TBP Balochi

بلوچی زبان ءِ کلانیں شائر ءُ پھلوان مُلا کمالان ءِ شئیرانی کلیات ھمے زوتاں چہ بلوچی میوزک پروموٹر سوسائٹی ءِ نیمگ ءَ چاپ ءُ شنگ بوگی اِنت –

اے کتاب مُلا کمالان ءِ جند ءِ شئرانی کلیات انت ءُ اشی ءِ نزار جی ھوت انت کہ ھمے زوتاں بزاں بیست ءُ یک فروری ءَ ملا کمالان ءِ یاتگیری ءَ بلوچی میوزک پروموٹرز سوسائٹی ماں کیچ ءَ مزنیں زیمری ءُ لبزانکی مراگشے برجم دار ایت ءُ کتاب ءِ دیم درائی کنت –

ملا کمالان ءِ شئیرانی کلیات ءِ درگت ءَ بلوچ میوزک پروموٹر سوسائٹی ءِ سرکماش اسحاق رحیم ءَ گوں دی بلوچستان پوسٹ ءِ اھوالکار ءِ گوم ءَ تران کنان ءَ گوشتگ کہ کتاب زِرگوات بلوچی زبان ءِ نامداریں پھلوان گشندہ واجہ ملاکمالان ءِ شئیرانی دپتر اِنت کہ اے دپتر ءِ تہ ءَ مُلا کمالان ءِ وتی جند ءِ پربستگیں درستیں شَیر ھوار اَنت – اے کتاب مُلاکمالان ءِ بچ واجہ گل محمد ھوت ءَ نزّارتگ ءُ رد ءُ بند داتگ واجہ گل محمد ھوت وتی کلمی نام ءَ گیشتر جی ھوت نبشتہ کنت –

آئی ءَ گُشت کہ اے کتاب چہ بلوچی میوزک پروموٹرزسوسائٹی ءِ نیمگ ءَ چاپ ءُ شنگی ءِ گُڈی سیمسران اِنت- بیست ءُ یک فروری ءَ کہ ملا کمالان ءِ سال روچ اِنت بلوچی میوزک پروموٹرز سوسائٹی اے روچ ءَ کیچ ءَ یک مزنیں ساز ءُ زیملی مراگشے برجم دارگ ءَ اِنت اے مراگش ءِ تہ ءَ بلوچ نبشتہ کار ملا کمالان ءُ بلوچی کوھنیں رنگ ءِ زیمر ءِ سر ءَ نبشتانک وان انت ءُ بلوچ پھلوانیں گشندہ وتی ازم ءِ درانگازی ءَ کن انت شَیر گوش اَنت – ھمے مراگش ءِ تہ ءَکتاب زِرگوات ءِ دیم درائی بیت انت –

دو شمبے ءُ سَے شمبے ءِ میانی شپ ءَ ایرانی چیریں ادارھانی کارندھاں زاھدان ءِ نندوکیں مردمے دزگیر کنگ ءَ پد بیگواہ کرتگ-

سر بیتگیں ھالانی رد ءَ گوستگیں روچاں ایران ءِ اُستان مشھد ءَ ایرانی چیریں ادارھانی کارندھاں زاھدان ءِ نندوکیں مردمے دزگیر کرتگ ءُ بیگواہ کرتگ-

بیگواہ کنگ بیتگیں مردم ءِ پجار عمر کمبرزئی خیل ء لال میر کہ انی زاھدان ءِ نندوک اِنت بن اسل ءَ چھبار ءِ نندوک اِنت –

ھالانی تہ ءَ گوشگ بیتگ کہ عمر گوستگیں روچاں مشھد ءَ شتگ پہ ساز ءُ سامان ءِ زورگ ءَ اود ءَ دزگیر کنگ ءُ بیگواہ کنگ بیتگ-

ھالانی تہ ءَ گوشگ بیتگ عمر ءَ وتی دزگیر بوگ ءِ ھال وتی کھول ءَ ھما وھد ءَ داتگ کہ آئی ءَ چندے دماناں رھوت کتگ ءُ گوشتگ کہ من ءَ چیرین ادارہ برگ ءَ اَنت ءُ چریشی ءَ پد آئی ءِ درگت ءَ ھال نہ بیتگ-

