TBP Balochi

سلیم ناز

دی بلوچستان پوسٹ

هاکم زالم ءُ زوارک اِنت
هر روچ میتگ ءَ بمب تراک اِنت

بندیگ کنت مئے زالان ءَ
روباہ ءِ وڑ ءَ چالاک اِنت

همراهی کتگ دلّاراں
سودائی بزان تریاک اِنت

مرچان من اَجب هیراناں
درسانی کتاب تاک تاک اِنت

واب ءَ بُست کن اِت او بیلاں
جاور سک گش ئے گَمناک اِنت

آپ نوں چہ سر ءَ گوستگ
دهرے بے وڑیں پیداک اِنت

بس اِنت نندگ ءُ موتک آرگ
دورگیں رهبراں گویاک اِنت

سندھ ءِ شھر نوابشاہ ءِ نزیک ءَ پاکستان ریلو لائن ناشناسیں سلاہ بندیں مردماں بارودی تراکاں گوں پروشتگ-

گیشیں ھالانی رد ءَ سکھر ءَ سر بیتگیں ھالانی رد ءَ نوابشاہ ءِ نزیک ءَ ریلوے پٹڑی سلاہ بندیں مردماں تراکناکیں شورواں گوں پروشتگ-

ریلوے ایس پی ءِ رد ءَ تراک ءَ پد واکدار تراکجاہ ءَ سر بیتگ اَنت ءُ بمب ڈسپوزل ءِ کارمند آیگ ءِ پرمان کنگ بیتگ اَنت ءُ آیاں جاہ ساپ گشتگ ءُ چریشی ءَ پد پٹڑی ءِ کار بندات بیتگ-

دومی نیمگ ءَ سندھودیش روولیوشنری آرمی ءِ جارکش سوڈھو سندھی ءَ رسانکدراں شنگ کرتگیں درشان ءِ تہ ءَ اے اُرش ءِ زمہ واری منّ اِتگ ءُ گشتگ کہ گوستگیں شپ ءَ کوٹ لالو ءَ ھیرپورمیرس ءَ پنجاپ ءَ رؤکیں ریل ٹریک مئے جھدکاراں نشانگ کرتگ ءُ پروشتگ کہ اشی ءِ زمہ واری ءَ مئے گل منّ اِیت-

سوڈھو سندھی ءَ گشتگ کہ ما پنجاپ ءِ سامراج ءَ بیھار دے کہ آ سندھ ءِ زمین ءِ سر ءَ زورانسری زورگری ءَ ھلاس بہ کنت –

جارکش ءَ گڈسر ءَ گشتگ کہ ما اشی ءَ ستک داری کن ایں سندھ ءِ سرجمیں آجوئی ءَ داں ایس آر اے ءِ سلاہ بندیں جھد برجاہ مان ایت –

بلوچ لبریشن آرمی ءِ جارکش جیئند بلوچ ءَ دوشی ءَ خضدار ءَ پاکستانی لشکریانی سرءَ بیتگیں اُرش ءِ زمہ واری من اِتگ۔

جیئند بلوچ ءَ درشان ءِ تہءَ گُشتگ کہ مئے سرمچاراں سئے شمبے ءِ روچ ءَ خضدار ءِ شھر ءَ ڈی آئی جی کارگس ءِ دیما بستگیں زورگیریں پاکستانی پوج ءَ بُنجل گوں دستی بمب ءَ نشانگ کُتگ۔

آئی ءَ گُشتگ کہ بُنجل ءِ ساڑی ایں فرنٹیئر کور قلات اسکاوٹس ءِ یک کارمند مرتگ وھدیکہ دو دگہ دو اُرش ءِ سوب ءَ ٹپی بیتگ اَنت۔ اُرش ءِ زمہ واری ءَ مئے گل بی ایل اے من اِت۔

درشان ءِ گُڈ سر ءَ بلوچ لبریشن آرمی ءِ جارکش ءَ گُشتگ کہ مئے اُرش داں سرڈگار ءِ آجوئی ءَ برجاہ مان اَنت۔

ورنائیں وکٹ کیپر، بالر ایشان کشن ءِ نیم سنچری ءِ سوب ءَ ممبئی انڈینز ءَ راجستھان رائلز ھشت وکٹاں پروش داتگ –

