TBP Balochi

سر بیتگیں ھالانی رد ءَ بلوچستان ءِ دمگ کیچ مند ءَ گوستگیں روچاں پکنک ءَ رؤکیں چار کس بیگواہ کنگ بیتگ اَنت –

کھول ءِ گوشگ اِنت ھر چاریں ورنا سَے روچ ءَ پیسر مند ءِ کوھی دمگ ءَ پکنک ءَ شتگ اَنت ءُ پد ءَ ھمود ءَ آوار جنگ ءُ بیگواہ کنگ بیتگ اَنت –

کھول ءِ گوشگ اِنت ھرچاریں مردم پوج ءَ آوار جتگ ءُ بیگواہ کرتگ اَنت ءُ پد ءَ آیانی بارو ءَ ھچ ھال نیست اِنت –

آوار جنگ بیتگیں مردمانی پجار صابر، حیاتان، قادو ءُ قابوس ءِ ناماں زانگ بیتگ اَنت کہ مند گیاب ءِ نندوک گوشگ بیگ ءَ اَنت –

بلوچستان ءَ بیگواھیانی لڑ ناوشیں جاوراں ودی کنگ ءَ اَنت ءُ بازیں کچے ءَ مھلوک ءِ آوار جنی برجاہ اَنت –

دومی نیمگ ءَ وائس فار بلوچ مسنگ پرسنز ءِ سروک نصر اللہ بلوچ ءَ چاگردی رسانکجاہ ٹوئٹر ءَ گُشتگ کہ اگاں سرکار بلوچستان ءُ ایمنی آرگ لوٹ ایت گڑا آ بلوچستان ءَ آوار جتگیں مردماں یل بہ کنت ءُ وتی آوار جنیاں بند بہ کنت –

زانگ بہ بیت نصر اللہ بلوچ ءَ اے گپ ھما وھد ءَ درشان کرتگ کہ بلوچستان ءَ سرکار ءِ نیمگ ءَ ھمے جار پرینگ بیتگ کہ بلوچ جنگول ءُ دگہ دلرنجیں مردماں گوں گپ ءُ تران کنت –

پاکستان ءِ سرکار ءِ جار بلوچ آجوئی لوٹوکیں سلاہ بندیں گلانی سروکاں رد کرتگ ءُ گوشتگ کہ پاکستان اگاں ایمنی ءَ گپ کنگ لوٹ ایت گڑا آ بلوچستان ءَ وتی پوج ءَ بہ کش ایت ءُ بروت –

شَیر: ندر پہ منی راجی رهشون
ڈاکٹر دین مھمد بلوچ ءِ نام ءَ

شائر: سلیم ناز

دی بلوچستان پوسٹ

ودار ءِ سُهب نہ کِنز اَنت زهیر ءِ بیگاه هم
تئی راہ ءِ چارگ ءَ کور بوتگاں دوئیں مئے چم

تو انچو دور نشتگ ئے مَرچاں سلامءُدروتے نئیت
منارا اندر ءَ انچو واراں، تئی ترانگ ءُ بیا گم

اے ماه ءُ سال هیالانی موسماں مَٹ اِیت
شپانی پاس گوں اِستالاں روچ بَنت همدم

بیا بیا کہ تئی رنگ پهک شموشتگ ما
دل را چوں بہ داران ءُ چوں بہ باں دلجم

سمین ءِ گوْات من ءَ ترانگاں تئی کار اِیت
ابیتکاں سّمی ءُ مهلب اے شال ناسرجم

بہ پروش ءُ سرجمیں کولانی سانکل ءُ تیلاں
بہ سبز اَنت بلکیں اے اَهدانی کْوھنگیں نوں گم

سلیم چو چورهیں چُکءَ گوں یاتاں چیهانٹ اِیت
تمامیں هلک ءَ گریتگ دل ءَ ببو الم

بلوچستان ءِ دمگ کیچ ءَ کرونا نادراھی گیش کپتگ، پنجاہ نوکیں نادراھانی نادراھی پدر بیتگ اَنت ءُ پازیٹو کیسز ءِ برزی پنجاہ ءُ دو ءَ سر بیتگ –

کیچ ءِ دمگ ءَ کرونا نادراھی گیش تالان بیگ اِنت گیر رجسٹرڈ ءُ گیر سرکاری کچ ءُ کساسانی رد ءَ دو روچانی تہ ءَ تمپ ءُ تربت ءَ زالبولے ءَ ھوار سَے مردم بیران بیتگ اَنت –

جانسلامتی کیچ ءِ نیمگ ءَ ٹیچنگ ھسپتال تربت ءَ ایمرجنسی جنگ بیتگ ءُ بی ایچ یوز ءُ آر ایچ سیز ءَ انگت ءَ ٹیسٹنگ ءِ آسراتی ھست اَنت –

کرونا ویروس آپریشن سیل مھکمہ سھت ءِ نیمگ ءَ شنگ کرتگیں رپورٹ ءِ رد ءَ بلوچستان ءَ درستاں گیشتر کیس پنجاہ ءُ ھشت کیچ ءَ رپورٹ بیتگ اَنت –

گوستگین روچ ءَ کرونا نادراھی ءَ یک سد ءُ سیزدہ ٹیسٹ کنگ بیتگ اَبت کہ اود ءَ پنجاہ ءُ ھشت کساں ویروس پدر بیتگ اَنت کیچ ءَ کرونا ویروس ءِ تالانی پنجاہ ءُ یک ٹک سَے بیتگ ءُ کیچ ءَ یک ھپتگے ءِ تہ ءَ رپورٹ بیتگیں کیسانی رد ءَ دو سد ءُ ھپتاد ءُ سَے ٹیسٹ کنگ بیتگ اَنت یک سد ءُ ھبدہ مردمانی نادراھی پدر بیتگ کیچ ءَ داں انگت ءَ شش ھزار ءُ شش سد ءُ نود ءُ شش ٹیسٹ کنگ بیتگ اَنت کہ آیانی تہ ءَ چاردہ سد ءُ ھشتاد ءُ دو مردماں ویروس پدر بیتگ –

