TBP Balochi

سربوتگیں ھالانی رِد ءَ بلوچستان ءِ تیاب دپی دمگ گوادر ءَ جھانی وبا کرونا وائرس ءِ نادراھی ءَ زالبولاں ھوار تنی وھدی یازدہ مردم بیران بوتگ انت –

دمگی مردمانی رِد ءَ گوادر ءَ جاندراھی ءِ ھچ وڑیں آسراتی نیست انت گیشیں مردمانی بیرانی چہ تپ ءِ گیش بوگ ءَ سرکاری نادراھجاھاں الاج نبوگ ءِ سبب ءَ بوتگ انت –

آھانی رِد ءَ گوادر ءَ گوادر پورٹ اتارٹی ءِ چیردستی ءَ جی ڈی اے مستریں نادراھجاہ ھست انت ءُ سول نادراھجاہ انت کہ دیریگیں نادراھجاہ ءِ ھنوں نوک ھم کنگ بوتگ بلے جاندراھی ھچ وڑیں آسراتی انگت گوادر ءَ نیست اِنت –

آھانی گوشگ انت کہ گوادر ڈپٹی کمشنر ءِ نیمگ ءَ چہ لاک ڈاؤن کنگ ءِ جار جنگ بوتگ اَنت ءُ شھر ءِ بازیں مارکیٹ ءِ چیزے وھد ءِ واستا بند ھم کنگ بوتگ انت ءُ کرونا ویکسین ءِ درگت ءَ ھم لھتے بندش جار پرینگ بوتگ کہ آھانی تہ ءَ یکے ایش انت کہ سول نادراھجاہ گوادر ءَ ھما مردم الاج ھاتر ءَ شُت کنت کہ آئی ءَ کرونا ویکسین جتگ – پمے ھاتر ءَ بازیں مردم ءَ کہ کرونا ویکسین نہ کرتگ پہ گیشیں تپ ءُ کُلگ دگہ نادراھی ءَ ھسپتالاں شُت نہ کن انت ایمرجنسی ءَ ویکسین جنگ المی کنگ بوتگ –

کرونا وائرس بلوچستان ءَ روچ پہ روچ گیش بیان اِنت ءُ گوستگیں روچاں جانسلامتی ءَ ھم بلوچستان ءَ ویروس ءِ گیش بیگ ءِ ھال شنگ کتگ اِت اَنت –

ھمے وڑ ءَ مروچی ھم پنجگور ءَ پانزدہ کس کرونا وائرس ءِ نادراھی ءَ پدر بیتگ اَنت –

دی بلوچستان پوسٹ

خیبرپختونخواہ ءِ دمگ کوھستان ءَ بمب تراک ءِ سوب ءَ چینی شھریاں ھوار بازیں مردمے مرتگ ءُ ٹپیگ بیتگ اَنت۔

ھالانی ردءَ چار شمبے ءِ سوب ءَ یک بس ءِ سرءَ تراک ءِ سوب ءَ چین ءِ شھریاں ھوار کساس دہ مردمانی مرگ ءِ ھال اِنت۔

اھوالانی ردءَ اپر کوھستان ءَ چینی انجینئرانی یک بس یے تہءَ ھما وھد ءَ تراک بیتگ وھدے آ یک اڈ بیوکیں ڈیم ءِ یے چار ءُ ٹپاسگ ءِ ھاترءَ روگ ءَ بیتگ اَنت۔

بنداتی ھالانی رد ءَ ھشت مردم تراک ءِ تہءِ مرتگ۔

ھالانی ردءَ بس ءَ 30 چینی انجینئر دیم پہ اپر کوھستان ءِ داسو ڈیم ءِ ھند ءَ برگ ءَ بیتگ۔ تراک ءِ تہءَ لس چینی مھلوک ءَ ھوار لشکریانی ھم دو کارمند مرتگ اَنت۔

پولیس درشان ءِ ردءَ تراک چارشمبے ءِ سھب ءَ ھشت ءُ نیم ءِ وھدءَ برسیں ءِ نزیک یک کوسٹر ءِ سرءَ بیتگ کہ اِشی ءَ 34 مردم نندوک بیتگ اَنت۔