ممبئی انڈینز ءَ پیسر ءَ جوانی ءَ بالنگ کرتگ ءُ راجستھان رائلز ءَ بیست اوورز آنی تہ ءَ بس نود رن جوڑ کرتگ- ممبئی انڈینز ءِ نیمگ ءَ تیزیں بالر ناتھن کلٹر نائل ءَ چار اوورانی تہ ءَ چاردہ رن داتگ ءُ چار وکٹ گپتگ، نیشم ءَ چار اوورانی تہ ءَ دوازدہ رن داتگ ءُ سَے ءُ بمراہ ءَ چار اوورانی تہ ءَ چاردہ رن داتگ ءُ دو وکٹ گپتگ –

نود ءُ یک رنانی ٹارگٹ ءِ پروشگے ھاتر ءَ ممبئی انڈینز ءِ لیبی کپٹن روہت شرما ءُ ایشان کشن اوپنر ءَ اتکگ ءُ جوانی ءَ گوازی کنان ءَ روہت ءَاولی اوور ءَ چاردہ رن جوڑ کرتگ – بیست ءُ سَے رنانی جوڑ کنگ ءَ پد روہت آؤٹ بوتگ ءُ ایشان ءُ سوریہ ءَ کمار ءَ گوازی جوانی ءَ برجاہ داشتگ – ایشان ءَ بیست ءُ پنچ بالاں نیم سنچری کتگ آئی ءَ پنچ چوکا ءُ سَے چکائے کمک ءَ بیست ءُ پنچ بالانی تہ ءَ پنجاہ رن جوڈ کُرتگ ءُ وتی ٹیم کٹارینتگ -سوریا کمار ءَ ھشت بالاں سَے چوکائے کمک ءَ سینزدہ رن جوڈ کرتگ – کلٹرنائل ءَ جوانیں بالنگ کنگے ھاتر ءَ پلئیر آف دی میچ ءِ داد دئیگ بوتگ –

راجستھان ءِ لیبی بیٹگ کنگ ءَ پد بالنگ ءَ ھم بے سوب بوتگ انت – رجستھان ءِ بالر مستفیض الرحمان ءُ چیتن سکاریہ ءَ یک یک وکٹ ءِ گپتگ – بیٹنگ ءَ ھم انچو جوانیں لیب ءِ پیش نہ داشت ایون لوئس ءُ یشسوی جیسوال ءَ بندات جوانی کرت بلے دیر ءَ نہ جل اِتاں – لوئس سَے چوکا ءُ یک چکائے کمک ءَ نوزدہ بالانی تہ ءَ بیست ءُ چار وھدیکہ یشسوی ءَ سَے چوکائے کمک ءَ نھ بالانی تہ ءَ دوازدہ رن جوڑ کنگ ءَ پد آؤٹ بوت –

ممبئی ءِ اے سوبمندی ءَ پد پلے آف ء تہ ءَ سر بوگ ءِ امیت ھست انت وھدیکہ راجستھان پلے آف تہ ءَ سر نہ بوت – ممبئی ءِ نیٹ رن ریٹانی تہ ءَ ھم باز شری اتکگ اننگز ءِ 11.4 اوور ھست بوگ ءَ ھشت وکٹاں آئی کٹگ ءَ پد آئی نیٹ رن ریٹ 0.048 سربوتگ –

نودربر گل بلوچ اسٹوڈنس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ اُستادانی میان استمانی روچ ءِ درگت ءَ بلوچستان ءِ درسیں استاداں دروت ندر کتگ ءُ گوشتگ کہ مئے استاداں وتی اے کار ءِ تہ ءَ مکلسی ءُ ایمانداری ءَ گوں شپ ءُ روچ جھد کرتگ ءُ آھاں بلوچ راجی زانت زانشت ءِ دیمروئی ءَ وتی کرد پیلو کرتگ ھمے استاداں وتی کار ءَ گوں انساپ کُتگ بلوچستان تھاریں گدانانی تہ ءَ زانت ءِ چراگ روک کتگ –