ھمے وڑ ءَ ڈپٹی کمشنر کیچ ءِ نیمگ ءُ ٹرانسپورٹرانی گون ءَ گند ءُ نند، کرونا ءِ پھریزی ءَ کڈنی ءُ ویکسن ءِ جنگ اژدری گوشتگ ءُ گوشگ ءِ نہ منوکیں ٹرانسپورٹ بند کنگ بنت ءُ مزنیں کچے ءَ ملام کنگ بنت اِنت –

ڈپٹی کمشنر کیچ ھسین جان بلوچ ءِ چیردستی ءَ کراچی ءُ شال ءِ دگاں آیوکیں ٹرانسپورٹ واھندانی گون ءُ نیاد بیتگ –

ڈپٹی کمشنر کیچ ءَ ٹرانسپورٹانی واھند ترندی ءَ گوں کڈن کرتگ ءُ گوشتگ اَنت کہ سفر جنوکیں مساپراں پیسر ءَ کرونا ویکسن ءِ بارہ ءَ جست بہ کن اَنت ءُ ابید ءِ ویکسن ءَ مساپر سفر ءِ موکل دیگ مہ بنت –

ڈپٹی کمشنر کیچ ءَ گُشت کہ ھما مردمانی گور ءَ ویکسنیشن ءِ ھچ منانک نیست گڑا آ بسانی تہ ءَ نندگ ءَ ایلگ مہ بیت اِنت ءُ ٹرانسپورٹانی واھند ءُ کار کنوکیں دراھیں مردماں ویکسن جنگ اژدری اِنت –

ھمے درچ ءَ کیچ ءَ رؤکیں آیوکیں مردمانی باڑوانی تہ ءَ چہ دَہ ءَ بیست ءَ درسد کمی کنگ ءِ پیسلہ کنگ بیتگ ءُ ٹرانسپورٹ ءِ وھداں مساپر بریں گاڑیاں ایرانی تیل، جیم،گھٹکا ءُ دگہ وردنیانی گیشیں لڈگ ءِ ترندی ءَ باپندی کرتگ –

ڈپٹی کمشنر کیچ ءَ گُشت ھرکس ءَ مئے گپ ءُ مسام نہ من اِت اَنت گڑا آ ٹرانسپورٹ ءِ ھلاپ ءَ کاروائی بیت اِنت ءُ بند کنگ بیت اِنت –

نوشکی ریکو ءَ ڈیتھ اسکواڈ کارمند ھیدر ساسولی گاڑی ءِ تراک ناکیں شوروانی نشانگ کتگ- بیبگر بلوچ

بلوچ سلاہ بندیں گل بلوچ ریپبلکن آرمی جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ گوستگیں روچ ءَ نوشکی ءِ دمگ ریکو ءَ ھیدر ساسولی گاڑی ءِ سر ءَ بوتگیں بمب تراک ءُ گوستگیں ماہ ءَ ھوشاب دمب ءَ سلاہ بندیں مردمانی دست ءَ آوار جنگ بوتگیں پیربکش ءِ کوش ءِ زمّہ واری منّ اِتگ ءُ گوشتگ کہ مئے سرمچاراں گوستگیں روچ ءَ نوشکی ءِ دمگ ریکو ءَ ڈیتھ اسکواڈ ءِ کارمند ھیدر ساسولی ءِ گاڑی ھما وھد ءَ تراک ناکیں شوروانی ءَ نشانگ جوڑ کتگ وھدیکہ آ چہ وتی گِس ءَ دراتکگ ءُ دیم پہ نوشکی ءَ روگ ءَ بوتگ-

جارکش ءَ گوشتگ کہ اُرش ءِ آسر ءَ ھیدر ساسولی ءِ زھگ ءُ ڈیتھ اسکواڈ ءِ کارمند عطاء اللہ گوں وتی دو کارمنداں ھوار سک باز زدگ بوتگ اَنت- ھیدر ساسولی ءُ آئی ءِ زھگ عطاء اللہ گوستگیں بازیں وھدے بیت کہ رحیم ساسولی ءُ ھاپز ممتاز ساسولی ءِ چیردستی ءُ سرکار ءِ واھگانی پد ءَ بلوچ راجی جھدکارانی بگیری ءَ کار ءَ بوتگ اَنت- نوشکی ءُ ھاران ءِ کوھی دَمگ لجے ، ریکو ،انجیری، کاکوئی، ھژدہ کول، منجرو ءَ ھوار دگہ بازیں دمَگے ءَ بوتگیں لشکر کشی آں ھمے کارمند پوج ءِ ھمراھی ءَ تچک ءَ ھوار بوتگ اَنت- ایشاں ابید اے کارندھاں دمگ ءِ تہ ءَ گریبیں لس مھلوک ءِ مال ءُ دلوتاں ھوار بازیں دگہ مڈی ءُ ڈنگی ءَ دست مان بوتگ-

