TBP Balochi

نبشتانک: نوتی منی ارواہ

نبشتہ کار: میرل بلوچ

دی بلوچستان پوسٹ

گوں تو دچار کپگ ءَ رند من ءَ نوکیں زندے رس اِتگ اَت ، من ءَ انگت یات اِنت وھدے من ءُ تو اولی رند ءَ دچار کپت اِیں ۔ من ءَ تئی آیگ ءَ چہ پیسر ھال ءَ گپتگ اَت کہ نوتک پیداک اِنت من سنگتاں چہ کمیں گِستا نشتگ اِتاں نوتی من کسّ ءَ چہ تئی جُست ھم نہ کُت کہ ھمے نوتک نامیں سنگت کہ پیداک اِنت کے اِنت ؟ چوناھا من ءَ کہ وھدے نوکیں سنگتے ءِ آیگ ءِ ھال ءَ گپتگ گڑا من سک گل بوتگ آں کہ مرچی من نوکیں سنگتے ءَ گوں دچار کپ آں بلے نوتی تئی آیگ ءِ وھد ءَ من چہ وت ءَ دُور ایوک ءُ تھنا نشتگ اِتاں ءُ گوں وتی تھنائی ءَ دیوان کنگ ءَ اِتاں من گوں جیڑگاں مان گیش اِتگ اِتاں کہ تو ھمے دمان ءَ سر بُوت ئے انچُش کہ من ترا آیگ ءَ دیست من ھم شُمئے دیوان ءِ بھر بُوت آں نُوتی من زان آں ترا ھما ساھت یات اِنت کہ دْرائیں سنگت من ءَ گُشگ ءَ اِت اَنت کہ تو کسان ئے تئی وانگ ءِ اُمبر اِنت تو انُوں اِے کوہ ءُ کھچراں چے کن ۓ ؟ من ھم زانت کہ سنگت راست گُشگ ءَ انت بلے زمین ءِ مھر ءَ انچُش منی باتن ءَ جاگہ کُتگ اَت کہ دل ءَ نہ گُشت کہ یک دمانے ھم چہ اِے کوہ ءُ گاراں دُور بہ باں لگتمالیں راج ، پُرسیگیں گِس ، چورھیں زھگ ، ودار ءِ آسر ءَ نِشتگیں زالبول ءُ ورنایانی ڈریل کُتگیں کُنٹاں من ءَ انچُش پدردیگ کُتگ اَت کہ وانگ ءُ لیب گوازی ءِ اُمبر ءَ من ڈیھ ءَ پھازگ ءَ اِتاں ، من اِے گپ ءَ ھم سرپد اِتاں کہ من سک کسان آں بلے گُلامیں راج ءِ جاوراں من ءَ وھد ءَ چہ پیش جیڑگ ءُ مارگ پرمات ، منی دست ءَ نَد ءِ بدل ءَ توپک اَت ، منی اُمبر ءِ زھگاں بستہ بڈّ ءَ اَت ءُ من ءَ تِیر ءُ کتار ، من کرکٹ ءُ پادبال لیب کنگ ءِ بدل ءَ جنگجاہ ءَ زِند ءُ مرگ ءِ لیب کنگ ءَ اِتاں ، وتی مسکیں ھاک ءِ شیدا اِتاں نوتی ! من ترا ھال دیگ لوٹ آں کہ ھما روچی من دیوان ءَ موکل گِپت ءُ گُشت کہ من واتر کایاں ، من شُتاں ءُ تھنائی ءَ گریت پرچا کہ من جیڑ اِت کہ کس من ءَ سرپد بوھگ ءَ نہ اِنت ، من مارگ ءَ اِتاں کہ من تھنا آں ، کس منی ءُ گلزمین ءِ مھر ءَ پھمگ ءَ نہ اِنت دْرائیں سنگتاں گُشت کہ تو کسان ئے انوں ترا وانگجاہ ءَ بوھگی اِنت تو واتر وتی ھنکین ءَ برو بلے نوتی منی واھگ اَت کہ من ڈیھ پھازے بہ باں ، من کسان اِتاں بلے منی پِگر کسان نہ اَت من وتی اِے واھگ ھم درشان کُت بلے ھِچ سنگت ءَ من ءَ گوش نہ داشت ، تھنا تو بے تْرک ءُ توار ءَ من ءَ چارگ ءَ اِت ئے ، دیوان ھتم بُوت تو من ءَ توار کُت من زان آں ترا ھم یات اِنت گِند ئے !-

تو دست منی سر ءَ ایر کُت ءُ گُشت میرو چون ئے زان ئے من ءَ وھدے ھمے ساھت گِیر کیت من مار آں کہ اچ تو پد من تھنا آں ، نُوتی اِے کمیں وھد ءِ تھ ءَ تو من ءَ ھمینچو مھر دات کہ من مار اِت کہ تو منی ارواہ ءَ گوں دیر اِنت پیوند ئے تو گوں بچکندے ءَ گپ بندات کُت ، ھمے گپ کہ اِے دگہ سنگتاں من ءَ گُشت انت تو ھم من ءَ ھمے سر ءُ سوج دات انت بلے نُوتی تو گوں من انچیں مھروانیں گالوارے ءَ گپ کُت کہ تئ پُرمھریں لبزاں من ءَ تاھیر بکشات ، گوں ترا دیوان کنگ من ءَ سک وش بُوت ، دل ءَ گُشت کہ تو سرجمیں روچ انچُش گوں من ءَ گپ بہ کن ئے بلے تئی کِرّ ءَ وھد کم اَت ءُ تو دومی روچ ءَ در کپت ئے تئی روگ ءَ پد من ھر وھد پہ ترا وداریگ بوتگ آں ، من لوٹ اِتگ کہ تو زوت واتر بیا ئے وھد گوں وتی ترندیں گاماں جُنزان اَت ، من سرجنان ءَ جاھے سر بُوت آں منی ودار ءَ دو سال سرجم بُوت کہ یکروچے منی وادریگیں چمّاں ترا دیست ، تئی گِندگ ءَ گوں من ءَ تاھیر رس اِت ، من وتی درائیں گم ءُ سکّیاں چہ پراموش بوت آں ۔

زان ئے نُوتی من جیڑ اِتگ کہ بلکیں اِے دوئیں سالانی تھ ءَ تو من ءَ شمُشتگ ءُ نوں پجّہ نیار ئے پھل کن کہ من رد بوتگ آں ، تو انچُش کہ من ءَ دیست تَاں من ءَ توار کُت اوووو میرو ! بیا منی کِرّ ءَ ، تو داں دیر ءَ بس من ءَ چار اِت ءُ پد ءَ تو کند اِت ءُ گُشت تو انگت ھمد ءَ گون ئے من گُشتگ باریں کجام دری ملک ءَ پہ وانگ ءَ شُتگ ئے یا باریں دم بُرتگ ءُ تتکگ ئےھھھھھھھھھھھ
نُوتی تئی کندگ من ءَ انگت گِیر کاینت تو دست منی سر ءَ ایر کُت ءُ درّائینت مزاک کن آں اڑے بلے تو چوں لاگر ئے من کند اِت ءُ گُشت من وَ چہ بِندات ءَ ھمے وڑ آں نُوتی وھد ھم سک بے وپا اَت ، من ءَ ءُ ترا یکجاہ بوھگ ءَ نَشت ئِے گِند ئے ! پد ءَ تو درکپت ئے ، زان ئے تئی روگ ءَ پد من ھما جاہ ءَاوشتوک اِتاں ، من سک ارمانی بُوت آں ، تئی گِندگ ءِ وشّی ءَ من تئی نمبر ءِ زورگ ءَ ھم بیھال بُوت آں بلے چے کن ئے کِسمت ءَ ھمیش اَت ۔

