TBP Balochi

سربوتگیں ھالانی رِد ءَ بلوچستان ءِ دمگ دکی، نسیرآباد ءَ اشکرانی کاریز ءُ تیرگواری وئیلاں ھپت مردم ٹپی ءُ یک جونے دست کپتگ –

گیشیں ھالانی رِد ءَ بلوچستان ءِ بنجاھی شھر شال مارواڈ ءَ اشکرانی کھن ءَ تراک ءَ شش کاریز کار سُتکگ ءُ ٹپی بوتگ انت –

ریسکیو ءِ رِد ءَ چار کاریزکار درکنگ بوتگ اَنت ءُ شال بولان میڈیکل کمپلیکس برگ بوتگ اَنت ءُ ریسکیو وھد ءَ دو کاریز کار ءِ در کنگ ءِ جُھد کنگ بوتگ اَنت –

معدنیات بنشون ءِ رِد ءَ ھرنائی، دکی، شال ءُ کچی ءَ ھوار بلوچستان ءِ ھپت دمگانی اشکرانی کاریز ءَ دوسد ءُ پنجاہ ملین ٹن ءَ گیش مڈی ھست انت – دوھزار ءُ ھشت ءَ سد ءَ گیش اشکرانی کاریز ءَ کساس ھپتاد ھزار کاریزکار کار کنگ ءَ اَنت، کہ ایشانی تہ ءَ گیشتریں کاریزکار خیبر پختونخواہ ءِ دمگ سوات، دیر، شانگلا ءُ افغانستان ءِ جھمنند اَنت۔

اشکرانی کاریز ءَ پھازگی ءِ ھچ وڑیں آسراتی نیست پمشکا ھمک سال کساس سد ءَ گیش کاریزکار جتا جتائیں وئیلانی آماچ ءُ بیران بنت-

دگہ وئیل ءِ نسیراباد ءَ دیم ءَ اتکگ کہ ناشناسیں مردمانی تیرگواری ءَ یک مردمے زدگ بوتگ –

وئیل نسیرآباد ءِ دمگ چتر ءَ دیم ءَ اتکگیں ناشناسیں سلاہ بندیں مردماں محمد قاسم نامیں مردمے تیرانی آماچ کتگ ٹپی کتگ –

دومی نیمگ ءَ بلوچستان ءِ دمگ ژوب ءَ ناشناسیں مردمے ءِ جون دست کپتگ –

لیویز بنشون ءِ رد ءَ کلی ویالا میرباز ءَ ناشناسیں مردمے ءِ جونے دست کپتگ کہ مردم کُشگ ءَ پد مانداشتگ، لاش لیویز ءَ نادراھجاہ ءَ رسینتگ- گڈی ھالاں تاں جون ءِ پجار نہ بوتگ –

چہ بلوچی اکیڈمی شال ءِ نیمگ ءَ بانک یاسمین حلیم ءِ پولکاری کتاب “بلوچی ءَ ناول ءِ رجانک ” چاپ ءُ شنگ بیتگ –

کتاب ءَ دری لبزانکانی ترینگ ءُ بلوچی ءَ کنگ ءِ بارو ءَ اِنت ءُ کتاب ءِ تہ ءَ بانک یاسمین حلیم ءَ وتی زانشت ءَ پولکاری کرتگ ءُ تالان کرتگ –

کتاب ءَ بانک یاسمین حلیم ءَ وتی لیکھانی تہ ءَ دری لبزانک ءِ بارو ءَ جوانیں گپ ءُ ھیال درشان کرتگ اَنت ءُ فکشن ءِ بارو ءَ یک مزنیں ارزشتے داریت –

کتاب ءِ پُشت تاک ءَ ذاکر قادر ءَ کتاب ءِ بارو ءَ گُشتگ کہ بلوچی ءَ فکشن ءِ ایندگہ تھرانی تہ ءَ ناول ءَ اینچو دیمروئی نہ کرتگ ءُ گوستگیں ھپتاد سالاں بلوچی ءَ کم ناول نبشتگ کنگ بیتگ ءُ اشی ءَ گیشتر بلوچ ندکاراں دری لبزانک ءِ کمک زرتگ ءُ ناول نویستگ –

رجانک ءِ بارو ءَ گوشگ بیت کہ رجانک زبانانی دیمروئی ءِ واستا مزنیں بھرے زانگ بیت ءُ چریشی ءَ یک زبانے دومی زبان ءَ سان زرت کنت ءُ وتی دیمروئی ءُ گھتری ءِ سنچ ءَ ودینت کُت کنت –

مکران ءَ گوستگیں یک ھپتگے ءَ بجلی ءِ بندش ءِ ھلاپ ءَ مھلوک زھرشانی کنگ ءَ اِنت – مھلوک ءِ گوشگ اِنت کہ زندگی ءِ آسراتیاں زبھر اَنت مھلوک اد ءَ ترمپے آپ ءَ تلوسگ ءَ اَنت –

