TBP Balochi

بلوچستان ءِ بنجاھی شھر شال ءَ ریڈ زون ءَ ھوشاپ ءِ وئیل ءَ شھید بوتگیں زھگانی کھول ءِ زھرشانی مروچی چارمی روچ ءَ برجاہ بوتگ –

اے وھد ءَ بلوچ یکجھتی کمیٹی ءِ رھشوناں ڈاکٹر مھرنگ بلوچ ءُ دگہ مردماں کھول ءِ ھمراھی ءَ پریس کانفرنس کنان ءَ گوشتگ کہ اگاں بیست ءُ چار ادارانی میان ءَ مئے لوٹ منّگ نہ بوت اَنت زھرشانی کنان ءَ دیم پہ اسلام آباد ءَ رؤئیں ھمود ءَ نندانک ءَ نندیں –

پریس کانفرنس ءَ تران ءَ کنان ءَ ڈاکٹر مھرنگ بلوچ ءِ گوشگ ات کہ یک کھول ءِ کہ آئی ءِ ھپت مردم پیسر ءَ جنگ ءُ کُشگ بوتگ انت ءُ پد ءَ ھمے کھول ءِ دگہ دو زھگ پوج ءِ نیمگ ءَ آس داتگیں ماٹر گولھاں شھید بوتگ – اے زوراکیاں چہ رکگ ءِ ھاتر ءَ اے کھول ءِ کماش بازیں جیڑہ ءُ جنجالاں پد تربت ءَ چہ شال اتکگ انت کہ نیم راہ ءَ زورانسری دارگ ءِ جھد ھم کنگ بوتگ –

آ چہ تربت ءَ شال ءَ ھمے امیت ءَ اتکگ انت اگاں تربت ءَ اھوالکاراں کوریج دیگ ءَ جیڑھانی دیمپانی انت بوت کنت شال ءَ آھانی پریات گوشدارگ بیت – پرچاکہ آئی ءِ کھول ءَگوستگیں بازیں سالاں زوراکی ءِ نشانگ بوگ ءَ انت بلے بژنی گپ ءِ کمے میٹر ءَ دور نشتگیں اھوالکار اے زھگانی جوناں کوریج دیگ ءَ بے سوب بوتگ انت –

آئی ءَ گوشتگ کہ بلوچستان ھاسکر مکران ءَ بس گوستگیں یک سالے ءِ تہ ءَ پوج ءِ دست ءَ انسانی ھکانی لگتمالی ءِ بازیں وئیل دیم ءَ اتکگ اَنت کہ مردمانی زورانسری اوار جنی، بید وارنٹ ءَ مردمانی گسانی سر ءَ بیڑ برگ ءُ چادر چاردیوالیانی لگتمالی، کراچی یونیورسٹی ءِ نودربر حیات بلوچ ءِ کوش ءَ بگر تاج بی بی تاں مردماں روچ رھمانی تیر آماچ کنگ ءُ شھید کنگ ءُ لس مھلوک ءِ سر ءَ تیر گواری یا ماٹر گولہ آس دیگ ھمک روچی کارے جوڑ بوتگ اَنت –

آئی ءِگوشگ ات کہ بلوچستان ءِ سیکورٹی پوج ءُ ھاسکر ایف سی سرجمی ءَ یل کنگ بوتگ کہ ھمک روچ سنگینیں انسانی ھکانی بگیری بوگ ءَ انت ھما وئیل رسانک ءِ چماں اندیم انت آ بئے نہ انت بلے ھما کھولاں ترس ءُ بیھارانی پرواہ نہ کتگ ءُ وتی کھولانی کوش ءِ بگیری ءَ توار چست کتگ نوں مردم وتی بے گناھیں مردمانی جونانی کل کنگ ءَ دم برتگ ءُ اے درچ یکشل ءَ برجاہ انت اوشتگے نام ءَ نہ زانت ھمے ھاتر ءَ نوں بلوچاں وتی جونانی کل کنگ ءَ انکار کتگ –

واجہ مھراب کہ آئی ءِ نماسگانی جون گورنر ہاؤس ءِ دیم ءَ ایر انت آئی ءَ وتی کھول ءِ پیسر ءَ بازیں مردمانی جون کل کتگ اَنت بلے نی آ ھک لوٹ ایت ءُ ھک رسگ ءَ ابید وتی زھگانی جونانی کل کنگ ءَ انکاری انت –

آئی ءَ دیمتر ءَ گوشتگ کہ مھراب ءَ تربت ءِ تہ اللہ بخش ءُ شراتون ءِ جونانی ھمراھی ءَ سَے روچ ءَ زھرشانی کتگ بلے اود ءِ انتزامیہ ءَ ڈی سی ءِ کرد ھمے بوتگ آھاں ایف سی ءِ ترجمانی کتگ – مردماں بیھار دیگ آھاں ھچ نگوشگ ءِ واست ءَ لاچ دیگ ءَ بوتگ انت وھدیکہ کھول ءَ وت ءَ شال ءَ سر کتگ ءُ ھک ءِ ھاتر ءَ وتی لوٹ دیم ءَ آؤرتگ انت آھانی لوٹ ملکی کانود ءُ رھبندانی رِد ءَ انت – بلے شال ءَ گوستگیں چار روچاں گورنر ہاؤس ءِ دیم ءَ نندانک جنگ ءَ ابید سرکار ءِ نیمگ ءَ ھچ وڑیں گامگیج زورگ نہ بوتگ اَنت- سرکار ءِ رویہ ءُ گیر سنجیدگی ءَ اے گپ پدر انت سرکار ملکی کانود ءُ رھبندانی رِد ءَ شھری مردماں ھک دیگ ءَ سرجمی ءَ بے سوب انت – ریاست ءِ بے حسی ءِ گندگ ءَ کھول ءُ زھرشانی منوگراں ھمے پیسلہ کتگ کہ نوں ترندیں گامگیج ءِ زورگی انت – آئی ءَ گوشتگ کہ سرکار ءَ بیست ءُ چار ادارانی مھلت دیگ بیت انت کہ مئے لوٹاں الکاپی ءَ دلگوش بہ دنت –