نُوتی ! من زان آں اِے ماتیں زمین ءِ مھر اِت انت کہ من ءَ ءُ ترا یکرندے پد ءَ ھوار کُت ئِے من تئی ودار ءَ نِشتگ آں تَاں مار اِتگ کہ من تھنا آں بلے ماتیں زمین وتی بچّاں تھنا نہ کنت ، ھمے زمین ءِ مھر اِت انت کہ من ءَ گوں تو گُڈّی ساھت ءَ ھوار کُت ئِے نُوتی !من ترا گُشگ لوٹ آں کہ تو پہ من پِت ، برات ، سنگت دْرست بوتگ ئے ، تئی آیگ ءَ گوں من سرجم بوتگ آں پرچا کہ من ترا وتی دْرست لیک اِتگ ۔

نوتی ! مرچی اگاں تئی میرو پہ تو دو دانک نبشتہ کنگ ءَ اِنت تَاں اِے تئی داتگیں مھر انت ، اِے تئی پنتانی برورد اِنت کہ من انگت ھست آں ءُ پہ تو جیڑ آں بلے نُوتی من تئی کمّی ءَ مار آں ، من ءَ انگت چہ تو باز دربرگی اَت بلے تو یک انچیں راھے گچین کُت کہ مردم ارسی تْرمپے ھم ریتک نہ کنت تئی ءُ زمین ءِ مھر انت کہ من انگت زندگ آں من زان آں کہ تو داں زند ءِ گُڈّی ساھتاں پہ من جیڑ اِتگ بلے من اِے گپ ءَ ھم سرپد آں کہ تئی مھر گلزمین اِنت ، تو زانتگ کہ من ءَ چہ پد منی زمین میرو ءَ وتی کُنٹ ءَ کنت ءُ رودین اِیت ۔

نوتی !تئی پیش داشتگیں راہ ءَ من انگت راھی آں ، تئی داتگیں پنت داں گُڈّی ساہ ءَ منی راھشونی ءَ کن انت تو دائم من ءَ گلزمین ءِ مھر ءُ ایردستیں راج ءِ گُلامی ءِ بارہ ءَ دْرست داتگ ، من ھم یکروچے ھاک ءِ مھرانی ھک ءَ اد ءَ کن آں ۔ نُوتی من بس ھما روچ ءِ وداریگ آں کہ زمین وتی شیھ ءَ گوانک بہ جنت ءُ مسکیں ھاک ءِ دلبند ءَ پہ دائمی ابدمان بہ کنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کوپا امریکہ ءِ گوازی ءَ یوروگاؤ یک گولے ءَ، ارجنٹینا ءَ چار گولے ءَ باج برتگ، یورو کپ ءَ اسپین ءَ کروشیا ءِ دیم ءَ پنچ گول ءَ باج برتگ، فرانس ءُ سویزر لینڈ سَے سَے گول ءَ دیمیگ –

کوپا امریکہ ءِ گوازی برجاہ انت دوشی شپ ءَ پنچمی راؤنڈ ءِ سیمی گوازی یورگاؤ ءُ پیراگاؤ ءِ میان ءَ بوتگ ءُ چارمی گوازی ارجنٹینا ءُ بلوؤیا ءِ میان ءَ بوتگ – سیمی گوازی ءَ یوروگاؤ ءِ لیبیاں جوانی ءَ گوازی کنان ءَ یک گولے اسکور کتگ گوازی وتی نام ءَ کتگ – یوروگاؤ ءِ نیمگ ءَ ایڈنسن کاونی ءَ گول اسکور کتگ-

ارجنٹینا ءُ بلوؤیا ءِ میان ءَ بوتگیں گوازی ءَ بلوؤیا ءِ نیمگ ءَ چہ یک گول کنگ بوتگ کہ بلوؤیا ءِ لیبی اروِن ءَ اسکور کتگ، وھدیکہ ارجنٹینا ءِ لیبی میسی ءَ دو گول ءُ الیجندرو ءُ لاؤتارو ءَ یک یک گول ءِ اسکور کتگ گوازی وتی نام ءَ کتگ –

کوپا امریکہ ءِ کواٹر پائینل ءِ گوازی شمبے ءِ روچ ءَ پیرو ءُ پیراگاؤ ءُ برازیل ءُ چلی ءِ میان ءَ بوگ ءَ انت ـ

دومی نیمگ ءَ یوئیفا یورو کپ فٹبال گوازی برجاہ دوشی شپ کروشیاء ءُ اسپین، فرانس ءُ سویزرلینڈ ءِ میان ءَ گوازی کنگ بوتگ –

دوشیگیں گوازی ءَ سپین ءَ کروشیا ءِ دیم ءَ پنچ گول ءَ باج بُرتگ، وھدیکہ فرانس ءُ سویزر لینڈ سَے سَے گول ءَ دیمیگ بوتگ انت –

یوئیفا یورو کپ ءِ شانزدھمی راؤنڈ ءِ پنچمی گوازی کروشیا ءُ اسپین ءِ میان ءَ بوتگ کہ کروشیا ءِ نیمگ ءَ سَے گول کنگ نبوتگ وھدیکہ اسپین ءَ پنچ گول داتگ ءُ باج برتگ، کروشیا ءِ نیمگ ءَ سَے ایں گول مسلاؤ اورسک، پیدری، ماریو ءَ اسکور کتگ انت، اسپین نیمگ ءَ اسپین ءِ لیبی پبلو سرابیا، کیسر، پیرنندو، ایلوارو مُراتا، مائیکل ءَ یک یک گولے اسکور کتگ گوازی وتی نام ءَ کتگ –

ششمی گوازی فرانس ءُ سویزرلینڈ ءِ میان ءَ بوتگ کہ کہ ھردو ٹیم سَے سَے گول ءَ دیمیگ بوتگ اَنت – فرانس ءِ نیمگ ءَ چہ سَے گول اسکور کنگ بوتگ کہ دو گول پرانس ءِ لیبی بینزیما ءَ اسکور کتگ ءُ یکے پالو ءَ اسکور کتگ، وھدیکہ سویزر لینڈ ءِ لیبی ھارس ءَ دو گول ءُ یک گول ءِ ماریو ءَ اسکور کتگ ھردو ٹیم دیمیگ بوتگ انت –

یورو کپ ءِ شانزدھمی راؤنڈ ءِ دیمے گوازی انگلینڈ ءُ جرمنی، سویڈن ءُ یوکرائن ءِ میان ءَ جتا جتائیں پٹاں بوگی اِنت –

زورانسری آوار جنیانی بگیری ءَ مئے جُھد برجاہ بیت – ماماقدیر

بلوچستان ءِ بنجاھی شھر شال ءَ پریس کلب ءِ دیم ءَ وی بی ایم پی ءِ زھرشانی برجاہ، زھرشانی ءَ مروچی چار ھزار ءُ سَے سد ءُ پنجاہ ءُ نُھ روچ سرجم بوتگ – سوراب ءَ چہ سیادی داروکیں سیاسی ءُ چاگردی باسک اللہ بکش بلوچ ءُ عبدالسلام بلوچ ءُ دگہ مردماں بنجل ءَ اتکگ ءُ بیگواھیں مردمانی کھولانی گوما دلپدردی درشان اتگ –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ پاکستان ءَ وتی جمھوریت ءُ انسانی ھقوق ءُ ھک دئی ءِ دبوکہ مانپوشتگ ءُ اے ریاست ءِ ناشرکاری چیر دیگ تانکہ تچکیں گپ گار بہ بنت ءُ ھاسکر میان استمانی گپ گوشداروکیں گمراہ بہ بنت –

