TBP Balochi

کوپا امریکہ ءِ گوازی ءَ برازیل ءُ ایکواڈور یک یک گولے ءَ دیمیگ، پیرو ءَ یک گولے ءَ باج برتگ، یورو کپ ءَ چیک ریپبلکن ءَ دو گول ءُ بلجئیم ءَ یک گولے ءَ باج برتگ –

کوپا امریکہ ءِ گوازی برجاہ انت دوشی شپ ءَ پنچمی راؤنڈ ءِ اولی گوازی برازیل ءُ ایکواڈور ءِ میان ءَ بوتگ ءُ دومی گوازی وینزیلا ءُ پیرو ءِ میان ءَ بوتگ – اولی گوازی ءَ برازیل ءُ ایکواڈور ءِ لیبیاں جوانی ءَ گوازی کنان ءَ ھردو ٹیمانی لیبیاں یک یک گولے اسکور کتگ دؤئیں ٹیم دیمیگ بوتگ انت – ایکواڈور ءِ نیمگ ءَ چہ ایکواڈور ءِ لیبی اینجل مینا ءَ گول اسکور کتگ ءُ برازیل ءِ ٹیم ءِ نیمگ ءَ چہ لیبی ایدِر میلتاؤ یک گولے اسکور کتگ –

وینزیلا ءُ پیرو ءِ میان ءَ بوتگیں گوازی ءَ وینزیلا ءِ نیمگ ءَ چہ ھچ گول کنگ بوتگ وھدیکہ پیرو ءِ لیبی ایندرے کاریلیو ءَ یک گول ءِ اسکور کتگ گوازی وتی نام ءَ کتگ –

کوپا امریکہ ءِ دیم ءِ گوازی یوروگاوے ءُ پیراگاؤ، بلوؤیا ءُ ارجنٹینا ءِ میان ءَ بوگ ءَ انت ـ

دومی نیمگ ءَ یوئیفا یورو کپ فٹبال گوازی برجاہ دوشی شپ نیدر لینڈ ءُ چیک ریپبلک ، بلجئیم ءُ پرتگال ءِ میان ءَ گوازی کنگ بوتگ –

دوشیگیں گوازی ءَ چیک ریپبلکن ءَ نیدرلینڈ ءِ دیم ءَ دو گول، بلجئیم ءَ پرتگال ءِ دیم ءَ یک گولے ءَ باج برتگ-

یوئیفا یورو کپ ءِ شابزدھمی راؤنڈ ءِ سیمی گوازی نیدر لینڈ ءُ چیک ریپبلک ءِ میان ءَ بوتگ کہ نیدرلینڈ ءِ نیمگ ءَ ھچ گول کنگ نبوتگ وھدیکہ چیک ریپبلکن ءَ دو گول داتگ ءُ باج برتگ، چیک ریپبلکن ءِ نیمگ ءَ یک گولے توماس ءَ داتگ دومی گول پاترک ءَ اسکور کتگ گوازی وتی نام ءَ کتگ –

چارمی گوازی بیلجئم ءُ پرتگال ءِ میان ءَ بوتگ کہ پرتگال ءِ نیمگ ءَ چہ ھچ گول اسکور کنگ نہ بوتگ وھدیکہ بیلجئیم ءِ لیبی تارگن ھازرڑ ءَ یک گولے اسکور کتگ گوازی وتی نام ءَ کتگ –

زانگ بہ بیت یوئیفا یورو کپ ءِ شانزدھمی راؤنڈ ءِ تہ ءَ بلجئیم ءُ اٹلی، چیک ریپبلک ءُ ڈینمارک ءِ لیبیاں جوانی ءَ گوازی کنان ءَ وت ءَ کواٹر پائینل ءَ سرکتگ –

یورو کپ ءِ شانزدھمی راؤنڈ ءِ دیمے گوازی کروتیا ءُ اسپین، پرانس ءُ سویزر لینڈ ءِ میان ءَ جتا جتائیں پٹاں بوگی اِنت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ پاکستانی پوج ءِ سر ءَ بیتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں کیچ ءِ دمگ شاپُک ءَ ڈیم ءِ سر ءَ برجاھیں پاکستانی پوج ءِ پانگس ءِ نزیک ءَ آپ بروکیں ٹینکر ءُ پرپٹ تراک ناکیں شوروانی نشانگ کتگ اَنت-

