TBP Balochi

اُرش ءِ آسرءَ یک کارمندے مرتگ ءُ یکے زَدگ بوتگ ۔ بیبگر بلوچ

گوستگیں بیگاہ ءِ ساھت ھپتءَ مئے سرمچاراں کیچءِ دمگ تمپ پل آبادءَ زورگیریں لشکر ءِ پانگسءِ سرا گوں دستی بمبےءَ اُرش کتگ ءُ یک کارمندے کشتگ ءُ یک زدگ کتگ۔ اُرش ءَ پد پروش وارتگیں لشکرءَ دَمگ انگِر کتگ ءُ لس مُچّیانی سرا پَٹءُ پولی لشکرکشی یے بندات کتگ ءُ مھلوک ءَ لَٹ ءُ کُٹ کنگءَ اِنت۔

مئے ایے پیمیں اُرش داں آجوئیں سرڈگارے ءَ برجاہ مان اَنت

اکس کمانچر بلوچ

نبشتانک: مارا زُبانے ھست اِنت کہ نام ئِے بلوچی اِنت

نبشتہ کار: شاھد اھمد بلوچ

اولی بھر

دی بلوچستان پوسٹ

مارا زُبانے ھست اِنت کہ چورو اِنت ، اے زُبان ءِ واھند نہ لوٹ اِت کہ ما اے وتی زُبان ءَ بہ وانین ءُ دربریں پرچاکہ گلامیں راج وتواجہ نہ اِنت کہ وتی راجی زُبان ءَ در بہ بارت ، بزاں راج ءِ وڑ ءَ راج ءِ زُبان ھم گُلام اَت چے ءَ کہ دژمن ءَ پہ آئی ءِ زُبان ءِ گاری ءَ وڑ وڑیں پندل ساز اتگ اَنت کہ سرجمیں راج مجگی گُلامے جوڑ بہ بیت۔ زان ئِے چے ءَ؟ پرچا کہ زُبان راج ءِ مھلوک ءَ یکجاہ کنت، زُبان راج ءِ تہ ءَ تپاکی یے ودی کنت ءُ زُبان دوستی نودربر ءُ سرجمیں راج ءَ راجدوست کنت پمیشکا زورگریں دژمن چہ دْرستاں پیسر گُلامیں راج ءِ زُبان ءَ گار کنگ ءِ جُھد کنت۔

بِہ گِند ئے اِے گلامیں راج ءِ نشانی مُدام وت ماں وت نادوستی ءِ سبب ءَ وتی زُبان ءَ میزان میزان ءَ شُموشگ ءَ اِنت۔ زُبان زندگ کنوکیں راج ءِ لھتیں راجدوست آجوئی لوٹگ اِت اَنت ءُ پہ وتی گلامیں راج ءَ سِکین دیگ ءَ اِت اَنت کہ وتی راجی زُبان ءِ دربرگ ءُ زُبان ءِ وانوکیں راج ءَ چہ گلامی ءِ رَکینگ ءِ ھاتر ءَ جُھد ھم کنگ ءَ اِت اَنت۔ بلوچی زُبان ءَ زندگ کنگ ءِ جُھد بلوچ راج ءَ کنگ لوٹ اِیت بلوچ نودربراں لوٹ اِیت کہ آ گیش ءَ چہ گیش وتی راجی زبان ءِ جُنز ءِ ھاتر ءَ شپ ءُ روچ بلوچی زبان وانگ ءُ نبشتہ کنگ الّم لوٹ اِیت۔ زُبان زندگیں راج ءَ پجارے دنت ءُ زُبان ناپتاکیں راجاں یکمُشت کنت۔

زُبان ھما وھد ءَ چور ءَ گْوشگ بیت وھدے کہ راج ءِ تہ ءَ آئی ءَ وانوک مہ بیت، راج ءِ نودربر ءُ وانِندگ وتی زُبان ءَ ڈالچار بہ کن اَنت گُڑا بزاں راج رد کپتگ ءُ زُبان ئِے ھم گار بیِان اِنت۔ وھدے کہ یک راجے وتی زُبان ءَ وان ایت گُڑا زُبان ءَ راج زندگ کنت اگاں راج زُبان ءَ در مہ بارت گڑا گوں زُبان ءِ ھمراھی ءَ راج ھم راجے نہ بیت ءُ نَیکہ زُبان بلکیں آئی ءِ پدریچ (نَسل) ھم گار ءُ بیگواہ بیت۔ بلوچ راج ءِ ارواہ آئی ءِ بلوچی زُبان اِنت پمیشکا مارا وتی زُبان پَھریزگی اِنت، وانگی اِنت ءُ دربرگی اِنت۔ راجی زُبان زِندگ بات ءُ بلوچ راج شالا دیمروئی بہ کنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: مھرک ءِ یات

