TBP Balochi

دی بلوچستان پوسٹ پتر ھال ءَ سر بیتگیں ھالانی رد ءَ بلوچستان ءِ بنجاھی شھر شال ءِ بازیں جاھاں بجلیانی بندش ءِ سبب ءَ کیسکو ءِ واکدارانی ھلاپ ءَ زھرشانی ءُ دگ بند کنگ بیتگ-

شال ءِ دمگ کلی مبارک، ھدہ، اپسنی دگ ءُ کش ءَ گوراں بجلی ءِ نہ بوگ ءِ سبب ءَ شھریاں زھرشانی کرتگ ءُ دگ بند کرتگ –

شھریانی رد ءَ دومی ایس ڈی او کیسکو بروری ءِ ھمے مان میتکیانی سبب ءَ روچ ءِ یک ءَ بجلی بند کرتگ ءُ بازیں ادارھاں بجلی بند بیتگ اَنت –

گرمانی موسم ءَ بلوچستان ءِ بازیں جاھاں بجلی نہ بوگ ءِ ھلاپ ءَ بازیں جاھاں دگ بند کنگ بیتگ اَنت –

شال ءِ بازیں جاھاں بجلی ءِ نہ بوگ ءِ سبب ءَ جھمنندیں مردم جنجالانی دیمپان اَنت ءُ مھلوک ءَ انتزامیہ ءِ اے رویش راجدشمنی کرار داتگ –

اسپنی دگ ءَ زھرشانی کنوکاں انتزامیہ ءِ رویش ءِ ھلاپ ءَ دگ بند کتگ ءُ کیسکو انتزامیہ ءِ رویش ءِ ھلاپ ءَ اوگام جتگ ءُ لوٹ کرتگ کہ ترندیں گرم ءِ سبب ءَ کلی مبارکی ھدہ ءِ کش ءُ گوراں نندوکیں مردماں المی ءَ بجلی دیگ بہ بیت اِنت –

سربوتگیں ھالانی رِد ءَ بلوچستان ءِ تیاب دپی دمگ گوادر ءَ ناشناسیں سلاہ بندیں مردماں یوفون موبائیل ٹاور مانداشتگ ءُ مشینری تاوان داتگ اَنت – دمگی مردمانی رِد ءَ گوستگیں شپ ءَ ناشناسیں سلاہ بندیں مردماں پسنی ءِ دمگ کپّر ءَ یوفون ٹاور ءِ سر ءَ تیرگواری کتگ ءُ آئی ءِ مشینری تاوان داتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ ٹاور ءِ ماندارگ ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ گوادر ءَ ھواریں شھر پسنی ءِ دمگ کپّر ءَ سی پیک دَگ ءَ برجاھیں یوفون ٹاورے ءِ سر ءَ تیرگواری کنگ ءَ پد مانداشتگ ءُ تباہ کتگ – جارکش ءَ گوشتگ کہ ھمے ٹاور ءَ چہ ریاستی ادارہ بلوچ ورنایانی چاریگری ءُ آیانی بیگواہ کنگ ءَ دزمانجن بوتگ اَنت۔ اے کمیونیکیشن تچکی ءَ ریاستی ادارھانی چیردستی ءَ کار کنگ ءَ اَنت ءُ ما آھاں دیمتر ءَ ھم وتی نشانگ جوڑ کن ایں-

گڈسر ءَ جارکش ءَ وتی درشان ءِ تہ ءَ گوشتگ کہ مئے اے وڑیں اُرش بلوچستان ءِ آجوئی ءَ تاں برجاہ مان انت –

