TBP Balochi

بلوچستان ءِ دمگ ھزدار ءَ شانزدہ ستمبر ءِ شپ ءَ پاکستانی پوج سی ٹی ڈی ءَ یک میڑے ءَ دو مردمانی جنگ ءِ ٹاہ داتگ کہ آیانی تہ ءَ یک مردمے پجار پیش ءَ بوتگ ءُ دومی مردمے پجار ھم کنگ بوتگ کہ آ زورانسری آوار جنگ بوتگیں مردمے بوتگ –

اھوالکار ءَ گوں ٹی بی پی ءَ تران کنان ءَ گوشتگ کہ دروگیں میڑ ءَ کشگ بوتگیں دومی مردمے پجار امیر بخش زھری ء محمد عالم زھری جھمنند یکبوزئی انت کہ آ پنچ ستمبر دوھزار بیست ءَ سَے ءَ چہ ھزدار ءَ زورانسری آوار جنگ ءُ بیگواہ کنگ بوتگ –

اھوالکار ءِ گوشگ انت کہ امیر بخش ءُ آئی ءِ ناکو خدا بخش زھری ء محمد شریف سپرے ءَ رؤگ ءَ بوتگ انت کہ پاکستانی پوج ایف سی ءُ چیریں ادارھانی کارمنداں چہ ھزدار ءِ دمگ باغبانہ ءَ آوار جتگ ءُ بیگواہ کتگ انت –

امیر بخش ماں ھزدار ءَ دروگیں میڑ ءَ کُشگ بوتگ وھدیکہ آئی ءِ ناکو خدا بخش ھنگت بیگواہ انت –

سی ٹی ڈی ءَ بلوچستان ءِ دمگ ھزدار ءُ جعفرآباد ءَ دو جتائیں میڑاں چار مردمانی کُشگ ءِ ٹاہ داتگ ات –

سی ٹی ڈی ءَ ٹاہ دتگ ات کہ ھزدار ءِ دمگ کھٹان ءَ سی ٹی ڈی ءِ سر ءَ اُرش کنگ بوتگ کہ سی ٹی ڈی ءَ پسوی ءَ دو اُرشکار جتگ انت –

جنگ بوتگیں مردمانی پجار امیر بخش ءُ اعجاز اعجاز احمد ناماں بوتگ انت –

اے مردمانی تہ ءَ اعجاز ءِ پجار ءَ پیش ءَ کنگ بوتگ کہ پاکستانی پوج ءَ بیست ءُ سَے اگست ءَ چہ منگچر ءَ زورانسری آوار جتگ ءُ بیگواہ کتگ بوتگ – کُشگ بوتگیں مردمے برات سعید احمد آئی ءِ آوار جنی ءِ وھد ءَ ھمے گوشتگ ات کہ شپ ءِ ادار دو ءِ وھد ءَ پاکستانی پوج ءِ کارمنداں مئے ھند منگچر وتی انگر ءَ کتگ ءُ مئے گس ءَ بیڑ برتگ ءُ منی برات زورانسری آوار جتگ ءُ گوں وت برتگ –

آئی ءَ پولیس ءِ گور ءَ ارزی داتگ ءُ گوشتگ کہ منی برات چدوپیسر ھم زورانسری آوار جنگ بوتگ پدا یل داتگ ھنو دوبر آوار جنگ ءُ بیگواہ کنگ بوتگ –

سی ٹی ڈی ءَ وتی دگہ درشانے ءِ تہ ءَ ٹاہ داتگ کہ جعفرآباد ءَ سلاہ بندیں گلانی دو مردم کُشتگ انت – بلے تنی وھدی آیانی پجار کنگ نہ بوتگ ءُ آیانی جون شال ءِ سول نادراھجاہ ءَ ایر انت –

بلوچستان ءَ سی ٹی ڈی ءِ کاروائی شکی نگاھاں چارگ بنت، گوست ءَ سی ٹی ڈی ءِ دیم پہ دیمی میڑ دروگ بوتگ انت –

اے میڑاں جنگ بوتگیں مردمانی تہ ءَ گیشتر مردم پیسر ءَ چہ زورانسری آوار جنی ءَ پد بیگواھیں بلوچ بوتگ انت- وھدیکہ باز براں مزھبی پاٹیاں سیادی داروکیں ھما مردم کہ پیش آوار جتگ انت ھما جنگ ءُ چگل دیگ بوتگ انت –