آئی ءَ دیمتر ءَ گوشتگ کہ مئے سرمچاراں گوستگیں ماہ ءَ ریاستی ڈیتھ اسکواڈ ءِ نام گپتیں باسک سعید لاٹو ءِ یک کارمندے شکاری پیر بکش کہ ھوشاپ دَمب ءِ جھمنند اِنت ھما وھد ءَ دزگیر کتگ وھدے آ سرمچارانی بنجلاں شوھازگ ءُ پدگیری کنان ءَ کوھی دمگ ءَ ساڑی بوتگ – ھمے کارمند ءِ کتگیں جرمانی پٹ ءُ پول کنگ بوتگ ءُ آئی ءَ منّ اتگ کہ آ بیست ءُ شش اکتوبر ءَ کولواہ ءَ ڈیتھ اسکواد ءِ باسک سعید لاٹو ءِ سرکماشی ءَ بوتگیں لشکرکشی ءَ تچک ءَ ھوار بوتگ – کہ ھمے لشکرکشی ءَ مئے گَل ءِ سنگت مُکتار جان پنام کُنر شھید بوتگ اَت- ایشی ءَ ابید اے کارمند ءَ بازیں دگہ لشکرکشیاں ھوار بوتگ کہ بازیں گریبیں مردمانی لوگ ءُ جاہ سوچگ بوتگ اَنت – ھمے کُتہ کاریانی مَنّگ ءَ پد شکاری پیر بکشءَ مَرگ ءِ سزا دیگ بوتگ – کہ زیک تیراماچ کنگ ءُ کُشگ بوتگ –

جارکش ءَ گڈسر ءَ وتی درشان ءِ تہ ءَ گوشتگ کہ مئے جھد سر ڈگار ءِ آجوئی ءَ تاں برجاہ مان ایت –

زامری کور دپ ءِ پانگس ءِ سر ءَ اُرش کتگ ءُ جانی ءُ مالی تاوان داتگ – میجر گوھرام

سربوتگیں ھالانی رِد ءَ ناشناسیں سلاہ بندیں مردماں زامران ءَ پاکستان ءِ پوج ءِ پانگس ءِ سر ءَ اُرش کُتگ – دمگی مردمانی رِد ءَ اُرش زامران ءِ دمگ زامری کور دپ ءَ برجاھیں پاکستانی پوج ءِ پانگس ءِ سر ءَ کنگ بوتگ اُرش ءَ پاکستانی پوج ءَ جانی ءُ مالی تاوانانی دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں بلیدہ زامران ءِ دمگ زامری کور دپ ءَ برجاھیں پاکستانی پوج ءِ پانگس گوں مزنیں سلاھاں وتی نشانگ کُتگ، چریشی ءَ زورگیریں پوج ءَ جانی ءُ مالی تاوان رس اتگ –

جارکش ءَ گوشتگ کہ بلوچستان ءِ آجوئی ءَ تاں زورگیریں پوج ءِ سر ءَ مئے اُرش برجاہ مان انت –

سربوتگیں ھالانی رِد ءَ بلوچستان ءَ جھانی وبا کرونا ویروس ءِ گیش تالان بوگ ءِ پشدر ءَ شپ ءِ ادار دہ ءَ بازاراں بند کنگ ءُ آدینگ ءِ روچ ءَ سرجمی ءَ بند آرگ ءِ جار پرینگ بوتگ اَنت –

بلوچستان محکمہ داخلہ ءُ قبائلی امور ءِ نیمگ ءَ شنگ کرتگیں جار ءِ رِد ءَ این سی او سی ءِ گوشگ ءِ پد ءَ بلوچستان ءَ کرونا ویروس ءِ شنگ ءُ تالان بوگ ءِ پشدر ءَ داں سی ءُ یک جولائی ءَ نوکیں بند آرگ ءِ جار پرینگ بوتگ –

جار ءِ تہ ءَ گوشگ بوتگ کہ کارءُ باری بنجل ءُ مارکیٹ شپ ءِ ادار دہ ءَ داں پچ کنگ بہ بنت وھدیکہ پٹرول پمپ، میڈیکل اسٹور، ویکسین سینٹر ءُ شیر ءِ دکانانی بیست ءُ چار ادار پچ کنگ ءِ موکل انت – ھوٹل ادار یازدہ ءُ پنجاہ ءُ نُہ ءَ تاں بند کنگ بہ بنت بلے ھما مردم ھوٹلانی تہ ءَ دارگ بہ بنت کہ آھاں کرونا ویرس ءِ ویکسین جتگ – اشی ءِ ھمراھی ءَ ھوٹل ءُ ھوٹل ءِ پھازدار مھمانانی ویکسین سرٹیفکٹ چارگ ءِ ھواری ءَ وتی کارداراں ویکسین بجنائین انت – جار ءِ رِد ءَ آروسی مراگش ھالانی تہ ءَ چارسد مردم کلگ بنت ءُ ڈن ءَ آروس ھم موکل انت – زیارت ءُ سینما ھم پچ کنگ بنت بلے سینما شپ ءِ ادار یک ءَ تاں پچ بہ بنت ءُ ھما مردم کلگ بہ بنت کہ آھاں ویکسین جتگ –

