TBP Balochi

روکپتی بلوچستان ءِ بنجاھی شھر زاھدان ءَ’ ھونین جمعہ ‘ ءِ یات ءَ زھرشانی ءُ روانک کش اتگ-

روانک ءُ زھرشانی آدینگ ءِ نماز ءَ پد مکی مسیت ءَ کش ءُ گوراں بندات بیتگ کہ اود ءَ بمازیاں زھرشانی دروشم ءُ اوگام جنان ءَ ’ مرگ بر خامنہ ای‘ ءِ اوگام جتگ ءُ زاھدان ءَ سی ستمبر ءَ جنگ بیتگیں مردمانی واستا انساپ ءِ لوٹ کتگ-

زھرشانی کنوکانی دستاں بینر بیتگ اَنت ءُ آیاں شھر ءِ جتا جتائیں دگاں زھرشانی دروشم ءَ وتی زھرشانی یاداشت کتگ-

زھرشانی گر ءُ دار ءِ ھاتر ءَ زاھدان ءَ بازیں کساسے ءَ سیکورٹی پورسز ءُ دگہ ادارہ دگانی سر ءَ گیشی ءَ گندگ ءَ اتکگ اَنت ءُ دومی نیمگ لھتے شنگ بیتگیں اکسانی توک ءَ چیریں ادارہ مردماں آوار جنگ ءَ اَنت-

دومی نیمگ ءُ ایران ءِ گوریچانی شھر استان گالیش ءَ مولانا گورگیج ءِ برگ ءِ ھلاپ ءَ کپن پوشیں روانک کشگ بیتگ کہ آیانی سر ءَ جتا جتائیں اوگام نبشتگ بیتگ اَنت-

بلوچی وٹس ایپی وانگجاہ

نبشتہ کار: ابدلستار بُگٹی

دی بلوچستان پوسٹ

اے راج ءِ وش بھتی انت کہ بلوچ راج ءِ تہ ءَ گوں نوکیں زرمبشے ءَ پہ راجی زبان ءِ وانگ ءُ نبیسّگ ءَ یک آشوبے ودی بیتگ گُڑا اے گْوشگ رَد نہ بیت کہ نی راج ھم سرپد بوتگ ءُ بلوچ وتی راجی زبان ءَ دوست دار ایت ایشی ءِ مستریں درور ایش انت بلوچ ماں چاگردی رسانکدر ءَ ھر چیزے گوں وتی راجی زبان بلوچی ءَ نبشتہ کنت۔ پد ءَ چہ ایشی ءَ گیشتر انچوشکہ ما گِندگ ءَ ایں کہ مرچی پیسبُک ءُ وٹس ایپ ءَ ابید ماں بازیں بلوچی تندجاھاں ھم بلوچی نبشتانک ءُ نکان پہ وانگ ءَ رس اَنت ءُ ھمُک روچ تب ھر وھد ءُ چاگردی جیڑھانی بابت ءَ ھم بلوچی نبشتانک شِنگ بنت کہ اود ءَ زُبان دوستی ءُ راجدوستی ءِ بابت ءَ راج ءَ نوکیں آگاھی یے رسگ ءَ انت۔

ٹَوک ءِ مول ءُ مراد ایش انت کہ باید انت ما بلوچ ایکم بِہ بَہ ایں بلکیں دلجم بِہ بَہ ایں کہ مئے بلوچی زبان مرچیگیں وھد ءَ دیمروی ءِ دَگاں جُنزان اِنت ءُ پہ راجی زبان ءِ دیمروی ءَ بلوچ زبان زانتکار ھم باز جُھد ءَ اَنت۔ چوناھیگا من باز وَ نہ زان آں بلے کمو سرپدی ھست کہ بازیں بلوچی زبان دوستیں استاداں وٹس ایپی گَل اڈ کتگ ءُ وتی گرانبھائیں وھداں پہ راج ءِ روژنائیں باندات ءَ کربان کنگ ءَ انت بزانکہ ھرکسے وتی وس ءُ واک ءَ راج ءَ بلوچی زُبان ءِ لبزانک ءُ نبشتاری ءِ سرپدی دیگ انت پمیشکا ما دلجم ایں کہ مئے راجی زبان ھم گیدی دگریں راجانی وڑ ءَ بے کساس دیمرویاں بالاچ بیت۔

