TBP Balochi

بلوچ اسٹوڈنٹس آرگنائیزیشن آزاد ءِ بنجاھی جارکش ءَ وتی شنگ کُتگیں درشان ءِ تہ ءَ گل ءِ گوستگیں انفارمیشن سیکرٹری شبیر بلوچ ءِ زوریں بیگواھی ءَ پنچ سال ءِ دراجیں وھدے سرجم بیگ ءَ پد ھم آئی یل نہ بیگ ءِ ءُ اے درگت ءَ میان اُستمانی کرد ءِ نا دلجمی ءِ درشان کنان ءَ گُشتگ کہ سیاسی زندانی چہ دھکاں چہ زورانسریں بیگواھی ءِ آماچ کنگ ءُ جھانی گلانی نیمگ ءَ ھاموشی ءِ پوشاک پوشگ بژنی گپ اَنت۔

آئی ءَ گُشت کہ زوریں زوگر ءَ بہ گر داں مروچی پاکستانی ریاست ءَ یکشلی ءَ گوں بلوچستان ءَ مردمی اگبالانی لگتمالی کنان اِنت ءُ پیداک اِنت، کہ اود ءَ پاکستان ءِ نیمگ ءَ بے میاریں لس مردماں چارراہ ءِ سر ءَ تیر گواری کنگ ءُ کُشگ بیگ ءَ اِنت ھمود ءَ سیاسی باسکاں ءُ بلوچ جُنز ءَ ھواریں مردماں زورانسریں آوارجنی ءَ پد آیانی زانگولیں جون دور دیگ بیگ ءَ اَنت۔ پاکستان ءِ نیمگ ءَ یک نیمگ ءِ بلوچستان کوش جاہ ءِ جوڑ کنگ بیتگ دومی نیمگ ءَ اود ءَ درزنانی کساس ءَ ورناہ بیگواہ کنگ ءُ زندانی کنگ بیگ ءَ اَنت۔ بلوچستان ءَ برجاھیں زوراکی ءُ زلم ءُ ھمک روچی ھساب ءَ مردمی اگبالانی لگتمالی ءَ ابید ھم جھانی گل ھاموشی ءَ گوں ندارگ چارگ ءَ اَنت۔

جارکش ءَ گُشت کہ گوستگیں دو دھکاں چہ گل مدام برجاھیں پاکستانی زوراکیانی آماچ اِنت۔ ریاست ءِ نیمگ ءَ گل ءِ مزنیں کساسے ءَ باسک بیگواہ کنگ ءَ پد کُشگ ءُ آیانی زانگولیں جون دور دیگ بیتگ اَنت درزنانی کساس ءَ بنجاھی اگدہ دار نمیران کنگ بیتگ اَنت وھدیکہ مزنیں کساسے ءَ انگت ھم بنجاھی رھشون ءُ باسک دھکاں چہ پاکستانی زندانانی تہ ءَ بندیگ اَنت۔ گل ءِ گوستگیں وائس چیئرمین ذاکر مجید دوازدہ سالاں چہ بیگواہ اِنت وھدیکہ گوستگیں چیئرمین زاھد بلوچ ءِ بیگواھی ءَ ھپت سال ءِ وھد سرجم کُتگ اَنت۔ بنجاھی رھشون ءُ باسکانی زورانسریں بیگواھی ءِ مول گل ءِ پُر ایمنیں جھد ءَ ھلاس کنگ اِنت ءُ شبیر بلوچ ءِ بیگواھی ھم ھمے یکشلی ءِ بھر اِنت۔

آئی ءَ دیمترا گُشت کہ گل ءِ گوستگیں انفارمیشن سیکرٹری شبیر بلوچ 4 اکتوبر 2016 ءَ چہ گورکوپ کیچ ءَ زور آوار جنگ بیتگ۔ شبیر بلوچ ءِ بیگواھی ءِ ھلاپ ءَ گل ءُ آئی ءِ کھول ءِ نیمگ بازیں وھداں زھرشانی کنگ بیتگ ءُ جھانی گلاں چہ شبیر بلوچ ءِ یل کنائنگ ءِ ھاتر ءَ دزبندی کنگ بیتگ۔ آئی ءِ کھول ءِ نیمگ ءَ شال ءُ کراچی ءَ ھوار اسلام آباد ءَ ھم زھرشانی کنگ بیتگ بلے مردمی اگبالانی جھانی گلاں ھوار کجام ھم جھانی گل ءِ نیمگ ءَ چہ گپ گوش دارگ نہ بیتگ اَنت۔ جھانی گلانی گیر سنجیدگی ءُ نادلکشی ءِ سوب ءَ گل ءِ نیمگ ءَ جھانی گلانی سرءَ نمدی ھم نبشتہ کنگ بیتگ اَنت بلے انسانی اگبالانی گلانی نیمگ سیاسی زندانیانی یل کنائنگ ءَ پہ ھچ گام زیرگ نہ بیتگ۔