گوستگیں شپ ءَ شال ءَ ناشناسیں سلاہ بندیں مردماں سی ٹی ڈی ءِ اپسر سید محمد تیر باران کتگ کُشتگ –

آئی ءِ کوش ءِ زمہ واری بلوچ لبریشن آرمی ءَ منّ اِتگ – جارکش جیئند بلوچ ءَ وتی درشان ءِ تہ ءَ گوشتگ کہ اے ادارہ بلوچانی گسانی سر ءَ بیڑ برگ، مردمانی زورانسری آوار جنی ءُ دروگیں میڑاں بلوچان کشگ انت –

جیئند ءَ گوشتگ کہ اے مرد ءِ دست ھم ھمے ناشرکاریاں مان بوتگ کہ بی ایل اے ءِ سرمچاراں تیرباران کتگ ءُ کشتگ –

ایشیاء کپ دوھزار ءُ بیست ءُ سَے گڈی (فائنل) گوازی ءَ بھارت ءِ دیم ءَ سری لنکائے لیبیاں ھچ لیب کُت نہ کتگ، بھارت ءِ بالرانی جوانی گوازی ءِ سوب ءَ سرجمیں لیبیاں بس پنجاہ رن آؤرتگ ءُ کہ بھارت ءَ ھپتمی اورر ءَ بید وکٹانی تاوان ءَ ٹارگٹ پروشتگ –

کولمبو ءَ بوتگیں گوازی ءَ سری لنکا ءَ ٹاس کٹ اِتگ ءُ اولسر ءَ بیٹنگ کنگ ءِ شور کتگ کہ پہ آئی ءَ اے گران ءَ کپتگ –

بھارت ءَ تیزتریں بالر محمد سراج ءَ شش لیبی آؤٹ کتگ انت وھدیکہ یاردک پانڈیا سَے ءَ جسپریت ءَ یک لیبی ءِ آؤٹ کتگ –

اولی اوور ءِ سیمی بال ءَ جسپریت کوسل پریرا ءَ کے ایل راہل ءِ دست ءَ کیچ آؤٹ کنائیں اتگ کہ آئی ءَ ھچ رن جوڈ نہ کتگ – دومی اوور ءَ محمد سراج ءَ میڈان کتگ، کہ اشی ءِ گڈسر ءَ آئی لینڈرز ءَ ھپت رن جوڈ کتگ ءُ یک لیبی ءِ آؤٹ بوتگ – سیمی اوور ءَ جسپریت ءَ جوانی ءَ بالنگ کنان ءَ بس یک رن ءِ داتگ – چارمی اوور ءَ محمد سراج ءَ چار لیبی واتر دیم داتگ انت، کہ آئی اولی بال ءَ پاتھم ءَ دو رن داتگ، سیمی بال ءَ سدیرا ایل بی ڈبلیو ءَ آؤٹ کتگ ءُ دیمے بال ءَ چارتھ ھم آؤٹ کتگ بلے پدا ھم آئی ءَ ھیٹرک کت نہ کتگ ءُ اوور ءِ گڈی بال ءَ دھننجایا ھم آؤٹ کتگ ءُ واتر دیم داتگ –

سری لنکا ءِ شھر کولمبو ءَ بوتگیں اے گوازی ھئور سوب ءَ اوشت ءِ آماچ بوتگ بلے پدا گوازی بندات کنگ بوتگ –

ھمے وڈ بھارت ءِ محمد سراج ءَ بیست ءَ یک رن داتگ ءُ شش لیبی آوٹ کتگ انت ، ہاردیک ءَ سَے رن داتگ ءُ سَے وکٹ کپتگ وھدیکی جسپریت ءَ بیست ءُ سَے رن داتگ ءُ یک وکٹ ءِ گپتگ –

بھارت ءِ بیٹسمیناں ھپتمی اوور ءِ اولی بال ءَ بید وکٹانی تاوان ءَ پنجاہ ءُ یک رنانی ٹارگٹ پروشتگ –

