TBP Balochi

ایمنسٹی انٹرنیشنل ایران ءَ وتی شنگ کتگین درشان ءَ گوشتگ کہ ایران ءَ زھرشانی ءِ وھد ءَ زھگانی سر ءَ چابگ جنگ، بجلی ءِ کرنٹ جنگ ءُ جنسی زوراکی کنگ بیتگ اَنت-

ایمنسٹی ءِ گوشگ اِنت کہ زھگ بے کساس لٹ ءُ کُٹ کنگ بیتگ اَنت ءُ آ جسمانی دروشم ءَ لٹ ءُ کٹانی نشانگ کنگ بیتگ ءُ اے گپتگیں مردمانی تہ ءَ دوزادہ سالی ئیں زھگ ھم ھوار اَنت –

ایمنسٹی ءَ زھرشانی ءِ وھد ءَ ایران ءِ سرکار ءِ دست ءَ دزگیر بیتگیں زھگانی گون ءَ ترسنانکیں زُلمانی بھتام جتگ اَنت-

ایمنسٹی انٹرنیشنل ءَ تامر بندی دروشم ءَ شنگ کتگیں کسانوکیں تامری دروشمے ءَ ھم زھگانی اکس ءُ ناوشیں جاورانی گمانی کسہ پیشدارگ ءِ جھد کتگ کہ آ ھبدہ سکینڈ ءِ توک ءَ گندگ بیت اِنت-

گوستگیں روچ ءَ آئی ءَ وتی شنگ کتگیں درشان ءَ گوشتگ کہ گوستگیں سال ءِ ستمبر ءِ ماہ ءَ مھسا امینی نامیں جنکے کہ ایران ءِ اکلاکی پولیس ءِ دزگیری ءِ وھد ءَ بیرانی ءَ پد بندات بیتگیں زھرشانیانی وھد ءَ زھگ دزگیر کنگ بیتگ اَنت-

ایمنسٹی انٹرنیشنل ایران ءِ گوشگ اِنت کہ ایرانی سرکار ءَ گپتگیں مردمانی کچ ءُ کساس دیم ءَ نیاؤرتگ اَنت بلے ایمنسٹی ءِ رد ءَ دزگیر بیتگیں مردمانی توک ءَ ھزارانی ھساب ءَ زھگ ھم ھوار اَنت-

گل ءِ نیمگ ءَ شنگ بیتگیں درشان ءَ گوشگ بیتگ کہ زھگاں مزنیں مردمانی رنگ ءَ آوار جن اَنت ءُ پد ءَ آیانی چماں بند اَنت ءُ پد ءَ آیاں چیریں زنداناں بندیگ کن اَنت ءُ پد ءَ لھتے روچانی توک ءَ پد ءَ نام گپتگیں زندناں بر اَنت-

ایمسنٹی ءِ رد ءَ آئی ءَ ھپت زھگانی کیس ءُ دگہ بازین کساسیں زھگانی کیس چم دیستگیں مردمانی درشانانی رد ءَ کتگ اَنت ءُ ریاستی چاریگاں جنسی زوراکی ءُ دگہ لٹ ءُ کٹانی نشان کتگ اَنت کہ آیانی جسم ءُ جاناں بجلی ءُ آیانی گون ءَ جنسی زوراکی ءُ دگہ زوراکیانی نشانگ کتگ اَنت-

آئی ءِ رد ءَ یک زھگے ءِ مات ءَ گوشتگ کہ ریاستی ادارھاں منی زھگ پائپ ءِ گون ءَ جنسی زوراکی ءِ نشانگ کتگ ءُ پد ءَ گار ءُ بیگواہ کتگ-

ایمنسٹی ءِ رد ءَ لٹ ءُ کُٹانی دگہ زوراکی چابگ جنگ، سٹن گنز ءِ کارمرد کنگ ءُ کرنٹ جنگ ءُ بے وجھیں گولیانی دیگ ءُ زھگانی سر ءَ آپ پریچگ ءُ دگہ دگہ چیز ھوار اَنت-

آئی ءِ رد ءَ ھمے وھد ءَ دزگیر بیتگیں یک زھگے ءَ گوشتگ کہ آیانی گون ءَ بے ھودیں کردے ءِ رنگ ءَ کنگ بوگ ءَ اِنت کہ ایاناں کساس کساسیں رنگاں زوراکیانی نشانگ کنگ ءَ اَنت-

ایمنسٹی انٹرنیشنل ءِ گوریچانی افریفہ ءِ ڈپٹی ریجنل ڈائریکٹر ڈیانا التھاوی ءَ گوشتگ کہ ایرانی ریاستی ایجنٹاں زھگ چہ کھولاں سستگ ءُ آیانی سر ءَ بے کساسیں زلم کتگ اَنت-

