TBP Balochi

ھشت روچ ءَ پیسر ایران ءِ استان چہ مشھد ءَ چیریں ادارھانی دست ءَ آوار جنگ بیتگیں مردم یل کنگ بیتگ –

آئی ءِ پجار عمر کمبر زئی ءِ نام ءَ زانگ بیتگ ات کہ آ چھبار ءُ زاھدان ءِ نندوک گوشگ بیتگ اَت ھشت روچ ءَ پیسر آ ماں مشھد ءَ ساز ءُ سامان ءِ زورگ ءِ ھاترا شتگ بیتگ ءُ اود ءَ چریں ادارھاں دزگیر کنگ ءَ پد بیگواہ کرتگ-

ھمے وڑ ءَ چہ زاھدان ءَ نُھ ورنا آوار جنگ ءَ پد بیگواہ کنگ بیتگ اَنت –

سر بیتگیں اھوالانی رد ءَ گوستگیں روچ ءَ روکپتی بلوچستان ءِ بنجاھی شھر زاھدان ءَ ایرانی چیریں ادارھانی کارندھاں نُھ کس آوار جنگ ءَ پد بیگواہ کتگ اَنت-

آوار جنگ بیتگیں مردمانی پجار آصف ریگی ء نعمت اللہ، یاسین ریگی ء عبدالحق، علی ریگی ء نوشیروان، اویس براھوئی، عرفان براھوئی ء غفور، یاسین شاھوزئی ء جعفر، مصطفیٰ شاھوزئی ء نادر، عثمان رخشانی ء عبدالرؤف ءُ عبدالمالک سنجرانی کہ ھردوک خدانظر خان ءِ زھگ اَنت –

اھوالانی تہ ءَ گوشگ بیتگ کہ ایشانی توک ءَ گیشتری نوزدہ سال ءَ چہ کم اُمری ورناینت کہ ایرانی چیریں ادارھانی کارندھاں آوار جتگ ءُ برتگ اَنت-

اے ورنا گیشتر زاھدان ءَ مکسی مسیت ءِ کش ءُ گوراں دزگیر کنگ ءُ ناشناسیں زنداناں برگ بیتگ اَنت-

ھالانی تہ ءَ گوشگ بیتگ کہ اے مردمانی ھواری ءَ اود ءَ مردم لٹ شاپ ھم کنگ بیتگ اَنت ءُ ھالانی تہ ءَ ھمے گمان بوگ ءَ اِنت آوار جنگ بیتگیں مردم گیش بوت کن اَنت-

بلوچستان ءِ دمگ چاگی ءِ ھند نوکنڈی آپ نیستی ءِ ھساب انت –

گوستگیں ھپتگے بیت بازیں سارتی ءَ ابید ھم آپ نیست دمگی مردم پہ آپ شوھاز ءَ.سرگردان انت –

نوکنڈی ءَ دو مزنیں واٹر سپلائی ھم ھست اِنت بلے دمگی مردم پہ پٹ ءِ آپ ءَ تلوسگ انت –

دمگی مردمانی رِد ءَ گھٹ ءِ واٹر سپلائی ءَ گوستگین ماھے بیت کہ بس آزاد لانڈھی ءَ آپ دیگ انت ھرکس ءَ کہ زلورت انت آ ازاد لانڈھی ءَ آپ بیاریت ءُ دومی نیمگ ءَ بوٹگ واٹت سپلائی جرنیٹر ءِ ھرابی ءُ پیپانی پُرشگے سوب ءَ گوستگیں ھپگے بیت کہ آپ بند انت –

چہ ایشی ءَ آپ ءِ پٹ ءِ ھم نوکنڈی ءِ پی ایچ ای ٹانکیاں سر نہ بیت – دمگی مردم اے سارتی ءَ پہ آپ ءِ ھاتر ءَ دلسیاہ ءُ سرگردان انت – پی ایچ ای ءِ سروکاں پاد ماں پاد ءِ سر ءَ انت ءُ نشتگ انت آھاں مردمانی دلسیاھی ءَ ھچ کار نیست –

