TBP Balochi

مبارک کازی ءِ پنجاہ سال ءِ شائری ءِ سپر بلوچ ءِ رنگاں رج اتگ پمیشکا مروچی آئی ءِ بیرانی ءَ سرجمیں بلوچ راج پرسیگ اِنت۔

اے گپ بلوچ نیشنل مومنٹ ( بی این ایم ) ءِ نیمگ ءَ برجم دارگ بیتگیں ’جھدکارانی پتر‘ ( ایکٹیوسٹ اسمبلی ) ءِ نیاد ءَ تْران کنان ءَ گل ءِ سرکماش ڈاکٹرنسیم ءَ گوشتگ اَنت۔

گل ءِ کمک سرکارگشاد چیئرمین کمال ءِ چیردستی ءَ بیتگیں اے مراگش مبارک کازی ءِ منگہ دیگ ءَ دو دمان ءِ بے تواری ءَ بنا بیتگ ،مراگش ءَ بی این ایم ءُ باسک ءُ اگدہ داراں مبارک کازی ءِ کرد ءُ ندانکی ( ادبی) کارانی سر ءَ آ ستک ءُ ستا نْدر کرتگ۔

ڈاکٹر نسیم ءَ گْوشتگ ھشتاد ءِ دھک ءَ بہ گر داں مروچی ، مبارک کازی ءِ نزیک ء پنجاہ سال ءِ شائری ءِ سپر ءَ آئی ءِ شائری گوں آشوب ، گھگیری ءُ بلوچ ءِ رنگاں بندوکیں شائری یے اَت۔کازی چہ ھما مردمان اَت کہ وت ھم راجی سیاست ءَ گون بیتگ ، جیل ءَ بند بیتگ ، آزار سگ اتگ ئِے ۔ آئی ءِ گوں جھد ءَ ھمگرنچ بیگ ءِ نشانی یے آئی ءِ تنگوئیں بچ ڈاکٹرکمبر کازی اَت کہ آئی ءِ ھم گھگیری ءِ راہ زرتگ اَت ءُ شائری ءِ پڑ ءَ ھم وتی توان چکاس اتگ۔آئی ءَ چہ مبارک کازی ءِ نیمگ ءَ سکین ءُ دلبڈی ءُ ھیلکاری بیتگ۔اے ھم کازی ءِ گھیگیری ءِ تہ ءَ ھوار بیگ ءِ درور اِنت۔

آئی ءَ گْوشتگ مروچی کہ چاگردی رسانک ءِ زمانگ اِنت کہ ما گندگ ءَ ایں بلوچ پہ کازی ءِ بیرانی ءَ پریشان اَنت۔ھما کازی کہ جتا جتائیں کرد ءِ واھند بیتگ ، آ کہ دیم گْوشیں کردے ءِ واھند اَت۔آئی ءَ مدام وتی گپ گوں دل ءَ ءُ دپ ءِ پر ءَ جتگ۔ریا رو کنگ ، دروگ بندگ ءُ پشت گْوشی کنگ چہ کازی ءَ سک سک دور بیتگ اَنت۔آئی ءِ ھمے شری بیتگ اَنت کہ مردماں دوست داشتگ ءُ آ دگہ کار کہ مردماں گْوشتگ کہ ایشی ءَ مدام شراب ءِ بوتلے دست ءَ اِنت ءُ گرد ایت،مروچی اے درسیں چیزاں مردم بے ھیال کنگ ءَ اَنت۔پرچا کہ آئی ءِ تہ ءَ دگہ ھزاراں شری بیتگ کہ اے وڑیں چیز اش اندیم کرتگ اَنت۔

بی این ایم ءِ سرکماش ءَ گوں مبارک کازی ءَ بلوچ راج ءِ مھر ءِ درور ءَ درشانتگ مروچی شما دیستگ کہ پسنی ءِ انجمن تاجران ءَ ، آئی ءِ پہ منگہ ءَ وتی دکان بند کرتگ اَنت ، باید سجھیں بلوچستان ءَ ھمے کار بوتیں۔ درسیں تک ءُ پھنات ءِ مردماں پہ آئی ءِ بیرانی ءَ وتی دلپدردی درشان کرتگ۔آئی ءِ مزن شانیں کرد اَت کہ مروچی آ چوش یات کنگ بیت۔