کیچ ءِ دمگ تمپ ءَ چاگردء باسک ءُ نبشتہ کار عندلءب گچکی ءِ سروکی ءَ زالبول ءُ چکاں نندانکی زھرشانی کرتگ ءُ سرکار ءَ زوت ءَ چہ زوت بجلیانی سرجم کنگ ءِ لوٹ کرتگ اَنت –

مکران ءَ بجلی ءِ پُجارینوکیں جیکی گور گریڈ اسٹیشن سَے شمبے ءِ سھب ءَ ابید ءِ جار ءَ بند کنگ بیتگ چریشی ءَ پد ھپتاد میگاواٹ بجلی ءِ پُجگ ءَ دَہ میگاواٹ بجلی سپلائی بندات کنگ بیتگ چریشی ءِ سبب ءَ سرجمیں مکران ءَ روچ ءَ بجلی ءِ نہ بوگ ءُ شپ ءَ بس یک یا دو اداراں بجلی پُجارینگ بیگ ءَ اَنت –

بلوچستان ءِ دمگ کیچ لھڑ تریں جاھاں ھوار اِنت کہ اود ءَ گرم ءِ زور چِل ڈگری سینٹی گریڈ ءَ برز بیت اِنت ءُ بجلی ءِ نہ بوگ ءَ مھلوک ٹوھیں جنجالانی دیمپان بنت اِنت ئِے –

عندلیب گچکی ءَ چاگردی رسانکجاہ ٹوئٹر ءَ گوشتگ کہ سرجمیں مکران ءَ بجلی ءِ بندش ءُ ڈیھ ءَ وت ءَ بجلی نہ بوگ ءَ مکران ءَ بجلی ءِ پجگ ءِ بند کنگ ءِ سبب ءَ تمپ، تربت ءَ زھرشانی برجاہ اَنت –