نوکنڈی ءِ دمگی مردماں چاگی ءِ ڈی سی ءَ گوں لوٹ کتگ ءُ گوشتگ کہ گھٹ ءُ بوٹگ ءِ واٹر سپلائی زوت ءَ زوت شر کنگ بہ بنت اگاں ناں گڈا نوکنڈی ءِ مردم آر سی ڈی ءِ شھدگ ءَ سرجمی ءَ بند کن انت تانکہ آپ دیگ نہ بیت ءُ اشی درسیں زمہ واری پی ایچ ای ءِ سر ءَ لڈگ بنت –

روکپتی بلوچستان ءِ بنجاھی شھر زاھدان ءَ ناشناسیں سلاہ بندیں مردمانی تیرگواری ءَ یک کماشے بیران بیتگ-

بیران بیتگیں مردم ءِ پجار خدارھم براھوئی ءِ نام ءَ زانگ بیتگ کہ آ زاھدان ءِ نندوک گوشگ بوگ ءَ اِنت-

وئیل گوستگیں شپ ءَ پیش اتکگ مہ اود ءَ سلاہ ببدیں مردماں اے اسپیت ریشے کماشے ءِ سر ءَ تیرگواری کنان ءَ کُشتگ-

زاھدان ءَ ھوار روکپتی بلوچستان ءِ دگہ جاہ ءُ ھنداں اے وڑیں وئیل گوست ءَ ھم پیش اتکگ بیتگ اَنت، گوستگیں شپ ءَ بیتگیں وئیل ءِ درگت ءَ زانگ نہ بیتگ –

کیچ ءِ بنجاھی شھر تربت ءَ محراب خالد ءُ طارق غنی ءِ تھیلیسیمیا نادراھی ءِ سر ءَ جوڈ کرتگیں ڈاکومینٹری تامر دی ریڈ سرکل ( The Red Circle) مروچی گورنمنٹ گرلز ڈگری کالج ءَ مزنیں پردھے ءِ پشت ءَ پیش دارگ بوتگ –

تامر ءِ چارگ ءِ ھاتر ءَ مزنیں کچے ءَ جنک ءُ بچکیں نودربراں بھر زرتگ مزنیں پردہ ءِ سر ءَ تامر ءِ چارگ ءَ پد کیچ تھیلیسیمیا کئیر سنٹر ءِ سرکماش ارشاد عارف ءَ نودربر تھیلیسیمیا ءِ درگت ءَ سرپدی داتگ انت –

زانگ بہ بیت ریڈ سرکل ڈاکومینٹری تامرے کہ آئی ءِ تہ ءَ تھیلیسیمیا ءِ نادراھی ءِ آماچیں مردم ءُ آھانی مات ءُ پتانی ھمراھی ءَ ھاسکر مکران ءِ زانتکاریں مردمانی میان ءَ بوتگیں گپ ءُ تران پیش دارگ بوتگ انت – اے تامر زامُر ءُ ساز کلک میڈیا ءِ نیمگ ءَ چہ پیش دارگ بوگ انت ءُ زامُر میڈیا ءَ وتی آفیشیل ترامجاہ ءَ گوشتگ کہ اے تامر سرجمیں بلوچستان ءَ پیش دارگ بیت اِنت پدا زامر ءِ آفیشل یوٹیوب چینل ءَ.شنگ کنگ بیت –

بلوچستان ءِ دو جتاجتائیں دمگ شال ءُ مستونگ ءَ پاکستانی پوج ءِ دستءَ سے ورناہ زورانسری آوار جنگ ءَ پد بیگواہ کنگ بیتگ اَنت-

گیشیں ھالانی رِدءَ بلوچستان ءِ دمگ مستونگ ءِ بازار ءَ آدینگءِ روچ ءَ پاکستانی پوج ءَ یک ورنایے آوار جنگ ءَ پد بیگواہ کتگ-

