TBP Balochi

سر بیتگیں ھالانی رد ءَ ڈیرہ بگٹی ءِ دمگ سوئی ءَ سرکاری پلامرزی ءَ ھستیں سلاہ بندیں گلانی وت ماں وت جنگ ءُ چوپ یک مردمے بیران –

گیشیں ھالانی رد ءَ جنگ ءُ چوہ ءِ وھد ءَ بیران بیتگیں مردم ءِ پجار موندرانی ٹک ءَ سیادی داروکیں مھمد امین موندرانی ء ھاسل بُگٹی ءِ نام ءَ زانگ بیتگ

دمگی مردمانی رد ءَ مھمد امین موندرانی دگہ ھوتکانی ٹک ءِ مردماں ھما وھد ءَ نشانگ کُرتگ وھدے وتی زھگ ءَ ھوار دوئیں پرپٹے ءَ سور گس ءَ رھادگ بوتگ اَنت۔

دمگی مردمانی رد ءَ مھمد امین موندرانی گوں وتی سرجمیں ٹک ءَ ساری بلوچستان ءِ آجوئی ءَ جنگ کنوکیں سِلاھبندیں گلے ءِ باسکے بوتگ۔ پد ءَ 2016 دژمن ءِ لب ءُ لالچ ءِ دیم ءَ سرجھل بوتگ ءُ دژمن ءَ ھوار بیتگ اَنت بلے بازیں راجدْروھیں ٹک ءُ کھول ءِ مردماں اے چیز بد بُرتگ ءُ وتی مردمانی بیر گِرگ ءِ تیاری کُتگ بلے پوج ءِ تُرس ءَ آ بے وس بیتگ اَنت۔

دمگی مردمانی رد ءَ نی چیزے ماہ بیتگ کہ نواب میر اَلی ءُ نواب شاھزین ءُ گھُرام ڈیرہ بگٹی ءِ میتگ آتکگ انت۔ پوج ءَ ڈیرہ بگٹی ءِ دمگ ءَ سرپراز بُگٹی ءُ نوابانی دست داتگ ءُ وت پشتونستان ءُ بلوچستان ءِ دگہ دمگاں پہ جنگ ءَ شُتگ اَنت۔ نی بازی سرجھل بوتگیں سِلاھبند وت ماں وت جنگ ءَ انت ءُ ھر ماہ ءَ جنگ ءُ مرگ ءِ ھال رسگ ءَ انت۔

دمگی مردمانی رد ءَ سرجمیں دمگ ءَ ناں سرکار ءِ زورے ھست ءُ نیکہ بلوچی دود ءُ رواجانی رِد ءَ راج ءِ وت ماں وتیں جنگ ءُ جیڑہ ھلاس بوگ ءَ انت۔ دژمن راج ءَ وت ماں وت جنگ ءُ جیڑھاں ودی کنان اِنت چریشی ءَ بیرانی دوئیں نیمگ ءَ بلوچ راج ءِ بوگ ءَ انت۔

بلوچستان ءِ دمگ کیچ ءِ بنجاھی شھر تربت ءَ مروچی بریسٹ کینسر ءِ سرپدی ءِ بارو ءَ ڈاکٹرانی نیمگ ءَ روانک کشگ بیتگ ءُ چریشی ءَ بازیں کچے ءَ ڈاکٹراں بھر زرتگ –

روانک ایم ایس ڈاکٹر لال جان، گائنی ڈپارٹمنٹ ءِ اسسٹنٹ پروفیسر ڈاکٹر روبینہ ءُ ڈاکٹر امتیاز ءِ سروکی ءَ جتا جتائیں تکاں بندوکیں ڈاکٹراں روانک ءَ بھر زرتگ –

روانک ایڈمن بلاک ءَ بندات بیتگ ءُ “شعبہ حادثات ءَ ھلاس بیتگ، روانک ءَ بھر زیروکیں مردمانی دستاں کینسر ءِ بارو ءَ نبشتگیں تاک ءُ بینر دست ءَ بیتگ اَنت –

روانک ءَ تران کنان ءَ ڈاکٹر روبینہ بلوچ ءَ گشتگ اَت کہ بریسٹ کینسر ءِ سرپدی ءِ نہ دیگ ءِ سبب ءَ چاگرد ءَ بازیں ھسابے ءَ زالبولانی ساہ ءُ جان زوال بیگ ءَ اَنت –

آئی ءَ گشتگ کہ بریسٹ کینسر ءِ بارو ءَ سرپدی ایش اِنت المی بیت آ نادراہ ءِ بارو ءَ تچک ءَ تچک گپ کنگ بہ بیت اِنت ءُ دانکہ آئی ءِ بارو ءَ گیش پَٹ ءُ پول کنگ ءَ دگہ جیڑہ مہ بیت اِنت-

ایم ایس تربت سول ھسپتال ڈاکٹر لال جان بلوچ ءَ گشتگ اَت کہ اے روانک ءِ مول ءُ مراد ایش اَنت کہ مردماں سرجم ءَ بریسٹ کینسر ءِ سرپدی زوت پٹ ءُ پول ءُ ھما وھد ءَ آئی ءِ جاندراھی ءِ واستا گامگیج زورگ ءُ مردماں گیشتر زالبول سرپد بہ بنت-

تربت ءَ سیمسر ٹریڈ ءَ گوں بندوکیں گاڑی ءِ واھنند ءُ ڈرائیوراں تربت پریس کلب ءِ دیم ءَ سیمسر ءَ بندی ، ٹوکن ھلاس کنگ ءُ سیمسر ٹریڈ یونین بگیری ءَ زھرشانی کتگ-

زھرشانی کنوکاں ٹریڈ یونین کلدار کماھینگ مشین گْوشتگ ءُ اشی سیادی ندارگ ءِ جار جتگ ءُ ناراہ بازی کتگ –

زھرشانی کنوکاں گپ ءُ تران کنان ءَ گْوشتگ رضا شاہ ، لالہ ءُ دگراں گْوشتگ ٹوکن سسٹم ءَ ھچ وڑ ءَ نہ منّ ایں ، ھرچ نوبت ءَ برے دوسد ءُ برے چار سد گوشگ بیت بلے یک گریبے ءَ ھم یک ٹوکنے نہ رس اِیت اشی ءَ چہ ڈرائیور ءَ درد بیت –

آھاں گْوشتگ کاگدانی سر ءَ ڈرائیور بگیری ءُ جنگ ءُ چوپ بوگ ءَ اِنت ما ھمے ھاتر ءَ لوٹ کن ایں ٹوکن ءِ سسٹم ھلاس کنگ بہ بیت سیمسر پچ کنگ بہ بیت اشی ءَ چہ مردماں کار ءُ بار ءِ مستر وت بنت –

آھاں گْوشتگ ایرانی توژگ نھاد کم اِنت اگاں سیمسر پچ بہ بیت گُڑا گران بھاھی کم بیت – اھاں گْوشتگ 2018 ءَ چہ ساری سیمسر کجام ڈول ءَ بوتگ ھمے وڑ پد ءَ پچ کنت بہ بیت ، مارا ٹریڈ یونین ھچ وڑ کبول نہ اِنت ، ایران ءَ چہ مئے سیادی ھست اَنت اگاں کسے ءِ سر ءَ پاکستانی پوج ءَ شک اِنت گُڑا آئی ءَ پٹ ءُ پول بہ کنت ، اگاں اے وڑ بزگی ءِ نشانگ کنگ بیت گُرا سیمسر ءَ سرجم ءَ بند بہ کن اَنت-

