TBP Balochi

بلوچستان ءَ زورانسری آوار جنیانی بگیری ءَ وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ نُھسد ءُ ھشتاد ءُ شش روچ سرجم بوتگ انت کہ شال پریس کلب ءِ دیم ءَ برجاہ اِنت-

مروچی بی ایس او ءِ گوستگیں ھنکینی سرکماش شکور بلوچ، سلطان بلوچ،  قاضی احمد بلوچ ءُ دگہ مردماں بنجل ءَ اتکگ ءُ بیگواھیںمردمانی کھول ءِ گوم ءَ دلپدردی درشان اِتگ-

ھمے وھد ءَ گل ءِ سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ تاگت ءِ زور ءَ برجاھیں ریاستی پالیسیانی دیما چیدگی اَنت پرچہ کہ بلوچ راج چہ اولی روچ ءَ ڈیھی زوراکیانی دیما زیردست بئیگ ءِ جاہ ءَ آئی بگیرءَ وتی جھدءَ دیما برگ ءَ اَنت۔

آئی ءَ گوشتگ کہ اے راجی سیاست ءُ دودمانی بنجل ریاست ءِ ادارہ نہ انت بلکینہ بلوچ راج ءِ دل ءُ مجگ انت کہ آھانی ھلاس کنگ گوںبلوچ راج ءِ ھلاس کنگ ءَ بیت انت- ھمے ھاتر ءَ ریاستی زور کارمرز کنگ ءُ بلوچ ءِ چکچینی ءِ تہ ءَ گیشی گندگ اتکگ- اے درچ گڈی سیمسران انت اے گیشگیواری میان استمانی ءُ گوستانک ءِ راستی ءَ گوں یک میان استمانی فورم ءِ تہ ءَ بوت کن انت کہ اشی ءِ ھاتر ءَاقوام متھدہ ءُ دگہ میان استمانی ادارہ ھست انت بلے زوراک ھمیشی ءِ سر ءَ باور کن انت کہ اے جاوراں آ وتی زور ءَ داشت نہ کن انتءُ بلوچ راج ءِ جتائیں پجار ءِ آرگ کپیت-

دومی نیمگ ءَ گل ءِ سرکماش نصراللہ بلوچ چہ ھزدار ءَ آوار جنگ بوتگیں لیاقت زھری ءِ کھول ءَ گوں دچار کپتگ-

آئی ءَ گوشتگ کہ لیاقت زھری سال دوھزار نوزدہ ءِ نُھ جون ءَ ایف سی ءِ کارمنداں چہ ھزدار ءَ عبدالرحمن ءِ دیم ءَ زورانسری آوار جتگ ءُبیگواہ کتگ ءُ آھاں لیاقت ءِ درگت ءَ ھچ وڈیں سرپدی دیگ بوگ ءَ نہ انت چریشی ءَ آئی ءِ کھول سک باز ماژگی ازیت ءِ آماچ اِنت-

آھاں دزبندی کتگ کہ وائس فار بلوچ مسنگ پرسنز لیاقت زھری ءِ یل کنگ ءَ وتی کرد ءَ پیلو بہ کنت-

نصراللہ بلوچ ءَ آ باور کنائین اِتگ اَنت کہ ھما وڈ گل ءَ لیاقت زھری کیس سرکار ءُ کمیشن ءَ سر کتگ ءُ ارزی نبشتہ کنگ ءَ وتی کرد پیلوکتگ ھمے وڈ ملکی کانودانی رِد ءَ دیمتر ءَ ھم پہ لیاقت بلوچ ءِ وش ءُ سلامتی یل کنائینگ ءَ وتی توار ءَ چست کنت-

نصراللہ بلوچ ءَ چہ سرکار ءَ لوٹ کتگ کہ آ لیاقت زھری ءِ وش ءُ سلامتی یل کنگ ءَ وتی کرد ءَ پیلو بہ کن انت اگاں لیاقت زھری ءِ سر ءَبھتام ءِ ھست آمیدگس ءَ آرگ بہ بیت اگاں ھچ نہ کتگ ھما دمان ءَ یل کنگ بہ بیت ءُ کھول چہ ماژگی ازیت ءَ رکینگ بہ بیت-

