TBP Balochi

شائر: شیھک شاہ

دی بلوچستان پوسٹ

ھال ءِ ترگ اِنت بازار ءَ
جان داتگ گُلیں بچار ءَ
نودان گونگیں بیلار ءَ
نوشکی ءِ یلیں شیرار ءَ
جُھدے مُھکمیں جُھدکار ءَ
دمکاں لیاری ءِ ما گرداں
نازیناں وتی بامرداں
گنجل پُلگدیں سالونکاں
چمانی وتی من روک آں
پُلیں آ نزیر چمروک ءَ
دوستیں فیصل ءِ دیدوک ءَ
یات کاراں کلیم جان ءَ من
گیر کاراں یلیں ریھان ءَ
کُربان پہ چُشیں بچان ءَ
جانان ءَ دیاں کندان ءَ
کُربان پہ بلوچستان ءَ
ندر بوتگ اَنت پہ ماتان ءَ
پھراں پہ شُما بنداں من
بشی جمبراں گرنداں من
پیش داشتگ بلوچاں راھے
کرتگ چاردھی روک ماھے
نزیک کرتگ نوں بانگواھے
شھیدی بات مبارک بیلاں
مارا ترانگوں نوں نیلاں
چمانی مئے ارس کیلاں
لوٹاں کہ بہ داراں ارساں
دارگ ارس نہ بنت چمانی
کُربان بچ بوت اَنت ماتانی
اللہ گوں ترا یک ارزے
جنگ اِنت مئے سرا اِے پرزے
بیلانی کُمک بو مولا
لوٹ اِنت آجوئی بچانی
واھگ اِنت منی ماتانی
شیھک ءِ یلیں براتانی
آجو کن بلوچستان ءَ
آجو کن بلوچستان ءَ

اوگانستان ءِ پرگینگ نمروز ءَ سلاہ بندیں مردماں اُرش کُتگ ءُ دو بلوچ پناگیر ٹپی کُتگ اَنت۔

راج دوستیں گل بلوچ ریپبلکن پارٹی ءِ بنجاھی جارکش شیر مھمد بگٹی ءَ رسانکدر ءَ شنگ کُتگیں کسانیں درشانے ءِ تہ ءَ گُشتگ کہ پاکستانی چیریں گلانی کارمنداں اوگانستان ءِ شھر نمروز ءَ بگٹی پناگیرانی سرءَ اُرش کُتگ۔ اُرش ءِ سوب ءَ دو مردم ٹپی بیتگ اَنت۔

آئی ءَ گُشگ اَت کہ ما اوگانستان ءِ انیگیں سرکار ءَ چہ لوٹ کنیں کہ آ پناگیرانی پھازگ ءَ باوری بہ کن اَنت، اے اُرش بلوچ ءُ پشتون ربیدگانی ھلاپ اِنت۔

زانگ بہ بیت اے اولی وئیل نہ اِنت کہ اوگانستان ءَ بلوچ پناگیر نشانگ کنگ بیتگ اَنت چہ اِشی ءَ پیسر ھم بلوچ پناگیر اوگانستان کندھار پرگینگ ءَ نشانگ کنگ بیتگ اَنت۔

ھمے سال ءَ اپریل ءِ ماہ ءَ اوگانستان ءِ سیمسری دمگ اسپین بولدک ءَ سلاہ بندیں مردماں تیر گواری کُتگ اَت ءُ چار بگٹی پناگیر کُشتگ اِت اَنت، جنگ بیتگیں مردمانی پجار غلام نبی ء ترونگ علی بگٹی، جنگی ء درمان بگٹی، سکا ء دین مھمد بگٹی ءُ امیر جان ءُ روستم بگٹی ءِ نام ءَ بیتگ اِت اَنت۔

چہ اِشی ءَ پیسر گوستگیں سال ءَ 20 دسمبر ءَ کندھار شھر ءَ سلاہ بندیں مردمانی تیرگواری ءَ دو بگٹی پناگیر بیران بیتگ اَت کہ اشانی پجار گل بھار بگٹی ءُ آئی چُک مراد علی بگٹی ءِ نام ءَ بیتگ اَت۔

