TBP Balochi

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بیست ءُ چار ستمبر ءَ آدینگ ءِ روچ ءَ نوشکی ءُ ھاران ءِ کوھی دمگ بڈو ڈور شیپ سوماری ءَ لوپ ءِ ھند ءَ زورگیریں پاکستانی پوج ءِ گوم ءَ جنگ دیان ءَ بلوچ لبریشن آرمی ءِ پنچ نہ ترسیں سرمچار تمردی ءَ گوں جنگ دیان ءَ شھید بوتگ انت وھدیکہ اے جنگ ءَ دژمنین پوج ءِ بازیں پوجی کارمندے مُرتگ ءُ بازینے زدگ بوتگ –

جارکش ءَ گوشتگ کہ جنگ ءِ بندات سھب ءَ ماھلہ ھما وھد ءَ بوتگ وھدیکہ دژمنیں پوج ءُ آئی ءِ داشتگیں کُشندہ ٹولی ءِ کارمند ھمے دمگ ءَ گشت ءَ دراتکگ انت ءُ سرمچارانی انگیر کنگ ءِ جھد ءِ کُتگ – چار اداراں گیش دیم پہ دیمی جنگ ءَ بلوچ سرمچاراں دژمنیں بازیں کارمندے کُشتگ ءُ زدگ کرتگ وھدیکہ شش بلوچ سرمچاراں دژمن ءِ انگیر پُروشتگ ءُ وتی ھمراھیں سنگتانی پہ سلامتی در کنگ ءَ سوبمند بوتگ ءُ وت شھیدی راہ گچین کُتگ –

جارکش ءَ گوشتگ کہ شھید بوتگیں سرمچارانی تہ ءَ کماندار گنجل پنام ءِ کامریڈ مزار، نزیر پنام ءِ سنگر، فیصل پنام ءِ یاسر، کلیم پنام ءِ بولانی ءُ ریھان پنام ءِ مھروان ءِ سیادی گوں بلوچ لبریشن آرمی ءَ چہ بوتگ وھدیکہ ھمگنگلیں گل یونائیٹڈ بلوچ آرمی ءِ سرمچار نودان پنام ھمل ءَ ھم بی ایل اے ءِ سرمچارانی ھمراھی ءَ تمردی ءَ گوں دژمن ءَ جنگ داتگ ءُ شھیدی پہ وت زرتگ-

جارکش ءَ گوشتگ کہ سرمچارانی تہ ءَ کماندار گنجل پنام ءِ کامریڈ مزار ء لکا کراچی ءِ نندوک بوتگ ءُ گوستگیں چار سالاں بی ایل اے ءَ گوں ھمگرنچ بوتگ ، آئی ءَ کسانیں وھدی ءِ تہ ءَ وتی جنگی ءُ سیاسی رپک ءُ ھُنراں گل ءِ جوانین جاہ ءَ سر بوتگ وتی زمہ واری پیلو کرتگ انت – کماندار گنجل وتی رپک ءُ ھنر مکلسی ءِ سبب ءَ بی ایل اے دمگی کماندار جوڑ کنگ بوتگ آئی ءَ داں گڈی ساھت ءَ وتی زمہ واری جوانی پیلو کرتگ انت ءُ دژمن ءِ انگیر ءَ وتی بازیں سنگت ءِ در کنگ ءَ سوبین بوتگ ءُ وتی شھیدی نوش کُتگ –