نبشتانک: نمدی: واجہ ڈاکٹر ناگمان ءِ نام ءَ پچیں نمدی یے

نبشتہ کار: ابدلستار بُگٹی

دی بلوچستان پوسٹ

واجہ دْروت ءُ دْراہ بات ئے، انچوشکہ تو دو بلوچی آب “ڑ ءُ ڈ” ءِ بابت ءَ یک تاُمربندے اڈ کت ءُ پد ءَ ھمے تامُربند یوٹوب ءُ پیسبُک ءَ ھم شِنگ ءُ تالان کُت۔ سنگت من تئی تامُربند ھورت چار اِت ءُ دلگوش کُت کہ ماں آئی ءِ تہ ءَ تو وتی ھیال ءُ لیکھاں دْرشان کنان ءَ راج ءِ تہ ءَ بَکڑ (کنپیوژن) ودی کنگ ءَ اِت ئے یا انچو گْوش ئے کہ تو پہ زانتکاری ءَ راج ءَ رَد دیگ ءَ اِت ئے! بہ بکش کہ منی ٹَوک کمیں تْرُند وَ بنت بلے منی ٹَوکانی لاپ ءِ ترا راستی ھم الم رس ایت۔ انچوشکہ تو وت گْوشگ ءَ ات ئے ” بلوچی آب “ڑ” ءُ “ڈ” نزیکیں آب اَنت ءُ یکیں توارکش اَنت پمیشکا منی ھیال ءِ رِد ءَ چہ دوئیناں “ڑ” دور دیگ بہ بیت” بزاں تو وت تچک نہ ئے بلکیں وتی ھیالے درشان کنگ ءَ ات ئے کہ تامُربند ءِ تہ ءَ من راج ءَ چون باوری بہ دے آں یا پد ءَ وھدیکہ راج منی تامُر ءَ چار ایت ءُ چیزے جُست بہ کنت گُڑا من آیاں چون منّانک دیان ءَ سرپد بہ کن آں چے ءَ کہ تئی تامُربند ءِ چارگ ءَ پد من انچو مار اِت کہ اِے تامُربند ءِ اڈکنگ ءَ پیش ءَ تو وت ھچ وڑیں تپاس نہ کُتگ اَت۔ چوناھا من چہ ترا سک دربُرتگ، تئی انگریزی ٹو بلوچی نوکاز پہ من یک ھُدائی ٹیکی یے کہ چریشی ءَ من بازیں گالے دربُرگ ءَ آں ءُ بلکیں وتی بازیں نبشتانکے ھم ھمے نوکاز ءَ کُمک ءَ سرجم کُتگ اَنت۔ دومی من تئی مِنتوار آں کہ ماں رجانکاری ءِ پِڑ ءَ تو “ٹِک نام” ءُ “لس نام” ءِ سرپدی دیان ءَ راج ءِ تہ ءَ بلاھیں بَکڑے ھلاس کُت چے ءَ کہ بکڑ ھر وڑیں جُنز ءُ جُھدانی گلاں اوشت ءِ آماچ کنت چریشی ءَ گل ءِ باسک دلپْروش بنت۔ البت اِے چیز ءَ تو ھم جْوان سرپد ئے بلکیں تئی وتی جِند ءِ گْوشتگیں ٹَوک اَنت کہ زُبان دوست راجدوست بنت ءُ راجدوست ڈیھ دوست۔۔۔۔ ءُ پد ءَ بلوچ راج ھم بازیں پھناتے ءَ جُنز ءُ جُھدانی توک ءَ انت ءُ پمیشکا راجی زُبان ءِ تہ ءَ بَکڑ ودی کنوک ھم راج ءِ بدواہ لیکھگ بنت۔ انچوشکہ اِے چیز ءَ ما دْراہ جْوان سرپد ایں کہ مئے راجی زُبان بلوچی یکشل ءَ رَد نبیسّگ بیگ اَنت، چے ءَ دنیا ءِ توک ءَ تھنا ھما راجانی زُبان دیمروئی کن اَنت وھدے کہ آ وتواجھیں راجانی زھگیں نودربر ءُ پدریچ وتی راجی زُباناں وت ماں وانگجاہ، دربرجاہ ءُ زانشجاھاں وان اَنت، راجی زُبان ءِ روتاک، ماھتاک ءُ گِندگُش ءِ وڑیں آسراتی بہ بنت گُڑا راجانی زُبان ھم دیمروئی کن اَنت ءُ راج ءِ لس مھلوک ھم وتی راجی زُبانانی وانگ ءُ نبشتہ شَر ھیل ءُ زبر بنت بلے پہ بلوچ راجی زُبان ءِ دیمروئی ءَ اِے وڑیں آسراتی نیست اِنت ءُ ناں کہ بلوچ راج ءَ ماں وانگجاھاں جِند ءِ راجی زُبان وانینگ بنت ءُ ناں کہ پہ براھوھی ءُ بلوچی ءِ دیمروئی ءَ آسراتی یے ھست ءُ نَیکہ بلوچ راج ءِ تہ ءَ ھم چوشیں سرپدی ءُ آگاھی یے ھست کہ ما گْوانکوانی تہ ءَ وتی راجی زُبان ءِ آبیکدار ءُ بزانت بلد ءَ ایرگیج ءُ کارمرز بہ کن این ءُ وتی دزھُورکی ءِ وھد ءَ وتی راجی زُبان ءَ وت وانان ءَ دربر ایں بلکیں واجہ منزور بسمل، واجی اَلی ایسا ءُ واجہ گوسبھار ءِ وڑیں بازیں بدواہ ءُ وتواھیں مردماں راجی زُبان ءِ تہ ءَ گیشتر بَکّڑ ودی کُتگ اَنت کہ راج ءِ وانِندگیں لس مھلوک بَکڑ ءِ آماچی ءَ دلپْروش بہ بنت ءُ وتی راجی زُبان ءَ مہ وان اَنت چمیشکا راجی زُبان ءِ نبشتہ رھبند بھر ءُ بانگ اِنت ءُ ھرکس وتی ھساب ءَ رد نبیسّ ایت۔

