TBP Balochi

سربوتگیں ھالانی رِد ءَ بلوچستان ءِ دمگ ڈیرہ بگٹی، ھب، کوھلو ءُ جھل مگسی ءَ جتا جتائیں وئیلاں زالبولے ءَ ھوار چار مردم بیران ءُ ھپت مردم ٹپی بوتگ انت –

گیشیں ھالانی رِد ءَ ڈیرہ بگٹی ءَ ناشناسیں سلاہ بندیں مردمانی تیرگواری ءَ یک مردمے بیران بوتگ –

وئیل مٹ موندرئی ءَ بوتگ کہ سلاہ بندانی تیرگواری ءَ نور حسن نامیں مردمے بیران بوتگ –
بیران بوتگیں مردم لیویز ءَ چِست کرتگ ءُ نادراھجاہ ءَ سر کتگ اود ءَ اژدری چار ءُ ٹپاس ءَ پد کھول ءِ ھوالگ ءَ دیگ بوتگ – ھمے گوشگ بوگ ءَ انت وئیل پیشی وت ماں وتی جیڑہ ءِ سر ءَ ودی بوتگ –

ھب ءَ سیلنڈر ءِ ترکگ ءَ یک مردمے بیران بوتگ –

وئیل یوسف گوٹ بس ٹرمینل ءِ نزیک ءَ ویلڈنگ دکان ءِ تہ ءَ بوتگ کہ سیلنڈر ءِ ترکگ ءَ یک مردمے بیران ءُ دو زدگ بوتگ انت – وئیل ھما وھد ءَ بوتگ کہ گاڑی ءِ پٹرول جاہ ءَ ویلڈ کنگ ءَ بوتگ انت – ریسکیو ءُ ٹپی ءُ بیران بوتگیں مردم نادراھجاہ ءَ سر کتگ انت –

دگہ وئیلے کوھلو ءَ چنگیز پٹرول پمپ ءِ نزیک ءَ دیم ءَ اتکگ کہ پرپٹ سوار ءُ رکشہ ءَ ڈیک وارتگ، ڈیک ورگ ءِ سوب ءَ دو پرپٹ سوار ٹپی بوتگ انت –
دمگی پولیس ءَ ٹپی بوتگیں مردم نادراھجاہ ءَ سر کتگ انت ٹپانی درمان کنگ ءَ پد گیشیں الاج ءِ ھاتر ءَ ڈیرہ گازی ھان ءَ سر کنگ بوتگ انت –

دگہ وئیلے جھل مگسی ءَ دیم ءَ اتکگ کہ یازدہ ھزار تاکتوریں بجلی تار کپگ ءَ کسان سالیں گونڈلے بیران بوتگ دو زدگ بوتگ انت – واپڈہ ءِ بگیری ءَ ارزی نبشتہ کنگ بوتگ – ھمے گوشگ بوگ ءَ انت کہ بجلی ءِ تار کپتگ بوتگ انت ءُ اھانی تہ ءَ کرنٹ مان بوتگ ءُ چریشی ءَ سَے زھگ ءُ دلوت زد ءَ اتکگ انت یک زھگے ھما دمان ءَ بیران بوتگ ءُ دگہ دو نادراہ جاہ ءَ داخل انت –
دمگی مردماں واپڈہ ءِ بگیری ءَ ارزی نبشتہ کنائینتگ –

دومی نیمگ ءَ بلوچستان ءِ دمگ کوھلو ءَ ھور ءُ ھرگاں چہ زالبولے بیران ءُ دو مردم ٹپی بوتگ انت –

ھالانی رِد ءَ کوھلو ءِ دمگ ماوند ءَ ھورانی سوب ءَ توپانی ھار ءَ یک زالبولے برتگ زالبول بیران بوتگ زالبول ءِ جون شوھاز کنگ بوتگ ءُ نادراھجاہ ءَ سرکنگ بوتگ اود ءَ اژدری چار ءُ تپاس ءَ پد کھول ءِ ھولگ ءَ داتگ – ھمے وڑ تمبو ءَ گرند ءِ کپگ ءَ یک مردمے ٹپی بوتگ ٹپی بوتگیں مردم دمگی نادراھجاہ ءَ سر کنگ بوتگ –

