TBP Balochi

بلوچستان لبریشن فرنٹ ءِ سروک ڈاکٹر اللہ نزر بلوچ ءَ چاگردی رسانکجاہ ٹوئٹر ءَ شنگ کرتگیں یک ٹویٹے ءِ تہ ءَ سر وزیر پاکستان ءِ پسو داتگ ءُ گوشتگ کہ بلوچ راج پاکستان ءِ گون ءَ ھچ گپ ءُ تران نہ کنت –

بلوچ رھشون ڈاکٹر اللہ نزر بلوچ ءَ گوشتگ کہ بلوچ راج ھر کجام چوشیں گپاں رد کنت ءُ بلوچ چوشیں گپانی واستا جاڑیگ نہ اِنت –

آئی ءَ گوشتگ کہ اگاں پاکستان پُر ایمنی ءِ گپ ءُ تران ءَ پہ وت ءَ واھگ دارگ اِنت گڑا آ وتی لشکر ءَ بلوچستان ءِ تہ ءَ بہ کش ایت ءُ بروت بلوچ راج ءِ لوٹ ھمیش اِنت ءُ اشی ءَ ابید دگہ ھچ لوٹ نہ داریت –

آئی ءَ گوشتگ کہ بلوچ راج ابید ءِ آجوئی ءَ دگہ ھچ گپ ءُ ترانانی سر ءَ پاکستان ءَ گوں گپ نہ کنت ءُ چوشیں گپاں رد کنت –

زانگ بہ بیت ڈاکٹر اللہ نزر بلوچ ءَ اے گپ ھما وھد ءَ درشان کرتگ کہ گوستگیں دوشمبے ءَ سر وزیر پاکستان عمران خان ءَ گوادر ءِ تر ءُ تاب ءَ گوشتگ کہ دل ھمے جیڑگ ءَ اِنت کہ بلوچ جنگولاں گپ ءُ تران بہ کن آں –

سربوتگیں ھالانی رِد ءَ بلوچستان ءِ جتا جتائیں دمگاں تیرگواری ءُ دگہ وئیلاں زالبولے ءَ ھوار چار مردم بیران بیتگ اَنت ءُ شش ٹپی بوتگ انت –

گیشیں ھالانی رِد ءَ گوستگیں روچ ءَ کراچی ءَ ٹیل ءِ ٹینکی ءِ گیس پر بوگ ءِ سوب ءَ ترکتگ ء یک مردمے بیران ءُ دو ٹپی بوتگ اَنت –

بیران بوتگیں مردم ءِ پجار بی این ایم ءِ نمیرانیں رھشون لالا منیر ءِ برازتک زوھیب ء محمد گل ءِ نام ءَ بوتگ – وئیل ھما وھد ءَ بوتگ کہ زوھیب وتی ٹیل ٹینکی ءِ کش ءَ اوشتاتگ بوتگ کہ ویلڈنگ ءِ میان ءَ گیس پُربوگ ءِ سبب ءَ ترکتگ چریشی ءَ زوھیب بیران ءُ دگہ دو مردم ٹپی بوتگ انت –

ھمے وڑ کوھلو ءَ دگ ءِ وئیلے ءَ پنچ مردم ٹپی بوتگ اَنت –

وئیل لاسہ زئی ءَ دیم ءَ اتکگ کہ آغا خان کنسٹریکشن کمپنی ءِ گاڑی ءِ چپی بوگ ءَ پنچ مردم ٹپی بوتگ انت – کہ آھانی تہ ءَ یکے ءِ جاور نگیگ انت – ٹپی بوتگیں مردم نادراھجاہ ءَ سر کنگ بوتگ –

دگہ وئیلء ھزدار ءَ دیم ءَ اتکگ کہ کوچ ءَ پرپٹ ءِ ڈیکر کتگ چریشی ءَ پرپٹ سوار بیران بوتگ – وئیل زیروپوئنٹ ءَ دیم ءَ اتکگ چہ ھزدار ءَ سند ءَ رؤکیں سدا بھار کوچ ءَ پرپٹ ءِ ڈیکر کتگ ڈیکر کنگ ءِ سبب ءَ رسول بکش ءِ محمد بکش زھری نامیں مردمے بیران بوتگ، پولیس ءَ کوچ گپتگ-

