TBP Balochi

بلوچستان لبریشن فرنٹ ءِ جارکش میجر گوھرام بلوچءَ رسانکدراں وتی  شنگ کرتگیں درشان ءِ تہ ءَ کولواہ ءَ پاکستانی پوج ءِ گوم ءَ دیم پہ دیمی میڑ ءَشھید بیتگیں سرمچار شھید اسداللہ، شھید آکل، شھید سکی بکش ءُ شھید پرویز دروت ندرکتگ ءُ آھانی ستاشانی کتگ ءُ گْوشتگ کہ آیاں کولواہ ءَ دُژمنیں پوجءِ دیم ءَ گوں جوانمردی ءَ جنگ داتگ ءُ شھید بیتگ اَنت۔

جارکش ءَ گوشتگ کہ نھ اکتوبر ءَ کولواہ ءِ مادگ کور ءَ مئےسرمچار ءُ زورگیریں پاکستانی پوج ءَ ڈیک وارتگ چہ ایشی ءَ دیم پہ دیمی میڑے بندات بیتگ ۔سرمچاراں پاکستانی پوج سک باز تاوان بار کتگ ءُ اے میڑ ءَ بی ایل ایف ءِ چار سرمچار پہ سرڈگار بلوچستان ءِ آجوئی ءَ گوں جوانمردی ءَ جنگ دیان ءَشھید بیتگ انت۔

آئی ءَ گوشتگ کہ شھید اسداللہ پنام میجر باسد جھمنند پسنی دوھزار یانزدہ ءَ گوں بی ایل ایف ءَ بلوچستان ءِ آجوئی ءِ سلاہ بندیں جُھد ءَ پاکستانی زورگری ءِبگیری ءَ وتی کِرد ءَ پیلو کنگ ءَ بیتگ۔آئی چہ جُھد ءَ دزکش بیگ ءَ پاکستانی پوج ءَ پہ لاچار کنگ ءَ آئی برات سابر زورانسری بیگواہ کُرتگ۔وھدیکہ شھید پہایشی ءَ پریشان نہ بوتگ گڑا پاکستانی پوج ءَ نومبر دوھزار شانزدہ ءَ آزارجاہ ءَ آئی ءِ برات سابر شھید کُرتگ ءُ ژانگولیں جون چگل داتگ ءُ پد ءَ دیم پہ دیمیمیڑ ءِ نام داتگ۔ چار مارچ دوھزار شانزدہ ءَ آئی ءِ مات بی بی آمنہ پاکستانی پوج ءِ تیرگْواری ءَ ٹپی بیتگ ءُ میجر باسد وت سَے جنوری دوھزار شانزدہ ءَڈیتھ اسکواڈ ءِ یک اُرشے ءَ ٹپی بیتگ ۔ ھمے وڑ ءَ پاکستانی ریاست ءُ ڈیتھ اسکواڈ ءَ آئی ءِ سَے ناکو لال بکش شانزہ اکتوبر دوھزار شانزدہ، یوسپ بیست ءُیک مارچ دوھزار شانزدہ ءُ بابو یازدہ اگست دوھزار ھژدہ ءَ شھید کُرتگ انت ۔

 جارکش ءَ گوشتگ کہ شھید میجر باسد یک ورنا ءُ سوھویں سرمچارے بیتگ،آ بی ایل ایپ ءِ مکران دمگ ءِ پتر ءِ باسک ءُ میجرے ءِ اُگدہ ءِ سر ءَ بیتگ۔آئی بلوچی زبان ءَ شائری ھم کُرتگ۔ شھید باسد پسنی ءَ ھوار کولواہ ءِ جتائیں جنگی پڑاں دُژمن ءِ بگیری ءَ جنگانی بھر بیتگ ءُ اے دمگاں پہ گل ءِدیمروی ءَ وتی کِردے پیلو کُرتگ انت۔

شھید آکِل ازاب پنام ریاز جھمنند پسنی دوھزار دوازدہ ءَ بی ایل ایپ ءَ بندوک بیتگ۔آ لیفٹیننٹ ءِ اُگدہ ءِ سر ءَ بیتگ ءُ نیٹورک کماندارے بیتگ۔آئیپسنی کلانچ، کولواہ، بالگتر، زامران، گورکوپ،پروم ءُ جتاجتائیں دمگاں جنگی پڑ ءَ وتی کِرد پیلو کرتگ۔ شھید آکِل جان بلوچی زبان ءِ یک جوانیں شائرےھم بیتگ۔ شھید عابد سوالی آئی برات اِنت کہ پاکستانی پوج ءَ  دوھزار سینزدہ ءَ شھید کُرتگ۔ ھمے وڑ ءَ چہ آئی کھول ءَ حبیب، حنیپ ءُ یوسپ پاکستانیلشکر ءَ شھید کُرتگ اَنت۔

لیپٹیننٹ سکی بخش حسین ء محمد حسین پنام مرید سال دوھزار سینزدہ ءَ گوں بی ایل ایپ ءَ بندوک بیتگ۔وتی جنگی سوھوی ءُ مزن پگر ءِ سْوب ءَ آ گلءِ تہ ءَ لیفٹیننٹ ءِ اُگدہ ءِ سر ءَ بیتگ۔آئی آواران، کولواہ، گچک، کیلکور، اورماڑہ ءُ بالگتر ءَ جنگی پڑ ءَ دُژمن ءِ بگیری ءَ وتی کِرد پیلو کُرتگ۔