بلوچ زبان ءِ نامدار ءُ بے دروریں شائر مبارک کازی ءِ سَے پاتیہ ءَ ھزارانی کچ ءَ مردماں پسنی ءَ شُتگ ءُ آئی ءِ مانش چار اِتگ وھدیکہ بلوچستان ءَ ھوار دری ڈیھاں آئی ءِ یات ءَ مراگش برجم دارگ بوگ ءَ انت –

دوشمبے ءِ روچ ءَ بلوچستان ءِ جتا جتائیں ھند ءُ دمگاں شائر، نودربر ءُ ھر تک ءُ پھناتاں سیادی داروکیں مردماں پسنی ءَ اتکگ ءُ واجہ ءِ پُرس سر ءَ دست داشتگ، وھدیکہ پدا رند ءَ مزنیں کچے ءَ مردماں مچی ءِ دروشم ءَ مانشجاہ ءَ شُتگ ءُ آئی ءِ مانش ءِ سر ءَ پُل ریتکگ ءُ دروت ندر کتگ –

چہ کیچ ءَ سربوتگیں ھالانی رِد ءَ تربت شھدربرجاہ ءِ نودربراں دوشمبے ءِ روچ ءَ مبارک کازی ءِ یات ءَ اوگام جتگ، روانک ءَ نودربراں مزنیں کچے ءَ بھر زرتگ ءُ ماسٹر ھم ھوار بوتگ انت –

روانک ءَ بھر زورکیں مردمانی دست ءَ بینر بوتگ انت کہ آیانی سر ءَ مبارک کازی ءِ شئیر نبشتہ بوتگ انت ءُ پہ آئی ءِ دروت ءَ نودربراں وتی ھیال درشان نبشتہ کتگ انت –

نودربراں ھوار پروفیسر ڈاکٹر عبدالصبور ، ڈاکٹر طاہر حکیم ، جمیل احمد بادینی، طارق رحیم ، گلاب مرزا ، سادق سبا ، باہدین احمد ، میر شریف ، میڈم شہناز ، میڈم فیروزہ ءُ ھوار دگہ بازیں مردمے اوگام جنگ ءَ ھوار بوتگ انت –

نودربراں لوٹ کتگ کہ مبارک کازی ءِ نام ءَ شھدربر جاہ ءِ تہ ءَ آئی ءِ یاتگیری چیزے جوڈ کنگ بہ بیت –

دومی نیمگ ءَ نودربر ءُ لبزانکی مردماں شال، ھزدار ءَ ھوار سرجمیں بلوچستان ءَ آئی ءِ یات ءَ چراگ روک کنگ بوتگ ءُ ھلیجی ڈیھاں آئی غائبانہ نماز جنازہ ءِ ھمراھی ءَ آ دروت ندر کتگ –

جتا جتائیں مراگشاں ھواریں مردماں آئی ءِ مرگ پہ بلوچ لبزانک ءُ زبان ءَ بلاھیں وئیلے گوشتگ کہ آئی ءِ وتی جتائیں شائری تہ ءَبلوچ راجی جھد ءُ زمین ءَ گوں مھر یک پدریچ ءَ دومی پدریچ ءَ سرکنگ ءَ وتی کرد پیلو کتگ –

مردماں گوشتگ کہ آئی ءِ بے دروریں شائری جھان ءِ ایردستیں راجانی رھشونی ءِ جوانیں بھرے بنت –

سربوتگیں ھالانی رِد ءَ بلوچستان ءِ دمگ پنجگور ءَ ناشناسیں سلاہ بندیں مردماں پاکستانی پوج ءِ پانگسے ءِ سر ءَ اُرش کتگ ءُ در شتگ انت –

گیشیں ھالانی رِد ءَ ناشناسیں سلاہ بندیً مردماں اے اُرش پنجگور ءِ دمگ رکشان پھل ءَ برجاھیں پاکستانی پوج ءِ پانگس ءِ سر ءَ کتگ، کہ سلاہ بندیں مردماں ٹوھیں سلاھاں گوں اُرش کتگ ءُ اُرش ءَ پاکستانی پوج ءَ جانی ءُ مالی تاوان ءِ گمان کنگ بیت –

اھوالکار ءِ رِد ءَ اُرش ءَ پد پاکستانی پوج ءَ سرجمیں راہ در بستگ انت، بلے تنی وھدی ھچ وڈیں دزگیری ءِ ھال نیست –

زانگ بہ بیت چدوپیسر ءَ پنجگور ءَ ھوار بلوچستان ءِ ایندگہ ھند ءُ دمگاں پاکستانی پوج ءِ سر ءَ بوتگیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ انت بلے اُرش ءِ زمہ واری ھچ گل ءَ نہ منّ اِتگ، ءُ سرکار ءِ نیمگ ءَ ھم تنی وھدی اُرش ءِ درگت ءَ ھچ گوشگ نہ بوتگ –

سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءَ یک مردمے زورانسری آوار جتگ ءُ بیگواہ کتگ، دومی نیمگ ءَ ماں کراچی ءَ زورانسری آوار جنگ بوتگیں تاج محمد سرپرہ ءِ گِس ءِ سر ءَ کبزہ کنگ بوتگ –

گیشیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءَ یک مردمے زورانسری آوار جتگ ءُ بیگواہ کتگ، آوار جنگ بوتگیں مردمے پجار کمالان ء گل محمد ءِ نام ءَ چہ بوتگ –

اھوالکارءِ رِد ءَ اے مرد پاکستانی پوج ءَ یک ستمبر ءَ آوار جتگ کہ ھما انت گار ءُ بیگواہ انت –

دومی نیمگ ءَ چہ کراچی ءَ ھمے ھال آیگ انت کہ زورانسری آوار جنگ بوتگیں باپاری مردم میر تاج محمد سرپرہ ءِ گِس ءِ سر ءَ کبزہ کنگ بوتگ –

تاج محمد سرپرہ ءِ لوگبانک ءَ اے ھبر راست کتگ ءُ چاگردی ترامجاہ ایکس ءَ وتی پوسٹ ءِ تہ ءَ نبشتگ کہ ڈی ایچ اے کراچی فیز ھپت ءَ منی گِس ءِ سر ءَ کبزہ گیریں ٹولی ءَ در کانودی کبزہ کتگ کہ آیاں علی رضا مگسی (زولفقار مگسی ءِ زھگ) ءُ ندیم جلبانی ءِ سروکی ءَ کتگ کہ ھچ وڈا منگ نہ بیت –

آئی ءَ گوشتگ کہ ما چہ سندھ سرکار ءَ لوٹ کن ایں کہ اے درکانودی کبزہ گیری ءَ بہ داریت –

آئی ءَ گوشتگ کہ گس ءِ سر ءَ کبزہ کنوک ءُ مئے مال ءُ مڈیانی سر ءَ کبزہ کنوکاں چہ مارا پھریز کنگ بہ بیت پرچا کہ اے وھدی کبزہ کنوکیں ٹولی مئے گس ءَ ساڑی انت، سندھ ءِ پولیس ھم اشانی گوم ءَ گون انت ءُ مئے پھریز ءِ بدل ءَ کبزہ گیرانی ھمراہ انت ـ من چہ درساں لوٹ کناں کہ منی گوم ءَ بوشتاں ءُ اے کبزہ گیریں ٹولیانی بگیری ءَ توار چست بکناں –

زانگ بہ بیت تاج محمد سرپرہ نوزدہ جولائی سال دوھزار بیست ءَ چہ کراچی ءَ پاکستان ءِ چیریں ادارھانی کارمنداں ھما وھد ءَ آوار جتگ وھدیکہ آ ترکی ءَ روگ ءَ در آیگ ءَ بوتگ –

آئی ءَ گوشتگ کہ سَے سالے ءِ گوزگ ءَ پد ھم آئی ءِ ھچ ھال نیست کہ کجا انت کجام جاورانی تہ ءَ انت –

بلوچستان ءِ دمگ کیچ ءَ ناشناسیں سلاہ بندیں مردماں یک مردمے تیرباران کتگ ءُ کشتگ وھدیکہ شال ءَ مساپرے ءَ رکشہ ڈرائیورے کُشتگ – دومی نیمگ ءَ ڈیرہ بگٹی ءَ تراک ناکیں شوروانی زد ءَ اتکگیں یک مردمے مُرتگ –

تربت ءَ بوتگیں تیرگواری آپسر ءَ بوتگ کُشگ بوتگیں مردمے نام رشید انت کہ کولواہ ءِ دمگ بلور ءِ نندوک انت –

اھوالکار ءِ گوشگ انت کہ اے مرد گوستگیں سوبائی وزیر ظہور بلیدئی ءِ نزیکیں مردمے بوتگ ءُ آئی ءِ کار نشہ ءِ باپاری بوتگ – بلے پدا وئیل ءِ درگت ءَ گیشیں سرپدی نہ رستگ کہ کجام سوب ءَ مرد کشگ بوتگ –