اوگانستان ءِ جتاھیں دمگانی تہءَ اے وھدءَ بلوچستان ءَ چہ لڈاتگییں ھزارانی کچ ءَ پناگیر جھمنند اَنت۔

گوستگیں روچانی تہءَ یک نیمگ ءِ پاکستانی پوج ءَ بلوچستان ءِ تہءَ مزنیں کساس ءَ بیڑ برگ بندات کُتگ ھمے ردءَ دومی نیمگ ءَ چہ بلوچستان ءَ ڈن سیاسی جھدکار ءُ بلوچ جُنز ءِ دوزواھاں نشانگ کنگ ءَ اَنت۔

بیگواھیں بلوچانی یل کنائنگ ءِ ھاتر ءَ جھد کنوکیں گل وائس فار بلوچ مسنگ پرسنز ءَ بیگواھیں شبیر بلوچ ءِ یل کنائنگ ءِ ھاتر ءَ بیوکیں زھرشانی ءِ ھمراہ داری کُتگ ۔

وتی شنگ کُتگیں درشان ءِ تہ ءَ آیاں گُشتگ کہ بیگوائیں شبیر بلوچ ءِ بیگواھی ءَ پنچ سال سرجم بیگ ءِ درگت ءَ بیوکیں زھرشانی ءِ وائس فار بلوچ مسنگ پرسنز ھمراہ داری ءِ جار ءَ جنت ءُ مھلوک ءَ بھر زیرگ ءِ دزبندی کنت۔

وائس فار بلوچ مسنگ پرسنز ءِ جارکش ءَ یک پریس ریلیز ءِ تہ ءَ لس مردماں چہ دزبندی کنان ءَ گُشتگ کہ چار اکتوبر دوھزار ءُ شانزدہ ءَ چہ کیچ ءَ زورانسری آوار جنی ءِ آماچ بیتگیں نودربر شبیر بلوچ ءِ بیگواھی ءَ پنچ سال سرجم بیگ ءِ سر ءَ کھول ءِ زھرشانی ءَ مردم جوانی ءَ بھر بہ زور اَنت۔

جارکش ءَ گیشتر گُشتگ کہ اسلام آباد ءَ پاکستانی سر وزیر عمران خان ءَ شبیر بلوچ ءِ گوھار سیما بلوچ ءَ باوری داتگ بیتگ کہ آئی ءِ برات ءَ ھوار ایندگہ بیگواھیں مردم زیت ءَ زیت یل کنائنگ بنت بلے واجہ عمران خان ءَ ھچ چُشیں گام نہ زرتگ کہ چہ اشاں بیگواھیں مردم یل کنگ بہ بنت ءُ کھول چہ اے درد ءُ اندوھاں بہ رک اَنت-

وائس فار بلوچ مسنگ پرسنز ءِ جار کش ءَ دیمترا گُشتگ کہ بیگواھیں مردمانی جیڑہ وت یک جیڑگی جیڑہ اِنت ءُ نوں اَے جیڑہ مزن بیان اِنت استانی گلاں لوٹ ایت کہ سنجیدگی ءِ درشانی ءَ بہ کن اَنت ءُ بیگواھیں مردماں دیم ءَ بیار اَنت۔

یاد بہ بیت شبیر بلوچ پنچ سال پیسر کیچ ءِ میتگ گورگوپ ءَ چہ پاکستانی لشکریاں آئی ءِ لوگ بانک ءِ دیم ءَ دزگیر کنگ ءَ پد بیگواہ کُتگ اَت کہ داں انگت بیگواہ اِنت۔

شبیر بلوچ وتی بیگواھی ءِ وھد ءَ بی ایس او آزاد ءِ انفارمیشن سیکرٹری بیتگ، ءُ آئی ءِ یل کنائنگ ءِ ھاتر ءَ چہ ھما روچاں بگر داں مروچی شبیر ءِ گوھار ءُ لوگ بانک زھرشانی کنگ ءَ اَنت۔