شنگ بیتگیں درشان ءِ رد ءَ تراک ءِ آسر ءَ ٬ھپت چینی شھری ءُ دو ایف سی کارمند مرتگ اَنت، وھدے ھشت مردمانی جاور نگیگ اِنت، ٹپی بیتگیں مردم ھسپتال ءَ روان دیگ بیتگ اَنت۔‘

نبشتانک: لُمّہ تئی میار اِنت

نبشتہ کار: مھروان کمبر

دی بلوچستان پوسٹ

ھمیش اِنت تھاریں شپ ءِ ھاکمی ھلاس بیتگ ءُ رودراتک ءَ بام وتی جلشکاں گیدی ءِ دلبند ءَ شنگینگ ءَ اِنت کوہ ءِ دامُن ءِ درچکانی سر ءَ واب کپتگیں مُرگ پاد اتکگ ءُ توار ءَ اَنت ابید چہ مُرگاں دگہ کسی برمش ءُ چڑکّھے ھم نیست من ءَ دو ساھت بیت کہ وتی سنگر ءَ نِشتگ ءُ سنگتانی پاسپانی ءَ کنگ ءَ آں روچ پہ روچ جاور نگیگ بوان اَنت، پمیشکا بانگواہ ءِ ساھت چہ ایندگہ ساھتاں چہ کمے گیش جاڑِیگ بُوَگی اِنت پرچا کہ دُژمن ءِ سُر ءُ پُر اے ساھت ءَ کمے گیش بَہ اَنت منی گْوھار یات اِنت ترا ھما سُھب کہ پاکستانی لشکر ءَ مئے سرجمیں بازار وتی انگراں کُتگ اَت ءُ میتگ ءِ لوگاں آس دیان اَت، ورنا ءُ کماشاں آوار جنان اَت آ روچ من ءَ شر یات اِنت ءُ منی زندگی ءِ رودپتر ءِ اولی تاک ءِ سر ءَ اے روچ نبشتہ اِنت، پرچا کہ ھما روچ ءَ چہ رند نہ من میتگ دیست، نہ ترا، نہ وتی مات ، دوست ءُ سنگت ھما روچ ءَ چہ من زانت کہ نِندگ ءُ تماشا چارگ ءَ نہ مئے سر ءَ اے زُلم ءُ زوراکی کم بہ اَنت ، نہ کہ وش ءُ وشھالیں زندے مئے نسیب ءَ بیت پمیشکا من وتی زور گپتگیں زمین ءِ پچگرگ ءَ، وتی دود ءُ ربیدگ، زُبان ءُ پجّار ءِ رکّینگ ءُ نوکیں زندگی ءِ شوھاز ءَ دراتک ءُ کوہ وتی سنگر کُت اَنت۔

منی گْوھار بہ گندئے تو بہ جیڑے کہ اِنچو سال ءَ چہ پد من چوں تئی ترانگ ءَ کپتگ آں ، گپّے زان ئے من ھر روچ ترا جیڑاں ءُ یات کن آں، بلے مرچی تو پمیشکا گیش یات پیداک ئے کہ دوشی من سوزن ابو الہوا ءِ گدار” ٹپّ پشت کپنت” ونتگ ات اے گدار ءِ تہ ءَ اِیسُپ ( یوسف ) نامیں کارِستے وتی گْوھار اَمل ءِ نام ءَ نِمدی یے نبشتہ کنت گْوش ئے اے نِمدی ءِ گپ منی اِت اَنت، بس پرک ھمیش اِنت آ پلستین ءِ زھگ ءُ من بلوچستان ئے۔ بلے!  مئے اندر ءِ جاور ءُ گُلزمین ءِ جاور یک اَنت ، نِمدی ءِ تہ ءَ اے وڑ نبشتہ اِنت کہ ” منی رَوَگ ھژدری اِنت تو پھمگ ءِ جُھد ءَ بہ کن باز ھپتگ اِنت کہ من اے نِمدی ءَ نبشتہ کنگ ءِ جُھد ءَ آں ، بلے من ءَ جْوانیں لبز دست کپگ ءَ نہ اِنت۔ ھردیں ند ءَ دست ءَ کناں من ءَ وتی پت ءِ گون ءَ کتگیں کول ءُ کرار گیر کاینت۔

