TBP Balochi

بلوچستان ءِ دمگ مستونگ ءَ سی ٹی ڈی ءَ نھ مردم کُشگ ءِ ٹاہ داتگ۔ سی ٹی ڈی ءِ رد ءَ کُشگ بیتگیں مردمانی سیادی گوں بلوچ سلاہ بندیں گل بی ایل اے ءُ بی ایل ایف ءَ گون اِنت۔

سی ٹی ڈی ءِ جارکش ءِ ردءَ مستونگ ءِ ھند روشی ءَ سی ٹی ڈی ءَ ھمے مردمانی درگت ءَ ھال رسگ ءَ پد بیڑ بُرتگ کہ آودہ تیر گواری ءِ سوب ءَ نھ مردم کُشگ بیتگ اَنت۔

سی ٹی ڈی ءِ جارکش ءِ ردءَ بیڑ ءِ نیام ءَ سلاہ، بمب ءُ شورو ھم دزگیر کنگ بیتگ اَنت۔

جارکش ءِ رد ءَ دزگیر کُتگیں سلاھانی تہ ءَ 9 کلاشنکوف، 20 سیر تراکناکیں شورو، پرائما کارڈ، ڈیٹونیٹر، آر پی جی راکٹ ءُ دو گولہ ھوار اَنت۔

بلے داں انگت سی ٹی ڈی ءَ کُشگ بیتگیں مردمانی پجار دیما نیاورتگ۔

زانگ بہ بیت کہ سی ٹی ڈی ءَ گوست ءَ ھم انچیں ٹاہ داتگ بلے رندءَ کُشگ بیتگیں مردمانی پیسرءَ چہ بیگواھیں مردمانی دروشم ءَ بیتگ۔

سی ٹی ڈی ءَ اگست ءِ ماہ ءَ ھمے پئیم ءَ بلوچ آجوئی لوٹوکیں سلاہ بندیں گل بی ایل ایف ءَ سیادی داروکیں مردمانی کُشگ ءِ ٹاہ داتگ اَت۔

بلے رند ءَ درستیں مردمانی پجار بیگواھیں مردمانی ھساب ءَ بیتگ اَت کہ اشانی تہ ءَ دو ءِ پجار پروم ءِ جھمنندانی دروشم ءَ بیتگ اَت کہ اشانی تہءَ یکے عبدالحامد ء رستم پروم پنجگور اَت۔

کھول ءَ دی بلوچستان پوسٹ ءَ گپ کنان ءَ اے گپ راست کُتگ۔

کھول ءَ اے گپ راست کنان ءَ گُشتگ کہ عبدالحامد لشکریاں ھمے سال ءَ جنوری ءَ لوگ ءَ بیڑ بُرتگ ءُ دزگیر کُتگ ءُ بیگواہ کُتگ ءُ گوستگیں روچاں دروگیں میڑ ءَ کُشتگ وھدیکہ کھو گُشگ بیتگ کہ بیا اِت ءُ جون ءَ بر اِت۔

وھدیکہ دگہ یکے ءِ پجار عمران ء منیر جھمنند پروم ءِ نام ءَ بیتگ اَت کہ آ ھم چہ پیش ءَ بیگواہ بیتگ۔

اگست ءَ دروگیں میڑءَ کُشگ بیتگیں صدام حسین ءِ گھار ءَ یک تامری کلہو ءِ شنگ کنان ءَ گشتگ اَت کہ سی ٹی ڈی ءِ دروگیں میڑءَ کُشگ بیتگیں صدام حسین 27 اپریل 2018 ءَ چہ کراچی ملیر ءَ ھما وھدءَ بیگواہ کنگ بیتگ وھدے آ چہ دبئی ءَ ملک ءَ وتی موکلانی گوازینگ ءَ اتکگ بیتگ۔

صدام حسین ءِ ھمراھی ءَ سی ٹی ڈی ءِ دروگیں میڑ ءَ کُشگ بیتگیں غنی بلوچ ھم پیسرءَ چہ دزگیر کنگ بیتگ اَت ءُ سی ٹی ڈی ٹاہ رد بیتگ اَنت۔