آئی ءِ گوشگ اَت کہ اقوام متھدہ ءِ انسانی ھکانی کونسل ءَ پاکستانی پوج ءِ ٹولیانی بجن بکوش چگل دے پالیسی، بلوچ پرزندانی زانگولیں جونانی چگل دیگ، بلوچ پرزنداں زورانسری اوار جنگ ءُ بیگواہ کنگے بلوچ راجداریں باسک نودربر رھشون اھوالکار ءُ شھری ھک لوٹوکیں بلوچ پرزندانی نشانگ کنگے پدّرائی ءُ انسان کشیں ریاستی کاروائیانی دارگے لوٹ کنگ اے گواھی ءَ دنت کہ ناکہ ایؤک ءَ بلوچ راج ءِ بگیری ءَ بلکیں میان استمان ءِ تہ ءَ ریاستی ناشرکاری دبوکہ ءَ دیر اتکگ –

ماما قدیر بلوچ ءِ گوشگ ات کہ اے سرڈگار ھما روھانی وارس انت اے زمین ھم گندیت کہ بلوچ ھوناں گوں سھرانت پرچا ھر ھما وھد ءَ کہ انسانی ھکانی لوٹوکے جون دست کپتگ ھمے زمین ءَ دامن پچ کتگ ءُ آ وتی امبازاں زرتگ ءُ وتی مھرئیں دلبند ءَ واپینتگ اے زمین ءَ ھم ھک است کہ آ شادمانی روچ ءَ بہ گندیت –

ماما قدیر بلوچ ءِ گوشگ ات کہ بلوچ سرڈگار ءِ سر ءَ کشت ءُ کوش کنگ ءَ بلوچ راج ءَ وتی راجی ھکانی گرگے جھد ءَ دستکش کرت نہ کنت –

جاؤ ءَ پوجی پانگس ءِ سر ءَ گوں راکٹاں اُرش کتگ ءُ جانی ءُ مالی تاوان داتگ – میجر گوھرام

سربوتگیں ھالانی رِد ءَ گوستگیں شپ ءَ بلوچستان ءِ دمگ آواران جاؤ ءَ ناشناسیں سلاہ بندیں مردماں پوجی پانگس ءِ سر ءَ اُرش کُتگ ءُ اُرشکار درآیگ ءُ رؤگ ءَ سوبین بوتگ انت –

اُرش جاؤ ءِ دمگ جھل جاؤ ءَ میتگو ءَ برجاھیں پاکستانی پوج ءِ پانگس ءِ سر ءَ کنگ بوتگ اُرش ءِ آسر ءَ پاکستانی پوج ءَ جانی مالی تاوان ءِ ھال انت-

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن پرنٹ ءِ جارکش میجرگوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں گوستگیں شپ ءَ ادار یانزدہ ء آواران جاؤ ءِ دمگ جھل جاؤ میتگو ءَ برجاھیں پاکستانی پوج ءِ پانگس ءِ سر ءَ گوں راکٹ آں اُرش کُتگ – دو راکٹ پانگس ءِ تہ ءَ کپتگ، چریشی ءَ پوجی پانگس تاوان بار بوتگ ءُ پانگس ءِ تہ ءَ ساڈی ئیں پوجی کارمند مرتگ ءُ ٹپی بوتگ اَنت-

جارکش میجر گوھرام بلوچ ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

نبشتانک: انچش گُش اَنت ودار نہ کُش ایت کِجین ایت

نبشتہ کار : شیردل بلوچ

دی بلوچستان پوسٹ

ھو مرچی مئے راج ءِ بازیں کُٹم ھست اَنت، گوں ودار ءِ گرانیں نوبتاں دُچار کپتگ اَنت، ھمے گال کہ ودار ءِ درگت ءَ اِنت، آ ھم بہ گند ئے کہ اے نسبت ءَ نہ بوتگ،چوشکہ جاہ ءَ روگ ءِ یا وتی کسے ءِ آیگ ءِ انچیں بابت ءَ بوتگ، راستی یے ودار مردم ءِ آرام ءُ کرار ءَ پچ گیپت ءُ بے تاھیری ءِ گرانیں ساھتاں گوں دُچار ئِے کنت، اگاں ودار ءِ آماچ بوت ئے گڑا روھ ءِ زمین ءِ ھرچ ندارگ نہ وش گندگ بیت بےتاھیری انچش وداں بیت، بیگاہ ءِ کوش،سھب ءِ سمین درینّ ءِ رنگ دراہ بے نما اَنت، ءُ کدی ھم مردم ءَ گوں باگ ءِ ڈولداریں پُل ءُ بلبل ءِ وشیں توار ءُ کپوت ءِ کوکو ءُ ناکو پیزوک ءِ زیمر ءُ نورھان ءُ آرپ ءِ الھان دراہ نہ وش لَگ اَنت ءُ زندماں ءِ دراھیں شاتکامی ھچ مانا نہ دار اَنت ۔

مرچی ھمے ودار ءِ گرانیں ساھتاں گوں دُچار کپتگ اَنت، مئے ھمک مات ءُ گُھار ءُ چُشیں گسے نیست کہ پشت کپتگ ءُ چَمّ ئِے ودار ءِ رھسرانی چاروک نہ اَنت، اگاں نامان اِش دیم ءَ بیار اَنت گڑا تاکانی تاک ھم چَکار بنت نام اِش آسر نہ بنت، بہ گند ناماں بگراں گوں کسے ءَ انساپ مہ بیت، مئے وتن شاھیگانیں بلوچستان ءِ ھمک وارس متاسر ھست اَنت ءُ کسے نام دیم ءَ آرگ مہ بیت،الم ھما کس ءَ را ازیت بہ رس ایت۔

اے نبشتھے سرھال ” بلوچ بیگواھیں پرزند اَنت، نام گپتیں اسلامی ڈیھ ءُ جھان ءِ ناشرکاریں اِستان “کادو ھجام ءِ ءُ برتاینہ ءِ پندلانی باپُشت ءَ ءُ ٹھینتگیں ڈیھ ھپتاد ءُ دوسال ءَ رند ھم وتی کاگدی اڑ داتگیں دستور ءِ سر ءَ وت اَمل کنگ ءَ آمادہ نہ اِنت، دومی راجانی ھزار سالیگیں زمین کبزہ کُتگ اَنت ئِے ءُ راجدپترانی پُلگ ئِے بندات کرتگ ، کسے وتی راج ءِ دودمانی رکینگ ءِ گپّ جنت گڑا میاریگ اِنت بیگواہ کنگ بیت ءُ کُنٹے ماں کوہ ءُ جنگل ءَ دَور دیگ بیت، چہ ھمے بیگواہ بیتگیں زمین زادگاں” چہ یکے ڈاکٹر دین بلوچ اِنت مرچی آئی چست کنگ ءِ دوازدہ سال سرجم اِنت ، بیست ءُ ھشت جُلکان (جون ) دوھزار نُھ ءَ چہ اورناچ ءَ چیریں گلانی دْز ءُ رستریں کارمنداں چہ نادراہ جاہ ءَ چست کتگ،دین مھمد ھمے نادراہ جاہ ءِ میڈیکل آپیسر بوتگ وتی بزّگیں راج ءِ نادراھانی الاج ءُ ھزمت ءِکنگ ءِ زمہ واریاں پیلو کنگ ءَ بوتگ ءُ آئی ھمراہ یکے ھمے نادراہ جاہ ءِ دگہ نوکرے ساڑی بوتگ ءُ ھمائی چمّانی دیم ءَ نیم شپ ءَ کا اَنت ڈاکٹردین مھمد پہ زورانسری لٹ دینت گوں وت بر اَنت ڈاکٹر دین مھمد بلوچ ءِ بیگواھی بگر تاں روچے مرچی آئی دُتک سَمی دین ءُ مھلب دین وتی واجھین پِت ءِ آوار جنگ ءِ ھلاپ ءَ ھرچ ھما دروازگ ٹُک انت کہ پبجاب ءُ زورگیریں سروکاں توار سر بہ بیت، بَلے ! سَمَی دین ءُ مھلب دین ءِ ھبر انگت ھچ کسے ءِ گوشاں نہ پُتر اَنت، چُک پہ زندماں ءِ سارتیں ساھگ ءُ گاریں وشیانی شوھازگ تُروارگ ءَ اَنت اے وھد ءَ گرانیں سکیاں گوں دُچار اَنت چہ وتی وانوکاں پھلی لوٹاں-