جارکش ءَ گوشت: ٹینکر ءُ یک پرپٹے تراک ناکیں شوروانی زد ءَ اَتکگ اَنت ءُ دو پوجی کارمند ھما دمان ءَ مُرتگ دو سک باز زدگ بوتگ اَنت –

میجر گوھرام بلوچ ءَ گوشتگ کہ اے پانگس چین ءُ پاکستان اکنامک کوریڈور (سی پیک) دگ ءِ پھازگ ءِ ھاتر ءَ جوڑ کنگ بوتگ –

گڈسر ءَ جارکش میجر گوھرام بلوچ ءَ گوشتگ کہ بلوچستان ءِ آجوئی ءَ تاں زورگیریں پوج ءِ سر ءَ مئے اُرش برجاہ مان انت –

بلوچستان ءَ دو ھپتگانی تہ ءَ بازیں کَچے ءَ ورنائیں نودربر آوار جنگ ءُ بیگواہ کنگ بیتگ اَنت-

بلوچستان ءِ دمگ چہ کیچ ءَ سر بیتگیں ھالانی رد ءَ گوستگیں روچ ءَ کیچ ءِ دمگ کلگ ءَ پاکستانی پوج ءَ دو نودربر آوار جنگ ءَ پد بیگواہ کرتگ اَنت –

آوار جنگ بیتگیں نودربرانی پجار شاہ میر ء پیر بکش ءُ فدا ءِ ناماں زانگ بیتگ اَنت –

دمگی مردمانی رد ءَ ھردوکیں ورناہ عطاشاد ڈگری کالج ءِ نودربر اَنت ءُ ھردوکانی اے وھد ءَ چکاس بیگ ءَ اَنت –

زانگ بہ بیت ھمے ماہ ءَ بلوچستان ءَ پاکستانی پوج ءِ بیڑ ءُ زورانسری آوار جنیانی تہ ءَ بازین کچے ءَ گندگ ءَ اتکگ اَنت ءُ ھمے ماہ ءَ بلوچستان ءِ بازیں جاھاں آوارجنیانی ھال شنگ بیتگ اَنت –

سبی ءُ کیچ ءَ پاکستانی پوج ءِ سر ءَ سلاہ بندیں مردماں اُرش کرتگ کم چہ کم چار کارمندانی کُشگ ءِ ھال بیتگ اَنت –

بلوچستان ءِ دمگ سبی ءَ سلاہ بندیں مردماں پاکستانی پوج ءِ سر ءَ اُرش کرتگ ءُ اُرش ءِ آسر ءَ سَے کارمند کُشگ بیتگ اَنت –

سبی ءَ کُشگ بیتگیں کارمندانی پجار ھولدار علی زمان، سپاھی آصف اقبال ءُ زوھیب ءِ ناماں زانگ بیتگ اَنت –

ھمے وڑ ءَ کیچ ءِ دمگ شاپک ءخ پاکستانی پوج ءِ سر ءَ ناشناسیں مردماں بمب تراکے کرتگ ءُ چریشی ءَ یک کارمندے مرتگ ءُ یکے زدگ بیتگ –

تراک ایف سی ءِ واستا آپ پُجارینوکیں گاڑی ءِ سر ءَ کنگ بیتگ کہ اود ءَ گاڑی ءِ ڈرائیور مرتگ –

مرتگیں کارمند ءِ پجار کفایت اللہ ءِ نام ءَ زانگ بیتگ –

زانگ بہ بیت بلوچستان ءَ اے لھتے ادارانی تہ ءَ اے دومی اُرش اِنت کہ پوجی بنشون ءِ رد ءَ چار کارمند کُشگ ءُ سَے زدگ بیتگ اَنت –

زانگ بہ بیت گوستگیں روچاں بولان ءِ دمگ سانگان ءَ پوج ءِ سر ءَ اُرش کنگ بیتگ اَت کہ پنچ کارمند کُشگ بیتگ اِت اَنت آیانی زمہ واری بلوچ لبریشن آرمی ءَ منّ اِتگ اِت اَنت بلے مروچی بیتگیں اُرشانی زمہ واری تنی وھدی ھچ گل ءَ پہ وت ءَ نہ زُرتگ اَنت –