نبشتانک: دیوال ءِ نِبشتگیں لَبزاں مَہ کروج اِت

نبشتہ کار: ڈاکٹر شکیل بلوچ

دی بلوچستان پوسٹ

اِے دیوال ایوک ءَ مِکّیں دیوال نہ اَنت، اِے مکّیں دیوالانی زیمیں جَبین ءِ تہ ءَ اھدی کِسّہ نبشتگ اَنت، اِے دیوالانانی جبین ءِ سر ءَ مُریدی درد گْون اَنت بلے من اِے دیوالانی سر ءِ نبشتگیں لبزانی ارزشت ءُ مانا نُوں پَھم اِت کہ اِے دیوالانی سر ءِ لبزاناں درد مان اِنت، اِے لبزانی پُشدر ءَ یک اھدے کَل اِنت، اِے لبزانی تہ ءَ درد، بِچکند، یات، ترانگ، زھیر سرجم ءَ پتاتگ ءُ ایر اَنت بلے من اِے گپ ءَ تچک ءُ راست گْوشگ لوٹ آں کہ اِے درد بستیں لبزانی ارزشت ءَ ھما مردم پَھم اِت کنت کہ آئی ءِ وتی زندمان ءُ آئی ءِ دوستیں سنگت ءُ ھمبلانی یات نبشتگ اَنت وھدے کہ آ دیوال ءِ لبزاں چمشانکے دنت گُڑا آ یکبرے سرجم ءَ وتی گْوست ءِ ھیالانی تہ ءَ بیگْواہ بیت، آئی ءِ کُنٹیں جْون ھمد ءَ ساڑی بیت بلے آ گْوست ءِ ترانگاں گْوں انچش موج بیت کہ آ ھچبر ءَ چہ ھما وھد ءُ پاساں چہ در آیگ نہ لْوٹ اِیت اِے ساھتاں چہ گْوستگیں زمانگ ءِ ھیالانی تہ ءَ در آیگ ھمے پیم ءَ گْران اِنت انچش کہ مردم ءِ جبین ءَ چہ دل ءَ گْوں زوراکیں دستاں بِہ جَپّ ئے ءُ بِہ کَش ئے-

اَزگر ٹاکْور یک انچیں وشدل ءُ مِھروانیں سنگتے کہ آئی ءِ مِھر پہ وتی سنگتاں بے کساس اَنت ھو ڈے وھد من تئی گِلگ ءَ چہ کے بہ کن اِیں کہ تئی کدم انچش تیز انت کہ تو پہ وشّیں دور ءُ باریگ ءُ ساھتاں ھچبر نہ جلّ ئے اگاں تو بِہ جلّتین ئے گُڑا من وتی بے وپائیں اُمر ءِ یک دِگہ بھرے اوتھل وانگجاہ ءُ دوارگِس (ھاسٹل) ءَ گْوازینتگ اَت ما مُدامی وھدے کہ گمیگ ءُ مُلور بوتگ اِنت گُڑا چہ ھنگول دوراگس (ھاسٹل) ءَ در اتک ءُ دیم پہ مگسی دوارگس ءَ شُتگ اِنت پرچے کہ اود ءَ مِھرانی پُرکیلیں سنگت ساجُو (ساجد عظیم)، آبد گپُور، زاھد گل، ڈاکٹر عنایت، ءُ آدگہ سنگت جاھمنِند اِت اَنت وھدے کہ ما مگسی دوارگس ءَ شُت اِنت گُڑا زندمان ءِ گْرانیں گم ءِ بار کمّیں سُبَک بوت اَنت سنگتانی ٹھَک ءُ کندگ ءُ مزاکاں چہ اِے دنیا ءِ گماں مارا گِسر کرتگ اَت ھو ڈے وھد۔

مگسی دوارگس ءِ مزنیں دروازگ ءَ کہ مردم ءَ وتی پاد اْیر کرت گُڑا اولی ءَ آئی ءِ چَمّانی نِگاہ یک کْوٹی ءِ دروازگ ءَ کپت اَنت کہ آئی ءِ دروازگ ءِ سر ءَ نبشتہ اَت “مِیر ءِ گِدان”۔ بِزاں کہ اِے کْوٹی مِھروانیں اَزگر ٹاکور ءِ کْوٹی اَت کہ ایشی ءِ تہ ءِ دیوالانی سر ءَ اندوہ چکاریں لبز نبشتہ اَت کہ اَزگر ٹاکور وتی درد نبشتانکی دروشم ءَ اِے دیوالانی سر ءَ نبشتہ کرتگ ءُ سمار اِت اَنت۔

کْوٹی ءِ دیم ءَ ازگر ءِ سے پادیگیں سینکل ھم اوشتاتگ اَت کہ آئی ءِ پُشت ءَ لھتیں بلوچی شئر نبشتہ اَت۔ وھدے کہ ازگر ٹاکور ءَ سیاھیں چَشمکے چمّ ءَ اَت وتی سینکل ءَ گْوں شھدربرجاہ ءَ نودربرانی دیم ءَ گْوست گُڑا ھریکے ءَ اِے لبز الّم ونت اَنت ءُ اِے لبزانی بِزانت (مانا) پَھمگ لوٹ اِت ھریکے ءَ اِے لبزانی بِزانت وتی ھیال ءُ مارشتانء پیم ءَ مانا کُرت اَنت بلے ازگر ٹاکور اوتھل ءِ شھدربرجاہ ءَ سک نام اَت ءُ مشھور اَت اَزگر ءِ کْوٹی مئے سیاہ چاہ ءِ ورَگ ءُ گپّ ءُ دیوان ءِ جاہ اَت سک وش اِت اَنت آ گوستگیں دور ءُ بارِیگ، زاھد گُل مدام لچہ ءُ شِئر ونت، ساجو ءِ مَزاک ءُ کندگ، آبد گپور ءِ وش الھانیں توار ءَ شِئر جَنَگ کجام کِسّھاں بہ کن آں ؟ وھدے کہ من آ اھد ءِ یاتاں جْیڑ آں گُڑا من پَھک ءَ چہ وت ءَ بے سماہ بنت ءُ منی کُنٹ ھمد ءَ ایر اِنت بلے منی ارواہ گْوں گْوست ءِ یاتاں بندوک بیت۔

بلے وھد تو ھِچ نہ جلّ ئے تو انچش بے وپا ئے کہ تئی بے وپائی ءِ کسّہ کنگ نہ بیت وھد ءَ دُرستیں سنگت گِستہ کرت اَنت ھر یک سنگتے دیم پہ وتی میتگ ءُ ھنداں رھادگ بوت ءُ شُت اَنت نوں آ ھاسٹل ءُ آ کْوٹی، آ دیوان جاہ، آ جاہ ءِ نوکیں نودربر دُرست مارا پَجّا نیار اَنت نوکیں اھد ءَ وتی دروشم پَھک ءَ مَٹ کرتگ۔