وتی درشان ءِ گُڈ سرءَ جارکش ءَ گُشت کہ مردمی اگبالانی جھانی گلانی ھاموشی پاکستانی زوراکیانی تہءَ گیشی آرگ ءِ سبب جوڑ بیگ ءَ اَنت ءُ دومی نیمگ ءَ جھانی گلانی کرد ءِ سر ءَ ھم مزنیں جُست ءِ چست کنگ ءَ اَنت۔ شبیر بلوچ یک پر ایمنیں وانندہ گلے ءِ بنجاھی رھشون ءِ اَت پنچ سال ءَ داں زوریں بیگواھی ءَ پد ھم آئی دیم ءَ نہ آیگ بازیں تُرس ودی کنت۔ ھمے رد ءَ شبیر بلوچ ءِ کھول ءِ نیمگ ءَ04 اکتوبر 2021 ءَ آئی زورانسریں بیگواھی ءَ پنچ سال سرجم بیگ ءِ روچ ءَ کراچی پریس کلب ءِ دیم ءَ یک زھرشانی ءِ جار جنگ بیتگ کہ اِشی ءِ تہ ءَ درستیں مردم دوستیں ءُ راجدوستیں مردمانی ھواری المی اِنت۔ ھمے روچ ءَ گل چاگردی رسانکدر ءَ شبیر بلوچ ءِ یل کنائنگ ءِ ھاتر ءَ کمپین ءِ ھم برجاہ داریت۔

بلوچستان ءِ دمگ کیچ ءِ بنجاھی شھر تربت ءَ گوستگیں روچ ءَ تھسیل بلیدہ ءَ سیکورٹی لشکر ءِ دست ءَ کسان سالیں زھگ ءِ کوش ءِ ھلاپ ءَ سرجم ءَ دربندیں ھرتال کنگ بیتگ –

زھرشانی نندانک ءَ آل پارٹیز ءَ ھوار گوادر ءَ جماعت اسلامی ءِ رھشون مولانا ھدایت الرحمان ھم اتکگ ءُ بازیں کچے ءَ سیاسی ءُ چاگردی مردماں بھر زرتگ ءُ شھید فدا چار راہ ءِ سر ءَ گوستگیں دو روچاں کسان سالیں زھگ ءِ لاش ءِ ھمراھی ءَ نشتگ اَنت –

وئیل شمبے ءُ آدینگ ءِ میانی شپ ءَ بلیدہ ءَ بی ایس او ءِ چیئرمین ظریف بلوچ ءِ لوگ ءِ سر ءَ بیڑ ءُ تیرگواری ءَ یک کسان سالیں زھگ رامز خلیل کُشگ، رایان خلیل ءُ زالبول زدگ کنگ ءِ ھلاپ ءَ آل پارٹیز کیچ ءِ دزبندی ءَ تربت ءِ شھر ءَ سرجمی ءَ ھرتال کنگ بیتگ ءُ باپاری بنجل ءُ دگانی سر ءَ گاڑیانی روانی مھتلی ءِ آماچ بیتگ اَنت –

تیرگواری ءِ سبب ءَ بیران بیتگیں کسان سالیں رامز خلیل ءِ لاش ءِ ھمراھی ءَ نندانک گوستگیں روچ ءَ چہ شھید فدا چار راہ ءَ برجاہ اِنت کیچ ءَ سیادی داروکیں جتا جتائیں پکراں بندوکیں مردم بازیں کچے ءَ ھوار اَنت-

گوستگیں روچ ءَ ڈپٹی کمشنر کیچ حسین جان بلوچ نندانک ءَ اتکگ ءُ کھول ءِ گون ءَ گپ ءُ تران ءَ بے سوب بیتگ، زھرشانی نندانک ءَ نندوکیں مردماں وئیل ءَ دزمانجنیں سیکورٹی کارمنداں کانود ءِ دار ءِ سر ءَ آرگ ءَ داں نندانک ءِ برجاہ کنگ ءِ پیسلگ کرتگ –

ھمے وڑ ءَ بی ایس او ءَ وتی شنگ کرتگیں درشان ءِ تہ ءَ گُشتگ کہ بلیدہ ءَ بلوچ چادر ءُ چار دیواریانی پادمال کنگ ءُ کسان سالیں زھگ ءِ کوش رستری ءِ –

بلوچ اسٹوڈنٹس آرگنائزیشن ءِ بنجاھی جارکش ءَ گُشتگ کہ گوستگیں دو یک شپے ءَ پیسر بلیدہ ءَ سی ٹی ڈی ءِ نیمگ ءَ لوگ ءِ سر ءَ بیڑ ءُ چادر ءُ چار دیواریانی پادمال ءُ تیرگواری ءَ کسان سالیں زھگ ءِ شھیدی پدردی اِنت ءُ اے رستری ءُ بلوچ کُش پالیسانی درچ اِنت –

جارکش بی ایس او ءَ گُشتگ کہ پولیس ءَ بلوچ دود لگتمال کتگ ءُ لوگ ءِ سر ءَ بیڑ برتگ ءُ گنوکائی تیرگواری کرتگ ءَ چریشی ءَ یک دَہ سالی ئیں زھگ رمیز خلیل شھید اش کرتگ ءُ آئی ءِ کستریں برات زدگ کرتگ اش اے وئیل وتی دور ءِ تہ ءَ یک دردناکیں وئیلے کہ ڈیھی کانود ءُ رھبنداں یک مردمے ءِ دزگیر کنگ ءَ سرجمیں کھول ءَ نشانگ کنگ ءُ زھگانی سر ءَ تیرگواری کنگ ءَ سنگینیں جرمے –

ھمے وڑ بلوچستان ءَ بندوکیں بلوچ چاگردی رسانکجاھاں ھم بلیدہ ءَ بیتگیں وئیل ءِ ھلاپ ءَ زھرشانی کنگ ءَ اَنت ھیش ٹیگ جِسٹس پور رامیز کارمرد کنگ ءَ اَنت-

پنچ روچ ءَ پیسر بولان ءَ بندات بیتگیں پوجی لشکر کشی انگت ءَ برجاہ اِنت-

دمگی مردمانی رد ءَ پوجی لشکر کشی ءَ بازیں کچے ءَ گیشیں کارمند بھر زورگ ءَ اَنت ھمے وڑ کمک ءَ وھد وھد ءِ سر ءَ ھیلی کاپٹر ھم برز ءَ بال اَنت –