سرمچار پرویز مھر ء ناگمان پنام ملوک سال دوھزار چاردہ ءَ بی ایل ایپ ءَ ھوار بیتگ۔آ آواران، کولواہ، کیلکور، ءُ اورماڑہ ءَ بازیں جنگاں دُژمن ءِبگیری ءَ وتی جوانمردی ءُ جوھر پیشداشتگ۔

جارکش گوھرام بلوچ ءَ گوشتگ کہ بی ایل ایپ شھیدیں سرمچاراں “ دروت و سلام“ ندر کنت ءُ آیانی راجی لوٹ ءُ واھگاں داں بلوچستان ءِ آجوئی ءَبرجاہ دارگ ءِ کول کنت۔

دَہ اکتوبر دوھزار ءُ بیست ءُ یک ءَ بلوچستان ءِ دمگ کیچ ءِ ھند ھوشاپ پرکوٹگ ءَ پاکستانی پوج ءِ مارٹر گولہ گواری ءَ کُشگ بیتگیں زھگانی لاش مروچی سیمی روچ ءِ بندات بیگ ءَ کھول ءَ لاش زرتگ ءُ دیم پہ شال ءَ نندانک ءِ واستا رھادگ بیتگ اَنت –

کیچ ءِ بنجاھی شھر تربت ءَ شھید فدا چوک ءَ دو روچ ءُ دو شپانی نندگ ءَ انساپ ءِ نہ رسگ ءَ کھول ءَ مروچی لاش زرتگ ءُ دیم پہ شال ءَ گورنر ھاؤس ءُ دگہ سرکاری جھاں زھرشانی نندانک ءِ پیسلہ کرتگ ءُ رھادگ بیتگ اَنت –

کھول ءِ گوشگ اِنت کہ مروچی سیمی روچ ءِ بندات بیگ ءَ ابید ھم سرکاری واک چوشیں نیتکگ اَنت کہ مارا انساپ دات بہ کن اَنت ءُ اشی ءَ ابید سرکاری دمگدار مارا انساپ دات بہ کن اَنت آ کوشکارانی چیر دیگ ءِ جھد ءَ اَنت –

آیانی گوشگ اِنت کہ مئے زھگ ایف سی ءِ مارٹر باری ءَ شھید بیتگ اَنت بلے سرکار ءُ آئی ءِ دمگدار اے گپ ءِ منگ ءَ تیار نہ اَنت –

زانگ بہ بیت گوستگیں روچ ءَ آل پارٹیز کیچ ءِ رھشون شتگ ءُ وئیل جاہ اش چار اِتگ ءُ چریشی ءَ پد آیاں وتی تراناں گشتگ کہ اے وئیل ءَ ایف سی دزمانجن اِنت ءُ باید اسرمندیں کھول انساپ دیگ بہ بیت جرمکار سزا دیگ ءُ دیم ءَ آرگ بہ بنت-

سیاسی پھناتانی نیمگ ءَ اے وئیل ایر جنگ بیگ ءَ اِنت اسرمندیں کھولانی انساپ دیگ ءِ واستا لوٹ کنگ ءَ اَنت –

مروچی کھول ءَ وتی زھگانی لقش زرتگ ءُ دیم پہ شال ءَ رھادگ بیتگ اَنت اود ءَ آیاں گورنر ھاؤس ءُ دگہ مزنیں جاھاں زھرشانی نندانک ءِ جار جتگ اَنت –

آل پارٹیز کیچ ءَ وتی درشانی ءَ آسرمندیں کھولانی کمک ءُ ھر رنگیں جیڑھانی دیمپانی ءَ آیانی گون ءَ ھمکوپگی ءِ جار جتگ –

یونائیٹڈ بلوچ آرمی ءِ جارکش مرید بلوچ ءَ پھمیانیں جاھے ءَ رسانکدراں گوں وتی یک درشانی ءَ گشتگ کہ یازدہ اگست دوھزار ءُ بیست ءُ یک ءَ مئے سرمچاراں کیچ ءِ دمگ تجابان سنگ آباد ءَ ریاستی کارندہ عظیم نشانگ کتگ ءُ کُشتگ –

مرید بلوچ ءَ دیمتر ءَ گُشتگ کہ سردار عظیم سرکاری ءُ دمگی ڈیٹھ اسکواڈ ءِ سروکی ءَ وتی ھند ءَ نیزگار ءُ شوانگ مپت ء ھدا تنگ کرتگ ءُ آیانی زمیب زورانسری گپتگ ءُ آ ترسینگ ءُ کُشگ ءِ بیھارانی آماچ کرتگ ما تاکت ءِ گون ءَ وتی بلوچ مھلوک ءُ نیزگاری مردمانی زمینانی سر ءَ زورگری ءِ ھچبر مکل ءُ دات نہ کن ایں بازیں براں سرپد کنگ ءَ ابید ھم سردار عظیم وتی کارنامھاں پشتکنز نہ بیتگ، گڈی ءَ یازدہ اگست ءَ مئے سرمچاراں سردار عظیم کُشتگ ءُ مروچی آئی ءِ زھگ اکرم ءُ اکرام سلاہ بند اَنت ءُ وتی پت ءِ رندپداں روگ ءَ اَنت آ توپک ءِ زور ءَ نیزگاریں مردمانی ترسینگ ءُ کشگ ءِ بیھاراں دیگ ءَ اَنت مئے گل ءِ نیمگ ءَ آ سرپد کنگ ھم بیتگ اَنت ءُ وتی پت ءِ رندپداں مہ رو اَنت – ما اکرم ءُ آئی ءِ برات اکرام ءَ گڈی بر ءَ بیھار ءَ دیگ ءَ ایں آ وتی توپکاں ایر بہ کن اں لس مردمانی پیم ءَ بہ نند اَنت –