نبشتہ کار: آدل درا

اولی بھر

دی بلوچستان پوسٹ

من یک روچے لوگ ءَ اِت اَنت ، من لوگ ءَ چہ سک بیزاری بوت آں ، منی دل ءَ گوشت مرچی دگہ جاھے بُرو ، بلے دل ءَ اے نہ گوشت کہ پلاں جاہ ءَ بُرو ، من ھمے وھد ءَ جیڑگ ءَ اِت آں کُجا بُرو آں ، بلے اے روچ ءَ من ءَ ھم دگہ جاہ ءَ کار نیست اَت ، من کمو یک ساھتے ءَ لوگ ءِ تہ ءَ شُت آں ، منی ھیال ءَ اے لوگ چہ دوزہ ءَ کمتر نہ اَت من پد ءَ چَہ لوگ ءَ دراَتک آں ، من کمو ڈن ءَ چار اِت ، من دیست منی سنگت کمبر چمداں چَہ روگ ءَ اِنت-

من کمبر ءَ توار جت او کمبر تو کُجا روگ ءَ ئے ، کمبر گوشت من اڑے وتی بلُک ءِ لوگ ءَ روگ ءَ یاں ،من گوشت اڑے کمبر من ءَ لوگ ءَ ھچ وش نہ بیت ، من گوش آں کمبر بیا دگہ جاھے رون ایں ، کمبر گوشت ، بیا اڑے منی بلُک ءِ لوگ ءَ رون ایں ، اڑے دگہ شریں جاہ نیست ، من چار اِت دگہ شریں جاہ نیست ، من ھم تھنا اِت اَنت، من ءُ کمبر چمداں شھر ءَ بالا روان اِت ایں ، منی کمو ھیال دگہ جاھے ءَ شُو ، کمبر ھمد ءَ چَہ گپے جت ، منی ھیال آئی ءِ نیمگ ءَ نہ اَت ، بلے ھمد ءَ چہ کمبر ھاموش بوت-

من آئی ءِ گپ ءِ جواب ھچ نہ دات ، ما کمو سپر کرت ءُ دیم ءَ شُت ایں ، من وتی سر چست کرت چار اِت ، داں چمداں چہ یک شریں کسان سالیں جنکے روگ ءَ اِنت ، گڑا من وتی چمّ ھمیشی ءَ سک دات اَنت ، من گُڑا چمداں چاراں ءُ روان اِتاں ، گڑا ھمے وھد ءَ کمبر گوشت آدل من توار نہ دات ، کمبر پد ءَ توار جت درا ، من وتی چک چَرّاینت ءُ چار اِت ، منی دلبر من ءَ ھم چارگ ءَ اِنت ، من وتی چمانی سر ءَ اشارہ کرت ءُ پد ءَ من کمبر ءَ گوشت چی ءَ جگر بہ گوش باریں ، کمبر ءَ کندگے جت ءُ گوشت ھچ انچو توار جت جان کمبر چمداں چہ سر پد بوت کہ آدل ءُ مھرک ھم چمداں چہ وت ماں وت دوست بوت اَنت-

روان اِنت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ گوستگیں بیست ءُ چار ادارانی تہ ءَ بلوچستان ءِ جتا جتائیں جاھاں سلاہ بندیں مردماں پاکستانی پوج ءِ سر ءَ اُرش کرتگ، اُرش کڈان، کاھان ءُ تمپ ءَ پیش اتکگ اَنت –

ھمے ماہ ءَ پوج ءِ سر ءَ اُرش ترندی ءَ گندگ ءَ آیگ ءَ اَنت ءُ گوستگیں روچاں ھم بازیں جاھاں اُرش بیتگ اَنت کہ آ ارشانی زمہ واری بلوچستان ءِ آجوئی ءِ واستا جنگ کنوکیں سلاہ بندیں گلاں منّ اِتگ اَنت –

گیشیں ھالانی رد ءَ کڈان ءَ ناشناسیں مردماں پاکستانی پوج ءِ بنجل ءِ سر ءَ مارٹر ءُ دگہ مزنیں سلاھاں گوں اُرش کُتگ۔

دومی نیمگ ءَ کوھلو ءَ کاھان ءِ ھند ءَ ناشناسیں مردماں پاکستانی پوج ءِ بنجاھی بنجل ءِ سر ءَ راکٹاں گوں اُرش کُتگ ءُ تتکگ اَنت۔

