TBP Balochi

دو اکتوبر ءَ کیچ ءِ دمگ بلیدہ ءَ بی ایس او ءِ چیئرمین ظریف رند ءِ لوگ ءِ سر ءَ بیڑ ءَ ناگتی پولیس دیمپانی ءُ تیرگواری ءِ آسر ءَ بیران بیتگیں زھگ رامز آئی ءِ بنکی ھنکین بلیدہ ءَ کل ءُ کسارت کنگ بیتگ –

سَے روچاں کھول ءَ تربت ءَ شھید فدا بلوچ چوک ءَ نندانک جتگ، پد ءَ سرکاری مزنیں واکاں آیانی گون ءَ رھوت نہ کتگ،ھمے ھپتگ ءِ بنداتی روچ ءَ کھول میت ءِ ھمراھی ءَ بلوچستان ءِ بنجاھی شھر شال ءَ ریڈ زون ءَ شتگ اَنت لوٹانی پد ءَ نندانک ءَ نشتگ اَنت – چارشمبے ءِ روچ ءَ سرکاری واک ءُ کھول ءِ میان ءَ گپ ءُ تران سوبمندی ءَ سر بیتگ ءُ پد ءَ کھول ءَ شال ءَ برجاھیں نندانک پشمبے ءِ شپ ءَ ھلاس کرتگ –

نندانک ءِ ھلاس کنگ ءَ پد لاش چہ شال ءَ دیم پہ تربت ءَ برگ بیتگ کہ اود ءَ پشمبے ءِ سھب ءَ ساھت یازدہ ءَ رامز خلیل سلو بلیدہ ءَ بازیں کچے ءَ مردمانی جاڑیگ بیگ ءَ کل ءُ کسارت کنگ بیتگ –

نماز جنازہ ءَ بلیدہ ءُ سلو ءِ جھمننداں ھوار کھول ءُ تربت ءُ پنجگور ءَ بندوکیں مردماں بھر زرتگ –

بلوچستان لبریشن فرنٹ ءِ جارکش میجر گوھرام بلوچ ءَ شھید شیھک پنام ءِ ناکو تلانگ ءَ سھر چکیں دروت کنان کنان ءَ گوشتگ کہ آ وتی ھمراھانی ھمراھی ءَ پنچ اکتوبر ءَ ساھر دو ءَ ابجیر کان کلبر ءِ کوھی دمگ ناگ ءَ گشت ءَ بیتگ اَنت کہ پیسر ءَ سر بستگیں ریاستی ڈیتھ اسکواڈ ءِ کارمنداں آیانی سر ءَ تیرگواری کرتگ –

آئی ءَ گُشتگ کہ چریشی ءَ ترندیں ھونریچی جنگ ءُ چوپ بندات بیتگ کہ چریشی ءَ سرمچار سیکنڈ لیفٹنیٹ شیھک پنام ءِ ناکو تلانگ ء دلجان جھمنند تمپ سرنکن بھادری ءَ جنگ کنان ءَ وتی ھمراھانی درکنگ ءَ سوبمند بیتگ ءُ وت بلوچ سرڈگار ءِ پھریزگ ءَ شھید بیتگ – اے وھد ءَ ڈیتھ اسکواڈ ءِ کمک ءَ پاکستانی پوج ھم اتکگ –

جارکش ءَ گُشتگ کہ شھید شیھک بلوچ سال دوھزار ءُ سیزدہ ءَ بی ایل ایف ءِ پتر ءَ ھوار بیتگ ءُ آجوئی ءِ سلاہ بندیں جنگ ءَ پرکار بیتگ – آ یک بھادر ءُ آشوبی شائرے ھم بیتگ – آ تمپ، دشت، بالگتر، بلیدہ ءُ زامران ءَ جنگ ءِ میدان ءَ وتی ڈبواں گوں پُرکار بیتگ ءُ وتی شریِں کارانی سبب ءَ آ سیکنڈ لیفٹینٹ ءِ اگدو ءَ نامینگ بیتگ ءُ آئی ءَ سھر چکیں دروت ندر کن ایں ءُ شھیدانی مسام ءَ داں بلوچستان ءِ آجوئی ءَ جد ءُ جھد ءَ برجاہ داریں –