لشکر کشی ءِ بندات گوستگیں روچاں کنگ بیتگ کہ گیش کنگ ءُ بزگر، الیکسر، چلڑی، بوک، انجیر گمبدی، ھُچ کمان، درہ، چُٹوک، گھڑانگ ءُ کش ءُ گوری دمگاں کنگ بیتگ اَنت –

تنی وھدی واکداراں پوجی لشکر کشی ءِ بارو ءَ دگہ گپ دیم ءَ نیتکگ اَنت –

زانگ بہ بیت جنگ زدگیں دمگ گیشتر کوھی دمگ اِنت کہ اے دمگ ءَ دامگی ھال ءُ دوری ءِ سبب ءَ دگہ گیشتریں ھال سر بیگ ءَ نہ اَنت –

بلوچ ریپبلکن پارٹی ءِ بنجاھی جارکش شیر محمد بگٹی ءَ رسانکدر ءَ شنگ کُتگیں درشان ءِ تہءَ گُشتگ کہ بلوچستان ءَ برجاھیں پوجی زوراکیانی ھلاپ ءَ جرمنی ءِ شھر گوٹنگن ءَ یک زھرشانی ءِ کن بیتگ۔

جارکش ءَ گُشتگ کہ زھرشانی ءِ مول بلوچستان ءَ پاکستانی پوج ءِ دستءَ برجاھیں زورانسریں آورار جنی، بندی جاھانی تہءَ مردمانی کُشگ، نودربرانی سرءَ لٹ کُٹ ءُ جنین ءُ زھگانی کوشانی وئیلاں جھان ءِ دیما پدر کنگ بیتگ۔

بی آر پی ءِ جارکش ءَ گُشتگ کہ گوستگیں روچاں پاکستانی پوج ءِ نیمگ ءَ بے میاریں بلوچانی کوش ءِ تہءَ گیشی آرگ بیتگ ءُ اِشانی سرءَ جھانی انسانی اگبالانی ھاترءَ کارکنوکیں گلانی ھاموشی جیڑگی گپ اِنت۔ آئی ءَ گُشتگ 23 ستمبر ءَ تُربت ءِ نزیک ءَ دار یکجاہ کنوکیں تاج بی بی ءَ پاکستانی پوج ءِ کارمنداں تیر گواری کُتگ ءُ نمیران کُتگ وھدیکہ مرچی لشکریاں بلیدہ ءَ سیاسی جھدکار ظریف رند ءِ لوگ ءِ سرءَ اُرش کُتگ ءُ آئی ھشت سالی ایں برازتک کُشتگ ءُ یک زھگے ٹپیگ کُتگ ۔

جارکش ءِ گُشگ اَت کہ بے میاریں بلوچانی کُشگ آیانی لوگانی سرءَ اُرش کنگ پاکستانی پوجے ھما پالیسیانی یکشلی اِنت کہ گوستگیں بیست سالاں چہ بلوچستان ءَ برجاہ اَنت اشانی مول ھمک تک ءَ گوں سیادی داروکیں بلوچاں کُشت ءُ کوش ءَ گوں ھاموش کنگ اِنت دانکہ دیمترءَ کس پہ وتی اگبالانی جھد ءَ وتی بھر ءَ ھوار کُت مہ کنت۔ ھمے سوب اِنت کہ ھمک روچ شال ءَ ھوار دگہ شھرانی تہءَ نودربرانی سرءَ لٹ کُٹ کنگ بیت ءُ آ زندانی کنگ بنت۔

شیر محمد بگٹی ءَ گُشتگ کہ پاکستانی پوج ءِ ناشرکاریں کردانی سرءَ ملکی ءُ درملکی مردمی اگبالانی جھدکارانی ھاموشی جیڑگی گپ اِنت۔

نبشتانک: منی گار بوگ ءَ ساری

نبشتہ کار: براھیم گُؔل

(نُھمی بَھر)

دی بلوچستان پوسٹ

مِھروان ! برے برے من جیڑاں کہ تھاریں شپاں وھدے کہ ماہ دَر کیت ءُ سرجمیں جھان ءَ ھمے یکّیں ماہ رُژن بکشا ایت ،جھان ءِ ھمُک تَکّ ءُ پھنات ءَ اِنسرین ایت،باریں چُنت آشک ءِ دل ءِ ٹپاں درمان کنت ، باریں چُنت لگور ءِ تہ ءِ مرد ءَ بُست پرمائیت ءُ جنگ ءِ سِکین ءَ دنت، باریں اے شپ ءَ چُنت مات وتی بَچّاں پہ زمین کپن بند اِیت ءُ جنگ ءَ روان دنت ،باریں چُنت کاروان ھمے ماہ ءِ دستاں گِپت ءُ دیم پہ منزل ءَ روت اِنت، باریں چُنت شھید ءِ ارواہ آسودگ بیت،باریں چُنت پُتینک ءِ تند شودگ بنت ءُ باریں چُنت سّسؔی ءُ پُنّؔو یک جاہ بنت باریں چُنت شؔے ءُ ھانؔل ھوار بیت؟-

 مِھروان ! تو یک آدمے ئے تو بہ لوٹ ئے چی نہ بیت ؟ ھرچی کُت کن ئے تو اوں گوں زُبان ءَ منزل ءَ سر بوت کن ئے،تو بس ھمے بِہ جیڑ کہ ایوکیں ماہ اِنت کہ سرجمیں جھان ءَ رُژن بکشات کنت ءُ ھزاراں ٹولی گامگیج کُت کنت،گُڑا تو چی پیم ءَ وتی کاروان ءِ جُھد ءَ سوبمند بوت نہ کن ئے؟-