جارکش ءَ گوشتگ شھید بوتگیں سرمچارانی تہ ءَ نزیر پنام ءِ سنگر ء محمد قاسم میروانی کلی میروانی سوراب ءِ نندوک بوتگ، فیصل رودینی بلوچ پنام یاسر کلی رودینی سوراب ءِ نندوک بوتگ، کلیم اللہ پنام ءِ بولانی ء مقبول احمد ریکی بلوچ دمب سوراب ءِ نندوک بوتگ، ھرسئیں سرمچار گوستگیں سَے سالاں چہ بی ایل اے ءَ بندوک بوتگ انت سئیں سرمچاراں جتائیں ھند ءُ دمگاں بی ایل اے ءِ کار دیم ءَ برتگ وتی پرز جوانی ءَ پیلو کرتگ ءُ گل ءِ گوشگ ءِ پد ءَ کوہ ءَ اتکگ انت –
نہ ترسیں سرمچار شھید ریھان پنام ءِ مھروان ء شوکت بادینی بلوچ جھمنند کلی شریف خان نوشکی گوستگیں یک سالے ءَ بی ایل اے ءَ گوں بندوک بوتگ وتی راجی زمّہ واریاں پیلو کنگ ءَ بوتگ – وھدیکہ شھیدیں سرمچار ایڈوکیٹ نودان پنام حمل ء کامریڈ حمید بلوچ جھمنند نوشکی گوستگیں یک سالے ءَ ھمگنگلیں گل یونائیٹڈ بلوچ آرمی ءَ بندوک بوتگ ءُ دژمن ءِ بگیری ءَ جنگ ءَ بی ایل اے سرمچاراں ھمکوپگ بوتگ ءُ گڈی ساہ ءَ جنگ ءِ داتگ-

جارکش جیئند بلوچ ءَ وتی درشان ءِ تہ ءَ گوشتگ کہ بازیں اداراں بوتگیں اے جنگ ءَ دژمن ءَ سنگانی رسینگ ءَ پد تیرانی ھلاس بوگے ءَ سنگت کلیم اللہ پنام ءِ بولانی ءُ سنگت نودان پنام ءِ ھمل ءَ گڈی تیر وت ءَ جتگ ءُ جنگ ءِ زانت گچین کُتگ دژمن ءِ دیم ءَ سرجھل کنگ ءَ چہ وتی گڈی تیر وت ءَ جتگ ءُ شھیدی پہ وت ءَ گچین کتگ –

جارکش ءَ گوشتگ کہ بلوچ لبریشن آرمی شھید بوتگیں سرمچاراں سرڈگارے رکینگ ءُ آجوئی ءِ ھاتر ءَ تمردی جنگ کنگ ءُ آھانی شھیدی ءَ آھاں دروت ندر کنت ءُ کول کنت شھیداں گل، راج ءُ رجدپتر ھچبر بیھال نہ کنت ءُ بی ایل اے آھانی مشن ءَ آسر کنت ءُ دم کش ایت –

بلوچستان ءِ دمگ قلات ءَ ناشناسیں سلاہ بندیں مردمانی تیرگواری ءَ دو مردم بیران بوتگ اَنت-

تیرگواری ءِ وئیل قلات احمد آباد ءَ بوتگ – تیرگواری ءِ آسر ءَ بیران بوتگیں مردمانی پجّار حاجی محمد آعظم حاجی خدا ء دوست ءِ ناماں چہ زانگ بوتگ اَنت-

لیویز ءِ رِد ءَ دوئیں چہ احمد آباد ءَ قلات ءَ روگ ءَ بوتگ اَنت کہ پیسر ءَ راہ بستگ ءُ دوئنیانی سر ءَ تیرگواری کنگ ءُ چریشی ءِ آسر ءَ ھما دمان ءَ مرتگ اَنت –

لیویز ءَ لاش ڈی ایچ کیو نادُراھجاہ قلات ءَ برتگ ءُ پہ گیشیں چار ءُ ٹپاس ءَ پد لاش کھول ءِ دستیگ کتگ اَنت –

لیویز ءِ رِد کوش ءِ سوب وت ماں وتی دشمنی جیڑھے بوتگ-

سید حاصل پاکستانی پوج ءَ بیست ءُ شش مارچ دوھزار ءُ بیست ءُ یک ءَ چہ شال ءَ دیم پہ کراچی ءَ روگ ءِ وھد ءَ زیرو پوائنٹ ءِ ھند ءَ بس ایرگیجگ ءُ بیگواہ کنگ بیتگ –

