TBP Balochi

بلوچی زبان ءِ نامداریں مھر ءُ آشوبی شائر مبارکیں کازی ماں پسنی ءَ ہائیر سیکنڈری سکول ءَ نماز جنازہ ءِ وانگ ءَ پد ما مانشجاہ ءَ برگ ءُ کل ءُ کسارت کنگ بوتگ، بلوچ اسٹودنٹس ایکشن کمیٹی ءَ سَے روچ ءَ پُرس دارگ ءِ جار جتگ وھدیکہ بلوچ رھشون ڈاکٹر اللہ نزر بلوچ ، راجکاریں رھشون ءُ نودربراں ھوار ھر تک ءُ پھناتاں سیادی داروکیں مردم ءُ گلاں مبارک کازی ءِ اناگتی بیرانی ءَ دلپدردی درشان اِتگ ءُ آئی ءَ را ستک شانی درشان کتگ –

ھستیں وھدے بلوچی زبان ءِ نامداریں شائر مبارک کازی ءِ نماز جنازہ آئی ءِ بنکی ھنکین پسنی ءَ وانگ بوتگ – آئی ءِ نماز جنازہ ءَ مزنیں کچے ءَ مردماں بھر زرتگ –

مبارک کازی بلوچ بیست ءُ چار دسمبر سال نوزدہ سد ءُ پنجاہ ءُ شش ءَ ماں پسنی گوادر ءَ ودی بوتگ آئی ءِ کماش نام کھدہ امان اللہ بوتگ – آئی ءَ وتی بنداتی وانگ چہ بنکی ھنکین ءَ دربرتگ ءُ پدا سال نوزدہ سد ءُ ھپتاد ءُ شش ءَ کراچی ءَ شتگ ءُ سندھ مسلم لاء کالج ءَ داکلہ زرتگ ـ لھتے وھد ءَ رند وانگ ءِ یلا دیگ پد واتر کراچی ءَ شتگ ءُ پرائیوٹ چکاس داتگ ءُ انترمیڈیٹ پاس کتگ –

کازی ءَ وتی وانگ برجاہ داران ءَ بی اے کتگ ءُ سال نوزدہ سد ءُ ھشتاد ءُ سَے ءَ اردو آرٹس کالج ءِ دگری گپتگ ءُ پدا نوزدہ سد ءُ ھشتاد ءُ شش ءَ شال ءَ بلوچستان شھدربرجاہ ءَ بین الاقوامی تعلقات (آئی آر ) تہ ءَ ایم اے کتگ ـ پدا کازی وتی بنکی ھنکین پسنی ءَ اتکگ ءُ فش ہاربر پسنی ءَ ڈائریکٹر بوتگ ـ کازی ھما بلوچستان ءِ نامداریں مردمانی رم ءَ ھوار انت، آ وتی راجدوستی ءُ لبزانکی کارانی پجارگ بیت ـ آئی آشوبی شئیر نبشتگ کنگ ءَ پد بندیگ ھم کنگ بوتگ پرچا کہ آئی ءَ بلوچ راج ءِ ھک ءَ سرکار ءِ بگیری ءَ آشوبی شئیر نبشتگ –

نامداریں شائر مبارک کازی ءِ اناگتیں بیرانی ءِ درگت ءَ بلوچ اسٹودنٹس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشانے ءِ تہ ءَ آئی ءِ بیرانی ءَ دلپدردی درشان اِتگ ءُ گوشتگ کہ بلوچ ڈیھ چہ یک ابدمانیں راجی ءُ گھگیریں شائرے ءَ زبھر بوت – اے دلپدردیں ھالءِ گوما گل سئے روچی موتکے ءِ جار ءَ جنت –

جارکش ءَ وتی درشان ءِ تہ ءَ گوشتگ کہ ھرچ ڈیھ ءُ زمینے ءَ راجی شائر، لبزانت ءُ ایدگہ پڈانی زانتکار ءُ کواسانی جتائیں ارزشت ءُ کردے بیت- ھرچ باسمائیں راجی زانتکار ءُ لبزانت وتی چاگرد ءُ ڈیھ ءِ راستیانی بنیاد ءَ وتی زمہ واریاں گیشین ایت ءُ وتی کردے پیلو کنت۔ اے درگت ءَ بلوچ ڈیھ ھم سَنٹ نہ بوتگ ءُ نہ انت – خیربخش مری ءُ صبادشتیاریءِ پلسپہ ءِ چیدگ مبارک کازی اوں ھمے سرپ ءَ نمیران بوت کہ آئی ءِ شائری وت وتی پلسپہءِ درانگازی ءَ کنت –

جارکش ءَ گوشتگ کہ بلوچ ڈیھ ءُ راجی گہگیری ءِ مزن نامیں شاعر ءُ زانتکار مبارک قاضی ءِ ناگتیں بیرانی پہ بلوچ ڈیھ ءُ گہگیری ءِ لبزانکءَ مزنیں تاوانے ۔ مبارک قاضی نہ تہنا بلوچی زبان ءِ مزن بالادیں شاعر ءُ لبزانتے اَت بلکیں بلوچ راج ءِ باسمائیں جہگیرے ات ھم ۔ بلوچ ڈیھءِ جاورالانی سرجمیں توارے ات۔ آئیءِ شاعری سرجم گوں وتی ڈیھ ءُ ڈگارءِ راستیں جاورہالاں پیوست ات۔ ھستیں اھد ءِ ھما کرداراں چہ یکے اَت کہ ھرچ وڑیں زوراکیانی دیم ءَ اوشتوک ات ءُ پہ بدیں دژماناں آئیءِ آشوبیں توار شہمات ءُ زِبرّیں ھکّلے ات۔ آئیءَ مدام وتی شائریءَ تچکیں راستیءِ پدرائی کُت ءُ بلوچستان ءِ جہگیری کت۔بلوچ گہگیری شائری ءُ راجی پِگر ءَ چکاریں راجی بامرد بلوچستان ءِ بن دپتر ءِ تاکاں نمیران بوت –

ھمے درگت ءَ بلوچ نیشنل مومنٹ ءِ بنجاھی جارکش ءَ وتی دلپدردی درشان ءِ تہ ءَ گوشتگ کہ مبارک کازی ءِ بیرانی ءَ سرجمیں راج دلپدرد اِنت۔ مبارک کازی راجی لچہ کارے اَت ، آئی ءَ گوں وتی لچہ کارے ءَ بلوچ راج ءِ مارشتانی جھگیری کرتگ۔ پہ زبان ءُ ندانک ( ادب) آئی ءِ کرد ءُ کارانی سر ءَ بی این ایم پہ آئی ءَ ستک شانی نْدر کنت۔

آئی ءَ گْوشتگ مبارک کازی ءَ گوں وتی لچہ کاری ءَ راج ءِ راھشونی کرتگ۔ آئی ءِ ند دو زھیں زھمے ءِ پیم ءَ اَت ۔ نیمگے آئی ءَ گوں وتی لچہ کاری ءَ زورگریں پاکستان ایر جتگ ءُ راجی زْرمبشت ءِ پلہ مرزی کرتگ ، دومی نیمگ ءَ چاگردی ھرابی ءُ چاگرد ءِ کلپیں سیاسی ءُ دگہ تک ءِ مردمانی بگیری ءَ تچکے ءَ نبشتہ کرتگ۔ آئی ءِ لچہ کاری ءِ سر ءَ آئی ءِ سر ءَ پہ کوش ءَ ارش کنگ بیتگ- آزار دیگ ءُ زندان ءَ بند کنگ بیتگ بلے آ چہ وتی لیکھاں بوگے ھم پد نہ کنز اتگ ءُ ناں کہ آئی ءِ ھاٹیگ ءِ تہ ءَ کمی اتکگ-