آوار جنگ بیتگیں ورنائے پجّار نصیب اللہ ء بختیار شاھوانیءِ نام ءَ چہ بیتگ-

کھول ءَ گوں سرکاری واکداراں دزبندی کتگ نصیب اللہ ءِ پہ سلامتی در کنگ ءِ لوٹ کتگ-

ھمے وڑ شال ءَ سول نادُراھجاہ ءَ پاکستانی پوج ءَ یک ورنایے آوار جتگ ءُ بیگواہ کتگ ءُ آئی ءِ پجّار حدا رحم نام ءَ چہ بیتگ زانگ بہ بیت اشی ءِ ھمراھی ءَ مشکے ءِ جھمنند سلام ء محمد اعظم ءِ نام ءَ چہ بیتگ اَت-

ھمے وڑ چاگردی رسانکدر ماں ٹوئیٹر ءَ علی جان لھری ءَ وتی شنگ کتگیں ٹوئیٹ ءِ تہ ءَ گْوشتگ پرندوشی پاکستانی پوج ءِ کارندھاں منی یک سیادے زورانسری آوار جتگ ءُ بیگواہ کتگ-

شنگ کتگیں ٹوئیٹ ءِ تہ ءَ بیگواھیں ورنائے پجّار باسط بلوچ ءِ نام ءَ چہ کتگ-

زانگ بہ بیت کہ بلوچستان ءَ ھمے ھپتگ ءَ چار ورناہ زورانسری آوار جنگ بیتگ ءُ وھدے کہ سے تیرسُپتگیں لاش دزکپتگ-

انسانی ھکانی گل ءُ بلوچ راجدوستیں پارٹی بلوچستان ءَ سیاسی باسکانی زورانسری آوار جنی ءُ تیرسُپتگیں لاشانی بھتام ءَ پاکستانی پوج ءِ سرءَ دیگ ءَ اَنت-

بلوچ راجداریں باسکانی زورانسری آوار جنی ءِ بگیری ءَ کراچی پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ھزار ءُ نُھ سد ءُ سِی چار روچ انت کہ یکشل ءَ برجاہ انت مروچی اے زھرشانی بنجل ءَ جماعت اسلامی ءِ نائب امیر اُسامہ زری، یوتھ ونگ ءِ جنرل سیکٹری اسمائیل بلوچ ءُ دگہ مردماں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

اے درگت ءَ گل ءِ کمک سرکماش ماما قدیر بلوچ ءَ گوشتگ کہ بلوچ ورنایانی پُرایمنیں جھدے درگان کنگے ھاتر ءَ استان تُرس ءِ ودی کنگ ءَ اِنت بلے ورنایانی پرایمنیں جھد برجاہ اِنت –

آئی ءَ گوشتگ کہ مروچی یکرندے پدا ژانگولیں جونانی دور دیگ ءِ درچ بندات کنگ بوتگ اگں اے کارانی کنگ ءِ سر ءَ پاکستانی پہ جوابدھی ءَ لوٹارینگ نہ بوت گڈا بلوچستان ءَ انسان نیستی ءِ جاور ودی بوت کنت –

بنجل ءَ مروچی بیگواھیں انسانی ھکانی باسک راشد حسین ءِ برازتک ماھزیب بلوچ ءَ بھر زرتگ ءُ گوشتگ کہ مارا بازیں وھدے بیت کہ زھرشانی کنگ ءَ ایں بلے مارا راشد حسین ءِ درگت ءَ ھچ وڈیں سرپدی دیگ بوگ ءَ نہ انت کہ آ چہ متحدہ عرب امارات ءَ پاکستان ءِ آرگ ءَ پد کجا برگ بوتگ ءُ کجام کتکاریانی سوب ءَ آئی ءَ چار سال انت کہ بندیگ کنگ بوتگ –

آئی ءَ گُوشتگ کہ راشد حسین ءَ ھوار ایندگہ زورانسری آوار جنگ بوتگیں مردمانی وش ءُ سلامتی ءَ یل کنائینگ ءِ ھاتر ءَ میان استمانی انسانی ھکانی ادارہ وتی کرد ءَ پیلو بہ کن انت –