سید حاصل کیچ ءِ بنجاھی شھر تربت کلاتک ءِ جھمنندیں نودربرے بیتگ – سید حاصل شال ءَ دیم پہ کراچی ءَ روگ ءَ بیتگ کہ زیروپوائنٹ ءِ ھند ءَ دزگیر کنگ ءَ پد بیگواہ کنگ بیتگ –

زانگ بہ بیت بلوچستان ءَ بازیں وھدے ءَ پاکستانی پوج ءُ چیریِں ادارھانی نیمگ ءَ سیاسی باسک، لبزانکی باسکاں ھوار لس شھری ھم دزگیری ءَ پد زنداناں برگ بنت –

خیبرپختوانخواہ ءَ سلاہ بندیں مردم ءُ پاکستانی پوج ءِ میان ءَ ترندیں جنگ ءُ چوپاں پاکستانی پوج ءِ کیپٹن بیران بیتگ-

دمگی مردمانی رد ءَ پاکستانی پوج ءَ شکی ءِ مردمانی جاڑیگ بیگ ءَ بیڑ برتگ ءُ ھمے وھد ءَ سلاہ بندیں مردم ءُ پوج ءِ میان ءَ جنگ ءُ چوپ مَچ اِتگ اَنت، یک کیپٹنے بیران بیتگ –

بیران بیتگیں کیپٹن ءِ پجار سکندر سھیل ءِ نام ءَ زانگ کہ ساھیوال ءِ جھمنند اِنت –

پشاور ءِ جھمنندیں اھوالکارے ءَ گُشتگ کہ اُرش ءَ سلاہ بندیں ٹولی ءِ یک کماندارے ھم جنگ بیتگ، بلے لس مھلوک ءِ نیمگ ءَ تنی وھدی اشی ءِ راستی نہ بیتگ اَنت –

زانگ بہ بیت اوگانستان ءَ تالبان ءِ گرگ ءَ پد پاکستان ءُ اوگانستان ءِ ھواریں دمگاں اُرش گیشی ءَ گندگ ءَ آیگ ءَ اَنت-

اے دمگاں گیشتر تالبان پُرکار اِنت کہ گوست ءَ چوشیں اُرشانی زمہ واری تالبان ءَ منّ اِتگ اَنت بلے مروچی بیتگیں اے اُرش ءِ زمہ واری تنی وھدی ھچ گل ءَ نہ زرتگ –

سربوتگیں ھالانی رِد ءَ گوستگیں روچ ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں سینزدہ دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ یک ھزار ءُ نھ سد ءُ بیست ءُ یک ءَ سر بوتگ اَنت-

بلوچستان جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ بلوچستان ءِ پنچ دمگاں ھشت سد ءُ چِل ءُ چار مردماں کرونا ویروس ٹیسٹ کنگ بوتگ کہ آھانی تہ ءَ سینزدہ مردماں کرونا ویروس پدر بوتگ ءُ دو سد ءُ ھپتاد دو مردمانی رپورٹ نہ اتکگ انت – چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ یک ھزار ءُ نھ سد ءُ بیست ءُ یک ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ بیست ءُ سَے مردم وش بوتگ انت، ٍوش بوتگیں مردمانی کچ نوکیں کیساساں ھوار سرجمی ءَ سِی ءُ یک ھزار ءُ چار سد ءُ پانزدہ انت-

رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ یک سد ءُ پنجاہ ءُ ھشت نادراہ ھست انت آھانی تہ ءَ پنچ شش نادراھجاھاں الاج انت ءُ دو نادراہ ھائی فلو آکسیجن اِلاج ءَ انت-

بلوچستان ءَ کرونا ویروس ءِ پوزٹیو کیسانی گیشی یک ٹک پنجاہ ءُ چار درسد بوتگ تنی وھد بلوچستان ءِ تہ ءَ کرونا ویروس ءَ سرجمی ءَ سَے سد ءُ چِل ءُ ھشت مردم بیران بوتگ انت-