جارکش ءَ گوشتگ کہ مروچی دنیا ءَ زانشتی درگت ءَ سک باز دیمروئی کرتگ ھمے زانشتی آشوبی ءُ ٹیکنالوجی ءَ ھر وڑیں ھنر سکتگ ھمے ھُنراں چہ انسان ءِ لوٹ ءُ برابری کنگ ءَ ھمے استادانی جوانیں کرد ءِ بوتگ – دنیا ءِ تہ ءَ ھما راج دیمروئی کن انت کہ وتی استادانی پگری ءُ زانت ءُ زانشت ءَ پھازگ ءَ سوبین بوتگ انت زانشتی راجانی تہ ءَ استادانی جوانیں جاھے درونتانی تہ ھمگرنچیں زانت ءُ نزریات داروکیں دانشور باندات ءِ گچین کنوکیں راجی منگ بنت – ھمے درچ نوکیں پدریچ ءَ زانت ءُ زانشت ءَ سرریچ کنت ءُ آھانی زانشت ءَ کن انت ءُ راج ءِ بانداتاں جوڑ کن انت ھمے سبب ءَ زندگیں راج وتی استاداں راجی مڈی لیک انت ءُ راجدپتری تاکاں گوں آیاں یات کن اَنت-

جارکش ءَ گوشتگ کہ ھما راج وش وشھال بنت کہ وتی استادانی کدر ءُ کیمت ءَ زان انت مروچی بلوچ راج ءِ گور ءَ چشیں بازیں مڈی ءِ ھست کہ آھاں زانت ءُ زانشتی نزریات ءِ جھد ءَ بلوچ نیشنل ازم ءِ نزریہ زندگ دارگ ءِ ھاتر ءَ وتی سرجمیں زند بلوچ راج ءِ ھاتر ءَ کربان کتگ ءُ ھمایانی تہ ءَ بلوچ استاداں وتی جانانی دیمونی داتگ ھمیشانی جھد ءِ بدولت ءَ مروچی بلوچ راج راجی زانت ءُ زانشت ءَ سر ریچ انت –

مروچی استادانی میان استمانی روچ ءَ بلوچ اسٹوڈنس ایکشن کمیٹی ھما درسیں استاداں دروت ندر کنت کہ آھان وتی زند پہ ھمے کار ءَ کربان کتگ ءُ ھما استاد ستاہ انت کہ بید ءِ آسراتی ءَ بلوچستان ءِ دیریں دمگاں بلوچ ورنایاں درونت دے اَنت ءُ راجی جزبگ ءَ سر ریچیں جھد ءِ روگن انت کہ بلوچ ورنایاں راجی زانت ءُ زانشت بہ دے اَنت –

جارکش ءَ گڈسر ء ورنایاں گوشتگ کہ مروچیگیں اے وھد ءَ مارا وتی استاد ءَ گران ءُ جوانیں ءَ چارگی انت ھما استاد کہ مارا اے وھد ءَ زانت ءُ زانشت دیگ انت ھما استاد کہ وتی زند ءَ کربان کتگ نمیران بوتگ انت مارا وتی کرد ءَ آھانی واھشت سرجم کنگی انت –

بلوچستان ءِ دمگ کیچ ءِ ھند بلیدہ ءَ گوستگیں ھپتگ ءَ پاکستانی سیکورٹی پورس ءِ تیرگواری ءَ بیران بیتگیں کسان سالیں زھگ رامز خلیل ءِ کھول لاش ءِ ھمراھی ءَ سَے شمبے ءِ روچ ءَ بلوچستان ءِ بنجاھی شھر شال ءَ سر بیتگ اَنت –

سَے روچاں داں کھول ءَ تربت ءَ شبید فدا بلوچ ءِ چوک ءَ نندانک جتگ ءُ نشتگ اَنت، بلے سرکاری مزنیں واکاں آیانی لوٹ سرجم کنگ ءَ رھوت نہ کرتگ –

دو شمبے ءِ روچ ءَ کھول لاش ءِ ھمراھی ءَ شال ءِ نیمگ ءَ دراتک اَنت ءُ پنجگور ءَ گوزان، سوراب، کلات ءُ مستونگ ءَ داں شال ءَ سر بیتگ اَنت –

مستونگ ءِ ھد ءَ ڈپٹی کمشنر مستونگ ءَ کھول ءِ گون ءَ گپ ءُ تران ءُ واتر روگ ءِ دزبندی کرتگ، بلے کھول ءَ ھر رنگ ءَ شال ءِ روگ ءِ پیسلہ کرتگ –