مرید بلوچ ءَ گُشتگ کہ گوستگیں روچ ءَ تربت ءِ دمگ ھوشاپ پرکوٹگ ءَ فرنٹئیر کور ایف سی ءِ کارمنداں تیرگواری کرتگ ءُ دو کسان سالیں زھگ شھید کتگ اَنت، شھید بیتگیں زھگانی کھول ءُ دمگی مردماں سی پیک دگ بند کرتگ ءُ نندانک جتگ ءُ دمگی لھتے میر ءُ ھاکماں ریاست ءِ چیردستی ءَ نندانک ءَ نشتگہں مئے مات ءُ گوھار زاہ ءُ بد کرتگ ءُ نندانک ءِ ھلاس کنگ ءِ بیھار داتگ اَنت –

آئی ءَ گُشتگ ما اے وڑیں زوراکاں بیھار دے کہ چوشیں گاماں بہ دار اَنت –

دو شمبے روچ ءَ دبئی انٹر نیشنل کرکٹ پٹ بوتگیں آئی پی ایل گوازی ءَ کے کے آر ءَ آر سی بی پروش داتگ – آر سی بی ءَ اولسر ءَ گوازی کنان ءَ ھپت وکٹاں یکسدو ءُسِی ءُ ھشت رن جوڈ کرتگ آف اسپینر سنیل نارئن ءَ چار وکٹ گپتگ – کے کے آر ءَ نوزدہ اوور ءَ شش وکٹانی تاوان ءَ ٹارگٹ پروشتگ ءُ کوہلی ٹیم چہ آئی پی ایل ءَ در کتگ – نون اے ٹیم سینزدہ اکتوبر ءَ دومی کوالیفائر کیپٹلس ءِ دیم ءَ گوازی کنت –

کے کے آر ءِ آئی پی ایل دوھزار بیست ءُ یک ءَ جوانیں گوازی پیش داشتگ ءُ آر سی بی ایلیمینیٹر گوازی ءَ چار وکٹاں پروش داتگ – اشی ءِ ھمراھی ءَ وراٹ کوہلی ءِ ٹیم آر سی بی ٹیم ٹورنمنٹ ءَ چہ ڈن بوت – کوہلی ءَ پیسر ءَ جار جتگ ات کہ اے سیزن ءَ پد کپٹنی ءَ یلا دنت بزاں کوہلی ءِ کپٹنی بگیر آئی پی ایل ءِ تران ءَ ھلاس بوت تنی وھدی یک لیبی ءِ ھساب ءَ ھم آئی آئی پی ایل ءِ داد دست نہ گپتگ –

اولسر ءَ کے کے آر ءِ لیبی شبھن گل ءَ بیست ءُ نھ ءُ وینکٹیش ایئر ءَ بیست ءُ شش رناں جوانی ءَ گوازی ءِ بمدات کت ھردوکاں چِل ءُ یک رن ھواری ءَ جوڑ کرت – گل ءَ ھژدہ بالاں چار چوکا جت ءُ ہرشل پٹیل ءَ آؤٹ کت آئی ءَ پد راہل ترپاٹی آھگ ءَ گوں شش ءِ جت بلے لیگ ءِ اسپنر یجویندر ءَ اے چو ارزانی ءَ نہ اشت- ہرشل پٹیل ءَ میچ ءِ یازدھمی اوور ءَ وینکٹیش آؤٹ کت – سَے وکٹانی کپگ ءَ پد سنیل نارئن ءَ پٹ دور کُت دوازدھمی اوور سیمی بال، چارمی ءُ پنچمی بال ءَ پد ماں پد سَے چکا جت ءُ ھمے بہ سمجھ کہ آر سی بی چہ میچ ءَ ڈن کت – اشی ءَ پد اتک نتیش رانا کہ بیست ءُ سَے رن جوڈ کت چہل ءِ دومی شکار بوت – یکسدو ءُ دہ رنانی اسکور ءَ ٹیم ءِ چارمی وکت ھم کپت –

نارئن ءَ بیست ءُ شش رن جوڈ کت ءُ سراج ءِ بال ءَ بولڈ بوت – ٹیم ءَ یکسدو بیست ءُ پنچ رنانی اسکور ءَ پنچمی وکٹ ھم کپت ھژدھمی اوور ءَ سراج ءَ دنیش کارتک ءِ بال ءَ آؤٹ بوت – کے کے آر ءَ گڈی دو اووراں دوازدہ رن جوڈ کنگی ات – نوزدھمی اوور ءَ جارج گارڈن بس پنچ رن دات ءُ گڈی اوور ءَ ھپت رن بچ اِتگ ات شکیب ءَ بیستمی اوور ءِ اولی بال ءَ چوکائے جت دومی بال ءَ رن ءِ زرت مورگن ءَ سیمی ءَ ھم یک رن ءِ زرت شکیب ءَ چارمی بال ءَ یک رن ءِ زرت ءُ وتی ٹیم کٹارینت –

