TBP Balochi

بلوچستان ءِ بنجاھی شھر شال ءَ بلوچ یکجھتی کمیٹی شال ءِ نیمگ ءَ مروچی شال ءِ جتا جتائیں جھاں ریاست ءِ زُلمانی بگیری ءَ پنتاک بھر ءُ بانگ کنگ بیتگ اَنت –

شنگ بیتگیں پنتاک “پملیٹ” ءِ سرھال (ریاسےی مظالم کے خلاف اجتماعی جدوجہد ناگزیر ہے) ریاستی زُلم ءُ زوراکی سر ءَ سر گوستگ اَنت چریشی ءَ جد ءُ جھد کنگ المی اِنت ءُ اشی ءِ ھوار ءَ چاگردی رسانکجاھاں ھیش ٹیگ #RemoveFCFromBalochistan ھم کارمرد بیگ بندات بیتگ –

زانگ بہ بیت دو اکتوبر ءَ بلوچستان ءِ دمگ کیچ ھوشاپ ءَ پاکستانی پوج ایف سی ءِ مارٹر باری ءَ دو زھگ بیران ءُ یکے زدگ بیتگ اَت، بیران بیتگیں زھگانی لاش دو روچاں بلوچستان ءِ دمگ کیچ ءِ بنجاھی شھر تربت ءَ شھید فدا چوک ءَ ایر کنگ بیتگ اِت اَنت اود ءَ آیاں انساپ ءِ نہ رسگ ءَ کھول ءَ لاش زرتگ ءُ بلوچستان ءِ بنجاھی شھر شال ءَ سر بیتگ اَنت –

مروچی دومی روچ اِنت شال ءَ زھرشانی نندانک برجاہ اِنت نودربر ءُ لاشانی کھول ءُ دگہ پھناتاں سیادی داروکیں مردم نندانک ءَ بھر زورگ ءَ اَنت –

شال ءِ سارتی ءَ دو لاشانی ھمراھی ءَ زھرشانی نندانک برجاہ، گوستگیں شپ پرگوستگ ءُ روچ ءِ بام ءَ ٹک داتگ دوشی سرجمیں شپ ءَ زھگانی کھول ءِ ھمراھی ءَ بلوچ نودربر ءُ دگہ ءِ تک ءُ پھناتاں سیادی داروکیں مردماں نشتگ ءُ زھرشانی کتگ –

دَہ اکتوبر ءَ بلوچستان ءِ دمگ کیچ ءِ ھند ھوشاپ پرکوٹگ ءَ ایف سی ءِ تیرگواری ءَ کُشگ بیتگیں زھگانی لاشانی ھواری ءَ آیانی کھول بلوچستان ءِ بنجاھی شھر شال ءَ گورنر ھاؤس ءِ دیم ءَ زھرشانی ءَ مروچی دومی روچ ءِ بندات بیگ ءَ نشتگ اَنت –

کھول ءِ لوٹ اِنت کہ مئے ھنداں ایف سی گلینگ بہ بیت ءُ مارا مئے زھگانی کوش ءِ سبب گوشگ بہ بیت اِنت ءُ ایف سی ءِ نام ءَ ارزی نبشتگ کنگ بہ بیت اِنت ءُ ما انساپ دیگ بہ بیت اِنت گوستگیں روچ ءَ داں انیگ ءَ بلوچستان ءِ بنجاھی شھر شال ءَ بازیں کچے ءَ جتا جتائیں تک ءُ پھناتاں بندوکیں مردماں بھر زرتگ انساپ ءِ لوٹ ءَ کنگ ءَ اَنت –

گوستگیں روچ ءَ ایم پی سناء بلوچ ءَ گشتگ اَت کہ اے ایوانانی دیم ءَ دو لاشانی آرگ ءُ ایر کنگ ءَ اے چیز ءَ پدر کنت کہ اے ایواناں بس مردگیں انسان اَنت مان اَنت کسے ءِ تہ ءَ اے ھمت نیست اِنت بئیت اِنت ءُ اے مردماں بہ گلائیت –