مِھروان مرچی تو بِلّے کہ ایوک ئے ءُ زُبان بِلّے کہ تو ایوک ءَ بَڈ ءَ زّرتگ ءُ روگ ءَ ئے ،بَلے مِھروان تو چہ ماہ ءَ نِزور تَر نہ بَے ،تو پد ءَ یک سرجمیں راجے ئے پِگر گرنچ ءَ کُتگ ءُ ترا ھمُک مات ءِ نیکیں دُوا گون اِنت۔

مرچی کہ تو ایوک ءَ جُنزگ ءَ ئے گُڑا باندا الّم تئی گاماں یکّے نا یکّے ھر وڑ ءَ گِپت ءُ تئی کاروان ءَ دیم ءَ بارت،یکّے نا یکّے تئی الّم ھمراہ بیت ءُ ترا کوپگ دنت،تو پد ءَ ھما راج ءِ اندر ءِ مرد ءَ بُست کنگ ءَ اِت کہ تئی راج ءِ ھمُک کِسّہ دپتراں داں روچ ء مروچی نمیران اِنت۔

تئی راج ، تئی زُبان دُرست زِندگ اَنت،تئی زُبان دُنیا ءِ مستریں ءُ زیبدار تَریں زُبان اِنت،بَس تئی زُبان کمو گُباراں گِپتگ ءُ دنزین اِنت مرچی کہ ھمے کاروان ءَ تو دیم ءَ ھمے داب ءَ بران بِہ کن ئے گُڑا اے گُبار لھتیں روچ ءِ مھمان بنت،تو زُوت پلگار بَے ، بلکیں ترا روگی اِنت،اے کاروان ءِ کِشک ترا منزل ءَ وت بارت ءُ سر کنت ، بَس تو گوں گاماں جُنزان کن ءُ روان بو!-

مِھروان ! منی گار بوّگ ءَ ساری من پمیشکا ترا سرجمیں رازاں شودگ ءُ دَیّگ ءَ آں کہ ترا بلکیں منی ھمے لھتیں بےنَپیں دانک پہ اڑ ءُ جنجالاں بِہ رکین اَنت ،چی ءَ کہ سَید زھور شاہ ھاشمِی ءَ من ءَ منی زُبان ءِ کِشک پیش داشت بَلے وت اے راہ ءَ گوں من گون نہ اِنت ءُ آئی ءَ اے بار منی ءُ تئی کوپگاں داتگ گُشگ ءِ مُول ءُ مُراد کہ سَید ھما اُستاد اَت کہ کِشکے پیش داشت بَلے سپر من ءَ ءُ ترا کنگی اِنت ،اے پند من ءَ ءُ ترا بُرّگی اِنت، اے کِشک ءِ ڈنگر من ءَ ءُ ترا ساپ کنگی اَنت،مارا کَسّی چمدار بوّگی نہ اِنت،چی ءَ کہ ھما راج چمدار بیت کہ چم جھلی ئِے آدت کتگ، بَلے من ءُ تو ھما راجاں کہ چمداری مئے ساھگ ءَ گوں نہ ٹھینت، مئے جِند دوریں ھبرے،مِھروان اے دنز ءُ گُبار منی تئی چمانی دیم ءَ داں کدّ ءُ انچو ودّ ایت ءُ نِدارہ کنت؟-

مِھروان ! اگاں مرچی کمانڈر اسلم بلوچ ءَ وتی زھگ ریھان بلوچ ءَ اولی پِدائی مہ کُت اِنت گُڑا بِہ گِند ئے دگہ پِدائی مہ بوتیں،بَلے مرچی ھما اسلم بلوچ ءِ بدولت اِنت کہ ھر بلوچ ءَ کپن بَستگ ءُ پہ مَرگ ءَ ساجو انت ھمائی ءِ بدولت اِنت کہ ھُمک سرمچار ءُ ھمُک بلوچ ءَ را وتی ملکموت کوپگاں گون اِنت ءُ دلیری ءَ گوں جُنزان اِنت،ھمے بلوچ کہ وھدے تِیرانی گونڈلاں گوں رجّگ بیت گُڑا کندگ ءَ اِنت ءُ ھمے ساھتاں اَنچو گَل اِنت کہ پہ گُلزمین شھید بوّگ ءَ اوں چو کہ ماتے گَل بیت ما بَچّے یے آروس ءَ۔

مِھروان ! گُشگ ءِ مُول ءُ مُراد کہ تو ھما پِدائیانی اولی اسلم ءُ رِیھان ئے۔ ترا کپن بندگی اِنت،تِیر چُکّگی اَنت،بَلے گام دارگی نہ اَنت ءُ ھمے داب ءَ روگی اِنت۔

منی گار بوّگ ءَ ساری ترا منی سنگر پہ مُھکمی گِرّگی اِنت ءُ گوں تِیرانی لوجگ ءَ جنزگی اِنت ءُ دیم ءَ روگی اِنت مِھروان ! منی گار بوّگ ءَ ساری زُبان تی؟-

روان اِنت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نیشنل موومنٹ جرمنی ھنکین ءِ نیمگ ءَ چہ شمبے ءِ روچ ءَ جرمنی ءِ راجدانی برلن ءَ یک زھرشانی ءِ برجم دارگ بیتگ۔