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شِنگ کتگیں درشان ءِ تہ ءَ گْوشتگ کہ گل بُنجاھی پتر ءُ ھائی کمان ءِ مروچی یکجاھی دیوانے ءَ اے شور کتگ کہ گل ءِ اے راہ ءُ راھبند ءَ چہ مروچیگ ءَ پد گل ءِ جارکش تھنا مزار بلوچ بیت اِنت- مُرید بلوچ ءِ باسکی ءُ جارکشی مرچیگ ءَ پد ھلاس کنگ بیتگ-

درشان ءِ تہ ءَ گوشگ بوتگ کہ بُنجاھی پتر ءَ دْراجیں گپ ءُ رپ ءَ پد یونائیٹڈ بلوچ آرمی ءِ کماندار سرفراز بنلگزئی چہ گل ءَ کش اِتگ ءُ مرچیگ ءَ پد سرفراز بنلگزئی ءَ گوں گل ءَ گوں ھچ سیادی نہ بیت نانکہ آئی ءِ زمہ وار گل بیت اِنت-

جارکش ءَ دیمتر ءَ گْوشتگ کہ بُنجاھی پتر ءَ گل ءِ بُنھشت ءَ دیم آؤکیں جاورانی ھساب ءَ گیشیں کار ءُ جوانتر کنگ ءِ ھاتر ءَ بازیں شور ءُ دیوانے کتگ کہ آھاں رسانکدر ءَ شنگ کُت نہ کن ایں-

پاکستان ءِ پوج ءِ نیمگ ءَ بلوچاں وتی ھنکیناں در پہ دری زند ءِ گوازینگ ءِ لاچار کنگ بیتگیں مرفن اوگانستان ءَ تالبان ءِ نیمگ ءَ لَٹ ءُ کُٹ ءُ آوار جنگ بیگ ءَ اَنت –

اے گپانی درشانی وائس فار بلوچ مسنگ پرسنز ءِ رھشون ماما قدیر بلوچ ءَ چاگردی رسانکجاھاں کرتگ اَنت ماما قدیر بلوچ ءَ وتی درشانی ھما وھد ءَ دیم ءَ اتکگ وھدیکہ گوستگیں روچ ءَ اوگانستان ءَ بلوچ اُستان نیمروز ءَ بلوچ پناہگزینانی لوگانی سر ءَ تالبان ءِ کارمنداں بیڑ برتگ ءُ ھپت مردم دزگیر کنگ ءَ کرتگ ءُ گوں وت برتگ اَنت ئِے-

ماما قدیر بلوچ ءَ گُشتگ اَت کہ پوج ءِ نیمگ ءَ بلوچ پھناتاں وتی ھنکین یلو کرتگ ءُ زورانسری در پہ دری زند ءِ گوازینگ ءَ لاچار کرتگ اَنت، ھمک روچ اے لوگانی سر ءَ بیڑ برگ ءُ سوچگ ءُ آوارجنی ءِ سبباں لَکانی ھساب ءَ بلوچ وتی ھمساھگیں ڈیھاں بلوچ پھناتاں نندگ ءَ لاچار اَنت –

آئی ءَ بھتام جنان ءَ گُشتگ کہ پاکستان ءِ گوشگ ءَ تالبان باھوٹی بلوچاں بازیں کچے ءَ آوار جنگ ءُ لَٹ ءُ کُٹ کنگ ءَ اَنت –