شَیر: بال ءَ بیا کپوت

شائر: آمد سیپ ساجدی

دی بلوچستان پوسٹ

بال ءَ بیا کپوت او چاھی
مناگیر اتک ھانلءِ ھمراھی

زوت بر منی کلوہ ءَ سرکن
دوست ءَ را بہ گوش واترکن

درکپ اوکپوت چہ مئے ھلکءَ
کُوچو ءَ بہ چار تھمبل کن

دیمءَ سر بہ گر گوں بال آں
من نیائین تو بہ دئے ھال آں

گُنکیءَ دہ بجے ٹیمءَ بیا
گونیءَ انگتءَ دیمءَ بیا

نَدگی ئے کاچراں شوکیناں
چار آں کن کوچگ آں دراھیناں

بند ترکوھی تچوکیں جوھاں
دیمءَ کئیت باھڑی گوں وشبوّان

ساھتے تو بہ دار الکاپ ءَ
ترکن بانزل آں چہ نوک آپ ءَ

ھچبر در میا اشتاپ ءَ
اگاں کائے واتری شکر آپءَ

ترا دست آں گوں وتی بال داتگ
بیا چمے شانک بہ دئے رباط ءَ

بالاں بند وتی ایوک ءَ
دیم ءَ بہ دئے وتی چروک ءَ

سُھر دپ مئے تلاہءُ زر ایں
مئے مسکیں زباد سک شر ایں

جست کن ھانلی تو یکو
برو شام ءَ تو بہ دار تاپکو

ادا کس ئے ترا نہ دنت ھانلی سوجءَ
سُھب ءَ سر بہ گر سر ریج ءَ

گِنداری جَمبراں وش بستءَ
بیا تو پوگی ءُ گواراست ءَ

داں ھینارو برو تیگاپ ءَ
رواں کن ھانلی نام ءَ پہ

چیل ئے جنگل آں کوکو کن
گری ءَ تو برو زوت زو کن

جمبر تئی سرءَ ساچان انت
تو کائے واتر ءَ دار دان ءَ

درستیں کوچگ آں وش وش چار
پیگامءَ ھانلی الم بیار

کوچگ بابلی سرسبزآں
وتی کوکوھاں بہ جن وش لبز آں

پہ کوکوھاں بہ جن اپسوزی
بلکیں ھانل ءَ جا ئِے ات دیست

سیل ءِ تو بہ کن جاورجی
کپوت سک دیر انت ترا آ وھدی

اسپکنری انگتءَ دیم ءَ انت
روچ نی جال شُتگ بیگاہ انت

بد رنگ مئے گلیں گلزار انت
پتکنری منی میتگ ءُ بازار انت

شائر تئی کپوت راھچار ایں
اھوال آں بہ دئے تو باریں

آتکے تو کپوت سر بوت ئے
گومن وش ءُ وش ھبر تو بوت ئے

آمد من تئی سلام سر کرت آں
گول ات گریشگءَ دَم برت آں

ساھتے گس دپءَ من نشت آں
دراھیں گپ ھانل ءَ من گُشت آں

من دیست ءَ تئی ھانل ءَ وش گپ ایں
چم آں چست ءَ کنت دل ٹپ ایں

گپ کنت ھبر وش کند انت
من درست کت ھانلیءِ جند انت

ھانل گُش ئے زیبا انت
ماہ ءَ چہ انگت ءَ رُژنا انت

مندریک لنکُکانی مان انت
سرومگ ھانلی چمان انت

وش بو دلبرے زلپانی
منا دیم داتگ برو تئی ءَ

باریں تو نیتکگے ءِ پرچی ءَ
جوابے دات ھانل ءَ زیبا ءَ

آمد من تئی ھمراہ آں
پہ تئی دوری ءَ تباہ آں

آمد تئی وھدءَ آں من بند آں
دیریں اشکتگ درد مند آں

ساھتے من جتگ سوداھی
اچ تو نی نہ بیت جتائی

