TBP Balochi

دمگدار ایف سی ءَ بے میار کنگ ءِ جھد ءَ اِنت- کھول

بلوچستان ءِ دمگ کیچ ءِ بنجاھی شھر تربت ءَ گوستگیں روچ ءَ پاکستانی پوج ایف سی ءِ دست ءَ کُشگ بیتگیں زھگانی لاش کھول ءِ ھمراھی ءَ مروچی دومی روچ ءَ شھید فدا چوک ءَ زھرشانی نندانک ءَ نشتگ اَنت –

نندانک ءِ جاہ ءَ آل پارٹیز کیچ، سول سوسائٹی، نودربر گل یُ دگہ پھناتاناں سیادی داروکیں مردم ءُ زالبولانی بازیں کچے جاڑیگ اِنت –

اے وھد ءَ ڈی سی کیچ حیسن جان بلوچ نندانک ءَ اتکگ ءُ کھول ءِ گون ءَ زھرشانی نندانک ءِ ھلاس کنگ ءِ دزبندی ءِ کرتگ ءُ ایف سی وئیل ءَ دزمانجن نہ اِنت –

آئی ءَ گُشتگ کہ ایف سی کسے ءَ وتسر ءَ نہ جنت –

ڈی سی کیچ ءَ گُشتگ کہ من ایف سی ءِ پلامرزی ءَ کنگ ءَ نہ آں بلے اے وئیل ءَ ایف سی دزمانجن نہ اِنت – آئی ءَ ٹاہ داتگ کہ اے جاہ ءَ دزبمب دزکپتگ اَنت –

آئی ءَ گُشتگ کہ آل پارٹیز کیچ، اھوالکار ءُ سول سوسائٹی ءِ رھشون یک ھواریں کمیٹی ءِ جوڑ بہ کن اَنت من آیانی گون ءَ گپ ءُ رپ کن آں –

حسین جان بلوچ ءِ گوشگ اَت کہ اد ءَ نندگ ءُ کسے ءِ نام ءَ ارزی نبشتگ کرت نہ کن آں –

ھمے وھد ءَ زھگانی کھول ءَ گُشتگ کہ وئیل ءَ ایف سی دزمانجن اِنت ءُ ایف سی ءِ رکینگ ءَ دروگ بندگ ءَ اَنت-

کھول ءِ گوشگ اِنت کہ زھگ لوگانی پُشت ءَ لیب ءَ بیتگ اَنت آیانی نزیکیں کیمپ ءَ یک گولھے اتکگ ءُ آیانی سر ءَ کپتگ –

کھول ءِ رد ءَ ایف سی بنجل مئے لوگانی ھنچش نزیک اِنت کہ شپ ءَ آیانی ءُ مئے لوگ ءِ رژنانی نزیک اَنت –

آیانی رد ءَ وئیل ءَ پد ایف سی ءِ کارندہ وئیل جاہ ءَ سر بیتگ اَنت ءُ چم دیستگیں مردم اش گوں وت اش برتگ اَنت-

اے وھد ءَ گوستگیں ماہ ءَ ایف سی ءِ دست ءَ کُشگ بیتگیں زالبول تاج بی بی ءِ سیاد ھم نندانک ءَ جاڑیگ بیتگ اَنت ءُ آیاں گُشتگ کہ ھما رنگ ءَ تاج بی بی ءِ ارزی گار کنگ بیتگ مارا سما بیت کہ اے وئیل ھم ناشناس بیت اِنت ءُ ناشناسانی نام ءَ ارزی نبشتگ کنگ بیت اِنت –

زھرشانی نندانک ءَ جاڑیگیں عطاشاد ڈگری کالج ءِ نودربر جمیل بلوچ ءَ دی بلوچستان پوسٹ پتر ھال ءَ گُشتگ کہ ھمے سما بیت کہ سیاسی پاٹی ایف سی ءِ ھلاپ ءَ نندانک ءَ نشت نہ کن آں ءُ آ کھول ءَ لاچار کن اَنت ءُ ڈی سی ءِ دیم ءَ پریات کنگ ءُ لھتے لوٹانی پژدر ءَ لاشاں کل ءُ کسارت بہ کن اَنت –

جمیل بلوچ ءِ گُشگ اَت کہ تربت ءِ مھلوک ءُ ورنا کھولانی ھمراھداری ءَ بہ کن اَنت آیانی ھاٹیگ گیشتر مزن بیت اِنت –

زانگ بہ بیت گوستگیں روچ ءَ کیچ ءِ دمگ ھوشاپ ءَ یک مارٹر گولہ ءِ تراکینگ ءَ دو زھگ بیران بیتگ ءُ یکے زدگ بیتگ اَت-

اے وئیل ءِ پژدر ءَ گوستگیں روچ ءَ ھوشاپ ءِ جھمننداں زھرشانی کنان ءَ سی پیک دگ بند کرتگ ءُ چریشی ءَ پد کھول لاشانی ھمراھی ءَ تربت ءَ سر بیتگ اَنت ءُ گوستگیں روچ ءَ چہ شھید فدا چوک ءِ سر ءَ لاشانی ھمراھی ءَ نشتگ اَنت –