بیتگیں وئیل ءِ بارو ءَ اوگانستان ءِ نامی ئیں اھوالکار بلال سروری ءَ نبشتگ کرتگ کہ نیمروز ءَ کلی مولانا ءَ تالبان پولیس ءَ باھوٹی بلوچانی لوگانی سر ءَ بیڑ برگ ءِ ھالانی تہ ءَ باھوٹی بلوچ دزگیر کنگ بیتگ اَنت کہ چریشانی تہ ءَ ھشتاد سالی ئیں کماش ملک ھان مھمد، جانی ھان، ظفر اللہ بلوچ، عبدالنبی، میر گل بلوچ، مھمد جان ءُ نانا ھوار اَنت –

اے درگت ءَ تالبان ءِ واکدارانی ھچ ھال دیم ءَ نیتکگ اَنت بلے دمگی مردماں ٹی بی پی ءَ گُشتگ کہ کارمنداں ملک ھان مھمد ءِ لوگ ءَ ھوار دگہ بلوچانی لوگانی سر ءَ بیڑ، اے وھد ءَ زالبول ءُ زھگ جتگ اَنت ئِے وھدیکہ زدگ بیتگ اَنت –

سر بیتگیں ھالانی رد ءَ گوستگیں روچ ءِ بیگاہ ءَ ناشناسین مردماں بلوچستان ءِ دمگ کیچ ءِ بنجاھی شھر تربت ءَ بالی پٹ دگ ءَ ھستیں پوجی چوکی ءِ سر ءَ اُرش، اُرش ءَ تاوانانی گمان کنگ بیتگ، اُرش ءِ زمہ واری بی ایل ایف ءَ منّ اِتگ-

بلوچستان ءِ آجوئی ءِ واستا جنگ کنوکیں گل بلوچستان لبریشن فرنٹ ءِ جارکش میجر گوھرام بلوچ ءَ تربت ءَ بیتگیں اُرش ءِ زمہ واری منّ اِتگ –

جارکش ءَ گوشتگ کہ گوستگیں روچ ءِ بیگاہ ءَ تربت ءَ بالی پَٹ دگ ءَ پوج چوکی ءِ سر ءَ دزبمبے چگل داتگ ءُ چریشی ءِ آسر ءَ پوج ءَ جانی ءُ مالی تاوانانی دیمپانی کنگ کپتگ-

جارکش میجر گوھرام بلوچ ءَ گُشتگ زورگریں پوج ءِ سر ءَ اُرش بلوچستان ءِ آجوئی ءَ داں برجاہ مان اَنت –

بلوچستان ءِ دمگ شال، سبی، ھرنائی، زیارت، پشین ءَ ھوار بازیں جاھاں زمین چنڈ ءِ سبب ءَ بازیں لوگ کپتگ اَنت بنداتی ھالانی تہ ءَ بیست مردم بیران بیتگ اَنت ءُ دو سد ءِ کچ ءَ مردم زدگ اَنت –

دمگدارانی رد ءَ چارشمبے ءِ شپ ءِ ساھت سَے ءَ آؤکیں زمین چنڈ ءَ بازیں لوگ کپتگ اَنت ءُ بازیں مردمے دیوالاں چیرترینتگ اَنت –

دمگداراں نادراہ جاہ جاڑیگ کرتگ ءُ کمکی کار بندات کتگ اَنت –

زمین چنڈ ءِ زور پنچ ٹک نُھ ریکارڈ کنگ بیتگ ءُ زمین چنڈ ءِ بنجل چہ شال ءَ یک سد ءُ ھشتاد کلو میٹر ءِ دوری ءَ ھرنائی ءَ بیتگ –

ڈپٹی کمشنر ھرنائی سھیل انور ھاشمی ءِ رد ءَ چار شمبے ءُ پشمبے ءِ میانی شپ ءَ کساس ساھت سَے ءَ زمین چنڈ ءِ ترند چنڈ سما بیتگ ءُ چریشی ءَ دیوال ءُ لوگ کپتگ اَنت ءُ بازیں مردم وپتگیں واب ءِ ترس ءَ گڑیتگ اَنت-

آئی ءَ گشتگ کہ زمین چنڈ ءَ ھرنائی ءُ آئی ءِ کش ءُ گوری دمگ شاھرگ ءَ بازیں کچے ءَ دیوالانی کپگ ءِ ھال اِنت ءُ بازیں سرکاری ماڑیانی تاوان ءِ ھال اِنت-