ھالانی تہ ءَ گوشگ بیتگ کہ آ باپاری مردمے آئی ءَ گیشتر کنارک ءُ چھبار ءَ وتی باپاری کتگ ءُ اے وھد ءَ آئی ءِ کھول زاھدان ءَ نندوک اِنت –

ھالانی تہ ءَ گوشگ بیتگ کہ آئی ءِ بیگواھی ءَ پد آئی ءِ کھول پریشانیانی دیمپان بیتگ اَنت-

روکپتی بلوچستان ءَ گوستگیں سال ءِ گڈسر ءَ بہ گر داں انیگ ءَ بازین کساسے ءَ مردم گرگ ءُ بیگواہ کنگ بیتگ اَنت-

گوستگیں روچاں روکپتی بلوچستان ءَ بندیگیں بلوچے ناگتی زندان ءِ توک ءَ بیران بیتگ-

گیشیں ھالانی رد ءَ روکپتی بلوچستان ءِ دمگ ایرانشھر ءَ یک بندیگیں بلوچے زندان ءِ توک ءَ بیران بیتگ-

بیران بیتگیں مردم ءِ پجار چِل سالی ئیں میردوست سرفرازی ء شھدوست ءِ نام ءَ زانگ بیتگ ءُ نیکشھر ءِ ھند چامپ ءِ جھمنند گوشگ بوگ ءَ اِنت-

ھالانی تہ ءَ گوشگ بیتگ میردوست سال دوھزار ءُ بیست ءُ دو ءَ ایران ءِ اُستان اسپھان ءَ پولیس ءَ نشہ ءِ باپاری ءِ پژدر ءَ دزگیر کتگ ءُ پد ءَ آمیدگس ءَ آئی ءِ سر ءَ بیست ءُ پنچ سال ءِ سزا داتگ-

ھالانی تہ ءَ گوشگ بیتگ میردوست دَہ ماہ ءَ پیش ایرانشھر ءِ زندان ءَ برگ بیتگ ءُ آ وھد ءَ آئی ءَ دگہ نادراھی نہ بیتگ-

ھالانی تہ ءَ گوشگ بیتگ آئی ءِ بیرانی ءَ پد جیل ءِ واکداراں آئی ءِ کھول ءَ را رھوت کتگ ءُ گوشتگ کہ شمئے مردم دل پَٹ بیتگ ءُ بیران بیتگ-

ایشی ءِ توک ءَ دمگی مردم اے گمان ءَ پدر کنگ ءَ اَنت آ زندان ءِ توک ءَ جنگ بیتگ چریشی ءَ آ ھمے میان ءَ بیران بیتگ-

زانگ بہ بیت روکپتی بلوچستان ءَ بندوکیں بازیں مردم نشہ ءِ باپاری ءِ پژدر ءَ گرگ ءُ پد ءَ آیانی سر ءَ پاھو ءِ سزا اتکگ بیتگ اَنت ءُ گوستگیں سال ءَ بازیں کساسے ءَ بندیگیں مردم پاھو دیگ بیتگ اَنت-

بلوچستان ءِ دمگ ھزدار ءَ یک ماھے ءَ پیش بیگواہ بیتگیں ورنا ءِ لاش دزکپتگ-

گیشیں ھالانی رد ءَ ھزدار ءِ دمگ زھری ءِ کوھی دمگ سیاہ کوہ ءِ ھند ءَ دمگی مردماں یک لاشے دیستگ ءُ اود ءُ مردماں انتزامیہ ھال داتگ –

دمگی انتزامیہ ءَ لاش دستیگ کتگ زھری نورگامہ ھسپتال ءَ سر کتگ اود ءَ لاش ءِ پجار عبدالواحد ء مھمد ھسن لوٹانی ءِ نام ءَ زانگ بیتگ کہ سی ءُ پنچ روچاں چہ بیگواہ بیتگ-

انتزامیہ ءَ اژدری چار ءُ ٹپاس ءَ ہد لاش کھول ءِ دست ءَ داتگ داں انگت ءَ ورنا ءِ بیگواھی ءُ بیرانی ءِ بارو ءَ دگہ سرپدی نہ بیتگ اَنت-

