TBP Balochi

رژن لبزانکی چاگرد کراچی ءِ نیمگ ءَ بلوچی زبان ءِ نامی ئیں شائر ءُ نبشتہ کار بانل دشتیاری ءِ یات ءَ دہ اکتوبر سال دوھزار بیست ءُ یک ءَ بیگاھے ادار سَے ءَ فٹبال ہاؤس چاکیواڑہ لیاری ءَ یک مراگشے برجم دارگ بوگ ءَ اِنت –

نوکتریں بلوچی شائری ءِ تہ ءَ بانل دشتیاری ءِ یک جتائیں نامے داریت- بانل دشتیاری ءِ بنکی نام سیدہ ناز بی بی بوتگ کہ آ سال نوزدہ سد ءُ بیست ءُ پنچ ءَ ماں لیاری ءِ دمگ بغدادی سیفی لین ءَ سید ملنگ شاہ ءِ گس ءَ ودی بوتگ ءُ آئی ءِ پت سید ملنگ شاہ ہاشمی ھم بلوچی زبان ءِ اولی کماشیں صوفی شائر بوتگ –

بانل ءَ وتی گِس ءَ تہ ءَ اولسر ءَ چہ وتی مات بی بی شھناز ءَ چہ کُران پاک دربُرتگ ءُ آئی ءَ وتی دمگ ءَ مُلا ملانی ذروک ءِ مدرسہ ءَ ھم ونتگ ءُ پارگ کتگ آ ملا ذروک ءِ نام ءَ زانگ بوتگ –

بانل دشتیاری شومک ءِ نادراھی ءِ آماچ بوتگ کہ دوازدہ نومبر سال نوزدہ سد ءُ نود ءُ دو ءَ پنچ شمبے ءِ روچ ءَ آئی ءَ اے دنیا یل داتگ – وتی بیرانی ءَ لھتے ماہ ساری آئی ءَ وتی پِت بند ءَ بلوچی زھیرونک گوشتگ –

زھیرونک در ءُ رنجانی رنگ ءَ گوشتگ اَنت بانل دشتیاری ءَ درد ءُ اندوہ چنچو یکجاہ کتگ ءُ دیوان کتگ ءُ آئی ءَ وتی درد نبشتگیں تاکانی تہ ءَ ھم کتگ اَنت – آئی ءَ پیراں سالی بلو کپوت ءِ نام ءَ پانزدہ روچی کتابپک “زمانہ” ءِ تہ ءَ مدامی وشکندی کالم نبشتہ کتگ –

سربوتگیں ھالانی رِد ءَ گوستگیں بیست ءُ چار ادارانی میان ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں بیست ءُ نھ دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ دو ھزار ءُ ھشتاد ءُ ھشت ءَ سر بوتگ اَنت-

بلوچستان جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ مروچی آدینگ ءِ روچ ءَ بلوچستان ءِ پنچ دمگاں بیست ءُ نھ مردماں کرونا نادراھی پدر بوتگ چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ دو ھزار ءُ ھشتاد ءُ ھشت ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ بیست ءُ چار ادارانی میان ءَ ھشت مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ءُ یک ھزار ءُ پنچ سد ءُ شست ءُ ھشت انت-

رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ یک سد ءُ ھپتاد ءُ یک نادراہ ھست انت کہ نھ نادراہ بلوچستان ءِ نادراھجاہ ءَ الاج کنگ ءَ انت ءُ آھانی تہ ءَ شش نادراہ ھائی فلو آکسیجن ءَ اِلاج ءَ انت- مروچی پنچ سد ءُ شست مردماں کرونا نادراھی ٹیسٹ کنگ بوتگ اَنت تنی وھدی ھپتاد ءُ چار مردمانی رپورٹ نہ اتکگ انت –

رپورٹ ءِ رِد ءَ بیست ءُ چار ادارانی میان ءَ بلوچستان ءَ کرونا ویروس ءِ کیسانی گیشی پنچ ٹک ھژدہ درسد بوتگ تنی وھدی بلوچستان ءِ تہ ءَ کرونا ویروس ءَ سرجمی ءَ سَے سد ءُ چِل ءُ نھ مردم بیران بوتگ انت-

بلوچستان ءِ جتا جتائیں دمگ جیونی ءُ قلعہ سیپ اللہ ءَ دگ ءِ وئیلاں زالبولے ءَ ھوار چار مردم بیران ءُ دو ٹپی بیتگ اَنت –