سربوتگیں ھالانی رِد ءَ پاکستانی پوج ءَ بلوچستان ءِ دمگ ھاران ءَ ورنائیں فٹبالر ءِ زورانسری آوار جتگ ءُ بیگواہ کتگ –

آوار جنگ بوتگیں فٹبالر ءِ نام صغیر احمد پنام ءِ چھوٹے ءِ نام ءَ چہ بوتگ –

اھوالکار ءِ رِد ءَ اے ورنا پاکستانی پوج ءَ گوستگیں شپ ءَ ھاران ءِ شھر شیلگ ایریا ءَ زورانسری آوار جتگ ءُ بیگواہ کتگ –

زانگ بہ بیت کہ چیزے وھدیں ھاران ءِ تہ ءَ زورانسری آوار جنیانی تہ ءَ گیشی اتکگ –

ھمے ماہ ءَ ھاران ءِ دمگ ھاش ءَ زورانسری آوار جنگ بوتگیں یک مردمے ءَ یل بوگ ءَ پد ٹپانی درد نہ سگ اِتگ ءُ بیران بوتگ –

ورنا ءِ پجار صلاح الدین ء ظفر علی ءَ ات کہ ایف سی ءُ سی ٹی ٹی ءِ کارمنداں دزگیری ءَ پد گوں وت برتگ ات پدا آ بے ھوشی ءِ جاوراں ھاران ءِ نزیک ءَ دست کپتگ ات –

صلاہ الدین ءَ نگیگیں جاوراں گوں نادراھجاہ ءَ برگ ءَ بوتگ انت کہ ا بیران بوتگ –

گوستگیں روچ ءَ آواران ءَ تُرندیں ھوراں پد کور ءَ آپ یک گاڑی یے بُک اِتگ، چریشی ءَ زالبول چُکاں ھوار ھپت ھوار مردم بُک اِتگ اَنت-

گیشیں ھالانی رِد ءَ آواران ءِ دمگ جھاو سیڑ کور ءَ یکیں کھول گاڑی یے ءَ ھوار بُک اِتگ- گاڑی ءَ سوار ھپت مردم بیران بیتگ اَنت- ریسکیو ٹلولی ءَ لاش در کتگ اَنت جھاو نادُراھجاہ ءَ برتگ وھدے کہ یک چُکے ءِ پٹ ءُ پول برجاہ ءَ اِنت-

بیران بیتگینانی تہ ءَ دو ءِ پجّار منیر احمد ءُ عزیز اللہ سمالاڑی ءِ ناماں چہ بیتگ وھدے کہ سوراب گدر جھمنند اَنت-

سعودی عرب، ایران ءِ مُسام ءُ دمگ ءِ سر ءَ سان

ٹی بی پی شونگال

گوستگیں ھپتگ ءَ چین ءِ ٹھینگی کوشستانی سوب ءَ میان رودراتک ءِ دو سانداریں دیم پہ دیمیں ڈیھہ سعودی عرب ءُ ایران ءِ بازیں سالاں چہ سستگیں سپارتی ھمبندی ءِ برجاہ کنگ ءِ ءُ آیوکیں دو ماھانی تہ ءَ بندیگیں سپارت جاھانی پچ کنگ ءِ جار جتگ۔ چین ءَ پیسر عمان ءُ عراق ءِ مھمانجلی ءَ سعودی عرب ءُ ایران ءِ نیام ءَ ترانکاریانی بازیں اھد بیتگ اَنت۔ سعودی عرب ءُ ایران ءِ ھمبندیانی برجاہ بیگ ءِ پدراھیں ءُ چیریں سان مئے دمگءِ سر ءَ کپ اَنت۔

