TBP Balochi

بلوچستان ءِ دمگ چہ ھرنائی ءَ پاکستانی پوج ءَ دو مردم زورانسری آوار جنی ءِ نشانگ کتگ اَنت- دو روچ ءِ گوزگ ءَ پد ھم اے مردمانی درگت ءَ ھچ وڑیں ھال دز نہ کپتگ-

دی بلوچستان پوسٹ پتر ءَ رستگیں ھالانی رِد ءَ پاکستانی پوج ءَ ھرنائی ءَ چیک پوسٹ ءَ دو مردم آوار جنگ ءَ پد بیگواہ کتگ اَنت ، اے مردمانی پجار محمد ابراھیم ء غوث بخش مینگل ءُ نظام ء نبی بخش مینگل ناماں چہ بیتگ اَنت-

اِھوالکار رِد ءَ زورانسری آوار جنی ءِ وئیل دہ روچ ءَ ساری نُھ مارچ ءَ ھرنائی ءِ دمگ کھوسٹ ، چپرلیٹ ءِ ھند ءَ بیتگ- اے مردم وامانی دیگ ءَ روگ ءَ بیتگ اَنت کہ بیگواہ کتگ اَنت-

اے مردم شال ءَ جھمنند اَنت وھدے کہ آیانی بُنکی ھنکین بولان ءِ دمگ چہ سنجاول ءَ اِنت- سنجاول ءَ 2014 ءَ لشکر کشی ءَ نظام ءِ یک براتے رمضان بیگواہ کنگ بیتگ ءُ پد ءَ آئی ءِ لاش دزکپتگ- اے دمگاں لشکر کشی ءَ پد ھمے کھول لَڑ ءُ بار کتگ ءُ شال ءَ جھمنند بیتگ اَنت-

کھول گوشگ رِد ءَ دہ روچ ءِ گوزگ ءَ ھم مئے دوستناکانی درگت ءَ ھچ وڑیں ھال نیست – آیاں انسانی ھکانی گل ءُ سیاسی پارٹیاں اے درگت ءَ کرد پیلو کنگ ءِ دزبندی کتگ-

بنگلہ دیش ءَ یک ترند روکیں کوچے ءِ کپگ ءِ سبب ءَ کساس ھبدہ مردم بیران بیتگ اَنت-

ھال سرکنوکیں ادارہ اے ایف پی ءِ رد ءَ پولیس ءَ گوشتگ کہ یکشمبے ءِ روچ ءَ یک بسے ھائی وے ءِ ٹٹ ءَ ٹکرے وارتگ چریشی ءَ چہ بس کپتگ-

پولیس ءِ رد ءَ وئیل ءِ سبب ءَ کم چہ کم ھبدہ مردم بیران بیتگ اَنت ءُ بیست ءُ پنچ زدگ بیتگ اَنت-

پولیس واکداراں بنداتی پٹ ءُ پولانی رد ءَ وئیل ڈرائیور ءِ بے سُدی ءَ پیش اتکگ کہ دمگی وھد ءُ پاسانی رد ءُ سھب ءِ ساھت ھشت ءَ ائی ءِ دست ءَ گاڑی لگوشتگ ءُ ھمے زوتاں جوڑ بیتگیں ایکسپریس وے ءِ ریلنگ ءِ ٹکرے وارتگ-

ترند روکیں بس ھائی وے ءِ سیمے پروشتگ ءُ سِی فٹ ءِ جھلانکی ءَ کپتگ – دمگی پولیس ءِ سروک مسعود عالم ءَ اے ایف پی ءَ گوں گپ کنان ءَ گوشتگ زرباری شیبچر ءِ ھند ءَ پیش اتکگیں وئیل ءَ پد گوشتگ اے وئیل ءَ ھبدہ مردم بیران بیتگ اَنت-

زدگ بیتگیں مردم دمگ ءِ نادراہ جاہ ءَ سر کنگ بیتگ اَنت – پولیس ءِ رد ءَ بنگلہ دیش ءَ کوھنیں گاڑی ءُ ھرابیں گاڑی ءُ دگانی ھوار ھواری ءَ بے سدیں ڈرائیورانی سبب ءَ گیشتر پیش کاینت-

ھائی وے ایکسیڈنٹ مانیٹر ءِ رد ءَ بنگلہ دیش ءَ گوستگیں سال ءَ دگ ءِ وئیلاں نُھ ھزار ءُ نُھ سد ءُ پنجاہ ءُ یک مردم بیران بیتگ اَنت-

اسلام آباد ءَ ناشری ءِ گر ءُ دار کنوکیں ادارہ ( سی ٹی ڈی) ءَ پاکستان تحریک انصاف ءِ چیئرمین عمران خان ءَ ھوار پاٹی ءِ ھژدہ رھشونانی ارزی نبشتہ کنگ بیتگ اَنت ءُ ھژدہ باسکانی دزگیری ءِ ٹاہ داتگ اَنت-

یکشمبے ءِ روچ ءَ اسلام آباد پولیس ءِ سروک ءَ عمران خان ءِ پیشی ءِ وھد ءَ سرکاری جاہ ءُ امن ءُ ایمنی ءِ ادارھانی گاڑیاں بیوکیں تاوانانی گر ءُ دار کنگ ءِ کڈنی کتگ –