بلوچستان ءَ زورانسری بیگواھی ءِ آماچیں سیاسی جھدکارانی سی ٹی ڈی ءِ دست ءَ دروگیں دیم پہ دیمی جنگانی نام ءَ نشانگ کنگ ءُ کُشگ ءِ ھلاپ ءَ زھرشانی برلن گیٹ ءِ دیم ءَ برجم دارگ بیتگ، زھرشانی ءَ بھرزیروکیں مردماں پلے کارڈ ءُ بینرز دست ءَ بیتگ اَنت ءُ بلوچستان ءَ برجاھیں زوراکیانی ھلاپ اوگام جنان ءَ میان اُستمانی برادری ءَ چہ دزبندی کُتگ کہ بلوچستان ءِ تہ ءَ پاکستانی لشکریانی دست ءَ سیاسی جھدکارانی نشانگ کنگ ءُ کُشگ ءِ ھلاپ ءَ توار چِست کنگ ءِ دز بندی کُتگ۔

زھرشانی ءَ گوں بلوچ نیشنل موومنٹ ءِ صدر حمل بلوچ ءُ جنرل سیکریٹری اصغر بلوچ ءَ تران کنان ءَ گُشت کہ پاکستانی ریاست ءَ سیاسی جھدکارانی نشانگ کنگ، زورانسری بیگواھیاں پد دروگیں میڑانی تہ ءَ آوار جتگیں مردمانی شھید کنگ ءِ یک درچ ءِ بنا کُتگ۔

آیاں گُشت کہ چہ سالاں پاکستانی چیریں گلانی زنداناں بندیں سیاسی جھدکارانی دروگیں میڑانی تہ ءَ کُشگ بلوچ نسل کشی ءِ شل اِنت، اگاں انسانی اگبالانی جھانی گل بلوچستان ءِ چُشیں زوراکیانی سرءَ ھاموش بہ بنت گُڑا انسانانی ھلاسی ءِ ودی بیت کنت۔

آیاں گُشت کہ گوستگیں لھتیں ماھانی تہ ءَ بازیں کساسے ءَ بیگواھیں مردم دروگیں میڑانی تہ ءَ کُشگ بیتگ اَنت کہ چہ بازیں سالاں پاکستانی چیریں گلانی دست ءَ زورانسریں آوارجنی ءِ آماچ اَنت۔

آیاں گُشت کہ ما مروچی اِد ءَ دودمانیں جھان ءِ دیم ء بلوچستان ءِ تہءَ بیوکیں پاکستانی زوراکیاں پدر کنگ ءَ اِنت۔

زھرشانی ءِ وھد ءَ جرمن ءُ انگلش زبان ءَ نبشتگیں یک پنتاکے ھم بھر کنگ بیتگ، کہ اِشی ءِ تہ ءَ دروگیں میڑاں کُشگ بیتگیں سیاسی جھدکارانی سرپدی ءُ دگہ زوراکیانی بارو ءَ سرپدی داتگ۔

نبشتانک: بلوچی مھر ءُ راجدوستی لوٹ ایت

نبشتہ کار: شاری بلوچ

دی بلوچستان پوسٹ

دنیا ءِ ھر وڑیں گُلامیں راجاں آیانی جِند ءِ راجی زُبان ماں وانگجاہ ءُ دربرجاھاں وانینگ نہ بیت اِنت چی ءَ کہ دُژمن ءِ مُدام ھمے جُھد بیت کہ گُلامیں راج ءِ راجی زُبان لگتمالی ءِ آماچ بہ بیت یا دائمی گار ءُ بیگواہ ئِے بہ کن آں پمیشکا دُژمن گلامیں راج ءِ پدریچ ءَ وتی زورگِریں زُبان ءُ وتی دْروگیں راجدپتر ءَ وانین ایت کہ گُلامیں راج ءِ پدریچ کم کم ءَ مجگی گُلام جوڑ بہ بیت۔ گُلام ءِ ورناھیں نودربر وتی جِند ءِ گْوست ءُ راجدپتر ءَ بے ھیال بہ بنت۔ اگاں ما بلوچ ھورت چاری بہ کن ایں گُڑا ما یکپارگی سرپد بہ ایں کہ بلوچ راج ھم یک مجگی گُلامے کہ آئی ءَ وتی راجی زُبان ءَ بے کساس ڈالچار کُتگ۔ مرچاں ھر بلوچے ءَ بچار کہ گپ ءُ تران ءِ وھد ءَ ھم وتی راجی زُبان ءِ زگریں گالاں ڈالچار کنان ءَ ھندی ءُ پارسی ءِ گالاں جاہ دنت کسے گْوش ایت “من نہ سمجھ اِت”، “من ءَ پتا نہ اِنت” ءُ “من مصروف آں”
بزاں اے مجگی گلام ءَ اے سما ھم نہ انت کہ تو وت یک بلاھیں راجے ئے، تو یک شاھگانیں زُبانے ءِ واھُند ئے۔ تو وتی زُبان ءِ”پھمگ، سرپد بوگ ءُ زانگ” ءِ وڑیں سے سے ئیں زگریں گالاں ڈالچار کن ئے ءُ بزگیں ھندی ءِ یکیں گال “سمجھگ” ءَ زور ئے! زاناں اے سمجھگ بلوچی گالے؟ مارا جیڑگ لوٹ ایت کہ ما چی ءَ وتی راجی زُبان ءِ زگریں گالاں وت لگتمال ءُ ڈالچار کنگ ءَ ایں! باید انت ما وتی راجی زُبان ءِ زگریں گالاں کارمرز بہ کن ایں کہ ھمے لگتمال ءُ ڈالچار بوتگیں گالاں ھاٹیگ بہ رس ایت۔ ما بہ گْوش ایں “من نہ پھم اِت یا سرپد نہ بوتگ آں”، “من ءَ سما نہ اِنت” ءُ “من دزگٹّ آں” نَیکہ ما ھندی، پارسی ءُ سرائیکی ءِ گالاں ماں وتی شھدیں زُبان ءَ ھوار بہ کن ایں چی ءَ کہ ما پیش ءَ گُلام ایں ءُ مئے راجی زُبان گار ءُ بیگواھی ءِ آماچ اِنت۔

