TBP Balochi

نبشتانک: مزار ءُ بولان

نبشتہ کار: زِر نود بلوچ

دی بلوچستان پوسٹ

من ءَ ماہ ءُ سال یات نہ بنت کہ ما کدی دوچار کپتیں بَلے اِنچو یات اِنت کہ ھما زمانگ ءَ ما سیاست ءِ پڑا نوک اتکگ اِتیں گُڑا مزار ءِ ھمرائی ءَ من یک زمانگے گوازینت مزار ءَ باریں کدی وتی سیاست بندات کتگ اَت نہ زاناں بَلے من ءَ یات اِنت مزار ءِ ھمبرائی ءَ ما برے جاھے جُنزان اِت اِنت اے ھچبر نہ زانت کہ مزار نی وتی سیاست ءِ گُڈی سیمسراں رس اتگ –

مزار ءَ وتی شھر ءِ پیچ ءُ تابیں دمکانی سیاست مٹ کُتگ ات مزار ءَ زانت کہ بلوچ ءُ بلوچستان ءِ گُڈی کِشک ھمے یکیں اِنت سیاست ءَ چے پَد بلوچ اگاں سرپد بہ بیت کہ بلوچ ءَ ھم کِشک ھستیں کہ وتی جُنز ءَ دیم ءَ بہ بارت گڑا آ کِشک شور ءُ پارود ءِ کوہ اَنت، سیاھیجی، مزن بند، بولان ءُ زامُران ءِ آپ بند اَنت پمیشکا مزار شھر ءِ سیاست ءَ چہ در کپت ءُ کوہ ءُ اگاراں دُشمن ءِ ھلاپ ءَ سلاہ بند بوت۔

مزار ما اسل ءَ سکیں مردگ پرستیں مردم ایں گپے زان ئے آ روچی کہ تو جُنزگ ءَ ات اِت جنگ کنگ ءَ ات اِت کوہ ءَ گوں سرمچنڈاں دیوان کُتگ ات پہ بلوچستان ءِ ھاترا وتی زندگی ءَ کربان کنگ ءَ ات اِت بَلے ما ترا چے بے ھال ات اِنت ما ترا ھما روچ ءَ شمشتگ اَت کہ ما وتی سیاست یل داتگ ات ما ھچبر نہ زانت کہ مزار انگت جنزان اِنت مزار ءَ وتی کِشک چہ سیاست ءَ چے تاب داتگ نی جَنگ کنگ ءَ اِنت مرچی کہ تئی اَکس من دیست ترا باور کنت من یکبرئے ھچ وڑ ءَ ترا نہ زانت کہ تو ئِے من ءَ ھچ ھیال ءُ گمان نیست اَت کہ مزار جنگ ءَ جَننگ بوتگ من اے ھم نہ زانت کہ تئی زندگی ءِ گُڈی ساھت بولان ءُ شور پارود ءِ کوھانی تہ ءَ گوستگ اَنت من ھچبر نہ جیڑ اِتگ اَت کہ اے اَکس تئی اِنت دیرا پَد سنگت ءِ نبشتہ کُتگیں کسّہ ءِ کہ من ونت تئی نام منی دیم ءَ اتک من ھیران بیت آں ءُ پد ءَ اَکس چار اِت کہ اے ھما “گَنجل ” مزار اِنت کہ یک زمانگے پہ گار ءُ بیگواھیں مردمانی ھاترا جُھد کنگ ءَ اَت کہ ھمے مردم چہ بندیگ جاہ ءَ دربیا اَنت آجو کنگ بہ بنت مرچی ھمے مردے جند پہ بیگواھیں مردمانی واستا شھید کنگ بوتگ –

ھو مزار ما مردگ پرستیں کہ مرچی ترا ما یات کنگ ءَ ایں کراچی ءَ بگر دانکہ بلوچستان ءِ ھمک کُنڈاں تو وتی زیبائی ءِ چیدگ مِک کُتگ اَنت ءُ پہ زمین ندر بوتگ ئے پہ ھما سرانی ھاترا ندر بوتگ ئے کہ تو گوں ھما سراں یکجاہ پارود ءِ کوھانی تہ ءَ زندگی ءِ زبیائی دیستگ اَنت بلوچستان ءِ آوکیں باندات دیستگ، زندانے ھما سرانی واب سرجم کُتگ اَنت ءُ پیش داشتگ کہ پہ شمئے روگ ءَ ھم ما اے کِشک یل نہ داتگ مرچی اے گپ ءَ تو دلجم بو کہ ریاست ءِ دژمن تئی زندانے تہ ءَ بندیں مھرواناں وت ھال دنت کہ مزار شھید کنگ بوتگ مزار ءَ سیاست ءَ ابید کوہ ءَ جنگ ءَ شُتگ بولان ءِ کوھانی تہ ءَ جَنگ ءَ شتگ۔