یک جُمایے ءَ نماز ءَ چہ پد ما روکپتی نیمگ ءِ زیتونانی باگ ءِ تہ ءَ نشتگ اِتگ اِیں کہ آئی ءَ من ءَ گْوشت کہ گوں من یک کولے بہ کن کہ اگاں من ءَ چیزے بہ بیت گُڑا من تئی ھیال ءَ جوانیں رنگے ءَ داراں آئی ءَ لوٹ اِتگ اَت کہ تو اِلم ءُ زانت در بہ برے ءُ جوانیں مردمے ءِ گون ءَ سانگ ءُ سیر بہ کن ئے ، بلے من مزنیں ناسرپدے اِت آں کہ منی ھِچّ وھم ءُ گُمان ءَ نیست اَت کہ اِسرائیل پد ءَ اُرش کنت بلے مئے پِت ءَ زانتگ اَت من جیڑ اِتگ اَت کہ بابا مُدام مئے ھمراہ اِنت، نی منی ھچ پھم ءَ نیاھگ ءَ اِنت کہ من وتی کول ءُ کراراں چو سرجم بہ کن آں۔ اگاں من ھمد ءَ بہ جلّاں گُڑا من ءَ اسرائیلی کُش اَنت، چی ءَ کہ
آیانی گْور ءَ تاکت ھست ءُ آیاں زمین پکار اِنت، ءُ آیاں دُگنیا ءِ ھچ تاکت داشت نہ کنت اَمل آیاں ھر چیز ءِ سر ءَ کْوزہ کُتگ، بلے انگت آ دگہ چیز لوٹگ ءَ اَنت ءُ من آیاں بے تواری ءَ نشت ءُ چار اِت نہ کن آں منی گْونڈیں گْوھار من ءَ پھل کن کہ من روگ ءَ آں من جنگ کنگ ءَ روگ ءَ آں۔

منی دیم ءَ یکّیں کِشک ءَ ابید دگہ ھچ نیست مئے زندگی ءِ پرمان ءَ ھما نبشتہ کنگ ءَ اَنت اے زندگی دْراجیں سزاے، مرگ ءَ چہ گنتریں سزا ئِے من آیانی داتگیں زندگی ءَ گْوازینت نہ کن آں۔ اگاں من شھید بیت آں ،  گُڑا منی واستا پھر ءِ گپ اِنت۔ تو منی سر ءَ ھم پھر بند ءُ منی ارواہ ءِ آسودگی ءِ ھاتر ءَ دُوا لُوٹ ھما بے ھیال نہ بیتگیں شھیدانی لڑ ءَ منی ھوار بُوَگ ءِ سر ءَ تو موتک میار، بلکیں شاتکامی بہ کن ھما مردُم اِنساپ ، آجوئی ءُ وتی گُلزمین ءِ ھاتر ءَ وتی ھیشی سر ءَ بکش اَنت، آ جنت ءَ رَو اَنت ھمے وڑ ءَ من کبس ءَ بندیں مُرگے ءِ پیم ءَ آں، من زان آں تو ھم منی وڑ ءَ ئے من برے برے تئی بارو ءَ جیڑاں گُڑا دل ءَ چہ گریوگ بندات بیت ءُ چمّانی شلیں ارس چہ انارکاں جھلاد بَہ اَنت ءُ وت ءَ ملامت کن آں کہ ابّا ءَ ھما وڑیں زندگی یے پہ تئی ھاتر ءَ جیڑ اِتگ اَت ءُ من ترا آ وڑیں زندگی دات نہ کُت من مُدام ھمے جیڑاں کہ ما سانکلاں گوں بستگیں گُلام ءُ باروٹی اِیں، پرے ھاتِر ءَ پہ زندگی ءِ گْوازینگ ءَ لاچاریں۔