اے دانکاں من نبیسگ ءَ آں کہ بلوچ ءِ ھکدار ءَ دار بہ بنت اے ھم گپّ ھست!! پِت ءِ بستار ءَ ھما کس بزانت کہ آ را وت ءَ پِت ھست، پنجاب ءِ واکدار یا سروک ھیرامنڈی ءِ ودی بوتگیں بے پت اَنت پِت ءِ بستار ءَ پمیشکا نہ زان انت، ھرّوچ چُک پہ وتی بیگواھیں پِتانی آجوئی ءَ گریوگ ءُ زار ءَ اَنت ماں دگّانی سر ءَ زھرشانی کنگ ءَ اَنت، چُنت مات ءُ گُھار گوں ھمے واھگ ءَ اکس اش ماں دلانی سر ءَ داروک بوتگ اَنت، گوں ارمانیں دلے بیران بوتگ اَنت، اُپ کہ چونیں گرانیں ساھتاں مئے راج ءِ مات ءُ گُھارانی چُک اش دیمپاں کرتگ اَنت مئے راج ءِ بانکیں دتک سَمی دین ءُ مھلب دین ءِ پادانی پند شال تا کراچی ءُ نامرادیں اسلام آباد ءِ روگ ءُ زھرشانی راج ھچبر پراموش نہ بیت، ڈاکٹر دین مھمدءُ زاکرمجید ءِ بیگواھی ءِ کھریں زند ءِ دوازدہ سال ءِ سرجم بوگ ءَ تیوگیں بلوچ راج گمیگ اِنت، گوں “سَمی دین ءُ مھلب دین یکجاتی ءَ ھور اُوشتاتگ-

راجی رھشون ” زاھدکرد ءُ شبیرجان رمزان جان ءَ ھوار دراھیں بندیگانی آجوئی ءَ انسان دوستیں گَل توار چست بہ کن انت تا بلوچ راج ءِ بیگواھیں پسگ زوت واتر بہ بنت بیگواھیں پُسگانی لوگانی رُژن واتر بہ بات اَنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

زھرشانی بیگواھیں ڈاکٹر دین مھمد بلوچ ءِ جنک سمی دین ءِ دزبندی ءَ کنگ بیتگ، زھرشانی کراچی آرٹ کونسل ءَ بندات بیتگ ءُ تران ءُ پریس کلب ءِ دیم ءَ شتگ –

زھرشانی ءَ بازیں کچے ءَ نودربر، سیاسی گل، بلوچ یکجھتی کمیٹی، سندھی رھشون ءُ چُک ءُ زالبولاں ھوار جتا جتائیں پھناتاں ھواریں مردماں بھر زرتگ –

زھرشانی ءَ زھرشانی کنوکانی دستاں ڈاکٹر دین مھمد بلوچ ءِ اکس ءُ نبشتگیں بینر ءُ دگہ بیگواھیں مردمانی کھول ھوار بیتگ اَنت –

زھرشانی کنوکاں شھر ءِ دگانی سر ءَ ڈاکٹر دین مھمد بلوچ ءِ یل کنگ ءِ واستا اوگام جتگ ءُ سرکار ءَ لوٹ کرتگ کہ آ اے دوازدہ سالاں بندیگ کرتگیں بلوچ ڈاکٹر ءَ یل بہ کنت ءُ آئی ءِ زھگانی پریاتاں گوش بہ داریت –

زھرشانی ءَ ڈاکٹر دین مھمد ءِ جنک سمی دین ءَ تران کرتگ ءُ گوشتگ کہ اشی ءَ شما سرپدے کہ من ھرکجا برے سارتی ءُ برے لھڑیں گرمانی تہ ءَ وتی پت ءِ شوھازگ ءَ دراں ٹکان اَنت –

سمی دین ءَ گوشتگ کہ ھچ چوشیں جاہ ءِ پش نہ گپتگ کہ اود ءَ من ءَ وتی پت ءِ یل کنگ ءِ اُمیت بیتگ اَنت، آئی ءَ گوشت کہ من کسان اُمری ءَ وتی راہ ھمے سفر ءَ گوں بندوک کرتگ ءُ اے دوازدہ سال اَنت ءُ دوازدہ روچ نہ اَنت-

آئی ءَ گوشت کہ من وتی زند ءَ ھنچش تکانسراں کہ منی ءُ منی کھول ءِ زند ناوشیں رنگے ءَ گوزگ ءَ اَنت ءُ ھنچش سما بیت کہ وتی زند ءَ ھمے ادارھانی دیم ءَ ببا بہ دے ءُ اے کلوہ ءَ بہ دے آ کجام انسانیت ءِ ٹاہ ءَ دیگ ءَ اَنت –

آئی ءَ گوشت کہ من بیست ءُ یکمی کرن ءَ دگ ءُ دگہ چیزانی لوٹ ءَ نہ کنگ ءَ آں ءُ من وتی پت ءَ لوٹگ ءَ آں،آئی ءَ گوشت کہ اگاں مئے مردم جنگ ءُ گار کنگ بیتگ اَنت ءُ آیانی ھڈ مارا پیشدارگ بہ بنت –

آئی ءَ گوشت کہ اے دوازدہ سالاں ھما انسان ھکانی واستا یک شھماتے بیت کہ آ تنی وھدی مارا انساپ دیگ ءَ بے سوب بیتگ اَنت –

زھرشانی ءَ بھر زیروکیں مردماں تران کرتگ ءُ گوشتگ کہ اے ھما وھد اِنت کہ اے گوانک پیسر ءَ بلوچستان ءَ بس بیتگ ءُ نِی اے بیگواھی ءِ گوانک جنوک سندھ، پکتونواہ ءُ پنجاپ ءَ ھم سر بیتگ –

زھرشانی ءَ بلوچ نودربر رھشون شبیر بلوچ ءِ گوھار سیما بلوچ ھم ھوار بیتگ ءُ آئی ءَ تران کرتگ ءُ گوشتگ کہ من ھمے رنگ ءَ سمی ءِ وڑ ءَ پنچ سالاں وتی برات ءِ ودار ءَ نیشتگ اَنت –

سیما ءَ گوشت کہ من ھروھد ءَ لوگ ءَ رواں گڑا منی مات من ءَ اے گپ ءَ جُست کنت سیما تو شتگے شبیر ءِ بارہ ءَ ھال ھست؟ یا ناں؟ من آئی ءِ دیم ءَ بے توار باں –

ھمے وڑ ءَ ڈاکٹر دین مھمد بلوچ ءِ یل کنگ ءِ واستا چاگردی رسانکجاہ ٹوئٹر ءَ ھم #SaveDrDeenMohdBaloch ھیش ٹیگ کارمرد کنگ بیتگ ءُ انگت ءَ بازیں ھسابے ءَ بلوچ تکاں بندوکیں مردم ھمے ڈس ءَ کارمرد کنگ ءَ اَنت-