چہ کراچی ءَ بلوچ پھناتاں بلوچ اسٹوڈنٹس ایکشن کمیٹی کراچی ھنکین ءِ نیمگ ءَ گل ءِ سروک ڈاکٹر صبیحہ بلوچ ءِ برات شاہ میر ءُ آئی ءِ ناکو زھگ مرتضیٰ ءِ بیگواھی ءِ ھلاپ ءَ کشگ بوکیں زھرشانی روانک ءِ درگت ءَ پمفلیٹ “پنتاک ” بھر ءُ بانگ کنگ بیتگ اَنت –

پنتاک گوستگیں روچ ءَ کراچی ءَ بلوچ پھنات لیاری ءُ ملیر ءَ شنگ کنگ بیتگ اَنت پنتاک ءَ زھرشانی ءَ بھر زورگ ءِ دزبندی کنگ بیتگ اَنت –

شاھمیر ءُ مرتضیٰ ءِ بیگواھی ءِ ھلاپ ءَ بلوچ ایکشن کمیٹی ءَ گشتگ کہ باندا بزاں بیست ءُ چار اکتوبر ءَ یکشمبے ءِ روچ ءَ ساھت ءِ سَے ءُ نیم ءَ ماں کراچی ءَ آرٹ کونسل ءَ بہ گر داں پریس کلب ءِ دیم ءَ یک زھرشانی روانکے ءِ کشگ ءِ جار جتگ –

آئی ءَ گشتگ کہ دراھیں تکاں گوں بندوکیں مردم اے روانک ءَ بھر بہ زور اَنت ءُ گل ءِ سروک ءِ برات ءُ آئی ءِ ناکو زھگ ءِ یل کنائینگ ءَ وتی کرد ءَ پیلو بہ کن اَںت-

روانک ءِ درگت ءَ چاگردی رسانکجاھاں یکشل ءَ تامر بندانی دروشم ءَ تامر شنگ ءُ تالان بیگ ءَ اَنت ءَ گوشگ اِنت کہ دراھیں مردم اے روانک ءَ بھر زور اَنت ءُ وتی کرد ءَ پیلو بہ کن اَنت –

زانگ بہ بیت بلوچستان ءَ اے وھد ءَ بازیں ھسابے ءَ مردم گار ءُ بیگواہ اَنت کہ آیانی بیگواھی ءِ بھتاماں پاکستانی پوج ءُ چیریں ادارھانی سر ءَ لڈگ ءَ اَنت ءُ تنی وھدی بازیں ھسابے ءَ بیگواھیں مردمانی لاش ھم وھد وھد ءِ سر ءَ بلوچستان ءِ جتا جتائیں جاھاں دزکپتگ اَنت –

آل پارٹیز کیچ ءِ جارکش ءَ وتی یک درشانے ءِ تہ ءَ گْوشتگ کہ چیزے ماہ ءَ ساری پاکستانی پوج ءِ بندیگجاہ ءَ لَٹ ءُ کٹاں چہ بیران بوتگیں کونشکلات تمپ ءِ جھمنندیں گھرام بلوچ ءِ کھول ءَ تنگ ءُ دلسیاہ کنگ ءَ اَنت-

آل پارٹیز ءَ دلپدرد درشان کتگ ءُ گْوشتگ کہ پاکستانی پوج ءِ کارندہ گھرام بلوچ ءِ کھول ءَ بیھار دیگ ءَ اَنت کہ آ یک نبشتانکے نبشتہ بہ کن اَنت کہ آئی ءِ مرگ چہ نادُراھی ءَ بوتگ –

جارکش ءَ گْوشتگ ھکومتی ادارھانی نیمگ ءَ پرایمنیں شھری ءُ شھیدانی کھول ءِ تنگ ءُ دلسیاہ کنگ ءَ یکشلہ برجاہ ءَ اِنت آ دلپدردناک اَنت ءُ ایر جن ایں-

آئی ءَ گْوشتگ کہ جاور اگاں اے وڑ ءَ اَنت گُڑا گمان اِنت جاور روچ پہ روچ ھرابتر بنت ءُ آئی ءِ زمہ وار ھکومت ءُ آئی ءِ ادارھانی سر ءَ کنگ بنت-