بلے مزاھمت ءُ گھگیری گیش بوان اِنت، یکروچے الم ما سوبین بہ ایں ھر چیز کہ چہ ما پُلگ بوتگ ما آیاں دو وار  پچ گر اِیں۔ ما وتی وتواجہ بَہ اِیں گوں ترا اے کول ءُ کرار اِنت منی اگاں ھژدری بوت من وتی ساہ ءُ سرانی بکشگ ءَ ھم چک ءُ پد نہ بَہ آں ، بلے ترا ءُ وتی راج ءَ یک آجوئیں زندے الم بکشاں لُمہ تئی میار اِنت! من زان آں یک کسانسالیں جنکے ءَ پہ اے بلاھیں کارے، بلے من وتی گیراج ءِ یک بھرے امین ءَ داتگ کہ آ تئج ءُ مات ءِ کُمک ءَ کنت من ھرچ زر ءُ کلدار کہ جم کُتگ ،آ ناکو دربیش ( درویش ) ءِ گْور ءَ پہ امانتی ایر اَنت اگاں زلورت بوت، گُڑا ھرچ بہ کن ءُ پاتُو ( پاتُمہ ) ءَ زلور دُچار بہ کپ کہ آ ترا چو منی داب ءَ دوست دار اِیت۔

منی گْوھار! من ھم دیر اِنت لوٹ اِتگ کہ پہ ترا ھمے رنگیں نِمدی یے نبشتہ بہ کن آں ، بلے من ءَ ھم چو اِیسُپ ( یوسف ) ءَ جوانیں لبز دست نہ کپتگ، یاکہ منی جاور انچوش بیتگ اَنت کہ موہ نہ رس اتگ پہ نِمدی ءِ نبشتہ کنگ ءَ بلے تو اِیسُپ ( یوسف ) ءِ نِمدی ءَ بِہ وان ءُ ھمے پھم کہ من ترا نبشتہ کُتگ سلامت بات ئے منی لاڑُکیں گْوھار! وشیانی منگیراں بات ئے ءُ ماتیں وتن آجو بات گوں ترا مھر کنوکیں تئی برات مھروان کمبر-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پنجگور آل پارٹیز شھرء ایکشن کمیٹی پنجگور ءَ ایرانی بارڈر ءِ کار ءُ بار ءِ سر ءَ اسٹیکر ءُ ٹوکن رد کررتگ ءُ پانزدی جولائی ءَ زھرشانی ءِ جار جتگ – اے گپانی درشانی آل پارٹیز شھری ایکشن کمیٹی ءِ چیئرمین میر نزیر احمد بلوچ، گوستگیں چیئرمین ھاپز مھمد اعظم بلوچ، ھاجی سالہ مھمد، خلیل دھانی، اشرف ساگر، سیاسی ءُ چاگردی باسک شاہ ھسین آغا، ھاجی سعید اللہ، سیف اللہ سیفی، مھمد جان ءُ ھاجی دادی بلوچ ءَ مُچی ءِ ھمراھی ءَ پریس کانفرنس کنان ءَ گوشتگ کہ آل پارٹیز شھری ایکشن کمیٹی اسٹیکر ءُ ٹوکن رھبند ءَ رد کنت-

آیاں گوشت کہ پنجگور گوں سیمسر ءَ بندوک اِنت ءُ پانزہ جولائی ءَ اے رویشانی ھلاپ ءَ زھرشانی کنت ئِے –

آیاں گوشت کہ اد ءَ مھلوک ءِ روزگار تباہ ءُ برباد بیگ ءَ اَنت ءُ ھزاراں مھلوک بے روزگاری ءَ دست اش سر ءَ اَنت ءُ نشتگ اَنت –

آیاں گوشت کہ پنجگور ءِ زورگار بس تھنا سیمسر اِنت ءُ اے ھم سرکار ءَ وتی ارجان جتگ ءُ اد ءَ نا زمینکاری ءَ آپ ھست ءُ نا کہ دگہ سرکاری زورگارے ھست –

آیاں گوشت کہ ریاست مات ءُ پَتے ءِ رنگ ءَ بہ بنت بلے اے ریاست ءَ نا مارا وتی زھگے ءِ دروشم ءَ چار اِتگ ءُ نا انسانے ءِ دروشم ءَ اشی ءَ مئے دراھیں چیز پُل اِتگ اَنت –

