TBP Balochi

بلوچ یکجھتی کمیٹی ءَ وتی شنگ کرتگیں درشان ءِ تہ ءَ تاج بی بی ءَ ھک دئیگ ءَ دیر کنگ،  کھول ءِ نیمگ ءَ ایپ سی ءَ نامزد کنگ ءَ ابید ارزی ناشناسیںمردم ءِ نام ءَ نبشتہ کنگے بگیری ءَ پدردی درشانتگ گوشتگ کہ تاج بی بی ءِ کوش ءَ ایف سی ءِ کارمند تچکی ءَ ھوار انت –

آئی ءَ گوشتگ کہ بازیں ترسینگ ءُ بیھار دئیگ ءَ ابید آئی کھول ءِ مردماں راستی دیم ءَ آرتگ بلے ایف سی ءِ کارمند ءَ سزا دئیگ ءُ کانود ءِ تھتگ ءِ سر ءَاُشتارینگ ءَ دمگی پھازدار ءُ سیکورٹی ادارھاں جھد کتگ کہ آ تاج بی بی ءِ کوش ءَ ھواریں کتکاراں چہ سزا ءَ بہ رکین انت- اشی ءِ ھاتر ءَ آھاں کھول ءِمردم ترسینتگ ءُ بیھار داتگ انت کہ ھچ مہ گوش اِت- 

آئی ءَ گوشتگ کہ تاج بی بی ءِ کھول اے وھدی تاگتورانی دیم ءَ ایوک ءَ دارگ ءَ انت کہ آھاں بلوچ راج ءِ کمک ءُ پلامرزی ءِ زلورت انت پرچاکہتاج بی بی کھول ایوک ءَ سیکورٹی کارمندانی زوراکی آماچ نہ انت بلکیں سرجم بلوچستان اِنت –

آئی ءَ گوشتگ کہ تاج بی بی ءِ ھک دئیگ ءَ دیر کنگ، دمگی پھازدارانی بے پروائی ءُ ارزی ءَ چیرترینگے پندل ءُ وھدیکہ دروگیں ارزی ءِ جوڑ کنگے بگیری ءَبلوچ یکجھتی کمیٹی دو ستمبر بزاں باند ءَ دو شمبے ءِ روچ ءَ تربت ءَ وتی زھرشانی ءِ درچ ءِ بندات کنت داں ھما وھد ءَ کہ تاج بی بی ءَ کُشندہ آمیدگس ءَآرگ نہ بنت-

درشان ءِ تہ ءَ گوشگ بوتگ کہ تاں ھما وھد ءَ سیکورٹی کارمند وتی زلم زوراکیاں بلوچستان ءِ تہ ءَ ھلاس نہ کنت بلوچ یکجھتی کمیٹی آھانی بگیری ءَ توارچست کنت – مروچی بلوچستان ءِ تہ ءَ سنگینیں انسانی المیہ ودی بوتگ کہ آئی ءِ بگیری ءَ سیاسی جھد وھد ءِ لوٹ اِنت – 

جارکش ءَ لوٹ کتگ گوشتگ کہ کیچ ءِ ھر دمک ءُ دراں زلم ءُ زوراکی ءِ راج برجاہ انت ءُ درسیں مردم اے زلم ءُ زوراکیانی چم دیستیں گواہ انتوھدے لوٹ ھمیش انت کہ دراھیں مردم یکجاہ بہ بنت ءُ زالمانی بگیری ءَ در بیا اَنت – گوستگیں روچاں اے زوراکی ملکناز،  حیات،  کلثوم،  امیر ءُ گلامجان ءِ گوم ءَ بوتگ مروچی تاج بی بی ھمیشی ءِ آماچ بوتگ باند ءَ دگہ یکے بوت کنت – اے زوراکیانی بگیری ءَ سک باز جُھدے درکار انت –

