TBP Balochi

سربوتگیں ھالانی رِد ءَ گوستگیں روچاں ناشناسیں سلاہ بندیں مردمانی دست ءَ آوار جنگ بوتگیں مردمے جون دست کپتگ –

گیشیں ھالانی رِد ءَ کلات ءِ دمگ گور، گزک ءَ یک مردمے ءِ جون دست کپتگ کہ تیر جنگ ءُ کُشگ بوتگ –

کشگ بوتگیں مردمے پجار حاجی حسن نچاری ءِ انت –

دمگی اھوالکارانی رِد ءَ اے مرد لھتے روچ ساری سلاہ بندیں مردماں گوں ھمراھے چُک ءَ گوں وت برتگ، کہ گوستگیں روچ ءَ آئی ءِ جون دست کپتگ ءُ چُک یلا کنگ بوتگ –

تنی وھدی وئیل ءِ درگت ءَ ھچ وڈیں سرپدی نہ رستگ کہ کجام سوب ءَ اے مرد کُشگ بوتگ –

روکپتی بلوچستان ءِ بنجاھی شھر زاھدان ءَ ایرانی زُلم ءُ گیشیانی پژدر ءَ مھلوک ءِ زھرشانی کنگ بیتگ-

گیشیں اھوالانی رد ءَ زاھدان ءَ آدینگ ءِ نماز ءَ پد مھلوک ءَ زھرشانی روانک کش اتگ ءُ اود ءَ بازیں کچے ءَ مردماں بھر زرتگ –

زھرشانی کنوکانی دستاں بینر دست ءَ بیتگ انت ءُ آیاں سرکار ءِ ھلاپ ءَ ’مرگ بر خامنہ ای ‘ ءِ ھلاپ ءَ اوگام جتگ-

آیاں گوشتگ کہ شما مئے برات کُشتگ اَنت ما ھم شمارا کش ایں ما ھم مِریں وتی براتانی بیراں گریں –

زانگ بہ بیت روکپتی بلوچستان ءِ بنجاھی شھر زاھدان ءَ گوستگیں سال ءِ سِی ستمبر ءَ ایرانی لشکر ءَ تیرگواری کتگ ات کہ چریشی ءَ بازیں کچے ءَ مردم کُشتگ اَنت ءُ بازیں کچے ءَ مردم زدگ بیتگ اَنت-

چرے وئیل ءَ پد اود ءَ ھمک آدینگ زھرشانی ءُ روانک کشگ بوگ ءَ اَنت کہ چریشی ءَ مردم کُشتگیں مردمانی واستا انساپ ءِ لوٹ ءَ کنگ ءَ اَنت-

زاھدان ءِ وئیل ھما وھد ءَ بندات بیتگ ات کہ شانزدہ ستمبر ءَ ایرانی پولیس ءَ روکپتی بلوچستان ءِ تیابدپی شھر چھبار ءَ یک پانزدہ سالی ئیں جنکوئے ءِ گون ءَ زوراکی کتگ ات کہ چریشی ءَ پد اود ءَ یک زھرشانی یے بندات بیتگ ات کہ داں اے زھرشانی گیش پراہ روان بوت ھونی جاورے ءَ مٹ بوت –

بلوچ لبریشن ٹائیگرز ءِ جارکش میران بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ گوستگیں شپ روچ ءَ سوئی ءَ چہ کراچی ءَ رؤکیں سی ءَ شش انچ ءِ گیس پائپ لائن گوں تراکناکیں شورواں تباہ کنگ ءِ زمہ واری ءَ منّ ایں-

بی ایل ٹی ءِ جارکش ءَ گْوشتگ کہ گوستگیں شپ ءَ سندھ ءِ دمگ کشمور ءِ شھر تنگوانی ءِ دمگ ڈیرہ چوک نزیک ءَ سوئی ءَ چہ کراچی ءَ رؤکیں سی ءُ شش انچ ءِ گیس پائپ لائن بی ایل ٹی ءِ سرمچاراں تراکناکیں شورو ایر کتگ ءُ تراکینتگ-