کوھلو ءَ تیر گواری ءِ وئیل ءَ یک مردمے زدگ بوتگ – ھالانی رِد ءَ اوریانی ءَ مھندانی ٹک ءِ دو ٹولیانی میان ءَ زمینی جیڑہ ءِ سر ءَ جنگ ءُ چوپ بوتگ تیرگواری ءَ یک مردمے ٹپی بوتگ –

دومی نیمگ ءَ واشک ءَ ھور ءُ ھاراں زالبولے ءَ ھوار دو مردم بیران بوتگ انت ءُ بازیں لوگ ءُ جاہ ھار ءَ بُرتگ اَنت –

گوستگیں شپ ءَ واشک ءَ ھور ھاراں تباھی کتگ، واشک ءِ دمگ دراپ ءَ زالبولے ءَ ھوار دو مردم آپ ءَ بُرتگ ءُ بیران بوتگ انت –
ڈپٹی کمشنر ءِ رِد ءَ واشک، ٹاں پلنتانک ءُ گریشہ دمگ ءِ مھلوک آپ ءِ تہ ءَ انت بازیں لوگ ءُ جاہ آپ ءَ پُروشتگ اَنت – مھلوک ءَ بازیں جانی ءُ مالی تاوان ءِ رس اتگ –

سر بیتگیں ھالانی رد ءَ روکپتی بلوچستان ءَ کرونا نادراھی گیش بیان اِنت ءُ تنی وھدی بازیں کچے ءَ ھمے نادراھی ءَ مرگ ءِ آماچ بیتگ اَنت –

گوستگیں روچ ءَ داں مروچیگ ءَ کرونا نادراھی ءَ سیستان و بلوچستان ءَ بیست مردم بیران بیتگ اَنت ءُ پانزدہ سد ءُ دَہ نوکیں کیس رپورٹ کنگ بیتگ اَنت –

سیستان و بلوچستان ءَ کرونا نادراھی ءِ سبب ءَ لس کار ءُ باری مھلوک ءَ ھوار شھری جنجالانی دیمپان اَنت ءُ نادراہ جاھاں آسراتی ءِ نہ بوگ ءِ بروبری ءَ اِنت –

کرونا نادراھی ءِ بارو ءَ اُستان ءِ راجمان پتر ءِ باسک ءُ ایرانشھر ءِ نمائندگ عبدالناصر درخشان ءَ راجمان پتر ءَ تران کنان ءَ گوشتگ کہ سیستان و بلوچستان ءِ جاھاں اے مزنیں نادراھی ءِ گر ءُ دار ءَ ھچ آسراتی نیست اَنت –

آئی ءِ گوشگ اِنت کہ اے دردناکیں گپے کہ وتی ھمساھگیں اُستان ءِ ھچ کمک بیگ ءَ نہ اِنت اد ءَ ناں شریں اکسیجن ھست نانکہ ونٹیلیٹر ھست –

آئی ءِ گوشگ اِنت کہ سیستان و بلوچستان ءَ نادراہ بس تھتانی سر ءَ وپتگ ءُ ھنچیں نادراہ ھست اَنت آ ھمے پَر پروکی ءَ جنان ءُ مرگ ءَ اَنت –

سر بیتگیں ھالانی رد ءَ بلوچستان ءِ دو جتا جتائیں جاھاں دگ ءِ وئیلاں زالبولے ءَ ھوار سَے مردم بیران بیتگ اَنت ءُ ھبدہ زدگ بیتگ اَنت –

وئیل بلوچستان ءِ بنجاھی شھر شال ءُ بیلہ ءَ پیش اتکگ اَنت کہ اود ءَ بیتگیں وئیلاں سَے مردم بیران بیتگ اَنت ءُ ھبدہ زدگ بیتگ اَنت –

گیشیں ھالانی رد ءَ بلوچستان ءِ بنجاھی شھر چہ شال ءَ دیم پہ دکی ءَ رؤکیں ویگن گاڑی وچ ونی ءِ ھند ءَ وئیل ءِ آماچ بیتگ ءُ چریشی ءَ زالبولے ءَ ھوار سَے مردم بیران بیتگ اَنت ءُ چاردہ زدگ بیتگ اَنت –