گُڈی ءَ جارکش ءَ گْوشتگ کہ آل پارٹیز کیچ وتی راج ءِ ھمکوپگ اِنت اگاں بے کانون ءُ راھبندی ءِ وڑ ءُ پیم راج ءَ تنگ ءُ دلسیاہ کنگ بوت گُڑا آل کیچ زھرشانی کنت-

بلوچستان ءِ دمگ کوھلو ءِ دمگ کاھان ءَ پاکستانی پوج ءَ گوستگیں روچ ءَ پنچ مردم آوار جنگ ءَ پد بیگواہ کنگ بوتگ اَنت-

دمگی مردماں گوں ٹی بی پی ءَ گوں تران کنان ءَ گْوشتگ کہ کاھان دمگ پیشی ءَ گوستگیں روچ ءَ پاکستانی پوج ءِ کارندھاں گوں ھمراہ ڈیتھ اسکواڈ کارندھاں لوگانی سر ءَ بیڑبرتگ ءُ پنچ مردم زورانسری آوار جتگ ءُ بیگواہ کتگ اَنت-

زورانسری آوار جن بوتگیں مردمانی تہ ءَ بخش علی ءِ سے چُک بابو ، بیڑا ءُ وڈو ھوار اَنت وھدے کہ دگہ دو مردمانی پجّار انگت نہ بوتگ اَنت – آوار جنگ بوتگیں سرجمیں مردم گوں مالداری ءَ چہ سیادی دار اَنت –

دمگی مردمانی گوشگ اِنت کہ گوستگیں بازیں ماھاں زورانسری آوار جنی ءِ وئیل دیم ءَ آیگ ءَ اَنت وھدے کہ مردم پوج ءِ بُنجل ءَ ساڑی بوَگ ءِ پابند کتگ اَنت-

ھمے دمگ ءَ اے سال ءَ اپریل ماہ ءَ پاکستانی پوج ءِ کارندھاں تیرگواری ءَ چہ دو مردم بیران بوتگ اَنت، بیران بوتگیں مردمانی پجّار جندو ءُ ولی داد ءِ ناماں چہ بوتگ اَنت وھدے کہ ٹپی بوتگیں مردم ءِ پجّار غلائند ء جندو نام ءَ چہ بوتگ کہ آ پوج ءَ گوں ٹپی جاوراں دزگیر کتگ ءُ ناشناسیں جاھے ءَ برتگ تنی وھدے بیگواہ ءَ اِنت-

دگہ یک وئیلے اپریل ماہ ءَ بیگواہ کنگ بوتگیں علی بیگ سی ٹی ڈی ءَ دروگیں میرے ءِ نام مارواڑ ءِ ھند ءَ کشتگ وھدے کہ اشی ءِ ھمراھی ءَ بیگواھیں جلالو ء نذر خان ءُ علی بیگ ءِ چُک انگت بیگواہ ءَ اَنت-

بلوچستان ءَ زورانسری آوار جنی یکشل ءَ گوستگیں دو کربان گیش برجاہ ءَ اِنت زورانسری بیگواھیں کنگ بوتگیں مردماں دروگیں میڑ ءَ کُشگ ءِ وئیل ءِ تہ ءَ گیشی آیگ ءَ پد کھول تُرس آماچی ءِ تہ ءَ گیشی اَتکگ-

پنجگور ءَ ڈپٹی کمشنر پنجگور عبدالرزاق ساسولی ءَ اسٹنٹ کمشنر گوارگو برکت علی بلوچ ءِ ھواری ءَ یک پریس کانفرنس کنان ءَ گوشتگ کہ نواز ءِ کوش ءَ ھواریں دو جرمکار دزگیر کرتگ اَنت –

ڈپٹی کمشنر ءَ گشتگ کہ پنجگور ءِ دمگ رخشان کریچی ءِ جھمنندیں نواز عبدالمالک گوستگیں روچ ءَ دُزاں آئی ءِ سر ءَ بیڑ برتگ ءُ آ تیرگواری کرتگ ءُ کشتگ اش ءُ آئی ءِ گاڑی گون وت اش برتگ –

آئی ءَ گشتگ کہ گوستگیں روچاں یک ایرانی گاڑی ءُ آئی ءِ واھند ءِ ھال دمگی مردماں نبشتگ کنائینتگ ءُ چریشی ءَ پد لیویز کارمنداں پٹ ءُ پول کرتگ ءُ مروچی آئی ءِ لاش دزکپتگ ءُ چریشی ءِ ھلاپ ءَ بیڑ بران ءَ پنجگور چتکان ءَ جرمکار صادق علی ءُ جلیل احمد دزگیر کرتگ اَنت –

