TBP Balochi

بلوچ نیشنل موومنٹ ءِ بُنجاھی جارکش ءَ گْوشتگ کہ سے اکتوبر ءَ یونان ءِ راجدانی ایتھنز ءَ یونان پارلیمنٹ ءِ دیم ءَ بلوچستان ءَ پاکستانی زُلم ، زورانسری آوار جنی ، دروگیں میڑ ءُ کُشت ءُ کوشانی بگیری ءَ زھرشانی کنگ بوتگ-

جارکش ءَ گْوشتگ کہ زھرشانی کنوکانی دستاں بینر ءُ پوسٹرز چست کتگ ءُ آیانی سر ءَ بیگواھیں مردم ءُ شھیدانی اکس بوتگ اَنت – زھرشانی کنوکاں پنتاک بھر ءُ بانگ کتگ ءُ دمگی مردماں پاکستانی زُلم ءُ زوراکیانی درگت ءَ سرپد کتگ اَنت بلوچستان ءَ اے زورگر ءَ چہ ورنا ، کماش ءُ زھگ ءَ ھچ کس پھریزی نہ اَنت-

زھرشانی ءَ گپ کنان ءَ بی این ایم یونان زون ءِ آرگنائزر قدیر ساگر بلوچ ءَ گْوشتگ کہ پاکستانی پوج بلوچاں چست کنگ ءُ بیگواہ کنگ یُ کُشگ ءُ ھلاس کنگ لوٹ اِیت دانکہ آ بلوچاں پہ مدامی بزگی زند ءِ تہ ءَ بہ کنت- اے ھمے سبب ءَ بلوچاں مدام بے راہ ءُ راھبنداں ءُ بید ء جرم ءَ چست کنگ ءُ شھید کنت- چیزے روچ ءَ پیس تاج بی بی ءُ رامز بلوچ ءَ دردناکی ءَ تیرگواری کنگ ءُ شھید اش کتگ اَنت ھستیں وھد ءَ بلوچستان ءَ آپ گرانبھا ءُ وھدے کہ بلوچ ءِ ھون اَرزان اِنت-

قدیر ساگر ءَ اکوام متھدہ ءُ یورپی یونین ءَ چہ لوگ کتگ ءُ گْوشتگ کہ دودمانیں دگنیا ءَ دیم ءَ آیگ لوٹ اِیت ءُ بلوچ راج ءَ اے زوراور ءَ چہ بہ رکین اَنت-

آئی ءَ گْوشتگ ک تھنا بلوچستان ءَ اناں سرجمیں سیمسر ءَ ایمن ءُ وشھالی ءِ پش کپتگیں راہ بلوچستان ءِ آجوئی اِنت-

اے زھرشانی ءَ بی این ایم ءِ باسکاں ابید یونانی این جی اوز ءُ دگہ کمیونٹی ءِ مردماں بھر زرتگ-

جماعت اسلامی بلوچستان ءِ جنرل سیکرٹری مولانا ھدایت الرحمان بلوچ ءَ دوشمبے ءِ روچ ءَ بلوچستان ءِ دمگ پنجگور ءَ یک مُچے ءَ تران کنان ءَ گُشتگ کہ بلوچستان ءَ جاورانی ناگیگ کنگ ءُ ناشریانی زمہ وار پاکستانی پورس ایف سی اِنت –

آئی ءَ گُشتگ کہ سیکورٹی ادارہ مھلوک ءِ پھازگی ءِ واستا بنت بلے بلوچستان ءَ کار ءُ بار کنگ ءَ اَنت – ھدایت الرحمان بلوچ ءَ گُشتگ کہ ایف سی ءُ کوسٹ گارڈ ءَ مھلوک ءِ کار ءُ بار پچ گپتگ وت کار ءُ بار بندات کرتگ –

آئی ءَ گشتگ کہ پورس ءِ بنجلاں ڈیزل ءُ روگن ایر اَنت یا آ ناشر وت کرنل ءِ گون ءَ نشتگ اَنت –

آئی ءَ دیمترا گشتگ کہ اد ءِ مردم یکجاہ بہ بنت ءُ وتی ھکانی واستا پُر ایمنیں جد ءُ جھد کنگی اِنت اے لوٹ اَنت ما کوھاں بہ روئیں بلے ما اے دمک ءُ دراں نندیں اشانی گٹاں داریں –