شمبے ءِ روچ ءَ چیئرمین عمران خان ءِ جوڈیشل کمپلیکس ءِ پیشی ءِ وھد ءَ جنگ ءُ چوپانی بھتام ءَ نبشتہ کنگ بیتگیں ارزیانی رد ءَ پی ٹی آئی ءَ سیادی داروکیں رھشونانی مُچی ءَ اتکگیں ھمراھانی دستاں لٹ ءُ سنگ بیتگ اَنت-

سی ٹی ڈی ءِ تھانہ ءِ نبشتگ بیتگیں ایف آئی آر ءِ رد ءَ عمران خان اتکگیں ھمراھاں پولیس ءِ سر ءَ سنگ جتگ اَنت-

ارزی ناشری، کارسرکار ءِ ھوارگیجگ، سرکاری ءُ لس چیزانی تاوان دیگ ءِ ھواری ءَ دگہ چیزانی سر ءَ نبشتگ کنگ بیتگ اَنت-

ایف آئی آر ءَ گوشگ بیتگ کہ عمران خان نیازی ءِ ھمراھی ءَ آیوکیں مچی لشکر ءَ پولیس ءِ چوکی ءَ سر بیتگ اَنت اود ءُ ستکگ ءُ سوچ، پروشت ءُ پروش ءُ ناشری ءِ تالان کنگ ءَ پولیس ءِ پکٹ پروشگ بیتگ اَنت، جوڈیشل کمپلیکس ءِ ھرچاریں نیمگ انگیر ءُ مین گیٹ پروشگ بیتگ ءُ تہ ءَ پتر اتگ اَنت-

ایف آئی آر ءَ گوشگ بیتگ کہ پی ٹی آئی ءِ رھشون گوں مُچی ءَ اتکگ اَنت کہ آیانی توک ءَ علی امین گنڈا پور، علی اعوان، مراد سعید، شبلی فراز، حسان خان نیازی، عمر ایوب، اسد عمر، امجد خان نیازی، حماد اظہر، خرم نواز، جمشید مغل، عامر کیان، فرخ حبیب، ڈاکٹر شھزاد، وسیم، لیفٹیننٹ کرنل ریٹائرڈ مھمد عاصم، عمران سلطان ءُ اسد کیسر ھوار بیتگ اَنت-

پنجگور ءَ یک جنکے ءَ وتکشی کتگ ءُ ھزدار ءَ دو بمب تراکاں زالبولے ءَ ھوار دو زدگ بیتگ اَنت-

بلوچستان ءِ دمگ پنجگور ءَ یک جنکے ءَ نازانگیں سبباں وتکشی کتگ –

وئیل پنجگور ءِ ھند بالگتر ءَ پیش اتکگ کہ اود ءَ جنکے ءَ وتی گُٹ ءَ ساد مان کتگ ءُ وتی زند ھلاس کرتگ-

وتکشی کنوکیں جنک ءِ پجار زرگل ء دوستین ءِ نام ءَ زانگ بیتگ – بلے تنی وھدی آئی ءِ وتکشی ءِ سبب زانگ نہ بیتگ-

ھمے وڑ ءَ ھزدار ءَ دو بمب تراکاں زالبولے ءَ ھوار دو مردم زدگ بیتگ اَنت-

گیشیں ھالانی رد ءَ گوستگیں شپ ءَ ھزدار ءِ دمگ کٹھان ءُ زھری ءَ دو بمب تراک بیتگ اَنت، بمب تراکاں یک زالبول ءُ یک مردمے ءِ زدگ بوگ ءِ ھال واکداراں راست کتگ اَنت-

پولیس ءِ رد ءَ ھزدار ءِ دمگ کٹھان ءَ دزبمب تراکے ءِ سبب ءَ یک زالبولے زدگ بیتگ ءُ نادراہ جاہ ءَ برگ بیتگ ءُ ھمے وڑ ءَ زھری ءِ ھند ءَ دزبمبے ءِ تراک ءَ ورنایے زدگ بیتگ –

پولیس ءِ رد ءَ زدگ بیتگیں مردم نادراہ جاہ ءَ سر کنگ بیتگ اَنت ءُ گیشین پٹ ءُ پول کنگ بوگ ءَ اِنت-

سر بیتگیں ھالانی رد ءَ روکپتی بلوچستان ءِ دمگ چھبار ءُ کنارک ءِ دگ ءَ دو گاڑیانی ٹکر ورگ ءَ دو مردم بیران بیتگ اَنت-

گیشین ھالانی رد ءَ روکپتی بلوچستان ءِ دمگ چھبار ءُ کنارک ءِ دگ ءَ روکیں دو تیل کشین گاڑیانی ٹکر وارتگ ءُ چریشی ءَ دو گاڑیاں سواریں دو مردم ستکگ ءُ بیران بیتگ اَنت-

ھالانی رد ءَ گاڑیاں تیل مان بیتگ ءُ چریشی ءَ آس ءِ کپگ ءَ گاڑی ستکگ ءُ تیل کش بیران بیتگ اَنت-