مزار یار گندے تئی ءُ تئی سنگتانی کسّھاں ھما سنگت نبشتہ بکن اَنت کہ آ انگت سلامت اَنت کوہ ءَ نیشتگ انت تئی درستیں کسّہ گوں کوھے سنگتانی ارواہ ءَ بندوک اَنت آ شرتر زانت کہ تو چونیں کردارے ءِ ھُدابند بوتگ ئے تو جنگ ءِ پڑا گوں لگوریں ریاست ءَ چوں جَنگ داتگ دانکہ تو گُڈی تیر ءَ وتی ساہ پہ زمین ءِ ھاترا مدامی ندر کُتگ ءُ زمین تو وتی مدامی امبازاں زرتگ مزار تئی سنگت تئی کسّھاں شرتر آورت کُت کن اَنت کہ تئی وابجاہ ماں بولان ءِ کوھانی تہ ءَ اِنت تئی وابجاہ سنگتانی بُنجل ءِ نزیک ءَ اِنت آ سنگت من ءَ چے گِشتر تئی کردار ءَ شرتر سرپد اَنت آیانی تہ ءَ جمبوریں آس تئی روگ ءَ چے پَد گشتر جمبور گپتگ آ زان اَنت تئی کسّہ ءَ چہ کجا چے بندات بہ کناں۔

مزار تئی روگ ءَ چے من زانت کہ بلوچ ءَ نی گشتر جَنگ ءِ نیمگ ءَ جُنزگی اِنت جَنگ ءَ چے تو وتی زمین ءَ آزات کُت کن اِت جَنگ ءَ چے تو وتی نیلیں  زِر ءَ آزات کُت کن اِت جَنگ من آں ءُ ترا مئے آوکیں باندات ءَ پیشداشت کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پاکستان ءِ قبائلی دمگ ءَ سلاہ بندیں مردماں پاکستانی لشکریانی سرءَ اُرش کُتگ ءُ چار کارمند کُشتگ اَنت۔

اھوالانی ردءَ تیرگواری ءِ وئیل وزیرستان ءِ ھنکین میر علی ءِ ھند ءَ دیما اتکگ کہ اِشی سوب ءَ شار کارمند مرتگ وھدیکہ یک پولیس کارمند گوں اولاک ءَ بیگواہ بیتگ۔

کُشگ بیتگیں کارمندانی تہءَ حوالدار زاھد، حوالدار اشتیاق، لانس نائیک مجید ءُ لانس نائیک ولی ھوار اَنت۔

اھوالکار گُشگ ءَ اَنت کہ اولاک گوں پولیس ایس آئی ڈرائیور جاوید ءَ ھوار بیگواہ اِنت نشانگ بیتگیں کارمند شلپازئی بوبلی بنجل ءِ سرءَ ڈیوٹی سرانجام دیگ ءَ بیتگ اَنت۔

اُرش ءَ پد پھازگی لشکریاں سرجمیں ھنکین انگیراں کُتگ ءُ پَٹ ءُ پول بندات کُتگ وھدیکہ اُرش ءِ زمہ واری داں انگت ھچ گل ءَ نہ من اِتگ۔

بی ایس او ءِ چیئرمین ظریف رند ءِ لوگ ءِ سر ءَ پولیس ءَ ناگتی بیڑ برتگ، تیرگواری ءَ دَہ سالی ئیں زھگے بیران، ھپت سالی ئیں زھگے زدگ، برات دزگیر کنگ بیتگ ھمے وڑ ءَ کھول ءَ جون ءِ ھمراھی ءَ زھرشانی کنان ءَ دگ بند کرتگ –

چیئرمین ظریف رند ءَ پولیس ءِ بیڑ راست کنان ءَ گوشتگ کہ آ جون ءِ ھمراھی ءَ ھما وھد ءَ داں شھید فدا چوک ءَ نندانک نند ایت دانکہ پولیس لوگ ءِ سر ءَ بیڑ ءُ زھگ ءِ شھید کنگ ءِ سبباں نہ گوش ایت –

بلوچ اسٹوڈنٹس آرگنائزیشن ءِ بنجاھی چیئرمین ظریف رند ءَ دیمترا گشتگ کہ بلوچستان ءَ ناشریں پولیس ءَ یک رندے پد ءَ وتی بنکی ناشری کرد پیلو کنان ءَ مروچی بلیدہ ءَ مئے لوگ ءِ سر ءَ مزنیں سلاھاں گوں بیڑ برتگ ءُ اُرش کرتگ – زھگ ءُ زالبولانی سر ءَ تیرگواری کرتگ چریشی ءَ منی دَہ سالی ئیں براتزتک رامز خلیل پولیس ءِ تیرگواری ءَ شھید بیتگ ءُ ھشت سالی ئیں رایان خلیل تیرگواری ءِ سبب ءَ زدگ بیتگ ھمے وڑ منی مستریں برات خلیل رند پولیس ءَ دزگیر کرتگ ءُ برتگ –

آئی ءَ بھتام جنان ءَ گوشتگ کہ اے اُرش ناشریں پولیس ءَ مروچی سھب ءَ فجر ءَ ھما وھد ءَ کتگ کہ لوگ ءِ مردم درست واب بیتگ اَنت – لوگ ءِ چادر ءُ چار دیواریاں لگتمال کنان ءَ ڈیھ ءِ سلاہ بندیں دستاں ابید ءِ ارزی، ابید ءِ بیھار، ابید ءِ ھال دیگ ءَ اے ناشرکاری سرجم کتگ –

ظریف رند ءَ گُشتگ کہ ما جست کن لوٹ ایں کہ اے ڈیھ ءِ داروکاں، آئی ءِ ادارھاں، آئی ءِ سرکار ءَ، آئی ءِ مزنیں آمیدگس ءُ زمہ واریں واکاں اے کجام کانود اِنت، اے کجام دستور اِنت، اے کجام واک اِنت کہ چریشی ءِ سبب ءَ ڈیھ ءِ شھری اے وڑ ءَ پدردی ءَ کُشگ ءُ مھلوک ءِ زندگی جھنم ءِ آس ءَ کتگ؟ –

