TBP Balochi

سی ٹی ڈی ءَ یک رندے پد ءَ پیسر ءَ دزگیر ءُ بیگواھیں مردم کُشتگ اَنت ءُ آ دیم پہ دیمی جنگ ءِ نام داتگ اَنت، دمگی مردمانی رد ءَ گوستگیں روچاں بلوچستان ءِ بنجاھی شھر شال ءَ سی ٹی ڈی ءِ دروگیں دیم پہ دیمی جنگ ءَ کُشگ بیتگیں مردم پیسر ءَ آوار جنی ءَ پد بیگواہ کنگ بیتگ اَنت –

سی ٹی ڈی ءَ ٹاہ داتگ اَت کہ دی ٹی ڈی ءُ ناشرکارانی میان ءَ تیرگواری ءَ پنچ مردم کُشگ بیتگ اَنت، بلے واکداراں کُشتگیں مردمانی نام پدر نہ کرتگ اَنت –

دی بلوچستان پوسٹ ءَ پَٹ ءُ پول ءَ پد یک مردمے ءِ پجار کنگ ءَ سوبمند بیتگ کہ آئی ءِ پجار بلوچستان ءِ دمگ ھاران ءِ ورنا قدرت اللہ ء مھمد وارس ملازئی ءِ نام ءَ زانگ بیتگ –

قدرت اللہ سَے ماہ ءَ پیسر سیکورٹی فورسز ءَ ھاران ءَ آئی ءِ لوگ ءِ سر ءَ بیڑ برتگ ءُ آوار جتگ ءُ بیگواہ کرتگ اَت کہ دو روچ پیسر سی ٹی ڈی ءَ دروگیں جنگ ءِ نام ءَ کُشتگ –

زانگ بہ بیت اے اولی وئیل نہ اِنت کہ بوگ ءَ اِنت چریشی ءَ پیسر سی ٹی ڈی ءَ دزگیر کرتگیں مردمانی کوشانی دزمانجن اِنت –

ھمے سال ءِ ھژدہ جنوری ءَ بلوچستان ءِ بنجاھی شھر شال ءِ رودراتکی شھدگ ءِ سر ءَ پاکستانی پوج ایگل اسکواڈ ءَ پٹ ءُ پول ءِ وھد ءَ دو ورناہ سمیع اللہ پرکانی ءُ جمیل اھمد پرکانی دزگیر کنگ ءَ پد سی ٹی ڈی ءِ دست ءَ داتگ اَنت ایگل فورس ءَ ٹاہ داتگ اَت گپتگیں مردمانی گور ءَ دزبمب دز کپتگ –

ھردوکیں ورنا پد ءَ سی ٹی ڈی ءَ مستونگ ءَ دگہ سَے مردمانی ھمراھی ءَ کہ پیسر ءَ دزگیر کنگ بیتگ اَنت ءُ دروگیں جنگ ءِ نام ءَ کُشتگ ءُ چگل داتگ اَنت –

اگست سال دوھزار ءُ بیست ءَ ھم ھمے وڑیں وئیلے درپیش بیتگ اَت کہ راجن پور ءَ پیش اتکگ اَت اود ءَ پولیس ءَ پنچ مردم جنگ ءِ نام ءَ کُشگ ءِ ٹاہ داتگ اِت اَنت ءُ پد ءَ بلوچ سیاسی تکاں بندوکیں پاٹیاں پولیس ءِ ٹاہ رد کرتگ اَت –

گوستگیں ماہ جون ءَ سی ٹی ڈی ءَ ٹاہ داتگ اَت کہ لشکر کشی ءِ وھد ءَ فورسز ءُ سلاہ بندیں مردمانی میان ءَ تیرگواری بیتگ چریشی ءَ چار مردم کُشگ بیتگ اَنت ءُ بیڑی ءِ وھد ءَ شش مردم تتکگ ءُ شتگ اَنت –

جارکش ءَ دیمتر ءَ گوشتگ اَت کہ ناشرکارانی کارمرزی ءَ کمپاؤنڈ ءِ تہ ءَ بازیں کَچے ءَ سلاہ دزکپتگ اَنت – سی ٹی ڈی ءَ اے ٹاہ داتگ اَت سلاہ بندیں گل ءِ باسک چہ یک ماھے ءَ پوج ءِ سر ءَ اُرشاں ھوار بیتگ اَنت –