آئی ءَ گشتگ کہ لیویز کارمند ھما دمان ءَ کمکی کاراں دیم دیگ بیتگ اَنت، ھرنائی ءِ ھند گریب آباد ءَ بازیں زدگ بیتگیں مردم نادراہ جاہ ءَ سر کنگ بیتگ اَنت –

ڈی سی ءَ گشتگ کہ زمین چنڈ ءَ پد بجلی شتگ اَنت ءُ کمکی مردماں مشکلانی جیڑھانی دیمپانی اِنت-

زمین چنڈ شناس ءِ بنجل اسلام آباد ءِ رد ءَ زمین چنڈ ءِ ریکٹر سکیل ءَ پنچ ٹک نُھ ءُ زمین ءِ جھلی ءَ پانزدہ کلو میٹر ریکارڈ کرتگ –

ڈپٹی کمشنر ءِ رد ءَ شال ءَ اُستانی ڈیزاسسٹرمینجمنٹ اتھارٹی ءِ واکداراں مارا رھوت کرتگ –

ایس ایچ او ھرنائی پولیس گلام اکبر ءَ گشتگ کہ زمین چنڈ ءَ ھرنائی ءِ شھر ءُ کش ءُ گوری دمگ اسرمند بیتگ اَنت ءُ کپتگیں دیوالاں بازیں راہ بند کرتگ اَنت ءُ چریشی ءِ سبب ءَ کمکی کارمنداں اود ءَ سر بیگ ءَ مزنیں مشکلانی دیمپانی اِنت –

آئی ءَ گشتگ کہ گریب آباد، مرزا کلی، جلال آباد، کلی شور، گوڈا غوژہ، کلی اسپانی ءُ کش ءُ گوری میتگ باز اسرمند اَنت –

بلوچستان ءِ تھی کارانی وزیر میر ضیاء لانگو ءَ چیئرمین ای ڈی ایم ءَ رھوت کرتگ ءُ گشتگ کہ ھمک نیمگ ءَ کمکی سدکی ءُ گوشتگ کہ اے گرانیں وھد ءَ ما ھر دمان ءَ شمئے گون ءَ اوشتاتگ اِنت-

چیئرمین این ڈی ایم ءَ گشتگ کہ ھرنائی ءَ زمین چنڈ ءَ اسرمندیں مردم میڈیکل ءِ ٹیم روان داتگ اَنت، ھیلی کاپٹر، نان فوڈ آئٹمز ءُ دارو درمان زوت ءَ چہ زوت زمین چنڈ ءَ بیتگیں جاھاں دیم دیگ بیت اِنت –

ڈسٹرکٹ ھیلتھ آفیسر رشید ناسر ءِ رد ءَ نادراہ جاہ ءَ زدگ بیتگینانی واستا جاہ، درمان کنوک ءَ درمان کم بیتگ اَنت چریشی ءِ سبب ءَ ترند زدگ بیتگیں مردم شال ءَ دیگ بیگ ءَ اَنت ءُ آئی ءَ گشتگ دو زدگ بیتگیں مردماں راہ ءَ ساہ داتگ اَنت-

لیویز واکدارانی رد ءَ شال ءَ لیویز کوئیک رسپانس ٹیم ھرنائی ءَ دیم دیگ بیتگ اَنت ڈی ایچ او ڈاکٹر عبدالرشید ناسر ءِ رد ءَ جانسلامتی ءِ دراھیں کارمند ڈاکٹرز ءُ پیرا میڈکس زوت ڈسٹرکٹ ھیڈ کوارٹر ھسپتال ھرنائی ءَ سر بیگ ءِ گڈنی کنگ بیتگ اَنت –