بلوچی مئے وتی راجی ءُ ماتی زُبان اِنت، ما ایشی ءَ ابرامی ونت کن ایں، سرپد بَہ ایں۔ تو وت بلوچے ئے تھنا اشتاپ مہ کن، پہ بلوچ ءَ بلوچی دربرگ ءَ دو روچ لگ ایت۔ بچار ما پہ پارسی، ھندی ءُ انگریزی ءِ دربرگ ءَ دہ سال جن ایں بلے پہ وتی راجی زُبان ءِ پھمگ ءُ دربرگ ءَ دو یا سے روچ لگ ایت، بزاں مارا تھنا درونت وانگ لوٹ ایت۔ ما لوٹ ایں کہ شُما ھر یک راجی زُبان ءِ بلاھیں نبشتہ کار ءُ زُبانزانت جوڑ بِہ بَہ اَت۔

وھدے کہ تو درونتاں سرجمی ءَ وان ئے گُڑا تو جُھد بہ کن کہ دزھُورکی ءَ گالرِداں نبیسّان ءُ وتی ردیاں راست بہ کن ئے۔ اگاں تو ھمے داب ءَ جُھد بہ کن ئے گُڑا تو زیت بلد بہ ئے بلے اشتاپ مہ کن، ھر چیزے نبشتہ کن ئے گُڑا آئی ءَ دو رند ءَ وت وان ءُ آئی ءِ ردیاں بہ کش چہ ردیانی راست کنگ ءَ تو بلوچی نبشتہ بلد بہ ئے۔ اگاں تو دگرے ءِ نبشتانکے وان ئے گُڑا آئی ءَ ھم پہ ردیانی چارگ ءِ جُھد بہ کن بزاں یک انچیں درشاندابے ءَ کہ تو وت اُستادے ئے تو یک نودربرے ردیاں راست کنگ ءَ ئے۔ پہ راجی زُبان ءِ دربرگ ءَ مھر ءُ دلبڈی لوٹ ایت، مارا راجدوستی ءِ مارشت ودی کنگ لوٹ ایت۔ اگاں ما پیسر درونتاں وان ایں گُڑا ما راجی زُبان ءَ سے روچ ءِ تہ ءَ زبر ءُ بلد بہ ایں۔

دومی ما بے ھال مہ بَہ ایں کہ بلوچی زُبان ھم راج ءِ وڑ ءَ زیردست اِنت پمیشکا پہ بلوچی زُبان ءِ دیمروئی ءَ ھچ وڑیں سرکاری آسراتی نیست انت، ناں کہ مئے راجی زُبان ماں وانگجاھاں وانینگ بیت ءُ نَیکہ پہ زُبان ءِ دیمروئی ءَ بلوچی روتاک ءُ شریں گِندگُشی چینلے ھست پمیشکا ما دْراہ راجدوستیں بلوچ وت ماں وت وتی راجی زُبان ءَ وانگ ءُ وانینگ ءَ ایں کہ بلوچ راج ءِ تہ ءَ مئے شھدیں زُبان ءُ راجی پجّار بلوچی ءِ وانگ ءُ دربرگ البار بہ بیت۔ البت پہ اے درگت ءَ یونیورسٹی ءُ کالجانی بلوچ نودربراں سک جُھد کنگ لوٹ ایت۔ باید اِنت بی ایس او ءِ نودربر وٹس ایپی وانگجاھاں اڈ بہ کن اَنت ءُ راج ءِ نودربراں راجی زُبان ءَ درونتاں وانین اَنت۔ ھمے داب ءَ ھر نودربرے پیسبُک ءُ وٹس ایپی دربرجاھاں اڈ کنان ءَ وتی سْیاد ءُ وارساں ھم بلوچی وانگ ءُ دربرگ ءِ سکین دنت چی ءَ کہ راج ءِتہ ءَ راجدوستی ءِ مارشتانی ودی کنگ ءَ بلوچی وانگ ءُ دربرگ اَلمی انت انچوشکہ راجی زُبان ءِ زُبانزانت واجہ ڈاکٹر ناگُمان گْوش ایت “داں وھدے کسے زُبان دوست مہ بیت آ راجدوست بیت نہ کنت” پمیشکا پہ بلوچ راج ءِ یکجاہ، یکمُشت ءُ تپاکی ءَ بلوچی وانگ ءُ وانینگ سک اَلمی اِنت۔

بلوچی مئے وتی راجی پجّار اِنت، بلوچ راج ءُ بلوچی شالا دیمروئی بہ کنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سنگت شہید مزار ءِ نام ءَ

عُمرمُراد

دی بلوچستان پوسٹ

دوستاں پہ گُلابے ات پہ دُژمناں تَلاارے ات
مزارے ات، مزارے اَت آجُنز ءِ نَر مزارے اَت

تئ کَندگانی شَھم چو ، اَنارکے ءِ انارے اَت
تئ گِندُکانی زید چو ، شال ءُ کندھارے اَت