آیاں گوشت کہ اد ءَ مھلوک وتی کمک ءَ مزوری کن اَنت ءُ گاڑی زیر اَنت ءُ باپاری کن اَنت اشانی بگیری ءَ ھم سرکار ءِ واگ ترند اَنت –

آیاں گوشت کہ نیزگاریں مھلوک ءِ گاڑیاں اسٹیکر ھم دیگ بیگ ءَ نہ اَنت ءُ ھما سرکار ءِ نزیکیں مردم اَنت آ وتی شان ءِ سر ءَ روگ ءُ آیگ ءَ اَنت بلے ھما کس نیزگار اَنت آیانی گاڑی دارگ بیگ ءَ اَنت اشی ءَ زانگ بیت اِنت کہ اے مھلوک ءِ زرکاری ءِ ھلاس کنگ ءُ مھلوک ءَ شد ءِ دیمپان کنگ اِنت –

آیاں گوشت کہ منشیات سر ء بازار گوزگ ءُ روگ ءَ آیاں کس جست نہ کنت بلے کسے ءَ چار گیلن تیل گون گڑا آئی ءِ سر ءَ سرکار ءِ روپ ترند اَنت –

بلوچ یکجھتی کمیٹی ءِ نیمگ ءَ شنگ بیتگیں درشانی ءِ رد ءَ بہ نام ء ”اوگستان ءِ بدل بوکیں جاورھال ءُ بلوچستان ءَ کپوکیں اسرات “ ءِ سر ءَ شال ءِ پریس کلب ءَ یک پُر مڑاھیں سیمینارگ برجم دارگ بیت اِنت – کہ اود ءَ بلوچستان ءُ اوگستان ءِ میان ھَ ھزاراں سالاں برجاھیں نزیکی، مجاھدین، اوگستان ءَ تالبان ءِ سرکار ءُ انیگیں جاورھال ءُ آ جاورھالاں بلوچستان ءَ کپوکیں اسرات ءِ سر ءَ بلوچ ءُ پشتون کواس، سیاسی رھشون ءُ زانتکار وتی وتی ھیال ءُ لیکھاں درشان کن اَنت اے دراھیں جاورھالانی بارو ءَ مھلوک سرپد کنگ بیت اِنت –

جارکش ءَ گوشتگ کہ اوگستان بلوچستان ءِ ھمراھی ءَ دراجیں سیمسر ءِ بھر کنگ ءِ ھواری ءَ بلوچ ءُ پشتون براتی سان ءِ چارگی ءُ راجدپتری باسکدارے ءِ دروشم ءَ چارگ بیت اِنت – ھمود ءَ بلوچانی مزنیں آبادی ءِ اوگستان ءَ جھمنند اَنت ھمود ءَ پشتونانی مزنیں کچے بلوچستان ءَ جھمنند اَنت کہ اشانی میان ءَ سالانی سال بنجتگیں ریشگے ھست اِنت – ھمے رنگ ءَ وھدیکہ بلوچستان یا اوگستان ءَ یک مزنیں جاورھالے اتکگ گڑا آئی ءِ آسرات ھردوکیں راجاں کپتگ – انیگیں جاوراں اوگستان ءِ جاور ھال گوں تیزی ءَ مٹ بیگ ءَ اَنت ءُ چریشی ءِ بازیں گپ لیٹ ءُ پلیٹ کنگ بیگ ءَ اَنت ءُ تاکت ءِ ساد مزبوت کنگ بیگ ءَ اِنت چریشی ءِ سر ءَ گمان پدر کنگ بیگ ءَ اِنت یک رندے پد ءَ اوگستان نا ایوک ءَ بلکیں بلوچستان ءَ ھوار سرجمیں دمگ ءِ تہ ءَ یک مزنیں بدلی ءِ آیگی اِنت –