ڈاکٹر مھرنگ بلوچ ءَ گوشگ ات کہ بیست ءُ چار ادار ءَ پد کھول پہ ھک ءِ ھاتر ءَ اسلام آباد نیمگ ءَ پند جنت ءُ اسلام آباد ءَ نندانک جنت ءُ زھرشانی کنت –
آئی ءِ گوشگ ات کہ ما یکرند ءِ پد ءَ گوں سرکار ءَ لوٹ کنیں کہ آ گوں سنجیدگی ءَ لوٹاں بہ منّیت اگان ناں اشی ءِ ھرابیں رزلٹ ءِ درکیت ءُ آئی ءِ زمہ دار سرکاریں –

آئی ءَ گوشتگ کہ ما اے پریس کانفرنس ءَ چہ بلوچستان ءِ کلیں راج ءَ، سیاسی گل، سول سوسائٹی، نودربر گل، ڈاکتر ءُ وکیلاں ءُ دگہ تک ءُ پھناناتاں سیادی داروکیں مردماں لوٹ کنیں کہ وتی ھاموشی ءَ ھلاس بہ کن انت پُرایمنیں زھرشانی ءِ بھر بہ بنت اے زوراکیانی بگیری ءَ توار چست بہ کن انت –

گڈسر ءَ بلوچ یکجھتی کمیٹی ءَ بلوچستان ءِ سرجمیں راج ءُ سیاسی تاکتاں چہ لوٹ کتگ کہ ھوشاپ ءِ شھید بوتگیں زھگانی کھول ءِ گوم ءَ یکجھتی کنگ ءِ ھاتر ءَ باند ءَ چہ وتی دمگاں زھرشانی بندات بہ کن انت ءُ شال ءِ درسیں شاھدگاں روگ ءُ آیگ ءِ راھاں سرجمی ءَ بند بہ کن انت –

نبشتانک: کِشک

نبشتہ کار : واھد بلوچ

دی بلوچستان پوسٹ

بازارے ھست اِنت کہ آ بازار ءِ چار کشک ءِ مِیان ءَ یک جاھے ھست اِنت جاہ ءِ نام اِنت بِہ مُراد بلے اے ساھت ءَ کَسّے گْومان ءَ ھم نہ اِنت کہ اے جاہ ءَ اے ساھتاں بہ مُراد ءِ سَرشپ ءَ دو پیرمرد گْوں دو آزگیں مَیّتاں گْوں کیت ءُ نِند اَنت پَد ءَ انساپ ءِ دریگ ءَ تَوار جَن اَنت کہ مار ءَ ھم بَر ءِ گْوں انساپ ءِ راہ ءَ ماہ ھم انساپ ءِ راہ ءَ روگ لوٹ آں مارا بَروک نیست اِنت بلے مُلک ءِ ھاکمیں مردماں کَسّ ءَ ھم وتی چک نہ ترّین اَنت ءُ دراھیناں وت ءَ را گُنگ ءُ کُور کُت ئِے بلے اے جاہ ءِ کپتگیں بالاد ءِ سَر ءَ پیسراں ھم باز آزگیں مَیّت اتگ ءُ نشتگ اَنت بلے آ مَیّت وتی منزل ءَ سُوبمند نہ بیتگ انت چیا کہ اگاں آ مَیّت سُوبمند بُتین اَنت گُڑا مرچی اے دویں پیرمرد گْوں دویں مَیّتاں نیتکگ اِت اَنت ءُ اے کشک ءِ سَر ء نہ کپتگ اِت اَنت ءُ گْوں ملک ءِ ھاکماں تَوار جَنگ ءَ نہ ات اَنت۔ اے تھار ماھیں ماھکانیں شپ وتی چادر ءَ زمین ءَ چیر گیجان بوت تھاری ءَ مانشان ءَ کُت اَنت ءُ بازار ءِ دراھیں ھند ءُ دَمگان ءَ گُشے ھاموشی ءِ اتک ءُ مانشان اَت-

ھمے ھاموشی اتک گڑا بلوچستان ءِ توک ءَ کُجام ھم ھند ءُ دَمگاں وت ءَ را تالاں کُت آ ملک ءِ نہ پُرس ءَ گیشتر ھمے آس کہ دنیا ءِ دگہ دگہ دمگاں تالاں بوگ ءَ اَنت تو مئے جِند ءِ ھاکمیں مردماں ھمے آسار ءَ آپ ماریچاں کُت کہ اے آس ھمے ساھتاں دمتوس ءُ بِمرّ ایت اِنت دنیا ءِ دگہ ھند ءُ دمگاں سَر مہ بیت اِنت چیا کہ اگاں مرچی اے آس دنیا ءِ دگہ دمگاں بُرو سَر بہ بیت اِنت گُڑا مئے ھاکمیانی تازوکیں زَر کیسگ ءَ نہ کپ اَنت تو پَمیشکہ ملک ءِ نہ پُرس ءَ آس ءِ کُشگ ءِ دُمب ءَ ئے پَد ءَ بازار ءِ مئے مردماں ملک ءِ نہ پرُس ءِ تواریں تُرسار ءَ دست تو دراھیں مردماں وت ءَ را کُور ءُ گُنگ کُتگ کہ بزاں ما اے دویں پیرمرداں ءُ دویں آزگیں مَیّتاں گندگاں نہ اِنت کَسّ اے تھار ماھیں شپ ءَ نہ اِنت آ دراھیں چیز وتی جاگہ ءَ اَنت بلے یکیں ھم نئیت دپی جُستے نہ کُت کہ شُما پیرمرداں چون اِت ءُ شُمارا اے شپ ءَ چی اے کار کَپت اِیت؟ پَد ءَ دراجیں شپ ءَ گمانی جنگل ءَ ارس نلیں زِر ءَ چو لِیب ءُ گْوازی ءَ اَنت آزگیں ٹپ ءُ درداں ءَ واد ھم است اِنت کے ھمے آزگیں ٹپ ءُ دردانی واداں چے دراجیں شپ ءَ واب ھم چمّاناں نیست اَنت دویں پیرمردانی گْوں مَیّتانی ھمراھے شپ گُوازینت ءُ شپ ءَ را روچ کُت-

