TBP Balochi

نیشنل پارٹی ءِ بنجاھی سروک ڈاکٹر عبدالمالک بلوچ ءَ شال کراچی شھدگ ءِ سرءَ دیمااکتگیں اندوھناکیں وئیل ءِ تہءَ 41 مردمانی بیرانی ءِ سرءَ باز درد ءُ بژن ءِ درشان کنان ءَ سانمندیں کھولاں وتی دلی دردواری ءُ کے جاں بحق ہونے پر انتہائی دکھ اور افسوس کا اظہار کرتے ہوئے متاثرہ خاندانوں سے اپنی دلی ہمدردی اور بژن ءِ درشان کُتگ۔

ڈاکٹر عبدالمالک بلوچ ءَ گُشتگ کہ بنجاھی سرکار ءِ نادلگوشی ءِ سوب ءَ نیشنل ہائی وے اتھارٹی بلوچستان ءِ تہءَ تھنا ءَ نام ءِ ھدءَ داں پشت کپتگ بلوچستان ءِ درستیں راجی شھدگ یک کِشک بئیگ ءِ سوب ءَ ھون وار ءُ ھونی شھدگانی دروشم ءَ زیرگ ءَ اَنت ھمک سال ھزارانی کچءَ مردم بلوچستان ءِ تہءَ دگانی وئیل ءِ آماچ بنت ءُ چہ وتی زندءَ زبھر بنت کہ اَے یک آپت یے ءَ چہ کم نہ اِنت۔

ڈاکٹر عبدالمالک بلوچ ءَ 41 مردمانی بیرانی ءَ یک سکیں پدردیگیں وئیل ءِ نامینتگ ءُ چہ بنجاھی سرکار ءَ ترندی ءَ گوں لوٹ کُتگ کہ بلوچستان ءِ تہءَ راجی شھدگانی دو کِشک کنگ ءِ کار ءَ زیت ءَ زیت بندات کنگ بہ بیت ءُ وئیل ءَ سانمندیں کھولانی زری کمک ھم باوری کنگ بہ بیت۔

ڈاکٹر مالک بلوچ ءَ درستیں کوچ شرکتانی واھنداں چہ دزبندی کُتگ کہ راجی شھدگانی تباھیں جاورانی سوب ءَ رکینگی شوربندی کارمرز کنان ءَ تیزی ءَ چہ پھریز بہ کن اَنت ٹرانسپورٹانی مانیٹر کنگ ءِ ھاترءَ نوکتریں آسراتی کارمرز بہ کن اَنت ءُ گاڑیانی تہءَ ٹریکر جنگ بہ بیت ءُ آیانی تیزی کساس کنگ بہ بیت ءُ مردم بروکیں اولاکانی سرءَ بُن گروکیں شئے برگ ءِ سرءَ بندش جنگ بہ بیت۔

بیلجیئم پھازگ ءَ بے سوب، جرمنی سئمی برءَ ہاکی ءِ جھانی باج بر بیتگ۔

ھندوستانی شھر بھونیشور ءَ برجاہ بیتگیں ایف آئی ایچ ہاکی ورلڈ کپ ءِ گُڈی گوازی (فائنل) ءَ جرمنی ءَ بیلجیئم پنالٹی شوٹ آؤٹ ءِ سرءَ پروش داتگ ءُ داد وتی نام ءَ کُتگ۔

جرمنی ءُ پیسرگیں باج بر بیلجیئم ءِ نیام ءَ سرجمیں وھدے آسر ءَ گوازی سے سے گولاں برابر بیتگ، لیب ءِ آسر ءَ سر بئیگ ءِ ھاترءَ پنالٹی شوٹ آؤٹ کارمرز کنگ بیتگ اَنت، کہ اِشی تہءَ جرمنی ءَ 4-5 ءَ چہ سومبند بیتگ۔

زانگ بہ بیت کہ اے جرمنی ءِ سیمی جھانی داد اِنت، جرمنی ءَ اولی برءَ دو ھزار دو ءَ ملائیشیا ءَ بیتگیں جھانی کپ ءِ فائنل ءَ آسٹریلیا پروش داتگ اَت ءُ داد وتی نام ءَ کُتگ اَت۔