گُڑا اے درگت ءَ من یک بتلے ھم گْوش آں انچوشکہ ” یک دست ءَ چاپ توار نہ کنت” ھمے ڈول ءَ باید انت مارا ھم گوں ھمے استاداں ھمکوپگی ءَ ھمراھداری کنگی اِنت کہ ما ھم ھمے بلوچی وٹس ایپی وانگجاھاں باسکی بِہ زیر ایں ءُ چیزے چہ اُستاداں دربر ایں۔ باید اِنت ما ھمے استادانی کاراں ھمکوپگ بِہ بَہ ایں کہ راج ورناہ ءُ کماشاں بلوچی ءَ وانینگ ءَ انت۔ ما اول ھمے استادانی بلوچی دَرونتاں وت وانان ءَ بلوچی نبشتہ رھبند ءَ ھیل گر ایں، مُدام آیانی نبشتانکاں وت بوان ایں ءُ دیم ءَ ھم روان بکن ایں۔ لازُم وَ نہ اِنت کہ شُما چہ اولی ھپتگ ءَ بلوچی نبشتہ بہ کن اِت۔ اگاں ما بلوچی ونت کن ایں گُڑا اے ھم گنج اِنت۔ بِل اِت کہ ماھے بہ لگ ایت۔ اگاں دوازدہ سال پہ ھِندی، پارسی ءُ انگریزی ءَ نباد بیت گُڑا یک ماھے پہ بلوچی وانگ ءُ زانگ ءَ ھم کُربان بہ کن ایں۔

وھدیکہ ما بلوچی دَرونت ءُ نبشتانکاں وانان ءَ بلوچی وانگ ءَ زبر بیتگ ایں۔ گُڑا ما ھمے دابیں بلوچی درونت ءُ نبشتانکاں نبیسّان ءَ راج ءَ ھم وانین ایں۔ ما وت ھم بلوچی وٹس ایپی وانگجاھاں اڈ کنان ءَ وتی لوگ ءِ مردم، سْیاد ءُ سنگتاں بلوچی بہ وانین ایں، آیاں راجی زُبان ءِ بارو ءَ سرپدی بہ دے ایں کہ بلوچی مئے راجی پجّار اِنت پمیشکا راجی زُبان ءِ دیمروی راج ءِ دیمروی اِنت۔ راجی زُبان راج ءَ یکجاہ ءُ یکمُشت کنائین ایت۔ پمیشکا مارا وتی راجی زُبان ءَ دیمروی دیگ لوٹ ایت بلے بلوچی ھما وھد ءَ دیمروی کنت وھدے کہ ما دْراہ بلوچ بلوچی وت دربر ایں ءُ دیم ءَ ھم وانین ایں۔ راج ءِ ورناھیں نودربراں راجی زُبان ءِ وانگ ءُ وانینگ ءِ سکین بہ دے ایں گُڑا مئے راجی زُبان دیمروی کنت۔ ترا تھنا بلوچی وت وانگ ءُ دربرگی نہ انت بلکیں ترا بلوچی وانینگی اَنت گُڑا تو وتی یک راجی زمہ واری یے پیلو کنگ ءَ ئے۔