جارکش میران بلوچ ءَ گْوشتگ کہ اشی ءَ پد کراچی ءَ ھوار تھی سندھ ءَ گیس روگ سرجمی ءَ بند بیتگ-

بلوچستان ء دمگ تربت گوگدان ءُ دگہ دمگاں چار روچاں چہ لین بے سبب ءِ بندی ءِ بگیری ءَ مروچی آدینگ روچ ءَ گوکدان ءِ نندوکیں مردماں ڈی بلوچ پوائنٹ سر ءَ بُنجاھی شھدگ بند کتگ-

بُنجاھی شھدگ بند بیگ ءِ سبب ءَ تربت ءَ چہ گوادر، پسنی، اورماڈہ، ھب ءُ کراچی ءَ روگ ءُ آھگ مھتل بیتگ – وھدے کہ دگ سر ءَ گاڑیانی دْراجیں لین لگ اِتگ-

دومی نیمگ ءَ دشت ، مند، تمپ ءُ ناصرآباد ءَ چہ تربت ءِ ھاتر آؤکیں دمگی ٹرانسپورٹ ھم مھتل بیتگ اَنت-

ڈی بلوچ پوائنٹ سر ءَ بُنجاھی شھدگ بند بیگ ءِ سبب ءَ گوگدان ءُ دگہ دمگاں گوستگیں چار روچاں چہ کیسکو ءِ بے سبب ءَ لین دیگ ءَ نہ اِنت-

شال ءَ پاکستانی پوج ءِ بنجل ءِ سر ءَ سلاہ بندین مردماں اُرش کنگ ءَ پد دستیگ کتگ ءُ اُرشکاراں ساز ءُ سامان گون وت برتگ اَنت – اُرشکارانی اُرش ءَ بازین کارندھانی مرگ ءِ ھال اِنت ءُ پوج ءَ سَے اُرشکارانی کُشگ ءِ ٹاہ ھم داتگ بیتگ-

پاکستانی پوج ءِ بنجل ءِ سر ءَ شال ءِ دمگ ولی تنگی ءَ گوستگیں بیگاہ ءَ اُرش کنگ بیتگ-

دمگی مردماں ٹی بی پی ءَ گوں گوشتگ کہ سلاہ بندیں مردمانی کچ ءَ پوجی پوسٹ ءُ پھزداری ءِ چوکی دستیگ کتگ اَنت-

اُرشکاراں پوج ءِ ساز ءُ سامان دستیگ کتگ ءُ شپ ءِ وھد ءَ پُشت مانداتگ ءُ شتگ اَنت-

پاکستان ءِ لشکری بنشون ءَ اُرش ءِ ھال راست کنان ءَ گوشتگ کہ سوبیدار رھیم کشگ بیتگ ءُ سَے کارندہ زدگ بیتگ اَنت ءُ لس مردمانی گوشگ اِنت پوج ءَ بازیں کَچے ءَ جانی تاوانانی دیمپانی کنگ کپتگ-

پوجی واکداراں ٹاہ داتگ کہ اُرشکاراں توک ءَ سَے مردم جنک بیتگ اَنت-

ھمے وڑ ءَ سھب ءِ سر ءَ ولی تنگی ءُ کش ءُ گوری ھنداں پوجی گن شپ ھیلی کاپٹراں جتاجتائیں تیرگواری کتگ بلے اے درگت ءَ دگہ اھوال دیم ءَ نیتکگ اَنت-

گوست ءَ بلوچ سلاہ بندیں مردمانی نیمگ ءَ بلوچستان ءِ جتاجتائیں جاھاں پاکستان پوج ءِ بنجلانی ارش ءُ دستیگی بیتگ اَنت ءُ چریشی ءَ پوج ءَ بازیں کچے ءَ جانی تاوانانی دیمپانی کنگ کپتگ اَنت-

