TBP Balochi

بلوچستان ءَ گوستگیں دو ھپتگانی تہ ءَ سَے سد ءُ ھشتاد وئیل دیم ءَ اتکگ اَنت – میڈیکل ایمرجنسی ریسپانس سینٹر

سربوتگیں ھالانی رِد ءَ بلوچستان ءِ دمگ نوکنڈی، جھل مگسی، چاگی ءُ ماشکیل ءَ تیرگواری ءُ دگہ وئیلاں شش مردم ٹپی ءُ دو مردم بیران بوتگ انت –

گیشیں ھالانی رِد ءَ نوکنڈی ءَ زمباد ءُ پیک اپ گاڑی ءِ ڈیک ورگ ءَ سَے مردم ٹپی بوتگ انت –
وئیل نوکنڈی ءِ نزیک ءَ آر سی ڈی دگ ءِ سر ءَ دیم ءَ اتکگ کہ مسافر کشیں پیک اپ گاڑی ءَ گوں زمباد گاڑی ءَ ڈیک وارتگ چریشی ءِ آسر ءَ مسافر کشیں گاڑی ءِ ڈرائیور ءَ ھوار دو مسافر ٹپی بوتگ اَنت – ٹپی بوتگیں مردم ڈی ایچ کیو نادراھجاہ نوکنڈی ءَ برگ بوتگ اَنت ٹپانی درمان کنگ ءَ پد پہ گیشیں الاج ءِ ھاتر ءَ دالبندین ءَ دیم دیگ بوتگ انت –

ھمے وڑ جھل مگسی ءَ دگ ءِ وئیلے ءَ یک مردمے ٹپی بوتگ – ھالانی رِد ءَ گنداواہ ءِ دمگ نوشھرہ ءَ لیویز چیک پوسٹ ءِ نزیک ءَ رکشہ گاڑی ءِ چپی بوگ ءَ یک مردمے ءِ پاد چہ جان ءَ سستگ – وئیل تیز رؤگ ءِ سبب ءَ دیم ءَ اتکگ ٹپی بوتگیں مردم ھما دمان ءَ گندواہ نادراھجاہ ءَ سرکنگ بوتگ –

زانگ بہ بیت گوستگیں دو ھپتگانی میان ءَ بلوچستان ءِ دگانی سر ءَ سَے سد ءُ ھشتاد وئیل دیم ءَ اتکگ اَنت – میڈیکل ایمرجنسی ریسپانس سینٹر ءِ رپورٹ ءِ رِد ءَ اے دؤئیں ھپتگانی تہ ءَ سَے سد ءُ ھشتاد وئیل دیم ءَ اتکگ کہ چریشی ءَ دہ مردم بیران ءُ پنچ سد ءُ ھشت مردم ٹپی بوتگ انت –

دگہ وئیل ءِ چاگی ءَ لوگی جیڑہ ءِ سر ءَ تیرگواری ءَ یک مردمے بیران ءُ آئی ءِ دو برات ٹپی بوتگ انت –

لیوز ءِ رِد ءَ وئیل چاگی ءِ دمگ پستی ءَ بوتگ کہ لوگی جیڑہ ءِ سر ءَ وتی وارس ءِ تیرگواری ءَ سَے مردم ٹپی بوتگ انت، ٹپی بوتگیں مردمانی پجار حاجی داد ، عید محمد، محمد طاھر ءِ نام ءَ چہ بوتگ اَنت کہ ھر سئیں برات انت – ٹپی بوتگیں مردم ھما دمان ءَ پرنس فھد نادراھجاہ ءَ سرکنگ بوتگ انت اود ءَ ٹپانی درمان کنگ ءَ پد شال ءَ دیم دیگ بوتگ انت بلے راہ ءِ نیم ءَ محمد طاھر ءَ وتی ٹپانی درد نہ سگتگ ءُ بیران بوتگ –

لیویز ءَ کتکار ءِ بگیری ءَ ارزی نبشتہ کتگ ءُ آئی ءِ پٹ ءُ پول ءَ کنگ انت –

ھمے وڑ ماشکیل ءَ ناشناسیں سلاہ بندیں مردمانی تیرگواری ءَ یک مردمے بیران بوتگ –

بیران بوتگیں مردم ءِ پجار ممتاز ء عبدالکریم ءِ نام ءَ بوتگ بیران بوتگیں مردم ءِ جون سول ھسپتال ماشکیل ءَ سرکنگ کنگ بوتگ اودا اژدری چارٹپاس ءَ پد جون کھول ءِ ھوالگ کنگ بوتگ –

سر بیتگیں ھالانی رد ءَ روکپتی بلوچستان ءِ دمگ آبادان ءَ سَے مردمانی جون دزکپتگ، جون پولیس ءَ آبادان ءُ پھرہ ءِ راہ ءَ یک پُھلے ءِ چیر ءَ دزکپتگ اَنت –

دمگی مردمانی رد ءَ دزکپتگیں جونانی پجار صادق کاووسی ء مھمد صدیق، محمود ریگی ء شریف ءُ صفی اللہ ءِ ناماں زانگ بیتگ اَنت-

پولیس ءَ دزکپتگیں جونانی گور ءَ یک پرپٹے ھم دزکپتگ ءُ پولیس ءَ بنداتی ھالانی تہ ءَ گوشتگ کہ گمان ھمے بیت اِنت اے مردم دگ ءِ وئیل ءِ آماچ بیتگ اَنت –

جونانی شنگ بیتگیں اکسانی تہ ءَ گندگ بیت اِنت اے مردم جنگ ءُ کُشگ بیتگ اَنت –

دمگی لس مردمانی گوشگ اِنت کہ اے مردم دزگیر کنگ ءَ پد کُشگ ءُ چگل دیگ بیتگ اَنت –

آیانی گوشگ اِنت کہ سیکورٹی فورسز مردماں آوار جنت ءُ پد ءَ آیاں کُشگ ءُ چگل دنت کہ اے روکپتی بلوچستان ءَ کساس کم یک نوکیں وئیلے درپیش بیتگ –

