TBP Balochi

‏سمّی ءِ ارس بچکند بنت

شائر: نور

دی بلوچستان پوسٹ

‏پُل ءُ وشبوه ءِ گستائی ءِ گپ کئے ءَ باور اِنت
‏روچ چہ روژنائی ءَ سستگ وتی
‏ماهکانی چہ ماه ءَ گِسر
‏ما ءُ تو در پہ در
‏شپ تهاری چو کِیلّ ءَ اِنت ما دیستگ اَت
‏گُلزمین ءَ منی
‏اِے سپر کہ مساپر پِلکّان اِتنت، ارس ءُ هونان اتنت،
‏تیر سوهان اِتنت مرد جُنزان اِتنت
‏درچک ءُ دارانی گلّہ وتی جاگہ ءَ
‏مردمانی دل ءِ روکیں آس ءَ بہ توسیت نہ گنداں کَسے
‏وائے کم دزرسی وائے مئے بے وسی
‏گاریں مردانی شوهاز گْران اِنت بلے
‏مهلبو دل مہ جن
‏وهد پِر گردیت هرچی هما پیم بیت
‏زلم ءُ زورانی شپ کِنزیت آ دیم بیت
‏گاریں کِشکانی بندیں مساپر اوں واتر کن اَنت
‏سبز ءُ میتاپ بوستان ءِ آپ بند بنت
‏سمّی ءِ اَرس بچکند بنت

نبشتانک: اوگانستان ءِ گْوست، ھست ءُ آیوک

نبشتہ کار : ابدلستار بُگٹی

دی بلوچستان پوسٹ

انچوشکہ اوگانستان ءِ بابت ءَ من وتی پیشی ئیں نبشتانک ءِ تہ ءَ ھمے درشان کُتگ اَت کہ اگاں ما 1989 تاں 1992 ءِ میان ءَ بچّار ایں گُڑا ما سرپد بَہ ایں کہ چَہ سوت یونین ءِ لشکر روگ ءَ پد نّاں گْوست ءِ کارمستر ڈاکٹر نجیب اُلہ ءِ سرکار چہ پاکستانی کاسگ چٹّین ءُ وتگڑیں مجاھدین ءِ دست ءَ پْروشت نَیکہ چہ اوگانستان ءَ امریکی جنگی لشکر ءِ روگ ءَ انیگیں کارمستر ڈاکٹر اشرپ گنی ءِ سرکار چہ وتگڑیں ملانی دست ءَ پْروش ایت۔ ما بے ھال مہ بَہ ایں کہ ھما وھداں ھم یک بلاھیں باوستے ھست اَت کہ چَہ سوت یونین ءِ روگ ءَ پد ڈاکٹر نجیب اُلہ ءِ سرکار لھتیں روچانی تہ ءَ پْروش ایت۔ یک امریکہ بلاھیں شونداتی ترامگیجے ءِ رِد ءَ اِے ھم گْوشگ بیتگ اَت کہ شش ماہ ءَ پد سویت یونین ءِ پلہّ مُرزیں نجیب سرکار وت مُلکاری جیڑھانی آسر ءَ پْروش ایت۔ دومی نیمگے ءَ شش ماہ ءَ پد 1989 ءَ پاکستانی جنرل ھمید گُل ءِ رھشُونی ءُ پوج ءِ کُمک ءَ وتگڑیں مجاھدیناں پہ اوگان ولایت (سُوبہ)  نگرھار ءِ شھر جلال آباد ءِ زورگِری ءَ بلاھیں جنگی اُرشے کُتگ ءُ سرجمیں شھر ءُ کِر ءُ کش ءِ دمگ دزگیر کُتگ اَنت۔ البت پد ءَ اوگان لشکر ءَ “وتن یا کپن” ءِ نامداریں بیرگِری آپریشن پہ جلال آباد ءُ ولایت نگرھار ءِ آجوئی ءَ بُنگیج کنان ءَ پاکستانی پلہّ مُرزیں مجاھدیناں پْروش دات ءُ نگرھار ولایت چہ مُجاھدیناں آجو کنائینت۔ اِے جنگ ءَ شش ھزار کاسگ چٹّیں مجاھدین مُرتگ ءُ ھزارانی کچ ءَ ٹپی ءُ دزگِیر کنگ بیتگ انت۔ پد ءَ ھمے جلال آباد آپریشن ءِ بے سوبی ءِ آسر ءَ پاکستانی سروزیر بانُک بینزیر بھٹو ءِ سرکار ھلاس کنگ بیتگ۔ بزاں سویت یونین لشکر ءِ روگ ءَ پد ھم نجیب سرکار ءَ وت ءَ یکشل ءَ تاں سَے سال ءَ برجاہ داشت۔ ایشی ءِ دو مستریں سبب ایش اَت اَنت کہ چریشی ءَ ڈاکٹر نجیب ءِ سرکار نہ پْروشتگ اَت۔ اولی بہ گِر 1989 تا 1991 ءَ چہ سوت یونین ءِ نیمگ ءَ ھر ماہ ءَ ڈاکٹر نجیب الہ ءِ سرکار ءَ $300 ملین کُمک رسگ ءَ اَت۔ گُڑا تاں دو سال ءَ پہ مجاھدین گل ءِ بیگری ءَ ھمے ھرماھیں کُمک پہ اوگانستان سرکار ءِ بلاھیں مدتے بیتگ اَنت پمیشکا ما تچک بَہ ایں کہ اگاں امریکہ اوگان سرکار ءَ لشکری، دیمروئی ءُ دِگہ بنی آدمی کُمک، ھاس ھرسال ءِ 4.5 بلین یو ایس ڈی لشکری کُمک برجاہ بہ دار ایت گُڑا ناں راجمستری ئیں اوگان سرکار پْروش ایت ءُ نَیکہ اوگان لشکر تالبان ءِ وتگڑیں جھادی جنگ ءَ پْروش وار اَنت ۔
 