جارکش ءَ گوشتگ کہ اوگستان ءِ انیگیں جاور ھال اے وھد ءَ سرجمیں دنیا ءِ واستا یک جیڑوکیں بنگپے – ھمے درچ ءَ بلوچ یکجھتی کمیٹی ءِ نیمگ ءَ “ اوگستان ءِ بدل بوکیں جاورھال ءَ بلوچستان ءِ سر ءَ کپوکیں آسرات ” ءِ بنگپ ءَ پانزدہ جولائی ءَ پشمبے ءِ روچ ءَ ساھت سَے ءَ شال ءِ پریس کلب ءَ یک سیمنارے برجم دارگ بیگ ءَ اِنت کہ اشی ءِ تہ ءَ بلوچ کواس انور ساجدی، پشتون کلانیں راجدار ءُ کواس افرسیاب خٹک، نیشنل پاٹی ءِ سروک ڈاکٹر عبدالمالک بلوچ، بی این پی ءِ رھشون ھاجی لشکری رئیسانی، کلانیں راجدار ساجد ترین ایڈوکیٹ ءُ پی ایچ ڈی اسکالر سیف ناصر بھر زیر اَنت ءُ اوگستان ءِ بدل بوکیں جاورھال ءُ بلوچستان ءِ سر ءَ کپوکیں آسرات ءِ بارو ءَ وتی وتی لیکھاں درشان کن اَنت – بلوچ یکجھتی کمیٹی بلوچستان ءَ سیاسی پاٹیاں ھوار دراھیں پھناتاں بندوکیں مردماں گوں بھر زیرگ ءِ دزبندی کنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ءُ ھزار سَے سد ءُ ھپتاد ءُ پنچ سرجم بوتگ – بلوچ اتھاد ورنا ءِ سرکماش بلال بادینی بلوچ ءَ وتی ھمراھانی ھمراھی ءَ بنجل ءِ تر ءُ تاب کرتگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ تران کنان ءَ گوشتگ کہ دنیا ءُ اے دمگانی جاور ھال ھمک روچ تیزی ءَ گوم ءَ بدل بوان انت ءُ اے بدل بؤکیں جاورھالاں یک گپ ءِ پدّر کتگ کہ دنیا ءِ سیاست ءِ تہ ءَ ھچ کس مدامی کسے ءِ بیل یا دژمن نہ انت ھر یکے وتی مفاداتاں پھازیت اگاں اے مفادات ءِ سیاست ءَ کسے سرپد نہ انت گڑا آ نیست ءُ نابود بیت –

ماما قدیر ءِ گوشگ ات کہ وتی یکجاھیں پائدگانی گرگ ءِ ھاتر ءَ ما بھیسیت راج زمہ واری دارگ انت؟ مئے رھشون ءُ راجداریں گل اے بدل بؤکیں جاور ھالاں گندگ انت؟ او اے بدل بؤکیں جاور ھالاں چہ وتی مفادات آں گپت کنیں؟ مار ءَ اے چیزانی سر ءَ چم ایرکنگی انت –

ماما قدیر ءِ گوشگ ات کہ ھما بدلی کہ مروچی دیم ءَ آیگ انت اشانی لھتے سال پیش کسی گمان ءَ نہ بوتگ اشی ءَ ابید ھما جاور ھال تیزی ءَ گوں بدل بوگ انت اے مئے واستا تاوان بار بنت یا پائدگ اے مئے سیاسی سنچ ءِ سر ءَ پائدگ کن انت مئے پالیسی ساز ادارھاں دنیا ءَ پیام دیگی انت کہ مئے لوٹ چی انت –

ماما قدیر بلوچ ءَ پانزدہ جولائی شال ءِ پریس کلب ءِ دیم ءَ تاج محمد سرپراہ ءِ زورانسری آوارجنی ءِ بگیری ءَ آئی ءِ کھول ءِ نیمگ ءَ بوکیں زھرشانی مردماں ھوار بوگ ءِ لوٹ کتگ ءُ گوشتگ کہ تاج محمد سرپراہ گوستگیں سال ءِ نوزدہ جولائی ءَ چہ کراچی بالی پٹ ءَ پاکستانی چیریں ادارھاں آوار جتگ ءُ بیگواہ کتگ – آئی ءَ گوشتگ کہ اے جیڑہ مروچیگین ءِ نہ انت بلکیں بیست سال ءِ کہ برجاہ انت اے گیر انسانی امل ءِ بگیری ءَ جوانیں وڑے ءَ توار چست کنگی انت –

