TBP Balochi

سر بیتگیں ھالانی رد ءَ روکپتی بلوچستان ءَ ناشناسیں سلاہ بندیں مردمانی تیرگواری ءَ یک مردمے بیران بیتگ –

تیرگواری ءِ وئیل روکپتی بلوچستان ءِ دمگ مگس ءَ پیش اتکگ کہ اود ءَ سلاہ بندیں مردمانی تیرگواری ءَ مھمد پیام ء ھاجی اکبر پیام بیران بیتگ –

ھالانی تہ ءَ گوشگ بیتگ کہ مھمد پیام لوگ ءَ ڈن در اتکگ کہ اود ءَ سلاہ بندیں مردماں تیرگواری کرتگ ءُ چریشی ءَ مھمد پیام بیران بیتگ –

روکپتی بلوچستان ءَ تیرگواریانی درچ ءَ یکشل ءَ مردم بیران ءُ زدگ بیگ ءَ اَنت –

روکپتی بلوچستان ءَ بندوکیں مردمانی گوشگ اِنت کہ سرکار ءِ نیمگ ءَ لس مردم سلاہ بند کنگ بیتگ اَنت چریشی ءِ پژدر ءَ مھلوک وتی زاتی ءُ دگہ جیڑھانی سر ءَ مردماں کُشگ ءَ اَنت –

ھمے وڑ گوستگیں روچ ءَ رودراتکی بلوچستان ءَ بندوکیں ازمکار ھمید جیئند ھم تیر جنگ ءُ کُشگ بیتگ اَت –

بلوچستان ءِ بنجاھی شھر شال ءَ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ءُ ھزار سَے سد ءُ ھشتاد ءُ چار روچ سرجم بوتگ – چہ شال ءَ سیاسی ءُ چاگردی باسک گلام رسول ءُ بی ایس او پجار ءِ گوستگیں کارمستر محمد اسلم بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ پاکستان ءِ جوڑ بوگ ءَ بگر تاں روچ ء مروچی پاکستانی پوج ءَ بلوچستان ءِ تہ ءَ ھزارانی کچ ءَ مردم زورانسری آوار جتگ ءُ بیگواہ کرتگ انت ، ھپتاد ءِ دھک ءَ پاکستانی پوج ءَ وتی زوراکیانی میان ءَ ھزارانی کچ مھلوک آوار جتگ یا کُشتگ انت چوشکہ آ وھد ءَ رسانکدر ءِ نہ بوگ ءِ سوب ءَ اے درگت ءَ ھچ وڑیں دستاویزات وَ نیست اِنت بلے اے درگت ءِ گواہ ھست اَنت کہ بلوچ راج کجام وڑ زوراکیانی آماچ بوتگ اَنت –

ماما قدیر بلوچ ءِ گوشگ ات کہ پوج ءِ زوراکی تنی وھدی برجاہ انت بلکیں ھمک روچ گیش بوان انت دو دھکاں چہ ھما وڑ پاکستانی پوج ءِ زوراکی بلوچستان ءِ تہ ءَ برجاہ انت کہ روچ ءِ رژن ءَ پدّر انت اشی ءَ ابید ھم دنیا ءَ ھچ نہ گوشگ ءُ روچگ اش داشتگ –

ماما قدیر ءِ گوشگ ات کہ پاکستانی پوج ءِ زوراکیانی درسیں گواہ مئے کرا ھست انت شھید ءُ بیگواہ بوتگیں مردمانی لسٹ ھم ھست انت وائس فار بلوچ مسنگ پرسنز گوستگیں دو دھکاں یکشل ءَ زھرشانی کنگ ءَ انت اشی ءَ ابید ما دنیا وتی نیمگ ءَ دلگوش دیگ ءِ ھاتر ءَ شال تاں کراچی ءُ کراچی تاں اسلام اباد ءَ یک ءَ پند ھم بُر اتگ اے پند ءَ سمی، علی ھیدر ءُ پرزانہ مجید ءَ ھوار بازیں مردمے وتی پت ءُ براتانی یل کنائینگ ءِ ھاتر ءَ آہ ءُ زاری بوتگ انت بلے اشی ءَ ابید دوازدہ دوازدہ سالانی گوازگ ءَ پد ھم اشانی بیگواھیں مردم پاکستانی پوج ءِ زنداناں ازیت سگگ ءَ انت –