سربوتگیں ھالانی رِد ءَ بلوچستان ءِ دمگ قلعہ سیپ اللہ ءَ مزن شھدگ ءَ ویگو گاڑی ءُ ٹرکے ءِ ڈِک ورگ ءَ زالبولے ءَ ھوار چار مردم بیران بیتگ اَنت –

انتزامیہ ءِ رِد ءَ ویگو گاڑی چہ پشاور ءَ دیم پہ شال ءَ روگ ءَ بوتگ کہ آئی ءَ گوں ٹرکے ءَ ڈک وارتگ چریشی ءِ آسر ءَ شال ءِ جھمنندیں چار مردم بیران بوتگ اَنت-
ا
بیران بوتگیں مردمانی پجّار بسم اللہ ء ابدالرازق ، قدرت اللہ ء نیک اللہ ، فرید اللہ ء اللہ گُل ، بسم اللہ ء لوگ ءِ بانُک اپسانہ نام ءَ چہ زانگ بوتگ اَنت –

بیران بوتگیں پہ گیشیں چار ءُ ٹپاس ءِ ھاتر ءَ سیف اللہ نادراھجاہ ءَ برگ بوتگ اَنت-

ھمے وڑ بلوچستان ءِ تیاب دپی دمگ جیونی ءِ ھند کنٹانی ھور ءَ چہ آؤکیں پک اپ گاڑی ٹائر ترک اِتگ ءُ چپ بوتگ-

پک اپ ءِ گاڑی ءِ چپ بوگ ءِ آسر ءَ سوار ڈرائیور ریاض ءُ آئی ءِ ھمراہ طارق ٹپی بوتگ-

دوئیں ٹپی بوتگیں مردم پہ الاج ءِ ھاتر ءَ جی ڈی نادُراھجاہ ءَ سر کنگ بوتگ اَنت-

بلوچستان ءِ دمگ ڈیرہ مراد جمالی ءَ پاکستانی پوج ءُ چیریں ادارھاں یک مردمے زورانسری آوار جنگ ءَ پد بیگواہ کرتگ –

زورانسری آوار جنگ بیتگیں مردم ءِ پجار سالار ء امیران ڈومکی ءِ نام ءَ زانگ بیتگ کہ ڈیرہ مراد جمالی ءِ جھمنند اِنت-

دمگی مردماں گوں ٹی بی پی ءَ گپ کنان ءَ گوشتگ کہ سالار پاکستانی پوج ءُ اسپیت پوشیں کارمنداں چہ ڈیرہ مراد جمالی ءِ بازار ءَ مروچی دزگیر کرتگ ءُ گاڑی ءَ نادینتگ ءُ وتی ھمراھی ءَ برتگ چریشی ءَ پد آئی ءِ بارو ءَ ھچ ھال ءُ اھوال نیست اِنت –

دمگداراں تنی وھدی اے درگت ءَ دگہ گیشیں ھچ ھال دیم ءَ نیاؤرتگ اَنت –

زانگ بہ بیت بلوچستان ءَ زورانسری آوارجنیانی وئیل ھمک روچ رپورٹ بیگ ءَ اَنت ھمے وڑ بیگواھیں مردمانی کھولانی نیمگ ءَ وتی دوستگیں مردمانی یل کنگ ءَ زھرشانیانی درچ یکشل ءَ برجاہ اَنت کھولانی گوشگ اِنت اگاں مئے مردماں دگہ جرمے کرتگ گڑا آیاں ڈیھی آمیدگساں پیش بہ کن اِت ءُ کانونی رنگ ءَ ھک دیگ بہ بنت-

دبئی ءَ پنچ شمبے روچ ءَ بوتگیں آئی پی ایل گوازی ءَ پنجاپ کنگز ءَ چنئی سپر کنگس شش وکٹاں ءُ کے کے آر ءَ راجستھان رائل ھشتاد ءُ شش رناں پروش داتگ –

