَ پد نِی ما اے ھال ءَ شنگ کنگ ءَ ایں –

بلوچستان ءَ گوستگیں ھپتگ ءَ باز مردم یل بیتگ اَنت ءُ یل بیتگیں مردمانی تہ ءَ دو کسانی سر نابروبری بیتگ اَنت –

مردمانی یل بیگ ءِ پژدر ءَ بلوچستان ءَ گار ءُ بیگواھیں مردمانی واستا کار کنوکیں گل وائس فار بلوچ مسنگ پرسنز شریں گامگیجے گُشتگ ءُ لوٹ کرتگ ءُ دراھیں مردم یل کنگ بہ بنت –

بلوچستان ءَ سیاسی گلانی گوشگ اِنت کہ بلوچستان ءَ سرکار ھمینکس مردم یل کنت دگہ گیشیں مردماں آوار جنگ ءُ بیگواہ کنگ ءَ اِنت –

گوستگیں روچ ءَ عید ءِ روچ ءَ بلوچستان ءِ بنجاھی شھر شال ءُ کراچی ءَ زھرشانی کنگ بیتگ –

زھرشانی بیگواھیں مردمانی کھولانی نیمگ ءَ کنگ بیتگ ءُ چریشی ءَ بازیں کچے ءَ بیگواھیں مردمانی کھولاں بھر زرتگ اَت –

آیانء گوشگ اَت کہ ھما وھد ءَ مئے مردم واتر بنت گڑا ھما وھد ءَ مئے واستا یک عیدے ءِ روچے ءِ دروشم اَنت –

سربوتگیں ھالانی رِد ءَ بلوچستان ءِ دمگ بولان ءَ ناشناسیں سلاہ بندیں مردماں پوجی پانگس ءِ سر ءَ اُرش کتگ، اُرش ءِ زمہ واری بلوچ سلاہ بندیں گل بی ایل اے ءَ منّ اِتگ –

دمگی مردمانی رِد ءَ اُرش گوستگیں شپ ءَ بولان ءِ دمگ پری چشمہ ءَ برجاھیں پوجی پانگس ءِ سر ءَ کنگ بوتگ، اُرش ءَ پاکستانی پوج ءَ جانی ءُ مالی تاوان ءِ دیمپانی بوتگ، اُرشکار درآھگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ بولان ءِ دمگ پری چشمہ ءَ برجاھیں زورگیریں پاکستانی پوج ءِ پانگس ءِ سر ءَ اُرش کتگ –

جارکش ءَ گوشتگ کہ اُرش ءَ راکٹ ءُ دگہ سلاہ کار مرز کنگ بوتگ چریشی ءَ زورگیریں پوج ءَ جانی ءُ مالی تاوان ءِ دیمپانی بوتگ –

آئی گوشتگ کہ مئے اُرش آجوئی ءِ گِرگ ءَ تاں زورگیریں پوج ءِ سر ءَ برجاہ مان انت –

سر بیتگیں ھالانی رد ءَ بلوچستان ءِ دمگ کیچ ءِ بنجاھی شھر تربت ءَ ڈپٹی کمشنر کیچ ءُ انجمن تاجرانی میان ءَ باندا ءُ پونشی لاک ڈاؤن کنگ ءِ سوڑگ ءَ پد تپاکی بیتگ –

انجمن تاجرانی یک ٹولی ءِ ڈپٹی کمشنر کیچ حسین جان بلوچ ءَ دُچار کپتگ ءُ کیچ ءَ کرونا وائرس ءِ گیش بیگ ءِ سر ءَ گپ ءُ تران بیتگ –

ڈپٹی کمشنر کیچ ءَ کرونا نادراھی ءِ گیش بیگ ءِ سر ءَ سرجمی ءَ دو روچ ءَ لاک ڈاؤن ءُ بیڑیانی تہ ءَ بندش جنگ ءَ انجمن تاجراناں گوں گپ ءُ تران کرتگ ءُ اے درگت ءَ انجمن تاجراں بیست ءُ سَے جولائی ءُ بیست ءُ چار جولائی ءَ تربت ءَ لاک ڈاؤن ءِ سر ءَ تپاک کرتگ-

گپ ءُ تران ءَ پد باندا ءُ پونشی شھر ءَ سرجمی ءَ لاک ڈاؤن ءِ پیسلگ کرتگ ءُ مھلوک ءَ گوں دزبندی کرتگ کہ لوگانی تہ ءَ بہ نند اَنت –

ماسک دپ ءَ بہ کن اَنت، سینیٹائزر کارمرد بی کن اَنت ءُ اشاں ابید دستاں گوں سابن ءِ گون ءَ بہ شود اَنت ءُ چاگری مچیاں گستا بہ بنت –