ھمبندی ءِ برجاھی ءَ چہ پیسر میان رودراتک ءَ بازیں دھکاں چہ سنی گیشتریں سعودی عرب ءُ شیعہ گیشتریں ایران ءِ نیام ءَ ناٹاھی برجاہ بیتگ ءُ میان رودراتک ءِ بازیں ڈیھہ اے ناٹاھی ءَ چہ زدگ اَنت۔ یمن، شام، عراق ءُ لبنان ءِ تہ ءَ سعودی عرب ءُ ایران ءِ سردستی ءِ ھاتر ءَ جنگ برجاہ اِنت ءُ دویں ڈیھہ جتا جتائیں دیم پہ دیمیں ٹولیاں کمک کنگ ءَ اَنت۔ ایران ءِ وتمنیں گلاں اے ڈیھانی تہ ءَ سعودی عرب ءِ ھاتر ءَ جنجالانی تہ ءَ گیشی ودی کُتگ ءُ حوثی یاگیانی نیمگ ءَ آرامکو ءِ تیل ءِ شوربندیانی سر ءَ ترندیں اُرش ءُ گوں امریکہ ءَ ھمبندیانی تہ ءَ دیری ءُ دمگ ءِ تہ ءَ ایران ءِ ودوکیں سانمندی ءَ پد سعودی عرب ءَ وتی پالیسیانی مٹ کنگ ءُ گوں ایران ءَ ھمبندی ءِ برجاہ دارگ ءِ مُسام کنگ ءَ لاچار بیتگ انت۔

مئے دمگ ءُ بلوچستان ءَ ھم سعودی عرب ءُ ایران ءَ وتی وتمنیں گلانی کمک ءَ یک دومیگ ءِ ھاتر ءَ جنجال ودی کُتگ اَنت۔ سعودی عرب سنی نیکراھیں ناشرکاریں گلانی کمک ءُ مدرسیانی زری کمک کنگ ءَ اِنت ءُ اے گل بلوچستان ءِ تہ ءَ شیعہ آبادی ( ھاسیں پئیم ءَ ھزارہ کمیونٹی ) ءَ نشانگ کنگ ءَ اَنت ءُ ایران ءِ بھتام اِنت کہ آئی ءِ بگیر ءَ جنگ کنوکیں سنی بلوچ گلاں ھم سعودی عرب زری کمک کنگ ءَ اِنت۔

بلوچستان ءُ پاکستان ءِ جتا جتائیں دمگانی تہ ءَ شیعہ آبادی ءِ تہ ءَ ھستیں لھتیں کارست ءُ گلاں ایران کمک کنگ ءَ اِنت ءُ شیعہ آبادی ءَ مزنیں کساسے ءَ ایران ءِ مستری ءَ جنگ ءِ ھاتر ءَ شام، عراق ءُ یمن ءَ شُتگ اَنت۔ پاکستان ءِ تہ ءَ شیعہ آبادی ءَ زینبیوں بریگیڈ ءُ اوگانستان ءَ فاطمیون بریگیڈ ءِ تہ ءَ مھکم کنگ ءَ اِنت کہ آ پاکستان ءُ اوگانستان ءِ تہ ءَ ایران ءِ مپادانی ھاتر ءَ کنگ ءَ اَنت ءُ جھانے دگہ ڈیھانی تہ ءَ ایران ءِ وتمنیں جنگ ءِ تہ ءَ بھر زیرگ ءَ اَنت۔

اے گپ انگت وھد ءَ پیشتر اِنت کہ ایران ءُ سعودی عرب میان رودراتک ءُ مئے دمگ ءِ تہ ءَ وتمنیں گلانی کمک ءَ بند کن اَنت اگںاں اَڑ ءُ کُڑ ءُ ناٹاھی ھمے وڑ جُنزان بنت بلے میان رودراتک ءَ ابراھیم مُسام ءَ پد اسرائیل ءُ عرب ڈیھانی ھمبندی ءَ پد ایران ءِ بگیر ءَ نوکیں سرپ بندی بئیگ ءَ اَت، اے جاوارانی تہ ءَ ایران ءُ سعودی عرب ءِ مُسام ایران ءِ مزنیں سوبمندی ءِ زانگ بیت ءُ چین ءِ کمک ءَ چہ مُسام میان رودراتک ءَ چین ءِ درملکی ءُ دیمروی (روزیگی) سپارت کاری ءِ سوبمندی ءِ اِنت کہ آ دمگ ءِ تہ ءَ آئی ءِ کرد ءَ گیشتر ودینیت کہ اِشی ءِ پدراھیں ءُ چیریں سان بلوچستان ءِ سر ءَ ھم کپ اَنت۔