نبشتانک: گواڑگ رنگیں سمُل ءَ

نبشتہ کار: شیھک شاہ

دی بلوچستان پوسٹ

من وشان ءُ من وتی گچین کُتگیں کار ءَ گوں دلگوشاں مئے جُھد پہ باندات ءِ منزل ءَ جُنزان اِنت ما باج بُرتگ باندات مئیگ اِنت بوت کنت من نباں بلے تو بہ ئے منی راج بیت اِے وھدی کہ من تئی نام ءَ چیزے نا دز رسیں دانک نبشتہ کنگ ءَ آں شپ ءِ ساھت یازدہ ءُ پنجاہ ءُ یک اِنت رَمس ھژدہ اپریل اِنت دو ھزار بیست یک ءِ سال اِنت من انوں چادر پچ کُتگ تچک آں بلے مکسک واب ءَ نیلگ ءَ اَنت ھمے دمان ءَ تئی یات آتک تئی یات چوناھا مُدام کاینت بلے انوں بے ھساب یات پیداک ئے ، دل ءَ گُشت کہ پرتو چیزے دانک نز بیار ءُ نبشتہ کن ،نزاناں ترا کدی منی نِمدی سر بہ بیت بلے من گوں گوات ءَ پہ تو دیم ئِے دیاں من ھر وڑ ءَ جُھد کنگ ءَ آں کہ ترا بیھال بکناں بلے تو بیھال کنگ نہ بہ ئے پرچا کہ تو بیھال کنگی مردمے نہ ئے پد ءَ تو ھر وھد ءَ رمزان ءِ ماہ ءَ سھور ءَ پاد کا ئے من زاناں تو منی ترانگ ءَ کپ ئے پرچا کہ ھپت سال پیسر من رمزان ءَ تئی نزیک ءَ بوتگ آں سرجمیں شپ ءَ نشتگ آں بلے وھدے کہ شُما سھور ءَ پاد آتکگ ئے گُڑا من وپتگ آں ، زانتگ کہ شُما آگاہ اِت نوں نہ وپس اِت اگاں دُژمن زاھر بہ بیت شُمارا اِنچُک موہ رس اِیت کہ من ءَ پاد بکن اِت من ءَ شمئے سر ءَ ھم بروسہ بوتگ ءُ بروسہ اِنت ءُ من سدک بیتگ آں کہ اِے بے گیرتیں دُژمن من ءَ چُش ارزانی ءَ انگار ءَ کُت نہ کنت ءُ جت نہ کنت ، بلے ھیر کوھنیں گپ ءَ یل دیاں پر تو کایاں من زاناں تو سھورے وھد ءَ وتی کر ءِ مردمانی گوما گپ کتگ ءُ منی ترانگ ءَ کپتگ ئے ءُ پچکند اتگ ، ھمے ھاموشی وھد ءَ تئی چمانی ارس رتکگ اَنت ءُ تو لوگا چہ ڈن در آتکگ ئے بلے ھُدا ءَ بچار اِے رمزان ءِ ماہ ءَ کس ءَ بد دُوا مہ دے، ھمے ساھت ءَ مُرگانی پری پری بیت تو ھما لوگ ءِ دیم ءِ نیمگ ءِ بُرزگ ءَ چماں سک دئے داں من گندگ نباں ھمے بُرزگ ءَ کمے ھما دیم تو تُپنگی مردُم گند ئے ءُ ھمے مار ئے کہ اش درآمد اَنت ،ھمایاں ھرچی بد دُوا دات کن ئے بکن من گُشاں سِنگ اِش بہ جن پرچا کہ ھمے زالمانی سوب ءَ یکے راجی دلار ءُ ھمے بیگیرتیں پارلیمنٹ ءِ مردمانی سوب ءَ مرچی من ءُ تو یکجاہ نہ بوت ایں ،ترا پہ دگرے ءَ بانور اِش کُت من انگت نشتگ آں سمُل سمُل کنان ءُ وتی روچاں گوازین آں ۔

بلے چی بہ کنت مردُم مردم اوں ترا گُش انت کہ سمُل بلکیں ترا تئی دزگُھار جُست بہ کن اَنت یا کُجام ھم وڑ ءَ ترا گُش اَنت ترا شیھو نہ رس اِیت تو پھر بہ بند ءُ بگُش شیھو ءَ زمین چہ دُرستاں دوستر اِنت من ھمے زمین ءِ یک چُکے آں اِد ءَ ھزاراں سمُل ءُ شیھک جُتا کنگ بوتگ، اِد ءَ ھزارانی ھک زورگ بوتگ اَنت اِد ءَ ھزارانی واھگ ناسرجم بوتگ اَنت دُرست ھمے دلارانی سوب انت اگاں مرچی مئے راج ءِ ورنایاں راج ءِ دلاری مہ کُتیں ءُ دُژمن ءِ ھمراداری مہ کُتیں ما دیری آزاد اِت اِیں مرچی شیھک ءُ سمُل یکجاہ اِت اَنت بلے سمُل گم مکن دلارانی روچ ھلاس اَنت دُژمن ءَ پروش وارتگ اگاں من ءُ تو یکجاہ نہ بوت اِیں نوں پہ دگہ شیھک ءُ سُملے ءِ جُتائی ءِ نوبت نئیت بلے زان ئے اولی رند ءَ کہ من ترا دیست تو بچکند اِت تئی ھما بچکندگ انگت منی چمانی ارساں ریچ انت،بلے تو گم مکن ترا ھما گپ ءُ ھبر من گُشت ءَ ھما وڑ بکن من ءَ بے ھیال بکن من ءَ یات مکن تئی زندے ھمراہ نوں ھما اِنت کہ تئی کر ءَ اِنت آئی ءَ مھر بدے آئی ءِ ازت ءَ بکن تئی زندگی ھما اِنت۔