بِہ گِند ئے اِے بکڑاں تو وت جْوان سرپد ئے کہ راج داں روچ مرچاں بلوچی زُبان ءِ کارگال، کُمکّار گال، ستاگال، تپورگال ءُ اَربی ءِ دوازدھیں آبانی جیڑہ ءِ وڑیں رھبندی بُنھِشتاں ناں کہ بے سما انت چمیشکا ھمے رھبندی چیزاں مُدام راستیں جاھاں کارمرز نہ کن اَنت البت مرچاں دامگ ءِ زمانگ ءَ وٹس ایپ ءُ پیسبُک ءِ وڑیں آسراتیانی راست کارمرزی ءَ راجی زُبان ءِ بازیں جُھدکاریں زُبان دوست گوں منّانکاں راجی زُبان ءِ بَکڑاں ھلاس کنان ءَ راج ءَ سرپدی دیگ ءَ اَنت کہ ماں نبشتھاری بلوچی نبشتہ رھبند ءَ چے یے ءُ ایشانی لھتیں درو من وت واجہ اَلی ایسا ءُ منزور بسمل ءِ نام ءَ لھتیں پچیں نمدی نبشتگ اَنت کہ راستی راج ءِ دیم ءَ بیا اَنت ءُ راج بکڑ ءِ آماچ مہ بیت بلے مارا یک ٹوکے تچک بوگ لوٹ ایت کہ بلوچی یک شاھگانیں زُبانے ءُ ابرمی دنیا ءِ ھر شاھگانیں زُبانانی نبشتہ گوں بُن آب ءُ بُنتواریں گالاں نبیسّگ بنت نَیکہ دمگی گالوار ءِ ھساب ءَ زُبان نبیسّگ بنت چے ءَ کہ ھرکسے وتی دمگی گالوار ءِ ھساب ءَ جُتا جُتائیان توارینکاں ودی کنت ءُ اگاں ھرکسے وتی دمگی گالواری توارینک ءِ ھساب ءَ نبیسّ ایت گُڑا زُبانانی نبشتہ ءِ سْیاھگ بھر ءُ بانگ بنت ءُ زُبان ونڈ ءُ چُنڈ بیت ھزار بژن انت کہ مئے مستریں نادْراھی ھمیش انت کہ ما گْوش ایں بلوچ بس منی دمگ ءُ شھر آباد اَنت ءُ بلوچی ھمیش انت کہ منی ءُ منی گالوار ءِ بلوچانی دپ ءَ در آیگ ءَ اِنت ءُ دِگہ ھچ جاہ بلوچ نیست انت ءُ راستیں بلوچی ھمیش انت کہ من گْوشان ءُ نبیسّگ آں۔ بدواہ ءُ وتواھیں مردماں راج ءِ تہ ءَ پیش ءَ بازیں بکڑ ودی کُتگ انت انچو کہ بازیں مردمے گْوش ایت “من سلیمانی بلوچے آں پمیشکا من رکشانی ءُ مکرانی بلوچی ءِ نبشتہ نہ زان آں ءُ لھتینے گْوش ایت من رکشانی یے آں پمیشکا من “خ ءُ غ” وڑیں آباں لازُم کارمرز کن آں”
بزاں راج ءِ تہ ءَ ھمے سرپدی ھم نیست انت کہ اِے مکرانی، سلیمانی ءُ رکشانی وت جُتائیں زُبان وَ نہ انت بلکیں راجی زُبان ءِ مستریں گالوار اَنت ءُ ھمے گالوار مئے راجی زُبان ءَ براھدار، دْراج ءُ شاھگان کنگ ءَ اَنت چمیشکا مئے راجی زُبان چہ کِر ءُ کش ءِ زبانی وازمند نہ انت باید انت ما وتواھی ءَ دور دیان ءَ وت سرپد بہ این ءُ راج ءَ ھم سرپد بہ کن ایں کہ ما دْراہ بلوچ یک ایں ءُ بلوچی مئے تیوگینانی راجی ءُ ماتی زُبان انت اِے رکشانی، سلیمانی ءُ مکرانی بس راجی زّبان ءِ گالوار اَنت مارا اول وتی راجی زُبان دوست دارگ لوٹ ایت ءُ پہ راجی زُبان ءِ دیمروئی ءَ بہ جیڑ ایں چے ءَ کہ راجی زُبان ءِ نبشتہ ءُ دیمروئی دْراھیں گالوارانی دیمروئی انت چریشی ءَ ھر گالوار گالاں ھاٹیگ رس ایت مارا ھک ھست اِنت ما وتی گالوار ءِ ھساب ءَ گپ ءُ ھبر بہ کن ایں، وتی گالوار ءِ ھساب ءَ بلوچی بہ وان ایں بلے نبیسّگ وھد ءَ مارا راجی زُبان یکیں نبشتہ رھبند ءَ نبیسّگی انت کہ ھما رھبند راجی زُبان ءِ نمیرانیں جُھدکار شاھسسّا واجہ سید ھاشمی ءَ گوں بُن آب ءُ بُنتواریں گالاں اڈ کُتگ بلے واجہ سک بژن انت کہ تو مرچی راجی زُبان ءِ نودربر رد داتگ انت کہ “ڑ” آب کشگ بہ بیت من ھم بلوچے آں ءُ من ءَ ھم ھَکّ ھست کہ من چہ ترا لھتیں سوال جُست نہ گر آں کہ اگاں تو “ڑ” ءِ آب دور دئے گُڑا “اڑ” ءُ “اڈ” ءِ ڈولیں جُتائیں گال چون دگری ودی کن ئے اے “ھُڑ ءُ ھکل، اڑ ءُ اڑاند، جیڑہ، جیڑگ، ساڑی، جوڑ، وڑ، بے چاڑ، آھڑ، گُڑ ، میھڑ(میشانی رم)ءُ روڑ(گْوسک) ءِ وڑیں بلوچی ھزاریں گال ھست اَنت کہ گوں “ڈ” ءَ نبیسّگ نہ بنت۔ تو گْوش ئے “ڑ” ءُ “ڈ” یکیں توار دے اَنت بلے ھرکس سرپد انت کہ تو رد ئے اے دوئیں دگہ دگہ توار اَنت انچوشکہ “ڈڈّ ، ھڈّ ، مڈّی ، ڈنگر ، ڈوک ، ڈال ، ڈل، جوڑ ، جاڑ ، جُڑ ، وڑ ءُ چاڑ” نی بچار چوں یکیں توار اَنت؟ بزاں “تو جوڑ ئے، ڈڈ ئے” ءَ ما ترا گْوش ایں “تو جوڈ ئے، ڈڈ ئے”؟-