انجمن تاجراں مھلوک ءَ گوں دزبندی کرتگ ءُ گُشتگ کہ اے جان کَشیں نادراھی ءِ اشی ءِ بچگ ءِ واستا ڈسٹرکٹ کیچ ءَ برجم کرتگیں کرونا ویکسین سینٹرز ءَ زوت ءَ زوت ویکسین بہ جنائین اَنت ءُ دانکہ مھلوک اے جان کُشیں نادراھی ءَ پھریزی بہ بیت –

زانگ بہ بیت بلوچستان ءَ جھانی وبا کرونا نادراھی اے ساھت ءَ گیش بیتگ ءُ مھکمہ ءِ سھت ءَ اے چارُمی لھر باز بیمناک اِنت –

سربوتگیں ھالانی رِد ءَ مروچی سھب ءِ وھد ءَ ناشناسیں سلاہ بندیں مردماں بلوچستان ءِ دمگ ھاران ءَ پوجی پانگس ءِ سر ءَ دز بمب اُرشے کتگ، اُرش ءِ زمہ واری بلوچ سلاہ بندیں گل یو بی اے ءَ منّ اِتگ –

اھوالکارانی رِد ءَ اُرش مروچی عید ءِ نماز ءِ وھد ءَ ھاران ءِ دمگ ھندو میتگ ءَ برجاھیں پوجی پانگس ءِ سر ءَ کنگ بوتگ اُرش ءَ پاکستانی پوج ءَ جانی تاوانانی دیمپانی بوتگ ءُ ارشکار درآیگ ءُ رؤگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل یونائٹیڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی ائید ءِ روچ ءَ ھاران ءِ دمگ ھندو میتگ ءَ برجاھیں پوجی پانگس ءِ سر ءَ دز بمب اُرشے کُتگ –

جارکش ءَ گوشتگ کہ اُرش ءِ آسر ءَ یک پوجی کارمندے مرتگ ءُ یکے ٹپی بوتگ –

آئی ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی تاں برجاہ مان انت –

بلوچستان ءِ بنجاھی شھر شال ءَ ناشناسیں سلاہ بندیں مردمانی تیرگواری ءَ یک مردمے بیران بیتگ –

گیشیں ھالانی رد ءَ وئیل سریاب دگ ءَ ایرگیشن ءِ نزیک ءَ پیش اتکگ کہ اود ءَ سلاہ بندیں مردماں تیرگواری کرتگ ءُ رکشہ ءِ ڈرائیور بیران بیتگ –

بیران بیتگیں مردم ءِ پجار عبدالحمید ء مھمد اکبر جھمنند سریاب دگ ءِ نام ءَ زانگ بیتگ –

بلوچستان ءَ گیشتر تیرگواریانی وئیل پیش آیگ ءَ اَنت ءُ چریشی ءَ مردم بیران ھم بیگ ءَ اَنت بلے سرکاری تکاں چوشیں وئیلانی سر ءَ گامگیج زورگ گندگ بیگ ءَ نہ اَنت –

ھمے وڑ ءَ سوراب ءَ لَٹ جنگی ءَ ھشت مردم زدگ بیتگ اَنت –

ھالانی تہ ءَ گوشگ بیتگ کہ سوراب زبر شکرڈن ءَ عبدالغنی ءِ لوگ ءِ سر ءَ اُرش کنگ بیتگ کہ اود ءَ ھشت کس زدگ بیتگ اَنت –

زدگ بیتگیں مردمانی تہ ءَ زالبول ھوار اَنت ءُ زدگ بیتگیں مردم نادراہ جاہ ءَ برگ بیتگ اَنت –

سربوتگیں ھالانی رِد ءَ ناشناسیں سلاہ بندیں مردماں بلوچستان ءِ دمگ بولان ءَ پاکستانی پوجی پانگس ءُ پوجیانی راشن سر کنوکیں گاڑی ءِ سر ءَ اُرش کُتگ، اُرشانی زمّہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ اَنت –

اھوالکارانی رِد ءَ ناشناسیں سلاہ بندیں مردماں شاھرگ ءِ ھند بیر کچ ءَ پاکستانی پوج ءِ سر ءَ اُرش کتگ اُرش ءَ پاکستانی پوج ءَ جانی ءُ مالی تاوانانی دیمپانی بوتگ –

ھمے وڑ بولان ءِ دمگ منصور ءَ پاکستانی پوج ءِ ھاتر ءَ راشن سر کنوکیں گاڑی ھم دیرواگیں بمب تراک ءِ نشانگ جوڑ کنگ بیتگ کہ چریشی ءَ گاڑی ءَ تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ ھردو اُرشانی زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ شاھرگ ءَ پاکستانی پوج ءِ پانگس ءِ سر ءَ اُرش کُتگ –

آئی ءَ گوشتگ کہ بی ایل اے اسنائپر آں کھوسٹ ءَ بیر کچ ءِ دمگ ءَ دژمنیں پوج ءِ یک کارمندے نشانگ کتگ ءُ کشتگ دور جنگیں توپک ءِ اُرش ءَ پد سرمچاراں مزنیں سلاھاں گوں پانگس ءِ سر ءَ اُرش کتگ چریشی ءَ پانگس ءَ سک باز تاوان رس اتگ –