بلوچستان ءِ دمگ کیچ ءَ سر بیتگیں ھالانی رد ءَ لیویز فورس ءَ نشہ باپاریانی بگیری ءَ بیڑ برتگ ءُ سَے نشہ باپاری مردم گپتگ اَنت –

لیویز بنشون ءِ گوشگ اِنت کہ ڈپٹی کمشنر کیچ حسین جان بلوچ ءِ گوشگ ءَ اسسٹنٹ کمشنر تربت ءِ سروکی ءَ رسالدار میجر ءَ لیویز چیک پوسٹ کلاتک ءِ ھمراھی ءَ سوبمندیں بیڑے کرتگ ءُ سَے نشہ باپاری مردم گپتگ اَنت –

لیویز بنشون ءِ رد ءَ سئیں نشہ باپاری مردمانی پجار مھمد نعیم ء شمبے، علیم ء اللہ بکش ءُ مھر اللہ ء رھمت اللہ ءِ ناماں زانگ بیتگ اَنت –

لیویز بنشون ءِ گوشگ اِنت گپتگیں مردمانی گور ءَ بازیں کچے ءَ نشہ دزکپتگ اَنت –

اے سی تربت عقیل کریم ءَ رسانکدراں گوں گپ کنان ءَ گوشتگ کہ نشہ ءِ ھلاپ ءَ لیویز فورس ءَ مزنیں گامگیج زرتگ اَنت ءُ نشہ ءِ ھلاسی ءَ کنت اِنت –

آئی ءَ گوشتگ کہ لیویز فورس ءَ ھرکجا نشہ ءِ ھال بہ رس ایت ھمود ءَ بیڑ بارت ءُ نشھیانی ھلاپ ءَ ترندیں گامگیج زور ایت ءُ دانکہ نشہ ءَ چاگرد پاک ءُ پلگار بہ بیت اِنت –

آئی ءَ کلات ءِ لیویز فورس ءِ اے گامگیج ءِ ستاشانی کرتگ ءأ گوشتگ کہ چاگردی سلکاریانی بگیری ءَ لیویز ءِ مشن اِنت ءُ ھرچ رنگ ءَ اے مشن سرجم بیت اِنت –

زانگ بہ بیت بلوچستان ءِ بازیں جاہ نشہ ءَ وتی لپیٹ ءَ زرتگ اَنت ءُ اود ءَ کسان کسانیں زھگ ھم ھمے سِلیں زھر ءِ آماچ اَنت –

بلوچستان ءَ سیاسی مردمانی گوشگ اِنت کہ نشہ باپاریانی پُشت ءَ مزنیں واکانی دست ھوار اَنت ءُ چریشی ءِ سر ءَ دمگاں لس جاھاں نشہ بھا بیگ ءَ اَنت –

بلوچستان ءَ بازی وھداں نشہ ءِ ھلاپ ءَ مھلوک زھرشانیاں ھم گندگ بیتگ اَنت ءُ گوست ءَ ھزدار ءَ نشہ ءِ ھلاپ ءَ توار چِست کنوکیں ورنایے نشہ باپاریاں تیرانی آماچ کرتگ ءُ کُشتگ اَت –

چہ بلوچستان ءَ زورانسری آوار جنی ءِ آماچیں مردمانی کھول سالانی سال وتی دوستگیں مردمانی آیگ ءِ وداراں نشتگ اَنت، بیگواھیں مردمانی کھولاں پاکستان ءِ آمیدگس ءُ میان اُستمانی انسانی ھکانی ادارھاں انساپ ءِ دیگ ءِ لوٹ ءَ کنگ ءَ اَنت –

مستونگ ءِ جھمنندیں بیگواھیں لیویز کارمند سعءد بلوچ ءِ مات ءُ چہ سوراب ءَ بیگواہ بیتگیں سیف اللہ رودینی ءِ گوھار ءَ شال ءِ پریس کلب ءِ دیم ءَ برجاھیں وائس فار بلوچ مسنگ پرسنز ءِ بنجل ءَ اتکگ ءُ وتی لاڑانی یل کنگ ءِ لوٹ کرتگ اَنت ءُ آیانی بیگواھی ءِ ھال شنگ اش کرتگ اَنت –

سعید احمد 29اگست 2013 ءَ دزگیر کنگ ءَ پد بیگواہ کنگ بیتگ ءُ سیف اللہ رودینی 22 نومبر 2013 ءَ بیگواہ کنگ بیتگ –