کولکتہ نائٹ رائیڈرز ءَ اول سر ءَ بالنگ کنگے وھد ءَ سنیل نارائن ءَ جوانی بالنگ کت بیست ءُ یک رن دات ءُ چار وکٹ گِپت – آر سی بی بیست بیست اوورانی تہ ءَ ھپت وکٹانی تاوان ءَ یکسدو سِی ءپ ھشت ءِ سر ءَ داشت – بنگلور ءِ کپٹن وراٹ کوہلی ءَ سِی ءُ سَے بالاں پنچ چوکائے کمک ءَ درساں گیشتر سِی ءُ نھ رن جوڈ کرت وراٹ ھشتاد ءُ ھشت اسکور سر ءَ نارائن ءَ بولڈ کت – وراٹ ءَ دیودت پڈیکل ءِ ھمراھی اوپننگ ءَ چِل ءُ نھ رن ھواری ءَ جوڈ کت – پڈیکل ءَ ھژدہ بالاں دو چوکائے کمک ءَ بیست ءُ یک رن جوڈ کت فرگوسن ءِ دست ءَ بولڈ بوت – بھرت ءَ شانزدہ بالاں نھ رن جوڈ کرت نارئن بال ءَ مزنیں شات جنگے ناکامیں جھدے کت ایئر ءِ دست ءَ کیچ بوت – بھرت وکٹ شست ءُ نھ اسکور ءَ کپت ءُ ویراٹ ھشتاد ءُ ھشت ءَ – گلین ءَ ھژدہ بالاں پانزدہ رن جوڈ کت نارائن ءِ شکار بوت – ڈی ولیئرز ءَ نھ بالاں یانزدہ رن جوڈ کت شھباز ءَ چاردہ بالاں سینزدہ رن جوڈکت فرگوسن ءِ دومی شکار بوت ڈینل ءَ ھشت بالاں نھ رن جود کت گڈی اوور ءَ آؤٹ بوت – ہرشیل پٹیل ءَ شش بالاں ھشت رن جوڈ کت ناٹ آؤت بوت –

کولکتہ ءِ نیمگ ءَ نارائن ےَ چار اووراں بیست ءُ یک رن دات ءُ چار وکٹ گپت ءُ فرگوسن ءَ چار اووراں سِی رن دات دو وکٹ گپت-

نال گریشہ ءِ نودربرانی ھاتر ءَ بلوچ اسٹودنس ایکشن کمیٹی نال ھنکین ءِ سرکماش کریم عالم بلوچ ءِ چیردستی ءَ زانشتی مراگشے برجم دارگ بوتگ- مراگش ءَ کیریئر کوؤنسلنگ، زانت ءُ زانشت ءِ شرّی ءُ ٹائم منیجمنٹ ءِ سرھالانی سر ءَ باوست کنگ بوتگ ءُ بلوچستان کتاب کاروان ءِ نام ءَ یک کتاب اسٹالے ھم جنگ بوتگ- مراگش ءَ نال گریشہ ءِ بچک ءُ جنکیں نودربران مزنیں کساسے ءَ بھر زرتگ تران کنوک گوشداشتگ انت –

مراگش ءِ گچینی ءِ مھمان بلوچستان یونیورسٹی ءِ اسسٹنٹ پروفیسر سر جئیند ساجدی یونیورسل اسکول ءُ کالج ءِ ڈائریکٹت میر بگادر خان لانگو، خالد میر جلالی بوتگ انت ءُ مراگش ءِ بندات چہ قرآن پاک ءِ وانگ ءَ چہ بوتگ –

زانت ءُ زانشت ءِ شّری ءِ سر ءَ بلوچ اسٹوڈنس ایکشن کمیٹی ءِ بنجاھی باسک رفیق بلوچ ءَ مراگش ءَ تران کنان ءَ گوشت کہ بلوچ نودربرانی زانت ءِ جیڑھانی گیش ءُ گیواری، جمھوری ھکانی ھاتر ءَ جھد مئے بنُکی انت اگاں ما بلوچ دمگاں زانت ءُ زانشت ءِ درگت ءَ چار ءُ بچار بہ کنیں گڑا اے گپ ءَ اندازگ جت کنیں کہ مئے گور ءَ وھد ءِ ھمراھی ءَ بلوچ دمگاں زانت ءُ زانشتی جیڑہ گیش بوان انت یک نیمگے بلوچستان ءِ تہ ءَ اسکول نیستی ھساب انت ءُ دومی نیمگ ءَ کالج ءُ دگہ آسراتی ماسٹرانی کمی ءَ زانت ءِ دربرگ ناممکن جوڑ بوتگ –

آئی ءَ گوشتگ یک نیمگے نودربر وت وتی زانت ءِ ھنرانی م ھلاس کنگ المی امر جوڑ بوتگ ھمود ءَ یکشل ءَ چاگرد ءِ تہ ءَ زانتی ردوم ءِ دیمروئی ءِ ھاتر ءَ مھکمین یکجاھیں جھد راجی زمہ واری ءِ وڑ ءَ پیلو کنگ بنت –

مراگش ءَ اسسٹنٹ پروفیسر سر جئیند ساجدی ءَ وتی ھیال درشان کُت ءُ گوشت کہ مروچی اے سیشن ءِ گڈسر ءَ من ءَ باز وشی بوگ ءَ انت کہ مئے ورنایاں شال ءِ وڑیں مزنیں شھرئے ءِ تہ ءَ سیشن ایر کتگ وتی نودربراں گوشگ انت کہ چوں گرانیں راھان سپر کنگ بیت ءُ آئی ءِ درگت ءَ سرپدی دیگ انت – من امیت داران اے درچ یکشل ءَ برجاہ دارگ بیت آئی ءَ گوں ورنایاں تران کنان ءَ گوشت شمار ءَ لوٹ ایت کہ وتی دمگانی تہ ءَ اے وڑیں سیشن ایر بہ کن ات تانکہ آؤکیں پدریچ ءِ جوانی ءَ سرپد کنگ بہ بیت –