نبشتانک: ملا گلاب ءَ داں ملا ھدایت الرحمان ءَ

نبشتہ کار: درپشان بلوچ

دی بلوچستان پوسٹ

بلوچستان ءِ تھاریں شپانی رژنائی ءَ باھند کنوکیں ملا گلاب ءَ بلوچستان ءِ نامی ءُ گرامی ءِ جاہ گوادر ءِ چپی بگل ءَ زر ءِ لمب ءَ سربندن ءِ ھنکین ءَ نوزدہ سد ءُ ھشتاد ءُ شش ءَ دنیا ءَ چم پچ کتگ اَنت-

بلوچستان ءِ دمتوسیں توار ءِ ھاٹیگ بیوکیں ملا گلاب ءَ وتی گلاب رنگیں پُل مٹ کت ءُ ھدایت الرحمان ءِ نام ءَ یک ھاٹیگ تواریں سکینے کت-

ملا ھدایت الرحمان ءِ بارو ءَ گوشگ بیت اِنت کہ ملا ھدایت الرحمان چو گوست ءِ وڑ ءَ یک توارے بلے اے توار ءَ لس مردم وتی وتی رنگاں دیگ ءَ اَنت کہ اے ھما چو گوست ءِ رنگ ءَ چیزے وھدانی تہ ءَ بے توار بیت اِنت یا دمتوسی ءَ گوں نیم ھاٹیگی ءَ ھلاس بیت اِنت –

یک چیزے ءَ اے جاہ ءَ گمان کنگ بیت اِنت کہ ملا ھدایت الرحمان وتی گپانی تہ ءَ بازیں دگری آؤرتگ ءُ مھلوک ءِ دل ءُ لاپاں یک اُمیتے ایر کرتگ –

چریشی ءِ سر ءَ ملا گلاب ءَ مٹ بیتگیں ملا ھدایت الرحمان ءَ یک کسانیں وھدے ءَ وتی توار یک مزنیں رنگے ءَ ایر کرتگ یک تورانکیں رنگے ءَ جکسینتگ اے توار ءَ ھما مردماں کہ وتی دروگانی تہ ءَ گیشی آؤرتگ آ توار ملا ھدایت الرحمان ءِ گران ءُ جکسوکیں توار ءَ نیزور کرتگ اَنت –

ملا ھدایت الرحمان ءِ بارو ءَ ھرکس آئی ءِ چِست بیتگیں زرمبشت ءِ پلامرزی ءُ ستاہ ءَ کنگ ءَ اَنت ملا ھدایت الرحمان ءِ بارو ءَ گوشگ بیت اِنت کہ آئی ءَ ھما گام چِست کرتگ آ گام ءِ تہ ءَ بوت کنت ناں بلکیں تچکی ءَ گمان کنگ بیگ ءَ اِنت کہ ھما مردماں ملا ھدایت ءِ ھند ءُ دمگانی ستاکرزی کرتگ ھما مردمانی دل ءَ اے تورناکیں گپ ءُ ٹال اَنت –

گوست ءَ زرمبشتاں دیر کرتگ نِی زرمبشت ءُ مھلوک چو گوست ءَ پیش وتی زرمبشتاں مُچ کنت ملا ھدایت ھم گوست ءِ مردماں دیستگیں رنگاں یک رنگے ءَ مَٹ بیتگ ءُ نوکیں دور ءِ نوکیں زرمبشت ءَ دیم ءَ اتکگ اَت –

اے کسانیں وھد ءَ بلوچستان ءِ پر آپیں زر ءِ لمب ءَ تنیگیں مید ءُ دھکانانی ھشکیں لُنٹانی توار ءُ بلوچستان ءِ تہ ءَ گران ءُ گچینی ءِ جاھاں ھواریں گوادر ءِ ماتانی پریات ءُ زر ءَ شتگ ءُ لاپ شوھازی ءَ کار کنوکیں دریاوردانی ھاٹیگ ءِ ھمراھی ءَ بلوچستان ءِ سیر آپیں زر ءِ تُنیگیں گورمانی راستیں رنگ دنیا ءِ دیم ءَ یک نگاھے ءَ پیش داشت اَنت –