اُرش ءَ پد لشکریاں بنجل ءِ کش ءُ کر ھنکین انگیراں کُتگ ءُ پَٹ ءُ پول بندات کُتگ۔

ھمے پیم ءَ گوستگیں بیگاہ ءَ ھپت ءِ وھد ءَ ناشناسیں مردماں کیچ ءِ ھنکین تمپ پُل آباد ءَ بستگیں لشکریانی بنجل ءِ سر ءَ دستی بمبے دور داتگ ءُ تتکگ اَنت۔

اھوالانی رد ءَ سئیں اُرشانی تہ ءَ لشکریاں تاوان رس اتگ ءُ ارشکار درکپگ ءَ سوبمند بیتگ اَنت۔ بلے داں انگت اے رد ءَ واکدارانی لیکہ دیم ءَ نیتکگ اَنت-

زانگ بہ بیت کہ اَے دمگانی تہ ءَ بلوچ آجوئی لوٹوکیں گل مدام لشکریانی سر ءَ اُرش کن اَنت بلے اے اُرشانی زمہ واری داں انگت ھچ گل ءَ نہ زُرتگ اَنت۔

 
پریمئیر لیگ فٹبال گوازی برجاہ یکشمبے روچ ءَ ٹوٹنھم ءُ ویسٹ ھیم ، برینٹ فورڈ ءُ لیسسٹر سِٹی ، لیور پول ءُ مانچسٹر سٹی ءِ میان ءَ گوازی کنگ بوتگ-

گوازی ءَ ویسٹ ھیم ءَ یک گولے ءَ لسسٹر سٹی دو ءُ لیور پول ءَ پنچ گول ءَ باج برتگ ءُ گوازی وتی نام ءَ کتگ-

پریمئیر لیگ گوازی ءَ ٹوٹنھم ءُ ویسٹ ھیم میان ءَ بوتگیں گوازی ءَ ویسٹ ہیم ءَ یک گولے ءَ باج برتگ وھدیکہ ٹوٹنھم نیمگ ءَ ھچ گول اسکور کنگ نہ بوتگ – ویسٹ ہیم ءِ نیمگ مائیکیل انتینیو ءَ گول اسکور کتگ ءُ گوازی وتی ٹیم ءِ نام ءَ کتگ –

برینٹ پورڈ ءُ لسسٹر سٹی ءِ میان ءَ بوتگیں گوازی ءَ لسسٹر سٹی ءَ دو گول ءَ باج برتگ –

برینٹ پورڈ ءِ نیمگ ءَ یک گول ءِ اسکور کنگ بوتگ کہ برینٹ پورڈ ءِ لیبی جورگینھو ءَ داتگ وھدیکہ لسسٹر سٹی ءِ لیبی یوری تیلیمین ءُ جیمس میڈسن ءَ یک یک گول ءِ اسکور کتگ باج برتگ –

ھمے وڑ یکشمبے روچ ءَ سیمی گوازی مانچسٹر سٹی ءُ لیور پول ءِ میان ءَ کنگ بوتگ کہ لیور پول ءِ لیبیاں جوانی ءَ گوازی کنان ءَ مانچسٹر سٹی ءِ دیم ءَ پنچ گول اسکور کتگ گوازی وتی نام ءَ کتگ – وھدیکہ مانچسٹر سٹی ءِ نیمگ ءَ ھچ گول اسکور کنگ نبوتگ –

لیور پول ءِ لیبی ڈائیگو جوٹا نیبے کیتا ءَ یک یک گول ءِ اسکور کتگ وھدیکہ مھمد سلاہ ءَ جوانی ءَ گوازی کنان ءَ سَے گول اسکور کتگ گوازی وتی ٹیم ءِ نام ءَ کتگ –

بلوچ اسٹوڈنٹس ایکشن کمیٹی ءِ بنجاھی چیئرپرسن ڈاکٹر صبیحہ بلوچ ءِ برات ءُ ناکوزتک ءِ یل کنگ ءِ واستا آرٹ کونسل ءَ داں کراچی پریس کلب ءَ زھرشانی روانک کشگ بیتگ کہ چریشی ءَ نودربراں ھوار جتا جتائیں پھناتاں بندوکیں مردماں بھر زرتگ –