سرجمیں شپ ءِ روچ بوگ ءَ تاں سرکار ءِ مزنیں ھچ کس نہ اتکگ کھول ءِ لوٹانی سرجم کنگ ءُ آھاں ھک دیگ ءَ ابید ایم پی اے ھم نہ اتکگ –

ھمود ءَ زھرشانی ءَ نندوکیں ورنائیں نودربرئے ءِ گوشگ ات کہ سھب ءَ چہ دو زھگانی لاش اد ءَ ایر انت کھول ءِ ھمے گوشگ انت داں مئے گوم ءَ ھک کنگ مہ بیت ما نہ روئیں ـ بلے ریاست ءِ نیمگ ءَ وزیر اعلی ءُ وزیر آزم ءَ یلا دئے تنی وھدی شپ ءِ گڈی پاس انت کہ یک ایم پی ءِ ھم داد رسی نہ اتکگ –

ورنا ءِ گوشگ ات ما زانیں شمئے دست ءَ نہ بیت شما جیڑھانی گیش ءُ گیوار ءَ کت نہ کن اِت بلے بھیسیت بلوچ بلوچ ءِ ھما دود انت ھال پرسی ءَ وَ کرت کن اِت کہ اد ءَ ھشت یا نھ ڈگری سنٹی گریڈ سارتی سر ءَ مردم نشتگ انت – بلے سرکار ءِ بے حسی کابل ایر جنگ انت – ورناہ ءَ دوشی لوٹ کتگ ات کہ درسیں انسان دوست سھب ءَ وت بہ رسین انت –

دگہ نودربر ورنایے ءِ گوشگ ات کہ مرچی چارمی روچ انت کہ تربت ءَ بگر داں شال ءَ اتکگ انت بلے سیاسی پارٹیانی ھچ کمکے نیست – آئی ءَ گوشگ ات ھما کہ کلیں سیاسی باسکاں لوٹ ایت بیا انت مہ کھول ءِ ھمراہ داری ءَ بہ کن انت مہ رو انت اے گونڈالی کبر ءَ مہ جن انت –

آئی پی ایل سال دوھزار بیست ءُ یکے گڈی پائینل گوازی کولکتہ نائٹ رائیڈرز ءُ چنئی سپر کنگز ءِ میان بیت – کے کے آر ءَ دومی کولیفائر دہلی کیپیٹل سَے وکٹاں پروش داتگ ءُ وت ءَ پائینل ءَ سرکتگ –

دبئی انٹرنیشل کرکٹ پٹ ءَ چار شمبے ءَ بوتگیں آئی پی ایل گوازی ءَ دہلی ءَ اولسر ءَ گوازی کتگ ءُ پنچ وکٹاں یکسدو سِی ءُ پنچ رن جوڑ کت پسوئی ءَ کے کے آر ءَ نوزدہ اوور ءُ پنچ بالاں ھپت وکٹانی تاوان ءَ دہلی ءِ ٹارگٹ پروشتگ –

کے کے آر ءَ جوانیں لیب پیش داشتگ ءُ لیبی وینکٹیش ءَ پنجاہ پنچ ءُ شبھمن گل ءَ چِل ءُ شش رن جوڈ کتگ- دوازدہ اوورانی تہ ءَ نود ءُ شش رن جوڑ کنگ بوتگ اولی ششیں اوورانی تہ ءَ ھچ وکٹ نہ کپتگ ءُ پنجاہ ءُ یک رن جوڈ کنگ بوتگ – ائیر ءِ اے سیزن ءَ اے سیمی نیم سینچری بوتگ – اے اولی رند انت کہ ٹی تونٹی لیگ ءِ گوازی انت آئی ءَ سَے سد رن ءَ گیش جوڑ کتگ – ائیر ءَ سِی ءُ ھشت بالاں نیم سنچری جتگ ات کہ کگیسو ءَ آؤٹ کت – اشی ءَ پد نتیش رانا ءَ بیست ءُ ھپت رن گیش کت –