پھل کن چمانی ارس دارگ بوگ ءَ نہ اَنت ءُ پد ءَ منی نزیک ءَ بازیں سنگت وپتگ ءُ لھتے نشتگ من انوں بس ترا یات کنگ ءَ آن ءُ نِمدی ءَ نبشتہ کنگ ءَ آں من اشکُتگ تئی گوانکوے اسکرین ءِ دیم ءَ منی اکس جتگ سمبال بکن منی اکسے سوب ءَ ترا تاوان مہ رس اِیت مرچی آستونک ءِ مار جند ءِ آستونک ءَ وپتگ کُجام ھم وھد ءَ ڈنگ جنت دل لوٹ اِیت ترا بہ گنداں بلے کار انچُش باز اَنت کہ موہ نہ رس اِیت ءُ پد ءَ جاور ھم ھک ءَ نہ اَنت کہ تئی گس ءَ بیایاں ءُ ترا ھم پریشان کنگ نہ لوٹاں آیگ وَ بیت من آتک ھم کناں ءُ شُت ھم کناں انچُشکہ پیسر ءَ گُشت اِے بیگیرتیں دُژمن دور اوشت اِیت ءُ تیر جنت نزیک ءَ آتک نہ کنت بلے منی روگ ءَ پد تئی بازارے ھال ھالتاکاں شِنگ بیت بوت کنت تئی لوگے ھم سلامت بات ئے مُدام وشیانی منگیراں بات ئے زندگ باں گندگ باں اگاں مُرت آں کبر ءِ سر ءَ الم پہ پاتیہ ءِ وانگ ءَ بیا من تئی گوما چیزے گپ دیم پہ دیم جَنگ لوٹاں نمدی گوات ءَ گون انت ترا من جزماں سر بیت دومی ءِ باریگ ءَ گوات باریں گوں من چون کنت۔

تئی وتی شیھو-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور ءَ یکشلیں ھورانی گوارگ ءَ یک مردمے بیران بیتگ ءُ یکے زدگ بیتگ –

گیشیں ھالانی رد ءَ گوستگیں سَے روچاں برجاھیں سبک سبکیں ھورانی گور ءَ پنجگور سریکوراب وشاپ ءَ دیوالے ءِ کپگ ءِ سبب ءَ بخت مھمد بیران بیتگ ءُ منیر اھمد نامیں مردے زدگ بیتگ –

بیران ءُ زدگ بیتگیں مردم انتزامیہ ءَ نادراہ جاہ ءَ سر کرتگ ءُ اود ءَ آیانی چار ءُ ٹپاس ءَ پد لاش کھول ءِ ھوالگ ءَ کنگ بیتگ –

پنجگور ءَ گورتگیں ھورانی سبب ءَ دھکانکاراں بازیں کچے ءَ تاوانباری بیتگ ءُ دھکانکارانی سولر ترندیں گوات ءَ دور داتگ اَنت –

پنجگور ءَ گورتگیں رگامانی سبب ءَ دمک ءُ در آپاں گَٹ کرتگ اَنت پنجگور شھر ءِ تہ ءَ جھل ءُ برزیں دگ ءِ سبب ءَ آپ شھر ءِ تہ ءَ مُچ بیتگ ءُ مھلوک ءَ روگ ءُ آیگیانی واستا جنجالانی دیمپانی اِنت –

مولم شناس ءِ رد ءَ ھورانی گیشیں گمان کنگ بیتگ اَنت –

مولم شناس ءِ رد ءَ مکران ءِ بازیں جاھاں 15،16ءُ 17 تاریخ ءِ میان ءَ جوانیں ھورانی گمان اِنت –

مولم شناس ءِ رد ءَ اے مولم گوات ءِ ھمراھی ءَ بدل بیت کُت کنت اِنت –

شال ءِ پریس کلب ءَ سیکرٹری پرائمری اینڈ سیکنڈری ہیلتھ کئیر عزیز احمد جمالی ءَ پریس کانفرنس کنان ءَ گوشتگ کہ کیچ ءُ شال ءَ بیست ءُ یک نمونہ ٹیسٹ کنگ بیتگ اَنت –