زھرشانی روانک ءَ تران کنان ءَ زھرشانی کنوکاں گشتگ کہ ھستیں وھد ءَ نودربر سیاست یکشل ءَ پاد گڑ کنگ ءِ جھد بیگ ءَ اِنت، نودربر سیاست ءِ دیم ءَ ڈنگر جنگ ءِ جھد بیگ ءَ اِنت ءُ نودربراں چہ سیاست ءَ دور کنگ ءَ جتا جتائیں ھنر ءُ ھِلہ سازگ بیگ ءَ اَنت- بلوچ اسٹوڈنٹس ایکشن کمیٹی ءِ بنجاھی چیئرپرسن صبیحہ بلوچ ءِ برات ءُ ناکوزتک ءِ بیگواھی ھمے شونانی درچ اَنت –

آیاں گشتگ کہ بلوچستان ءَ زورانسری آوارجنی اوشت ءِ نام ءَ نہ زانگ ءَ اِنت ھمود ءَ سیاسی پُرکارانی سر ءَ باپندی جنگ بیت اِنت ھمود ءَ سیاسی باسکانی بے توار کنگ ءَ جتا جتائیں ھُنر ءُ ھِلہ سازگ بیگ ءَ اَنت – اے وڑیں جاور ھال بازیں جست پہ وت ءَ یلو کن اَنت کہ ھاں ڈاکٹر صبیحہ ءِ آ کجام گناہ اِنت کہ آئی ءِ سبب ءَ چوشیں جھلانکیں سزا ءِ دیمپان کنگ بیتگ آ کجام رھبند اِنت کہ یک جمھوری سیاستے ءِ رھبنداں ستک داروکیں باسک ءَ چوشیں ناوشیں دیمپان کنگ اِنت –

آیاں گشتگ کہ ڈاکٹر صبیحہ ءِ برات ءُ آئی ءِ ناکو زتک ءِ بیگواہ کنگ یک گیر رھبندی ءُ گیر جمھوری املے اشی ءِ سرجم ءَ ایر جنی اِنت اے امل ءِ ھلاپ ءَ ھمک تکاں گوں بندوکیں مردماں توار چِست کنگ لوٹ ایت صبیحہ ھروھد ءَ زیردستانی توار بیتگ ءُ مروچی آ بے توار کنگ ءَ آئی ءِ ھلاپ ءَ یک دردے چگل دیگ بیتگ –

بلوچستان ءِ جتاجتائیں دمگاں دگ ءِ وئیل ءُ تیرگواری ءِ وئیل ءَ پنچ مردم بیران ءُ سے ٹپی-

سربوتگیں ھالانی رِد ءَ دشت بشام باگ ءِ نزیک ءَ تیل کشیں گاڑی ءُ پرپٹے ءِ ڈِک ورگ ءَ دو برات اللہ بکش ءُ راشد بیران بوتگ اَنت-

بیران بوتگیں دوئیں برات اللہ بکش ء غلام ءُ راشد دشت شکرو ءِ جھمنند بوتگ اَنت ، ھردوکیں براتانی لاش چار ءُ ٹپاس کنگ ءِ ھاتر ءَ کیچ نادُراھجاہ ءَ سر کنگ بوتگ اَنت ءُ پد ءَ کھول دستیگ کتگ اَنت-

ھمے وڑ سبی ءِ بختیار آباد ءِ شھدگ ءَ گاڑی ءُ پرپٹے ءِ ڈِک ورگ ءَ یک غلام قادر گولا بیران بوتگ ءُ محمد یاسین سیال ٹپی بوتگ – بیران بوتگیں ءُ ٹپی بوتگیں بختیار آباد نادُراھجاہ ءَ برگ بوتگ اَنت پہ گیشیں الاج ءِ ھاتر ءَ ٹپی بوتگیں یاسین سبی نادُراھجاہ ءَ برگ بوتگ –

مشکے ءَ پوریاگرے ٹکٹر ٹالی ءَ ھاک مان کنگ ءَ بوتگ ھمے وھد ءَ ھال لمبیتگ – ھاک لُمبگ ءِ آسر ءَ محمد صادق ء حسن بیران بوتگ ءُ شھباز ء لیاقت ٹپی بوتگ – لاش ءُ ٹپی بوتگیں مرد نادُراھجاہ ءَ برگ بوتگ اَنت پہ چار ءُ ٹپاس ءَ پد لاش کھول ءِ دستیگ کتگ-

شال ءِ دو جتائیں جاھاں تیرگواری ءِ آسر ءَ یک مردمے بیران ءُ یکے ٹپی بوتگ –

شال المدار دگ ءَ ناشناسیں سلاہ بندانی تیرگواری ءَ چہ سھراب ء رستم خان بیران بوتگ – دومی تیرگواری وئیل شال ءِ شاوکشاہ دگ ءَ ناشناسیں سلاہ بندیں مردمانی تیرگواری ءَ چہ یک مردمے ٹپی بوتگ-