بیگواھیں سعید احمد ءِ مات زرگل بلوچ ءِ رد ءَ آئی ءِ زھگ ءِ بیگواھی ءِ ھلاپ ءَ گیشتر زھرشانی ءُ پریس کانفرنس کنان اِنت بلے توار ءِ گوشداروک کس نیست اِنت – سعید احمد ءِ مات ءَ گوشت کہ اسلام آباد ءَ زھرشانی ءِ وھد ءَ سر وزیر پاکستان ءَ مارا مسام کرتگ ءُ گوشتگ کہ آ مئے لاڑیں بچاں دیم ءَ کاریت اِنت –

آئی ءَ گوشت کہ عمران ءِ ٹاھاں ابید مارا مئے بیگواھیں مردمانی بارو ءَ ھچ سرپدی نیست اِنت – آئی ءَ گوشگ اَت: ھشت سال ءِ دراجیں ودار باز دردناک اِنت ما انساپ دیگ بہ بہ ایں –

بیگواھیں سیف اللہ ءِ گوھار ءَ شنگ کرتگیں تامربندے ءَ گوشتگ کہ سیف اللہ رودینی ودار کنان ءَ منی پت ءُ مات ءَ اے دنیا یل کرتگ، برات دیم ءَ آرگ بہ بیت ءُ ما انساپ دیگ بہ بہ ایں –

سیف اللہ رودینی ءِ گوھار ءَ گوشتگ کہ کجام ھم ریاست وتی شھریاں چوش گار ءُ گمسار نہ کنت ءُ شھریانی بیگواہ کنگ گیر انسانی املگ اگاں منی برات ءَ جرمے کرتگ گڑا آ آمیدگساں آرگ بہ بیت ءَ جرم منینگ بہ بیت اِنت –

سیف اللہ رودینی ءِ گوھار ءَ دیمترا گوشت کہ بیگواھیں مردمانی واستا جوڑینتگیں جے آئی ٹی ءِ دیم ءَ پیش بیگ ءَ من ءَ گوشگ بیتگ کہ تئی برات ردیں کاراں دزمانجن بیتگ ءُ چریشی ءِ سبب ءَ بیگواہ کنگ بیتگ اگاں ریاستی کانون کجام مرد ءَ بید ءِ آمیدگسانی پیش کنگ ءَ زورنسری آوار بہ جنت اے وڑیں کانود ءَ ما نہ منّیں –

آئی ءَ میان اُستمانی انسانی ھکانی ادارھاں گوں دزبندی کرتگ ءَ گوشتگ کہ آ منی برات ءِ یل کنگ ءَ وتی کرد ءَ پیلو بہ کن اَنت –

بلوچ اسٹوڈنٹس ایکشن کمیٹی کراچی ھنکین ءِ نیمگ ءَ شنگ بیتگیں ھالانی رد ءَ ملیر ءَ بنزہ ءِ جوڑینگ بیتگ کہ چریشی ءَ نور خان بلوچ سروک گچین کنگ بیتگ-

بنزہ ءِ نیاد ھنکینی کارمستر نورمان خالد ءِ سروکی ءَ برجم کنگ بیتگ کہ نیاد ءَ ھنکینی مھمان فوزیہ بلوچ ءُ ھواری مھمان کمک کارگشاد بالاچ ھسن بیتگ اَنت –

نیاد ءَ پجاروکی ءَ پد ھنکینی سرکولر، گل ءِ کارانی ءُ آؤکیں گامگیجانی سر ءَ جوانیں رنگے ءَ باوست بیتگ اَنت، نیاد ءَ دراھیں باسکاں گل ءِ کارانی گھتری ءُ جوانیں رنگے ءَ دیم ءَ جنزگ ءِ سوڑگ کرتگ –

نیاد ءَ وانگی تکانی سر ءَ ھم باوست کنگ بیتگ ءُ دراھیں باسکاں زانگ ءُ زانشت ءِ دیمروئی ءِ واستا گھتری ءِ مسام کرتگ اَنت –

نیاد ءَ بنزہ ءِ گچین بیتگیں سروک ءُ باسک گچین کنگ بیتگ ءُ بنزہ ءِ سروک نورخان بلوچ، کمکار مستر گل زیب بلوچ، کارگشاد، نعیم بلوچ، کمکار گشاد رشید بلوچ ءُ شنگکار حسنین بلوچ گچین کنگ بیتگ اَنت ءُ زالبول کوارڈینیٹر ءِ واستا ثناء بلوچ ءُ زیب النسا ء گچین کنگ بیتگ اَنت –

