نبشتانک: شیر دل گیب ءُ من
نبشتہ کار : داد شاشانی
دی بلوچستان پوسٹ
من شیردل گیب ءَ ھما وھد ءَ زان آں کہ اولی کتاب تیرے فراق اتکگ اَت بلے آ زانگ ءُ انیگیں زانگ ءِ تھ ءَ مزنیں دگری یے ھست آ وھداں من سک زھر اَت آں گوں شیر دل ءَ ، بلے مرچی من ءَ سک دوست بیت گیب جان ۔
من ءَ یات اِنت مئے میتگ ءِ ورنایاں نوک پہ وانگ ءَ شال ءِ روگ بندات کُتگ اَت بزاں پیسر ءَ مئے میتگ ءِ مردُم پہ وانگ ءَ گیش دور ءُ دران نہ شُتگ اَت اَنت کزا یکے پہ ردی شُتگ اَت ھاں بلے اے وھداں شال سک نامان اَت، بد بھتی ءَ من انگت شال ءَ وتی پاد ایر نہ کُتگ اَنت بلے انوں گریشگ ءِ نودربر شال ءَ چو کاگد واریں گوک ءَ یلہ اَنت ۔ ھمے وھد ءَ شال ءَ پہ وانگ ءَ روگ بِنا کُتگ اَت مئے میتگ ءِ ورنایاں ھمے وھداں گریشگ ءِ تھ ءَ راجدوستی ءُ راجکاری ءَ وتی پاد ایر کُتگ اَت اَنت منی ءُ شیر دل گیب ءِ جنگ ھمے وھد ءَ سر زُوران اَت ، جنگ ءِ مول ءُ مُراد ھمیش اَت ورنایانی دیوان ءَ اگاں پہ ردی کَسے بِہ نشتیں گُڑا شیر دل ءُ امبل ءُ شال ءِ راہ ءُ دگانی گپ ءَ چَہ ابید دگہ ھچ نیست اَت ۔ من اے گپ ءَ زھر نہ اَت اَنت گیب ءِ کتاب ءُ جند ءِ گپ مہ بوتیں ۔ من ھمے گپ ءَ گوں گیب ءَ زھر اَت آں مئے میتگ ءِ ورنا پہ شال ءَ ھمے واست ءَ گیش روگ ءِ جُھد ءَ اَت اَنت کہ اود ءَ آشکی کنگ ءِ دگہ لِزتے نام وانگ ءَ اَت بلے واھشت دگرے اَت اَنت ، چوناھیگا من مِھر ءُ دوستی یے یک شیدائیں منوگِرے آں منی زھر گوں وھد زوالان اَت آ تھنا وھد ءَ را زوال کنگ ءَ اَت اَنت ، پد ءَ من اے وھد زوالی ءِ گناہ گار شیردل گیب کُتگ اَت کہ انچیں کتابے نبشتہ کُتگ ھر ورنا ھمے راہ ءَ پہ وت مادنیں راھے سرپد بیگ ءَ اَت من بلے شیردل ءِ کتاب وت نہ ونتگ اَت ھمے سنگتانی دیوان ءِ تھ ءَ کسھاں من ءَ دلپروش کُتگ اَت یکے شیردل ءِ جند ءِ کسہ اَت اَنت گوں دومی کتاب ءُ امبل ءِ ۔ من ھمے شیردل ءِ پٹ ءُ پول بِنا کُت منی دل ءَ اَت اگاں من ءَ کُجا اے مرد دست بِہ کَپ ایت من گوں اے راجی بدواہ ءَ راھے رو آں چُشیں راج دژمن من ءَ ھچ وڑ اوپار نہ بیت کہ راجدوستی وتی پاداں نوک ایر کنگ ءَ اَت نوک گام جنگ ھیل کنگ ءَ اَت ھمے وھد ءَ شال ءَ کمبر چاکر ءُ الیاس نزر ھم نامدار اَت اَنت ۔ بلے مئے میتگ ءَ شیردل گیش اَت شال ءِ من ءَ سما نیست اَت پرچاکہ من وت شیردل ءِ کتاب نہ ونتگ اَت دومی شال ءَ نہ شُتگ اَت آں سیمی شیردل گیب ءُ الیاس نزر ءُ کمبرچاکر دیم پہ دیم نہ دیستگ اَت اَنت بس گپ ءُ کسھانی تھ ءِ مردُم اَت اَنت، آ وھد ءَ الیاس نزر ، کمبر چاکر ءُ بالاچ بالی درونت ءِ نام ءَ کتاب ھم شنگ کنگ ءَ اَت اَنت ما بس ندارہ چارگ ءَ اَت ایں کَے گیش بیت مئے میتگ ءَ شیردل ءِ مردُم سک باز اَت اَنت پرچاکہ شال ءِ ورنا ھر کَس کہ میتگ ءَ واتر بوت بے شیردل ءِ کتاب ءَ نیاتک پد ءَ جنک ءُ بچکی اشکی داستان سک وانگ بیت،من ھمے گپ ءَ گوں شیردل ءَ زھر اَت آں کہ شیردل راج ءِ ورنایاں رَدیں راھے ءَ برگ لوٹگ ءَ اِنت ۔ بس تھنا آشکی بیگ ءَ اَت مِھر ءُ دوستی ھم نیست اَت ۔