یک روچے من شال ءَ اِت آں، من ءَ سک دیر اَت کہ من اوتھل شریپ دِیدار نہ کرتگ اَت، من ءَ زَھیراں انچو بے تاھیر کرتگ اَت۔ اناگت ءَ من وٹس اپ چار اِت کہ اَزگر ٹاکور ءِ پیامے (Messege) اھتگ اَت من آئی ءِ توار بند گْوش داشت، گُڑا آ گْوشگ ءَ اَت کہ شُما سکّیں بے وپا اِت، ھما اِنت کہ چہ اوتھل ءِ شھدربرجاہ وانگ دربُرتگ بلے واتر نہ اَتکگ اِت، مِیر ءِ گِدان ءِ دروازگ انگت ھر وھد ءَ پہ شُما پَچ اِنت آ دیوالانی سر ءِ نبشتگیں لبز انگت شُمئے مِھرانی ترانگاں گْیج اَنت، شمئے دیوان جاہ انگت ھْورک اِنت، اِے لبزاں من ءَ بے کساس بے تاھیر ءُ بے سماہ کُرت، من یکپارگی چہ شال ءَ در اھت آں منی ارواہ مگسی دوارگس ءَ “میر ءِ گدان” ءِ دیوالاں ھمباز کنگ ءَ اَت ایوک ءَ منی جْون اَت کہ شال ءَ پشتکپتگ اَت شال ھم مِھروان اِنت بلے شال ءَ من ءَ بے کساس پُروشتگ، شال ءَ من ءَ مِھر ءُ درد دوئیں بکشاتگ، من شال ءَ چہ گِلگ نہ کن آں پرچے کہ من وتی زندمان ءِ گْیشیں وھد اوتھل شریپ ءَ گْوازینت، پمیشکا من ءَ گْوں اوتھل شریپ ءَ مِھر اِنت، اوتھل شریپ من ءَ بے کساس مِھر دَنت، من ءَ درد ھم دنت بلے منی درداناں دوا ھم کنت اوتھل شریپ من ءَ پمیشکا گْیش دوست اِنت کہ آئی ءَ من ءَ گْوں سرجمیں بلوچستان ءَ پَجّاروکی کرتگ ءُ شال ءَ من ءَ درد داتگ، من ءَ بازیں رَند ءَ شال ءَ پُروشتگ، شال ءَ یک انچیں دردے داتگ کہ آ درد ءِ کِسّہ کنگ نہ بیت، اوتھل شریپ منی ارواہ ءِ سارتیں ساھگ اِنت یکبرے من پد ءَ اِے گپّ ءَ تچک کن آں کہ اوتھل شریپ ءَ من ءَ گْوں بلوچستان ءَ پَجّاروکی کُرتگ من ءَ گْوں منی “زندگی” ءَ پَجّاروکی کرتگ ھیر گپ باز اَنت بلے من وھدے کہ ازگَر ٹاکور ءَ جُست کرت کہ تو انگت مِیر ءِ گدان ءَ جاھمنند ئے، گُڑا آئی ءَ من ءَ پسّو دات کہ میر ءِ گدان دگہ لھتیں نودربراناں گْون انت بلے من انگت ھر روچ آئی ءِ دیدار ءَ روآں گپ ءُ دیوان کن آں، ھما نبشتگیں لبزاں وان آں، ھما دیوالاں چار آں پرچے کہ اِے لبزانی تہ ءَ بازیں درد نبشتہ اِنت، اے دیوالانی جبین ءَ منی مھرانی سنگتانی دُرّیں یات ءُ ترانگ نبشتہ اَنت بلے یک روچے منی کْوٹی ءِ تہ ءِ جاھممندیں سنگتاں من ءَ یک گپّے گْوشت کہ ما اِے دیوال ءِ لبزاں کروج اِنت نوں ءُ اِے دیوالاں گْوں نوکیں رنگاں گوناپ اَنت بلے اِے گپّاں من ءَ بے کساس تور اِتگ، گُڑا من آ نودربراناں اِے پسّو داتگ ءُ گْوشتگ کہ تاں من زندگ آں، تاں من اوتھل شریپ ءَ اوں، تئی من اِے کْوٹی ءَ روان ءُ کایاں من ھِچبر اِے نبشتگیں لبزاں کروجگ ءَ نیل آں، اِے لبزاں گْوں منی اُمر ءِ یک بھرے بندوک اِنت، اے دیوالانی تہ ءَ یک اھدے کَل اِنت۔ اِے کْوٹی زاھد گُل اِنت کہ دردناکیں شئر ءُ لچّھاں، اِے کْوٹی ءِ تہ ءَ ساجُو اِنت گْوں وتی سنگتانی مزاک ءُ کندگاں، اِے کْوٹی ءِ تہ ءَ آبد گپور اِنت گْوں وتی وشیں توار ءُ بِچکندگاں، اِے کْوٹی ءِ تہ ءَ تو ئے گْوں وتی مِھروانیں بِچکندگ ءُ بے بھائیں مِھراں من ءَ اِے دیوال، من ءَ اِے کوٹی، من ءَ اِے نبشتگیں لبز چو ساہ ءِ پیم ءَ دوست بنت کسّے کہ اِے لبزاں بِہ کروج اِیت گُڑا بِہ زاں کہ آئی ءَ منی زندمان ءِ نیم بھر کروج اِت ءُ ھاکاں دور دات ھو ڈے اوتھل شریپ تئی مِھر، تئی درد، تئی گم ھم وش اَنت ءُ تامدار اَنت پرچے کہ تو مارا گْوں سرجمیں بلوچستان ءَ پجّاروکی کرتگ ءُ من ءَ گْوں وتی “زندگی ءُ زندمان” ءَ پَجّاروکی کرتگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءَ دشت ءُ بالگتر ءَ پاکستانی پوج ءِ سر بیتگیں اُرشانی زمہ واری منّ اِتگ اَنت –

بی ایل ایف ءِ جارکش میجر گوھرام بلوچ ءَ رسانکدراں شنگ کرتگیں درشان ءِ تہ ءَ گُشتگ نوزدہ اکتوبر ءِ شپ ءِ ساھت ھشت ءَ سرمچاراں کیچ ءِ ھند دشت، پیروتگ ءَ ھستیں پوجی چوکی ءِ سر ءَ راکٹاں گوں اُرش کرتگ، راکٹ چوکی ءِ تہ ءَ کپتگ اَنت کہ چریشی ءَ پوج ءَ جانی ءُ مالی تاوانانی کنگ کپتگ –

آئی ءَ گُشتگ کہ بالگتر ءِ دمگ چیری گڈگی ءَ سرمچاراں نوزدہ اکتوبر ءِ سھب ءِ ساھت ھشت ءَ دشمنیں پوج ءِ کارمندانی راہ ءِ سر ءَ شورو کل کرتگ اَنت کہ چریشی ءِ زد ءَ اتکگیں یک پوجے ءِ مرتگ –

میجر گوھرام بلوچ ءَ گشتگ کہ زورگریں پوج ءُ آئی ءِ کمکارانی سر ءَ اُرش بلوچستان ءِ آجوئی ءَ داں برجاہ بنت-

نبشتانک: پاکستان ءِ نزوری ءُ بلوچ راج ءِ آجوئی جُنز

نبشتہ کار : شاری بلوچ

دی بلوچستان پوسٹ

وھدے کہ 1971 ءَ بنگلہ دیش چہ پاکستان ءَ آجو بوت ءُ یک جُتائیں مُلکے جوڑ بوت گُڑا بنگلہ دیش ءِ تہ ءَ راجدوستی یے ودی بوت چوناھا ھمے بنگالیاں دْروگیں پاکستان اڈ کُتگ اَت چے ءَ کہ انگریزانی کاسگ چٹّیں انڈین مسلم لیگ ءِ سیاسی گل 1905 ءَ ڈھاکہ ءَ اڈ دیگ بوتگ اَت۔ ھر کس سرپد اِنت کہ پاکستان ءِ سکیم بنگالی راج ءُ یو پی ءِ لھتیں کاسگ چٹّیں نوابانی واھشت اَت انچوشکہ آیاں مار اِت کہ ھندوستان ءِ آجوئی ءَ پد ھندو راجدوست آیاں راجدْروھی ءِ سزا دنت چے ءَ کہ ھمے لیاکت الی ھان، مھمد اَلی جناہ ءُ الامہ اکبال مُدام زورگِریں انگریز ءِ کاسگ چٹّ اِت انت۔ وھدے کہ بنگالی راج ءَ چہ پاکستانی پوج ءِ دست ءَ چُکچینی، زالبولانی سر ءَ زُلم ءُ زِنا ءَ ھوار دگہ کماشانی کم شرپی ءُ لگتمالی ءِ دُچار کپت اَنت گُڑا بنگالی راج ءِ تہ ءَ پاکستانی پوج ءُ پنجابی راج ءِ سر ءَ یک کست ءُ نپرتے ودی بوت دُنیا ءِ آشوبی مردم گْوش اَنت کہ نپرت یک راجے ءِ آشوب ءُ گُلامیں راجانی آجوئی ءِ جُنز ءِ بُنگیج اِنت۔ داں وھدے کہ یک گُلامیں راجے وتی سر ءَ زُلم ءُ زوراکیاں نہ مار ایت آ راج ءِ تہ ءَ آشوبے ودی نہ بیت ، داں وھدے کہ گُلام وتی زورگِر ءِ سر ءَ نپرت ودی مہ کنت آ ھچبر آجو نہ بیت۔ بزاں پہ وتی راجی آجوئی ءَ ھر راجے ءَ دژمن ءِ ھلاپ ءَ نپرت ءُ کینگ ودی کنگ لوٹ ایت گُڑا آ راج آجو بیت۔