بہ گوش کائین لازمی تئی شھر ءَ
اچ من تو مہ بر اوپار ءَ

نبشتانک: راج وتی راجی زّبان ءَ چی ءَ رَد نبیسّ ایت

نبشتہ کار : ابدلستار بُگٹی

دی بلوچستان پوسٹ

رَدی وَ بنی آدم ءِ دست ءَ بیت ءُ بنی آدم ءَ مُدام چہ ردیاں دربُرتگ پمیشکا من ءَ ھم رَدی دوست بنت چی ءَ کہ داں وھدے ما رَدی نہ کن ایں ما ھچ دربُرتگ نہ کن ایں۔ اِے ٹَوکاں من نہ گْوشگ ءَ آں بلکیں گیدی ءِ بلاھیں زانتکار ءُ شاھزانت ھم گْوش اَنت انچوشکہ واجہ ھینری پورڈ جاھے ءَ گْوش ایت “بُندری رَدی ھما اِنت کہ ما چہ ھما ردی ءَ ھچ دربرگ ءِ دلگوش نہ کن ایں”
واجہ پاول بیر بریانٹ گْوش ایت “وھدے کہ تو رَدی یے کن ئے گُڑا ترا سَے چیز چَہ ھمے رَدی ءَ دلگوش کنگ لوٹ ایت: وتی رَدی ءَ بہ منّ، چہ ردی ءَ دربر ءُ ردی ءَ دوبار مہ کن”
واجہ بریڈون مُل گْوش ایت “سرپدیں مردم چہ وتی رَدیاں دربر اَنت البت شیوّار چہ دِگر ءِ کُتگیں رَدی ءَ دربرگ ءِ جُھد کن اَنت”
اگاں تو ردی ءِ بستار ءُ ارزِشت ءِ بابت ءَ گیشتریں پٹ ءُ پولے کنگ لوٹ ئے گُڑا چہ گوگل پریام ءَ شوھاز بہ کن گُڑا ردی ءِ بابت ءَ اود ءَ ھم ترا بازیں سرپدی یے رس ایت۔ البت ترا اود ءَ ھم ھمے یکیں سرپدی رس ایت کہ ردی دربرگ ءِ بُندری پادینک اِنت بزاں نودربری ءَ بِہ گر داں شاھزانتی ءَ ردی بنی آدم ءِ ھمراہ اِنت ءُ بنی آدم مُدام ءُ یکشل ءَ چہ وتی رد کُتگیناں دربرگ ءِ جُھد ءَ انت۔

نی ما وتی نبشتانک ءِ سر ءَ کا این ءُ گپ کن ایں مئے راجی زُبان بلوچی چی ءَ رَد نبیسّگ بیت؟! مارا یک ٹوکے ءِ سر ءَ تچک بیگ لوٹ ایت کہ دنیا ءِ توک ءَ تھنا ھما راجانی زُبان دیمروئی کنات وھدے کہ آ وتواجھیں راج ءِ زھگیں نودربر ءُ پدریچ وتی راجی زُباناں وت ماں وانگجاھاں وان اَنت، راجی زُبان ءِ روتاک، ماھتاک ءُ گِندگُش ءِ وڑیں آسراتی بہ بنت پد ءَ مرچیگیں زمانگ ءَ ھر راج ءِ وانِندگیں مھلوک ماں گْوانکواں پہ کلوہ، ٹپال ءُ گپ ءُ رپ ءَ وتی جِند ءِ زُبان ءَ کارمرز بہ کن اَنت۔ بلے پہ بلوچ راجی زُبان ءِ دیمروئی ءَ اِے آسراتی نیست ناں کہ بلوچ راج ءَ ماں وانگجاھاں جِند ءِ راجی زُبان وانینگ بنت ءُ ناں کہ پہ براھوھی ءُ بلوچی ءِ دیمروئی ءَ آسراتی یے ھست ءُ نَیکہ بلوچ راج ءِ تہ ءَ ھم چوشیں سرپدی ءُ آگاھی یے ھست کہ ما گْوانکو آنی تہ ءَ وتی راجی زُبان ءِ آبیکدار ءُ بزانت بلد ءَ ایرگیج ءُ کارمرز بہ کن ایں۔