آل پارٹیز کیچ ءِ کنوینئر مشکور انور ایڈوکیٹ ءَ تربت پریس کلب ءَ پریس کانفرنس کنان ءَ گوشتگ دمگدارانی نیمگ ءَ چہ آپسر گوستگیں روچاں شھید کنگ بیتگیں تاج بی بی ءِ کوش ءِ ارزی ناشناسیں مردمانی نام ءَ نبشتگ کنگ ءَ ایر جن ایں ءُ ارزی ءَ رد کن ایں –

آئی ءَ گُشتگ کہ دمگدار تچکیں جرمکارانی رکینگ ءَ راستی چیر دیگ ءُ پیش کنگ اِنت ءُ دروگیں ارزی ءَ نبشتگ کنگ ءُ اسرمندیں کھول ءَ انساپ ءِ پجارینگ ءَ نا ممکن کنگ ءِ جھد ءَ اِنت –

پریس کانفرنس ءَ تاج بی بی ءِ گوھار زتک عبدالرازق بلوچ ءُ دگہ کھول ءِ مردماں ھوار آل پارٹیز ءِ ڈپٹی کوارڈینر فضل کریم، بی این پی عوامی ءِ بنجاھی رھشون خان محمد جان، پیپلز پاٹی ءِ رھشون نواب شمبے زئی، جماعت اسلامی ءِ دمگی امیر غلام یاسین بلوچ، بی این پی عوامی ءِ دمگی سروک کامریڈ ظریف زدگ، جے یو آئی ءِ تھسل تربت ءِ امیر عبدالقدیر مینگل، ثناء اللہ مری، آل پارٹیز جارکش حفیظ علی بکش، نیشنل پاٹی رھشون انور اسلم ءُ تربت سول سوسائٹی کنوینئر گلزار دوست ءَ ابید دگہ سیاسی ءُ چاگردی رھشون ھوار بیتگ اَنت –

آل پارٹیز کیچ ءِ کنوینئر مشکور انور ایڈوکیٹ ءَ گوشتگ کہ بیست ءُ یک ستمبر ءَ آسکانی بازار آپسر ءِ جھمنندیں تاج بی بی ھما وھد ءَ شھید کنگ بیتگ کہ وتی کھول ءِ دگہ مردمانی ھمراھی ءَ کیچ کور ءُ سامان کور ءَ دار چِنگ ءَ روگ ءَ بیتگ –

آئی ءَ گُشتگ کہ شھید تاج بی بی ءِ کھول ءِ رد ءَ آیانی سر ءَ سیکیورٹی لشکر ءِ نزیکیں چیک پوسٹ ءَ تیرگواری ءِ وئیل ءَ پد زوت ءَ کھول ءَ ارزی ءِ دزبندی کرتگ ءُ چریشی ءَ ناشناساں ابید سیکیورٹی لشکر ءِ نام ءَ نہ کنگ باز پر دیگ ءُ بژنیگ اِنت انتزامیہ ءَ وسر ءَ دیری ءِ بھانگ کرتگ ءُ بیست ءُ پنچ ستمبر ءَ ھواریں جرمکار کھول ءَ نام گپت کتگ اَنت ءُ ناشناسیں مردمانی ناماں نبشتگ کرتگ ءُ چریشی ءَ تچک ءَ زانگ بیت اِنت کہ انتزامیہ ھواریں جرمکارانی پُشگیری کنگ ءِ جھد ءَ اِنت –

آیاں گُشتگ کہ سیکیورٹی ءِ نام ءَ اتکگیں ادارہ بے گناھیں مردمانی کوش ءَ ھواری ءَ وھد پہ وھد کنگ ءُ پیداک اَنت -چریشی ءَ مھلوک تکانسری ءِ آماچ اَنت آل پارٹیز کیچ شھید تاج بی بی ءِ کھول ءَ انساپ دیگ ءِ راہ ءَ ڈنگر جنوکیں ادارھانی گیر انسانی رویش ءَ ایر جنت –