سربوتگیں ھالانی رِد ءَ گوستگیں روچ ءَ بلوچستان ءِ دمگ دشت کھڈان ءَ نادرا کارگس ماندارگ بوتگ –

گیشیں ھالانی رِد ءَ گوستگیں روچ ءَ شپ ءِ وھد ءَ ناشناسیں مردماں دشت ءِ دمگ کھڈان ءَ نیشنل ڈیٹابیس ءُ رجسٹریشن اتھارٹی ءِ کارگس مانداشتگ – چریشی ءَ نادرا کارگس ءَ بازیں تاوان ءِ بوتگ – نادرا کارگس ءِ ماندارگ ءِ زمّہ واری بلوچ آجوئی لوٹوکین سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گوھرام بلوچ ءِ رِد ءَ مئے سرمچاراں دشت کُھڈان ءَ پاکستانی ادارہ نیشنل ڈیٹابیس اینڈ رجسٹریشن اتھارٹی ءِ کارگس گوستگیں شپ ءِ ادار نھ ءَ مانداشتگ۔

میجر ءَ گوشتگ کہ ما زورگیریں پاکستانی تْرامکاری کارگس، سامان، وتگڑیں دیمروئی ءِ شوربندیاں وتی سرڈگار ءِ سر ءَ اوپار کُت نہ کن ایں- نادرا ءِ کار پاکستانیانی ودی بیگ ءِ روچ،سور ءُ دگہ چیزانی یاداشت کنگ ءِ ھواری ءَ پجار کارڈ جوڑ کنگ اِنت – اے پدر انت کہ پاکستان ءِ پجار جھان ءِ دیم ءَ وت پہ ھمائی ءِ جند ءَ کمشرپی جوڑ بوتگ ،گڑا چہ ایشی ءَ بلوچ راج ءَ یک زورگِپتیں راجے ءِ بستار ءَ گوں ایشی ءَ ھچ کار نیست-

جارکش ءِ رِد ءَ ھمک روچ بلوچ زورانسری آوار جنگ ءُ کُشگ بوگ ءَ اَنت ءُ دومی نیمگ ءَ زورگیریں استان مئے پجار ءِ گار کنگ ءِ جُھد ءَ اِنت ءُ وتی پجار ءَ مئے سر ءَ مُشگ لوٹ ایت ، کہ ایشی ءَ ما ھچ پیم ءَ نہ منّ ایں –

دومی نیمگ ءَ گوستگیں روچ ءَ سندھ ءِ دمگ چونڈکو ءَ ناشناسیں مردماں گیس پائپ لائن ءِ سر ءَ تراکناکیں شورہ کل کتگ ءُ تراکین اِتگ انت ءُ چریشی ءَ گیش پائپ لائن تباہ بوتگ – گیس پائپ لائن ءِ سر ءَ بوتگیں اُرش ءِ زمّہ واری بلوچ آجوئی لوٹوکیں سلاہ بندیں گل بلوچ ریپبلکن گارڈ ءَ منّ اِتگ –

بی آر جی ءِ جارکش دوستین بلوچ ءِ رِد ءَ مئے سرمچاراں بیست ءُ چار جنوری ءَ چہ بلوچستان سوئی ءَ دیم پہ کراچی ءَ رؤکیں گیس پائپ لائن سندھ دمگ چونڈکو ءَ تراکناکیں شورواں گوں تباہ کتگ – تراک ءَ گیس پائپ لائن سرجمی ءَ تباہ بوتگ –

جارکش ءَ گوشتگ کہ مئے اے دابیں اُرش بلوچستان ءِ آجوئی ءَ تاں برجاہ مان انت –

امریکہ ءِ پاپ گشندہ جسٹن بیبر ءَ وتی سوتانی ھک 200 ملین ( 20) کروڑ ءَ بھا کتگ اَنت-

فرانسیسی ھال سرکنوکیں ادارہ اے ایف پی ءِ رد ءَ میوزک پبلشنگ ءُ ریکارڈنگ کیٹالاگ ءِ ھسس بلیک اسٹون ءِ پلامرزی ءَ کمپنی ھپگنوسس ءَ زرتگ اَنت ءُ مسام انڈسٹری ءِ درستاں مستریں ڈیل گوشگ بیتگ –

