TBP Balochi

نبشتانک: نمدی یے پہ تنگوئیں بچ ءَ

نبشتہ کار: معراج لعل

دروت

دی بلوچستان پوسٹ

اُمیدیں کہ شُما دُرس ھست ءُ سلامت ءُ دراہ اِت کہ مُدام ھمے داب ءَ بات اِت من زاناں منی تنگوئیں بچ تو اے نمدی ءِ وانگ ءَ پیش پھم اِتگ کہ من چی نبشتہ کُتگ اے نمدی ءِ تہ ءَ من اے ھم زاناں تئی گِلہ آں گِلہ ءِ پِر بیت کہ اے ائید ءَ پد ءَ من گوں شُما ھوار بُوت نہ کناں بِلے تو شر تِر ءُ بھتر زان ئے کہ منی زمہ واری بے کساس اَنت ءُ منی کُوپگ سک نِزور اَنت من بُلوٹاں ھم شُمارا گوں دِرتگیں پُچاں اے ائید ءِ وشیں روچاں دیست نہ کناں ۔

من نلوٹاں کہ منی اندر ءِ پشت کپتگیں ھاٹیگ شُمئے گندگ ءَ پد ھتم بہ بیت ءُ من ھاکمیں وھد ءِ دیم ءَ دستاں چست بہ کناں چو من سدک آں منی چُک تو بُودناکیں زھگے ئے ترا ھمک چیز ءِ گم وت ءَ پِر اِنت بلے پد ءَ ھم ترا گُشگ لوٹاں کہ من ءَ چہ پد دُرائیں زمہ واری تئی کُوپگاں بنت۔

ھیر آ گپاں بِل تو چُش کن منی ءُ وتی مات ءِ ھما اکس کہ لوگ ءِ دیم ءَ ٹنگ اِتگ پُچے بہ جن ئے گوں اے وشیں روچاں کمیں ساپے کن بلکیں تئی مات ءِ روہ رژناہ تِر بیت ءُ مزنیں مات ءَ بُگش تئی نرمزاریں بچ ءَ ترا سلام کُتگ ءُ گُشتگ ئِے منی واستا دل ءَ دو بر مہ کن من وش ءُ سلامت آں ءُ دگہ گپے تئی واستا جُپتے ترّکل(پِشی سواس) ءُ مزنیں مات ءِ گور پاتے ءَ من گوں حاجی ءِ گاڑی ءَ روان دیان اش تو وھد بہ کش ءُ بیار اِش چہ منی نیمگ ءَ شُمارا ائید مُراد بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ پتر ھال ءَ سر بیتگیں ھالانی رد ءَ بلوچستان ءِ دمگ کیچ ءِ بنجاھی شھر تربت ءَ پاکستانی پوج ءَ یک مردمے دزگیر کنگ ءَ پد بیگواہ کرتگ –

پوج ءِ دست ءَ آوار جنگ بیتگیں مردم ءِ پجار عقیل ء بشیر احمد ءِ نام ءَ زانگ بیتگ –

دمگی مردمانی رد ءَ عقیل ء بشیر احمد دَہ جولائی ءَ آئی ءِ نزیکیں وارسانی دیم ءَ پوج ءَ آوار جنگ ءَ پد بیگواہ کرتگ –

بلوچستان ءَ بیگواھیانی درچ یکشل ءَ برجاہ اَنت ءُ دومی نیمگ ءَ شال ءَ گار ءُ بیگواہ بیتگیں مردمانی واستا توار چِست کنوکیں گل وائس فار بلوچ مسنگ پرسنز ءِ زھرشانی نندانک برجاہ اِنت- زھرشانی نندانک ءَ مروچی چار ھزار ءُ سَے سد ءُ ھشتاد ءُ یک روچ سرجم بیتگ –

زھرشانی نندانک ءَ این ڈی پی ءِ بنجاھی رھشون ثناء بلوچ، رشید بلوچ، محبوب بلوچ ءُ دگہ مردماں اتکگ ءُ نشتگیں مردمانی گون ءَ پدردی درشان اِتگ –