ھنکین ءِ کارمستر ءَ بنزہ ءِ گچین بیتگیں اگدو دار سوگند داتگ اَنت اگدو داراں گل ءِ رھبندانی سر ءَ مسام بندی کرتگ ءُ وتی زمہ واریانی پیلو کنگ ءَ سدکی کرتگ –

بلوچ ایکشن کمیٹی کراچی ءَ ھوار بلوچستان ءِ ھند ءُ دمگاں ھم وتی بنزہ ءُ گلی کاراں دیم ءَ جنزان اِنت کہ بلوچستان ءَ بلوچ نودربرانی رھشونی ءَ یک گچینی ءِ گلے ءِ نام ءَ زانگ بیت اِنت –

نبشتانک: منی گار بوگ ءَ ساری

نبشتہ کار: براھیم گُؔل

چارُمی بَھر

دی بلوچستان پوسٹ

مِھروان ! چم پہ گِندگ ءُ گوش پہ تھنا اِش کنگ ءِ واستا ھُدا ءَ بنیادم ءَ را نہ داتگ اَنت،بلکیں دگہ اوں ھزار کار کنگ ءِ توپیک کنگی اِنت۔
مِھروان! من ءَ چہ پد زُبان ءِ لَگام ءَ یلو بوگ ءِ ھِچ موہ مہ دئے،پرچا کہ اگاں یک شِپانکے وتی رمگ ءِ ھیال ءَ مہ دار ایت آئی ءِ رمگ ءَ گُرک وارت ، اگاں گُرک نہ وارت اش الّم دگرے یے ڈگاراں چَر ایت ئِے من پد ءَ برے برے زُبان ءِ لھتیں جُھد کاراں گِنداں من سک بژنیگ باں ،من باز گَلانی باسک دیستگ اَنت کہ آ پہ نام برجم دارگ بوتگ اَنت ءُ اود ءَ پہ زُبان ءَ ھِچ کار کنگ ءَ نہ اَنت ،اَنچش کہ اوتھل لسبیلہ ءَ یک روچے منی سر یک بلوچی لبزانکی گَلّے ءِ تہ ءَ کپت کہ من دیست اود ءَ ھِچ کار اوں نہ بوگ ءَ اَت ، اود ءَ دُراھیں سنگت پہ وتی اُکدہ ءَ ھودوک اِت اَنت، یکے وتی کمک کاری ءُ یکے وتی پاگواجائی ءَ ۔

مھروان ! منی گُشگ ءِ مول ءُ مُراد کہ وتی زُبان ءَ پہ نام ھِچ مہ چار ھرچی کن ئے پہ سِتک بِکن، ھرچی کن ءِ پہ مُھکمی بِہ کن،چو مہ بیت کہ باندا روچ من ءُ تو گوں وتی زُبان ءَ ملامت کنگ بِہ بہ ایں ، چو مہ بیت کہ من ءَ چہ پد منی زُبان اوں اوشت ءِ آماچ بِہ بیت چو مہ بیت کہ ھما سنگتانی گَلّ ءِ وڑ ءَ پہ نام زُبان برجم دارگ بِہ بیت، اِنّاں مِھروان من ترا پیسر ءَ گُشتگ کہ ترا بےکساس مُھکم بوگی اِنت،ترا سک باز کار کنگی اِنت،ترا وتی زُبان ھپتیں آزمان ءَ سر کنگی اِنت،ترا داں تئی آتراپ ءِ ھمُک درچک ءُ دار بِہ زان اَنت کہ ترا یک مُھکمیں زُبانے ھست ءُ آ زُبان ءِ پاسبان چو کوھساریں سرمچار ءَ اوشتاتگ اَنت، من ءَ چہ پد زُبان ءَ تند بندگ ءِ ھِچ موہ مہ دئے۔