اولی اوگان اُلسی جنگ ءُ تالبان ءِ بُنگیج: سھودی اَرب، امارات ءُ پاکستان ءِ لشکر ءِ کُمک ءَ نیکراھی ناشرکاریں گل اوگان تالبان 1994 ءَ اڈ دیگ بیتگ۔ وھدیکہ لشکری ءُ دیمروئی ءِ بے کُمک آسر ءَ 16 اپریل 1992 ءَ ڈاکٹر نجیب ءَ چہ سرکار ءَ دزکشّی کُت پد ءَ اوگان راجی لشکر ھم وت ماں وت جنگی جیڑھاں  بھر ءُ بانگ ءَ پْروش اِت۔ گُڑا امریکہ، سھودی اَرب ءُ پاکستان ءِ کاسگ چٹّیں مجاھدین ءِ باٰزیں سِلاھبدیں گلاں پہ وتی زاتی پائدگاں زورانسری ئیں ھاکمی ءِ اڈ کنگ ءَ یکدومی ءِ ھلاپ ءَ اُرشاں کنان ءَ کابل تباہ کُت۔ اول پاکستان ءَ چہ مُجاھدیناں وتی مستریں کاسگ چٹّ گُلبدین ھکمتیار لَنچ کُت کہ اِے مرد اوگانستان ءِ سروزیر بیت۔ البت اوگان ءِ نامداریں مجاھدینی رھشُون نمیران بُرھان اُدین ربانی، اوگان راجی ھستی ءُ نمیران اھمد شاہ مسھود ءُ دگہ مجاھدیناں اے سڑگ ءِ ھلاپ ءَ توار جِست کُت کہ سوت یونین ءِ لشکر شُت باید انت نی ما راجمستری یا اسلامی رِد ءُ بند ءِ ھساب ءَ سروزیر ءَ گچین  ایں بلے بے تپاکی ءُ پہ سرکار ءِ اڈ کنگ ءِ لالچ ءَ مجاھدین وت ماں وت جنگی بیتگ اَنت چریشی ءَ اوگانستان السی جنگے(سِول وار) ءَ دُچار کپت۔ وھدیکہ پاکستان ءَ مار اِت کہ گُلبدین ھمکتیار یک بے سوبیں رھشُونے گُڑا پاکستان ءَ گوں بازیں ارب جنگولاں ھوار چہ اوگان لڈّ ءُ بوج ءِ نودربراں یک ناشرکاریں جنگولی گلے اوگان تالبان ءِ نام ءَ اڈ کُت۔ چی ءَ سویت یونین ءِ ھلاپ ءَ جنگ کنوکیں مجاھدین پاکستان ءِ ردیں پنت ءُ ٹَوکاں نہ منّ اَنت نی شُما بیا اِت ءُ اوگانستان ءُ بُنجاھی شھر کابُل ءَ دزگِیر کنان ءَ یک اسلامی رِد ءُ بندیں “اسلامی شریائی” سرکارے اڈ بِہ کن اِت۔ وھدے کہ پاکستان ءِ لشکر ءِ کُمک ءَ تالبان ءَ کابُل ءُ دگہ بازیں ولایتے جنگی اُرشاں کنان ءَ زورگپت گُڑا دومی نیمگ ءَ پاکستانی کاسگ چٹّیں تالبان ءِ ھلاپ ءَ اوگانستان ءِ گوریچی راجاں انچوشکہ تاجک، اُزبک ءُ ھزاراں ناردرن آلائنس نامیں یکمشتی گلے اڈ کُت کہ تالبان ءِ بے راجمستری ئیں جنگی گل ءَ پْروش بہ دے ایں۔ اسامہ بن لادن، ایمن الزواری ءُ دگہ بے شُمار ارب جنگولاں ھوار، پاکستان، امارات، سھودی اَرب ءِ جنگی  مالی ءُ کُمک ءِ آسر ءَ تالبان ءَ 1996 ءَ کابُل دزگیر کُتگ ءُ مجاھدین گل وت ماں وت ءِ جنگاں نزور تر اِت انت ءُ بے کمکی ءِ آسر ءَ پْروش وارتگ اش۔ البت اھمدشاہ مسھود ءُ ابدلرشید دوستم ءِ رھشُونی ءَ گْوریچی تپاک ءِ راجاں  گوں تالبان ءَ یکشل ءَ جنگ گنڈ اِت ءُ تالبان ءَ سرجمیں اوگانستان وتی چنگُل ءَ نہ اشکتگ اش۔
 
چوناھا تالبان گل ءِ مستریں سروک ءُ رھشُون دْراہ پشتون انت ءُ پمیشکا 1994-96 ءَ تالبان ءَ وتی جنگی جُنز چہ پشتو ولایت ءُ دمگ ءَ بُنگیج کُت ءُ اُلسی جنگ ءِ ژند ءُ پند، وت ماں وت بھر ءُ بانگیں مجاھدیناں پْروش دیان ءَ کابُل زورگپت۔ انچوشکہ مستریں بیران ءُ زِندگیں رھشونانی نام اِے وڑ ءَ انت: مُلا مھمد اُمر کندھار ولایت ءِ ھاکریز دمگ ءِ کوچگ چاہ ھمت ءِ نِندوکے اَت۔ مالوی مھمد ابدُلکبیر ولایت پکتیا ئیگ اِنت۔ مُلا ابدلگنی بردار اورزگان ولایت ءِ دمگ دیرھاوڈھ ئیگ انت، مُلا اکتر منسور ولایت کندھار ئیگ انت ءُ جنگی سروک مُلا ھیبت اُلہ ھم کندھار ولایت ءِ مردمے پمیشکا 1994-2002 ءَ ایشانی زور تھنا ھلمند، کندھار، زابُل، اروزگان، گزنی لوگر، پکتیا، کْوست، نگرھار ءُ لگمان ءِ وڑیں  پشتو ولایتاں اِت انت۔ البت ڈاکٹر نجیب اُلہ، ابدلھک، اسداُلہ ھالد، ھمداُلہ مُھیب، جنرل رازک، رھمت اُلہ نبیل، گُلبدین ھکمتیار، ڈاکٹر اشرپ گنی، ڈاکٹر ھامد کرزی ءُ دگہ بازیں آزات ھیالیں پشتو مُلا رنگیں تالبان ءِ ھلاپ انت۔البت ما ھیران ایں کہ اِے اولی رَند انت کہ گوں امریکی لشکر ءِ روگ ءَ پد ءَ تالبان مُلایاں جنگی اُرشاں کنان ءَ تاجک ءُ اُزبک راج ءِ ولایت پریاب، بلگ ءُ کندوز ءِ لھتیں دمگ ءُ کوچگ دزگِیر کُتگ اَنت کہ اود ءَ آیانی زور ھچبر نہ بیتگ۔ منی ھیال ءَ اوگان تالبان میان اُستمانی چاگِرد ءَ ھمے رَدیں سرپدی دیگ لوٹ ایت کہ ما گوریچ ءَ ھم زورآور ایں بلے گپ وَ دِگرے چی ءَ کہ اوگان راجی لشکر ءَ 2001 بہ گر تاں روچ مرچیگ ءَ اوگان تالبان ءَ ماں پشتون ولایتاں بے کساس کُٹ ءُ پْروش داتگ ءُ دومی اوگان پشتون راج ءِ آزات ھیالیں رھشون ءُ راجدوست ھم تالبان ءَ پِٹ دے انت بلکیں پاکستان ءِ کاسگ چٹّ ءُ راجدْروہ منّ اَنت۔
 البت اوگان لشکر ءَ پہ ھمے دمگانی آجو کنگ ءَ تْرُندیں اُرش کنان ءَ ھزارانی کچ ءَ تالب جنگول کُشتگ ءُ یک یکی ءَ ھمے دمگاں آجو کنان انت۔ دومی نیمگ ءَ اوگان راجدوست، آزات ھیالیں رھشُون ءُ اوگان لس مھلوک ءَ ھم تالبان ءِ ھلاپ ءَ سِلاہ چست کُتگ۔ نی رسانکدر ءَ انچیں ھال ھم آیگ ءَ انت کہ تالبان پْروش ورگ ءَ انت۔
 