چر آئی ءَ چار سالاں پد بزاں دو ھزار شش ءَ وتی سرڈگار ءِ سرءَ یک برے پدءَ گُڈی گوازی ءَ آسٹریلیا پروش داتگ اَت وتی باج بری ءِ پھازگ ءَ سومبند بیتگ اَت۔

بلوچستان ءِ دمگ  سبی ءَ کل کُتگیں تراکناکیں شوروانی  تراک ءِ تہءَ یک مردمے ٹپی بیتگ۔

تراک بھاگ پولیس تھانے ءِ میتگ مٹھل آباد ءِ نزیک ءَ جلال خان دگ ءِ سرءَ بیتگ کہ اِشی آسر ءَ یک شپانک ءِ باز ٹپی بیتگ۔

اسسٹنٹ کمشنر ءِ ردءَ ٹپی بیتگیں مردم سول نادراھجاہ سبی ءَ برگ بیتگ وھدیکہ لشکریاں دمگ انگیراں کُتگ ءُ منانک یکجاہ کنگ ءَ اِنت۔ 

پنوج ءَ گوستگیں روچاں تیل ءِ گرگ ءِ واستا لین ءَ اوشتوکیں زالبول ءَ وتی ساہ داتگ اَنت-

فارسی نیوز ءِ ھال سرکنوکیں ادارہ رسانک نیوز ءِ رد ءَ بیست ءُ شش جنوری ءَ روکپتی بلوچستان ءِ دمگ پنوج ءَ گاسٹیل ءِ واستا لین ءَ اوشتوک بیتگ ناگتی آ بیران بیتگ-

بیران بیتگیں زالبول ءِ اُمر پنجاہ ءُ سَے سال گوشگ بیتگ ءُ آئی ءِ درگت ءَ دگہ گیشیں اھوال سر نہ بیتگ –

ھالانی تہ ءَ گوشگ بیتگ کہ اے زالبول بازیں اداراں تیل ءِ گرگ ءِ ھاتر ءَ لین ءَ اوشتوک بیتگ ءُ ناگتی آئی ءِ دل ءِ ھرکت بند بیتگ ءُ بیران بیتگ-

سیستان ءُ بلوچستان ءِ شھراں گاسٹیل ءِ نہ بوگ ءِ سبب ءَ مھلوک ءَ بازیں ادارانی ودار کنگ کپ ایت-

پنوج ءِ گورنر ءِ ڈپٹی سکیورٹی ءُ پولیٹیکل ڈیپارٹمنٹ عطا اللہ شاہ بخش ءَ گوشتگ کہ اے شھر ءِ جیڑھانی توک ءَ یکے تیل ءِ نہ پُجگ ءِ سبب اِنت ءُ ایشی ءِ درگت ءَ واکدارانی گون ءَ گپ ءُ تران کنگ بیت اِنت-

سربوتگیں ھالانی رِد ءَ پاکستان ءِ پھازگی لشکر ءَ یک مردمے زورانسری آوار جتگ ءُ بیگواہ کتگ –

گیشیں ھالانی رِد ءَ بلوچستان ءِ دمگ کیچ ءَ سیادی داروکیں یک مردمے پھازگی لشکر ءَ زورانسری آوار جتگ ءُ بیگواہ کتگ –

زورانسری آوار جنگ بوتگیں مردمے پچار سلیم ء محمد کریم ءِ نام ءَ بوتگ کہ ھمے ماھے بیست ءُ شش جنوری ءَ کراچی ءِ دمگ یوسف گوٹھ ءَ پھازگی لشکر ءَ آوار جتگ ءُ گوں وت برتگ کہ ھنگت بیگواہ انت-

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءَ بازیں مردمے زورانسری آوار جتگ ءُ بیگواہ کتگ کہ آھانی تہ ءَ کمے مردم یل بوتگ انت وھدیکہ دومی نیمگ ءَ دوسری آوار جنگ ءُ بیگواہ کنگ بوتگ – بیگواھیں مردمانی پانکجنیں گل وائس فار بلوچ مسنگ پرسنز ءِ رِد ءَ اے وھدی کساس پنجاہ ھزار گیش مردم پوج ءَ آوار جتگ ءُ بیگواہ کتگ کہ آھانی تہ ءَ گیشتریں کچ بلوچ نودربر ءُ ورنایانی انت وھدیکہ بازیں بلوچ راجداریں باسکانی ژانگولیں جون چگل دیگ بوتگ انت –