پنجاپ کنگز ءُ چنئی سپر گنگز ءِ میان ءَ بوتگیں گوازی ءَ کپٹن لوکیش راھل ءِ نود ءُ ھشت جوانیں اننگز ءِ گوازی ءَ پنجاپ ءَ شش وکٹاں باج برتگ – پنجاپ ءِ نیمگ ءَ اولسر ءَ بالنگ کنگ بیت ءُ چنئی ءَ یک سد ءُ سِی چار رنانی ٹارگٹ دات ءُ پنجاپ ءَ سیزدہ اووراں چار وکٹانی تاوان ءَ چنئی ءِ ٹارگٹ پروشت ءُ یک سد ءُ سِی ءُ نھ رن جوڑ کرت – چنئی ءِ نیمگ ءَ بس شاردل ٹاکر ءَ سوبمند بوت ءُ آئی ءَ سَے اوورزاں بیست ءُ ھشت رن دات ءُ سَے وکٹ گپت اشی ءَ پد درسیں بالراں انچو جوانیں لیب پیش نہ داشت – چنئی ءِ نیمگ ءَ اے سیزن ءَ سوبمندتریں بالر دیپک چاھر چار اووراں چِل ءُ ھشت وھدیکہ ڈوین ءَ دو اورراں سِی ءُ دو رن داتگ –

راھل ءَ جوانی ءَ گوازی کنان ءَ چِل ءُ دو بالاں ھپت چوکہ ءُ ھشت چکایانی کمک ءَ نود ءُ ھشت رن جوڑ کرتگ بس دو رن ءَ وتی سنچری کنگ ءَ زبھر بوت بلے وتی ٹیم سوبمند کنائینت – آ گوازی ءِ کٹگ ءِ سر ءَ پلئیر آف دی میچ ءِ داد دیگ بوت – پنجاپ ءِ نیمگ ءَ ایندگہ بیٹسمین چوش جوانیں لیب پیش نداشت ایڈن ءَ یک چک ءِ جت ءُ ھشت بالاں سیزدہ ءُ مینگ اگروال ءَ دوازدہ بالاں یک چوکائے ءِ کمک ءَ دوازدہ رن جوڑ کرت –

پنجاپ ءِ نیمگ ءَ جوانی بالنگ ھم کنگ بوت کہ چنئی یک سد ءُ سِی ءُ چار رناں دیم ءَ رؤگ ءَ نیشت -پنجاپ ءِ بالر ارشدیپ ءَ چار اوور ءَ سی ءُ پنچ رن دات ءُدو آؤٹ کت، جورڈن ءَ سَے اوور ءَ بیست رن دات دو، سمیع ءَ چار اوور ءَ بیست ءُ دو رن دات ءُ یکے ءُ بشنوئی ءَ چار اووراں بیست ءُ پنچ رن دات یک وکٹ گپت –

دومی نیمگ ءَ کولکتہ ءُ راجستھان رائل میان ءَ بوتگیں گوازی ءَ کولکتہ نائٹ رائیڈرز ھشتاد ءُ شش رناں راجستھان رائل پروش داتگ –

کولکتہ ءَ نیمگ ءَ اولسر ءَ بیٹنگ کنگ بوت ءُ کولکتہ ءِ لیبیاں جوانی ءَ گوازی کنان ءَ بیست اوورانی تہ ءَ یک سد ءُ ھپتاد ءُ یک رن ٹارگٹ دات – ٹارگٹ ءِ پروشگ ءِ ھاتر ءَ راجستھان ءِ لیباں کولکاتہ ءِ بالرانی دیم داشت نہ کت راجستھان ءَ شانزدہ اووراں بس ھشتاد ءُ پنچ رن جوڑ کرت ءُ آل آؤٹ بوت انت –

کولکاتہ ءِ بالراں جوانیں گوازی پیش داشت ماوی ءَ سَے اووراں بیست ءُ یک رن دات ءُ چار وکٹ گپت ءُ فرگیوسن چار اووراں ھژدہ رن دات سَے وکٹ گپت اشاں ابید ورون چکروتی ءُ شکیب الحسن یک یک وکٹ ءِ ھم گپت – شیوم ماوی جوانیں بالنگ کنگ ءِ سبب ءَ آئی ءَ پلئیر آف دی میچ ءِ داد دیگ بوت –

اوگانستان ءِ دمگ کندوز ءَ یک وتکُش تراکے ءَ سد ءِ کچ ءَ مردم بیران ءُ زدگ بیتگ اَنت –

تراک کندوز ءِ دمگ سعید آباد ءَ ھما وھد ءَ پیش اتکگ کہ مسیت ءَ بازیں کچے ءَ مردم جاڑیگ بیتگ اَنت –