اگاں من باندا گْوش آں کہ “چ ءُ ش” ءِ توار ءُ “و ءُ ب” ءِ توار یک اَنت ءُ چہ ایشاں یک یک کشگ بہ بیت انچوشکہ سلیمانی گالوار ءِ لاپ ءَ “دْرچک، روچ، پدریچ، ریچگ، پاچِن، ھَنیچّگ، پچگ، سوچگ، تچگ ءُ سریچک” ءِ وڑیں ھزاریں گال اَنت کہ ما سلیمانی گالوار ءِ بلوچ “ش” ءِ توار ءَ کش ایں انچوشکہ”دْرشک، روش، پدریش، ریشگ، پاشِن، ھَنیشّگ، پشگ، سوشگ، تشگ ءُ سریشک” ءُ ھمے رنگ ءَ “نواب، ھساب، کتاب، سُبک، واب، شپ ءُ ھراب” گوں “و” ءَ توارکش بنت انچوشکہ “نواو، ھساو، کتاو، سُوک، واو، شوّ ءُ ھراوّ” گْوش بنت بلے بازیں جاھاں ” ب ءُ چ” ءِ وتی جُتائیں توار ھست اَنت انچوشکہ “بُز، بھائینگ، باج، سبر ءُ لب یا چم، چات ءُ چُکّ” گُڑا شُما چہ ھمے “ب ءُ و” ءُ “چ ءُ ش” ءَ کجام آباں کش اِت ءُ کُجاماں زُور اِت؟ راستی وَ ایش اَنت کہ اے ڈ، ڑ، چ، ش، ب ءُ و” دْراہ راجی زُبان ءِ بُن آب کہ نمیرانیں سید ھاشمی ءَ ٹوک ھلاس کُتگ۔ گُڈسری من ھمے گْوش آں کہ بلوچ راجی زُبان زیردست اَنت ءُ بلوچ راج ءِ زھگاں ماں وانگجاھاں جِند ءِ راجی زُبان وانینگ نہ بنت پمیشکا مئے راجی زُبان بے کساس ڈالچار انت بلے نی ھمے وٹس ایپ ءُ پیسبُک ءِ راست کارمرزی ءَ لھتیں زُبان ءِ جُھدکار پہ راج ءَ بلوچی وانگ ءُ زانگ ءِ جُھد ءَ انت ءُ آیانی جُھد ستا کرز ایت باید تو یک رندے پد ءَ “ڈ ” ڑ ” ءِ سر ءَ وتی لیکھاں بہ چکاس ءُ دو بر “ڈ “ڑ ” ءِ بارو ءَ جوانتریں راہ ءِ گیش ایت بہ کنت-

مُدام وش ءُ ھست بات ئے، بلوچ شالا یکمُشت ءُ یک رھبند ءِ سر ءَ تپاک بات اَنت ءُ بلوچی شالا دیمروئی بہ کنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچی زبان ءِ نمیرانیں آشوبی شائر سلمان ھمل ءِ شئیرانی اولی دپتر “ھون ء بھار ” چاپ ءُ شنگ بیتگ-

کتاب سبا دشتیاری اکیڈمی وشکوشیں پروم ءِ نیمگ ءَ شنگ ءُ چاپ بیتگ، کتاب ءَ بلوچی زبان ءِ نمیرانیں شائر سلمان ھمل ءِ گرنچ داتگیں لچہ براھداریں رنگے ءَ ھوار اَنت –

کتاب بلوچستان ءِ جتا جتائیں جاھاں کتاب جاھاں پہ وانوکاں دز کپ ایت ءُ کتاب ءَ نمیرانیں سلمان ھمل ءَ بلوچستان ءَ بیوکیں زوراکی لَچھی دروشم ءَ گرنچ داتگ اَنت –

ھالانی تہ ءَ گوشگ بیتگ کہ پہ بلوچی زبان ءِ وانوکاں ٹیکی ءِ مستاگے کہ آئی ءَ وتی ند ءِ زور پہ راستی ءَ شَئیرانی دروشم ءَ دیم ءَ آؤرتگ –

کتاب ءِ سرتاک ءَ بلوچستان ءَ ھواریں زوراکیانی ھون ریچی ءِ رُستگیں پُل مان گیجگ بیتگ اَنت –