اشون ءَ پانزدھمی اوور ءَ اولی بال ءَ رانا ءِ کیچ یلا دات اے وھدی آئی ءَ نھ رن جوڑ کتگ ات بلے آئی انچو ھم وتی اننگز ءَ لیب نہ کت ءُ نارکیا ءِ بال ءَ آؤٹ بوت دومی وکٹ یک سد ءُ بیست ءُ سَے اسکور سر ءَ کپت –

آئی ءَ پد دنیش رباد ءِ بال ءَ بولڈ بوت – ٹیم ءَ سَے رن جوڑ کتگ ات ءُ سَے وکٹ تاوان بوتگ ات – کے کے آر ءَ گڈی دو اووراں دہ رن جوڑ کنگی ات نوزدھمی اوور ءَ نرکیا ءَ بس سَے رن دات ءُ مورگن زیرو سر ءَ آؤٹ ھم کت – کے کے آر ءَ گڈی اوور ءَ ھپت رن جوڈ کنگی ات – اشون ءَ بیستمی اوور ءِ اولی بال دیم دات راہل ءَ اولی بال ءَ رن ءِ زرت – شکیب ءَ دومی بال ءَ ھچ رن جوڑ نہ کت سیمی بال ءَ شکیب زیرو سر ءَ ایل بی ڈبلیو آؤٹ بوت –

نوں سَے بالاں شش رن ءِ لوٹ ات نارئن ھم زیرو ءِ سر ءَ چارمی بال ءَ آؤٹ بوت- راہل ترپاٹھی ءَ پنچمی بال ءَ چکائے جت ءُ گوازی کے کے آر ءِ نام ءَ کُت –

آئی ءَ یازدہ بالاں دوازدہ رن جوڑ کت ناٹ آؤٹ بوت – ٹیم ءَ نوزدہ اوور ءُ پنچ بالاں باج بُرت گوازی وتی نام ءَ کُت – دیم ءِ گوازی بزاں پائینل مروچی بیگاہ ءَ بیت انت –

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ پنجگور ھق آباد ءَ کُشندہ ٹولی گون ءَ جنگ دیان ءَ شھید بوتگیں سرمچار مراد بلوچ دروت ندرکتگ ءُ گوشتگ کہ گوستگیں روچاں ماں پروم ءِ دمگ حق آباد ءَ ایم آئی ءُ کشندہ ٹولی ءِ کارمندانی اُرشے ءَ گَل ءِ سرمچار ورنائیں مراد بلوچ پنام ھلال ء عبدوست جھمنند تمپ کلاھو شھید بوتگ۔

جارکش ءَ گوشتگ کہ مراد بلوچ گوستگیں چار سالاں گَل ءِ پَتّر ءَ پہ راجی آجوئی ءِ ھاتر ءَ دژمن ءِ بگیری ءَ جھد ءَ بوتگ۔ آئی ءَ دشت، تمپ، زامران ءُ پروم ءَ دژمن ءِ بگیریءَ جنگ ءِ بھرے بوتگ۔آ کسان سالی ءَ ابید یک دلیریں تمردیں سرمچارے بوتگ۔

جارکش بیبگر بلوچ ءَ گوشتگ کہ راجی آجوئیءِ سِلاہ بندیں جنگءَ نمیرانی ءِ گرانکدریں جاہ ءَ سر بوگ ءَ گل بی آر اے مراد بلوچ ءَ ستاشانی ءَ سھریں دروت ندر کنت۔ اے اَھد کن ایں کہ داں راجی آجوئی ءَ زورگیر ءِ بگیری ءَ کربانیانی درچ برجاہ بیت-

ایف سی بلوچستان ءِ دمگاں درکنگ بہ بیت، آئی جی ایف سی بگیری ءَ ارزی نبشتہ کنگ بہ بیت – کھول

نیشنل ڈیموکریٹک پارٹی ءِ بنجاھی جارکش ءَ رسانکدراں وتی شنگ کُرتگیں درشان ءِ تہ ءَ گْوشتگ کہ ھوشاپ ءِ وئیل اولی وئیل نہ اِنت ، ایشی ءَ پیش ھم بلوچستان ءَ چوشیں بازیں وئیلے بیتگ- اے دُرسیں وئیلاں پاکستانی پوج تچکی ءَ ھوار اِنت-