روکپتی بلوچستان ءَ بندوکیں مردمانی گوشگ اِنت کہ رودراتکی بلوچستان ءَ ھمے وڑ ءَ پاکستانی چیریں ادارہ اود ءَ بلوچاں آوار جنگ ءَ پد کُشگ ءُ چگل دیگ ءَ اَنت اے ھما وئیلاں گوں ھمدپ اِنت ءُ ھما جاور روکپتی بلوچستان ءَ ھم کم کم ءَ ودان اَنت –

لس مھلوک ءَ گوشگ اِنت کہ اد ءَ ھرکس وتی ھک ءَ اگاں گپ بہ کنت آ ھم گرگ ءُ زندانی کنگ بیگ ءَ اَنت –

ایرانی لشکر ءَ تنی وھدی مردمانی دزگیری ءُ کوشانی گپ یکشل ءَ رد کرتگ اَنت –

بلوچستان ءِ بنجاھی شھر شال ءَ بالی پَٹ دگ ءَ عسکری پٹرول پمپ ءِ نزیک ءَ پاکستانی پوج ءِ کاروان ءِ سر ءَ بمب تراکے بیتگ –

دمگی مردمانی رد ءَ تراک ءِ ترندی ءَ نزیکیں ماڑیانی شیشگ پرشتگ ءُ نزیک ءَ اوشتوکیں گاڑیاں ھم آس لگ اِتگ –

پولیس ءِ رد ءَ آس کُشیں گاڑی لوٹائینگ بیتگ ءُ پولیس ءُ پوج ءَ ھوار دگہ ادارھاں دمگ انگیر ءخ کرتگ، بمب ڈسپوزل اسکواڈ ھم تراک جاہ ءَ آیگ ءِ پرمان کنگ بیتگ –

تراک ءَ بیرانی گمان کنگ بیگ ءَ اِنت –

اولی بلوچی تامر “ھمل ءُ ماہ گنج ” ازمکار ءُ تامرکار انور اقبال لھتے وھداں نادراہ بیگ ءَ پد پشمبے ءَ کراچی ءَ بیران بیتگ –

انور اقبال ءِ کھول ءَ آئی ءِ بیرانی ءِ ھال راست کرتگ ءُ گوشتگ کہ انور اقبال ءِ جان وش وش نہ بیتگ ءُ لھتے روچ ءَ نادراہ جاہ ءَ وپتوک بیتگ – آئی ءِ نماز جنازہ عشاء ءَ بیت المکرن مسیت ءَ وانگ بیت اِنت آئی ءِ کل ءُ کسارات میوہ شاہ مانش ءَ بیت اِنت –

انور اقبال ءِ گوشگ اِنت کہ لھتے ماہ ءَ پیش آئی ءِ لوگی ھم بیران بیتگ –

انور اقبال ءِ اکس لھتے وھداں چاگردی رسانکجاھاں گندگ بیتگ کہ نیزور ءُ نادراہ جانی ءَ گندگ بیتگ –

انور اقبال ءَ 1975 ءَ اولی بلوچی تامر ھمل ءُ ماہ گنج جوڑ کرتگ کہ بلوچ راجدوستاں رد کرتگ ءُ زھرشانی کرتگ ءُ چریشی ءِ سبب ءَ تامر شنگ نہ بیتگ جوڑ کرتگیں تامر چِل ءُ دو سال ءَ پد سال دوھزار ءُ ھبدہ ءَ شنگ بیتگ –

آئی ءَ پاکستان ٹیلی وژن ءَ ڈرامھاں کار کرتگ کہ “شمع ءُ آخری چٹان ءَ ھم وتی کرد پیلو کرتگ اَنت –

نبشتانک: میرل جان گُلزمین ءِ سالونک انت

نبشتہ کار: مقبول ساچ

دی بلوچستان پوسٹ

مُدتے ءَ پد میرل جان تو یاد اتکگ ئے چیاکہ تو سکیں مھروانیں ھمبل ءُ جوانیں جھدکارے ات ئے میرل جان من ءَ انچُش گُمان بیت کہ من گوں تو کولواہ شندی ءَ دُچار کپتگ آں ءُ تو چہ سپرے ءَ اتکگ ات ئے ءُ پدا وش آتک، ھال ءُ اھوال بوت تو گوں سنگتان مھروانیں بچکندگ ءُ مسکراھی ءَ گوں شپ وتی آسر کُت ءُ پد ءَ سُھب ءِ بام ءَ ٹک دات، سنگت ھم راہ کپتگ انت پہ سپر ءَ ھمے دمان ءَ تو من ءَ گوانک جت ءُ گوشت! ساچ پُل بیا اد ءَ ، من اتک آں بلے من ءُ تو دوئیں گُنگ اَت ایں نا تو گپے کُت ءُ نا من چیاکہ من پیسرا نا آشنا ات آں کہ تو کئے ۔۔۔؟ بلے ساھتے ءَ پد تو من ءَ گوشت کہ منی ھیال ءَ تو من ءَ انگت پجّہ آرگ ءَ نہ ئے۔۔؟ من پسّو دات ھو راستے کہ من ترا زانگ ءَ نہ آں سنگت –