جارکش ءَ گْوشتگ آئی ءِ راجدوستیں لیکھانی پد ءَ آئی ءِ چک کمبر کازی بلوچ آجوئی ءِ جھد ءَ سرمچارانی ھمراہ بوت ءُ پندلے ءِ پد ءَ دژمن ءِ چیریں کارداراں شھید کرت۔پہ واجہ مبارک کازی ءَ اے جھلیں ٹپے اَت بلے آئی ءَ پہ راجی آجوئی ءَ وتی چک ءِ دیمونی سگ ات ءُ وتی چک ءِ شھیدی ءَ مدام پھر بستگ اَت –

بلوچی زبان ءِ شائر منیر مومن ءَ دلپدردی درشانتگ ءُ گوشتگ کہ کازی ساب ھمے کساس ءَ زندگیں مردمے اَت کہ آئی ءِ بیران بوگ ھچ باور نہ بوگ ءَ انت –

کازی اے تئی زوراکی اِنت کہ تو جھان بدل کُت- بلئے تئی کِرد ءِ رنگ ھمینچو باز ءُ زندگ اَنت ، دل نہ منّیت کہ تو اچ مئے نیام ءَ در کپتگ ئے –

بلوچ راجی رھشون ڈاکٹر اللہ نزر بلوچ نبشتہ کنت کہ آجوئی ءِ جھد ھر وھد ءَ تازہ انت (مبارک قاضی)
کازی اھد سازیں شائر ءُ راجی جھد ءِ سروک ات –

بلوچ سوشل میڈیا ایکٹوسٹ پیردان بلوچ آئی ءِ شئیرے نبشتہ کنت
“شاریؔ ءِ ارواہ شْدریں شپ چراگے بْرمشؔ دنت،ما اوں کازی یک ءُ دو پُلّ رھگْوزی زرشان کُتیں” کہ وانگ ءِ وھد ءُ زمانگ ءَ جنرل ضیا ءِ ترندیں زوراکیانی روچاں مچ جیل ءَ زند گوازینوک ءُ جنرل مشرف وھد ءَ تربت سنٹرل جیل ءَ بند ءُ ازیت اوپار کنوکیں آشوبی شئر گشوکیں کازی ءَ اے جھان یل داتگ –

سید ہاشمی ریفرنس کتابجاہ ،کراچی ملیر ءَ وتی دلپدردی درشان ءِ تہ ءَ نبشتگ کہ؛ ملکموت مستیں لیڑہے بوتیں برتیں ماں کَور ءَ جور چارینتیں
بلوچی زبان ءِ نامداریں شاعر واجہ مبارک قاضی ءِ بیرانی پہ بلوچی زبان ءُ بلوچ راج ءَ زنڈیں تاوانے ءُ داں صداں سالاں کازی ءِ کَنڈ ءَ کس گپت نہ کنت-

بلوچی میوزک پروموٹرز سوسائٹی دلپدردی درشان اِتگ کہ بلوچی زُبان ءِ مزن نامیں شاعر واجہ مُبارک قاضی بیران بُوت۔ بلوچی لبزانک ءِ پِڑ ءَ مُبارک کازیؔ یک اھدے ءِ نام اَت۔ واجہ مبارک کازی ءِ بیرانی پہ بلوچی زُبان ءُ لبزانک ءَ مزنیں تاوانے۔ ما ، واجہ مُبارک کازی ءِ اے اناگتی مرگ ءَ بژن ءُ ارمانیگ ایں ءُ آئی ءِ کھول ءِ گماں شریدار ایں-

ڈاکٹر مھرنگ بلوچ وتی دلپدری درشان ءِ تہ ءَ نبشتہ کنت کہ نامداریں شائر ءُ بلوچی لبزانت مبارک کازی مار ءَ چہ جتا بوتگ کہ آئی ءَ وتی زند پہ بلوچی زبان، دود ءُ پہ لبزانک ءَ کربان کتگ، آ یک نمیرانیں زھگے ءِ پت ءُ بلوچ زرمبشت ءَ گوں بندوک بوتگ آ یک گوستانکی مردمے نام ءَ یات کنگ بیت –

بی این ایم ءِ رحیم بلوچ نبشتہ کنت کہ ‏بلوچی زبان ءِ نامداریں شائر ھدامرزی واجہ کازی مبارک وتی بے مٹیں شائری، قوم دوست وانسان دوست،سیاسی و چاگردی پگر و ھزمتانی برکت ءَ نمیران انت – پہ بلوچ قوم و بلوچی زبان و لبزانک ءِ دیمروی ءَ آئی ھزمت داں کرنانی کرن شموشگ نہ بنت –

گیشیں سرپدی ءِ ھاتر ءَ اے لنک ءَ پچ بہ کن ات-

پاکستان ءِ ناشرکار کاریں پوج کہ سی ٹی ڈی ءِ نام ءَ زانگ بیت آئی ٹاہ داتگ کہ بلوچستان ءِ دمگ ھزدار ءُ جعفرآباد ءَ دو جتائیں میڑاں چار مردم جنگ بوتگ انت –

سی ٹی ڈی ءَ ٹاہ داتگ کہ ھزدار ءَ سی ٹی ڈی ءُ سلاہ بندانی میان ءَ میڑے بوتگ ، میڑ ءَ سلاہ بندانی دو مردم جنگ بوتگ انت –

ھمے ٹاہ دایگ بوتگ کہ ھزدار ءِ دمگ کھٹان ءَ سی ٹی ڈی ءِ سر ءَ اُرش کنگ بوتگ کہ سی ٹی ڈی ءَ پسوی ءَ دو اُرشکار جتگ انت –

جنگ بوتگیں مردمانی نام امیر بخش ءُ اعجاز احمد گوشگ بوگ ءَ بوگ ءَ انت – اے ھم ٹاہ دیگ بوتگ کہ آیانی گور ءَ سِی تیری ءُ دز بمب دستیگ کتگ انت –

زانگ بہ بیت اعجاز پاکستانی پوج ءَ بیست ءُ سَے اگست ءَ چہ منگچر ءَ زورانسری آوار جتگ ءُ بیگواہ کتگ بوتگ – کُشگ بوتگیں مردمے برات سعید احمد آئی ءِ آوار جنی ءِ وھد ءَ ھمے گوشتگ ات کہ شپ ءِ ادار دو ءِ وھد ءَ پاکستانی پوج ءِ کارمنداں مئے ھند منگچر وتی انگر ءَ کتگ ءُ مئے گس ءَ بیڑ برتگ ءُ منی برات زورانسری آوار جتگ ءُ گوں وت برتگ –

آئی ءَ پولیس ءِ گور ءَ ارزی داتگ ءُ گوشتگ کہ منی برات چدوپیسر ھم زورانسری آوار جنگ بوتگ پدا یل داتگ ھنو دوبر آوار جنگ ءُ بیگواہ کنگ بوتگ –