ھالانی تہ ءَ گوشگ بیتگ کہ مروچی نیمروچ ءِ وھد ءَ شال ءَ دیم پہ دکی ءَ رؤکیں ویگب وچ ونی ءِ ھند ءَ وئیل ءِ آماچ بیتگ کہ ویگن پٹڑی ءِ چیر ءَ لگوشتگ ءُ کپتگ ءُ چریشی ءَ زالبولے ءَ ھوار سَے مردم بیران ءُ چاردہ زدگ بیتگ اَنت ءُ اشانی تہ ءَ ھپت کسانی جاور نگیگ گوشگ بیتگ اَنت –

زدگ بیتگیں مردم سنجاوی ءِ نادراہ جاہ ءَ برگ بیتگ اَنت ءُ اود ءَ بنداتی درمان ءَ پد شال ءَ برگ بیتگ اَنت –

دومی وئیل بلوچستان ءِ دمگ بیلہ ءَ پیش اتکگ کہ اود ءَ بنجاھی شھدگ ءِ سر ءَ دارو پُھل ءِ نزیک ءَ ویگو گاڑی ءُ مزدہ ٹرکے ءَ ٹکر وارتگ چریشی ءَ سَے مردم زدگ بیتگ اَنت –

دمگی مردمانی رد ءَ زدگ بیتگیں مردمانی تہ ءَ ایکسئن بی اینڈار آواران ھم ھوار اِنت ءُ زدگ بیتگیں مردم بیلہ نادراہ جاہ ءَ برگ بیتگ اَنت –

بلوچستان ءِ دمگ کیچ ءَ سر بیتگیں ھالانی رد ءَ مکران ءَ ایران ءِ نیمگ ءَ آؤکیں بجلی بند کنگ بیتگ اَنت –

بجلیانی بند بوگ ءِ سبب ءَ مکران ءِ بازیں جاہ تھارُکی ءَ کپتگ اَنت ءُ مھلوک بازیں جنجالانی آماچ اَنت-

تربت، گوادر، پنجگور ءَ ھوار مکران ءِ بازیں ھنداں بجلی نیست ءُ تھارُکی ءَ کپتگ اَنت ءُ مکران ءِ سرکاری ءُ نجی ھسپتالاں نادراہ جنجالانی دیمپان اَنت –

کیسکور مکران ءِ رد ءَ بجلی کدی پچ کنگ بنت اے اے درگت ءَ آئی ءِ گور ءَ ھچ سرپدی نہ بیتگ –

ھالانی تہ ءَ گوشگ بیتگ کہ ناگتی ایران ءِ واکداراں سیمسری ھنف جیکی گور ءِ گریڈ اسٹیشن بند کرتگ ءُ چریشی ءَ سرجمیں مکران ءَ بجلی شتگ اَنت ءُ مھلوک کوراسی ءَ نشتگ اَنت –

گوستگیں روچاں پاکستان ءِ سر وزیر عمران خان ءَ گوادر ءَ تران کنان ءَ گُشتگ کہ ما جیڑگ ءَ ایں کہ بلوچ جنگولاں ھم گپ ءُ تران دانکہ پد ءَ آ انڈیا ءِ دست ءَ ناشرکاری ءَ کارمرز مہ بنت۔ زانتکارانی رد ءَ اولی رند نہ بیت کہ پاکستانی سرکار ءَ بلوچ جنگولاں گوں گپ کنگ ءِ ٹاہ داتگ بلے مدامی گپ بے سوب بیتگ اَنت۔

بلوچستان ءِ تہ ءَ جنزوکیں پنچمی جنگ ءِ تہ ءَ اولی گپ ءُ تران (مزاکرات) نواب اکبر خان بگٹی ءَ گوں کنگ بیتگ اَت کہ آئی ءِ آسر ڈیرہ بگٹی ءَ بمباری ءُ پد ءَ نواب اکبر خان ءِ شھادت ءِ دروشم ءَ دیم ءَ اتکگ اَت۔

مشرف ءِ روگ ءَ پیپلز پارٹی ءِ سرکار ءَ (عام معافی) ءِ جار جنگ ءَ پد مزاکرات ءُ گپ ءُ تران کنگ ءِ ٹاہ داتگ اَت بلے پیپلز پارٹی ءِ سرکار ءِ تہ ءَ ھم ھزارانی کساس ءَ بلوچ بیگواہ ءُ شھید کنگ بیت اَنت۔ چریشانی تہ ءَ یکے چہ مستریں وئیلاں غلام مھمد بلوچ، لالا منیر بلوچ ءُ شیر مھمد بلوچ ءِ بیگواھی ءَ پد کوش ءِ وئیل اَت۔