آئی ءَ گُشتگ کہ پولیس ءِ اے ناشریں امل ءِ سر ءَ ما بے ایمنی ءَ نہ نندیں، اشی ءِ بیر الم گرگ بیت اِنت، ھمک روچ لاشانی چِست کنگ ءُ کل کنگ ءَ ما دمبرتگ –

آئی ءَ گُشتگ کہ شھید رامز خلیل ءِ میت ءَ ما ھچ رنگ ءَ کل نہ کن ایں وتی کسان سالیں میت ءِ ھمراھی ءَ بندات ءَ تربت ءَ شھید فدا چوک ءَ نندانک جن ایں پد ءَ میت ءَ زوریں شال ءَ پد ءَ اسلام آباد ءِ نیمگ ءَ روان کن ایں – اگاں سیکورٹی لشکر ءَ اے کار پما گچین کرتگ گڑا آ مارا تیر ءُ بمبانی گون ءَ پیش آیگ لوٹ آں گڑا اے کار ءَ نِی شھر ےُ چوک ءُ چار راھانی سر ءَ بہ کن اَنت ءُ نِی شپ ءِ تھاری ءَ مرگ ءَ نہ منّیں –

بلے تنی وھدی اے وئیل ءِ بارو ءَ پولیس ءِ گپ دیم ءَ نیتکگ اَنت –

ھمے وڑ کھول ءَ کیچ ءِ بنجاھی شھر تربت ءَ شھید فدا چوک ءَ ترندیں ھور ءِ وھد ءَ لاش ءِ ھمراھی ءَ زھرشانی برجاہ داشتگ –

نبشتانک: زیبائیانی دیار

نبشتہ کار: سعید احمد بلوچ

دی بلوچستان پوسٹ

اے وشیں ساھتانی وشی کہ ھور ءِ ترمپ گُلزمین ءِ سر ءَ ٹُپ ٹُپ ءَ کپگ ءَ اِت اَنت ءُ گُلزمین ءِ وشیں بوه ماں گیدی ءِ چاریں آتراپاں شنگ ءُ تالان اِت اَنت ءُ مُرگ وتی زیملاں گوں تاھیر بکشیں تواراں اے ندارگ ءَ گُشئے گیش ڈولدار کنگ ءَ اِت اَنت اے سرجمیں نِدارگ منی دیم ءَ چو تامر ءِ دروشم ءَ اِت اَنت گُشئے من یک تامُرے چارگ ءَ آں ءُ گوں تامُر ءَ دلگوش اِت آں ءُ دل ءَ وڑ وڑیں هیالاں گوں جیڑگ ءَ اِت آں گوں جیڑگاں من جیڑ اِت کہ ھُدا ءَ پرچی من ءَ مُرگے نہ کُت کہ من چَہ زندمان ءِ درائیں اڑ ءُ جنجالاں چے آجو اِت آں گوں وشی اے درچک ءُ آ درچک بوتگ اِت آں ناں من کسّے ءِ پُشت ءَ گپ کُت ناں منی پُشت ءَ کسّے ءَ-

مُرگ، گْوات، ھور ءُ من گوں جیڑگاں داں نیم ادار ءَ بُرز رند ءَ هیال کُت کہ من سرجم ءَ میس اِتگ اِت آں من گوں نِدارگاں اَنچو ھوار اِت آں کہ من ءَ وتی سرجم ءَ تَر بوگ ءِ هیال هم گور نہ بوت اے گُلزمین ءِ نِدارگانی مھر اَنت کہ مردم ءَ اَنچو گوں وت همگرنچ کن اَنت کہ مردم وتی زندمان ءِ درائیں وشی ءُ گَماں پھک شموشیت ءُ لھتیں وھد ءَ گوں نِدارگاں گوں اَنچو ملما بیت کہ وتی هیال ئِے هم گور نہ بیت- اے همے نِدارگ اَنت کہ شائر ءَ پہ شئیرے ءِ پربندگ پرمائیت ءُ نِبشتہ کارے ءَ نِبشتہ کنگ ءِ سکین ءَ دے اَنت-

اے گُلزمین ءِ مھر اِنت کہ مروچی زانتکار وھدے بلوچ راج دوستی ءِ گپ ءَ کن اَنت گُڑا اے هبر ءَ الّم کن اَنت کہ بلوچ راج دوستی گوں بلوچ ءِ گُلزمین ءَ بندوک اِنت،، گُشئے هُدا ءَ مارا چَہ اے جھان ءِ درائیں مردماں چَہ بلوچ دوستر بوتگ کہ بلوچ ءَ را چُشیں زیبائیں ءُ پُر مھریں سرزمینے بکشاتگ ئِے، بلوچ ءِ سرڈگار چَہ دنیا ءِ زیبائیاں هوار چَہ مھر ءَ هم سرریچ اِنت بلوچستان ءِ ھر کُجام ھند ءُ دمگ بلوچ ءَ چو ساه ءَ دوست اَنت-