ھمے میان ءَ وی بی ایم پی ءِ وائس چیئرمجن ماما قدیر بلوچ ءَ گُشتگ اَت کہ انسانی راجداپتر اے امر ءِ گواہ اِنت دنیا ءِ کجام ھم کُنڈا زُلم ءُ زوراکی ءِ ھلاپ ءَ چِست بیتگیں توار کُشت ءُ کوشانی زور ءَ ایر موش کنگ نہ بیتگ اَنت –

ماما قدیر بلوچ ءَ گُشتگ اَت کہ ھروھد ءَ زیردستیں مردمانی گون ءَ ھمے وڑ کنگ بیتگ ءُ مروچی بلوچانی گون ءَ ھم ھما وڑ بیگ ءَ اِنت –

ماما قدیر بلوچ ءَ گُشتگ اَت برطانیہ ءِ درایگ ءَ پد پاکستان ءَ ھونواریں لشکر ءِ ھواری ءَ بلوچستان ءِ سر ءَ زورگپتی کرتگ ءُ مروچی ءَ داں بلوچانی سر ءَ کوہ پروشیں زُلماں کنگ ءَ اِنت –

ماما قدیر بلوچ ءَ گُشتگ اَت اے وھد ھمیش اَتکگ کہ مارا یکجاہ بیگ ءُ جد ءُ جھد کنگی اِنت ءُ بلوچانی سر ءَ بیوکیں کوہ پروشیں زُلمانی روچ آسر کنگی اَنت –

ھمے وڑ ءَ چہ مستونگ ءَ بیگواہ بیتگیں ءُ جھمنندیں لیویز کارمند سعید احمد ءِ مات شال ءِ پریس کلب ءِ دیم ءَ برجاھیں وائس فار بلوچ مسنگ پرسنز ءِ بنجل ءَ اتکگ ءُ وتی زھگ ءِ یل کنگ ءِ لوٹ کرتگ ئِے –

سعید احمد بیست ءُ نُھ اگست دوھزار ءُ سیزدہ ءَ آوار جنگ ءَ پد بیگوا کنگ بیتگ –

بلوچستان ءِ باپاری شھر ھب ءَ سر بیتگیں ھالانی رد ءَ بجلیانی بندش ءِ ھلاپ ءَ مھلوک ءَ زھرشانی کرتگ-

مھلوک ءِ گوشگ اِنت کہ بازیں روچاں ھب ءَ بجلی نہ بوگ ءِ ھساب ءَ اَنت ءُ چریشی ءَ چہ بازیں جنجالانی دیمپانی اِنت –

ھب ءِ شھریاں بجلی ءِ بندش ءِ ھلاپ ءَ بیلہ کراس ءَ مزن دگ بند کرتگ ءُ زھرشانی کرتگ ءُ دگ ءِ بندی ءِ سبب ءَ ھردوکیں نیمگاں گاڑیانی لین لگ اِتگ اَنت ءُ رؤ ءُ آؤکیں مساپراں مھتلی ءِ جنجالانی دیمپانی بیتگ –

ھب ءِ شھریانی گوشگ اِنت کیسکیو شھریانی سر ءَ زُلم کنگ ءَ اِنت ءُ چہ بازیں روچاں بجلی ءِ بند کرتگ ءُ شھر ءَ مھلوک جنجالانی دیمپان کرتگ اَنت –

ھب ءَ ھوار بلوچستان ءِ دگہ جاھاں ھم بجلیانی نہ بوگ ءِ ھلاپ ءَ زھرشانی بیگ ءَ اَنت –

گوستگیں روچاں گوادر، تربت، تمپ ءُ مکران ءِ دگہ جاھاں ھم بجلی نہ بوتگ اَنت ءُ مھلوک زھرشانیاں گندگ اتکگ اَنت –