ھمے پئیم ءَ نواز شریف ءِ سرکار ءَ نیشنل پارٹی ءِ سروک ڈاکٹر مالک ءَ ھم یک گپ ءُ ترانے بندات کنگ ءِ جھد کُتگ اَت اے گپ ءُ تران ءِ تہ ءَ ڈاکٹر مالک ءِ آیانی اھوال گوں براھمدگ بگٹی ءَ بیتگ اَت ءُ آئی ءِ لوٹ ھم انچیں بیتگ اَنت کہ ارزانی ءَ منگ بیتگ اِت اَنت، بلے انگاگتی بنجاھی سرکار ءُ پوج ءِ نیمگ ءَ گپ ءُ تران ءِ یکشلی دارگ بیتگ ءُ ھچ پئیمیں دیمروئی نہ بوت۔ انی یک رندے یک پاکستانی سروزیرے ءَ گوادر ءَ اوشتاتگ ءُ مزاکرات ءِ گپ جتگ۔

عمران خان ءِ گپانی سر ءَ ھیال درشان کنان ءَ بلوچستان ءِ نامی ئیں اھوالکار انور ساجدی ءَ گوں اردو نیوز ءَ وتی ھیال درشان کنان ءَ گُشتگ کہ عمران خان ءَ سرکار ءَ آیگ ءَ رند اولی بر اِنت کہ گوں بلوچ جنگولاں گپ کنگ ءِ واھگ پیش داشتگ۔ چہ سرکار ءَ آیگ ءَ پیسر ھم آئی ءَ بلوچستان ءُ فاٹا ءِ جیڑھانی گیش ءُ گیوار کنگ ءِ گپ کُتگ اَنت بلے آئی ءَ داں انگت فاٹا ءَ ھم گپ تران کنگ ءِ جھد بندات نہ کُتگ۔

انور ساجدی ءِ گُشگ اَت کہ “بوت کنت اے سرکار اوگانستان ءِ ھراب بیوکیں جاوراں گندگ ءَ پد گمان کنگ ءَ اَنت کہ بلوچستان ءَ ھم جاورانی نگیگیانی تہ ءَ گیشی اتک کنت۔ گپ کنگ ءُ راہ کَشگ ءِ نوکتریں جھد بیت کُت کن اَنت بلے منی ھیال ءَ اِشی ءِ آسر ھچ در نئیت۔”آئی ءِ رد ءَ گپ ترانانی سوبمندی ءِ گمانی پمیشکا ھم نیست چیا کہ کوھانی تہ ءَ نشتگیں سلاہ بندیں مردم درانڈیھی بلوچ رھشونانی سانمندی ءَ نہ اَنت۔”

“کوھاں نشتگیں بلوچ گُش انت کہ بلوچستان ءِ جیڑہ فنڈ اگاں دیمروئی ءِ نہ اِنت بلکیں راجی پجار ءُ ننگیگ اِنت وھدیکہ سرکار اے درگت ءَ گپ نہ کنت۔ اے جیڑہ اے وھد ءَ پمیشکا ھم گیوار بیت نہ کنت پرچہ ھردوئیں نیمگاں ترندی ءَ گوں وتی گپانی سر ءَ اوشتوک اَنت۔ داں وھدیکہ راستیں جیڑہ چارگ مہ بیت، اے تھنا بے سوبیں جھد بنت۔”

تیرتیج ءَ سی پیک دگ ءِ سر ءَ کارکنوکیں ایف ڈبلیو او ءُ پاکستانی پوجی پانگس ءِ سر ءَ بوتگیں اُرشانی زمّہ واری ءَ منّ اِیں – میجر گوھرام