بلے برے برے مردم گُش اَنت ساه چَہ دیدگاں دوست تِر اِنت بلے من گُش آں ناں پرچا کہ کسّے اے سرزمین ءَ نِشتگ ءُ اے نِدارگاں چم ء وت مہ گندیت گُڑا اے ساھت پہ ھمائی ء‍َ مَرگ چَہ کمتر نہ اِنت، بلوچ ءِ سرزمین ءِ سر ءَ ساه ءَ را هچ ارزشت نیست دیدگانی دیم ءَ، اے همے نِدارگ اَنت کہ مارا زندگ بوگ ءِ سکین ءَ دے اَنت،، اے سرزمین ءِ سر ءَ نِندگ ءُ نِدارگانی نہ گندگ چَہ مَرگ ءَ هم گیش آزارانی دیمپان کنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

انڈئن پریمئیر لیگ (آئی پی ایل) دوھزار بیست ءُ یک ءِ چِل ءُ پنچمی گوازی دبئی انٹرنیشنل کرکٹ پٹ ءَ کولکتا نائٹ رائیڈرز ءُ پنجاپ کنگز ءِ میان ءَبوتگ – پنجاپ کنگز ءَ کے کے آر پنچ وکٹاں بے سوب کُتگ گوازی وتی نام ءَ کُتگ –

دبئی ءَ بوتگیں اے گوازی ءَ کے کے آر ءَ ٹاس نہ کٹتگ ءُ پیسر ءَ گوازی کتگ ھپت وکٹانی تاوان ءَ بیست آوور ءِ تہ ءَ یکسد ءُ شست ءُ پنچ رن جوڈ کرتگ پنجاپ کنگز ءَ نوزدہ آوور ءَ پنچ وکٹانی تاوان ءَ ٹارگٹ پورہ کتگ –

پنجاپ کنگز ءَ تنی وھدی دوازدہ ءَ گوازیانی تہ ءَ پنچ گوازی ءَ سوبین بوتگ، وھدیکہ کے کے آر ءَ دوازدہ گوازیانی تہ ءَ ھپت گوازی ءَ بے سوب بوتگ –

مروچیگیں گوازی ءَ وینکٹیش ائیر ءِ بال ءَ شوم ماوی ءَ راھول ءِ کیچ گپتگ، راھول ءَ اننگز ءِ گڈی آوور ءِ دومی بال ءَ شست ءُ ھپت رن جوڈ کتگ ءُ آوٹ بوتگ – آئی ءَ پنجاہ ءُ پنچ بالاں پنچ چوکا ءُ چار چکا جتگ –

یکسدو ءُ شست ءُ شش رن ءِ ٹارگٹ ءَ راھول ءُ میانک اگروال ءَ پنجاپ ءِ نیمگ ءَ جوانی ءَ گوازی ءِ بمدات کتگ ءُ ھردوکاں ھپتاد رن ھواری ءَ جوڈ کرت ءُ ایڈن ایڈن مارکرم سنیل نارئن ءِ دیم ءَ کپتگ اننگ ءِ شانزدھمی اوور ءِ سیمی بال ءَ شوبھم گل ءَ کیچ کتگ – مارکرام ءَ وتی اننگز ءَ شانزدہ بالانی تہ ءَ یک شش ءِ جتگ وھدیکہ دیپک ھڈ ءَ چو ھاس نہ ات کہ آئی ءَ شوم ماوی ءِ بال ءَ وت ءَ کیچ کنائینت –

وینکٹیش ائیر ءَ وتی دومی نیم سنچری جوانی گوازی کنان ءَ کُرت آئی ءَ وتی اننگز ءِ چِل ءُ نھ بالانی تہ ءَ نُھ چوکا ءُ یک چکائے جتگ – کولکتا ءَ اولی جٹکا ھژدہ رن ءِ سر ءَ لگیت کہ شوبمان گل ءَ ارشدیپ بولڈ کتگ اشی ءَ پد ونکٹیش ءَ راھول ترپاٹھی ءِ ھمراھی اننگز دیما بُرت –
گوازی ءَ کپٹن مورگن ءَ انچو ھاسیں گوازی پیش نداشت – نتیش رانا ءَ ھژدہ بالاں دو چکا ءُ دو چوکائے کمک ءَ سِی ءُ یک رن جوڈ کت آئی ءَ ارشدیپ سنگ ءِ بال ءَ میانک اگروال ءَ کیچ کُتگ –

گوستگیں روچ ءَ گوازی ءَ چنئی سپر کنگز ءَ سن رائزر حیدرآباد شش وکٹاں بے سوب کتگ – آوکیں گوازی مروچی ممبئی انڈئنز ءُ دھلی کیپیٹل ءِ میان ءَ بوھگ انت –

بلوچستان ءِ بنجاھی شھر شال ءَ سول سوسائٹی پروم ءِ نیمگ ءَ جلیل سنجرانی ءُ دگہ مردمانی ناھکیں کوش ءِ بگیری ءَ پریس کلب ءِ دیم ءَ زھرشانی کنگ بوتگ – زھرشانی ءَ سیاسی ءُ چاگردی باسکاں ھوار نودربر ءُ دگہ تک ءُ پھناتاں سیادی داروکیں مردماں مزنیں کساسے ءَ بھر زرتگ –