دمگی رسانکدرانی رد ءَ بمب تراک وتکشے بیتگ،درملکی خبر ایجنسی اے ایف پی ءِ رد ءَ تراک ءَ داں انگت ءَ پانزدہ مردم بیران ءُ نود زدگ بیتگ اَنت-

دی بلوچستان پوسٹ کابل ءِ اھوالکار ءِ رد ءَ دمگی مردماں گشتگ کہ اُرش ءَ داں انگت ءَ پنجاہ مردم بیران بیتگ اَنت نود ءَ گیش زدگ بیتگ اَنت –

اھوالکار ءِ رد ءَ بیرانی کساس سرجمی ءَ گشگ نہ بنت، بیرانی کساس گیش بیت کنت –

گوستگیں روچ ءَ رمس 7 اکتوبر 2021 ءَ بلوچ اسٹوڈنٹس ایکشن کمیٹی “ایم ایم سی بنزہ” ءِ نیاد بیتگ، نیاد ھنکینی کارمستر سعید بلوچ ءِ چیردستی ءَ اڈ دیگ بوتگ، نیاد ءَ ایکش کمیٹی ءِ مکران کالج ءِ بنزہ ءِ باسکاں بازیں کچے ءَ بھر زرتگ ءُ نیاد ءَ مصوق بلوچ نوک گچین بیتگیں سروک نامینگ بیتگ-

نیاد ءَ جتا جتائیں بنگپانی سر ءَ گپ ءُ باوست بیتگ اَنت، تعارفی نشست، تنظیمی امور ءُ تجاویز میان اُستمان ءُ ھَندی سیاسی جاور ھال، آؤکیں گامگیج تعارفی نشست ءَ پد تنظیمی امور ءُ میان اُستمانی ءُ ھندی سیاسی جاور ھالانی سر ءَ گپ ءُ باوست بیتگ اَنت –

دیمترا ھنکینی کارمستر سعید بلوچ ءَ بلوچستان ءِ جاور ھالانی سر ءَ تران کنان ءَ گوشتگ کہ اگاں ما بلوچستان ءِ مرچیگیں جاوراں بہ چاریں گڑا اے مئے واستا الّمی اِنت کہ مارا سیاسی پِڑا گام ایر کنگی اِنت ءُ بلوچستان ءِ نودربرانی زانت ءُ آھانی بُنکی ھکانی ھاترا جھد کنگی اِنت۔ آیاں گُشتگ کہ اے مئے وش بھتی اِنت کہ بساک ءِ وڑیں نودربر گلے مارا رس اتگ ءُ درستیں بلوچ نودربر یکجاہ ءُ یکمشت کُتگ اَنت۔

نیاد ءَ تران کنان ءَ آئی ءَ گوں آدگہ باسکاں تران کنان ءَ گُشت کہ مارا وتی راجی زمہ واری سرپد بوگی اَنت مارا وتی پجار،دود ءُ ربیدگ ءُ لبزانک ءِ سر ءَ کار کنگی اِنت۔ اگاں ما مرچی بہ چاریں کجام کہ راج ءَ دیمروئی کُتگ گڑا آئی ءِ پُشت در ءَ نودربرانی مزنیں ارزشتے گندگ ءَ کیت کہ آھاں وتی وس ءُ واک ءِ بنیات ءَ وتی راجی زمہ واری پیلو کُتگ اَنت۔

دیمترا ھنکینی سنگت ءَ نوک گچین بوتگیں کابینہ سوگند دات۔ نوک گچین بوتگیں کابینہ ءِ تہ ءَ بنزھی کارمستر مصدق بلوچ، کمک کارمستر محمود بلوچ، کارگشاد ھدایت مجید، کمک کارگشاد سفیر بلوچ، شنگکار مصطفیٰ بلوچ گچین کنگ بوتگ اَنت۔

یونائیٹڈ بلوچ آرمی ءِ جارکش مرید بلوچ ءَ ناشناسیں جاھے ءَ رسانکدر ءَ شِنگ کُتگیں درشان ءِ تہ ءَ گْوشتگ کہ پنجگور ءِ دمگ گوانتاک گواری ءَ پاکستانی پوج ءِ بُنجل ءِ سر ءَ بوتگیں اُرش ءِ زمہ واری منّ اِتگ ءُ گْوشتگ کہ مئے سرمچاراں پاکستانی پوج ءِ بُنجل ءِ سر ءَ گوں راکٹ ءُ وتکاریں سلاھاں نشانگ کتگ ءُ دو کارندہ کُشتگ اَنت-