آئہ ءَ گشتگ کہ جرمکارانی گور ءَ یک جمنی گاڑی ءُ یک نائن ایم ایم پسٹلے دزکپتگ اَنت ءُ دزاں نواز ء عبدالمالک گوں زمباد ءِ ھمراھی ءَ برتگ ءُ پد ءَ آ تیر جتگ ءُ کشتگ ءُ آئی ءِ لاش کور ءَ چگل داتگ دو روچاں پد آئی ءِ لاش دزکپتگ –

زانگ بہ بیت پنجگور ءَ گوستگیں لھتے ماھانی تہ ءَ سِی مردم ءَ گیش کُشگ بیتگ اَنت کہ ءُ آیانی گیشتریں بھتاماں سرکاری پلامرزی ءَ جوڑ بیتگیں ڈیتھ اسکواڈ ءِ سر ءَ جنگ ءَ اَنت-

گوستگیں روچاں پنجگور ءَ ناوشیں جاورانی ھلاپ ءَ زھرشانی ءَ ھم مھلوک گندگ ءَ اتکگ اَنت ءُ مھلوک ءِ گوشگ اِنت کہ پنجگور ءَ کُشت ءُ کوش روچ ء رھمانی بیگ ءَ اَنت انتزامیہ بس مردمانی کوشانی ندارگ ءَ چارگ ءَ اَنت –

سر بیتگیں ھالانی رد ءَ بلوچستان ءِ دمگ بولان ءَ سلاہ بندیں مردماں پاکستانی لشکر ءِ سر ءَ اُرش کرتگ، اُرش ءَ پوج ءَ جانی ءُ مالی تاوانانی دیمپانی کنگ کپتگ –

دومی نیمگ ءَ بلوچ لبریشن آرمی ءِ جارکش جیئند بلوچ ءَ اے اُرش ءِ زمہ واری منّ اِتگ ءُ گوشتگ کہ سرمچاراں مروچی آدینگ ءِ روچ ءَ بولان ءِ دمگ شاھرگ ءَ آپ برگ ءِ ھاتر ءَ یکجاہ بؤکیں پاکستانی پوج ءِ پیادگیں کارندہ چیرکتگیں شورواں گوں نشانگ کتگ اَنت –

شاھرگ ءَ کچھی کوھی ھند ءَ بوتگیں اُرش ءِ آسر ءَ دُژمنیں پوج ءِ دو کارندہ ھما دمان ءَ مرتگ اَنت وھدے کہ دو ٹپی بوتگ اَنت-

جارکش جیئند بلوچ ءَ گوشتگ کہ اے اُرش ءِ زمہ واری ءَ مئے گل بلوچ لبریشن آرمی منّ اِیت ءُ داں بلوچستان ءِ وتواجھی ءَ زورگریں پوج ءِ سر ءَ مئے اُرش یکشلہ برجاہ بنت-

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار چار سد ءُ ھپتاد ءُ یک روچ سرجم بوتگ۔ نیشنل پاٹی ءِ بنجاھی رھشون شمع اسحاق، عبدالغفار قمبرانی ءُ دگہ مردماں بنجل ءَ اتکگ ءُ دلپدردی درشانتگ۔

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ زورانسری آوارجنی ءُ بیگواھی ءُ مروچاں ھر دمگ ءَ ژانگولیں جونانی دست کپگ ناشرکاری ءِ ھنچیں نکش اَنت کہ آ بس بلوچ ءِ پُرایمنیں جھد ءِ سوبمندی ءُ بیگواھیں مردمانی یل بوھگ ءُ گلامی ءَ چہ رکگ ءَ پد ھلاس بیت۔