ما گپ ءُ دیوان ءَ اَت ایں، تو پسّو دات کہ من زپیر آں تیرتیج ءِ من ھیران ءُ ابکّہ بوت آں کہ تو منی سکین دلی یے سنگت ئِے ءِ من ءُ تو یکیں ھند ءِ مردم ایں ءُ مدام یکجاہ ءُ ھور بوتگ ایں زپیر ۔۔۔ بلے تو نی بدل بوتگ ئے پدا ساھتے ءَ پد تو گوشت کہ کُجام زپیر ؟ من زپیر ءَ پجّہ آرگ ءَ نہ آں، من میرل آں۔ بلے تو کوھنیں آ گپان بل بیا من ءُ تو نند ایں ءُ کوھنیں یات ءُ زھیرے تالان کنیں من ءُ میرل ساھتے ءَ نشت ءُ دیوان کُت ءُ وتی کسانی ءِ کسہ آرت انت ءُ مسکرا ءُ جاک، کندگ بنا بوت اناگت ءَ گاڑی ءِ اتک ءُ اوشتات میرل جان ھیران ءُ ابکّہ بوت کہ اے چونیں گاڈی یے کہ مئے گورا اتک، ساھتے ءَ پد من میرل ءَ پسّو دات کہ اے پمن اتکگ چیاکہ مزنیں شھر ءَ لھتیں کار پشت کپتگ، تو نشتگ ئے من ترا موکل کن آں کہ منی گاڈی اوشتاتگ، اگاں ترا شھر ءَ کار ھست تو گُشت کن ئِے تو پسّو دات سلامت بات ئے ۔

من کیچ ءَ سر بوت آں ءُ ساھتے ءَ پد منی گوانکو ءَ توار کُت ءُ من ھمے دمان ءَ گوانکو دست ءَ کُت چارت داں نوکیں نمبرے وھدے من چست کُرت ءُ ھلو ءَ گوں کندگے بنائے کُت کہ چونے ساچ ھالاں بدئے سر بوت ئے؟ من پسّو دات من وش ءُ سلامت آں تو چون ئے ءُ مرچی چونیا منی یاتاں کپتگ ئے؟ بس پُل شُمئے مھر انت ھمد ءَ مئے ھال ءُ اھوال بوت سک کندگ ءُ مسکر ءَ بوت، پدا تو منا گُشت کہ تو ھما مردم دیستگ من ھیران ءُ ابکّہ بوت آں کہ کُجام مردم ۔۔۔۔؟

ءَ تو کئی جست ءَ کنگ ءَ ئے پدا پسّو دات کہ منی مھرُل۔۔! من وتی کندگاں گوں گشت جی نہ من نہ شُتگ آں بلے منی ھیال ءَ پُل مھرُل تی ھچ ترانگ ءَ نہ اِنت ءُ بس تو وت ءَ مُپت ءَ گنوک ءُ دیوانگ کُتگ۔ پدا تو گشت پُل مھرُل منی واستہ مھروان انت ءُ من ھم پہ مھرُل ءَ من گوشت شر پُل وش انت من چہ نٹورک ءَ در کپگ ءَ آں دگہ وھد ئے ءَ موہ دات انشا ء اللہ ھال ءُ اھوال کن ایں۔

مُدت ئے ءَ پد من کولواہ ءَ اتک آں کہ یک روچے شھید پیرک جان گون وتی سنگتان نشتگ ات ءُ دیوان ات ءُ من ھم ھمے دیوان ءَ ھور بوت آں، پد ءَ ساھتے ءَ پد پیرک ءِ گوانکو ءَ توار کُت، بیا کہ بدیں ھالے ھست کہ دو سنگت شھید بوتگ من ھیران ءُ ابکّہ بوت آں سنگت ءَ گُشت کہ بالگتر ءَ جنگے بوتگ، مئے دو سنگت شھید بوتگ۔

پیرک ءَ گُشت اڑے چون کئے کئے بوتگ انت پل؟ سنگت ءَ گشت کہ یکے مراد جان ءُ یکے میرل جان انت پون ھمد ءَ چہ کٹ بوت ءُ شھید پیرک جان گُشت کہ مرچی مرادجان ءُ میرل جان شھید بوتگ انت بالگتر ءَ منی چمانی ارس شل شل بوت انت ءُ من پدا بچکندت ءُ من وت ءَ دلبڈی دات ءُ دل ءَ گوشت کہ منی میرل جان گلزمین ءِ سالونک انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: تو چہ من شر تر ءُ ارزشتر ئے

ندر انت پہ دُرسینانی نام ءَ

نبشتہ کار: میرین بلوچ

دی بلوچستان پوسٹ

دْراھبات ئے

اُمیت کن آں کہ تو وش ءُ سلامت ئے، تئی مات، پت، بْراس ءُ گْوھار، دوست ءُ دزگْوھاراں ابید گوگ ءُ پس ءُ دْرچک ءُ دار دْراہ سلامت انت ءُ تئی گِس ءِ پیژگاہ ءِ دْرچک ءُ دار تنیگت ءَ من ءَ گیر کاینت بلے چہ اے دْرستاں گیش تو من ءَ گیر کائے چی ءَ کہ زندگی ءِ باداتیں اوست گوں تو بندوک اَنت۔

ترا یات بیت کہ تو سک کسان ات ئے ءُ وتی گِس ءِ پیژگاہ ءِ دیمی بانڈُم ءَ لیب ءُ گْوازی کُت من ھم کسان اتاں کہ چہ دگنیا ءِ ھِچی گم ءُ رنج ، وانگ ءُ زانگ، شر ءُ ھراب ءِ دْرُسیں چیزاں ناآشنا اتاں بلے تو نوں رُستگ ئے لائِک ءُ مزن ئے باید انت نو تو دُرسینانی گماں وتی بہ لیک ئے مات ءُ پت ءِ گم ، بْرات ءُ گْوھارانی گم ءُ کوم ءُ راج ءِ گماں شری دار بہ بہ ئے ءُ من ھم ھمے امیت ءَ کناں۔

چی ءَ کہ بیست ءُ شش سال ءَ پد دوشی شپ ءِ کروڑ بج ءَ تو منی واب ءَ اتک ئے وھدے من واب ءَ بُست کُت ءُ چار اِت داں کس نیست بس من ءُ منی ساھگ ءُ پد ءَ گوں جیڑھاں بے وس بوتان ءُ سگریٹ ءِ دوتاں شپ آسر کُت بلے تو گار ات ئے ءُ گندگ نہ بوت ئے۔