آئی ءَ پریس کانفرنس ءَ گُشتگ کہ چہ تربت ءَ پنچ ءُ چہ شال ءَ یازدہ کیس کرونا ویروس ءِ نادراھی ءِ دیم ءَ اتکگ اَنت کہ چریشاں ڈیلٹا ویرئینٹ پدر بیتگ اَنت-

ڈاکٹر شیرین خان ءَ گوشتگ کہ اگاں پھریزی ءِ کنگ ءَ مھلوک دلجمی نہ بیت گڑا چارمی درچ ءَ درستاں گیشتر بیمناک بیت کُت کنت –

آئی ءَ گوشتگ کہ ھستیں ویروس گُٹ ءَ کم وھد ءُ پُپاں گیشتر اسر کنت ئِے ءُ آئی ءَ گُشتگ کہ اے انیگیں ویروس ءِ گرگ ءَ پد نادراہ ءِ گور ءَ وھد باز کم بیت ءُ گیش نادراہ ءَ نیزور کُت کنت –

آئی ءَ گُشتگ کہ شال ءَ چار درسد مھلوک ءَ ویکسین جتگ ءَ یک درسد مھلوکے ٹیسٹ کنگ بیتگ اَنت اے ناوشیں جاوراں باز کم اَنت ءُ ڈاکٹر عزیز احمد ءَ گوشتگ کہ مھلوک ءَ سرپد بیگ لوٹ ایت ءُ ویروس ءِ گر ءُ دار ءَ وتی پھریزگ المی اِنت ءُ باید انتزامیہ ترندی بہ کنت ءُ مھلوک ءَ کڈن بہ کنت ءُ مُچی بیڑی مہ کن اَنت ءُ شھر ءَ ترگ ءِ وھد ءَ دپگ بہ کن اَنت –

آئی ءَ گُشتگ کہ کرونا ویروس کسے ءَ جُست نہ کنت ءُ نہ گپت مارا وتی زمہ واریانی سر ءَ المی بیگی اِنت ءُ بلوچستان ءِ سرکار سنگل ڈوز ویکسین آرگ ءَ اِنت ءُ دانکہ مھلوک ءَ ویکسینیشن ءِ واستا آسانی بہ بیت اِنت –

ڈاکٹر عزیر احمد ءَ گُشتگ کہ ھرکس ءَ یک ڈوزے جتگ باید آ دومی ڈوز ءَ ھم بہ جنائین ایت ءُ بلوچستان ءِ سرکار ءَ بلوچستان ءِ دراھیں جاھاں ویکسین پُجارینتگ اَنت –

دومی نیمگ ءَ کیچ ءَ نامی ئیں تاجر شاہ دوست دشتی ءَ وتی شنگ کرتگیں درشان ءَ گُشتگ کہ بانداتگیں روچ ءَ کیچ تربت ءَ سھب ءَ شھید فدا چوک ءَ سنیٹائزر ءُ دپگ بھر ءُ بانگ کنگ ءِ جار جتگ اَنت –

آئی ءَ گُشتگ کہ مھلوک وتی پھریز ءَ دپگ ءُ سنیٹائزر ءَ گیش کارمرد بہ کن اَنت ءَ دانکہ آ اے مزنیں نادراھی ءَ بچ ایت کُت بہ کن اَنت –

