TBP Balochi

دبئی انٹرنیشنل کرکٹ پٹ ءَ پنچ شمبے روچ ءَ بوتگیں ٹی ٹونٹی کرکٹ ورلڈ کپ کرکٹ گوازی ءَ بنگلہ دیش ءَ پاپوا نیو گنی ھشتاد ءُ چار رناں پروش داتگ ءُ گوازی وتی نام ءَ کرتگ –

ٹی ٹونٹی ورلڈ کپ ءَ بنگلہ دیش ءِ سوبمندی ءَ شکیب ءَ جوانیں لیب پیشداشتگ کہ آئی ءَ سی ءُ ھپت بالاں سے چکاہ ءِ کمک ءَ چِل ءُ شش رن جوڑ کرت ءُ پد ءَ وتی تیزیں بالاں چہ چار اووران نُھ رن دات ءُ چار وکٹ گپت – آئی ءَ مڈل آرڈر درسیں بیٹس مین آؤٹ کرت انت –

بنگلہ دیش ءَ ٹاس کٹ اتگ ءُ اولسر ءَ بیٹنگ کنان ءَ بنگلہ ءِ لیبیاں بیست اوورانی تہ ءَ یک سد ءُ ھشتاد یک رن جوڑینت کہ شکیب ءَ ابید کپٹن محمود اللہ، لٹن داس، عفیف حسین ءُ محمد سیف الدین ھم جوانیں لیب پیش داشتگ – محمود ءَ بیست ءُ ھشت بالاں پنجاہ، لٹن ءَ بیست ءُ سَے بالاں بیست ءُ نھ عفیف ءَ چاردہ بالاں بیست ءُ یک ءُ سیف الدین ءَ شش بالاں نوزدہ رن جوڈ کرت –

ٹارگٹ ءِ پروشگ ءِ ھاتر ءَ پاپوا نیو گنی لیبیاں نوزدہ اووراں نود ءُ ھپت رن جوڑ کرت ءُ آؤٹ بوتاں وکٹ کیپر بیٹسمین کیپلن ڈرویگا ابید دگہ ھچ کس ءَ جوانیں لیب پیش نداشت ڈوریگا ءَ سِی ءُ چار بالاں چِل ءُ شش رن جوڑینٹ –

اشی ءَ پیش پاپوا نیو گنی بالنگ ھم جوان نہ ات کپٹن اسد والا، کبوا واگی موریا ءُ ڈیمین راوو ءَ دو دو ءُ سائمن اتائی یک یک وکٹے گپت بلے آھاں بنگلہ دیش مزنیں اسکور ءِ جوڑینگ ءَ داشت نہ کت –

دومی نیمگ ءَ عمان ءُ اسکاٹ لینڈ ءِ میان ءَ بوتگیں گوازی ءَ اسکاٹ لینڈ ھشت وکٹاں باج برتگ –

عمان ءَ ٹاس کٹ اتگ ءُ بیٹنگ کرتگ ءُ بیست اووراں یک سد ءُ بیست ءُ دو رنانی ٹارگٹ داتگ – اسکاٹ لینڈ ءَ ھبدہ اوورانی تہ ءَ ٹارگٹ پروشتگ ءُ باج بُرتگ –

ھرنائی ءَ بمب اُرش ءَ زورگیریں پاکستانی پوج ءِ دو کارمند کشتگ اَنت- جئیند بلوچ

سربوتگیں ھالانی رِد ءَ بلوچستان ءِ دمگ ھرنائی ءَ ناشناسیں مردماں پاکستانی پوج ءِ تر ءُ گرد کنوکیں ٹولی تراکناکیں شوروانی نشانگ جوڑ کتگ –

اھوالکار ءِ رِد ءَ پوج ھما وھد ءَ نشانگ جوڑ کنگ بوتگ کہ ناکس ھزارہ ڈیم ءَ تر ءُ گرد کنگ ءَ بوتگ – چریشی ءَ پاکستانی پوج ءَ جانی تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں مروچی ھرنائی ءَ زورگیریں پاکستانی پوج ءِ کارمند تراک ناکیں شوروانی نشانگ جوڑ کرتگ انت – اُرش ناکس ہزارہ ڈیم ءَ ھما وھد ءَ کتگ کہ زورگیریں پوج ءِ کارمند پیادگ ءَ ترگ ءَ بوتگ انت –

جارکش ءَ گوشتگ کہ اُرش ءِ آسر ءَ دژمن پوج ءِ دو کارمند ھما دمان ءَ مُرتگ – گڈسر ءَ جارکش جئیند بلوچ ءَ وتی درشان ءِ تہ ءَ گوشتگ کہ بی ایل اے کول انت کہ بلوچستان ءِ آجوئی ءَ تاں زورگیریں پوج ءِ سر ءَ مئے اُرش برجاہ مان انت –