بام ءَ روچ ءِ پدرائی کُت ءُ روچ ءِ کسان کسانُکیں شھم گس ءِ دیم ءِ دْرچکانی سر ءَ اَت اَنت ءُ شپ گوں تئی جیڑھاں بے واب ات اَنت ءُ نوں روچ ءَ ٹِک داتگ ات ءُ واب ھم پرشتگ اَت من پسیل ءَ شُت آن ءُ دیم شُشت ءُ واتر لوگ ءِ تہ ءَ اتک آں ءُ دیم گوں آدینک ءَ کُت بلے من وتی جِند نہ دیست بلکیں من ترا دیست من زان آں تو جیڑگانی آماچ بہ ئے کہ آدینک ءِ دیم ءَ ھر کس وت ءَ وت گند ایت ءُ گُش ایت چہ من ءَ شرتر کس نیست بس من ءُ منی بالاد دگہ ھچ۔۔۔؟
بلے باور کن من ترا دیست کہ تو سک باز بْراھدار ات ئے ءُ تئی ملگور دلبند ءِ سر ءَ نکش ات اَنت ءُ دمانے ءَ جیڑ اِت کہ اے کوہ ءُ زِر جنگل ءُ گیابان اے زمین ءُ آزمان تئی دْروشم ءَ جن اَنت ءُ ھمے دمان ءَ گُش ئے تو گوں من ھور ءُ ھوار ات ئے۔ منی بالاد ءِ تہ ءَ منی مارشت ءِ تہ ءَ منی اَکس ءِ تہ ءَ تو گون ات ئے ءُ اے تئی مھر انت کہ شپ ءِ کروڑ بج ءَ تو منی واب ءَ اتک ئے ءُ پد ءَ ساھتے ءَ پد من ھمے جیڑ ات کہ تو چہ من ءَ شر تر ءُ ارزشتر ءِ چی ءَ کہ تو منی پُشت پد ءِ تو منی باندات ءِ روژنائیں چراگے ئے تو ناکو اُمیتان ءِ جنکانی بامسارے ئے کہ مُدام پاد کاینت ءُ آدینک ءِ دیم ءَ وتا سینگار انت ءُ پد ءَ چہ وانگجاہ ءَ در کپ اَنت ءُ تو گنگُزار ءِ ھوٹل ءِ بٹ ءُ کابلی ئے ءُ مات روزاتون ءِ دوتکگیں پشک ءِ جالار ئے تو گْوھار گنجی ءُ شاری ءِ بچکندے ئے تو ماسٹر شپیک ءِ دست ءِ جوڑ کُرتگیں ڈرائینگے ئے ءُ ماسٹر دلیپ ءِ ریازی ءِ ھل کُرتگیں ھساب ءُ تو منی کلاس پیلوئیں بے نزیر ئے ءُ کتابانی زُلپ ءِ نِوانے ئے ءُ دُروشم ءِ آستین ءِ گوات ءُ پاتمہ ءِ سریگ ، تو چہ من ء شرتر ءُ ارزش تر ئے چی ءَ کہ تو منی پُشت پد ئے منی پیراں سری ءِ ھسایے ئے بلکیں اے نگیگیں ساھت ءَ من ترا یل بدے آن ءُ گُمنام بہ باں بلے تو ھست ئے چیاکہ تو منی اوست ءُ اُمیتانی دریگ ئے ءُ تو کچکلول ءِ گُشتگیں پربندانی گالوارے ئے ءُ دُرین ءِ سازانی بےچاڑیں موتک ءُ ساچان ءِ دست ءِ ند ءُ تو منی بالاچ ، بیبگر ءُ دودا ءُ شاری ءُ شدری ءُ ماھگنج ءُ تو منی لاڑیں بچک ءُ جَنک ، تو منی واجو ءِ دست ءِ ھسا ئے ءُ استاد ءِ داتگیں پنتانی سبکے ئے ءُ تو وابانی بانُک ءُ ھزار اوستانی اُمیت ئے تو چہ من ءَ شرتر ءُ ارزش تر ئے ءُ تو من ءَ یلا دات نہ کن ئے چی ءَ کہ تو منی ھدا ئے، منی ھستی ئے ءُ منی زیبائی ئے، منی کائنات ئے۔

اگاں تو من ءَ یلا بدئے تو اے کلکشان ءِ روژنائی وتی روژنائی ءَ یلا دے اَنت ءُ اے وشبوئیں پُلانی وشبو بے تاھیر بنت اے گْوات اوشت ءِ آماچ بیت ءُ من نپس گیر بنت ءُ منی دل ءِ دھڑکن بند بیت ءُ اے زمین ءُ آزمان اے دگنیا ءُ اے کائنات بید تئی ءَ ھچی ارزشت نہ دے اَنت ناں من ءُ ناں تو! من زان آں تو ھمے جیڑ ات کہ اے پِلمی ڈائلاک انت بلے اگاں تو من ءَ یلہ بکن ئے گُڑا اے پمن ءَ ھکیکت بنت ءُ پد ءَ یک روچے تو من ءَ جُست کن ئے کہ “کُجام گیشتر شرتِر ءُ اَلم اِنت منی زندگی یا تئی؟ گُڑا من پّسو دے آں “منی گُڑا تو یل کن ئے ءُ روئے ابید اے زانگ ءَ کہ منی زندگی وَ توئے ۔

( ھلیل جبران )

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ ھشت جون ءَ بلوچستان ءِ بنجاھی شھر شال ءَ پاکستانی پوج ءُ چیریں ادارھانی دست ءَ زورانسری آوارجنگ ءُ بیگواہ بوتگیں بلوچستان یونیورسٹی ءِ نودربر قاسم ءِ عبدالغنی جھمنند گومازی ءُ بلال ء محمد بکش جھمنند مند گوستگیں روچ ءَ یل کنگ بوتگ انت –