نبشتانک: بچکندے روان دے

نبشتہ کار: برانز بلوچ

دی بلوچستان پوسٹ

زندگی ءِ چاریں روچانی پند ءَ بنی آدم ءِ دیم ءَ بازیں چیز ءِ گوز ایت لہتیں پَش کپوکیں یات جوڑ بنت لہتیں انچیں نوبت ءُ ساھت اَنت کہ مردم آیاں بِھ یات کنگ نہ لوٹ ایت ہمے چاریں روچانی پند ءَ مردم بازیں چیز ءِ دَر بارت برے برے مردم ءَ گمان بِیت کس ئے بوگ نہ بوگ ءَ پرک ءِ نہ کنت بلَے باز مردم ءُ چیز ءِ بوگ ءُ نہ بوگ ءَ بازیں پرک ءِ کپ ایت زند ءَ زندگی ءِ چاریں روچ بس لہتیں پَشکپتیں ءُ کُچلیں گیر ءُ یاتانی چرک ءَ چرک وارت باز براں مردم جیڑ ایت جیڑگ ءُ جیڑہ ءَ ابید دگہ ھچ پَش نہ کپتگ نہ چیزانی است ءِ مان ایت نہ پُشدر ءِ بس لھتیں پشکپتیں ءُ دنز گبار گپتگیں گیر مَدان مَدان مِج ءَ اندیم گران اَنت باز برا مردم جیڑ ایت کہ کسے نا کسے ءِ بہ بیت کہ جیڑگانی پشدرا بے مانا اِنت ھمے بوگ ءُ نہ بوگ ءُ ھمے است ءُ نیست ءِ میانجی ءَ چاریں روچ ءُ یات ءُ گیرانی مُچی ءُ ہمے چاریں روچاں زند ءَ مردم یلَہ چَر اِنت ءُ نہ زانت کجا ءُ کئی تب ءَ زندگی بہ کنت ؟ کجا بروت کئی ھیال ءِ باپُشت ءَ دَزموش بکنت ؟ ہمے جیڑگ ءُ مارشتانی میانجی ءَ بازیں چیزے پَشکپیت نہ زانت ءِ بزانت ءِ نا زند ءُ جند ءِ شناس ءُ ڈس ءُ شان ءِ پَش کپ ایت بس ھمے زند ءُ پند ءِ چاریں روچانی روانی اِنت روان اِنت بس پشکپتیں چیز ھیال ءُ گیر اَنت ءُ مانشے ءُ لھتیں مُشت ھاک ءُ یک سنگے ءِ کہ باریں نام ءُ کرد ءِ نویسگ بِیت یا ناں ہمے کَش ءُ چیل ءُ جیڑگانی توک ءَ عمرے ءِ آسر بیت بس لھتوکیں گیر کہ ساھتانی مچّی ءَ اوار کَپ اَنت ءُ گوناں ھمے ساھت مردم ءَ کدی کدی چو سیاہ مار ءَ دَج اَنت-

ھمے چاریں روچاں زندے کدی کدی مردم ءِ مگَز اجب ہلتاں دُچار کپ ایت برے اکس ءِ سمبھینت برے یات ءِ کُبل ءَ کلیت کنت ھمے کہ ماہ ءَ چاردہ بیت اِنت گُش ءِ پَری دروشم اِنت ھمے دروشم ءُ ساھت کدی کدی پُشدر ءِ پَریچ اَنت گڑا ہمے دمان ءَ ھیال ءِ رِستر بے چاڑ کنت تچ ایت برے مہ نیک ءِ چَاپڑ اِنت مجلس ءُ تراں اِنت ٹریڑشنانی دُت بے نامیں مانشانی سنگانی سر ءَ تَلان اَنت ٹَک ءُ بچکندانی توار اِنت ءُ مچکدگ اِنت برے برے شال ءِ دمک ءُ دراں ءُ بروری ءِ دَگ ءَ گیر کار اِت ءُ بچکندی ءُ شُبین کَنت گُشے ہمے دمان ءَ کَس ءِ چِد ءَ چہ گوست ءَ گوات ءَ گُشے آئی ءِ وشبو گون اِنت ہمے ساعتاں گُشے مردم وت سر ءَ کمار ءُ ملار بیت نہ مان ایت ھچ بس گوں وت اِنت بَلے اے ھیال ءِ ھم اجب مسیبت ھمود ءَ کہ مردم مدامی بوگ لوٹ ایت ادارُکے ہم نہ جَل ایت برے برے کہ ھیال ہمے اکس ءَ سمبھینت ءُ ساھتاں پَریچ کَنت گڑا مردم ءِ ذہن ءَ کیت مردم ھیال ءِ ھمے Creativity ءُ اکس ءِ کہ شُبین ءَ دنت پد ءَ جیڑگ ءِ اجبیں لزتے کیت ھمے ساھت گَندے گوں مردم ءَ کید کنگ بوتیناں گڑا ہمے سرجمیں ھیال ءِ Creativity اکسے جوڑ کُتگ اَت پہ تو رواں داتگ اَت بلکیں ترا سما کپتگ اَت کہ است کَسے مدامی تھاریں شپاں استال ھساب کنت ءُ وھد ءِ کہ ماہ ءَ چاردہ بیت ماہ ءِ سر ءَ تئی اکس ءَ ہم سمبھینت اے ھما اِنت کہ میتگ ءِ ہما کھیر ءِ سردیں سیاھگ ءَ بگر داں شال ءِ دمکاں مدامی ہمے نہیت ءَ ویل بیت کہ کد تئی دید ءِ اکس ءِ دیدگاں بَل اِت ترا یات بت کسانی ءِ ھما لیب جاہ ؟ ھما دَربَر جاہ ءُ ہما کھیر ءِ سیاھگ کہ مدامی ئیگیں ساھتاں پہ سیل ءُ سواد اتک ئے –