سی ٹی ڈی ءَ وتی دگہ درشانے ءِ تہ ءَ ٹاہ داتگ کہ جعفرآباد ءَ سلاہ بندیں گلانی دو مردم کُشتگ انت –

سی ٹی ڈی ءِ جارکش ءِ رِد ءَ جعفرآباد ءَ سی ٹی ڈی ءُ شکی ایں مردمانی میان ءَ میڑ بوتگ ءُ چریشی ءَ دو شکی ایں مردم جنگ بوتگ انت –

آئی ءَ گوشتگ کہ پٹ پولی آپریشن ءِ میان ءَ اے مردماں پوج ءِ سر ءَ اُرش کتگ پسوی اُرش ءَ دو مردم جنگ بوتگ انت اشانی گور ءَ سلاہ ءُ گولہ ھم دستیگ کتگ انت –

بلوچستان ءَ سی ٹی ڈی ءِ کاروائی شکی نگاھاں چارگ بنت، گوست ءَ سی ٹی ڈی ءِ دیم پہ دیمی میڑ دروگ بوتگ انت –

اے میڑاں جنگ بوتگیں مردمانی تہ ءَ گیشتر مردم پیسر ءَ چہ زورانسری آوار جنی ءَ پد بیگواھیں بلوچ بوتگ انت- وھدیکہ باز براں مزھبی پاٹیاں سیادی داروکیں ھما مردم کہ پیش آوار جتگ انت ھما جنگ ءُ چگل دیگ بوتگ انت –

ڈیرہ بگٹی ءَ پوجی بیڑ

ٹی بی پی شونگال

ڈیرہ بگٹی بلوچستان ءِ درستاں پدمنتگیں ءُ جنگ زدگیں دمگانی تہ ءَ شمار کنگ بیت اِنت۔ پوجی زورشاھیں جنرل پرویز مشرف بلوچستان ءِ سر ءَ ھونواریں جنگ مُشت کہ چریشی ءَ ڈیرہ بگٹی ءُ کوھلو درستاں گیشتر سانمند بوت اَنت، لکھانی کچ ءَ مھلوک لڈگ ءَ لاچار بوت اَنت، ھزارانی کچ ءَ مردم زورانسری بیگواھیانی آماچ کنگ بیت اَنت ءُ بے کساس مردم کُشگ بوت اَنت۔ پاکستان ءِ تہ ءَ پوجی زورشاھی ءِ آسری ءَ پانزدہ سال گوستگ ءُ پیپلز پارٹی، مسلم لیگ نون ءُ تحریک انصاف ءِ سرکار جوڑ بوتگ اَنت ءُ ھلاس بیتگ اَنت بلے ڈیرہ بگٹی ءِ ناگیگیں جاورانی تہ ءَ ھچ پئیمیں گھتری ءِ نئیتکگ۔

ھمے زیتاں بلوچ لبریشن ٹائیگرز ءَ چہ سوئی ءَ سبی رؤکیں شش فٹبال ءِ لئیبی بیگواہ کُتگ اَنت، چریشی ءَ پد ڈیرہ بگٹی ءِ تہ ءَ مزنیں کچے ءَ پوجی بیڑ بندات کنگ بیتگ۔ پاکستانی پوج ءِ دوازمی کور ءِ کماندار آصف غفور ءُ آئی جی فرنٹیئر کور بلوچستان ڈیرہ بگٹی ءَ شُتگ اَنت ءُ راجدوستیں گل ترس ءِ درشان کنگ ءَ اَنت اے اپسرانی ڈیرہ بگٹی ءَ رؤگ ءُ تَر ءُ گرد پوجی بیڑانی تہ ءَ گیشی آرگ ءِ سوب جوڑ بیت کنت۔

پوجی بیڑ ءَ سوئی ھنکین ءِ جتاجتائیں میتگ ءُ بازارانی لوگانی س رءَ بیڑ بری برجاہ اِنت، بازیں میتگاں لوگ ماندارگ بیتگ اَنت ءُ مردم زورانسری لڈگ ءَ پہ لاچار کنگ ءِ ھم اھوال پیداک اَنت۔ ڈیرہ بگٹی ءِ جتا جتائیں ھنکین پوجی انگر ءِ تہ ءَ اَنت ءُ بازیں مردم زورانسری بیگواھی ءِ آماچ کنگ بیتگ اَنت۔

پاکستان ءِ تھی کارانی سرپانکیں وزیر سرفراز بگٹی ءِ سر ءَ یکشل ءَ وتی بگیر کارانی ھلاپ ءَ بے کساسیں تاکت ءِ کارمرزی ءِ بھتام جنگ بوتگ اَنت ءُ بلوچستان ءَ سرپانکیں سرکار ءِ آیگ ءَ پد زورانسری بیگواھیانی تہ ءَ ھم گیشی اَتکگ۔ پوجی بیڑ ءُ بلوچ راج ءِ سر ءَ زوراکیاں چہ بلوچستان ءِ جاورانی تہ ءَ گھتری ءِ جاہ گنتری کئیت۔ بلوچ جیڑہ ءِ زوراکی ءُ زورشاھی ءَ گوں دارگ ءِ کوشست پیسر ءَ ھم بے سوب بیتگ اَنت ءُ انی ھم تاکت ءِ بے کساسیں کارمرزی ءَ گوں جیڑہ گیش ءُ گیوار نہ بنت بلکیں گیشتر بنت۔

بلوچستان ءِ تیاب دپی شھر گوادر ءُ سندھ ءِ بنجاھی شھر کراچی ءَ چہ پاکستانی لشکریاں دو بلوچ ورناہ دزگیر کنگ ءَ پد بیگواہ کُتگ اَنت۔

سر بیتگیں ھالانی ردءَ بلوچستان ءِ تیاب دپی شھر گوادر ءَ چہ پاکستانی لشکریاں یک ورناھے بیگواہ کُتگ ھمے پئیم ءَ سندھ ءِ بنجاھی شھر کراچی ءَ چہ ھم یک بلوچ ورناھے لشکریاں دزگیری ءَ پد زورانسری بیگواھی ءِ آماچ کُتگ۔

زورانسری بیگواھی ءِ آماچ بیتگیں دوھیں ورناھانی پجار تربت پیدارک ءِ جھمنند دو سیاد میران ء حسین ءُ سمیر ء نعمت ءِ ناماں چہ بیتگ۔

زورانسری بیگواھی ءِ آماچ بیتگینانی تہءَ میران بلوچ دوشیگیں شپ ءَ چہ گوادر ءَ دزگیری ءَ پد بیگواہ کنگ بیتگ وھدیکہ سمیر چہ کراچی ءِ ھند رئیس گوٹھ ءَ پاکستانی لشکریاں دزگیر کنگ ءَ پد بیگواہ کُتگ۔

بلوچی زبان ءِ نامداریں شائر مبارک قاضی 24 دسمبر 1956 ءَ بلوچستان ءِ تیاب دپی دمگ پسنی ءَ کھدہ امان اللہ ءِ لوگ ءَ ودی بیتگ۔