آئی ءَ گشتگ کہ نادراہ جاہ ءَ ڈاکٹر ءُ درمانی کمی ءِ دیمپانی اِنت –

دبئی انٹرنیشنل کرکٹ پٹ ءَ گوستگیں روچ ءَچار شمبے ءَ بوتگیں آئی پی ایل گوازی ءَ سن رائزرس حیدرآباد ءَ لیبیاں جوانی ءَ گوازی کنان ءَ رائل چیلنجرز بنگلور چار رناں پروش داتگ –

اول سر ءَ بیٹنگ کنان ءَ حیدرآباد ءِ لیبیاں بیست اوورانی تہ ءَ ھپت وکٹانی تاوان ءَ یک سد ءُ چِل ءُ یک رن جوڑ کرتگ گڑا بنگلور لیبیاں بیست اوورانی تہ ءَ شش وکٹانی تاوان ءَ یک سد ءُ سِی ءُ ھپت رن جوڑ کرتگ ءُ حیدرآباد ءِ داتگیں ٹارگٹ پروشت نہ کتگ بلے گوازی سک باز وش ءُ ھردو ٹیمانی لیبیاں جوانیں گوازی پیش داشتگ اے گوازی تاں گڈی ءَ یک ٹیمے ءِ ھک ءَ نہ بوتگ –

ٹارگٹ پروشگ ءِ ھاتر ءَ بنگلور ءِ نیمگ ءَ اوپنر ورار کوھلی ءُ دیودت پڈیکل گوازی بندات کرتگ ات بلے گوازی ءِ بندات انچو ھاس نہ ات – کپٹن کوہلی اولی اوور ءِ گڈی بال ءَ بھونیشور ءَ آؤٹ کت آئی ءَ ھلتی پنچ رن جوڑ کرتگ ات شش اسکور ءُ اولی وکٹ ءِ کپگ ءَ پد ڈینٹل کرشچن اتک ءُ آئی ءَ ھم ھچ کرت نہ کت ءُ یک رن ءِ جوڑ کنگ ءَ پد آؤٹ بوت – اشی ءَ پد پڈیکل ءَ سری کر بھرت ءِ ھمراھی ءَ اننگز دیم ءَ بُرت بلے بھرت ءَ دہ بالانی تہ ءَ دوازدہ رن جوڑ کت ءُ آؤٹ بوت سریکر ءِ وکٹ ءِ کپگ ءَ گلین میکسویل اتک ءُ آئی ءَ جوانیں گوازی پیش داشت – میکسویل ءَ بیست ءُ پنچ بالاں چِل رن جوانیں لیب پیش داشت آئی ءِ بیٹنگ ءِ سبب ءَ بنگلور مھکم بوت بلے آ رن آؤٹ بوت آئی ءَ پد پڈیکل ءُ اے بی ڈی ویلئرس ءَ اننگز برجاہ داشت –

اے وھد ءَ پڈیکل ءَ پنجاہ ءُ دو بالاں چِل ءُ یک رن جوڑ کت ءُ آؤٹ بوت گڈی ءَ ڈی ویلئرس ءُ احمد ءَ گوازی کنان ءَ گوازی گڈی اوور ءَ سر کت – بنگلور ءَ کٹگے ھاتر ءَ گڈی اوور ءَ سیزدہ رنانی درکار ات بلے اے اوور ءَ آھاں بس ھشت رن جوڑ کرت کت –

سن رائزرس حیدر آباد بالنگ باز جوان ات ءُ درسیں بالر سوبمند بوت انت بھونیشور ءَ چار اوور ءَ بیست ءُ پنچ رن دات ءُ یکے، جیسن ءَ چار اوور ءَ بیست ءُ ھپت رن دات ءُ یکے آؤٹ کت، سدھارتھ ءَ چار اوور ءَ بیست ءُ چار رن دات ءُ یکے، عمران ملک ءَ چار اوور ءَ بیست ءُ یک رن دات ءُ یکے ءُ راشد خان ءَ چار اوور ءَ سِی ءُ نھ رن دات ءُ یک لیبی ءِ آؤٹ کت -حیدرآباد ءِکپٹن ولیم سن سِی ءُ یک رنانی اننگز لیب ءَ پلئیر آف دی میچ ءِ داد دئیگ بوت –