نی ما گپ کن ایں کہ یک گُلامیں راج ءِ تہ ءَ نپرت چون ودی بیت؟ مارا چے کنگ لوٹ ایت کہ بلوچ راج ءِ تہ ءَ دژمن ءِ ھلاپ ءَ نپرت ودی بہ کن ایں؟ چوناھا سرجمیں بلوچ راج پاکستان ءَ نپرت کنت ءُ مرچی سرجمیں بلوچ راج سرپد اِنت کہ پنجابی پوج بلوچ راج ءِ سر ءَ وڑ وڑیں زُلم ءُ کھر کنگ ءَ انت۔ ھزارانی کچ ءَ بلوچ ورنائیں نودربر شھید کنگ بوت اَنت ءُ ھزارانی کچ ءَ انگت گار ءُ بیگواہ اَنت، ھزارانی کچ ءَ بلوچ راج ءِ ورناہ ءُ کماش دژمن ءِ آزرجاہ ءُ زِندان ءِ تھاریں کوٹیاں لٹ شاپی ءُ گُژن ءِ آماچ اَنت ، بلوچ راج ءِ گِس ماندار دیگ بوت اَنت۔ بلوچ راج ءِ ٹیل، گیس، کوئلہ، تنگو، زِر ءُ دگہ ھزاریں مال ءُ مڈّی پُلگ بوگ ءَ اِنت، مرچی کوہ، شھر، کوچگ ءُ میتگانی تہ ءَ ھر روچ بلوچ راج ءِ کسانیں چُکاں بہ گِر داں کماشیں شْوانگ شھید کنگ بوگ ءَ اَنت ، بلوچ راج ءِ زُبان، دود ءُ ربیدگ لگتمالی ءِ آماچ اَنت بزاں اے دْراہ دژمن ءِ وتی مھربانی اِنت کہ بلوچ راج ئِے سرپد کُت کہ ما پنجابی تئی سر ءَ زورآور ایں ءُ تو بلوچ یک گُلامیں راجے ئے۔ ما تئی زُبان، دود ءُ ربیدگاں یکشل ءَ لگتمال کنان ایں۔ اے دژمن ءِ زُلم ءُ زوراکیانی آسر اِنت کہ شھید بانُک کریمہ بلوچ ءِ وڑیں زالبولیں رھشُون راج ءِ دیم ءَ آتکگ ءُ وتی ساہ ئِے پہ راجی آجوئی ءَ ندر کُتگ چمیشکا مرچی بلوچ راج ءِ آجوئی ءِ جُنز ءُ راجی سوبمندیں آشوب ءَ بلوچ زالبوال دیم ءَ بران اَنت۔ وھدے کہ یک راجے ءِ زالبوالاں راجی آجوئی ءِ آگاھی ءُ سرپدی بوت گُڑا بزاں آشوب سوبمند انت۔ وھدے کہ یک راجے ءَ بے کساس کُربانی داتگ ءُ آزاتی گپت، پد ءَ دژمن ءِ دپچٹ، کاسگ چٹّ ءُ راجدْروھاں سزا ئِے داتگ گُڑا آ راج یک راجے جوڑ بیت، راج ءِ لس مھلوک وتن دوست بیت، راجدوست بیت پد ءَ مُلک ئِے ھم ھر پھنات ءَ بے کساس دیمروئی کنت۔ انچوشکہ بنگلہ دیش مئے دیم ءَ انت۔ اگاں یک مُلکے بے کُربانی ءَ ٹھینگ بوت گُڑا آئی ءِ راج ءِ تہ ءَ ناں راجے بیت ءُ نیکہ راجدوستی یے بیت ئِے بلکیں مُدام سِلکاری ءِ آماچ بیت۔ آ مُپتیں مُلک ءِ مُلکار (سیاستدان) سِلکار بنت بلکیں سرجمیں لس مھلوک سِلکار بیت ئِے انچوچکہ پاکستان اِنت۔

بنگلہ دیش ءِ مھلوک ءَ دژمن ءِ ھر وڑیں کُشت، زُلم ءُ لگتمالی سگ اِت ءُ وت ءَ آجو کُت۔ آجوئی ءَ پد بنگلہ دیش ءِ سرکار ءَ پاکستانی کاسگ چٹّیں جمائت اسلامی ءِ سِلاھبندیں گل وتگڑیں رزاکار ، الشمش ءُ البدر ءِ کارندہ راجدْروھی ءِ بھتم ءَ یک یکی ءَ پاھو داتگ انت۔ ھمے لگتمالی، کُربانی ءُ بیرانی ءَ پد بنگلہ دیش راج ءِ تہ ءَ راجدوستی ءِ مارشت ودی بوتگ اَنت چمیشکا مرچاں بنگلہ دیش ءَ سک دیمروئی کُتگ۔

وھدے کہ 1971 ءَ بنگلہ دیش چہ پاکستان ءَ آجو بوت گُڑا 1975 ءَ پاکستان ءِ جی ڈی پی 28 بلین ڈالر اَت ءُ بنگلہ دیش 10 بلین ڈالر اَت، 1990 ءَ پاکستان ءِ جی ڈی پی 40 ءُ بنگلہ دیش ءِ 31 بلین ڈالر اَت ، 2010 ءَ پاکستان ءِ 168 ءُ بنگلہ دیش ءِ 100 بلین ڈالر ، 2018 ءَ پاکستان ءِ 314 بلین ٖڈالر ءُ بنگلہ دیش ءِ 274 بلین ڈالر بلے مرچی 2021 ءَ پاکستان پُشت ءَ روان انت پاکستان ءِ مرچی جی ڈی پی چہ 314 ءِ پُشت ءَ آتک ءُ 263 اِنت ءُ گیشتر جھل ءَ روان انت دومی نیمگ ءَ بنگلہ دیش ءِ جی ڈی پی 324 بلین ڈالر انت۔ یک بنگالی یے ءِ ماہ ءِ کساس کمائی 2300 ڈالر ءُ پاکستان ءِ 1200 ڈالر انت۔ دومی نیمگ ءَ پاکستان 122 بلین ڈالر ءِ وامدار ھم ھست۔ پاکستان ءِ روپیہ ءَ ڈالر ءِ دیم ءَ ھمروچ کپان انت۔ یک ڈالر 175 پاکستانی روپیہ ءُ 84 بنگالی ٹکا ءَ انت۔ یک پاکستانی روپیہ 0.45 بنگالی ٹکہ انت بزاں 2.03 پاکستانی روپیہ یک بنگالی ءِ برابر انت۔ بنگلہ دیش یک راجدوستیں راجے ءِ مُلک اِنت کہ پہ وتی راجی آجوئی ءَ بے کساس کُربانی ئِے داتگ اَت بلے دومی نیمگ ءَ مُپتیں پاکستان کہ انگریزاں ٹھینتگ اَت پمیشکا پاکستان نی یک اکونومک تباھی ءِ نیمگ ءَ روان انت چے ءَ پاکستان ءِ تہ ءِ کس راجدوست انت کہ اے چیزاں بہ مار ایت کہ چے ءَ پُشت ءَ روان ایں۔ بلے من چہ ترا یک جُستے کن آں کہ زاناں تو اے چیز ءَ سرپد ئے کہ اے چے ءَ بوگ ءَ انت؟ بلکیں تو ھم سرپد نہ ئے یا تو ھم اے چیز ھچبر نہ جیڑ اتگ۔ چوناھا مارا جیڑگ ھم نہ لوٹ ایت! بِہ گِند ئے اگاں پاکستانی وت پہ وتی مُلک ءِ دیمرئی ءُ بیرانی ءَ نہ جیڑ اَنت گُڑا ما پرچا وتی سر ءَ درد بہ دے ایں۔