روکپتی بلوچستان ءِ بنجاھی شھر زاھدان ءَ ایرانی چیریں ادارھاں یک ورنایے آوار جنگ ء پد بیگواہ کتگ-

آوار جنگ بیتگیں مردم ءِ پجار احسان خارکوھی ء پسند جھمنند شیر آباد دزاپ ءِ نام ءَ زانگ بیتگ-

ھالانی رد ءَ گوشگ بیتگ کہ احسان ھما وھد ءَ گرگ بیتگ کہ آئی ءَ آدینگ ءِ نماز ونتگ ءُ دیم پہ لوگ ءَ روگ ءَ بیتگ کہ آ راہ ءَ گرگ ءُ برگ بیتگ-

ھالانی رد ءَ گوشگ بیتگ کہ آئی ءِ کھول ءِ ترس اِنت احسان ءَ ودی بوگ ءِ کاگز نیست ءُ چریشی ءَ آئی ءَ سیمسراں واتر مہ کن اَنت-

زانگ بہ بیت روکپتی بلوچستان ءَ زھرشانیاں پد بازیں کساسے ءَ مردم گرگ ءُ بندیگ کنگ بیتگ اَنت ءُ گوستگیں روچ ءَ ھم آدینگ ءِ نماز ءَ پد مھلوک ءَ بیگواھیں مردمانی یل کنگ ءِ ھاتر ءَ زھرشانی کتگ ءُ آیاں بندیگینانی یل کنگ ءِ لوٹ کتگ –

نال ءِ سرکاری وانگجاھاں کتاب دیگ بوگ ءَ نہ انت ءُ چریشی ءَ وانگجاہ ءِ نودبر چہ دربرگ ءَ زبھر انت –

بلوچستان ءِ زانشتی واکدار سرکاری اسکولاں کتاب دیگ ءَ نہ انت، گوادر، نال ءُ دگہ بازیں دمگاں سرکاری وانگجاھاں وانگی سال ءِ بندات بوگ ءَ ابید ھم تنی وھدی کتاب سر نہ بوتگ انت –

چریشی ءَ وانگ نیست، سرکاری وانگجاھانی نودربرانی سال زوال بوگ ءَ انت –

زانگ بہ بیت بلوچستان چہ زانشتی آسراتیاں زبھریں دمگے زانگ بیت –

کچ ءُ کساس ءِ رِد ءَ بلوچستان ءَ سرجمی ءَ سینزدہ ھزار ءُ شش سد ءُ ھپتاد ءُ پنچ وانگ جاہ ھست انت کہ آھانی تہ ءَ یانزدہ ھزار ھپت سد ءُ چِل ءُ ھپت وانگجاھاں بلڈنگ ھست انت وھدیکہ شانزدہ سد ءُ بیست ءُ پنچ وانگجاھانی بس کاگدانی تہ ءَ نام ھست، ءُ پنچ ھزار سَے سد ءُ شست ءُ چار وانگجاھاں بس یک یک ماسٹرے نودربراں وانینگ انت –

پاکستانی پوج ءِ نیمگ ءَ رسانکدراں شنگ کنگ بوتگیں درشان ءِ تہ ءَ ٹاہ دیگ بوتگ کہ پوج ءَ چیریں ھالے ءَ سر بوگ ءَ بلوچستان ءِ دمگ چمن بوغرہ دگ ءَ بیڑ بری ءِ میان ءَ ناشرکارانی ٹکانہ ءَ مزنیں کچے ءَ سلاہ دستیگ کتگ انت –