جارکش ءَ گْوشتگ کہ حیات بلوچ، تاج بی بی، کیگد بلوچ ءِ کوش ءِ وئیل بہ بنت یا ھوشاپ ءَ دو بلوچ زھگانی کوش بہ بنت اے درساں چہ پدر اِنت کہ پاکستانی پوج ءَ بلوچستان ءِ تہ ءَ وتی ساڑی بیگ ءِ سْوب شمُشتگ نی بایدیں کہ چہ بلوچستان ءَ ایپ سی زوت درکنگ بہ بیت-

آئی ءَ گْوشتگ کہ یکجاھیں کُشت ءُ کوش ءِ شوندات ءُ پاکستانی پوج ءِ زوراکی ءَ برجاہ دارگے ھاتر ءَ بلوچستان ءِ تہ ءَ ایف سی بے مھار کنگ بیتگ ،پمشکا پوج ابید جیڑگ ءَ بلوچ زھگاں بگر داں مات ءُ کماشاں تیرانی آماچ کنگ ءَ اِنت-

گڈسر ءَ این ڈی پی ءِ جارکش ءَ وتی درشان ءِ تہ ءَ گْوشتگ کہ ھوشاب ءَ ایپ سی ءِ دست ءَ دو زھگانی کوش ءِ بگیری ءَ زھگانی کھول ءَ لاش شال ءَ آورتگ ءُ زھرشانی کنگ ءَ اَنت- آھانی کھول ءِ نیمگ ءَ ھر وڑیں لوٹ ءِ ایرکنگ بیتگ ما آھانی پلہ مرزی ءَ کنین ءُ کھول ءَ ھک دیگ ءَ این ڈی پی ھرکجا گوں آیاں ھمکوپگی ءَ اوشت ایت-

ھوشاپ وئیل ءَ شھید بوتگیں زھگانی کھول ءِ نیمگ ءَ ایر کنگ بوتگیں لوٹ –

1- ایف سی لس مھلوک ءِ گس، اسکول، پارک، مسیت ءُ بازاراں چہ در کنگ بہ بیت -2: لس مھلوک ءِ نزیک گواراں ایف سی ءِ درسیں پانگس ءُ بنجل ھلاس کنگ بہ بنت ءُ آھانی جاہ ءَ لیوز ءُ پولیس آرگ بہ بیت 3: شھید تاج بی بی ءُ شھدائے ھوشاب ءِ کوش ءِ ارزی آئی جی ایف سی ساؤتھ بگیری ءَ نبشتہ کنگ بہ بیت -4:شھید تاج بی بی ءُ شھدائے ھوشاپ ءِ کھول مردماں بیھار دیگ بند کنگ بہ بیت ءُ پھریزگ بہ بنت – 5:ڈی سی کیچ راستی چیر دیگ ءُ کتکارانی پھریزگ ءِ جرم ءَ ماٹو کنگ بہ بیت 6- شھدائے ھوشاپ ءِ کھول زورانسری درپہ دری ءَ رکینگ بہ بیت ءُ جند ءں میتگ ءَ نندگ ءِ اجازت دیگ بہ بیت7- اے درسیں زوراکیانی بگیری ءَ مزن آمیدگس ءَ اسپیشل ٹریبیونل ءِ جوڑ کنگ بہ بیت ءُ ھمائی ءَ چہ سرجمی ءَ پٹ ءُ پول کنگ بہ بیت –

شھدائے ھوشاپ کھول ءِ نیمگ ءَ لوٹانی ھواری ءَ آھاں پیسر ءَ چہ بوتگیں زوراکیانی درگت ءَ ھم گوشتگ کہ اے اولی رند نہ انت کہ آھانی کھول ءِ سر ءَ زوراکی کنگ بوتگ بلکیں چد ءُ پیش ھم سال دوھزار ءُ چاردہ ءَ مئی ماہ ءَ آھانی گِسانی سر ءَ جنگی بالی گراباں تیر گواری کتگ، کماش ءِ دو نماسگ شھید کتگ، مال ءُ مڈی لٹ ءُ پُل کنگ بوتگ انت ءُ آ چہ میتگ ءَدر پہ در کتگ انت –