پہ تُرسینگ ءَ گلامی باز دیراں رو نہ کنت پرچاکہ زیردستانی تہءِ تُرس دربئیت گُڑا زالم زانت کہ مار ءَ مرگ ءِ تُرس نیست آ کجام پندل ءُ ھنراں بہ سازیت۔ بلے بلوچ پُرایمنیں جھد ءِ سر ءَ سِتک داریت ءُ پگری ھمگرنچی ءَ اے تاکتور وتی سامراجی لٹ پُل نزام ءَ برجم دارگے ءُ بلوچانی جُھد ءَ پہ تاکت نزور ءُ ھلاس کنگے کوشش بے سوب بوھگے تُرس ءَ آ تہ ءَ چہ ھلاس کتگ ھمے ھاتر ءَ ناشرکاری ءِ تہ ءَ دو ھمینچو گیشی آرگ بیت ءُ رستری زلم زوراکی ءِ چدوگیشتر کنگ بیت۔

ماما قدیر بلوچ ءِ گُشگ ات کہ یک باکردیں مردمے زند ءِ ھاتر ءَ رژن ءُ آئی ءِ مرگ راجدپتر ءِ تہءَ وتی رھبندانی ھاتر ءَ سنگ میل ءُ روکیں چراگ ءِ جوڑ بیت اِنت پرچاکہ یک راستیں مردمے ھما راہ ءَ گچین نہ کنت کہ مزدانک بہ بیت بلکیں ھما راہ ءَ گچین کنت کہ آئی ءَ پرز ءِ ادا کنگ بہ بیت ھمے کرد پیلو کنوکیں مردمانی کرد اَنت کہ باند ءَ کانود جوڈ بنت ۔

مرگ ءَ پیش آئی زند ءَ درساں گیش پرارزشتی آئی جھد ءَ گوں وپاداری اِنت۔

سربوتگیں ھالانی رِد ءَ بلوچستان ءِ دمگ ھزار گنجی ءُ چاگی ءَ تیر گواریاں دو مردم بیران یکے زدگ بوتگ، ژوب ءَ دگ ءِ وئیل ءَ ورنایے بیران وھدیکہ ھب ءَ یک مردمے ءِ جون دست کپتگ –

گیشیں ھالانی رِد ءَ چاگی ءِ دمگ عامری ءَ تیرگواری ءَ دو مردم بیران بوتگ – تیرگواری وئیل گوستگیں شپ ءِ ادار سَے ءَ عامری ءِ ھند اوکی ءَ بوتگ چریشی ءَ جان محمد ءُ فقیر محمد بیران بوتگ انت ھردو مردم اوکی ءِ جھمنند انت – پولیس ءِ رِد ءَ وئیل ءِ درگت ءَ سَے ٹیم جوڑ کرتگ پٹ ءُ پول کنگ بوگ ءَ انت –

ھمے وڑ ھزار گنجی ءَ دو ٹولیانی میان ءَ جنگ چوپ ءَ چِل ءُ پنچ سالی مردم ءِ ٹپی بوتگ – ٹپی بوتگیں مردم ءِ پجار حاجی شاہ محمد ء ملگ بنگلزئی ءِ نام ءَ بوتگ – ریسکیو آ چست کتگ ءُ نادراھجاہ ءَ سر کتگ –

دگہ وئیل ءِ ژوب ءَ دیم ءَ اتکگ کہ ژوب ءِ شھدگ ءِ سر ءَ ٹریکٹر ءُ پرپٹے ءَ ڈیک وارتگ چریشی ءَ پرپٹ سواریں ورناہ بیران بوتگ – ورنا ءِ پجار دنیگت ءَ کنگ نبوتگ –

دومی نیمگ ءَ بلوچستان ءِ کاروباری شھر حب ءَ یک مردمے ءِ جون دست کپتگ – جون آر سی ڈی شھدگ ءَ برجاھیں باب بلوچستان ءِ تھی نیمگ ءَ دست کپتگ – جون نادراھجاہ ءَ سرکنگ بوتگ دنیگت ءَ آئی ءِ پجار کنگ نہ بوتگ – اے ھم دنیگت ءَ گوشگ نبوتگ کہ مرگ سوب چی انت –