البت ما راج ءَ یک سرپدی یے اَلم گْوشگ لوٹ ایں مارا وتی راجی زُبان رکینگ لوٹ ایت کہ مئے راجی زُبان ءِ زگریں گال گار ءُ بیگواہ مہ بنت۔ مارا وتی راجی زُبان وت وانگ ءُ زانگی انت ءُ پد ءَ کم کم ءَ دربرگ ءُ نبیسّگی انت۔ توری رَد ھم نبیسّ ایں بلے پد ءَ وت کم کم ءَ وت ھیل گِر ایں۔ راجی زُبان ءِ وانگ ءُ زانگ ءِ وھد ءَ مارا ھر چیز ھورت چارگی انت گُڑا ما چیزے دربر ایں۔ انچوشکہ دنیا ءِ ھر زُبان ءَ نامگال(Noun)، پنامگال(Pronoun)، کارگال(Verb)، کُمکّار گال(Helping Verb or Modal verbs)، ستاگال(Adjectives) ءُ تپور گال(Preposition) ءِ وڑیں رھبند چیز بنت۔ اگاں ما وتی راجی زُبان ءِ اِے چیزاں سرپد بوتگ ایں گُڑا بزاں ما وتی راجی زُبان ءَ وت سے روچ ءِ تہ ءَ زان ایں البت پد ءَ پہ ھیل کنگ ءَ مارا وانگ ءُ نبشتہ کنگ لوٹ ایت۔

انچوشکہ ما دْراہ سرپد ایں کہ بلوچی مئے راجی پجّار اَنت ءُ چہ زُبان ءِ وانگ ءُ نبیسّگ ءِ برکت ءَ سرجمیں راج ڈیھ دوست ءُ راجدوست بنت پمیشکا مرچاں بازیں بلوچ برات ءُ گْوھار پہ راجی زُبان ءِ دیمروئی ءَ ماں وٹس ایپ، ٹیلی گرام، پیسبُک ءُ دگہ دامگی پریاماں کار ءَ اَت۔ ھر کس راجی زُبان ءَ وت دربرگ ءُ دیم ءَ ھم وانینگ ءِ جُھد ءَ انت چریشی ءَ ما دْراہ زیت راجی زُبان ءَ وت وان این ءُ دربر ایں بلکیں پد ءَ دیم ءَ ھم وتی سْیاد، وارس، دزگْوھار ءُ سنگتاں راجی زُبان ءِ بارہ آگاھی دے ایں کہ ھر کس وتی گْوانکو آنی راست کارمرزی ءَ راجی زُبان ءِ نبشتہ ھیل کُت کنت۔

البت پہ بلوچی نبشتہ دربرگ ءَ من شُمارا یک سوج دیگ لوٹ آں کہ چوناھیگا ما دْراہ وَ بلوچ ایں پمیشکا ما دْراہ وتی ماتی ءُ راجی زُبان ءِ وانگ ءُ سرپد بیگ ءَ زبر ایں۔ گُڑا ما ءُ شُما لھتیں روچاں بلوچی نبشتانک، آزمانک ءُ گْوشکنداں وانان کن ایں، بزاں شُما ھم یک انچیں دابے ءَ بلوچی نبشتانک، آزمانک ءُ گْوشکنداں بہ وان اِت کہ شُما وت استاد اِت بزاں انچو نبشتھاں ھورت ءُ دلگوش ءَ وان اِت کہ شُما چَہ نودربرانی نبشتھاں ردیِاں چارگ ءَ اِت۔

بلے بَے (شَرت) ایش انت کہ ما ھر کسے پیسر ءَ وت راجی زُبان ءِ درونتاں سرجمی ءَ بہ وان ایں بزاں ما پیسر کارگال، کُمکّار گال ءُ ستاگال وڑیں چیزاں جْوان سرپد بَہ ایں۔ بزاں یکبرے بلوچی درونتانی وانگ ءَ رَند تو انچیں دابے ءَ بلوچی وانان کن کہ تو چہ نبشھاں نزوریاں چارگ ءُ رَدیاں پٹگ ءَ ئے گُڑا ھمے داب ءَ تو زیت دربر ئے۔ چریشی ءَ مستریں پائدگ ایش انت کہ ترا مُدام بلوچی درونت تاجگ بنت۔