لاش ءُ ٹپی بوتگیں مردم نادُراھجاہ ءَ برگ بوتگ اَنت-

پاکستان ءَ بھارت دہ وکٹاں پروش داتگ ءُ اے اولی رند انت کہ پاکستان ءَ ورلڈ کپ ءِ تہ ءَ بھارت پروش داتگ –

مروچی دبئی انٹرنیشنل کرکٹ پٹ ءَ بوتگیں ٹی ٹوئنٹی ورلڈ کپ گوازی ءَ پاکستان ءَ ٹاس کٹیتگ ءُ وت اولسر ءَ بالنگ کنگے پیسلہ کتگ –

بھارت ءَ بیست اوورانی تہ ءَ ھپت وکٹانی تاوان ءَ یکسد ءُ پنجاہ ءُ یک رن جوڈینتگ ءُ یکسدو ءُ پنجاہ ءُ دو ءِ ٹارگٹ ءِ داتگ –

پاکستان ءِ نیمگ ءَ شاھین سَے وکٹ گپتگ ءُ درساں چہ سوبمندتریں بالر بوتگ وھدیکہ حسن علی ءَ دو ءُ شاداب ءُ حارث ءَ یک یک وکٹ ءِ گپتگ –

پسوئی ءَ پاکستان ءَ یکسدو ءُ پنجاہ ءُ دو رنانی ٹارگٹ بید تاوان ءَ ھژدھمی اورر ءَ پروشتگ ءُ گوازی کٹیتگ –

بلوچ نیشنل مومنٹ ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ میان اُستمان ءَ گل ءِ نیمگ ءَ آگاھی مھم رِد ءَ شمبے ءِ روچ ءَ جرمنی ءِ شھر بیلفیڈ ءُ نیدرلینڈ ءِ بنجاھی شھر ایمسٹرڈم ءُ مروچی یکشمبے ءِ روچ ءَ زرباری کوریا ءَ بلوچ چکچینی ءُ پاکستانی ریاست ءِ دگہ زوراکیانی بگیری ءَ زھرشانی کتگ – زھرشانی کنوکاں پلے کارڈ، بینر ءُ زورانسری آوار جنگ بوتگیں مردمانی اکس چست کتگ ءُ بلوچستان ءَ بؤکیں پاکستانی زوراکیانی بگیری ءَ اوگام جتگ –

بلوچ نیشنل مومنٹ ءِ جرمنی زھرشانی ءَ گوستگیں ھپتگ ءَ بلوچستان ءِ دمگ تربت ھوشاپ ءَ پاکستانی پوج ءِ دست ءَ شھید بوتگیں کسان سالیں زھگ اللہ بکش ءُ شراتون ءِ کوش ءُ بلوچستان ءِ دمگ واشک ٹوبہ زورانسری آوار جنگ بوتگیں دہ سالی ئیں جنکو صنم جمیل ءُ شش سالی ئیں گزین جمیل ءِ آوارجنی ءُ بلوچستان ءَ برجاھیں پاکستانی ریاست ءِ زوراکیانی بگیری ءَ اود ءِ مھلوک سرپدی داتگ انت –

بی این ایم ءِ زھرشانی ءَ جرمن ایکٹوسٹ رفال ءُ دگہ مردماں بھر زرتگ ءُ بلوچستان ءَ بؤوکیں پاکستان ءِ زوراکی ءُ بلوچ ءِ چکچینی ایر جتگ اَنت –

زھرشانی ءَ بی این ایم ءِ گوستگیں جوائنٹ سیکٹری ندیم سلیم ءَ تران کنان ءَ گوشتگ کہ پاکستان بلوچ راج ءِ چکچینی ءَ کنگ ءَ انت ءُ سول بیوروکریسی پاکستانی پوج ءِ جنگی کتکاریاں چیر دیگ ءِ جھد ءَ کنگ ءَ انت – انوگیں وئیل ءَ کیچ ءِ ڈپٹی کمشنر تاج بی بی کوش ءِ کیس ءُ شاھد چیر ترینتگ انت ھمے وڑ ھوشاپ ءِ وئیل ءَ ھم یک رندے پد ءَ ڈپٹی کمشنر ءَ آرمی ءِ کتکاریانی چیر دیگ ءِ جھد کتگ –

