TBP Balochi

بلوچستان ءِ دمگ کیچ ءَ سر بیتگیں ھالانی رد ءَ مند ءَ مروچی بلوچ یکجھتی کمیٹی مند ءِ نیمگ ءَ نوزدہ جون دوھزار ءُ بیست ءُ یک ءَ بیران ءُ زدگ بیتگیں زالبولانی سر ءَ ٹیچرانی اُرش ءِ بگیری ءَ زھرشانی –

زھرشانی مند بلو ءَ بندات بیتگ ءُ زھرشانی ءَ بازیں کچے ءَ مھلوک ءَ بھر زرتگ ءُ زھرشانی روانک ءِ دروشم ءَ سورو ءِ بازار ءَ سر بیتگ ءُ اود ءَ مُچے ءِ دروشم ءَ یکجھتی کمیٹی ءِ رھشوناں تران کرتگ ءُ زھرشانی کنوکانی دست ءَ زالبولانی واستا انساپ ءِ تاک نبشتگ بیتگ اَنت –

زھرشانی ءَ گوشگ بیتگ کہ نوزدہ جون دوھزار ءُ بیست ءُ یک ءَ بلو ءَ عبدالرزاق ءُ عمران نامیں دو ٹیچراں اُرش کرتگ ءُ رشیدہ ھمید کُشتگ ءُ مھرالنساہ، فریدہ ءُ عزیز بلوچ ٹپیگ کرتگ اَنت –

زھرشانی ءِ مُچی ءَ ھاجی نور بلوچ، ایوب دریاس، انور عادل ءُ ضیا بلوچ ءَ تران کرتگ ءُ رشیدہ ھمید ءِ کھول ءِ گون ءَ پدردی درشان کرتگ –

آیاں گوشتگ کہ اے ناوشیں وئیلے ءِ گوزگ ءَ پد ھم سرکار ءَ تنی وھدی جرمکار ترندیں سزا نداتگ اَنت ءُ باید آیاں بلوچستان ھائی کورٹ سر وزیر بلوچستان اے وئیل ءِ بارہ ءَ گامگیج بہ زور اَنت جرمکاراں سزا بہ دے اَنت ءُ بیران ءُ زدگ بیتگیں کھولاں انساپ بہ دے اَنت –

دمگی مردمانی رد ءَ کوشکاراں سرکارانی واکانی چیردستی گون اِنت چریشی ءِ سر ءَ آ تنی وھدی اے مردمانی کوش ءُ زدگ کنگ ءَ سزا دیگ بیگ ءَ نہ اَنت –

تربت ءُ مند ءَ پاکستانی پوج ءِ سر ءَ اُرش کتگ ءُ پنچ پوجی کارمند کُشتگ – میجر گوھرام

سربوتگیں ھالانی رِد ءَ ناشناسیں سلاہ بندیں مردماں مروچی مند ءِ دمگ شیراز ءَ ٹٹ جنوکیں پوجی کارمندانی سر ءَ اُرش کُتگ – اُرش ءَ پاکستانی پوج ءَ جانی ءُ مالی ءُ تاوانانی دیمپانی بوتگ –

ھمے وڑ بیست ءُ چار جون ءَ ناشناسیں مردماں کیچ ءِ بنجاھی شھر تربت ءَ پارک ھوٹل ءِ نزیک ءَ برجاھیں پاکستانی پوج ءِ پانگس ءِ سر ءَ دستی بمب اُرش ءِ کُتگ- اے اُرش ءَ ھم پاکستانی پوج ءَ جانی تاوان ءِ دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن پرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ واری منّ اِتگ گوشتگ کہ مئے سرمچاراں مروچی سھب ھشت ءُ نیم ءَ کیچ ءَ مند ءِ دمگ شیراز ءَ سلاہ کوہ ھند ءَ سیمسراں ٹٹ جنوکیں پھازگی پوجی کارمندانی سر ءَ وتکاریں سلاھاں گوں اُرش کُتگ –

میجر گوھرام بلوچ ءَ گوشتگ کہ سھب ءَ ماھلہ سرمچاراں پیسر ءَ چہ سنگر بستگ ءُ پھازگی ءِ ھاتر ءَ آؤکیں سَے کارمندانی سر ءَ تیرگواری کُتگ کُشتگ اَنت –