چہ شال ءَ ھمے ھال آیگ انت کہ علمدار دگ ناصرآباد ءِ نزیک ءَ رکشہ ءَ سواریں مساپر ءَ رکشہ ڈرائیور تیرباران کتگ ءُ کتگ ءُ وت وئیل جاہ ءَ تتکگ –

کُشگ بوتگیں مردمے پجار مری آباد ءِ جھمنند چِل سالی حسین ء یعقوب علی ہزارہ ءِ نام ءَ چہ بوتگ –

دومی نیمگ ءَ بلوچستان ءِ دمگ ڈیرہ بگٹی ءَ چیر کتگیں تراکناکیں شوروانی تراک ءَ یک مردمے مرتگ ءُ یکے زدگ بوتگ –

لیویز ءِ رِد ءَ ڈیرہ بگٹی ءِ ھند لوٹی بیھ ءَ پرپٹ ءِ تراکناکیں شوروانی زد ءَ اتکگ ءُ چریشی ءَ پرپٹ ءَ سواریں ساجن ء حسین شمبانی بگٹی ھما دمان ءَ مُرتگ وھدیکہ آئی ءِ ھمراہ سک باز زدگ بوتگ –

دمگی مردمانی رِد ءَ اے مرد ءِ سیادی گوں ریاستی کشندہ ٹولی انت – بلے تنی وھدی اے اُرش ءِ زمہ واری ھچ گل ءَ نہ من اتگ – بلے ریاستی کشندہ ٹولیانی کارمندانی سر ءَ پیش ءَ بوتگیں اُرشانی زمہ واری گیشتر بلوچ آجوئی لوٹوکیں سلاہ بندین گلاں منّ اِتگ انت –

ھزدار ءَ جنکو جنسی زوراکی کنگ ءَ پد کُشگ بیتگ،کوش ءِ بھتام ءَ یک مردمے دزگیر کنگ بیتگ-

گیشیں اھوالانی رد ءَ بلوچستان ءِ دمگ نال ءَ گوستگیں روچ ءَ بیگواھیں جنک ءِ گشان ءَ دراتکگیں لاش انتزامیہ ءَ دزکپتگ ءُ پد ءَ جنکو ءِ لاش ھسپتال ءَ سر کنگ بیتگ- ھسپتال ءَ جنکو ءِ گون ءَ بیتگیں جنسی زوراکی ءِ ھال راست کتگ-

دمگی اھوالانی رد ءَ ھزدار ءِ دمگ نال ءَ جھل مگسی ءِ جھمنندیں دھکانکار عابد نامیں مردمے ءِ ھشت سالی ئیں جنکو ھمیرہ گوستگیں روچ ءَ ناگتی بیگواہ بیتگ چریشی ءَ پد آئی ءِ کھول ءُ دمگی مردماں جنکو ءِ شوھاز بندات کتگ کہ مردچی آئی ءِ لاش کرپاسانی ڈگار ءَ دراتکگین لاش دزکپتگ-

جنکو ءِ لاش ءِ دزکپگ ءَ پد نال ءِ انتزامیہ ءَ ھمے وھد ءَ سر بیتگ ءُ جنکو ءِ لاش اش چست کتگ ءُ نادراہ ءَ برتگ اش –

دمگی مردمانی رد ءَ ھپستال ءَ چار ءُ ٹپاس ءَ پد جنکو ءِ گون ءَ جنسی زوراکی ءَ کنگ ءَ پد کشگ ءِ ھال راست کتگ- ھمے وڑ نال ءِ انتزامیہ ءَ جنکو ءِ گون ءَ جنسی زوراکی ءُ کوش ءِ بھتام ءَ یک مردمے دزگیر کتگ-

بلے سرکاری تکاں جنکو ءِ زوراکی ءُ آئی ءِ گون ءَ بیتگیں وئیل ءِ درگت ءَ ھچ مردمانی دزگیری ءِ اھوال دیم ءَ نیتکگ اَنت-

زانگ بہ بیت ھزدار ءَ جنسی زوراکی ءِ وئیل پیش ءَ ھم دیم ءَ اتکگ ایشی ءَ پیش اپریل سال دوھزار ءُ بیست ءُ دو ءَ ناشناسیں مردماں شاھزیب مھمد ھسنی نامیں بچکے جنسی زوراکی ءَ پد کُشتگ ات- ھما سال ءَ سیزدہ سالی ئیں جنک ھم جنسی زوراکی ءِ نشانگ کنگ بیتگ ات-