نبشتانک: تَرا چہ پیسر کشک ھلاس بہ بیت

نبشتہ کار: لطیف سکی

دی بلوچستان پوسٹ

گش انت کہ زند ءِ پیچ ءُ تاباں مردم بازیں دَرد ءُ ترس تژن بھتام اڈ ءُ جنجال بُگز ءُ کینگ مارشت ھیال ءُ اَبِکّھیں کسہ مردم ءِ چکاساں ودی کن انت۔ مردم اے سرکیلانی تہ ءِ چو تلامبیں جون ءَ وت ءَ آپ ءِ بنشون ءَ سرکنت ءُ چو تاک ءِ پیم ءَ اسر جنان بیت ءُ درکیت برے آئی ءِ ھیال چو بن بستگیں اکساں دیوالاں اڑینگ بیت ءُ برے اے ھیال موجر بنت ءُ دیم ءَ چَکر انت تئی نیمونیں ھیال پہ الھان ء وت ءَ ساڑ ءَ انت مردم ءَ ھنچو گُمان بیت تاسے آپ ءِ تہ ءَ موریکیں تکانسری پاد جَنت ءُ مِر اِیت ءُ پہ دیمیں سَرجنگاں ۔ھمے دابیں کسّھاں مَردم پَٹ ءُ ھنڈ کنت وت ءَ بشون ءِ ایت دل ءِ تکانسریں درداں بہ موک اِیت۔ بلے مردم ءُ زند ءِ تہ ءَ بازیں وھد ءَ آئی ءِ جند ءِ تاپتگیں اکس چو دَریگ ءِ ندارگیں ساھتاں کرار بند انت ھر پیم پاس ءَ گوں اے دریگ ءَ ندارگاں شَھار دے آدم ءَ ھمے گُمان بیت کہ آئی ءِ زند ءِ کسہ چو رُدومیں اھدے گونڈو ءَ ساد جَنت بے تاھیریں زند ءِ ھیالاں پہ دام ایر بوجیت ءُ کسّھاں آسر کنت ۔بلے ! اے زند ءِ چاریں نیمگ مردم ءَ چو بے تاھیر ءُ تستگیں بودکاماں شھار پَرما اَنت مَردم ءَ ھنچو سماہ بیت کہ زندگیں بنی آدم گُٹ گیری ءِ ساداں بستگ ءُ کور چاتے ءَ چَگل داتگیں ڈوک ءِ رھسراں ایر بوتگ ھیال ءُ نہ جیڑ اِتگیں کسّہ پہ ھَبکھَے بیا انت دیم ءَ درانز بہ بنت ھنچو گمان بیت تو نوک ھندے ءَ سَر بیتگیں بنی آدمانی لوٹ بوتگیں مَردمے ترا اے چاریں نیمگ ءَ کِشک ءِ وتسریں کچک چو اجبیں داباں چار انت مردم ءَ ھمے سمارگ دیم ءَ کیت وھدے آئی ءِ پادانی گڈی تستگیں ھند انت پہ مُدامی ابدمان بوگ ءَ اے کشک ءِ مساپرانی رَم ءَ جند ءِ ھند ءَ سَربیتگ اے ھیالانی تہ ءَ مَردم باز سَرچکیں کشک ءَ پند بُرّ اتگیں راھاں اتکگ ءُ آئی ءِ لوٹ بوتگ من باز ودار بکن آں۔ بلے اے کشک ءَ ڈوک ءُ بازیں سیمسرانی ارجان گپتگیں سکی ءُ سوری دیمپان کنگ بیتگ انت اے راہ ءِ مساپِرانی یک چیدگے رَمت بوتگ ءُ اھد ءِ دستاں پہ گُمانی ایر کپتگ ءُ رھادگ بوتگ انگت راہ ءِ مساپر پہ ابدمانیں روانسریں کشک ءَ چو دمبرتگیں ھَر ءِ بستار ءَ گندگ بوتگ انت ھنچو گمان بیتگ برے برے دل ءِ تیلانک ءَ چم ءِ کنڈ ءَ پِر اِتگ ءُ تستگیں آہ ءِ کشگ ءَ مردم ءَ باز بچار کتگ ۔