دوھا منّگ نامہ ءُ آئی ءِ ارزِشت: مارا یک ٹَوکے ءِ سر ءَ تپاک کنگ لوٹ ایت کہ امریکہ ءَ ماں اوگانستان ءِ تہ ءَ وتی راجی سیت ءِ ھساب ءَ جنگی مول ءُ مُراد پیلو کُتگ انت گُڑا امریکہ ماں اوگانستان ءَ چی ءَ مُدام بِہ نند ایت، بہ گِند ئے امریکہ ءَ را وَ یک روچے ءَ الم روگی اَت چمیشکا 29 پروری 2020 ءَ امریکہ ءَ گوں تالبان ءَ کتر ءِ بُنجاھی شھر دوھا ءَ یک منّگ نامھے ءِ سر ءَ تپاک کُت ءُ دوئیناں دزنام کُتگ اَنت۔ منّگ نامہ ءِ رِد ءَ امریکہ ءُ اوگان تالبان یک دومی ءِ سر ءَ جنگی اُرشاں نہ کن اَنت۔ چہ اد ءَ اِے ٹَوک ھلاس بیتگ کہ اوگان تالبان ءَ امریکہ ءُ نیٹو گل ءِ ھلاپ ءَ وتی نیکراھی جھاد سرجم کُتگ ءُ نی وتی جِند ءُ اوگان راج ءِ سر ءَ کُشت ءُ کوشیں جنگی اُرش ءُ جھاد جائز نہ انت۔ باید انت اوگان ءُ پشتون دود ءُ رواجانی ھساب ءَ جِرگہ، سُھل ءُ تْران ءِ آسر ءَ وتی جیڑھاں ھلاس بہ کن اَنت۔ منّگ نامہ ءِ رِد  یک نیمگے ءَ امریکہ ءِ لشکر تاں جون 2021 ءَ اوگانستان ءَ یلہ کنت ءُ ھمے میان ءَ تالبان واجہ اشرپ گنی ءِ راجمستری ئیں اوگان سرکار ءَ نِند ءُ نیاد کنان ءَ وتی جیڑہ سُھل ءُ تْران  ءِ آسر ءَ ھلاس کنان ءَ زیت جنگ بندی یے بیت ءُ تالبان وت ءَ اوگانستان ءِ راجمستری ئیں سرکار ءِ بھرے جوڑ کنت پمیشکا ما گِندگ ءَ ایں تالبان ءُ اوگان سرکار سُھلکار ھر ماہ بے آسریں نِند ءُ نیاداں کن اَنت وھدیکہ گچینکاری یے ءَ تالبان ءَ باج بُرتگ ءُ چریشی ءَ اوگانستان ءِ لاپ ءَ تالبان ءِ سرکارے بوتگ گُڑا اوگانستان ءِ ڈگار پہ ھچ کسی ھلاپ ءَ کارمرز نہ بیت۔ بزاں تالبان ءَ اسلامی شریایہ یلہ کنگ ءُ اوگان پارلیمنٹ ءُ آئی ءِ جرگہ منّگی اَت نَیکہ جنگی زورانسری ءَ ماں اوگانستان ءَ تالبان ءِ وتگڑیں اسلامی اماراتے اڈ بہ کنت۔ گْوش ئے تالبان ءَ ھر وڑ ءَ راجمستری اوگانستان ءِ سرکار ءَ گوں نند ءُ نیاد، ٹَوک ءُ توار ءِ آسر ءَ وتی جیڑہ ھلاس کنگی اَت نَیکہ جنگی زور ءَ اوگانستان ءَ وتی چنگُلانی تہ ءَ بیار ایت بزاں چہ اے منّگ نامہ ءِ آسر ءَ تالبان 1996 تاں 2001 ءِ ڈول ءَ اوگانستان ءَ ایوک ءَ گوں اسلامی رِد ءُ رھبنداں سرکار کت نہ کنت بلکیں مُلکاری ءُ راجمستری ءِ رِد ءَ اوگانستان ءَ وتی بَھر زور ایت۔ پد ءَ آئی ءِ بھت انت کہ اگاں اوگان لس مھوک آئی پلامرزی کنت یا اِنّا۔
اگاں ما ھورت بہ چار ایں  کہ ناں امریکہ ءَ وتی جنگی لشکر چہ اوگانستان ءَ جون ءِ ماہ ءَ کش اِت انت بلکیں کارمستر جوبائیڈن ءَ جار جت کہ مئے 650 جنگی کماندار اوگانستان ءِ تہ ءَ مشین ءَ بنت ءُ چہ اوگانستان ما وتی لشکر ءَ 9/11 ویل ءِ سالرُوچ ءَ ستمبر ءِ ماہ کش ایں ءُ  دومی نیمگ ءَ ناں کہ ھمے سُھل ءُ تران ءِ میان جنگ بندی یے بیتگ ءُ نَیکہ اوگان تالبان ءَ وت ءَ اوگانستان ءِ راجمستری سرکار ءِ بھر ءُ باسکے جوڑ کُت بلکیں یکشل ءَ اوگان لس مھلوک ءُ اوگان راجی آسراتیانی سر ءَ اُرش کتگ انت۔ بزاں 2020 پروری والائیں دوھا منّگ نامہ ءِ جِند نیست انت ءُ اوگانستان یکرندے پد ءَ وت ماں وتی اُلسی جنگے ءِ نیمگ ءَ دُچار کپان اِنت۔
 
اوگان تالبان ءَ راجمستری ءِ تُرس: مارا سرپد بیگ لوٹ ایت کہ تالبانانی جُنز ءُ سسّا ءِ رَد ءَ راجمستری ھرام اِنت پمیشکا راجمستری نہ منّ ایت بلکیں پہ اسلامی رِد ءُ رھبند ءِ آرگ ءَ زورانسری ءِ سر ءَ اوست دار ایت۔ دومی تالبان ءَ بِہ گِر 2001 تاں روچ مرچیگ ءَ وتی تیوگیں ناشرکاریں جُھد ءَ امریکیانی سر ءَ تْروندیں اُرُش نہ کتگ اَنت بلکیں وتی اوگان لشکر ءِ کاروان، لشکری ترامگیج ءُ لس مھلوک ءِ سر ءَ مُدام تْرُندیں اُرُش کتگ اَنت بزاں شھرانی لاپ ءَ ھمے تالبان ءِ جنگولاں اوگانستان ءِ ھر وڑیں آسراتی انچوشکہ پُھل، وانگجاہ، دربرجاہ، نادْراھجاہ، میتگ ءُ شھدگانی وڑیں آسراتی ھم تباہ کُتگ انت، سور ءُ آروساں لس مھلوک ءِ سر ءَ ھونیں وتکُشی بمب ھم ترکینتگ اَنت چمیشکا لاکھانی ھساب ءَ بےگناھیں مردم مرتگ ءُ لاکھانی کساس ءَ نیم جان بیتگ اَنت چمیشکا اوگانستان ءِ ھر مردم گوں تالبان ءَ کست ءُ زھر کنت ءُ اوگان لس مھلوک تالبان ءَ اوگانستان ءِ راجدْروہ منّ اَنت۔ چریشی ءَ ماں راجمستری اوگانستان ءَ تالبان ھچبر سوبین نہ بیت بلکیں راستی وَ ھمیش انت کہ اوگان مھلوک تالبان ءِ گل ءَ پاکستانی لشکر ءِ کاسگ چٹّ لیک انت اوگان سرکار ءِ تہ ءَ مزنیں رھشُون تالبان ءُ پنجابی ءِ نام ءَ گوں زاہ ءُ زکت گِر اَنت چمیشکا تالبان ھم جْوان سرپد انت کہ اے کست ءُ زاھر ءِ آسر ءَ ماں یک راجمستری ئیں رھبندے ءَ تالبان پْروش وران ءَ گار ءُ بیگواہ بیت پمیشکا تالبان لوٹ ایت کہ تُرس ءُ بیم ءِ آسر ءَ اوگانستان ءَ چنگُل ءِ تہ ءَ بیار ایں۔