سربوتگیں ھالانی رِد ءَ گوستگیں دوشمبے ءِ روچ ءَ ناشناسیں سلاہ بندیں مردماں آواران ءِ دمگ تیرتیج ءَ سی پیک دگ ءِ سر ءَ کارکنوکیں ایف ڈبلیو او ءِ کارمندانی سر ءَ اُرش کُتگ ءُ ھمے وھد ءَ سلاہ بندیں مردماں تیر تیج جک ءَ برجاھیں پاکستانی پوج ءِ پانگس ءِ سر ءَ ھم اُرش کُتگ – اُرش ءَ پاکستانی پوج ءَ جانی ءُ مالی تاوان ءِ دیمپانی بوتگ – اُرشکار دراھگ ءُ رؤگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرشانی زمّہ واری منّ اِتگ گوشتگ کہ مئے سرمچاراں دوشمبے ءِ بیگاہ ءِ ادار ھپت ءَ آواران ءِ دمگ تیرتیج ءَ سی پیک دگ ءِ سر ءَ کارکنوکیں پوجی بندساچی کمپنی ایف ڈبلیو او ءِ کارمندانی سر ءَ اُرش کتگ ءُ ھمے وھد ءَ سرمچاراں تیرتیج جک ءَ برجاھیں پوجی پانگس ءِ سر ءَ راکٹ ءُ ٹوھیں سلاھانی گوم ءَ ھم اُرش کتگ – آئی ءَ گوشتگ کہ اُرش ءِ آسر ءَ پاکستانی پوج جانی ءُ مالی تاوان ءِ دیمپانی بوتگ-

جارکش ءَ دیمتر ءَ گوشتگ کہ سی پیک شوربندیانی ءَ دمگ ءَ زورگیریں پاکستانی پوج دگ ءُ دگہ بندساچی آنی راہ ءَ آؤکیں دراھیں آبادی ءُ کِشت ءُ کشاری زمیناں زور دستیگ کنگ ءَ اِنت- آئی ءَ درشان ءِ تہ ءَ دمگی ٹھیکیدار مکن کتگ ءُ گوشتگ اَنت کہ آ ایف ڈبلیو او ءِ ھواری ئیں ٹھیکہ زورگ ءَ بند بہ کن اَنت ءُ ریاستی شوربندیاں چہ دور بہ بنت اگاں ناں وتی تاوان ءِ زمہ وار وت بہ انت-

نبشتانک: لھتیں ٹیکی پَش کپتگ اَت

نبشتہ کار: مھم جان گُل

دی بلوچستان پوسٹ

چہ باتن ءَ ھرچ دردے ءَ نال اِت ءُ ھیسکار جت ، من مان نیارت ءُ ترا گِیراں بست چماں  چو نِھنگ ءَ ھار کُت ءُ من بُکّ وارت ءُ دَراتک آں ، چی ءَ کہ تئی مُدّتے ءِ ودار ءَ اِشتاپ اِت آں تئی کلوہ ءِ باپُشت ءَ من ٹپّاناں واد چنڈّ اِت ءُ گوں ھوناں ءَ شُشت اَنت ، دل گوں ھزار جیڑگاں دُچار اَت، بلے  پاداں انگت وتی سپر نہ داشت ءُ تراولاں سکینے رُودینتگ اَت۔ تئی گیرّاں انچو  پیڑاتگ اَت ، منی زِرد ءُ جبین تئی ودار ءَ انچو بے کرار کہ دل ءَ نہ مَنّ اِت کہ چہ سپر ءَ پُشت بِہ دے آں۔

من جُنزاں جنزان ءَ وتی سپر ءِ نْیام ءَ اَتک ءُ سر بیت آں ، گُڑا تئی ھبرے من ءَ گیر اَتک کہ زند چکّاسے ءُ  اِد ءَ ھرکس وت ءَ ءُ دومی ءَ چکّاس اِیت۔  دُرست چکاس ءَ پہ باج برگ ءَ دیم ءَ جُنزان کن اَنت ، من ھم یکروچے ترا چکّاساں گوں دُچار کناں باریں تو باج برے یا وھد ءِ لُوٹ! گُڑا پد ءَ  من جیڑاں کہ وھد ءِ ھمراھداری ءَ بِہ کن آںیا تئی۔

گُڑا من وتی باتن ءِ مردُم شُھاز اِت ءُ پاد داشتاں جُست کُت کہ اے پسّواں بِہ دے آں ، آئی ءَ سارتیں گینّسارتے کَشاِت ءُ گْوشت، تو اتک نہ کن ئے اے تھار ماھیں شپاں کہ رُژن نیست رُوکیں کندیلاں داں چینچُک ءَ من تئی دست ءَ بِہ گراں ءُ دیمتِر ءَ کَشان بِہ کناں ءُ بِہ براں، من گوں ترا سھت ءُ دمان گون نہ بَہ آں ، اگاں ترا اے سپر ءَ جُنزگی اِنت گُڑا تھنائی ءَ وتی کُوپگاں لَڈّ ءُ دَر بِہ کپ،  پرچا کہ باندا ترا منی ھاجت مہ بیت ، اے سپر ءَ ترا بازیں آدمی رسترانی دیمپان بُوَگی اِنت ، گُڑا ترا تُرسگی نہ اِنت، ترا آدمی رسترانی دیم ءَ چو کوہ ءَ مِکّ بُوَگی اِنت۔