گوستگیں روچ ءَ ملا ھدایت الرحمان ءِ مچی ءَ بازیں دگری دیم ءَ گندگ ءَ اتکگ اِت اَنت بلوچستان ءِ نوکیں زرمبشت ءَ تُستگیں توارانی تہ ءَ اے اولی توار اَت کہ اینکس مزنیں مُچی ءَ گوں یکجاہ بیتگ اَت-

نِی یک پھناتے ءَ چارگ بیت اِنت بلوچستان ءِ مھلوک ءَ وتی ھکانی واستا بے تواری پروشتگ ءُ وتی ھکانی جست ءَ کنگ ءَ اَنت ءُ چرے پھاناتاں دگہ ھزارانی جیڑھانی گپ ءَ ھم کنگ ءَ اَنت –

ملا ھدایت الرحمان ءَ یک توارے وتی منّینتگ کہ بلوچستان ءَ ھمک دمک ءُ دراں پوجی بنجل ءُ چوکی جوڑینگ بیتگ اَنت ءُ ھر ھما مردم اے پوجی چوکی ءُ بنجلاں بے زار اَنت ءُ ھمک وھد ءَ اے جست آیاں کنگ بیت اِنت کہ “کجا روگ ءَ ئے کجا آیگ ءَ ئے ” اے توارناکیں جست بلوچستان ءِ مھلوک ءِ تب ءَ ڈن شتگ ءُ آیاں برانز گپتگیں توار برز کرتگ –

ھدایت الرحمان ءَ وتی گوستگیں روچ ءِ مچی ءَ تران ءَ گشتگ اَت کہ اگاں مئے لوٹ سرجم نہ بیت اَنت گڑا سِی اکتوبر ءَ بزاں یک ماھے ءَ پد بلوچستان ءَ بلاھیں رنگے ءَ زھرشانی کنگ بنت –

نِی ھدایت الرحمان چی کنت، چی پہ بزگیں مھلوک ءَ دیم ءَ کاریت ءُ کجام ھد ءَ داں شت کنت بلے آئی ءَ یک گپے تچک کرتگ کہ من داں گڈی ساہ ءَ اے بزگ ءُ چیرترتگیں مھلوک ءِ رھشونی ءَ کن آں ءُ اے زمین ءُ زر ءِ واھند بلوچ اَنت ءُ بلوچانی مڈی اَنت بلوچاں دیگ بہ بنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ سلاہ بندیں آجوئی لوٹوکیں گل یونائیٹڈ بلوچ آرمی ءِ جارکش ءَ وتی شنگ کُتگیں یک درشان ءِ تہ ءَ منگچر ءَ پاکستانی پوج ءِ سر ءَ بیتگیں اُرش ءِ زمہ واری منّ اِتگ –

جارکش ءَ وتی شنگ کرتگیں درشان ءِ تہ ءَ گُشتگ کہ گوستگیں روچ ءَ چار بج ءِ وھد ءَ قلات ءِ ھنکین منگچر پرنس ھوٹل ءِ نزیک ءَ بلوچ سرمچاراں لشکریانی اولاک ءِ سر ءَ دستی بمبے ءَ گوں اُرش کُتگ، اُرش ءِ سبب ءَ یک کارمندے مُرتگ ءُ سئے ٹپی بیتگ اَنت اے اُرش ءِ زمہ واری ءَ یونائیٹڈ بلوچ آرمی من اِیت۔

جارکش مرید بلوچ ءَ گُڈ سر ءَ گُشتگ کہ مئے چُشیں اُرش داں بلوچستان ءِ آجوئی ءَ برجاہ مان اَنت۔

بلوچستان ءِ دمگ بولان ءَ پاکستانی پوج ءِ نیمگ ءَ چہ مروچی سیمی روچ ءَ ھم لشکر کشی برجاہ ءَ اِنت-

پاکستانی پوچ ءَ اے لشکر کشی گوستگیں روچاں بندات کتگ دانکہ مروچی ھم برجاہ ءَ اِنت بزگر ءُ آئی ءِ کش ءُ گور ءِ دمگاں لشکر کشی کنگ بوگ ءَ اِنت-