البت مارا کمیں دژمن ءِ بابت ءَ وانگ ءُ سرپد بوگ لوٹ ایت کہ زاناں دژمن ءَ ھاٹیگ ھست یا روچ ماں روچ نزور بوُان انت؟ مرچاں پاکستان ءَ فوڈ انفلیشن 15 در سد انت بلے دومی نیمگ ءَ ھندوستان ءُ بنگلہ دیش ءَ فوڈ انفلیشن 1 در سد انت پمیشکا پاکستان ءَ آرت، برنج، روگن، شکر ، دال، گوشت ءُ دوائی ءِ وڑیں ھر ورگی چیز گِران بوان اَنت ءُ اے چیزاں پاکستان ءِ کوڑائیں رھشُون وتی راج ءِ دیم ءَ نیار اَنت۔ البت اے کوڑائیں پاکستانی رھشُون جْوان سرپد اَنت کہ اے گِرانبھائی، ڈالر ءِ دیم ءَ روپیہ ءِ کپگ ءُ بے کساس وامدار بوگ ءِ سوب چے اَنت بلے وتی پاکستانی لس مھوک ءِ دیم ءَ اے چیزاں نیار اَنت چے ءَ کہ اے تُرس اَنت کہ راستی پاکستانی لس مھلوک ءِ دیم ءَ مئیت۔ وھدیکہ راستی دیم ءَ آتک گُڑا پاکستان پْروش ایت۔
راستی ایش انت کہ پاکستانی پوج یک چیرجنگے(گوریلہ وار) ءِ آماچ اِنت۔ پشتونستان ءَ بگر داں سرجمیں بلوچستان ءَ پاکستان ءِ پوج ھر کوہ ءُ کوچگاں ٹی ٹی پی ءِ مُلائیں جنگول ءُ آزات ھیالیں بلوچستان ءِ سرمچارانی ھکل ءُ اُرشانی آماچ انت۔ 2001 ءَ بگر داں 2015 ءَ پاکستان ءَ اوگانستان ءِ جنگ ءَ کولیشن سپورٹ پنڈ، نان نیٹو آلائینس ءُ امریکی فرنٹ لائین آلائی ءِ نام ءَ بے کساس زر کمائینگ ءَ ات۔ بہ گِند ئے 1980 ءِ دھک ءَ امریکہ ءُ سھودی اَرب ءَ ھوار دِگہ بازیں ارب مُلکاں سوت روس ءِ ھلاپ ءَ پاکستان ءَ سک باز سِلاہ ءُ زر ھم داتگ بلے نی 2021 ءَ امریکہ ءَ وت ءَ چہ اوگانستان ءَ کش ات ءُ پاکستان نی ایپ اے ٹی ایپ ٹی ءِ گرے لِسٹ ءَ اَنت بلکیں سیاھیں لِسٹ ءَ ھم بئیت۔ امریکہ ءَ 20 سال ءَ ماں اوگانستان ءَ 2.3 ٹریلین ڈالر پہ کاسگ چٹّانی پلہ مُرزی ءُ جنگ ءَ ھرچ کُتگ اَت بزاں ھر روچ 33 ملین ڈالر جنگ ءَ ھرچگ بوتگ اَت۔ دومی مُدام امریکہ ءَ پاکستان ءِ دژمب ٹی ٹی پی ءِ رھشُون کُشتگ اَنت ناں کہ پاکستان ءَ ! نی وھدیکہ امریکہ چہ آتراپ ءَ شُت، انی ٹی ٹی پی ھر روچ دیمروئی کنان ءَ پاکستانی لشکر ءِ سر ءَ تْرُندیں اُرشاں کنگ ءَ انت ءُ پاکستان ءِ جنگی ھرچگ ھم سک باز بوُان اَنت۔ بِہ گِند ئے پاکستان ھندوستان ءِ سِیمراں ھم جنگی جاوران انت دومی نیمگ ءَ پشتونستان ءُ بلوچستان ءِ تہ ءَ ھم چیر جنگ ءِ آماچ اِنت کہ ھر روچ پاکستانی پوج ءَ جنگی تاوان بنت۔

راستی وَ ایش اِنت کہ اے دْراہ چیر جنگ ءِ سان اَنت کہ لس پاکستانی بیرانی ءِ آماچ اِنت۔ نوکیں ھال اِنت کہ پہ ڈاسو ڈیم ءِ مُرتگیں نو چینی انجینئرانی کھول ءَ چینی سرکار ءَ چہ پاکستان ءَ 38 میلین ڈالر ءِ لوٹ کُتگ۔ یک نیمگے ءَ ھمے یکیں اُرش ءَ ڈاسو ڈیم ءِ کار پہ دائمی بند بوتگ اَنت، ھزارانی ھساب ءَ پاکستانی مھلوک کہ اے پروجیکٹ ءَ پوریاگِری کنگ ءَ ات اَنت مرچاں بے روزگار اَنت دومی چہ پاکستان ءَ بلاھیں زرے ءِ لوٹ ھم بیتگ۔ ھمے پیم ءَ گْوادر ءَ ھم پاکستان بیرانی ءِ آماچ انت ءُ چین وتی دْروگیں سی پی سی سی ءِ پروجیکٹ ءَ کراچی ءِ نیمگ ءَ لڈّ ءُ بوج کنگ ءَ انت بلکیں نی دیمی سال ءَ سی پی ای سی ءِ وامانی بول آیوک اِنت۔ پاکستان ءَ اے گِرانبھائی، جی ڈی پی ءِ جھل کپگ ءُ اکانومی ءِ بیرانی ءِ سبب پاکستان ءِ پشتونستان ءُ بلوچستان ءِ تہ ءَ چیر جنگ اَنت کہ پاکستان کاسگ چٹّ ءُ جنگی ھرچگاں بیران کُتگ بلے راج ئِے انگت بے سما اِنت۔

البت پاکستان ءِ سِلکاریں سیاسی ءُ لشکری کوڑائیں رھشُون اے چیزاں سرپد اَنت بلے گپ نہ کن اَنت کہ تُرس ءِ آماچ اَنت۔ چوناھا پاکستان مپت ءَ ایشاں رستگ ءُ مپتیں چیزاں ھچ بستار نیست انت۔ بچار اِت کہ اگاں امریکہ چیرجنگ ءِ ھرچاں برداشت نہ کنت گُڑا پنٖڈوکیں پاکستان ءِ چے ھاٹیگ ءُ بستارے بیت کہ پشتونستان ءُ بلوچستان ءِ چیرجنگ ءِ دیم اوشت ایت۔ دومی نیمگ ءَ اوگانستان ءَ دائیش، الکائدہ ءُ تالبان ءِ جنگ ءُ جیڑہ پاکستان ءَ پاکستان ءَ بیرانی دے اَنت۔ آیوکیں یک دو سال پہ مُپتیں پاکستان ءَ سک ھراب اَنت۔ پاکستان ناں کہ راجے ءُ پاکستان ءَ نَیکہ راجدوستی یے ھست۔ پاکستان ءَ مرچی راجدوستیں رھشُون ھم نیست دْراہ سِلکار ءُ بدواہ اَنت۔ پاکستان ءِ لس مھلوک ھم ھرامزادگ اَنت کہ وتی سِلکاریں مُلکارانی ھلاپ زھرشانی نہ کن اَنت انچوشکہ یک راجے ءِ لس مھلوک راجدوستی ءِ مھر ءَ چہ گِس ءَ درکپان ءَ زالمیں ھکمرانانی سر ءَ زھرشانی کنان ءَ آشوب ودی کن اَنت۔ پاکستان ءِ نزوری بے کساس اَنت باید آشوبی بلوچ راجدوست چہ پاکستان ءِ نزوریاں پائدگ بہ زور ایت۔ باید انت بلوچ راجی تپاک ءُ یکمُشت بہ بیت ءُ وتی راجی آجوئی ءِ جُنز ءَ دیم ءَ بران بہ کن اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