پد ءَ ھمے ورنائیں مردمانی ھم یک راجی ڈُبہ ءُ زمہ واری ھست انت کہ ما گِندگ ءَ ایں اے ورنائیں نودربر وتی زمہ واریاں پیلو نہ کنگ ءَ اَنت۔ انچوشکہ مارا ایوک ءَ ماں دیوان ءَ ھوار بیگ ءُ جون ءِ وڑ ءَ بے بَھر ءَ ساڑی بیگی نہ اَنت بلکیں ما بلوچی آبیکندار ءُ سیدگنج ڈکشنری ءَ ماں وتی گوانکواں ایرگیج کن ایں ءُ ماں وانگجاہ ءَ بِھر بہ زور ایں ءُ زیت راجی زبان ءِ نبیسّگ ءَ بلد ءُ زبر بہ بہ ایں۔ وانگجاہ ءِ بْرات ءُ گْوھاریں باسکاں بیسَہ ءُ باوری بہ دے اَنت کہ آ وانگجاہ ءِ تہ ءَ اول بلوچی درونتاں بوان اَنت، بلوچی نبشتہ بہ کن اَنت، مُدام وتی نبشتگیناں دوبر چمشانک دیان ءَ وتی رَدیاں وت راست بکن اَنت۔ بزاں ما آیانی ھمُک وڑیں کُمکّ بہ کن ایں۔

باید اِنت ما اول چہ رَدیاں مہ تُرس ایں چے ءَ بنی آدم ءَ مُدام چہ رَدیاں دربرتگ۔ اگاں ما رَدی نہ کن ایں گُڑا چتور بلوچی وانگ ءَ بلد بہ ایں۔ اگاں یکے ءَ بلوچی ءَ چیزے دربرتگ گڑا اے ھما باسک ءِ ڈُبّہ (زمہ داری) اِنت کہ آ پد ءَ دیم ءَ سد ءُ دو سد بلوچ برات ءُ گْوھار بہ وانین اِیت۔ مارا بْرات ءُ گْوھار چوشیں وانگ ءُ زانگ ءِ وانگجاھاں آرگی اَنت ءُ ما امیت کن ایں کہ ھر کسے راجی زبان ءِ نبشتہ کنگ ءَ بلد بیت ءُ وتی دَمگ ءُ شھراں بلوچی وٹس ایپی گَلاں اڈ کنت ءُ راج ءَ راجی زبان ءِ نبیسّگ ءَ سوج ءُ پنت کنت۔

بلوچ ھست ءُ یکمُشت بات اَنت، بلوچ راج ءَ ھوار براھوئی ءُ بلوچی شالا دیمروی کنات اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پاکستان ءَ امریکہ ءِ ڈالر ءِ دیم ءَ کلدار ءِ نھاد ءَ دگہ چار کلدار کمی بیتگ-

آدینگ ءِ روچ ءَ انٹر بینک مارکیٹ ءَ ڈالر ءِ نھاد ءَ دو سد ءُ شست ءُ یک روپیہ بیتگ ھمے وڑ اوپن مارکیٹ ءَ امریکہ ءِ ڈالرے ءِ نھاد دو سد ءُ شست ءُ سَے روپے ءَ بھا بوگ ءَ اِنت-

فاریکس ڈیلرز ءِ رد ءَ کاروباری تکاں ھپتگ ءِ گڈی روچ ءَ آدینگ ءِ بندات ءَ کاروبار ءِ پھناتاں ھم روپے ءِ نھاد کمی ءَ گندگ بیتگ –

امریکہ ءِ یک ڈالرے ھنچش کہ اوپن مارکیٹ ءَ پشمبے ءِ روچ ءَ دو سد ءُ پنجاہ ءُ شش ءَ بھا بوگ ءَ بیتگ مروچی دو سد ءُ شست ءَ بھا بوگ ءَ ایں ھمے وڑ انٹر بینک مارکیٹ ءَ ڈالر ءِ نھاد دو سد ءُ پنجاہ ءُ شش ءَ گیش بیتگ ءُ دو سد ءُ شست ءَ ٹریڈ بوگ ءَ اِنت-