مبارک قاضی ءَ بنداتی وانگ چہ پسنی ھائی اسکول ءَ 1972 ءَ سرجم کُتگ ءُ گیشتری وانگ ءِ ھاتر ءَ کراچی ءِ سندھ مسلم کالج ءَ شُتگ، بلے مالی ناگیگیانی سوب ءَ آئی ءَ وتی وانگ نیم راہ ءَ یل کُتگ ءُ پد ءَ وتی بنکی ھنکین ءَ واتر بیتگ۔ آ 1978 ءَ پہ بی اے ءِ ھاتر ءَ دوبر کراچی ءَ شُتگ ءُ اردو آرٹس کالج ءَ وتی وانگ برجاہ داشتگ ئے۔ ءُ پد ءَ پہ ماسٹرز (ایم اے) ءِ ھاتر ءَ آ بلوچستان شھدربرجاہ شال ءَ شُتگ، کہ چہ اود ءَ آئی ءَ انٹرنیشنل ریلیشنز (آئی آر) ءِ تہ ءَ ڈگری گپتگ۔

پہ بلوچی زبان ءِ تالانی ءُ دیمروی ءَ مبارک قاضی ءَ مزنیں کردے گوں وتی شائری ءَ پیلو کُتگ، مبارک قاضی ءِ شئر بلوچ، بلوچی ءُ بلوچستان ءِ جھگیر بیتگ اَنت۔ مبارک قاضی ءِ شئرانی تہ ءَ نہ تھنا ازم ءُ ھیالانی درشانی گوں جوانی ءَ گندگ بیتگ بلکیں گوں زمین، زُبان ءُ راج ءَ مھر ءِ درشان ھم پلگاریں رنگ ءَ گندگ ءَ اَتکگ انت۔

مبارک قاضی ءَ چہ ورنائی ءَ شائری ءِ نیمگ ءَ دلگوش گور کُتگ ءُ کساس 1977 ءَ آئی ءَ شائری نبشتہ کنگ بندات کُتگ۔ مبارک قاضی ءِ شائری آئی ءِ جند ءِ تاکبنداں ابید، روتاک، ماھتاک، ءُ دگہ جاھاں ھم شنگ ءُ تالان بیتگ اَنت۔

بلوچی زبان ءِ مھر ءُ وتی آشوبی شئرانی سوب ءَ مبارک قاضی دزگیر ھم کنگ بیتگ، بیھار ھم دیگ بیتگ بلے مبارک قاضی ءَ اے بیھار ءُ دزگیریاں ابید ھم وتی آشوبی شئر برجاہ داشتگ اَنت ءُ راج سکین داتگ کہ پہ وتی باندات، پہ وتی آجوئی، پہ وتی وشھالی، پہ وتی زبان، راج ءُ ڈیھہ ءَ وتی جھد ءَ برجاہ بہ دار اَنت۔

مبارک قاضی ءِ شِنگ بیتگیں شائری دپترانی نام

1. زرنوشت
2. چولاں دریا یل داتگ
3. منی اھدءِ گم ءِ کسہ
4. مُرگ پہ کدوھاں رپتگ اَنت
5. جَنگل چنچو زیبا اِنت
6. شاگ ماں سبزیں ساوڑءَ
7. آپ سَمّاک ءَ جتگ
8. ھانی منی ماتیں وتن

ھمے وڑ ءَ مبارک قاضی ءِ نبشتگیں نبشتانکانی ھم یک دپتر ءِ شنگ بیتگ کہ آئی نام اِنت:

باریں منی باریگ کجام اِنت

مبارک قاضی مروچی بزاں 16 ستمبر 2023 ءَ ماں تُربت ءَ بیران بیتگ۔ مبارک قاضی ءِ بیرانی ءَ گوں بلوچی شائری، بلوچ زبان دوستی ءُ لبزانک ءِ یک مزنیں اھدے آسر بیتگ۔

ٹی بی پی بلوچی ءِ درستیں ٹیم بلوچی زبان ءِ مزن نامیں شائر مبارک قاضی ءَ آئی ءِ جندے اے دوبنداں گوں یات کنت ءُ ستاشانی پیش کنت کہ:

“چُشیں قاضی یے کہ مبارک اِنت”
“پدا مشکل اِنت کہ ودی بہ بیت”

روکپتی بلوچستان ءِ بنجاھی شھر زاھدان ءُ ایرانشھر ءَ سَے مردم بیگواہ کنگ بیتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ گوستگیں روچ ءَ دو مردم آوار جنگ پد بیگواہ بیتگ اَنت-

آوار جنگ بیتگیں مردمانی پجار بیست سالی ئیں نوید شاہ بخش ء نور مھمد ءُ بیست ءُ یک سالی ئیں عرفان شاھنوازی ء نادر ءِ ناماں زانگ بیتگ اَنت-

اھوالانی رد ءَ اے مردم گوستگیں روچ ءِ ساھت دو ءَ لس پوشاکی کارندھاں آوار جتگ ءُ گون وت برتگ اَنت-

ھمے وڑ ءَ ایرانشھر ءَ یک نودربرے بیگواہ کنگ بیتگ-

گیشین اھوالانی رد ءَ ایرانشھر ءَ حقانیہ دینی وانگ جاہ ءِ نودربر بیگواہ کنگ بیتگ-

بیگواہ کنگ بیتگیں نودربر ءِ پجار نوید درزادہ ء مراد مھمد جھمنند گسک لاشار ءِ نام ءَ زانگ بیتگ-

اھوالانی رد ءَ نوید پیش ءَ دارالعلوم مکی زاھدان ءِ یک نودربرے بیتگ ءُ آئی ءِ مات ءِ نادراہ بوگ ءَ آ لوٹارینگ بیتگ ءُ ایرانشھر ءَ گڑا اود ءَ ائی ءَ وانگ دوبر حقانیہ وانگ جاہ ءَ بندات کتگ-

اھوالانی رد ءَ نوید لھتے روچ ءَ پیش ماں دیم پہ زاھدان ءَ دراتکگ گڑا اود ءَ سر نہ بیتگ ءُ راہ ءَ بیگواہ بیتگ-

آئی ءِ بیگواھی ءِ بارو ءَ دگہ ھچ اھوال دیم ءَ نیتکگ انت نانکہ آئی ءِ بارو ءَ دگہ سرکاری تکاں گپ دیم ءَ آرگ بیتگ اَنت-

ایشیا کپ گوازی ءِ سُپر فار راونڈ ءِ گوازیاں ھندوستان ءَ بنگلہ دیش ءُ پاکستان ءَ سری لنکا ءِ دیما پروش وارتگ۔

پانزدہ ستمبر ءَ بیتگیں سپر فار گوازی ءَ ھندوستان ءُ بنگلہ دیش دیم پہ دیم بیتگ اَنت۔ ھندوستان ءَ ٹاس کَٹ اتگ ءُ پیسرءَ بالنگ کنگ ءِ پیسلہ کُتگ، بنگلہ دیش ءَ پنجاہ اورانی آسرءَ ھشت وکٹءِ تاوان ءَ 265 رنز ءِ ٹارگٹ داتگ۔

بنگلہ دیش ءِ نیمگ ءَ شکیب الحسن ءَ 84 وھدیکہ توحید ھریدوائے ءَ 54 رنز اڈ کُتگ، وھدیکہ ھندوستانی بالرانی تہءَ شاردل ٹاکر ءَ سئے ءُ مھمد شامی دو وکٹ گپتگ۔