آئی ءِ گوشگ ات کہ مارا اے وھد ءَ ھمے گوشگ بیت سائنس ءِ مکسد گران ءُ آرٹ مراد بزاں ارزان انت – بلے راستی چپ انت نوں ما سرپد بوتگیں کہ سائنس ءِ وتی جتا ءُ آرٹ جتا وتی دنیائے – مئے مدامی ھمے واھشت بیت اِنت کہ ما یک وشھالیں زندے بگوازینیں ءُ ھر یکے مئے ستاہ ءَ بکنت بلے اشی ءِ ھاتر ءَ مار ءَ زانت، مھنت ءُ جھد کنگی انت ءُ مارا مدامی کتاب وانگ لوٹ ایت ءُ مارا ھر وھد ءَ کتاب جاھاں روگ لوٹ ایت ءُ وھد دیگ لوٹ ایت –

آئی ءِ گوشگ ات کہ نودربراں ھما پیلڈ روگی اِنت کہ آھانی ھُب واھگ انت ناکہ ھما پیلڈ ءِ کہ وبائے آئی سر ءَ بہ بیت –

سر جئیند ءِ گوشگ ات کہ اگاں ما ھر راہ ءَ بید سلاہ مشورہ ءَ اولسر ءَ بہ رویں گڑا مارا منزل ءَ سر بوگ ءَ وھد باز درکار بیت ءُ کیرئر کونسلنگ ءِ مراد ھما وھد ءِ کم کنگ ھر ھما نودربر وتی کیریئر پیسلہ سوچ بچار بہ کنت گشادی مہ کن اَنت پرچاکہ جلدی کنگ ءَ ما تاوان بار بہ ایں پائدگ نہ رس ایت –

جئیند ساجدی ءَ نودربراں ٹائم منیجمنٹ ءُ وتی پیلڈ ءِ درچنگ ءِ درگت ءَ سرپدی دات کہ اے دنیا ءِ تہ ءَ ھچ کار ناممکن نہ انت دنیا ءِ تہ ءَ ھما مردم سوبین بنت ھماھاں کہ وھدے کدر کتگ ھما بے سوب بنت کہ وھدے کدر ءِ نہ زانتگ – دنیا ءِ تہ ءَ ھر گار بوتگیں چیز شوھاز بوت کنت بلے شُتگیں وھد واتر نہ بیت – آئی ءَ وھد ءِ درگت ءَ وتی گپانی تہ ءَ گیشی آؤرت گوشت کہ مئے گور ءَ ھر یکے سوشل میڈیا ءِ سوب ءَ وتی وھد ءَ زوال کن انت بلے کتاب جاہ ءَ نہ روانت ءُ کتاب نہ وان انت مارا سوشل میڈیا شریں وڑے ءَ کارمرز کنگی انت تانکہ چہ آئی ءَ پائدگ زرت بہ کنیں وتی واستا ارزانی وتی گِس ءِ تہ ءَ پیدا کت بہ کنیں –

مراگش ءَ یونیورسل سکول ءُ کالج ڈائریکٹر میر بھادر خان لانگو ءَ وتی ھیال درشان کت ءُ گوشت کہ ھما راج وش بھت انت ءُ وشھالی گپتگ ات کہ وتی استادانی کدر ءَ زان انت مروچی بلوچ ءِ گور ءَ چشیں بازین کردانی واھند ھست انت کہ آھاں زانشتی ءُ نزریاتی جھد ءِ بنیات ءَ بلوچ نیشنل ازم نزریہ زندگ داشتگ وتی سرجمیں زند بلوچ راج ءِ ھاتر ءَ کربان کتگ ءُ ھماھانی تہ ءَ بازیں استاداں وتی جانانی کربانی داتگ ءُ وت ءَ راجدپتر ءِ تہ ءَ نمیران کتگ ھما کردانی واھندانی سوب ءَ مروچی بلوچ راج راجی زانت ءَ سر ریچ انت –

میر بھادر ءَ دیمتر ءَ گوشت کہ اے وھدی منی شال ءِ تہ ءَ یونیورسل اسکول ءِ شش برانچ ھست انت نال ءُ گریشہ ءِ نودربرانی ھاتر ءَ درسیں تبکاں سِی درسد ریایت دیگ بیت – آئی ءِ گوشگ ات کہ ما نومبر ءَ تاں شال ءَ امداد چار راہ ءِ نزیک ءَ ڈیجیٹل کتاب جاہ ءِ پچ کنگ ءَ ایں کہ آئی ءِ تہ ءَ نال گریشہ ءِ درسیں نودربرانی فیساں پنجاہ درسد یل دیگ بیت اِنت – آئی ءَ نودربرانی زانتی جیڑھانی درگت ءَ تران کت ءُ باندات ءَ زانت ءِ درگت ءَ ھم سرپدی دات –

کیریئر کونسلنگ ءِ ھاتر ءَ یاسر بلوچ (آرٹ فیکلٹی) فھیم بلوچ (ڈیپارٹمنٹ آف لاء) اسلم بلوچ (میڈیکل ءُ سائنس ءِ ڈیپارٹمنٹ) انجینئیر تاج محمد بلوچ (انجینئرنگ ڈیپارٹمنٹ) خالد میر جلالی (ایگری کلچر ڈیپارٹمنٹ) ءَ جوانیں وڑے ءَ نودربرانی کونسلنگ کت –