آئی ءِ ھمے ھبر منی باتن ءَ سھت ءُ دمان چو شِل سریں تیرے ءَ ھیر بُکّان اَت ءُ پسّو ءِ وداریگ اَت، بلے منی باتن ءَ اِنچو ھاٹیگ ءُ توکل مان نیست اَت کہ پسّواں بِہ دے آں، پرچا کہ آئی ءِ وش آتک ءَ من ءَ پسّوانی زِر ءَ بُکّ دَیگ ءَ نیشت ءُ منی اُوشتیں پاد چو جنگولے ءَ بال گیپتاں ءُ پہ ھمائی ءِ ڈس ءُ نشان ءَ رھادگ بیت آں ، گُڑا منی پادانی ھوناں کِشک بُران کُت ، نُکّ ءَ تُکّاں گُلاٹان ءُ من وت ءَ ساکِم کُت، بلے دل ءَ کَے داشت کنت کہ وھدے ودارانی کرار دمتُوس بِہ بیت، چَم وتی رُژن ءَ تالان بِہ کنت ءُ کس مہ گِند اِیت بس لھتیں ٹیکّیاں پمّن پش کپتگ اَنت ، یک منگلیکے ءِ پُرشتگیں دو ٹُکر ءُ یک چُلمبے کہ ھاکانی تہ ءَ کپتگ ءُ گُشانے  کہ ڈنگراں مان پُوش اتگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ پنجگور ءِ دمگ گرمکان ءَ ناشناسیں سلاہ بندیں مردماں یک مردمے آوار جتگ ءُ گوں وت برتگ ءُ یکے تیرانی آماچ کتگ ءُ ٹپی کتگ –

دمگی پولیس ءِ رِد ءَ ناشناسیں گاڑی سواراں اُسامہ ءُ آئی ءِ ھمراہ میر عالم گاڑی ءِ سوار بوگ ءَ گوشتگ انت اُسامہ گاڑی ءَ سوار بوتگ وھدیکہ آئی ءِ ھمراہ عالم تتکگ سلاہ بنداں تیرآماچ کتگ ءُ ٹپی کتگ، اسامہ گوں وت برتگ –

ھردو مردم گرمکان ءِ جھمنند انت سلاہ بندانی درگت ءَ دنیگت ءَ ھچ وڑیں سرپدی نہ رس اتگ کہ چونیں بوتگ انت ءُ کجام سوب ءَ اے مردم آوار جنگ بوتگ انت –

پنجگور ءَ ھوار کیچ ءَ ھم سلاہ بندیں مردمانی دستاں مردم آوار جنگ بیگواہ کنگ بیتگ اَنت کہ آیانی ھال رسانکدر شنگ بیتگ اَنت –

ھمے وڑ ءَ گوستگیں شپ ءَ کیچ ءِ بنجاھی شھر تربت دشتی بازار ءَ سلاہ بندیں پرپٹ سوارانی تیرگواری ءَ ملا نوید زدگ بیتگ –

دمگی مردمانی رد ءَ ملا موید النوید سروس اسٹیشن ءِ واھند اِنت ھما آئی ءِ سر ءَ تیرگواری کنگ بیتگ کہ آ وتی لوگ ءَ روگ ءَ بیتگ کہ ناشناسیں سلاہ بندیں مردماں دشتی بازار ءَ تیرگواری کرتگ ءُ زدگ کرتگ ءُ آ ناگیگیں جاوراں نادراہ جاہ ءَ برگ بیتگ –

سر وزیر پاکستان عمران خان دوشمبے ءِ روچ ءَ بلوچستان ءں تیابدپی شھر گوادر ءِ تر ءُ تاب ءَ یک روچے ءِ واستا سر بیتگ –

دمگی مردمانی رد ءَ سر وزیر پاکستان تر ءُ تاب ءِ وھد ءَ سی پیک پروجکٹ ءَ ھواریں بازیں منسوبھانی بنھشت ءَ ایر کتگ اَنت کہ آیانی تہ ءَ یکے شھر ءَ آپ ءِ پجارینگ ھوار اِنت –