اے اُرش ءِ زمہ واری ءَ یونائیٹڈ بلوچ آرمی منّ اِیت-

جارکش ءَ دیمتر ءَ گْوشتگ کہ مئے اے وڑیں اُرش داں بلوچستان ءِ وتواجھی ءَ برجاہ بنت-

نبشتانک: راجی زُبان ءِ ھندی سْیاھگ

نبشتہ کار: ابدلستار بُگٹی

دی بلوچستان پوسٹ

انچوشکہ شُما سرپد اِت کہ من ءَ یک دو ماہ بیتگ کہ من ھندی ءِ آب دربُرتگ ءُ ھندی ءِ وانگ ھیل کتگ۔ گُؑڑا چہ ھندی ءِ وانگ ءُ دربرگ ءَ رند من ءَ مار ات کہ پہ راجی زُبان ءَ ھم ھندی ءِ سْیاھگے اڈ بہ کن آں کہ چہ اے کار ءَ راج ھم سرپد بہ بیت کہ بلوچی آبانی وڑ ءَ ھندی سْیاھگ ءَ ھم یکیں توارینک ءِ دو یا سے آب نہ بنت انچوشکہ اَربی سْیاھگ ءِ تہ ءَ توری “ز ، ژ، ذ، ض ءُ ظ” بہ بنت یا توری “ث، س ءُ ص” یا توری ” ع، ء، ا،ءُ ھ” بہ بنت ھمے داب ءَ “ھ ءُ ہ” بہ بنت۔ بزاں ھندی ءِ آب ھم کم اَنت ءُ سُرینوک ئِے ھم نیست اِنت۔ البت من راجی زُبان ءِ ھندی سْیاھگ پہ ھمے ھاتر ءَ اڈ نہ کُتگ کہ من کسے ءَ بلوچی ءَ ماں ھندی ءِ سْیاھگ ءَ وانینگ ءَ آں یا من سید رھبند ءِ اربی سیاھگ رَد کُتگ ءُ راج ءَ گْوشگ ءَ کہ شُما نمیرانیں سید ھاشمی ءِ اربی سْیاھگ ءِ رھبند ءَ یلہ بہ دے اِت انچوشکہ منی ھلاپ ءَ لھتیں بدواھیں مردم پوتاری کنگ ءَ اَنت۔

چوناھا راستی وَ ایش اِنت کہ راجی زُبان ءِ رواج گپتگیں رھبند نمیرانیں سید ھاشمی ءَ گوں اَربی سیاھگ ءَ ٹھینت ءُ من وت اَربی سیاھگ ءِ منّوگر آں کہ روایرشُتی ءُ رودرآتکی بلوچ نودربراں ماں وانگجاھاں اربی سْیاھگ وانینگ بیگ ءَ اِنت پمیشکا بلوچ راج وتی راجی زُبان ءِ نبشتہ سیاھگ ءُ رھبند ءَ وت ھیل گرگ ءَ اَنت۔ البت دری زُبان ءِ سْیاھگ دربرگ ءُ راجی زُبان ءَ ھم یک نوکیں سْیاھگے دیگ یک بلاھیں سببے ءُ اے بنی آدم ءِ بودی اَنت کہ یک مردمے ملٹی ٹیلنٹ بہ بیت۔