زرکاری ءِ تکانی زانتکار سمیع اللہ طارق ءَ اردو نیوز ءَ گوں گپ کنان ءَ گوشتگ کہ ڈیھ ءَ ڈالر ءِ نھاد ءِ برزی مروچی ھم برزی ءَ گند بیتگ – ڈالر ءَ چہ کیپ ءَ دور بوگ ءَ پد ترندی ءَ ڈالر برز ءَ روگ ءَ اِنت- مروچی ھم انٹربینک ءُ اوپن مارکیٹ ءَ چار ءَ داں پنچ روپے گیش بیتگ اَنت –

آئی ءَ دیمتر ءَ گوشتگ کہ ڈالر ءِ نھاد ءِ گیش بوگ ءِ ھواری ءَ ڈیھ ءَ وام ھم گیش بوگ ءَ اَنت ایشی ءَ ھوار ھوار آیوکیں روچاں گران نھادی ھم گیش گندگ بیت اِنت –

بلوچستان ءِ جتاجتائیں دمگ شال ، ھب ، کلات ، بسیمہ ءُ ھُزدار ءَ یک ھپتگے ءِ تہ ءَ چار لاش دزکپتگ ءُ یکے تیرگواری ءِ آسر ءَ کُشگ بیتگ-

سربوتگیں ھالانی رِد ءَ گوستگیں روچ ءَ شال ءِ دمگ گوریچانی بائی پاس ءَ یک مردمے ءِ لاش دزکپتگ-

اِھوالکارانی رِد ءَ دزکپتگیں لاش ءِ پجّار 28 روچاں بیگواہ بیتگیں ورناہ سارنگ مری ء سلطان مری ءِ نام ءَ چہ بیتگ-

ھمے وڑ بسیمہ ءِ دمگ کلغلی ءَ یک لاشے دزکپتگ ءُ دزکپتگیں لاش ءِ پجّار محمد ادریس ء محمد ابراھیم جھمنند کھٹان لطیف آباد ھُزدار نام ءَ چہ بیتگ کہ آ یک ھپتگے ءَ ساری ءَ چہ وتی لوگ ءَ درتکگ بیتگ-

بلوچستان ءِ باپاری شھر ھب چوکی شھر ءِ نزیک ءَ امیر آباد ءَ گوزوکیں یک کورے ءَ کماشے لاش دزکپتگ ، دمگی انتزامیہ ءَ لاش دز گپتگ ءُ پہ پجّار ھاتر ءَ جام قادر نادراھجاہ ءَ برتگ اود ءَ آئی ءِ پجّار پنجاہ سے سالی ئیں محمد بخش ء محمد رمضان نام ءَ چہ بیتگ-

ھمے وڑ گوستگیں روچاں کلات ءِ دمگ زرد عبداللہ ءِ ھند ءَ ڈیم ءِ نزیک ءَ ناشناسیں سلاہ بندیں مردمانی تیرگواری ءَ چہ یک مردمے بیران بیتگ-

بیران بیتگیں مردم ءِ پجّار سعداللہ ء خان محمد ٹک لانگو جھمنند زرد عبداللہ نام ءَ چہ بیتگ ءُ کوش سوب زانگ نہ بیتگ-

ھمے وڑ چہ ھُزدار ءَ یک ماھے ءَ ساری بیگواہ کنگ بیتگیں ورنایے ءِ لاش ھُزدار ءِ تھسیل زھری کوھی دمگ سیاہ کوہ ءَ دمگی مردماں دزکپتگ اَت-

دزکپتگیں ورنائے لاش عبدالوحید ء محمد حسن لوٹانی نام ءَ چہ بیتگ ءُ آ سی پنچ روچاں ساری بیگواہ بیتگ-

زانگ بہ بیت بلوچستان ءِ جتاجتائیں دمگاں وھد وھد سر ءَ تیرسپُتگیں لاش دزکپ اَنت ءُ گیشتریں لاشانی پجّار نہ بیت مردم ھمے گوش اَنت کہ مارا تُرس اِنت اے لاش بیگواہ کنگ بیتگیں مردمانی بنت ءُ دومی نیمگ ءَ راجدوستیں راھشون ءُ آجوئی لوٹوکیں پارٹی انسانی ھکانی باسک لاشانی دور دیگ ءِ بھتام ءَ پوج ءُ آئی ءِ چیریں ادارھانی سر ءَ جنگ ءَ اَنت-