ھمے وڑ بیست ءُ یک دسمبر سال دوھزار ءُ بیست ءَ آھانی میتگ ءِ سر ءَ جنگی بالی گراباں تیرگواری کتگ ءُ چریشی ءَ کماش ءِ ورنائیں زھگے ءَ ھوار پنچ سیاد شھید کنگ بوتگ اَنت –
بیست ءُ یک ستمبر سال دوھزار بیست ءُ یک ءَ آسکانی بازار آپسر ءَ ایف سی ءَ تیر گواری کتگ ءُ آھانی کھول ءِ زالبول تاج بی بی شھید کتگ – ءُ پد ءَ انو اے وئیل کہ دہ اکتوبر دوھزار بیست ءُ یک ءَ دیم ءَ اتکگ کہ پاکستانی پوج ءَ ماٹر گولہ آس داتگ ءُ کماش ءِ دگہ دو نماسگ شھید کتگ ءُ یکے ٹپی انت – آھاں گوشتگ کہ بلوچ ءِ جندے سرڈگارے سر ءَ اے زلم زوراکی تیزی ءِ گوم ءَ برجاہ انت ءُ اشی تہ ءَ فرنٹیرکور بزاں ایف سی بلوچستان تچکی ءَ ھوار انت پمیشکہ نوں اے زلم زوراکی درچ ھلاس کنگ بہ بیت –

بلوچستان ءِ بنجاھی شھر شال ءَ ھوشاپ ءَ پوج ءِ دست ءَ کُشگ بیتگیں زھگانی لاشانی ھواری ءَ گورنر ھاؤس ءِ دیم ءَ مزنیں کچے ءَ زھرشانی نندانک برجاہ اِنت –

زھرشانی نندانک ءَ سیاسی گل، نودربر گل ءُ دگہ پھناتاں بندوکیں مردم ھوار اَنت – آیانی گوشگ اِنت کہ مار انساپ بہ رس ایت ءُ اے کُشگ بیتگیں زھگانی کوش ءِ درگت ءَ پَٹ ءُ پول کنگ بہ بیت اِنت –

گوستگیں دو روچاں بلوچشتان ءِ دمگ کیچ ءِ بنجابی شھر تربت ءَ شھید فدا چوک ءَ زھرشانی نندانک ءَ انساپ ءِ نہ رسگ ءِ نہ سر ءَ کھول ءَ لاش چِست کرتگ ءُ گوستگین روچ ءَ دیم پہ شال ءَ جنز اِتگ اَنت –

راہ ءَ بازیں جیڑھاں ابید ھم کھول گوں لاشاں مروچی بلوچستان ءِ بنجاھی شھر شال ءَ سر بیتگ –

شال ءِ سر بیگ ءَ بلوچستان شھدربر جاہ ءِ نودربراں ھوار بلوچ یکجھتی کمیٹی شال ءِ رھشوناں ھردوکین زھگانی لاشانی وش اتک مزنیں ھسابے ءَ کرتگ –

اے وھد ءَ زھرشانی نندانک برجاہ اِنت ءُ بازیں ھسابے ءَ سیاسی ءُ چاگردی گل نندانک جاہ ءَ جاڑیگ اَنت ءُ سرکار ءِ ھلاپ ءَ اوگام جنگ ءَ اَنت –

گوستگیں روچ ءَ دراتکگیں لاش راہ ءَ بازیں جیڑہ ءُ جنجالاں پد ھم شال ءَ سر بیتگ اَنت ھوشاپ ءِ ھند ءَ ایف سی ءِ چیک پوسٹ ءَ بازیں اداراں دارگ ءَ ابید ھم مروچی سوبمندی ءَ شال ءَ سر بیتگ اَنت ءُ تنی وھدی سرکاری نمائندگ زھرشانی جاہ ءَ سر نہ بیتگ اَنت –