اوگانستان: ءِ مزن شھر کابل ءَ مزنیں ائید ءِ نماز ءِ وھد ءَ صدارتی مھل ءِ کش ءُ کراں کساس دو راکٹ آس دیگ بیتگ اَنت۔

اوگان رسانک ءِ رد ءَ صدارتی مھل ءِ نزیک ءَ راکٹ آس دیگ بیتگ اَنت۔ راکٹ اُرشانی وھد ءَ صدارتی مھل ءِ تہ ءَ مزنیں ائید ءِ نماز وانگ بیگ ءَ بیتگ کہ راکٹانی کپگ ءَ پد ھم برجاہ دارگ بیتگ۔

درملکی رسانکی اھوالکارانی گُشگ اِنت کہ صدارتی مھل ءِ نزیک ءَ کساس دو راکٹ ارش کنگ بیتگ اَنت ۔ اے راکٹ سھب ءَ ھشت بج ءَ جنگ بیتگ اَنت ءُ اشانی توار داں گرین زون ءَ اِشکُنگ بیتگ۔

داں انگت کجام ھم گل ءَ راکٹ اُرشانی زمہ واری نہ من اِتگ بلے اوگانستان ءَ چہ درملکی پوجانی در آیگ ءَ ھوار تالباناں وتی اُرشانی تہ ءَ ترندی ءُ گیشی آورتگ ءُ گوں تیزی ءَ بازیں دمگاں ھم دز گرگ ءَ اَنت۔

گوستگیں روچ ءَ دوحہ ءَ اوگان سرکار ءُ تالبانی نیام ءَ گپ ءُ تران ھم کجام آسری ءَ رسگ ءَ ابید ھلاس بیتگ اَنت ءُ چریشی ءَ یورپ ءِ سفارتی مشن ءَ چہ تالبان ءَ ائید ءِ روچ ءَ جنگ ءِ دارگ ءِ دزبندی ھم کُتگ اَت۔

سر بیتگیں ھالانی رد ءَ بلوچستان ءِ جتا جتائیں جاھاں سَے کس یلو کنگ بیتگ اَنت ءُ وتی لوگاں سر بیتگ اَنت –

یلو بیتگیں مردمانی تہ ءَ سَے سال پیسر آوار جنگ بیتگیں لطیف سرکری بگٹی جھمنند ڈیرہ بگٹی ءُ مستونگ ءَ سَے سال ءَ پیسر یاسر عرفات ءُ چار مئی دوھزار ءُ نوزدہ ءَ ڈیرہ بگٹی ءَ آوار جنگ بیتگیں جوانسال ء گھنور بگٹی ناماں زانگ بیتگ اَنت-

یل بیتگیں مردمانی یل بیگ ءِ ھال وائس فار بلوچ مسنگ پرسنز ءَ راست کرتگ اَنت –

وائس فار بلوچ مسنگ پرسنز ءِ گوشگ اِنت بیگواھیں مردمانی یلو کنگ وشیں گپے ءُ سرکار باید درستیں مردماں یلو بہ کنت ءُ بیگواھیں مردمانی کھولاں شاتمان بہ کنت –

سربوتگیں ھالانی رِد ءَ دوشمبے روچ ءَ ناشناسیں سلاہ بندیں مردماں بلوچستان ءِ دمگ تمپ گومازی ءَ پاکستانی پوجی پانگس ءِ سر ءَ اُرش کُتگ – اُرش ءِ زمّہ واری بلوچ آجوئی لوٹوکیں سلاہ بندیں گل بی ایل ایف ءَ منّ اِتگ –

دمگی مردمانی رِد ءَ اُرش دو شمبے روچ ءَ شپ ءِ ادار نُھ ءَ گومازی چیری بازار ءَ پاکستانی پوج ءِ زورانسری کبزہ کوتگیں گِس ءِ سر ءَ کنگ بوتگ – اُرش ءَ زورگیریں پوج ءَ جانی ءُ مالی تاوانانی دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن پرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں دوشمبے ءِ بیگاہ ءِ ادار نُھ ءُ نیم ءَ گومازی چیری بازار ءَ پاکستانی پوج ءِ پانگس ءِ سر ءَ راکٹانی گون ءَ اُرش کتگ-

