ری امیجننگ پاکستان: بلوچستان ءَ یک نوکیں تجربگے ؟
ٹی بی پی شونگال
شال ءَ ری امیجننگ پاکستان ءِ نام ءَ چہ یک سمینارے اڈ دیگ بیتگ اَت کہ اِشی ءَ پاکستان ءِ پیسرگیں مزن وزیر ءُ ن لیگ ءِ رھشون شاھد خاقان عباسی، بلوچستان ءِ پیسرگیں سر وزیر نواب اسلم رئیسانی، پاکستان ءِ انیگیں ن لیگ ءِ سرکار ءِ پیسرگیں وزیر خزانہ مفتاح اسماعیل، پیپلز پارٹی ءِ پیسرگیں رھشون ءُ سینیٹر مصطفی نواز کھوکھر، پاکستان یونین آف جرنلسٹ ءِ مھتر شھزادہ ذوالفقار ءُ حق دو تحریک ءِ رھشون واجہ حسین واڈیلہ ءُ دگراں تران کُتگ اَت۔
پاکستان ءَ ھر وھدیکہ نوکیں تجربگے کنگ بیت گُڑا آئی ءِ بندات چہ بلوچستان ءَ کنگ بیت اِنت، گُڑا تُری آ راسکوہ ءِ ایٹمی تجربگ بہ بنت اگان باپ ءِ دروشم ءَ شپ ءِ تھاری ءَ بنجاھی پاٹی ءِ اڈ دیگ بہ بیت، نوں ری امیجننگ پاکستان ءَ ھم بلوچستان ءِ شھر شال ءَ چہ بندات کنگ بیتگ۔ داں انگت پدر نہ اِنت کہ ری امیجننگ پاکستان ءِ لوٹ ءُ مکسد چی اَنت بلے ایشی ءِ رھشون گُش اَنت کہ آ ھما جیڑھانی سر ءَ گپ کنگ لوٹ اَنت کہ آیانی درگت ءَ پاکستانی اسمبلی اگاں گچینی فورمزانی سر ءَ گپ نہ بیگ ءَ اِنت۔
سیمینار ءِ تہ ءَ زورانسری بیگواھیاں ھوار بلوچستان ءِ بُن گپتگیں جیڑھانی سر ءَ گپ کنگ بوت۔بلوچستان ءِ جیڑھانی پدراھی کنگ بہ بیت بلے ایشانی گیواری ءِ درگت پدریں روڈ میپ دیگ نہ بیتگ ءُ ھما جیڑھانی سر ءَ کہ گپ کنگ بیتگ ایشانی زمہ وار ھم یک ھدے ءَ داں سیاسی کارست ءُ پارلیمانی پاٹی اَنت۔ شاھد خاقان عباسی مزن وزیر اَت، آ وھدی آ زورانسری بیگواھیانی سر ءَ نا گپ کنگ ساڑی بیتگ نانکہ بلوچستان ءَ برجاھیں پوجی بیڑانی درگت ءَ گپ کنگ ءَ بیتگ۔ بلوچستان ءَ وھدیکہ ھمروچ زورانسری بیگواھیں مردمانی ژانگولیں جون دزکپگ ءَ بیتگ اَنت آ وھد ءَ مصطفی نواز کھوکھر پیپلز پارٹی ءِ بھر بیتگ ءُ بلوچستان ءَ پیپلز پارٹی ءِ سرکار بیتگ۔
مروچی بلوچ ورنایانی زورانسری بیگواھی ءُ دروگیں میڑانی تہ ءَ جنگ بیگ ءِ سر ءَ کوکار کنوکیں نواب اسلم رئیسانی ھم سر وزیر بلوچستان بیتگ، وھدے بلوچ ورنایانی کُشگ ءُ دور دیگ ءِ درچ پیپلز پارٹی ءِ سرکار ءَ بندات بیتگ اَت۔ پاکستان ءِ تہ ءَ پارلیمانی پاٹی ءُ کارست وھدے اپوزیشن ءِ تہ ءَ بنت آیاں بلوچستان ءَ بیوکیں زلم ءُ زوراکی گندگ ءَ کائنت بلے وھدے سرکار ءَ بنت گُڑ ءَ آ ھمے استانی زوراکیانی تہ ءَ پاکستانی پوج ءِ ھمکار جوڑ بنت۔
بلوچستان ءِ جیڑہ سیمینار ءَ تران کنگ ءَ چہ اگاں پارلیمنٹ ءَ یک بل ءِ پاس کنگ ءَ چہ گیوار نہ بنت۔ وھدیکہ پاکستانی ڈیھہ اگاں پاکستانی پوج بُنکی بلوچ راجی اگبال ھوار آجوئی ءِ اگبال ءَ منگ ءَساڑی مہ بنت داں ھما وھدءَ بلوچستان بُن بیت ءُ بلوچ جنگ برجاہ بیت اِنت۔