اے سوداگری ءِ دررگت ءَ گوستگیں بازیں ھپتگاں گپ بیگ ءَ بیتگ اَنت کہ بیست ءُ ھشت سالی ئیں جسٹن ھما ازمکاراں ھوار بوگ ءَ اِنت آیاں ھمے زوتاں وتی کیٹالاگز بھا کتگ اَنت-

ھپگنوسس ءِ نیمگ ءَ ڈیل ءِ شرت دیم ءَ آرگ نہ بیتگ اَنت ءُ اے سود ءِ نزیک ءَ گندوکیں رسورساں اے ایف پی ءَ گوں گوشتگ کہ دو سد ملین ءَ ڈالر ءِ بزیک ءَ بھا بیتگ اَنت –

ایشی ءَ پیش جسٹن ءِ نزیکین مردم جسٹن ٹمبرلیک ءُ شکیرا ءَ ھم وتی موسیقی ءِ شیئر بھا کتگ ات اَنت ءُ آیاں ھم ھپگنوسس ءَ گوں ڈیل کتگ –

بلے چوشیں گیشیں ڈیلز جاب ڈائلن ءُ بروس سپرنگٹن ءِ ورین مزنیں گشندھانی نیمگ ءَ گندگ ءَ اتکگ اَنت-

سپرنگٹن ءِ کیٹالاگ سونی کمپنی ءَ پنجاہ کروڑ ڈالر ءَ زرتگ بیتگ کہ اے ھردوکیں گشندھانی واستا مھکمی سرپد بیتگ اَنت ھردوکانی مالی جیڑہ ءَ ھوار ھوار چار ءُ گزاری ھم کنگ بیتگ اَنت-

جسٹن بیبر ھما ورنائیں گشندھاں ھوار بیت اِنت کہ آیانی سوت شوکی ءِ سر ءَ گوشدارگ بنت ءُ نی ھپگنوسس ءِ گور ءَ بیست ءُ یکمی کرن ءِ نامترین سوتانی رائٹس ھست اَنت کہ آیانی توک ءَ بے بی ءُ سوری ھم ھوار اَنت-

بلیک اسٹون ءُ ھپگنوسس ءِ موسیقی ءِ بارو ءَ باپاری زرکاری یک ارب ڈالر اِنت-

ھپگنوسس ءِ گوشگ اِنت ایشی ءَ گیش دوستانکی بیبر ءِ دو سد ءُ نود سوت اَنت کہ وھدیکہ ڈیل ءَ گیش ھواریں اے وڑیں سوت ھست اَنت کہ سی ءُ یک دسمبر دوھزار ءُ بیست ءُ یک ءَ پیسر شنگ بیتگ اَنت-

یک دگہ رسورسے ءِ رد ءَ بازین وھدے ءَ پد بیبر ءِ سوتانی ھکانی داروکیں کمپنی یونیورسل ءِ گور ءَ اِنت داں انگت ءَ آئی ءِ گور ءَ آئی ءِ ماسٹر ریکارڈنگز ھست اَنت-

سبحان قیصرانی ءُ سیاد مسعود الرحمن قیصرانی پاکستانی پوج ءَ دزگیر کتگ اَنت بیگواہ کتگ اَنت- اے گپ بیگواھیں سبحان ءُ مسعود کھول ءَ کتگ اَنت-

برات رِد ءَ آ ھمے سال ءِ شانزدہ جنوری ءَ بیگواہ کتگ اَنت کہ گوستگیں دو ھپتگاں چہ بیگواہ اَنت کہ آیانی ھچ وڑیں ھال نیست-

کھول گْوشگ اِنت کہ سبحان قیصرانی ءِ دو سالی ئیں جنکو ماھنور بلوچ وتی پت ءَ بید بے سکون ءُ نادُراہ ءَ اِنت وھدے کہ مئے لوگ پُرسی جاور ءُ بے تاھیری اِنت-

آئی ءَ گْوشتگ کہ منی دوئیں برات ءُ سیاد پیسر ءَ ھم بیگواہ کنگ بیتگ اَنت اشی ءَ پد یک براتے ءُ سیاد یل کتگ اَنت یک براتے یازدہ ماہ دہ روچ ءَ آزارجاھاں ازیت دیگ ءَ پد عیسیٰ نگری بروری دگ شال ءَ ھپدہ جولائی دوھزار ھپدہ دروگیں میڑے ءَ کُشگ بیتگ-