زھرشانی ءَ تران کنان ءَ آھانی گوشگ ات کہ مروچیگیں اے شال ءِ پریس کلب ءِ دیم ءِ زھرشانی ھما ھاکمانی واستا انت کہ واکداری ءِ تہ ءَ نشتگ انت آھاں بُڈگ ءُ مرگ لوٹ ایت کہ بلوچستان ءِ چک، زالبول ورنا مروچی اد ءَ ورنائیں جلیل سنجرانی کوشکارانی دزگیری ءِ لوٹ ءَ کنگ ءَ انت – شما ھما روچ ءَ بہ مُرتین ات کہ اقتدار ءَ نشتگ ءُ ھمے ودار ءَ ات کہ کَے اشی زمّہ واری ءَ کَے من ایت – اے ناشناس نہ انت اے کُشندھاں کہ شما ناشناس گُش ایت اشاں ھرکس زانت اے کوش ءِ زمہ وار ریاست انت ، آئی جی پولیس انت، اے کوش ءِ زمہ وار وزیراعلی بلوچستان انت ، مروچی ھمیشاں دزگیر بہ کن ات گڑا سرپد بئے کہ اے ناشناس انت یا اشانی کشندہ اشاں مالوم انت – اے ھما مردم انت کہ پہ زور پنجگور ءَ تُرس ءِ ودّینگ لوٹاں پنجگور ءَ ھمک روچ دزی ڈنگی، کشت ءُ کوش بوگ ءَ انت اود ءَ ورنایانی مات ءُ گھارانی ھمے توار انت کہ پنجگور ءَ کئی نزر لگ اتگ – پنجگور ءَ اگاں نزر ءِ لگتگ گڑا سی پیک ءِ اگان پنجگور راہ سی پیک مہ بیت اِنت گڑا ایمنی بیت، پنجگور ءَ اگاں ایران ءِ باڈر مہ بیت اِنت گڑا ایمنی بیت – پنجگور ءِ ھر ایمنی شما تباہ ءُ برباد کتگ – مروچی بلوچستان ءِ کنڈ کنڈ چریشی ءَ دردیگ انت بلے ھاکم سرپد بہ بنت کہ بلوچ ھون انچو ارزان نہ انت بلوچ ءِ ھون ریچی پیسر اے بہ زان ات کہ باندا اے بدامنی شمار ءَ ھم کیت ءُ سر بیت – اشی ارزانی ایربُرت نہ کن ات –

آھانی گوشگ ات کہ مار ءَ چہ اے چیف جسٹس اں ھک لوٹی ءِ اوست نیست اشان بلوچ ءُ بلوچستان ءِ واستا انساپ دئیگی نہ انت اگاں اشاں گوں بلوچ راج ءُ ورنایانی گوم ءَ انساپ کنگی بوتیں گڑا مروچی بازیں روچے ئے گوازگ ءَ پد بلوچانی زانگولیں جونانی سر ءَ گامیگج زرتگ ات ئِے، کشت ءُ کوش ءُ بیگواھیں مردمانی درگت ءَ اشاں انساپ کُتگ ات – بلے آھاں گوں بلوچستان ءِ گوم ءَ ھچ گرز نیست ـ بلوچ ورنایاں یکجاہ بوگی انت ءُ توار چست کنگی انت –

آھانی گوشگ ات کہ مروچی آئی جی پولیس وتی راستیں زمہ واری ءَ پد کنزتگ ءُ اے ورنایانی کُشندھانی دزگیر کنگ ءَ ابید سیاسی باسک ءُ سیاسی رھشونانی گِس آں دور کن انت ءُ گُش انت کہ شما راجداری ءَ چہ دور بہ بیت – شمار ءَ یات بیت لھتے ماہ پیسر پاکستان ءِ مزن وزیر اتکگ ات ءُ بلوچستان ءِ تر ءُ تاب ءَ اتکگ ات آئی ءَ جنوبی بلوچستان ءِ نام ءَ پیکج ءِ جار جتگ ات – اول ما نہ پھمتگ ات کہ جنوبی بلوچستان پیکج چی ئے آھاں گوشتگ ات کہ جنوبی بلوچستان پیکج رِد ءَ شمار ءَ وشھالی دیگ بیت بلے مزن وزیر رؤگ ءَ پد جنوبی بلوچستان ءِ پیکج رِد ءَ مکران ءِ مردماں رسگ انت آ چی انت – آھاں نہ ھک رس ات ناکہ دیمروئی رس ات اگاں جنوبی بلوچستان ءِ پیکج نام ءَ مکران پنجگور ءِ مردماں چیزے رس اتگ گڑا ورنا،پیر ءُ زالبولانی کُشت ءُ کوش ـ کیچ ءَ تاج بی بی کُشگ بیت درست زان انت کہ کئے ءَ جتگ بلے ارزی نبشتہ بوتگ آ ناشناسیں مردم ءِ نام ءَ نبشتہ بوتگ مروچی جلیل سنجرانی کھول ءِ مردم ھمے ھاتر ءَ اد ءَ شال اتکگ انت کہ دراجیں پند ءِ بُراِتگ کہ اود ءَ اشانی توار اشکنگ نہ بوتگ –

آھانی گوشگ ات کہ یک کھولے ءَ یک مردمے کہ بیران بیت گڑا یک پرد ءِ نان بلکیں سرجمیں کھول ھلاس بیت – اد ءَ مئے نشتگیں مات ءُ گھار اے چیز ءَ شری ءَ سرپد ءُ زان انت کہ آھانی گِس ءَ کسے بہ روت گڑا آھانی زند چوں اسرمند بیت –