تئ لاگری ءِ کوپگاں لیڈَھانی بارے ات
کسّی گِلّہے نہ داشت کہ کار اَنچیں کارے اَت

گوں اوّلی گندگ ءَ ھما زند ءَ مرگ یارے اَت
گوں ھرکس ءَ ٹَہِت آ مَہری وش مہارے ات

من سہتُکے ءَ ھوں نہ گریت ، تئ رَپتِن گَم ءَ
اے جیگ ءِ ھون میچلی دیدگانی ھارے اَت

اے زند دَمکے ءِ دپ ءَ سَھتَکے دُچارے اَت
اے زند کؤرے ءِ دپ ءَ رُکستی ھوارے اَت

زی دَنزے ات مُجے، ءُ لشکری توارے ات
من زانت چود ءَ گوستگیں مرد شھسوارےات

تو گون اتئے اے زندگی پُلے اَت بہارے اَت
ترا چہ پد اے زندگی سُتکگیں پَلارے ات

چوں جلوہ دارانت بیا بچار دست ءِ ھِنّی ھانُل ءِ
تئ ھون ءِ تِرینزُکے ھُمک نکشے ات نِگارے اَت

اے ساہ چو سُوچِنے منی رگاں نوں جِکّ جنت عُمر
اے بُزدلیں دلوں گُشئے بس دریکگی توارے اَت

انڈئن پریمئیر لیگ (آئی پی ایل) دوھزار بیست ءُ یک ءِ چِل ءُ ششمی گوازی دبئی انٹرنیشنل کرکٹ پٹ ءَ دھلی کیپیٹلز ءُ ممبئی انڈینز میان ءَ بوتگ – دھلی ءَ ممبئی چار وکٹاں پروش داتگ ءُ گوازی وتی نام ءَ کُتگ –

دھلی ءِ کپٹن رشبھ پنت ءَ اول ءَ ٹاس کٹیتگ فیلڈنگ ءِ پیسلہ کتگ – ممبئی ءِ کپٹن روہت شرما ءَ دہ بالانی سر ءَ یک چوکائے جتگ ءُ ھپت رن جوڑ کتگ اویش خان ءَ آؤٹ کتگ – کوٹنٹن ڈی کاک ھژدہ بالاں نوزدہ رن جوڑ کتگ یک چوکا ءُ یک چکے ءِ جتگ ءُ آؤٹ بوتگ – سوریا کمار یادو ءَ بیست ءُ شش بالاں سِی ءُ سَے رن جوڑ کتگ ءُ آوٹ بوتگ کہ اکشر ءَ آؤٹ کتگ سوربھ تیواری ءَ ھژدہ بالاں پانزدہ رن جوڑ کتگ ءُ اے ھم اکشر ءَ آؤٹ کتگ – اے جینت ءَ بس چار بالاں یانزدہ رن جود کتگ ءُ گڈسر ءَ کرونال پانڈیا ءَ گوازی کنان ءَ آکری بال ءَ چکائے جتگ ءُ ممبئی رن یک سدو ءُ بیست ءُ نھ ءَ سر کُتگ انت –

بالنگ ءَ اویس ءَ چار اوور ءَ پانزدہ رن داتگ ءُ سَے وکٹ گپتگ ءُ اکشر ءَ چار اوور ءَ بیست ءُ یک رن داتگ ءُ سَے وکٹ گپتگ ھمے وڑ نورٹجے ءُ اشون ءَ ھم یک یک وکٹ گپتگ –

دھلی ءِ لیبیاں گوازی کنان ءَ شیکھر دھون ءَ ھپت بالاں یک چکائے جتگ ھشت رن جوڈ کتگ ءُ آؤٹ بوتگ وھدیکہ آئی ءِ ھمراہ پرتھوی شاہ شش رن جوڑ کتگ ءُ کرونال ءِ دست ءَ ایل بی ڈبلیو بوتگ اسٹیون نھ رن جوڑ کتگ ناتھن ءَ بولڈ کتگ –

پنت ءُ سریئس ایئر ءَ بیست ءُ ھپت رن جوڑ کتگ، گوازی کنان ءَ پنت ءَ بیست ءُ شش رن ءِ تہ ءَ سَے چوکا ءُ یک چکّائے جتگ ءُ پد ءَ ہاردک پانڈیا ءِ دست ءَ کیچ بوتگ –
اکشر پٹیل ءَ نھ رن جوڑ کتگ ءُ ٹرینٹ ءِ بال ءَ ایل بی ڈبلیو بوتگ ھمے وڑ شمرون ءَ ھشت بالاں دو چوکا جتگ ءُ پانزدہ رن جوڑ کتگ بلے ہیٹ مائر نود ءُ سَے اسکور ءِ سر ءَ جسپریت آؤٹ کتگ –

ائیر ءُ اشون ءَ جوانی ءَگوازی کنان ھواری ءَ سِی ءُ نھ رن جوڈ کتگ ءُ دھلی سوبین کتگ – اشون ءَ گڈی اوور ءِ کرونال ءِ اولی بال ءَ شش ءِ جتگ ءُ گوازی ھلاس کتگ –

کیچ تربت ءَ شھید فدا چار راہ ءِ سر ءَ گوستگیں روچ ءَ سھب ءَ ماھلہ بلیدہ ءَ پاکستانی فورسز ءِ نیمگ ءَ چہ تیرگواری ءَ شھید بوتگیں دہ سالی ئیں زھگ رامیز ھلیل ءِ کوش بگیری ءَ زیکیں روچ ءَ چہ آئی ءِ کھول ءِ مردماں نندانک جتگ ءُ زھرشانی برجاہ انت –