کھول ءَ انسانی ھکانی گل ءُ سیاسی ءُ نودربر پارٹیاں گوں دزبندی کتگ کہ آیانی دوستناکانی یل کنائینگ ءِ ھاتر ءَ توار چست بکن اَنت دانکہ آیانی زندمان بہ رک اَنت-

بالی ووڈ ءِ ازمکار شاھرخ خان ءِ نوکتریں تامر مروچی سینیماھاں جنگ بیتگ، تامر وتی شنگ بئیگ ءَ پیسر بازیں جنجال، بیھار ءُ بائیکاٹی جارانی آماچ بیتگ اَت، بلے اِشی ءَ ابید ھم بالی ووڈ ءِ کنگ خان ءِ تامر ءَ اولی روچ ءَ جوانیں باپار کُتگ۔

پٹھان تامر ءِ درگت ءَ ٹوئیٹ کنان ءَ بالی ووڈ باپار زانتکار ترن آدرش ءَ گُشتگ کہ پٹھان تامر یک بھتریں تامرے، اِشی ءِ تہ ءَ درستیں شئے جوان اَنت، کسہ، سوت، مزن نامیں ازمکار۔ آئی ءَ تامر ءَ پنچ ءَ چہ چار ءُ نیم استار داتگ ءُ گُشتگ 2023 ءِ اولی بلاک باسٹر تامر پٹھان بیت۔

ترن آدرش ءَ دگہ یک ٹوئیٹ ئِے تہ ءَ گُشتگ کہ پٹھان تامر ءَ ھندی تامرانی تہ ءَ درستاں گیشتر پردہ رس اتگ ءُ اِے رد ءَ پٹھان نوں ھندوستان ءَ 5500 پردھانی سر ءَ ءُ میان اُستمان ءَ 2500 پردھانی سر ءَ پیش دارگ بیت اِنت۔

پٹھان تامر ءَ ٹکٹانی باپار ءَ ھم دومی مستریں تامر ءِ جاہ زرتگ کہ تامر ءِ شنگ بئیگ ءَ پیسر اے کساس ءَ ٹکٹ مردماں گپتگ اَنت۔ اے درگت ءَ اولی تامر باھو بلی ھندی ءِ دومی بھر بیتگ کہ آئی ءَ سینیما ءَ آیگ ءَ ساری شش ءُ نیم لکھ ٹکٹ بھا بیتگ اَنت وھدیکہ پٹھان ءِ پنچ لکھ پنجاہ ءُ شش ھزار ٹکٹ بھا بیتگ اَنت۔

پٹھان تامر ءِ سوبمندی پہ بالیووڈ ءَ مستاگی ءِ بیت کنت ؟

تامر زانتکارانی رد ءَ گوستگیں لھتیں سالاں چہ بالیووڈ تامر مزنیں جنجالانی آماچ اَنت ءُ پمیشکا گیشتریں تامر بے سوب بئیگ ءَ اَنت۔

اِشانی تہ ءَ یک مستریں سوبے ھندوستان ءِ راستیں دست ءِ سیاست کنوکیں ھندو نیکراھی ٹولیانی بائیکاٹانی جار ءُ تامر کارانی ھلاپ کمپین جنزینگ اِنت۔ ھمے پئیم پٹھان تامر ءِ ھلاپ ءَ ھم بازیں کمپین جنزینگ بیتگ چشکہ یک سوت ءِ تہ ءَ دیپیکا پادیکون ءِ پوچانی سر ءَ زھرشانی ءُ دگہ بازیں سوب ھوار کنگ بیتگ اِت اَنت۔ بلے پٹھان تامر ءَ گندگ ءَ درستیں پروپیگنڈہ، بیھار، بائیکاٹاں ابید پہ وت ءَ جاہ جوڑ کُتگ ءُ مردمانی گور ءَ سربئیگ ءَ سوبمند بیتگ۔ بازیں زانتکارانی گُشگ ھمے بیتگ کہ کنگ خان ءِ تامر الم بالیووڈ ءِ تہ ءَ بدلی آورت کنت۔ اے درگت آیوکیں روچ اژدری اَنت۔