جار ءِ رِد ءَ ھچ وڑیں دود ربیدگی ، دینی، شئر ءُ شائری مراگش برجم دارگ ءِ موکل نیست جیمزانی تہ ءَ ھم ویکسین کتگیں مردم شُت کن انت ءُ ٹرانسپورٹ ھپتاد درسد ءِ کچ ءَ مردم سپر کرت کنت ءُ آدینگ ءِ روچ ءَ سرجمی ءَ لاؤک ڈاؤن کنگ بیت وھدیکہ سیل ءُ سواد، پارک پنجاہ درسد پچ کنگ ءِ موکل دیگ بنت اَنت ئِے –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ءُ ھزار سَے سد ءُ ھپتاد روچ سرجم بوتگ – مروچی پشتونخوامیپ ءِ قادر آغا ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ کالونائیز ءَ وتی درسیں تیاری کرتگ انت مزنیں پنجگانی زور ءَ زیردستیں مھلوک ءِ ڈول ءَ پروشینگ ءِ نیمگ ءَ دیم دنت ءُ دومی نیمگ ءَ زلم ءُ زوراکی ءِ بچتگیں اوستاں سرجم کنت – ڈیتھ اسکوڈ ءَ چہ بلوچ راجداریں باسک ، دانشور، ورناہ، وکیل، ڈاکٹر ءُ اھوالکاراں شھید کنائینیت ءُ مایوسی تالان کنگ ءِ جھد ءَ کنت وھدیکہ دومی نیمگ ءَ وتی جوڑ کرتگیں پیداگیراں وتی ردیں پگر ءُ سیاسی نزریہ ءَ دیم ءَ برگ ءِ جھد ءَ کنت –

ماما قدیر بلوچ ءِ گوشگ ات کہ کمے وھد ءِ تہ ءَ وی بی ایم پی ءَ سرجمیں دنیا ءِ تہ ءَ دیم ءَ اتکگ دومی نیمگ ءَ پاکستانی پوج مئے جھد ءِ ھلاس کنگ ءِ یا نزور کنگ ءِ ھاتر ءَ وڑ وڑیں پندل سازگ ءَ انت – بلوچستان ءِ تہ ءَ روچ ء مروچی پوجی لشکر کشی ، زانگولیں جون زلم زوراکی یکشل ءَ برجاہ انت بلے اے وڑیں زوراکیاں ابید ھم ریاست بلوچ جھد ءَ ھلاس کنگ ءَ بے سوب بوتگ – بلوچستان ءِ تہ ءَ زورانسری اوارجنی ءُ لشکر کشیانی تہ ءَ ھمک روچی گیشی آیگ انت ھمے وڑ مردمانی دل ءِ تہ ءَ نپرت ھم گیشتر بوان انت ءُ مھلوک اے ھم سرپد ءُ زانت کہ اگاں ما ھچ مہ گوش ایں گڑا ما ھم یک روچے ھمے زلم ءُ زوراکیانی آماچ بئیں گھتر ھمیش انت کہ چیزے بگوشیں –

بلوچستان ءِ تیابدپی دمگ پسنی ءَ “معذوراں ” پسنی پریس کلب ءِ دیم ءَ زھرشانی کرتگ ءُ گوشتگ کہ “معزور “ھکاں زبھر کنگ بیگ ءَ اَنت، آیان گوشتگ کہ “معذورانی بھت ءَ بس پنڈگ ءُ زکات ایر کنگ بیتگ اَنت باید مارا نوکری دیگ بہ بنت –

“معذورانی”زھرشانی ءَ بی این پی(عوامی) پاٹی ءِ زالبول ونگ گوادر ءِ آرگنائزر میڈم مریم صاحب خان ءَ تران کرتگ ءُ گوشتگ کہ من وتی پاٹی ءِ سروک اُستانی وزیر میر اسد اللہ بلوچ ءَ دزبندی کن آں آ تھسیل پسنی ءِ “معذوروں سوشل ویلفیئر ڈیپارٹمنٹ گوادر ءَ کمک بہ کنت –

آئی ءَ گوشت کہ الاج ءِ واستا سرکاری درچاں زر دیگ بہ بیت ءُ تانکہ معذوراں شریں وڑے ءَ کمک بہ کنت –

آئی ءَ گوشت کہ معذورانی واستا ایمبولینس ءِ بند ءُ بست کنگ بہ بیت ءُ آئی ءَ گوشت کہ من زاناں معذورانی ھکاں کَے جنگ ءَ اِنت ءُ بلے اشی ءِ دزبندی ءَ کن آں آیاں آیانی ھک دیگ بہ بیت کہ معذوراں دگہ کس نیست اِنت –

زھرشانی ءَ “معذور ” راشد بلوچ ءَ تران کرت گْوشت کہ ھما وھد ءَ گوادر ءَ سولر بھر بیتگ بلے گل ءِ سروک ءَ مارا معذور پدر نہ کرتگ ءُ مارا ایف آئی آر ءِ ترس داتگ –

آئی ءِ گوشت کہ معذورانی جست کنوک نیست ءُ معذوراں بس پِنڈگ ءِ نوکریانی بھت ءَ اِنت ءُ باید معذور نوکری دیگ بہ بنت – آئی ءَ گوشت کہ معذورانی نام ءَ راشن مُچ کنگ بنت بلے معذوران اش کس نہ دنت درستاں وت ھڑپ کن اَنت –

آئی ءَ گوشت کہ پسنی ءَ ھپتاد ءِ کچ ءَ معذور ھست اَنت بلے مروچی ءَ داں کسے ءَ جست نہ کرتگ اَنت ءُ دراھیں سرکاری ادارھاں گوں دزبندی اِنت کہ معذوریں مردماں گوں وت دچار بہ کپ اَنت ءُ آیانی بارہ ءَ جست بہ کن اَنت –

بلوچستان ءَ چوشیں روچے پِر نہ گوز ایت کہ اود ءَ مردم دگ ءِ وئیلانی آماچ نہ بیگ ءُ بیران ءُ زدگ بیگ ءَ نہ اَنت ھمک روچ بلوچستان ءِ دگانی سر ءَ بیتگیں وئیلاں لس مردم مرگ ءِ آماچ بیان اَنت ءُ لس مھلوک چرے وئیلاں زدگ بیگ ءَ اَنت –