آئی ءَ گوشتگ کہ آھانی کمک ءَ آؤکیں کارمندانی سر ءَ ھم اُرش کُتگ یک دگہ کارمند ءَ کُشتگ، نزیکیں پانگِس ءَ چہ سرمچارانی دارگ ءُ نشانگ کنگ ءِ جھد کنگ بوتگ بلے آ سرمچارانی دارگ ءَ بے سوب بوتگ اَنت اودے ھستیں مشینری ھم ارش ءَ چہ تاوان داتگ اَنت-

میجرگوھرام بلوچ ءَ دیمتر ءَ گوشتگ کہ بیست ءُ چار جون ءَ سرمچاراں پارک ہوٹل ءِ نزیک ءَ برجاھیں پوجی پانگِس دستی بمب اُرش ءَ نشانگ جوڈ کرتگ، اُرش ءِ آسر ءَ یک پوجی کارمندے مُرتگ ءُ دو ٹپی بوتگ انت –

میجر گوھرام بلوچ ءَ گوشتگ کہ مئے اُرش بلوچستان ءِ آجوئی تاں برجاہ مان انت –

بلوچستان ءِ دمگ چہ کیچ ءِ بیگواہ بیتگیں کماشے ءِ جون دزکپتگ۔

ھالانی رد ءَ چاردہ روچ ءَ پیسر اناگتی بیگواہ بیتگیں حبیب ء جھانگیر ءِ جون زیک دزکپتگ۔

دمگی اھولاکار ءِ رد ءَ حبیب ء جھانگیر چاردہ روچ پیسر اناگتی بیگواہ بیتگ کہ اِشی ءِ درگت ءَ رند ءَ ھچ پئیمیں اھوال کس ءَ نہ رس اتگ، زیک یک راہ گوزے ءَ سلو کور ءَ آئی ءِ جون دِستگ ءُ بازار ءَ ھال سرکُتگ۔

اھوالکار ءَ گیشتر گُشت کہ جون دز کپتگیں مرد ءِ زھنی ھوالہ ءَ شر شر نہ بیتگ دومی نیمگ ءَ جون ءِ دست کپگ ءَ پد حبیب ءِ چُک ءَ وتی بیران بیتگیں کماش ءِ جون پجار کُتگ ءُ پد ءَ جون سلو بلیدہ ءَ آیانی لوگ ءَ سر کنگ بیتگ، کہ ھمو ءَ حبیب وتی گُڈی آرام جاہ ءَ کل کنگ بیت۔

اے دوزادہ سالاں ڈیھ ءِ چوشیں دروازگے یل نہ کرتگ کہ اود ءَ من ءَ وتی پت ءِ یل بیگ ءِ تُشیں اُمیت گندگ ءَ اتکگ – سمی بلوچ

بیگواھیں ڈاکٹر دین مھمد بلوچ ءِ جنک سمی بلوچ ءَ وتی شنگ کرتگیں بیان ءِ تہ ءَ گوشتگ کہ شما درست سرپد اِت بیگواھیں مردمانی جیڑہ بلوچستان ءَ بندات بیتگ ءُ ھیبر پکتوانواہ، سندھ ءُ پنجاپ ءَ مروچی داں سر بیتگ –

آئی ءَ گوشتگ کک بلوچستان ءَ ھوار سرجمیں پاکستان ءَ اے زورانسری ءِ بیگواھیں ناوشیں جاور ودی کرتگ اَنت ءُ ھرروچ بیگواھیں مردمانی کچ گیش بیان اَنت –

آئی ءَ گوشتگ کہ میان اُستمانی کانودانی رداں ھوار پاکستان ءُ آئی ءِ سرکار ءَ الم زورانسری آوار جنیانی واستا یک کانودے جوڑ کرتگ بلے اے ناوشیں امل ءِ دارگ ءَ سرکار ھچ رنگ ءَ گندگ ءَ آیگ ءَ نہ اِنت –

آئی ءَ گوشتگ کہ نِی بیگواھی ایوک ءَ بلوچانی تہ ءَ نہ اِنت بلکیں سندھی، پکتون، شیعہ ءُ پنجابی ھم بیگواھی ءِ آماچی ءَ گندگ بیگ ءَ اَنت ڈیھ ءِ اے وڑیں ھچ اُستان نیست کہ اود ءَ کَسے بیگواہ نہ اِنت –

