اگاں من ءَ یا بی وائی سی ءِ کجام ھم باسکے ءَ چیزے بوت گڑا زمہ وار پاکستانی ریاست انت- ڈاکٹر ماہ رنگ بلوچ

بلوچ یکجھتی کمیٹی ءِ رھشون ڈاکٹر ماہ رنگ بلوچ ءَ شنگ کتگین درشان ءَ گوشتگ یک ھزار ءَ گیش بی وائی سی ءِ منوک دزگیر کنگ بیتگ اَنت-

آئی ءَ گوشتگ اگاں من ءَ یا بی وائی سی ءِ کجام ھم باسکے ءَ چیزے بوت گڑا پاکستان ءِ ریاست ءَ پسو دیگی انت-

آئی ءَ گوشتگ بیست ءُ ھشت جولائی ءَ گوادر ءَ بلوچ راجی مچی ءِ درگت ءَ پرامنیں مچی کنگ بیتگ بلے ریاست ءِ نیمگ ءَ زوراکی کنگ ءُ آئی ءِ دارگ ءِ جھدے کنگ – سَے روچانی توک ءَ مئے یک ھزار سنگت دزگیر بیتگ انت ءُ ھچ ھال نیست کجا انت –

آئی ءَ گوشتگ چار روچاں گوادر ءَ کرفیو ءُ نیٹ ورک بند کنگ بیتگ ءُ ڈیتھ اسکواڈ ءِ کارندہ دمک دمک ءَ لس مھلوک ءَ گرگ ءُ جنگ ءَ انت ءُ گوادر ءِ مچی ءَ دومی رند ءَ کریک ڈاؤن ءِ دیمپانی کنگ کپتگ پوج گوں مارا پر ایمنیں گپ ءُ تران ءَ ابید زوراکی کنگ ءَ لگ اتگ مارا ھچ سرپدی نیست انگ چنکس زدگ بیتگ انت ءُ زھرشانی ءِ وھد ءَ شھید بیتگیں مردمانی لاش ھسپتالاں ایر انت ءُ مارا روگ ءَ نیلگ انت-

من دزبندی کن اں سرجمیں زیردستیں راجاں بلوچ نسل کشی ءِ ھلاپ ءَ بیا انت ءُ بلوچ یکجھتی ءِ ھمراھداری ءَ بہ کن انت-