بارکھان ءَ زھرشانی کنگ ءَ شھریانی بگیری ءَ ایف آئی آر نکش، لوگانی سر ءَ بیڑ

بلوچ یکجھتی کمیٹی ءِ جار پد ءَ زی بارکھان ءِ شھر رکھنی ءَ بیتگیں شٹر ڈاؤن ھڑتال ءُ روانک ءَ بھر زوروکیں مردماں ھوار بلوچ یکجھتی کمیٹی ءِ باسکانی سر ءَ پولیس نیمگ ءَ چہ ایف آئی آر نکش کنگ بیتگ اَنت-

بلوچ راجی مچی ءُ کاروانانی سر ءَ پاکستانی پوج ءِ اُرشاں ءُ لَٹ کُٹانی بگیری ءَ سرجمیں بلوچستان ءَ سیاسی بلوچ یکجھتی کمیٹی ءِ زھرشانی ءَ نندانکانی دْرچ برجاہ ءَ اِنت-

بی وائی سی ءِ کال پد ءَ گوستگیں روچ ءَ بلوچستان دگہ دمگانی وڑ ءَ بارکھان ءِ شھر رکھنی ءَ ھم شھریاں دگانی سر ءَ زھرشانی کنگ بیتگ وھدے کہ اے میان ءَ شھر ءَ سرجمی ءَ ھڑتال بیتگ چریشی ءِ سبب ءَ اے پولیس ءَ زھرشانی کنوکانی بگیری ءَ ایف آئی آر نکش کنگ بیتگ-

زھرشانی کنوکانی گْوشگ اِنت کہ بارکھان ءِ شھر رکھنی ءَ ھم زی یک پُرایمنیں روانکے کشگ بیتگ کہ ھرچ مردمے ءِ بُنکی ھک اِنت بلے اشی ءِ پُشدر ءَ جتاجتائیں باسکاں لوگانی سر ءَ بیڑبرگ بیگ ءَ اِنت ءُ دزگیر کنگ بیگ ءَ اَنت-

آئی ءَ گْوشتگ کہ ما رکھنی انتزامیہ ءَ چہ زوت اے ایف آئی آر ھلاس کنگ ءُ مردماں بے سبب ءَ دزگیر کنگ ءَ بند بہ کن اَنت اگاں آئی ءِ بگیری ءَ تُرندیں زھرشانی کنگ بیت-