آئی ءَ گشتگ کہ مردم یجکاہ بہ بنت زوت ٹوکن سسٹم ءُ کار ءُ باری بندش ءِ ھلاپ ءَ لکانی مھلوک تربت ءَ یکجاہ کن ایں –

آئی ءَ گُشتگ کہ ھمک روچ مرگ ءَ گھتر اِنت یک روچے ءَ بہ مریں نِی آ ڈن ءَ اتکگیں مردماں مئے ازت ءِ سر ءَ دست دراج کتگ آئی ءَ گُشتگ کہ بلوچ بے گیرت نہ اَنت بلکیں وتی گیرت ءِ واستا وتی جان ءَ دے اَنت –

بلوچستان ءِ بنجاھی شھر چہ شال ءَ پاکستانی لشکریانی دست ءَ دزگیری ءَ پد بیگواہ بیتگیں دو مردم آجو بیتگ اَنت۔

آجو بیتگیں مردمانی تہ ءَ منیر اھمد زھری گوستگیں ماہ ءَ سی ٹی ڈی ءُ دگہ پھازگی لشکریاں برما ھوٹل شال ءَ ھما وھد ءَ دزگیر کُتگ ءُ بیگواہ کُتگ کہ آ اود ءَ جھمنند بیتگ۔ اُستاد منیر ءِ یل بیگ ءِ ھال ھندی اھوالکاراں ھم سدکی کُتگ۔

اھوالانی رد ءَ گوستگیں ماہ ءَ چہ شال ءَ بیگواہ بیتگیں خضدار ءِ ھنکین زھری ءِ جھمنند اُستاد منیر اھمد آجو بیتگ ءُ لوگ ءَ سر بیتگ۔

بلوچستان ءَ زوریں بیگواھیانی وئیل مدام نبشتہ بنت۔ خضدار زھری ءِ جھمنندیں دو ورناہ عرفان زھری ءُ قادر کنول ھم گوستگیں ماہ ءَ زوریں بیگواھی ءِ آماچ بیتگ اَنت کہ داں انگت یل کنگ نہ بیتگ اَنت۔

بلوچستان ءَ بیگواھیں مردمانی جیڑہ روچ پہ روچ گنتر بیان اِنت۔

بلوچستان ءِ سیاسی پاٹی ءُ گلانی نیمگ ءَ مزنیں مدتے ءَ چہ بیگواھیں مردمانی آجوئی ءِ ھاتر ءَ جھد کنگ ءَ اَنت وھدیکہ دومی نیمگ ءَ شال پریس کلب ءِ دیم ءَ گوستگیں یک دھکے ءَ بیگواھیں مردمانی کھول ھم زھرشانی کنگ ءَ اَنت۔

دومی نیمگ ءَ چار ستمبر ءَ چہ شال ءَ لشکریانی دست ءَ بیگواہ بیتگیں منیب بڑیچ ھم یل بیتگ ءُ لوگ ءَ سربیتگ۔

منیب بڑیچ چار ستمبر ءَ پاکستانی لشکریاں شال سریاب دگ ءِ سر ءَ بلوچستان مزن شھدربرجاہ ءِ دیم ءَ بستگیں میتگ شفیع کالونی ءِ یک لوگے ءِ سر ءَ بیڑ بُرتگ ءُ دزگیر کنگ ءَ پد بیگواہ کُتگ اَت۔

منیب بڑی شال ڈگری کالج ءَ ایف ایس سی ءِ نودربر اِنت۔

نبشتانک: داں کد؟

نبشتہ کار: ابرَم بلوچ

دی بلوچستان پوسٹ

رپت اَنت ھما دور ءُ نوبت کہ بلوچ وتی دودانی رکینگ ءِ ھاتر ءَ دشمن ءِ دیم ءَ چوں البرز ءِ کوہ ءَ مِک بیتگ انت ، رپت اَنت ھا واجھی واھگ کہ پہ مڈا ءُ شان دستار بستگ ءُ چو پھوال ءَ زمین زادگ ءِ پیم ءَ گشتگ ءُ آجوئی ءِ مُرگانی لد ءَ گوں ھم توار بیتگ انت ءُ توار دگہ در ءِ پدر بیتگ ، رپت اَنت ھما نا سرجمیں واھگ کہ وتی ڈیھ ءُ آؤکیں پدریچ ءِ مھکمیں باندات ءِ واستا ودان بیتگ انت ۔