مَن اے تستگیں مساپرانی اھد ءِ مردمانی رَم ءَ ھوار بیتگیں بنی آدمے بوتگ آں۔ مُدام پہ رھسریں رُنگ راھاں آسری چَک نہ جتگ چم دائمی پہ پادانی بُن ءَ سک داتگ انت دُریں راہ ءِ نیمون ءَ بازیں مَکر ءُ پریبانی سَتاہ کتگ اے لگوریں ھیالاں من ءَ وتگڑیں کِردے واھند کتگ بازیں مَردمانی نِز ءَ من ءَ ھیال ءِ کَرس بستگیں بنی آدمے گُشگ بوتگ بازیں جاھاں تستگیں درچک ءِ ٹامے پرچے ءَ ؟ من ھر وھد ءَ اے کڈ ءِ اکس چار اِتگ اِے دگہ رَھوارانی بوجیگ ءِ مھار تَرندی ءَ داشتگ ءُ اوشت ءِ آماچ ءَ سر کتگ انت ۔اجب ھما کاروان ءِ مَردمانی ھاٹیگ ءَ بات پہ ڈولیں ھیال ءُ پہ وشدلیں داباں من ءَ چو تبلیں زھگ ءَ مدام پہ کشک چنک جَتگ ءُ رھادگ کتگ اش چے ءَ کہ آیانی ایمنی ءُ دل ستکی مَدام پہ ھمبلی ءِ دروشم ءَ منی گونگیں ناسرپد ءَ چارگ بوتگ آیاں ستک ھم کتگ مَرچی پہ دمبرانی کشک ءِ دورسریں راھاں بران انت پد ءَ باند ءَ اے ساد ءِ سَر ءَ مار ایت ءُ اے کشک ءَ سواساں نمب جنت ءُ رھادگ بیت پرچے ءَ کہ اے کشک پہ واب گندگ ءَ یک بے سریں تران بیت کنت بلے اجب تو اے کسہ دمانے ایوک ءَ چادر مان پوش ءُ بہ جیڑے ترا سَماہ بیت تو اھد ءِ نوک زرتگیں مھری رھت کتگ ءُ روانی ءِ بُست کتگ بلے اے راہ نا سرجم بیت بَرے تئی دُزیں ھیال ترا بے تاھیر کن انت بَرے چاگرد ءِ دود ترا بازیں جَمپ ، ڈوک، بینٹ، کور ءُ آپ ءِ پیم ءَ دار انت ترس راہ ءَ کش کن انت بلے پہ ابدمانیں کسّہ تو مُدام باز رَند ءَ وت کشک شوھاز ئے ءُ چو گنوکانی داب ءَ سَرجناں بہ ئے پہ گُڈّی منزل ءَ اے رُنگ راہ پیچ ءُ تاب چک پُروشیں تلار دیم ءَ کیت ۔

اے کشک چو نوک بن گپتگیں پاتے ءِ پیم ءَ بیت ءُ ترا بازیں مان بندی ءُ ڈاک ءُ مانشت مان دیگ ساد پیش ایر گیجگ پرمائیت ۔من ھمے سَدک ءَ مُدام بیتگ کہ اے جنز ترا پہ دور دیگیں سیمسراں ایر نہ بُکّین ایت دل ءَ جزمان بہ ئے کہ من یک نیکیں راھے بنگیج ءَ وتی واک زیان کتگ انت پہ دلجمی مار ئے کہ من یک اھدے ءِ کرنیں ھیش ءِ بستگیں مستاگے آں۔ مُدام چو گوات ءُ نیمروچ ءِ نیمون ءَ چو پال ءُ تچک ءُ تابیں ماسگے بنت ءُ راستی ءِ پلہ مرزی ءَ کنان ءُ دل ءِ لھڑیں وشکامیاں دیم ءَ کاراں ،انگت راہ سرجم نہ بیت ءُ راہ ءِ رھسراں ترا وڑ وڑیں گپ بیت مردم تئی راہ ءِ دیم ءَ پُگنز مانریچ انت اوشت ءِ کسھانی یاتاں مان پِرین انت تانکہ تو راستی ءِ کشک ءَ چک ءُ پد بہ بہ ئے بلے اجب ترا ھما وھد ءَ بیت تو راستی ءِ راہ ءَ وتی جبین ءَ ایر بہ گیج ئے تانکہ مُھکمیں راہ ءِ گچین کنگ ءَ ترا تی زمیر ءِ سکین گون بہ بیت تا وتی منزل ءِ شوھاز ءَ چولانی رَم ءَ پریناں بہ بہ ئے۔