منی پِت ڈاکٹر دین مھمد بلوچ ءِ بیگواھی ءَ دوازدہ سال سرجم بیتگ، ڈاکٹر دین مھمد بلوچ بلوچستان ءِ دمگ ھزدار اورناچ ءَ سرکاری ڈیوٹی ءِ وھد ءَ اسپیت پوشیں چیریں ادارگانی کارمنداں دزگیر کرتگ ءُ بیگواہ کرتگ ءُ مروچی دوازدہ سال گوزگ ءَ پد ہم منی پت ءِ ھچ ھال نیست اِنت –

آئی ءَ گوشتگ کہ من ڈیھ ءِ اے وڑیں دروازگ یل نہ کتگ کہ اود ءَ منی پت ءِ یل کنگ ءِ اُمیت مارا گندگ ءَ اتکگ –

اے دوزادہ سالاں بیگواھیں مردمانی واستا جوڑ کرتگیں کمیشن ءِ دیم ءَ پیش بیتگ اَنت آمیدگساں شتگ اَنت سپریم کورٹ ھائی کورٹ کمیٹیانی دیم ءَ پیش بیتگ اَنت رسانکدرانی دیم ءَ گپ جتگ بلے اے دوازدہ سالاں ما بس تسلی ءُ دروگیں اُمیتانی ودار ءَ نادینگ بیتگ اِنت –

لھتے ماہ ءَ پیش سر وزیر پاکستان عمران خان ءَ دُچار کپگ ءِ وھد ءَ من ءَ زبان ءِ کرتگ کہ تئی پت ءِ یل کنگ ءِ واستا زاتی دلگوشی دے آں بلے بازیں ماھانی گوزگ ءَ پد ھم سر وزیر ءِ نیمگ ءَ من ءَ ھچ وڑیں رھوتی نیتکگ –

ما اے ملک ءِ شھری یے ما گوستگیں دوازدہ سالاں اوپار ءِ دامن داشتگ ءُ زھرشانی ءُ ڈیھ ءِ آمیدگس ءُ دگہ ادارھانی دیم ءَ پیش بیگ ءَ ایں من ڈیھ ءِ ھاکماں پُرسگ لوٹ آں آ مئے شھری ھک، پُر ایمنیِ زندگی ءِ ھک، زندگ بیگ ءَ ھم نیل اَنت –

آئی ءَ گوشتگ کہ من یک رندے پد ءَ ھاکمانی جماعت اپوزیشن پاٹی ءِ ادارھاں گوں دزبندی کن آں منی پت ءِ یل بہ کنائینت ءُ مارا پُر ایمنیں زند ءِ گوازینگ ءِ ھک ءَ بہ دے اَنت پہ بستار ءِ اے ملک ءِ شھری ءِ رنگ ءَ من ءَ منی لوگ ءِ مردماں یا پاکستان ءِ کجام شھری ءِ کس ءَ اے ھک نیست آئی ءِ ھکانی برز جنی ءَ بہ کنت آ تری کجام رنگ ءَ تاکتور بہ بیت وھدیکہ ما لس شھری انت اے ملک ءِ کانودانی اھترام ءَ کن ایں گڑا ادارہ باید شرتر بہ کن اَنت – ادارھاں لوٹ ایت کہ آ پاکستان ءِ آئین ءُ کانونانی رد ءَ مئے جائزیں لوٹ آں سرجم بہ کنت ءُ ڈاکٹر دین مھمد ءَ ھوار پاکستان ءِ سرجمیں بیگواھیں مردماں یل بہ کنت ءُ زورانسری ءِ آوار جنیاں بند بہ کنت –

آئی ءَ گوشتگ کہ من زند ءِ ھمک تک ءَ بندوکیں مردم سیاستدان، وکیل، مزدور، نودربر، ٹیچرز، ایکٹوسٹ، فیمنسٹ، سوشلسٹ، مذھبی پاٹیاں بندوکیں باسک ءُ لیڈراِ ھوار دراھیناں گوں دزبندی کن آں آ منی پت ءِ بیگواھی ءَ دوازدہ سال سرجم بیگ ءَ بیست ءُ ھشت جون ءِ بیگاہ ءِ ساھت چار ءَ آرٹس کونسل ءَ داں کراچی پریس کلب روانک کشگ بیت اِنت ءُ اے زھرشانی ءَ مارا کُمک بہ کن اَنت ءُ مئے ھمراہ بہ بنت بیت کنت مئے درستینانی توار ءَ منی پت ءِ یلی سابت بہ بیت ءُ منی کھول ءِ اے مشکلیں ءُ دردناکیں درداں دور کنگ بہ بیت –