ءُ اے واھگانی گار ءُ بیگواہ ءُ کَل کنوک مئے جِند اِنت ، اھد ءِ مردماں گوشتگ کہ ” وھدے یک راجے وتی ھک ءِ ھلاپ ءَ جنگ نہ کنت آئی ءِ گار ءُ بیگواھی الم اِنت ” بلوچ ءِ انیگیں جاور ھمے پیم ءَ اَنت زلم ءِ ھلاپ ءَ گپ کنگ ءَ مئے دپ پچ نہ بنت وتی باریگ ءِ ودار کنگ ءَ ایں کہ کد اے زوراکیں لشکر ءِ چم مارا سک بہ بنت ءُ وتی زوراکی ءَ مئے کھولانی مردمانی سر ءَ چو آس ءِ بہ گوار ایت نو ما وتی دپاں پچ کنیں۔

شھید ھیات ، شھید ملک ناز، شھید کلثوم، شھید شاہینہ شاھین، شھید تاج بی بی، شھید جلیل پرکانی، شھید یاسر ءُ شھید رامیز ءِ درستانی مرگ پہ سرجمیں بلوچ راج ءَ ھمے کلوہ ءَ دیگ ءَ اِنت کہ انو اگاں نہ گڑا کدی زلم ءُ زالم ءِ ھلاپ ءَ گپ نہ کنیں ءُ داں کد وتیِ ودار ءَ کنیں.

زالم یک برے زلم ءِ آماچ ءُ لگت مالیں کوم ءَ چکاس ایت ءُ وھدیکہ دژمن اے چیز ءَ ٹِک کنت ءُ پھم ایت کہ اے راج گُنگ اِنت زالم ءِ ھلاپ ءَ گپ جت نہ کنت ءُ ترس ءُ بیم ءِ آماچ اِنت گڑا آ وتی زوراکیاں ترند کنت وڑ وڑیں پندل ساز ایت وڑ وڑیں ھنر کنت نپر پہ وت در گیجی کہ اے زلم ءِ تک ءُ پنات گیشتر دراج بہ بنت ءُ ما وتی کار ءُ منزل ءَ گیشتر دیم ءَ رھادگ بہ کنیں۔

اے اولمی رند نہ اِنت کہ مئے دود لگتمال کنگ بیتگ اَنت چادر ءُ چار دیوالی پامال کنگ بیتگ اَنت ازت ءُ ننگ ءِ سر ءَ ارش کنگ بیتگ نوُں ما وت ءَ کجام شرم ءَ بلوچ بِہ لیکیں ؟ بس بلوچ ءِ گوشگ ءَ کس بلوچ نہ بِیت بلوچانی لھتے دود است اَنت راج دپتر ءَ مزن شرپیں نام ءِ واھند است انت کہ مارا پجار دے اَنت ءُ اے سکین ءَ دے اَنت کہ مارا کجام راہ پہ وت در گیجگی اِنت ءُ وھدے کہ بدواہ گوں مارا گُون جَنت گڑا آکبت کجام ھد ءَ داں بہ بیت اے سرجمیں دودانی بُنھشت ءَ مارا یک کُل راجے ءَ یک مشت ءُ ھم گرنچ بوگی اِنت چیا کہ نوں آ دور آ وھد ءُ آ نوبت اتکگ کہ مارا وتی آؤکیں پدریچ ءُ وتی گیرت ، شرپ ءُ ننگ ءُ ناموس ءِ رکینگ ءِ ھاتر ءَ جھد ءِ کاروان ءَ آوار بیگی اِنت ءُ وتا چہ دراھیں زلم ءُ زالم ءَ چہ رکینگی اِنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دوشمبے ءِ روچ ءَ سندھ ءِ بنجاھی شھر کراچی ءِ پریس کلب ءِ دیم ءَ نودربر رھشون شبیر بلوچ ءِ زورانسری آوار جنی ءَ پنچ سال سرجم بوگ ءَ زھرشانی کنگ بوتگ –