منی راج ءِ بْرات ءُ گْوھاراں ما اُمیت کن ایں کہ شُما زیت وتی راجی زُبان ءِ نبشتہ دربر اِت چوناھیگا شّما وت بلوچ اِت پمیشکا پہ شُما بلوچی نبشتہ دربرگ ھچبر اڑ ءُ اڑاندے نہ بیت۔ بس ما اشتاپ مہ کن ایں ھمے ھیالداری بہ کن ایں کہ ھر چیزے ما نبیسّگ ءَ ایں گُڑا ما وت ھم ھمے نبشتگیں چیزاں دو سے رند ءَ چمشانک بہ دے این ءُ وتی نبشتہ رَدیاں وت کَشان کن ایں چی ءَ کہ ھر زُبان ءِ ندکار ءُ نبشتہ کار نبیسّگ ءِ وھد ءَ اشتاپیگ نہ بنت بلکیں دو سَے رند ءَ وتی نبشتگیں گالرِداں وت وانان ءُ وتی رَدیاں راست کن اَنت ھمے داب ءَ مارا چہ وتی رَدیاں دربرگ لوٹ ایت ءُ پہ راجی زُبان ءِ دیمروئی ءَ مارا وت جُنزان کنگی اِنت چی ءَ کہ اے مئیگ ءُ شُمئے راجی زمہ واری اِنت کہ ما راج ءَ سرپد کنان ءَ بلوچی وت دربر ایں ءُ وتی راج ءَ ھم وانین ایں کہ مئے بلوچ راجی زُبان ءَ ھم گیدی ءِ دگریں زُبانی ڈول ءَ دیمروی بہ رس ایت۔

بلوچ شالا میزران بات اَنت، راج شالا مُدام وتی راجی زُبان وانان ءُ راجدوست بہ بات اَنت ءُ راجی زُبان شالا دیمرویاں سربات۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ بنجاھی شھر دُزاپ ءَ ایرانی آمید گس ءِ پرمان ءَ سَے بندیگیں بلوچ پاھو دیگ بیتگ اَنت –

ایرانی آمیدگس وھد وھد ءِ سر ءَ سیستان و بلوچستان ءَ بندوکیں مردماں پاھو دیگ اِنت کہ اشانی ھال رسانکدراں شنگ ءُ تالان بیتگ اَنت –

بلوچ کمپین فعالین ءِ گوشگ اِنت کہ ایرانی آمید گس ءَ سَے بندیگیں بلوچ پاھو داتگ اَنت کہ آیانی تہ ءَ یکے ءِ پجار عبدالحمید قنبرزئی ء ابراھیم جھمنند چشمہ زیارت ءِ نام ءَ زانگ بیتگ کہ دگہ کسانی پجار نہ بیتگ اَنت –

بلوچ کمپین فعالین ءِ گوشگ اِنت کہ اے مردم دو سال پیسر ایرانی لشکر ءَ گپتگ اَنت ءُ دزاپ ءَ بندیگ کرتگ اَنت –

ایرانی رسانکدر ءِ رد ءَ اے مردمانی سر ءَ بھتام بیتگ کہ دزاپ کلانتری ھبدہ ءَ دو پاسدار کُشتگ اَنت –

بلوچستان ءَ بندوکیں انسانی ھکانی باسک ایرانی لشکر ءِ گپاں رد کنگ ءُ گوشگ ءَ اَنت کہ وتسریں بھتامانی رد ءَ لس مردماں پاھو دیگ اِنت –

ایرانی آمیدگس ءَ لس مردمانی پاھو دیگ ءَ ایران ایمنسٹی ءَ ھم باز براں ایرانی آمیدگس ءِ سر ءَ ایراد گپتگ ءُ گوشتگ کہ آمیدگس مردمانی پاھو دیگ ءَ بند بہ کنت –

یوئیفا یورو کپ فٹبال گوازی ءِ شانزدھمی راؤنڈ دوشی شپ ویلس ءُ ڈینمارک، اٹلی ءُ آسٹریا ءِ میان ءَ گوازی کنگ بوتگ –

دوشیگیں گوازی ءَ اٹلی ءَ دو گول ءُ ڈینمارک ءَ چار گول ءَ باج برتگ ءُ وت کواٹر پائینل ءَ جاہ داتگ –