کھول ءِ گوشگ اِنت کہ داں ھما وھد ءَ مارا کسے انساپ ءِ دلجمی ءَ نہ دنت ما اے لاشانی گون ءَ اے راہ درانی سر ءَ نند اِنت-

زانگ بہ بیت دومی ھپتگ اِنت بلوچستان ءِ دومی وئیل ءِ لاش اَنت بلوچستان ءِ بنجاھی شھر شال ءَ سر بیگ ءَ اَنت ءُ گوستگیں ھپتگ ءَ رامز بلوچ کہ سی ٹی ڈی ءِ تیرگواری ءَ کُشگ بیتگ اَت کہ آئی ءِ لاش کھول ءَ زرتگ ءُ بلوچستان ءِ بنجاھی شھر شال ءَ زھرشانی کنان ءَ سر کرتگ اَت اود ءَ دو روچ ءَ زھرشانی ءَ پد سرکاری واکانی سدکی ءَ لاش کھول ءَ واتر کیچ ءَ بلیدہ ءَ آئی ءِ ھنکین ءَ کل ءُ کسارات کتگ اَت –

بلوچستان ءَ جتائیں وھداں آوار جنگ بوتگیں دو مردم چہ پاکستانی پوج ءِ آزارجاھاں آجو بوتگ اَنت-

دوئیں مردمانی یل بوگ ءِ گپ بیگواھیں مردمانی گل وائس فار بلوچ مسنگ پرسنز ءَ وتی پیسبُک تاک ءَ چہ کتگ –

وائس فار بلوچ مسنگ پرسنز ءِ رِد ءَ 21 نومبر 2017 ءَ بیگواہ کنگ بوتگیں سعید لانگو 16 جولائی 2019 ءَ آبسر تربت ءَ چہ بیگواہ کنگ بوتگیں شے حق ء محمد سلیم آجو بوتگ اَنت-

وائس فار بلوچ مسنگ پرسنز ءِ نیمگ ءَ دیمتر ءَ گوشگ بوتگ کہ آ ما اُمیت کن ایں ھکومت آ دگہ بیگواھیں مردماں یل کنائینگ ءُ زورانسری آوارجنی ءِ جیڑہ ءَ ملکی راہ ءُ راھبندانی سر ءَ ھلاس کنگ ءَ وتی کرد ءَ پیلو کنت-

نبشتانک: راجی زُبان ھم جُھد لوٹ ایت

نبشتہ کار : آئیشہ بلوچ

دی بلوچستان پوسٹ

اے چیز ءَ ما دْراہ سرپد ایں کہ بلوچی مئے وتی شھدیں زُبان اِنت، بلوچی مئے بلوچ سرڈگار ءُ سرجمیں بلوچ راج ءِ پجّار اِنت۔ زُبان راجانی یکجاہ، یکمُشت ءُ تپاکی ءِ بُنھِشت اِنت ءُ زُبان راجدوستی ءِ مستریں لوٹ اِنت انچوشکہ واجہ ناگُمان بلوچ گْوش ایت “داں کہ کَسے زُبان دوست مہ بیت آ راجدوست بیت نہ کنت” اے دْراھیں چیز مئے دیم ءَ اَنت ، بچار کہ بنگالی راج ءِ راجدوستی ھما وھد ءَ بُنگیج بوتگ وھدے کہ آیاں پہ وتی راجی زُبان ءِ پھزگ ءَ زگریں ھون دات اَنت گُڑا چہ ھمے ویلاں پد بنگالی راج ءَ مار اِت کہ ابید چہ راجی آجوئی ءَ دگہ راہ نیست۔ بزاں بے زُبان دوستی ءَ ھچ راجی آجوئی آشوب دیمروئی نہ کنت داں وھدے کہ راج ءِ تہ ءَ وتی جِند ءِ راجی زُبان ءِ وانگ ءُ نبیسّگ ءِ مھر ءُ واھگ مہ بیت ءُ دومی نیمگ ءَ زورگِر مُدام ھمے جُھد کنت کہ گُلام راج وتی راجی زُبان ءَ مہ وان ایت ءُ آیائی ءِ راجی زُبان چہ ھر وڑیں آسراتیاں زبھر بہ بیت تچکیں ھبر ایش انت کہ راج ءِ وڑ ءَ زُبان ھم مُدام زیردست کنگ بیت۔ بِہ گِند ئے مئے بلوچ راج ءِ زُبان ھم زیردست اَنت ما دْراہ مجگی گُلام ایں کہ ما وتی راجی زُباناں وت نہ وانگ ءَ ایں چمیشکا مئے راجی زُبان پُشت ءَ روان اِنت چی ءَ کہ بلوچ راج ھم گجر ءُ پنجابی ءِ گُلام اِنت گُڑا زاناں زورگِریں گُجر ءُ پنجابی کُجا لوٹ ایت کہ بلوچ راج نودربر وتی زُبان ءَ بہ وان اَنت؟-