بھارت ءِ اوپنر شبمن گل ءَ بیست ءُ ھشت ءُ ایشان کشن ءَ بیست ءُ سَے رن جوڈ کتگ ءُ سری لنکا پروش داتگ ءُ ایشیاء کپ وتی نام ءَ کتگ – اے بھارت ءِ ھشتمی رند انت کہ ایشیا کپ ءَ وتی نام ءَ کنگ ءَ انت –

بلوچستان ءِ دمگ کیچ ءَ پاکستانی پوج ءَ یک مردمے زورانسری آوار جتگ ءُ بیگواہ کتگ-

بیگواہ کنگ بیتگیں مردم ءِ پجّار مستری صابر ء امید نام ءَ چہ بیتگ-

اِھوالکارانی گوشگ اِنت کہ اے مرد کیچ ءِ دمگ چہ ھوشاپ تل ءَ پاکستانی پوج ءَ ھمے ماہ ءِ یک ستمبر ءِ شپ ءَ بیڑبرتگ ءُ آوار جنگ ءَ پد بیگواہ کتگ انگت بیگواہ ءَ اِنت-

کھول رِد ءَ مستری صابر ءِ درگت ءَ آیاں ھچ وڑیں سرپدی نیست اِنت کجام جرم ءَ چست کتگ ءُ بیگواہ کتگ –

زانگ بہ بیت بلوچستان ءِ جتاجتائیں دمگاں پاکستانی پوج ءُ چیریں ادارھانی آوار جنی ءِ دْرچ یکشلہ برجاہ ءَ اِنت دومی نیمگ ءَ ڈیرہ بگٹی ءَ ھپتگے ءَ گیش اِنت کہ پاکستانی پوج ءِ زوراکی یکشلہ برجاہ ءَ اِنت ھمے میان ءَ بازیں مردمے زورانسری آوار جنی ءِ نشانگ کنگ بیتگ اَنت-

روکپتی بلوچستان ءِ دمگ ایرانشھر ءَ کسانیں تپلے ءَ آکسیجن ءِ آسراتی ءِ نہ رسگ ءَ تپل ءَ وتی ساہ داتگ اَنت-

اھوالانی رد ءَ ایرانشھر ءَ گوستگیں روچاں یک ماتے ماں نادراہ جاہ ءَ چُک ءُ مات بوتگ ءُ چریشی ءَ چہ آئی ءِ زھگ چار روچ ءِ زندگ بوگ ءَ پد بیران بیتگ-

اھوالانی رد ءَ زھگ ودی بوگ ءِ وھد ءَ جاندراہ بیتگ ءُ آئی ءِ وزن چار کلو بیتگ ءُ آ ڈاکٹرانی گوشگ ءِ سر ءَ آکسیجن ءِ سر ءَ کنگ بیتگ-

اھوالانی رد ءَ تپل گوستگیں چار شمبے ءِ روچ ءَ ودی بیتگ ءُ آئی ءِ آکسیجن ءِ جنگ ءَ پد تپل ءِ جاور ناگیگ بیتگ اَنت ءُ چریشی ءَ پد تپل آئی سی او واڑ ءَ برگ بیتگ-

اھوالانی رد ءَ اود ءَ ڈاکٹرانی نادلگوشی ءِ سبب ءَ تپل ءَ وتی ساہ داتگ انت –

زانگ بہ بیت روکپتی بلوچستان ءِ مِکیں نادراہ جاھاں گیشتر آسراتی نہ بوگ ءِ برابر اِنت چریشی ءِ سبب ءَ چوشیں کیس باز کم گر ءُ دار کنگ بنت اِنت-

بلوچستان لبریشن فرنٹ ءِ جارکش میجر گوھرام بلوچ ءَ ٹیلی گرام چینل ءَ شنگ کرتگیں درشان ءَ پاکستانی لشکر ءِ سر ءَ بیتگیں اُرش ءِ زمہ واری من اتگ-

جارکش ءَ گوشتگ سرمچاراں 16 ستمبر ءَ شمبے ءِ بیگاہ ءِ چار ءُ نیم ءَ زورگریں پاکستانی لشکر ءِ سر ءَ اُرش کُرتگ ءُ یک کارمندے کُشتگ۔