دویں پیرمرد گْوں اے ملک ءِ نہ ھاکماں ءُ نہ کے اے ملک ءِ چہ انساپ ءَ امید گندگ ءَ اَنت اے ملک ءِ گس ءِ دریگ ءَ چہ ھچ گندگ ءَ نہ اَنت گُڑا دویں پیرمرد چہ اے مَیّتانی کشک ءِ سَر ءِ نندگ ءُ تَوار جَنگ چے دل پُرش بوت اَنت کہ نوں ما اے مَیّتاں زوراں رواں لوگ ءُ جاھے کن آں۔

ھمے ساھتاں یک پیرماتے اتک ھَمد ءِ نشتگیں مردماں کَسّ نزانت اِنت کُجیگ اِنت ءُ کُجا نشتگ نامے کے اِنت ھمے بازار ءِ چارین کشک ءِ مِیانی ءَ اتک ءُ نشتگ اَنت ھمے دویں مَیّتانی دیم ءَ نشتگ اَنت ھمے پُسو ئِے دات ءُ گُشتے کہ اے مَیّتاں ھچ جاہ ءَ نہ بَر اَنت ءُ اے مَیّت منی اَنت اے منی چُک بیتگ اَنت ءُ منی چُکانی مَیّت اَنت کُجام مات وتی چُکانی مَیّتاں یل کنت اَنت رو اِت اِنت؟ –

ھمے مات ءَ پَد ءَ پُسو دات کہ اگاں مئے تَوار ءَ ءُ مئے گپاں اے بِہ مُرادیں جاہ ءَ گُوشدارگ نہ بنت اِنت ءُ مارا ءُ شُمارا اد ءَ انساپ دست نہ کپ ایت گُڑا مارا ءُ شُمارا دگہ ءَ یک کشکے ھست اِنت ھما کشک ءَ راوان ءُ نند اِنت انساپ ءِ واستا بلے اے گپاں دویں پیرمرد ءَ وتی زھن ءَ کش اِت کہ ما اے مَیّتاں بَریں لوگ جاھے داں اگاں مرچی ما ءُ شُما اے مَیّتاں بَگیر انساپ ءَ لوگ جاہ بکن آں دنیا ءِ دیم ءَ مئے چم جل بنت اِنت تو اے ریاست بانداں روچ دگہ ماتی ءِ چمّاں ارسیں کن اَنت-

گُڑا پَد ءَ دویں پیر مردانی توک ءَ یک انچے سَرجمیں سوگات اتک ءُ دور ءِ کُت کہ آ سوگات پیرمات ءَ دات انت اے دویں پیر مرد وتی سَرجم ءِ زندگی ءَ چہ دنیا ءِ ھَر وڑیں زوراکی ءِ بیتکین اَنت اے شانیں سَراں چو کوہ بنداں مک بنت اَنت ءُ اے دویں پیرمرداناں کَدی ھم نوں زوراکی ءِ پُشت ءَ دور دات کُت نہ کنت اَنت چیا کہ اے ھمے رنگ ءَ نوں سَرجم بُوت اَنت-

گُڑا اد ءَ بے مُرادیں جاہ ءَ اے دویں پیرمرد دویں مَیّتاناں انساپ نہ رس اِت اے دویں پیرمرداں ھمے پیسلہ کُت کہ ما پہ انساپ ءِ واستا رواں شال ءِ کشکانی سَر ننداں ءَ ءُ ملک ءِ ھاکمان ءَ تَوار پَد جَناں بلکیں مئے تَوار ءَ انساپ ءِ یکپت ءُ مئے تَوار ءَ پَد بہ دے اَنت بلے اے روچ ءَ اے بازار ءِ بے مُراد ءِ جاہ ءَ ءُ ھند ءُ دمگے بازیں لَس مھلوک اتکگ ءُ بَر زرتگ اَنت ھَوار بوتگ اَنت ھمے دویں پیرمردانی کاروان ءَ گوں ۔

اے شپ ءَ وتی تھار ماھکان ءِ برمش ءَ گوست اَنت تو روچ ءَ وتی نازروکیں برمشاناں روان دات اَنت زمین ءَ تو دویں پیرمرداں تیاری کُت اَنت نوں شال ءِ کشکانی سَر ءِ نندگ ءَ پہ لھتے ساھت ءِ گوزگ ءَ پَد دویں پیرمرد ءُ لھتے لَس مھلوک ءُ دویں مَیّتاں گْوں روان بیت اَنت شال ءِ دیم ءَ پہ انساپ ءِ لوٹگ ءَ اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیاب دپی دمگ پسنی ءِ جھمنند بلوچی زیمر ءِ نامی ئیں بینجو جنوک اُستاد رسول بکش فرید گوستگیں روچاں بزاں چاردہ رمس ءَ آدینگ ءِ شپ پسنی ءِ تیاب دپ ءَ مراگشے ءِ سر ءَ کم شرپ کنگ بوتگ، زاہ ءُ بد آ گوں لگت ءُ مشتاں مانبندگ بیتگ ءُ آئی ءِ بینجو پروشگ ءُ بیھار دیگ بیتگ کہ دگہ برے مراگشاں بھر مہ زور،آھاں وت ءَ ایجنسی ءِ کارمند زاھر کتگ ءُ چیریں ادارھانی دست ءَ آوار جنگ ءِ بیھار ھم داتگ –