دومی نیمگ ءَ دی بلوچستان پوسٹ ءَ پَٹ ءُ پول کرتگ ءُ راستگیں ھالانی پکاہ کنگ ءَ پد یک مردمے ءِ پجار کنگ ءَ سوبمند بیتگ اَت – کہ پیسر ءَ سالاں بندیگیں مردمے بیتگ اَت آ دگہ سَے مردمانی ریش ءُ میداں زانگ بیتگ اَت اے مردم پیسر ءَ دزگیر ءُ بندیگیں مردم اَنت –

دمگی مردمانی ٹی بی پی ءَ گوں گپ کنان ءَ گوشتگ کہ کُشگ بیتگیں مردمانی تہ ءَ ملا مادو مزارانی مری ھوار اِنت کہ آ دو سال ءَ پیسر شال ءَ جتک اسٹاپ ءَ لوگ ءِ تہ ءَ پاکستانی پوج ءُ چیریں ادارھاں آوار جتگ ءُ بیگواہ کرتگ –

نبشتانک: جولس فیوچک ءُ حمید بلوچ

نبشتہ کار : جاوید بلوچ

دی بلوچستان پوسٹ

جولس فیوچک 23 فروری 1903 پیراگ ءَ ودی بوتگ آئی ءِ پت پولاد ءِ کارجاه ءَ پوریاگِرے بوتگ فیوچک شانزده سال ءِ اُمر ءَ پوریاگِر زُرمبِشت ءَ بَهر زوریت آئی ءَ پیراگ ءِ مزن شاهدربرجاه ءَ چہ لبزانک ءُ ساز ءُ زیمل ءِ بابت ءَ ونتگ هردیں کہ جرمنی ءِ زوراکیں هِٹلر چیکوسلواکیہ ءِ سر ءَ کبزه کنت گڑا آیانی جند ءِ گُلزمین ءَ آیانی واست ءَ جَهنم جوڑ کنت چیک راج ءِ سر ءَ زُلم ءُ زوراکی کنت اود ءِ مردمانی ننگ ءُ ناموس ءُ اِزت ءِ پادمالی کنت هَمُک نیمگ ءَ تُرس ءُ بیمّ بیت گڑا چیکوسلواکیہ ءِ  مردمانی جذبگ ءُ نپرت نوکیں پُسّگ ودی کنگ ءَ ات اِنچو پیراگ بے توار اَت اے مَرگ ءِ بے تواری نہ ات غصہ ءِ بیرے ات –

همے نپرت ءُ جذبگاں فیوچک ءِ رنگیں هستی ءُ نڈریں مردمے نازیّانی زوراکیانی بَگِیری ءَ توار چِست کنگ ءِ هِمّت ، هاٹیگ ءُ بودناکی دات هردیں کہ آئی ءَ نازی سپاهی دیست انت گڑا آئی مُشت بند بوت انت جان ءِ رَگّ تِرنْگ گِپت انت ءُ آئی ءِ دیم ءِ سر ءَ نپرت ءِ مزن مزنیں لکیر گندگ اَتک آئی ءَ نازی هکومت بیهار دات ءُ آئی ءِ هِلاپ ءَ جْوانیں رنگے ءَ کار کرت گڑا چرے سوب ءَ فیوچک دزگیر کنگ بوت آ یکّ سال ءُ چار ماه جیل کنگ بوت مرگ یَکوئی آئی ءِ چمّانی دیم ءَ ناچ کنگ ءَ ات آ هَمُک روچ ءَ گْڈی روچ ، هَمُک شپ ءَ گُڈّی شَپ فَهمگ اِت ءُ گْوازینت همے جیڑگ ءُ یاتانی تہ ءَ ات کہ نازی آں 25 اگست 1943 ءَ پہ دائمی واست ءَ فیوچک بے توار کرت اِیردَستیں راجانی بامرد جوڑ کرت فیوچک وتی کتاب هما کہ بندی جاه ءِ تہ ءَ Notes from the Gallows نبشتہ کرتگ ، آ گْوش ایت هردیں کہ من ءَ سیاه ءُ تهاریں بندی جاه ءِ تہ ءَ آرت اش گڑا اچ من چہ جُست گرگ بوت کہ زندگی چون اِنت من گْوشت من نہ زان اوں بلے اِش کرتگ باند ءَ من ءَ پاهو دیگ بیت پد ءَ آئی ءَ جُست کرت تو نہ ترس ئے؟ ترا ترس مارشت نہ بیت؟ پد ءَ فیوچک گْوش ایت من لیکهی دِرچ ءَ مَرگ ءِ واست ءَ تیار اوں-