جارکش ءَ گوشتگ کہ راکٹ پانگس ءِ تہ ءَ کپتگ اَنت چریشی ءَ زورگیریں پاکستانی پوج ءَ جانی ءُ مالی تاوانانی دیمپانی بوتگ – آئی ءَ گوشتگ کہ اے پانگس پاکستانی پوج ءَ بی ایل ایف ءِ شھیدیں سرمچار کیپٹن جھانگیر ءِ گِس ءِ زورگر کنگ ءَ پد جوڑ کتگ –

بلوچستان ءَ پاکستانی پوج ءِ سر ءَ اُرش یکشل ءَ گندگ بیگ ءَ اَنت ءُ سرکاری تکاں ھم بازیں اُرشانی راستی پدر بیتگ اَنت –

سر بیتگیں ھالانی رد ءَ بلوچستان ءَ جھانی نادراہ کرونا وائرس ءِ برزی چار درسد ءَ برز شتگ ءُ شش ءَ سر بیتگ ھمے وڑ بلوچستان ءِ بنجاھی شھر شال ءَ یک درسدے ءَ برز برتگ ءُ سَے درسد ءَ سر بیتگ –

جانسلامتی ءِ نیمگ ءَ شنگ کرتگیں ھالانی رد ءَ دَہ شھراں یازدہ سد ءُ سِی ءُ یک ٹسٹ کنگ بیتگ اَنت، چرے ٹسٹانی تہ ءَ سشت ءُ ھپت مردم نادراھی ءَ پدر بیتگ اَنت –

چریشانی تہ ءَ درستاں گیشتر نادراہ بیست ءُ شش کس کیچ ءَ بیتگ اَنت، بیست ءُ یک شال ءَ، گوادر ءَ چارد کس نادراہ پدر بیتگ اَنت ءُ کرونا ءِ تالانی برز بیتگ ءُ شش درسد ءَ سر بیتگ اَنت –

جانسلامتی ءِ رد ءَ بلوچستان ءِ بنجاھی شھر شال ءَ ھشت سد ءُ یازدہ ٹیسٹ کنگ بیتگ اَنت ءُ شال ءَ سَے درسد ءَ سر بیتگ ءُ بلوچستان ءَ بیران بیتگیں مردمانی کَچ سَے سد ءُ نوزدہ ءَ سر بیتگ اَنت ءُ بیست ءُ چار ادارانی تہ ءَ بیست ءُ سَے شھراں ھچ ٹیسٹ کنگ نہ بیتگ اَنت –

گوستگیں روچ ءَ کیچ ءَ سیادی داروکیں وکیل کرونا ءِ نادراھی ءَ بیران بیتگ اَت –

تربت ءَ بیران بیتگیں وکیل ءِ پجار مصطفیٰ ایوب گچکی ءِ نام ءَ زانگ بیتگ اَت ءُ بلوچستان ءَ اے وھد ءَ کرونا نادراھی باز ترند اِنت ءُ پھزدارانی نیمگ ءَ کرونا نادراھی ءِ نیمگ ءَ کرونا ءِ رکگ ءَ سرپدی یکشل ءَ برجاہ اَنت –

دومی نیمگ ءَ بلوچستان ءِ سرکار ءِ جارکش لیاقت شاھوانی ءَ پریس کانفرنس کنان ءَ گُشتگ کہ بلوچستان ءَ کرونا نادراھی برز بیتگ ءُ ناوشیں جاورھال ودی کنگ ءَ اَنت –

لیاقت شاھوانی ءَ گُشتگ کہ کرونا نادراھی بلوچستان ءَ کرونا نادراھی نود ءُ ھشت درسد ءَ جھل کپتگ ءُ نود ءُ چار ءَ سر بیتگ –

لیاقت شاھوانی ءَ گُشتگ کہ گوستگیں دَہ روچانی تہ ءَ بلوچستان ءَ کرونا نادراھی برز بیتگ ءُ چریشی ءَ انگت ءَ مھلوک ویکسن جنگ ءَ کم گندگ ءَ آیگ اَنت –

آئی ءَ گُشتگ کہ بلوچستان ءَ سرکاری دفتر، پکنک پوائنٹس ءُ دگہ پُرکاریانی سر ءَ بندش جنگ بیت اِنت ءُ باید سرجمیں مھلوک وت ءَ داں یک اگست ءَ ویکسن بہ جنائین اِیت –