آئی ءَ گوشتگ کہ زگگانء ھلاپ ءَ لٹ ءُ کُٹ ءُ ورنایانی ھمگرنچی آیانی ھکانی لوٹ ءُ آجو-ی ءِ دارگ ءِ ھاتر ءَ یک شوربندی ءِ رنگ ءَ کنگ بوگ ءُ پد ءَ اے کرد ءَ یک جوانین رنگے ءَ پاشک کنت –

روکپتی بلوچستان ءِ دمگ ایرانشھر “پھرہ ” ءَ دو تیل کش سوتکگ ءُ بیران بیتگ اَنت-

ھالانی رد ءَ گوستگیں روچ ءَ روکپتی بلوچستان ءِ دمگ ایرانشھر ءَ تیل کشین گاڑی یے چپ بیتگ ءُ چریشی ءَ دو مردم سوتکگ ءُ بیران بیتگ اَنت-

بیران بیتگیں مردمانی پجار سی ءُ چار سالی ئیں عبدالمنان رخشانی عیسی جھمنند فھروج ءُ نوزدہ سالی ئیں ابوبکر ء مھر اللہ ءِ ناماں زانگ بیتگ اَنت-

اھوالانی تہ ءَ گوشگ بیتگ کہ ایشانی گاڑی چپ بیتگ ءُ چریشی ءَ گاڑی ءَ پد ءَ اس کپتگ ءُ ھردوک گاڑی ءِ توک ءَ سوتکگ ءُ بیران بیتگ اَنت-

زانگ بہ بیت روکپتی بلوچستان ءَ گیشتر چوشین گاڑیانی ترند روگ ءِ سبب ءَ پیش کاینت ءُ چریشی ءَ پد اود ءَ تیل کشیں گاڑیاں آس کپ ایت ءُ اود ءَ مردم زوال ءُ بیران بنت-

بلوچستان ءِ دمگ ژوب ءَ بیتگیں اُرش چہ تمنی سروک گوں وتی ھپت ساتی بیران بیتگ۔

وئیل ژوب ءِ دمگ غورلم ھند ءَ بیتگ، اُرش چہ تمنی سروک احمد کبزئی گوں وتی ھپت ساتی نشانگ کنگ بیتگ۔

وئیل چہ پد پولیس ءَ جون دست گپتگ ءُ نادرھجاہ ءَ برتگاں ءُ پٹ ءُ پول چہ رند جون ھاندان ءِ مردمانی دست ءَ داتگاں۔

البتہ اے وئیل سوب کہنیں دژمنی گوشگ بیت ایں۔

ایران ءِ بنجاھی شھر تھران ءَ چار سال ءُ ھپت ماہ ءَ بندیگیں سپیدہ قلیان دوبر بیگواہ کنگ بیتگ-

سپیدہ قلیان گوستگیں روچ ءَ تھران ءَ کساس سَے سد مِل ءِ دوری ءَ دوبر ایرانی چیریں ادارھاں آوار جتگ ءُ برتگ-

سپیدہ قلیان گوستگیں روچ ءَ زندان ءَ یل بیگ ءَ پد آئی ءَ خامنہ ای سرکار ءِ ھلاپ ءَ اوگام جتگ ءُ چریشی ءِ پژدر ءَ آ دوبر گرگ بیتگ-

شنگ بیتگیں تامر بنداں گندگ بیت اِنت سپیدہ قلیان ءَ بلوچی گُد گور ءَ اِنت ءُ خامنہ ای سرکار ءِ ھلاپ ءَ گوشگ اِنت زندان ءِ بندیگی ءَ ما ایرموش بوت نہ کن آں ھرچ ھساب ءَ ما ترا وتی زُلمانی ھساب ءَ گریں –

تامر بند ءَ آ پارسی زبان ءَ گوشگ ’ خامنہ ای ضحاکی کشیمت زیر خاک ‘ بزانکہ خامنہ ای تو ھما ھونواریں رسترے ما ترا ھاک ءِ چیر ءَ چہ کش ایں –

سپیدہ قلیان کہ گوستگیں روچ ءَ یل بیتگ ءُ آئی ءِ کھول ءَ زرتگ ءُ دیم پہ وتی ھند ءَ روگ ءَ بیتگ اَنت گڑا کساس سَے سد مِل چہ تھران ءَ دور ایرانی چیریں ادارھاں آوار جتگ –