پلے آف ءِ ھاتر ءَ کوالیفائی کنوکیں ٹیم بنگلورو اے سیزن ءِ سیمی ٹیم جوڑ بوتگ اے رندی چمپئین چنئی سپر کنگس ءُ آئی ءَ پیش ھژدہ ھژدہ پؤنٹسانی ھمراھی ءَ دھلی کپیٹلسٹ ٹیم ءَ پلے آف ءِ تہ ءَ وت ءَ جاہ داتگ –

شارجہ ءَ گوستگیں روچ ءَ یکشمبے ءَ بوتگیں گوازی ءَ آر سی بی ءَ پنجاپ کنگز شش رن ءَ پروش داتگ – بنگلورو ءِ آل راؤنڈر گلین میکسویل ءَ پنجاہ ءُ ھپت رن ءِ جوانیں اننگز کمک ءَ بیست اوور ءِ ھپت وکٹانی تاوان ءَ یک سد ءُ شست ءُ چار رن جوڑ کرتگ – بلے انگت مینک اگروال پنجاہ ءُ ھپت بزاں نیم سنچری کنگ ءَ ابید پنجاپ ءِ ٹیم شش وکٹانی تاوان واری ءِ یک سد ءُ پنجاہ ھشت رن ءِ جوڑ کرتگ – آر سی بی ءِ اسپنر یجویندر چھل ءَ جوانی ءَ گوازی کنان ءَ سَے وکٹ گپتگ –

یک سد ءُ شست ءُ پنچ ءِ ٹارگٹ دیم ءَ کپٹن کے ایل راھل ءُ مینک اگروال پنجاپ بندات ءَ مھکم کتگ – ھردوکاں نود ءُ یک رن جوڑ کرتگ – راھل ءَ سِی ءُ پنچ بالاں یک چوکائے ءُ دو چکائے کمک ءَ سِی ءُ نھ رن جوڑ کرتگ پد ءَ یجویندر چھل نکولسن دیودت دست ءَ کَیچ کنائینتگ – پنجاپ ءِ سیمی وکٹ یک سد ءُ چاردہ اسکور ءِ سر ءَ کپتگ وھدیکہ مینک چھل ءِ بال ءَ سراج ءِ دست ءَ کیچ بوتگ – مینک ءَ وتی اننگز ءِ تہ ءَ چِل ءُ دو بالاں شش چوکا ءُ دو چکا جتگ –

پنجاپ ءِ نیمگ ءَ ایڈن مارکرم بیست، شارخ خان شانزدہ ءُ ہینریکس ناٹ آوٹ بوتگ ءُ دوازدہ رن جوڈ کتگ –

یجویندر چہل بنگلورو واست ءَ درساں چہ سوبمندیں بالر بوتگ کہ آئی ءَ چار اوور ءَ بیست ءُ نھ رن داتگ ءُ سَے وکٹ گپتگ جارج گارٹن ءُ شہباز احمد ءَ یک یک وکٹ گپتگ –

دومی نیمگ ءَکے کے آر ءَ سن رائز حیدرآباد شش وکٹانی تاوان ءَ پروش داتگ –

سن رائز حیدرآباد ءَ یک سد ءُ پانزدہ ٹارگٹ داتگ ءُ کولکتہ نائٹ رائیڈرز ءَ ٹارگٹ پروشتگ ءُ یک سد ءُ نوزدہ رن جوڑ کرتگ ءُ باج برتگ –

بلوچ یکجھتی کمیٹی ءَ بلیدہ ءَ سی ٹی ڈی ءُ پولیس ءِ نیمگ ءَ کسانیں رمیز خلیل تیرگواری ءِ نشانگ کنگ ءِ وئیل ءَ گوں تُرندیں لبزاں ایر کتگ ءُ گْوشتگ کہ بلوچستان ءَ ھمَکروچ بلوچاں بے راہ راھبندی ءَ کُشگ اَنت – بلیدہ ءَ یک لوگے ءَ بیڑبرگ ءِ وھد ءَ کسانیں زھگانی سر ءَ تیرگواری کنگ ءِ ھد ءَ چہ گیشیں زوراکی ءِ ، بلوچ دودمانانی لگمتال کنگ ءَ گوں تُرندیں لبزاں ایر جن ایں – اے وڑیں وئیل بلوچستان ءَ بے راہ راھبندی ءِ پدریں نشانی اِنت-

