TBP Balochi

سربوتگیں ھالانی رِد ءَ کیچ تربت ءَ اسکول فار آل ویلفئیر آرگنائزیشن ءِ نیمگ ءَ بولان گرائمر اسکول (بولان انگلش لینگویج سینٹر) ءَ یک کتابی میڑہ ءِ برجم دارگ بوگ ءَ اِنت اے کتاب میڑہ ءِ یک بھرے پیش ءَ برجم دارگ بوتگ دومی بھر بولان گرائمر اسکول ءَ چارشمبے ءِ روچ ءَ ھپت جولائی ءَ برجم دارگ بوگ ءَ انت –

اے درگت ءَ ایس ایف اے ءَ چاگردی ترامجاھاں وتی شنگ کرتگیں جار ءِ تہ ءَ گوشتگ کہ مئے کتاب میڑہ ءَ پہ نودربرانی ھاتر ءَ بیست درسد ڈسکاؤنٹ کنگ بیت ءُ پہ کتاب وانوکاں شریں نھاد ءَ اردو ، انگلش ءُ بلوچی نبشتہ کارانی ھر رنگیں کتاب دست کپیت اِنت –

جار ءِ تہ ءَ دیمتر ءَ گوشگ بوتگ کہ کتاب میڑہ دو بھر ءَ اِنت اولی بھر ءَ زالبولانی ھاتر ءَ اِنت ءُ دومی بھر ءَ جنین ءُ مردین نودربر ھر ھما کس کہ کتاب وانگ ءِ واھشت ءَ داریت اتک کنت –
اولی بھر ادار ھشت ءَ بگر تاں دہ ءَ آسر بیت ءُ دومی بھر ادار دہ ءَ بگر تاں سَے ءَ برجم دارگ بیت اِنت –

جار ءِ تہ ءَ گوشگ بوتگ کہ میڑہ ءَ آھگ ءُ وتی کتابانی زورگ ءَ بیھال مہ بئے اِت چیاکہ شمے بھرشت توجیلے سازیت –

شئیر: بس ندارہ بچار

آھوگ گُل

دی بلوچستان پوسٹ

مھر وھدے وفا ءِ نگاھاں کپیت
سنگتی دوستی گاریں راھاں کپیت
نیکیں نیّت دل ءِ نقس ءُ سیت ءَ کپیت
سُجدگ ءَ سر پہ لالچ مسیت ءَ کپیت
بس ندارہ بچار

شپ تا چمّاں نہ کنت بند روچ ءِ تب ءَ
داں کہ کینگ نزانت کینگ ءِ متلب ءَ
دانکہ ننگ ءَ پہ غیرت نکنت زِرد تئی
دوزہ ءِ چارگ ءَ جنت چاگرد تئی
بس ندارہ بچار

ناں من ءَ فکر تئی ناں ترا مئے ھیال
بس گوز انت زار ءُ زِد روچ ءُ شپ ماہ ءُ سال
درد ءُ غم پہ حسد دست ماں دست باں
پہ شگان ءُ ھبر تئی قدم چِست باں
بس ندارہ بچار
پرچیا؟ جنگ پہ ساھگاں ما ءُ تو
یکّیں راہ ءِ مسافر اگاں ما ءُ تو
آزمان ءُ زمین ءِ اے دوری چیا؟
آھنیں باسکاں چو نزوری چیا؟
بس ندارہ بچار

دود ءُ شھدیں زبان جنگ باہوٹ مئے
چی اِنت منزل بچار چی گرز لوٹ مئے
مارگ ءُ پھمگ ءِ چی گلگ ھمبلاں
گُل وتا گُنگ کن ھچ مہ گُش جائلاں
بس ندارہ بچار

سر بیتگیں ھالانی رد ءَ روکپتی بلوچستان ءِ دمگ سرباز ءَ ایرانی پولیس ءَ دو کس دزگیر کنگ ءَ پد بیگواہ کرتگ اَنت –

بلوچ کمپئن فعالین ءِ گوشگ اِنت کہ گوستگیں روچاں سیستان و بلوچستان ءِ دمگ سرباز ءِ ھند گوردر ءَ یک لوگے ءِ سر ءَ پولیس ءُ چیریں ادارھاں بیڑ برتگ ءُ اود ءَ دو کس آوار جنگ ءَ پد بیگواہ کنگ بیتگ اَنت –

آوار جنگ بیتگیں مردمانی پجار عبدالباسط اربابی ء ابراھیم ءُ بلال اربابی ء عبدالمجید ءِ ناماں زانگ بیتگ اَنت –

