نبشتانک: شَے مُریدیں شیھو
نبشتہ کار : زرینہ بلوچ
دی بلوچستان پوسٹ
سرمچار ءِ متلب ھما راجی بامرد کہ پہ وتی سرڈگار ءُ راج ءِ ننگ ءِ پھزگ ءَ وتی سر ءِ پرواہ نہ کنوکیں مردم ، راجی سیت ءُ پائدگ ءِ ھاتر ءَ وتی سر ءَ پہ دومی ءَ ندر کنوک, سرمچار ما ھمایاں گُش ایں کہ پہ وتن ءِ آجوئی ءَ جنگ کن انت, پہ ازت ءُ گیرت ءَ کربان بنت, پہ گُلام بلوچ راج ءِ بندات ءَ وتی زند ءُ زند ءِ وشیاں کُربان کن انت، دیم پہ کوھاں رو اَنت, وتی مات, پت, بْرات ءُ گْوھار ءُ چُک ءُ جنین درستاں یل کن انت ءُ وتی زند ءِ ھمُک واھگ ءَ گُٹگیر کن اَنت وھدے کہ سرمچارے دیم پہ کوہ ءَ روت گُڑا وتی دل ءِ سرجمیں واھگاں کُش ایت ءُ کَل کنت، سرمچار پہ وتن ءَ گُژن, بزگی, بے وابی دُرست اُوپار کنت۔ ورگ ئِے ھم پہ دلجمی نہ رس ایت، تُن ھم سگ ایت, ھزاریں جنجالانی دیمپان بیت ءُ راجی جُھد ءَ پہ مھکمی دار ایت تاں گُڈی تیر ءَ وتی دلبند ءَ مک کنت ءُ شھادت ءِ شھد ءَ نوش ایت۔ سرمچار ھما دلیریں سر انت بس مُدامی ءَ پہ زمین ءِ رکینگ ءَ جُھد کن انت ءُ پہ زمین ءَ کربان بنت-
من یک انچیں ڈیھ دوستیں بْراتے پیسبُک ءَ دیتگ کہ ھرکجا بوتگ تھنا سرمچاری ئِے کتگ. سرمچار راجی آجوئی ءِ جنگ ءَ شھیدبوتگ ءُ وتی جند چہ مارا جُتا کُتگ بلے نوں آئی ءِ پکر مئے ھمگام انت۔
من شھید شھیک شاہ ءِ گپ ءَ آں کہ شیھو راجی سرمچارے ات، راجی زُبان ءِ جُھدکار ءُ بلوچی زبان ءِ جوانیں شائر ءُ نبشتہ کارے ات۔ بہ گِند ئے سرمچاریں شیھو انوگیں دور ءِ شَے مرید بوتگ کہ پہ بلوچ گُلزمین ءِ آجوئی ءَ تُن، گُژن، ھر وڑیں سکی ءُ سوری ئِے سگ اِت ءُ وتی سر ئِے راجی آجوئی ءَ ندر کُتگ چوکہ شے مرید ھانی ءِ اشک ءَ گنوک بوت، برے یک جاھے برے یک درے, در پہ در بوت۔ مئے شَے ھم پہ وتی زمین ءِ آشک ءَ گنوک بوتگ,کدی اے کوہ ءُ کدی آ کوہ, کلبر , زامران, بالگتر ءُ تمپ ءُ دشت ءِ ماتکوہ وتی سنگر کتگ اَنت ئِے-
شیھو ءِ اولی مھر ماتیں زمین اَت ءُ دومی سمل بلے سمل ءِ مردماں شیھو گوشتگ کہ تو سمُل ءَ اگاں وتی کنگ لوٹ ئے گُڑا وتی ماتیں زمین ءَ یل بکن ءُ تُپنگ ءَ دور بدئے ءُ ڈنی ملک ءَ برو اود ءَ ما ترا پہ سمل ءَ سالونک کن ایں۔ گُڑا ھما روچ ءَ شیھو ءَ گوشتگ من وتی ماتیں زمین ءَ یل نہ دیاں اے تُپنگ دور دیگ نہ بیت کہ گوں مھکمیں سسّا ءُ پکراں بندوک انت زاناں درملک نہ ریچ ایت گُل ءُ گوہر پہ من بلے من شاتاں وتی تنگوئیں براتانی تہ ءَ من ءَ مہ زور ایت پہ سمل ءَ من ءَ زمین وت وتی کنت زمین ءَ شیھو وتی کت-
