بلوچی وٹس ایپی وانگجاہ
نبشتہ کار: ابدلستار بُگٹی
دی بلوچستان پوسٹ
اے راج ءِ وش بھتی انت کہ بلوچ راج ءِ تہ ءَ گوں نوکیں زرمبشے ءَ پہ راجی زبان ءِ وانگ ءُ نبیسّگ ءَ یک آشوبے ودی بیتگ گُڑا اے گْوشگ رَد نہ بیت کہ نی راج ھم سرپد بوتگ ءُ بلوچ وتی راجی زبان ءَ دوست دار ایت ایشی ءِ مستریں درور ایش انت بلوچ ماں چاگردی رسانکدر ءَ ھر چیزے گوں وتی راجی زبان بلوچی ءَ نبشتہ کنت۔ پد ءَ چہ ایشی ءَ گیشتر انچوشکہ ما گِندگ ءَ ایں کہ مرچی پیسبُک ءُ وٹس ایپ ءَ ابید ماں بازیں بلوچی تندجاھاں ھم بلوچی نبشتانک ءُ نکان پہ وانگ ءَ رس اَنت ءُ ھمُک روچ تب ھر وھد ءُ چاگردی جیڑھانی بابت ءَ ھم بلوچی نبشتانک شِنگ بنت کہ اود ءَ زُبان دوستی ءُ راجدوستی ءِ بابت ءَ راج ءَ نوکیں آگاھی یے رسگ ءَ انت۔
ٹَوک ءِ مول ءُ مراد ایش انت کہ باید انت ما بلوچ ایکم بِہ بَہ ایں بلکیں دلجم بِہ بَہ ایں کہ مئے بلوچی زبان مرچیگیں وھد ءَ دیمروی ءِ دَگاں جُنزان اِنت ءُ پہ راجی زبان ءِ دیمروی ءَ بلوچ زبان زانتکار ھم باز جُھد ءَ اَنت۔ چوناھیگا من باز وَ نہ زان آں بلے کمو سرپدی ھست کہ بازیں بلوچی زبان دوستیں استاداں وٹس ایپی گَل اڈ کتگ ءُ وتی گرانبھائیں وھداں پہ راج ءِ روژنائیں باندات ءَ کربان کنگ ءَ انت بزانکہ ھرکسے وتی وس ءُ واک ءَ راج ءَ بلوچی زُبان ءِ لبزانک ءُ نبشتاری ءِ سرپدی دیگ انت پمیشکا ما دلجم ایں کہ مئے راجی زبان ھم گیدی دگریں راجانی وڑ ءَ بے کساس دیمرویاں بالاچ بیت۔
گُڑا اے درگت ءَ من یک بتلے ھم گْوش آں انچوشکہ ” یک دست ءَ چاپ توار نہ کنت” ھمے ڈول ءَ باید انت مارا ھم گوں ھمے استاداں ھمکوپگی ءَ ھمراھداری کنگی اِنت کہ ما ھم ھمے بلوچی وٹس ایپی وانگجاھاں باسکی بِہ زیر ایں ءُ چیزے چہ اُستاداں دربر ایں۔ باید اِنت ما ھمے استادانی کاراں ھمکوپگ بِہ بَہ ایں کہ راج ورناہ ءُ کماشاں بلوچی ءَ وانینگ ءَ انت۔ ما اول ھمے استادانی بلوچی دَرونتاں وت وانان ءَ بلوچی نبشتہ رھبند ءَ ھیل گر ایں، مُدام آیانی نبشتانکاں وت بوان ایں ءُ دیم ءَ ھم روان بکن ایں۔ لازُم وَ نہ اِنت کہ شُما چہ اولی ھپتگ ءَ بلوچی نبشتہ بہ کن اِت۔ اگاں ما بلوچی ونت کن ایں گُڑا اے ھم گنج اِنت۔ بِل اِت کہ ماھے بہ لگ ایت۔ اگاں دوازدہ سال پہ ھِندی، پارسی ءُ انگریزی ءَ نباد بیت گُڑا یک ماھے پہ بلوچی وانگ ءُ زانگ ءَ ھم کُربان بہ کن ایں۔