ایرانی لشکر ءِ گوشگ اِنت ھردوکیں مردم دُزیاں دزمانجن بیتگ اَنت کہ آیاں چریں دُزی کرتگ –

بلوچ کمپئن فعالین ءِ گوشگ اِنت کہ ھردوکیں مردم دزگیری ءَ پد ایرانشھر ءَ برگ بیتگ اَنت ءُ اود ءَ پد ءَ دیم پہ زاھدان ءِ زنداناں برگ بیتگ اَنت –

ھمے رنگ ءَ دَہ روچ ءَ پیسر سیستان و بلوچستان ءِ دمگ کسرکند ءَ یاسر رئیسی ء ابابکر جھمنند کوشوک ھم آوار جنگ ءُ بیگواہ کنگ بیتگ –

روکپتی بلوچستان ءَ بازیں ھسابے ءَ مردمانی گرگ ءُ دزگیری ءُ زندانیانی ھال یکشل ءَ پیداک اَنت ءُ گرگ بیتگیں مردم جتا جتائیں کارانی بھتاماں گرگ بیتگ اَنت –

پنچ شمبے ءِ روچ ءَ پاکستانی پوج ءِ سر ءَ بولان ءُ تُربت ءَ بیتگیں دو جتائیں اُرشانی تہ ءَ پنچ سپاھیگ مرتگ اَنت ءُ دگہ بازینیے ٹپی بیگ ءِ گمان اِنت۔

سربیتگیں ھالانی رد ءَ پنچ شمبے ءِ روچ ءَ بولان ءِ ھنکین سانگان ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ تیرگواری کُتگ ءُ تیرگواری ءِ آسرءَ پنچ پوجی کارمند کُشگ بیتگ اَنت۔ مرتگیں کارمندانی پجار نائک نادر، حوالدارظفر، بشیر، ھدایت ءُ سپاھی نور اللہ ءِ نام ءَ چہ بیتگ اَنت۔

داں انگت ءَ ھچ کجام گل ءَ اے اُرش ءِ زمہ واری نہ من اِتگ، بلے پاکستانی لشکریانی سر ءَ ھمے دمگ ءَ پیسر ءَ ھم بازیں اُرش کنگ بیتگ اَنت۔ بلوچ آجوئی لوٹوکیں سلاہ بندیں گلاں ھاس بی ایل اے ءَ مدام چُشیں اُرشانی زمہ واری من اِتگ اَنت۔

ھمے پیم ءَ تُربت ءَ پاک ھوٹل ءِ نزیک ءَ پاکستانی پوج ءِ بنجل گوں دستی بمب ءَ نشانگ کنگ بیتگ۔ داں اے وھد ءَ واکدارانی نیمگ ءَ تراک ءِ درگت ءَ ھچ پئیمیں اھوال دیم ءَ نیتکگ اَنت، بلے تراک ءِ سوب ءَ مزنیں تاوان رسگ ءِ گمان ھست اِنت۔

کوپا امریکہ ءِ چارمی راؤنڈ ءِ گوازی ءَ یوروگاؤ ءُ پیراگاؤ ٹیم ءَ دو دو گول ءَ باج برتگ گوازی وتی نام ءَ کُتگ –

کوپا امریکہ ءِ گوازی برجاہ انت دوشی شپ ءَ چارمی راؤنڈ ءِ سیمی گوازی یوروگاؤ ءُ بلوؤیا ءِ میان ءَ بوتگ ءُ چارمی گوازی چلی ءُ پیراگاؤ ءِ میان ءَ بوتگ – سیمی گوازی ءَ بلوویا ءِ نیمگ ءَ چہ ھچ گول کنگ نبوتگ وھدیکہ یوروگاؤ ءِ لیبیاں جوانی ءَ گوازی کنان ءَ دو گول اسکور کتگ گوازی وتی نام ءَ کُتگ – چارمی گوزی ءَ چلی ٹیم ءِ نیمگ ءَ چہ ھم ھچ گول کنگ نبوتگ پیراگاؤ لیبیاں دو گول اسکور کتگ گوازی وتی نام ءَ کتگ –

یوروگاؤ ءُ بلوویا ءِ میان ءَ بوتگیں گوازی ءَ یوروگاؤ ءِ نیمگ ءَ چہ دو گول کنگ بوتگ کہ یوروگاؤ ءِ لیبی جؤن پرینندو ءُ ایڈنسن کیوانی ءَ داتگ وھدیکہ پیراگاؤ ءِ لیبی برائن سمودیو ءُ میگوئل المیرون ءَ چلی لیبیانی دیم ءَ یک یک گول ءِ اسکور کتگ گوازی وتی نام ءَ کتگ –