بلوچستان ءِ بُنجاھی شھر شال ءَ میڈیکل نودربرے پاکستانی پوج ءَ زورانسری آوار جنگ ءَ پد بیگواہ کتگ-

گیشیں ھالانی رِد ءَ گوستگیں شپ ءَ شال ءَ سیول نادُراھجاہ ءِ نزیک ءَ پاکستانی پوج ءِ کارندھاں میڈیکل نودبرے آوار جتگ ءُ گوں وت برتگ-

آوار جنگ بیتگیں ورنائے پجّار سلام ء محمد اعظم جھمنند مشکے تنک نام ءَ چہ بیتگ-

زانگ بہ بیت بلوچستان ءَ زورانسری آوار جنی ءِ نہ کُٹوکیں دْرچ یکشلہ برجاہ ءَ اِنت ءُ دومی نیمگ ءَ زورانسری آوار جنی ءِ ھاتر ءَ جوڑ کتگیں شُدکُشیں ھڑتالی بُنجل ءَ چار ھزار نُھ سد سی دو روچ سرجم اِنت-

مکران ءَ اولی رند ءَ براھوئی زبان دربرائینگ ءِ درچ تربت سول سوسائٹی ءِ نیمگ ءَ بندات کنگ بوتگ –

بلوچی ءِ دومی مستریں زبان براھوئی کلاس ھمے سال ءِ جنوری ماہ ءَ عطا شاد ڈگری کالج تربت ءَ بندات کنگ بوتگ انت کہ مزنیں کچے ءَ ورنا اشی ءِ شوک ءَ دارگ ءَ انت –

تربت سول سوسائٹی ءِ نیمگ ءَ ماں تربت ءَ براھوئی زبان ءِ دربرائینگ ءِ جار ءَ پد مزنیں کچے ءَ مردین ءُ جنین ھاسکر ورنا دیم اتکگ انت ءُ وانگ لوٹ انت – گورنمنٹ عطاشاد ڈگڑی کالج تربت ءَ کلاس بیست جنوری ءَ بندات کنگ بوتگ انت کہ بیگاہ ءِ پنچ ءَ بگر تاں شش ءَ برجاہ بنت-

تربت سول سوسائٹی ءِ کنوینر گلزار دوست ءَ گوشتگ کہ تربت ءَ براھوئی کلاس ءِ بندات کنگ ءِ مول ءُ مراد بلوچانی دومی مستریں زبان براھوئی ءِ ماں مکران ءَ دیمروئی دیگ ءُ وتی زبان ءِ پھازگ اِنت –

آئی ءَ گوشتگ کہ مکران ءِ مردم وتی زبان ءِ نہ زانگ ءِ سوب ءَ شال، جھالوان یا سراوان ءَ رو انت گڑا وت ءَ درآمد مار انت پرچاکہ ما براھوئی زبان ءَ پھمیت نہ کن ایں ، اد ءَ کلاسانی بندات کنگ ءِ مستریں مول ھمے درآمدی ءَ گار کنگ، ورنایانی شوک ءُ کلاساں بھر زورگ ءَ مئے جزبگ گیشتر مھکم بوتگ انت –

آئی ءَ گوشتگ کہ باندات ءَ مئے ھمے جھد بیت اِنت کہ جھالوان، سراوان ءُ رخشان ءَ بلوچی زبان ءِ دربرائینگ ءِ جھد ءَ بندات بہ کن ایں تاکہ مئے تہ ءَ زبان ءِ نہ پھمگے دوری ھلاس بہ بیت –