ڈاکٹر دین مھمد سال دوھزار ءُ نُھ ءَ بلوچستان ءِ دمگ ھزدار اورناچ ءَ سرکاری ھسپتال ءِ ڈیوٹی ءِ وھد ءَ آوات جنگ بیتگ –

آ روچ ءَ پد آئی ءِ زھگاں بلوچستان ءَ ھوار کراچی، اسلام آباد ءَ یکشل ءَ زھرشانی کنگ ءَ گندگ ءَ آیگ ءَ اَنت ءُ اشی ءَ ابید سال دوھزار ءُ چاردہ ءَ سمی دین ءَ وائس فار بلوچ پرسنز ءِ وائس چیئرمین ماما قدیر، زاکر مجید ءِ گوھار فرزانہ، بیگواھیں رمزان ءِ زھگ الی ھیدر ءِ ھمراھی ءَ شال کراچی داں اسلام آباد ءَ پند ءَ روانک جتگ –

نبشتانک: رودپتر ءِ سیمی بھر

نبشتہ کار: شاؔری لال

دی بلوچستان پوسٹ

در نئیت چُشیں بَلّی یے کہ ماھکانیں شپاں لوگ ءِ پیشگاہ ءَ کِلّہ دار ءَ تکّہ بہ دنت گوں وتی زھگ ءُ نماسگاں کسہ بہ گْوش اِیت، چے ءَ کہ کسّہ جنوکیں بَلّی مُرتگ اَنت بلے پد ءَ اوں بید چہ بَلّی ءَ کسے وتی نگاھاں ھر نیمگ ءَ شانک بہ دنت آئی ءَ کسّھانی گرنچ گندگ ءَ کیت تھنا آئی ءَ ھمے گرنچانی تہ ءِ کسہ بوجگ ءُ چارگ ءَ پد جیڑگی اَنت۔

منی جاڑکیں برات کہ یک سالے ءُ سے ماہ ءَ پیسر ناگتیں مرگ ءَ ھدامرزی بوت ءُ چہ ما پہ مدامی جتا بوت۔ مرچی کہ من ءَ آئی ءِ چاڑاں زرتگ اَت من چہ گنوکی ءَ آئی ءِ پولگ ءَ آئی ءِ کتاب ءُ دپتراں چارگ ءَ اِت آں کہ بوت کنت آئی ءِ چیزے بہ گندان ءُ آزگیں زرد ءَ بہ ساڑیناں پٹّان پٹّان ءَ من آئی ءِ رودپتر ءَ دیست کہ آئی ءَ اے رودپتر ءِ نویسگ ءِ وھد ءَ ھچ کس ءَ وتی کرّ ءَ نیشتگ ءُ مرچی رودپتر کہ من دیست رودپتر ءِ تہ ءَ آئی ءِ بازیں یاتے منی دیم ءَ آتک ءُ رودپتر ءِ سر ءَ گوں وش نویسی ءَ نبشتہ اِنت ”ایشی ءَ پچ مکن رازے مان“-

بلے من ھدامرزی ءِ کول پروشت رودپتر پچ کت، دپتر ءِ پچ کنگ ءَ گوں منی ارسانی ھار ملّ اِت۔ اولی تاک ءِ سر ءَ منی ءُ آئی ءِ کسانی ءِ اکسے جنوک ءَ اَت کہ اکس ءِ تہ ءَ من ءُ آ بگل ماں بگل اوشتوک اَنت رو دپتر ءِ اولی بھر ءِ تہ ءَ آئی ءِ کسانی ءِ یات ءُ وانگجاہ ءِ نوبت نویس اتگ اَنت دومی بھر ءِ تہ ءَ درانڈیھی ءِ وھد ءَ آئی ءَ وتی جنجالی ءُ بزگی نویس اِتگ۔ سیمی بھر ءِ تہ ءَ کہ آئی ءَ پہ وتی میتگ ءِ دیمروئی ءَ گوں سرکار ءَ جنگے کتگ اَت ھما کسہ نویس اِتگ اَت من آئی ءِ کسہ ونت من ءَ پہ وتی برات ءَ ناز بوت کہ آ چوشیں کردے ءِ واھند بوتگ ءُ اے کسہ ءِ بوجگ ءَ پد من گرنچ دات نہ کت ءُ شمے دیم ءَ ایر اِنت۔

آ رودپتر ءِ سیمی بھر ءَ تہ ءَ چوش کسہ کنت:- ”من وانگ ءَ اِت آں اسکول ءُ مدرسہ ءَ نہ نئیکہ سنٹراں من وانگ ءَ ات آں دامگ (انٹرنٹ) ءِ سر ءَ۔ اسکول ءُ مدرسہ وھد ءِ ھرجان بوت اَنت ءُ بند بیت اَنت نی من نشتگ ءُ دامگ ءِ تہ ءَ گھوانی کن آں، چونائی ءَ اسکول ءُ مدرسہ آں تئی دل ءِ تب ءَ وانگ نہ بیت اود ءَ چونیں ماسٹر یاکہ مولوی کتاب دنت ترا ھما کتاب الّم وانگی اِنت بلے دامگ ءِ تہ ءَ تئی دل ءَ چونیں کتاب تب کنت تو آئی ءَ ونت کت کن ئے کسے ترا ٹوکے گوشت نہ کنت“۔

”من دامگ ءِ تہ ءَ ھمک رنگ ءِ کتاب گھوانی کنگ ءَ اِت آں بزاں شائری، لبزانکی، گْوستانکی، راجدپتری، زندجاورھال، نیکراھی ءُ شھزانتی، ءُ دگہ بازیں من ھمے رنگ ءِ کتاب وانگ ءَ اِت آں ءُ دگہ سدانی ھساب ءَ ھمے رنگ ءِ کتاب انگت پہ منی جانبنڈی ءِ سوب ءَ کپتگ ءُ پہ وانگ ءَ ایر اَنت وانگ ءَ وَ چونائی ءَ من ھمک رنگ ءِ کتاب واناں بلے آ ھما کتاب کہ من ءَ سک دوست بیت آ گدار انت“۔

منی گھوانی ءِ شوک نوکی برجاہ اَت کہ ما چہ وتی بنکی ڈیھ ءَ درآتکیں ءُ درانڈیھ بوتیں نوکین ءُ ھشکاوگیں دیارے ءَ آتکیں اِے دیار ءَ اوں مئے ڈیھ ءِ سان زرتگ ات ءُ چو مئے ڈیھ ءَ ھشکاوگ اَت ھما بے اسکولی ءُ بے وانندھی، نئیکہ اد ءَ نادراہ جاھے ھست ات ءُ نئیکہ اد ءَ شرّیں آسراتی یے ءُ مستریں ھبر ایش اَت کہ پہ منی گھوانی ءَ دامگ نیست اَت ھاں البت کاردام (نٹورک) ھست بلے کرّ ءُ گْور ءِ دمگاں دامگ ھست بلے اے دمگ چہ دامگ ءَ زِِبھر اَت۔