اوگانستان ءُ پاکستان ءِ سیمسری ٹَٹ ءِ بستار: انچوشکہ پاکستان ءِ سرکار مُدام پوتاری کنان ءَ گْوش ایت کہ ما اوگانستان ءِ سیمسر ءَ ٹَٹے بستگ چہ ایشی ءَ نی اوگانستان ءِ الُسی جنگ ءُ جیڑہ پاکستان ءَ تاوان نہ دے اَنت۔ بُندر ءَ پاکستانی ٹَٹ ءِ مول ءُ مراد پاکستان چہ ٹی ٹی پی، الکائدہ، دائیش ءُ دِگہ گھگریں جنگولاں رکینگی انت بہ گِند ئے ٹَٹ دو دژمنیں مُلکانی ریگولر ملیٹری ءِ میان ءَ بیت ءُ دوئیں نیمگاں لشکری بُنجل بنت ءُ ھر دو وتی سرڈگاراں چہ یک دومی ءَ رکین اَنت۔ البت ھمے ڈورینڈلائین ءِ سیمسر ءِ روایرشُتی کش ءَ اوگان سرکاری لشکر نیست انت بلکیں دْراہ اوگان پشتون ٹرایبل اَنت بچار اگاں اُلسی جنگے ھم بیتگ گُڑا پد ءَ وَ پک ءُ لازُم اوگان سرکاری لشکر دگہ نیمگے ءَ دزگٹّ بنت نَیکہ ھمے ڈورائینڈ لائین ءِ سیمسر ءَ بُنجلاں بند اَنت۔ بزاں سیمسر ءِ دومی نیمگ ءَ ٹی ٹی پی دائیش ءُ الکائدہ ءِ وڑیں گل وتی مرزی ءِ ھساب ءَ پاکستانی لشکر ءِ سر ءَ اُرشاں کن اَنت ءُ تچ اَنت پد ءَ ناں اوگانستان ءِ لشکر آیاں داشت کنت ءُ نَیکہ پاکستان چیزے کُت کنت۔ انچوشکہ ٹی ٹی پی، الکائدہ ءُ اوگان تالبان دْراہ یکیں سسّا ءِ واھُند اَنت۔ بزاں اد ءَ ھم اِے سیمسر پاکستانی لشکر ءَ ھچ پائدگ نہ دنت۔

دومی پوتاری ایش انت کہ ما ٹَٹ سیمسر ءَ بند کنین ءُ جنگی جاورالاں آماچیں اوگان لڈّ ءُ بوجی مھوک ءَ ماں پاکستان ءَ جاہ نہ دے ایں۔ چوناھا مرچی ھر اسلامی مُلک اسلام نیست انت اگاں اسلام ھست گُڑا یورپ ءَ ترا اسلام رس ایت چی ءَ کہ 2015 ءِ اَرب آشوب ءَ سوریا جنگ ءِ آماچیں لڈّ ءُ بوجیاں کِر ءُ کش ءِ ترکی، ایراک، ایران ءُ کویت ءِ وڑیں مسلمان ملکاں وتی اربی زُبان ارباں پناہ ءُ جاہ نہ داتگ بلکیں دْراہ گوں یداراں سپراں کنان ءَ یورپ ءَ سر بیتگ انت۔ چہ یدارانی بُڈّگ ءَ ھزارانی ھساب ءَ جنگ زدگیں ارب مسلمان مُرتگ انت۔ یمن جنگ ءِ زدگیں لڈّ ءُ بوجیاں نزیکیں سھودی ارب ءُ امارات پناہ نہ داتگ چوناھا ھمے یکیں ارب راج ئیگ اِت اَنت کہ ایشانی زُبان، دود ءُ ربیدگ دْراہ یک اَنت۔ اگاں اسلامی نیکراھی شرھیا بہ گِند ئے باھوٹی مردم کا اَنت ءُ مسلمان دومی مسلمان ءَ پناہ دنت۔ سیمی چہ اوگانستان ءَ پاکستان نیمگ ءَ روّگیں لڈّ ءُ بوجی مھلوک گیشتری ءَ وَ اوگانستان ءِ پشتون راج بنت۔ اگاں اے مھلوک ءَ پاکستان ماں وتی سیمسر ءَ پُترگ ءَ نیل ایت گُڑا ٹٹ ءِ روایرشُتی نیمگ ءَ ھمے پشتون گُژن ءُ نادْراھیاں مر اَنت چریشی ءَ پاکستان ءِ ھلاپ ءَ زھر ءُ کستے ودی بیت۔ دومی نیمگ ءَ آزات ھیال ءُ راجدوستیں پشتوناں ھم پی ٹی ایم ءِ دْرشماں یک آشوبے رُدینت ءُ پی ٹی ایم ایشی ءِ پائدگ ءَ زُوراناں پاکستان ءَ ژند ءُ پند کنت چی ءَ کہ اگاں پاکستان ٹَٹ ءَ پچ مہ کنت گُڑا پشتون راجدوستیں گل پی ٹی ایم اِے بنی آدمی اندوہ ءَ کبول نہ کنت۔ چارمی ٹی ٹی پی ءُ الکائدہ ھمے جنگ زدگیں مردماں وتی جنگی مول مُراد ءِ ھاتر ءَ کارمرز کن اَنت گُڑا چریشی ءَ گیشتر تاوان پاکستان ءَ رس ایت چمیشکا پاکستان ءِ بستگیں دورینڈلائین ءِ ٹَٹ اوگان اُلسی جنگ ءِ ھالت ءَ ھم پھریزگی بستارے نہ دار ایت۔

آسر : اِے 1994 ءِ وھد نہ انت کہ ناشرکاریں تالبان تیوگیں آزات ھیالیں اوگان ءِ رھشُوناں پْروش دیان ءَ سرجمیں اوگانستان ءُ کابل ءَ زیردست بہ کنت چی ءَ کہ 1994 ءَ اوگانستان ءَ راجی لشکر ھم نیست اَت، دومی گْوست ءِ مجاھدین گل 1992- 94 ءَ وت ماں وت جنگ ءِ آسر ءَ ژند ءُ پند اِت اَنت بلکیں آیاں کُمک کنوک ھم نیست اَت۔ دومی نیمگ ءَ پاکستان، الکائدہ ءِ اَرب جنگول، امارات ءُ سھودی تالبان ءَ ھر وڑ کُمک کنگ ءَ اِت اَنت۔