دمگی اھوالکارے ءِ رِد ءَ ھمے دمگاں نزیکیں میتگ پاکستانی پوج ءِ انگر ءَ اَنت-

اے لشکر کشی ءِ درگت ءَ انگت سرکاری رِد ءَ گپ دیم نیتکگ وھدے کہ دیر ءُ دراجیں دمگانی بوگ ءُ روگ ءُ آھگ ءِ راہ درانی بند بوگ ءِ سبب ءَ تاوانانی ھال سر بوگ ءَ نہ اِنت-

زانگ بہ بیت اے سئیں روچاں برجاھیں لشکر کشی ءَ پاکستانی پوج ءِ جھلی لشکر ءِ ھمراھی بُرزی کُمک ھم گون اِنت-

بلوچ لبریشن آرمی ءِ سروک بشیر زیب بلوچ ءَ چاگردی رسانکجاہ ٹوئٹر ءَ یک ٹوئٹے ءَ نبشتگ کرتگ گوستگیں روچاں نوشکی ءِ نزیک ءَ پاکستانی پوج ءِ گون ءَ جنگ ءُ چوپ ءَ شھید بیتگیں سنگت گنجل بلوچ، بلوچ راجی زرمبشت ءِ یک بے مٹیں کردے ءِ واھند بیتگ ءُ جھدکارے بیتگ-

بی ایل اے ءِ سروک ءِ بیان ھما وھد ءَ دیم ءَ اتکگ اَت کہ گوستگیں روچاں پاکستانی پوج ءُ دمگی ڈیتھ اسکواڈ ءِ گون ءَ جنگ ءُ چوپ ءَ شش سرمچار نمیران بیتگ اَنت –

نمیران بیتگیں سرمچارانی تہ ءَ بی ایل اے ءِ کماندار گنجل پنام ءِ مزار ھوار بیتگ کہ آئی ءِ سیادی کراچی ءَ بلوچ پھنات لیاری ءَ اِنت-

بشیر زیب بلوچ ءَ گشتگ کہ ھمراھیں گنجل بلوچ ایوک ءَ پیش اتکگیں ھاٹیگانی واھند یک کماندارے نہ بیتگ بلکیں یک سیاسی استادے ھم بیتگ –

بی ایل اے ءِ رھشون ءَ وتی ٹوئٹ ءَ گشتگ کہ سنگت گنجل، سنگت کلیم، سنگت فیصل، سنگت نودان، سنگت ریحان ءُ سنگت نزیر ءَ یک بھادریں رنگے ءَ وتی گل زمین ءِ ھاتر ءَ دشمن ءِ گون ءَ دیم پہ دیمی جنگ کنان ءَ وتی سرڈگار ءِ دلبند ءَ ھروھدی ءَ نمیران بیتگ اَنت –

بشیر زیب بلوچ ءَ گُشتگ کہ نِی بلوچ راجی جنگ ءِ آجوئی ءَ کس داشت نہ کنت ءُ نانکہ نیزور ترینت کنت بلوچستان ءِ ھمک کُنڈ ءَ آجوئی ءِ بیرک ءِ مک کنگ ءَ داں زورگریں پاکستانی پوج ءِ ھلاپ ءَ جنگ ترندی ءَ گون برجاہ بیت اِنت-

زانگ بہ بیت اے جنگ بیتگیں سرمچار نوشکی ءُ ھاران ءِ کوھی دمگاں بیست ءُ چار ستمبر ءَ آدینگ ءِ روچ ءَ بڈو ڈور نالہ ءَ ھواریں ھند سیاہ لوپ ءِ ھند ءَ پاکستانی پوج ءِ گون ءَ یک جنگے ءَ نمیران بیتگ اَنت –

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں درشان ءَ پاکستانی پوج ءِ گون ءَ ترندیں جنگے ءَ بلوچ لبریشن آرمی ءِ پنچ سرمتابیں بھادراں یک جوانیں کردے پیلو کنان ءَ شھیدی گچین کرتگ ءُ جنگ ءَ بازیں پوجی کشگ ءُ زدگ کرتگ اَنت-