بلوچستان ءَ جھانی نادراھی کرونا ویروس ءِ گیش بیگ ءَ بازیں جاھاں مھلوک پھریزگ ءِ کڈن کنگ بیتگ اَنت ءُ سپر کنگ ءَ ابید ءِ ویکسن جنگ ءَ بندش جنگ بیتگ –

جانسلامتی ءِ نیمگ ءَ شنگ بیتگیں رپورٹ ءِ رد ءَ بلوچستان ءَ 1039 مردمانی ٹِسٹ کنگ بیتگ اَنت ءُ چریشی ءَ نود ءُ ھشت کساں نادراھی پدر بیتگ اَنت –

جانسلامتی ءِ رد ءَ شال ءَ ھپتاد ءُ نُھ، کیچ ءَ یازدہ، واشک ءَ چار، پنجگور، ژوپ، پشین ءُ ھزدار ءَ یک یک مردماں کرونا نادراھی پدر بیتگ اَنت –

جانسلامتی ءِ رپورٹ ءِ رد ءَ نوکیں نادراھانی ھواری ءَ بلوچستان ءَ نادراھانی کچ بیست ءُ ھپت ھزار ءُ نُھ سد ءُ شست ءُ یک ءَ سر بیتگ اَنت –

رپورٹ ءِ رد ءَ گوستگیں بیست ءَ چار ادارانی تہ ءَ بلوچستان ءَ ھژدہ نادراہ وش بیتگ اَنت ءُ داں انیگ ءَ وش بیتگیں مردمانی کَچ بیست ءُ شش ھزار ءُ ھپت سد ءُ شست ءُ نُھ ءَ سر بیتگ اَنت –

رپورٹ ءِ رد ءَ بلوچستان ءَ اے وھد ءَ نَھ نادراہ ھائی فلو آکسیجن ءِ تہ ءَ دراہ بیگ ءَ اَنت ءُ اُستان ءَ اے وھد ءَ ھستیں نادراھانی کچ ھشت سد ءُ ھپتاد ءُ پنچ ءَ سر بیتگ اَنت –

رپورٹ ءِ رد ءَ بلوچستان ءَ نادراھی ءِ شنگ بیگ ءِ زور نُھ ٹک چِل ءُ سَے ءَ سر بیتگ ءُ داں انیگ ءَ سَے سد ءُ ھبدہ مردم اے نادراھی ءَ مرگ ءِ ارجان بیتگ اَنت –

بلوچستان ءِ دمگ کیچ ءَ پاکستانی پوج ءَ دو نودربر آوار جتگ ءُ بیگواہ کرتگ اَنت -آوار جنگ بیتگیں نودربرانی پجار اکبر ء برکت جھمنند نودز کیچ ءُ شاکر بلوچ ءِ ناماں زانگ بیتگ اَنت –

اکبر پاکستانی پوج ءَ تلار ءِ چیک پوسٹ ءَ ھما وھد ءَ آوار جتگ کہ آ چہ تربت ءَ دیم پہ کراچی ءَ روگ ءَ بیتگ – ھالانی تہ ءَ گوشگ بیتگ کہ اکبر نیول ٹکنیکل کالج ءِ نودربر اِنت –

ھمے وڑ ءَ کیچ ءِ بنجاھی شھر تربت ءَ بلوچستان شھدربرجاہ ءِ لاء ءِ نودربت شاکر بلوچ ھم چیریں ادارانی کارمنداں آوار جتگ ءُ بیگواہ کرتگ –

گوشگ بیتگ کہ شاکر موکلانی وھداں تربت ءَ اتکگ ءُ آ آوار جنگ ءُ بیگواہ کنگ بیتگ –

بلوچستان ءَ زورانسری آوار جنیانی درچ یکشل ءَ برجاہ اَنت گوستگیں بیست ءُ چار ادارانی تہ ءَ اے ششمی مردم اَنت کہ پوج ءَ آوار جتگ اَنت – چریشی ءَ ابید پیسر بلوچستان ءِ دمگ کیچ ءِ ھند چار ورنا سَے روچ ءَ پیسر پکنک ءَ شتگ اَنت آ پوج ءَ دزگیر کنگ ءَ پد بیگواہ کرتگ اَنت –

سربوتگیں ھالانی رِد ءَ بلوچستان ءِ دمگ ڈیرہ مراد جمالی، سوراب، دکی، اوستہ محمد، چمن، تمبو ءَ تیرگواری ءُ دگہ وئیلاں دو مردم بیران بیتگ اَنت ءُ دہ زدگ بوتگ انت وھدیکہ خان کوٹ ءَ یک مردمے ءِ جون دست کپتگ –