گوستگیں روچ ءَ بیست ءُ شش جنوری ءَ ناشناسیں سلاہ بندیں مردماں بلوچستان ءِ دمگ جھاو ءُ کولواہ ءَ پاکستانی پوج ءِ سر ءَ اُرش کُتگ –

سلاہ بندیں مردماں یک اُرش ءِ کولواہ ءِ دمگ ڈنڈار مادگ ءَ برجاھیں پاکستانی پوج ءِ بنجلے ءِ سر ءَ کُتگ ءُ دومی اُرش جھاؤ ءِ دمگ نوندڈ ءَ کتگ – ھردو اُرشاں پاکستانی پوج ءَ جانی ءُ مالی تاوان ءِ دیمپانی کنگ کپتگ اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءُ بلوچ لبریشن آرمی ءَ منّ اِتگ انت –

بی ایل اے ءِ جارکش جیئند بلوچ ءَ وتی آفیشل ٹیلیگرام چینل “ھکل ” ءَ شنگ کتگیں درشان ءِ تہ ءَ کولواہ ءِ اُرش ءِ زمّہ واری منّ اِتگ گوشتگ کہ اے اُرش ءَ سَے دژمن کارمند کُشتگ ءُ بازینے زدگ کُتگ انت –

جارکش ءِ رِد ءَ بی ایل اے ءِ سرمچاراں آواران ءُ کیچ ءِ میانی دمگ کولواہ ڈانڈار ءَ مادگ ھند ءَ برجاھیں زورگیریں پاکستانی پوج ءِ بنجلے ءِ سر ءَ سَے نیمگاں اُرش کُتگ – بیست ملٹاں اُرش برجاہ بوتگ اے اُرش ءَ سرمچاراں دژمن پوج ءِ سر ءَ بازیں راکٹ ءُ گرنیڈ لانچر ءِ گولہ آس داتگ انت کہ چریشی ءَ سَے دژمن کارمند ھما دمان ءَ مرتگ انت ءُ بازینے زدگ بوتگ انت وھدیکہ بازیں بزدلیں دژمن کارمنداں وتی سنگر یل داتگ ءُ تتکگ انت –

جارکش ءَ گوشتگ کہ بلوچ لبریشن ارمی اے اُرش ءِ زمّہ واری ءَ منیت- زورگیریں پوج ءِ سرجمی ءَ درآیگ ءَ تاں مئے اُرش ترندی ءَ گوں برجاہ بنت –

جھاؤ بوتگیں اُرش ءِ زمّہ واری بلوچستان لبریشن فرنٹ ءَ منّ اِتگ ءُ گوشتگ کہ دورجنگیں توپک ءِ اُرش ءَ یک پوجی کارمند ءِ کُشتگ –

بی ایل ایف ءِ جارکش میجر گوھرام بلوچ ءَ وتی آفیشل ٹیلیگرام چینل “آشوب” ءَ شنگ کرتگیں درشان ءِ تہ ءَ گوشتگ کہ سرمچاراں بیست ءُ شش جنوری ءَ آواران ءِ دمگ جھاؤ ءَ نوندڈ ءِ ھند ءَ نوکوہی ہوٹل ءِ سر ءِ پوجی کارمندانی سر ءَ دورجنگیں توپک ءِ سر ءَ اُرش کُتگ یک کارمندے کُشتگ –

جارکش ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

نبشتانک: شیر دل گیب ءُ من

نبشتہ کار : داد شاشانی

دی بلوچستان پوسٹ

من شیردل گیب ءَ ھما وھد ءَ زان آں کہ اولی کتاب تیرے فراق اتکگ اَت بلے آ زانگ ءُ انیگیں زانگ ءِ تھ ءَ مزنیں دگری یے ھست آ وھداں من سک زھر اَت آں گوں شیر دل ءَ ، بلے مرچی من ءَ سک دوست بیت گیب جان ۔