بیگواھیں شبیر بلوچ ءِ گوھار سیما بلوچ ءِ گوشگ ءِ پد ءَ چُک ءُ زالبول ورنایاں مزنیں کساسے ءَ بیگواھیں مردمانی اکس زرتگ ءُ زھرشانی ءَ بھر زرتگ – وھدیکہ وائس فار بلوچ مسنگ پرسنز ءُ بلوچ یکجھتی کمیٹی ءَ زھرشانی ءِ پلامرزی کتگ –

زھرشانی ءَ تران کنان ءَ شبیر بلوچ ءِ گوھار سیما بلوچ ءِ گوشگ ات کہ گوستگیں پنچ سالاں وتی برات ءِ یل کنائینگ ءِ ھاتر ءَ زھرشانی کنگایاں – کدی کراچی ءُ کدی شال پریس کلب ءِ دیم ءَ ما پریات کنگائیں بلے مارا انساپ دیگ نہ بیت اِنت –

سیما بلوچ ءِ گوشگ ات کہ وھدیکہ من زھرشانی ءَ پد گِس ءَ واتر باں گڑا منی مات ءُ شبیر ءِ لوگی من ءَ چہ شبیر ءِ وش ءُ سلامتی ءِ ھال پُرسی ءَ کن اَنت – وھدیکہ کہ ما اسلامباد ءَ شُتگیں پاکستان ءِ سروزیر ءَ گوں دچار کپتگ انت گڑا آئی ءَ گوں ما کول کتگ کہ مئے دوستیگیں مردماں یل کنائینیت، بلے مروچی آ کول ءُ کرار بس لبز بوتگ انت آھانی سر ءَ ھچ گامگیج زورگ نہ بوتگ –

آئی ءَ چہ پاکستان ءِ سروزیر ءَ لوٹ کتگ گوشتگ کہ آ وتی کول ءِ سر ءَ بہ اوشتیت ءُ مئے دوستگیں مردماں یل بکنائینیت –

آئی ءِ گوشگ ات کہ شبیر بلوچ ءَ بگیر مئے وشھالی شُتگ – آئی ءَ چہ انسانی ھکانی ادارھاں چہ لوٹ کتگ کہ منی برات ءِ یل کنائینگ ءَ وتی کِرد ءَ پیلو بہ کن انت –

زھرشانی ءَ بیگواھیں ڈاکٹر دین محمد بلوچ ءِ جنک سمی دین بلوچ، بیگواھیں انسانی ھکانی باسک راشد حسین بلوچ ءِ مات، بیگواھیں محمد آصف ءُ رشید ءِ کھول ءَ ھوار دگہ بیگواھیں مردمانی کھولاں بھر زرتگ –
زانگ بہ بیت بلوچ نودربر گل آزات ءِ گوستگیں انفارمیشن سیکرٹری شبیر بلوچ چار اکتوبر سال دوھزار ءُ شانزدہ ءَ پاکستانی پوج ءِ کارمنداں کیچ ءِ دمگ گورکوپ ءَ زورانسری آوارجنی ءَ پد بیگواہ کتگ –

دومی نیمگ ءَ بی ایس او آزات ءِ نیمگ ءَ چاگردی ترامجاہ ٹویٹر ءَ یک کمپئین ءِ برجم دارگ بوتگ کہ سوشل میڈیا ایکٹوسٹس، نودربر گل ءُ بلوچ نیشنل مومنٹ ءَ ھوار دگہ انسانی ھکانی باسکاں بھر زرتگ ءُ بلوچستان ءَ زورانسری آوار جنی ءُ شبیر بلوچ ءِ درگت ءَ ٹویٹ کرتگ – میان استمانی انسانی ھکانی ادارھاں چہ بیگواھیں مردمانی یل کنائینگ ءَ وتی کرد ءُ بلوچستان ءَ انسانی ھکانی پھازگے ھاتر ءَ توار چست کنگ ءِ لوٹ کتگ –

سرجمیں دنیا ءَ نامی ئیں چاگردی رسانکجاہ فیس بک، میسجنگ ایپ واٹس ایپ ءُ فوٹو شیئرنگ ایپلی کیشن انسٹاگرام سروس بند بیتگ –