ترا بلکیں سما مہ بیت بلَے اِنبَری من ترا سرپد کنگ لوٹاں ءُ ترا سما ہم بہ بیت اِنت کہ است کسے مدامی تئی یاتاں ءُ آھی ءِ جیَڑگانی بُنزہ ہم تو ئے کہ مدامی آہی ءِ رَستریں ھیال اکس سھمبینت ھمے اَکس پری دروشم ءَ تئی اکس منا زند ءِ میتگ ءَ بارت تئی اکس کہ زندے شُبین اِنت-

ترا سما بہ بیت اِنت کہ است کسے نشتگ کوھی ٹول سر ءِ مدامی پہ تو گوں گوات ءَ الوت کنت ءُ غزل نویست مدامی شال ءِ دمکاں یلَہ چَر بُت ءَ کہ کد دیدے نَباشتیں تلب ءِ سرجم بہ بیت اِنت-

ترا اگاں سما بہ بیت اِنت است کسے کہ نشتگ دور ساھتانی مچی ءَ ایوک ءُ ابیتک برے ماہ ءِ ماھکانی ءَ گوں تران کنت برے تھارونکی ءِ شپاں گوں استالاں گیر کار اِیت ساھتاں سال ءُ ماہ پِرگوز اَنت پہ داب بلَے اُپ ءِ نہ گلگ ءِ اگاں ترا سما بہ بیت اِنت اے ابیتک ءُ ایوکی ءِ ساھت برے چو گَرند ءُ گروک بنت برے اے ساھت چو مچی ءَ سر گوز بنت-

تو بس یک برے گوں گوات ءَ بچکندے رواں دے اے زند ءِ دراھیں پشکپتیں ساھت مّچی ءَ شادکامی بَنت بوت کنت اے پَشکپتیں مانش ءِ سنگ ءَ نام ءُ کرد ءِ دیگ بیت اِنت بس ھمے بچکند ءِ روانی ءَ گوں گوات ءَ رواں دیان کن تئی بچکند ءُ دیدئے گنوک پھک گنوک اِنت یلَہ چَر اِنت گوں وھدے بے ریائیں نوبتاں-

تئی اھد ءِ سر گنوک
مرچاں نشتگ لبز پَول ایت
اکس ئے ءِ دروشم ءَ جنت
کاگز
کلم
دُت ءُ پُر
برے کشک ءِ رند ایت
برے چو گنوک ئے ءَ
زَار کنت
برے برے
نگاہاں شانک دنت
ھیال ئے دروشم ءَ
اکس سہمبینت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دبئی انٹر نیشنل کرکٹ پٹ ءَ یکشمبے ءِ روچ ءَ بوتگیں آئی پی ایل گوازی ءَ چنئی سپر کنگز ءَ دھلی کیپیٹل چار وکٹان پروش داتگ ءُ وت ءَ پائینل گوازی ءَ سرکتگ – دبئی کرکٹ پٹ ءَ بوتگیں گوازی ءَ دھلی ءَ بیست اوورانی تہ ءَ پنچ وکٹانی تاوان ءَ یک سد ءُ ھپتاد دو رن جوڑ کرتگ- ریتوراج ءِ ھپتاد ءُ رابن اتھپا ءِ شست ءُ سَے بزاں ھردوکانی نیم سنچری ءِ کمک ءَ چنئی ءَ شش وکٹانی تاوان ءَ ٹارگٹ پروشتگ ءُ گوازی وتی نام ءَ کتگ کپٹن ڈونی ءِ سوبمندی ءِ چوکا جتگ –

چنئی ءَ اے سوبمندی ءِ ھواری ءَ وت ءَ پائینل ءَ سرکتگ بلے دھلی انگت گوازی ھلاس نہ انت نوں آ سیزدہ اکتوبر ءَ شارجہ پٹ ءَ دومی کوالیفائر رائل چیلنجرز بنگلور یا کولکاتہ نائٹ رائیڈرز ھما کہ باج ءَ بارت ھمائی ءِ دیم ءَ گوازی کنت – اگاں ریشبھ پنت ءِ ٹیم کٹیت گڑا پائینل ءَ گوں چنئی ءَ دیم پہ دیم بیت اِنت –