زانگ بہ بیت چوشیں وئیل یکشل ءَ رپورٹ بوگ ءَ اَنت کہ ایشی ءِ توک یَ مردم زدگ ءُ بیران ھم بیتگ اَنت-

بلوچستان ءِ دمگ جھل مگسی ءَ تیرگواری ءِ وئیل ءَ چار مردم بیران بیتگ۔

واکدارانی رد ءَ جھل مگسی ءَ دُزاں آروسی گاڈی ءِ سر ءَ تیرگواری کُتگ چریشی ءَ زالبوال ءُ چُک ءَ آوار چار مردم بیران ءُ پنچمی زدگ بیتگ۔

تیرگواری ءِ وئیل سوئجہ لیویز پانگس ءِ نزدیک ءَ بیتگ البت گُشگ بوھگ ءَ ایں کہ بیران ءُ زدگ بیتگیں مردم یکیں کھول ءَ چہ سیادی دار اَنت۔

بیران ءُ زدگ بیتگیں مردم ڈی ایچ کیو نادرھجاہ ءَ برگ بیتگ انت، گُشگ بوھگ ءَ اِنت کہ زدگ بیتگینانی تہ ءَ سئے مردمانی جاورھال سک نگیگ اَنت۔

اے وئیل ءَ پیسر بلوچستان ءِ دمگ آواران ءَ گاڈی ءِ ھار ءَ برتگ، گاڈی ءَ سواریں یکیں کھول ءِ ھشت مردم بیران بیتگ۔ اے مردمانی سیادی خضدار ءِ ھَند سوراب ءَ انت، وھدیکہ بیران بیتگینانی تہءَ زالبوال ءُ چُک آوار اَنت۔

تربت شھدربرجاہ ءِ نودربراں شھدربرجاہ ءَ لین، آپ ءُ انٹرنیٹ ءَ ھوار ایندگہ آسراتیانی لوٹ ءَ شھدربرجاہ ءَ بگر تاں ڈی بلوچ شھدگ ءَ روانک ءِ کش اِتگ ءُ شھدگ بند کتگ –

ھمے میان ءَ نودربراں واکدارانی بگیری ءَ ترندیں اوگام جتگ- نودربرانی گوشگ ات کہ تربت شھدربرجاہ ءَ بجٹ ءِ رسگ ءَ ابید ھم آسراتی نیست انت –

نودربراں گوشتگ کہ تربت شھدربرجاہ ءَ بلوچستان ءِ جتا جتائیں ھند ءُ دمگانی نودربر وانگ ءَ انت کہ اودا ھزارانی کچ ءَ بلوچ نودربراں چہ دوریں ھند ءُ دمگاں امیت زرتگ ءُ وانگ ءَ اتکگ انت دانکہ آ شری ءَ ونت بہ کن انت ءُ باندات ءَ وتی راج ءُ دمگ ءِ ھاتر ءَ وتی کرد ءَ پیلو کت بہ کن انت بلے ادا واکدارانی کرپشن ءُ نادلگوشی ءَ آ وتی بنکی آسراتی ءُ زانت ءَ زبھر کنگ بوگ ءَ انت کہ چریشی ءَ آھاں بازیں دلسیاھیانی دیمپانی کنگ کپگ ءَ انت –

زھرشانی کنوکیں نودربرانی گوشگ ات کہ گوستگیں بازیں روچاں لین نہ بوگ ءِ سوب ءَ ھاسٹلاں آپ ءُ دگہ آسراتی نیست انت چریشی ءَ نودربر بازیں اڈوجنجالانی آماچ انت –

نودربرانی گوشگ ات کہ شھدربرجاہ ءِ واکدار جیڑھانی گیشگواری ءَ سنجیدگ نہ انت چکاس ھم سر ءِ سرا انت، برزی تبک ءِ واکدار زوت گامگیج بہ زور انت – آھاں گوشتگ کہ تاں ھما وھد ءَ مئے لوٹ سرجم کنگ نہ بنت ڈی بلوچ پچ کنگ نہ بیت –

بلوچ لبریشن آرمی ءِ جارکش جئیند بلوچ ءَ ماں رسانکدرءَ شنگ کتگیں درشانے تہءَ گشتگ کہ بی ایل اے ءِ سرمچاراں گوستگیں شپ ءَ قلات ءِ ھند منگچرءَ کبزہ گیریں پاکستانی پوج ءِ بنجائی کیمپ ءِ پانگس ءِ سرءَ اوشتاتگیں کارمند گوں دستی بمب ءَ نشانگ کتگ اَنت۔

جارکش ءَ گُشتگ تراکے آسر ءَ یک کارمندے ھما دمانءَ مُرتگ ءُ دگہ دو زدگ بیتگ اَنت۔

آئی ءَ گُڈ سرءَ گشتگ کہ بلوچ لبریشن آرمی اے اُرشے زمہ واری ءَ منّ اِیت ءُ کبزہ گیریں پوج داں ھما وھد ءَ چہ بلوچستان ءَ تیوگءَ در نہ کپتگ مئے اُرش برجاہ بنت اِنت۔