استاد رسول بکش فرید ءَ وت وتی شنگ کرتگیں تامری درشان ءِ تہ ءَ اے گپ راست کُتگ گوشتگ کہ آدینگ ءِ شپ ءَ تیاب دپ ءَ ساز زیمری مراگش ءِ بوتگ مراگش ءَ گلاب جمعہ، نسیر پسنی والا ءُ خیر جان باقری ھوار مناں ھم مراگش ءَ لوٹارینگ بوتگ کہ بینجو بہ جن –

آئی ءَ گوشتگ کہ من ناں سرکاری نوکری ءَ ناکہ سرکار ءِ نیمگ ءَ پنڈ ءِ رس اتگ ، یا رسگ ءَ انت یا رسگ ءِ امیت ءَ داراں، ناکہ من ءَ پوڑی ءِ رس ایت ناں من ءَ جاہ ءُ مِلک ءِ ھست کہ من لاپ بہ وراں منی ھر چیز گوں ھمے بینجو ءَ بندوک انت کہ ماہ ءُ دو ماھے سر ءَ گشندہ ءِ دل ءَ بیت من ءَ مراگش ءَ بارت گوں –

آئی ءَ گوشگ ات کہ گلاب جمعہ ءُ نسیر پسنی ولائے گانا جنگ ءَ پد خیرجان باقری اسٹیج سر ءَ اتکگ ات شپ ءِ ھما ساھت چار بوتگ ات – آئی ءَ گوشت کہ ھر گشندھے کہ پنچ شش گانا جنت گڑا سَے چار براں بینجو سُر کنگی انت ، آئی تار جھل برز کنگی انت گڑا اشی ءَ کم چہ کم پنچ دہ ملٹ لگیت انت گڑا خیر جان وتی سُر مٹینت گڑا من گوں وتی بینجو دلگوش بوتگ سُر ءَ شر کنگ ءَ تاں مردماں خیرجان گوشت کہ گانا بہ جن گڑا منی ھمساھگ گوشاں کہ مراگش ءَ نندوک بوتگ انت حیرجان ءَ سر سُرینتگ بزاں اشارہ سر ءَ گوشتگ ئب کہ من گانا جنیں بلے اے بینجو ساز کنگ ءَ انت – گڑا من دیست سِی چل مردم اتک ءُ منی سرءَ میلانک بوت گوشگ ءَ لگتاں کہ تو بینجو ٹنگ ٹنگ کنگ ات. من گُشت آ مرد سُر مٹینتگ من بینجو ساز کنگایاں اشاں کوکار کتگ ات من ءَ ساز کنگ ءَ ھم نہ اشتے – من گڑا خیر جان گشت گڑا گانا بہ جن من بینجو ءَ جنیں گڑا حیرجان پاد اتک کہ من گانا نہ جنیں گڑا اشاں مناں مان بست –

آئی ءَ وتی تامر ءِ تہ ءَ لھتے مردمانی پجار کنائینت کہ آھاں وتی کھول ءِ دگہ مردمانی ھمراھی ءَ من ءَ جتگ ءُ منی بینجو پروشتگ ءُ بینجو ءِ ساز ءُ سامان ھمراہ ءِ بینجو ءَ برتگ ات کہ دنیگت ءَ ھماھاں گون انت –

آئی گوشت کہ جنوکانی تہ ءَ نورا ھیدر ٹاکور ءِ چک ، ھدایت اللہ ء ھمزہ بینک والا، دولت دگہ خمینی نامینے کہ اشاں سِی مردم ءَ گیش مردم گون بوتگ منی سر ءَاُرش ءِ کتگ –

آئی ءَ گوشت کہ انچو وھد گوستگ شما بلوچ راج دراہ سرپد ات کہ من ھمے بینجو سر ءَ لاپ ورگایاں وتی وھد ءَ تیلانک دئیگایان آئی ءَ گوشت کہ من وتی کیس بلوچ راج ءِ ھوالگ ءَ داتگ – منان ھمے بیھار ءِ داتگ کہ ما ایجنسی مردمیں اگاں دگہ برے تو بلوچانی مراگش ءَ شُت ئے ما تر ءَ ایجنسی ءِ دست ءَ اوار جنائینیں –

آئی ءَ وتی تامر ءِ تہ ءَ گوشت کہ مروچی ءَ چہ پد من ءَ یا منی کھول ءِ دگہ مردم ءَ چیزے بوت زمہ وار ھمے مردم انت ءُ منی گورا دگہ ھچ راہ نیست اگاں من مراگش ءَ مہ رؤئیں منی زھگ چہ گژن ءَ مِر انت – نوں من وتی ارزی وتی بلوچ راج ءِ گور ءَ آؤرتگ کہ شما چی گوشے اے مردم گوشگ انت کہ ما ایجنسی مردم ایں تو اگاں مراگشاں بھر زرت ما تر ءَ چِست کنائینین نوں شما چی گُش ئے –

بلوچستان ءِ دمگ کیچ ءِ ھند ھوشاپ ءَ ایف سی ءِ گولہ باری ءَ کُشگ بیتگیں زھگانی لاشانی ھواری ءَ کھول ءِ زھرشانی بلوچستان ءِ بنجاھی شھر شال ءَ گورنر ھاؤس ءِ دیم ءَ چارومی روچ ءَ برجاہ، زھرشانی ءَ جتا جتائیں پھناتانی مردم اتکگ اَنت ءُ کھول ءِ گون ءَ پدردی درشان کنگ یکشل ءَ برجاہ اَنت –