نبشتانک: ماں اوگانستان ءِ آس ءَ کَے سُچ ایت

ندکار: ماھگُل بلوچ

دی بلوچستان پوسٹ

تالبان ءِ ھلاپ ءَ بیست سال ءِ میان ءَ امریکہ ءُ آئی ءِ باسکاں ماں اوگانستان ءَ اوگان راجی لشکر تیار ءُ اوگانستان ءِ تہ ءَ راجمستری ءِ بُنھِشت ایر کُت انت۔ دومی نیمگے ءَ اوگان راج ھم سرپد اَت کہ بیست سال ءِ مزنیں مُدّتے ءَ امریکہ ءِ وڑیں یک دِیر نشتگیں راجے داں دیر نشت وَ نہ کنت گُڑا باید انت ما وتی راجی جیڑھاں وت گیش ءُ گیوار بہ کن ایں۔ نی بزاں پہ پاکستانی کاسگ چٹّیں اوگان تالبان ءِ پْروش دیگ ءَ اوگان راجی لشکر وَ ھست ءُ پہ تالبان ءِ پْروش دیگ ءَ اوگانستان ءَ امریکہ ءِ ھر سال 3.3 بلین ڈالر پہ جنگی ءُ لشکری زَرکاری ءَ گیش اَنت پمیشکا امریکہ ءَ اوگانستان ءَ گیشیں وھد ءَ نِندگی ھم نہ اَت البت پہ اوگانستان ءِ ایمنی ءَ پروری 2020 ءَ کتر ءِ راجمانی شھر دوھا ءَ امریکہ ءَ یک منّگ نامھے ءِ رِد ءَ اوگان راجمستری سرکار ءُ تالبان ءِ میان ءَ گوں ھمے بے ءَ سُھل ءُ تْرانے بُنگیج کنائینتگ اَنت کہ تالبان راجمستری ءِ مُلکاری گل ءُ تبکے جوڑ بہ بنت۔
اگاں ما ھورت بچار ایں ھمے سُھل ءُ تْران وَ وھد ءِ زیانی ءُ بے آسریں جُھد اَنت کہ دو تبک چہ وتی بُکی لوٹاں پدکِنِزگ ءَ تیار نہ اَنت۔ اوگان راجمستری سرکار ءُ نیکراھی تالب ءِ لوٹ سک گِران اَنت۔ تالبان لوٹ ایت کہ اوگانستان ءَ ماں مئے کارمستِری ءَ نیکراھی شرھیا رھبند بہ بنت ءُ ما شُمارا وتی سرکار ءَ بھرے دے ایں بلے راجمستری اِے چیز ءِ موکل نہ دنت ءُ سُھل ءُ تْران ءِ نِند ءُ نیاد ءَ اوگان راجمستری سرکار ءِ جھگیر گوں تالبان ءَ ھمے لوٹ کنگ ءَ اَنت کہ مئے اوگانستان ءِ رھبند ھم یک سلامی یے پمیشکا ماں میان اُستمانی چاگِرد ءَ اوگانستان ءَ اسلامک ریپبلک آپ اوگانستان ءِ نام ءَ زانگ بیت اگاں شُما اوگانستان ءِ رِد ءُ رھبنداں بدلی یے آرگ لوٹ اِت گُڑا بیا اِت ءُ مُلکاری ءِ تبکے جوڑ بِہ بَہ اِت یا شُما وتی اسلامی رھبند ءَ تیار بِہ کن اِت ءُ مارا بہ دے ات ما ایشی ءَ ھستیں وھد ءِ اوگان رھبنداں ھوار کن ایں۔ بزاں دوئیں تبک ءِ لوٹ سک گِران اَنت ناں کہ اوگان تالبان وت ءَ راجمستری ءِ بھر ءُ تبکے جوڑ کنگ ءَ تیار اِنت ءُ ناں کہ اوگان راجمستری سرکار راج ءِ واھشت ءُ سوڑگ ءِ رَد کنگ لوٹ ایت، بزاں راجمستری پاکستان ءِ کاسگ چٹّیں تالب ءِ دیم ءَ سرجھلی کنگ ءَ ساڑی نہ اِنت۔