دی بلوچستان پوسٹ پتر ھال ءَ سر بیتگیں اھوالانی رد ءَ بلوچستان ءِ دمگ نوشکی ءِ بازیں جاھاں بجلی ءِ بازیں ءُ ابید جاری لوڈشیڈنگ، سرپگ ءُ وولٹیج ءِ کمی ءِ ھلاپ ءَ شھریانی نیمگ ءَ زھرشانی کنگ بیتگ-

زھرشانی کنوکاں نوشکی ریکو ءِ ھند ءَ چہ نوشکی ءَ دیم پہ ھاران ءَ روکیں مزن شھدگ بند کتگ ءُ روگ ءُ آیگی مھتل کتگ اَنت ءُ ھمے وھد ءَ شھریاں سرکار ءُ کیسکو ءِ ھلاپ ءَ ترندیں اوگام جتگ-

ھاران، شال دگ ءِ بلاک بوگ ءِ سبب ءَ رھگوزیاں سراتی ءِ سبب ءَ بازیں مشکلانی دیمپانی اِنت – زھرشانی کنوکانی گوشگ اِنت زھرشانی داں لوٹانی سرجم بوگ ءَ برجاہ بیت اِنت-

نوشکی ءَ زھرشانی کنوکاں گوشتگ بجلی ءِ بازیں ءُ ابید جاری لوڈشیڈنگ ءِ ھواری ءَ بجلی ءِ چمُک جنگ ءَ مھلوک ءِ زند دلسیاھی کتگ، ترندیں سارتی ءَ بجلیانی بندش ءَ لوگاں زالبول ءُ زھگ ءُ گیشتر نادراہ ءُ نودربراں ترندیں جیڑھانی دیمپانی اِنت ءُ ھمے وڑ باپاری ءُ دھکانکاراں ھم لکانی ھساب ءَ تاوان لوڈشیڈنگ ءِ سبب ءَ بوگ ءَ اِنت-

آیاں گوشتگ واپڈا ءِ بُتی ءِ سبب ءَ نوشکی ءِ مھلوک وتی کمک ءَ وت چندہ کن اَنت ءُ کوچگانی واستا ٹرانسفارمر زیرگ ءَ اَنت کہ ایشی ءَ سرکار ءُ ھستیں واکدارانی واستا شرمے گپے-

زھرشانی کنوکاں کیسکو ءِ واکداراناں یک ھپتگے ءِ مھلت داتگ اگاں یک ھپتگے ءِ توک ءَ بجلی ءِ ابید جاری لوڈشیڈنگ، سرپگ ءُ وولٹیج ءِ کمی ھلاس کنگ نہ بیت اَنت گڑا نوشکی ءِ مھلوج سیاسی ءُ چاگردی گلاں گوں ھوار بیت ءُ نہ کٹوکہں وھدے ءَ داں واپڈا گریڈ اسٹیشن ءَ انگیر ءَ کنت پرچاکہ سد درسد بل ءِ جما کنگ ءَ ابید ھم مھلوک ءَ چہ بجلیاں زبھر کنگ اوپار کنگ نہ بیت اِنت –

سر بیتگیں اھوالانی رد ءَ روکپتی بلوچستان ءِ دمگ دلگان ءَ ناشناسین سلاہ بندیں مردماں تیرگواری کنان ءَ دو کس کشتگ اَنت ءُ چار زدگ کتگ اَنت-

بیران بیتگیں مردمانی پجار سجاد رئوفی ءُ عبدالرضا بامری ءِ نامان زانگ بیتگ اَنت ءُ زدگ بیتگیں مردمانی پجار نہ بیتگ اَنت-

وئیل گوستگیں شپ ءَ یک گیم ءِ دکانے ءَ پیش اتکگ اود ءَ سلاہ بندیں مردمانی تیرگواری ءَ دکان ءِ واھند ھوار دو مردم بیران ءُ دگہ چار کس زدگ بیتگ اَنت-

تیرگواری ءَ پد تیرگواری کنوک تچگ ءُ روگ ءَ سوبمند بیتگ اَنت ءُ وئیل ءِ گیشین سبب زانگ نہ بیتگ اَنت-