اے ھند ءِ آیگ ءَ پیسر من ءَ اد ءَ ھچ سنگتے نیست اَت ءُ نئیکہ من ءَ پجّاروکے ھست اَت من چو ھما ائیدی بُز ءَ سربتگ اِتاں کہ چہ کوچگے ءَ آرگ بوتگ شھر ءَ پہ ائیدی کنگ ءَ ھاں بلے لھتے ماہ ءَ پد من ءَ یک ءُ دو پہ نام ءَ سنگت بوت کہ نوں منی سنگت نہ اَنت نزاناں آھاں من ءَ وتی سنگت لیک اِتگ یا نا بلے آھاں من وتی سنگت لیک اِتگ ءُ انگت وتی سنگت اِش لیک آں بلے من ءَ نوں آ من ءَ وتی نکن اَنت برے برے من آھاناں گوانکو ءِ سر ءَ دروت ءُ سلامے میسج کن آں آ منی میسجانی پسہ ءَ نکن اَنت گڑا من ءَ سک بژن بیت کدی کدی من جیڑ آں بوت کنت آ نہ لوٹ اَنت کہ من آیاناں میسج بہ دیاں یا بوت کنت چہ من ءَ دلگران اَنت بلے دل وت ءَ وت پسہ دنت کہ من ھچ چشیں کارے نہ کتگ آ چہ من ءَ دلگران بہ بنت برے دل گش اِیت آ نوں سیر بوتگ اَنت گاڑی ءُ مزنیں لوگانی ھُدابند بوتگ اَنت پمیشکا منی ڈولیں گریبے ءِ زھگ ءَ یات ءَ نہ اَنت۔ من وَ چہ آھاں کدی یک آنہ یے ءِ لوٹ نہ کتگ ءُ نئیکہ واھگ داراں ھاں یکبرے من چہ آئی ءَ یکبرے یک بینک اکاؤنٹے ءِ لوٹ کت چیاکہ من یک کار ءُ روزگارے بنا کتگ اَت (آ روزگار ءَ را وتن دوست ءُ راج دژمناں بند کت آ کسہ ءَ دگہ برے کن آں) من آ ملک ءِ باشندھے نہ اِت آں من ءَ اے ملک ءَ بینک اکاؤنٹ پچ کت نہ کت) آئی ءَ من ءَ ساپ ءَ ساپ گوشت کہ من بینک اکاؤنٹے دات نہ کن آں گڑا من باز دلپدرد نہ بوت آں چے ءَ کہ من پیسر ءَ دلجم اِت آں کہ اے دردواریں سنگتے نہ ئِِے ءُ منی دومی سنگت بلوچ ءِ زھریں نشہ تریاک ءِ آماچ بوتگ کہ گیش ء وت نہ اِنت اِے دیار ءِ آیگ ءَ من ءَ دو سال گوستگ اَت ءُ منی زندگی ءِ روچ زوال بوان اِت آں وانگ نیست اَت، نئیکہ کتابجاھے ءُ دامگے ھست اَت کہ کتابے بوان اِیت من کہ سرچِست کتگ من ءَ کتاب ءِ ھڈکّہ بوتگ ھرچ رنگ ءِ کتابے دیستگ دل ءَ گشتگ بس بہ زورے اینچو نہ ونتگ کہ اینچو کتاب من ءَ گون بوتگ، بلے اد ءَ من ءَ ھچ کتاب گون نیست اَت ءُ منی وھد ھچ روگ ءَ نہ اَت۔

ماہ ءُ روچ گْوزان اِت اَنت کہ یک روچے ھبرے شنگ اِت کہ سرکار ءَ میتگ ءَ را دامگ دیگ لوٹ اِتگ بلے میتگ ءِ میر ءُ متبراں دامگ جنگ مکن کتگ پرے ھاتر ءَ کہ دامگ میتگ ءِ مردم ءُ جاوراں ھراب کنت۔ پرے ھال ءِ اِشکنگ ءَ رند من سک ابکّہ ءُ ھیران بیت آں دامگ مردماں چتور ھراب کنت، اگاں ھرابے بہ کتیں اینچو وھد ءَ من ھراب بوتگ ات آں من رند ءَ سرپد بوتاں کہ میتگ ءِ میر ءُ متبر انگت ھما ”رجعت پسندی“ ءِ چات ءَ اَنت۔ منی دل ءَ وس وسے ودی بوت۔ یک شیتانی یے۔ یک پندلے کہ چتور چے رنگ ءَ میتگ ءِ مردماں لاچار بکن آں کہ میتگ ءَ دامگ بہ دے اَنت بوت یک روچے من گوں وتی ریٹائر بوتگیں دوئیں سنگتاں ھمے ھبر پیش کت کہ چونیں پندلے سازگی اِنت کہ میتگ ءِ دامگ ءِ ھاتر ءَ گڑا آھاں گوشت مئے میتگ ءَ دامگ نہ رس اِیت اِد ءِ مردم ھچبر چشیں آسراتی نہ لوٹ اَنت دانکہ زاھدان ءَ یک ویرے لونجان کتگ اش سدانی ھساب ءِ کلومیٹر ءِ دوری ءَ یک ویرے تچک کتگ اِش ءُ کاردام ءِ آورتگ بلے دامگ ءِ باری ءَ تپ انت اِش،-

سنگت ءِ گپ ءِ اشکنگ ءَ منی زرد ءَ اوستے ءَ باھند کت من ھما دمان ءَ گوشت اگاں ما ھمے کاردام ءِ ویراں بہ بُرّیں چون اِنت؟ سنگت: کاردام ءِ ویر ءَ چے ءَ بُرّیں؟ من: ویر ءَ ما ءُ شما بُرّیں کاردام بند بیت میتگ ءَ کاردام نہ بیت ءُ ما میتگ ءِ میر ءَ گوش ایں دانکہ میتگ ءَ دامگ جنگ نہ بیت ما کاردام ءَ پچ کنگ ءَ نئیل ایں سنگت ءِ دپ ءَ بچکندگے اَتک واکی راست گشے چوش وش انت بلے ویر ءَ کدین بُرّیں من گوشت ھنی سنگت دامگ ءِ شوکی ات پہ کتاب ءُ وانگ ءَ نہ، بلکیں پہ تامر چارگ ءَ گنوک اَت ما راہ کپتگیں پہ ویر ءِ نیمگ ءَ“۔

من رودپتر ءِ وانگ وانگ ءَ نہ زانت چنچو وھد گْوستگ اَت۔ من ساھت چار اِت کہ سہ بج ءَ بیست ءُ پنچ ملٹ اَت ھنو من ءَ شیما ءِ جنک کلسوم ءَ ٹیوشن دیگی اِنت رودپتر ءِ دیم ءِ تاکاں دگہ وھدے واناں۔

روان اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: آشوبی زُرمبِشت ءُ راجی استان ءُ آئی ءِ جوڑشت ءِ زرمبِشت

نبشتہ کار : جاوید بلوچ

دی بلوچستان پوسٹ

آشوب یک سیاسی ءُ غیر سیاسی ، صنعتی ، زرعی ءُ راجمانی بدلی یے بازیں زانتکار مُلک ءِ سر رهبند ( Constitution) ءِ تہ ءِ بدلی ءَ ، ءُ اداره ءِ جوڑشت ءِ تھ ئِے بدلی ءَ هَم آشوب گْوش اَنت-بلے ایش آشوب  کسانیں کچ ئیگ بنت انچو گْوشت کن ات کہ مهدود تهر ئیگ انت وهدیکہ ما دپتر ءِ سرا چمّاں شانک بہ دے  ایں مارا اِے شے گندگ ءَ کیت کہ آشوب دپتر ءِ تہ ءَ جِتائیں دورانی تہ ءَ جتائیں چاگرد ءُ مُلکانی تہ ءَ اتکگ همے آشوبانی سَوَب ءَ آ راج ءُ آیانی راجمان ءُ استان ءِ تہ ءَ نہ ایوکا سیاسی بلکیں ربیدگی ، زرعی ءُ صنعتی بدلی آؤرتگ بلے بازیں وهداں  سیاسی آشوباں شرّیں بدلی آؤرت کرت نہ کرتگ کہ آیانی واست ءَ آ آشوبانی مقصد بوتگ بازیں مردم انقلاب ءَ گْوں راجدوستی ءِ جُهد ءَ همگرنچ کن اَنت جوانیں آسرال دات کرت نہ کن انت پرچ ءَ کہ راجدوستی ءِ جُهد الگیں  اِستانے ءِ واست ءَ بیت اِنت آ اِستانی سیمسر ءُ اِستان ءِ حدود ءِ تھ ئِے جُهد نہ بیت انت راجدوستی ءِ جتائیں  بزانت کنگ بوتگ  یک راجی تهریکے کہ آ پہ راجی پجّار ءِ بحالی ءِ واست ءَ انت آئی ءِ وجود غضب کنگ بوتگ گڑا اِے رنگیں راجی تهریک ءِ کُمک کنگ آئی تہ ءَ وتی کرد ءَ پیلو کنگ ، راجی پجّار ءُ آئی بحالی ءِ واست ءَ جذبگانی ءُ مارشتانی هستانکی راجدوستی اِنت بلوچ ءُ کُرد راجدوستی ءُ راجی آجوئی زرمبشت همے لڑ ءَ کاینت وطن دوستی  Patriotism: بازیں زانتکار ایشرا هَم راجدوستی گوش اَنت ءُ قوم پرستی ءِ یک دروشمے لیکنت وتی اِستان ، راجمان ءُربیدگانی سر ءَ بےکساس پھر بندگ، ایشی ءِ گیشیں دروشم ءَ را Jingoism گْوش انت مطلب وتی راج ءَ را دُهمی راجاں چہ برزتر سمجَهگ ، وتی راجی لوٹانی واست ءَ هرچ وڑیں قدم زورگ ، دومی ءِ هچ پروا نہ دارگ ، گڑا ایشی ءَ را جرمن ءِ نازی اِزم ءِ یک درورے هَم
کرار دات کن انت-