کوپا امریکہ ءِ پنچمی راؤنڈ ءِ اولی گوازی برازیل ءُ ایکواڈو، وینزیلا ءُ پیرو ءِ میان ءَ دو شمبے روچ ءَ بوگ ءَ انت ـ

بلوچستان یک ایمرجنسی زون ءِ ندارگ ءَ پیش دارگ اِنت کہ اود ءَ ناں ترا ریاستی کانود ءِ گندگ ءَ کئیت ءُ ناکہ میان استمانی انسانی ھکانی کانودانی پاسداری بوگ ءَ اِنت- ماماقدیر

بلوچستان ءِ بنجاھی شھر شال ءَ پریس کلب ءِ دیم ءَ وی بی ایم پی ءِ زھرشانی برجاہ، زھرشانی ءَ مروچی چار ھزار ءُ سَے سد ءُ پنجاہ ءُ پنچ روچ سرجم بوتگ -چہ ھاران ءَ سیادی داروکیں سیاسی ءُ چاگردی باسک شکور بلوچ، رحیم بلوچ ءُ دگہ مردماں بنجل ءَ اتکگ ءُ بیگواھیں مردمانی کھولانی گوما دلپدردی درشان اتگ –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ دنیا ءِ بازیں راجانی تہ ءَ مردین ءُ جنیناں زوراکی ءِ بگیری ءُ زورانسری آوار جنگ ءُ بیگواہ بوتگیں مردمانی یل کنائینگ ءِ ھاتر ءَ پُرایمنیں جُھد کُتگ کہ مروچی راج دپتر ءِ بھر ءِ جوڑ بوتگ اَنت –

آئی ءِ گوشگ اَت کہ ھمے وڑ ءَ بلوچستان ءِ تہ ءَ زوراکی ءِ آماچ بوتگیں ھزاراں بیگواھیں بلوچانی ھاتر ءَ وی بی ایم پی ءِ سنگتاں دیمونی داتگ ءُ پاکستانی زوراکیانی دیم ءَ پرایمنیں جُھد یکشل ءَ برجاہ داشتگ آھانی اے راجدپتری پُرایمنیں جُھد سرجمیں دنیا ءِ ایردستیں راجانی ھاتر ءَ روکیں چراگ ءِ درور اِنت –

ماما قدیر بلوچ ءِ گوشگ اَت کہ بلوچستان یک ایمرجنسی زون ءِ ندارگ ءَ پیش دارگ اِنت کہ اود ءَ ناں ترا ریاستی کانود ءِ گندگ ءَ کیت ءُ ناکہ میان استمانی انسانی ھکانی کانودانی پاسداری بوگ ءَ اِنت –

آئی ءِ گوشگ اَت کہ بلوچستان ءِ تہ ءَ اے وھدی وفاق ءِ رِد ءَ یک سوبائی سرکار ءِ کار کنگ ءَ اِنت کہ آئی ءِ کِرا ناکہ راجی مینڈنٹ ءِ ھست ءُ ناکہ اے شریں یک گچین کتگیں سرکارے –

یک جولائی ءَ تاں مئے گوما ھک کنگ نبوت سرجمیں ضلع ءَ زھرشانی کنیں – دمگی زمیندار

سربوتگیں ھالانی رِد ءَ گوادر ءَ دوسد ءُ پنجاہ باڈر ءِ زمینانی سر ءَ زورانسری گرگ ءِ بگیری ءَ دمگی مردماں سرجمیں ضلع ءَ زھرشانی کنگ ءِ جار پرینتگ –

دمگی زمیندارانی گوشگ انت کہ دو سد ءُ پنجاہ ءِ زمین مئے پت ءُ پیروکی پُشتی زمین انت کساس سد سال بیت کہ مارا گون انت بلے نوں مئے پت ءُ پیروکی زمینانی سر ءَ تاکتوریں مردم وتی پنچگاں ایر کنگ ءَ انت- آھانی گوشگ انت کہ اے ناھکی ءِ بگیری ءَ ما گوادر ءِ ڈی سی ءُ ڈی ایس پی ءُ ایس ایچ او ءِ گور ءَ ھم باز براں شُتگ انت بلے اشی ءَ ابید آ ھچ گوشگ ءَ نہ اَنت ءُ دومی نیمگ ءَ مئے پت ءُ پیروکی زمینانی سر ءَ گیرکانودی زورگری کنگ ءَ اَنت –