کھول ءِ زھرشانی ءَ مروچی چارومی روچ سرجم کرتگ ءُ شال ءِ سارتی ءِ سر ءَ دگانی سر ءَ نشتگ اَنت ءُ تنی وھدی سرکارءِ مزنیں واکدار زھرشانی نندانک ءَ کھولانی گون ءَ تران ءَ نیتکگ اَنت –

کھول ءِ گوشگ اِنت کہ ما چار روچ اِنت کہ اد ءَ نشتگ اِنت مارا دو کسانیں زھگانی لاش اَنت گون اَنت بلے ھاکمانی گوشاں ھرامب ءَ مورے ھم نہ وارت –

کھول ءِ گوشگ اِنت کہ ما داں ھما وھد ءَ اد ءَ نندوک بہ ایں دانکہ مارا انساپ نہ رس ایت ما اے سارتی ءَ اوپار کن ایں –

ھمے وڑ ءَ قدیر نامیں ٹوئٹر کارمرد کنوکے ءَ زھرشانی نندانک ءِ اکس شنگ کرتگ ءُ گشتگ کہ یک دردناکیں کسھے کہ مروچی اے سارتی ءِ سر ءَ دو لاشانی ھواری ءَ مردم انساپ ءِ ھاتر ءَ نشتگ اَنت بلے انسانی ھکانی چمپئن گار اَنت –

گوستگیں شپ ءَ کشگ بیتگیں زھگانی پِت واھد بلوچ ھم چہ دبئی ءَ شال ءَ اتکگ ءُ سر بیتگ ءُ آئی ءَ رسانکدراں گوں گپ کنان ءَ گشتگ کہ من درملک ءَ مزوری کنگ ءَ بیتگ اَنت منی سر ءَ اے گرانیں بار دور دیگ بیتگ باید سرکاری واک اے گرانیں بار ءِ واستا مارا انساپ بہ دے اَنت –

ھمے وڑ اسگر بلوچ ءَ ٹوئٹر ءَ نبشتگ کرتگ کہ دو لاش ایر اَنت بلے چوشیں میڈیا نیست کہ اے لاشانی ھالاں مردماں سر کرت بہ کنت ءُ پاکستان ءِ میڈیا ھنچش گنگ ءُ کریں دام ءَ گپتگ اَنت وتی کیمرھانی دیم ءَ ترینت کرت نہ کن اَنت –

آئی ءَ گشتگ اے انساپ ءِ در ءَ ٹکگ ءَ اَنت بلے انساپ ءِ سیاھیں در بند اِنت ءُ اشانی توار ءَ ھچ سما کنگ ءَ نہ اِنت –

ھمے وڑ ءَ پاکستان بار کونسل ءِ وکیلانی ٹولی ءَ احسان بھنون ءِ سروکی ءَ زھرشانی نندانک ءَ اتکگ ءُ کھولانی گون ءَ پدردی درشان کرتگ –

ھمے وڑ اسٹوڈنٹس رھشون ڈاکٹر مھرنگ بلوچ ءَ ٹوئٹر ءَ گشتگ کہ چار روچ اِنت دو لاش گورنر ھاؤس ءِ دیم ءَ شال ءَ ایر اَنت بلے اھوالکار ءُ رسانکدر اے ھال ءِ دیگ ءَ یکدم بے تھمبل اَنت ءُ اشانی ھواری ءُ انسانی ھکانی گل ھم وتی وابیں چماں انگت واب اَنت –

وکیلاں گشتگ کہ ما ھرچ رنگ ءَ آمیدگسی دروشم ءَ کھول ءِ انساپ ءِ واستا اوشتوک اِنت ءُ مارا اے وئیل دردناک اِنت-

زانگ بہ بیت گوستگیں روچ ءَ ایف سی ءِ کارمندانی یک گاڑی ءِ نندانک ءِ جاہ ءَ اتکگ ءُ چریشی ءَ پد مردماں کُکار ءُ وائی کرتگ ءُ ایف سی ءِ کارمند واتر شتگ اَنت –

مردمانی گمانی بیتگ کہ ایف سی ءِ کارمند نندانک ءِ ھلاس کنگ ءَ اتکگ اَنت بلے اود ءَ جاڑیگیں مردماں اے بے سوب کرتگ ءُ تاچینتگ اَنت –

ھمے درگت ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گشتگ کہ شھدائے ھوشاپ ءِ نندانک ءَ ایف سی ءِ جنجال ودی کنگ ءَ کجام نام ءَ بہ دے؟ –

آئی ءَ گشتگ کہ تامر بند ءَ چارگ بیت اِنت کہ ایف سی زھرشانی نندانک ءَ نشتگیں مردمانی سر ءَ گاڑی ءِ چاڑینگ ءِ جھد ءَ کجام رنگ ءَ کنگ ءَ اِنت –

آئی ءَ گشتگ کہ جست ایش اِنت اگاں ایف سی اے وئیل ءَ دزمانجن نہ اِنت گڑا پرچا شال ءَ آیوکیں کاروان چاردہ اداراں دارگ بیتگ – مروچی پرچا زھرشانی کنوکاں گاڑی ءِ سر ءَ لگت دیگ ءِ بیھار ءَ دنت –

بلوچ نیشنل موومنٹ ءِ چیرمین خلیل بلوچ ءَ ھوشاب وئیل ءِ پشدر ءَ شنگ کُتگیں درشان ءِ تہءَ گُشتگ کہ ایردستی ءِ ھپتاد سالی پژناکیں ھیلکاری ءَ بلوچ ءِ دل ءَ پہ آجوئی ءَ یک مھرے ودی کُرتگ کہ پاکستانی لشکر ءِ زورکی،ناشرکار ءُ جنگی میار باریاں آیانی توانمندی کم نہ کرتگ،ھوشاپ وئیل ءَ پیریں بلوچ ءِ توانمندی ءُ وھد ءِ زوراک ءِ دیم ءَ پہ جوانمردی اوشتگ ءَ اے یک یکبرے پد ءَ پیشداشت کہ زوراکی وتی تہ ءَ وتی بربادی توم ءَ رودین ایت ءُ کجام ھم وھد ءَ گْوستانک ءِ آمیدگس ءَ زورگری ءُ ناشرکاری ءِ بگیری ءَ ھک ءِ جنگ ءِ سْوڑگ ءَ کنت ءُ زوراک ءِ کسہ آسر بیت۔