بنگلور ءِ گور ءَ بس نوں یک گوازی ءِ بچ اتگ ءُ آ گوازی ءِ کٹگ ءِ ھواری ءَ آئی ءَ گیش ءَ چہ گیش ھژدہ پؤنٹ گرگی انت –

مروچی بیگاہ ءَ پنجاپ گنگز ءُ چنئی سپر گنگز ءُ کے کے آر ءُ راجستھان رائل گوازی کنگ بنت –

دی بلوچستان پتر ءَ سربوتگیں ھالانی رِد ءَ افغانستان ءِ اُستان نمروز ءَ کہ (بازیں بلوچ ءِ جھمنند انت) افغان تالباناں بلوچ پناہ گزینانی گساں بیڑ برتگ کماشیں بلوچ رھشونے ءَ ھوار ھپت مردم دزگیر کُتگ وھدیکہ دو مردم ھمے میان ءَ ٹپی کنگ بوتگ اَنت –

ٹی بی پی ءِ اھوالکار ءِ رِد ءَ مروچی چارشمبے ءَ بیگاہ ءِ وھد ءَ نمروز ءِ دمگ مضافات ءَ افغان تالباناں بازیں بلوچ پناہ گزینانی گِسانی سر ءَ بیڑ برتگ – افغان تالباناں بیڑ برگ ءِ میان ءَ گِسانی تہ ءَ ساڑی ئیں چُک ءُ زالبول بیھار داتگ ءُ لٹ شاپ کتگ انت ءُ اے میان ءَ دو مردم ٹپی بوتگ اَنت –

اھوالکار ءِ رِد ءَ افغان تالباناں ھپت مردم لٹ شاپ کتگ ءُ گوں وت برتگ اَنت کہ آھانی تہ ءَ کماشیں بلوچ رھشون ملک خان محمد مری ھم ھوار انت – اھوالکار ءِ رِد ءَ افغان تالباناں ملک خان محمد مری ھم لٹ شاپ ءُ ٹپی کتگ –

زانگ بہ بیت اشی ءَ پیش افغان تالبان کندھار ءَ ھم بلوچ پناہ گزینانی گِساں بیڑ برتگ ءُ آھانی گاڑی دستیگ کتگ انت –

اشی ءَ ابید گوستگیں روچ ءَ نمروز ءَ ناشناسیں مردمانی تیر گواری ءَ دو پناہ گزین ٹپی بوتگ انت اے درگت ءَ بی آر پی رھشون شیر محمد بگٹی ءِ گوشگ ات کہ بلوچ پناہ گزیناں پاکستان ءِ ایجنٹس نشانگ کنگ انت –

کرزئی ءُ اشرف غنی ءِ سرکار ءِ وھد ءَ ھم افغانستان ءَ بلوچ پناہ گزین ٹارگٹ کلنگ ءُ بمب تراکانی نشانگ کنگ بوتگ انت کہ بازیں پناہ گزینے بیران بوتگ بلوچ راج دوستاں اے وئیل پاکستانی چیریں ادارھانی سر ءَ داتگ بلے تنی وھدی افغان تالبان ءِ سرکار آیگ ءَ پد آھانی گسانی سر ءَ بیڑ برگ ءُ دزگیریانی اولی وئیل انت –

بلوچستان ءِ تیاب دپی دمگ چہ پسنی ءُ گوادر ءَ پاکستانی لشکر ءَ بلوچی زبان ءِ شائرے ءَ ھوار دو مردم آوار جنگ ءَ پد بیگواہ کرتگ اَنت-

سربوتگیں ھالانی رد ءَ تیابدپی دمگ پسنی ءَ دو روچ ءَ ساری شپ ءِ وھد ءَ پاکستانی پوج ءَ لوگانی سر ءَ بیڑ برتگ ءُ بلوچی زبان ءِ شائر آوار جتگ ءُ بیگواہ کتگ –