جماعت اسلامی بلوچستان ءِ جنرل سیکرٹری ءُ گوادر ءِ حق دو تحریک ءِ سروک مولوی ھدایت الرحمان ءَ سَے شمبے ءِ روچ ءَ تربت پریس کلب ءِ دیم ھَ گپ کنان ءَ گشتگ اَت کہ چہ گوادر ءَ نوزدہ اگست ءَ ھک، ازت ءُ سرڈگار ءِ واستا مھرانی زرمبشت بنا بیتگ کہ اے مردمانی ئیگ اِنت –

آئی ءَ گشتگ کہ اے زرمبشت ءَ سرجمین بلوچستان ءَ تالان کن آں ءُ داں اسلام آناد ءَ اے زرمبشت ءَ براں –

ما اے سرڈگار ءِ جھمنند اِنت ءُ اد ءَ مڈیانی واھند ما اِنت مارا وتی سرڈگار ءِ جھلتریں شھریانی رنگ ھچ رنگ ءَ کبول نہ اِنت بلوچستان کالونی ءُ بلوچستان ءِ مھلوک گلام سرپد بیگ ءَ اَنت نِی کالونی ءِ رنگ ءَ ھچ وڑ ءَ منّگ نہ بیت اِنت مئے سرڈگار ءِ پرگنجیں مڈیاں لُٹ ءُ برگ ءَ اَنت-

آئی ءَ گشتگ اَت کہ مئے مڈیاِں شیر مادر سرپد بنت بے کساس برگ ءَ انت ئِے – اے سرڈگار ءِ سر ءَ دراتکگیں سوئی گیس ءُ سھر اد ءِ مردمانی ھک نہ اَنت بلے بارڈر ءَ ھواریں لکانی مردم کہ روزگار کنگ ءَ اَنت بلے آیاں اے ھک نیست اِنت –

آئی ءَ گشتگ اَت کہ ھپت سد کلومیٹر گران بھائیں زر اللہ ءَ مارا داتگ بلے دریاورداں اشی ءِ ھک نیست اِنت، بارڈر ءِ سر ءَ نندوکیں مردم شد ءِ آماچ اَنت یک زانت ءُ شوربندی ءَ بلوچستان ءِ مھلوک شد ءِ دیمپان کنگ بیگ ءَ اَنت – بارڈر وھدیکہ پچ بیتگ ءُ مئے زر ءَ ماھیگانی نسل کشی نہ بیتگ گڑا مردم وشھال اِت اَنت ءُ سر ء روزگار اِت اَنت یک شوربندی ءَ بارڈر ءُ زر بند کنگ ءُ سیکیورٹی ءِ جیڑوا کار ءُ بار ءَ بند کنگ ءُ مھلول ءِ زلیل کنگ بندات بیتگ اَنت –
آئی ءَ گشتگ کہ زُلم، زوراکی ءُ گیشیانی ھلاپ ءَ ھکانی پد جنی زرمبشت سرجمیں بلوچستان ءَ شنگ ءُ تالان بیگ ءَ اِنت، زر ءِ مڈی ءُ وتی مڈیانی واھند ما وت اِنت اشانی پھریزگ ءَ سیاسی گھگیری ءَ جاڑیگ اِنت پر امنیض رنگء ءَ جمھوری ءُ آئینی گھگیری ءِ بنکی تاکتاں ھک ءَ گریں –

آئی ءَ گشتگ کہ سِی ءُ یک اکتوبر ءَ راجدپتری نندانک بیت اِنت ءُ اے زرمبشت داں اسلام آباد ءَ شنگ ءُ تالان بیت اِنت بیست ءُ نُھ اکتوبر ءَ تربت ءَ مھلوک ءِ گون ءَ نند ءُ نیاد بیت اِنت ھمے رنگ ءَ سِی اکتوبر ءَ پنجگور ءَ مھلوک ءِ گون ءَ نند ءُ نیاد بیت اِنت –

مئت لوٹ بارڈر ءِ سر ءَ ٹوکن سسٹم ءِ ھلاس کنگ مھلوک ابید ءِ تکلیف ءُ جنجالاں آجوئیں رنگے ءَ کار ءَ اِلگ بہ بیت زر ءَ دریا وردانی سر ءَ جتگیں گیر آئینی پابندیانی دور کنگ دریاورد ابید ءِ دارگ ءَ وتی کار ءَ کرت بہ کن اَنت سیکورٹی پورسز وتی کار ءَ بہ کنت مھلوک ءَ بے روزگار مہ کنت اگاں مئے المی ءَ منّگ نہ بیت اَنت گڑا سرجمیں بلوچستان ءِ مھلوک یکجاہ کنگ ءُ زوراکی ءُ ناھکیانی ھلاپ ءُ زھرشانی بندات کنگ بنت –

آئی ءَ گشتگ کہ ما پر امن اِنت، جمھوری ءُ آئینی رنگ ءَ وتی مقدمہ ءَ گوں جنگ کن ایں ھما وھد ءَ داں ادارھانی رویش شر نہ بنت آجوئی ءِ رنگ ءَ کار ءُ بار، جان ءُ مال، ازت ءُ نپس ءِ پھریز، زر ءُ بارڈر ءَ کار ءُ بار نہ رس ایت بید ترس ءَ مھلوک ءِ گور ءَ روگ بیت ءُ شریں رنگے ءَ یکجاہ کنگ بنت –

آئی ءَ گشتگ کہ ما جماعت اسلامی ءَ جدا نہ اِنت آئی ءِ کمک ءَ اے زرمبشت ءَ دیم ءَ برگ ءَ اِنت اے زرمبشت ءَ ورنا ءُ مھلوک ھوار اَنت اے مھلوک ءِ زرمبشت اِنت ءُ جماعت اسلامی ءِ پالیسانی رد ءَ دو جھد کنگ ءَ اوں داں انگت ءَ جماعت اسلامی ءَ منی بیانانی تہ ءَ ایراد نہ گپتگ ءُ انگت ءَ چہ من ءَ پسو نہ لوٹ اِتگ –

آئی ءَ گشتگ کہ اے یک مھلوکی زرمبشتے ما اے سرڈگار ےِ نندوک اِنت ءُ سرڈگار ءِ وپادار اِنت بیوروکریسی ءُ گلامی ءُ لگتمالی کبول کنگ نہ بنت -ھما سیاسی زرمبشت مئے ھمایت ءَ یک بیانے دات نہ کنت آ سرڈگار ءِ واستا چی کربانی دات کنت بلے وتی زرمبشت ءِ وھد ءَ کسے ءَ دور نہ اَنت بلکیں سیاسی پاٹیاں الم گپ ءُ تران بیت اِنت –

ھوشاپ ءِ وئیل ءَ انتزامیہ ءِ کشگ اجکھی کنت بلوچستان ءِ سروزیر ءُ گورنر ءِ گپ منگ نہ بیت اِنت ڈپٹی کمشنر ءُ اے سی ءِ بستار چی اِنت ھما وھد ءَ انساپ ءَ گوں وتی چماں نہ گنداں ازباب گندی ءَ ھچبر اوست نہ داراں –

آئی ءَ گشتگ کہ دمگی بیوروکریسی ءِ وھد ءَ ملازمت ءَ وتی زمین ءُ وتی مردمانی گون ءَ وپاداری کنگ لوٹ ایت اِنت آ شاہ ءِ وپاداری ءَ اے کچ ءَ شت نہ کنت آئی ءِ واستا ایوک ءَ بس پشومانء ایر بنت مئے بیوروکریسیانی بژنی گپ ایش اِنت آ ریٹائرمنٹ پد راجدوست جوڑ بنت –

آئی ءَ گشتگ کہ جام ءِ سراار ءِ ھلاپ ءَ گیشیں زرمبشت ءِبتھء جنگ ءِ پژدر اَنت استانی سرکار سرجم ءَ بے سوب اِبت بلے سرکار ءِ ھلاپ ءَ ھمسنتیں گھگیری اِنت اے درست مھلوک ءِ لوٹانی واستا بیگ ءَ نہ اَنت-