چیرمین خلیل بلوچ ءَ گُشتگ کہ ھوشاپ ءِ پیمیں وئیل آجوئی ءِ سپر ءَ گْوستانکی بھر اَنت، اے مارا چکاس اَنت، اے دوست ءُ دُژمنانی پجار ءَ کنائین اَنت ءُ دیم ءَ جُنز اَنت ءُ گوں دُژمن ءَ دیم پہ دیم ءُ سوبمندی، زْرمبشت ءَ توانمندی بکش اَنت، ھوشاپ وئیل ءِ بگیری ءَ بلوچ راجی چیست ءُ ایراں بلوچ ءِ لپاشگ ءَ زوراکیں شوندات ءُ ناشرکاری ءَ یکبرے پد ءَ پاکستان ءِ بھر ءَ رُزوائی نبشت ءُ بلوچ سوبمند بوت۔

آئی ءَ دیمترءَ گُشتگ کہ بلوچ راجی زْرمبشت راجی دروشُم ءَ رج اِتگ، دُژمن ءَ چنچوک زوراکی پہ زْرمبشت ءِ لپاشگ ءَ کُرتگ ایشی ءِ آسر گیش مزنی ءُ شاھگانیں زْرمبشتے ءِ دروشُم ءَ دیم ءَ آھگ ءَ اِنت۔

چیرمین خلیل ءَ وتی درشان ءِ گُڈ سرءَ گُشتگ کہ اے گپ ءِ اُمیت کم اِنت کہ پاکستان سرپد بہ بیت ءُ زوراکی مہ کنت بلے اے گپ تچک اِنت کہ بلوچ ءُ پاکستان ءِ سیادی چو ٹیل ءُ آپ ءِ وڑ ءَ اِنت کہ ایشاں جھان ءِ ھچ کیمیاگر وت ماں وت ھوار کُرت نہ کنت۔

آئی پی ایل ءِ چاردھمی سیزن ءَ چنئی سپر کنگز ءَ یکرندے پد ءَ بزاں چارمی رند ءَ باج بُرتگ ءُ چمپئین جوڑ بوتگ –

دبئی انٹر نیشنل کرکٹ پٹ ءَ آدینگ ءِ روچ ءَ بوتگیں آئی پی ایل پائینل گوازی چنئی سپر کنگز ءَ بُرتگ، چنئی ءَ کولکتہ نائیٹ رائیڈرز بیست ءُ ھپت رناں پروش داتگ اے چارمی رند انت کہ چنئی مھندر سنگھ دونی ءِ کپٹن ءَ آئی پی ایل گوازی ءِ کپ ءَ کٹگ انت –

چنئی سپر کنگز ءَ اولسر ءَ گوازی کنان ءَ سَے وکٹانی تاوان ءَ یک سد ءُ نود دو رن جوڑ کتگ ، پسوئی ءَ کولکتہ ءَ بس یک سد ءُ شست ءُ پنچ رن جوڑ کرت –

چنئی ءِ نیمگ ءَ لیبی ڈوپلیسی ءَ ھشت ءُ شش رن جوڑکت ٹارگٹ ءِ پروشگے ھاتر ءَ کولکتہ ءَ پٹ ءَ اتک دومی اوور ءِ سیمی بال ءَ دونی ءَ ایئر ءِ ارزانیں کَیچ ءِ یلا دات اے وھدی ٹیم ءَ بس شش رن جوڑ کرتگ ات قسمت ءَ کولکتہ ءِ ھمراھداری کت اشی ءَ پد گل ءُ ایئر ءَ دہ اوورانی تہ ءَ نود ءُ یک رن ھواری ءَ جوڑینت –

ائیر ءَ سِی ءُ دو بالانی دیمپانی کت کہ آئی ءَ پنچ چوکا ءُ سَے چکا جت ءُ ائیر ءَ اے سیزن ءِ چارمی نیم سینچری ھم سرجم کت –

کولکتہ ءَ نود ءُ یک رن جوڑ کرتگ ات کہ ھچ وکٹ ھم نہ کپتگ ات یازدھمی اوور ءِ چارمی بال ءَ شاردل ٹاکر ءَ اول ءَ ائیر ءُ پد ءَ ھمے اوور ءِ گڈی بال ءَ نتیش رانا زیرو سر ءَ آؤٹ کت اشی ءَ پد دیم ءِ اوور ءَ ہیزل ووڈ ءَ سنیل نارئن دو رن ءَ آؤٹ کت اے وھدی ٹیم ءِ رن نود ءُ ھپت ءَ سر بوتگ ات انت بلے سنیل نارئن ءَ اے رندی جوانیں لیب پیش نہ داشت شبھمن گل ءَ ھم وتی نیم سنچری جت –

شبھمن ءَ پنجاہ ءُ یک رن جوڑ کت دیپک ءِ بال ءَ آوٹ بوت رویندر ءَ پانزدھمی اوور ءَ اولسر ءَ دنیش نھ ءِ سر ءَ پد ءَ شکیب زیرو سر ءَ آؤٹ کت راہل ترپاٹھی ءَ ھم بس دو رن جوڑ کت شاردل ءِ بال ءَ آؤٹ بوت کپٹن مورگن ءَ ھم انچو ھاسیں لیب پیش نہ داشت چار رن جوڑ کت ءُ ہیزل ءَ آؤٹ کت ماوی ءَ بیست رن جوڑ کت آکری اوور ءَ آؤٹ بوت ٹیم ءَ بیست اوورانی تہ ءَ نھ وکٹانی تاوان ءَ واری ازابی یک سد ءُ شست ءُ پنچ رن جوڑ کت – فرگیوسن ءَ ھژدہ رن جوڑ کت ناٹ آؤٹ بوت شاردل ءَ درساں گیش سَے وکٹ گپت – ھمے وڑ چنئی سپر گنگز ءَ چارمی رند ءَ آئی پی ایل کپ کٹ ات گوازی وتی نام ءَ کت –