مِھروان! اے کِشک کہ من زُرتگ ءُ رَوگ ءَ آں ، اے کِشک ءَ جھل ءُ بُرز سک باز مان، اے کِشک ءَ ھزار کُنٹگ ھست، ھر ھمُک گام ءَ پاد تراول بنت، ھون بنت، اے کِشکانی مُساپِر کُجام اوں وھد ءَ پُلگ بنت، بلے ترا جُنزگی اِنت جند ئے زُبان اِنت ءُ آئی ءِ ھاتر ءَ ترا ھمُک کِشک ءِ کُنٹگ دُور کنگ ءُ جُنزگی اِنت،پرچا کہ اے مئے جِند ءِ مات اِنت،اگاں پہ مات ءَ من ءُ تو درد ءُ رنج اوپار کُت نہ کناں گُڑا مئے زندگی ءِ ھِچ مول نیست، یک بَچّے پہ مات ءَ ندر بوت نہ کنت گُڑا آ بَچ اے مات ءِ چُک گُشگ نہ بیت اَنچو کہ ” جاھے ءَ بلوچی زُبان ءِ شھزانت سید زھور شاہ ھاشمی ساھب گُش ایت کہ ، اگاں یک راجے وتی جِند ءِ ماتی زُبان ءَ وانگ ءُ نبیسگ مہ زانت گُڑا آ وانندگے گُشگ نہ بیت” اگاں ما بِہ چاریں واجہ راست گُشتگ،پرچا کہ بےزُبان ءَ ھِچ راج زندگ نہ مان ایت ءُ پہ زندگ مانگ ءَ وتی زُبان زندگ کنگی اِنت،اگاں راجے کہ جِند ءِ زُبان ءَ نبشتہ کُت نہ کنت ءُ ونت نہ کنت گُڑا آ راج چی پیم زندگ مان ایت !-

مِھروان! من بِہ گِندئے آ جاگہ ءَ نہ رس اِت آں ءُ ساری گار بوتاں گُڑا منی ھمے کار ترا کنگی اِنت،ترا تئی سرجمیں راج پہ وتی زُبان ءِ وانگ ءُ زانگ ءُ پوہ بوگ ءَ لاچار کنگی اِنت،تو وتی راج ءَ ھما جاگہ ءَ بیار کہ تئی راج ءِ ھر چُک تئی زُبان ءِ وانگ ءُ نبشتہ کنگ بِہ زانت،تئی زُبان کہ زندگ بیت گُڑا تئی راج زندگ بیت،اگاں تئی راج زندگ بیت گُڑا تو بِزاں کہ منزل ءَ سرئے ءُ تئی زُبان زِندگ اِنت مِھروان پد ءَ گِندئے تئی زُبان ءَ ھرکس زانت ءُ ھرکس ترا یک جِتائیں پجّارے دنت گُڑا من زاناں کہ تو منی کول پیلو کُتگ اَنت۔

مِھروان! تو بلکیں پد ءَ ھمے بِہ جیڑئے کہ من یک گُنگیں راجے ءِ زُبان ءِ ھاتر ءَ جُھد کُت نہ کناں،اے راج وتی زُبان ءَ چہ گیش دگہ زُباناں گوں شوک داریت اِنّاں مِھروان اگاں تئی راج چہ واب ءَ بُست نہ کنت ءُ وتی زُبان ءِ گمان ءَ نہ اِنت گُڑا تو اے گُنگیں راج ءِ زُبان بُہ بو، تو اے راج ءَ چہ واب ءَ پاد بِہ کن،اے راج الّم پاد کیت بَلے ترا جُھد کنگی اِنت، داں ھما وھد ءَ جُھد کنگی اِنت کہ تئی گُنگیں راج آشنا بِہ بیت ءُ بِہ زانت کہ مئے زُبان ءِ زندگ کنگ ءِ اولی گامگیج ترند کنگی انت اے ھبر ءَ کدی مہ جیڑ کہ مئے جِند ءِ زُبان ءِ واھند دَری زُبان ءَ نبشتہ کنگ ءَ اَنت ءُ ما پرچا بلوچی ءِ سر ءَ بہ جُنز ایں؟ اے ھبر ءَ ھچبر مہ جیڑ ، مُدام ھمے بِہ جیڑ کہ تئی ھمُک اِسرار گوں زُبان ءَ بندوک اِنت بس،تئی زُبان تئی دُنیا اِنت،تو اگاں زُبان زندگ کُت گُڑا منی ھیال ءَ تئی مات سک گَل بیت،تئی مات چہ گَل ءَ جاگہ نہ کنت ءُ پد ءَ تئی مات ھمے جیڑ ایت کہ منی جُھد ءِ مستریں سرمچار توئے۔