دھلی ءِ نیمگ ءَ داتگیں یک سد ءُ ھپتاد ءُ سَے ءِ ٹارگٹ پروشگ ءِ ھاتر ءَ چنئی ءِ اولی وکٹ اولی اوور ءِ چارمی بال ءَ کپتگ کہ فاف ڈو پلیسی ءِ وکٹ ات ءُ اینریک ءَ بولڈ کت اشی ءَ پد ریتوراج ءُ رابن ءَ یک سد ءُ دہ رن ھواری ءَ جوڑ کرت ءُ چنئی مھکم کت ھردوکاں نیم سنچری کتگ ات کہ ٹام کیرن ءَ چاردھمی اوور ءِ سیمی بال ءَ اتھپا شریس ایئر ءِ دست کیچ بوت – اتھپا ءَ وتی اننگز ءَ چاردہ چِل ءُ چار بالاں ھپت چوکا ءُ دو چکا جتگ شاردل ٹاکر اتک بلے آ ھمے اوور ءِ گڈی بال ءَ واتر بوت آئی ءَ دنیگت ءَ ھچ نہ کرتگ ات کہ ایئر ءِ دست ءَ کیچ بوت – امباتی رائیڈو یک رن ءِ جوڑ کت ءُ رن آؤٹ بوت اے وھدی چنئی اسکور یک سد ءُ نوزدہ ات چار وکٹ کپتگ ات – اشی ءَ پد گائیکواڈ ءَ معین علی ءِ ھمراھی سِی رن جوڑ کرتگ ات کہ وتی اننگز ءِ نوزدھمی اوور ءِ اولی بال ءَ اکشر پٹیل دست ءَ کیچ بوت –

دھلی ءِ نیمگ ءَ چہ ٹام کیرن ءَ سَے وکٹ گپت وھدیکہ نورکھیا ءُ اویش ءَ یک یک وکٹ گپت –

اشی ءَ پیش چنئی ءِ کپٹن مھندر سنگھ دونی ءَ ٹاس کٹ ایت بلے پیلڈنگ کنگ ءِ پیسلہ کت – دھلی ءِ نیمگ ءَ پرتھوئی ءَ جوانی ءَ گوازی کنان ءَ سِی ءُ چار بالاں شست رن جوڑ کرت آئی ءَ ھپت چوکا ءُ سَے چکا جت – رشبھ ءَ ہیٹ مائر ءِ ھمراھی ءَ ھشتاد ءُ سَے رن جوڑ کرت ہیٹ مائر ءَ بیست ءُ چار بالاں سِی ءُ ھپت رن جوڑ کت آئی ءَ سَے چوکا ءُ یک چکائے جت – شیکھر دھون جوش ہیزل ءِ بال ءَ وکٹ کیپر دونی ءِ دستاں کیچ بوت شیکھر ءَ ھپت بالاں ھپت رن جوڑ کرت – گوستگیں کپٹن شریاس ایئر ءَ ھشت بالانی تہ ءَ بس یک رنے جوڑ کنگ ءَ سوبین بوت ءُ پد ءَ کرہیزل ءَ شکار بوت – اکشر پٹیل یازدہ بالاں دہ رن جوڑ کرت ءُ آف اسپینر معین علی ءَ آؤٹ کت ہیٹ مائر ڈوین براوو ءَ رویندر جڈیجہ ءِ دست ءَ کیچ کنائینت ءُ پرتھوی دویندر ءِ بال ءَ فاف ڈوپلیسی ءَ کیچ کت –

چنئی ءِ نیمگ ءَ چہ ہیزل ووڈ ءَ بیست ءُ نھ رناں دو وکٹ گپت وھدیکہ جڈیجہ، معین، براوو ءَ یک یک وکٹ ءِ گپت –

سربوتگیں ھالانی رِد ءَ یکشمبے ءِ روچ ءَ بلوچستان ءِ کاروباری شھر ھب ءَ سٹی تانہ ءِ نزیک ءَ گاڑی ءِ سر ءَ دستی بمب اُرش ءَ ٹی وی چینل ءِ اھوالکار ءِ ٹپی بوتگ ءُ پد ءَ ٹپانی درد نہ سگتگ ءُ مُرتگ –

اُرش اھوالکار شاھد زھری ءِ گاڑی ءِ سر ءَ کنگ بوتگ چریشی ءَ شاھد ٹپی بوتگ کہ ھما دمان ءَ حب سیول نادراھجاہ ءَ سرکنگ بوتگ ءُ اود ءَ ٹپانی درمان ءَ پد کراچی ءَ دیم دیگ بوتگ ھمود ءَ ٹپانی درد نہ سگتگ ءُ مُرتگ-

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ شاگد زھری کوش ءِ زمہ واری منّ اِتگ –

جارکش جئیند بلوچ ءَ وتی درشان ءِ تہ ءَ گوشتگ کہ بی ایل اے ءِ سرمچاراں دہ اکتوبر ءَ ھب ءِ شھر ءَ زورگیریں پاکستانی پوج ءِ کارندہ شاھد زھری ءِ سر ءَ بمب اُرشے کتگ ءُ کُشتگ –