یوئیفا یورو کپ ءِ شانزدھمی راؤنڈ ءِ اولی گوازی ویلس ءُ ڈینمارک ءِ میان ءَ بوتگ کہ ویلس ٹیم ءِ نیمگ ءَ ھچ گول اسکور کنگ نبوتگ وھدیکہ ڈینمارک ءِ لیبیاں جوانی ءَ گوازی کنان ءَ چار گول داتگ ءُ باج برتگ، ڈینمارک ءِ نیمگ ءَ دو گول ڈینمارک ءِ لیبی کاسپر ڈولبرگ ءَ داتگ ءُ یکے جوکم مھیلی ءُ یک گول ءِ مارٹین ءَ اسکور کتگ باج برتگ ءُ گوازی وتی نام ءَ کتگ –

دومی گوازی اٹلی ءُ آسٹریا ءِ میان ءَ بوتگ آسٹریا ءِ نیمگ ءَ چہ یک گول ءِ اسکور کنگ بوتگ کہ آسٹریا ءِ لیبی ساسا ءَ داتگ وھدیکہ اٹلی ءِ لیبی فیڈیریکو ءُ میتیو ءَ یک یک گول ءِ داتگ ءُ باج برتگ ءُ گوازی وتی نام ءَ کتگ –

یورو کپ ءِ دیمے گوازی نیدرلینڈ ءُ چیک ریپبلک، بیلجئم ءُ پرتگال ءِ میان ءَ جتا جتائیں پٹاں بوگی اِنت –

سربوتگیں ھالانی رِد ءَ بلوچستان ءِ دمگ پنجگور ، ھب ، گڈانی ءُ لورلائی ءَ تیرگوری ءُ دگہ وئیلاں کسانیں زھگ ءَ ھوار سَے مردم بیران بوتگ انت-

گیشیں ھالانی رِد ءَ بلوچستان ءِ دمگ پنجگور ءَ تیرگواری ءِ وئیل ءَ یک مردم ءِ بیران بوتگ –

تیرگواری ءِ وئیل پنجگور ءِ دمگ گوارگو ءَ دیم ءَ اتکگ بیران بوتگیں مردمے پجار عمران ء خدابکش ءِ نام ءَ بوتگ – دمگی مردمانی گوشگ انت کہ اے مرد ءِ سیادی گوں سرکاری چِرکانی ٹولی ءَ گوں بوتگ بلے دنیگت ءَ کوش ءِ درگت ءَ ھچ وڑیں سرپدی نہ رس اتگ –

زانگ بہ بیت پاکستانی پوج ءُ چیریں ادارھانی سر ءَ ھمے الزام جنگ بیت انت کہ آھاں بلوچستان ءِ تہ ءَ بازیں سلاہ بندیں ٹولی جوڈ کرتگ اَنت کہ دمگی مردم آھاں ڈیت اسکواڈ ءِ نام داتگ اے ٹولیاں گوں ھمگرنچیں مردمانی کوش ءِ زمّہ واری چدوپیسر گیشتر بلوچ آجوئی لوٹوکیں سلاہ بندیں گلاں منّ اِتگ انت بلے دنیگت ءَ ایشی ءِ کوش ءِ زمّہ واری ھچ گل ءَ نہ زرتگ –

دومی نیمگ ءَ ھب مری گوٹ ءَ آپ ءِ کنڈ ءِ تہ ءَ جون ءِ دست کپتگ ایدھی بنشون ءِ رِد ءَ ھب گجرا میرا مری گوٹ ءَ دہ روچ پیسری جون ءِ دست کپتگ – ایدھی ءِ کارمنداں جون درکتگ ءُ نادراھجاہ ءَ سر کُتگ جون پجار دنیگت ءَ نبوتگ اے درگت ءَ گیشیں پٹ پول برجاہ انت –

دگہ وئیل ءِ گڈانی ءَ دیم ءَ اتکگ ورناھے کوہ ءِ سر ءَ چہ زِر ءَ کپتگ ءُ بُڈیتگ –

ریسکیو ءِ رِد ءَ شمبے ءِ روچ ءَ گڈانی زِر ءَ سیل سواد ءَ سواد ءَ اتکگیں ورناھے کوہ ءِ سر ءَ چہ لگشتگ ءُ زِر ءَ کپتگ ءُ بڈیتگ – پنچ ادار ءَ پد زِر ءِ چولاں ورناھے جون چہ زِر ءَ ڈن درکتگ –