دومی نیمگ ءَ گوں امریکہ ءِ درکپگ ءَ پد اوگان تالبان ءَ گوریچی آتراپاں اوگانستان ءِ ولایتانی بازیں دمگ ءُ کوچگے دزگیر کُتگ اَنت البت نی یک یکی ءَ اوگان سربازیں راجی لشکر اوگان تالبان ءَ پْروش دیان ءَ ھمے دمگ ءُ کوچگاں پچ گِران اِنت۔ اگاں ما اوگانستان ءِ نی ئیں اُلسی جنگ ءَ ھورت بچار ایں گُڑا ما سرپد بہ ایں کہ تالبان جنگولی گل ءَ پاکستان ءِ لشکر کُمک کنگ ءَ انت پمیشکا لس اوگان ءُ اوگانستان ءِ سرکاری رھشُون دْراہ اِے جنگ ءَ اوگان راج ءُ پنجابی ءِ میان ءِ جنگے ءِ نام دے اَنت۔ دْراھیں اوگانستان راج سرپد انت کہ اوگانستان ءِ بیرانی، کُشت ءُ کوش ءِ زمہ وار پاکستان انت چریشی ءَ تالبان ءَ اوگانستان ءِ راجدْروہ لیک اَنت۔ بہ گِند ئے پاکستان یک نیمگے وتی کوڑائیں مُلک ءَ دو لمبریں راجمستری ءِ پلہّ مُرزی ءَ کنت، وتی مِلک ءِ تہ ءَ انگت انگریز زمانگ وکیل، جج ءُ آمیدگِس ءُ ھیرامنڈی ءِ وڑیں کھبگ جاھاں جُنزینائین ایت بلے پہ وتی ھمساھِگیں مُلک اوگانستان ءَ شرھیا رھبنداں لوٹ ایت، پہ امریکی ڈالرانی لب ءُ لالچ ءَ ماں بیست سال ءِ جنگ ءَ پاکستان ءَ وت بازیں پاکستانی زیردستیں پشتوان ءُ اوگان تالبان ءِ جنگول کُشائینت انت ءُ بازیں رھشونے دزگِیر کُتگ ءُ امریکہ ءِ دست ءَ داتگ اَنت ئِے ءُ اے دْراھیں کِسّہ پاکستان ءِ گْوستگیں زورانسری ئیں کارمستر جنرل مُشرپ ءَ ماں وتی کتاب “اِن دی لائین آپ پائیر” ءَ نبشتگ اَنت پمیشکا ناں کہ تھنا اوگان تالبان ءِ تہ ءَ بازیں تالبان ءِ جنگول پاکستان ءَ وتی دژمن منّ اَنت بلکیں نی پاکستان ءِ تہ ءَ ھم پا کستانی تالبان ودی بیتگ ءُ تالبانائیزیشن ءِ آشوب ھم ھست اَنت کہ ٹی ٹی پی ءِ نام ءِ زانگ بنت ءُ ایشی ءِ بُنکی لوٹ، مول ءُ مُراد پاکستان ءِ رھبند ءُ بیرک بدل کنگی اَنت ءُ پاکستان ءَ ھم اوگانستان ءِ وڑ ءَ شرھیا رھبند آرگ بہ بنت ءُ پاکستان ءُ ٹی ٹی پی ءِ بیست سال ءِ جنگ ءُ بے کساسیں دْروگیں جنگی آپریشناں گیشتر لس پشتوں راج بیرانی ءِ آماچ کُت ءُ ھمے بیرانی ءِ آسر ءَ پی ٹی ایم ءِ وڑیں آشوبی گل دیم ءَ آتکگ ءُ گل ھان ءِ وڑیں بازیں پاکستان ءِ رَدیں مھر ءِ مجگی نادْراہ ھم دْراہ ئِے کنائینتگ اَنت۔