آئی ءَ گوشتگ کہ اے کار بی ایل اے ءِ اسپیشل ٹیکٹیکل آپریشنل اسکواڈ ءَ کتگ، تراک ءَ چیریں ادارھانی کارندہ شاھد زھری مُرتگ وھدیکہ آئی ءِ گاڑی تباہ بوتگ –

جارکش ءَ گوشتگ کہ پاکستانی پوج ءِ چیریں ادارہ ایم آئی ءِ کارمند شاھد زھری سال دوھزار ھشت ءَ اھوالکاری ءِ دروشم ءَ بلوچ زرمبشت ءِ بگیری ءَ کار کنگ ءَ بوتگ – آ چیریں ادارھانی نیمگ ءَ جوڑ کنگ بوتگیں مارخور نامں ٹولی ءِ سربراھی ءَ کنگ ءَ بوتگ، کہ آئی ءِ تہ ءَ بزگریں مردم زر ءِ ملام داتگ ءُ ھوار کتگ انت پد ءَ مکبری، بلوچ ورنایانی آورجنی ءُ کُشگ ءَ پرماتگ انت –

جئیند بلوچ ءَ گوشتگ کہ اے ٹولی ءِ یک دگہ کارمند ءِ جلیل زھری بیست ءُ شش ستمبر سال دوھزار ءُ ھژدہ ءَ بی ایل اے سرمچاراں نشانگ کتگ کشتگ –

جارکش ءَ گوشتگ کہ شاھد زھری اھوالکاری ءِ پوشاک ءَ گوادر ءَ چہ کراچی ءَ نشہ باپاری، کتکاریں ٹولیاں ھوار بوگ ءُ کار ءُ بار کنگ ءِ ھمراھی ءَ کسانسالیں زھگانی گوم ءَ زیادتی ھوار دگہ چاگردی ھرابیاں ھوار بوتگ وھدیکہ اے کتکاریاں آئی ءَ ایف سی ءِ کرنل ءَ کمک گون بوتگ –

جارکش جئیند بلوچ ءَ گوشتگ کہ بی ایل اے اے گپ ءَ پدر کنگ لوٹ ایت کہ مئے گل آزاتیں ھیالانی درشانی ءُ پریس ءِ آزاتی سر ءَ یکین داریت مدام اھوالکاران گوں تعاون کنت، بلے پاکستانی پوج ءَ وتی بازیں کارندھے پریس کلبانی تہ ءَ دیم داتگ کہ آھانی کار بلوچ راجداریں باسکانی نشاندھی کنگ انت ءُ بلوچ راجی زرمبشت ءِ بگیری کنگ ءَ انت – اے کار ءَ درسیں گیرجانبداریں اھوالکار سرپد انت –

جارکش ءَ اھوالکاران چہ لوٹ کتگ گوشتگ کہ آ وتی کار ءِ تہ ءَ شاھد ءِ وڑیں سیاھیں روباھاں در بہ کن انت اگاں ناں بی ایل اے اے دابیں درسیں راج ءُ زرمبشت دژمناں وت ھلاس کنت آ تری ھر وڑیں رنگ، زات ءُ کار ءَ بہ بیت –

بلوچ اسٹوڈنٹس ایکشن کمیٹی ءِ بُنجاھی چیئرپرسن صبیحہ بلوچ ءِ براتانی زورانسری آوار جنی ءِ بگیری ءَ شال پریس کلب ءِ دیم ءَ زھرشانی کنگ بوتگ ءُ چریشی ءَ مزنیں کچے ءَ نودربراں بھر زرتگ-

زھرشانی ءِ تہ ءَ گپ ءُ تران کنان ءَ گْوشتگ کہ بلوچستان ءَ سیاسی امل سر ءَ گر ءُ داری کتگ – سرجمیں سیاسی مردمانی راہ ءِ سر ءَ دیم ءَ اوشتوک اَنت-

آھاں گْوشتگ کہ بلوچستان ءَ انوگیں وھد ءَ نودبرانی سُر پُر سیاسی تاکت ءِ رنگ ءَ زانگ بیت ءُ نودربر جمھوری وڑ ءَ پیم چہ سیاسی جَھد کنگ ءُ آھگ اَنت – نودبرانی نیمگ ءَ چہ بؤکیں سیاسی سُرپرانی سر ءَ مدام مکن کنگ ءُ دیم ءَ اوشتگ ءِ جُھد کنگ ءَ اَنت ءُ بساک ءِ بُنجاھی چیئرپرسن ءَ سیاسی سُرپُر ءَ چہ یک کر کنگ ءِ ھاتر ءَ ھم ھمے ھُنر ساز اِتگ- اے گرانیں وھد ءَ نودبریں گل بساک ءِ ھمراہ ءَ اَنت ءُ بیگواہ بوتگیں مردمانی یل کنائینگ ءَ جُھد ءِ راہ در چن ایں –