بلوچستان ءِ بنجاھی شھر شال ءَ بیگواھیں بلوچانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی ءَ مروچی 4450 روچ سرجم بیتگ -یکجاھی درشانگ ءِ ھاتر ءَ بی ایس او ءِ ھنکینی پاگواجہ شکور بلوچ ءُ دگہ اگدہ دار ھوار بیتگ اَنت۔

وی بی ایم پی رھشون ماما قدیر بلوچ ءَ بنجل ءَ اتکگیں مردماں گوں گپ کنان ءَ گشت کہ بیستمی کرن ءِ گڈی دھک ءُ بیست یکمی کرن ءِ بندات ءَ ردوم زیروکیں بلوچانی پرایمنیں جھد ترندی، زانشت، سنچ ءُ بودناکی ءِ رد ءَ چہ گوستگیں جھداں باز برزتِر ءُ پزورتِر اِنت۔ بلوچانی نمیرانیانی یکشلی ھم نوکتریں راجدپتری نبشتہ کنگ ءَ اَنت۔ اے رندی ھمینچوک دیمھونی ھم ھست کہ اے دیمھونیاں لیکہ ھم گشگ بیت کنت کہ بلوچ نمیرانی دیمھونیانی سوب اِنت کہ مروچی رستری زوراکی ءُ لٹ ءُ کُٹ ءَ پد ھم بلوچ وتی پرایمنیں جھد ءَ دیمروئی کنان ءَ میان استمانی سیاست ءِ تہ ءَ انچیں جاہ ءِ سربیتگ اَنت کہ ڈالچار بیت کُت نہ کن اَنت۔

آئی ءَ گشتگ کہ انیگیں رایمنیں جھد ءَ بلوچ نمیران ءُ بیگواھیں زندانیانی لڑ تیزی ءَ گوں ودگ ءَ اِنت اے لڑ ءِ تہ ءَ ھواریں ھمک بلوچ ءِ دیمھونی بے درور اَنت مرچی کوھستان مری، ڈیرہ بگٹی، مکران، جھالاون، سراوان، رخشان ءُ دگہ ھنداں نمیران ءُ بیگواہ بیتگیں بلوچ نہ تھنا راجدپتر ءِ تہ ءَ مستریں ھنداں سر بیتگ اَنت بلکیں بازیں دیمھونیانی سوب ءَ بلوچ پرایمنیں جد ءُ جھد ءِ سوب ءَ بلوچ چاگرد ءِ پھناتانی تہ ءَ پترتگ کہ اِشی ءَ بلوچ چاگرد نہ تُرسیں مزاج ءِ ودی کُتگ۔

ماما قدیر ءَ گُشتگ کہ زوراکیں واکدارانی نیمگ ءَ چہ پر ایمنیں جھد ءَ لشکریانی زوراکی ءُ تاکت ءِ کارمرز کنگ ءُ ھلاس کنگ ءَ بے سوب بیگ ءَ پد دگہ یک رستری وڑے ءَ لوگانی سر ءَ مارٹر جنگ، چست کنگ، کُشگ ءُ دور دیگ بندات کنگ بیتگ۔ زلم ءُ زوراکی ءِ اے کردار بلوچ سیاسی رھشون، جھدکار ءُ زند ءِ جتائیں تکاں سیادی داروکیں ھما درستیں بلوچانی ھلاپ ءَ کارمرز کنگ بیتگ کہ آ پرایمنیں بلوچ راجی جھد ءِ باسک ءُ دوزواہ اَنت اِشی ءَ پد بلوچستان ءِ جتائیں دمگانی تہ ءَ نمیرانی کچ ودان بیت، گوستانک چشیں مزنشانیں نمیرانی دیمھونیاں چہ پُر اِنت کہ آیانی دیمھونیاں پُر ایمنیں انقلابی جھدانی ترندی ءُ گیشی آورتگ۔