برتانیہ ءِ رسانک فنائنشل ٹائمز ءِ گوشگ انت کہ پاکستان اے وھدی نگیگیں جاوراں گوں گوزگ انت، اے جاوارانی تہ ءَ پاکستان ءِ مالی ڈبگ ءِ ترس ھست انت –

برتانیہ ءِ تندجاہ ءِ رپورٹ ءِ تہ ءَ بنجاھی بینک ءِ درور دیگ بوتگ ءُ گوشگ بوتگ کہ زِر ءِ تہ ءَ سدانی کچ ءَ کنٹینر اُشتاتگ انت کہ آھانی تہ ءَ دری سامان مان بلے بھا زورگ ءِ ڈالر نیست –

میان استمانی کمپنی ءُ جھازانی ایسوسی ایشن ءَ کڈن کتگ کہ پاکستان ءَ درملکی جھازانی ڈالر داشتگ انت کہ چریشی ءِ سوب ءَ پاکستان انڈسٹری ھما ملکانی لڑ ءَ ھوار انت کہ فنڈاں دار انت –

واکدارانی گوشگ انت کہ کار کنگ ءُ مڈیانی پھریزگ ءِ ھاتر ءَ ٹیکسٹائل وڑیں دگہ فیکٹری بند بوگ ءَ انت – میکرو اکنامک انسائٹس ءِ سروک ثاقب شیرانی ءَ گوشتگ کہ ملک ءِ بازیں باپار ءِ بند بوتگ اگاں باپاری کنوکاں وتی کار ءُ بار پچ نکوت چریشی ءَ مزنیں تاوان ءِ بوت کنت – زانتکاراں کڈن کتگ کہ پاکستان مالی درگت ءَ نزور بوان انت، اے وڈ پاکستان چو سری لنکا ءِ وڑ ءَ بوت کنت کہ اود ءَ مھلوک ءَ اژدری سامان ھم رسگ ءَ نہ انت –

فنانشل ٹائمز ءِ رِد ءَ درملکیانی دیگ ءِ ھاتر ءَ پاکستان ءِ گور ءَ پنچ ارب ڈالر ھم نیست کہ یک ماھے ءَ پہ دریاں بس نہ بنت دومی نیمگ ءَ شھباز شریف ءِ سرکار ءِ آئی ایم ءِ گون ءَ بوتگیں ھپت بلین ڈالر کمک ءِ پیکج ھم اشتاتگ – میان استمانی بینک ءِ گوستگیں مشیر عابد حسن ءَ گوشتگ کہ پاکستان ءِ ھاتر ءَ ھمک روچ اژدری انت اے جاورانی تہ ءَ درآیگ ءَ تنی وھدی ھچ راہ نیست، اگاں پاکستان یک یا دو ارب ڈالر رول اوور ءَ سوبمند بہ بیت ھم اے سسٹم ھنچوش ھراب انت کہ بس ادارکی کمکے بوت کنت –

پاکستان ءِ وزیر احسن اقبال ءَ فنانشل ءَ ٹائم ءَ گوشتگ کہ در ملکی کرنسی ءَ پھریز کنگ ءِ جھد ءَ پاکستان ءِ دری سک باز کم بوتگ – زانتکارانی گوشگ انت درآمدکنندگان ءِ ھاتر ءَ بینک ءِ نیمگ ءَ لیٹر آف کریڈٹ پچ نہ کنگ ھم بلاھیں سوب یے کہ چریشی ءَ اسٹیل انڈسٹری وتی پیداوار ءِ بند کنگ ءِ بیھار داتگ –

بنجاھی بینک ءَ گوشتگ کہ وردنی ءُ ٹیل ءِ وڑیں اژدری سامانانی سربوگ ءِ ارزان کنگ ءِ ھاتر ءَ درآمدی بندش کم کنگ بہ بنت پاکستان انی ھم گوستگیں سال ءَ اتکگیں سیلاب ءِ تباھکاریانی آماچ انت کہ چریشی ءَ.کساس سِی ارب ڈالر ءِ تاوان بوتگ –