زانگ بہ بیت بلال بلوچ ءُ قاسم بلوچ ریاستی چیریں ادارھانی کارمنداں بولان میڈیکل کالج ھاسٹل ءِ گیٹ ءِ دپ ءَ ھما وھد ءَ زورانسری آوار جتگ ءُ بیگواہ کرتگ انت کہ آ چہ بیگواھیں مردمانی یل کنائینگ ءِ ھاتر ءَ ھشت جون ءِ روانک ءُ زھرشانی ءَ پد واتر پیداک بوتگ انت –

چد ءُ پیش ھم بلوچستان ءَ انسانی ھکانی گلاں بندوکیں مردم گار ءُ بیگواہ کنگ بیتگ اَنت –

بلوچستان ءَ سیاسی پاٹیانی گوشگ اِنت کہ بلوچستان ءَ توار چِست کنگ یک جرمے جوڑ بیتگ ھرکس وتی ھک ءُ یا گار ءُ بیگواھیں مردمانی واستا توار چست کنت گڑا گرگ ءُ گار کنگ بیتگ اَنت –

بلوچستان ءَ گار ءُ بیگواھیانی بھتام پاکستانی چیریں ادارہ ءُ پوج ءِ سر ءَ لڈگ بیگ ءَ اَنت بلے تنی وھدی پوج ءُ چیریں ادارھاں بلوچستان ءَ گار ءُ بیگواھیانی گپ رد کرتگ اَنت –

دومی نیمگ ءَ بلوچستان ءِ بنجاھی شھر شال ءَ گار ءُ بیگواہ بیتگیں مردمانی گوانک وائس فار بلوچ مسنگ پرسنز ءِ زھرشانی ھرتال ماما قدیر بلوچ ءِ سروکی ءَ برجاہ اِنت ءُ گل ءِ لوٹ اِنت کہ ھما مردم کہ گرگ ءُ گار کنگ بیتگ آ آمیدگس ءَ پیش کنگ بہ بیت ءُ آئی ءِ جرم گوشگ ءُ سزا دیگ بہ بیت بلے اے وڑ ءَ زنداناں بندیگ کنگ نا ایوک ءَ آئی ءَ زندانی اِنت بلکیں آئی ءِ تیوگیں کھول بندیگ کنگ بیتگ –