مراگش ءِ گڈسر ءَ کریم عالم بلوچ ءَ اتکگیں مھمانانی منت گپت ءُ گوشت کہ مار ءَ باز وشی بوت کہ مئے زانشتی مراگش ءَ سوبین کنگ ءِ ھاتر ءَ شما مئے ھمراھداری کتگ مارا شرپ بکش اتگ ءُ گڈسر ءَ درسیں مھمان شیلڈ دیگ بوت انت –

بلوچستان ءِ ضلع کیچ ءِ دمگ ھوشاپ ءَ گوستگیں روچ ءَ پاکستانی پوج ءِ دست ءَ کُشگ بوتگیں زھگانی لاش زرتگ ءُ کھول ءِ زھرشانی تربت شھید فدا چار راہ ءِ سر ءَ داں شپ ھم برجاہ ءَ اِنت-

زھرشانی جاہ ءِ سر ءَ شھریانی مزنیں کچے ءَ ساڑی اَنت آل پارٹیز کیچ کنوینئر مشکور انور ءُ دگہ راھشوناں گپ ءُ تران کنان ءَ گْوشتگ کہ مروچی آل پارٹیز ءِ باسکاں وئیل ءَ جاہ ءَ شتگ ءُ جاگہ چار ءُ ٹپاس کتگ اود ءِ جھمنندیں مردماں گوں وئیل ءِ درگت ءَ سرپدی زرتگ-

آھاں گْوشتگ کہ شپ ءَ شپ انتزامیہ ءِ گپانی بدل بوگ ءِ سر ءَ شک ودی بوگ ءَ اِنت-

آل پارٹیز راھشونانی رِد ءَ دمگی مردماں گْوشتگ کہ وئیل ءَ دہ دمان ءَ رند ایف سی ءِ کارندہ وئیل جاہ ءَ سر بوتگ ءُ گولھانی چُنڑ ءُ مُنڑ وتی ھمراھی ءَ برتگ اَنت گوں ءُ ٹپی ئیں زھگ تلوسگ ءَ بوتگ اَنت اے وھد ءَ ایف سی ءِ کرد بے انسانی بوتگ-

دمگی مردماں آل پارٹیز ءَ گْوشتگ کہ شپ ءَ ایف سی ءَ کبر ھم کونڑ اِتگ ءُ لاشانی کل کنگ ءَ کھول زور داتگ اَنت-

آھاں گْوشتگ کہ کیچ ءِ اے مستریں دردناکیں وئیل اِنت کہ آئی ءَ ھمینچو ایر بہ جن ایں آ کم اِنت ، اسرکپتگیں کھول ءِ گپاں ڈپٹی کمشنر کیچ ءُ انتزامیہ گوشدارگ وتی جاہ ءَ آ گیش مردمانی تہ ءَ زھر ودی کنگ اِنت – زھگاں کل ءُ کسارت کنگ ءِ ھاتر ءَ تاکت ءِ زور ءَ کبرانی جنگ زھری ءِ سبب جوڑ بیت-

تھسیلدار ھوشاپ ءِ سرکاری ھال ءِ تہ ءَ گوشگ بوتگ کہ زھگانی مرگ راکٹ ءِ آس دیگ ءِ سبب ءَ بوتگ ، بلے ڈپٹی کمشنر کیچ اے درشان ءَ نہ منّگ ءَ اِنت ءُ اشی ءَ دزبمبے گوشگ ءَ اِنت-

مروچی آل پارٹیز اود ءَ شتگ ءُ چار ءُ ٹپاس کتگ دانکہ راستی ءَ دیم ءَ بیار اِیت ءُ ھرکس ءَ اشی ءَ ھوار اِنت آ پدر کنگ بہ بیت ءُ اے ھواریں کُتکار سزا دیگ بہ بیت-

آھاں گْوشتگ کہ کھول ءِ لوٹ سرجم کنگ بہ بنت آل پارٹیز سرکار ءُ انتزامیہ ءِ کار ءُ کرد ءَ چہ دلپروش اِنت-

انچیں وھداں اے وڑیں وئیلاں پوج دیر ءَ کَیت بلے یکیں وئیل اِنت چریشی ءَ دہ دمان ءِ تہ ءَ ایف سی اود ءَ سر بوتگ ءُ انسان دوستی ءِ بگیری کتگ ءُ ناں ٹپی ئیں زھگ ناں شھیدیں زھگ نادُراھجاہ ءَ سر کتگ اَنت بلکیں مردم تُرس ءِ آماچ کتگ ءُ نشانی اود ءَ چہ چست کتگ ءُ برتگ اَنت – اشی ءِ بدتر اے کتگ کہ شپ ءِ نسپ ءَ شتگ ءُ کبر کونڈمڑ اِتگ ءُ زورانسری لاشانی کل کنگ ءِ جُھد کنگ پدر کنت کہ اشی ءَ کے ھوار اِنت-

آھانی گْوشگ اِنت اسرکپتگیں کھول ءَ انساپ ءِ دیگ ءِ ھمراھی ءَ آؤکیں وھد ءَ ھم پھازگ سرکار ءِ زمہ واری اِنت کہ تانکہ اشاں کس دلسیاہ ءُ تنگ مہ کن اَنت ، آل پارٹیز اے دردناکیں وئیل ءَ اسرکپتگیں کھول ءِ ھمراھی ھرچ گام ءَ ساڑی اِنت، انتزامیہ ءُ ڈپٹی کمشنر ءِ کرد ءُ کردگار ءَ ایر جن ایں-