بازیں زانتکار راجدوستی ءِ نوعیت ءُ ابرم ءُ آئی بزانت هما ھاسیں وهدے تہ ءَ یک راجے یے هما خاصیں بوهوکیں جاورانی  سرا گون کن انت اگاں بہ چار ایں هما راج کہ وتی آجوئی ءِ واست ءَ جُهد کنگ ءَ اَنت آیانی سر ءَ راجدوستی ءِ هَما بزانت جوان کیت انت کہ ساری برز ءَ کنگ بوتگ راجانی  راجدوستی ءِ جذبگ راجی آجوئی ءَ پد هَم هلاس نہ بنت بلکیں اِستان ءِ واهند بوهگ ءَ پد راجانی تہ ءَ هم راجدوستی بیت انت اے الم نہ انت کہ آجوئیں چاگرد ءُ راجانی تہ ءَ راجدوستی مہ بیت  البت دوئیں هالتانی تہ ءَ آیانی نوعیت ءُ ہیئیت ءِ تہ ءَ تپاوت الم بیت بلوچ راجی زرمبشت قبضہ ءِ بگیری ، راجی پجار ءُ بلوچ اِستان ءِ بحالی ءُ آجوئی ءِ یک تهریکے بازیں بلوچ نودربر ،ورنا ءُ بازیں کواس ءُ زانتکار بلوچ راجی جیڑه ءُتهریک ءَ کیوبا ءِ فیڈل کاسٹرو ءُ  روس ءِ سوشلسٹ انقلاب ءَ گوں یک کن انت یاکہ هما آجوئیں راج ءُ مُلکانی تہ ءَ کہ رجیم ءِ بدلی ءِ (Internal regime Change ) تهریکاں گوں یک کن اَنت یاکہ هما تهریکاں چہ رہنمائی زورگ ءِ جهد ءَ کن انت یاکہ آیاں  وتی رول ماڈل کنگ ، Ideal سمجهگ روس ءِ آشوب ءُ کیوبا ءِ تہ ءَ بٹیستا ءِ رجیم ءِ هلاپ ءَ فیڈل کاسٹرو ءُ ڈاکٹر چے ءِ کمیونسٹ تهریک کابل زکر اِنت- بازیں بلوچ ورنایاں ءُ نودربراں  روس ءِ کمیونسٹ لبزانک ءِ کتابانی سرا وتی توجہ کرتگ  ءُهمے روس ءِ کمیونسٹ لبزانک ءَ  رٹا جن انت باز ایشاں چہ متاثر بوتگ انت ، گڑا همے واست ءَ کمیونسٹ انکلاب ءُ قوم پرستی یا آجوئی ءِ تہ ءَ چے تپاوت هست انت هنچوکہ ساری ءَ گوشتگ ات کہ بلوچ ورناهانی سرا گیشتر روس ءِ سوشلسٹ آشوب ءُ کیوبا ءِ کمیونسٹ   آشوب ئیگ انت گڑا نبشتانک ءِ تہ ءَ راجدوستی یا راجی آجوئی ءِ تهریک ءُ کمیونسٹ آشوب یا کہ یک آجوئیں راجے یے ، ملک  ءِ تہ ءَ رجیم ءِبدلی ءَ تهریک ءِ تہا چے فرق انت، اے نبشتانک ءِ تہ ءَ اشانی تچک ءَ گیشینگ ءِ جُهد کرتگ اشتراکیت( socialism) ءُ راجدوستی ( nationalism) دو جتائیں لیکہ اَنت- سوشل ازم  راجمان ءِ تہ ءَ معاشی طبقات ءِ چیرتراِتگیں طبقاتانی گپ ءَ کنت- راجدوستی راجی جوڑشت ءُ آئی تہا کُلیں راجمان ءُ گُزرانکی تبکات کاینت سوشل ازم یک مخصوصیں طبقہ یے جُهد ءَ کنت آئی ءَ را چاگرد ءِ تہ ءَ یک خاصیں طبقہ یے کمک گون بیت وهدیکہ راجدوستی  راج ءِ  جوڑشت ءُ راج ءَرا گلامی ءَ چہ درکنگ ءَ اِستان ءِ آجوئی ءِ یک تِهریکے کہ راج ایردست ءُ گلام اِنت گڑا آ راج ءِ سرجمیں چاگرد ءِ تہ ءَ هرچ طبقہ چہ سیادی داروکیں مردم گلام اَنت گلامی ءِ سانکلانی پروشگ ءِ واست ءَ راجمان ءِ تہ ءَ کُلیں طبقات،   درنیامی طبقہ( Middle Class) ، برزی تبکہ( Upper Class) ءُ جَهلی تبکہ ( Lower Class) ایش کُلیں طبقھاں چہ سیادی داروک آ تُری نیکراهی(religious) بہ بنت یاکہ سوشلسٹ ءُ لبرل بہ بنت ایش کُلانی راجی پجّار( national identity)  خطره ءِ تہ ءَ بیت انت ایش کُلیں طبقہ آں چہ سیادی داروکیں مردم گلامی ءُ مازین ءِ بگیری ءَ جهد ءَ یکمُشت بنت روس ءِ سوشلسٹ انکلاب ایران ءِ نیکراهی آشوب ءِ ذریعہ ءَ زار ءُ شاه ءَ ایران ءِ رجیم ءِ بدلی ءَ چِہ روس ءُ ایران ءِ جغرافیائی ءُ سیمسرانی تہ ءَ  بدلی نہ اتکگ راجی آجوئی تهریک ءِ سوبمندی سورت ءَ جغرفیائی وھدت پُرش انت- هنچوکہ رودَراَتکی پاکستان ءِ آجوئی ءَ چہ پاکستان ءِ جغرفیائی حد پرشت اَنت راجی آجوئی ءِ تهریک ءَ یکے دُهمی ءَ تاگت داروکیں راج  یاکہ ملکے ءِ دیم ءَ بیت انت اچ آئی چہ رَکّگ سک باز گرانے کارے رجیم ءِ ءِ تہ ءَ بدلی آرگ ءُ دگہ یک سیاسی نظامے ملک ءِ تہ ءَ آرگ ءِ جهد کنگ ، یکیں راج ءَ چہ سیادی داروکیں  جتائیں طبقہ ءِ فکر داروکانی نیام ءَ بیت انت ایش گران ءُ هون ریز الم ءَ بیت انت بلے یک اِستانے ءِ ءُ راج ءِ جوڑشت ءِ امل ءَ چہ گرانتر نہ انت- ملک ءِ رجیم ئے یاکہ سیاسی نظام ءِ بدلی ءِ تِهریک هما وهد ءَچِست بیت انت وهدیکہ گُڈ گوورنس مہ بیت ، زالمیں ، سفّاکیں نظام بہ بیت ، اولس ءَ وتی گپانی جنگ ءِ آجوئی ءِ مہ بیت ، گڑا وهدیکہ عوام زالمیں بادشاه ءِ هکومت ءِ هلاپ ءَ پاد کاینت ، پد ءَ هما ملک ءِ سربراه وتی پوج ءُ طاقت ءِ ذریعہ ءَ لس مهلوک ءِ جَنَگ ءَ جهد کن انت، آ وتی رجیم ءِ برجاه دارگ ءِ هاتر ءَ وڑ وڑیں جبر کن انت بلے اے جاورانی تہ ءَ فوج ءِ بازیں افسر عوام ءِ کمک ءَ ملک ءِ هکمران ءِ هکم عدولی ءَ کرت کن انت ایران ءِ تہ ءَ شاه هلاپ ءَ تهریک ، عرب شپرنگ ، مصر ءِ تہ ءَ ایشی ءِ درور رس اَنت وهدیکہ آجوئی تِهریکانی تہا زورگیر بے کساس زلم ءِ سہارءَ زور ایت ، ایردستیں راج ءَ را وتی جند ءِ گلزمین ءِ سر ءَ وتی فوج ءُ پولس ءِ ذریعہ گوں سنگدلی ءُ سفاکی چہ جنت همے رنگ پاکستان ءِ تہ ءَ عمران خان ءُ طاهرالقادری اسلام آباد ارش کرتگ ، آشوب ءِ آرگ ءِ جُهد کرت، آیاناں پاکستان ءَ کار هم نہ داشت پرچا آ ملک ءِ تہ ءَ آشوب آرگ لوٹ اِتگ همے رنگ ءَ پی ڈی ایم ات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نیشنل موومنٹ ءِ گوستگیں بنجاھی پتر ءِ باسک ڈاکٹر دین مھمد بلوچ ءِ بیگواھی ءَ مروچی دوازدہ سال سرجم بیتگ، بیگواھیں ڈاکٹر دین مھمد ءِ جِنِک سمی ءُ مھلب مروچی کراچی ءَ روانک کَشگ ءَ اَنت، بلوچ یکجھتی کمیٹی ءَ روانک ءِ پلہ مرزی کنان ءَ کراچی ءَ نشتگیں بلوچ دزبندی کُتگ اَنت کہ روانک ءَ بھر بہ زیر اَنت۔ دومی نیمگ ءَ سندھی بیگواھیں مردمانی آجوئی ءِ ھاتر ءَ کارکنوکیں زالبولیں جھدکار سورٹھ لوھار ءَ ھم زھرشانی ءِ پلہ مرزی کُتگ ءُ بھر زیرگ ءِ جارجتگ ءُ ھمے وڑ ءَ بلوچ ڈاکٹر فورم ءَ ھم روانک ءِ پلامرزی ءُ ڈاکٹر دین مھمد ءُ ڈاکٹر اکبر مری ءِ یل کنگ ءِ لوٹ کتگ اَنت اے وھد ءَ بلوچستان ءَ بندوکیں مردماں ھوار جتا جتائیں پھناتانی ھمگرنچی ءِ سمی ءُ مھلب ءَ کنگ بیگ ءَ اِنت ۔