جتا جتائیں جاھاں بلوچ راجدوست نودربر گل، سیاسی پاٹی ءُ سول سوسائٹی ءِ باسک ءُ دمگی مھلوک ءَ کھول ءِ گون ءَ ھمگرنچی درشان کرتگ ءُ کاروان ءِ ھمراہ بیتگ اَنت –

چہ مستونگ ءَ لاش ءِ گون ءَ مردمانی بازیں کچے ءَ شال ءِ شھر ءَ پترتگ اَنت اود ءَ بلوچستان شھدربرجاہ ءِ دیم ءَ نودربرانی بازیں کچے ءَ لاش ءِ دیم ءَ اتکگ اَنت ءُ پد ءَ کھول ءَ لاش چِست کرتگ ءُ ریڈ زون ءَ گورنر ھاؤس ءِ نزیک ءَ سر بیتگ اَنت –

کھول ءُ مھلوک ءِ بازیں کچے ءَ اے وھد ءَ گورنر ھاؤس ءِ نزیک ءَ نشتگ ءُ نندانک ءَ نشتگ اَنت –

زانگ بہ بیت دو اکتوبر ءَ تھسیل بلیدہ ءَ سی ٹی ڈی ءَ بی ایس او ءِ چیئرمین ظریف رند ءِ لوگ ءَ بیڑ برتگ ءُ اود ءُ کسان سالیں زھگ رامز خلیل بیران بیتگ ءُ یک زھگے ءُ زالبولے زدگ بیتگ اَت ءُ خلیل رند پورس ءَ وتی ھمراھی ءَ برتگ اَت –

اے وئیل ءَ پد سرکاری تکاں اے گوشگ بیتگ کہ ھردوکیں نیمگاں تیرگواری ءِ سبب ءَ اے زھگ ءِ بیرانی بیتگ –

بلے کھول ءَ اے دراھیں بھتام رد کرتگ ءُ انساپ ءِ لوٹ کرتگ –

ھمے وڑ وئیل ءَ دزگیر بیتگیں خلیل رند مروچی زمانت ءِ سر ءَ یلو بیتگ ءُ تربت ءَ سر بیتگ-

 دوشمبے ءِ روچ ءَ دبئی انٹرنیشنل پٹ ءَ بوتگیں آئی پی ایل کرکٹ گوازی ءَ چنئی سپر کنگس ءَ بیست اوورانی تہ ءَ دھلی کیپٹل ءِ دیم ءَ پنچ وکٹانی تاوان ءَیکسدو ءُ سِی ءُ شش رن ءِ ٹارگٹ داتگ بلے دھلی کیپٹل ءَ جوانی ءَ گوازی کنان ءَ نوزدہ اوورانی تہ ءَ ھپت وکٹانی تاوان ءَ یکسدو ءُ سِی ءُ نھ رن جوڑکتگ چننئی ءِ ٹارگٹ پروشتگ ءُ گوازی وتی نام ءَ کتگ – 

دھلی کیپٹل ءَ چنئی سپر کنگس گڈی اوور ءَ سَے وکٹاں پروش داتگ – 

چنئی نیمگ ءَ انباٹی رائیڈو ءَ جوانی ءَ گوازی کنان ءَ نیم سنچری کتگ پنجاہ ءُ پنچ رن جوڑ کتگ ءُ ناٹ آوٹ بوتگ – 

دھلی ءَ وتی سوبمندی ءَ چہ ءَ مروچی وتی کپٹن رشبھ پنت ءِ ودی بوھگے روچ ءَ سوبمندی ءِ سوگات ندر کتگ – 

دھلی ءِ سینزدہ گوازیانی تہ ءَ اے دھمی سوبمندی انت ءُ آ بیست پوائنٹ ءِ ھمراھی ءَ ٹیبل ءِ تہ ءَ اولی لمبر ءَ اتکگ – دومی نیمگ ءَ چنئی ءِ یکشل ءَ دو ءُزیکین ءِ ھواری ءَ چارمی بے سوبی ءِ دیمپانی بوتگ آ ھژدہ پوائنٹانی ھمراھی ءَ دومی نمبر ءَچہ دراتکگ – 