سال ءُ ماہ ءُ روچ وتی ھساب ءَ رواں بوت اَنت ما گوں زند ءِ برے یک جیڑھے ءَ آڑان اَت ایں ھمے وڑ ءَ منی سر ماں کُلاچی ءَ کَپت یک روچے سنگتے ءَ شیردل گیب ءِ سے کتاب منی کِر ءَ پہ امانتی ایر کُت پہ وتی کارے ءَ گریشگ ءَ شُت من نوک کُلاچی ءَ اَتکگ اَت آں پہ من ھر چیز درامد اَت من نہ گَشت آں بس لوگ ءَ نشتگ اَت آں، دگہ کتاب منی کر ءَ نیست اَت، من ءَ دیر اَت کہ کتاب ءِ وانگ یل کُتگ اَت دل ءَ گْوشت کتابے بُوان آں بلے من کتاب ءِ سر ءَ شیردل گیب ءِ نام ءَ گند آں من ءَ شِگِلّی بیت ۔ مزنیں دل ءُ مجگ ءِ جنگے ءَ پد من چماناں مُچ کُت شیردل ءِ کتاب تیرے فراق دست ءَ کُت پہ نادلکشی وانگ ءَ بِنا کُت من ءَ چَہ آشکی ءَ گیش راجدوستی گندگ بوت من ھیران ءُ ھبکہ بوت آں من وابے گندگ ءَ آں یا دل پہ گیب ءِ مول ءُ مُراد اَنچ اِنت من شیردل ءِ سے ئیں کتاب دو دو بر ءَ یک لَسّ ءَ ونت آں گُڑا من زانت شیردل ءِ مول ءُ مُراد چے اِنت اے گپ راستے کہ شیردل وت چون کہ بوتگ وتی کسہ ھما وڑ نبشتہ کُتگ ئِے بلے وتی نزور پدر کُتگ ئِے آئی ءَ مُدام ھمے جُھد کُتگ منی وڑ ءَ کَس مہ بیت وتی وھد ءَ کَس زوال مہ کنت ۔ ھمے جُھد کُتگ کہ راج ءِ تھ ءَ کَس اے وڑیں جاورانی تھ ءَ چَہ وتی راج ءُ زمین ءُ راجکاری ءَ بے سُدّ ءُ سما مہ بیت منی زھر ءُ زِدّ ھما روچ ءَ چَہ گیب ءَ ھلاس بوت اَنت ۔ من ھما اِنت گیب ءِ یک لوٹُکے بوتگ آں ھما روچ ءَ من زانت مئے میتگ ءِ ورنایاں شیردل ءُ شیردل ءِ کتاب ءِ بے کدری کُتگ تھنا اِشکی گپ دیم ءَ آرگ بوتگ اَنت آ ھم زگریں اشکی دْروشم ءَ گوں نا بلے راجدوستی ھچ گپ ءِ درانگازی کنگ نہ بوتگ کتاب ءِ تام کَش اِتگ اِش ۔
شیردل ءِ کتابانی تھ ءَ دْرستیں تَکّ ءُ پَھنادانی ھیال دارگ بوتگ اَنت بلوچ چاگِرد یکجاہ کنگ ءُ بڈ ءَ جنگ ءِ جُھد کُتگ گیب ءَ جاورانی وڑ ءُ پیم جاورانی نازُرکی مِھر ءُ دوستی جنگ ءُ جیڑہ جُھد ءُ جپا وار ءُ بزگی پیسری کتابانی تھ ءَ گیب ءَ شال ءِ کِرّ ءُ گْور پدر کُتگ اَنت ھما نیمگ ءَ تَر ءُ مانتر بوتگ بلے انوں امبل کتاب ءِ تھ ءَ گیب ءَ باکمالیں درشاندابے ءَ وتی ند کار بستگ امبل ءِ تھ ءَ شال ءِ جاگ ءَ کیچ مانپوش اِتگ وتی بڈ ءَ چوناھیگا یک ھسابے ءَ گیب ءِ کتاب بُندپتری چِھرگ ءَ ھم باز جاگہ ءَ گوں شَریں وڑے ءَ جَن اَنت وھدے شیردل ءِ ند شال ءِ چَپ ءُ چاگِرد ءَ ایر کَپتگ گُڑا کوھن کْوھنیں کسھاں گوں دیم پہ دیم بوتگ بلے ایبری شیردل ءِ ند کہ کیچ ءَ ایر کَپتگ مزیں بُندپترے گوں وت ءَ زُرتگ ئِے بلوچ ءُ درامدانی ھر ھما سُر ءُ پُر گیب ءَ چِتگ ءُ نز آرتگ اَنت کہ لَس مردُمانی نزّ ءَ نیا اَنت لَس مردُم ءِ گُمان ءَ نیا اَنت وانوک ءَ را دست ءَ گِپت ئِے بوچ بوچ ءِ نشان ءَ داتگ ئِے ۔