نبشتانک: نوں مارا مزار نیست اِنت

نبشتہ کار: بھادُر بلوچ

گُڈی بھر

دی بلوچستان پوسٹ

بِگند ئے ٹوپانی جواب پہ تو ٹوپ بنت، انچوشکہ شھید کمبر چاکر گْوش ایت تو کیچ، پنجگور ءُ گوادر (بزاں بلوچستان) تہ ءَ بلوچ ماتانی چم ارسیگ کتگ اَنت، ما اوں پنڈی ءُ لاھور ءِ دمکانی تہ ءَ ترا پیش دار ایں، مرچی بِل کہ لیاری ءِ دمک پُرسیگ اَنت، بلے ھاران ءُ نوشکے ءِ گْوات تو ٹپّیگ کتگ، بلے پنڈیءِ بادگیر اوں ایمن مہ بنت۔ اے جنگ روچ پہ روچ گوں چہ تْرُندی ءَ تْرُندیں دابے ءَ دیمروئی کنان اِنت گْوست ءِ کمی ءُ بےپرواھیانی سر ءَ گپ ءُ تران بوگ ءَ اِنت ءُ گوریلہ جنگ ءِ نوکیں رپک ءُ ھُنرانی سر ءَ شوندات (پالیسی) ٹھینگ بوگ ءَ اِنت، نوکیں آشوب آؤکیں تب پہ زورگِر ءَ یک تباھی یے ءِ مانزمانے بیت ءُ پہ بلوچ ءَ آجوئی ءِ سباھے۔

مزار جان من زان آں جسمانی بستار ءَ چہ مارا جتا بوگ اِنت بلے گڈی وھداں تو ھمے جیڑگ ءَ بوتگ ئے کہ من پہ ڈیھ ءَ ھچ نہ کت ءُ رپت آں بلے چوش نہ اِنت آ تئی وتی مُھکمیں جزبہ اِنت کہ ترا اے جیڑگ پرماتگ ئِے۔

سید زھور شاہ ھاشمی کہ بلوچی زبان ءِ ھاتر ءَ وتی توامیں زند ءَ نْدر کنت، وتی زبان ءُ لبزانکءِ ھر تک ءُ پھناتانی سر ءَ کار کنت بلے وتی زند ءِ گڈی روچاں گْوش ایت کہ “من ءَ درد نہ اِنت کہ مِراں ءُ منی چُک چورہ بنت بگند ئے گم ایش اِنت کہ من پہ وتی زبان ءَ ھچ نہ کت”
بلے بلوچی زبان ءُ لبزانک بید ءِ سیدءَ ناسرجم اِنت۔ ھمے ڈول ءَ تو اوں نہ جیڑ اِت ھما گِس ءَ کہ من وتی چم پچ کتگ اَنت، روچے یک وھدے باریں چُل ءَ آس روک بیت یا نہ بیت، ترا درد نہ اَت کہ منی نہ دیستگیں زھگ من ءَ چہ چورہ بنت، ترا گم نہ اَت کہ من ءَ پد گِس ءِ دیم ءَ کس نیست (کسان سالیں براتے ءِ کوھیں گَم ترا چہ کسانی ءَ کوپگان اَت) ءُ اے ڈیھ کہ تو وتی زھگے ءِ روچاں بگر داں زند ءِ گُڈی ساہ ءَ آئی ءَ را وتی امبازاں زرتگ، تو ایشی ءِ ھک ادا کتگ اَنت، اے ترا ھچبر شمُشت نہ کنت۔

گَنج تاں مزار ءَ سر بوت بلے چون؟ اے یک بلاھیں جُستے، اے جُست ءِ پسّہ ءَ من ھچ ڈول ءَ دات کت نہ کن آں، چہ من ءَ گیش اے جست ءِ پسہ ءَ لیاری ءِ ویرندانیں دمک پرّیتک کن اَنت، کراچی ءِ نُگرھیں شَھرانی در ءُ دیم بیان کت کن اَنت، شُرّ ءُ بولان ءِ آبشار آئی ءِ تمردی ءِ کسّھاں الم آؤرت کن اَنت گوں من ءَ تھنا چیزے پشت کپتگیں یات اَنت، وتی ھما کمنٹمنٹیں سنگت کہ آئی ءِ گور ءَ شپ تا روچ کار کنگی اَت، اے بلاھیں کشک ءِ مساپراں پد ءَ چک ءُ پد بوگی نہ اَت، آئی ءِ گور ءَ اوشتگ، دمبرگ ءُ دلپروشی ءُ ملوری ءِ کسّہ ھچبر نیست اَت۔ بلے چہ اے درستیں آشوبی سِپتاں گیش من ءَ آئی ءِ یک ھیلے سک دوست بوت، آئی ءِ ھمبراھی ءَ مردم ھچبر مونجا نہ بوت، آئی ءِ گپ کنگ ءُ مسکرا ءُ مزاکانی انچیں اندازے اَت کہ منی ھیال اِنت جنگ ءِ تہ ءَ (کہ ھر جھدکارے ھزاراں گم ءُرنجانی دیمپان اِنت) اے پیمیں بلاھیں کِردانی بلاھیں کردے۔