من ءَ یات اِنت مئے میتگ ءِ ورنایاں نوک پہ وانگ ءَ شال ءِ روگ بندات کُتگ اَت بزاں پیسر ءَ مئے میتگ ءِ مردُم پہ وانگ ءَ گیش دور ءُ دران نہ شُتگ اَت اَنت کزا یکے پہ ردی شُتگ اَت ھاں بلے اے وھداں شال سک نامان اَت، بد بھتی ءَ من انگت شال ءَ وتی پاد ایر نہ کُتگ اَنت بلے انوں گریشگ ءِ نودربر شال ءَ چو کاگد واریں گوک ءَ یلہ اَنت ۔ ھمے وھد ءَ شال ءَ پہ وانگ ءَ روگ بِنا کُتگ اَت مئے میتگ ءِ ورنایاں ھمے وھداں گریشگ ءِ تھ ءَ راجدوستی ءُ راجکاری ءَ وتی پاد ایر کُتگ اَت اَنت منی ءُ شیر دل گیب ءِ جنگ ھمے وھد ءَ سر زُوران اَت ، جنگ ءِ مول ءُ مُراد ھمیش اَت ورنایانی دیوان ءَ اگاں پہ ردی کَسے بِہ نشتیں گُڑا شیر دل ءُ امبل ءُ شال ءِ راہ ءُ دگانی گپ ءَ چَہ ابید دگہ ھچ نیست اَت ۔ من اے گپ ءَ زھر نہ اَت اَنت گیب ءِ کتاب ءُ جند ءِ گپ مہ بوتیں ۔ من ھمے گپ ءَ گوں گیب ءَ زھر اَت آں مئے میتگ ءِ ورنا پہ شال ءَ ھمے واست ءَ گیش روگ ءِ جُھد ءَ اَت اَنت کہ اود ءَ آشکی کنگ ءِ دگہ لِزتے نام وانگ ءَ اَت بلے واھشت دگرے اَت اَنت ، چوناھیگا من مِھر ءُ دوستی یے یک شیدائیں منوگِرے آں منی زھر گوں وھد زوالان اَت آ تھنا وھد ءَ را زوال کنگ ءَ اَت اَنت ، پد ءَ من اے وھد زوالی ءِ گناہ گار شیردل گیب کُتگ اَت کہ انچیں کتابے نبشتہ کُتگ ھر ورنا ھمے راہ ءَ پہ وت مادنیں راھے سرپد بیگ ءَ اَت من بلے شیردل ءِ کتاب وت نہ ونتگ اَت ھمے سنگتانی دیوان ءِ تھ ءَ کسھاں من ءَ دلپروش کُتگ اَت یکے شیردل ءِ جند ءِ کسہ اَت اَنت گوں دومی کتاب ءُ امبل ءِ ۔ من ھمے شیردل ءِ پٹ ءُ پول بِنا کُت منی دل ءَ اَت اگاں من ءَ کُجا اے مرد دست بِہ کَپ ایت من گوں اے راجی بدواہ ءَ راھے رو آں چُشیں راج دژمن من ءَ ھچ وڑ اوپار نہ بیت کہ راجدوستی وتی پاداں نوک ایر کنگ ءَ اَت نوک گام جنگ ھیل کنگ ءَ اَت ھمے وھد ءَ شال ءَ کمبر چاکر ءُ الیاس نزر ھم نامدار اَت اَنت ۔ بلے مئے میتگ ءَ شیردل گیش اَت شال ءِ من ءَ سما نیست اَت پرچاکہ من وت شیردل ءِ کتاب نہ ونتگ اَت دومی شال ءَ نہ شُتگ اَت آں سیمی شیردل گیب ءُ الیاس نزر ءُ کمبرچاکر دیم پہ دیم نہ دیستگ اَت اَنت بس گپ ءُ کسھانی تھ ءِ مردُم اَت اَنت، آ وھد ءَ الیاس نزر ، کمبر چاکر ءُ بالاچ بالی درونت ءِ نام ءَ کتاب ھم شنگ کنگ ءَ اَت اَنت ما بس ندارہ چارگ ءَ اَت ایں کَے گیش بیت مئے میتگ ءَ شیردل ءِ مردُم سک باز اَت اَنت پرچاکہ شال ءِ ورنا ھر کَس کہ میتگ ءَ واتر بوت بے شیردل ءِ کتاب ءَ نیاتک پد ءَ جنک ءُ بچکی اشکی داستان سک وانگ بیت،من ھمے گپ ءَ گوں شیردل ءَ زھر اَت آں کہ شیردل راج ءِ ورنایاں رَدیں راھے ءَ برگ لوٹگ ءَ اِنت ۔ بس تھنا آشکی بیگ ءَ اَت مِھر ءُ دوستی ھم نیست اَت ۔