آئی ءِ گوشگ ات کہ پاکستان ھمک روچ بلوچ ءِ پگر ءَ چیر ترینگ ءِ پندل سازگ انت ءُ زلم ءُ زوراکی ءِ نوکتریں دپتر نویسگ انت ھوشاپ ءَ ناکہ تھنا زھگ شھید کنگ بوتگ انت بلکیں زھرشانی کنوکیں آئی ءِ کھول ھم زھرشانی کنگ ءَ داشتگ ءُ زورانسری گونڈلاں کبر کنگ ءِ جھد کتگ –

بی این ایم یونٹ سیکریٹری جبار بلوچ ءَ گوشتگ کہ پاکستان یک ناشرکاریں ریاستے دنیا ءِ ھرکنڈ ءَ ناشر کاری ءِ بہ بیت آئی ءِ تہ ءَ ریاست پاکستان ءُ پوج دست الم وڑے ناں وڑے ءَ مان انت – ھمے ھاتر ءَ ما سرجمیں دنیاءَ چہ لوٹ کنیں کہ پاکستان ءِ مالی کمک ءَ بند بہ کن انت پرچاکہ ھمے کمک ءَ آ ناکہ تھنا بلوچستان ءَ بلکیں سرجمیں دنیا ءَ ناشرکاری ءَ تالان کنگ انت –

زھرشانی ءَ بی این ایم ءِ باسک بدل خان جرمنی ھنکین ءِ باسک شار حسن بلوچ، ماجد بلوچ، عبدالحمید بلوچ دگہ مردماں تران کرت ءُ گوشت کہ پاکستان ءَ بلوچستان یک پوجی سنگرے ءِ تہ ءَ بدل کتگ دنیا ءِ پرز انت کہ آ پاکستان ءِ زوراکیانی آماچیں بلوچاں ریاستی کوش ءِ درگت ءَ گامگیج بہ زور ایت –

زھرشانی کنوکاں جرمن ءُ انگریزی زبان ءَ نبشتھیں تاک بھر ھمود ءِ دمگی مردمانی گور ءَ بھر کرت انت کہ آھانی تہ ءَ ھوشاپ ءُ واشک ءِ وئیل ءَ زھگانی کوش، زورانسری آوار جنی ءَ ھوار سی ٹی ڈی ءِ دست ءَ زورانسری آوار جنگ بوتگیں بیگواھیں مردمانی دروگیں میڑ ءَ کوش ریاست ءِ زوراکیانی درگت ءَ نبشتہ بوتگ اَنت –

بلوچ نیشنل مومنٹ ءِ (بی این ایم) نیدرلینڈ ھنکین ءِ نیمگ ءَ بلوچ چکچینی واشک ءَ زھگانی زورانسری آوارجنی ءُ ھوشاپ ءَ زھگانی کوش ءِ زھرشانی کنگ بوتگ زھرشانی نیدرلینڈ ءِ بنجاھی شھر ایمسٹرڈم ءَ ڈام اسکور ءَ کنگ بوتگ کہ مردماں مزنیں کساسے ءَ بھر زرتگ اود ءَ ھم زھرشانی کنوکاں بینر ءُ پلے کارڈ ءُ پاکستان ءِ دست ءَ بیگواھیں ءُ شھید کنگ بوتگیں زھگانی اکس بوتگ انت – زھرشانی ءَ بلوچستان ءَ انسانی ھکانی لگتمالی ءُ پاکستان ءِ زوراکیانی بگیری ءَ اوگام جنگ بوتگ اَنت – زھرشانی کنوکاں ھمود ءِ نندوکیں مردمانی آگاھی دیگ ءِ تاک بھر کرتگ ءُ بی این ایم نیدرلینڈ باسک لطیف بلوچ ءَ تاک ونتگ ءُ اشکنائینتگ اَنت –

زھرشانی ءَ تران کنان ءَ بی این ایم نیدرلینڈ ھنکین ءِ سرکماش کیّا بلوچ ءِ گوشگ ات کہ اے زلم زوراکیانی کسھاں گوستگیں ھپت دھکاں اشکنگ انت – پاکستانی پوج ءِ زوراکی روچ پہ روچ گیش بوان انت پاکستان بلوچ راج ءِ چکچینی ءَ کنگ ءَ انت مروچی دنیا بلوچ چکچینی ءَ ھچ نہ گوشگ ءُ چارگ انت پاکستان ءَ ھمے چکچینی بنگالیانی گوم ءَ ھم کتگ –
شاکر بلوچ ءَ وتی ھیال درشان اِت انت ءُ گوشت کہ پاکستانی پوج مئے چک ءُ زالبول کماشاں ھم نہ بکشیت آ چست کنگ ءُ بیگواہ کنگ بنت پاکستان ءِ زوراکیانی آماچیں راج ءَ چم دنیا ءِ نیمگ ءَ کتگ انت کہ ھما اے انسانی ھلاسی ءَ چہ مارا بہ رکینیت – ما اے جست ءَ کنگ لوٹیں زانان بلوچاں اے دنیا ءِ تہ ءَ زندگ بوگ ءِ ھک نیست انت زاناں بلوچ ءِ ھک انسانی ھک نہ انت –