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ نُھ سد ءُ سِی ءُ شش روچ سرجم بوتگ انت، مروچی بی ایس او ءِ سرکماش جہانگیر بلوچ، محمد اشرف بلوچ ءُ دگہ رھشوناں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی میان ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ ایردستیں بلوچستان جنوری ماہ ءَ ھم استان ءِ زوراکیانی آماچ بوتگ ـ چوناھا ھچ چُشیں روچ ءِ نگوزیت کہ بدیں ھالے مہ ایت- چُش ھچبر نہ بوتگ کہ استان ءَ پہ بلوچانی کُشگ ءَ وتی دست داشتگ انت – سرجمیں ماہ ءَ اگاں یک جاھے ءَ بلوچ پرزند ءِ آوار جنی ءِ ھال اتکگ ءُ دومی نیمگ ءَ ژانگولیں جون ءِ دست کپگے ھال بوتگ –

ماما قدیر بلوچ ءَ گوشتگ کہ ھمک روچ کہ واب ءَ پاد کائے آ روچ ءِ بندات ءُ آسر ریاستی زوراکیاں گوں بیت اِنت – استان ءَ نوکیں شوربندی ٹھین اِتگ یکے زالبولانی آوار جنی بندات کُتگ ءُ دومی نیمگ ءَ ژانگولیں جونانی چگل دیگ بندات کتگ – پاکستان بلوچ ءِ پُرایمنین جھد ءِ ھلاس کنگے ھاتر ءَ وتی زوراکیانی تہ ءَ گیشی آرگ انت کہ اشی گر ءُ دار اقوام متحدہ ءِ زمہ واری انت –

آئی ءَ گوشتگ کہ درسیں زورانسری آوار جنگ بوتگیں مردمانی یل نہ کنگ ءُ اقوام متحدہ ھچ نگوشگ بازیں جست ءِ پیداک کنت – مئے پُرایمنیں جھد ھماھانی دلگوش کنگے ھاتر ءَ انت – مئے مول مراد بیگواھیں مردمانی وش ءُ سلامتی واتر بوگ ءُ میان استمان دیم ءَ پاکستانی پوج ءِ زوراکیانی پدر کنگ ءُ آھانی زمیراں بُست کنائینگ کہ بلوچ راج چکچینی ءَ گامگیج بہ زور انت –

ڈیرہ بگٹی ءِ دمگ سوئی ءَ سینزدہ سالی شُدیکیں ورنایے ءَ ھُشکیں نان ءِ نہ رسگ ءِ سوب ءَ وتی گُٹ وت ساد لوپ کُتگ ءُ وت ءَ کُشتگ –

گیشیں ھالانی رِد ءَ گوستگیں روچ ءَ بلوچستان ءِ دمگ سوئی، وشحال کالونی ءِ سینزدہ سالی کسانسالیں ورنا راجو ڈومب بگٹی ءَ چہ گریبی ءُ گِس ءِ نگیگیں جاوراں بیزار بوتگ ءُ وتکُشی کُتگ –

ھمے گوشگ بوگ ءَ انت کہ کسانسالیں ورنایے کار بازار ءَ مردمانی بوٹ پالش کنگ بوتگ بلے گوستگیں روچ ءَ آئی ءِ ھچ کمائی نہ بوتگ ءُ گِس ءَ شُتگ چہ مات ءَ ورگ لوٹ اِتگ –

دمگی مردمانی رِد ءَ مات ءَ زھگ گِس ءَ نادین اِتگ ھمساھگانی گور ءَ آرت ءِ پچگرگ ءَ شُتگ گڈا چہ شُد ءَ بیزارءِ کسانسالیں ورنا ءَ مایوس بوتگ وتی گُٹ ءَ ساد لوپ کُتگ ءُ وتکشی کُتگ –