جارکش ءِ رد ءَ جنگ ءِ بندات سھب ءَ بندات بیتگ ھما وھد ءَ دشمنیں پوج ءُ آئی ءِ دمگی ھونواریں کشندہ ٹولی ڈیتھ اسکواڈ ءِ کارمنداں جنگ زدگیں دمگ ءَ تر ءُ تاب ءَ دراتکگیں سرمچارانی یک ٹولی ءِ انگیر کنگ ءِ جھد اش کرتگ –

زانگ بہ بیت نمیران بیتگیں سرمچارانی تہ ءَ پنچ ءِ سیادی بی ایل اے ءُ یکے ءِ سیادی یو بی اے ءَ اِنت –

ھپتاد سالاں راج ءِ سر ءَ زلم بوگ ءَ انت، سِی اکتوبر ءَ تاں مئے لوٹ سرجم نہ بوت اَنت سِی ءُ یک اکتوبر ءَ بلوچستان راجدپتر ءِ مستریں زھرشانی جار ءَ جناں – مُولانا ھدایت الرحمان

بلوچستان ءِ تیاب دپی دمگ گوادر ءَ جماعت اسلامی ءِ رھشون مولانا ھدایت الرحمان ءِ چیردستی ءَ شھدائے جیونی چار راہ ءِ سر ءَ مزنیں مچی ءِ اڈ دیگ بوتگ گوادر ءِ راجدپتر ءِ تہ ءَ مستریں مچی گوشگ بوگ ءَ انت کہ مولانا ھدایت الرحمان ءِ گوشگ ءِ پد ءَ گوادر ءَ ھوار پیشکان، جیونی، سربندن، پسنی، اورماڑہ، تربت ءِ ھزارانی کچ ءَ لس مھلوک ءَ بھر زرتگ – مچی ءَ مکی مسیت ءَ بگر تاں دارالعلوم پبلک اسکول ءَ مھلوک ءِ مُچی بیتگ اَنت –

مچی ءَ تران کنان ءَ جماعت اسلامی بلوچستان ءِ رھشون مولانا ھدایت الرحمان ءِ گوشگ ات کہ زند ءُ مرگ ، ازت ءُ شرپ دراہ اللہ ءِ دست ءَ انت مروچیگیں اے مچی ءَ بھر زوروکیں درسیں ورنایانی جزبگ ءَ سلام کناں-

آئی ءِ گوشگ ات کہ مروچی ءَ چہ ھپتاد سالاں مئے بنکی ھک پُلگ بوگ ءَ انت مئے بنکی ھکانی پُلوک ءُ زلم زوراکی کنوکانی بگیری ءَ مروچی ما در اتکگ انت – ما پاکستانی انت ءُ ملکی کانود ءُ رھبندانی رِد ءَ وتی ھکانی لوٹ ءَ کنیں پاکستان ءِ کانود ءِ رِد ءَ دمگی مردمانی بنکی ھک دئیگ ءِ زمہ واری ریاست انت بلے مئے بزگیں راج گوستگیں بازیں وھداں آپ ءُ لین، جانسلامتی، روزگار ءُ زانت ءَ زبھر انت-

آھانی مال ءُ مڈیاں سریچیں زِر ٹرالر مافیاں والاھاں بکشگ بوتگ چریشی ءَ دریاورد چُنڈے نگن ءِ چمدار انت ءُ آبی ھیات ءِ چکچینی بوگ ءَ انت پھازگی ادارہ گیرکانودی ٹرالنگ ءَ داشت نہ کن انت بلے دریا ورداں پہ ماھیگ ءِ شکار رؤگ ءَپریشان کن انت آھاں تنگ کن انت-

آئی ءِ گوشگ ات کہ چیک پوسٹاں مئے راج ءَ بے سوب ءَ تنگ کن انت دمگی مردماں وتی پجار کنائیگے ھاتر ءَ بار بار گوشگ بیت کجا چہ پیداکے، کجا رؤگ ءَ ئے –