بنگلہ دیش ءِ نیمگ ءَ اڈ کُتگیں 265 ءِ ٹارگٹ ءِ رندگیری کنان ءَ ھندوستان ءِ سرجمیں ٹیم 259 رنز ءِ سرءَ 49.5 اورزاں آوٹ بیتگ ءُ پروش وارتگ اِش۔ ھندوستان ءِ نیمگ ءَ شبمن گِل ءَ 121 ءُ اکسر پٹیل ءَ 42 رنز اڈ کُتگ وھدیکہ بنگلہ دیشی بالر مسطفیزالرحمن ءَ سئے ءُ تنظیم حسن ثاقب ءَ دو وکٹ گپتگ ءُ لئیب بنگلہ دیش ءَ وتی نام ءَ کُتگ۔

ھمے پئیم چاردہ ستمبر ءَ پاکستان ءُ سری لنکہ ایشیا کپ سپر گوازی ءَ دیم پہ دیم بیتگ اَنت، پاکستان ءَ ٹاس کَٹ اتگ ءُ پیسرءَ بیٹنگ ءِ پیسلہ کُتگ ءُ چِل دو اورانی تہءَ ھپت وکٹانی تاوان ءَ 252 رنز اڈ کُتگ۔ پاکستان ءِ نیمگ ءَ مھمد رضوان ءَ 86 ءُ ابداللہ شفیق 52 ءَ رنز اڈ کتگ، وھدیکہ سری لنکن بالرانی تہءَ متیشاہ پتی رانا ءَ سئے ءُ پرمود مدھوشن ءَ دو وکٹ گپتگ۔

پاکستان ءِ داتگیں 252 رنز ءِ ٹارگٹ ءِ رندگیری کنان ءَ سری لنکہ ءَ چِل دو اورانی آسرءَ ھشت وکٹءِ تاوان ءَ 252 رنز اڈ کُتگ ءُ ڈی ایل ایس رھبند ءِ ردءَ باج بر بیتگ۔ سری لنکہ ءِ نیمگ ءَ کُسل منڈس ءَ 91 ءُ چریت اسلانکہ ءَ 49 رنز اڈ کُتگ، وھدیکہ پاکستانی بالر افتخار احمد ءَ سئے ءُ شاھین آفریدی ءَ دو وکٹ وتی ناماں کُتگ اَنت۔

ایشیا کپ ءِ فائنل گوازی ھبدہ ستمبر ءَ ھندوستان ءُ سری لنکا ءِ نیام ءَ لئیب کنگ بیت اِنت۔

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ سوئی ءَ چہ پنجاب ءَ رؤکیں سی ءُ شش انچ ءِ گیس پائپ لائن تباہ کنگ ءِ زمہ واری ءَ منّ اِتگ-

گل ءِ جارکش گوشگ اِنت کہ مروچی شپ ءَ ڈیرہ بگٹی سوئی ءِ نزیک ءَ سوئی ءَ چہ پنجاب ءَ رؤکیں سی ءُ شش انچ ءِ گیس پائپ لائن بی آر جی ءِ سرمچاراں تراکناکیں شورو پر کتگ ءَ تراکینتگ-

جارکش دوستین بلوچ ءَ گْوشتگ کہ ھمے وڑ اُرش بلوچستان ءِ وتواجھی ءَ تاں برجاہ بنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کُتگیں درشان ءِ تہ ءَ گْوشتگ کہ بی ایل اے ءِ سرمچاراں ھب ءُ پنجگور ءَ زورگریں پاکستانی پوج اُرشانی نشانگ کتگ ءُ کلات ءَ دزگیرکتگیں دُژمن ءِ یک دمگی چاریگے کُشتگ-

آئی ءَ گْوشتگ کہ بی ایل اے ءِ سرمچاراں گوستگیں شپ ءَ ھب چوکی ءَ گیٹرون شرکت ءِ ھند سر ءَ برجاھیں زورگریں پاکستانی پوج ءِ چوکی گوں دستی بمب ءَ نشانگ کتگ، تراک آسر ءَ دو دُژمنیں کارندہ ٹپی بیتگ اَنت کہ آیانی تہ ءَ سک باز ٹپی ھوار اِنت-

جارکش ءَ گْوشتگ کہ دگہ یک اُرشے گوستگیں روچ ءَ مگرب ءِ وھد ءَ بلوچ لبریشن آرمی ءِ سرمچاراں پنجگور ءِ شھر ءَ زورگریں پاکستانی پوج ءِ بُنجاھی بُنجل سر ءَ ھما وھد ءَ گرنیڈ لانچر ءَ گوں بازیں گولھے آس داتگ وھدے دُژمنیں پوج ءِ کاروان بُنجل ءَ سر بیتگ- اُرش آسر ءَ دُژمن ءَ مزنیں کچے ءَ جانی ءُ مالی تاوان چست کنگ کپتگ-

جارکش ءَ گوشتگ کہ بلوچ لبریشن آرمی ءِ سرمچاراں کلات ءَ دزگیر کُتگیں زورگریں پوج ءِ چاریگ ءِ ھمگرنچ بیگ ءِ جرم ءَ پد کُشتگ-

آئی ءَ دیمتر ءَ گْوشتگ کہ گوستگیں روچاں سرمچاراں یک بیڑے ءِ میان ءَ چہ کلات، گزگ ، گھور ءَ محمد حسن ء سبزل خان نیچاری ءُ آئی ءِ چُک علی اکبر دزگیر کتگ اَنت-

آئی ءَ گْوشتگ کہ جُست ءُ پُرس میان ءَ محمد حسن ءَ منّ اِتگ کہ آ زورگریں پاکستانی پوج ءِ ھاتر ءَ چاریگی ءِ کار کنگ ءَ بیتگ- آئی ءَ گْوشتگ کہ گزگ ءُ کش گوراں بلوچ سرمچارانی راھانی نشانگ کنگ ءَ ھوار بیتگ-

آئی ءَ گْوشتگ کہ چاریگ محمد حسن نیچاری ءَ منّ اِتگ کہ ھپت اپریل 2014 ءَ کلات ءِ دمگ گزگ ءَ مَشہ خل گھور ءَ زورگریں پوج ءِ زوراکی ءَ کُمکاری ءِ بستار ءَ ھوار بیتگ، اود ءَ میتگانی سر ءَ زورگریں پوج ءَ بالگردانی سر ءَ تیرگواری ءُ بمبگواری کتگ ءُ دو چُکاں ھوار پنچ زالبول کُشتگ ءُ شش ٹپی کتگ اَنت-

آئی ءَ گْوشتگ کہ اے چاریگ ءَ منّ اِتگ کہ اے میتگ ءِ نشان کنگ ءُ زوراکی ءَ پد کُشک بیتگینانی پدری کتگ-

آئی ءَ گْوشتگ کہ محمد حسن نیچاری راجدروھی سرزد بیگ ءِ سر ءَ بلوچ راجی آمیدگس مرگ پرمان داتگ ءُ اشی ءِ سر ءَ گوستگیں روچ ءَ بلوچ سرمچاراں گامگیج زرتگ ءُ آ کُشتگ-

جارکش ءَ گْوشتگ کہ اے چاریگ ءَ وتی سنگتانی نام ھم گوشتگ اَنت گوں، آ زوت گُڈی آسر ءَ سر کنگ بنت- بلوچ راجی آمیدگس ءَ بھتام ءِ پدر نہ بیگ ءِ سر ءَ محمد حسن ءِ چُک علی اکبر نیچاری یل داتگ-