میان استمانی وام دیوکاں ھمے ماہ ءَ جنیوا ءَ بوتگیں ڈونر کانفرنس ءَ پاکستان ءِ مالی جاورانی گھتری ھاتر ءَ نھ بلین ڈالر ءَ گیش دیگ ءِ کول کتگ بلے اے زر کدی ءُ چون کائنت اے درگت ءَ باوست بوگ ءَ انت –

سندھ ءِ مزن شھر کراچی ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ.مروچی چار ھزار نُھ سد ءُ سِی ءُ سَے روچ سرجم بوتگ انت – مروچی چہ کراچی ءَ عوامی تحریک ءِ رھشون محمد پیور شفقت ءُ دگہ مردماں بنجل اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ پاکستانی پوج ءُ آمیدگس یک مھکمیں پندل ءِ رِد ءَ زورانسری آوار جنگ بوتگین مردمانی جیڑہ ءَ میان استمان دیم ءَ ھمے پدر کنگ انت کہ اے پاکستان ءِ تھی جیڑہ یے ءُ زورانسری آوارجنی ءِ جیڑہ ءِ توار ءَ میان استمان تکاں درگان درگان کنگے بے سوبیں جھد ءَ کنگ ءَ انت -.

آئی ءَ گوشتگ کہ بلوچ راج پاکستان ءِ اے درسیں رپک ءُ ھنراں سرپد بہ بیت ءُ آئی ءِ بگیری ءَ مھکمیں وڈے ءَ جھد بہ کن انت ءُ آئی ءَ بے سوب بہ کن انت ءُ بلوچ راجی زرمبشت ءَ منزل ءَ سر بکن انت –

ماما قدیر بلوچ ءَ دیمتر ءَ گوشتگ کہ پاکستانی ادارہ بلوچستان ءِ تہ ءَ وتی بے سوبی ءَ گندگ ءَ پد زوراکیانی تہ ءَ گیشی آرگ ءَ انت – بلوچ پرزندانی دیمھونی ءُ مات ءُ گھارانی تمردی ءَ پاکستان ءِ زلم ءُ زوراکی بے سوب کتگ انت –

آئی ءَ گوشتگ کہ ریاستی ادارہ کشندہ ٹولی ءُ دگہ ڈنگاں مڈی دیگ ءُ سرجمیں بلوچستان ءِ تہ ءَ زوراکی کنگ پرمایگ انت –

ماما قدیر بلوچ ءَ گوشتگ کہ پھازگی لشکر چیرہ ادارہ ءُ زر زیریں کشندہ ٹولیاں بلوچستان ءِ تہ ءَ زلم زوراکیانی تہ ءَ گیشی آرتگ ءُ ھمے میان ءَ بلوچانی زورانسری آوار جنی ءُ آھانی ژانگولیں جونانی چگل دیگ ءِ درچ ءِ تہ ءَ یکرندے پدا گیشی آرگ بوتگ –

پاکستان ءِ اُستان سندھ ءِ بنجاھی شھر چہ کراچی ءَ پولیس ءَ بلوچ آجوئی لوٹوکیں گل ءَ بندوکیں باسکے ءِ دزگیر کنگ ءِ ٹاہ داتگ-

پولیس ءِ رد ءَ کراچی ءِ دمگ کیماڑی ءَ پولیس ءَ بیڑ بران ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ (بی ایل ایف) ءِ پرکاریں باسک شفیع محمد بلوچ سلاہ ءُ شوروانی ھواری ءَ دزگیر کتگ-

ایس ایس پی کیماڑی ءَ ٹاہ داتگ کہ دزگیر کتگیں مردم کراچی ءُ بلوچستان ءَ سکیورٹی پورسز ءِ سر ءَ اُرشاں دزمانجن اِنت ءُ ھمے وڑ آئی ءَ وتی دگہ سَے ھمراھانی ھمراھی ءَ سعید آباد ءَ پولیس ءِ سر ءَ اُرش ھم من اتگ-