سال ءُ ماہ ءُ روچ وتی ھساب ءَ رواں بوت اَنت ما گوں زند ءِ برے یک جیڑھے ءَ آڑان اَت ایں ھمے وڑ ءَ منی سر ماں کُلاچی ءَ کَپت یک روچے سنگتے ءَ شیردل گیب ءِ سے کتاب منی کِر ءَ پہ امانتی ایر کُت پہ وتی کارے ءَ گریشگ ءَ شُت من نوک کُلاچی ءَ اَتکگ اَت آں پہ من ھر چیز درامد اَت من نہ گَشت آں بس لوگ ءَ نشتگ اَت آں، دگہ کتاب منی کر ءَ نیست اَت، من ءَ دیر اَت کہ کتاب ءِ وانگ یل کُتگ اَت دل ءَ گْوشت کتابے بُوان آں بلے من کتاب ءِ سر ءَ شیردل گیب ءِ نام ءَ گند آں من ءَ شِگِلّی بیت ۔ مزنیں دل ءُ مجگ ءِ جنگے ءَ پد من چماناں مُچ کُت شیردل ءِ کتاب تیرے فراق دست ءَ کُت پہ نادلکشی وانگ ءَ بِنا کُت من ءَ چَہ آشکی ءَ گیش راجدوستی گندگ بوت من ھیران ءُ ھبکہ بوت آں من وابے گندگ ءَ آں یا دل پہ گیب ءِ مول ءُ مُراد اَنچ اِنت من شیردل ءِ سے ئیں کتاب دو دو بر ءَ یک لَسّ ءَ ونت آں گُڑا من زانت شیردل ءِ مول ءُ مُراد چے اِنت اے گپ راستے کہ شیردل وت چون کہ بوتگ وتی کسہ ھما وڑ نبشتہ کُتگ ئِے بلے وتی نزور پدر کُتگ ئِے آئی ءَ مُدام ھمے جُھد کُتگ منی وڑ ءَ کَس مہ بیت وتی وھد ءَ کَس زوال مہ کنت ۔ ھمے جُھد کُتگ کہ راج ءِ تھ ءَ کَس اے وڑیں جاورانی تھ ءَ چَہ وتی راج ءُ زمین ءُ راجکاری ءَ بے سُدّ ءُ سما مہ بیت منی زھر ءُ زِدّ ھما روچ ءَ چَہ گیب ءَ ھلاس بوت اَنت ۔ من ھما اِنت گیب ءِ یک لوٹُکے بوتگ آں ھما روچ ءَ من زانت مئے میتگ ءِ ورنایاں شیردل ءُ شیردل ءِ کتاب ءِ بے کدری کُتگ تھنا اِشکی گپ دیم ءَ آرگ بوتگ اَنت آ ھم زگریں اشکی دْروشم ءَ گوں نا بلے راجدوستی ھچ گپ ءِ درانگازی کنگ نہ بوتگ کتاب ءِ تام کَش اِتگ اِش ۔