زھرشانی ءِ تہ ءَ گپ ءُ تران کنان ءَ گْوشتگ کہ بلوچ اسٹوڈنٹس ایکشن کمیٹی ءِ سنٹرل کمیٹی ءِ باسک رفیق بلوچ ءَ گْوشتگ کہ گل اے وڑیں ھُنراں چہ بُنجاھی راھشون ءَ را گوں تاکت ءِ سر ءَ بے توار کنگ ءِ جُھد ءَ کنت گُڑا گل اشی ءِ بگیری ءَ جھد کنت – بلوچ اسٹوڈنٹس ایکشن کمیٹی اے گرانیں وھد ءَ سرجمیں نودربر گلاں گوں ھال ایوال کنگ ءَ اِنت ءُ اشی ءِ بگیری ءَ باندا نودربر گلانی نیمگ ءَ چہ گپ ءُ تران کنگ بیت ءُ دیمتر ءَ ھم اے درگت ءَ جار جنگ بیت –

بلوچستان ءِ دمگ کیچ ھوشاپ ءَ پاکستانی پوج ءِ گولہ باری ءَ بیران بوتگیں زھگانی کھول ءَ کیچ ءِ بنجاھی شھر تربت ءَ شھید پدا چار راہ ءِ سر ءَ زھرشانی کتگ ءُ ننداک جتگ-
ٹی بی پی ءَ سربوتگیں ھالانی رِد ءَ گونڈلانی کھول ءَ آھانی جون ھسپتال ءَ چہ درکتگ ءُ شھید پدا بلوچ ءِ چار راہ ءِ سر ءَ آؤرتگ ءُ زھرشانی کتگ – زھرشانی ءَ آل پارٹیز کیچ ءُ دگہ تک ءُ پہناتاں سیادی داروکیں مردماں ھما وھد ءَ زھرشانی بھر زرتگ –

دی بلوچستان پوسٹ ءِ اھوالکارے گوم ءَ تران کنان بیران بوتگیں زھگانی کھول ءِ گوشگ ات کہ مئے زھگانی کوش ءَ ایف سی ھوار انت ءُ وئیل ءَ ھواریں کارمند سزا دئیگ بہ بنت ءُ مئے چکانی گوم ءَ ھک کنگ بہ بیت –

آھانی گوشگ ات کہ وئیل ءَ سیکورٹی پوج ءِ بری الزمہ گوشگ ناھکی ئے ءُ ھک لوٹ کنیں –

زانگ بہ بیت مروچی دہ اکتوبر ءَ کیچ ءِ دمگ ھوشاپ ءَ ایپ سی ءِ نزیکیں پانگس ءَ ماٹر گولہ آس دئیگ بوتگ چریشی ءَ ھپت سالی اللہ بخش ءِ عبدالواحد ءُ پنچ سالی جنکو جنکو شراتون ء عبدالواحد ھما دمان ءَ بیران بوتگ انت وھدیکہ مارٹر گولہ ءِ زد ءَ اتکگیں مسکان ء وزیر سک باز ٹپی بوتگ ھما دمان ءَ نادراھجاہ ءَ برگ بوتگ – وھدیکہ ایف سی وتی کتکاریاں منّگ ءَ تیار نہ انت ءُ وئیل ءِ تردید کتگ –

اے درگت ءَ رحیم بخش بلوچ کہ بیران بوتگیں زھگانی ناکو انت آئی ءَ اھوالکاراں گوں تران کنان ءَ گوشتگ کہ آئی ءِ گِس ءِ پُشت ءَ گوازی کنوکیں زھگانی سر ءَ نزیکیں پوجی پانگس ءَ چہ گولہ آس دئیگ بوتگ کہ ھردو زھگ بیران بوتگ انت ءُ یکے زدگ بوتگ ھما دمان ءَ نادراھجاہ ءَ برگ بوتگ –
آئی گوشتگ کہ ھردو بیران بوتگیں زھگ برات ءُ گھار انت آھانی مات ھم ماژگی نادراھی آماچ انت پمیشکہ ھردو گونڈل منی مات ءِ گور ءَ رُستگ ءُ مزن بوتگ انت –

ایم ایس ڈاکٹر لال جان بلوچ ءِ گوشگ ات کہ مسکان ءِ دلبند ءُ جگر ٹپ انت آ آپریشن ءَ پد آئی سی یو ءَ برگ بوتگ کہ جاور نگیگ انت –

وئیل ءِ ھال سربوھگ ءَ آل پارٹیز کیچ کنوینئر مشکور انور ایڈوکیٹ ھمراھی ءَ بی این پی ءِ دمگی رھشون شے نزیر احمد، حاجی عزیز، جمعیت اہلحدیث ءِ رھشون یلان زامرانی سول سوسائٹی گلزار دوست، بی ایس او بنجاھی کمیٹی ءِ باسک کریم شمبے آرگنائزر بالاچ طاہر دگہ بازیں مردم ءَ نادراہ جاہ ءَ وت ءَ سر کتگ کھول ءِ گوم ءَ دلپدردی درشانتگ –