اد ءَ اگاں مئے گھار زانت ءِ ھاتر ءَ توار چست کناں آ لٹ شاپ کنگ ءُ زنداناں بندیگ کنگ بنت – اگاں زانت ءُ زانشت دیمروئی دات نہ کنے کم چہ کم اے نشہ ءَ مئے سرا توک مہ کن ات – مروچی ھرجاہ ءَ پنجگور ءُ بلوچستان ءِ ھر دمک ءُ دراں شما بہ چاریت مروچی کجام مافیا انت کہ پہ زور مئے زھگ نشہ آماچ کنگ بوگ ءَ انت – آھانی گوشگ ات کہ ھر کست کہ اھانی بگیری ءَ توار چست بہ کنت گڑا آ ھمے وڑ شھید کنگ بنت جلیل سنجرانی وڑ ءَ سمیع وڑ ءَ اگاں مروچی ما یکجاہ بہ بئیں ءُ اشی ءِ بگیری ءَ توار چست بہ کنیں گڑا اے سرکار وتی دیم ءَ چیر دنت تچ ایت – اد ےَ سرکار ڈیت اسکواڈ ءَ پنڈ دنت اے مئے بلوچستان ءِ گوم ءَ بوگ ءَ انت اے سوچ پگر کتگیں پندل ءِ کہ یک گنوکے پاد کیت حیات ءَ شھید کنت، ھمے وڑ تاج بی بی ءَ شھید کنت شما وت بہ چاریت گڑا اد ءَ چوں مار ءَ ھک دیگ بیت –

آھانی گوشگ ات کہ پنجگور ءِ تہ ءَ یک انسانی المیہ ودی بوتگ کہ اود ءِ ھر یک مردمے پریشان انت اود ءَ ھما جاور ودی کنگ بوتگ انت کہ سال دوھزار ءُ نھ ءُ دوھزار ءُ دہ ءَ مکران ءِ دومی دمگاں پیدا کنگ بوتگ انت – یک ھنچین نمائندگ ءِ آرگ بوتگ کہ بس زر ءُ لالچ ءَ مردمانی چکاں کُش ایت – من جست کنگ لوٹاں تو زان ئے چُک چون ورناہ بنت اگاں نہ زان ئے گڑا جلیل ءِ پت ءَ جست بہ کن ات کہ آئی ءَ وتی چک چوں رودینتگ مزن کتگ وانیتگ ماسٹر کنائینتگ، یک وانندھیں ورنایے ءَ مپت ء ناھک ءَ شما کُش ات اشی ءِ سوب چی انت – شمے مردم کہ کشندہ ٹولی نام ءَ زانگ بنت آ کئی گوشگ ءِ پد ءَ مردماں یک موبائیل ءِ واستا جن انت – من سرپداں اد ءَ نشتگیں درسیں مردم زان انت کہ اود ءَ بس دزی ءِ لبز کارمرز بیت بلے راستی ءَ ھما دراھیں مردم کُشگ بوگ ءَ انت کہ وتی ھک ءِ ھاتر ءَ سوال چست کنگ انت – من جست کنگ لوٹاں کہ ھما سرکار ءُ آئی ءِ چاپلوسان کہ شمئے رِٹ کجا انت؟ شمئے اے مزن مزنیں پانگس کہ ھستاں پد ءَ ھم ھمک روچ پنجگور ءِ دمکاں پرپٹ سواریں مردم مردماں کُش انت ءُ شمئے ھمے پانگسانی دیم ءَ چہ گوز انت زاناں شمارا مالوم نہ اِنت اگاں ناں شما زان ات ءُ انگت آھاں دُز گش ات – من جست کنگ لوٹیں وھدے یک سرکاری مردمے جنگ بیت گڑا مزن مزنیں آپریشن کنگ بیت گڑا جلیل سنجرانی کُشگ ءَ پد پنجگور ءَ آپریشن بوتگ – اگاں نہ بوتگ ما ھمے پھماں گڑا راجی بلوچ نمائندگ نہ انت بلکیں پوجی ھاکمانی چاپلوس ءِ کہ نشتگ اَنت وت ءَ بلوچ ءِ لیکے بلے بلوچی گیرت ءَ چہ زبھرے –

زھرشانی ءَ تران کناں آھاں درسیں بھر زورکیں مردمانی منت گپت گوشت کہ درسیں مردماں اد ءَ نشتگیں مات گھاراں کہ انچو دور ءَ پہ ھک لوٹگ ءِ ھاتر ءَ اتکگ انت توار چست ءِ کتگ – اے ھک اشاں ھمود ءَ بائدیں بہ رستیں بلے چوش نہ بوت بژن بیت – اے ریاست ھمے پھمیت کہ ما کسے جن ایں گڑا کس ھچ نہ گوش ایت، ما کسے ارزی ءَ دئیں کس ھچ نہ گوش ایت بلے چوش توار ایرموش نہ بنت – بلکیں چریشی ءَ گیشتر مردم در کائینت دیم ءَ کائنت ھنچوش کہ مروچی سول سوسائیٹی ءُ شھیدانی کھول نودربر ءُ سیاسی ءُ ھرتک ءُ پھناتاں سیادی داروکیں مردم دراتکگ ءُ سبوت داتگ کہ وتی ھک ءِ ھاتر ءَ ما ھر کجا درکائیں –
آھانی گوشگ ات کہ بلوچستان بازیں وھدے ءَ پیسر پرایمنیں سوبہ ءِ گوشگ بیت پیسر ءَ ما تر ءُ تاب ءَ پنجگور ءُ بلوچستان ءِ دگہ دمگاں شتگ انت اود ءَ گِسانی دیم ءَ چاردیوالی نبوتگ مروچی چاردایولی بوھمگ ءَ ابید مردم جنگ بنت کُشگ بنت –