ھَپت ھَشت سالاں پد کہ آئی ءَ گوں پد ءَ دُچار کپت آں، تاں من آئی ءَ را شر پجّا نیاؤرت، بلے یک بیگاھے ءَ کہ گوں آئی ءَ دیوانے بوت (تو ڈئے ھما ئے ؟) ھاھاھاھا من کند اِت ءُ گْوشت “ھو، یک مزنیں مدّتے ءَ پد وتی مزار جان ءَ گوں پد ءَ چیزے روچ گوازینگ نسیب ءَ بوت۔ اردو ءَ آئی ءَ چندیں کپ ءُ چُنڈیں شَیرے نبشتگ اَت مزار ، گندئے تو وتی شَیر دگہ جاھاں نہ ونت اَنت تو گُشت اے شَیر نہ انت، بلے من نہ منّ اِت (وتی منّ ءَ وزن ءَ کت انت ءُ ترا دات انت) کہ سک شوک اَنت، شَیر بگندئے نزور ات اَنت بلے تو منءَ سک دوست ات ئے، ترا نوں مردم چے گُشت کنت یک اردو گزلے کہ ھر شپ گْوانکو ءِ گوش ایت ھانی یک تارے تئی گوش ءَ ات ءُ دومی منی، تئی روگ ءَ پد من اے گزل گوش نہ داشت بلے تئی نمیرانی ءَ پد تئی یات ءَ آئی ءِ گوشدارگ پد ءَ بندات کتگ –

رات بھر آپکی یاد آتے رہے
رات بھر چشمِ نم مسکراتے رہے
رات بھر کوئی دیوانہ گلیوں میں پھرتا رہا کوئی آواز آتے رہے
رات بھر-

مزار ! ھما شپ ءَ کہ تو پہ وت ءَ درکپت ئے ءُ ما پہ وت ءَ نہ جیڑ اِت کہ گوں ترا اے گُڈی دیدار بیت، مُدام ھمے ودار ءِ تہ ءَ اتاں کہ روچے نہ روچے پد ءَ دُچار کپ ایں۔ پد ءَ ھواری ءَ کار کن ایں۔

اے میان ءَ بس یکبرے ترا پون ءَ ھال اھوالے بوت، پد ءَ کندگ، مسکرا مزاک ءُ ایدگہ دنیا ءِ چِست ءُ ایر ترا یات بیت کہ تو ھما باڈر ءِ سپر ءِ کسّہ پد ءَ آؤرت، کسانیں باڈرے اَت کہ 10 دمانے ءِ تہ ءَ پار کنگی اَت، شپ تھار اَت، مئیم آئگ ءَ نہ اَت، راستگیں جاھے ھم نہ اَت، کوہ ءُ تلار اِت اَنت، پہ تچگ روگی اَت ءُ دگہ لیٹ ءُ رُژناھی ھم جنگی نہ اَت، گپ ھم کنگی نہ اَت۔ راج جنان ءُ پروشان ءَ جنزان اَت، چوناھا گریوگی اَت بلے ما پہ کندگ ….، پد ءَ لیب گوں تئی بُٹّان اَت، یک تاھے ءِ بُن سستگ اَت ءُ یکے ءَ اے تلارانی سر ءَ ٹَھک ٹھکے بر اَت، ھمے میانءَ یک ترندیں بُستگ توارے بوت، دیم ءَ جُھلیں کنڑے اَت، بزاں دیم ءِ سنگت ھمے کَنڑ ءَ شت، اد ءَ نوں مئے کَندگاں ھُدا بہ دار ایت، (ھمد ءَ یک جاہ ھم پرشت) پہ ھزاب ءُ روزائی ءَ وتی جاہ ءَ سر بوت اَنت۔

چہ ایش ءُ پد ترا گوں اھوال نہ بوت، بلے ترا چہ بے ھال بِھ نہ بوتگ آں ءُ نیکہ باں۔ ترا گوں بیہال نہ بوگءِ مراد تئی نظریہ ، تئی گچین کرتگیں کشک ءَ چہ بے ھال نہ بوگ انت کہ اے پِکر 24 کلاک ماں زھن ءَ جوڈڑگ ءَ اِنت۔ اے یک تچکیں راستی یے کہ جسمانی بستار ءَ جنگ ءَ پیش کپتگیں مئے ڈولیں باریں چینکس لَڑ سپر کنت، بلے ھمے لڑانی کار ءُ کربانی آنی آکبت بلوچ ڈیھ ءِ آجوئی اِنت، بلوچستان ءَ بلوچانی وتواجھی اِنت۔