سپیدہ قلیان کَے اِنت؟

سپیدہ قلیان ایران ءِ اُستان ھوزستان ءِ نندوک اِنت ءُ آ عرب ٹک ءَ سیادی داروک اِنت –

ھوزستان کجا اِنت؟

ھوزستان ایران ءِ زرباری رودراتک ءَ عراق ءِ سیمسر ءَ اِنت کہ اود ءَ نندوکیں مردم عرب اَنت –

سپیدہ قلیان کدی گرگ بیتگ ءُ چون گرگ بیتگ؟

سپیدہ قلیان چار سال ءُ ھپت ماہ ءَ پیش ما ھوزستان ءَ یک زھرشانی ءِ وھد ءَ گرگ بیتگ کہ اود ءَ یک شکر کمپنی ءِ کار کنوکاں وتی ھکانی واستا زھرشانی کتگ ءُ اود ءَ سپیدہ قلیان پہ اھولکاری ءِ دروشم ءَ آئی ءَ کار کنوکانی کمک ءَ رپورٹنگ کتگ ءُ چریشی ءِ پژدر ءَ آ رپورٹنگ ءِ وھد ءَ گرگ بیتگ ءُ آئی ءِ سر ءَ چار ھپت ماہ زندانی اتکگ بیتگ-

زانگ بہ بیت گوستگیں روچاں ایران ءَ یک جارے ءَ زندانیانی پھل کنگ ءِ جار جتگ ات کہ چریشی ءَ پد گمان کنگ بیت کہ آ ھمے لڑاں ھوار گیجگ ءُ یل کنگ بیتگ ءُ پد ءَ آئی ءَ زاندان ءِ گیٹ ءِ دپ ءَ بلوچی گُداں گوں اوگام جتگ ءُ پد ءَ تھران ءَ کساس سَے سد مِل دور گرگ ءُ بیگواہ کنگ بیتگ-

سعودی عرب ءِ وزیر ھزانہ مھمد الجدعان ءَ گوشتگ کہ (مملکت ایران) ءِ گون ءَ سپارتی سیادی ءِ گھتری ءَ پد گوں ایران ءَ سرجمی ءَ زرکاری باپار ءَ جاڑیگ اِنت –

سعودی عرب ءُ ایران ءَ گوستگیں آدینگ ءَ وتی سپارتی سیادی گھتر کتگ ءُ ھردوکیں ڈیھانی میان ءَ بند بیتگیِ سپارت جاھاں دوبر دو ماہ ءِ توک ءَ پچ کنگ ءِ جار پرینگ بیتگ اَنت –

عرب نیوز ءِ رد ءَ ریاض ءَ زرکاری ءِ پھناتاں برجم دارگ بیتگیں باپاری کانفرنس ءَ وزیر ھزانہ ءَ جست گرگ بیتگ کہ سعودی عرب کدی گوان ایران ءَ نام گروکیں زرکاری ءَ بندات کنت گڑا الجدعان ءَ گوشتگ سرجمی ءَ گوش آں –

سعودی وزیر ھزانہ ءَ گوشتگ کہ مئے مول ءُ مراد ھنچین دمگے ءَ اِنت کہ سرجم بہ بیت ما وتی مردمانی بنکی ھک ءُ آسراتیاں سرجم کنگ ءَ بروبر اِنت ءُ وشھال اِنت اے وڑ مہ بیت کجام سبب نیست اِنت اے مول ءُ مراد سرجم مہ بیت ایران مئے ھمساھگ اِنت ءُ آیوکیں سالاں ھم مئے ھمساھگ بیت اِنت-

ایران ءَ گچینی وھد اِنت ءُ ما آئی ءَ گچینی وھد دے دانکہ آ ھم پما وشنود بہ بیت –

مھمد الجدعان ءَ گوشتگ کہ دانکہ ھردوکیں نیمگاِ ھامکمیت ءُ گپ ءُ ترانی مسامانانی پاسداری کنگ بیت اِنت گڑا ھچ سبب نیست ھردوکیں ڈیھانی میان ءَ جاور ھراب بہ بنت من ءَ اے درگت ءَ ھچ اڑانک دیم ءَ آیگ ءَ نہ اَنت-

سر بیتگیں ھالانی رد ءَ روکپتی بلوچستان ءُ رودراتکی بلوچستان ءِ سیمسری ھند ءَ سیمسری پھزدارے زدگ بوگ ءَ پد بیران بیتگ-

گیشین ھالانی رد ءَ سرکاری رسانک ءِ رد ءَ ایرانی سیمسری پھزداراں یک درشانے ءَ گوشتگ کہ سیمسری پھزدار گشت ءَ بیتگ اَنت کہ اود ءَ ناشناسانی اُرش ءَ زدگ بیتگیں یک سپاھی ءَ وتی ساہ داتگ اَنت-