چاگردی رسانکجاہ ایپس انسٹاگرام، فیس بک ءُ وٹس ایپ تکنیکی ناگیگیانی سبب ءَ ھر سئیں سوشل میڈءا ایپس بند بیتگ اَنت ھالرسانی نہ بیگ اِنت ناکہ کلوہ روگ ءَ اَنت نا کہ آیگ ءَ اَنت وٹس ایپ ءُ فیس بک ڈیسک ٹاپ ءَ ھم کار کنگ ءَ نہ اَنت، وٹس ایپ ھرسئیں کمپنیاں تنی وھدی اے ناگیگی نہ گشتگ –

امریکی ریاست کیلی فورنیا ءَ چلوکیں سرجمیں دنیا ءِ نامی ئیں سائٹ فیس بک ءُ کلوھانی دیم دیگ ءَ درستاں مستریں موبائل ایپلیکشن واٹس ایپ ءُ فوٹو شیئرنگ ایپ انسڑاگرام کارمرد کنوکانی تہ ءَ بلوچستان ءَ سیادی داروکیں مردم لکانی ھساب ءَ اَنت –

بلوچستان لبریشن فرنٹ ءِ جارکش میجر گْوھرام بلوچ ءَ آواران ءَ پاکستانی پوج ءِ چوکیانی سر ءَ بوتگیں اُرشانی زمہ واری منّ اِتگ ءُ گْوشتگ کہ شمبے ءِ روچ ءَ سرمچاراں کولواہ ءِ دمگ بزداد کلی ءَ پاکستانی پوج ءِ چوکی ءِ سر ءَ گوں مزنیں سلاھاں اُرش کرتگ-

جارکش ءَ دیمتر ءَ گْوشتگ یکشمبے ءِ روچ ءَ سرمچاراں کولواہ ءِ دمگ بزداد گند کور ءَ ھستیں پاکستانی پوج ءِ چوکی ءِ سر ءَ وتکار ءُ مزنیں سلاھاں چہ نشانگ کتگ ءُ چریشی ءِ آسر ءَ دشمنیں پوج ءَ مزنیں کچے ءَ جانی ءُ مالی تاوان چست کنگ کپتگ-

میجر گْوھرام بلوچ ءَ دیمتر ءَ گْوشتگ زورگریں پاکستانی پوج سر ءَ مئے اُرش داں بلوچستان ءِ آجوئی ءَ داں برجاہ بنت-

ڈیرہ مراد جمالی ءَ بدکاری ءِ بھتام ءَ تیرگواری ءَ زالبولے ءَ ھوار دو کس بیران، ھزدار ءَ سلاہ بندیں مردمانی تیرگواری ءَ یک مردمے بیران –

ٍڈیرہ مراد جمالی ءَ لوگ واجہ ءَ بدکاری ءِ بھتام ءَ وتی زال ءُ آئی ءِ نام گپتی آشک ءَ ھوار کشتگ ءُ وت ءَ پولیس ءِ دست ءَ داتگ-

گیشیں ھالانی رد ءَ نسیر آباد ءِ دمگ ڈیرہ مراد جمالی ءِ نزیک ءَ اوچ پاور پلانٹ ءَ گوٹھ میر جان مھمد ھان ءَ جرمکار مھمد اسلم ءَ بدکاری ءِ بھتام ءَ تپر ءِ سر ءَ سراپ کرتگ ءُ وتی بیست ءُ ھشت سالی ئیں زال سبحانہ ءُ آئی ءِ ناگتی آشک سںی ءُ پنچ سالی صدر جمالی کشتگ اَنت –

دمگی مردمانی رد ءَ جرمکار ءَ وت ءَ پولیس ءِ دیم ءَ پیش کتگ ءُ کوش منّ اِتگ ءُ دزگیری داتگ-

کُشگ بیتگیں سبحانہ ءِ برات سھراب ھان ءَ ناوشیں کوش ءِ ھال راست کرتگ ءُ کہ تنی وھدی ما گیرت ءِ نام ءَ جنگ بیتگیں بھتام ءِ بارو ءَ ھچ گُشت نہ کن ایں –

ھمے وڑ بلوچستان ءِ دمگ ھزدار ءِ ھند وڈھ ءَ سلاہ بندیں مردمانی تیرگواری ءَ یک مردمے بیران بیتگ، وئیل ءِ ھلاپ ءَ کھول ءَ آر سی ڈی شھدگ بند کرتگ –