جارکش ءَ گْوشتگ سرجمیں بلوچستان ءَ انسانی ھکّانی پادمالی ءِ تہ ءَ گیشی پیداگ اِنت – کسانیں رمیز خلیل بے دردناکیں کوش ءُ کسانیں رایان ءَ ٹپی کنگ بلوچستان ءَ زُلم ءُ زوراکیانی پدریں نشانی اِنت – اے وڑیں وئیلاں چہ زانگ بیت کہ بلوچستان ءَ پوج داں کجام ھد ءَ راھبند ءِ پاسداری کنگ ءَ اِنت – اے اولی وئیل نہ اِنت بلکیں اشی ءَ چہ ساری ھم چُشیں وئیل بوتگ کہ اود ءَ کسانیں زھگ نشانگ کتگ اَنت- بلیدہ ءِ بوتگیں جنگی جرمانی تہ ءَ ھوار بیت – دو ڈیھانی میان ءَ جنگ ءُ چوپاں ھم چُکاں نشانگ کنگ جنگی جرمانی تہ ءَ ھوار بیت بلے بلوچستان ءَ پوج ھرچ وڑیں زُلم ءُ زوراکی کنگ ءِ سرجمی ءَ اجازت اِنت-

بلوچ یکجھتی کمیٹی بلیدہ وئیل ءَ ھوار سرجمیں کارندھاں سزا دیگ ءِ لوٹ کتگ ءُ گوں ھکومت ءَ دزبندی کتگ کہ کسانیں رمیز خلیل ءُ رایان ءِ نشانگ کنوکیں کُتکار کانون ءِ دست ءَ بیار اَنت ءُ گوں تُرندی ءَ سزا دیگ بہ بنت –

پریمئیر لیگ فٹبال گوازی برجاہ یکشمبے روچ ءَ ٹوٹنہم ءُ آشٹن ویلا، ویسٹ ہیم ءُ برینٹ فورڈ، کرائسٹل پلیس ءُ لیسسٹر سِٹی ، لیور پول ءُ مانچسٹر سٹی ءِ میان ءَ گوازی کنگ بوتگ-

گوازی ءَ ٹوٹنہم ءُ برینٹ فورڈ ءَ دو دو گول ءَ باج برتگ ءُ وھدیکہ کرائسٹل پلیس ءُ لیسسٹر سِٹی ، لیور پول ءُ مانچسٹر سٹی ءِ دو دو گول ءَ دیمیگ بوتگ انت –

پریمئیر لیگ گوازی ءَ ٹوٹنہم ءُ آشٹن ویلائے میان ءَ بوتگیں گوازی ءَ ٹوٹنہم ءَ دو گول اسکور کُتگ وھدیکہ آشٹن ءِ نیمگ ءَ یک گول ءِ اسکور کنگ بوتگ – ٹوٹنہم ءَ دو ءَ باج برتگ گوازی وتی نام ءَ کتگ –

ویسٹ ہیم ءُ برینٹ فورڈ میان ءَ بوتگیں گوازی ءَ ویسٹ ہیم ءَ باج برتگ – برینٹ فورڈ ءِ نیمگ ءَ یک گول ءِ اسکور کنگ بوتگ وھدیکہ ویسٹ ہیم ءَ دو گول اسکول کتگ گوازی وتی نام ءَ کتگ –

پرائمیر لیگ ءَ کرائسٹال پلیس ءُ لیسسٹر سِٹی ءِ میان ءَ بوتگیں گوازی ءَ ھردو ٹیم دو دو گول ءَ دیمیگ بوتگ انت –