شیردل ءِ کتابانی تھ ءَ دْرستیں تَکّ ءُ پَھنادانی ھیال دارگ بوتگ اَنت بلوچ چاگِرد یکجاہ کنگ ءُ بڈ ءَ جنگ ءِ جُھد کُتگ گیب ءَ جاورانی وڑ ءُ پیم جاورانی نازُرکی مِھر ءُ دوستی جنگ ءُ جیڑہ جُھد ءُ جپا وار ءُ بزگی پیسری کتابانی تھ ءَ گیب ءَ شال ءِ کِرّ ءُ گْور پدر کُتگ اَنت ھما نیمگ ءَ تَر ءُ مانتر بوتگ بلے انوں امبل کتاب ءِ تھ ءَ گیب ءَ باکمالیں درشاندابے ءَ وتی ند کار بستگ امبل ءِ تھ ءَ شال ءِ جاگ ءَ کیچ مانپوش اِتگ وتی بڈ ءَ چوناھیگا یک ھسابے ءَ گیب ءِ کتاب بُندپتری چِھرگ ءَ ھم باز جاگہ ءَ گوں شَریں وڑے ءَ جَن اَنت وھدے شیردل ءِ ند شال ءِ چَپ ءُ چاگِرد ءَ ایر کَپتگ گُڑا کوھن کْوھنیں کسھاں گوں دیم پہ دیم بوتگ بلے ایبری شیردل ءِ ند کہ کیچ ءَ ایر کَپتگ مزیں بُندپترے گوں وت ءَ زُرتگ ئِے بلوچ ءُ درامدانی ھر ھما سُر ءُ پُر گیب ءَ چِتگ ءُ نز آرتگ اَنت کہ لَس مردُمانی نزّ ءَ نیا اَنت لَس مردُم ءِ گُمان ءَ نیا اَنت وانوک ءَ را دست ءَ گِپت ئِے بوچ بوچ ءِ نشان ءَ داتگ ئِے ۔

من جُھد کُتگ گیب ءِ پیسری کتاب کہ یکجاہ کنگ بوتگ اَنت چار ناولٹ ءِ نام ءَ ھما کتاب ءَ بِہ وان آں گُڑا وتی چمشانک ءَ نبشتہ بہ کن آں بلے کتاب من ءَ دست نہ کَپتگ پمیشکا گپ گیش امبل ءِ سر ءَ کنگ لوٹ آں کہ منی دست ءَ اِنت اے کتاب دْرستاں چَہ پیش شیردل ءَ من ءَ سوگات کُتگ بلے منی جُھد بوتگ من چارناولٹ ءَ وان آں نوں وتی چمشانک ءَ نبشتہ کن آں پمیشکا کمو دیر ءَ شُمارا منی چمشانک دست کَپگ ءَ اِنت چوناھیگا اے چمشانکے نہ اِنت ( بس چار دانک پہ شیردل ءَ ) من بُہ گْوشتیں شَر اَت امبل ءِ تھ ءَ گیب ءِ دْرستان چَہ وشتریں درشانداب گچین کُتگ کہ وتی چاگِرد ءِ کَسان کسانیں جُستانی پسو دیگ ءِ جُھد کُتگ وتی ڈیھ ءِ جاورانی نگیگی ءِ سوب ءَ راج ءِ تھ ءَ وڑ وڑیں جُست ءَ سر ءَ زُرتگ گیب ءَ ھمے جُھد کُتگ کہ من مردُمانی مجگ ءِ تھ ءَ ھمے نگیگیں جُستاں ھلاس بہ کن آں گیب ءَ وتی کارست انچُش کاربستگ اَنت ھر نیمگ ءَ پُترینگ ءِ جُھد کُتگ ءُ یک شَریں وڑ ءَ ھم سوبین بوتگ کارستاں وتی جُست ءُ پسو انچیں دابے ءَ درانگاز کُتگ اَنت کہ مردُمانی لوٹ بوتگ اَنت راج ءَ را ھمے جُستانی پسو درکار بوتگ ۔ گیب ءِ جُھد بوتگ من امبل کتاب ءِ تھ ءَ ھچ کمی پشت مہ گیج اَنت منی گپ ءِ مُراد اے ھم نہ اِنت شیردل ءَ دْرستیں لوٹ ءُ نگیگی سرجم کُتگ اَنت ۔ بلے گیب ءَ وتی زانت ءُ سرپدی ءِ کد ءُ کِساس ءَ مزیں زھمتے کَش اِتگ کہ من وت ءَ آپسرے ءَ سر بہ کن آں ۔