آھانی گوشگ انت کہ اے زمین مئے مِلک انت پہ وتی مِلک ءِ ھاتر ءَ ما دستاں سر ءَ کُت نشت نہ کنیں –

آھانی گوشگ اِنت کہ اگاں مئے جیڑہ گیش ءُ گیوار کنگ نبوت گڑا ما زھرشانی کنیں ءُ زھرشانی ءَ مکران کوسٹل ہائی وے بند کنگ بیت اِنت – اگاں مئے اے زھرشانی ءُ دگ ءِ بند آرگ ءِ میان ءَ زھرشانی ھواریں مردماں ھر وڑیں تاوان ءِ بہ رس ایت گڑا آئی ءِ زمہ وار گوادر ءِ ڈی سی اِنت –

دی بلوچستان پوسٹ پتر ھال ءَ سر بیتگیں ھالانی رد ءَ بلوچستان ءِ دمگ کیچ گومازی ءَ بیست ءُ سَے مئی ءَ پاکستانی پوج ءِ دست ءَ آوار جنگ بیتگیں اسامہ ء مھمد جان مروچی یل بیتگ ءُ وتی لوگ ءَ سر بیتگ –

اسامہ ءِ یل بیگ ءِ ھال ٹی بی پی ءَ گوں گپ کنان ءَ اسامہ ءِ کھول ءَ گوشتگ کہ مروچی اسامہ یل بیتگ ءُ وتی لوگ ءَ سر بیتگ –

اسامہ ءِ پجیگ ءَ دو کسانی یل بیگ ءِ ھال ھم بیتگ اَنت بلے تنی وھدی آیانی راستی پدر نہ بیتگ اَنت –

زانگ بہ بیت گوستگیں چیزے روچانی تہ ءَ کیچ ءَ ھواریں دمگانی تہ ءَ کسان سالیں ورنایانی آوار جنیانی تہ ءَ گیشی اتکگ ءُ مردمانی بھتام اِنت کہ پاکستانی پوج ءُ آئی ءِ جوڑ کرتگیں ڈیتھ اسکواڈ مردماں آوار جنگ ءُ گار کنگ اِنت –

دومی نیمگ ءَ شال ءَ گار ءُ بیگواھیں مردمانی ھاتر ءَ وائس فار بلوچ مسنگ پرسنز ءِ زھرشانی برجاہ اِنت –

گل ءِ گوشگ اِنت کہ ھمود ءَ کم کساساں مردم یل بیگ ءُ دومی نیمگ ءَ دوسری مردم گرگ ءُ گار کنگ بیگ ءَ اَنت –

بلوچستان ءِ دمگ کیچ ءَ جون ءِ ماھے تہءَ درزنانی کساس ءَ مردم بیگواہ کنگ بیتگ اَنت ءُ یکے ءِ زندان ءِ تہءَ کُشگے وئیل ھم دیما اتکگ۔

دی بلوچستان پوسٹ

کیچ ءِ بنجاھی شھر تُربت ءِ گھوڑا چوک ءِ ھند ءَ ناشناسیں مردماں یک مردمے آوار جنی ءَ پد بیگواہ کتگ کہ آئی پجار مھمد موسی ء مھمد امین نام ءَ بیتگ۔

بیگواھی ءَ پد زالبول ءُ گونڈواں ڈی سی آفس ءَ زھرشانی درشان کتگ، زھرشانی کنوکیں زالبولانی ردءَ گھوڑا چوک ءَ پجا نیاورتگیں سلاہ بندیں مردماں مھمد موسی ء مھمد امین چِست کتگ ءُ بیگواہ کتگ۔ زھرشانی کنوکاں اے سی تُربت ءَ گوں گند ءُ نند کتگ ءُ وتی بچ ءِ سلامتی ءَ یل کنینگ ءِ لوٹ کُتگ۔

زانگ بہ بیت گوستگیں روچ ءَ ھم تُربت ڈالی بازار آبسر ءِ جھمنند شاہ میر ءِ لوگ بانک حمیدہ بی بی ءَ تُربت ءَ پریس کانفرنس کنان ءَ گُشتگ کہ آئی بیست سالی یے بچ حسن ء شاہ میر سَے روچ پیسر سلاہ بندیں مردماں چہ لوگءَ دزگیری ءَ پد بیگواہ کُتگ وھدیکہ پولیس بیگواھی ءِ ارزی ءَ نبشتہ کنگ ءَ نہ اِنت حمیدہ بی بی ءِ رد ءَ آ بیگواہ کنوکیں مردماں پجءَ کار اَنت ءُ آیانی درگت ءَ سرجمیں اھوال پولیس ءَ دیگ ءَ پد ھم مئے چک یل کنائینگ نہ بیگ ءَ اِنت ءُ نہ کہ بیگواہ کنوکیں مردمانی ھلاپ ءَ کیس نبشتہ کنگ بئیگ ءَ اِنت۔