روان اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ سیمسری دمگ مند نوکیں کھن ءِ جھمنندیں اسد ء ھاجی ناصر ءِ گوھار ءَ دزبندی کرتگ برات ءَ یل بہ کن اِت –

اسد بلوچ ءِ گوھار ءِ رد ءَ آئی ءِ برات اسد بلوچ یک جولائی دوھزار ءُ نوزدہ ءَ نوکیں کھن مند ءَ زورانسری آوار جنی ءِ آماچ بیتگ، دو سال ءِ پِر گوزگ ءَ پد انگت ءَ دیم ءَ آرگ نہ بیتگ –

آئی ءَ گوشتگ کہ برات ءِ بیگواھی ءَ دراجیں مُدتے ءِ گوزگ ءَ پد مئے کھول ترندیں دردمانانی آماچ اِنت ءُ منی مات وتی زھگ ءِ بیگواھی ءِ سبب ءَ درد ءُ رنجانی آماچی ءَ نادراھی ءُ بے ھوشی ءِ زند ءَ گوازینگ ءَ اِنت –

آئی ءَ ڈیھی ادارہ ءُ مزن واکداراں گوں برات ءِ یل کنگ ءِ لوٹ کرتگ ءُ گوشتگ کہ سالانی بیگواھی ءَ سرجمیں کھول دردناکی ءِ آماچ اِنت –

ھمے وڑ ءَ بلوچ سوشل میڈیا ایکٹیویسٹانی نیمگ ءَ اسد بلوچ ءِ زورانسری بیگواھی ءَ دو سال سرجم بیگ ءَ چاگردی رسانکجاہ ٹوئٹر ءَ کمپین کارمرد کنگ ءِ جار پِرینتگ اَنت –

بیگواھیں اسد ءِ گوھار ءَ دَہ جولائی ءَ وتی برات ءِ سلامتی ءِ یل کنگ ءَ کمپین ءِ بھر زورگ ءَ انسان دوست ءُ دگہ تکاں بندوکیں مھلوک ءَ گوں دزبندی کرتگ –

بلوچستان ءِ تیابدپی شھر گوادر ءَ دُزی ءُ ڈنگی گیش مھلوک ءُ جنجالانی دیمپان، انتزامیہ گر ءُ دار ءَ بے تھمبل –

گیشیں ھالانی رد ءَ گوستگیں شپ ءَ تھانہ وارڈ ءَ بازیں لوگانی سر ءَ دُزاں بیڑ برتگ ءُ گران بھائیں ساز ءُ سامان برتگ انت اش –

گوستگیں شپ ءَ تھانہ وارڈ گوادر ءَ دُزانی یک ٹولی ءَ کساس دَہ لوگانی تہ ءَ دور کرتگ، دمگی مردمانی گوشگ اِنت شپ ءِ ساھت ءُ چار ءِ میانی پاس ءَ دَہ لوگانی گران بھائیں مڈی، سھر، گرانبھائیں دُوچی گُد، مباھل ءُ لکانی کلدار دُز اِتگ ءُ تتکگ اَنت –

دمگی مردمانی گوشگ اِنت کہ دُزانی گور ءَ مزن مزنیں سلاہ بیتگ اَنت ءُ چریشانی دیم ءَ مھلوک بے وس بیتگ اَنت ءُ مھلوک ءِ چمانی دیم ءَ دُز گندگ بیتگ اَنت ءُ بلے دُزاں سلاھانی زور ءَ مھلوک ترسینتگ اَنت –

دمگی مردمانی گوشگ اِنت دُزانی ٹولی چاردہ مردمانی کَچ ءَ بیتگ اَنت کہ چریشی ءِ سر ءَ سُبکی تتکگ اَنت –

مھلوک ءِ گوشگ اِنت گوادر ءِ وڑیں مھریں جاھے ءَ بازیں سیکورٹی بیگ ءَ ابید دُز سلاھاں کاینت ءُ مئے لوگانی تہ ءَ دور کن اَنت اے گپ جیڑگ پرمائیت –

مھلوک ءَ دمگ ءِ پھزداراں گوں دزبندی کرتگ ءُ گوشتگ کہ مئے پھریز ءَ بہ کنت کہ ما گران بھائیں مڈی ساماناں دُز برگ ءَ اَنت –