گیشیں ھالانی رِد ءَ ڈیرہ مراد جمالی نسیرآباد ءَ ناشناسیں پرپٹ سوارانی تیرگواری ءَ یک مردمے بیران بوتگ – وئیل خان کوٹ ءَ گوٹ شاہن خان ءِ نزیک ءَ دیم ءَ اتکگ کہ نشناسیں پرپٹ سواراں اھسان نامیں مردمے تیر اماچ کُتگ کُشتگ – وئیل پیشی زاتی جیڑہ سوب گوشگ بوھگ انت –

دمگی پولیس ءَ وت ءَ وئیل جاہ ءَ سر کتگ کشندہ تچگ ءُ رؤگ ءَ سوبمند بوتگ انت پولیس ءَ جون چست کتگ ءُ نادراہ جاہ ءَ سر کتگ اود ءَ اژدری چار ٹپاس ءَ پد کھول ءِ ھوالگ ءَ داتگ –

ھمے وڑ سوراب ءَ ناشناسیں مردمانی تیر گواری ءَ یک مردمے بیران بوتگ – وئیل سوراب ءَ چار راہ ءِ سر ءَ دیم ءَ اتکگ کہ ناشناسیں مردماں ھاجی خان پندرانی تیرانی آماچ کتگ کُشتگ بیران بوتگیں مردم کلات ءِ جھمنند انت –

ھمے وڑ دکی ءَ اناگتی تیر لگگ ءِ سوب ءَ کسان سالیں گونڈلے بیران بوتگ –

وئیل دکی ءِ دمگ کلی ملک علی مھمد ءَ ناسر ءَ گِس ءِ تہ ءَ دیم ءَ اتکگ – نادراھجاہ بنشون ءِ رِد ءَ گِس ءِ تہ ءَ پسٹل ءِ ساپ کنگے میان ءَ توپک ءَ آس بُرتگ ءُ پنچ سالی گونڈل مدثر خان ء محمد زئی بیران بوتگ، اژدری چار ءُ ٹپاس پد گونڈل ءِ جون کھول ءِ ھوالگ ءَ دئیگ بوتگ –

ھمے وڈ اوستہ محمد ءَ دو ٹکی ٹولیانی میان ءَ جنگ چوپ ءَ تیرگواری ءَ پنچ مردم ٹپی بوتگ انت وئیل گوستگیں روچ ءَ رند ءُ بلیدئی ٹکانی میان ءَ پیشی زاتی دژمنی ءِ سوب ءَ دیم ءَ اتکگ، تیرگواری ءَ چہ پنچ مردم ٹپی بوتگ انت –

دگہ وئیلے چمن ءَ بوتگ کہ گیس سلینڈر ءِ ترکگ ءَ سُتکگ ءُ زدگ بوتگ انت –

ھالانی رِد ءَ چمن ءَ گِس ءَ سیلنڈر ءِ ترکگ ءِ سوب ءَ یکیں کھول ءِ پنچ مردم ستکگ ءُ زدگ بوتگ انت وئیل ھما ٹیم ءَ بوتگ کہ زالبول ءِ گِس ءِ تہ ءَ ورگ ءِ ھڈ کنگ ءَ بوتگ کہ گیس ترکیتگ تراکگے سوب ءَ آئی ءِ نزیکیں دگہ پنچ مردم ستکگ ءُ زدگ بوتگ انت – زدگ بوتگیں مردمانی تہ ءَ چُک ءُ زالبول ءُ یک مردین ءِ ھوار انت- زدگ بوتگیں مردم ھما دمان ءَ نادراھجاہ ءَ سر کنگ بوتگ انت –

دومی نیمگ ءَ تمبو خان کوٹ ءَ اللہ داد ڈپ ءِ نزیکیں کور ءَ یک مردم ءِ جون ءِ دست کپتگ جون نادراھجاہ ءَ سر کنگ بوتگ اودا آئی ءِ پجار گلام علی کٹوہر ءِ نام ءَ چہ بوتگ اے درگت ءَ گیشیں پٹ پول برجاہ انت –

زانگ بہ بیت گوستگیں روچ ءَ بلوچستان ءِ تیاب دپی دمگ گوادر ءَ ھم یک مردم ءِ جون ءِ دست کپتگ، جون ڈی جی اے نادراھجاہ ءَ سرکنگ بوتگ اودا آئی پجار عبدالغفار ء لال بکش ءِ نام ءَ چہ بوتگ –

پنجگور ءَ ڈسٹرکٹ ہیلتھ آفیسع پنجگور ڈاکٹر نادر بلوچ ءِ سروکی ءَ ملریا ءِ نادراھی ءِ مھم ءِ بنھشت ایر کنگ بیتگ ءُ مھم ءِ بنھشت ءِ ایر کنگ ءِ وھد ءَ گچینی ءِ مھمان بلوچستان نیشنل پاٹی ءِ بنجاھی لیبر سیکرٹری نور اھمد بلوچ بیتگ –