بلوچستان ءِ دمگ کیچ ءِ ھند دشت ءَ پاکستانی لشکر ءَ یک ورنایے آوار جتگ-

سربوتگیں ھالانی رِد ءَ مروچی سُھب ءَ پاکستانی پوچ ءَ دشت ءِ دمگ مھمدی کور ءَ یک ورنایے آوار جتگ ءُ گوں وت برتگ-

آوار جنگ بوتگیں ورنا ءِ پجّار ماجد ء قادر داد جھمنند دشت کاشاپ ءِ نام ءَ چہ بوتگ-

دمگی مردماں دی بلوچستان پتر ھال ءَ گوں گپ کنان ءَ گُشتگ کہ ماجد گوں دگہ یک ھمراھی ءِ گون ءَ مھمدی کوہ ءَ ساڑی بوتگ کہ پاکستانی پوج ءِ بمب گواریں بالگرداں تیرگواری کتگ دوئینانی سر ءَ جھلی پوج ھم ھمے وھد ءَ اَتکگ ءُ سر بوتگ اَنت-

پاکستانی پوج ءَ ماجد دزگیر کتگ ءُ گوں وت برتگ ءُ آ دومی ھمراہ تتکگ بلے تنیگت ءَ زانگ بوگ ءَ نہ اِنت کہ ماجد گوں ٹپی ئیں جاوراں پوج ءَ گپتگ یا سلامتی یے جاوراں –

دمگی مردمانی رد ءَ ماجد یک گریب نزگاریں مردمے آ پہ لاپ ءِ شوھازگ ءَ مزن ھور ءَ بوتگ ماھے بیت وتی میتگ ءَ اَتکگ آ گیشتر پِش ءُ دار چنت بھا کنت آ سکّیں نزگار ءُ گریبیں مردمے-

بلوچستان ءَ بیگواھیانی درچ یکشل ءَ برجاہ اَنت ءُ گوستگیں روچ ءَ شال ءَ سی ٹی ڈی ءِ دست ءَ گرگ بیتگیں نوید بلوچ یلو کنگ بیتگ –

نوید بلوچ ءِ کھول ءَ گوستگیں روچ ءَ شال ءِ پریس کلب ءِ دیم ءَ زھرشانی کرتگ ءُ ھوشاپ ءَ کشگ بیتگیں زھگانی کھولانی نندانک ءَ بھر زرتگ ءُ اود ءَ زھرشانی نندانک ءَ نشتگ اَنت-

بلوچستان ءِ دمگ آواران مشکے ءِ جھمنند دوازدہ سالاں بیگواھی ءَ پد یل بوتگ –

ھمے ماھے اولی ھپتگ ءَ ڈیرہ بگٹی ءَ چہ یک مردمے ءَ چاگردی ترامجاھاں اے مرد ءِ اکس شنگ کُرتگ ءُ گوشتگ ات کہ بیگواھیں مردم ءِ یل کنگ بوتگ بلے آئی ءِ یاداشت شُتگ ھمے ھاتر ءَ وتی گِس ءُ کھول ءِ مردمانی درگت ءَ ھچ گوشگ ءَ نہ انت –

بازیں مردم ءَ ھمے گوشتگ ات کہ اے مرد بلوچ نودربر گل آزاد ءِ رھشون زاکر مجید بلوچ انت کہ آئی ءِ زورانسری آوار جنی ءَ دوازدہ سال ءَ گیش انت –

بلے مروچی بلوچستان ءِ آنلائن رسانک ریڈیو زرمبش ءَ داتگ کہ اے مرد بیگواھیں نصراللہ بلوچ انت ءُ مشکے نوکجو ءِ جھمنند انت کہ دوازدہ سال پیسر آوار جنگ ءُ بیگواہ کنگ بوتگ – دوازدہ سالانی دراجیں وھد ءَ بیگواہ بوھگ ءَ آئی ءِ یاداشت شُتگ ءُ آئی ءِ جان ءِ سر ءَ بازیں لٹ کُٹ ءِ نشان ھم ھست انت –

یل بوتگیں نصراللہ بلوچ ءِ برات ءَ ترامجاھاں شنگ بوتگیں اکس ءَ پد وتی برات ءِ شوھاز ءَ شُتگ آئی ءِ سر ءَ ٹپ ءَ چہ آئی پجار کتگ –

زانگ بہ بیت بلوچستان ءَ چشیں بازیں مردمے یل کنگ بوتگ کہ آھانی یاداشت شتگ –

ھمے وڑءَ گوستگیں سال ءَ بلوچستان ءِ دمگ ڈیرہ دگہ یک مردمے یل کنگ بوتگ ات چاگردی ترامجاھاں ھمے گوشگ بوتگ ات کہ سمیر بلوچ بوتگ کہ پنچ مئی دوھزار سینزدہ ءَ مند ءَ زورانسری آوار جنگ ءُ بیگواہ کنگ بوتگ –