البت مرچاں اوگانستان ءَ یک بامردیں راجی لشکرے ھم ھست ءُ اوگانستان ءِ آزات ھیالیں راجدوستیں رھشُون ءُ مھلوک ھم گوں وتی راجی لشکر ءَ ھمکوپگی ءَ تالبان ءَ پْروش دیگ ءَ انت چمیشکا تالبان ءِ ناشرکاریں جنگول تیوگیں اوگانستان ءَ زیردست کُت نہ کن اَنت۔
اوگان تالبان، پاکستانی تالبان ءُ الکائدہ دْراہ یک اَنت۔ اگاں ھورت بہ چار ئے پاکستانی تالبان ءِ نیک مھمد، ھکیم اُلہ مھسود، بیت اُلہ مسھود، مُلہ پزل اُلہ ءِ وڑیں دِگہ بازیں رھشُونے امریکہ ءَ وت چہ بالی ڈرونانی اُرشاں کُشتگ اَنت ءُ ھمے امریکہ ءَ مُدام پاکستانی تالبان ءِ گل ءَ تاوان داتگ، چہ پاکستان ءِ دست ءَ پاکستانی تالبان ءِ ھچ رھشون کُشگ نہ بوت پمیشکا وھدیکہ امریکہ چہ اے آتراپ ءُ دمگ ءَ روت گُڑا اوگان تالبان ءِ باز ءُ کساسیں سوب پاکستانی تالبان ءَ ھم دلبڈی دنت چریشی ءَ پاکستان ءَ ھم بیھار ءُ تُرس ودی بیت۔ پد ءَ ھمے دوئیں نیمگی تالبان ءُ الکائدہ ءِ نیکراھی سسّا ءِ رِد ءَ جھاد پہ ھر مسلمان ءِ پھریزگ ءَ بیت بزاں توری پہ پلستین ءِ آزاتی ءَ اسرائیل ءِ ھلاپ ءَ جھاد بہ بیت یا توری کشمیر ءُ چینی مسلمانانی آجوئی ءِ ھاتر جھاد بہ بیت۔ بزاں اوگانستان ءِ ھما بَھر کہ تالبان ءُ دِگہ جھادی جنگولاں زیردست کُتگ اَنت چہ اود ءَ دگنیا ءِ بازیں شھر ءُ جاہ بمب تراک ءُ جنگی اُرش بنت پمیشکا دیر ءُ زیت ما دِگہ 9/11 ءِ وڑیں ویلے ءِ ھم وداریگ ایں۔

یات بہ بیت کہ کس ءَ وَ گمان نیست اَت کہ 1992- 94 ءَ اوگان مجاھدین پہ وتی کسانیں زاتی پائدگانی ھاتر ءَ اُلسی جنگے کنان ءَ اوگانستان ءَ بیران کن اَنت ءُ پد ءَ اناگاہ 1994 ءَ پاکستان ءِ پلہّ مُرزیں تالبان ءِ وڑیں نیکراھی جنگولے در کپ ایت ءُ یک یکی ءَ بھر ءُ بانگیں مجاھدین ءِ گلاں پْروش دیان ءَ کابُل ءُ اوگانستان ءِ مزنیں بھرے ءِ تہ ءَ اسلامی شرھیا پابند کنت پمیشکا وھدیکہ اوگان آزات ھیال ءُ راجدوستانی گل گوں اوگان لشکر ءَ ھوار تالبان ءَ مُدام جنگ ءَ بنت گُڑا نوکیں گلانی ودی بوگ ءِ ھم مُدام گُمان بیت انچوشکہ رھدربری درور سوریا، یمن، لیبیا ءُ ایراک مئے دیم ءَ اَنت کہ دو پاٹی ءِ وت ماں وتی جنگ ءَ چار پنچ دِگہ جنگولی گل ودی بیتگ اَنت ءُ کس نہ زانت کہ کَے پہ کَے ءَ جنگ اَنت!

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کوپا امریکہ ءِ کواٹر پائینل ءِ گوازی ءَ کولمبیا ءَ پیلانٹی شوٹ ءَ چار گول، ارجنٹینا ءَ سَے باج برتگ، یورو کپ کواٹر پائینل ءَ ڈینمارک ءَ دو گول ءَ ءُ انگلینڈ ءَ چار گول ءَ باج برتگ ءُ گوازی وتی نام ءَ کُتگ –

کوپا امریکہ ءِ گوازی برجاہ انت دوشی شپ ءَ کواٹر پائینل گوازی یوروگاؤ ءُ کولمبیا ءِ میان ءَ بوتگ ءُ چارمی گوازی ارجنٹینا ءُ ایکواڈور میان ءَ بوتگ – سیمی گوازی ءَ یوروگاؤ ءُ کولمبیا ءِ لیبیاں جوانی ءَ گوازی کنان ءَ ھر دو ٹیم دیمیگ بوتگ انت پیلانٹی شوٹ ءَ کولمبیاءِ لیبیاں دو گولے دیم ءَ چار گول کتگ ءُ گوازی وتی نام ءَ کتگ –

ارجنٹینا ءُ ایکواڈور ءِ میان ءَ بوتگیں گوازی ءَ ارجنٹینا ءَ ایکواڈور ءَ سَے گول داتگ ءُ باج برتگ گوازی وتی نام ءَ کتگ-

کوپا امریکہ ءِ سیمی پائینل ءِ اولی گوازی برازیل ءُ پیرو ءِ میان ءَ اولمپک پٹ ءَ بوگ ءَ انت ـ

دومی نیمگ ءَ یوئیفا یورو کپ فٹبال گوازی برجاہ اِنت ءُ دوشی شپ چیک ریپبلک ءُ ڈینمارک، یوکرائن ءُ انگلینڈ ءِ میان ءَ کواٹر پائینل ءِ گوازی کنگ بوتگ اَنت –

دوشیگیں گوازی ءَ ڈینمارک ءَ چیک ریپبلک ءِ دیم ءَ دو گول ءَ باج بُرتگ، وھدیکہ انگلینڈ ءَ یوکرائن ءِ دیم ءَ چار گول ءَ باج برتگ گوازی وتی نام ءَ کُتگ –

یوئیفا یورو کپ ءِ کواٹر پائینل ءِ سیمی گوازی چیک ریپبلک ءُ ڈینمارک ءِ میان ءَ بوتگ کہ چیک ریپبلک ءِ نیمگ ءَ چہ یک گولے اسکور کنگ بوتگ وھدیکہ ڈینمارک ءِ لیبیاں جوانی ءَ گوازی کنان ءَ دو گول اسکور کتگ باج برتگ –

چارمی گوازی گوازی یوکرائن ءُ انگلینڈ ءِ میان ءَ بوتگ کہ یوکرائن نیمگ ءَ چہ ھچ گول اسکور کنگ نہ بوتگ وھدیکہ انگلینڈ ءِ لیبیاں جوانی ءَ گوازی کنان ءَ چار گول اسکور کتگ باج برتگ ءُ گوازی وتی نام ءَ کتگ –

زانگ بہ بیت یوئیفا یورو کپ ءَ بیست ءُ چار ٹیماں بھر زرتگ ءُ بیست ءُ چار ٹیمانی تہ ءَ اٹلی ءُ اسپین، انگلینڈ ءُ ڈینمارک ءِ لیبیاں جوانی ءَ گوازی کنان ءَ وت ءَ سیمی پائینل ءَ سرکتگ سیمی پائینل اولی ءِ گوازی ءَ اٹلی ءُ اسپین ءِ میان ءَ ویمبلے پٹ بوگ ءَ انت-

زھگ لوگ ءَ دراتکگ، لھتے گاماں دور بے نمبر پلیٹیں گاڑی والایاں زورانسری وتی ھمراھی ءَ گوں وت برتگ چریشی ءَ پد آئی ءِ ھچ ھال نیست – گپ بیگواھیں علی اکبر مینگل ءِ پت ءَ وائس فار بلوچ مسنگ پرسنز ءِ بنجل ءَ اتکگ ءُ وتی نبشتگ کنائینتگ اَنت –