مسکرائی گپ ایش انت کہ داں بیست سال ءَ پاکستانی کوڑائیں رسانکدر ءُ وزیر یکشل ءَ ھندوستان ءَ بھتام جنگ ءَ اِت اَنت کہ پاکستان ءِ ھلاپ ءَ ٹی ٹی پی ءَ ھندوستان ءُ اسرائیل جنگی ءُ زرکاری کُمک کنگ ءَ انت، دیم ءَ ھم ھمے گْوشگ ءَ اِت اَنت کہ ٹی ٹی پی ءُ اوگان جُتا جُتائیں گل اَنت پمیشکا وھدے کہ اوگانستان ءِ تہ ءَ اوگان تالبان ءِ سرکار اڈ بیت گُڑا ٹی ٹی پی ءُ بلوچ راجی آجوئی ءِ لوٹوکیں سِلاھبندیں گل ھم ھلاس بنت ءُ پاکستان ءَ ایمنی ودی بیت بلے 15 جون ءَ پاکستانی چیریں ترامگیجاں وتی مُلکاراں “اوگانستان ءِ جیڑہ، اوگان اُلسی جنگ ءُ آئی ءِ سان” ءِ بابت ءَ یک جارکشّی نِند ءُ نیادے اڈ کُت ءُ اود ءَ پاکستانی لشکر ءِ سروک ءُ چیریں ترامگیجانی واجکاراں وتی مُلکاراں اوگان جیڑہ بابت ءَ بازیں سرپدی یے دات، پاکستانی چیریں ترامگیجانی رِد ءَ پاکستانی تالبان ءُ اوگان تالبان ءِ جنگولی گل یک اَنت۔

اوگان تالبان ءِ ھلاپ ءَ امریکہ ءِ بیست سال ءِ جنگ ءَ پاکستان وت امریکہ ءِ جنگی باسکے بوتگ ءُ بازیں اوگان تالبان ءِ رھُشونے پاکستان ءَ پہ ڈالر ءِ لالچ ءَ وت کُشتگ اَنت ءُ بازینے دزگِیر کُت ءُ امریکہ ءِ دست ءَ داتگ انت کہ آیاں وتی زِند ءِ مزنیں بھرے ماں امریکی آزارجاھاں گْوازینتگ اَنت۔ دیم ءَ گْوشگ بیتگ کہ اوگان تالبان رھشُون پاکستانی لشکر ءِ وڑ ءَ مُناپِک نہ انت کہ یک نیمگے ءَ ما پہ وتی مُلک ءَ دْروگیں راجمستری یے پلہّ مُرز ایں ءُ دومی نیمگ ءَ اوگانستان ءَ اسلامی شرھیا ءِ سوج ءَ دے ایں پمیشکا اگاں اوگانستان ءِ تہ ءَ اوگان تالبان اسلامی شرھیا ءِ رھبندانی اڈکنگ ءَ سوبین بیتگ اَنت گُڑا الکائدہ ءُ اوگان تالبان ٹی ٹی پی ءَ ھم دلبڈی دے اَنت کہ پاکستان ءِ تہ ءَ ھم شرھیا رھبند بہ بنت ءُ چوناھا تھریک لبیک ءِ وڑیں گل پہ اسلامی شرھیا ءِ رھبندانی اڈکنگ ءَ بس یک موھے ءِ وداریگ اَنت۔

پاکستانی لشکر ءُ چیریں ترامگیجانی اے درشانی ءِ ھرکس ھبکّہ ءُ ھیران اَت کہ چہ امریکہ ءِ روگ ءَ پد ماں اوگانستان ءَ توری اُلسی جنگے بہ بیت، توری اوگان تالبان باج بر اَنت ءُ اوگانستان ءِ تہ ءِ شرھیا رھبنداں اڈ بہ کن اَنت یا توری اوگان تالبان ماں جنگ ءَ پْروش بہ وارت بزاں پاکستان ھر وڑ ءَ تاوان گِند ایت بلکیں پاکستانءِ تہ ءِ بلاھیں بیرانی ودی بنت۔
اگاں ما 17 جولائی ءِ داسو ڈیم ءِ ویل ءَ بچار ایں کہ اود ءَ چینی انجینئرانی سر ءَ یک ٹوھیں وتکُشی اُرشے بوت چریشی ءَ نو چینی انجینئر بیران بوتگ ءُ پانزدہ گیشی ءَ ٹپّی بوتگ اَنت ءُ اے اُرش ءَ پد چین ءَ پاکستان ءِ تہ ءَ سی پیک ءَ ھوار وتی بازیں کار ئِے بند کُتگ اَنت ءُ پاکستانی پوریاگِراں موکل داتگ اَنت ئِے۔ ایشی ءَ ابید چینی ءِ سرکاری روتاک ءُ تندجاہ گلوبل ٹائمز ءُ رِد ءَ چین ءِ پاکستان ءَ اے بیھار ھم داتگ کہ اگاں پاکستان چینی کُشکاں سزا نہ دنت گُڑا چین وت پاکستان ءِ تہ ءَ ناشرکارانی سر ءَ مزائیلانی اُرشاں کنت۔