بلے داں انگت ءَ اے اُرش ءِ زمہ واری ھچ گل ءَ پہ وت ءَ نہ زرتگ –

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں ھُزدار ءِ دمگ زھری کھن ءَ زورگریں پاکستانی پوج ءِ یک ھاسیں کارندہ ظھور لوٹانی تیرگواری کتگ ءُ کُشتگ-

جارکش ءَ گْوشتگ کہ ظھور احمد ء عبدالسلام لوٹانی گوستگیں یک دراجیں مُدتے ءَ چہ زورگریں پاکستانی پوج ءِ سروکی ءَ راج ءِ دُژمنی پُرکاری ءَ ھمگرنچ بوتگ- اے کارندہ ھُزدار ءَ ھوار گوادر ءَ زورگریں پوج ءِ سروکی ءَ چاریگی ءِ کار ءَ کنگ ءَ بیتگ- زھری ءَ بلوچ ورناھانی ءِ زورانسری آوار جنی، لوگانی سر ءَ بیڑبرگ ءَ اے کارندہ ءَ تچکی ءَ ھوار بیتگ وھدے کہ اشی ء بدل ءَ زورگریں پوج ءَ اش نشہ باپاری ءَ موکل داتگ-

جارکش ءَ گْوشتگ کہ اے کارندہ ءَ 2019 ءَ سنگت گل ءِ یک باسک ایں سرمچارے ءِ چاریگی کتگ ءُ زھری بازار ءَ چہ لیویز ءِ دست ءَ آوار جنائینتگ- اے پیسر ءَ سے رند ءَ بی ایل اے ءَ کڈن کتگ کہ آ وتی سلّکاریاں یل بکنت بلے آ یکلشہ راج دُژمنی ءَ پُرکار بیتگ-

جیئند بلوچ ءَ گْوشتگ کہ ظھور لوٹانی راجدروھی ءُ ڈیھ ءِ دُژمنی ءِ سر زدگ بیگ سر ءَ بلوچ راجی آمیدگس ءَ مرگ ءِ پرمان داتگ چریشی ءِ سر ءَ گامگیج زوران ءَ بلوچ سرمچاراں آ وتی گُڈی آسر ءَ سر کتگ اے نیٹورک ءِ آ دگہ مردم ھم مئے نشانگ ءِ تہ ءَ اَنت-

جارکش ءَ گُڈی ءَ گْوشتگ کہ بلوچ لبریشن آرمی اے اُرش زمہ واری ءَ منّ اِیت – راجدروھی ءِ ھمگرنچ ھچ مردم پھل کنگ نہ بیتگ – زورگریں پاکستانی پوج ءُ آئی ءِ ھمکارانی سر ءَ مئے اُرش برجاہ بنت-

اوگانستان ءُ پاکستان ءِ میان ءَ ھستیں سیمسر طورخم آدینگ ءِ سھب ءَ پندی ءُ گاڑیانی واستا پچ کنگ بیتگ-

ھال سر کنوکیں ادارہ اے ایف پی ءِ رد ءَ سرکاری یک مزنیں آپیسرے ءَ سیمسر ءِ رھگوزی ءِ پچ بوگ ءِ ھال راست کتگ-

زانگ بہ بیت ھردوکیں ڈیھانی سیمسر ھما وھد ءَ بند کنگ بیتگ ات کہ ھردوکیں سیمسری لشکراں تیرگواری کتگ ات کہ چریشی ءَ چہ یک ھپتگے ءَ گیش روگ ءُ آیگی راہ ءُ در بند کنگ بیتگ اَنت-

پاکستان ءِ ھیبر ءِ اسسٹنٹ کمشنر ارشاد خان مھمد ءَ اے ایف پی ءَ گوں گوشتگ کہ ٹرکانی چار ءُ ٹپاس کنگ بندات بیتگ ءُ اوگانستان ءِ شھری ءأ کلیئرنس ءُ امیگریشن ءَ پد اوگانستان ءَ روگ ءَ اَنت-

اسلام آباد ءُ کابل ءِ میان ءَ جاور ھال شش ستمبر ءَ سپارتی ءِ مھتلانی دیمپان اَنت ءُ سیمسراں پھزداراں تیرگواری کتگ بیتگ-