جارکش ءَ دیمتر ءَ گوشتگ کہ اُرش ءَ پد دژمنیں پوج ءِ چار گاڑیاں جنگجاہ ءَ کمک ءَ آیگ ءِ جُھد کرتگ بلے سرمچارانی دگہ ٹولی ءَ اشانی سر ءَ راکٹ ءُ دگہ سلاھانی گون ءَ اُرش کتگ اُرش آسر ءَ دژمن پوج ءَ جانی ءُ مالی تاوانانی دیمپانی بوتگ –

جارکش ءَ گوشتگ کہ بی ایل اے ءِ سرمچاراں گوستگیں روچ ءَ بولان ءِ دمگ منصور ءَ زورگیریں پوج ءِ ھاتر ءَ راشن سرکنوکیں گاڑی ءِ ھم تراک ناکیں شوروانی نشانگ جوڑ کتگ چریشی ءَ گاڑی ءَ تاوان رس اتگ –

بی ایل اے ءِ جارکش جئیند بلوچ ءَ وتی درشان ءِ تہ ءَ گوشتگ کہ پاکستانی پوج لس مھلوک ءِ گاڑیاں راشن ءِ آرگ ءَ کارمرز کنگ ءَ انت وھدیکہ اے درگت ءَ لھتے دمگی اشکرانی کاریز ٹیکدار آھاں کمک کنگ ءَ انت آئی ءَ گوشتگ کہ بی ایل اے زورگیریں پوج ءَ راشن سر کنوکیں مردماں نشانگ کنت ھمے ھاتر ءَ اے مردم وتی جان ءُ مال ءِ زمّہ وار وت انت –

سندھ ءِ مزن شھر کراچی ءَ بلوچستان ءَ بیگواہ بیتگیں مردمانی کھولانی نیمگ ءَ زھرشانی نندانک برجاہ –

زھرشانی نندانک ءَ سندھی، سیاسی باسک، بیگواھیں مردمانی کھول ءُ بلوچ یکجھتی کمیٹی کراچی ھنکین ءِ باسک ءُ رھشون ھوار اَنت –

بیگواھیں مردمانی کھولاں وتی دوستگیں بیگواھیں مردمانی اکس ءُ تاکانی سر ءَ نبشتگیں بیگواھیں مردمانی بارو ءَ دست ءَ اَنت ءُ وتی بندیگیں مردمانی یل کنگ ءِ لوٹ ءَ کنگ ءَ اَنت –

بیگواھیں مردمانی کھولانی گوشگ اِنت کہ مروچی دنیا نیکراھی دودانی ائید ءِ روچ ءَ دارگ ءَ اِنت بلے بلوچستان ءِ زھگ ءُ زالبول پریس کلب ءُ دگانی سر ءَ وتی مردمانی یلو کنگ ءِ لوٹ ءَ اَنت –

زھرشانی بنجل کراچی پریس کلب ءِ دیم ءَ برجم دارگ بیتگ کہ چریشی ءَ بیگواھیں مردمانی کھول ھوار اَنت –

بیگواھیں ڈاکٹر دین مھمد بلوچ ءِ جنک سمی دین ءَ چاگردی رسانکجاہ ٹوئٹر ءَ گُشتگ کہ مروچی دنیا پُرشانے ءَ وتی کھولانی ھمراھی ءَ ائید ءِ وشیاں شاتمانی گوازینگ ءَ اَنت –

سمی دین ءَ گُشتگ کہ ریاست ء مدینہ ءَ ائید ءِ روچ ءَ بیگواھیں مردمانی کھول وتی دوستگیں مردمانی واستا انساپ ءِ شوھازگ ءَ درکپتگ اَنت ءُ پریس کلب ءِ دیم ءَ زھرشانی نندانک ءَ نشتگ اَنت –

سمی دین ءَ گُشتگ کہ اے وڑ ءَ وداریگیں کھولانی نندانک ءُ انساپ ءِ نہ رسگ ءِ سر ءَ یک دودمانیں ٹاہ دیوکیں ریاستے ءِ واستا شرمے گپے بلے اد ءَ جُست کنوک نیست اِنت –

بیگواھیں مردمانی کھولاں گوستگیں روچ ءَ کراچی ءُ شال ءَ زھرشانیانی جار جتگ اَت کہ ائید ءِ روچ ءَ شال ءُ کراچی ءِ پریس کلب ءِ دیم ءَ نندانک ءُ زھرشانی کنگ بیت اِنت-

دومی نیمگ ءَ چاگردی رسانکجاھاں بیگواھیں مردمانی یلو کنگ ءِ واستا ھیش ٹیک #SaveBalochMissingPersons کارمرد کنگ ءِ دزبندی کنگ بیتگ اَنت –