سر بیتگیں ھالانی رد ءَ بلوچستان ءِ دمگ سبی ءَ مزن شھدگ ءِ سر ءَ لمجی ءِ نزیک ءَ گیس گاڑی ءَ ٹرالرے ءَ ٹکرے جتگ ءُ چریشی ءَ یک مردمے بیران ءُ یکے زدگ بیتگ –

سبی ءِ وئیل ءَ لیویز ءِ کارمنداں ھال ءِ سر بیگ ءَ آیاں وت ءَ وئیل جاہ رسینتگ ءُ جون ءُ زدگ بیتگیں مردم چِست کرتگ ءُ سبی ءِ سول ھسپتال ءَ برتگ اَنت –

سبی ءَ گیس ٹنکر ءَ سواریں بیران بیتگیں مردم ءِ پجار ھمایوں گل ءُ زدگ بیتگیں مردم ءِ پجار اورنگزیب ءِ نام ءَ زانگ بیتگ ءُ پنجاپ ءِ دمگ ملتان ءِ نندوک گوشگ بیگ ءَ اَنت –

زدگ بیتگیں مردم ءِ جاور ھم نگیگ گوشگ بیتگ اَنت ءُ آ سی ایم ایچ ءَ برگ بیتگ –

واکدارانی گوشگ اِنت ٹرالر ھرابی ءِ سبب ءَ دگ ءِ کش ءَ اوشتوک بیتگ کہ گیس ٹنکر اتکگ ءُ آئی ءَ را ٹکر جتگ –

ھمے وڑ ءَ بیلہ آر سی ڈی دگ ءَ لنگڑو ءِ ھند ءَ شال ءَ دیم پہ کراچی ءَ رؤکیں اے جے موورز بس وئیل ءِ آماچ بیتگ –

وئیل ءَ زالبول ءُ چُکاں ھوار بیست مردم زدگ بیتگ اَنت –

ھال ءِ سر بیگ ءَ بیلہ پولیس ءُ ریسکیو ءِ کارمند سر بیتگ ءُ زدگ بیتگیں مردم بنداتی درمان ءَ بیلہ ءِ ھسپتال ءَ سر کنگ بیتگ ءُ گیشیں درمانی ءَ کراچی ءَ برگ بیتگ اَنت –

نبشتانک: رودپتر ءِ سیمی بھر

(سیمی بھر)

نبشتہ کار: شاؔری لال

دی بلوچستان پوسٹ

من ایران شُشت اَنت۔ مات پسانی کاہ ءُ کدیم کنگ ءَ پد آتکگ آت لوگ ءَ دست ئِے پیماز کَوٹگ اِت اَنت ءُ چم ئِے ماں وتگِند ءَ سک اِت اَنت وتی دوستیں کسمانک “وسو ءُ نشار ءِ مِڑ”ءَ چارگ ءَ اَت مات کہ یکبرے وتی چمّاں کسمانک ءِ تہ ءِ “وسّو ءُ نشار ءِ مِڑ” ءَ گِند اِیت آئی ءَ وتی کرّ ءُ گْور ءِ ھچ ھیال نہ بیت مات ءِ پُشت ءَ مئے لوگ ءِ مدامی ئیں دُزّیں پشّی ھما ایران ءَ چَٹّگ ءَ اَت کہ من شودگ ءَ بیھیال کتگ اَت من ھنچو کہ پشّی دیست پہ آئی ءَ زھر آتک دل ءَ گوشت گلین ئِے بلے نہ زاناں منی دل ءَ چونی ءَبزّگی یے آتک من ءَ پہ پشّی ءَ بزّگ بوت، ودار کت بِلّے وارت ءُ روت۔ ھنچوکہ پشّی ءَ من ءَ دیست یکدم چہ لوگ ءَ در آتک۔

من ھیران بوت آں اینچو وھد ءَ مات نندوک بوتگ چہ آئی ءَ نہ ترس اِتگ ئِے ھنچو کہ من ءَ دیست ئِے پرچا جِست؟ منی ءُ مات ءِ تہ ءَ چے تپاوت ھست کہ پشّی ءَ چہ مات ءَ نہ ترس اِت چہ من ترس اِت ئِے من وَ ھچبر پشّی ءَ را نہ جتگ، بلے انگت چہ من ءَ ترس اِت ئِے من جیڑگ ءَ پد ترانگ کپت آں کہ من ءَ رودپتر وانگی اِنت بلے من ءَ شُد ءَ جتگ اَت ورگ تیار نہ اَت مات نوکی پیماز کوٹگ ءَ اَت۔ من پریج پچ کت داں پریج ءَ چاکلیٹے ھست اَت من وارت شد کمو جھل کپت من پد ءَ شُت آں دومی لوگ ءَ رودپتر دیم ءَ کت۔

رودپر ءِ ھژدھمی تاک ءَ نویس اِتگ اَت “سھب کہ بوت من رند ءَ ترانگ ءَ کپت آں من بلاھیں ردی یے کتگ ءُ من ءَ سک اپسوز بوت اے ھاتر ءَ نہ کہ ما کاردام ءِ ویر بُرّ اتگ اَت، بلکیں اے سوب ءَ ویر بُرّگ ءَ پد ما ویر بُرّگ ءِ سوب ھما جاہ ءَ ایر نہ کتگ اَت کار ءِ کنگ ءَ ءَ پیسر من گوں سنگت ءَ سوڑگ کتگ ات وھدے ما ویر ءَ بُرّیں ھما ویر ءِ سر ءَ یک تاکے ءِ سر ءَ بیھارے دئیں کہ “دانکہ میتگ ءِ دامگ پچ کنگ نہ بیت، مارا ھشکیں کاردام ءِ زلورت نہ انت ءُ ھمے ڈول ءَ کاردام ءِ ویر ءَ بُرّیں”-