آئی ءِ گوشگ ات کہ مرچی باندا بیگواھیں مردم دروگیں میڑ ءِ نام ءَ جنگ بوگ انت کہ سک باز بژنی انت –

آئی ءِ گوشگ ات کہ مار ءَ ترس انت کہ ایندگہ بیگواھیں مردم دروگیں میڑ ءِ نام ءَ جنگ مہ بنت ھمے ھاتر ءَ درسیں انسانی ھکانی ادارہ سیاسی گل ءُ نودربر گلاں چہ لوٹ کنیں کہ آ مئے ھمراہ داری بہ کن انت ءُ توار چست بہ کن انت –

سربوتگیں ھالانی رِد بلوچستان ءِ دمگ مستونگ، قلعہ عبداللہ، پنجگور ءَ تیرگواری ءُ دگہ وئیلاں ھشت مردم بیران دوازدہ ٹپی بوتگ –

گیشیں ھالانی رِد ءَ مستونگ ءَ سلاہ بندیں مردمانی تیرگواری ءَ دو مردم بیران بوتگ-

وئیل مستونگ ءِ دمگ پڑنگ آباد ءَ دیم ءَ اتکگ ناشناسیں سلاہ بندیں مردمانی تیرگْواری ءَ خالد شاھوانی ء انور خان شاھوانی بیران بوتگ –

ھمے وڑ گوستگیں روچ ءَ مستونگ ءِ دمگ دشت تیرہ میلءَ ناشناسیں مردماں گاڑی ءِ سر ءَ تیرگواری کتگ چریشی ءَ دو مردم ٹپی بوتگ –

دمگی مردمانی رِد ءَ گوستگیں روچ ءَ ناشناسیں سلاہ بندیں مردماں دشت ءِ دمگ تیرمیل اعوان پٹرولیم ءِ نزیک ءَ ھاجی بشیر اھمد کرد ءِ گاڑی ءِ سر ءَ تیرگواری کتگ تیرگواری سوب ءَ ھاجی بشیر اھمد کرد ءُ آئی پرزند ادریس کرد ٹپی بوتگ انت – ھال سر بوھگ ءَ لیویز ءَ وت ءَ وئیل جاہ ءَ سر کتگ ٹپی بوتگیں مردم درمان کنگ ءَ پد شال نادراھجاہ ءَ دیم دئیگ بوتگ انت –

ھمے وڑ قلعہ عبداللہ ءَ ٹکی جیڑہ ءَ تیرگواری ءَ سَے مردم بیران ءُ دہ ٹپی بوتگ انت – دمگی مردمانی رِد ءَ گوستگیں روچ ءَ سلاہ بندیں مردماں قلعہ عبداللہ ءَ کارگس ءَ تیرگواری کتگ چریشی ءَ عبدالقدیر، رحمت اللہ ءَ ھوار دگہ یک مردم ءِ بیران ءُ دہ ٹپی بوتگ – ھمے گوشگ بوھگ انت وئیل ٹکی جیڑہ سوب ءَ ودی بوتگ –

دگہ وئیل ءِ بلوچستان ءِ دمگ کلعہ سیف اللہ ءَ دیم ءَ اتکگ کہ گاڑی ءِ وئیل ءِ آماچ بوتگ ءُ دو مردم بیران بوتگ – وئیل ءَ بیران بوتگیں مردمانی پجار شادی خان ءُ عبدالباقی نام ءَ چہ بوتگ انت وھدیکہ وئیل ءَ سَے مردم ٹپی بوتگ انت – ٹپی ءُ بیران بوتگیں مردم نادراھجاہ ءَ سر کنگ بوتگ انت –

ھمے وڑ مستونگ ءَ دگ ءِ وئیل ءَ یک مردم ءِ بیران بوتگ –

وئیل مستونگ ءَ جنگل کراس ءِ نزیک ءَ دیم ءَ اتکگ کہ زمباد گاڑی ءِ ڈیکر کنگ ءَ پرپٹ سوار ءِ بیران بوتگ – بیران بوتگیں مردم ءِ پجار محمد اکرم ءِ نام ءَ چہ بوتگ وھدیکہ وئیل خان محمد نامیں مردمے ٹپی بوتگ ، ٹپی ءُ بیران بوتگیں مردم نادراھجاہ ءَ سر کنگ بوتگ انت اژدری چار ءُ ٹپاس پد جون کھول ءِ ھوالگ ءَ کنگ بوتگ –