کشگ بیتگیں مردم ءِ پجار ڈاکٹر شیر مھمد شیخ مینگل ءِ نام ءَ زانگ بیتگ –

دمگی مردمانی رد ءَ وئیل ھما وھد ءَ پیش اتکگ کہ اے مرد وتی لوگ ءَ چہ بازار ءِ نیمگ ءَ روگ ءَ بیتگ کہ ناشناسیں مردماں تیرانی نشانگ کرتگ ءُ کُشتگ –

وئیل ءِ ھلاپ ءَ کھول ءَ زاھرشانی کنان ءَ شال ءُ کراچی ءَ روکیں مزن شھدگ بند کرتگ –

تنی وھدی انتزامیہ ءِ نیمگ ءَ اے وئیل ءِ بارو ءَ ھچ گپ دیم ءَ نیتکگ اَنت ءُ اے کوش ءِ سبب ھم زانگ نہ بیتگ –

شئیر: نَدر پہ شیرزال ھانی بلوچ ءِ نام ءَ

آبؔد رھشون

دی بلوچستان پوسٹ

کریؔمہ بانُک ءِ اَھد ءِ اَبد ھمراہ
نہ بیت جُھد ءُ تئی رُژن ءِ چراگ بیگواہ

اگاں روکے اے راج ءِ دیدگاں جلّ ایت
اگاں ارواہ ءُ ساھے ملپداں ملّ ایت
شپ ءِ سیاھی گوں روچ ءِ بْرانزے ءَ ھلّ ایت
مدام درپش ایت تئی پگر ءِ گلیں بانگواہ
کریؔمہ بانک ءِ اھد ءِ اَبد ھمراہ

ھمک بازار کہ تُنّیگ ءُ شُدی ڈیھ ءِ
چہ ھون ءَ پُلّ میتاپاں رُدیت ڈیھ ءِ
سِدیت پُلّے بَدن مسکیں کُدیت ڈیھ ءِ
رُدان اِنت تئی گُلیں زانت ءِ گِھیں پیژگاہ
کریؔمہ بانُک ءِ اَھد ءِ اَبد ھمراہ

ھمے آشوب بلان اِنت روت گوں آساں گوں
ءُ جنگ کوھاں بْرھدار اِنت براساں گوں
بلوچ ءِ ھکّ ءِ بیرک گُھار ءُ ماساں گوں
نمیران ئے بلوچ راج ءِ دلی دوزواہ
کریؔمہ بانُک ءِ اَھد ءِ اَبد ھمراہ

لگور اَنت آ کہ ٹاکور ءُ شگانی بنت
شھیدیں ھون رُدنت ءُ چو کہ ھانؔی بنت
اے سُھریں تاک پہ باندات ءَ نشانی بنت
گواہ ءُ شاھد اِنت پاکیں منی اللؔہ
کریؔمہ بانُک ءِ اَھد ءِ اَبد ھمراہ

گُلیں ھاؔنی تئی ھون ءُ زمین ءِ ھاک
جھان ءَ پہ بلوچ ءِ دپتر ءِ بنت تاک
مڑاھاں گوں شُت ئے ھست اِنت تئی گویاک
بہ مار رھشؔون بلوچ مار اَنت کہ درد ءُ آہ
کریؔمہ بانُک ءِ اَھد ءِ اَبد ھمراہ

نبشتانک: نہ سرجمیں ترانے گوں گنجل ءَ

نبشتہ کار: جورکان بلوچ

دی بلوچستان پوسٹ

زندگی چی یے؟ من نہ زان آں
زند گوز ایت ءُ مردم مر ایت، بلئے مردم چون مر ایت؟ انچو گُش انت کہ مرگ گاری یے بل مرگ گاری یے پہ ھمایاں کہ آ چہ مرگ ءَ ترس انت، لھتے مردم مرگ ءِ جند ءَ کُش انت ءُ زندگ بنت۔

مزار تو ھم نمیران بوت ئے، مرگ ءَ را کُشت وت ءَ را راجدپتر ءِ تاکانی تہ ءَ یک کمانڈرے ءِ نام ءَ جاہ دات، داں جھان ھست انت تو ابدمان ئے۔