آئی ءَ گوشتگ سرمچاراں آواران ءِ پیراندر ءَ کینرہ ءَ برجاھیں زورگریں پاکستانی لشکر ءِ پانگس ءِ سر ءَ گوں اسنائپر ءَ نشانگ کُرتگ ءُ دُژمنیں لشکر ءِ یک کارمندے کُشتگ ءُ پد ءَ دُژمن ءِ پانگس ءِ سر ءَ گوں گرنیڈ لانچراں اُرش کُرتگ۔اُرش ءَ دُژمنیں لشکر ءِ یک کارمندے مُرتگ ءُ دو ٹپی بیتگ اَنت۔

جارکش ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ داں زورگپتیں بلوچستان ءِ آجوئی ءَ زورگریں دُژمنیں لشکر ءُ آئی ءِ زورگری شوربندیانی سر ءَ بی ایل ایپ ءِ اُرش برجاہ بنت۔

متھدہ عرب امارات ءَ پبلک پراسیکیوشن ءَ دونمبریں زر ءِ سکینڈل ءَ ھواریں ٹولی ءِ دزگیری ءِ پرمان دیگ بیتگ-

الامارات الیوم ءِ رد ءَ امارات ءَ یک ٹولی ءِ سوشل میڈیا ءِ کمک ءَ دونمبریں زراں اسلی زر کنگ ءُ تالان کنگ ءَ اَنت – زر ءِ مٹ کنگ ءَ پنجاہ دراد ھم ریایت دیگ بوگ ءَ اِنت-

پٹ ءُ پول ءَ سرپدی رس اتگ کہ اے پنجاہ درسد ریایت ءِ سر ءَ دونمبریں زر ءِ بھا کنگ ءَ ھواریں ٹولی سوشل میڈیا ءَ نَپ چست کنگ ءَ اَنت-

لس مھلوک ٹَگانی پنجگ ءَ کپ ایت ءُ رد وارت اِنت ءُ ایجنٹ ھم اے دابیں کرداں پیلو کنگ ءَ نپ چست کنگ ءَ اِنت-

پبلک پراسیکیوشن ءَ شھری ءُ درملکیاناں گوشتگ کہ آ زر ءِ مٹ کنگ ءَ پیسر پرمٹ ھولڈز ءَ سرپدی بہ زور اَنت – ءُ سوشل میڈیا ءَ دروگیں ٹگانی باپار ءِ پنجگاں وت ءَ بہ رکین اَنت-

آئی ءِ رد ءَ اے مردم شپ ءِ شپ سیٹ بوگ ءِ لالچ ءَ لس مردماں سبزیں باگ ءَ پیشدار اَنت ءُ آیاں برباد کنگ ءَ اَنت-

بلوچ اسٹوڈنٹس فرنٹ ءِ بنجاھی جارکش ءَ وتی جار ءِ تہ ءَ دل پدردی درشان کنان ءَ گْوشت کہ بلوچی زبان ءِ اَھد سازیں آشوبی ءُ راجدوستیں شائر واجہ مبارک کازی ءِ بیرانی پہ بلوچ راج ءَ یک مزنیں تاوانے، شائری ءُ لبزانک ءِ پِڑ ءَ آئی ءِ ھورکیں جاہ ءِ پُر بوگ ءَ سدانی سال درکار بیت۔ تاں جھان ھست آئی ءِ کْوھیں کِرد سرڈگار ءِ کْوہ ءُ کُوچگ، جنگل ءُ گیابان، شَھر ءُ میتگ، دمگ دمگاں مان اِیت۔ بلوچ راج آئی ءِ کْوھیں کِرد ءَ کدی شموش اِت کرت نہ کنت، ما آئی ءِ کْوھیں کِرد ءَ سِتک شانی ندر کن اَیں۔

