گوادر:ڈاکٹر صبیحہ ءَ پد سمی ءُ سبغت اللہ یل بیتگ انت

گوستگیں روچ ءَ گوادر ءَ برجاھیں زھرشانی نندانک ءِ وھد ءَ دزگیر بیتگیں سمی ءُ سبغت اللہ یل بیتگ انت-

ھردوکیں رھشون گوستگیں روچاں ڈاکٹر صبیحہ بلوچ ءِ ھمراھی ءَ دزگیر کنگ بیتگ انت ءُ پد ءَ بیگواہ کنگ بیتگ اَنت-

داں انگت ءَ گوادر ءِ نندانک ءَ دو سد ءَ گیش مردن دزگیر کنگ بیتگ اَنت ءُ دزگیر بیتگیں مردمانی بارو ءَ ھچ سرپدی نیست انت-

زانگ بہ بیت ڈپٹی کمشنر گوادر ءَ وتی شنگ بیتگیں درشان ءَ سمی، صبیحہ ءُ صبغت اللہ ءِ دزگیری ءِ ھال بس ھنچیں گپے گشتگ ات ءُ گوادر ءَ زالبولانی دزگیری یا زدگ بوگ ءِ ھال بے بنیات گشتگ ات اَنت-

ڈپٹی کمشنر گوادر ءَ یک پریس کانفرنسے ءَ گوشتگ ات کہ راجی مچی ءِ وھد ءَ کمیٹی ءِ باسکاں لا انفورسمنٹ ایجنسیز ءِ یک کارندھے دزگیر کتگ ءُ آ وتر دیگ ءَ انکاری کتگ – دمگی انتزامیہ ءِ گپتگین مردم ءِ بارو ءَ گپ ءُ تران کتگ گڑا کمیٹی ءَ گشتگ سیکیورٹی ایجنسی ءِ کارندہ مئے گور ءَ نہ اِنت ءُ ایشی ءَ پد پولیس ءُ ایف سی ءَ نندانک ءِ مُچی شنگ ءُ شانگ کتگ-

دومی نیمگ ءَ بلوچ یکجھتی کمیٹی ءَ گوستگیں روچ ءَ بھتام جتگ ات کہ بی وائی سی ءِ رھشون سمی، صبیحہ ءُ صبغت اللہ پورسز ءَ نندانک جاہ ءَ لٹ ءُ کٹ ءُ ٹپیگ کنگ ءَ پد زدگیں جاوراں دزگیر کتگ ءُ ناشناسیں جاھان برتگ انت-