سعودی عرب، ایران ءِ مُسام ءُ دمگ ءِ سر ءَ سان
ٹی بی پی شونگال
گوستگیں ھپتگ ءَ چین ءِ ٹھینگی کوشستانی سوب ءَ میان رودراتک ءِ دو سانداریں دیم پہ دیمیں ڈیھہ سعودی عرب ءُ ایران ءِ بازیں سالاں چہ سستگیں سپارتی ھمبندی ءِ برجاہ کنگ ءِ ءُ آیوکیں دو ماھانی تہ ءَ بندیگیں سپارت جاھانی پچ کنگ ءِ جار جتگ۔ چین ءَ پیسر عمان ءُ عراق ءِ مھمانجلی ءَ سعودی عرب ءُ ایران ءِ نیام ءَ ترانکاریانی بازیں اھد بیتگ اَنت۔ سعودی عرب ءُ ایران ءِ ھمبندیانی برجاہ بیگ ءِ پدراھیں ءُ چیریں سان مئے دمگءِ سر ءَ کپ اَنت۔
ھمبندی ءِ برجاھی ءَ چہ پیسر میان رودراتک ءَ بازیں دھکاں چہ سنی گیشتریں سعودی عرب ءُ شیعہ گیشتریں ایران ءِ نیام ءَ ناٹاھی برجاہ بیتگ ءُ میان رودراتک ءِ بازیں ڈیھہ اے ناٹاھی ءَ چہ زدگ اَنت۔ یمن، شام، عراق ءُ لبنان ءِ تہ ءَ سعودی عرب ءُ ایران ءِ سردستی ءِ ھاتر ءَ جنگ برجاہ اِنت ءُ دویں ڈیھہ جتا جتائیں دیم پہ دیمیں ٹولیاں کمک کنگ ءَ اَنت۔ ایران ءِ وتمنیں گلاں اے ڈیھانی تہ ءَ سعودی عرب ءِ ھاتر ءَ جنجالانی تہ ءَ گیشی ودی کُتگ ءُ حوثی یاگیانی نیمگ ءَ آرامکو ءِ تیل ءِ شوربندیانی سر ءَ ترندیں اُرش ءُ گوں امریکہ ءَ ھمبندیانی تہ ءَ دیری ءُ دمگ ءِ تہ ءَ ایران ءِ ودوکیں سانمندی ءَ پد سعودی عرب ءَ وتی پالیسیانی مٹ کنگ ءُ گوں ایران ءَ ھمبندی ءِ برجاہ دارگ ءِ مُسام کنگ ءَ لاچار بیتگ انت۔
مئے دمگ ءُ بلوچستان ءَ ھم سعودی عرب ءُ ایران ءَ وتی وتمنیں گلانی کمک ءَ یک دومیگ ءِ ھاتر ءَ جنجال ودی کُتگ اَنت۔ سعودی عرب سنی نیکراھیں ناشرکاریں گلانی کمک ءُ مدرسیانی زری کمک کنگ ءَ اِنت ءُ اے گل بلوچستان ءِ تہ ءَ شیعہ آبادی ( ھاسیں پئیم ءَ ھزارہ کمیونٹی ) ءَ نشانگ کنگ ءَ اَنت ءُ ایران ءِ بھتام اِنت کہ آئی ءِ بگیر ءَ جنگ کنوکیں سنی بلوچ گلاں ھم سعودی عرب زری کمک کنگ ءَ اِنت۔
بلوچستان ءُ پاکستان ءِ جتا جتائیں دمگانی تہ ءَ شیعہ آبادی ءِ تہ ءَ ھستیں لھتیں کارست ءُ گلاں ایران کمک کنگ ءَ اِنت ءُ شیعہ آبادی ءَ مزنیں کساسے ءَ ایران ءِ مستری ءَ جنگ ءِ ھاتر ءَ شام، عراق ءُ یمن ءَ شُتگ اَنت۔ پاکستان ءِ تہ ءَ شیعہ آبادی ءَ زینبیوں بریگیڈ ءُ اوگانستان ءَ فاطمیون بریگیڈ ءِ تہ ءَ مھکم کنگ ءَ اِنت کہ آ پاکستان ءُ اوگانستان ءِ تہ ءَ ایران ءِ مپادانی ھاتر ءَ کنگ ءَ اَنت ءُ جھانے دگہ ڈیھانی تہ ءَ ایران ءِ وتمنیں جنگ ءِ تہ ءَ بھر زیرگ ءَ اَنت۔
اے گپ انگت وھد ءَ پیشتر اِنت کہ ایران ءُ سعودی عرب میان رودراتک ءُ مئے دمگ ءِ تہ ءَ وتمنیں گلانی کمک ءَ بند کن اَنت اگںاں اَڑ ءُ کُڑ ءُ ناٹاھی ھمے وڑ جُنزان بنت بلے میان رودراتک ءَ ابراھیم مُسام ءَ پد اسرائیل ءُ عرب ڈیھانی ھمبندی ءَ پد ایران ءِ بگیر ءَ نوکیں سرپ بندی بئیگ ءَ اَت، اے جاوارانی تہ ءَ ایران ءُ سعودی عرب ءِ مُسام ایران ءِ مزنیں سوبمندی ءِ زانگ بیت ءُ چین ءِ کمک ءَ چہ مُسام میان رودراتک ءَ چین ءِ درملکی ءُ دیمروی (روزیگی) سپارت کاری ءِ سوبمندی ءِ اِنت کہ آ دمگ ءِ تہ ءَ آئی ءِ کرد ءَ گیشتر ودینیت کہ اِشی ءِ پدراھیں ءُ چیریں سان بلوچستان ءِ سر ءَ ھم کپ اَنت۔