دومی نیمگ ءَ بلوچ یکجھتی کمیٹی، آل پارٹیز ءُ دگہ راجداریں گلاں وئیل ایرجتگ ءُ چاگردی ترامجاہ ٹویٹر ءَ جتائیں پگر ءِ منوگراں بلوچستان ءَ اے وڈیں ھواریں پوجی کارمندانی بگیری ءَ گامگیج زورگے لوٹ کتگ –

ترامجاہ ٹویٹر ءَ StopBalochGenocide ءِ ھیش ٹیگ پاکستان ءِ تہ ءَ ٹرینڈ ءَ بوتگ کہ آئی ءِ تہ بلوچ راجداریں باسکاں ھوار پشتون، سندھی، ءُ دگہ سوشل میڈیا ایکٹویسٹاں وتی رد ءِ امل ءَ اے وئیل بلوچ چکچینی گوشتگ –

ھوشاپ وئیل ءِ درگت ءَ بلوچ یکجھتی کمیٹی ءِ جارکش ءَ رسانکدراں وتی شنگ کرتگیں درشان ءِ تہ ءَ ھوشاپ ءَ پوج ءِ نیمگ ءَ لس مھلوک ءِ سر ءَ آس داتگیں ماٹر گولہاں چہ زھگانی شھیدی ءُ ٹپی بوھگ ءِ وئیل ایرجتگ ءُ گوشتگ کہ بلوچستان ءِ تہ ءَ پوج یکشل ءَ زوراکی ءِ سیمسراں سرگوز کنگ ءُ لس مھلوک ءَزوراکیانی نشانگ کنگ انت – آئی ءَ گوشتگ کہ مروچی ھوشاپ ءَ ھوشاپ ءَ پوج ءَ کسانیں زھگانی سر ءَ مارٹر گولہ آس داتگ چریشی ءَ دو زھگ بیران ءُ یکے زدگ بوتگ –

جارکش ءَ گوشتگ کہ مروچی دیم ءَ اتکگیں وئیل اولی وئیل نہ انت بلکیں گوستگیں دھک ءَ چہ اے وئیلانی تہ ءَ گیشی گندگ آھگ بوھگ انت – پوج ءِ نیمگ ءَ پیسر ءَ چشیں پدردین وئیل دیما اتکگ انت کہ یک نیمگ بلوچ ءِ چادر ءُ چار دیوالی یکشل ءَ لگتمال بوھگ انت ءُ ھمود ءَ بے سوب ءَ مردم کُشگ بوھگ انت –

جارکش ءَ گوشتگ ھمے وڈ گوستگیں روچاں پوج ءَ تربت ءل نودربر حیات بلوچ شھید کتگ ءُ ھمے سال ءِ تہ ءَ ملک ناز ءُ کلثوم تربت ءِ دمگان وتی گسانی تہ ءَ شھید کنگ بوتگ انت – اے دابیں گیر انسانی ءُ گیرکانودی کارانی تہ ءَ یک نیمگے پوج دست مان انت ءُ دومی نیمگ ءَ آئی داشتگیں کشندہ ٹولیانی – بلوچستان ھر تک ءُ پہناتاں سیادی داروکیں مردم یکشل ءَ ریاست زوراکیانی آماچ بوھان انت –

جارکش ءَ گوشتگ کہ بلوچستان ءِ تہ ءَ اے دابیں وئیل ھمک روچ بوھگ انت کہ ھمک روچ مردم کُشگ بوھگ انت ھمے وڈ گوستگیں روچ ءَ تربت ءِ دمگ آپسر ءَ کماشیں زالبول ءِ دار ءِ چنگ ءَ رؤت تیرانی آماچ کنگ ءُ کُشگ بیت کہ تاج بی بی ءِ ھون ھُشک نہ اتاں ھوشاپ ءَ اے وئیل دیما اتک – بلوچستان ءَ اے وئیلانی دیما آھگ اے گپ ءِ پدرائی ءَ کن انت کہ بلوچستان ءِ تہ ءَ بے کساس ءَ بلوچانی چک چینی بوھگ انت –

جارکش ءَ گوشتگ کہ بلوچ یکجھتی کمیٹی اے وئیل ءُ پوج ءِ سیمسران سرگوز بگیری جمہوری ترز امل ءَ وتیگی کنت زھرشانی کنت –

آل پارٹیز ءِ جارکش ءَ وتی داتگیں درشان ءِ تہ ءَ گوشتگ نازاکیں زھگاں بے دردی کُشگ ءَ انسان دژمنیں تاکتاں وتی زلم زوراکیانی سرجمیں سیمسر سرگوز کتگ انت –
ائی ءَ گوشتگ کہ آل پارٹیز کھول ءِ درد ءَ ھوار انت ءُ کھول ءَ ھک دئیگے گوں آھاں ھمراہ انت –

بلوچستان دمگ پنجگور ءَ گوستگیں شپ ءَ پوج ءَ گِسانی سر ءَ بیڑ برتگ مردمانی گران نھادیں سامان ھم گوں وت برتگ انت –

گیشیں ھالانی رِد ءَ گوستگیں شپ ءَ پنجگور ءِ ھند پروم ریش پیش ءَ پاکستانی پوج ءَ خان جان ءُ دگہ مردمانی گِساں بیڑ برتگ ءُ پرشت پروش کنگ ءَ پد مردمانی گرانھادیں سامان گوں وت برتگ انت –