نبشتانک: ائید، تو پد ءَ پیداک ئے؟

نبشتہ کار: ھاتر اسلم

دی بلوچستان پوسٹ

من اِشکُرتگ تو ھمک سال ءِ وڑ ءَ پد ءَ پیداک ئے بلے ما ترا گوں کجام دل ءَ وش آتک بہ کن ایں؟ ترا پہ ما چے گوں اِنت؟ من زاناں تو مئے درداں پد ءَ گیش کنگ لوٹ ئے-

تو شری ءَ سرپد ئے مئے مات سالانی سال پہ وتی تاسُپیں بچانی ودار ءَ نِشتگ اَنت، مئے لاڈُکیں گھاراں وتی زند پہ وتی بندیگیں براتاں ببا داتگ اگاں کسے ماں زنداناں بندیگ نہ اِنت، گڑا آ پہ لاپ ءِ شوھاز ءَ ماں دراں ڈیھ اِنت.ما چہ درداں سَریچ ایں، مئے چم اَرساں کور اَنت، ما تھاروکیں زندے ءِ واھند ایں. ما ترا چو وش آتک کن ایں؟-

ما چوناھا گوں تو ھچ گِلگدار نہ ایں. ما گُل لوٹ ایں ترا پہ مُرادے وش آتک بہ کن ایں ما ھم لوٹ ایں کہ اے وشیں روچ ءَ پہ وشی بہ گوازین ایں چو یدگہ راجانی وڑ ءَ مارا تَر ءُ تَاب ھم وش بیت نوکیں پازوار ءِ پاد ءَ کنگ ءُ نوکیں گُد ءِ گور ءَ کنگ ءَ مئے دل اوں مان بیت بلے بژن سد بژن کہ مئے نسیب ءَ بدبھتی ءُ تنگدستی نبشتہ اِنت کہ ما گلامی ءِ آس ءَ سوچان ایں-

اے ھپتاد ءُ سیمی سال اِنت تو مئے درداں سال پہ سال گیشتر کنان ئے تئی آھگ ءِ روچ ءَ ھمک مردم بیچاڑ ءُ مُلور اِنت. کَماشاں بگر داں ورنایاں، زھگاں بگر داں زالبولاں درست گمیگ اَنت کسے وتی پت ءَ یات کنت کسے وتی برات ءَ گیر کار ایت ءُ کسے وتی سیاد ءُ وارسے-

ترا اگاں باور کنت، اے روچ ءَ کس ءَ را سما نہ بیت کہ اے وشی ءِ روچے کسی دل نہ لوٹ ایت گوں بچکنداں نوکیں گد گور ءَ بہ کنت پرچا کہ ھرکسی ھیال پہ وتی پت، برات، سیاد ءُ ازیزاں روت کہ باریں آ چے پیم اَنت؟-

تئی وشیں روچ پہ ما وش نہ اَنت تئی آھگ مارا گیشتر دردانی ءُ رنجانی باوٹ کنت اے وشیں ءُ شاتکامیں روچ بھ پہ وشی نہ گوز اَنت داں ما آجو نہ بہ ایں-

تئی آھگ ھما وھد ءَ وش اِنت کہ ما آجو بہ ایں ، وتی سرڈگار ءِ واھند وت بہ ایں گڑا ترا ما گوں دل ءِ جولانک ءَ وش آتک گوش ایں ءُ ترا بے دروریں مھر دے ایں-

اُمیت اِنت کہ منی گپّاں چہ بھ دلگران نہ بہ ئے پرچا کہ من راستی پَدر کرت ءُ وتی راج ءِ بیوسی ءُ لاچاری گوں تو زھرشان کرت کہ ما تئی آھگ ءَ سک باز وشں ایں بلے گلامی مارا تئی آھگ ءَ گیش درد دنت ءُ گریوگ ءَ پرما ایت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ءُ ھزار سَے سد ءُ ھپتاد ءُ ھشت روچ سرجم بوتگ – بلوچ یکجھتی پتر ءِ باسک ءُ دیگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان کُتگ ءُ گوشتگ کہ ھک ھمود ءَ رسیت کہ اود ءَ انسانیت ءِ بہ بیت، جمہوریت برجاہ بہ بیت ھمود ءَ کہ جمھوریت لوٹوک بہ بنت، چہ کہ اے ملک جوڑ بوتگ بلوچانی گوم ءَ ناھکی، بلوچانی کشت ءُ کوش، زورانسری اوار جنی، مال مڈیانی لٹ پُل، بلوچ راجداریں باسک، نودربر، ڈاکٹر، وکیل، بزگر، دانشور ءُ زند ءِ دگہ پڑ ءَ ھمگرنچیں مردمانی آوار جنی یا شھید کنگ ھمک روچی کارے جوڑ بوتگ –