نائب تھسیل دار ءِ ھال دیگ ءَ اِنت کہ راکٹ آس دیگ بوتگ بلے اشی ءَ چہ ابید ڈپٹی کمشنر کیچ اے درشان ءِ پُشتکنز بوتگ داں انو بگر اسرکپتگیں کھول اَرزبندیں کاگد زرتگ ءُ ایف آئی آر ءِ نکش ھاتر ءَ تچ ءُ تاگ ءَ اِنت – آمیدگس ءَ ھوار ھرچ آ کجام فروم اسرکپتگیں کھول انساپ دات کُت کنت آئی ءِ کر ءَ رو ایں اگاں سرکار ءُ انتزامیہ اے جیڑہ ءَ زوت نہ گِش اِنت گُڑا آل پارٹیز سول سوسائٹی ءُ انجمن ءِ مالدارانی ھمراھی ءَ وت یک راھے درگیجیں-

ھمے وھد ءَ بی این پی ءِ بُنجاھی راھشون ڈاکٹر عبدالغفور بلوچ ءَ گْوشتگ کہ آل پارٹیز وئیل جاہ ءَ شتگ چار ءُ ٹپاس شاھدانی یکجاہ کنگ ءَ پد ڈپٹی کمشنر ءِ درشان ءَ نہ منّ ایں زھگانی کُشگ ءَ ایف سی ءِ ھوار اِنت ءُ آ کجام سلاہ ءِ گوم ءَ نشانگ کتگ آ وت ئِے زانت – دُرستاں چہ دردناک ءُ نشانی اش اِنت کہ انتزامیہ ءَ دمگ ءَ شپ ءِ نسپ ءَ دو کبر کونڑ اِتگ ءُ زھگانی کل کنگ ءِ ناکامیں جُھدے کتگ اگاں ایف سی اے وئیل ءَ ھوار نہ اِنت گُڑا کبرانی کونڑگ ءُ کھول ءِ بیھار دیگ-

آھاں گْوشتگ کہ آل پارٹیز کھول ءِ ارزبندیں کاگد ءَ سرجمی ءَ ایف آئی آر نکش کنگ ءِ لوٹ ءَ کنت-

سربوتگیں ھالانی رِد ءَ دوشی شپ ءَ بلوچستان ءِ بنجاھی شھر شال ءَ پاکستانی پوج سی ٹی ڈی ءَ حاجی گلام نبی ءِ گِس ءَ بیڑ برتگ ءُ زوراکی کنان ءَ بلوچ نودربر آوار جتگ ءُ بیگواہ کتگ-

آوار جنگ بوتگیں ورنا ءِ پجار نوید احمد ء حاجی غلام نبی ءِ نام ءَ بوتگ -نوید بلوچ بلوچستان یونیورسٹی ءِ نودربرے-

آئی ءِ کھول ءِ مردماں نوید بلوچ ءِ زورانسری آوارجنی ءِ ھبر راست کتگ گوشتگ کہ سی ٹی ڈی ءَ دوشی شپ مئے گس ءَ بیڑ برتگ مردم ترس ءُ بیھار داتگ انت توپک ءِ زور ءَ نوید بلوچ زورانسری آوار جتگ ءُ گون وت بُرتگ –

زانگ بہ بیت نوید بلوچ ءِ برات عامر بلوچ ھم پیسر ءَ آوار جنگ ءُ بیگواہ کنگ بوتگ کہ پد ءَ رند ءَ آ یلا کنگ بوتگ دوشی شپ ءَ آئی برات نوید بلوچ سی ٹی ڈی ءَ وتی گِس ءَ چہ آوار جتگ بیگواہ کتگ –

بلوچستان ءَ سی ٹی ڈی ءِ بیڑانی تہ ءَ آوارجنی گیشی ءَ گندگ ءَ آیگ ءَ اَنت ءُ گوست ءَ سی ٹی ڈی ءَ ٹاہ داتگ اَت کہ دیم پہ دیمی جنگ ءَ ناشرکار جنگ بیتگ اَنت بلے سی ٹی ڈی ءِ ٹاھانی پژدر ءَ جنگ بیتگیں مردم بیگواھیں مردمانی ناماں زانگ بیتگ اَنت –

بلوچستان ءَ سیادی داروکیں سیاسی پاٹیانی گوشگ اِنت کہ سی ٹی ڈی لس مردماں آوار جنت ءُ پد ءَ آیاں دروگیں جنگ ءِ نام ءَ کُشگ ءُ دور دیگ ءَ اِنت –

ھمے ماہ ءِ دو اکتوبر ءَ سی ٹی ڈی ءَ کیچ ءِ دمگ بلیدہ ءَ بی ایس او ءِ چیئرمین ظریف رند ءِ لوگانی سر ءَ بیڑ برتگ اَت –

اود ءَ سی ٹی ڈی ءِ بیڑ ءَ ظریف رند ءِ برات زتک رامز خلیل تیرگواری ءِ وھد ءَ جنگ بیتگ اَت ءُ آئی ءِ برات ءُ مات زدگ کنگ ءُ آئی ءِ پت آوار جنگ بیتگ اَت-