یک پولیس ءِ سپاهی ءَ اچ من چہ جُست کرت چے کلوه وتی مردماناں دیگ لوٹ ئے—؟؟
گڑا فیوچک هَبکّہ بیت کہ اِے مردک اچ من همدردی کنگ ءَ انت ءُ ایشی ءِ وردی ءَ چہ درستیں چیک راج ءِ هون ءِ بو آیگ ءَ اِنت ایشی ءِ بوٹاں چہ هزارانی کساس ءَ چیک راج  لگت مال کنگ بوتگ آ وردی ءَ مئے ماس ءُ گھارانی ازت تار تار کرتگ آ ودری ءَ مئے آجوئی پچ گپتگ همے ودری ءِ تہ ءَ انسان دوستی ءِ دست منی دست ءَ دیگ بوگ ءَ انت آئی نام کونسکی ات آ چیک راج ءِ مردکے اَت- من راجی درد مار اِتگ وتی نوکری ءِ پرواه کنگ ءَابید فیوچک ءِ کمک کرت رند ءَ آئی ءَ را نوکری ءَ چہ کشگ بوت –

فیوچک وتی کلوه ءِ تہ ءَ گْوش اِیت زندگی ءَ چہ بے  کساس مهر ءُ محبت بوتگ مهر ءُ زندگی ءِ زیبائی ءَ من ءَ جنگ ءِ واست ءَ پِڑا دیم داتگ انساناں من ءَ شما چہ مِهر بوتگ من آ وهد ءَ باز گل ءُ شات باں هردیں کہ شما منی رند گیری ءَ کن اِت زالم ءِ هلاپ ءَ هکّ ءِ گپّ ءَ کن اِت وتی ماس ءُ پس ءَ را گْوش ایت من پہ وشی ءُ شاتمانی ءِ واست ءَ زندگ اوں وشی ءُ شاتمانی ءِ واست ءَ جان دیگ ءَ اوں همے واست ءَ منی کبر ءِ سر ءَ گَم ءِ بُت ءَ مہ جن ات ءُ منی گوم ءَ نا انصافی مہ کن ات بلے اے راستی یے فیوچک مریت هم مروچی زندگ انت همے وڑ ءَ فیوچک ءِ رنگ ءَ حمید بلوچ ءُ آئی مردمانی سر ءَ جنرل ضیاء ءِ وهد ءَ جند ءِ گلزمین ءَ پہ آیانی واست ءَ جهنم جوڑ کن انت، بلوچستان ءِ تہ ءَ زلم ءُجبر ءِ بازار ءَ گرم کن انت گلزمین زهگ حمید بلوچ گوں زانت ءُ سرپدی ءَ آشوب ءِ  دَگّ ءَ گچین کنت زَالمِیں هُکمران ءِ هلاپ ءَ گَھگِیری کنت بلوچ ورنایاں زوراکیانی هلاپ ءَ توار چست کنگ ءِ واست ءَ تیار کنت-

جهد کنت همے گوش ایت مدام زلم ءِ آماچ بوتگیں مردمانی کُمکّ ءَ بِہ کَن اِت ءُ زُورَاک ءِ زُورَاکیانی دیم ءَ بوشت اِت، هردیں کہ جنرل ضیاء بلوچ ورنایاں مسقط ءِ فوج ءَ بهرتی کنگ ءِ جهد کنت گڑا حمید ءَ سک باز درد بیت همے گوش ایت یک ایردستیں راجے ءَ را دُهمِی لَگتمالیں راجے ءِ واست ءَ کارمرز کنگ اے اِستانی پندل انت ایش را بے سوب بہ کن ات آئی ءِ سر ءَ باز رند ءَ تیرگواری کنگ بیت آئی ءِ کوشگ ءِ باز رند ءَ جهد کنگ بیت پد ءَ رند ءَ حمید بلوچ پاهو دیگ بیت بلے گڈی وهد ءَ تاں ثابت قدم بیت ءُ مریت هم زندگ انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

1966 ءَ پد اولی رند اِنت انگلینڈ ءَ مزنیں جاھے ءَ وت ءَ سر کرتگ ءُ آئی ءَ باج بران کرتگ ءُ وت ءَ سیمی پائنل ءَ وت ءَ سر کرتگ –

یورو کپ سیمی پائینل ءِ دومی گوازی ءَ انگلینڈ ءَ ڈینمارک ءِ دیم ءَ دو گول ءَ باج برتگ ءُ وت ءَ پائینل ءَ سر کُتگ –