آل پارٹیز کیچ لوٹ کنت کہ شھید تاج بی بی ءِ کوش کھول ءِ داتگیں دزبندی ءِ رد ءَ کنگ بہ بیت اِنت آل پارٹیز ھستیں ارزی کہ آئی ءِ راستی ڈالچار کنگ بیتگ کہ ھچ رنگ ءَ منّگ نہ بیت اِنت اگاں انتزامیہ ءَ آسرمندیں کھول ءَ انساپ نہ دات گڑا ترندیں زھرشانی کنگ بیت اِنت –

آیاں گُشتگ کہ ڈپٹی کمشنر کیچ ءَ وئیل جاہ سَے کلومیٹر گشتگ کہ اے آئی ءِ بدیانتی اِنت تچک ءَ ھما جاہ ءَ کہ گاڑی ءِ سر ءَ تیرگواری بیتگ آ جاہ بس یک کلو میٹرے ءَ گیشتر نہ بیت اِنت –

اے وھد ءَ شھید تاج بی بی ءِ گوھار زتک عبدالرزاق ءَ گُشتگ کہ ما انتزامیہ ءَ ارزی ءِ دزبندی کرتگ اشی ءَ راستی ءَ ارزی نبشتگ کرتگ بلے شھید ءِ برات ءَ ناشناسانی نام نہ گپتگ انتزامیہ ءَ وسر ءَ دیر کرتگ ءُ نا ایوک ءَ کوشکارانی رکینگ ءِ جھد کرتگ بلکیں ارزی ھم رد نبشتگ ءُ چریشی ءَ مئے کھول ءَ انساپ ءِ رسگ نا ممکن اِنت –

مند چکاپ ءَ پاکستانی پوج ءِ چار کارمندانی کوش ءِ زمّہ واری ءَ منّ اِیں – میجر گوھرام

سربوتگیں ھالانی رِد ءَ ناشناسیں سلاہ بندیں مردماں کیچ ءِ دمگ مند ءَ شیراز کوہ ءَ ٹٹ جنوکیں کارمندانی سر ءَ اُرش کُتگ –

اُرش مروچی سَے شمبے ءِ سھب ءَ مند ءِ دمگ چکاپ کور ءَ سیمسر ءَ ٹٹ جنوکیں پاکستانی پوج ءِ کارمندانی سر ءَ کنگ بوتگ، اُرش ءَ پاکستانی پوج ءَ جانی تاوان بوتگ اُرشکار درایگ ءُ رؤگ ءَ سوبمند بوتگ اَنت- اُرش ءِ زمہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں مند ءِ دمگ چکاپ کور ءَ ٹٹ جنوکیں پوجی کارمندانی سر ءَ اُرش کُتگ چار پوجی کارمند کُشتگ اَنت ءُ یکے زدگ کُتگ –

جارکش ءَ گوشتگ کہ پاکستانی پوج مند ءِ دمگ چکاپ کور ءَ سیمسر ءَ ٹٹ کنگ انت سیمسراں ٹٹ کنوکیں کارمندانی پھازگ ءِ ھاتر ءَ سرجمیں روچ ءَ پوجی کارمند آھاں سیکورٹی دے اَنت ءُ بیگاہ ءِ وھد ءَ واتر ءَ پوجی پانگس ءَ رو اَنت –

جارکش ءَ گوشتگ مروچی سَے شمبے ءَ مئے سرمچاراں چکاپ کور ءَ سیاھیں کوہ ءَ پیسر ءَ شتگ ءُ پوجی سنگر وتی کبزہ کُتگ نشتگ انت ھنچو کہ چار پوجی وتی سنگرانی نیمگ ءَ آیگ ءَ بوتگ انت پیسر ءَ چہ نشتگیں مئے سرمچاراں آھانی سر ءَ اُرش کُتگ چریشی ءَ سَے کارمند ھما دمان ءَ مُرتگ اَنت ءُ یکے زدگ کوہ ءِ شیپ ءَ کپتگ –