آئی ءِ گوشگ ات کہ مروچی ما یکرندے پد ءَ ھما پیشی روش ءِ نیمگ ءَ رؤگ ءَ ایں کہ ھمود ءَ ما بندات ءَ یکے دومی ءَ نہ منّگ، انا ءِ ودی بوگ، زاتی پسند ءُ ناپسند، زانت ءِ جاہ ءَ بس وتی پیسلہ دیگ –

ماما قدیر بلوچ ءِ گوشگ ات کہ ھزارانی کچ ءَ چکانی پت، براتانی گوھار زند ءَ گار انت زانگ نہ بیت چینچو جنین جنوزام بوتگ یا چِنکس جنین وت ءَ جنوزام بہ گوش ایت – مروچی مئے انا پرستی، نا پسند قبائیلیت، ھیروازم ءُ گیر شئوری امل ءَ کندیل ءِ کُشگ ءَ گوات ءُ توپان نزر کتگ – ھزارانی کچ بیگواھیں مردمانی زانگولیں جون یا اکساں گندین گڑا دل ھون ءِ ارش شلیت منی کاروان ءِ سنگت مرگ واب ءَ واب انت –

آئی ءِ گوشگ ات کہ منی ڈیھے پرزند وتی جندے سرڈگار ءَ شُد ءَ چہ مرگ انت دژمن ءِ چہ بمباریاں شھید بوگ ءَ انت-

نبشتانک: ‏آجوئی زندگی ءِ چھرگ اِنت

نبشتہ کار: عزیز جے آر

دی بلوچستان پوسٹ

من گوں آبرشت ءَ دومی سنگ ءِ نیمگ ءَ شتاں ءُ پد ءَ یکشل ءَ جھل کوہ ءَ رھادگ بوت آں ڈیم ءِ رسگ ءِ ھاتر ءَ من وت ءَ را مُھر داشت, منی آپ اوشتات ءُ اناگت ءَ من ءَ ھمے سما بوت کہ من دارگ بوتگ آں ھر چیز بوگ ءَ اَت من آئی ءِ دارگ ءِ جھد کُت اے پمن نوکیں چیزے نہ ات بلے ھمک رند ءَ ایشی ءِ دیمپانی کنگ باز گران ات پرچا کہ من چہ اے نکلی چیز ءَ تُرس ءِ آماچ اِت آں کہ منی ابرمی رشت ءَ دارگ ءَ اَت پد ءَ من چہ اِے مزنیں نکلی چیز ءَ در اتک آں ءُ من لوٹ اِت کہ گل ءُ شات بہ باں بلے من دم ھم باز برتگ ات-