یوئیفا یورو کپ فٹبال گوازی برجاہ انت دوشی شپ ءَ سیمی پائینل ءِ دومی گوازی ڈینمارک ءُ انگلینڈ ءِ میان ءَ بوتگ – دوشیگیں گوازی ءَ ڈینمارک ءِ نیمگ ءَ یک گولے اسکور کنگ بوتگ وھدیکہ انگلینڈ ءِ نیمگ ءَ دو گول اسکور کنگ بوتگ – ڈینمارک ءِ نیمگ ءَ ڈینمارک ءِ لیبی میکل ءَ یک گول ءِ داتگ وھدیکہ انگلینڈ ءِ لیبیاں جوانی ءَ گوازی کنان ءَ انگلینڈ ءِ لیبی سیمن ءُ ھیری ءَ یک یک گولے اسکور کتگ باج برتگ ءُ وت ءَ پائینل ءَ سر کتگ –

زانگ بہ بیت یوئیفا یورو کپ ءَ بیست ءُ چار ٹیماں بھر زرتگ ءُ بیست ءُ چار ٹیمانی تہ ءَ اٹلی ءُ انگلینڈ ءِ لیبیاں جوانی ءَ گوازی کنان ءَ وت ءَ پائینل ءَ سرکتگ – انگلینڈ ءُ اٹلی ءِ میان ءَ پائینل گوازی یانزدہ جولائی ءَ یکشمبے ءِ روچ ءَ ویمبلے پٹ ءَ بوگ ءَ انت –

ھستیں وھد ءِ سرکار مشرف ءِ دور ءِ رندپدانی رندگیری ءَ کنگ ءَ اِنت -ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ءُ ھزار سَے سد ءُ شست ءُ ھشت روچ سرجم بوتگ – چہ مستونگ ءَ سیاسی ءُ چاگردی باسک عبدالستار بلوچ، زبیر بلوچ ءُ دگراں بنجل ءِ تر ءُ تاب کرتگ ءُ بیگواھیں مردمانی کھولانی گوم ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان کتگ ءُ گوشتگ کہ بلوچستان ءَ زلم ءُ زوراکی لٹ ءُ کُٹ لُٹ ءُ پُل ءُ ایردستی ءِ بگیری ءَ بلوچ راج ءَ توار چست کتگ ءُ پُرایمنیں جھد ءِ بندات کرتگ، بندات ءَ کمے بلوچ ھوار بوتگ ءُ وی بی ایم پی ءَ پُرایمنیں جُھد ءِ بنھشت ایرکتگ –

آئی ءِ گوشگ اَت کہ زورگیر ءَ لٹ ءُ کٹ، زلم ءُ زوراکی ءِ تہ ءَ گیشی آورتگ ءُ ھزارانی کچ ءَ بلوچ شھید کنگ بوتگ انت ءُ ھزارانی کچ ءَ مردم ریاستی زوراکی ءُ زنداناں ازیت سگگ انت –

ماما قدیر بلوچ ءِ گوشگ ات کہ بلوچستان ءِ تہ ءَ زیادتی ھنچو گیش بوتگ کہ سرکار ءِ جندے گلانی لھتے باسک زورانسری آوارجنی کُشت ءُ کوش ءَ ایرجنگ ءَ انت – بلوچ راج ءَ درساں چہ مستریں ھترہ چہ ریاستی اجنسیانی نیمگ ءَ انت کہ زورانسری اوار جن انت ءُ کُش انت –

آئی ءِ گوشگ ات کہ ھستیں وھد ءِ سرکار ءَ مشرف دور ءِ رندپدانی رندگیری ءَ کنگ ءَ اِنت اگاں تاکت ءِ زور ءَ راج ءِ واھشت ایرموش کنگ بوتیناں گڑا اے دنیا ءِ سر ءَ ھمائی ءِ راج بوتگ ات کہ کہ آئی ءَ درساں پیش وت ءَ یک سلاہ بندیں ٹولی ءِ وڑ ءَ مھکم کرتگ ات-

جھانی نادراھی کرونا نادراھی ءِ نوکیں درچ ءَ بازیں ڈیھ وتی لپاش ءَ زرتگ اَنت ءُ بازیں ڈیھاں جنجالانی دیمپانی اِنت –

ھمے وڑ ءَ کرونا نادراھی ءَ بلوچستان ءَ بیست ءُ چار ادارانی تہ ءَ دو مردم بیران بیتگ اَنت ءُ یک سد ءُ شش نوکیں کیس رپورٹ بیتگ اَنت –