ھمے وڑ لیور پول ءُ مانچسٹر سِٹی ھم دو دو گول ءَ دیمیگ بوتگ انت ھردو ٹیماں جوانی گوازی کنان ءَ دو دو گول اسکور کتگ –

پریمئیر لیگ ءِ دیمے گوازی واٹ فورڈ ءُ لیور پول، ساؤتھ ہیمپٹن ءُ لیڈ یونائیٹڈ، ناروچ سٹی ءُ بریگٹون، آشٹن ویلا ءُ وولوبز ، لیسسٹر سٹی ءُ مین یونائیٹڈ، مین سٹی ءُ برنلی، برینٹ فورڈ ءُ چیلیسیا میان ءَ شمبے ءِ روچ ءَ شانزدہ اکتوبر ءَ بوگی انت –

بلوچستان ءِ دمگ کیچ ءِ بنجاھی شھر تربت ءَ گوستگیں دو روچاں بلیدہ ءَ پاکستانی پوج ءِ دست ءَ جنگ بیتگیں رامز ءِ کھول ءِ نندانک ءَ مروچی دومی روچ ھم گوازینت ءُ اے سیمی رند اِنت ڈپٹی کمشنر کیچ حسین جان زھرشانی نندانک ءَ گپ ءُ تران ءَ بے سوب بیتگ –

زھرشانی نندانک ءَ رامیز ءِ کھول ءَ ڈپٹی کمشنر ءِ گپ رد کرتگ ءُ میت ءِ کل نہ کنگ ءُ زھرشانی ءِ ھلاس کنگ رد کرتگ اَنت –

زھرشانی نندانک ءَ رامیز ءِ کھول ءُ آل پارٹیز کیچ ءِ نیمگ ءَ ڈپٹی کمشنر ءِ سیمی رند اِنت دیوان یکشل ءَ بیگ ءَ اَنت ءُ مروچی آ ھم بے سوب بیتگ –

زھرشانی نندانک ءَ ڈپٹی کمشنر حسین جان ءَ گپ کنان ءَ گشتگ کہ اے وئیل پدریں وئیلے ءُ مارا درد اِنت ءُ ما آئی ءِ کھول ءِ گماں بروبری ءَ شریک اِنت –

آئی ءَ گُشتگ کہ ڈسٹرکٹ ایڈمنسٹریٹر ءَ بنداتی روچ ءَ انساپ ءِ دیگ ءِ جھد ءَ اَنت ءُ چیف سیکٹری، ایڈیشنل چیف سیکرٹری ءُ دگہ مزن واکداراں لوٹ روان داتگ اَنت ءُ کانون ءُ آئین ءِ رد ءَ شمئے لوٹانی واستا گپ کن آں –

دومی نیمگ ءَ رامیز ءِ کھول ءَ بانداتگیں روچ ءَ میت ءِ زورگ ءَ دیم پہ شال ءَ روگ ءِ جار جتگ اَنت –

آیانی شنگ بیتگیں درشانی ءَ گشگ بیتگ کہ باندا سھب ءِ ساھت دَہ ءَ کھول آل پارٹیز کیچ ءِ کمک ءَ میت ءَ زور ایت ءُ دیم پہ شال ءِ نیمگ ءَ روان کنت-

آیانی گوشگ اِنت کہ استانی سرکار ءَ مارا انساپ نہ داتگ ما دیمتر ءَ روگ ءَ لاچار اِنت کہ وتی توار ءَ دیم ءَ سر بہ کن ایں ءُ دنیا ءَ سرپد کن ایں –

آیاں راہ ءَ دراھیں تکاں بندوکیں مردماں کاروان ءَ بھر زورگ ءِ دزبندی کرتگ ءُ شال ءِ لانگ مارچ “شھید رامیز لانگ مارچ ءِ نام دیگ بیتگ-

آیانی گوشگ اِنت کہ شال ءَ سروزیر بلوچستان ءُ گورنرھاؤس ءِ دیم ءَ نندانک ءَ نندانکی زھرشانی ءَ برجاہ کن ایں –

