عبدالمالک ءِ کُشندھانی یل بوگ پدردی اِنت – کھول

عبدالمالک ءِ کھول ءَ رسانکدراں وتی شنگ کرتگیں درشان ءِ تہ ءَ گوشتگ کہ کتکاراں دوھزار بیست ءُ دو ءِ بیست ءُ شش جنوری ءَ مپت گناہ ءَ عبدالمالک کُشتگ ءُ آئی ءِ جون ویرانگے ءَ کل کُتگ –

درشان ءِ تہ ءَ گوشگ بوتگ کہ نوزدہ روچاں پد عبدالمالک ءِ جون کھول ءَ دست کپتگ ءُ کشندہ ھم زانگ بوتگ انت – عبدالمالک ءِ آوار جنی ءُ کوش ءَ پد کھول ءَ جرمکار دین محمد ء شیران ءُ حمید ء شیران ءِ بگیری ءَ ارزی نبشتہ کنائین اِتگ –

کھول ءَ گوشتگ کہ پولیس ءَ لھتے روچاں پد کتکار دزگیر کتگ انت ءُ جست پد کتگ انت گڈا کتکاراں دپ ءِ وت منّ اِتگ ءُ گوشتگ کہ آھاں عبدالمالک کُشتگ شھر ءَ دور ویرانگے ءِ کل کُتگ –

پدا رند ءَ پولیس ءَ کتکارانی گوشگ ءِ پد ءَ ھما جاہ ءَ شُتگ ءُ عبدالمالک ءِ جون در کُتگ ءُ کھول ءِ دست ءَ داتگ –

آھاں گوشتگ کہ کتکارانی عبدالمالک ءِ کوش ءَ ھوار دگہ بازیں سلکاریاں آھانی دست مان بوتگ ءُ آھانی بگیری ءَ پیسر ءَ چہ بازیں ارزی ءِ نبشتہ کنگ بوتگ –

کھول ءَ بھتام جتگ ءُ گوشتگ کہ گندگ ءَ سرکار ءَ کتکارانی شوھاز ءَ تچگ ءَ بوتگ کہ اشاں بلیدہ، زامران، پروم ءُ تربت ءَ بازیں دزی ءُ ڈنگی ءِ کتگ ءُ آھانی ھمراہ ھمدا سر زاھری ترگ ءَ انت وھدیکہ اے کتکارانی زمانت ءِ سر ءَ یل بوگ بازیں جست ءِ ودی کنت –