من جُھد کُتگ گیب ءِ پیسری کتاب کہ یکجاہ کنگ بوتگ اَنت چار ناولٹ ءِ نام ءَ ھما کتاب ءَ بِہ وان آں گُڑا وتی چمشانک ءَ نبشتہ بہ کن آں بلے کتاب من ءَ دست نہ کَپتگ پمیشکا گپ گیش امبل ءِ سر ءَ کنگ لوٹ آں کہ منی دست ءَ اِنت اے کتاب دْرستاں چَہ پیش شیردل ءَ من ءَ سوگات کُتگ بلے منی جُھد بوتگ من چارناولٹ ءَ وان آں نوں وتی چمشانک ءَ نبشتہ کن آں پمیشکا کمو دیر ءَ شُمارا منی چمشانک دست کَپگ ءَ اِنت چوناھیگا اے چمشانکے نہ اِنت ( بس چار دانک پہ شیردل ءَ ) من بُہ گْوشتیں شَر اَت امبل ءِ تھ ءَ گیب ءِ دْرستان چَہ وشتریں درشانداب گچین کُتگ کہ وتی چاگِرد ءِ کَسان کسانیں جُستانی پسو دیگ ءِ جُھد کُتگ وتی ڈیھ ءِ جاورانی نگیگی ءِ سوب ءَ راج ءِ تھ ءَ وڑ وڑیں جُست ءَ سر ءَ زُرتگ گیب ءَ ھمے جُھد کُتگ کہ من مردُمانی مجگ ءِ تھ ءَ ھمے نگیگیں جُستاں ھلاس بہ کن آں گیب ءَ وتی کارست انچُش کاربستگ اَنت ھر نیمگ ءَ پُترینگ ءِ جُھد کُتگ ءُ یک شَریں وڑ ءَ ھم سوبین بوتگ کارستاں وتی جُست ءُ پسو انچیں دابے ءَ درانگاز کُتگ اَنت کہ مردُمانی لوٹ بوتگ اَنت راج ءَ را ھمے جُستانی پسو درکار بوتگ ۔ گیب ءِ جُھد بوتگ من امبل کتاب ءِ تھ ءَ ھچ کمی پشت مہ گیج اَنت منی گپ ءِ مُراد اے ھم نہ اِنت شیردل ءَ دْرستیں لوٹ ءُ نگیگی سرجم کُتگ اَنت ۔ بلے گیب ءَ وتی زانت ءُ سرپدی ءِ کد ءُ کِساس ءَ مزیں زھمتے کَش اِتگ کہ من وت ءَ آپسرے ءَ سر بہ کن آں ۔
من چُش گْوشت نہ کن آں شیردل ءَ گِدار ءِ سرجمیں لوٹ پیلو کُتگ اَنت پرچاکہ من گِدار ءِ لوٹاں بلد نہ آں باریں گیب ءَ گِدار ءِ لوٹ چونیں سنگرے ءَ آپ داتگ اَنت بلے من گوں پُرتوارے ءَ گْوش آں گیب ءَ کارستاں گوں ھچ جَھل ءُ بُرزی نہ کُتگ ھچ وڑ ءَ نا انساپی نہ کُتگ کارست انچیں وڑے ءَ کاربند کنگ بوتگ اَنت کہ ھما وڑ ءَ اے وھد ءَ درکار بوتگ اَنت گیب ءَ کارستانی تب شَریں وڑے ءَ زانتگ اَنت ھچ وڑ ءَ گوں کارستاں زوراکی نہ کُتگ ،پہ زور تُرسینگ ءُ دلیر ھم نہ کُتگ اَنت ئِے ھما داب ءَ کہ انوں جاور ھست اَنت ھما داب ءَ کارست کار گِرگ بوتگ اَنت ، بلے منی ءُ شیردل ءِ جیڑہ انگت نہ گیش اِتگ پرچاکہ گیب ءَ بلوچی زُبان ڈالچار کُتگ زُبان ءِ ڈالچار کنگ ءَ ما ھچ وڑ ءَ وش ءُ رازِیگ نہ بہ ایں اے جُست الم شیردل ءَ کنگ بہ بیت بلوچ ءِ زُبان ءَ گوں تئی کُجام بدی ھست ؟-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