اے لاگریں ورنا گوں وتی مھر ءُ بچکنداں من ءَ گوں بِھ بے ھیال کنگ نہ بیت، مدام دیستگ ات، تچ ءُ تاگ ءَ ات، شپ تاں روچ کار ءَ ات پہ راج ءُ راجی وشیں باندات ءِ جہد ءَ ات، وتی تنظیم ءُ تحریک ءِ مھکمی ءَ پہ جھد ءَ ات۔ مزار! تئی لاگرئِے ءِ سر ءَ باز براں دل ءَ لوٹ ات ترا چہ جست بہ گِر کہ تو زاناں ورگ نہ ور ئے کہ چو لاگر ئے؟ بلئے من بگندئے گوں تو آ ڈول ءَ ھبر کت نہ کت بلئے مزار ! من ءَ گوں تو گلگ ھست انت، تو شت ئے بلئے تو وتی داتگیں ھادت پمن اشت انت، تئی ھادت نوں منی ھادت جوڑ بوتگ انت، تو مھر ءِ نام ءَ من ءَ چنچو ھادت داتگ تو بگندئے نہ زان ئے ھم تئی داتگیں ھمک مھر من ءَ تئی ترانگاں گیج اَنت مزار ۔

مزار تو گپے زان ئے منی زند ءِ مستریں واھشتاں چہ یک واھشتے ایش اَت کہ من یک برے پد ءَ ترا بگند آں، گوں تو پد ءَ نند ءُ نیادے بکن آں، من ءَ تئی واستا سک زھیر بوتگ، تئی گپانی واستا، تئی مھرانی واستا، بلئے تو من ءَ گوں نیاد ءَ چہ پیسر نمیران بوت ئے۔

نوں تئی ھرچیز پمن یات جوڑ بوتگ انت، ترا یات کنت تو من ءَ گُشتگ اَت کہ” تو وانگ ءَ سک سُست ئے، ترا ویتنام کی جد ءُ جھد (درسگاہ ءِ سیریزے)ءِ وانگ ءَ دو ھپتگ لگ ایت”
ترا سما انت مزار من آ وھد ءَ ششمی کلاس ءَ اتاں ءُ من اردو ءِ وانگ ءَ سک سُست ات آں۔ بلئے تئی ھمے گپ من ءَ دل ءَ اَت، تو زان ئے رند ءَ من ھمے سیریز سئے روچ ءَ ونت ءُ ھلاس کت۔
ءُ تئی گپاں چہ من کتاب ءِ وانگ ھم بندات کتگ ءُ مرچی ھم من یک گالے اگاں وان آں، من ءَ تو گیر کائے چیاکہ تو ھرچ وھد ءَ کہ من ءَ دیستگ ات بس وانگ ءِ بارو ءَ جست کتگ ات، ترا ھرچ وھد ءَ بس وانگ ءِ گم پِر اَت، لیاری ءِ دمکاں تئی بوہ مان اِنت، پتو چنچو زھیر کتگ ایش، بلئے تو پد ءَ اے دمکاں واتر نہ کت، بگندئے زند گْوز ایت ءُ روت گوں ترا نند ءُ نیاد نہ بیت ھم بلئے تو گوں وتی مھراں مدام منی ھمبراہ ئے۔

مزار گوستگیں روچ ءَ بندات ءَ کہ تئی اکس منی دیم ءَ اتک تاں من ھچیگی نہ بوت آں چمانی ارس دارگ نہ بوت انت، بلئے وہدے کہ من سنگتانی اسٹیٹمنٹ (statement) دیست منی ارس وشی ءِ ارس بیت انت، من وتی سر برز کت وت ءَ مبارکی دات کہ من تئی اھد ءَ زندگ آں کمانڈر گنجل، کامریڈ مزار پمّن اے مزنیں ھبرے کہ من گوں تو وھد گْوازینتگ، من تئی سنگتے بیتگ آں، بی ایس او آزات ءِ ھما یونٹ ءَ کہ تو کار کتگ من ھم ھما یونٹ ءَ کار کتگ بلئے مزار تو ھرچ جاہ ءَ وت ءَ را منارینت، سیاست ءِ تہ ءَ ھم جنگ ءِ تہ ءَ ھم، تو سیاست ءِ تہ ءَ ھم استاد ات ئے ءُ جنگ ءَ ھم کمانڈرے۔ تو ھرجاہ مزارے ات ئے، مزارے ئے، مزارے بات ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