آھانی گوشگ ات جلیل چی کتگ بیت بس ٹویٹر ءَ ٹویٹ ءِ داتگ بوتگے ھک لوٹ اتگ، وتی آؤکیں باندات ءِ ھاتر ءَ وتی ورنایانی ھاتر ءَ توار چست کتگ – زلم ءُ زوراکیانی ھاتر ءَ توار چست کتگ – آئی ءَ سرکار بگیری توار چست نہ کُتگ – آئی ءَ ھمے گوشتگ ات کہ آ روچ مہ ایت کہ شمے لوگ ءَ لاش ءِ در بئیت آئی مالوم نہ ات کہ زالم یک دو روچ ءِ تہ ءَ ھمائی نشانگ کن اَنت پرچا کہ آئی ءَ ھک گپ جتگ ات – بلے اے زالم اے سرپد نہ انت کہ آھان بس یک مردم ءِ نہ جتگ بلکیں آئی ءِ ھمراھی ءَ آئی ءِ کھول ءِ مردم جتگ انت –

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں درشان ءِ تہ ءَ ھزدار ءَ بیتگیں اُرش ءِ زمہ واری منّ اِتگ ءُ گوشتگ کہ سرمچاراں گوستگیں روچ ءَ ھزدار ءِ شھر ءَ پولیس تھانہ ءِ تہ ءَ زورگریں پاکستان ءِ پولیس کارندہ یک اُرشے ءَ نشانگ کتگ اَنت-

جارکش ءَ گُشتگ کہ بی ایل اے اسپیشل آپریشنل ٹیکٹیکل اسکواڈ ( STOS) ءِ سرمچاراں پرپٹ ءَ پٹ کتگ ءُ گوں شورواں تہ ءَ رسینتگ-

تراک ءِ آسر ءَ پولیس ءَ مزنیں کچے ءَ مالی تاوان چست کنگ کپتگ- چو پیشگیں وڑ ءَ زورگریں پوج ءَ وتی تاواناں چیر دیگ ءَ جُھد کتگ ءُ اُرش دستبمبے پیش داشتگ-

بی ایل اے اشی ءَ چہ پیش ھم پولیس ءُ لیویز پورس بیھار داتگ اَنت کہ بلوچ بوَگ ءِ ھاتر ءَ آ بکشگ بنت، بلے اے پوج زورگریں پوج ءِ دست چیری جاگھانی پٹ ءُ پول ءِ نام ءِ سر ءَ ءُ لوگاں بیڑبرگ ءِ وھد ءَ بلوچ راج ءَ را زلیل کنگ ءُ آیانی سر ءَ زوراکی کنگ ءِ گپ پیداگ اِنت اگاں پولیس ءَ زورگریں پوج ءِ چیردستی ءَ بلوچ ءِ مپادانی بگیری ءَ سُر ءُ پُر کت گُڑا آیانی گوم ءَ ھما وڑ کنگ بیت کہ دُژمنیں پوج ءِ بگیری ءَ کنگ ءَ ایں-

جارکش ءَ گشتگ کہ اے اُرش ءَ پولیس پورس یک بیھارے سرپد بہ بنت بلوچ راجی جُھد آجوئی بگیری ءَ وتی سُر ءُ پراں بند بہ کن اَنت –

بلوچستان ءِ دمگ پنجگور ءَ سلاہ بنداں یک مردمے ءِ آوار جنگ ءَ پد بیگواہ کتگ-

اے وئیل پنجگور ءِ دمگ گرمکان ءُ سوردو ءَ بوتگ –

دمگی مردمانی رِد ءَ پنجگور ءِ دمگ گرمکان ءَ گاڑی ءَ سوار سلاہ بندیں مردماں مسلم ء محمد جان جھمنند گرمکان ءَ مھمان جاہ ءَ پترتگ ءُ چست کتگ ءُ گوں وت برتگ اَنت-

پنجگور ءَ بیست ءُ چار کلاکانی تہ ءَ اے دومی وئیل اِنت کہ بوتگ- اشی ءَ پیش گوستگیں روچ ءَ روچ رھم ءَ رخشان فوٹو اسٹیشن ءِ واھنند نجیب گاڑی سواراں آوار جتگ ءُ گوں وت برتگ-

بلے گوستگیں روچ ءَ آوار جنگ بوتگیں مرد ءِ درگت ءَ پنجگور پولیس ءَ آفیسر کیپٹن (ر) زوہیب محسن ءِ گوشگ اِنت کہ آوار جنگ بوتگیں مرد پد ءَ یل کنگ بوتگ وھدے کہ آوارجنوکانی دزگیری ءُ پجّار ءِ ھاتر ءَ جُست کتگ گُڑا آفیسر ءَ پسّہ نداتگ-

پنجگور ءَ چیزے وھد اِنت جاور سک نگیگ اَنت روچ رھماں دُزی گیش بوتگ-

ھمے وڑ مروچی پنجگور ءِ دمگ سوردو ءَ ناشناسیں سلاہ بندیں گاڑی ءَ سوار احمد جان ء عبداللہ موبائل فون ڈیلر ءَ چہ لکّانی ھساب ءَ تُپنگ ءِ سر ءَ موبائل پچ گپتگ پہ ارزانی تچگ ءَ سوبین بوتگ-