ناشناسیں مردمانی تیرگواری ءَ رودراتکی بلوچستان ءَ سیادی داروکیں مردمے روکپتی بلوچستان ءَ بیران-

سربوتگیں ھالانی رِد ءَ روکپتی بلوچستان ءِ دمگ پِشین ءَ ناشناسیں سلاہ بندیں مردمانی تیرگواری ءَ یک مردمے بیران بوتگ –

تیرگواری ءِ وئیل پشین ءِ دمگ گریب آباد ءَ دگ ءِ سر ءَ دیم ءَ اتکگ کہ ناشناسیں سلاہ بندیں گاڑی سوارانی تیرگواری ءَ ایوب ءِ جھمنند تمپ ملانٹ بیران بوتگ –

دمگی پھازداراں بیران بوتگیں مردم ءِ جون دست گپتگ ءُ نادراھجاہ ءَ سر کتگ –

زانگ بہ بیت رودراتکی بلوچستان ءَ پاکستانی پوج ءِ زوراکیانی سبب ءَ بازیں کچے ءَ مردماں لڈ ءُ بار کرتگ ءُ روکپتی بلوچستان ءَ ھوار اوگستان ءُ دگہ جاھاں شتگ اَنت

زانگ بہ بیت چد ءُ پیش ءَ ھم چوشیں وئیل بیتگ اَنت کہ روکپتی بلوچستان ءُ اوگستان ءَ نشتگیں میار بندیں مردم تیرگواریاں رودراتکی بلوچستان ءَ بندوکیں مردم جنگ بیتگ اَنت –

سیاسی گلانی گوشگ اِنت کہ اے کوشانی تہ ءَ پاکستانی چیریں ادارھانی نیمگ ءَ جوڑ کرتگیں سلاہ بندیں گل “ڈیتھ اسکواڈ ” ھوار اِنت-

سیاسی گلانی گوشگ اِنت کہ پاکستان وتی داشتگیں چریکانی زور ءَ باھوٹی بلوچاں کُشگ اِنت ءُ سیاسی گلانی گوشگ اِنت ھمے ھساب ءَ بلوچستان ءَ مردم جنگ ءُ کُشگ بیگ ءَ اَنت ھمے ھساب ءَ دگہ جاھاں ھم نشتگیں بلوچ نشانگ کنگ بیگ ءَ انت –

نبشتانک: منی گار بوگ ءَ ساری

نبشتہ کار: براھیم گُل

دومی بَھر

دی بلوچستان پوسٹ

 مِھروان منی گار بوگ ءَ ساری ترا وتی دل ءِ سرجمیں اِسراراں گُشگ لوٹ آں ،پرچا کہ منی کاروان ءِ رھشون ترا بوگی اِنت۔ من اگاں اَچ تئی دستاں پُلگ بوت آں گُڑا منی بازیں شَیرانی دپتر منی گرنچانی تہ ءَ ایر اَنت ءُ منی ھشت  شَیرانی دپتر ءُ دو دپتر منی آ دگہ کِسّہ ءُ نبشتانکاں ماں گرنچانی تہ ءَ ڈکّ داتگ اَنت ءُ ھمے گَرنچانی بُرز ءَ منی بانُکیں مات ءِ ھم اکسے درنجوک اِنت ، آئی ءِ ھم ھیال ءَ بِہ دار گوں-

مِھروان ! من برے برے جیڑاں داں تہ ءَ چے سک ھلاس باں ءُ سک پُرشاں ءُ سست باں تو زان ئے چی ءَ ؟ اے واست ءَ کہ من اگاں بیگواہ کنگ بِہ باں ، گُڑا منی کَسّہ ،زھیر ءُ ترانگ نکش انت ءُ بانُکیں مات ءِ یات ھما ماھؔو کہ پہ من مُدام نِشتگ ءُ دُوا کنت ءُ پہ منی سالونکی ءَ ھزار واب گِند ایت ھِچ شپ ءَ واب اوں نہ کپ ایت داں منی توار ءَ اِش مہ کنت ءُ منی اکس ءَ مہ چار ایت، من ءَ مُھکمیں ھمراز گِیر کایاں ءُ من پُرش آں ،بس یک چِیزے سک گِیر کیت کہ منی زُبان باریں چون بیت من ھمے جیڑگ ءَ باں کہ باریں مرچی سنگر ماھتاک ءَ نوکیں چیز کَے تالان کُتگ باریں منی زُبان ھما پیشی وڑا نبشتہ بوگ ءَ اِنت یا اِنّاں؟ پد ءَ منی آتراپ ءِ ھمُک مَردُم کاینت  اُردو کن اَنت منی کِرّ ءَ باریں کَسّے بیت یا اِنّاں ؟ آ منی گوم ءَ منی جِند ءِ زُبان ءَ ھبر بِہ کنت یا اِنّاں؟-