جارکش ءَ گوشتگ کہ ھمے اُرش ءِ وھد ءَ سیاھیں کوہ ءِ ٹٹ جنوکیں پوجی کارمنداں مئے سرمچارانی سر ءَ اُرش کنگ ءِ جھد اش کتگ بلے سرمچاراں پیسر ءَ چہ شور بند کتگیں جنگی رپک ءُ ھنراں آھانی اُرش بے سوب کُتگ یک کارمندے کُشتگ ءُ دگہ بازینے زدگ کُتگ اَنت-

جارکش میجر گوھرام بلوچ ءَ گوشتگ کہ ترس آماچیں دژمنیں پوج ءِ کارمنداں بازیں مارٹر گولہ آس داتگ بلے سرمچار سوبمندیں اُرش ءَ پد وتی چیریں اوتاک ءَ سر بوتگ انت –

آئی ءَ گڈسر ءَ وتی درشان ءِ تہ ءَ گوشتگ کہ بلوچستان ءِ آجوئی تاں زورگیریں پوج ءِ سر ءَ مئے اُرش برجاہ مان انت –

بلوچستان ءِ تیاب دپی شھر چی گوادر ءَ پاکستانی پوج ءَ سے مردم آوار جتگ ءُ پد بیگواہ کتگ اَنت ءُ وھدے کہ یک مردمے یل کنگ بوتگ-

دمگی اھوالکارانی رِد ءَ گوستگیں روچ ءَ مگرب ءِ وھد ءَ پاکستانی پوج ءُ چیریں ادارھانی کارندھاں گوادر ءِ دمگ مونڈی ءَ سے مردم آوار جتگ ءُ بیگواہ کتگ اَنت-

آوار جنگ بوتگیں یک ورنایے ءِ پجّار سرفراز محمد عصاء ءِ نام ءَ چہ زانگ بوتگ کہ آئی ءِ اُمر بیست ءُ دو سال اِنت وھدے کہ آئی ءِ ھمراھی آوار جنگ بوتگیں دو ءِ پجّار نہ بوتگ اَنت-

ھمے وڑ چہ مستونگ ءَ 10 اگست ءَ پاکستانی پوج ءِ دست ءَ زورانسری آوارجنی بوتگیں بابل بنگلزئی آجو بوتگ-

بیگواھیں مردمانی کھول ءِ گل وائس فار بلوچ مسنگ پرسنز ءَ بابل بنلگزئی ءِ آجو بوگ ءِ گپ راست کتگ ءُ گْوشتگ کہ اُمیت کن ایں ھکومت آ دگہ بیگواھیں مردمانی یل کنائنگ ءَ مئے یکین ءَ نہ پروش اِیت ءُ آئی ءِ ھمراھی ءَ زورانسری آوار جنی ءِ جیڑہ ءَ ڈیھ ءِ راہ ءُ راھبندانی وڑ ءُ پیم ءِ سر ءَ شر کنگ ءَ وتی کرد ءَ پیلو کنت-

روکپتی بلوچستان ءَ شنگ بیتگیں تامر بندانی تہ ءَ گندگ بیت اِنت انتزامیہ لس مھلوک ءِ سر ءَ تیرگواری کنگ ءَ اِنت، چرے تیرگواریانی میان ءَ زالبول ھم گندگ ءَ کاینت کہ آ سلوات کنگ ءَ کنگ ءَ اَنت –

روکپتی بلوچستان ءِ دمگ تمپ ریگان ءَ گوستگیں روچ ءَ شنگ بیتگیں تامر بنداں چارگ بیت اِنت کہ ایرانی انتزامیہ لس مھلوک ءِ سر ءَ تیرگواری کنگ ءَ اِنت-