زانگ بہ بیت ڈیرہ بگٹی ءَ اے وھدی چار گیس فیلڈز ھست کہ سوئی، پیرکوہ، لوٹی ءُ اُچ انت کہ سرجمیں پاکستان ءَ.سر بنت بلے ھمود ءِ مردم چہ سوئی گیس ءَ زبھر انت وھدیکہ بیروزگاری ھم گیش بوتگ –

سوئی گیس فیلڈ ءَ پاکستان پیٹرولیم لمیٹڈ بزاں پی پی ایل نامی کمپنی ءِ چلائینگ ءَ انت کہ آئی ءِ مزن کارگس کراچی ءَ انت – سوئی گیس ءَ کساس شش سد ءُ شست ملین کیوبک فٹ درکیت ءُ ھمے گوشگ بیت کہ اودا دو ٹریلین کیوبک فٹ گیس ءِ زخائر ھست انت –

سربوتگیں ھالانی رِد ءَ مند ءُ تمپ ءِ میانجی ءَ مزن بند ءِ کوھی دمگاں پاکستانی پوج ءِ جاسوسیں ڈرون بالگرد چکر اِتگ انت –

اھوالکار ءِ رِد ءَ پاکستانی پوج ءِ جاسوسی ڈرون بالگرداں مروچی ادار سَے ءَ مزن بند ءِ کوھی دمگ گورگی ءَ بگر تاں بانسر، چرپان، گوراپی، بودیگ، تکشی، پکیر چات ءُ سیمسری ھنداں چکر جتگ ءُ تنی وھدی ھنگت چکرگ انت –

دمگی اھوالکار رِد ءَ اے دمگاں مزنیں لشکر کشی ءِ گمان کنگ بیگ ءَ انت ھر وھد ءَ کہ پاکستانی پوج لشکر کشی ءَ کیت گڈا پیسرا ڈرون بالگرد چکر جن انت ءُ پدا لشکر کوھانی تہ ءَ مانرچیت بلے مروچی تنی وھدی پوج کوھانی نیمگ ءَ نہ شُتگ –

بلوچستان ءِ دمگ لسبیلہ ءَ مروچی پیش اتکگیں وئیلے ءَ داں انگت ءَ چِل مردم مرگ ءَ وتی ارجان جتگ اَنت –

دگ ءِ وئیل لسبیلہ ءِ دمگ چینک اسٹاپ ءِ نزیک ءَ مساپر بریں کوچ ھما وھد ءَ پیش اتکگ مساپت بردار کوچ شال ءَ دیم پہ کراچی ءَ روگ ءَ بیتگ کہ کھڈ ءَ کپتگ ءُ چریشی ءَ داں انگت ءَ چِل مردم بیران بیتگ اَنت ءُ بازینے زدگ بیتگ اَنت-

وئیل ءِ سر بوگ ءَ فائریگیڈ گاڑی ءُ ریسکیو ءِ واکدار سر بیتگ اَنت ءُ آس اش توسینتگ،اے سی بیلہ ءِ رد ءَ مساپر کوچ ءِ چل ءُ ھشت مساپر سوار بیتگ اَنت-

بلوچستان ءَ اے وڑیں جانکُشیں وئیل لس جوڑ بیتگ اَنت دگانی پروشت ءُ پروشانی سبب ءَ ٹریفک ءِ رھبندانی لگتمالی ءِ سبب ءَ اے وڑیں گاڑی وئیل ءِ آماچ بنت-

بلوچستان ءَ ھمک سال ھزارانی مردم دگ ءِ آماچی ءِ سبب ءَ مرگ ءِ دیمپان بنت- گوستگیں سال ءَ قلعہ سیف اللہ ءَ یک ترند روکیں بسے ھمے وڑ ءَ کم چہ کن بیست ءُ دو مردم بیران بیتگ ات اَنت –

ھمے وڑ دو سال ءَ پیسر چہ کراچی ءَ دیم پہ پنجگور ءَ روکیں مساپر بریں کوچ دگ ءِ وئیل ءَ پد آس کپتگ ات ءُ سِی ءِ کساس ءَ مردم بیران بیتگ ات اَنت-