بلوچستان ءَ زالبولانی ھاتر ءَ کار کنوکیں گل ءِ رد ءَ جنسی زوراکی ءِ وئیلاں گیشتر کم اُمریں جنک نشانگ کنگ بوگ ءَ اَنت – ھمے سال ءَ اوتھل ءُ لورالائی ءَ دو ھنچیں وئیل پیش اتکگ اَنت کہ اود ءَ کم اُمریں جنکو جنسی زوراکی ءِ نشانگ کنگ بیتگ اَنت-

گل ءِ رد ءَ اے وئیل گیشتر پاکستان ءَ گوست ءَ پیش اتکگ انت بلے گوستگیں سال ءَ چہ بلوچستان ھم اے دابیں وئیلاں وتی انگیر ءَ زرتگ-

گل ءِ بھتام اِنت بلوچستان ءَ اے دابیں وئیلانی گر ءُ دار کنگ ءَ انتزامیہ ءَ وتی گوش واپینتگ اَنت کہ اے دابیں وئیلاں کم باز کساس ءَ جرمکارانی ھلاپ ءَ انتزامیہ ءَ بیڑ ءِ گام تیز کتگ اَنت اگاں جاور اے داب ءَ بوت اَنت گڑا جنسی زوراکی ءِ وئیل گیش بوت کن اَنت-

میان اُستمان ءِ دودمانی ءُ گھبودی گل یونیسکو ءَ زیردستیں روکپت ءِ لمب ءِ شھر اریھا (جیریکو) ءِ ھند تل السلطان میان اُستمانی پتر بندی ءَ ھوار کرتگ-

ھال سرکنوکیں ادارہ ایس پی اے ءِ رد ءَ یونیسکو ءِ چیردستی ءَ میانی اُستمانی پتر داری ءِ کمیٹی ءَ ریاض ءَ برجاھیں نیاد ءَ کتگ اَنت-

تل السلطان کہ چہ اھرام ءِ مسر ءَ اھرام ءِ مسر ءَ پیسر اِنت یل دگہ دابیں ٹیلایے کہ اود ءَ انسانی بوگ ءِ پیش راجدپتری ءِ منانک ءَ دنت اِنت –

فلسطین ءَ میان اُستمانی پتر بندی ءِ ادارہ ءِ ڈائریکٹر جنرل ڈاکٹر اھمد الرجوب ءَ گوشتگ کہ اریھا ءِ شھر سرجمیں دنیا ءَ پیش ءُ کوھنتریں سیاسی، چاگردی ءُ انتزامیہ ءِ نمونگ اِنت –

آئی ءَ گوشتگ کہ اے ایوک ءَ دنیا ءِ کوھنتریں شھر اِنت بلکیں دنیا ءِ کوھنتریں چاگردی، سیاسی ءُ زرکاری ءُ دینی نزام ءِ داروکیں شھر اِنت -انسان ءِ بنکی سنچ ءِ دارگ اے شھر ءِ کرد اِنت-

آئی ءَ گوشتگ کہ تل السلطان – اریھا ءِ میان اُستمان ءِ پتر بند ءَ ھوار بیگ چاگردی پیسلہ ءِ دستیگی اِنت ءُ ایشی ءِ سان دود ءُ زرکاری ءَ ھم بنت اِنت-

آئی ءِ گوشگ ات کہ فلسطین یک ھنچیں ڈیھے کہ آئی ءِ گور ءَ آمدنی ءِ وسائل نیست اَنت بلے آ ھم پد ءَ دود، نیکراھی ءُ ابرمی مڈیاں مال ءُ مال اِنت –

اریھا ماں میان اُستمان ءِ پتر ءَ ھوار بوگ پراھی ءَ زرکاری ءِ نپ بنت اِنت – تر ءُ تاب کنوکانی کساس گیش بنت اَنت ءُ چریشی ءَ زرکاری گیشتر ود ات کت کنت اِنت-

زانتکارانی گوشگ اِنت فلسطین.ءِ شھر تل السلطان اریھا سرجمیں دنیا ءِ کوھنتریں شھر اِنت اد ءَ انسان ءِ بنچپک راجدپتر ءَ.پریچگ ءَ اِنت ءُ اے شھر ءِ سیادی نوکیں دور ءِ ھجری ءَ اِنت- ایشی ءِ سلسلگ بیزنتی سلطنت ءَ داں برجاہ بیتگ اد ءَ دیوھیکل گول ءِ مینارہ ھم ھست اَنت-