آئی ءِ گوشگ ات کہ ما ملکی کانودانی رِد ءَ وتی وتی بنکی ھکانی لوٹ ءَ کنگ ءَ اِنت ھچ وڑیں گیر کانودی کار کنگ ءَ نہ ایں اگاں ملکی کانودانی رِد ءَ ھک لوٹی جُرم ءِ گڑا اے جُرم ءَ ما مدام کنیں – آئی ءِ گوشگ ات کہ مھلوک ءَ تُرسگ نہ لوٹیت وتی بنکی ھکانی پھازگ ءَ مار ءَ یکجاہ بوگ ءُ جھد کنگی انت –
آئی ءِ گوشگ ات کہ گوادر ءَ جتگیں چیک پوسٹ راج ءِ تنگ کنگ ءِ ھاتر ءَ جوڑ کنگ بوتگ انت – پاکستان ءِ دگہ شھراں مھلوک ھچ وڑ ءَ تنگ کنگ نہ بنت چو کہ اد ءَ گوادر ءَ بیت –

آئی ءِ گوشگ ات کہ گوادر ءَ بس دیمروئی ءِ جاہ سلوات کنگ بیت بلے راستی چپ انت – مرگ ءُ زند ءِ سر ءَ اوست دارگ نہ بیت اگاں من مُرتاں منی مرگ ءَ پد اے زرمبشت اوشت آماچ مہ بیت –

ملا ءَ لوٹ کُتگ گوشتگ کہ گوادر ءِ زِر ءَ ٹرالنگ ھلاس کنگ بہ بیت دریاورد ماھیگ ءِ شکار ءَ تنگ کنگ مہ بنت ، دمگی مردماں بنکی ھک دیگ بہ بنت، گوادر ءِ دمگی مردماں آپ دیگ بہ بیت، گوادر شراب دکان بند کنگ بہ بنت، گوادر ءِ تہ ءِ درسیں گیرزلوری چیک پوسٹ ھلاس کنگ بہ بنت کوسٹ گارڈ سربندر ءَ گپتگیں مردمانی لانچ ءُ گاڑیاں واپس بہ کنت-زورانسری آوار جنگ بوتگیں مردم یل کنگ بہ بنت- اگاں مئے لوٹ سرجم کنگ نبوتاں گڑا سِی ءُ یک اکتوبر ءَ ملا پازل چار راہ پریس کانفریس کنیں ءُ بلوچستان ءَ راجدپتر ءِ مزنیں زھرشانی ءِ جار ءَ پرینیں-

مچی ءَ بیگواھیں مردمانی پانکجنیں گل ءِ رھشون ماما قدیر ءِ جاندراھی ءِ ھاتر ءَ دوا کنگ بوتگ –

مچی ءَ مولانا ھدایت الرحمان ءَ ھوار ءَ سعید احمد، ملا لیاقت، ماجد سھرابی، شریپ میاں داد ، محمد جان مری، ماجد جوھر ءُ ھسن مراد ءَ تران کتگ –

بلوچستان ءِ دمگ پنجگور ءَ سلاہ بندیں گاڑی سواراں یک مردمے آوار جتگ ءُ برتگ-

اے وئیل پنجگور ءِ بنجاھی شھر چتکان ءَ پیش اتکگ کہ آوار جنگ بیتگیں مردم ءِ پجار نجیب ء عبدالحق ءِ نام ءَ زانگ بیتگ پنجگور عیسی سند سر ءِ جھمنند اِنت-

نزیکیں دکانداراں گشتگ کہ ناشناسیں مردماں یک سرف گاڑی ءَ سوار بیتگ اَنت ءُ سلاہ بند بیتگ اَنت ءُ دبوکہ اش جتگ توپک ءِ زور ءَ آیاں نجیب آوار جتگ ءُ برتگ –

زانگ بہ بیت نجیب وتی دکان ءَ فوٹوگرافی ءِ کار ءَ بیتگ، وئیل ءَ پد نزیکیں دکاندارانی دلاں ترس ودی بیتگ اَنت –