بیران بیتگیں پھزادار ءِ پجار مھمد رضا مقدم سبحانی جھمنند ماھشھر ءِ نام ءَ زانگ بیتگ –

ایرانی سیمسری پھزداراں اے پدر نہ کتگ کہ چون ءُ کجام جاہ ءَ ائی ءِ سر ءَ اُرش بیتگ –

زانگ بہ بیت ناشناساں نیمگ ءَ وھد وھد ءِ سر ءَ اُرش بوگ ءَ اَنت بلے اے اُرشانی زمہ واریان کس پہ وت ءَ زیرگ ءَ نہ اِنت ءُ نانکہ دگہ گلے دیم ءَ گندگ ءَ اتکگ –

بلوچستان ءِ دمگ ھاران ءَ گوستگیں روچ ءَ سھب وھد ءَ پوج ءَ ھاران ءِ دمگ ایری کلّگ ءَ جتائیں ھنداں بازیں لوگانی سر ءَ بیڑبرتگ، لوگاں پروشت ءُ پروش ءَ اَبید زالبول ءُ چُک لَٹ ءُ کُٹانی نشانگ کتگ وھدے کہ دو مردم آوار جنگ ءَ پد ناشناسیں جاھے ءَ برتگ-

بیگواہ کنگ بیتگیں مردمانی پجّار امجد آحمد ء بلال آحمد ءُ محمد قاسم ء حاجی کریم داد ناماں چہ بیتگ اَنت-

اِھوالکارانی رِد ءَ بیڑ وھد ءَ پوج ءَ لوگاں بیڑبرتگ وھد ءَ لوگاں لُٹ ءُ پُل ءِ میان ءَ جند سلاہ ، کلدار، سُھر ءُ دگہ گرانبھائیں مڈی ھم وتی ھمراھی ءَ برتگ اَنت گوں-

زانگ بہ بیت ھاران ءَ پاکستانی پوج ءِ دست ءَ 27 فروری ھاران ءِ دمگ گواش ءَ صلاح الدین سیاپاد لوگ ءَ بیڑبرتگ صلاح الدین آوار جتگ اَت، آوار جنگ وھد ءَ صلاح الدین سیاپاد سک لَٹ ءُ کُٹ ءِ نشانگ کتگ ءُ بے ھوشی جاور ءَ آ ھاران شھر ءَ دور داتگ-

آ کھول ءَ زوتاں الاج ھاتر ءَ شال ءَ برتگ ءُ اود ءَ آئی ءَ ٹپانی درد نہ سگ اِتگ ءُ بیران بیتگ-

بلوچستان ءِ دمگ کیچ ءَ سلاہ بندین مردماں یک گاڑی ءِ سر ءَ تیرگواری کتگ چریشی ءَ زالبولے بیران بیتگ-

تیرگواری ءِ وئیل کیچ ءِ دمگ کلاتک ءَ پیش اتکگ- پولیس ءِ رد ءَ چارشمبے ءِ بیگاہ ءَ بی ایریا کلاتک ءَ ناشناسیں مردماں کمبر پٹھان جھمنند ڈگاری کھن کہ آئی ءِ گاڑی ءِ سر ءَ ناشناساں تیرگواری کتگ ءُ چریشی ءَ کمبر ءِ لوگ بانک ءَ تیر ءِ لگگ ءِ سبب ءَ آ بیران بیتگ-

پولیس ءِ رد ءَ تیرگواری ءَ کمبر وت رک اتگ-

دمگی مردمانی رد ءَ کمبر پٹھان ءِ سیادی سرکاری پلامرزی کنوکیں گل ءِ مزنیں باسک راشد پٹھان ءِ براتزتک اِنت ءُ آ وت ھم ھمے سلاہ بندیں گلے باسک اِنت-

زانگ بہ بیت بلوچستان ءَ پوج ءِ سر ءَ سیاسی پھناتاں اے بھتام اِنت کہ پاکستانی پوج ءُ چیریں ادارھاں یک سلاہ بندیں گلے جوڑ کرتگ کہ آ چاگردی سلکاری ءُ دگہ کوش ءُ آوار جنیاں دزمانجن اِنت کہ ایشی ءَ لس نام ڈیتھ اسکواڈ ءِ نام ءَ زانگ بیت اِنت-

بلے تنی وھدی تیرگواری ءِ الکاپیں بابتانی درگت ءَ سرپدی نہ بیتگ اَنت-