جارکش ءَ دیمتر ءَ گْوشتگ کہ بلوچ لبریشن آرمی اے اُرشانی زمہ واریاں منّ اِیت ءُ اے اِھد کنت کہ بلوچستان ءَ چہ زورگریں پوج ءِ سرجمی ءَ دراھگ ءَ تاں مئے اُرش برجاہ بنت-

بلوچستان ءِ اکسکاری: کمانچر بلوچ ءِ ازمکاری ءِ سپر

ٹی بی پی کور اسٹوری

بلوچستان ءِ جھلانکی ءَ ھمود ءَ زمین ءِ سر ءَ کھر آماچی اِنت ھمود ءَ نندوکانی ساہ ءِ یک مھکمیں ریشگے ھست اِنت – یک اکسکارے دیم ءَ کیت اِنت ءُ آ ھما زیباہ ءُ پشکپتگین ءُ جنگ آماچیں دمگ ءَ چیریں کسھاں درشان کنگ ءَ اَنت-

بلوچستان ءُ وتی زیبائی ءُ دودمانی ءِ دولت ءِ پژدر ءَ نامان اِنت، دَہ ءَ گیش سالاں کمانچر بلوچ ءِ کیمرہ ءِ بنجل جوڑ کتگ – آئی ءَ وتی کیمرہ ءِ زور ءَ بلوچستان ءِ زیبائیں رنگ ءُ مھلوک ءِ ھمک روچ ءِ زندمان ءِ یک اکسکاری ءِ دروشمے پیش کتگ – اے زیبائی نگاھانی رنگ ءَ لس اِنت بلے ایشی ءِ کسہ یکدم ءُ سک ءَ دراج کشیں دروشمے ءِ ندارگاں پیش کنت اِنت-

نی وھدیکہ دیمپانی وتی جان ءُ ساہ ءِ بیت اِنت گڑا کمانچر یک نوکیں رنگے بندات کتگ اے رنگ ءَ آ ایوک ءَ وتی ازمکاری ءَ تالان کنگ اِنت بلکیں آ وتی جاندراھی ءِ ھاتر ءَ ھم کمک ءَ لوٹگ ءَ اِنت-

یک ویژنری پوٹوگرافر

کمانچر بلوچ 25 نومبر1998 ءَ بلوچستان ءِ دمگ کیچ ءِ ھند مند ءَ ودی بیتگ، آئی ءَ بنداتی رنگ ءَ وتی سادگیں رنگیں موبائل ءِ کمک زوران ءَ پوٹوگراپی ءِ دنیا ءَ گامے ایر کتگ اَنت – آئی ءَ 2015 ءَ پوٹوگراپی ءِ وتی کار جوڑ کتگ ات-

بلوچستان پوسٹ (ٹی بی پی) ءَ گوں گپ کنان ءَ آئی ءَ وتی ڈیھ ءِ زیبائی ءُ جیڑھانی کسہ دنیا ءِ دیم ءَ آرگ ءَ پھری رنگ ءُ تچکیں رنگے ءَ درشان کتگ انت، چوشکہ اے دمگ ءَ پوٹوگراپی شوکے ءِ رنگ ءَ اِنت-

پانزدہ سال ءَ پیش منی گور ءَ یک موباھلے بیتگ ءُ ھما وھد ءَ من ءَ دلدوستی بیتگ ’کمانچر ءَ ٹی بی پی ءَ گوں جتگ ‘- اے وھد ءَ منی واھشت بوتگ کہ چیزے نا چیزے من گرنچاں گوں ایر بہ کن آں ءُ مردماں گوں سر بہ کن آں – اے وھد ءَ بازیں جاھانی تر ءُ تاب کتگ ءُ جتا جتائیں زیبائیں ندارگ ءُ کسہ کیمرہ ءِ تہ ءَ یکجاہ کتگ اَنت -’ نی اے ھُب ءُ واھگ ءَ ھما کچ ءَ سر کتگ کہ من ایشی ءَ پہ وتی واستا زمہ واری یے سرپد باں –

وھدیکہ آئی ءَ را جست کنگ بیتگ کہ بلوچستان ءِ ازم ءِ کار سُبک اِنت، کمانچر ءَ پسو داتگ ’ بلوچستان ءَ ھروھد ءَ ازمکار جاڑیگ اَنت بلے آیاں بازیں جیڑھانی دیمپانی بنت اِنت، ءُ ایشانی درستاں جیڑہ تریں نیزگاری اِنت – مئے مھلوک، سرکار ءَ ھواری ءَ ازمکاری ءَ سرپد نہ اِنت – ’آئی ءَ گوشتگ مئے مھلوک داں انگت ءَ ازمکارانی رنگ ءِ زانگ ءَ بے سوب بیتگ اَنت ءُ آیانی پلامرزی ءَ نہ کنت اِنت – ’مئے مھلوک داں انگت ءَ ازم ءَ سرپد نہ اَنت بازیں مردم ایشی ءَ وھد زوالی سرپد بنت اِنت بلے ایشی ءَ نزان اَنت کہ یک پوٹوگراپرے یک اکسے ءِ کشگ ءَ کجام کساس ءَ جھد کنت اِنت، چنکس دور روت اِنت ءُ یک زیبائیں رنگے شوھاز کنگ ءَ سپرے ھلاس بیت اِنت – اگاں ما لوٹ ایں مئے چاگرد زندگ بہ بیت گڑا مارا وتی ازمکار شرپ دیگ لوٹ اَنت‘-

کمانچر ءِ ازمی ویژن بلوچستان ءِ زیبائی ءِ ھندانی ھواری ءَ ھما مردمانی نگاھانی نیمگ ءَ اِنت دمگانی دودمان ءِ سانمندی ءَ ایر کن اَنت – آیانی نگاہ شائر، کتابکار ءُ نامی ئیں مردمانی سر ءَ اِنت، اے دمگ ءَ دودمان ءِ بنھشت ءَ ایر کنگ ءَ اَنت-

بلوچستان ءِ دودمانی وارسس: کمانچر ءِ لینس ءِ کسہ

کمانچر ءِ کیمرہ ءِ چماں بلوچستان ءِ پراھگ ءُ دراجی ءَ تران ءُ جتا جتائیں رنگ ءُ زیبائی گرنچ داتگ اَنت ءُ زیبائی ءِ وش رنگی جتاجتائیں رنگ ءُ دروشماں گچینی رنگاں پیش کتگ اَنت آئی ءِ اکس شال ءِ برپ بستگیں کوھانی دامن ءَ بندات بیت اِنت گوادر ءِ زیبائیں زر ءَ داں سپر کنگ ءَ گندگ بیت اِنت اے ھم سر نامان اِنت کہ مکران ‘پرنسس آف ھوپ ‘ ھم ھوار اِنت-

آئی ءَ بلوچستان ءِ زیبائی ءِ ھواری ءَ مھلوک ءِ مھنت، دودمان ءُ ازم ءِ تالانی کتگ- آئی ءَ بلوچ زالبولانی دیمروئی ءِ زانت پدراھی کتگ ءُ آئی ءَ مردینانی دستاں جوڑ بیتگیں سواس ءُ بلوچی چَوٹانء اکس ءُ شان وتی اکسانی توک ءَ گندگ بیت اِنت – آئی ءِ کار بلوچستان ءِ نود ءُ پنچ درسد ھنداں زیبائی ءَ درا کن اَنت کہ مھلوک ءِ مھکمی ءُ زندگ دلی ءِ واستا اکسانی دروشم ءَ دار اَنت ٹ کمانچر ءِ اکس بلوچستان ءِ رژنائی اَنت- بلے جد ءُ جھد ءِ زیبائی ءَ ندارگ ءَ پیش کن اَنت-