دومی نیمگ ءَ پنجگور ءَ یک مردمے کور ءَ بکتگ ءُ بیران بوتگ –

وئیل پنجگور ءَ رخشان کور ءَ دیم ءَ اتکگ کہ پیر بکش نامیں مردمے جان شودگ ءِ میان ءَ بڈیتگ ءُ بیران بوتگ – دمگی پولیس ءَ لاش دست گپتگ ءُ نادراھجاہ ءَ سر کتگ اود ءَ اژدری چار ءُ ٹپاس پد کھول ءِ ھوالگ ءَ دیگ بیتگ –

روکپتی بلوچستان ءَ بازیں جاھاں ھوراں گورتگ ءُ بازین جاھاں ملک آپ ءُ سراپ بیتگ اَنت- روکپتی بلوچستان ءَ ھور مروچی بندات بیتگ اَنت ءُ بازیں جاھاں شریں رنگے ءَ رگاماں گورتگ ءُ موسم بدل کرتگ –

روکپتی بلوچستان ءِ دمگ سرباز، راسک، نیک شھر،کسر کند، فنوج، چھبار، دشتیاری، کنارک، ایرانشھر،بمپور، دلگان، سراوان، سیب و سوران، مھرستان ءُ زرباری دمگ تفتان، ھاش ءُ گلشن ءَ ھوراں گورتگ ءُ زمین آپ ءُ سراپ کرتگ اَنت –

مولم شناس ءِ گوشگ اِنت آیوکیں آدینگ ءَ روکپتی بلوچستان ءَ ھورانی گوارگ ءِ گمان ھست اِنت ءُ بیت کنت کہ اے ھور توپانی کُت بہ کن اَنت –

روکپتی بلوچستان ءَ بندوکیں مولم شناس ءَ مھلوک شیوار کرتگ ءُ گوشتگ کہ آ اے روچانی تہ ءَ کور سراں پھریز بہ کن اَنت –

سر بیتگیں ھالانی رد ءَ روکپتی بلوچستان ءَ تیرگواری وئیلاں سَے مردم کُشگ بیتگ اَنت، کُشگ بیتگیں مردمانی تہ ءَ دو برات ھوار اَنت –

کمپین فعالین بلوچ ءِ نیمگ ءَ شنگ بیتگیں ھالانی رد ءَ گوستگیں روچ ءَ واش ءَ ناصر ریکی نامیں مردمے تیرانی آماچ کنگ ءُ کُشگ بیتگ کہ آ یک نادراہ جاھے ءِ کارمندے بیتگ –

ھمے وڑ ءَ جالک ءَ ناشناسیں مردمانی تیرگواری ءَ دو برات عبدالستار چاکری ءُ حاتم چاکری ناشناسیں مردماں تیرانی آماچ کرتگ ءُ مچگدگ ءَ چگل داتگ اَنت –

کمپین فعالین بلوچ ءِ رد ءَ گجری تیرماہ سال چاردہ سد ھجری ءَ پنجاہ ءُ ھپت بلوچ کُشگ ءُ سیزہ مردم زدگ کنگ بیتگ اَنت-

روکپتی بلوچستان ءَ بندوکیں سیاسی مردمانی گوشگ اِنت کہ روکپتی بلوچستان ءَ کُشت ءُ کُشارانی گشتریں سبب ایرانی لشکر ءِ نیمگ ءَ سلاہ بندیں مردمانی نیمگ ءَ بیگ ءَ اَنت –

آیانی گوشگ اِنت کہ ایرانی سپاہ ءَ لس وتی کاربندی ءِ واستا مردماں سلاہ داتگ ءُ چریشی ءَ روکپتی بلوچستان ءَ کُشت ءُ کُشاری بیگ ءَ اَنت –