نبشتانک: نمدی: پچیں نمدی یے پہ منی استاد واجہ ابدالستار بُگٹی ءَ

نبشتہ کار: پراز نور

دی بلوچستان پوسٹ

دْروت ءُ دْراہ بات ئے دائم ءَ شات ءُ آبات بات ئے زند ءَ ھچ گم مہ گِندات ئے منی گوں تو نند ءُ گِند نہ بوتگ دیم پہ دیم من ءُ تو یکدومی نہ دیستگ من پیسر ءَ ترا را نہ زانتگ کہ تو کئے۔ یک روچے من مُدامی وڑ ءَ پیسبک ءَ سنگتانی ٹپّالانی سر ءَ وتی ھیال ءُ لیکھاں نبشتہ کنگ ءَ اِت آں اناگہ منی نبشتگیں گالردانی سر ءَ تئی یک دانکے (کمنٹے) اتکگ اَت منی نبشتگین رد ات اِنت گُڑا گالانی دیم ءَ تو راستیں گال نبیسّ اِتگ اَنت من یکبرے ھجک ءَ بوت آں کہ باریں اِے کَے بوت کنت گُڑا من ءَ زریپ وپا ءَ گْوشتگ کہ اِے واجہ ابدالستار بُگٹی اِنت بلوچی زبان ءِ جھدکارے ءُ ھزمتکارے گُڑا من چہ ھما روچ ءَ تئی گْور ءَ دربرگ بِنا کُتگ ءُ تئی گَل ءِ تہ ءَ ءُ دگہ لھتیں بلوچ نودربر بلوچی وانگجاھی گل ءِ تہ ءَ ھوار کُت انت۔ مروچی من ءَ کساس دو ماہ بیت کہ من بلوچی نبشتانک ءُ آزمانکاں گوں ھمگرنچ آں۔ من چہ تو باز دربُرتگ ءُ انگہ دربرگ ءَ آں۔ شمئے وڑیں ھزمتکارانی جُھد پہ بلوچی زبان ءَ بے درور اَنت مُدام تئی درونتاں چمشانک دے آں چریشی ءَ من ءَ نبشتہ کنگ ءَ گیش ءَ چہ گیش ھاٹیگ رس ایت۔ مئے وڑیں دگہ باریں چنچو نودربر ھست کہ آیاں چہ تو دربرتگ ءُ نبشتانک ءُ آزمانکانی نبیسّگ بِنا کُتگ شُما پہ بلوچ راج ءِ واست ءَ ھداوند ءِ نیمگ ءَ بے بھائیں ٹیکی اِت ھداوند شمارا راجمان ءِ دیمروئی ءِ واست ءَ دْراجیں اُمر بہ دنت۔

منی بس ھمے اولی سر ءِ ردیانی کشّگ ءَ من دیم ءَ جنزان بوت آں پٹ ءُ پول ھم بِنا کُتگ ءُ مرچی من وڑ وڑیں کتاباں وانگ ءَ آں۔ تئی گل ءِ تہ ءَ آیگ ءُ چہ نبشتہ کاری ءَ بازیں مردمانی پجّار بوت گوں آیاں منی ھال ءُ اھوال گپ ءُ تْران نہ بوتگ بلے آیانی پیسبک ءِ پیج ءَ رواں، چاران ءُ پھم آں کہ آ دْراہ بلوچ راج ءِ واست ءَ بلاھیں ھستی اَنت انچوشکہ مجیب ولی، جمیل مھراب، اِبرار سمین ءُ دگہ بازیں زبانزانت ھست اَنت کہ من ایشانی ٹپّالاں چارگ ءُ دربرگ ءَ آں ایشاں اوں ھداوند دْراجیں اُمر بہ دنت کہ مئے نودربر چہ ایشاں باز دربرگ ءَ اَنت۔

ائید ءَ پد من دلمانگ آں وتی ھلک ءُ میتگ ءِ تہ ءَ یک بلوچی ءُ انگریزی دربرجاھے پچ بہ کن آں ءُ وتی بلوچ راج ءِ چاگِرد ءِ تہ ءَ راجی زُبان ءِ بستار ءُ ارزِشتے ودی بہ کنائین ایں پہ من دوا بہ کن کہ ھدا منی جُھد ءَ من ءَ سوبین بہ کنت۔

گڈسری من گوں راج ءَ دزبندی کنان ءَ گْوش آں کہ باید انت ما وتی دزھُورکی ءِ ھُمک ساھت ءُ دمانے پہ وتی راجی زُبان ءِ وانگ ءُ دربرگ ءَ بہ دے ایں ما اولسر وت پیسبُک ءُ وٹس ایپی بلوچی وانگجاھاں باسکی بزور ایں ءُ پد ءَ وتی لوگ ءِ مردم ءُ سْیاداں ھم سکین بہ دے ایں کہ پہ بلوچی وانگ ءُ زانگ ءَ مئے بلوچی دربرگی گلاں بَز بہ کن اَنت چوناھا ما دْراہ بلوچ ایں پمیشکا گوں درونتانی وانگ ءُ سرپد بوگ ءَ ما ھرکس وت بلوچی نبشتہ دربر ایں۔

البت من ترا ھم اِے گوشگ لوٹ آں کہ تو نوں پہ مئے راج ءِ واست ءَ نوکیں درونتاں ھم جوڑ بہ کن ئے کہ راج ءَ گیشتریں سرپدی یے بہ رس ایت ءُ ما اُمیت کن ایں کہ راج ھم گوں تو ھمراھی ءَ جُنزان کنت۔ شالا مُدام ھست، شات ءُ پہ راجی زُبان ءِ دیمروئی ءَ جُنزان بات ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ دمگ پنجگور ءَ بند ساچی شرکت، دمگی ڈیتھ اسکواڈ ءُ اپسی کہن ءَ پاکستانی پوج ءِ سر ءَ ناشناسیں سلاہ بندیں مردماں اُرش کتگ –