وھدیکہ ناشرکار بیڑ برگ ءَ پیسر چہ دمگ ءَ تچگ ءُ رؤگ ءَ سوبمند بوتگ انت –

آئی ایس پی آر ءِ رِد ءَ بیڑ ءِ میان ءَ مزنیں کچے ءَ سلاہ دستیگ کتگ انت کہ آھانی تہ ءَ راکٹ، وت جوڈ کتگیں بمب، گولہ ءُ شورواں ھوار دگہ مڈی ھوار بوتگ انت –

درشان ءِ تہ ءَ گوشگ بوتگ کہ ناشرکارانی ساڑی بوگ ءِ ھال رستگ ءُ اے آپریشن کتگ، اے ناشر کار پھازگی لشکر، دمگی مردمانی سرا تراک ءُ وت جوڈ کتگیں بمبانی کل کنگ ءَ ھوار بوتگ انت –

آئی ایس پی آر ءِ رِد ءَ ناشرکاری ءِ ھاتر ءَ اتکگیں موادانی دستیگی ءَ شال ءُ دگہ جاھاں ناشرکاری ءِ کاروایانی گر ءُ دار ءَ کمک ءِ رستگ –

روکپتی بلوچستان ءَ ھمک آدینگانی وڑ ءَ اے آدینگ ءَ ھم مھلوک ءَ بیگواھیانی یل کنگ ءِ واستا زھرشانی کتگ –

زھرشانی روکپتی بلوچستان ءِ بنجاھی شھر زاھدان ءَ مکی مسیت ءَ نماز ءَ پد بندات بیتگ کہ اود ءَ بازیں کساسے ءَ مردماں روانکی دروشم ءَ زھرشانی روانک کش اتگ-

روانک ءَ مردمانی دستاں پلے کارڈ بیتگ ءُ بیگواھیانی درگت ءَ نبشتگین تاک بیتگ اَنت – زھرشانی کنوکاں اوگام جنان ءَ بیگواھیں مردمانی یل کنگ ءِ لوٹ کتگ آیاں پارسی زبان ءَ ’تجاوز جنایت مرگ بر این ولایت ‘ ’خامنہ ای حیا کن، مملکتو رھا کن ‘ ءِ اوگام جتگ –

آیاں گوشتگ کہ زھرشانی وھداں نیکراھی رھشوناں ھوار لس مردم گرگ ءُ برگ بیتگ اَنت تنی وھدی انگت ءَ بیگواہ اَنت-

زانگ بہ بیت روکپتی بلوچستان ءَ زھرشانی ھما وھد ءَ بندات بیتگ اَنت کہ گوستگیں سال ءِ ستمبر ءَ ایران ءِ پولیس ءَ چھبار ءَ کسان سالیں جنکو ماھو نامیں جنکے ءِ گون ءَ سلکاری ءِ بھتام بیتگ ءُ چریشی ءَ پد اود ءَ یک برانزے بندات بیتگ-

برانز ءَ زاھدان ءَ سدانی کچ ءَ مردم کُشگ ءُ سدانی کچ ءَ ٹپیگ کنگ بیتگ اَنت-

زاھدان ءَ چرا روچ ءَ رند ھمک آدینگ مھلوک وتی مردمانی یاتگیری ءَ زھرشانی ءُ روانک ءُ انساپ ءِ لوٹ ءَ کن اَنت –

ایران ءَ زھرشانیانی پژدر ءَ انسانی ھکانی گل ھم ایراد گر اَنت کہ گوستگیں روچ ءَ ایمنسٹی انٹرنیشنل ءَ وتی درشان ءَ بازیں مردمانی گرگ ءِ ھواری ءَ زھگانی دزگیری پدر کرتگ اَنت-

ایمنسٹی انٹرنیشنل ءَ گوشتگ کہ اود ءَ ایرانی چیریں ادارہ زھگانی گون ءَ جنسی زوراکی ءُ بے کساسیں لٹ ءُ کُٹ کنگ ءَ اَنت-