بلوچستان یک ھنچیں زمینے کہ ابرمی مڈیاں سرگنج اِنت بلے اے ھم راستی یے اے دمگ دنیا ءِ پشکپتگیں ھنداں ھوار بیت اِنت، کہ سالانی سال جنگ ءُ زرکاری ءِ دیمپانی ءِ سانمندی ءَ اِنت – کمانچر ءَ اے دمگاں مھلوک ءِ مھکمی ءُ دیمروئی ءِ واستا گام یک تچکیں رنگے ءَ پیش کتگ اَنت، ھمک روچی ئیں رنگ ءَ مشکل ءُ جیڑھانی دیمپانی ءَ کنگ ءَ اَنت-

ما کمانچر ءَ را جست کتگ کہ بلوچستان ءِ زبھریں وڑین ھند ءَ جھمنندی بیگ ءَ آئی ءَ پوٹوگراپی ءِ پجار ءِ ھاتر ءَ آئی ءَ کجام کجام مشکل ءُ جیڑھانی دیمپانی کنگ کپتگ؟ آئی ءِ پسو ات ’ منی پوٹوگراپی ءِ کسہ 2008 ءَ بندات بیتگ، ھما وھد ءَ منی وتی بنکی ھنکین مند ءَ وتی ازم ءِ بندات کتگ – اے جاہ ءِ دود مشکل ءُ ازمکار ءَ وتی مھنت ءُ جد ءُ جھد ءِ وتی جاہ ءَ جوٍ کنگ کپتگ ات- من ءَ پوٹوگراپی ءِ واستا اژدری ساز ءُ سامان دیگ نہ بیتگ اَنت کہ ھمایانی من ءَ زلوری بیتگ اَنت – یک پوٹوگراپی ءِ واستا وھد ءُ مالی آسراتی زلوری بنت اِنت دانکہ آ وتی گچینی کسھاں جوانیں رنگے ءَ آورت بہ کنت اِنت – من باز وھد ءَ جیڑ اتگ کہ من یک شریں ادارھے ءَ چہ کلاس بہ زوراں دانکہ پوٹوگراپی ءَ جوانتر سرپد بہ باں ءُ وتی کار ءَ دیم ءَ بہ براں بلے منی دزرسد ءَ گیش اِنت پرچا منی گور ءَ دگہ سپانسر نیست اِنت – منی پت 2003 ءُ بیران بیتگ ءُ من یک نودربرے آں، منی کار پوٹوگراپی اِنت، ءُ اے چاگرد ءَ پوٹوگراپی ھچ کسی کوپگ بیت نہ کنت اِنت-

بلوچستان ءِ پوٹوگراپر کمانچر ءَ وتی ازم ءِ زور ءَ بلوچستان ءِ مھلوک ءِ جیڑہ ءُ جنجالاں دیم ءَ کار ایت اِنت- اے اکسانی توک ءَ دلمانگی، بدھالی ءُ بنکی آسراتی ءِ کمی تچک ءَ گندگ بنت اِنت بلے اے مشکل ءُ جیڑھاں ابید ھم فریمز اُمیتانی تہ ءَ گندگ بنت اِنت – کمانچر ءَ بلوچستان ءِ مھلوک ءِ واستا سادگین ءُ تچکیں اکس پیش کتگ اَنت-

آئی ءَ نا ایوک ءَ بلوچستان ءِ شوانگانی ٹنگ ٹنگیں گدان وتی لنس ءَ گرنچ داتگ اَنت کہ یک سادگیں زندے ءِ گوازینگ ءَ اَنت بلکیں کمانچر ءَ بلوچستان ءِ نیزگاریں زھگانی وانگ ءِ واھشت ءُ دمگی لوک گشندہ سوروز کہ بلوچ دودمان ءِ یک جوانیں سازے زانگ بیت اِنت اے ھم آئی ءَ وتی اکسانی توک ءَ گرنچ داتگ ءُ آئی ءَ وتی سازانی جوڑینگ ءِ جاورھال پیش داشتگ اَنت ھمے وڑ دمگ ءل سازگری ءِ وانگی ادارہ نیست اِنت – آئی ءُ مھلوک ءِ ھُب ءُ واھگ ءُ آیانی جاورھال پیش کتگ اَنت-

کمانچر ءَ ٹی بی پی ءَ گوں گوشتگ کہ آئی ءُ ھچبر پوٹوگراپی ءِ رسمی وانگ نہ زرتگ بلکیں آئی ءَ وتی ردیاں دربران کتگ ’پوٹوگراپی یک گچینی ازمے ءُ منی واھش اِنت من وتی راج ءِ کسھاں اے زبان ءَ گوش بہ داریناں- منی اے سپر انگت روان اِنت ءُ من اے سپر ءَ داں انگت ءَ یک نودربرے آں ‘ اے لیکہ آئی ءَ درشان کتگ انت-

وھدیکہ بلوچستان پوسٹ ءَ آئی ءَ.جست کتگ ات کہ آئی ءِ گچینی جار ءِ سبب چی اِنت گڑا آئی ءَ پسو داتگ کہ ’ ھر ھما پوٹوگراپر وتی سپر ءَ بیت اِنت ءُ ھرکس وتی وتی رنگ ءَ دنیا ءَ گند ایت ءُ اکس کش ایت- من بلوچستان ءَ وتی گچینی جاہ سرپد باں ءُ ایشی ءِ جتا جتائیں رنگاں وتی اکسانی دروشم ءَ گرنچ دے آں –

ٹی بی پی ءَ ازمکار ءَ چہ جست گپت پوٹوگراپی چاگرد ءِ واستا کجام رنگ ءَ جوان اِنت ؟

آئی ءَ پسو داتگ کہ ’پوٹوگراپی چاگرد ءِ ھمک تک ءُ پھناتاں پدر کنت اِنت – اے وئیلاں گرنچ دنت ءُ آیوکیں باندات ءِ واستا مھکمیں رنگے ءَ ایر ایش کنت اِنت – ھرچی کہ چاگرد ءَ بوگ ءَ اِنت آئی ءَ را انبار کت کنت اِنت‘-

بلوچ چاگرد ءَ ازمکار ءِ شرپ ءِ درگت ءَ آئی ءَ گوشتگ کہ آیاں گچینی نگاھچاری دیگ نہ بیت اِنت آیانی واستا نگاھچاری دیگ بیت اِنت – آئی ءِ لیکہ اِنت ’ازمکار ءَ دانکہ راستی نگاھچاری دیگ نہ نیت اِنت ازم چاگرد ءِ گھتر کنگ ءَ کمکار نہ بیت اِنت‘-

ٹی بی پی ءَ چہ کمانچر ءَ گیش جست کنگ ءِ جھد کتگ تو پرچا وتی کار ءَ گیشتر بلوچستان ءِ سر ءَ نگاھاں ایر کن ئے گڑا آئی ءَ گوشتگ، ’ من بلوچے آں، ءُ من لوٹ آں منی اکس بلوچستان ءِ گچینی یے وشبو بہ بنت ءُ اے وشبو سرجمیں دنیا ءَ تالان بہ بنت‘-