بلوچستان ءَ سرجمیں بیرانیانی کچ سَے سد ءُ ھبدہ ءَ سر بیتگ اَنت ءُ گوستگیں بیست ءُ چار ادارانی تہ ءَ دو کس بیران بیتگ اَنت –

جانسلامتی ءِ نیمگ ءَ شنگ بیتگیں رپورٹ ءِ رد ءَ اُستان ءَ ھبدہ جولائی ءَ کرونا ءِ نادراھی ءَ دگہ دو مردم بیران بیتگ اَنت بیران بیتگیں مردمانی کچ سَے سد ءُ ھبدہ ءَ سر بیتگ اَنت –

جانسلامتی ءِ نیمگ ءَ شنگ بیتگیں رپورٹ ءِ رد ءَ بیست ءُ چار ادارانی تہ ءَ یک سد ءُ شش نوکیں مردماں کرونا نادراھی پدر بیتگ اَنت –

جانسلامتی ءِ رد ءَ بیست ءُ چار ادارانی تہ ءَ کرونا وائرس ءِ شنگ بیگ یازدہ ٹِک شانزدہ بیتگ ءُ رپورٹ ءِ رد ءَ گوستگیں روچ ءَ نُھ سد ءُ پنجاہ مردمانی ٹیسٹ کنگ بیتگ اَنت ءَ یک سد ءُ شش مردماں کرونا نادراھی پدر بیتگ اَنت –

نبشتانک: شھید ءِ وتن ناکو شریپ

نبشتہ کار: الی شیر بلوچ

دی بلوچستان پوسٹ

چونا بلوچ سر ڈگارے ما کبز ءَ گیری ءَ بہ چاریں ھر بلوچ ءِ پرز بیت کہ وتی وس ءَ وتی سر ڈگارے رکینگ ءِ ھاترا کربانی بداں وتی بگیری ءِ ھلاپ ء جھد بہ کنت اے تھنا یک بلوچے ءِ پرز نہ اِنت کَل بلوچانی پرز,انت ھرکس اے بگیری ءِ ھلاپ ءَ جھد بکنت جنگ بہ کنت وتی سرڈگارے ھک ءَ اد ءَ بکنت ھمے وڑا بازیں بلوچے روچ ء مروچی گوں دژمن ءَ پہ سرڈگارے آجوئی ءِ ھاترا جنگ کنان ءُ وتی سرانی دیمونی ءَ دیگ ءَ انت چاہے کجام مکتبے شکل بہ بیت ماسٹر ڈاکٹر شوانگ دوکاندار ءُ نودربر ءُ دانشور مروچی وتی جنانان کربان کنگ ءَ انت شھید ناکو شریپ ھمے مکتبے پگرانی رد ءَ ھوار انت شھید ناکو شریپ دوھزار 2009 ءَ یک برے ماں پا پوریاگری ءَ پہ لاپ گژنءِ ھاترا ماں ( دبئ بزاں عمارت ءَ رؤت آ ھمود ءَ ,چیزے وھد پہ پوریاگری ءَ باگے ءَ کارا بیت بلے اے وھد ءَ بلوچستان ءِ تہ ءَ بلوچ آجوئی زرمبش گیش چہ گیش,بوان ات ھر بلوچے ءِ دل ءَ زرمبش ءِ آچ پتاھان ات ھرکسی دل ءَ یک جزبگے ودی بوان ات ھرکس ءَ گوشت کہ من اے زرمبش ءَ پشت مہ کپاں شھید ناکو ھم ھمے ورنایانی جزبگ ءُ پگرانی تہ ءَ ھوار ناکو ءَ ھم سر ڈگارے روکیں گلامی ءِ آچ برداشت نہ کت آ اوں ( دبئ عمارت ءَ ھمے سال ءَ مھتل نہ بوت پد ءَ واتر وتی سرڈگار ءَ اتک آ گڑا دو ھزار ءَ 2009 ءَ بلوچ مزاحمتی گل بی آر اے جوائن کرت آ ھمود ءَ گوں خلوص ءُ ایمانداری ءَ وتی جھد ءَ بندات کنت ناکو یک ایماندار ءُ دل پھکیں جھدکار ءِ بیت شپ روچ پہ کوم ءُ سر زمین ءِ واستہ جھد کنت آ پہ کوم ءُ گل ءِ واستا ھچ وڑا کارے ءِ واستا چک ءُ پد نہ بیت آ ھمے وڑا گل ءِ کسانیں نیٹ ورکے ءِ زمہ دار جوڑ کنگ بیت زمہ دار جوڑ بوگ ءَ پد ناکو گیشتر مھکم ءُ ایمانداریں جھدکارے جوڑ بیت چہ ناکو ءِ ایمانداری ءُ دلیری ءُ مکلسی ءَ بازیں ورنایے ھم ناکو ءِ ھمراہ داری ءَ پہ بلوچ ءِ بگیری ءِ ھلاپ ءَ ناکو ءِ سرپ ءَ اوشتیت گوں ناکو گوں ورنایانی جزبگ ءَ دوھزار ءُ چاردہ ءَ گڑا بلوچ ءِ جھد یک جوانیں رنگے ءَ دیم ءَ بارت ءُ 2014 ءَ یک اوتاکے ءِ بزان کیمپ کمان ءِ زمہ داری دیگ بیت اَنت ءُ ناکو داں آ روچاں بگر داں روچ ء مروچی ھما جھد کار ات ھما وڑ مھکم ءُ مزبوت ات ناکو ءِ پگر ءُمارشت چو کوہ ءِ البرز ءُ سیاجی ءُ دڑامب ءَ برزتر ءُ مزن ات ناکو اے نگیگیں ساھتاں تُشے ھم بدل نہ بوتگ ات ناکو ءَ داں گڈی ءَ شھادت ءِ امبر ءَ وتی راجی دوستی ءُ ایمانداری نہ شموشتگ ات بلوچ راج دپتر داں ھست انت شھید ناکو شریپ ءِ کربانیانی کرد ءُ آسر مان انت ناکو وتن یک دیوانگ ءُ مولانگیں انسانے ات پمیشکا ناکو ءَ وتی سر ءُ جان پہ سرڈگارے آجوئی ندر کت انت سھریں دروت شھید ناکوشریپ ءُ راج ءِ کُلیں شھیداں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ کلات ءِ کُچگی دمگ پندران کش ءَ سُھرک ءِ نادراھی تالان بوتگ ءُ ورنایے ءُ دگہ چار زھگ سھرک ءِ نادراھی ءَ بیران بوتگ اَنت ءُ دگہ بازینے نادراھی ءِ آماچ انت –