دی بلوچستان پتر ھال ءَ سر بیتگیں ھالانی رد ءَ سر وزیر پاکستان گوادر ءِ تر ءُ تاب ءِ وھد ءَ شھری لوگانی تہ ءَ بند کنگ بیتگ اَنت ءُ دریا ورد زر ءِ نہ روگ ءَ کڈن کنگ بیتگ اَنت ءُ چریشی ءَ دریا ورداں ھم بازیں جیڑھانی دیمپانی کنگ کپتگ –

گوستگیں روچ ءَ پاکستان ءِ میری ٹائم سیکورٹی ایجنسی فشریز ءِ انتزامیہ ءَ ھال داتگ کہ سر وزیر پاکستان گوادر ءِ تر ءُ تاب ءَ اِنت دریا ورد زر ءِ روگ ءَ پھریز بہ کن اِت –

دو شمبے ءِ سھب ءَ بہ گر داں شپ ءَ دریا ورد وتی لوگاں ڈن در نیتکگ اَنت –

اللہ بخش یک دمگی دریا وردے کہ آئی ءَ گوشتگ کہ ھردیں ما زر ءَ شتگیں گڑا مئے لوگانی چُل ءِ آس روک بیتگ وھدیکہ شھر ءَ یک مزنیں مردمے آیگی بیت اِنت گڑا آ شپ ءَ مئے زھگ شد ءُ لاپ وپس اَنت –

اے کسہ اللہ بخش ءِ وڑیں ھزاراں دریا وردانی کسہ اَنت –

سر وزیر عمران ءَ مروچی وتی تر ءُ تاب ءَ گوادر ءَ زر ءِ آپ ءِ وش کنگ ءَ یک پلانٹے ءِ بنھشت ایر کرتگ، بلے اود ءِ مردن ڈی سیلینیشن پلانٹ ءِ بیگ ءَ واھگدار نہ اَنت پرچاکہ گوست ءَ ھم ھمے رنگیں بنھشت ایر کنگ بیتگ اَنت بلے دمگی مردمانی تن ءِ پروشگ ءَ چَٹ بے سوب بیتگ اَنت –

دمگی مردمانی رد ءَ یک ڈی سیلینیشن پلانٹے گوادر ءِ شھر ءَ سِی ءُ پنچ کلو میٹر ءِ دوری ءَ نوکیں بالی پٹ ءِ نزیک ءَ اِنت ءُ یک ارب کلدارے کچ ءَ ھرچ کنگ بیتگ بیست لَک گیلن آپ ھمک روچ ساپ بیگی بیتگ بلے نہ بیتگ –

دو ھزار ءُ دَہ ءَ پد آ لھتے روچانی تہ ءَ چلگ ءِ جھد بیتگ آ بیست لَک ناں بلے دو یا سَے لک گیلن آپ اش ساپ کرتگ ءُ پد ءَ بے سوب بیتگ –

آپ گوادر ءِ بنکی جیڑہ اِنت اے وھد ءَ گوادر، جیونی ءُ پسنی سک تھ آپی ءِ آماچ اَنت دمگی مردم سی پیک ءِ نام ءَ گچینی ءِ مومنٹ، مزنیں ٹاہ ءُ سدکیانی سر ءَ اوستی نہ بیتگ اَنت –

گوادر ءِ تر ءُ تاب ءِ وھد ءَ دمگی نمائندگ، نودربر ءُ باپاری مھلوک ءَ تران کنان ءَ سر وزیر پاکستان ءَ گوشتگ کہ جیڑگ ءَ آں جتائی ءِ لوٹوکیں زرمبشتانی جنزوکیں مردماں گوں گپ ءُ تران بہ کن اں، ھنچیں مردم کہ ھندوستان ءِ وڑیں ڈیھانی مپاداں وتی کارمرد بیگ ءَ اَنت –

سر وزیر ءَ گوشتگ کہ نِی بلوچستان ءَ گچینی دلگوش دیگ بیگ ءَ اِنت، من درستاں گیشتر پیکیج بلوچستان ءَ داتگ، وفاق ءَ ھم ءُ منی ھیال ءِ تہ ءَ دمگی سیاستداناں ھم دلگوش نہ داتگ، ھما زر مہ وفاق ءِ نیمگ ءَ اتکگ اَنت آ درست کارمرد نہ بیتگ اَنت –