بیران بوتگیں ورنا ءِ پجار عابد خان ءِ شیرخان جھمنند کراچی بلدیہ اتھاد ٹاؤن ءِ نام ءَ بوتگ کہ وتی دگہ سنگتانی ھمراھی ءَ سیل سواد ءَ اتکگ بوتگ – آئی جون آر ایچ سی شیخ آباد گڈانی نادراہ جاہ ءَ برگ بوتگ اود ءَ اژدری چار ءُ ٹپاس ءَ پد کھول ءِ ھوالگ ءَ دیگ بوتگ –

ھمے وڑ لورلائی ءَ کسانیں زھگے بور ءِ چات ءَ کپتگ ءُ بیران بوتگ –

ھالانی رِد ءَ لورلائی ءِ دمگ زڑہ نالی میختر ءَ سَے سالی ئیں جنکوے بور ء چات گور ءَ گوازی کنان ءَ چات ءِ تہ ءَ کپتگ ءُ بیران بوتگ – لورلائی ءَ چہ رزاق کروٹی ءُ دمگی مردماں وتی کمک ءِ وت سَے ادار ءَ پد زھگ ءِ جون اش درکتگ –

کیچ ءَ پوجی آپریشن ءِ میان ءَ سَے کس آوار جنی ءَ پد بیگواہ کنگ بیتگ اَنت، پنجگور ءَ سلاہ بندیں مردماں یک مردمے آوار جتگ –

بلوچستان ءِ دمگ کیچ ءَ سر بیتگیں ھالانی رد ءَ گومازی ءَ مروچی پاکستانی پوج ءَ لشکر کشی ءِ وھد ءَ سَے کس آوار جتگ ءُ بیگواہ کرتگ اَنت –

آوار جنگ بیتگیں مردمانی پجار اُمیر ء داد مھمد، واجو ء ھبیب ءُ روزیگ ء مراد مھمد ءِ ناماں زانگ بیتگ اَنت –

دمگی مردمانی رد ءَ اُمیر ءِ برات نائب پیسر ءَ پوج ءَ آوار جتگ ءُ برتگ ھم پوج ءَ آوار جتگ ءُ بیگواہ کرتگ کہ تنی وھدی بیگواہ اِنت –

ھمے وڑ ءَ پنجگور ءِ دمگ تسپ غریب آباد ءَ سلاہ بندیں گاڑی سواریں مردماں عامر ء داد جان آوار جتگ ءُ گوں وت برتگ –

دمگی مردمانی رد ءَ عامر ھما وھد ءَ سلاہ بندیں مردماں آوار جتگ ءُ برتگ کہ دکان ءِ دپ ءَ نندوک بیتگ –

زانگ بہ بیت چیزے وھد بیت کہ بلوچستان ءَ اے وڑیں وئیل درپیش بیگ ءَ اَنت گوستگین روچاں کیچ ءِ بنجاھی شھر تربت ءَ گھوڑا چوک ءَ سلاہ بندین مردماں مھمد موسیٰ ء مھمد امین آوار جتگ ءُ برتگ –

چریشی ءَ تربت ڈاکی بازار آبسر ءِ جھمنندیں ھمیدہ بی بی ءَ تربت پریس کلب ءَ تران کنان ءَ گوشتگ کہ آئی ءِ بیست سالی ئیں زھگ ھسن ء شاہ میر سَے روچ پیسر آوار جتگ ءُ بیگواہ کرتگ –

ھمے رنگیں وئیلے نصیر آباد ءِ دمگ بختیار آباد ءِ جھمنندیں مھمد نواز ءَ وتی زال ءِ ھمراھی ءَ اے گپ پدر کرتگ کہ آئی ءِ جنکیِں چُک لمی گوستگیں روچاں لھتے زورامنداں آوار جتگ ءُ برتگ کہ تنی وھدی ھچ ھال نیست کہ آ کجا ءَ اِنت –