آئی ءِ کھول ءَ دوشگیں شپ انت کہ چار راہ ءِ سر ءَ نشتگ ءُ زھرشانی کنگ ءَ انت آھاں چہ بلوچ راج ءَ لوٹ کتگ کہ اے ھون ناھک ءِ بگیری ءَ گوں ما ھمکوپگ بہ بنت ءُ توار چست بہ کن انت – آھانی گوشگ انت کہ داں ھما وھد ءَ ما گونڈل ءِ جون ءَ چست نہ کنیں کہ آئی ءَ ھک دیگ مہ بیت ءُ کشندہ دزگیر کنگ مہ بنت جون تُری ماہ ءِ بہ گوز ایت ءُ ھراب بہ بیت – آ دوشیگیں شپ انت کہ پچیں آزمان چیر ءَ ھور ءِ سر ءَ نشتگ ءُ زھرشانی کنگ ءَ انت آھانی گوشگ ات کہ تنی وھدی سرکاری ھچ وڑیں ادارہ ھم نہ اتکگ –

دومی نیمگ ءَ بلوچ نیشنل مومنٹ ءَ رسانکدراں وتی شنگ کرتگیں درشان ءِ تہ ءَ بلیدہ ءَ پاکستانی پوج ءِ ناشرکاری ایرجتگ ءُ گوشتگ کہ بلیدہ ءَ پاکستانی پوج ءَ یک گسے ءَ بیڑ بُرتگ، تیرگْواری ءَ دہ سالی ئیں زھگ ءِ شھید کرتگ-

جارکش ءَ گوشتگ کہ دہ سالی زھگ رامز ءِ کوش ءُ ھپت سالی ئیں رایان ءِ ٹپی بیگ ءِ وئیل بلوچستان ءَ برجاھیں زوراکی ءِ درچ اِنت۔ اے رستری ءِ آماچ دہ سالی ئیں رامس شھیدی ءِ دروشُم ءَ بہ بیت یا سیزدہ سالی ئیں امیر مراد ءِ گون ءَ بدکاری ءِ وئیل اے دُرس پاکستانی شوندات ءِ بھر اَنت کہ بلوچستان ءَ یک کالونی جوڑ کنگ ءَ پد بندات کنگ بیتگ اَنت۔

جارکش ءَ گْوشتگ کہ اے یک سکیں ایرجنگی ءُ پژناکیں کارے۔ اے ھما وئیلانی دْرچ اِنت کہ سرجمیں بلوچستان ءَ ھمک روچ بیگ ءَ اَنت۔اے ایردستی ءِ نشانی اَنت ایردستیں راجانی گون ءَ بیتگیں اے رویشت گْوستانک ءَ مارا دست کپ اَنت بلے بیست ءُ یکمی کرن ءَ یک ڈیھے کالونی جوڑ کنگ ءُ ایردستیں رویشت ءِ دارگ مردمگری ءُ مردمی ارزیشتانی چَپ ءَ اِنت پاکستان اے نوکیں دور ءَ ھم بلوچستان ءَ زورگِر ءُ کالونی دارگ ءُ زوراکی کنگ ءَ اِنت ایشی ءِ درور مرچیگیں جھان ءَ بوت کنت کہ دز مہ کپ ایت۔

آئی ءَ گْوشتگ کہ جھان ءِ تہ ءَ بازیں گلے پہ مردمانی زندمان ءَ جُھد کنگ ءَ اَنت بلے پاکستان جھان ءَ ھرچیز کنت، نہ ایوک ءَ کالونیلزم برجاہ داشتگ بلکیں زوراکی ءَ زھگاں ھم نشانگ کنگ ءَ اِنت اے رویشت پہ زرگیپتیں گُلاماں برجاہ دارگ بیتگ۔

آئی ءَ گشتگ مرچیگیں جھانی دیمروئی کنگ ءَ پد جھان ءَ چوشیں وئیل نہ بیگ ءِ برابر ءَ اِنت بلے پاکستان مرچی ھم بلوچستان ءَ کرون واستا ایردستانی سر ءَ بیتگیں رویشت برجاہ داشتگ۔

جارکش ءَ گْوشتگ کہ بلیدہ ءَ بی ایس او ءِ سرکماش ظریف رند ءِ گس ءِ سر ءَ اُرش ءُ دہ سالی ئیں زھگ ءِ شھید کنگ ءَ دُرسیں مردماں پادآیگ ءُ پاکستان ءِ بگیری ءَ کینگ ءِ درشان کنگی اِنت۔ ظریف رند ءِ لیکہ ءُ پاکستان ءِ پریم ورک ءِ سیاست ءِ گون ءَ بگیری ءَ ابید کسے ءِ گس ءَ دور کنگ، تیرگواری ءَ زھگانی نشانگ کنگ ءَ نہ منّ ایں۔

آئی ءَ گشتگ پاکستان ءِ اے رویشت ءَ مئے گپ راست کُرتگ کہ اگاں تو یک بلوچے ءِ گڑا ترا چہ پاکستان ءَ آجوئی لوٹگی اِنت چے ءَ کہ اِد ءَ آپ، لین، جاندراھی آسراتی ءُ ھرچیز ءِ لوٹگ ءَ توگوں تیراں ژانگول کنگ بہ ئے۔

ھمے وڑ چاگردی ترامجاھاں بلوچستان ءِ ہیومن رائٹس کونسل ءُ سیاسی ءُ چاگردی باسکاں رامز ھلیل کوش ایرجتگ ءُ کشندھاں دزگیر کنگ ءُ گونڈل ھک دیگ ءِ لوٹ کتگ –