من تیاب دپانی سیلاب کنگ ءُ راہ ءِ بدل کنگ ءِ بابت ءَ ھیال کت بلے من نہ زان آں کہ من باریں چوش بہ کن آں منی کسانیں کوراں من ءَ دگہ کورانی کسّہ کُت اَنت کہ چتور آیاں وتی تیاب دپ سیلاب کتگ اَنت آھاں ھمک مردم کہ ھمود ءَ بیتگ کشتگ ھما دْراھیں مردم ءُ برے برے من ءَ ھمے سما بیت کہ شَر کُتگ اِش, آھاں کے ءَ گُشتگ کہ اود ءَ دیم جوڑ بہ کن اِت ءُ مئے آجوئی ءَ تباہ بکن اِت، پہ وتی مکسد ءَ ؟ بلے پد ءَ من ءَ ھمے سما بیت کہ من وتواہ بیگ آں ءُ پہ وتی آجوئی ءَ دگرانی ساہ ءَ گرگ ءَ آں ءُ پد ءَ آ گیشتر دیم بند انت باریں بُندر ءَ آ اے چیز ءَ کرز انت یا ناں؟ من نہ زان آں بلے نی سک باز برداشت کتگ باز واک ءُ زور اِنت ءُ من ءَ وتی آجوہی گیر آیگ ءَ اِنت نی من ءَ اِے کار کنگی انت من سک باز ودار کتگ ءُ چہ ایشی ءَ پیسر کہ منی ارادہ بدل بہ بیت امینچو زیت بیت من ءَ اِے کار کنگ لوٹ اِیت مرچی روچ اِنت ئِے۔

شَرّ اِنت، زیتّ دیم پہ ڈیم ءِ رسگ ءَ، من وتی سجّھیں زکت ءُ تاکت یکجاہ کُت اَنت ءُ تَر اِت آں اِے کار اینچو ارزان نہ اَت اینچو کہ گندگ ءَ اتک من جُنزان کُت۔ اِد ءَ کور بُن نیست اَت پمیشکا من تچک ءَ شُت نہ کُت من یک کَلّگے ءَ گوست آں ءُ من چیھال اِش کُت آں چک پہ وتی مات ءُ پت ءَ چیھالگ ءَ اِت اَنت، رامگیں ساھدار پہ وتی واھنداں ءُ جوان چہ ھر نیمگ ءَ ھرکس ءَ زیرگ ءُ روگ ءَ اِت اَنت چہ ایشی ءَ پیسر کہ باز دیر بہ بیت من درد ءُ کولنج مار اِت اراں من شَرّیں پیسلھے زُرتگ؟ من دومی کلّگ ءِ نیمگ ءَ روگ ءِ جھد کُت بلے کنارہ ءِ نیمگ ءِ لھتے لوگ بُرت گوں من یکّیں وھد ءَ وت ءَ را باز زورآور ءُ بے ھاٹیگ مار اِت۔ وتی رھم ءِ سر ءَ بازیں مردمانی تباہ کنگ ءَ من وت ءَ را ھراب ءُ تاکت ور سما کُت۔

ھما مردم کہ چہ ڈیم ءَ سیتّ ءُ نپ اِش چست کُت۔ بلے من وت ءَ نِزور ءُ بے ھاٹیگ ھم مار اِت پرچا کہ من یک انچیں چیزے بندات کت کہ من وت گِر ءُ دار کُت نہ کُت دریگتیں من چوش مہ کُتیں اراں اِے ھما چیز بیتگ کہ من لوٹ اِتگ؟ بلے من گوں تھل ءُ شھدیں مارشتانی ڈیم ءَ آجو بوت آں من گوں زندگی ءَ جنزان اِت آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ جتا جتائیں دمگاں پاکستانی پوج ءِ دست ءَ زورانسری آوار جنگ ءُ بیگواہ بوتگیں سَے کس یل کنگ بوتگ انت گِساں سر بوتگ انت –

یل بوتگیں مردمانی تہ ءَ رسول بخش ء نزیر احمد جھمنند ھاران کہ دو ماہ ءَ پیش پاکستان ءِ پوج ءَ زورانسری آوار جتگ ءُ بیگواہ کتگ – مستونگ ءِ دمگ دشت ءَ سیزدہ دسمبر دوھزار ءُ ھبدہ ءَ آوار جنگ بوتگیں عبدالحکیم ء جمعہ خان بنگلزئی ءُ شش ماہ ءَ پیش آوار جنگ بوتگیں خاران ڈگری کالج ءِ نودربر صفیان حسین زئی ھوار انت کہ مروچی پاکستانی پوج ءِ زنداناں یل بوتگ ءُ وتی گِساں سر بوتگ انت –