مزار جان گڑا ھوار ایں چو کہ اے جنگ اِنت، جنگ ءِ تہ ءَ ھرچ چیزے ءِ وتی یک جتائیں لزّتے ، بلے درستاں چہ نگیگ تریں ساھت پہ من ھمیش انت سنگتے ءِ تاں ابد رپتن ءِ ھالے بئیت ءُ مرچی ئیں تئی نمیرانی ءِ ھال ءَ گوں ھما انت کہ من وانگ آں ! بلے تئی اے نہ سرجمیں وابانی دیم ءَ برگ مئے ایمان اِنت، اے جنگ نہ اوشت ایت ءُ نیکہ نزور بیت، بس مئے میان ءِ ابیتکی ایش اِنت کہ نوں مارا مزار نیست۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ اسٹوڈنٹس ایکشن کمیٹی کراچی ھنکین ءِ نیمگ ءَ شنگ بیتگیں یک جارئے ءِ رد ءَ گوشگ بیتگ کہ بیست ءُ بیست ءُ چار اکتوبر ءَ گل ءِ بنجاھی سروک ڈاکٹر صبیحہ ءِ برات ءُ آئی ءِ ناکوزتک ءِ بیگواھی ءِ ھلاپ ءَ زھرشانی کنت –

شنگ بیتگیں جار ءِ رد ءَ گوشگ بیتگ کہ بیست ءَ چار اکتوبر دوھزار ءُ بیست ءُ یک ء کراچی ءَ آرٹ کونسل ءَ داں پریس کلب ءِ دیم ءَ یک روانکے کشگ بیت اِنت –

روانک ءَ بساک ءِ کراچی ءِ ھنکین ءَ دراھیں نودربر ءُ سیاسی ءُ انسانی ھکاں گوں بندوکیں مردماں لوٹ کرتگ ءُ گوشتگ کہ سرجمیں مردم اے روانک ءَ بھر بہ زور اَنت ءُ گل ءِ سروک ءِ بیگواھیں برات ءُ آئی ءِ ناکوزھگ ءِ یلو کنائینگ ءِ ھاتر ءَ مئے توار ءَ گوں ھمتوار بہ بنت-

دومی نیمگ ءَ بلوچ یکجھتی کمیٹی کراچی ھنکین ءَ ھم اے زھرشانی روانک ءِ پلامرزی کرتگ ءُ گوشتگ کہ ایکشن کمیٹی ءِ نیمگ ءَ برجم بیوکیں روانک ءَ مھلوک بہ زور اَنت –

گل ءَ گشتگ کہ اے روانک یکشمبے ءِ روچ ءَ بیگاہ ءِ ساھت سَے ءُ نیم ءَ آرٹ کونسل ءَ درکیت ءُ دیم پہ پریس کلب ءَ روت اِنت –

زانگ بہ بیت ڈاکٹر صبیحہ بلوچ ءِ برات شاہ میر نوزدہ جون دوھزار ءُ بیست ءُ یک ءَ انجینئرنگ یونیورسٹی ھزدار چار ھمراھانی ھمراھی ءَ دزگیر کرتگ ءُ برتگ ءُ پد ءَ آ درست یلو کرتگ اَنت ءُ شاہ میر انگت ءَ بیگواہ اِنت –

ھمے رنگ ءَ بیست ءُ پنچ جون ءَ ڈاکٹر صبیحہ بلوچ ءِ ناکوزتک ھم آوات جنگ ءُ بیگواہ کنگ بیتگ –

نودربر گلاں ڈاکٹر صبیحہ بلوچ ءِ برات ءُ ناکوزتک ءِ یل کنگ ءِ لوٹ کرتگ ءُ اگاں یل نہ بیت اَنت گڑا بلوچستان ءَ زھرشانیانی جار پرینگ بنت-

نبشتانک: نمیرانیں باسو

نبشتہ کار: بالاچ سگار

دی بلوچستان پوسٹ

اے 2013 ءِ زمانگ اَت کہ ھمے زمانگ ءَ بلوچ راجی آجوئی ءِ زرمبش ءُ آگاھی ءِ جُنز سرجمیں بلوچستان ءِ دمگ ءُ دمکاں سک تُرند اَت گُڑا کلانچانی دمگاں باسو نامیں ورنایے گوں وتی بازیں ھمراھاں لوگ پہ لوگاں شُت ءُ دروازگ ئِے ٹُک ات ءُ بلوچ راج ءَ راجی آجوئی ءِ آگاھی ءِ دیان ءَ گْوشگ ءَ اَت ” اگاں اے بری کسے ءَ ووٹ دات گُڑا وتی زمہ وار وت اِت کہ مارا گوں اے پنجابی مُلک ءِ سیاست ءَ ھچ کار ءُ سْیادی نیست انت ما بلوچ وت یک جُتائیں راج ءُ سرڈگارے واھُند ءَ ایں۔