اُرشانی آسر ءَ پاکستانی پوج ءُ پوجی شرکت(ایپ ڈبلیو او) کارمنداں جانی ءُ مالی تاوان ءِ دیمپانی بوتگ – سلاہ بندیں مردم درآھگ ءُ رؤگ ءَ سوبمند بوتگ انت –

دومی نیمگ بلوچ آجوئی لوٹوکیں سلاہ بندیں گل بلوچستان لبریشن پرنٹ ءُ بلوچ ریپبلکن آرمی ءَ رسانکدراں وتی شنگ کرتگیں درشانانی تہ ءَ اے اُرشانی زمّہ واری منّ اِتگ اَنت آھانی گوشگ انت پاکستانی پوج، ڈیتھ اسکواڈ ءُ پوجی شرکت ءِ سر ءَ اُرش بلوچستان ءِ آجوئی ءَ تاں ھمے وڈ یکشل ءَ برجاہ مان انت –

بلوچستان لبریشن پرنٹ ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں گوستگیں روچ ءِ بیگاہ ءِ ادار ھپت ءَ تمپ ءِ دمگ اپسی کھن ءِ دُزراہ ءَ پاکستانی پوج ءِ پانگس ءِ سر ءَ دورجنگیں توپک ءَ گوں اُرش کتگ ءُ یک کارمند ءِ کُشتگ-

جارکش ءَ دیمتر ءَ گوشتگ کہ یکشمبے ءِ سُھب ءَ مئے سرمچاراں کیچ ءِ دمگ مند چُکّاپ ءَ پاکستانی پوج ءِ سر ءَ ھما وھد ءَ اُرش کتگ کہ آ سیمسراں ٹَٹ جنوکیں کارمندانی پھازگ ءَ ساڈی بوتگ اَنت-اُرش ءِ آسر ءَ پاکستانی پوج ءِ سےَ کارمند مرتگ ءُ اُرش ءَ پد لاشانی چست کنگ ءَ پاکستانی پوج ءِ بالگرد جنگجاہ ءَ سربوتگ اَنت-

ھمے وڈ بلوچ ریپبلکن آرمی جارکش بیبگر بلوچ ءَ پنجگور ءَ ڈیتھ اسکواڈ ءُ ایپ ڈبلیو او کارمندانی سر بوتگیں اُرش ءِ زمّہ واری منّ اِتگ گوشتگ کہ مئے سرمچاراں مروچی سھب ءَ پنجگور ءِ دمگ دِز پروم ءِ ھند گومازی ءَ سی پیک ءِ لِنک دَگ ءِ سر ءَ کار کنوکیں ایپ ڈبلیو او ءِ کارمند ءُ ھندی کشندہ ٹولی ءِ کارمندانی سر ءَ نوکیں سلاھاں گوں اُرش کتگ – اُرش آسر ءَ ایپ ڈبلیو او ءُ کشندہ ٹولی ءِ سےَ کارمند کُشتگ ءُ بازیں ئِے زدگ بوتگ-

جارکش ءَ گوشتگ کہ ما یکرندے پد ءَ دمگی مھلوک ءَ لوٹ کنیں کہ آ چہ ھمے کار ءِ پوریاگری ءُ کُمک ءَ وت ءَ دور بہ دار اَنت – ما وتی اُرشاں ترند تِر کن ایں۔

شَیر: ندر پہ شهید خالد حیدر عرف بیبگر ءِ اروه ءَ

شائر: سلیم ناز

دی بلوچستان پوسٹ

تاسپیں بَچانی گم اُوپار نہ بیت
سّدکان مئے هون پہ هالو گار نہ بیت

سرمچاراں پہ وتن دیوانگاں
آ گنوکاں گیدی ءَ بہ سار نہ بیت

جنگ هست داں کہ بلوچے هست بات
زندگیں بیبگر ءِ پگر باپار نہ بیت

سنگراں مھکم کن اِت اُو همبلاں
اے گلامی ءَ مُدام بازار نہ بیت

گلزمین لوٹ اِیت مُدام سالونکیں سر
هنییں هوناں گوں دهل تیجار نہ بیت

راجی بامرداں سلام سهریں سلام
گوں ما موتک ءُ زالی هچ پیم زار نہ بیت

ایمن ءَ هچبر نہ ننداں من سلیم
آجوئی ءِ داں کہ گوشاں جار نہ بیت

یوروکپ ءَ اٹلی ءَ انگلینڈ ءِ دیم ءَ پیلانٹی شوٹ دو پہ سَے ءَ باج برتگ – گوستگیں روچ ءَ ارجنٹینا ءُ برازیل ءِ میان ءَ کوپا امریکہ کپ ءَ ارجنٹینا ءَ باج برتگ اَت –