چرے تیرگواری بازیں وھدے ءَ گندگ ءَ کیت اِنت ءُ اے تیرگواری ءِ میان ءَ زالبول ءُ چکانی پریات ھم اشکنگ بیگ ءَ اَنت –

بلوچ کمپئن فعالین ءِ رد ءَ چرے تیرگواریاں دو کس زدگ بیتگ اَنت –

زدگ بیتگیں مردمانی پجار مھر اللہ ریگی یوسف آبادی ء نواب ءُ ایمان ریگی یوسگ آبادی ء کرہم ءِ ناماں زانگ بیتگ اَنت –

ھردوکیں زدگ بیتگیں مردم ھاتم ایرانشھر ءَ نادراہ جاہ ءَ برگ بیتگ اَنت –

بلوچ کمپئن فعالین ءِ رد ءَ دمگی مردمانی نیمگ ءَ سر بیتگیں ھالانی رد ءَ چرے تیرگواری ءَ زالبول ھم زدگ بیتگ اَنت ءُ آ اے وھد ءَ نادراہ جاہ ءَ اَنت –

بلوچ کمپئن فعالین ءِ رد ءَ ایرانی انتزامیہ ءَ بیڑ برتگ ءُ ابید ءِ جست ءُ پرس ءَ میتگ ءِ سر ءَ تیرگواری کرتگ ءُ رند ءَ پد ءَ آئی ءَ لوگانی پَٹگ ءِ نام زاھر کرتگ –

بلوچ کمپئن فعالین ءِ رد ءَ روکپتی بلوچستان ءِ جتا جتائیں جاھاں چوشیں وئیل درپیش بیگ ءَ اَنت بلے چوشیں وئیلانی گر ءُ داری نیست اِنت –

سندھ یونیورسٹی جامشورو جتا جتائیں نودربر گلاں شال ءَ پی ایم سی ءِ رھبند ءُ زوراکیانی ھلاپ ءَ زھرشانی ءَ ھواریں بلوچ نودربرانی ھمدردی ءِ واستا یک روانکے کشگ بیتگ –

روانک ءَ بلوچ نودربرانی سر ءَ پوج ءِ تیرگواری، لَٹ ءُ کٹ ءُ بلوچ نودربرانی ھک ءَ سندھ یونیورسٹی جامشورو ءَ آرٹس فیکلٹی ءَ داں سی ایل ءَ روانک کشگ بیتگ –

چریشی ءَ سندھ یونیورسٹی ءِ شاگرد پاٹی جئے سندھ اسٹوڈنٹ فیدریشن (آزاد) جساف (آریسر) سپاف، آل اسٹوڈنٹس ایکشن کمیٹی، سندھ شاگرد سَبھاء ءُ مھران اسٹوڈنٹس کونسل ءَ ھوار سندھ یونیورسٹی دگہ نودربراں بھر زرتگ –

ھمے وھد ءَ نودربر رھشوناں گشتگ کہ ھما کہ شال ءَ بلوچ نودربرانی گون ءَ پیش اتکگ اَنت آ باز پدردیگ اَنت کہ اشی ءَ ما ترندی ءَ ایر جن ایں –

آیاں گشتگ کہ نودربر رھشون ھانی بلوچ ءِ مرگ اے پرشتگیں نزام ءِ وابی گوشان ءَ گشتگ کہ ما المی ءَ لوٹ کن ایں کہ نودربر رھشون ھانی بلوچ ءِ کوش ءِ تچکیں پَٹ ءُ پول بہ بنت ءُ پی ایم سی ءِ تچکی ءَ پدر بہ کنت اگاں نا گڑا زھرشانیانی درچ گیش کنگ بنت –

نودربر رھشوناں گشتگ کہ بلوچ نودربر مئے برات اَنت بلوچ نودربرانی جائزیں ھکانی واستا ھر تک ءَ جد ءُ جھد کنگ بیت اِنت ءُ ھر گام ءَ آیانی گون ءَ اوشتوک اِنت-