بہ گِند ئے دُرستیں راج ءَ ھم باسو ءِ ھُکم کبول کت پمیشکا وھدے کہ گچینکاری ءِ روچ بوت گُڑا ھچ کس پہ ووٹ ءَ نہ شُت وھدے کہ ووٹ ءِ دیگ وھد ءُ پاس ھلاس بوت اَنت گُڑا باسو ءِ کاروان مُدام دیم ءَ جُنزان ات ءُ روچ پہ روچ باسو ءِ ھمراہ ھم گیش بوان ات اَنت کلانچانی تہ ءَ کسے ءَ اگاں دُزّی یے بہ کُتیں باسو آئی ءَ را اد ءَ پد ءَ گردگ ءَ نیشتگ اَت۔ چوناھا کلانچانی دمگاں دُزّ سک باز بوتگ اَت۔ البت وھدے کہ باسو آتک گُڑا بازیں دُزّے واجہ باسو ءَ جُت ءُ لٹ دات۔ درستیناں توبہ ئِے ھم دات اَنت چمیشکا دُزّاں دوبارہ کلانچ ءَ کسے ءِ بوچ ءِ ٹالے ھم چست نہ کُت۔

باسو گوں ھمراھاں مُدام کوچگاں ویل اَت ، شپ جاھ ءُ روچ جاھ اَت گُڑا 2016 ءِ تہ ءَ باسو ءَ را بونس ابدلرسول ، ملا ماھر ءُ دگہ لھتیں راجدْروھیں مردم ءَ راہ بست بلے ورنا باسو اَت کہ ایشی جنگ پہ دژمن ءِ کاسگ چٹّاں انچو ارزان نہ اَت۔ ما دگرانی دپ ءَ انچو اِشکتگ اَت کہ باسو چہ بُرز کلانچ ءَ گوں وتی ھمراھے ءَ آیگ ءَ بیت گُڑا بونس پاٹی پیسر ءَ راہ بند ایت ءُ نند ایت، ھمد ءَ یک کورے بیت ھمے کور ءَ نِند اَنت ء ڈارک باسو ءَ تیرے جن اَنت ءُ یک تیر باسو ءِ پاد ءَ لگ ایت باسو گوں سائیکل ءَ چپی بیت ءُ کپ ایت بلے باسو ڈارک آیاں دستی بمبے روپ ایت گُڑا آ تچ اَنت چہ ھمے اُرش ءَ ٹپی ئیں باسو ءَ باسو ءِ ھمراہ ھما دمان وتی جاھ ءَ کار ایت ءُ دوا ءُ درمان کنت گُڑا باسو دْراہ بیت۔

پد ءَ دگہ کاسگ چٹّیں مردے کہ نام ئِے دوشو اَت کہ اے ھم باز جاھاں باسو ءِ راہ ءَ بند ایت بلے دیم ءَ مرد باسو انت کہ ھلو ھالو ءَ کسی دست ءَ وَ نہ کپ ایت۔ باسو انچو ھوشار بیت کسے کہ ایشی راہ ءَ بہ بند ایت آئی را پیسر ءَ سما بیت پمیشکا مُدام وت ءَ گیگ ءُ گْور کنت۔ دوشو ھم بے سوب بیت ءُ گڈی ءَ باسو ءَ کاسگ چٹّیں دوشو ھم گپت ءُ کُشت۔

رھیم نامیں دُزے ھست اَت کہ راھیلہ کلانچ ءَ جھمند اَت، ایشی گوں ٹولی ءَ ھم باز زور جتگ کہ باسو ءَ بہ جن ایں بلے بے سوب بوتگ۔ چاچا اھمد نامیں سرکاری دلارے ھم بیت ھمے دلار باسو ءِ بازیں مردمے کُش ایت گُڑا باسو ایشی ءَ را ھچ وڑ ءَ یل نہ دنت دمب ءَ بیت داں وھدے کہ باسو زندگ اَت۔ ایشی کلانچ ءَ پاد ھم ایر نہ کُت۔ باسو ھما ورنا اَت کہ ایشی ءِ انچیں بیمے اَت ھرکس ترس ءُ لرز ءَ اَت ، ھرکسے ایشی ءِ تُرس ءَ جسکگ اَت ءُ چیر اَت۔ گڈی ءَ 2018/2017 ءِ ھمے سال ءَ سرجھلی (سرینڈر) کنگ بندات بوت۔ باسو ءِ درستیں ھمراہ سرجھل بوت اَنت باسو ءِ کلانچانی گیشتر ھمراہ سرجھل بوت بلے بازیں سنگتاں باسو ھم منّت کُت کہ بیا سرجھلی بہ کن ایں گُڑا ھمیشانی تہ ءَ شھید شاکر ائیدو ھم ھوار اَت کہ ایشی ءِ کھول سک لُٹ ءُ کُٹ کنگ بوگ اَت کہ شاکر بئیت ءُ سرجھل بہ بیت۔