آل تحصیل مند تمپ بنام ءِ شھید احمد مراد شھید داد اللہ بلوچ ءِ یات ءَ شکاری پٹبال کلب مند گوبرد نیمگ ءِ ٹورنمنٹ برجم دارگ بوتگ –

ٹورنمنٹ ءَ تمپ ءُ مند ءِ بیست ٹیماں بھر زرتگ – ٹورنمنٹ یک اکتوبر ءَ بندات کنگ بوتگ ءُ مروچی پائینل گوازی بوتگ کہ تمپ ءِ ٹیم حمل ظفر گومازی ءُ ون اسٹار گومازی ءِ ٹیم ءَ جوانی ءَ گوازی کنان ءَ وت ءَ پائینل ءَ سر کُتگ پائینل گوازی ءَ ون اسٹار ءُ حمل ظفر ءِ ٹیم ءَ جوانیں لیب پیش داشتگ ءُ ھردو ٹیم دیمیگ بوتگ انت پیلانٹی شوٹ ءَ ون اسٹار گومازی ءَ باج برتگ وِنر کپ دست گپتگ –

شکاری پٹبال کلب ءِ نیمگ ءَ آؤکیں مھمان رنر ءُ ونر ٹیم دلبڈی دئیگ بوتگ انت اتکگیں مھمان ءُ ٹورنمنٹ ءَ بھر زوروکیں لیبیانی منت گپتگ –

گچینی مھمان بلوچی زبان ءِ شائر ظفر اکبر، حکیم وپا، بلوچی زیمرکار خورشید بلوچ، مند ءُ تمپ ءِ دگہ مردماں ٹورنمنٹ اتکگ ءُ ٹورنمنٹ ءِ ستاشانی کرتگ ءُ ونر ٹیم ءِ کپٹن ماما ءَ چہ گچینی مھمانانی دست ءَ ونر کپ دست گپتگ گچینی مھماناں دومی لیبیانی داد بھر کرتگ انت –

ٹورنمنٹ ءِ مین آف دی سیریز شکاری پٹبال کلب گوبرد ءِ لیبی اسرار مراد بوتگ –

ونر ٹیم ون اسٹار گومازی ءَ کپٹن ماما ءِ سروکی ءَ جوانیں لیب پیش داشتگ وت ءَ پائینل ءَ آورتگ ءُ سرکتگ ونر ٹیم ءِ اولی گوزی شھید گُل بلوچ آباد، دومی راؤنڈ ءَ بلبل بلوچستان ھوزئی، سیمی پائینل ءَ واجہ نور سورو ءِ دیم ءَ باج برتگ-

بلوچستان ءِ دمگ آواران ، دشت ، بالگتر ءَ پاکستانی پوج ءِ سر ءَ ناشناسیں سلاہ بنداں مردماں اُرش کتگ-

سربوتگیں ھالانی رِد ءَ آواران ءِ دمگ جھاؤ ءَ نونڈڑہ تلارک ءِ ھند ءَ پاکستانی پوج ءِ چوکی ءِ سر ءَ ناشناسیں سلاہ بندیں مردماں اُرش کتگ –

اُرش ءِ آسر ءَ پاکستانی پوج ءَ تاوان چست کنگ کپتگ-

ھمے وڑ مروچی سُھب ءَ ساھت ھشت ءَ ناشناسیں مردماں پاکستانی پوج ءِ راہ ءِ سر ءَ شورو چیر کتگ ءُ پوج شوروانی نشانگ ءَ اَتکگ ءُ جانی تاوانانی چست کنگ ءِ گمان اِنت-

دگہ یک اُرشے دشت ءِ دمگ پیروتگ ءَ ساھت ھشت ءَ پاکستانی پوج چوکی ءِ سر ءَ ناشناسیں سلاہ بندیں مردماں گوں ٹوھیں ءُ راکٹاں اُرش کتگ –

اے اُرش ءِ آسر ءَ پاکستانی پوج ءَ تاوان ءِ گمان اِنت-

اے بوتگیں جتاجتائیں اُرشانی زمہ واری انگت ھچ گل ءَ نہ زرتگ اَنت نانکہ سرکاری بنشون ءِ نیمگ ءَ اے اُرشانی درگت ءَ درشان شِنگ کتگ-

نبشتانک: نوں مارا مزار نیست اِنت

نبشتہ کار : بھادُر بلوچ

اولی بھر

دی بلوچستان پوسٹ

مُدّتے بیت کہ ند پہ نبشتانکے ءِ نبشتہ کنگ ءَ دست ءَ نہ کتگ، امروز ءِ کسانیں کسانیں کار ءُ دزگٹّیاں مردماں وتی وڑ ءَ کتگ، مَجّگ ءَ اوں گُش ئے پیسریگیں وڑ ءَ کار یلہ داتگ، چوناھا لبزانکی مارشتانی انچیں زورے کہ مردماں پہ ھاموش بوّگ ءَ وت نیل ایت بلے باور بہ کن اِت ماھو کہ منی دگنیا اِنت، چوشیں ساھتے نیست کہ چرآئی ءِ مِھروانیں مھراں بے ترانگ بہ باں، شَھرّنگیں ھون ءِ تہ ءَ آئی ءِ یات اَنت کہ گردش کن اَنت یا کہ ایدگہ دگنیا ءِ وئیل ءُ جاور بہ بنت بلے ھرام اِنت اے سُن بیتگیں ساہ پہ کَسّے ءَ ٹُکّرے اوں نبشتہ بہ کنت بلے مرچی اے کجام زور اَنت کہ دستے لنکُکاں وت ھبر پرماھگ ءَ اَنت، دل ءُ دماگے تہ ءَ بے چاڑی یے داب ءَ ایر کپتگ کہ بہ لِک، مرچی وتی ھاموشی ءِ دگنیا ءَ کَروج ایت ءُ سُن مہ بیت کہ پہ تو نوں ھچ نہ مَنّ اتگ، مھشر ءَ دگہ کانٹے پِر نیست، آزمان چد ءُ گیش ایر نئیت، مہ تُرس، دل مجن، نبیسّان بہ کن۔

بلوچستان کہ یک جنگی جاورے ءِ تہ ءَ اِنت، بلوچ وتی راجی ھستی ءُ راجی تباھی ءِ میان ءَ جاورانی تہ ءَ اِنت، اے جنگ ءَ اگاں بلوچ گوں وتی جنگی رِپک ءُ ھُنراں چہ دژمن ءَ گیش شیوار بوت، جنگی سرجمیں لوٹانی پیلو کنگ زانت، گڑا باندات ءَ آ وتی راجی ھستی گوں زندگ بوت کنت اگاں دژمن ءِ جنگی چال بلوچ ءَ نہ پھم اِت اَنت گڑا بزانکہ بلوچ ءِ باندات یک تھاریں تباھی یے نیمگ ءَ روان اِنت مرچی بیست (یا کمیں گیش) سال ءِ بلوچ راجی آزاتی ءِ گھگری ءَ بلوچ ءَ یک گِھیں کُتھکاری (تَجرْبَگے) داتگ، گْوستگیں پانزدہ بیست سالانی جنگ ءَ نگدی یے چمّاں بچار ئے تاں بے کِساس سوبمندیاں ھوار ، البت بے سوبیانی اوں یک مزنیں بھرے ھست اِنت۔