شیھو ءَ وتی مھر پہ زمین ءَ کُربان کُت, وتی تپنگ ئِے چگل نہ دات ءُ درانڈیھی ءِ زندگی نہ گوازینت ئِے اے گپ ءِ کنگ سک ارزان انت کہ مھر ءِ کُربانی دیگ بلے اسل ءَ اگاں یکے وت ءَ شیھو ءِ جاہ ءَ بکنت ءُ بچار ایت سک گران انت بلے شیھو ءَ پہ بلوچ ءِ باندات ءُ آؤکیں آجوئی ءِ بامسار ءِ ھاتر ءَ وتی مھر کربان کُت ءُ زمین ئِے وتی امبازاں زرت ءُ پہ زمین ءَ سالونکی مُراداں بوت ءُ شُت-
“مرگ سالونکی یے پہ شھیدیں سراں”
من پہ جزم گْوش آں کہ شیھو بیست ءُ یکّومی کرن ءِ شے مرید اِنت منی اھد ءِ شے مرید پہ وتن سالونک بنت پہ مائیں کاڑاں اِنّاں شے مریدیں شیھو ءِ وتی واھگ بوتگ کہ من پہ وتی گُلزمین ءِ سالونکے باں ءُ گوں دژمن ءَ دیم پہ دیمی جنگ ءَ وتی سالونکیں سر ءَ پہ بلاھیں بلوچ راج ءِ وشیں باندات ءِ ھاتر ءَ کربان بکن آں, شیھو ءَ وتی مھکمیں کول پیلو کت,شیھو ءِ واھگ سرجم بوت-
شیھو تئی رتکگیں ھون ستا ءِ وازمندگ نہ انت, تئی کربانی گوں من سنگ ءُ شاھیم کنگ نہ بنت, من نزاناں کُجام ستا ءَ بکن آں بلے من پھر بندان ءُ گْوش آں کہ من ءَ ھُدا پاک ءَ شیھو ءِ وڑیں بْراتے داتگ کہ مئے شرپ، اِزت ءُ گیرت ءِ دیمپان بوگ ءَ وتی سالونکیں سر ئِے دیم ھونی دات۔ من ءُ شیھو ءَ کم وھد انت کہ من زانان ئِے۔ مُدام من شیھو سوشل میڈیا ءَ دیستگ گوں ھر کس ءَ کَندگ ءُ مسکرائی ءَ بیتگ ءُ ھر کس ءَ ازت داتگ ئِے۔ شیھو یک سادگ ءُ دل پھکیں مردمے ات، شیھو ھمنکس توسیپ ءُ ستا بکن آں آ کم انت بلے بژن کہ من شیھو ءِ زند ءَ پہ شیھو ءَ ھچ نبشتہ نہ کُت, منی دل انگت گْوش ایت کہ شیھو زندگ انت ءُ شیھو مئے ھیالانی سر ءَ بادشائی کنگ ءَ انت شیھو نمیران انت-
یک شیھوے شھید بوتگ اگاں یک بلوچ ماتے اے گیدی ءَ زندگ بہ بیت گُڑا اے وڑیں شیھو دِگہ ھزار پیداک کنت ءُ دست ءَ بڈا جنت ءُ پد ءَ دیم پہ وتن پھازگ ءَ روان دنت دُژمن باج نہ بارت, باج رتکگیں ھونانی اِنت, باج شھیدیں سرمچار ءُ بلوچ راج ئیگ انت شیھو جان تاں اے دنیا ھست انت تو بلوچ راجدپتر ءَ نمیران ءُ ابدمان ئے-
سُھریں دْروت پہ ترا ماتیں زمین ءِ شے مُریدیں شیھک-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