پنجگور ءَ ھوار سرجمیں بلوچستان ءَ پاکستانی پوج ھزارانی سلاہ بندیں ٹولی جوڑ کتگ ءُ دیم داتگ اَنت آیانی درگت ءَ بلوچ راھشوناں اے بھتام جتگ اَنت کہ پوج ءَ بلوچ جُھد ءِ گر ءُ دار کنگ ءِ ھاتر ءَ اے ٹولی سرجمی ءَ لگام یل داتگ ءُ کہ آ مردمانی کُشگ ءُ بیگواہ کنگ ءَ اَبید جتائیں چاگردی رد کاریاں ھوار اَنت-

بیگوائیں نودربر رھشون شبیر بلوچ ءِ گوھار سیما بلوچ ءَ وتی چاگردی رسانکدر ءِ تند جاہ ٹوئیٹر ءَ شنگ کُتگیں تامری کلوہ ءِ تہ ءَ گُشتگ کہ چار اکتوبر دوھزار ءُ شانزدہ ءَ بگر داں انی پنچ سال بیت کہ منی برات بیگواہ اِنت، بلے منی برات ءِ درگت ءَ ھچ وڑیں اھوال نیست کہ آ کجا اِنت چونیں جاورانی تہ ءَ اِنت۔

سیما بلوچ ءَ گُشتگ کہ اے پنچ سالانی تہ ءَ من ھمک وھد جھد کُتگ وتی برات ءِ یل کنائینگ ءِ ھاتر ءَ بلے منی برات یل کنگ نہ بیتگ ءُ داں انگت من ءَ اَے گُشگ نہ بیگ ءَ اِنت کہ آ کجا اِنت کجام جاورانی تہ ءَ اِنت۔

سیما بلوچ ءَ شبیر بلوچ ءِ بیگوائی ءَ پنچ سال ءِ سرجم بئیگ ءِ روچ ءَ بزاں چار اکتوبر دوھزار ءُ بیست ءُ یک ءَ کراچی پریس کلب ءِ دیم ءَ روچ ءِ سئے بج ءَ زھرشانی ءِ جار جنان ءَ چہ زند ءِ جتائیں تکاں سیادی داروکیں مردماں چہ دزبندی کُتگ کہ آئی ءِ ھمراھداری بہ کن اَنت ءُ زھرشانی ءَ بھر بہ زیر اَنت۔

زانگ بہ بیت شبیر بلوچ بی ایس او آزاد ءِ گوستگیں بنجاھی انفارمیشن سیکریٹری اِنت کہ چار اکتوبر سال دوھزار ءُ شانزدہ ءَ آئی ءِ لوگ بانک ءِ دیم ءَ بیگواہ کنگ بیتگ اَت ءُ داں انگت بیگواہ اِنت۔

کراچی ءَ چِست بیتگیں توپان ءِ دیم چہ کراچی ءُ زرباری سند ءِ دمگاں چہ ءَ مٹ اِتگ ءُ دیم پہ روکپتی گوریچان ءِ نیمگ ءَ بزاں بلوچستان ءِ نیمگ ءَ تر اِتگ۔

چہ اِشی سبب ءَ زری توپان ءُ ترندیں ھورانی گمان نزور بیتگ بلے داں انگت ءَ تُرس ءِ ھلاس بیگ ءَ ابید ھم مولم شناس ءَ کراچی ءَ آدینگ ءِ روچ ءَ بازیں دمگانی تہ ءَ تیز ءُ نزوریں ھور ءِ گمانی زاھر کُتگ وھدیکہ بلوچستان ءِ زرباری دمگانی تہ ءَ داں انگت ترندیں ھورانی گمان زاھر کنگ بیگ ءَ اِنت پرچہ کہ ڈیپ ڈپریشن روکپتی زربار ءِ نیمگ ءَ ودگ ءَ اِنت۔

ناوشیں موسم ءِ گمانی ءَ پد کراچی ءِ زر ءَ داں پنچ اکتوبر ءَ جان شودگ ءِ سر ءَ ھم بندش جنگ بیتگ وھدیکہ آدینگ ءِ روچ ءَ کراچی ءَ لس ھلاسی ءِ جار جنگ بیتگ اَنت۔

سند پرگینگ ءِ درستیں وانگ جاہ بند کنگ بیتگ اَنت۔ کراچی مزن شھدربرجاہ ءَ چکاس دارگ بیتگ اَنت ءُ اناگتی جاورانی دیمپانی ءِ ھاتر ءَ ھاسیں توجیل سازگ بیتگ۔

زانگ بہ بیت کہ پاکستانی زری دمگ لھتے سالاں چہ بیتگیں ھورانی سبب ءَ اناگتی آیوکیں ھاراں چہ سانمند بیگ ءَ اَنت۔

مولم شناس ءِ واکدارانی رد ءَ آیوکیں شش ساھتانی تہ ءَ اے ڈپریشن سائیکلون توپان ءِ تہ ءَ مٹ بیت اِنت ءُ یہ روکپتی گوریچان ءِ نیمگ ءَ مکران کوسٹ ءِ نیمگ ءَ شُت کنت ۔

کراچی ءَ چہ 160 کلومیٹر دیری ءَ گوستگیں دوازدہ ساھتانی تہ ءَ اے جھلیں ڈپریشن ءِ تہ ءَ مٹ بیوکیں توپان ءَ پانزدہ کلومیٹر ھمک ساھت ءِ تیزی ءَ گوں نوکیں نیمگی ءَ دیم ءَ کُتگ۔