اے وئیل جاہ ءَ پیش اتکگ کہ اود ءَ پوکیس ءِ اسٹیشن دو سد ءُ ایف سی ءِ بنجل سد میٹر ءِ دوری ءَ اِنت کہ تنی وھدی انتزامیہ ءِ نیمگ ءَ اے درگت ءَ دگہ گپ پیش کنگ نہ بیتگ اَنت –

پنجگور ءَ گوستگیں بازیں وھداں اے وڑیں وئیل ناوشیں رنگے ءَ رودم زوران اَنت ءُ روچ ء رھمان دزی بیگ ءَ اَنت اے وھداں سلاہ بندیں مردماں سِی مردم ءَ گیش کُشتگ اَنت –

گوستگیں روچاں سلاہ بندیں مردماں پنجگور سزی منڈی بیڑ برتگ ءُ سامان رپتگ ءُ برتگ اَنت –

اشی ءَ ابید گوستگیں روچاں سیدان راھی نگور ءَ دو درزن ءَ گیش دزاں شپ ءَ وارس ء منیر ءِ لوگ ءَ بیڑ برتگ ءُ دزی کتگ اود ءَ نزیر اھمد ء مولداد تیر جتگ ءُ زدگ کرتگ –

چریشی ءَ پد دمگ ءِ مردماں زھرشانی کرتگ ءُ دزانی دزگیر کنگ ءِ لوٹ کرتگ اَنت اے درگت ءَ نزیر اھمد ءِ برات میرو ءَ گشتگ کہ ما دزانی نشانی کرتگ ءُ لیویز کارمند گشتگ اَنت کہ دز روگ ءَ اَنت بلے آیاں ھچ نہ کرتگ ما ایف سی ءِ گور ءَ شتگ اِنت گڑا آیاں گشتگ کہ مارا گرگ ءِ واک گون نہ اِنت گڑا ما لاچار بوتگ ءُ زھرشانی کرتگ –

پنجگور ءَ ھوار سرجمیں بلوچستان ءَ سدانی کچ ءَ مردم پوج ءِ نیمگ ءَ سلاہ بند کنگ بیتگ اَنت سیاسی مردمانی گوشگ اِنت کہ اے مردم پوج ءَ ھمے واستا سلاہ بند کتگ اَنت کہ آجوئی ءِ رزمبشت ءَ ھلاس بہ کن اَنت چریشی ءِ سر ءَ آیاں ھر وڑیں چیزانی کنگ ءِ واک دیگ بیتگ اَنت –

نبشتانک: مزار ترا انگت روگی نہ اَت

نبشتہ کار: محسن رزاق

دی بلوچستان پوسٹ

من ءَ سک دل ءَ اَت کہ ترا یک رندے پد ءَ بہ گنداں پد ءَ ھما گوستگیں کسھاں بہ کن آں پد ءَ ھما کندگ ءُ مزاکی دیوان بہ بنت نزاناں نسیب ءَ نیست ءَ یا زالم ءَ مئے نندگ ءُ مزاک کنگ دوست نہ بوت انت –

گوں تو ھمراھی ءُ دیوان ءَ کسہ سک باز اَنت بلے ترا یات بیت اِنت کماش (کماش شھید حاجی عبدالرزاق) بیگواہ کنگ بوت پد ءَ شھید کنگ بوت من ءُ تو دگہ لھتے سنگتاں تئی میتگ ءَ اوشتاتگ ات ایں تو سک مونجا ءُ گمیگ اَت ئے، گوشت یار حاجی کماش مہ شت اِنت آئی ءِ جاہ ءَ من بہ شتیناں –

یار مزار جان نِی تو لیاری چورہ کت ما کُل چورہ بوت اِنت، ما ترا مزار ءِ نام ءِ سر ءَ توار کرتگ اَت ءُ تو وت ءَ مزارے کرت ءُ پیش داشت تو حاجی ءِ چورھیں لیاری ءَ را دگہ نوکیں نامے دات، من بس ھمے گشگ لوٹ آں کہ حاجی ءَ تئی وڑیں مزار جوڑ کرتگ مروچی لیاری ءَ ابید تیوگیں بلوچستان ءُ بلوچ راج تئی سر ءَ پھر بندگ ءَ اِنت –