پد ءَ کھول ءَ رامز ءِ لاش زرتگ اَت کیچ ءَ شھید فدا چوک ءَ دو روچاں نندانک جتگ ات ءُ پد ءَ شال ءَ زھرشانی کنان ءَ شتگ اِت اَنت اود ءَ آیاں انساپ ءِ سدکی ءَ پد کھول ءَ وتی زھرشانی ھلاس کتگ اَت ءُ واتر وتی ھنکین ءَ شتگ اِت اَنت –

بلوچستان ءَ سی ٹی ڈی ءِ بیڑانی تہ ءَ لس مھلوک ترس آماچ اِنت ءُ آئی ءِ ھلاپ ءَ زھرشانی کنگ ھم بیتگ اَنت-

ھجام دکان ءِ سر ءَ اُرش کتگ یک کارمندے ٹپی کتگ – مزار بلوچ

سربوتگیں ھالانی رِد ءَ بلوچستان ءِ بنجاھی شھر شال ءَ ناشناسیں مردماں عسکری پارک ءِ نزیک ءَ ھجام دکان ءِ سر ءَ دستی بمب ءِ چگل داتگ –
دستی بمب اُرش ءَ یک مردم ءِ ٹپی بوتگ –

دومی نیمگ ءَ بلوچ آجوئی لوٹوکیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں دوشمبے ءِ بیگاھے ادار شش ءُ نیم ءَ عسکری پارک ءِ نزیک ءَ چیریں ادارھانی دست ءَ کارمرز بوکیں ھجام ءِ سر ءَ دستی بمب ءِ چگل داتگ –

جارکش ءَ گوشتگ دستی بمب اُرش ءَیک کارنندہ ءِ ٹپی بوتگ –

جارکش ءَ گوشتگ کہ زورگیریں پوج ءُ پوج ءِ کمک کارانی سر ءَ اُرش بلوچستان ءِ آجوئی ءَ تاں برجاہ مان انت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ – گل ءِ رھشون ماما قدیر بلوچ ءَ زھرشانی بنجل ءَ چہ وتی شنگ کرتگیں تامربند درشان ءِ تہ ءَ گوشتگ کہ درساں پیش من شمے منت ءَ گراں کہ شما منی واستا نیک دوائی کتگ – بلوچستان ءَ سرجمیں دنیا ءَ ھر ھما مردماں منی جاندراھی ءِ ھاتر ءَ نیک دوائی کتگ آھانی کچ ھمینچو باز انت کہ یک یک ءَ آھانی نام گرگ نہ بنت –

آئی ءَ دیمتر ءَ وتی درشان ءِ تہ ءَ گوشتگ کہ شما ھمک روچ گندگ اِت کہ پوج ءِ لشکر کشی ءُ بلوچانی زورانسری آوار جنیانی تہ ءَ گیشی اتکگ ھمک روچ بازیں بلوچ پرزند آوار جنگ بوگ ءَ انت –

آئی ءَ گوشتگ کہ ریاست ءِ پالیسیانی رِد ءَ پاکستانی پوج چُکاں ھوار بلوچ راج ءَ جنگ انت ءُ ھمے پالیسی ءِ رِد ءَ گوستگیں روچ ءَ ھوشاپ ءَ کسان سالیں زھگ جنگ بوتگ انت وھدیکہ اشی ءَ پیش تاج بی بی نامیں زالبولے تیرباران کنگ بوتگ ءُ کُشگ بوتگ –

آئی ءَ گوشتگ کہ منی اے پیام بلوچاں ھوار سرجمیں دنیا ءِ انسانی ھکانی باسکانی ھاتر ءَ انت کہ آ بیگواھیں مردمانی ھاتر ءَ گیش ءَ چہ گیش توار چِست بہ کن انت –

سندھی آجوئی لوٹوکیں سلاہ بندیں گل ایس ار اے ءَ مروچی نوابشاہ ءَ پاکستانی چیریں ادارھانی کارگس ءِ سر ءَ بیتگیں دزبمب اُرش ءِ زمہ واری منّ اِتگ-

سندھودیش روولیوشنری آرمی ءِ جارکش سوڈوھو سندھی ءَ رسانکدراں شنگ کرتگیں درشان ءِ تہ ءَ گُشتگ کہ مروچی سھب ءَ نوابشاہ ءَ سرکٹ ھاؤس ءِ دیم ءَ پاکستانی انٹیلینجنس ایجنسی “آئی ایس آئی ” ءِ کارگس ءِ سر ءَ دزبمبے چگل داتگ –

آئی ءَ گُشتگ کہ اے اُرش ھما وھد ءَ کنگ بیتگ کہ وھدیکہ آئی ایس آئی کارگس ءِ گیٹ ءِ دپ ءَ نگھپانیں کارمند ءِ شپ ءِ ڈیوٹی ھلاس کرتگ ءُ دومی کارندہ وتی کار ءَ دزگرگ ءَ بیتگ ارش ءَ دو کارندہ مرتگ اَنت ءُ دو زدگ بیتگ اَنت –

جارکش ءَ گُشتگ کہ ایس آر اے سندھ سرڈگار ءِ سر ءَ زورگریں پنجابی پوج ءَ بیھار دنت کہ آ سندھ ءِ سرڈگار ءِ سر ءَ زورگری ءَ ھلاس بہ کنت –

آئی ءَ گُشتگ کہ ایس آر اے سندھ ءِ سرجمیں آجوئی ءَ داں وتی جنگ ءَ برجم کنگ ءَ مسام ءَ کنت –