آئی ءَ گوشتگ کہ حسن ءِ آوار جنگ ءَ یک روچے پیسر ھمے پرائیویٹ سلاہ بندیں مردماں گوں مئے دپ جاک بیتگ ءُ چریشی ءَ پد آ فون ءِ سر ءَ یکشل ءَ بیھار دیگ ءَ اَنت، آوار جنگ ءَ پیسر مئے لوگ ءَ اشاں اُرش کرتگ ءُ مارا لٹ ءُ کُٹ کرتگ ءُ چریشی ءَ ما ٹپ ءُ ٹور بیتگیں ءُ ما نادراہ جاہ ءَ شتگیں ءُ ما وتی درمانی کرتگ –

بلوچستان ءَ سَے جتاھیں دمگاں دگ ءِ وئیلانی تہءَ دو گونڈواں ھوار دہ مردم بیران بیتگ بیتگ اَنت، ءُ سی ءَ گیش مردم ٹپیگ بیتگ اَنت۔ 

دی بلوچستان پوسٹ

اولی وئیل مستونگ کیڈٹ کالج کراس ءِ کرءَ ٹوڈی ءُ آلٹو گاڑیانی نیام ءَ ٹکر ورگ ءِ سوب ءَ دیما اتکگ، اے وئیل ءِ تہءَ دو کسان سالیں گونڈو ھمادمان ءَ بیران بیتگ اَنت وھدیکہ دو زالبول ھم ٹپی بیتگ اَنت۔ 

دومی نیمگ ءَ پنجگور ءِ میتگ گوارگو ءَ ڈومبان ءِ ھند ءَ دو ایرانی موڈل گاڑیانی وت ما وت ٹکرءِ سوب ءَ آس چِست بیتگ ءُ چہ ھمے آس ءَ دو مردم سُتکگءُ بیران بیتگ اَنت۔ 

وھدیکہ پنجگور ءَ دگہ یک دگ ءِ وئیل ءِ تہءَ چار مردم بیران بیتگ اَنت۔

پنجگور ءَ کاٹاگری ھندءَ ایرانی گاڑیانی نیام ءَ ٹکر ءَ چہ چار مردم بیران بیتگ، بیران بیتگینانی تہءَ دو مردم ءِ پجار ساجد ء ظہور ءُ اسامہ ء نبی داد جھمنند جائیںپروم ھوار اَنت داں انگت دگہ دو مردمانی پجار کنگ نہ بیتگ۔ 

ھمے وڑ ءَ بلوچستان ءِ دمگ لسبیلہ ءَ دگہ یک بیمناکیں وئیل ءِ تہءَ بس ءُ ٹرک ءِ نیام ءَ ٹکر ءِ سوب ءَ دو مردم بیران بیتگ اَنت ءُ سی ءَ چہ گیش ٹپی بیتگاَنت ۔

سربیتگیں ھالانی ردءَ وندر ناکہ کھارڑی ءِ نزیک کراچی ءَ چہ انتھک ءَ رؤکیں کوسٹر کوچ دگ ءِ کش ءَ اوشتاتگیں ٹرک ءَ گوں ٹکر اِتگ چریشی سوب ءَترندیں وئیلے آماچ بیتگ۔ 

بنداتی اھوالانی رد ءَ کوسٹر کراچی ءَ چہ میت ئے ءِ پجیگ ءَ اوتاک ءَ روگ ءَ بیتگ کہ وئیل ءِ آماچ ۔ وئیل ءِ تہءَ یک دوازدہ سالی گونڈو ءُ زالبول ءِھوار اِنت۔

ایدھی ایمبولینس وئیل ءِ جاہ ءَ سربیتگ، ٹپی جام غلام قادر سول ھسپتال حب ءَ برگ بیتگ اَنت کہ اشانی تہءَ ترندیں ٹپانی آماچ بنداتی دارو درمان ءَ پدکراچی ءَ پہ گیشتریں علاج ءَ دیم دیگ بیگ ءَ اَنت۔

زانگ بہ بیت کہ بلوچستان ءَ ھمک روچ دگانی وئیلانی تہءَ درزنانی کساس ءَ مردم ٹپی ءُ بیران بنت کہ اِشی سوب ءَ لس مردم بلوچستان ءِ دگانی ھرابیںجاور ءُ ڈرائیورانی نابزانتی گُش اَنت۔