بیگواھیں ورنا علی اکبر مینگل ءِ پت ولی مھمد مینگل ءَ گوشتگ کہ منی زھگ بیست ءُ ھشت جون دوھزار ءُ بیست ءُ یک ءَ سریاب دگ ءَ موسیٰ کالونی ءَ وتی لوگ ءَ دراتکگ ءُ چریشی ءَ پد آ بیگواہ اِنت زھگ ءَ دو مباھل ھم گون بیتگ اَنت کہ بند اَنت –

آئی ءَ گوشت کہ چریشی ءَ پد ما پولیس کارگس ءَ شتگ ءَ وتی کمک ءَ شمئے کمک ءِ زور ءَ زھگ ءِ درگیج ءِ جھد کرتگ ھمے وھد ءَ موسیٰ کالونی ءَ بنجاھی دگ ءَ کار کنوکیں مزدوراں گوشتگ کہ گپتگیں مرد بے نمبر پلیٹیں دو گاڑی والایاں برتگ کہ آیاں ایف سی ءُ اسپیت پوشیں مردم سوار بیتگ اَنت ءُ آیاں یک بچکے ءِ چم بستگ ءُ گاڑی ءِ تہ ءَ چگل داتگ ءُ برتگ –

بیگواھیں علی اکبر ءِ پت ءَ سر وزیر بلوچستان، عسکری واکدار ءُ سر وزیر پاکستان ءَ کلوھی گپ گوشتگ کہ منی زھگ یک نودربرے ءُ ما گریبءِ کھول ءَ گوں بندوک اِنت ءُ منی زھگ ءَ پاکستانی چیریں ادارھانی دست ءَ آجو بہ کنائیت –

ھمے وڑ ءَ بلوچستان ءِ دمگ سبی ءَ سیادی داروکیں ھاجی مزار خان ءِ بیگواھی ءَ یازدہ سال ءِ دراجیں وھد گوستگ- مزار خان ءِ کھول انگت ءَ آئی ءِ ودار ءِ اسری ءَ نشتگ اَنت –

ھاجی مزار خان ء گوھرام بیست ءُ ھشت مئی دوھزار ءُ دَہ ءَ دگہ چار مردمانی ھمراھی ءَ آوار جنگ بیتگ – مزار خان ءِ کھول ءِ گوشگ اِنت سبی ءِ دمھ جالڑی ءَ پوجی آپریشن ءِ وھد ءَ پاکستانی پوج ءَ مزار خان ءَ ھوار دگہ پنچ مردن شامیر ء ھاجی، فیض مھمد ء جلاب، نزر علی ء گوھرام ءُ یار خان ء گوھرام دزگیر کرتگ ءُ برتگ اَنت –

کھول ءِ گوشگ اِنت آ دگہ دراھیں مردم وھد وھد ءِ سر ءَ یل بیتگ اَنت بلے ھاجی مزار خان انگت ءَ بیگواہ اِنت –

تربت ءَ فرنٹیر ورکس آرگنائزیشن ءِ سر ءَ اُرش کتگ ءُ جانی ءُ مالی تاوان داتگ – میجر گوھرام

سربوتگیں ھالانی رد ءَ گوستگیں شپ ءَ ناشناسیں سلاہ بندیں مردماں کیچ ءِ بنجاھی شھر تربت ءَ دگ جوڑ کنوکیں کمپنی ایپ ڈبلیو او ءُ آئی ءِ پھازدارانی سر ءَ اُرش کتگ-

اُرش دوشی شپ ادار ھشت ءُ نیم ءَ تربت ءِ بالی پٹ ءِ نزیک ءَ دگ جوڑ کنوکیں کمپنی ءُ آئی پھازدارانی سر ءَ کنگ بوتگ – اُرش ءِ آسر ءَ ایپ ڈبلیو او ءِ کارمند ءُ پھازداراں جانی ءُ مالی تاوان دیمپانی بوتگ سلاہ بنداں کمپنی ءِ مشین ءُ دگہ سامان ھم مانداشتگ ءُ درایگ ءُ روگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں گوستگیں شپ ءِ ادار ھشت ءُ نیم ءَ تربت بالی پٹ ءِ نزیک ءَ پوجی عسکری تعمیراتی کمپنی ایپ ڈبلیو او سائیٹ سر ءَ اُرش کتگ –

جارکش ءَ گوشتگ کہ اُرش ءَ کمپنی ءِ مشینری ءُ دگہ سامان ھم مانداشتگ انت ءُ ھمے میان ءَ ایپ ڈبلیو او ءِ تمبو ھم نشانگ کرتگ انت چریشی ءَ زورگیریں پوجی کمپنی ءَ جانی تاوان رس اتگ –
آئی ءَ گوشتگ کہ دگ جوڑ کنوکیں کمپنی ءِ نزیکیں لیویز پانگس ءَ چہ تیرگواری کنگ بوتگ بلے سرمچاراں آ نشانگ نہ کرتگ انت بلے آھاں مکن کنیں کہ آ زورگیریں پوج ءِ ھچ وڑیں شوربندیانی پھازگ ءِ ھاتر ءَ بلوچاں نشانگ مہ کن انت ءُ اشی ءِ ھمراھی ءَ ما دمگی ٹیکداراں ھم مکن کنیں کہ آ اے شوربندیاں زورگیریں سرکار ءِ ھمراداری مہ کن اَنت اگاں ناں گڑا وتی جان ءُ مال ءِ تاوان ءِ زمہ وار وت بہ انت-

جارکش میجر گوھرام بلوچ ءَ گوشتگ کہ ھمے کمپنی بالی پٹ داں ڈی بلوچ ءَ دگ ءِ جوڑ کنگ ءُ ھمے دگ ءِ سر ءَ پنچ کلومیٹر ءِ کچ ءَ داں میرانی ہاؤسنگ اسکیم ءِ نام ءِ سر ءَ نوکیں آبادی یے جھمنند کنگ ءِ جھد ءَ کنگ ءَ اِنت کہ اود ءَ دَر بلوچیں مردمانی آرگ ءُ آباد کنگ ءِ یک پندلے سرجم کنگ بوگ ءَ اِنت- میرانی ہاؤسنگ ءَ ھمے زمین مزن شھدربرجاہ جوڑ کنگ ءِ نام ءِ سر ءَ لس مھلوک رَد داتگ ءُ ھشک ءَ پچ گپتگ اَنت-

بلوچستان لبریشن فرنٹ ءِ جارکش میجر گوھرام بلوچ ءَ گوشتگ کہ بیست ءُ شش جون ءَ سرمچاراں مشکے ءِ دمگ تنک ءَ تیرگواری کرتگ ءُ لگور بیتگیں سرمچار گلاب ء سھراب کُشتگ –

جارکش ءَ گوشتگ کہ کشتگیں مرد بلوچ راجی آجوئی جنز ءَ تچگ ءَ پد پاکستانی پوج ءِ واستا کمکاری ءَ بیتگ – کجام ھم مردم بلوچانی نسل کُشی ءُ جنگی جرماں ھوار بیت ءُ پاکستان ءِ ھمراہ بیت گڑا آئی ءِ سزا ھم ھمے رنگ ءَ بیت اِنت –