ایس ایس پی ءِ رد ءَ جرمکار ءَ وتی جد ماتیں برات ءِ سروکی ءَ گل ءِ کمکاری کتگ ءُ گیشیں پٹ ءُ پول برجاہ اَنت-

امریکہ ءَ چار شمبے ءِ روچ ءَ جار پرینان ءَ گوشتگ ’ آ روس ءِ بگیری ءَ جنگ ءَ یوکرین ءِ کمک ءَ مزنیں ٹینک دنت ‘-

فرانسیسی ھال سرکنوکین ادارہ اے ایف پی ءِ رد ءَ روس ءِ نیمگ ءَ ھمک روچیگیں بیھاراں ابید ھم امریکہ ءَ ابید جرمنی ءُ ناروے ءَ یوکرین ءَ را ٹینک دیگ ءِ جار پرینتگ اَنت-

امریکہ ءِ سروک جوبائیڈن ءَ وائٹ ھاؤس ءَ تران کنان ءَ یوکرین ءَ ٹینک دیگ ءِ جار جتگ-

آئی ءَ گوشتگ ’ امریکہ روس ءِ بگیری ءَ جنگ ءَ یوکرین ءَ را 31 ایم وج ابرام ٹینک دنت کہ یوکرین ءِ یک بٹالینے ءِ بروبری ءَ اِنت ‘-

نارو ءِ وزیر دفاف ءَ گوشتگ ’ آ روکپتی ڈیھانی نیمگ ءَ یوکرین ءِ کمک ءِ امل ءِ بھرمند بیگ ءَ آئی ءَ لنپرڈ 2 ٹینگ دنت ‘-

یوکرین بازین ماھاں روکپتی ڈیھاں چہ اے جھد ءَ پد جرمنی ءَ کیئف 14 لیپرڈ 2ٹینک دیگ ءِ جار جتگ، ٹینک دنیا ءِ توک ءَ جوانتریں ٹینکانی لڑاں ھوار اَنت –

یوکرین ءَ امریکہ ءُ جرمنی ءِ نیمگ ءَ داتگیں ٹینکانی منت گپتگ ءُ گوشتگ کہ ’ چریشی ءَ روسی پوجیانی اُرشانی پروشگ ءَ کمک رس ات اِنت-

دومی نیمگ ءَ سروک پوتن ءَ گوشتگ روکپتی ڈیھ یوکرین ءَ کمک کنگ ءَ رھبنداں لگتمال کنگ ءَ اَنت-

آئی ءَ گوشتگ کہ روکپتی ڈیھانی نیمگ ءَ یوکرین ءَ را ٹینک دیگ ءِ پژدر ءَ روس ءَ وتی گام تیار کتگ اَنت-

دونیسک ءَ ھستیں پوجی کارندھاں روس ءِ سرکاری ھال سرکنوکیں ایجنسی (طاس) ءَ گوں گپ کنان ءَ گوشتگ ’ ما روکپتی ٹینکانی پروشگ ءَ سرجمی ءَ تیار اِنت ‘-

زانگ بہ بیت گوستگیں ھپتگانی وھداں یوکرین ءِ سروک زیلنسکی ءَ یکے ءَ گیش بر روکپتی ڈیھاں لوٹ کتگ من ءَ سلاہ ءُ ٹینک بہ دے اَنت –

روس ءِ سروک ولادیمیر پوتن ءَ نوکیں زوراکیانی چن ءُ لانچ ءِ پژدر ءَ نیٹو ءِ سروک جین اسٹولنبرگ ءَ جرمنی ءِ بنجاھی شھر برلن ءِ تر ءُ تاب کتگ-

نیٹو ءِ سروک ءَ اے ٹاہ داتگ ءُ گوشتگ ماسکو سرجمیں یوکرین ءَ گرگ لوٹ ایت –