دی بلوچستان پوسٹ ءِ اھوالکار ءِ گوم ءَ کھول ءِ مردماں تران کنان ءَ گوشتگ کہ گوستگیں شپ ءَ پوج ءُ دمگی کشندہ ٹولیانی ھمراھی ءَ خان جان ءُ دگہ سیاد وارثانی گِساں بیڑ برتگ چُک ءُ زالبول سک باز لٹ کُٹ کرتگ انت ءُ ماژگی تشدد کرتگ انت –

زانگ بہ بیت اے گِس بلوچی زبان ءِ ورناھیں آشوبی شائر فضل شیر ءِ مستریں برات خان جان انت – خان جان پیسر ءَ پاکستانی پوج ءَ آوار جتگ ءُ بازیں وھد ءَ بندیگ کتگ وھدیکہ یل بوھگ ءَ پد ناشناسیں مردماں بیست ءُ سَے مئی سال دوھزات بیست ءُ یک ءَ پنجگور ءَ وتی وارس ءِ ھمراھی ءَ تیر باران کتگ ءُ شھید کتگ –

بلوچستان ءِ تہ ءَ گیشتر بلوچ جھدکارانی کھول بیگواہ کنگ بنت یا جنگ ءُ کُشگ بنت راجدوستانی گوشگ اِنت کہ کھول ءَ یکجاھیں سزا دئیگ بوھگ انت آھاں اے کتکاریانی الزام ریاستی ادارھانی سر ءَ لڈیتگ –

بلوچ اسٹوڈنس کونسل ملتان ءِ نیمگ ءَ غلام حسین شوہاز ءِ یات ءَ لبزانکی مراگِش ءِ اڈ دئیگ بوتگ –

مراگش ءَ غلام حسین شوہاز ءِ زند ءُ ازم ءُ آئی ءِ بلوچی شائری ءِ کِرد ءِ سرءَ چمشانک دئیگ بوتگ، مراگش ءِ دومی بھر ءَ بلوچی ءُ براھوئی ءَ شائری، گلوکاری وھدیکہ سیمی بھر ءَ نوکیں باسکاں وتی پجار کنائینتگ ءُ مراگش ءِ گڈسر ءَ بلوچی چاپ بوتگ –
لبزانکی بھر ءَ اسٹیج سیکریٹری معراج بلوچ ءُ نعیم بلوچ ءَ کتگ، گلام حسین شوہاز ءِ زند ءُ ازم ءُ لبزانکی کارانی سر ءَ انیس بلوچ، معراج دیدگ ءُ فاروق بلوچ ءَ وتی ھیال درشانتگ انت – دومی بھر ءَ بلوچ اسٹوڈنس کونسل ءِ باسکاں بلوچی ءُ براھوئی شائری ءُ گلوکاراں وتی سرڈگار ءُ زبان ءِ گوم ءَ مھرے ازھار کتگ –

مراگش ءِ سیمی بھر ءَ بلوچ اسٹودنس کومسل ملتان ءِ نوک اتکگیں باسکاں وتی پجار کنائینتگ ءُ مراگش ءِ گڈسر ءَ کونسل ءِ درسیں باسکاں بلوچ چاپ کتگ ءُ بلوچستان ءِ دود ربیدگ پنجاپ ءِ تہ ءَ ھم زندگ داشتگ –

بلوچ اسٹوڈنس کونسل ملتان ءِ جارکش ءِ رِد ءَ کونسل داخلہ، اسٹڈی سرکل، نودربرانی جیڑہ گیش گیواری ، زبان ءُ دودربیدگ ءِ دیمروئی ءِ ھمراھی ءَ ھر سال مراگش اڈ دنت کہ وتی راجدپتری ھیروانی زند ءُ آھانی کِرد سر ءَ لبزانکی مراگش ایر کنت – او اے مراگش ھم کونسل ءِ ھمے ترجیح پدر کنت –

یونائیٹڈ بلوچ آرمی ءِ جارکش مرید بلوچ ءَ رسانکدر ءَ شنگ کتگیں درشان ءِ تہ ءَ قلات پوج ءِ چوکی ءِ سر ءَ بمب اُرش ءِ زمہ واری ءَ منّ اِتگ-

یو بی اے ءِ جارکش ءَ گْوشتگ کہ گوستگیں شپ ءَ سرمچاراں قلات ءِ دمگ کوھنگ ءَ بُنجاھی دگ ءِ سر ءَ پاکستانی پوج ءِ چوکی ءِ سر ءَ دست بمب اُرشے کتگ –

مرید بلوچ ءَ گْوشتگ اُرش ءَ پاکستانی پوج ءِ یک کارندھے مرتگ وھدے کہ دومی ٹپی بوتگ –

جارکش ءَ گْوشتگ پوج ءِ بگیری ءَ مئے گل ءِ اُرش داں بلوچستان ءِ آجوئی ءَ برجاہ بنت-وی