چنئی ءِ نیمگ ءَ داتگیں ٹارگٹ انچو مزن نہ ات بلے دھلی ھم بازیں زور ءِ جنگ کپت – اوپنر ءَ شتگیں شیکھر دھون ءَ سِی ءُ پنچ بالاں سَے چوکا ءُ دو چکّاءِ کمک ءَ سِی ءُ نھ رن جوڑ کرتگ ءُ شمران ہتمائر ءَ ھژدہ بالاں دو چوکا ءُ یک چکّائے کمک ءَگوازی ءِ سوبمندی دیوک ءَ بیست ءُ ھشت رن جوڑ کتگ – اوپنر پرتھوی شا ءَ سَے چوکائے کمک ءَ ھژدہ ءُ اولی گوازی کنوک رپل پٹیل ءَ دو چوکائے کمک ءَ ھژدہ رن جوڑ کتگ ءُ ریشبھ پنت ءَ بس دوازدہ بالاںیک چوکائے ءُ یک چکائے جتگ ءُ پانزدہ رن جوڈ کتگ –

چنئی نیمگ ءَ رویندر جڈیجہ ءُ شاردل ٹاکر ءَ دو دو وکٹ گپتگ ءُ آل راؤنڈر راکشل پٹیل ءَ جوانی بالنگ پیش دارگے ھاتر ءَ پلئیر آف دی میچ ءِ سوگاتدئیگ بوتگ –

بلوچستان ءِ دمگ ھرنائی ءَ زھگ ءَ تیرگواری کرتگ ءُ وتی مات کُشتگ ءُ پد ءَ تیرگواری کرتگ ءُ وتی ارواہ ھم گپتگ اَنت –

تیرگواری ءِ وئیل ھرنائی ءِ دمگ شاھرگ ءَ پیش اتکگ –

لیویز بنشون ءِ رد ءَ زھگ ءَ پیسر ءَ تیرگواری کرتگ ءُ وتی مات کُشتگ ءُ پد ءَ تیرگواری کرتگ ءُ وت ءَ وت کُشتگ –

تنی وھدی وئیل ءِ سبب زانگ نہ بیتگ اَنت ءُ ھمے وڑ لاش لیویز کارمنداں چِست کرتگ ءُ ھیلتھ سنٹر شاھرگ ءَ رسینتگ اَنت –

سر بیتگیں ھالانی رد ءَ بلوچستان ءُ اوگانستان ءِ سیمسری دمگ چمن ءِ سیمسر تالبان ءِ نیمگ ءَ گوستگیں شپ ءَ بند کنگ بیتگ –

ھالانی تہ ءَ گوشگ بیتگ کہ چمن ءِ سیمسر اسلامی امارات تالبان ءِ نیمگ ءَ باب دوستی گیٹ ھردوکیں نیمگاں سیمنٹ ءِ گون ءَ بند کرتگ –

چمن پاک اوگان ءِ سیمسر ءِ بندش ءِ سبب ءَ روگ ءُ آیگی سرجم ءَ بند کنگ بیتگ اَنت – سیمسر ءِ بندش ءِ سبب ءَ مساپر ھردوکیں مھتل اَنت ءُ جیڑھانی آماچ اَنت –

چمن ءَ اوگان تالبان ءَ گُشتگ کہ پاکستان دمگی مساپرانی گون ءَ ناوشیں رویشاں بند بہ کنت –

چمن گوستگیں سرکار ءِ گون ءَ کرتگیں مسامانی رھبندانی رد ءَ روگ بہ بیت اِنت چریشاں کندھار ءُ چمن ءَ پجار کاڈ ءِ اجازت دیگ بیتگ –

چمن ءَ سیمسر ءِ بندش ءِ سبب ءَ لوڑیں گاڑیاں فروٹ ءُ سبزیانی پینسگ ءِ گمان کنگ بیگ ءَ اِنت-

چمن ءِ بارڈر ءِ بندش ءِ سبب ےَ پاکستان ءُ اوگانستان ءِ باپار اوشت ءِ آماچ اِنت ءُ ھردوکیں نیمگاں گاڑیانی دراجیں کتار لگ اِتگ اَنت –

چمن ءِ بارڈر ءِ بندش ءِ سبب ءَ دمگی تاجراں بازیں کچے ءَ مالی تاوانانی گمان کنگ بیگ ءَ اِنت –