من پد ءَ سھب ءَ گوں سنگت ءَ وتی کارجاہ ءَ نندوک اتیں من ھمے گپ گوں آئی ءَ کت آئی ءَ ھچ بژن نہ بوت گشت ئِے مشکل نہ اِنت ھر وھد ویر پد ءَ شر کنگ بوت من تو ویر ءَ پد ءَ بُرّیں ءُ کاگز ءَ ھمود ءَ ایر کنیں من ءُ سنگت ھمے سوڑگ کنگ ءَ اتیں کہ مئے دروہ اتگیں سنگت سیہ گوک آتک ءُ اوشتگ ءَ گوں زھر زھر ءَ گشت ئِے ھاں شما ویر بُرّ اِت؟ ءُ پد ءَ یکدم شُت آئی ءِ اے گپ ءِ جنگ ءَ من ءُ سنگت ءَ سک کند اِت ءُ من گوشت سکیں بے اکلے ما اگاں ویر بُرّ اتگ پہ میتگ ءِ دیمروئی ءَ نئیکہ پہ کارزوالی ءَ۔

دو روچ گوست ما ودار ءَ اتیں چہ شھر ءَ کاردام ءِ شرکنوکیں یک گاڈی یے آتک میتگ درھیں ویراناں چار ات ئِے ءُ مئے ھما بُرّ اتگیں ویر ءَ را سِست ئِے دگہ نوکیں ویرے بِر کت اِش، کاردام ءِ ویر ھنچین ئِے اگاں آ یکبرے بُرّگ بہ بیت گڑا دوبر شر نہ بیت باید تیوگیں ویر ءَ دُور بہ کن ئے وھدے من سستگیں ویر دیست کہ سک مزن اَت گڑا من ءَ کمو درد بوت کہ کاردام ءِ کمپنی ءَ ما مزنیں تاوانے داتگ یکے بلاھیں ویرے زوال کتگ ءُ پد ءَ اِے ویر ءِ نھاد سک باز اِنت ءُ اینچوکیں راھے ءِ آیگ ءَ آھانی وھد زوال بوتگ ءُ پد ءَ گاڑی ءِ تیلانی سوچگ بلے من ناچار اِت آں کہ پہ میتگ ءِ دیمروئی ءِ ھاتر ءَ کمو کربانی دیگ لوٹ اِیت کاردام دوبر شر کنگ بوت آں ھما روچ ءِ روچ منی دلیریں سنگت آتک ءُ گوشت ئِے کاردام وَ پد ءَ شر بیتگ اَنت بریں دوبر پد ءَ ویر ءَ سِندیں بلے من آئی ءَ مکن کت کہ دو رو سبر کنیں گڑا پد ءَ بوت کنت کسے ویرانی پانگ بہ بیت ءُ مئے سر ءَ مشکلے مہ بیت ما دو روچ ودار کت ودار کنگ ءَ پد ویر ءِ بُرّگ ءِ بارو ءَ ما دوئیناں جیڑ اِت کہ نی ویر کجا ءُ چے وھد ءَ بُرّگی اِنت مئے اِے رندی دل ڈڈتر اِت ما روچ ء رھمی دیگر ءِ وھد ءَ چہ میتگ ءَ نیم ساھت ءِ دُوری ءَ ھنچیں جاھے ءَ شتیں کہ ویر ٹوھیں روڈ ءِ کش ءَ اَت ما سیکل شیپے ءِ تہ ءَ داشت پہ پند شتیں ویر ءِ گْور ءَ، منی سنگت کسانیں کوھے ءِ سر ءَ اوشتات ھمے ھاتر ءَ مردم کسیکہ آیگ ءَ بہ بیت آ من ءَ ھال دات بہ کنت من تیربرگ ءِ سر ءَ روگ لوٹ اِت بلے روڈ ءِ سر ءَ گاڈیانی سک روگ ءُ آیگ اَت من تیربرگ ءِ سر ءَ شت نہ کت من پد ءَ شُت آں شیپ ءِ تہ ءَ اوشت آں کہ روگ ءُ آیگ کمتر بہ بیت بلے اِے ھنچیں جاھے ات یک دمانے ءَ روڈ ھالی نہ اَت چہ گاڈی ءَ۔ پد ءَ ما اِے ھند ءِ کار ماٹو کت شُتاں دگہ جاھے ءَ کہ اود ءَ کَورے اَت ءُ گاڈیانی روگ ءُ آیگ کمتر اَت اود ءَ کہ ما شتیں من سیکل کَور ءِ تہ ءَ دازے ءِ بُن ءَ داشت منی سنگت شُت پہ آپدستے ءَ ءُ من ھرّگ زُرت شُت آں پہ وتی کار ءَ من تیربرگ ءِ سر ءَ آت آں ویر ءِ نیم بُرّ اِتگ لھتے گاڑی ءِ توار بوت من چہ تُرس ءَ تیربرگ ءِ سر ءَ چَہ دَور کُت شُت آں داز ءِ کش ءَ کہ گاڈی والا ءَ ھچ شک مہ بیت تنا وھدی منی سنگت آتک آئی گوشت تو ویر چی ءَ نہ بُرّ اِتگ من آئی ءَ گاڑی پیشداشت اَنت آئی ءَ گوشت تو سوچ گاڈیاں آئی ءَ منی دست ءِ ھرّگ وت زُرت شُت پہ تیربرگ ءِ نیمگ ءَ۔ ھنچوکہ گاڈی نہ بوت آئی ءَ ھما دمان ءَ ویر بُرّ اِت ءُ چہ تیربرگ ءَ ایر آتک جت ئِے کندگ ئِے گوش اِیت بہ روئیں من گوشت مروچی ھنچو نہ روئیں من شُت کاگزے ءِ سر ءَ بیھار ءَ دات ءُ بُرّ اِتگیں ویر ءِ سر ءَ لونجان کت ما پد ءَ ساری ءِ وڑ ءَ لوگ ءَ آتکیں۔ مئے لگوریں سنگت سیہ گوک ءَ زانت کہ اِے کار ما کتگ گڑا یکروچے گوں من دچار بوت گشت ئِے اگاں شما دوبر چشیں کار کت من شمئے راز ءَ پاشک کن آں۔ من آئی ءِ دل ءِ ھال ءَ سرپد اَت آں من دلجم اِت آں کہ ایشی ءَ چشیں جان نیست بلے اسل ءَ من رَد اِت آں اے بری یک ھپتگے ءِ گْوزگ پد کاردام دوبر شر کنگ بوت اَنت بلے دامگ انگت شر کنگ نہ بوت اَنت۔