زانگ بہ بیت گوادر ءِ وڑ ءَ کیچ ءِ دمگاں ھم دزی ءُ ڈنگیانی ھال گیش بیتگ اَنت ءُ اود ءَ بازیں کچے ءَ دُزی ءُ ڈنگی بیگ ءَ اَنت –

دمگی مھلوک ءِ گوشگ ءِ اِنت دُز بلوچستان ءِ “ڈیتھ اسکواڈ ” ءِ نام ءَ زانگ بیت اِنت کہ اشانی پُشت ءُ پناھی ءَ پوج ءُ چیریں ادارہ کنگ ءَ اَنت –

بلوچستان ءِ بنجاھی شھر چہ شال ءَ سر بیتگیں ھالانی رد ءَ سَے روچ کوھنیں جونے دزکپتگ –

جون شال ءِ دمگ میاں غنڈی ءِ کوھی دمگ ءَ دزکپتگ، پولیس ءِ رد ءَ گوستگیں روچ ءَ نیو سریاب پولیس ءَ ھال سر بیتگ کہ میاں غنڈی ءِ کوہ ءَ یک جونے ایر اِنت –

پولیس ءِ رد ءَ ھال ءِ سر بیگ ءَ پولیس سر بیتگ ءُ جون اش چِست کرتگ ءُ نادراہ جاہ ءَ رسینتگ ءُ اود ءَ ڈاکٹراں چار ءُ ٹپاس ءَ پد گوشتگ کہ اے جون سَے روچ پیسری اِنت ءُ گمان بیت کہ کوہ ءَ کپتگ ءُ جون پجار ءِ ھاتر ءَ مردہ ھانہ ءَ ایر کنگ بیتگ –

ھمے وڑ ءَ چہ ڈیرہ بگٹی ءَ سر بیتگیں ھالانی رد ءَ دگ ءِ وئیل ءَ یک مردمے بیران بیتگ –

گیشیں ھالانی رد ءَ ڈیرہ بگٹی ءِ دمگ کچھء کینال ءَ مساپر بریں وین تیز روگ ءِ سبب ءَ کپتگ ءُ چریشی ءَ یک مردمے بیران بیتگ –

ھمے وڑ ءَ بلوچستان ءِ بنجاھی شھر شال ءَ کُچگی دمگ ءَ کوہ ءَ یک زھگے کپتگ ءُ بیران بیتگ –

ھالانی تہ ءَ گوشگ بیتگ کہ ھشت سالی زھگے کوہ ءَ کپتگ ءُ بیران بیتگ –

ریسکیو ءِ رد ءَ گوستگیں روچ ءَ اصغر آباد ءَ کوہ ءَ ھشت سالی ئیں زھگے ناگتی لگوشتگ ءُ کپتگ چریشی ءَ آ چِست کنگ ءُ شیخ زید ھسپتال ءَ برگ بیتگ ءُ اود ءَ اژدری چار ءُ ٹپاس ءَ پد زھگ ءِ جون کھول ءِ ھوالگ ءَ کنگ بیتگ –

بلوچستان ءِ دمگ پنجگور ءَ سر بیتگیں ھالانی رد ءَ پروم ءَ ھواریں مھلوک ءِ ھمراھی ءَ پروم بارڈر ٹریڈ ءِ نیمگ ءَ دیوان بیتگ ءُ مھلوک ءَ تران کنان ءَ گوشتگ مہ ما ھما اِنت اد ءَ آباد اِنت مئے زند ءِ والینگ ایران ءِ سیمسر ءِ سبب ءَ بیگ ءَ اِنت بلے نِی اے کار ءُ بار ءَ روچ پہ روچ مُشکل بیان اِنت-

آیاں تران کنان ءَ گوشت کہ نِی پرون ءِ کسانوکیں جاہ ءَ یک کمیٹی ءِ جوڑ کنگ بہ بیت تاکہ دراھیں جیڑھاں ھمے کمیٹی گیش ءُ گیوار کُت بہ کنت –

آیاں گوشت کہ دمگ ءِ مھلوک ءِ گوشگ اِنت کہ اد ءَ سیمسر یکدم نزیک اِنت ءُ گاڑیانی رُمب ءَ بازیں وئیل درپیش بیگ ءَ اَنت ءُ چریشی ءِ سبب ءَ بازیں مردم زوال بیتگ اَنت ءُ تنی وھدی مئے وتی جند ءِ گاریاں اسٹیکر ءُ ٹوکن نہ رس اِتگ –