آئی ءَ تران کنان ءَ گْوشت کہ مبارک کازی 24 تاکشان ءَ ماں کراچی ءَ ودی بوتگ، آئی ءِ واجھیں پِت ءِ نام کُھدہ امان اللّہ اِنت، نمیرانیں مبارک کازی ءَ وتی بنداتی وانگ وتی ھنکین پسنی ءَ دربرتگ، دیمتر ءِ وانگ ءِ ھاتر ءَ ایس ایم شاھدربرجاہ ءَ داھلہ ئِے زرت، بلے گزرانکی نِزوری ءِ سوب ءَ آ وتی وانگ یلہ کنت ءُ بلوچستان Fisher Harbor کارگس ءَ بستار ئے Lab assistant کار کنت۔ دیمتر ءَ واجہ کازی ساھب وتی وانگ ءِ برجاہ دارگ ءِ ھاتر ءَ پرائیوٹ انٹر کنت ءُ بی اے واست ءَ اردو آرٹس شھدربرجاہ ءَ داخلہ زور اِیت۔ اِے وھد ءَ آ گْوں لبزانک ءَ ھمگرنچ بیت، لبزانکی مراگشاں بھر زور ایت، دیمتر ءَ واجہ بلوچستان مزن شھدربرجاہ ءَ IR ءِ کارگس ءَ داخلہ زور اِیت۔ وانگ ءِ وھداں آ بلوچ ورنا وانندہ گل ءَ ھوار بیت۔ ایم اے سرجم کنگ ءَ پد واتر کیت پسنی ءَ Fisher Harbor کارگس ءَ Assistant Finance جوڑ بیت۔ اِے وھداں واجہ پسنی ءَ گْوں آ دگہ بلوچی ءِ نامداریں شائر منیر مومن، انور ساھب ھان ءَ ھور بیت ءُ لبزانکی شنگکار مجلس ءَ جوڑ کن اَنت واجہ کازی آئی ءِ سروک جوڑ بیت۔ واجہ ءَ بلوچی شائری ءِ پِڑ ءَ بازیں کتاب نبشتہ کنت، آئی ءِ اولی کتاب زِرنوشت اِنت، ھانی منی ماتیں وتن، چولاں دریا یل داتگ، منی اھد ءِ گم ءِ کسّہ، مرگ پہ کودوھاں رپتگ اَنت، جنگل چِنچو زیبا اِنت، شاگ ماں سبزیں ساوڑ ءَ، آپ سماک ءَ جتگ، باریں منی باریگ کجام اِنت ءِ سرھالانی سر ءَ شائری کتاب نبشتہ کرتگ ءُ شنگ بوتگ اَنت۔

آئی ءَ دیمتر ءَ تران کنان ءَ گْوشت کہ واجہ مبارک کازی ءَ را گْوں وتی ایردستیں سرڈگار ءُ لگتمالیں بلوچ راج ءَ بے کساس مِھر بوتگ، آئی ءَ وتی شِئرانی تہ ءَ بلوچ سرڈگار ءِ ایردستی، بلوچ ءِ بزّگی، واری درشان کرتگ اَنت۔ آئی ءَ بلوچستان ءِ کوہ، کوچگ، شَھر ءُ دیار، جنگل ءُ گیابان، میتگ، درمک ءُ در نازینتگ اَنت ءُ بلوچ ءُ بلوچستان ءِ اکس ءَ نبشتانکی ءَ دروشم ءَ لبزانی تہ ءَ کماتگ ءُ درشان کرتگ اَنت، آئی ءِ آشوبی شِئراں بلوچ راجی جُنز ءَ را مھکم کرتگ ءُ ورنایاناں گیش توکل ءُ ھاٹیگ داتگ۔ واجہ کازی ءَ وتی سرجمیں زند ءَ بلوچ ءُ بلوچستان نازینتگ، آ ھر سکّی ءُ سوری ءَ بلوچ راج ءَ گْوں ھمگرنچ بوتگ، آ دو رَند ءَ استان ءِ زندانانی تہ ءَ بندیگ کنگ بوتگ، آئی ءَ وتی ورنائیں پرزند ڈاکٹر کمبر مبارک ءَ را ھم پہ بلوچ سرڈگار ءِ ھاتر ءَ ندر کرتگ۔ کازی ءِ دیمونیانی دِرچ سک مزن اِنت کساس کنگ نہ بنت۔