طورخم سیمسر ھردوکیں ڈیھانی میان ءَ یک مزنیں گوزانی راھے کہ ایشی ءِ نزیک ءَ اوگان ءِ یک چوکی ءِ بندگ ءَ جیڑہ پاد اتکگ ات-

اے ھردوکیں ڈیھانی میان ءَ باپاری ءُ شھریانی روگ ءُ آیگ ءِ دزگٹتریں رھگوزی اِنت ءُ اے اوگانستان ءُ پاکستان ءِ ھدانی سیمسر ءِ دوھزار ءُ شش سد کلومیٹر ءَ دراج کشیں.کوھاں گوزان کنت ءُ یک راھوکیں بیت اِنت-

ھردوکیں نیمگانی تاجرانی گوشگ اِنت سیمسر ءِ بندش ءِ سبب ءَ ھزاراں ٹن ساز ءُ سامان زوال بیتگ انت- اوگان شھریانی رد ءَ آیاں پاکستان ءِ راہ ءَ درملک ءِ روگ ءِ بالیگاں ھم پشکپتگ اَنت ءُ بازینے ءَ نادراہ جاھاں نمبر گپتگ بیتگ آ ھم شتگ اَنت-

روکپتی بلوچستان ءِ سیمسری ھنداں تیل کشے ایرانی لشکر ءِ ٹکر جنگ ءَ یک مردمے بیران بیتگ –

اھوالانی سر ءَ روکپتی بلوچستان ءِ دمگ سراوان ءِ ھند کلگان ءِ سیمسراں ایرانی لشکر ءَ یک تیل کَشے ٹکر جتگ ءُ چریشی ءَ تیل کش بیران بیتگ-

اھوالانی رد ءَ بیران بیتگین مردم ءِ پجار رامین یاراھمد زئی ء ساھب داد جھمنند ھاش ءِ نام ءَ زانگ بیتگ-

اھوالانی رد ءَ رامین بیران بوگ ءَ پد آئی ءِ لاش لشکر ءَ گون وت ءَ برتگ ءُ لاش ءِ دیگ ءَ انکاری کتگ-

اھوالانی رد ءَ لشکر گوشگ اِنت کہ لاش شمارا ھما وھد ءَ دیگ بیت اِنت کہ شما اے گپ ءَ چِد ءُ دیم مہ بر ات ءُ بہ گوش ات کہ اے کزائے بیتگ-

زانگ بہ بیت رامین ھما وھد ءَ ٹکر جنگ بیتگ کہ آ وتی پرپٹ ءَ گوں روگ ءَ بیتگ کہ ایرانی مرساد ءَ آ ٹرک ءِ سر ءَ ٹکر جتگ ءُ دور داتگ –

بلوچستان ءِ دمگ چہ ڈیرہ بگٹی ءَ یک مردمے بیگواہ وھدے کہ چہ نوشکی ءَ یکے آجو بیتگ-

گیشیں ھالانی رِد ءَ پاکستانی پوج ءَ ڈیرہ بگٹی ءِ تھسیل سوئی ءِ دمگ دولی ءَ پوج ءِ چیک پوسٹ ءَ یک ورنایے دزگیر کنگ ءَ پد بیگواہ کتگ کہ آئی ءِ پجّار واحد بخش ء دین محمد بگٹی ءِ نام ءَ چہ بیتگ-

ھمے وڑ چہ نوشکی ءَ نُھ ماہ ءَ ساری بیگواہ کنگ بیتگیں ورناہ صفیان ء حنیف جمالدینی آجو بیتگ ءُ لوگ ءَ سر بیتگ-

زانگ بہ بیت ڈیرہ بگٹی ءَ چار روچ بیت کہ لشکر کشی برجاہ ءَ اِنت ھمے میان ءَ پاکستانی پوج ءَ بازیں مردمے آوار جنگ ءَ پد بیگواہ کتگ اَنت-