زھرشانی کنوکاں میان استمانی ادارہ دودمانیں راج ءُ انسانی ھکانی ادارہ، میان استمانی گل ءُ آزاتیں رسانکاں چہ لوٹ کتگ کہ ایردستیں بلوچستان پاکستانی پوج ءِ دست ءِ نیمگ ءَ برجاھیں چکچینی ءِ ھاتر ءَ گامگیچ بہ زور انت آھانی گوشگ ات کہ بلوچستان ءِ تہ ءَ اے وھدی سکیں مزنیں انسانی ھلاسی ءِ ودی بوتگ اگاں دودمانیں دنیا اے زوراکیانی سر ءَ ھاموش بوت گڑا پاکستان ءِ زوراکیانی تہ کمی نیت بلکیں گیشی کیت آ بلوچستان ءَ یک کبرستان ءِ جوڑ کنگ ءَ چک ءُ پد نہ باں –

ھمے وڑ مروچی یکشمبے ءِ روچ ءَ ھم زرباری کوریا ءِ شھر سویانگ ءَ بی این ایم ءِ نیمگ ءَ زھرشانی کنگ بوتگ – زھرشانی کنگ ءِ مول ءُ مراد بلوچستان ءَ برجاھیں بلوچ ءِ چکچینی ءُ انوگیں وئیلاں دنیا ءِ دیم ءَ پدر کنگ بوتگ اَنت کہ پاکستانی پوج ءَ ھوشاپ ءَ کسان سالیں زھگ اللہ بخش ء واحد ءُ شراتون ء واحد ءِ کوش ءُ واشک ءَ دہ سالی ئیں صنم ء جمیل ءُ گزین ء جمیل چیریں ادارھاں زورانسری اوار جتگ ءُ زندانی کتگ انت –

گل ءِ نیمگ ءَ مروچی ھم تاک بھر کنگ بوتگ ءُ شھید ءُ زورانسری اوار جنگ بوتگیں زھگانی اکس دست ءَ کتگ ءُ پاکستان ءِ بگیری ءَ اوگام جتگ –

زھرشانی ءَ سمیر بلوچ، حفصہ بلوچ ءُ بختاور ءَ تران کتگ ـ

زھرشانی ءَ تران کنان ءَ سمیر بلوچ ءِ گوشگ ات کہ پاکستانی پوج ءِ سوب ءَ بلوچستان ءِ تہ ءَ جاورھال سک باز ھراب انت کہ بلوچستان ءِ سر ءَ کبزہ کنگ ءَ پد برجاہ انت بلوچ راج اے زورگیری ءِ بگیری ءَ آجوئی ءِ ھاتر ءَ جھد کنگ انت – ھمے جھد ءِ چیر ترینگ ءِ ھاتر ءَ پاکستان مھلوک ءِ سر ءَ زوراکی کنگ ءَ انت – ھزارانی کچ ءَ بلوچ پاکستان ءَ کُشتگ انت ھزارانی کچ ءَ بیگواہ کتگ انت – اود ءَ جنگی جرم اولی لڑ ءِ تہ ءَ انت – گوستگیں ھپتگ ءَ پاکستانی پوج ءَ ھوشاپ مارٹر گولہ آس داتگ ءَ دو زھگ شھید کتگ انت ءُ یکے زدگ کتگ – ھمے وڑ حیات بلوچ آئی ءِ مات ءُ پتانی دیم ءَ تیرانی اماچ کتگ ءُ شھید کتگ – یک زالبولے تاج بی بی ھم وتی پانگس ءَ چہ تیرگواری کتگ شھید کتگ – ھمے وڑ بلیدہ ءَ رامز بلوچ ءِ گِس ءَ دور کنگ بوتگ ءُ شھید کنگ بوتگ –