اے سیمی رند ءِ ھاتر ءَ ما داں یک ھپتگے ءِ ودار کت کہ جاور گیگ بہ بنت مئے مشورہ ھمے بوت کہ اے بری ھما اولی شپ ءِ وڑ ءَ شپ ءَ روئیں بلے اِے رندی بازار ءِ دیم ءِ کور ءِ تہ ءَ چے ویر گوز اِیت ھمے کور ءِ تہ ءَ وتی کار ءَ کنیں چہ کار ءِ کنگ ءَ پیسر من ءَ یات آتک سیہ گوک ءَ گشتگ ات اگاں شما پد ءَ چشیں کار کت من شمئے راز ءَ پاشک کن آں، گڑا من چہ زِدّ ءَ آئی ءَ پیسر ءَ ھال دات کہ ما روگائیں وتی کار ءِ کنگ ءَ ترا ھرچ زھمے جنگی اِنت برو بجن۔
ما دوئیناں اے بری تھنا یک ھرّگے ءُ دو دانگ چادر زُرت اگاں کسے بہ گند اِیت گڑا مارا درس مہ کنت۔ ما سرشپ ءَ سیکل زُرت ءُ شُتیں من سیکل ھچ جاہ ءَ چیر نہ دات من شُت آں تیربرگ ءِ کَش ءَ سیکل داشت گوں اوشتگی جاہ ءَ من سیکل ءَ ایر نہ کپتگ اِت آں کہ تنا وھدی سنگت شُت ھما سھت ءَ ویر بُرّ اِت ما پہ تیزروانی واتر شُتیں۔

ما روگ ءَ اِتیں کہ راہ ءِ سر ءَ گاڈی یے اوشتاتگ اَت کہ مارا چو گمان بوت کہ بلکین ءَ ایجنسی ءِ گاڈی اِنت مئے وَ سیکل ءِ لیٹ پیسر ءَ بند اِت اَنت شپ ماھکانی اَت من سیکل یک دازے ءِ پُشت ءَ داشت ءُ چار اِت باریں چونیں گاڑی یے مئے راہ ءِ سر ءَ نندوک اِنت “من ءَ گمان بوگ ءَ انت اے گاڑی پہ مئے راہ ءِ بندگ ءَ نِشتگ” سنگت گشت کمو ھمد ءَ ودار کنیں دانکہ گاڑی بہ رُوت بلے گاڑی ھچ نہ شُت یکوئی گاڑی ءَ وتی لیٹ ویرانی نیمگ ءَ جت اَنت ءُ چارگ ءَ اَت من کہ گاڑی چو کنگ ءَ دیست من سِتک بوت آں اے گاڈی پہ مئیگی نِشتگ۔ منی جان ءِ پُٹ چِست بوت اَنت من ءَ تُرس ءُ لرزے ءَ زُرت من سنگت ءَ گوشت پہ اِد ءِ نندگ ءَ ما گنتر جنجالے ءَ کپیں شرتر ھمیش اِنت ما چد ءَ چِہ وت ءَ بہ کشّیں شرتر اِنت ھرچی آورتگ اللہ ءَ آورتگ ما دوئیں سیکل ءَ سوار بوتیں دیم ءِ راہ ءَ گاڈی اوشتوک اَت ما دگہ راھے گپت ءُ آھستہ آھستہ راہ گپتیں۔ نہ زاناں کدی گاڈی ءَ مارا دیست مئے پُشت ءَ پیداک اَت۔ وھدے کہ گاڈی من دیست مئے پُشت ءَ گون اِنت سیکل ءَ ھرچی شُت کت من بُرت پُشت ءَ چار اِت گاڈی لیٹ سر ءَ اشارہ دیگ انت۔ من ھچ جمپ ءُ چول نہ چار اِت بس روان اِت آں چکّے منی ءُ چکّے منی پُشت ءَ گاڈی ءَ چارگ ءَ ات آں باریں گاڑی نزیک اِنت یا دُور اِنت بلے گاڈی مئے پُشت ءَ کپتگ یل دیگ ءِ نام ئِے نہ زانت۔ من اوں چہ ترس ءَ برے راہ چار اِت ءُ برے پُشت ءَ گاڈی ءَ۔