تئی درستیں ھمراہ تئی سر ءَ پھر بندگ ءَ اَنت، من زاناں وھدے تو اولی تیر وارتگ گڑا بچکندگے ءَ ءُ دل ءَ گشتگ کہ نو کہ من شھید باں ھرکس ھمے گوش ایت مزار منی سنگت بوتگ-

مزار نزان آں کہ پد ءَ گوں تو منی نندگ دُشمن ءَ دوست نہ بوتگ یا نسیبءَ نہ بوتگ بلے وھدے کہ من ءَ سنگتاں ھال دات کہ مزار شھید کنگ بوتگ من ءَ اے گپ باور نہ بوت رند ءَ کہ تئی نمیرانی ءِ ھال پک ءَ بوت من نزانت من کُجا آں ءُ چون آں پرچہ کہ من ھمے وھءَ سک مونجا اَت آں ءُ باز پھر بندگ ءَ ات آں کہ مزار پہ بلوچ راج ءَ نمیران بوت ءُ راجی جھد ءِ دپتر ءَ وت ءَ اوارے کُرت ۔

مزار! من گوں سدکی ءَ گُش آں کہ تئی چینکس سنگت ھست اَنت ھر کُجا انت آ الم تئی سر ءَ پھر بندگ ءَ بنت ءُ یکیں ساھت ءَ چو من ءَ مونجا ھم بنت مزار من نزان آں کجام کسہ ءَ بیار آں کُجام گپ ءَ بجن آں مرچی تئی جتائی ءِ مونجائی من ءَ چہ سک بالا اِنت۔ مرچی من وتی زند ءِ یک سیاھیں دگے ءَ پد ءَ اوشتوک آں چُش کہ ساری ءَ یک برے بوتگ آں بلے منی امبراہ آ ساھتاں تو بوتگ ئے مرچی تو ھمے تھاری ءِ تہ شت ئے پہ رُژنائیں راج ءِ باندات ءَ ءُ من ھمد ءَ مونجا اوشتوک آں نزان آں چے بگُش آں، چے بہ جیڑ آں تئی وڑیں لائکیں،مڑاہ داریں،مزاریں،ملنگیں دلبرے ءَ پہ من گُشت ھم چے کن آں مزار من ھچ نبشتہ کُرت کنگ ءَ نہ آں مزار من ترا ھچ گُشت کنگ ءَ نہ آں مزار بلے تو یک برے پد ءَ لیاری ءِ نام بُرز ءَ کُرت۔

اوار اِیں۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ بولان ءَ پاکستانی پوج ءِ لشکر کشی دومی روچ ءَ ھم برجاہ ءَ اِنت ءُ جھلی پوج ءَ بُرزی کُمک ھم گون اِنت-

پوج ءِ لشکر کشی گوستگیں روچ ءَ سُھب ءَ بزگر ءِ کش ءُ گور ءِ دمگاں جتاجتائیں ھنداں بالگرداں پوج ءِ کارندہ ایر گپتگ اَنت ءُ وھدے کہ ھمے میان ءَ بمب گواریں بالگرداں تیرگواری ھم کتگ اِت-

اِھوالکاری ءَ ٹی بی پی ءَ گوں ھال کتگ کہ لشکر کشی ءَ دلگوشیں کارندھاں ھداروکی بُنجلے جوڑ کتگ ءُ وھدے کہ مروچی سُھب ءَ یکرندے پد ءَ بالگرد ھمے دمگ ءَ گندگ بوتگ اَنت-

زانگ بہ بیت بلوچستان ءَ اے وھد ءَ پاکستانی آرمی مزنیں کچے ءَ جھلی ءُ بُرزی لشکر کشی برجاہ ءَ اِنت- بولان ءَ برجاھیں لشکر کشی ءَ دنگیت ءَ ھچ وڑیں دزگیری ءُ جانی تاوانانی ھال سر نہ بوتگ-

سرکار نیمگ ءَ ھم اے درگت ءَ گپ دیم ءَ نیتکگ-