دمگ ءِ مھلوک ءَ گوں دمگ ءِ انتزامیہ ءَ گوں دزبندی کرتگ ءُ گوشتگ کہ پروم ءَ دو بر اسٹیکر ءُ ٹوکن گاڑی والایاں بہ دنت ءُ آیان یکیں ماہ ءِ تہ ءَ سَے یا چار رند ءَ اینٹری بہ بیت پرچاکہ بارڈر ءِ ھمدپ ءَ مھلوک وتی زند ءَ والینگ ءَ اِنت –

زانگ بہ بیت پنجگور ءَ ھوار بلوچستان ءِ دگہ جاھاں ھم سیمسر ءِ جیڑھانی سر ءَ مھلوک یکشل ءَ زھرشانی کنگ ءَ اِنت –

مھلوک ءِ گوشگ اِنت بلوچستان ءِ گیشتریں مھلوک ءِ آس روک تھنا گوں سیمسر ءَ بندوک اِنت سیمسر ءِ بندش ءِ سبب ءَ بلوچستان ءِ مھلوک نیزگاری ءِ دیمپان بیت کُت کنت –

پنجگور ءِ دمگ کیلکور ءَ سیادی داروکیں بلوچ ٹکی مردماں یک شمبے ءَ تربت پریس کلب ءَ پریس کانفرنس کتگ –

پریس کانفرنس ءَ رحمت داؤد ءَ اھولکاراں گوں تران کنان ءَ گوشتگ کہ پاکستانی پوج ءَ مئے چار دوستگیں مردم بے دردی کُشتگ انت ءُ پیرجان پوج ءَ زوانسری آوارجتگ لٹ ءُ کٹ کُتگ کہ سک باز ٹپی بوگ ءَ آئی ءَ ٹپانی درد نہ سگ اِتگ ءُ بیران بیتگ –

رحمت داؤد ءِ گوشگ اَت کہ ریاستی ادارھاں مئے زند ازاب ءِ تہ ءَ رسینتگ، مئے لوگ جاہ مانداشتگ اَنت – آئی ءِ گوشگ اَت کہ مارا ھمے گوشگ بیت کہ پوج شمے پھازگ ءِ ھاتر ءَ آرگ بوتگ، بلے اے مارا جنگ ءَ اَنت مئے مال، دلوت ھم تیر جتگ ءُ کُشتگ اِنت ئِے، مئے پنچ ھُشتر ھم تیرانی آماچ کنگ ءُ کُشگ بیتگ اَنت، مئے زالبولانی ھم ننگ ءُ ناموس پادمال کنگ بوتگ اَنت ما سرپد کنگ بیت زاناں پھازدار ھمے وڑ کن انت؟ –

پریس کانفرنس ءَ گلام نبی ءَ تران کنان ءَ گوشتگ کہ مار ءَ مئے زمینانی سر ءَ کِشت ءُ کشاری ءَ نیل انت ءُ مئے کشار تباہ کنگ بوتگ اَنت –

آئی ءِ گوشگ ات کہ مئے ءُ مئے ھمساھگانی گِسانی سر ءَ بیڑ برگ بوتگ اش ءُ زالبولانی ننگ ءُ ناموس اش پادمال اش کرتگ اَنت ءُ ما چہ سرکار ءَ لوٹ کنیں کہ مار ءَ چہ اے بے لگامیں پوج ءِ زلم ءُ زوراکیاں چہ بہ رکینیت –

بانک جانگُل ءَ کسانیں زھگ ءِ رسانکدرانی دیم ءَ آؤرتگ ءُ گوشتگ کہ اے پنچ سالی مغل انت کہ اشی ءِ پت دلجان لشکر کشی ءِ میان ءَ شھید کنگ بوتگ اے چورھیں زھگ ءِ گوم ءَ کَے ھک کنت مار ءَ چہ اے مُلک ءَ ھک رسگ ءِ ھچ اوست نیست، مار ءَ مئے جُرم گوشگ بہ بیت کہ آکر ما اے پوج ءِ کجام کار ھراب کُتگ – گڈسر ءَ بانک جانگل ءَ گوشتگ کہ من بس ھمے گوشگ لوٹیں کہ مار ءَ وتی سرڈگار ءِ سر ءَ نندگ ءِ ھک دیگ بہ بیت –