نبشتانک: سلمان ھمّل یاتانی در

نبشتہ کار: واھگ نیاد

دی بلوچستان پوسٹ

وھدے بیگاہ ءِ سارتی ءَ ایر دات من وتی کلّیگ آپ کت اُرد بست اَنت گوں دو سنگت ءِ پجّی ءَ چہ اوتاک ءَ درکپتاں کہ کش ءُ گور ءِ ھالے بہ چِناں گُڈا کلاکے ءَ پد ما نیٹ ورک ءَ اتیں داں سنگت چاکر جان ءِ کلوھے اتک ” ھالکن نوتک منی گور ءَ اِنت ما جاھے کارے چاراِتگ لوٹیں ہمے کار ءَ پہ در بہ کپ ایں بلے مارا چہ شما لھتے مڈّی ءُ چار سنگت پکاریں اگاں وت اتک نہ بئے بلے ہمیشاں بہ ٹاھین پہ ما دیم دے” من گُشت من ٹاھیناں اش ءُ بوت کنت منی جند ہم بئیت بلے سسٹم ءِ زمہ دار وَ پیرک جان اِنت اگاں دزرس ءَ بیت شما ہمائی ءَ بگش اِت پد ءَ کلوھے اتک ” پیرک ءَ گوں ھال بوتگ آئی ءَ گُشتگ ترا بُگش اِت ” گُڑا ما وتا زوت گیشینت ءُ بلیدہ ءِ کوچگ ءَ سر بیتیں راھسرے ءَ سنگت چاکر جان ءُ شھید جلال جان مئے وداری اِتاں سلام دروت بوتیں پد ءَ پہ سنگتانی اوتاک ءَ در کپتیں ھود ءَ سنگت نوتک جان مئے دیما اتک دروت ءُ درھبات بوت دیوان ءُ ھال بوت پد ءَ شام کت اے منی اولی گندک اَت گوں سنگت نوتک جان ءَ کسان سالیں پَٹک بالادیں ورنایے اَت بلے آئی ءِ زانت ءُ سما ءَ منا گوں وت کَشّ اِت ءُ برت من ھیراں اِتاں اے عمر ءَ ایشی ءَ وتی گل ءِ توک ءَ پہ وت ءَ چتور اے ڈولیں مزنیں جاہ ءُ مقامے جوڑ کتگ ءُ اے ڈُبہ ءَ چتور پہ جوانی پیلو ہم کنگ ءَ اِنت (اے وھد ءَ نوتک جان ءَ بی آر اے ءِ توک ءَ مزنیں ڈُبّہ ءُ زمّہ واری یے گون اَت) آئی ءِ سنچ ءُ زانت راجی جبزگ پہ کُلیں سنگتاں راھشونی ءِ چیدگ ات شام ءَ پد نوتک ءَ منا توار کت بیا رواں کشے ءَ سوڑگے کنیں من ءُ نوتک جان ءُ سنگت چاکر نشتیں گپ بوت بلے من گوں آھاں تپاک نہ کت منی گمان اَت کہ اے کار ءِ توک ءَ اھوالکاری کنوکاں چے کسے گوں سنگتاں لیب کنگ ءَ انت من گُشت اے کار بوت نہ کنت مارا سی ءُ چِلّ سنگت گون اگاں کمیں اینگر آنگر بہ بیت پہ ما باز تاوان بیت گُڑا سنگت نوتک دگہ سے سینئریں سنگت سلاہ ءِ توک ءَ زرت گوں کہ چہ آ سنگتاں یکے شھید جلال جان اَت ہمے سنگتاں چے یکے ءَ انچیں گپے ایر کت کہ نوں من ءَ پہ مڑاہ سنگتانی گپ ھان کنگی اَت من سنگتانی پجّی ءَ درکپتاں پہ سفر ءَ بلے سجّوئیں شپ ءِ پند جنگ ءَ پد ہم ما وتی ٹارگٹ ءَ داں سر نہ بوتیں بام بوت روچ در اتک بس ہیمنچو بوت کہ کار وَ نہ بوت بلے ما وتی جند ءُ سنگتانی رکینگ ءَ سوب مند بوتیں روچ ءَ کمو آرام کنئگ ءَ پد من شتاں نیٹ ورکے ءَ جھد ہمیش اَت کہ گوں پیرک جان ھال اھوال بہ بیت پیرک جان ءَ دہ دوازدہ روچ ءَ گیش ات کہ چہ من گسر کپتگ ات گُڈی ءَ من پہ پیرک ءَ کلوھے یل دات اگاں لینے ءَ اتک ئے ھال بکن ما فلاں ھند ءُ دمگان اِیں بُرز دیگر ءَ پیرک جان ءُ گلاب جان اتک مئے گور ءَ سر بوتاں ناھاری ات ما پجّی ءَ ورگ وارت ءُ ورگ ءِ سر ءَ من پیرک جان ءَ گُشت ورگ ءَ پد من تو یک کِرّے ءَ رویں ورگ وارت من ءُ پیرک جان شت گپ ءُ ھال کت آئی ءَ منی گپانی اش کنگ ءَ پیسر گُشت ئِے اے کار اے وڑیں جاگہے ءَ اے داب ءَ بوت نہ کنت دگہ ترتیب ئِے اڈ کنگ لوٹ ایت من گشت زیکین ایں منی ھبر ہمیش بوتگ بلے سنگتاں گوں من تپاک نہ کتگ گُڑا ما سنگت نوتک ءَ لوٹاھینت گپ دیما ایر کتاں آ مئے گپانی سر ءَ رازیگ بوت بزاں نوتک جان ءِ اے وتی سنچ ءُ زانت ات کہ آئی ءَ وتی گل ءَ چے ڈن ہم ایندگہ سنگتانی سلاہ ءُ شور ھچ بر رد نہ کت اَنت گُڑا ما وتی ایندگہ سنگت نوتک ءِ گور ءَ یل کت اَنت ءُ رپتیں پہ وتی اوتاک ءَ پیرک جان ءُ گلاب جان ءَ سنگتانی راشن گون ات اَنت ما سئیں گاڑی ءَ بوتیں ءُ شھید چیسل موٹر ءِ سر ءَ مئے دیم ءَ ات ما اوتاک ءَ سر بوت ایں اے شپ ءَ ما ہمود ءَ جل اِت ایندگہ شپ ءَ من ءُ پیرک جان اتکیں جاھے ءَ نیٹ ورک ءَ داں ھال اتک کہ مروچی بلیدہ ءِ کوچگ ءَ سنگتانی سر ءَ لشکر ءَ ارش کتگ اَت سنگت در کپگ ءَ سوبین بوتگ اَت بلے لشکر ءَ واتری ءَ کوچگ ءَ سنگت امیربکش تلانگ ءِ لوگ ءَ بیڑ برتگ اَت امیر بکش ءِ کسانیں جنکوے ءِ پجّی ءَ شھید کنگ بوتگ پیرک جان گشت مئے گمان گُمانے نہ بوتگ بلکیں اسل ءَ ہمے رنگیں پلان ے بوتگ اگاں نوتک ءَ مے ھبر مہ گپتیں ءُ ہما جاہ ءَ بہ شُت ایں سنگت ءَ تاوان بوتگ اَت-

پد ءَ لھتے وھد من ءُ پیرک جان کیلکور ءُ کولواہ ءِ دمگاں رپتیں وھدے واتر اتکیں گُڑا وتی دمگ ءِ کماش ءِ گور ءَ رپتیں کماش ءَ نوتک ءِ جُست کت ما گشت ما دیستگ کماش ءَ گشت نوتک منی گور ءَ اتکگ من دیستگ اے عمر ءُ سند ءَ ایشی ءَ آفرین انت ایشی ءَ اینچو ڈبہ سر ءَ دیگ بوتگ کُلیں چیزانی سر ءَ دست رس ءِ ھست فھم ءُ زانت سما ءُ سسا کارانی ھیل ءُ ھیل کاری شون ءُ سلاہ ءُ سوج کلیں تکانی زانت داریت اے سنگت ءَ گوں ہمکاری ءُ ہمراہ داری بکن ات ہر وھد نزیک بہ بہ اِت کارانی سر ءَ سلاہ ءُ شور بکن ات ما سے چار روچ کماش ءِ گور ءَ جل اتیں ہر وھد کماش نوتک ءِ ستا ءُ توسیپ کنگ ءَ ات-