البت انی مارا جیڑگ لوٹ ایت کہ اے درگت ءَ ، بزاں بلوچ راج ءَ پہ وتی راجی زُبان ءِ دیمروئی ءَ چے کنگ لوٹ ایت کہ دُنیا ءِ دگہ زُبانانی ڈول ءَ بلوچ راج ءِ زُبان ھم مرچیگیں ٹجیٹل زمانگ دیمروئی بہ کنت یا باز نہ لوٹ ایں کمین مئے جِند ءِ زُبان ءِ وانگ ءُ نبیسّگ بلوچ راج ءِ تہ ءَ البار بہ بیت۔ مارا پْروش ءِ آماچ بوگی نہ انت بلکیں مارا پہ وتی راج زُبان دیمروئی ءَ جُھد کنگ لوٹ ایت۔ مارا وتی بلوچ چاگِرد ءِ تہ ءَ راجی زُبان ءِ بارو ءَ یک زرمُشتے آرگ لوٹ ایت۔ ما راج ءِ تہ ءَ ھمے آگاھی بیار ایں کہ ما بلوچ ایں گُڑا باید اِنت ما اول وتی راجی زُبان ءَ وان این ءُ دربر ایں۔ تو پہ راجی زُبان ءِ دیمروئی ءَ یک راجی جُھدکارے بہ ئے کہ ترا راج ءِ تہ ءَ راجی زُبان ءِ بستار ءُ ارزِشت ءِ ودی کنگ ءَ جُھد کنگ لوٹ ایت بلے وتی جِند ءِ راجی زُبان ءِ وانگ ءُ دربرگ ءَ جُھد وَ اِنّا بلکیں ھیل گِرگ لوٹ ایت چے ءَ کہ تو وت بلوچے ئے ءُ بلوچی تئی وتی ماتی ءُ راجی زُبان اِنت۔ ما دْراہ وتی راجی زُبان ءَ وت ونت کن ایں بس پہ بلوچی نبشتہ ھیل گِرگ ءَ مارا راجی زُبان ءِ درونت ھورت چاری ءَ وانگ ءُ پد ءَ وت کسان کسانیں درونت تیار کنگ لوٹ ایت کہ ما نبشتہ ھیل گِر ایں۔