زانگ بہ بیت شمبے ءُ آدینگ ءِ میانی شپ ءَ کیچ ءِ دمگ بلیدہ ءَ بی ایس او ءِ چیئرمین ظریف رند ءِ لوگ ءِ سر ءَ بیڑ برتگ اَت ءُ چریشی ءَ آئی ءِ برات زتک رامیز خلیل بیران ءُ آئی ءِ کستریں برات زدگ بیتگ اَت-

مروچی کیچ ءَ آل پارٹیز ءِ نیمگ ءَ تربت ءِ شھر ءَ ھرتال کنگ بیتگ –

دی بلوچستان پوسٹ ءِ پتر ءَ سربوتگیں ھالانی رِد ءَ افغانستان ءِ بنجاھی شھر کابل ءَ محمود خان دمگ ءَ عیدگاہ ءَ مزنیں مسیت ءَ ڈن ءَ بمب تراکے ءَ بازیں مردمے بیران ءُ ٹپی بوتگ اَنت –

تالبان ءِ جارکش ذبیح اللہ مجاھد ءَ وئیل ءِ ھبر راست کُتگ ءُ گوشتگ کہ عیدگاہ ءَ ڈن پرس پتر ءِ میان ءَ بمب تراک ءَ بازیں مردمے بیران ءُ ٹپی بوتگ اَنت –

چہ کابل ءَ ٹی بی پی نمائندگ ءِ گوشگ انت کہ اے تراک ھما وھد ءَ بوتگ وھدیکہ مردم تالبان ءِ جارکش ذبیح اللہ مجاھد ءِ مات ءِ پُرس ءِ سر ءَ نشتگ بوتگ انت –
زانگ بہ بیت ذبیح اللہ مجاہد ءِ مات گوستگیں روچ ءَ بیران بوتگ ات اے وھدی مردم آئی ءِ پُرس ءِ سر ءَ نشتگ انت – بلے زبیح اللہ مجاہد ءَ وتی درشان ءِ تہ ءَ اے گپ ءِ زاھری نہ کتگ –

دومی نیمگ ءَ افغانستان ءِ نوکیں سرکار ءِ وزیر داخلہ ءِ جارکش قاری سعید خوستی ءَ گوشتگ کہ بمب تراک ءَ دو مردم بیران ءُ سَے ٹپی بوگے گپ راست کُتگ –

وھدیکہ دومی اھوالکاراں چہ سربوتگیں ھالانی رِد ءَ تراک ءَ ھشت مردم بیران ءُ بیست ٹپی بوتگ اَنت –

اھوالکار ءِ رد ءَ اشی ءَ پیش ھم افغانستان ءِ دمگ جوزجان ءَ آروس ءِ مراگشے ءَ ھم تراک ءِ بوتگ تراک ءِ آسر ءَ بانور ءَ ھوار چار مردم بیران بوتگ انت –

افغان رسانکدر ءِ رِد ءَ ننگرہار ءِ بنجاھی شھر جلال آباد تراک ءَ چار مردم بیران بوتگ انت آھانی تہ ءَ زھگے ھم ھوار انت –

دمگی پھازدارانی رِد ءَ بیران بوتگیں مردمانی تہ ءَ دو تالبان کارمند ھم ھوار بلے تنی وھدی ھچ کس ءِ نیمگ ءَ اے تراک ءِ زمّہ واری منّگ نبوتگ –

ذبیح اللہ مجاہد ءِ نائب بلال کریمی ءِ رِد ءَ آدینگ ءِ روچ ءَ ھم تالبانانی گاڑی ءِ نشانگ کنگ بوتگ، تراک ءَ پد آپریشن ءَ داعش ءِ جنگولانی گوم ءَ جنگ چوپ ءَ داعشی جنگول جنگ بوتگ انت ءُ لھتے دزگیر کنگ بوتگ وھدیکے جنگ ءَ تالبان کارمند ھم ٹپی بوتگ انت –