چیرجنگ (گوریلہ جنگ): چیرجنگ ءِ لوٹ، جنگی مول ءُ مُراد ھوار آئی ءِ مُسام (ڈسپلین) نہ بوگ (یا باز کم) برابر ءَ بوتگ اَنت۔ جنگی لوٹ ءُ مُراداں گیش جُھدکاراں وتی تب ءِ پد ءَ جنگ داشتگ۔ ھمے نازانتیانی سوب اِنت کہ مرچی ما اے جاہ ءَ سر بوتگ اِیں۔ بلے جست ایش اِنت کہ زاناں نوں چے کنگ لوٹ ایت؟ ھمے جست ءِ پسہ ءَ وھدے کہ ما مرچی بلوچ سرمچارانی کارپدانی (کاروائیانی) بنیات ءَ چار ایں گڑا سما بیت کہ اے وھد ءَ بلکیں بلوچ جُھدکاراں اے جُست کمّیں ورگ ءَ اِنت کہ جنگ گوں نوکیں پِڑ ءُ کارانی بنیات ءَ کم ءُ باز مٹ بوتگ۔ جنگی رپک ءُ ھُنر گیش گندگ ءَ کئیت اِنت۔ بلوچ چیرجنگ ءِ بُندری لوٹ ءُ بنیات ءَ دژمن ءِ سر ءَ انچیں وھد، انچیں جاہ، انچیں کارپدانی بنیات ءَ اُرش کنگ ءَ اِنت کہ اے چہ آئی ءِ ھیال ءُ گُمان ءَ ڈن اَنت ءُ مرچیگیں اے جنگ ءِ شون دیوک پوزیشن ءَ بلوچ ورناھانی ھم یک ھاسیں کردے ءُ بھرے ھست۔

چہ ساھتے ءَ پیسر ھر روچ ءِ ڈولءَ من وتی سنگتانی دیوانے ءَ نشتگ اِت آں، روچ ءَ ایر داتگ اَت ءُ آزمان نوں استالاں سبھینگ ءَ اَت، چاہ ءُ چلیم اَت، گپ ءُ تران ، کندگ ءُ مزاک اَت بلے بامرد (کہ گپ ءُ مسکرایانی مُدام بھرے بوتگ) مرچی بے توار ءُ ملور ات، کمّیں منی گور ءَ کِنز اِت ءُ وتی گْوانکو منی دیم ءَ ایر کت ئِے۔ گُڑا جُست ئِے کُتگ “تو اے ھالءَ سرپد ئے؟” من ھچ نہ گُشت ءُ نوں مئے ھردوانی میانءَ ھاموشی یے ودی بوت۔

مزار جان ءِ اَکس اِنت، وتی ڈیھ ءِ ھاک ءَ گوں انچو پیوست اِنت کہ ماتے وتی زھگ ءَ پہ بَلاہ زور بہ بیت۔ یک ایردستیں چاگردے ءِ ھکّی ئیں آشوبکار ھمیش اَنت، دژمن ءِ چمّانی تہ ءَ چم ایر کنگ، ھزاراں جنجالاں گوں زند گوازینگ، ھر روچ زند ءُ مرگ ءِ نیام ءَ زندگی کنگ وَ کمال اِنت۔ بہ گِند ئے چہ زبان ءَ اُپے اوں نہ کش اَنت۔ دژمن ھمے کہ سرمچارے شھید کنت، گَل ءَ بال بیت کہ مرچی من سرمچارے جتگ بلے اے نہ زانت کہ آشوبیانی زند چہ مرگ ءَ بندات بیت۔ اے جون کہ گوں وتی ڈیھ ءَ چو پیوست اِنت، دیم پہ دیمی جنگ ءَ شھید بوتگیں زندگی وَ کسے ئیگ اِنت، اے ھما کس اِنت کہ آئی ءَ ھزار بار اے سُھر سریں تیرانی دیمپانی کتگ ، اے یک تمردیں سپاھی یے ءِ جون اِنت، یک جنگی استادے ءِ ، استاد بگندئے جسمانی رنگ ءَ رپتگ بلے آئی ءِ جنگی ازم بِھ مُرت نہ کنت۔ بِگِند ئے آئی ءَ زی ھم بلوچستان ءِ تہ ءَ پوجی بُنجل مان رُپتگ ءُ برتگ اَنت ءُ باندا ھم آئی ءَ چہ گیش ھمے کار ءَ گوں نوکیں دْروشمے ءَ برجاہ بنت دمانے پیسر ءَ مئے سیاسی دیوان سیاسی ڈسکیشن کنگ ءَ اَت “انٹرنیشنل سیاست ءِ بدل بؤکیں تب ءِ سر ءَ گپ اَت، آتراپ (ریجن) ءِ مٹ بؤکیں جاور ءُ آیانی بلوچستان ءِ سر ءَ آؤکیں سانانی (اسراتانی) سر ءَ گپ اَت، دومی نیمگ ءَ اے یک مزنیں بیمّے مارگ بوگ ءَ اَت کہ چائنہ ءُ ایدگہ تاکتوریں ریاست مارا (بلوچاں) چو اژدھا ءَ ایر بر اَنت ،بوت کنت پہ بلوچ ءَ ھچ پشت اوں مہ کپ ایت، دیمروئی ءِ نام ءَ ڈیھ ءِ مڈی جتائیں پروگرامانی لالچ ءَ لٹ ءُ پل کنگ بوّگ ءَ اَنت، “ڈیوائیڈ اینڈ رول” والا پالیسی ءَ پاکستان تاں مرچی کارمرز کنگ ءَ انت، بلوچ ءِ ڈیھ ءَ بھر ءُ بانگ کنگ ءَ اِنت، ھَندی مھلوکاں لڈینگ ءُ آیانی جاھاں وتی مھلوک ءَ آرگ ءَ اِنت، پہ وتی کار ءُ باری رھبنداں ءُ جاگیرداری ءِ مھکم کنگ ءَ اے وھداں سی پیک ءِ روٹ وسیلہ ءَ بے کساس کار کنگ ءَ اِنت، ایسٹ، ویسٹ ءُ سنٹرل روٹانی مھلوک چہ وتی ڈیھ ءُ ڈگاراں زبھر بوگ ءَ انت ءُ دگہ دگہ-

بہ گِند ئے دیوان ءِ سنگتانی گپ وَ شوک اَنت کہ چریشی ءَ سنگت وتی ڈیھ ءِ جاور ءُ جنز ءِ ھستیں بستار ءَ با ھبر بوگ سک شر اِنت، کم چہ کم مردم آزات ھیال ءُ رد ھیالی (خوشفھمی) ءِ تہ ءِ روگ ءَ وَ رَک اَنت بلے دومی نیمگ ءَ بامرد ءِ گْوانکو انگت منی دست ءَ اِنت، مزار بیمّیں ورنا اوں ڈیھ ءِ بھت ءَ کپتگ، انچیں مُھکمیں پکرانی واھُند اَنت کہ دنیا ءِ سپر پاور اش چیلینج کتگ اَنت، چہ زورآوراں پنڈگ لوٹگ ءَ نہ اَنت، زر ءُ پِنڈ ءَ ھم لوٹگ ءَ نہ اَنت بلکیں وتی بولان ءِ آبشارانی گپ ءَ اَنت، ساجی ءِ کُمبانی داوا کنگ ءَ اَنت، پہ سلیمان ءِ میزّریں پٹ ءُ دیاراں جنگ ءَ اَنت، چوش ھم نہ اِنت کہ چہ زورگیراں وتی ہھک ءَ پنڈگ لوٹگ ءَ اَنت، یا کہ چم اش گوریچان ءُ رو ایرکپتءَ داشتگ اَنت کہ پہ ما نوکیں بانداتے چہ دگہ نیمگے ءَ وت کیت۔ اناں، بلکیں گوں دژمن ءَ دژمن ءِ زبانءَ ھبر کنگءَ اَنت چیئرمین گلام محمد ءِ گُشتین اِنت کہ اے جنگ مئے سر ءَ بُنگیج کنگ نہ بوتگ بگندئے ایشی ءِ بِندات ما وت کتگ۔ پمیشکا سنگتاں آئی ءِ بار مرچی وتی کوپگاں وت زرتگ اَنت مرچی دژمن ءَ را اے باور کنائینتگ اش کہ تو وتی سِلاھاں ھرچی آس دات کن ئے آس بہ دئے بلے اے ودار ءَ مہ بو کہ ما ایشانی بیر ءَ پہ تو پل ءُ گلاب ءِ شان اِیں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