ایشی ءَ ابید اے شھر ءَ پھریزی ءِ پسیلانی نشانگ ھم ھست اَنت سد ءَ گیش اد ءَ شوھازی ءَ کار بوگ ءَ اِنت آیاں سرپدی رس اتگ کہ انسانانی بنداتی شھری اِنت ءُ اد ءَ دیز ٹنانی ھساب ءَ ریکانی چیر ءَ اَنت –

بلوچستان ءِ دمگ آواران ءَ پاکستانی پوج ءَ یک مردمے زورانسری آوار جتگ ءُ بیگواہ کتگ-

گیشیں ھالانی رِد ءَ آواران ءِ دمگ تیرتیج ءَ پاکستانی پوج ءَ یک مردمے زورانسری آوار جتگ ءُ گوں وت برتگ کہ آئی ءِ پجّار رسول بخش ء موسیٰ جھمنند وھلی کوہ نام ءَ چہ بیتگ اے مرد پاکستانی پوج ءَ ھما وھد ءَ آوار جتگ وھدے کہ آ وتی ڈگارانی سر ءَ کار ءَ دھکانکاری ءَ بیتگ-

رسول بخش ءِ آوار جنی ءِ گپ بیگواھیں بلوچانی گل وائس فار بلوچ مسنگ پرسنز ءَ وتی چاگردی رسانکدر ٹوئیٹر ءَ “x” چہ راست کتگ-

زانگ بہ بیت بلوچستان ءَ زورانسری آوار جنی ءِ نہ کُٹْوکیں دْرچ یکشلہ برجاہ ءَ اِنت-

بلوچ لبریشن آرمی ءِ جارکش جیئند بلوچ ءَ رسانکدر ءَ وتی یک شنگ کتگیں درشانے ءِ تہ ءَ گْوشتگ کہ گوستگیں روچاں شال ءِ دمگ ولی تنگی ءَ زورگریں پاکستانی پوج ءِ یک بُنجلے ءِ سر ءَ سرجمی ءَ دستیگ کتگ ءُ یازدہ کارندہ کُشتگ ءُ دُژمنیں پوج ءِ ساز ءُ سامان وتی دست ءَ کتگ اَنت-

جارکش ءَ گْوشتگ کہ بی ایل اے ءِ سرمچاراں چاردہ ستمبر 2023 ءِ بیگاہ ءِ کساس شش ءِ نزیک ءَ شال نزیک ءَ ولی تنگی ءِ ھند سر ءَ زورگریں پاکستانی پوج ءِ یک بُنجلے ءِ پھازوکی چوکیانی سر ءَ اُرش کتگ ءَ بُنجل سرجمی ءَ وتی دست ءَ داتگ- سرمچاراں دُژمنیں پوج ءِ جتائیں نیمگاں چہ انگر ءَ پد راکٹ ءُ دگہ سلاھاں گوں اُرش کتگ، چریشی ءَ دُژمنیں کارندھاں وتی سلاہ ءُ کُشگ ءُ ٹپی بیتگیں کارندہ یل داتگ ءُ تتکگ اَنت-

جیئند بلوچ ءَ گْوشتگ کہ سرمچاراں زورگریں پوج ءِ بُنجل ءِ دو پوسٹ سرجمی ءَ وتی دستیگ کتگ ءُ وھدے کہ سیمی پوسٹ کہ سلاھانی ھمبار بوتگ، آ گوں راکٹاں اُرش کتگ ءُ تباہ کتگ، چریشی ءِ آسر ءَ دُژمن ءِ سلاھاں ھمبار سرجمی ءَ تباہ بیتگ وھدے کہ پوسٹ ساڑی ئیں کارندہ کُشتگ اَنت-

جارکش ءَ دیمتر ءَ گْوشتگ کہ اُرش ءِ آسر ءَ زورگریں پوج ءِ صوبیدار قیصر رحیم بھٹہ جھمنند کوٹ ادو ءَ ھوار یازدہ کارندہ کُشتگ وھدے کہ دستیگ کنگ ءَ پد دُژمن ءِ سلاہ ءُ دگہ ساز ءَ سامان بلوچ سرمچاراں وتی دست ءَ کتگ اَنت-

جیئند بلوچ ءَ گْوشتگ کہ بلوچ لبریشن آرمی اے اُرش زمہ واری ءَ منّ اِیت ءُ اے اِھد کنت کہ زورگریں پاکستانی پوج ءِ سرجمی ءَ دراھگ ءَ تاں ھمے وڑیں اُرشاں برجاہ دار اِیت-