من چُش گْوشت نہ کن آں شیردل ءَ گِدار ءِ سرجمیں لوٹ پیلو کُتگ اَنت پرچاکہ من گِدار ءِ لوٹاں بلد نہ آں باریں گیب ءَ گِدار ءِ لوٹ چونیں سنگرے ءَ آپ داتگ اَنت بلے من گوں پُرتوارے ءَ گْوش آں گیب ءَ کارستاں گوں ھچ جَھل ءُ بُرزی نہ کُتگ ھچ وڑ ءَ نا انساپی نہ کُتگ کارست انچیں وڑے ءَ کاربند کنگ بوتگ اَنت کہ ھما وڑ ءَ اے وھد ءَ درکار بوتگ اَنت گیب ءَ کارستانی تب شَریں وڑے ءَ زانتگ اَنت ھچ وڑ ءَ گوں کارستاں زوراکی نہ کُتگ ،پہ زور تُرسینگ ءُ دلیر ھم نہ کُتگ اَنت ئِے ھما داب ءَ کہ انوں جاور ھست اَنت ھما داب ءَ کارست کار گِرگ بوتگ اَنت ، بلے منی ءُ شیردل ءِ جیڑہ انگت نہ گیش اِتگ پرچاکہ گیب ءَ بلوچی زُبان ڈالچار کُتگ زُبان ءِ ڈالچار کنگ ءَ ما ھچ وڑ ءَ وش ءُ رازِیگ نہ بہ ایں اے جُست الم شیردل ءَ کنگ بہ بیت بلوچ ءِ زُبان ءَ گوں تئی کُجام بدی ھست ؟-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ بنجاھی شھر چہ شال ءَ زورانسری آوار جنگ بیتگیِ حافظ علی احمد ھشت سال ءِ گوزگ ءَ پد ھم دیم ءَ ارگ نہ بیتگ- کھول ءَ آئی ءِ یل کنگ ءِ لوٹ کتگ-

زورانسری آوار جنگ بیتگیں حافظ علی احمد ء حاجی محمد شکم مینگل ءِ کھول ءِ گوشگ اِنت کہ چہ ھشت سالاں حافظ علی احمد ءِ واتری ءِ ودار ءَ کنگ ءَ ایں بلے واکدارانی نیمگ ءَ داں انگت ءَ آئی ءِ یل کنگ ءَ ھچ وڑیں گامگیج نہ زرتگ-

کھول ءِ گوشگ اِنت حافظ علی احمد مینگل جھمنند قادر آباد نوشکی شش فروری دوھزار ءُ پانزدہ ءَ پاکستانی پوج ءُ چیریں ادارھاں سیٹلائیٹ ٹاؤن شال ءَ دزگیر کتگ ءُ پد ءَ ھما اِنت بیگواہ اِنت ءُ آئی ءِ درگت ءَ ھچ وڑیں اھوال نیست اَنت-

کھول ءِ گوشگ اِنت حافظ علی احمد اگاں کجام ھم بھتامے ھست گڑا آئی ءَ را آمیدگس ءَ پیش بہ کن ات بلے اے وڑ ءَ ابید ءِ آمیدگساں پیش نہ کنگ ءُ کانون ءُ انسانی ھکانی واکدار کسے ءَ چو اے وڑ ءَ بیگواہ کنگ منّگ نہ بیت اِنت-

کھول ءَ بلوچستان ءِ سیاسی ءُ چاگردی گلاں گوں علی احمد ءِ یل کنگ ءِ واستا توار چست کنگ ءِ دزبندی کتگ-