من ھندی ءِ سْیاھگ دربُرتگ بلے من راج ءَ اے وَ نہ گْوش آں کہ شُما راجی زُبان ءَ ھم گوں ھندی آباں نبیسّ ات چے ءَ کہ بلوچ راج ءَ ھندی نہ وانتگ ءُ نَیکہ بلوچ ءَ گوں ھندی ءَ سْیادی یے ھست ءُ نَیکہ مارا گوں ھند ءِ ھُشکنات ءَ کار ءُ داری یے ھست۔ ھر کس سرپد اِنت کہ بلوچ راج ءِ کِر ءُ کش ءِ ھمساھِگیں راج انچوشکہ دری، پارسی، پشتو، اُزبک، کُرد، سندھی ءُ سرائیکی دْراہ پہ وتی زُبانانی نبیسّگ ءَ اربی سْیاھگ کارمرز کن اَنت بلے بژن اِنت کہ لھتیں مردماں منی سر ءَ کَند اِت ءُ بدبُرتگ، لھتیں سنگتاں منی سر ءَ مسکرائی کُت ءُ بازین زھر بیتگ اَنت۔ یک سنگتے کہ نام ئِے داد اُلہ اِنت، گْوشت ئِے “بلے انگت منی وتی بلوچی سیاھگ راست نہ اِنت گڑا من کدی ھندی ءَ دربُرت کن آں ، گھتر ھمیش اِنت بلوچی سیاھگ ءِ سر ءَ کار بہ بیت” بلے اے واجہ اے ھم سرپد نہ بوتگ کہ من ھندی ءَ وانینگ ءَ نہ آں بلکیں یک سْیاھگے دیم ءَ آؤرتگ بلے من سنگت داد اُلہ بلوچ ءَ پسّو دات ءُ گْوشت کہ واجہ راجی زّبان ءِ اربی سّیاھگ سرجم ءُ پیلو اِنت۔ اربی سْیاھگ ءِ سرجمیں درونت ءُ کورس ھم ھست اَنت۔ من وت راجی زُبان ءَ اربی سْیاھگ ءِ منّوگر آں کہ نمیرانیں سید ھاشمی ءِ اربی سْیاھگ راجی زُبان ءِ رواج گپتگیں رھبند اِنت بلے پہ دزھُورکی ءُ مسکرائی ءَ من ھندی دربُرتگ ءُ من نی ھندی وانگ ءُ نبیسّگ ھیل کُرتگ۔ بلے من مار اِت کہ ھندی ھم راجی زُبان ءَ یک جْوانیں سْیاھگے دنت پہ اے ھاتر ءَ من راجی زُبان ءِ یک ھندی سْیاھگے ھم تیار کُت بلے ایشی ءِ اے مول ءُ مُراد وَ نہ انت کہ راجی زُبان ءِ اربی سْیاھگ گوں سید رھبند ءَ رِد اِنت! ھمے ڈول ءَ یک دگہ سنگتے کہ نام ئِے جلاب آسکانی اِنت، ھم یک مسکرائی جُستے کُتگ اَت “ھنچوش کہ اسلم کادر ءِ سْیاھگ ءَ رواج گپت گُڑا اے ھم رواج گیپت! نگبھت بات ئے مئے راج ءَ ھما سیاھگ ءِ سر ءَ سد سال جتگ انگت ٹریک ءَ درایان اِنت ایشی ءَ کجا در بارت تو مپت ءَ ٹیل سوچگ ءَ ئے لالا ستار ” گُڑا من سنگت ءَ مسکرائی پسّوے دات “جی ھو تو راست گْوشگ ءَ ئے بلے بلوچ راجدپتر ءِ تہ ءَ اے ھم نبشتہ بیت کہ نمیرانیں واجہ ابدلستار بُگٹی ءَ راجی زُبان ءِ ھندی سْیاھگ اڈ کُتگ اَت”-

بلے من واجہ سابت تگرانی ءِ منّتوار آں کہ ھمے سنگت ءَ ھم ھندی آب ونتگ ءُ دربُرتگ اَنت۔ وھدے کہ واجہ ءَ منی تیار کُتگیں ھندی سْیاھگ ءِ بلوچ درونت چار اِت اَنت گُڑا نبشتگ ئِے “جوانیں کارے کسے ءَ دردبرگ ءِ ھُب ھست در بہ بارت ئِے بلے واجہ پہ بلوچی سیاھگ ءَ سید ءِ گچین کُتگیں سیاھگ جْوان تِر اِنت ھمائی ءِ سر ءَ کار بہ بیت تو وَ انّو دربُرتگ بلے واجہ سید ءَ ھم ھندی ءَ دزرس بیتگ زیا بلوچ ءُ ایدگہ زُبان زانت ھم ھندی ءَ بلد اَنت۔ اگاں اد ءَ چیزے بیتیں وَ پیسر ءَ بیتگ اَت” من گوں واجہ سابت تگرانی تپاک کن آں کہ مارا سید رھبند دیم ءَ برگ لوٹ ایت کہ راج اربی سْیاھگ ءَ ھیل اِنت۔ بلے یک گپے وَ ھست کہ پہ بلوچی زُبان ءَ ھندی سْیاھگ چہ اربی سْیاھگ جْوانتر بیت انچوشکہ آب ئِے ھم کم اَنت ءُ دومی لھتیں پوتاری ھم ھلاس بیت کہ ما “مھمد، الہ بکش، ابدلکادر ءُ کاسم” ءِ نبیسّگ ءَ گُناھگار بَہ ایں۔