وھدیکہ ما بلوچی دَرونت ءُ نبشتانکاں وانان ءَ بلوچی وانگ ءَ زبر بیتگ ایں۔ گُڑا ما ھمے دابیں بلوچی درونت ءُ نبشتانکاں نبیسّان ءَ راج ءَ ھم وانین ایں۔ ما وت ھم بلوچی وٹس ایپی وانگجاھاں اڈ کنان ءَ وتی لوگ ءِ مردم، سْیاد ءُ سنگتاں بلوچی بہ وانین ایں، آیاں راجی زُبان ءِ بارو ءَ سرپدی بہ دے ایں کہ بلوچی مئے راجی پجّار اِنت پمیشکا راجی زُبان ءِ دیمروی راج ءِ دیمروی اِنت۔ راجی زُبان راج ءَ یکجاہ ءُ یکمُشت کنائین ایت۔ پمیشکا مارا وتی راجی زُبان ءَ دیمروی دیگ لوٹ ایت بلے بلوچی ھما وھد ءَ دیمروی کنت وھدے کہ ما دْراہ بلوچ بلوچی وت دربر ایں ءُ دیم ءَ ھم وانین ایں۔ راج ءِ ورناھیں نودربراں راجی زُبان ءِ وانگ ءُ وانینگ ءِ سکین بہ دے ایں گُڑا مئے راجی زُبان دیمروی کنت۔ ترا تھنا بلوچی وت وانگ ءُ دربرگی نہ انت بلکیں ترا بلوچی وانینگی اَنت گُڑا تو وتی یک راجی زمہ واری یے پیلو کنگ ءَ ئے۔
پد ءَ ھمے ورنائیں مردمانی ھم یک راجی ڈُبہ ءُ زمہ واری ھست انت کہ ما گِندگ ءَ ایں اے ورنائیں نودربر وتی زمہ واریاں پیلو نہ کنگ ءَ اَنت۔ انچوشکہ مارا ایوک ءَ ماں دیوان ءَ ھوار بیگ ءُ جون ءِ وڑ ءَ بے بَھر ءَ ساڑی بیگی نہ اَنت بلکیں ما بلوچی آبیکندار ءُ سیدگنج ڈکشنری ءَ ماں وتی گوانکواں ایرگیج کن ایں ءُ ماں وانگجاہ ءَ بِھر بہ زور ایں ءُ زیت راجی زبان ءِ نبیسّگ ءَ بلد ءُ زبر بہ بہ ایں۔ وانگجاہ ءِ بْرات ءُ گْوھاریں باسکاں بیسَہ ءُ باوری بہ دے اَنت کہ آ وانگجاہ ءِ تہ ءَ اول بلوچی درونتاں بوان اَنت، بلوچی نبشتہ بہ کن اَنت، مُدام وتی نبشتگیناں دوبر چمشانک دیان ءَ وتی رَدیاں وت راست بکن اَنت۔ بزاں ما آیانی ھمُک وڑیں کُمکّ بہ کن ایں۔
باید اِنت ما اول چہ رَدیاں مہ تُرس ایں چے ءَ بنی آدم ءَ مُدام چہ رَدیاں دربرتگ۔ اگاں ما رَدی نہ کن ایں گُڑا چتور بلوچی وانگ ءَ بلد بہ ایں۔ اگاں یکے ءَ بلوچی ءَ چیزے دربرتگ گڑا اے ھما باسک ءِ ڈُبّہ (زمہ داری) اِنت کہ آ پد ءَ دیم ءَ سد ءُ دو سد بلوچ برات ءُ گْوھار بہ وانین اِیت۔ مارا بْرات ءُ گْوھار چوشیں وانگ ءُ زانگ ءِ وانگجاھاں آرگی اَنت ءُ ما امیت کن ایں کہ ھر کسے راجی زبان ءِ نبشتہ کنگ ءَ بلد بیت ءُ وتی دَمگ ءُ شھراں بلوچی وٹس ایپی گَلاں اڈ کنت ءُ راج ءَ راجی زبان ءِ نبیسّگ ءَ سوج ءُ پنت کنت۔
بلوچ ھست ءُ یکمُشت بات اَنت، بلوچ راج ءَ ھوار براھوئی ءُ بلوچی شالا دیمروی کنات اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