بلوچ اسٹوڈنٹس فرنٹ ءِ بنجاھی جارکش ءَ وتی دل پدردی درشان ءِ گُڈ سر ءَ واجہ مبارک ءَ را ستک شانی ندر کرت ءُ گْوشت کہ کازی ءِ کِرد کدی شموشگ نہ بیت، تاں جھان ھست آئی ءِ کْوھیں کرد بلوچستان ءِ کْوہ ءُ کوچگ، دمگ دمگاں یات کنگ بیت۔ ما آئی ءِ کْوھیں کرد ءَ گْوں گرانبھائیں لبزاں سِتک شانی ندر کن اَیں۔

بلوچ لبریشن آرمی ءِ جارکشّ جیئند بلوچ ءَ ماں رسانکدر ءَ وتی شِنگ کُتگیں یک درشانے ءِ تہ ءَ گْوشتگ کہ بلوچ لبریشن آرمی ءِ سرمچاراں مرچی شال ءَ زورگریں پاکستانی پوج ءِ جھلی پوج سی ٹی ڈی ءِ یک آفیسرے ءِ سر ءَ تیرگواری کُتگ ءُ کُشتگ ۔

آئی ءَ گْوشتگ کہ بی ایل اے ءِ سرمچاراں جیل روڈ ، ہدّہ ءِ دمگ ءَ سی ٹی ڈی ہیڈ کانسٹیبل سید محمد جھمِنند ء اسپنی روڈ ، مُبارک چوک شال تیرگواری کُتگ ءُ کُشتگ ۔

جارکشّ ءَ گْوشتگ کہ ھمے مردم زورگریں پاکستانی پولیس ءِ ھمگرنچیں پوج سی ٹی ڈی ءَ گوں بندوک بُوتگ-

ھمے پوج بلوچانی لوگانی سر ءَ بیڑ برگ ، مردماں دلسیاہ کنگ ، زورانسری ءَ گار ءُ بیگواہ کنگ ءُ دُروگیں میڑاں مردمانی کوش ءِ وڑیں جرم ءَ ھوار بیتگ۔

آئی ءَ گْوشتگ کہ اے کارندہ میارباری سَوَب ءَ بی ایل اے ءِ نشانگ لِسٹ ءِ تہ ءَ بُوتگ کہ آ مرچی سرمچاراں آئی ءِ گُڈّی مِنزل ءَ رسینتگ ۔

جارکشّ جیئند بلوچ ءَ گْوشتگ کہ بلوچ لبریشن آرمی اے اُرش ءِ زمہ واری ءَ منّ اِیت ءُ اے سوگِند ءِ پیلو ءَ کنت کہ بلوچستان ءَ چہ زورگریں پاکستانی پوج ءِ سرجمی ءَ دراھگ ءَ تاں مئے اُرش برجاہ بنت ۔

پاکستانی فوج نیمگ ءَ چہ ڈیرہ بگٹی ءَ لَس مھلوک سر ءَ لشکر کشی ءُ بازیں مردمانی زورانسری بیگواہ کنگ ءِ بگیری ءَ بلوچستان ءِ بُنجاھی شھر شال ءَ زھرشانی کنگ بیتگ-

گیشیں ھالانی رِد ءَ بلوچ یکجھتی کمیٹی ءِ نیمگ ءَ چہ بلوچستان ءِ دمگ ڈیرہ بگٹی ءَ گوستگیں بازیں روشاں چہ بندات بیتگیں پاکستانی فوج ءِ لشکر کشی ءُ زوراکی ءِ بگیری ءَ شال ءَ روانکے کشگ بیتگ-

زھرشانی کنوکاں ڈیرہ بگٹی ءُ کش گوراں پاکستانی فوج ءِ زُلم ءُ زوراکی لشکر کشی ءِ بگیری ءَ تُرندیں نارا جتگ-

زھرشانی کنوکاں لوٹ کتگ کہ ڈیرہ بگٹی ءَ پاکستانی آرمی زُلم ءُ زوراکی ءَ بند بکنت زورانسری آوار جتگیں مردماں زوت یل بکنت-

زھرشانی کنوکانی تہ ءَ بلوچ یکجھتی کمیٹی، نودبر گلانی باسک، بلوچ وومن فورم ءَ ھوار ھرچ پڑ ءِ مردم ھوار بیتگ اَنت ءُ زھرشانی ئیں روانک ءَ چہ تران کنان ءَ ڈیرہ بگٹی ءَ برجاھیں پاکستانی فوج ءِ زوراکی ایر جتگ ءُ بلوچستان ءَ لشکر کشی ءِ ھلاس کنگ ءِ لوٹ کتگ-