آوار جنگ بوتگیں بلوچی زبان ءِ ورنائیں شائر ءِ پجّار اظھر نور ء خدابخش ءِ نام ءَ چہ بوتگ-

ھمے وڑ تیاب دپی شھر گوادر ءِ دمگ پکیر کالونی ءَ پاکستانی پوج ءُ چیریں ادارھانی کارندھاں یک لوگے ءِ سر ءَ بیڑ برتگ ءُ یک مردمے آوار جتگ ءُ بیگواہ کتگ اَنت –

آوار جنگ بوتگیں ورنا ءِ پجّار سالم ء ابدالواحد جھمنند دشت ٹُنگی ءِ نام ءَ چہ زانگ بوتگ-

زانگ بہ بیت بلوچستان ءَ زورانسری آوار جنی یکشل ءَ برجاہ ءَ اَنت روچ پہ روچ گیشی پیداگ اِنت اے وھد ءَ گیشتر نودربر پاکستانی پوج ءُ چیریں ادارھانی دست ءَ آوار جنگ ءُ بیگواہ کنگ بوگ ءَ اَنت-

بلوچستان ءِ بنجاھی شھر شال ءَ گورنر ھاؤس ءِ دیم ءَ مروچی دومی روچ ءَ ھم برجاہ کھول ءِ گوشگ اِنت داں ھما وھد ءَ انساپ نہ رس ایت مئے زھرشانی برجاہ بیت اِنت –

زھرشانی ءَ جتا جتائیں سیاسی پاٹیاں بندوکیں مردم نندانکی زھرشانی ءَ ھوار اَنت ءُ رامز خلیل ءِ واستا چہ واکداراں انساپ لوٹگ ءَ اَنت –

رسانکدراں تران کنان ءَ بی ایس او ءِ چیئرمین ظریف رند ءُ رامز ءِ ناکو ءَ گوشتگ کہ سرکاری واکاں مئے گپ ءُ تران بیتگ مئے لوٹ داں منّگ نہ بنت ھما وھد ءَ مئے زھرشانی نندانک برجاہ بیت اِنت –

ظریف رند ءَ گشتگ کہ سرکاری پھناتاں اے گپ گوشگ بیتگ کہ لوٹانی نوٹفکشین گوشگ بیت اِنت بلے تنی وھدی انگت ءَ گوشگ نہ بیت –

آیانی گوشگ اِنت کہ رامز خلیل ءِ کوشکار دزگیر کنگ ءُ زدگ بیتگیں رایان ءِ انساپ ءُ آئی ءِ مات ءِ انساپ ءُ رامز ءِ پت خلیل ءِ دروگیں ارزی کَشگ بہ بیت اِنت –

زانگ بہ بیت دو اکتوبر ءَ پاکستانی پورس سی ٹی ڈی ءَ کیچ ءِ دمگ بلیدہ ءَ بی ایس او ءِ چیئرمین ظریف رند ءِ لوگ ءِ سر ءَ بیڑ برتگ ءُ اود ءَ تیرگواری ءَ کسان سالیں رامز بیران ءُ آئی ءِ برات رایان زدگ ءُ آئی ءِ مات ھم زدگ بیتگ اَت-

زھرشانی کنوکاں دو روچ ءَ کیچ ءِ بنجاھی شھر تربت ءَ شھید فدا چوک ءَ دو روچاں نندانکی زھرشانی کرتگ ءُ پد آیاں انساپ ءِ نہ رسگ ءَ کھول ءُ سیاسی ءُ سول سوسائٹی ءَ لاش ءِ ھواری ءَ شال ءَ شتگ اَنت اود ءَ آیاں گورنر ھاؤس ءِ دیم ءَ مروچی دومی روچ ءَ نندانکی زھرشانی ءَ نشتگ اَنت ءُ گوستگیں شپ ءَ آ سارتیں سارتی ءَ شال ءَ گورنرھاؤس ءِ دیم ءَ نشتگ اَنت –