یل بیتگیں مردمانی تہ ءَ عبدالحکیم ءِ یل بیگ ءِ ھال وائس فار بلوچ مسنگ پرسنز ءَ راست کرتگ ءُ آد بیگواھیں مردمانی یل بیگ ءِ ھال کھولانی نیمگ ءَ راست کنگ بیتگ اَنت –

زانگ بہ بیت بلوچستان ءِ جتا جتائیں دمگاں پاکستانی پوج ءِ زوراکی ءُ لشکر کشی آوار جنی ءِ رِد یکشل ءَ برجاہ انت کہ بلوچستان ءَ ھزارانی ھساب ءَ ورنا، کماش سیاسی ءُ چاگردی باسکاں ھوار نودربر آوار جنگ ءُ بیگواہ کنگ بوتگ انت کہ آھانی تہ ءَ کمے کساس ءَ مردم یل کنگ بوتگ اَنت ءُ بازیں مردم کہ آیاں سالانی سال سرجم انت کہ روچ ء مروچی بیگواہ انت – بازیں مردمے ءِ زانگولیں جون دست کپتگ انت – ءُ لھتین ءَ دروگیں میڑ ءِ نام ءَ کُشگ چگل دیگ ءَ اِنت –

بلوچستان ءَ یل بیتگیں مردمانی بارو ءَ انسانی ھکانی واستا کار کنوکیں گلانی گوشگ اِنت یل بیتگیں مردمانی یل بیگ یک جوانیں گامگیجے باید سرکار بلوچستان ءِ دراھیں بیگواھیں مردماں یلو بہ کنت ءُ داں آیانی گِساں شاتمانی اتک بہ کنت –

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ ھرنائی ءَ پاکستانی پوج ءِ تر ءُ تاب کنوکیں کارمندانی سر ءَ سلاہ بندیں مردماں اُرش کرتگ، دومی نیمگ ءَ بلوچ آجوئی لوٹوکیں سلاہ بندیں گل بی ایل اے ءَ اُرش ءِ زمہ واری من اِتگ۔

پاکستانی پوج ءَ چہ بلوچستان ءَ بازیں سالاں اُرشانی دیمپانی کنگ کپگ اِنت ءُ چرے اُرشاں پوجی کارمنداں جانی ءُ مالی تاوانانی دیمپانی اِنت –

ھرنائی بلوچستان ءِ ھما دمگاں ھوار اِنت کہ اود ءَ پاکستانی پوج ءَ وھد وھد ءِ سر ءَ سلاہ بندیں مردم نشانگ کنگ ءَ اَنت –

گوستگیں شپ ءَ بیتگیں اُرش ءِ زمہ واری بلوچستان ءَ پرکاریں سلاہ بندیں گل بلوچ لبریشن آرمی ءِ جارکش جیئند بلوچ ءَ شنگ کرتگیں بیان ءَ منّ اِتگ –

بلوچ لبریشن آرمی ءِ جارکش جیئند بلوچ ءِ نیمگ ءَ رسانکدراں شنگ کرتگیں بیان ءِ رد ءَ پاکستانی پوج ھما وھد ءَ نشانگ کرتگ کہ آ تر ءُ تاب ءَ بیتگ ءُ چرے اُرش ءَ پوج ءِ کارمند مرتگ ءُ زدگ بیتگ اَنت ءُ گاڑی ءَ ھم تاوان بیتگ –

بلوچستان ءَ ھرنائی ءَ ابید ھم دگہ جاھاں بلوچ لبریشن آرمی ءَ ھوار دگہ سلاہ بندیں گل یکشل ءَ پاکستانی پوج ءِ سر بیوکیں اُرشانی زمہ واریاں منّگ ءَ اَنت –

بلوچ سلاہ بندیں گلانی گوشگ اِنت کہ اے اُرش پاکستانی پوج ءِ سر ءَ ھما وھد ءَ برجاہ مان اَنت کہ دانکہ آ وتی پوج ءَ بلوچستان ءَ بہ کش ایت ءُ بلوچ سرڈگار ءَ یلو بہ کنت –