دمگی مردمانی رِد ءَ سُھرک ءِ نادراھی ءَ بیست ءُ پنچ سالی ئیں ورنا جُمّا خان ء جان محمد ءَ ھوار دگہ چار زھگ بیران بوتگ اَنت – بیران بوتگیں زھگانی اُمر یک ءُ نیم سال ءُ سَے سال اِنت –

ھمے گوشگ بوگ ءَ انت سُھرک ءِ نادراھی تالان بوگ ءَ دگہ بازیں کَسے بیھوش بوتگ ءُ نادراھی ءِ آماچ اِنت – نادراھی ءَ آماچ بوتگیں مردم زھری نادراہ جاہ ءَ برگ بوتگ انت –

دمگی مردماں کلات ءِ ڈپٹی کمشنر ، ڈی ایچ او ءُ دگہ سرکاری مردماں چہ کمکی ٹیم ءِ دیم دیگ ءُ سھرک ءِ نادراھی ءَ آماچ بوتگیں مردمانی جاندراھی ءِ لوٹ کُتگ تانکہ دگہ گیشتر مردم چہ زند ءَ زبھر مہ بنت –

نبشتانک: نازو بچکندگانی یک دَریگے اَت

نبشتہ کار: میرین بلوچ

دی بلوچستان پوسٹ

26 سوچکان ءِ گرماگی روچ اتاں من وتی کُڈُک ءَ وپتگ اتاں اناگت ءَ گوانک ءِ توار منی گوشاں کپت کہ دو موتر سائیکل توپکّی ھمے اوتاک ءِ دیم ءَ پیداک انت من توپکّ زُرت ءُ دیم پہ موتر سائیکلاں رھادگ بوت انت ءُ کمیں ساھت ئے ءَ پد موتری منی گور ءَ سر بیت انت ءُ پد ءَ گُمان کُت اے سنگتاں بلے من دُرست نکُت انت من وش اتک ئے ءَ پد ما دیم پہ اوتاک ءَ روان بیت انت بلے ھمے سنگتانی تہ ءَ یک انچیں مھروانیں سنگت ئِے گوں ات کہ آئی ءِ توسیپ کنگ ءِ واستا منی گور ءَ چُشیں لبز نیست کہ سنگت ئِے توسیپ ءُ ستا ءَ بکناں بلے من اے سنگت ءَ چہ نا آشنا اتاں ءُ نام ھم نزانت بلے ساھتے ءَ پد ھمے سنگت منی گور ءَ اتک ءُ وش دیوانی ءَ لگیت ءُ من ءَ ھچ گمان ءُ لیکہ نیستگ ات کہ اے سنگت گومن چُش یکدم نزدیک بیت بِلّے انچُش گُش اَنت کہ جھدکار ستر دور ءُ گستا بہ بیت بلے آئی ءِ سوچ ءُ پگر مدام یکجاہ ءُ ھور انت ءُ سنگتاں آ سنگت اکیل جان اُرپ ءِ آزاد ات بلے ما مدام نازو ءِ نام ءَ توار کُت نازو یک پگری سنگت ئِے ات تاں لیڈر شپ ءَ بگر تاں جھلی تبکّاں گوں نند ءُ نیاد ات ءُ نازو بچکندگانی یک دریگ ءِ ات کجام کہ اوتاک ءَ آئی ءِ سر کپت گُڑا آ اوتاک مزاک ءُ کندگ ءُ ٹھکاں گوں اوتاک ءِ سر ءَ زُرتگ اَت ءُ تاں من ءَ یاد بیت کہ ما یک روچ ءِ نازو ءِ دیوان ءَ نشتگ اتاں نازو ءَ درائینت کہ ما یک روچ ءِ واجُل ءِ دیوان ءَ نندوک اتاں ءُ واجل ءَ درائینت کہ شُما اے سکاں گند ءِ من اے ھورتیں سکاں دست دِل ءَ کناں ءُ پد ءَ ھمے سکاں سکانی تہ ءَ دور اش دیان شُما اے سکاں درگیج کُت کن ئے؟ پد گڑا ما پسّو داتگ، نا واجل گُڑا واجل ءَ درائینتگ مئے آوکیں جنگ یک روچ ءِ کیت کہ دژمن نزانت کہ سرمچار کَے انت ءُ عام مردم ۔

نازو ترا بیت کہ تو منی مھبت گُلی ءِ سر ءَ چونیں چونیں مزاک کُتگ ات ئِے بلے من کدی دل ءَ نکُرتگ ات ءُ تنیگا ھم دل ءَ نکناں چیاکہ تو منی گُلی ءِ بوہ ءَ کن ئے ءُ منی ھاک ءِ بوہ ءَ کن ئے ءُ وھدے من ترا گنداں گڑا من وتی شوھاز ءَ درکپاں ترا جگر من چوں گُشت کنان چیاکہ تو منی وشی ءُ گمان گوں شریدار ءِ منی مرگ ءِ گڈی ساہ ءَ گومن ھور ءُ ھوار اَت ءُ گُلی ءَ چہ تو ارزش ترے ءُ دومی ءِ گور ءَ سنگتاں، نازو سکیں لاجواب ءُ سرمچنڈیں سنگتے ات ءُ ھر سنگت ءَ گوں ھور ءُ تور ات ءُ مدام راجی کاراں گوں گلائیش ات برے کولواہ ءُ برے کیلکور ءُ مشکے ءُ برے گچک ءَ وتی کاراں گوں دست گٹ ات-

من ءَ نازو ءِ دُرستیں شئے ءَ چہ آئی ءِ کندگ من ءَ سک دوست ات انت چیاکہ آ بچکندگانی یک دریگے ات ءُ من مدام ھمے پھر بست کہ تو کدی جنگجاہ ءَ چہ پُشت کنزگ ءِ نام ءَ نگرے چیاکہ تو مدام دژمن ءَ پُشت کنزگ ءَ لاچار ءُ بے بس کُتگ ات ءُ تو مزن بند ءُ سائجی ءَ بگر تاں کولواہ ءُ کندھار ءِ ٹُلیں ھسارانی در ءُ دریگاں تئی پَد دراہ بیتگ انت ءُ تنیگتا تئی پد ھست انت ءُ تئی سوچ ءُ پگر تنیگت ءَ مئے دلانی تہ ءَ زندگ انت چیاکہ ترا گوں سرزمین اشک بوتگ ءُ سرزمین ءِ آشک کدی ھم نمر انت چیاکہ آ مدام ھست ءُ نمیران انت بس ھمد ءَ من وتی نبشتانک ءَ آسر کنان ءُ تئی بچکند ھروھد ءُ سھت ءُ دمان گیر کاینت اے درچک ءُ دار سُر اَنت تئی بچکندانی ترانگاں گیج اَنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یورو کپ سیمی پائینل ءِ اولی گوازی ءَ اٹلی ءَ پیلانٹی شوٹ ءَ باج برتگ ءُ کوپہ امریکہ سیمی پائینل ءَ برازیل ءَ باج بُرتگ ءُ وت ءَ پائینل ءَ سر کتگ –