من جیڑ اِت اگاں ما ایشانی دست ءَ گِرگ بہ بیں مئے ھال کچکانی ھال بیت ما اگاں گرگ بوتیں کے بہ زانت مارا کجام بھتام ءَ بندیگ کن اَنت سیکل گوں تیزی روان اَت من جیڑگ ءَ پد کمو پُشت ءَ چار اِت باریں گاڈی انگت دمبہ گون اِنت پُشت ءِ چارگ ءَ گوں سیکل چہ منی دست ءَ لگشت سرگ منی پُلکے ءِ تہ ءَ کپت دپ چہ ھاک ءَ پُرّ بوت۔ سنگت کہ پُشت ءَ سوار اَت چہ کپگ ءَ چہ منی سر ءَ گْوست دگہ سیکل ءِ انڈل ءِ سر ءَ شُت۔ من ھما سھت پاد آتک آں گاڈی چار اِت گاڈی دُور اوشتوک اَت من زانت آئی ءَ اے شپ ءَ مارا گار کتگ من ھچ نہ چار اِت کہ من یا سیکل چون اِنت سیکل چالو کت ما پد ءَ دوئیں سوار بوتیں۔ پد ءَ ھما گوں تیزی ءَ روان بوتیں کمو دُور روگ ءَ پد من مار اِت منی سروشک ءَ سُچگ ءَ اِنت نوں من مار اِت منی سروشک کپگ ءَ گوں کرّگ بوتگ۔ من سنگت ءِ ھال ءِ جست کت آئی ءَ گوشت من برابر آں۔ من شُت آں سنگت لوگ ءِ دپ ءَ روکیں بلب ءِ دیم ءَ سیکل اوشتارینت ما دوئیناں ھدا ءِ شکر گپت وتی ٹپ ءُ ٹوریں جاگہ چار ات انت منی دست انچو ھراب ات کہ چوکہ منی سیکل اَت سیکل ءِ میٹر۔ بریک لیور ءُ پیڈر پرشتگ اِت اَنت من سنگت ءَ آئی ءَ لوگ ءَ رسینت وت آتک آں لوگ ءَ۔ وھدے من لوگ ءَ آتک آں سروشک ءِ ھدّ ءِ آستونک کمو ھونین اَت نوں من زانت کہ چہ کپگ ءَ دست اوں ھونین بوتگ ءُ منی پُچ سک ھاکین اِت انت من شُت وت جان شُشت ءُ پُچ بدل کت اَنت نان ورگ ءَ پد رودپتر دیم ءَ کت۔

اے بری داں دَہ روچ ءَ کاردام گار بوت اَنت کس نیتک کاردام ءِ شَر کنگ ءَ پہ بے کاردامی ءَ منی بازیں کارے اوشتوک بوت۔ ءُ من مار اِت کہ میتگ ءِ درھیں مردم ھم ھمے آس ءَ سُچگ ءَ اَنت بلے من جزم اِت آں کہ من شَر کتگ، ھر کجا کہ من گشت آں ھرکس ءَ ویر گُڈّوکاں بدوا دات بلے من ھچ بد نہ مُرت چے ءَ کہ بدیں بدوا ھمائی ءَ گیپت کہ ردیں کارے بہ کنت من وَ پہ میتگ ءِ شرّی ءَ اے کار کتگ اَت دامگ ءِ شرّی سک باز اَنت کسے کہ بہ زانت بلے مئے میتگ ءِ بہ زانت ءُ بہ اگل ءَ کے سرپد کنت چرے شرّیں آسراتی ءَ۔

دھ روچ ءَ گیش گْوستگ اَت۔ کاردام گار اِت اَنت ھمک مردم سماگو اَت یک دو روچ ءَ پد آتک آدینگ ءِ روچ بوت من شُت آں مسیت ءَ آدینگ ءِ نماز ءَ ءُ واز ءِ گوشدارگ ءَ اے وھد ءَ کہ من مسیت ءَ شُت آں مسیت ءِ مولوی نہ یتکگ اَت من مسیت ءَ نشت آں چو ایدگہ مردمانی ڈول ءَ مولوی ءِ ودار ءَ کم کم ءَ مسیت چہ مردم ءَ پُرّ بوت مسیت ھنچو پُرّ بوت لٹّے دَور بہ داتیں بُن ءَ نہ کپت کمو ودار ءَ پد مولوی اوں آتک بلے اے روچ ءَ مولوی ءِ تب شَر نہ اَت چونائی ءَ مولویانی تب گیشتر ھراب انت ھمک وھد ءَ رنجیگ اَنت۔ بلے اے روچی من مار اِت ھبرے ھست اِنت۔ مولوی ممبر ءِ سر ءَ نِشت بندات ءَ تازی زبان ءَ یک ھدیسے ونت ئِے بس تیوگیں آدینگ ءِ واز ءِ جاہ ءَ مولوی ءَ کاردام ءِ جیڑہ ءِ سر ءَ گپ کت۔

آئی ءَ بندات ءَ دوبر ءَ شاکار اِت ءُ آئی ءَ وتی گپ چوش بندات کت اَنت کہ من آئی ءِ گپّاں گوں گونڈگیری ءَ درشان کن آں”-

مولوی ءَ وتی گپ بنا نہ کتگ اَت کہ مات ءِ توار چہ دومی لوگ ءَ آتک، “جنے بیا ورگ تیار اگاں ورئے” من وَ پیسر ءَ کمو شدیگ ات آں۔ بلے ھنو شد ءَ باز گْور جتگ اَت۔ وھد من چار اِت شپ ءِ دھ ءُ نیم اَت۔ من رودپتر ءِ دپ بند کت ءُ وتی سرجاہ ءِ سر ءَ ایر کت۔ پد ءَ من شت آں بورچی ءِ نیمگ ءَ پہ لاپ ءِ مان چینگ ءَ۔

روان اِنت

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