دوشی شپ یوئیفا یورو کپ ءِ پائینل گوازی برجم دارگ بوتگ اٹلی ءَ انگلینڈ ءِ دیم ءَ پیلانٹی شوٹ باج برتگ یورو کپ دست گپتگ –

یوئیفا یورو کپ ءِ فائینل گوازی انگلینڈ ءُ اٹلی ءِ میان ءَ بوتگ – اٹلی ءَ پیلانٹی شوٹ سَے گول ءَ انگلینڈ ءِ دیم ءَ باج برتگ کپ دست گپتگ – گوازی ءِ بندات ءَ انگلینڈ ءِ لیبیاں جوانی ءَ گوازی کنان ءَ انگلینڈ ءِ لیبی لوکی شاؤ ءَ اولی دؤئیں ملٹانی تہ ءَ یک گولے اسکور کُتگ ، وھدیکہ دومی آپ ءَ اٹلی ءِ لیبی لیونارڈو ءَ گول موکتگ ءُ ھردو ٹیم یک یک گول ءَ دیمیگ بوتگ انت – ھردو ٹیمانی لیبیاں گیشیں ملٹانی تہ ءَ ھم ھچ گول اسکور نہ کتگ وھدیکہ پیلانٹی شوٹ ءَ اٹلی ءَ انگلینڈ ءِ دیم ءَ سَے گول باج برتگ –

زانگ بہ بیت یوئیفا یورو کپ ءَ بیست ءُ چار ٹیماں بھر زرتگ ءُ بیست ءُ چار ٹیمانی تہ ءَ انگلیڈ ءُ اٹلی ءِ لیبیاں جوانی ءَ گوازی کنان ءَ وت ءَ فائینل ءَ سرکتگ – فائینل گوازی ءَ انگلینڈ اٹلی ءِ دیم ءَ پیلانٹی شوٹ ءَ بے سوب بوتگ یورو کپ اٹلی ءَ کٹیتگ –

انگلینڈ پنجاہ ءُ پنچ سال ءَ پد یک جوانیں چیزے ءِ کَٹگ ءَ اُمیتدار بیتگ بلے آ اے سوبمندی ءَ اٹلی ءِ دیم ءَ پُرشت ءُ اٹلی ءَ چار کروڑ ءُ چِل لک ڈالر ءِ گران بھائیں داد دست گپتگ ءُ وت ءَ سوبمند کرتگ –

یورو کپ ءِ آسری ءَ جتا جتائیں ڈیھاں گوازی جاھاں گوازی جوانیں رنگے ءَ سمبھینگ ءُ دوستداروکاں مزنیں کچے ءَ مزنیں اسکرینانی دیم ءَ چارگ بیتگ –

گوستگیں روچ ءَ کوپا امریکہ پائینل گوازی ءَ ارجنٹینا ءَ باج برتگ کپ دست گپتگ –

ارجنٹینا ءَ برازیل ءِ دیم ءَ یک گولے ءَ باج برتگ ءُ کوپا امریکہ ءِ نوکیں چمپئین جوڑ بوتگ –

کوپا امریکہ کپ ءِ فائنل گوازی برازیل ءُ ارجنٹائن ءِ میان ءَ بوتگ کہ ارجنٹینا ءِ لیبی ڈی ماریا ءَ بیست ءُ دومی مِلٹ ءِ تہ ءَ یک گول ءِ اسکور کتگ آئی پد ڈوئیں ٹیمانی نیمگ ءَ ھچ گول اسکور کنگ نبوتگ ھمے وڑ ارجنٹینا ءَ برازیل ءِ دیم ءَ یک گولے ءَ باج برتگ-

زانگ بہ بیت ارجنٹینا نوزدہ سد ءُ نود سَے پد کوپا امریکہ ءِ کپ ءِ کٹگ ءَ سوبین بوتگ وھدیکہ برازیل سرجمی ءَ بیست ءُ ھپت لیبانی بازی برگ ءَ پد گڈی (فائینل) ءَ ارجنٹینا ءِ دیم ءَ بے سوب بوتگ – ھمے وڑ ارجنٹینا ءِ گول کیپر ایمی مارٹینز گولڈن گلوزانی ھکدار جوڑ بیتگ ءُ ایمی مارٹینز گولڈن گلوز آنی کٹگے ارجنٹینا ءِ اولی گول کیپر جود بوتگ – برازیل ءَ بیست ءُ ھپتیں گوازیاں باج برتگ آئی ءَ بیست ءُ دو گوازی کٹیتگ ءُ پنچ گوازیاں دیمیگ بوتگ – وھدیکہ ھچ گوازی ءَ بے سوب نبوتگ بلے گڈی ءَ ارجنٹینا ءِ دیم ءَ یک گولے ءَ بے سوب بوتگ