نبشتانک: ما چی ءَ وتی زبان ڈالچار کُتگ

نبشتہ کار: نئیم مؔومن

دی بلوچستان پوسٹ

راج ءِ مستریں پجار آئی ءِ زبان اِنت چریشی ءِ سوب ءَ راج پجّا آرگ بیت ، ھمک راج ءِ مستریں ھستی آئی ءِ زبان ءُ دود ءُ ربیدگ اَنت کہ دنیا ءِ دیم ءَ شرّیں دْروشمے آئی ءِ سْیادی ءَ پدّر کن اَنت کہ کُجام راج ءِ مردمے ھمے وڑ ءَ اگاں یک راجے ءَ را زندگ بُوّگی اِنت گُڑا دْرستاں ءَ چَہ پیسر آ را وتی زبان پھریز ءُ زندگ دارگی اِنت کہ ابید چَہ زبان ءَ راج ھچبر دیمروئی ءُ زندگ بوت نہ کنت زبان ایوک ءَ توار ءُ گالوار ءَ را نہ گْوش اَنت بلکین ھمک زبان ءِ چار بھر اَنت ءُ  آ ایش اَنت کہ  ”  نبشتکاری ، وانگ ، اِشکُنگ ، ھَبَر کنگ ” ( Writing , Reading , Listing , Speaking ) ءُ  پہ بلوچی زبان ءِ زانگ ءُ دیمروئی ءِ واست ءَ مارا چاریں بھر دیم ءَ آرگی اَنت ءُ یک ھساب دَربرگی اَنت راج ءِ بیگوائی ءِ مستریں سَوب آئی ءِ زبان ءِ گاری اِنت کہ چریشی ءَ ابید راج وت ءَ را ھچ پیم ءَ دومی راجانی دیم ءَ برجم داشت نہ کنت انچوش کہ یک مردمے ھبر نہ کنت آ گنگ ءِ نام ءَ زانگ بیت گُڑا ھمے وڑ ءَ یک راجے ھم زبان ءَ ابید دومی وَتواجھیں راجانی دیم ءَ  بےزبان ءُ گُنگ لیکگ بیت زبان یک چاگردے ءَ را گوں دومی چاگرد ءَ ھمگرنچ کنت ءُ چاگرد ءُ ٹَکانی یکجاھی ءَ را یک راجے یے ءِ نام دیگ بیت ۔ 

دیمتر ءَ ، من ھمے گْوش آں کہ مئے راجی زبان  بلوچی چی ءَ مئے جند ءِ ڈیھ ءَ چُش ڈالچار ( ignore ) اِنت ءُ پرچا مئے راج وتی زبان ءِ وانگ ءَ ساڑی نہ اِنت ؟ زبان راج ءِ ساہ اِنت  کہ راج ءَ زندگ دار اِیت بلے انگت  ما وتی زبان ءِ ارزشت ءَ نہ زان ایں ۔ اگاں ما زبان دوست مہ بَہ ایں گُڑا راج دوست چتور بوت کن ایں ؟پرچاکہ راج دوست بُوّگ ءِ مستریں راز زبان اِنت یک مردمے ءَ را گوں تیوگیں راج ءَ جوڑیں اِیت ءُ گوں راج ءَ آئی ءِ سْیادی ءَ پدّر کنت اگاں مارا وتی راج زندگ کنگی اِنت گُڑا گیش ءَ گیش مارا زبان ءِ سر ءَ ھم جْھد کنگی اِنت  دانکہ آدگہ  راج بزان اَنت کہ بلوچ ءَ را وت زبانے گوں سرجمیں بُنرھبند ( Grammar ) ءَ  ھست ءُ آ دومی زبان ءِ  بُنرھبندانی وازمندگ نہ اِنت ۔

اگاں ما بہ چار ایں  پاکستان ءِ آدگہ دمگّاں بلوچ راج ءَ را بلوچی ءِ نام ءِ سر ءَ توار جن اَنت بلے آ انچو سرپد نہ اَنت کہ بلوچی راج ءِ نام نہ اِنت بلکین بلوچستان ءِ جاہ منندیں راج ءِ زبان ءِ نام اِنت ، بہ گند ئے  اے مئے جند ءِ میار اِنت کہ ما وتی زبان ءِ ھاتر ءَ جْھد نہ کُتگ ءُ تنینگہ آدگہ راج  بلوچ ءُ بلوچی ءِ میان ءِ پرک ءَ سرپد نہ اَنت پہ راج ءِ نامدار کنگ ءِ ھاتر ءَ زبان ءُ دود ءُ ربیدگانی دیم ءَ آرگ ءِ واست ءَ جْھد اَلمی اِنت گُڑا مارا اے دوئینانی ھاتر ءَ ھمک سھت ءُ دمان جْھد کنگی اِنت  ۔

چَہ زبان ءِ وانینگ ءَ پیسر من ھمے جیڑ اِت کہ راج وتی زبان ءِ وانگ ءِ سک واھدار اِنت بلے نوں من سرپد بوت آں کہ بلوچ نودربراں وتی زبان ءِ وانگ ءَ چَہ گیش دری زبانانی وانگ ءِ واھگ ھست ۔ بازیں مردم ھمے گْوش اِیت  بلوچی ءِ وانگ ءَ ھچ پائدگ نیست بلے من گْوش آں وتی زبان ءِ مستریں پائدگ ایش اِنت کہ نبشتکاری ءِ وھد ءَ شّریں وڑے ءَ نبشتہ کنگ بیت ءُ نبشتکار وتی نِکانانی ( مواد points ) یکجاہ کنگ ءِ جْھد ءَ بیت بلے آئی دل ءَ اے تُرس نیست کہ منی نبشتانک ءِ تہ ءَ بُنرھبندانی ردی بنت ءُ آ وتی نبشتانک ءَ یشلی ءَ نبشتہ کُت کنت وتی زبان ءِ زانگ ءِ پائدگ ایش کہ دومی مردم اے شگان جَت نہ کنت کہ تو راجی زبان نہ زان ئے پہ زبان ءِ  زندگ کنگ ءِ ھاتر ءَ مارا گیش ءَ چَہ گیش وتی جند ءِ زبان ءَ نبشتہ بہ کن ایں دانکہ آوکیں پدریچ وتی زبان بیھال مہ کن ۔

من وتی گُلیں راج ءِ نودربراں  گوں دزبندی کن آں کہ  وتی زبان ءَ بِہ وان اَنت نبشتہ بِہ کن اَنت دانکہ مئے شھدیں بلوچی بیگوائی ءِ آماچ مہ بیت ءُ پہ دیمروئی ءَ ردوم بزور اِیت ءُ  آکبت ءَ یک مَنّ اِتگیں( Accepted )  زبانے جوڑ بہ بیت ۔ بلوچ راج یک پدمنتگیں راجے ءُ مئے مسترین میراس وتن ،  زبان ءُ بلوچی دود ءُ ربیدگ اَنت کہ مارا مئے کماش ءُ  زانتکاراں سوگات داتگ اَنت ۔ باید اِنت ما ایشانی پھریز ءَ بہ کن ایں ءُ گاری ءَ اِش مَیل ایں ۔ 

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کوپا امریکہ ءِ کواٹر پائینل ءِ گوازی ءَ پیرو ءَ پیلانٹی ءَ چار گول ءَ، برازیل ءَ یک گولے ءَ باج برتگ، یورو کپ کواٹر پائینل ءَ اسپین ءَ پیلانٹی سَے گول ءَ ءُ اٹلی ءَ دو گول ءَ باج برتگ ءُ گوازی وتی نام ءَ کُتگ –