ھمے وھد ءَ ڈاکٹر نادر بلوچ ءَ تران کنان ءَ گوشتگ کہ ملریا ءِ جتا جتائیں دروشم ھست اَنت ءُ ملریا ءِ دارگ ءِ واستا پنجگور ءِ جتا جتائیں جاھاں مُپت ءَ الاج کنگ بیگ ءَ اَنت ءُ دراھیں آسراتی جاڑیگ اَنت –

آئی ءَ گوشتگ کہ ملریا یک ناوشیں نادراھی ءِ اشی ءِ گر ءُ دار ءَ جانسلامتی گامگیج زورگ ءَ اِنت ءُ اشی ءِ ھمراھی ءَ ڈینگی ءِ رکگ ءِ واستا ھم شھر ءِ بازیں جاھاں زھر چَنڈگ بیتگ اَنت –

ڈاکٹر نادر بلوچ ءَ تران کنان ءَ گوشتگ اَت کہ ملریا ءِ ھواری ءَ مھلوک ءَ وت ءَ جھانی نادراھی کرونا ویروس ءِ رکگ ءَ ھم وت ءَ ویکسین بہ جنائینت ءُ پنجگور ءَ کرونا ویروس ھست اِنت –

ھمے وھد ءَ ملریا کنٹرول نیاد ءِ انچارج شکیل اھمد بلوچ، بلوچستان نیشنل پاٹی ءِ بنجاھی لیبر سیکرٹری گوستگیں دمگی نازم اھمد بلوچ، بنجاھی کمیٹی ءِ باسک ھاجی آصف مجید، سوفی رسوپ بکش، مقبول اھمد، نور اللہ، ھِپزُ اللہ بلوچ جاڑیگ بیتگ اَنت –

ملیریا ءِ سپریڈنٹ شکیل اھمد بلوچ ءَ گوشتگ اَت کہ ملریا کنٹرول نیاد ءِ نیمگ ءُ اُستانی وزیر سوشل ویلفیئر اینڈ خصوصی تعلیم میر اسد اللہ بلوچ ءِ کمک ءَ پنجگور ءَ مھم بندات کنگ بیتگ –

آئی ءَ گوشت کہ ڈسٹرکٹ ہیلتھ آفیسر پنجگور جانسلامتی ءِ واستا پنجگور ءَ ملیریا ءِ مپت الاج کنگ جتا جتائیں نادراہ جاھاں جاڑیگ اِنت ءُ بانداتگیں روچ ءَ شھر ءِ دراھیں جاھاں ملیریا ءِ زھر چنڈگ بیت اِنت –

سیمسری دمگ چکاپ ءَ ٹٹ جنوکیں پوجی کارمندانی سر ءَ اُرش کُتگ پنچ کارمند کُشتگ اَنت – میجر گوھرام

سربوتگیں ھالانی رِد ءَ مروچی سھب ءِ ادار ھپت ءَ ناشناسیں سلاہ بندیں مردماں مند ءِ دمگ شیراز چکاپ کور ءَ روکپتی ءُ رودراتکی بلوچستان ءِ جُدا کنوکیں گولڈ سمتھ لائن ءَ ٹٹ جنوکیں کارمندانی سر ءَ اُرش کُتگ – دمگی مردمانی رِد ءَ ارش ءَ پد دو بال گرد ھم جنگ جاہ ءَ سربوتگ ھمے گمان بیت کہ اُرش ءَ پوج ءَ جانی ءُ مالی تاوانانی دیمپانی بوتگ، اُرشکار درایگ ءُ روگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی شمبے ءِ سھب ءِ ادار ھپت ءَ کیچ ءِ دمگ مند چُکاپ ءَ ایران بلوچستان ءِ سیمسر ءَ ٹَٹ جنوکیں کمپنی ءِ کارمند ءُ آھانی پھازگ ءِ ھاتر ءَ ساڑی ئیں پوجی کارمندانی سر ءَ اُرش کتگ-

میجر گوھرام بلوچ ءَ گوشتگ کہ اُرش ءِ آسر ءَ بندساچی کمپنی ءُ آھانی پھازداریں پنچ کارمند مرتگ ءُ دو ٹپی بوتگ اَنت –

آئی ءَ گوشتگ کہ اُرش ءَ پد پاکستانی پوج ءِ جنگی بالگرداں دمگانی سر ءَ برز ءَ بال بیتگ اَنت ءُ پوجی کارمند وتی مرتگیں ءُ ٹپی بوتگیں کارمندانی چست کنگ ءَ زوت جنگجاہ ءَ سربوتگ اَنت-

بی ایل ایف ءِ جارکش میجر گوھرام بلوچ ءَ گوشتگ کہ پاکستانی پوج ءُ سرکار ءِ کمکارانی بگیری ءَ مئے اُرش بلوچستان ءِ آجوئی ءَ تاں برجاہ مان انت –