بلوچستان ءَ ھورانی گوارگ ءَ بلوچستان ءَ جانی ءُ مالی تاوانانی دیمپانی –

ٹی بی پی پتر ھال ءَ سر بیتگیں ھالانی رد ءَ پشین ءِ دمگ بوستان کلی ریگی ءَ یک لوگے ءِ چھت ءِ کپگ ءِ سبب ءَ یکیں کھول ءِ پنچ مردم بیران بیتگ اَنت –

لیویز بنشون ءِ رد ءَ لیویز ءَ ھال ءِ سر بیگ ءَ وت ءَ وئیل جاہ ءَ سر کرتگ ءُ اود ءَ لیویز ءِ کارمنداں بیران بیتگیں مردمانی لاش کَش اِتگ ءُ پشین ھسپتال ءَ سر کرتگ اَنت –

ھالانی تہ ءَ گوشگ بیتگ کہ مھمد داود نامیں مردمے ءِ ھِشتی ءِ لوگ اچانگ ءَ گوستگیں شپ ءَ لُمب اِتگ ءُ کپتگ –

بیران بیتگیں مردمانی تہ ءَ مھمد داود ءُ آئی ءِ چار زھگ کہ آیانی اُمر دوازدہ سال ءَ بہ گر داں سَے سال ءَ ھوار اَنت –

گوستگیں شپ ءَ ھمے دمگ ءَ ھور ءَ ھم گورتگ ءُ چریشی ءِ سبب ءَ لوگ ءَ مِس کش اِتگ ءُ لوگ لُمب اِتگ ءُ کپتگ –

گوستگیں روچ ءَ بلوچستان ءِ جتا جتائیں جاھاں بشی ھورانی گوارگ ءَ ھپت مردم بیران بیتگ اِت اَنت –

ھمے وڑ ءَ گوستگیں روچ ءَ تربت ءَ توپانی ھورانی گوارگ ءَ ھار ءَ گاڑی ءِ بڈینتگ ءُ چریشی ءَ چُک ءُ زالبولاں ھوار چار مردم بیران –

وئیل پیدارک ءِ دمگ کلگ جمک ءَ پیش اتکگ کہ اود ءَ گاڑی ءِ آپ ءَ برتگ ءُ چریشی ءَ زالبول ءُ چکاں ھوار چار مردم بیران بیتگ اِت اَنت –

لیویز بنشون ءِ رد ءَ گاڑی ءِ ڈرائیور شکیل گنگزار ءِ لاش گوستگیں شپ ءَ در کنگ بیتگ ءُ دگہ دو زدگ بیتگیں کس ھم درکنگ ءُ ھسپتال ءَ سر کنگ بیتگ اَنت –

دگہ چک ءُ زالبولاں ھوار سَے مردم آپ ءَ برتگ اَنت ءُ اشانی تہ ءَ چِل ءُ پنچ سالی زالبولے ءِ لاش سھب ءَ گندگ بیتگ –

بلوچستان ءَ ھورانی گوارگ ءَ بجلی ءِ نزام ھم گار ءُ بیگواہ اِنت ءُ مروچی دوبر ھم ھوراں گوارگ بندات کرتگ ءُ بلوچستان ءَ مولم شناسان داں مروچیگ ءَ ھورانی گوارگ گُشتگ اَت –

ھمے وڑ ءَ لسبیلہ ءَ ھم ھورانی گوارگ ءَ راہ ءُ در بند بیتگ اَنت –

گیشیں ھالانی رد ءَ لسبیلہ ءَ ھورانی گوارگ ءَ کوراں ھار کرتگ ءُ ھب گڈان وندر، دریجی کنراج، اوتھل، لاکھڑا ءُ بیلار ءَ گورتگیں ھوراں کوراں ھار کرتگ ءُ راہ ءُ در بند بیتگ اَنت ءُ بجلی ءِ نزام بیگواہ –