کوپا امریکہ ءِ گوازی برجاہ انت دوشی شپ ءَ کواٹر پائینل اولی گوازی پیرو ءُ پیراگاؤ ءِ میان ءَ بوتگ ءُ دومی گوازی برازیل ءُ چلی میان ءَ بوتگ – اولی گوازی ءَ پیرو ءُ پیراگاؤ ءِ لیبیاں جوانی ءَ گوازی کنان ءَ سَے سَے گولے اسکور کتگ ھر دو ٹیم دیمیگ بوتگ انت پیلانٹی شوٹ ءَ پیرو ءِ لیبیاں سَے گولے دیم ءَ چار گول کتگ ءُ گوازی وتی نام ءَ کتگ –

برازیل ءُ چلی ءِ میان ءَ بوتگیں گوازی ءَ چلی ءِ نیمگ ءَ چہ ھچ گول کنگ بوتگ وھدیکہ برازیل ءِ لیبی لوکاس ءَ یک گولے اسکور کتگ ءُ باج برتگ گوازی وتی نام ءَ کتگ-

کوپا امریکہ ءِ کواٹر پائینل ءِ دیم ءِ گوازی یوروگاؤ ءُ کولمبیا، ارجنٹینا ءُ ایکواڈور ءِ میان ءَ بوگ ءَ انت ـ

دومی نیمگ ءَ یوئیفا یورو کپ فٹبال گوازی برجاہ اِنت ءُ دوشی شپ سویزرلینڈ ءُ اسپین، بلجئیم ءُ اٹلی ءِ میان ءَ گوازی کنگ بوتگ اَنت –

دوشیگیں گوازی ءَ سپین ءَ سویزر لینڈ ءِ دیم ءَ پیلانٹی شوٹ سَے گول ءَ باج بُرتگ، وھدیکہ اٹلی ءَ بلجئیم ءِ دیم ءَ دو گول ءَ باج برتگ ءُ ھردو ٹیماں وت ءَ سیمی پائینل ءَ جاہ داتگ –

یوئیفا یورو کپ ءِ کواٹر پائینل ءِ اولی گوازی اسپین ءُ سویزرلینڈ ءِ میان ءَ بوتگ کہ ھردو ٹیماں یک یک گولے ءَ دیمیگ بوتگ انت پلانٹی شوٹ ءَ اسپین ءَ سَے پہ یکے ءَ باج برتگ گوازی وتی نام ءَ کتگ –

دومی گوازی اٹلی ءُ بلجئیم ءِ میان ءَ بوتگ کہ بلجئیم نیمگ ءَ چہ یک گولے اسکور کنگ بوتگ وھدیکہ اٹلی ءِ لیبیاں جوانی ءَ گوازی کنان ءَ دو گول اسکور کتگ باج برتگ ءُ گوازی وتی نام ءَ کتگ –

زانگ بہ بیت یوئیفا یورو کپ ءَ بیست ءُ چار ٹیماں بھر زرتگ ءُ بیست ءُ چار ٹیمانی تہ ءَ سویزرلینڈ ءُ اسپین، بلجئیم ءُ اٹلی، چیک ریپبلک ءُ ڈینمارک، یوکرائن ءُ انگلینڈ ءِ لیبیاں جوانی ءَ گوازی کنان ءَ وت ءَ کواٹر پائینل ءَ سرکتگ مروچیگیں کواٹر پائینل ءِ گوازی ءَ اٹلی ءُ اسپین ءَ باج برتگ ءُ وت ءَ سیمی پائینل ءَ جاہ داتگ-

یورو کپ ءِ کواٹر پائینل ءِ دیم ءِ گوازی چیک ریپبلک ءُ ڈینمارک، یوکرائن ءُ انگلینڈ ءِ میان ءَ جتا جتائیں پٹاں بوگی اِنت –

سال ءُ دو ھزار ءُ پانزدہ سَے جولائی ءَ بلوچستان ءِ تیابدپی شھر گوادر ٹی ٹی سی کالونی ءَ پاکستانی پوج ءُ چیریں ادارھانی دست ءَ آوار جنگ بیتگیں عظیم ء دوست مھمد ءِ بیگواھی ءَ شش سال سرجم بیگ ءَ چاگردی رسانکجاہ ٹوئٹر ءَ کمپین کارمرد کنگ بیت اِنت –

عظیم دوست ءِ گوھار رکسانہ دوست ءَ یک تامر بندے ءَ شنگ کرتگیں گپانی تہ ءَ گوشتگ کہ منی برات دوھزار ءُ پانزدہ سَے جوالائی ءَ گوادر ٹی ٹی سی کالونی ءَ پاکستانی پوج ءُ چیریں ادارھاں آوار جتگ ءُ بیگواہ کرتگ کہ تنی وھدی بیگواہ اِنت –

آئی ءَ گوشتگ کہ منی برات ءَ شش سال سرجم اِنت کہ گار ءُ بیگواہ اِنت چریشی ءَ چہ مئے سرجمیں کھول عظیم ءِ ودار ءِ راہ ءَ چاروک اَنت –

آئی ءَ گوشتگ کہ سَے جولائی ءَ ٹوئٹر ءَ کمپین ءِ برجم دارگ بیت اِنت دراھیں انسان دوست ءُ چاگردی رسانکدر کارمرد کنوکاں گوں دزبندی اِنت ھیش ٹیگ #saveazeemdost کارمرد بہ کن اَنت ءُ منی برات ءِ یل کنگ ءَ مئے کمک ءَ بہ کن اَنت –

بلوچستان ءَ گار ءُ بیگواھیں مردمانی جیڑہ یک مزنیں جیڑھے ءِ سر ءَ سر بیتگ ءُ اود ءَ مھلوک ءَ ھمک روچ وتی کھولانی واستا زھرشانی کنگ ءَ گندگ بنت اِنت –

بلوچستان ءَ گار ءُ بیگواھیں مردمانی کھولانی گوشگ اِنت کہ دری انسانی ھکانی گل بلوچستان ءِ ناوشیں جیڑہ ءَ دلگوش بہ کن اَنت –

ھمے رنگ ءَ چہ نوشکی ءَ بیگواھیں نصیب اللہ بادینی ءِ کھول شال ءَ بیگواھیں مردمانی بنجل ءَ اتکگ، آئی ءِ مات ءَ وتی چک ءِ یل کنگ ءِ لوٹ کرتگ –

بیگواھیں نصیب اللہ بادینی ءِ مات ءِ رد ءَ ھپت سال ءِ گوزگ ءَ پد ھم نصیب اللہ انگت ءَ زورانسری بیگواھی ءِ آماچ اِنت بازیں وھدانی گوزگ ءَ ابید ھم انگت ءَ وتی زھگ ءِ راہ ءَ چاریگ اَنت ءُ ریاستی آمیدگس انساپ بہ دے اَنت –

آئی ءَ گوشت کہ نصیب اللہ دوازدھمی تبک ءِ نودربرے بیتگ ءُ وتی وانگ ءَ گوں دلگوش بیتگ آئی ءَ اگاں کجام ھم بھتامے ھست اِنت گڑا آ آمیدگس ءَ پیش کنگ بہ بیت اِنت –

زانگ بہ بیت نصیب اللہ بادینی سال دوھزار ءُ چاردہ ءَ نوشکی ءَ پوج ءَ دزگیر کرتگ ءُ ناشناسیں جاھے ءَ برتگ کہ چریشی ءَ پد آ بیگواہ اِنت –