بَلے مِھروان ! من ءَ تئی سر ءَ بے کِساس سِتک اِنت ءُ من دل ءَ جزماں کہ تو منی کاروان ءَ اُوشت ءِ آماچ بوگ نَیل ئے ،منی نَد ءَ تو منزل ءَ سر کنگ ءِ جُھد ءَ الّم کن ئے ، منی کاروان ءِ گاماں تو ھر روچ دیم ءَ بَران کن ئے۔

مِھروان ! من برے برے اے اوں جیڑاں کہ چو مہ بیت منی گار بوگ ءَ پَد تو اوں چوں منی وڑ ءَ بےتوار بہ بئے ،روچ ءُ شپ پہ منی یاتاں گوں دِگہ ھِچ کاری مہ بئے ! اے ھبر ءَ ھمبل کدی بےھیال مہ بو ترا زُبان ءِ سرجمیں زھیر وتی کوپگ ءَ بندگی اَنت ءُ منی ناسرجمیں کِسھانی پُژدر ترا الم مانا کنگی اَنت ،ترا منی دُراھیں واب پِیلو کنگی اَنت، ترا زُبان ءِ رامٹو گوں پَکرے ءَ دیم ءَ بَرگی اِنت، من باں نہ باں ترا منی کمی ھِچ مارگی نہ اِنت ءُ منی کمی ءَ گوں وتی جُھد ءََ ھِچ وڑیں سیادے مہ دار۔

منی گار بوگ ءَ ساری ترا اے اوں گُشگ لوٹ آں کہ من اگاں بیگواہ بوت آں داں تو ھمے بِہ جیڑ کہ یک مُورے مُرتگ، پد ءَ بِہ کند گوں ارسیں کدھاں ءُ روان بہ بو گوں کاروان ءَ پہ منزل ءَ سُران بو-

منی ءُ تئی نیام ءَ ھِچ گم ءُ رنج دْرنجگی نہ اِنت ، مُدام تو ھمے بِہ جیڑ کہ تو اگاں اے کاروان دیم ءَ بُرت ءُ منزلے ءَ شُت ئے ءُ سر کُت گُڑا من تئی مُدام دیم ءَ آں، مُدام تئی ارواہ ءِ بادگیر ءَ سیل ءَ آں ، تئی آتراپ ءَ ھمُک وھد من ساڑی آں۔

مِھروان منی گار بوگ ءَ ساری ترا من اے اوں گُشگ لوٹ آں کہ ترا جھان ءِ ھر ھند ءُ دمگاں منی ھیال سر کنگی اِنت،منی زُبان زندگ کنگی اِنت من ءَ چہ پَد منی ھاکمیں وھد بِہ زانت کہ اے زُبان ءِ راج پہ کُشگ گار نہ بیت ، ھزار بارت ءُ بیگواہ کنت ءُ ھزار واھگ نیم دَگاں پشت گیج ایت بلے اے راج پہ وتی ماتی زُبان ءَ ھِچ وڑ ءَ پُشت ءَ نہ کنز ایت،ھِچ وڑ ءَ وتی زُبان ءِ کمی ءَ اوپار کُت نہ کنت، اے راج گوں وتی زُبان ءَ پَکر جناں کنت ءُ پہ زُبان ھزار ساہ ندّر کنت بلَے گاماں پہ تُرس ءَ بِیھار ءِ داشت نہ کنت۔

منی گار بوگ ءَ ساری ترا من اے اوں گُشگ لوٹ آں کہ  ترا تئی سرجمیں جھان منّارینگی اِنت ءُ مُھکمیں دابے ءَ ترا ھساریں سنگرے جوڑ بوھگی اِنت ۔