فائینل گوازی ءَ پیش جھانی وبا کرونا وائرس ءَ بیران بوتگیں مردمانی یات ءَ یک ملٹ ھاموشی پد گوازی بندات کنگ بوتگ-

یات بہ بیت جنوبی امریکہ دہ ٹیمانی میان ءَ لیب دارگ بوتگ ءُ کوپا امریکہ کپ گوازی پانزدہ جون ءَ بندات بوتگ ءُ یانزدہ جولائی گڈی گوازی کنگ بوتگ –

سر بیتگیں ھالانی رد ءَ بلوچستان ءِ دمگ دالبندین ءَ گوادر ءَ چائنہ ٹرالنگ ءُ بلوچ دریا وردانی لاپ ءِ لگت جنگ ءِ ھلاپ ءَ دالبندین پریس کلب ءِ دیم ءَ زھرشانی کنگ بیتگ –

زھرشانی نیشنل پاٹی ءِ دمگی سروک میر عاطف بلوچ، بی ایس او (پجار) ءِ دمگی آرگنائزر وسیم بلوچ، تھسیل سیکرٹری غلام اللہ بلوچ ءُ دگہ مردماں تران کرتگ –

تران کنوکاں گوشتگ کہ گوادر ءِ زر ءَ چائنیز ٹرالنگ بلوچ دردیا وردانی لاپ ءَ لگت جنگ ءُ آیاں شد لاپ کنگ ءَ اَنت کہ اے بلوچ دردیا وردانی زرکاری ءَ نیست ءُ نابودی ءَ گوں بروبر اَنت –

آیاں گوشتگ: جھلیں زر ءَ شریں ماھیگاں گرگ ءُ نوکیں دور ءِ نام ءَ کارمرد کنگ ءُ ماھیگانی نسل ءَ گرگ ءَ وتی زراں برگ ءَ اَنت –

آیاں گوشت کہ اے رنگ ءَ ماھیگانی نسل کُشی ءُ بلوچ دریا وردانی زرکاری ءَ نیست ءُ نابود کنگ ءَ سرجمیں بلوچستان نہ منّ اِیت –

آیاں گوشت کہ سی پیک ءِ نام ءَ زر گرگ ءُ ورگ ءُ پنجاپ ءَ پائدگ بیگ ءَ اِنت ءُ بلوچستان ءِ زر ءُ مڈیاں روپگ ءُ برگ ءُ ھڑپ کنگ ءَ اَنت –

آیاں گوشت کی بلوچستان ءِ مھلوک ءِ گون ءَ نیشنل پاٹی ھر گام ءَ اوشتوک اِنت ءُ سرکار ءِ ردیں پالیساں ھمک پھناتاں بندوکیں مردم بے روزگاری ءِ سبب ءَ تکانسر اَنت ءُ دانکہ مھلوک ءَ ھک دیگ نہ بیت تنا وھدی ڈیھ دیمروئی کُت نہ کنت –

آیاں گوشت: گوادر ءِ نام ءَ مزن مزنیں ٹاہ دیگ بیگ ءَ اَنت بلے تنی وھدی اود ءِ جھمنندیں مردماں ترمپے آپ ھم نیست کہ وتی نکاں تر کُت بہ کن اَنت –

آیاں گوشت کہ دریا وردانی زراں ھلاس پرے ھاتر ءَ کنگ ءَ اَنت کہ دانکہ زر واریں مھلوک اود ءَ تنگدست بہ بیت ءُ لڈ ءُ بار ءَ لاچار کنگ بہ بیت ءُ آیانی جاہ ءَ دری مھلوک ءَ چائنیز آرگ ءُ آباد کنگ ءُ نوکیں ساز ءَ ساماناں بلوچ مزنیں پندلے سازگ بیگ ءَ اِنت –

آیاں گوشت کہ جھمنندیں مھلوک ءَ بے روزگار کنگ ءَ دری مھلوک ءَ آرگ ءُ روزگار دیگ اے ناانساپی بیگ ءَ اِنت ءُ چریشی ءَ نیشنل پاٹی ءُ بی ایس او (پجار) ءِ رھشون بے توار نہ بنت ءُ اشانی واستا توار چِست کن اَنت –