یوئیفا یورو کپ فٹبال گوازی برجاہ انت دوشی شپ سیمی پائینل ءِ اولی گوازی اٹلی ءُ اسپین ءِ میان ءَ بوتگ –
دوشیگیں گوازی ءَ اٹلی ءُ اسپین یک یک گول ءَ دیمیگ بوتگ انت وھدیکہ پیلانٹی شوٹ ءَ اٹلی ءَ چار گول اسکور کُتگ باج برتگ وت ءَ پائینل سر کتگ –

یورو کپ ءِ سیمی پائینل ءِ دومی گوازی انگلینڈ ءُ ڈینمارک ءِ میان ءَ ویمبلے پٹ ءَ بوگ ءَ انت –

دومی نیمگ ءَ کوپا امریکہ ءِ سیمی پائینل ءِ اولی گوازی برازیل ءُ پیرو ءِ میان ءَ بوتگ – پیرو ءِ نیمگ ءَ چہ ھچ گول اسکور کنگ نبوتگ وھدیکہ برازیل ءِ لیبی لوکاس ءَ یک گول ءِ اسکور کتگ باج برتگ وت ءَ پائینل ءَ سر کتگ –

کوپا امریکہ ءِ سیمی پائینل ءِ دومی گوازی ارجنٹینا کولمبیا ءِ میان ءَ بوتگ – کولمبیا ءَ باج برتگ گوازی وتی نام ءَ کتگ – کوپا امریکہ دیمے گوازی پیرو ءُ کولمبیا ءِ میان ءَ بوگی اِنت –

ازمکار ءِ آفیشل ٹوئٹر اکاؤنٹ ءَ آئی ءِ کھول ءِ نیمگ ءَ کرتگیں ٹوئٹ ءَ دلیپ کمار ءِ بیرانی ءِ ھال شنگ کرتگ –

ھندوستانی ھالرساج اے این آئی ءِ رد ءَ ممبئی ءَ پی ڈء ھندو جا ھسپتال ءَ ازمکار الاج کنوکیں پلمو نولوجسٹ ڈاکٹر جلیل پارکر ءَ ھم دلیپ کمار ءِ بیرانی ءِ ھال راست کرتگ –

دلیپ کمار یازہ ستمبر نوزدہ سد ءُ بیست ءُ دو ءَ پشاور ءَ خداداد ءَ ودی بیتگ آئی ءِ راستیں نام مھمد یوسف خان بیتگ –

آ وتی کھول ءِ ھمراھی ءَ نوزدہ سد ءُ سِی ءُ پنچ ءَ ھندوستان ءِ بھری ءَ پیسر ممبئی (ھما وھد ءِ بمبئی) ءُ شتگ، ازمکارانی ءِ پڑا آیگ ءَ پیسر دلیپ کمار ءَ پُلانی باپاری کرتگ –

آئی ءَ نوزدہ سد ءُ شست ءُ شش ءَ ازمکار سائرہ بانو ءِ گون ءَ آروس کرتگ –

دلیپ کمار ءَ تامرکاری ءَ بے کساس ءَ تامر جوڑ کرتگ اَنت، کہ آیانی تہ ءَ جوار بھاٹا، انداز، دیوداس، سوداگر، امر، اڑن کھٹولہ، سنگ دل ءُ مغل شھنشاہ جذبات آئی ءَ اے تامرانی تہ ءَ جوانیں ازمکاری کرتگ اَنت دلیپ کمار ءِ گڈی تامر قلعہ بیتگ کہ نوزدسد ءُ نود ءُ ھشت ءَ شنگ بیتگ –

دلیپ کمار ءَ وتی جوانیِ ازمکاری ءِ ھنر ءَ جوانیں داد گپتگ اَنت کہ آیانی تہ ءَ دادا صاحب پھالکے ءُ پدم ءُ بھوشن ھوار اَنت –

دلیپ کمار ءِ بیرانی ءَ ازماارانی نیمگ ءَ ھوار دنیا ءِ پدردی بوگ ءَ اَنت ءُ آئی ءِ ستاشانی ءَ کنگ ءَ اَنت –