ما وھدیکہ بلوچی دربُرتگ گُڑا دِگہ بلوچ نودربراں وتی راجی زُبان ءَ وانین ایں چے ءَ کہ وت ماں وت وانگ ءُ وانینگ ءَ مئے راجی زُبان دیمروئی کنت۔ آیانی نیمگ ءَ درونتاں راہ بہ دے ایں، آیانی نبشتہ سْیاھگ ءَ راست کنگ ءِ کُمک بہ کن ایں۔ باید اِنت ما مرچیگیں ٹیلی گرام، وٹس ایپ ءُ پیسبُک ءِ وڑیں بلاھیں آسراتیاں پہ وتی راجی زُبان ءِ دیمروئی ءَ کارمرز بہ کن ایں۔ راج ءَ ھمے سرپدی بہ دے ایں کہ پیسبُک ءَ بلوچی دربرجاھی گلاں وت ھوار بَہ ایں ءُ وتی دزگْوھار ءُ سنگتاں ھم انوائیٹ بہ کن ایں گُڑا مئے راجی زُبان دیمروئی کنت۔ بزاں پہ راجی زُبان ءِ دربرگ ءَ جُھد نہ لوٹ ایت بلکیں پہ راج ءِ سرپدی ءُ راجی زُبان ءِ دیمروئی ءَ جُھد لوٹ ایت پمیشکا بیا اِت راجی زُبان ءِ جُھدکار جوڑ بِہ بَہ ایں ءُ راج ءَ پہ راجی زُبان ءِ وانگ ءُ وانینگ سکین بہ دے ایں کہ بلوچی مئے وتی شھدیں زُبان ءُ راجی پجّار اِنت پمیشکا مُدام ما وتی راجی زُبان ءَ وان ایں ءُ نبشتہ بہ کن ایں کہ مئے راجی زُبان دیمروئی بہ کنت۔ وھدے کہ یک راجے وتی راجی زُبان ءَ دوست دار ایت گُڑا آ راج وتی دولت ءُ وتن ءَ ھم دوست دار ایت چے ءَ کہ زُبان دوستی، راجدوستی ءُ وتن دوستی اے دْراہ وت ماں وت ھمگرنچ اَنت۔

بلوچ راج وتواجہ ، بلوچستان آجو بہ بات ءُ راجی زُبان دیمروئی بہ کنات۔ شالا انچوش بِہ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ بنجاھی شھر تربت ءَ گوستگیں روچاں ایف سی ءِ گولہ باری ءَ کُشگ بیتگیں زھگانی لاش کھول ءِ ھمراھی ءَ دیم پہ شال ءَ برگ بیگ ءَ اَنت –

گوستگیں بازیں اداراں ھوشاپ چیک پوسٹ زورانسری دیم پہ شال ءَ روکیں کاروان داشتگ ءُ کھول بیھار داتگ ءُ گشتگ کہ لاشاں کَل ءُ کسارت بہ کن اِت بلے کھول ءُ لاشانی ھواری ءَ ھواریں مردماں بازیں اداراں پد ایف سی ءِ گپ رد کرتگ ءُ دیم پہ شال ءَ در کپتگ اَنت –

گوستگیں شپ ءَ ایف سی ءَ ھردوکیں لاش ھوشاپ ءِ ھند ءَ چیک پوسٹ ءَ داشتگ اَنت ءُ دمگانی دامگی ھال ھم بند کتگ اِت اَنت –

بلوچستان ءِ دمگ کیچ ءِ ھنکین ھوشاپ ءَ گوستگیں روچاں ایف سی ءِ گولہ باری ءَ بیران بیتگیں زھگانی لاش کھول ءَ زرتگ ءُ شھید فدا چوک ءَ نندانک ءُ نشتگ ءُ زھرشانی اش کرتگ ءُ پد ءَ اود ءَ انساپ ءِ نہ رسگ ءَ کھول دیم پہ شال ءَ سر گپتگ کہ اود ءَ گورنر ھاؤس ءُ دگہ مزنیں جاھاں زھرشانی نندانک ءِ جار جنگ بیتگ اَنت –

اے زھرشانی نندانک ءِ پلامرزی بلوچ یکجھتی کمیٹی شال ءَ کرتگ ءُ آئی ءَ وتی یک بیانے ءِ تہ ءَ گشتگ کہ شال ءَ ھردوکیں زھگانی لاشانی سر بیگ ءَ اود ءَ یک شرپے ءَ وش اتک کنگ بنت ءُ ھر گام ءَ اے کھول ءِ گون ءَ یکجھتی کمیٹی اوشتاتگ –

دومی نیمگ ءَ بلوچ پھناتاں لاشانی دارگ ءِ ھلاپ ءَ چاگردی رسانکجاہ ٹوئٹر ءَ کمپیئن برجم دارگ بیتگ کہ بلوچ تکاں #FCStoppedBalochDeadBodies ھیش ٹیگ کارمرد کنگ بیتگ –