تَرس مُدام یک سنگتے ءُ دوستیگیں ھمبل ءِ پیم ءَ مُدام تئی ھمکوپگ بیت پرچے ءَ کہ یک ھمبلویں بیلی یے وتی بسات ءِ پیم ءَ مُدام جیڑگ ءُ راہ شناسی اکس ءُ کشک پَٹ ایت ھمے پیم آ مدام سَر جنت کجام راہ ترا پہ راستی ءِ نیمگ ءَ رھادگ کنت کجام راہ ترا مرگ ءِ آماچ کنت کجام کشک ترا پہ کور چاتے ءَ ایر گوازین ایت اے روانگیں تامُر ءِ داب ءَ انت کہ دل ءَ تسلّہ دَنت کہ من دائمی اے راہ ءِ گوانز کنگ ءَ پد کنزگ نہ بوتگ اے دور سریں کشک ءَ مردم بازیں رنگ ءُ داب ءَ مَٹ ءُ بدل بنت بازیں رَند ءَ تئی ھمراہ داری کت نہ کن اَنت ءُ بازیں رَند ءَ تو مردمانی مزاجاں زانت کُت نہ کن ئے چو وتسر بہ ئے بلے ترا اے جیڈگ المی انت کہ تو اے مردماں پہ وت ءَ راھدربریں نیمونے بزان ئے تاںکہ تئی مھری ءُ اوپار یک باندات ءِ مانگیش اتگیں واتری ءِ نام انت مُدام تو گال ءِ گُپت کن ئے۔

سَرجمیں کشک ءَ یک دریگ ءِ ندارگ گمان ءَ ایر کنگی انت دل ءِ لھڑ کوار ءَ بندگی انت شپ جَتیں یات ءُ تستگیں ارمان بانزلیں ھیال چو یکدار ءِ پیم ءَ موسم ءِ وداریگ ءُ کیپ ءِ نیمون ءَ دل ءَ ایر کنگی انت ترا جیڈگی انت اے اکس من جھان ءِ پیچ ءُ تابیں گیواراں چو کورے ءَ زور ایت گوُاز تاب پہ کیلگاں سر کنت ترا مدام گوار چنیں ھیال دل ءَ چو زھگ ءِ پیم ءَ دارگی انت چو ناسرپدیں چوری ءَ تئی ھیال ترا چہ گیش تئی پَدمنتگی ءُ زورانسری ءِ سانکلاں برجم دارگ ءِ ھاٹیگ جوڈ بہ بنت۔ تو پہ ھَلو اے موجیں زِراباں گوانز بہ ئے ءُ کورچات ءُ بینٹاں پدریچ ئے سوگات تئی چیلک بہ باں کسھاں باریں چے نام گندگ بہ اَنت، دل مدام پہ کسّہ تئی ھَبکہ ءُ اجب رنگ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءِ جارکش میجر گوھرام بلوچ ءَ کیچ ءَ پاکستانی لشکر ءِ سر ءَ بیتگیں اُرش ءِ زمہ واری منّ اِتگ ءَ گوشتگ کہ گوستگیں بیگاہ ءَ دشت ءِ ھند چوٹ ءَ مباھل فون زونگ ٹاور ءِ پھازگ ءَ ھستیں چوکی ءِ سر ءَ سرمچاراں راکٹ ءُ وتکاریں سلاھاں گوں اُرش کرتگ – چوکی ءِ تہ ءَ راکٹانی کپگ ءِ سبب ءَ زورگریں لشکر ءِ دو کارندہ مرتگ ءُ آ دگہ زدگ بیتگ اَنت –

آئی ءَ گشتگ کہ اے مباھل پون ٹاور چین پاکستان اکنامک کوریڈور (سی پیک) منسوبہ ءِ سرجم کنگ ءَ بازیں دگانی سر ءَ ھست اَنت اے ٹاور ءِ سر ءَ سرمچاراں پیسر ءَ ھم اُرش کرتگ ءُ مشینری ءُ دگہ سامان مانداشتگ اَنت چریشی ءَ پد اود ءَ آئی ءِ پھازگ ءِ واستا یک پوجی چوکی ءِ جوڑ کنگ بیتگ –

میجر گوھرام بلوچ ءَ گشتگ کہ اے اُرش بلوچستان ءِ آجوئی ءَ داں برجاہ بنت –