دومی اسلام آباد ءِ سک باز پھریزی دمک پیڈرل بیلو ایریا ءَ اوگان ڈنّی کارانی رھُشون واجہ نجیب اُلہ کیل ءِ نودربریں جنیں چُکّ بانُک سِلسلہ کیل ءِ آوارجنی، لٹ شاپی ءُ کم شرپی ءِ ویل ءَ اوگان راج ءِ لس مھلوک، آزات ھیالیں رھشُوناں ھوار اوگان تالبان ءِ مستریں رھشُون ھم زھر داتگ۔ واجہ اشرپ گنی ءِ سرکار ءَ اے ویل تْرُندی ءَ ایرجنان ءَ پاکستان ءِ تہ ءَ وتی ڈنّی کارانی رھشُون ءَ پاکستان ءِ یلہ کنگ ءُ اوگانستان ءِ آیگ ءِ پرمان دات۔ اوگان تالبان ءِ رھشُون واجہ ابدلسلام زیپ ءَ پاکستانی پندلاں پِٹ دیان ءَ گْوشت “پنجابی ءِ دست ءَ بانُک سلسلہ ءِ کم شرپی ءَ تُرندی ءَ ایرجن ایں بلکیں پنجابی ءِ دست ءَ اے تیوگیں اوگان راج ءِ کم شرپی یے ما بے ھال مہ بَہ ایں کہ واجہ مُلا ابدلسلام زیپ 1996-2001 ءَ پاکستان ءِ تہ ءَ اوگان ڈنّی کارانی رھشُون اَت ءُ 9/11 ءِ ویل ءَ رند پاکستانی لشکر ءَ پہ ڈالر ءِ لالچ ءَ واجہ دزگِیر کُتگ ءُ امریکہ ءِ دست ءَ داتگ ءُ پد ءَ گوتاناموبے ءِ وڑیں بدنامیں آزارجاہ ءَ امریکہ لشکر ءِ لٹ شاپی ءُ آزارھی ءِ آماچ بیتگ۔ وتی آجوئی ءَ واجہ ءَ وتی کتاب “ما لائیپ ود تالبان” ءِ تہ ءَ پاکستانی لشکر ءِ بابت نبشتگ “یکیں دپ ءَ ایشانی دو زَبان اَنت، یک سگر ءَ ایشانی دو دیم اَنت پمیشکا اِے پہ ھر یک ءِ پلہّ مُرزی ءَ گپ کن اَنت، ھر کس ءَ کارمرز ھم کن اَنت ءُ ھر کس ءَ دْروہ ھم کن اَنت” چمیشکا ما گْوش ایں اوگان تالبان ءِ بازیں تبک ءُ رھشُونے پاکستان ءِ رَدیں سوج ءُ پنتاں نہ منّ ایت ءُ پاکستان ءِ ھلاپ ٹی ٹی پی ءَ کُمک کن اَنت۔

اوگان تھی کارانی کارگس ءَ جار جت ءُ گْوشت “ما اوگان انگت ءَ زِندگ ایں ءُ چہ پنجابی ءَ بانُک سِلسلہ ءِ بیر ءَ یک پہ دھی ءَ گِر ایں ھمے ویل ءِ ھلاپ ءَ کابُل ءُ اوگانستان ءِ دِگہ مستریں شھراں اوگان راج ءَ پاکستانی چیریں ترامگیجانی ھلاپ ءَ تُرندیں زھرشانی کُتگ اَنت چریشی ءَ اوگانستان ءِ تہ ءِ پاکستان ءَ ھلاپ ءَ زھر، کست َ کینگے ودی بوتگ۔