پد ءَ منی زُبان ءِ سر ءَ ھر کَسے اُرش کنگ ءَ بیت داں بِہ جیڑ ایت کہ اے مُھکمیں زُبانے ءُ اے زُبان ءِ ھزاراں پاسبان نِشتگ اَنت،آ چہ تُرس تئی زُبان ءِ نام ءَ اوں گِپت مہ کنت ،تئی مُھکمی پہ زُبان ءَ یک کُبلے جوڑ بِہ بیت ، زُبان ءِ ھاتر ءَ ھِچ وڑیں ساھارانی تُرس ءَ وتی گاماں نِزور تَرّگ میل ایت ءُ مُھکمی گوں جُنزان بہ کنت من ءَ چہ پَد زُبان ءِ ٹولی ءَ پہ مُھکمے وتی کوپگاں بہ زور ءُ کاروان ءَ منزل ءَ سر کنگ ءِ ھاتر ءَ سرد ءُ گرم ھِچ مَچار ، روان بو ، سُران بو ، کِشک ھوشت اَنت بَلے ترا رَوگی اِنت ۔

مِھروان ! تئی ھیال ءُ گُمان ءَ بس ھمے بِہ بیت کہ منی زِند ءِ واھگ یکّے ءُ آ منی زُبان اِنت۔!
پہ زُبان ءَ من ءَ ھر وڑ ءَ جُنزگی اِنت ،تو بِہ گِند ئے بَرے بَرے ایوک بِہ بئے ءُ ترا پہ کاروان ءَ جُنزگ ءَ کَس مہ رس ایت، گُڑا اوشت ءِ آماچ مہ بو  پرچا کہ باز وھد ءَ مَردُم ءِ گام اوشتارینگ بنت ءُ نیم دَگاں ھلاس بنت بلے تو گوں آزمان ءِ نیم بالیں مُرگاں بہ رو ءُ ترا وتی کاروان دیم ءَ بَرگی اِنت،ترا رَوگی اِنت ،جنزگی انت! –

روان اِنت دیم ءَ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ لبریشن آرمی ءِ جارکش جئیند بلوچ ءَ وتی شنگ کتگیں درشان تہءَ سانگان ءَ اُرش ءِ تہ ءَ پنچ پوجی کارمندانی کوش ءِ زمہ واری من اِتگ۔

زانگ بہ بیت پنچ شمبے ءِ روچ ءَ بولان ءِ ھنکین سانگان ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ تیرگواری کُتگ ءُ تیرگواری ءِ آسرءَ پنچ پوجی کارمند کُشگ بیتگ اَنت۔ مرتگیں کارمندانی پجار نائک نادر، حوالدارظفر، بشیر، ھدایت ءُ سپاھی نور اللہ ءِ نام ءَ چہ بیتگ اَنت۔

دومی نیمگ ءَ بی ایل اے ءِ جارکش جئیند بلوچ ءَ رسانکدراں پہ شنگ کُتگیں وتی درشان ءِ تہ ءَ سانگان اُرش ءِ زمہ واری زیران ءَ گُشتگ کہ بلوچ لبریشن آرمی سرمچاراں پنچ شمبے ءِ روچ ءَ بولان ءِ سانگان دمگءَ دربی ءِ ھند ءَ پیسر ءَ چہ راہ بستگ ءُ اُرش کُتگ۔

جئیند بلوچ ءَ گُشت کہ سرمچارانی اُرش ءَ گاڑی ءَ سواریں دژمن ءِ پوج ءِ درستیں پنچیں کارمند نائک نادر، حوالدارظفر، بشیر، ھدایت ءُ سپاھی نور اللہ ھما وھد ءَ مرتگ اَنت وھدیکہ گاڑی ءَ ھم مزنیں تاوان رستگ۔

جئیند بلوچ دیمترءَ گُشتگ کہ اُرش ءَ پد سرمچار وتی پھازتگیں باھوٹی جاھاں سربیتگ اَنت۔ بلوچ لبریشن آرمی ءِ جارکش ءَ گُڈ سر ءَ زور گیریں پوج ءُ آئی ءِ ھمراھداری کنوکانی سرءَ گوں ترندی ءَ اُرش برجاہ دارگ ءِ جار ءَ جنت-

پنسن کور ءَ برجاھیں پاکستانی پوج ءِ پانگس ءِ سر ءَ اُرش کتگ یک کارمند ءِ کُشتگ – میجر گوھرام