زھرشانی ءَ چہ ترانکارانی گْوشگ اِنت ھمے ھپتگ ءَ ڈیرہ بگٹی ءَ پاکستانی پوج نیمگ ءَ بندات کُتگیں لشکر کشی جتاجتائیں دمگاں برجاہ ءَ اِنت-

‎ھمک ڈیھ ءُ ایردستیں راجانی تہا راجی شاعر ، زانتکار ءُ کواسانی یک جتائیں ارزشتے بیت ءُ زمینی راستیانی بنیات ءَ وتی کرد ءَ پیلو کن اَنت بلے درد واریں زانتکار ھما بیت کہ وتی زمین ءِ سرا نندوک بیت ءُ زوراکیانی دیمپانی ءَ کنت ، لس مھلوک ءِ درد ءَ ماریت ءُ وتی ند ءِ تاگت ءَ زمین ءِ سرا بوھوکیں زلم ءُ زوراکیاں ھر ھند ءُ دمگاں سر کنت ، بلوچ ڈیھ چہ اے وڑیں کواساں سنٹ نہ بوتگ ءُ نہ اِنت ، عطا شاد ، سید ظہور شاہ ہاشمی ،صبا دَشْتیاری ،واجہ مبارک کازی ءُ دگہ بازیں زانتکار ھمے پلسپہ ءِ مُساپر بوتگ اَنت ءُ راجدپتر ءِ تاکانی تہا نمیران اَنت ۔

‎مبارک کازی ءِ بیرانی پہ بلوچ لبزانک ءُ بلوچ راج ءَ مزنیں تاوانے ، بلوچ انچیں دور ءِ تہا گوزگ ءَ اِنت کہ کازی ءِ وڑیں گہگیری شائر ءِ ودی بوھگ ءَ کرنے ءِ پکار اِنت ۔واجہ مبارک کازی شاعری ءَ آوار سْیاسی کارانی تہا مُدام اولی سرپ ءَ اوشتوک اَت ءُ آئی ءَ مُدام بدواہ بیھار داتگ ، کازی ءَ باز دیستگ اَت زلم ءُ زوراکی ،زندانی بلے آ پیر مرد چوں سْیاجھی ءِ کوہ ءَ تمرد اَت او آئی ند ھچبر اوشت ءِ آماچ نہ بوتگ، واجہ ءَ وتی شاعری ءِ تہا ھر ھند ءُ دمگ ءِ گالوار کارمرز کُتگ اَنت آ ایوک ءَ مَکُّران نہ اَت آ سرجمیں بلوچستان ءَ اَت ،کازی ءَ وتی شاعری ءِ تہا بلوچستان ءِ سرجمیں اکس پیش داشتگ ، بلوچ ءِ دود ءُ ربیدگ ، زالبول ءِ کرد ، مھر ءِ ارزشت ، جنگ ءِ ارزشت ، واجہ کازی ءَ مُدام وتی شاعری ءِ تہا بلوچ مات ءُ زالبول ءِ یک مھکمیں کردار ءِ پیش داشتگ ،کازی جاہ ءِ گوشیت کہ من بلوچ ماتے آں پہ بداں شہماتے آں ۔

مبارک کازی بلوچی زبان ءِھما شاعر اِنت بلوچ راج ءَ آئی زند ءَ شرپ ءُ ازت ءِ داتگ واجہ شاعرے ءَ ابید بلوچ راج ءِ گہگیری جہد کار ءِ بوتگ کازی وتی گُڑی وھد ءَ تک پہ بلوچ ءَ آشوبی شعر گُشتگ ءُ وتی سرجمیں زِند پہ بلوچ ءُ بلوچستان ءَ ندر کُتگ اَت۔

واجہ ءَ وتی شعراں وتی راج ءَ را سکین داتگ ءُ بلوچ ماتان ءَ شعری دروشم ءَ دلبڈی داتگ۔ مروچی واجہ مبارک کازی مئے میان ءَ ساڑی نہ اِنت بلے آئی ءِ گُشتگیں شعر تاں ابدی مئے رہشونی ءَ کن اَنت۔