سمیر بلوچ ءِ گوشگ ات کہ واشک ءَ دہ سالی ئیں صنم ءُ گزین جمیل پاکستانی پوج ءَ زوراکی کنان ءَ آوار جتگ ءُ بیگواہ کتگ انت کہ دنیگت ءَ بیگواہ انت – ما کوریا ءِ سرکار ءَ درستیں میان استمانی گلاں چہ لوٹ کنیں کہ آ نسانی ھکانی بگیردارواکانی بگیری ءَ توار چست بہ کن انت –

حفصہ بلوچ ءِ گوشگ ات کہ گوستگیں ھپتاد ءُ شش سالاں پاکستان ءِ پوج ءَ زوراکی یکشل ءَ برجاہ انت زورانسری اوار جنی، بجن بکوش چگل دئے، دروگیں میڑ ءِ نام کوش ھم روچی کارے جوڑ بوتگ – چِل ھزار ءَ گیش بلوچ گار ءُ بیگواہ انت کہ پاکستانی پوج ءِ چیریں زنداناں درد سگگ انت –

آئی ءِ گوشگ ات کہ میان استمان ءِ ھچ نگوشگ ءَ پاکستان بلوچستان ءِتہ ءَ ھمک روچ بلوچ چکچینی ءُ زوراکیانی تہ ءَ گیشی ارگ انت اگاں ھمے وڑ ھچ گوشگ نبوت گڈا پاکستان انسانیت ءِ بگیری ءَ وتی کتکاریاں ازاتی ءِ گوما برجاہ داریت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی ماما قدیر بلوچ ءِ سرکماشی ءَ برجاہ زھرشانی مروچی چار ھزار چار سد ءُ ھپتاد ءُ چار روچ سرجم بوتگ- بی ایس او ءِ ھنکین ءِ کمک سرکماش ثنا آجو ءَ بنجل ءَ اتکگ ءُ دلپدردی درشانتگ -.

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ سامراجی تاکت وتی مفاداتانی ھاتر ءَ مزلوم ءُ ایردستیں راجانی درگت ءَ نوکیں صف بندی ءَ مھکم گنگ بوھگ انت – ھمک روچ سامراج بگیری داروک پُرایمنیں جھدے ھلاس کنگ ءَ وڈ وڈیں پندل سازگ انت ءُ دنیائے تہ ءَ برجاھیں پُرایمنیں جھد ءَ ھاکاں ھوار کنگے سک باز تاکت کارمرز بوھگ ءُ بازیں تحریکانی دیم ءَ رد انکلانی ٹولی مزھبی، ٹکی ءُ لسانی جنگ چوپاں دیم ءَ آرگ ناکامیں کوشست ءِ کنگ بوھگ انت –

آئی ءِ گوشگ ات کہ ھستیں وھد ءَ بلوچستان ءِ جاور ھال ھم ھمے وڈا گندگ بوھگ انت کہ زورگیریں ریاست ءِ نیمگ ءَ بلوچ ءِ پُرایمنیں جھد درگان درگان کنگے ھاتر ءَ بازیں تاکت ءِ کارمرز کنگ ءُ ریاستی خور بلوچ چکچینی ءِ دمب انت –

ماما قدیر بلوچ ءَ دیمتر ءَ گوشتگ کہ بلوچانی سر ءَ تاکت ءِ کارمرز کنگ ھاکمانی ٹیل پریچگے عمل ناکہ تھنا پاکستان ءَ بلکیں سرجمیں دنیائے تہ ءَ عدم استحکام گیش بیت – بلوچانی گوشگ انت ھاکم تاکت ءِ زور ءَ بلوچ ءِ پجار ءَ گار کنگ لوٹیت ادا مرگ ءِ تُرس ھلاس بوتگ پرچاکہ آ سرپد انت بلوچ ءِ ھک توار چست کنگ ءَ ھما راھے گچین کتگ آ ھاکمانی تاکت بلوچ راج ءِ میان ءَ گیشی اھگ انت –

آئی ءِ گوشگ ات اے کجام جُرم بس گردن الم بُرگی انت بلوچانی رِد ءَ راستی ءَ اے تاکت ھک ءُ راست ءَ چہ ترسیت ھمے ترس انت بلوچ آوار جنی ءَ پد شھید کنگ بنت ءُ آھانی زانگولیں جون ویرانگاں چگل دئیگ بنت – اے جُرم نوں بلوچ ءِ چاگرد ءِ تہ ءَ عام بوتگ کہ ھر ویرانگاں بیگواھیں بلوچ ءِ زانگولیں جون دست کپیت چریشی ءَ زانتکارانی گوشگ انت اگاں کُشت ُ کوش ءُ لاشانی کپگ بند نہ بوت گڈا بلوچ چاگرد ےَ توپان ودی بیت انت –