بلوچ راج شالا یکمُشت ءُ تپاک بہ بات، بلوچ راجی زُبان شالا مُدام دیمروئی بہ کنات، شالا انچوش بہ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یونائیٹڈ بلوچ آرمی ءِ جارکش مرید بلوچ ءَ رسانکدراں وتی شنگ کرتگیں درشان ءِ تہ ءَ مزار بلوچ ءِ نام ءَ چہ یو بی اے ءِ کماندار سرفراز بنگلزئی یو بی اے ءَ چہ درکنگ چُکی کارے لیکتگ ءُ آئی ءِ درشان رد کُتگ –

جارکش ءِ گوشگ ات کہ یو بی اے ءِ ھچ وڑیں ہائی کمان ءُ سنٹرل کمیٹی ءِ بندات ءَ چہ ھچ وڑیں وجود ءِ نیست گل ءَ دمگی ءُ ریجنل کماندار گراؤنڈ ءِ تہ ءَ کمان کنگ ءَ انت ءُ گل سرفرازبنگلزئی ءِ مھنت ءُ جوانیں جنگی رپک ءُ ھنراں چہ سرجم انت –

آئی ءِ گوشگ ات کہ ما راج ءِ دیم ءَ اے گپ ءَ ایرکنگ لوٹیں کہ گل ءِ کماندار پمے ھاتر ءَ اے سزا دیگ بوتگ کہ آئی ءَ اتھاد یکجاھی ءِ جھد کتگ کہ آئی ءِ تہ ءَ یو بی اے ءَ براس ءِ تہ ءَ ھوار کنگے جھد ھم مان انت کہ نام گپتیں ہائی کمان مھران مری باز بگیر بوتگ پرچاکہ آ اتحاد ءُ یکمشتی ءِ منوک نہ انت – آ مدامی میان استمانی تاکتانی وڑ ءَ بلوچ زرمبشت ءَ یک پریشر ٹولی ءَ تان دارگ لوٹ ایت کہ آئی ءِ بگیری ءَ گل ءِ کماندار ءَ مدامی رھبندانی گھگیری کتگ –

جارکش ءَ دیمتر ءَ گوشتگ کہ گل ءِ کماندار ءَ وتی گل ءِ مکران ءَ جوانیں کماندار خالد پنام بیبرگ بلوچ ءِ وتی سنگتانی دست ءَ شھیدی ءِ بگیری ءَ توار چست کتگ ءُ اے ناجائزیں امل ءَ ھواریں مردماں سزا دیگ ءِ لوٹ کتگ – کہ لھتے مردماں اوپار نہ بوتگ، ما مدامی گل ءِ تہ ءَ برابری ءُ کانود ءِ بالادستی اولی جھد کتگ ءُ مئے اے واھشت مدامی نزرانداز کنگ بوتگ انت ءُ ھنچیں گامگیج زورگ بوتگ کہ گل ءِ تہ ءَ دوری پیداک بہ بیت –

جارکش ءَ گوشتگ کہ گل ءِ دمگی کمانداراں چہ صلح باوست ءَ پد ھمے پیسلہ زورگ بوتگ کہ گل سرفراز بنگلزئی کمان ءَ وتی پوجی ءُ جنگی کاراں دیم ءَ بارت –

جارکش ءَ گوشتگ کہ مشاورت ءَ یک کمیٹی ءُ آئی ءِ گشینگ ءِ ھاتر ءَ سینئر کمان ءِ کمیٹی ءِ اڈ دیگ بیت کہ گل ءِ امور ءُ جیڑھانی سر ءَ گل ءِ پتر ءَ چاربچار کنت ءُ آھان گیش ےُ گیواری ءِ جھد ءَ کنت تانکہ گل ءِ تہ ءَ اختلاف رائے، اداری سازی بھربانگی وڈیں جمھوری رھبند لپاشگ کنگ مہ بنت ءُ زوراکی ءِ ھوسلہ دئیگ ءُ آ گیش کنگ مہ بنت –