گڈی ءَ شاکر ءَ وت ءَ وت جت ءُ باسو گار بوت۔ بازیں سنگتاں ھما وھد ءَ گْوشتگ اَت کہ باسو دُزے وتی سیت ءُ پائدگ ءِ واست ءَ تپنگ ئِے بڈا کتگ بلے باسو گوں گلزمین ءَ کسم وارتگ اَت کہ تا گُڈی تیر ءَ راجدْروہ نہ باں گُڑا 9 اکتوبر ھما شومیں روچ اَت کہ یک اناگاھے ءَ باسو ءِ مرگ ءِ جار شنگ اِتگ۔ گْوش ئے گوں باسو ءِ جُتائی ءَ کلانچانی دْرچک ءُ دار ھم ابیتک بوت اَنت۔ بلے باسو ءَ راستی درشان کُت ءُ پیش داشت کہ من گڈی تیر ءَ جنگ دار آں۔

سُھریں دْروت باسو ءَ گوں وتی گُنگریں ھمراھاں ءُ راجی آجوئی ءِ جُھد مُدام میرزان بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

راجی دستونک

شَائر :  مومن ابراھیم

دی بلوچستان پوسٹ

بچارے    زندگی   چونیں   رنگے   کار   اِیت
مئے  ارواھاں  گوں  چونیں  جنگے  کار  اِیت

اے   بلوچستان   ءِ    ھستی   ءُ   دولت    اِنت
اے  باریں  بدواھان گوں چونیں  رنگے کار اِیت

تنا    وھدے    بہ    بیت       آجو    بلوچستان
کس  نہ  زانت  باریں چونیں  جنگے   کار     اِیت

اے    وڑیں    گدار   جنگ ءَ  کُجا   سلاہ    کنت
من   ءُ   ترا    پہ    چرّک    ءُ    ملنڑ    کار   اِیت

اے    کُجا   بلوچان   سَنگّ   ءُ   ھمکوپگ   کنت
اے دِگہ زالمے گریب ءُ  بے  وسان تنگّ  کار  اِیت

زندگی  ءَ   زانتکارانی  سرّے   گپت     ءَ    ھرجا
اے من ءُ ترا  پہ بے تعلیمی کرّی ءُ گُنگی چار اِیت

ھرچ   پُسّگ   ءِ    پہ    وتی  بانداتے  ءِ  اُکبال   ءَ
مرچی  پہ   وشی   تئی   تیر  شکار    کار  اِیت

بلوچ آجوئی لوٹوکیں سلاہ بندیں گل بلوچ لبریشن آرمی ءِ سرکماش بشیر زیب بلوچ ءَ چاگردی ترامجاہ ٹویٹر ءَ وتی ٹویٹے ءِ تہ ءَ گوشتگ کہ بکول ءِ جنرل اسلم بلوچ ءِ نوں اے دژمن ءِ سر ءَ اِنت آ اے جنگ ءِ سر ءَ کجانگر تاب دیگ لوٹ ایت –

بشیر زیب بلوچ ءِ گوشگ ات کہ مروچی دژمن ھما ھد ءَ بد کرد جوڑ بوتگ کہ مئے بے سلاھیں چُک ءُ زالبولاں نشانگ کنگ ءَ انت زاناں آ ھمے پھم اِت کہ ما زوراکیاں بے ھیال کنیں؟ –

آئی ءِ گوشگ ات کہ یا دژمن ھمے بے سُدی ءِ آماچ انت کہ اے وڑیں کپتگیں کاراں مار ءَ وتی منزل ءِ نیمگ ءَ رؤگ ءَ داریت؟ اے وڑیں پگر کنگ دژمن ءِ کم بے سدی انت پرچاکہ ما وتی مردمانی سر ءَ بوتگیں زلم ءُ زوراکیانی ھساب ءَ یک یک ءَ گریں –

بشیر زیب بلوچ ءِ گوشگ ات ما وتی مات ءُ گوھارانی رتکگیں ھرساں ھچبر بے ھیال نہ کنیں –

بی ایل اے ءِ سرکماش ءَ وتی ھیال ھما وھد ءَ درشان اتگ انت وھدیکہ ھوشاپ ءِ وئیل ءَ شھید بوتگیں زھگ دو روچ ساری شال ءَ شھدائے بلوچستان ء کبرستان ءَ کل ءُ کسارت کنگ بوتگ اِت اَنت-