پد ءَ رند ءَ سمیر بلوچ ءِ کھول ءَ اے گپ راست کتگ ات کہ ھو سمیر بلوچ بوتگ بلے دوبر گار انت تنی وھدی مالوم نبوتگ کجا شتگ – بازیں مردمے ءِ ھمے گوشگ انت کہ دوبر پاکستانی پوج ءِ چیریں ادارھانی کارمنداں آوار جتگ ءُ بیگواہ کتگ بلے تنی وھدی اے گپ راست کنگ نہ بیتگ –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس پار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار چار سد ءُ چِل ءُ چار روچ سرجم بوتگ – زھرشانی ءَ ھر تک ءُ پہناتاں سیادی داروکیں مردماں اتکگ ءُ دلپدردی درشانتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءِ تہ ءَ زورانسری آوار جنی ءِ درچ یکشل ءَ برجاہ انت ءُ نوں ریاست ءِ پوج ءِ دست ءَ تپلیں زھگانی کوش ءِ تہ ءَ ھم گیشی آرگ بوتگ –

آئی گوشتگ بلوچستان ءِ تہ ءَ پوجی سرکار ءِ ھاکمی انت، ھرکس ءَ ھر وھد ءَ بہ لوٹیت کُشت کنت، آوار جت ءُ بیگواہ کت کنت آئی ءَ جست پُرس کنوک نیست –

ماما قدیر بلوچ ءَ گوشتگ کہ راج ءَ اے ناھکّیانی بگیری ءَ یکجاہ بوھگ ءُ توار چست کنگی انت –

آئی ءَ گوشتگ کہ مروچی بلوچستان ءِ تہ ءَ چُک زالبول، پیر، ورناہ زھرشانی ءَ اَنت ءُ ریاستی زوراکیانی بگیری ءَ اوشتاتگ انت –

ماما قدیر بلوچ ءَ گوشتگ کہ بلوچستان ءَ زورانسری آوارجنی ءِ سوب ءَ انسانانی ھلاسی دیما آھگ انت اے پدردیں جیڑہ ءِ سر ءَ انسانی ھکانی ادارھانی ھچ نگوشگ جرم ءِ لیکگ بیت –

نبشتانک: تربت یونیورسٹی ءِ جاور ءُ ایڈمن ءِ گُنگی

نبشتہ کار: گُمنام بلوچ

دی بلوچستان پوسٹ

تربت یونیورسٹی ءِ ایڈمن ھر وھد ءَ نودربرانی جیڑھاں ڈالگچار کنگ ءَ انت، آ توری مِس ءِ ورگانی جیڑہ بہ بیت یا نیٹ ءُ کلاسانی، ھالانکہ ایش وَ انچائیں جیڑہ انت ایشاں چہ مستریں جیڑہ وَ انگت باز دوریں گپ انت۔

ایڈمن نودربرانی بنکی ھکاں دات مہ کنت گڑا کجام درد ءِ دوا انت بت آورتگ ءُ نادینتگ انت، آمر تبیں مردم انت کہ کس نزانت مئے دائرہ کجام انت سیکورٹی انچارج رجسٹرار ءِ کار ءَ کنگ ءَ انت ءُ رجسٹرار سیکورٹی انچارج ءِ کاراں گوں سیلے وئیل اَنت –

چوشیں درور باز انت کہ دگرانی جاگہ دگہ مردم وتسر ءَ وت دزمانجنی کنگ ءَ انت تربت یونیورسٹی ءَ نوں روچ پہ روچ وئیل ءُ جیڑہ ودّان انت۔

اے گوستگیں وھد ءَ ھم پیش اتکگ بلے نوں آپ اش گواز کتگ ھالانکہ اے وئیلانی زنگ ءُ گلگ نامگ ایڈمن ءَ سر کنگ بوتگ اَنت بلے آیاں مدام ڈالچار کتگ اَنت۔

تربت یونیورسٹی یک انچیں دمگے ءَ انت کہ اود ءَ گیشتریں نودربر بلوچ انت، چوشکہ بلوچ ءَ وتی ربیدگی تبے گون انت، بلائیں دودمانے گون ءُ پیداک انت اگاں یونیورسٹی ءِ توک ءَ چوشیں وئیلاناں گر ءُ دار مہ بیت تہ باندا روچ کسی ننگ ءُ ناموس پش نہ کپ ایت۔ یک وئیلے زیکیں روچ ءَ دیم ءَ اتکگ (چوشکہ کہ ہمے یکیں وئیل انت کہ پد ماں پد ءَ بوگ ءَ انت بلے ایڈمن ءِ بے توار ھم مانایے داریت) کہ مس ءِ توک ءَ وزیر نامیں ورگ گرادءَ وتی کاردارے ءَ زور گاہ (ریپ) کنگ ءِ جھد کتگ، بلے کاردار ءَ گھگیری کنان ءَ اود ءَ چہ در اتکگ ءُ پولیسان ءَ ھال داتگ چریشی ءَ پد ھم نہ پولیساں ایشی ءِ سر ءَ گامگیجے زرتگ نئیکہ سیکورٹی انچارج دیم ءَ اتکگ شپ ءِ پاد اتکگیں وئیل ءِ سر ءَ داں سبارگ ءَ کس ءَ ہچ نہ گشتگ، کوک ءِ شری بوتگ کہ آ وت چہ یونیورسٹی ءَ تتکگ ءُ شتگ وزیر ءِ یکیں رند ءِ جیڑہ نہ انت بلکیں ایشی ءِ کر ءَ سہ چار کاردار بوتگ انت آیانی ہم گلگ ہمے بوتگ چوشکہ ایڈمن ہم سہی ءُ سرپد بوتگ بلے گوشاں کر ءُ چماں کور مرچی اے وئیل مس ءِ توک ءَ پاد اتکگ باندا کلاس رومانی توک ءَ سر بیت کت کنت مروچی ءَ چہ انگت مھلہ سر ءُ چٹ گرگی انت، نودربراناں وتی توار اے بت گونگیں ایڈمن ءِ ھلاپ ءَ چست کنگی انت پرچہ کہ ایشیءِ مستریں زمہ وار ایڈمن انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