اگاں ما پاکستان ءِ سر ءَ چین ءُ اوگانستان ءِ اے بْرانز ءُ زھر مار ایں، پد ءَ پاکستانی لشکر ءِ سر ءَ ھمُک روچ پاکستانی تالبان ءِ تْرُندیں اُرشاں پرّیچ ایں گُڑا سرپد بَہ ایں کہ نوکیں چیزے ھست۔ چہ اِے وڑیں ویل ءُ جیڑہ یکشل ءَ پاکستان ءِ تہ ءَ تُرندی ءَ بوُان اَنت چریشی ءَ اِے زانگ بیت کہ جاورال ھر وڑ ءَ بہ بنت بیرانی ءِ دیمی لمبر پاکستان ئیگ انت، بزاں اگاں ما اوگانستان ءِ ھستیں وھدی آس ءِ تک ءُ پھناتاں ھورت بہ چار ایں گُڑا انچوش لگ ایت کہ ماں اِے آس ءَ تھنا پاکستان سُچ ایت ءُ اِے آس ءِ آسر ءَ بلوچ راجی رھشُوناں ھم پہ وتی راجی سیت ءُ پائدگ ءَ یکمُشت ءُ لھتیں سوڑگ کنگ لوٹ ایت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ بلوچستان ءِ تیابدپی شھر گوادر ءَ آپ نہ بوگ ءِ سر ءَ مھلوک ءَ زھرشانی، زالبولاں دگ بند کرتگ –

زھرشانی گوادر ءِ شھر ءِ تہ ءَ بلال مسیت ءِ دیم ءَ بندات بیتگ اود ءَ مھلوک ءَ دگ بند کرتگ ءُ دگ ءِ سر ءَ ٹائر مانداشتگ –

مھلوک ءِ گوشگ اِنت کہ مئے گور ءَ ترمپ ءِ آپ پہ ورگ ءَ نیست اِنت ءُ واکدارانی گوشاں مورے ھم نہ وارت اِنت –

زانگ بہ بیت گوادر ءَ ھوار گوادر ءِ کَش ءُ گور جیونی، پسنی ءُ اورماڑہ ءَ ھم بازیں وھداں آپ ءُ دگہ زند ءِ جنجالانی سر ءَ زھرشانی کنگ ءَ اَنت –

گوادر ءِ بارو ءَ سرکاری ٹاہ برز اَنت ءُ گوادر ءِ بارو ءَ گوشگ بیت اِنت گوادر ءَ بلوچستان ءِ دیمروئی ءِ کار بیگ ءَ اَنت –

گوادر ءِ مھلوک ءِ لوٹ اِنت کہ مارا مئے زند ءِ آسراتی دیگ بہ بنت ءُ سرکاری واکدار اے درگت ءَ ھچ وڑیں گامگیج ءِ زورگ ءَ گندگ بیگ ءَ نہ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ءُ ھزار سَے سد ءُ ھشتاد ءُ سَے روچ سرجم بوتگ – شال سول سوسائیٹی ءَ بنجل ءِ تر ءُ تاب کرتگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ اے دمگانی بدل بؤکیں جاور ھالانی ھمراھی ءَ بلوچستان ءِ تہ ءَ پاکستانی پوج ءِ زوراکی ھمک روچ گیش بوان انت مدامی ءِ روچ ھمے زوراکیاں گوں ایر رؤت ھر ھمک آؤکیں روچ بلوچانی چکچینی ءِ بندات بیت – زورانسری آوارجنی ھمک روچ گیشی ءِ گون ءَ بوگ ءَ انت ءُ پوجی لشکر کشی ءِ نام ءَ زوراکی ءُ بمبگواریاں زلم ءُ زوراکی ءِ یک نوکیں کسہ ءِ نبیستگ –

ماما قدیر بلوچ ءِ گوشگ ات کہ ھر ھما وھد ءَ کہ پاکستان ءِ مزنیں اگدہ دارے بلوچستان ءِ تر ءُ تاب ءَ کنت گڑا ما گندیں بلوچستان ءِ تہ ءَ لشکرکشی گیش کنگ بیت انت پاکستان ءِ وزیرآعظم ءِ تر ءُ تاب ءَ پد ھم ھمے وڑ ءَ بلوچستان گندگ بوگ ءَ انت –

ماما قدیر بلوچ ءِ گوشگ ات کہ لشکر کشیانی تہ ءَ پاکستانی پوج ءُ چیریں ادارھاں پیش ءَ بندیگ ءُ بیگواھیں مردم دروگیں میڑ ءِ نام ءَ کُشتگ انت ءُ اے ھما بجن بکوش چگل دے پالیسی انت کہ پیش ءَ بندیگیں مردم لٹ ءُ کٹ کنگ کُشگ بوتگ انت نوں دروگیں میڑ ءِ نام ءَ کُشگ بوگ انت کار ھما پیشی انت بس دروشم مٹینگ بیتگ اَنت –