بیست ءُ ھشت جون سال دوھزار ءُ نھ ءَ چہ اورناچ، خضدار ءَ بیگواہ بیتگیں ڈاکٹر دین مھمد بلوچ ءِ بیگواھی ءَ دوازدہ سال سرجم بیگ ءِ درگت ءَ مروچی چاگردی رسانکدر ءَ ھوار کراچی ءَ روانک کَشگ بیت اِنت۔ اے روانک سمی ءُ مھلب ءِ جارے پد ءَ کشگ بیگ ءَ اِنت، روانک ءِ تہ ءَ جتا جتائیں پگراں گوں سیادی داروکیں مردماں گوں بھر زیرگ ءِ دزبندی کنگ بیتگ۔

دومی نیمگ ءَ بلوچ نیشنل موومنٹ ءَ وتی رھشون ءِ بیگواھی ءِ دوازدہ سال سرجم بیگ ءِ درگت ءَ جھان ءِ جتا جتائیں ملکانی زھرشانیانی درچ بندات کُتگ، بی این ایم ءِ نیمگ ءَ چہ جرمنی، برتانیہ، نیدرلینڈ، گریس امریکہ ءُ کوریا ءَ زھرشانی کنگ بیتگ اَنت، اے زھرشانیانی تہءَ بی این ایم ءِ درملکی باسک ءُ رھشوناں مزنیں کساس ءَ بھر زرتگ ءُ ڈاکٹر دین مھمد ءِ یل کنگ ءِ لوٹ کُتگ۔

ھمے پئیم ءَ چاگردی رسانکدر کارکنوکیں جھدکار مروچی بی این ایم ءُ ڈاکٹر دین مھمد ءِ کھول ءِ جار ءِ پد ءَ یک کمپین ءِ گوں #SaveDrDeenMohdBaloch ءِ ھیشٹیگ ءَ کارمرز کنان ءَ جنزین اَنت۔

دی بلوچستان پوسٹ چاگردی رسانک ءِ اھوال کار ءِ رد ءَ کرونا وائرس ءِ آسری ءَ پد یک مھکمیں کمپین ءِ پد ءَ چہ بلوچ نیشنل موومنٹ ءُ بیگواھیں مردمانی کھولانی نیمگ ءَ چہ گندگ پیداک اِنت۔

سمی بلوچ ءَ مروچیگیں روانک ءَ بھر زیرگ ءُ چاگردی کمپین ءَ ھوار بیگ ءِ ھاتر ءَ بلوچ راج ءُ کلیں انسان دوستیں مردماں چہ دزبندی کنان ءَ گُشتگ کہ مئے مرچیگیں روانک پاکستان ءِ وھد چار ءُ نیم ءَ چہ کراچی آرٹس کونسل ءَ در کپیت ءُ پریس کلب ءِ دیما آسر بیت۔

کرونا ءِ گیش بیگ ءَ گوستگیں روچاں روکپتی بلوچستان ایرانشھر ءَ وانگی بنجلاں دَہ روچ ءِ موکل دیگ بیتگ اَنت –

روکپتی بلوچستان ءِ جانسلامتی ءِ رد ءَ بیست ءُ چار ادارانی سر ءَ ھشت سد ءُ چِل ءُ یک نوکیں نادراہ پدر بیتگ اَنت –

روکپتی بلوچستان ءَ بیست ءُ چار ادارانی تہ ءَ دَہ مردم بیران بیتگ کہ چرے بیران بیتگیں مردمانی ھواری ءَ درستیں بیران بیتگیں مردمانی کچ یک سد ءُ سِی ءُ چار ءَ سر بیتگ اَنت –

کرونا ءِ نادراھی ءَ روکپتی بلوچستان ءَ گپتگیں مردمانی کچ نُھ ھزار ءُ ھپت سد ءُ پنجاہ ءُ ھشت ءَ سر بیتگ اَنت ءُ وش بیتگیں مردمانی کَچ سیزدہ ھزار ءُ دو سد ءُ بیست ءُ نُھ بیتگ اَنت –