سربوتگیں ھالانی رِد ءَ گوستگیں روچ ءَ بزاں چار شمبے ءَ ناشناسیں سلاہ بندیں مردماں کیچ ءِ دمگ دشت ءَ پاکستانی پوج ءِ پانگس ءِ سر ءَ اُرش کُتگ –
اُرش دشت ءِ دمگ پنسن کور ءَ برجاھیں پاکستانی پوج ءِ پانگس ءِ سر ءَ کنگ بوتگ اُرش ءَ پاکستانی پوج ءَ جانی تاوان ءِ دیمپانی بوتگ –

بلوچ آجوئی لوٹوکیں سلاہ بندیں گل بلوچستان لبریشن پرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ دشت پنسن کور ءَ برجاھیں پاکستانی پوج ءِ پانگس ءِ سر ءَ بوتگیں اُرش ءِ زمّہ واری منّ اِتگ گوشتگ کہ مئے سرمچاراں چارشمبے ءِ بیگاہ ءِ ادار شش ءَ کیچ ءِ دمگ دشت مزن بند ءِ ھند پنسن کور ءَ برجاھیں پوجی پانگس ءِ سر ءَ دور جنگیں توپک ءَ گوں اُرش کُتگ یک پوجی کارمند ءِ کُشتگ –

میجر گوھرام بلوچ ءَ گوشتگ کہ زورگیریں پوج ءِ سر ءَ مئے اُرش ایردستیں بلوچستان ءِ آجوئی ءَ تاں برجاہ مان اَنت –

سر بیتگیں ھالانی رد ءَ بلوچ یکجھتی کمیٹی مند ءِ نیمگ ءَ شنگ بیتگیں ھالانی رد ءَ گوشگ بیتگ کہ بیست ءُ شش جون دوھزار ءُ بیست ءُ یک ءَ سھب ءِ ساھت دَہ ءَ مند ءَ زالبولانی سر ءَ بیتگیں اُرش ءَ زھرشانی کنگ بیت اِنت –

یکجھتی کمیٹی مند ءِ نیمگ ءَ گوشگ بیتگ کہ زھرشانی سھب ءِ ساھت دَہ یک روانکی دروشمے ءَ مند بلو ءَ بندات ءُ آئی ءِ آسری سورو ءِ بازار ءَ بیت اِنت ءُ اود ءَ مُچی ءِ دروشم ءَ زھرشانی کنگ بیت اِنت –

یکجھتی کمیٹی مند ءِ نیمگ ءَ مھلوک ءَ گوں دزبندی کنگ بیتگ کہ اے مُچی ءَ بھر بہ زور اَنت ءُ زالبولانی سر ءَ اُرشکار کنوکانی سزا دیگ ءَ مئے کمک ءَ بہ کن اَنت –

زانگ بہ بیت مند بلو ءَ نوزدہ جون ءَ لینگویچ سنٹر ءِ دو استاد عبدالرزاق ء اللہ بکش ءُ عمران ء اللہ بکش جھمنند تربت سنگانی سر ءَ لینگویچ سنٹر ءِ زھگانی سر ءَ بیڑ برتگ ءُ اود ءَ زھگ لَٹ ءُ کُٹ کرتگ اَنت –

چریشی ءِ میان ءَ زھگانی کھولاں گوشتگ کہ زھگاں چوش مہ جن اِت ءُ ھمے گپانی میان ءَ لینگویچ سنٹر ءِ ھردوکیں اُستاداں کارچ جن ءُ کائی ءَ رشیدہ نامیں زالبولے بیران بیتگ ءُ دگہ سَے زالبول زدگ بیتگ اَنت –

زدگ بیتگیں زالبول کراچی ءَ درمانی بیگ ءَ اَنت ءُ کھول ءِ گوشگ اِنت مارا انساپ دیگ بہ بیت ءُ مئے سر ءَ زوراکی کنگ بیتگ ءُ ما جنگ بیتگ اِنت –

ٹیچرانی اُرش ءَ پد دمگ ءِ مھلوک برانز گپتگ ءُ ٹیچر ایف سی ءِ گور ءَ میار بندی ءَ شتگ اَنت ءُ اود ءَ ایف سی ءَ مھلوک ءِ برانزی ءَ پد ھردُکیں ٹیچر تمپ ءِ لیویز ءِ ھولگ ءَ کرتگ اَنت –