پد ءَ گُڑا برے کُلبر ءَ برے بلیدہ برے کیلکور ءُ کولواہ نوتک جان گوں ما ھوار ات ہمگام ات ہم دیوان ات من ءُ شھید پیرک جان ءُ شھید نوتک سنگت ملین ءِ پجّی ءَ شتیں پہ واجو ءِ گند ءُ گدارے ءَ یک روچے من ءُ شھید پیرک جان واجو ءِ گْور ءَ چے در کپتیں پہ کارے ءَ نوتک جان ءُ سنگت ملین ءَ ہم جتا در کپت انت پد ءَ سھب ءَ آپریشن ات جھازانی ایژ ءُ آنژ ات بمباری ات ایس ایس جی کمانڈوانی دور دیگ ات بلاھیں آپریشن ات من ءُ پیرک جان چہ جاہ ءِ جند ءَ کمیں گستا اتاں ایندگہ سنگت کل آپریشن ءِ زد ءِ توک ءَ کپتگ اتاں تگ ءُ تاچ پما ہم کم نہ ات اَنت بلے چو ایندگہ سنگتاں پما گیشن نگیگی نیست ات بس بے تاھیری ات کہ سنگتانی ھال باریں چے بیت ھاوند ءِ رھم بوت سنگتانی زند رک اِت ھشت دہ روچ ءَ پد پد ءَ ما ھور اتیں سپر ات شپ جاہ ءُ روچ جاہ اتیں داں دگہ آپ بندے ءَ اتک ءُ کمیں جل اتیں پد ءَ پیرک جان واجو ءِ گورا جلّ اِت من ءُ نوتک جان سنگتانی پجّی ءَ سفرے ءَ در کپتیں چرے سفر ءَ پد لہتیں وھد ءَ آ گوں وت ءَ ات چَٹ گوں وت ءَ من ھم ھمائی ءِ داب ءَ اتاں چَٹ گوں وت ءَ یک روچے ھال بوت کہ سنگت نادراہ انت نگیگ ایں من نزانت کہ آ گیشتر نگیگ ایں یا من بلے کمیں پرک ءُ تپاوت ءَ ابید مئے دوئینانی گیشتر یکیں ھال ات داں یک روچے منی گورا اتک گُشت ئِے مروچگیں مٹ اتگیں جاور ھالانی رد ءَ ما لوٹیں کہ کلیں سنگتانی دیوانے اڑ بکنیں کہ آئی توک ءَ بی ایل ایف، بی ایل اے، بی آر اے ءُ لشکر بلوچستان ءِ سنگتاں ھم گوانک بہ کنیں کہ جوانیں راہ ءُ درے بہ بوج ات پہ جھد ءِ دیمروی ءُ وتی ہمبلانی رکّینگ ءَ گُڑا دیوان ات نوتک جان ءَ وت ءَ جارچین کت ءُ من ءَ گشت تو اے دیوان ءَ گشتانک بدے مروچگیں جھد ءِ تک ءُ پھنات ءُ سنگتانی راہ ءُ راھبند ءُ جوانیں گامگیج کہ پہ جھد چے چے کنگ ءُ چون چون بوگ لوٹ ایت بازیں وھدے ما ھور ءُ یکجاہ اتیں پد ءَ گسر کپتیں لھتے وھد ءَ رندے یک رمزانے ءَ ما یک سنگتے ءِ اوتاک ءَ لھتے وھد ھور گوازینت آ ھمود ءَ سنگت ءِ اوتاک ءَ ات ماھے کپے ءَ رند من چہ ھود ءَ در کپتاں چندے روچ ءَ پد من چاراں تاں نوتک ءُ شھید اسد شیھو انت بلے جاھے رؤگ ءِ تیاری ءَ آں من اناگھی کہ گون کپتاں من ءَ گشت اش ما چو کشئے ءَ روگ ءَ ایں بیا کہ رویں من مزاک کت نوتک ترا شوکیں بوٹ پاد ءَ وتی بوٹاں دے من کایاں گوں اگاں نا چوناھیگا گُڑا اوشتاتگیں جاہ ءَ وتی بوٹ ئِے گوں جُرّاباں کش اِت ءُ من ءَ دات اَنت ءُ من گشت من مزاک کتگ گُشت ئِے نوں کسم کہ من پد ءَ ایشاں پادا بکاں من وس کت بوٹ منی پاداں یک نمبرے ءَ کستر اتاں من پہ مسیبتے بوٹ پادا کت اَنت آئی ءَ منی چَوٹ ہمے دیوان ءَ شھید اسد شیھو ءَ را شبین بوتگ ات کہ من شھید باں بار بار ہمے گپ ئے کت کہ من گوں لشکر ءَ دپ کپاں مزنیں جنگے بیت مزنیں لشکری یے مریت ءُ یکزد بیت من شھید باں بلے پاکستانی میڈیا گُشیت منی کس نہ مرتگ بس منی نام ءَ دنت گشیت یک دھشت گردے ھلاک بوتگ ھمے ھلاک ءِ سر ءَ شھید نواز ءُ ایندگہ سنگتاں سک کند ات ہمد ءَ سنگتے مبائل ءَ حمید ءِ سوتے گوشدارگ ءَ ات شھید شیھو ءِ من ءَ ھلوت کت گُشت ئِے گندئے سوت بند مہ بیت منی ءُ تئی جان پُرّ بیت دگہ ناچے بنا کناں من زاناں حمید وتی دیم ءَ سیاہ کنت ایندگہ روچ ءَ شھید شھیو ءُ نوتک سفرے ءَ شتگ اتاں ھال اتک کہ اولاک اش کپتگ نوتک ٹپّی انت پادے پرشتگ پد ءَ نوتک مئے گور ءَ اتکگ سر ات چیزے روچ ءَ پد شھیو ءِ شھیدی ات بلے انچش کہ شیھو جان ءَ شبین بوتگ ات شھادت ءِ ہما پئیم ءِ پئیم بوتگ ات ہما سنگت ءِ اوتاک ءَ کہ پیسر ءَ ما رمزان ءَ ھور بوتگ اتیں ہمے اوتاک ءَ پد ءَ یکبرے من ءُ نوتک جان یکجاہ اتیں بلے اے بری من ہمودا اتاں کہ نوتک جان پیسر در کپت شت اے مئے گُڈی دیدار گندی ات چد ءُ پد من لین ءَ کہ اتکاں گُڑا برے برے سلام ءُ دعا کت فون ءَ بس یک رندے پد ءَ سر ھما سنگت ءِ اوتاک ءَ کپت سنگت ءَ من ءَ گُشت بیا کہ نوتک ءَ منا ھال کتگ تئی نام ئِے گپتگ من ءَ گشتگ ئے پہ تو چیزے زر کئیت پہ واھگ ءَ مبائلے بزور دیم دے نوں کہ تو وت اتکگ ئے ترا جست کنیں اگاں زر اتکاں پہ تو چونین مبائلے بزوراں من گشت من نزاناں نوتک پہ من چونیں مبائلے زوریت وتی نمبرے مَٹ کتگ گوں من ھالے نیست من ءَ نوکیں نمبر ءَ ئِے بدے من وت ھالے کناں من ھال کت من گُشت تو دیریں درا نہ بئے کجائے ؟ نوں بیا من ءَ گُشت ئِے” یار کامُوو من نیاھاں نوں” من گُشت پرچا اینچو بے مھری ؟ من ءَ گُشت ئے” یار کامُووو ھمے تو مھر ءِ جند اِنت من ءَ واتر بوگ ءَ نوں نیل ایت” من گشت چون متلب؟ من ءَ گُشت ئِے” تئی دوستیگیں مردمے ترا چے دور ءُ گستا بہ بیت تو گیش تر ھدوک بے نہ بے؟” من گُشت ھئو گُڈا کندگے جت ءُ گُشت ئے” گُڑا ھمے گپ ایں یار دور بوگ ءَ چے مھر گیش بیت کم نہ بیت من گُشاں مھر مِھر بہ بیت تو گُش ئے بے مھری کمال کن ئے یار ” مرچی مھر ھما مھر انت کہ چہ چماں گستا انت بلے دور نہ انت ادا نہ انت بلے دل ءَ انت گوں ھاک ءِ وشبو ءَ انت گوں گوات ءِ سارتی ءَ انت گوں نود ءِ نمبی ءَ انت گوں زر ءِ زیبائی ءَ انت گوں ماہ ءِ ماھکان ءَ انت انچش گوں ھاک ءِ وشبو ءَ ھواریں کہ گوں ھر دل ءِ دریکگ ءَ واتر ایت ھر شھم ءَ شھمگ ءَ انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ جیڑہ سیاسی اِنت ءُ اد ءَ انسانی ھکانی سک باز بگیری دارگ برجاہ انت – ماما قدیر