اسپین فٹبال لیگ لالیگا گوازی برجاہ انت چریشی ءَ یکے دومی ءِ پروش دیگ ءَ ساجو اَنت –

ایتھلٹک کلب ءِ لیبیاں وتی پٹ گوازی ءِ بندات ءَ جوانیں گوازی پیش داشتگ ، ھمے وڑ سیکنڈ لاسٹ پوزیشن ءَ الاویز ءِ ٹیم ءَ ھم جوانی گوازی کتگ گڈسر ءَ اولی ھاپ ءِ ھلاس بوگ ءَ ساری گارشیا ءَ یک گولے اسکور کتگ –

چِل ءُ چارمی ملٹ ءَ اسکور کنگ بوتگیں گول ءَ پد ھچ گول کنگ نہ بوتگ –

ھمے وڑ لالیگا دومی گوازی ءَ اوساسونا ءَ رایو وایاکانو یک گولے ءَ پروش داتگ – اوساسونا ءِ نیمگ ءَ یکیں گول مانو سانچیر ءَ اسکور کتگ –

سیمی گوازی ءَ مایورکا ءَ لیوانٹے ھم یک گولے ءَ پروش داتگ مایورکا ءِ نیمگ ءَ یکیں گول ادریسو بابا ءَ اسکور کُتگ ءُ وتی ٹیم کٹارینتگ –

لالیگا ءِ چارمی گوازی کیڈیز ءُ ویلنشیا ءِ میان ءَ بوتگ کہ ھردو ٹیم دیمیگ بوتگ انت ھردو ٹیمانی لیبیاں ھچ گول اسکور کرت نہ کتگ –

یمن ءَ آجوئی دوستیں لشکر ءِ میان ءَ وت ما وتی جنگ ءُ چوپ ءِ وھد ءَ چار جنگول بیران بیتگ اَنت –

عرب نیوز ءِ رد ءَ آجوئی لوٹوکانی میان ءَ جنگ ءُ چوپ زرباری شھر عدن ءَ پیش اتکگ –

آجوئی دوستانی زرباری کونسل ءَ ناگتی شھر ءِ امن ءُ ایمنی ءِ واستا بکتربند گاڑی روان داتگ ءُ شھری لوگانی تہ ءَ نندگ ءِ پرمان کتگ اَنت –

شھر ءَ دو روچاں چہ مزنیں سلاھانی توار اشکنگ بیگ ءَ اَنت، عدن ءِ اے ھما جاہ اِنت کہ اود ءَ سرکاری مزنیں کارگس ءُ بنجاھی زرکاری جاڑیگ اَنت –

اے دمگ میان اُستمانی رنگ ءُ ڈولاں یمنی سرکار ءُ زرباری کونسل ءِ جنگولانی میان ءَ جنگ ءُ چوپانی بنجاھی جاہ اِنت اود ءَ ڈیھ ءِ زرباری دمگاں دستیگ کنگ ءِ جھد برجاہ اَنت –

زربارء سکیورٹی لشکر ءِ بنزہ ءِ یک کسے ءَ وتی درشان ءَ گشتگ کہ ما کریٹر ءِ ھند ءَ شھری پرمان کتگ اَنت آ لھتے وھدانی واستا لوگانی تہ ءَ بہ بنت –

آئی ءَ گُشتگ کہ دمگ ءَ سکیورٹی ءُ ناشرکاری ءِ بازیں گیر کانونیانی ھلاس کنگ ءِ جھد بیگ ءَ اِنت –

چم دیتگیں مردمانی رد ءَ اے دمگ ءَ پد ءَ سلاھاں پُریں گاڑی دمگ ءَ شتگ اَنت سروزیر معین عبدالمالک سعید ءَ گوستگیں ھپتگ ءَ سعودی عرب ءَ واتر عدن ءَ وت ءَ سر کرتگ اے وھد ءَ سرکاری واک ءُ دگہ اگدودارنی ھمراھی ءَ سروکی کارگس ءَ یمن ءَ سروک عبدالرب منصور ھادی ریاض ءِ لوگ ءَ جاڑیگ اَنت –