نوکیں پدریچ ءَ دلگوش گور کنگ

کمانچر ءِ اکسکاری ءِ سان بلوچستان ءِ ورنایاں سر بیتگ ءُ آئی ءَ جوانیں رنگے ءَ دگہ ورنا ھم اکسکاری ءِ تک ءَ دلبڈی داتگ اَنت کہ آ ھم وتی کسھاں بیار اَنت – ءُ آئی ءَ وتی اکس چاگردی ترامجاھاں ھم وتی اکس ابید دارگ ءَ شنگ ءُ تالان کتگ اَنت، ءُ دانکہ دگہ کسے ایشاں ڈونلوڈ بہ کنت ءُ ایشاں کارمرد بہ کنت – اے پیسلگ ءَ نوک رُستگیں پوٹوگراپرز ءَ یک کمیونٹی ءِ گیش کتگ، کہ وتی لنس ءَ بلوچستان ءِ چیریں زیبائی ءُ جیڑھاں پدر کنگ لوٹ ایت-

جاندراھی ءِ جد ءُ جھد ءُ پوٹوگراپی ءِ بھا کنگ

کمانچر بلوچ ءِ ازم ءِ سپر چو کسانوکینے نہ اِنت ایشی ءِ توک ءَ آئی ءِ زاتی جیڑہ ءُ جاندراھی ءِ جد ءُ جھد ھم ھوار اَنت، میدہ ءِ نادراھی، چمانی نیزاری، زیابیتس ءُ جسمانی نیزوریاں آئی ءِ سپر ءِ دیمپانی داشتگ اَنت – بلے آئی ءَ پروش نہ من اتگ-

اے مشکلیں وھد ءَ کمانچر ءَ وتی اکسانی پیشدراھی ءُ بھا کنگ ءِ پیسلہ کتگ دانکہ آ وتی جاندراھی ءِ واستا اژدری ءِ کمک ءَ زرت بہ کنت – بندات ءَ آئی ءَ ترس ءُ لرزے سما کتگ ات بلے ستک جوڑ بیت چریشی ءَ نا ایوک ءَ آئی ءِ مالہ جیڑہ آسان بوت بلکیں اے بلوچستان ءِ دود ءُ ازم ءِ شرپ ءَ گیش کنت اِنت-

کمانچر ءِ اے نوکیں گام ءِ پژدر دو درور ودی کنگ ءَ اِنت لھتیں مردم ایشی ءِ پلامرزی ءَ کنگ ءَ اَنت لھتیں مردم اے گام ءِ کمک ءَ آئی ءِ ازم ءِ راستی ءَ کمی گندگ ءَ اَنت – بلے کمانچر وتی مھکمی ءَ تچک اِنت زان ایں آئی ءِ پوٹوگراپری ءَ نا ایوک ءَ آئی ءِ زند مٹ بیت اِنت بلکیں اے بلوچستان ءِ ازمکارانی واستا یک نوکیں راھے پچ کنت اِنت-

ھمے زوتاں تو وتی جاندراھی ءِ جیڑہ ءِ بارو ءَ گپ جتگ ات ءُ ھمے سبب ءَ وتی اکسانی بھا کنگ ءِ سوڑ اتگ ات دانکی وتی جاندراھی ءَ کت بہ کن اں – ھاں ناوشیں جاور ھالاں ترا کسے ءَ کمک کنگ ءِ گپ جتگ؟

کمانچر: جی منی جان گوستگیں لھتیں ماھاں یکدم ناوش اِنت – اے وھداں روچ پہ روچ منی جاور گیش ناگیگ بوان بوت اَنت ءُ من مرگ ءأ زند ءِ کش ءَ اوشتوک بوت اَنت – اے ناوشیں وھد ءَ منی سنگتانی نیمگ ءَ پکر ءُ کمک ءِ سما رس اتگ – بلے بژن کہ بلوچستان ءِ سرکار یا دگہ مزنیں مردمے ءَ من ءَ ھچ کمک کنگ ءِ گپ نہ جتگ- اے وڑیں جاورھال ءَ منی گور ءَ بس یکیں راہ پش کپتگ من وتی اکساں بھا بہ کن آں ءُ وتی مالی کمک ءِ زلورتاں سرجم کت بہ کن آں –

بلوچستان ءَ پوٹوگراپرانی شرپ ءُ ازمکارانی جاہ

کمانچر بلوچ جانسلامتی ءِ نیزوریانی سبب ءَ آئی ءَ وتی اکسانی بھا کنگ ءِ پیسلہ کتگ دانکہ آئی ءِ جاندراھی ءِ واستا مالی کمک ءَ وتی کت بہ کنت- اے پیسکہ نا ایوک ءَ مالی کمک ءِ سبب اِنت بلکیں اے یک جوانیں کلوھے کہ ھما پوٹوگراپر ءُ ازمکارانی شرپ ءَ پدر کنت اِنت – بلوچستان ءَ پوٹوگراپرزی یک اسٹرونگیں پلیٹ پارمے ءِ زلوری اِنت – دانکہ اے ازمکاراں شرپ بہ دنت ءُ آسراتی دات کت بہ کنت ءُ آ گیش پروگریس کت بہ کن اَنت-

ٹی بی پی: ھاں بلوچستان ءِ سرکار یا دمگی ادارہ تئی ازم ءِ پلامرزی ءُ دلبڈی کنگ ءَ اَنت ؟
کمانچر: بژن نہ اِنت، من گوستگیں پانزدہ سالاں اے تک ءَ کار کنگ ءَ آں ءُ من بلوچستان ءِ جتا جتائیں جاھاں ھپت ھزار ءَ گیش پوٹو کش اتگ بلے داں انگت ءَ بلوچستان ءِ سرکار ءِ نیمگ ءَ ھچ پلامرزی یا دلبڈی نہ رس اتگ ءُ مارا وتی کار ءِ دیم ءَ برگ ءِ اجازت ھم دیگ نہ بیتگ ،ازمکار ءِ دیم ءَ برگ ءِ واستا گچینی اسکیم یا آسراتی نیست اِنت ءُ بلوچستان ءِ سرکار ازمکارانی جاورھالاں ھم چَٹ بے سما اِنت-

وھدیکہ ما کمانچر بلوچ ءِ کریئیٹو دنیا ءِ جھلانکی ءَ رویں ما گندیں پوٹوگراپر یک گچینی یے تاکتے کہ راستی ءَ پدر کنت اِنت ءُ مٹی یے ءِ کلوہ ءَ سر کنت اِنت آئی ءِ لنس ءَ بلوچستان ءِ دودمانی وارست، زیبائی دروشم ءُ مردمانی نہ پروشوکہں جزبگ ءِ چمک گندگ ءَ کاینت – کمانچر ءِ سپر بلوچستان ءِ زیبائی ءُ جد ءُ جھد ءِ یک بے دروریں مسالے ءُ مئے درستانی زمہ واری اِنت ما اے ازمکاری ءِ گھتری ءُ دیم ءَ آرگ ءَ ستک بہ کن ایں-

کمانچر بلوچ ءِ پیس بک لنک