بلوچستان ءِ بنجاھی شھر شال ءَ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ شست ءُ یک روچ سرجم بوتگ – پشتون تھپز مومنٹ شال ھنکین ءِ اگدہ دار ءُ چاگردی باسک حمیدہ نور بلوچ، خالدہ ایڈوکیٹ بلوچ بنجل ءَ اتکگ ءُ بیگواھیں مردمانی کھولانی گوما دلپدردی درشان اش کتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ایمنسٹی انٹرنیشنل ءِ نیمگ ءَ رپورٹ ءِ شنگ کنگ بوتگ آئی ءِ تہ ءَ نبشتگ بوتگ کہ آوار جنگ بوتگیں بلوچانی زند ھترہ ءِ تہ ءَ اِنت بلوچستان ءَ زورانسری آوار جنگ ءُ بیگواہ بوتگیں مردمانی تیرسپتگیں زانگولیں جونانی وئیلانی تہ ءَ گیشی اتکگ –

ماما قدیر بلوچ ءِ گوشگ ات کہ وائس فار بلوچ مسنگ پرسنز سرجمیں دنیا ءِ مردمانی گوم ءَ لوٹ کنت کہ آ پاکستان ءُ بلوچستان ءِ سرکار ءَ نمدی نبشتہ بہ کنت آھاں چہ لوٹ بہ کن انت کہ آ بلوچانی گیرجانبدار پٹ ءُ پول ءَ بہ کن انت ءُ آھانی زمہ واراں سزا بدیان انت ءُ ھما مردم یل کنگ بہ بنت یا ھنچیں اعلانیہ سرکاری بندیگ جاہ ءَ آرگ بہ بنت –

ماما قدیر بلوچ ءِ گوشگ ات کہ بلوچستان ءِ جیڑہ سیاسی اِنت ءُ اد ءَ انسانی ھکانی سک باز بگیری دارگ برجاہ انت –

آئی ءِ گوشگ ات کہ انسانی ھکانی میان استمانی ادارہ ھم اے پدر کتگ کہ بلوچستان ءَ زورانسری آوار جنی جاور ھال سک نگیگ انت –

سلاہ بندیں مردماں سَے پوریاگر چہ ڈگاراں بیگواھی ءَ پد دو کُشتگ ءُ یکے ٹپی کُتگ۔

زیارت ءِ یونین کونسل منہ ءَ چہ ناشناسیں سلاہ بندیں مردماں سبّی ءِ جھمنندیں سَے مردم اللہ داد گورگیج، شاھد خان گورگیج ءُ جمال خان سھریانی آوارجنی ءَ تیر آماچ کُتگ اَنت، دو مردم کُشتگ ءُ یکے ٹپیگ کُتگ۔

کُشگ بیتگینانی تہءَ شاھد گورگیج ءِ سند چاردہ سال گُشگ بئیگ ءَ اِنت۔ ھندی واکدارانی رد ءَ سئیں پوریاگر ایک ھندی ٹھیکیڈار ءِ گورءَ ڈگاراں پوریا گری کنگ ءَ بیتگ اَنت کہ سلاہ بندیں مردماں آور جتگ ءُ کُشتگ اَنت۔

جون ءُ ٹپی بیتگیں مردم زیارت ھسپتال ءَ برگ بیتگ اَنت کہ آودہ ٹپیگیں جمال ءَ بنداتی جاندارھی کمک دیگ ءَ پد پہ گیشتر علاج ءَ شال ءَ برگ بیتگ۔

ڈپٹی کمشنر خورشید عالم ءِ مستری ءَ واکدار وئیل ءِ ھند ءِ چارگ ءُ ٹپاسگ ءَ پد گُشتگ کہ آیانی جرم کارانی دزگیر کنگ ءِ ھاترءَ وتی کار بندات کَتگ۔