ملا گلاب ءَ پہ آئی ءِ گرانبھائیں دیمونیاں “کوھسار ء وتن ” ءِ نام ءَ آئی ءِ ستا شانی ءَ کن آں- بیبگر بلوچ

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کتگیں درشان ءِ تہ ءَ گوشتگ کہ گل ءِ جوانیں سنگت ملا گلاب پنام ء ملا نور ھبدہ اکتوبر ءَ پنجگور ءِ دمگ پروم ءَ زورگیریں پوج ءِ ارش ءَ شھید بوتگ۔

جارکش ءِ رِد ءَ ملا گلاب سال دوھزار چاردہ ءَ بی آر اے ءِ پَتّر ءَ پہ بلوچ سرڈگار ءَ سلاہ بندیں جھد ءَ دزگٹ بوتگ – آ چہ کسان سالی ءَ یک پُرسِنچ ءُ نہ ترسیں سرمچارے بوتگ ھمے سبب ءَ آئی ءَ را گل ءِ پوجی اھوالکار کمیٹی ءِ باسک جوڑ کنگ بوتگ اَت – گلاب جان ءَ شھیدی داں وتی ڈُبّہ ءُ زمہ واری گوں جوانیں رنگے ءَ پیلو کتگ اَنت- آ چہ جنگی رِپک ءُ ھنراں سرریچ ، زانتکار ءُ گلزمین ءِ یک لیکھی پُسّگے بوتگ – گل آئی ءِ گراں بھائیں دیمونیاں ستا شانی ندر کنان ءَ پہ آئی ءَ “کوھسار ء وتن” ءِ لقب دیگ ءِ جار جنت-

آئی ءِ گوشگ ات کہ ما دژمن ءَ تچک ءَ گشگ لوٹیں کہ پاکستان ءِ زورگیری ءِ بگیری ءَ سلاہ بندیں جھد ءَ پہ نمیران بوگ ءَ جھد گیشتر مھکم ءُ توانگر بیت انت – بلوچ ورنایانی یک پدریچے گوں سلاہ بندیں جنز ءَ ھمگرنچ بوگ ءَ اِنت کہ پاکستان ءِ زورگیری ءِ بگیری ءَ ساڑی اِنت –

جارکش ءَ گڈسر ءَ وتی درشان ءِ تہ ءَ گوشتگ کہ زورگیر ءِ بگیری ءَ دیمونیانی درچ بلوچستان ءِ آجوئی ءَ تاں ھمے وڑ برجاہ بنت –

مند ءُ جاؤ ءَ پاکستانی پوج ءِ پنچ کارمند کُشتگ اَنت – میجر گوھرام

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ مند ءُ جاؤ ءَ پاکستانی پوج ءِ سر ءَ بوتگیں اُرشانی زمّہ واری منّ اِتگ ءُ گوشتگ کہ مئے سرمچاراں مروچی مند ءِ دمگ سنگستان کنڈگ ءَ پوجی پانگس ءِ سر ءَ اُرش کُتگ –

جارکش ءَ گوشتگ کہ پنچ پوجی کارمند نزیکیں کور ءَ آپ ءِ آرگ ءِ ھاتر ءَ دراتکگ بوتگ انت کہ سرمچاراں وتی نشانگ جوڑ کرتگ انت سَے کارمند کُشتگ ءُ ھمے میان ءَ آھانی پھازگی کارمند سنگر ءَ ڈن درآیگ ءَ بوتگ اَنت آ ھم جتگ اَنت – اے اُرش ءَ چار پوجی کارمند مُرتگ ءَ بازینے زدگ بوتگ اَنت –

جارکش ءَ گوشتگ کہ اُرش ءَ زدگ ءُ مرتگیں پوجیانی چِست کنگ ءِ ھاتر ءَ جنگی بالگرداں وت ءَ جنگ جاہ ءَ سر کتگ –

میجر گوھرام بلوچ ءَ دیمتر ءَ گوشتگ گوستگیں روچ ءَ آواران ءِ دمگ جاؤ نوندڑہ ءَ تلارو ءَ برجاھیں پوجی پانگس ءِ سر ءَ ھم مئے سرمچاراں دورجنگیں توپک ءِ گون ءَ اُرش کُتگ چریشی ءَ یک پوجی کارمندے مُرتگ –

گڈسر ءَ بی ایل ایف ءِ جارکش میجر گوھرام بلوچ ءَ وتی درشان ءِ تہ ءَ گوشتگ کہ اُرش بلوچستان ءِ آجوئی ءَ تاں برجاہ مان انت –