TBP Balochi

بلوچستان ءِ سے جتاجتائیں دمگ ھب چوکی ، شال ءُ پنجگور ءَ ناشناسیں سلاہ بندیں مردماں پاکستانی پوج ءِ سر ءَ اُرش کتگ یکے بیران ءُ سے ٹپی کنگ بیتگ اَنت-

گیشیں ھالانی رِد ءَ سلاہ بندیں مردماں بلوچستان ءِ دمگ پنجگور ءَ برجاھیں پاکستانی پوج ءِ بُنجاھی بُنجل سر ءَ اُرش کتگ- اُرش ءِ وھد ءَ تُرندیں تیرگواری ءُ تراکانی توار اش کنگ بیتگ-

ھمے وڑ مروچی ھب چوکی ءَ گیٹرون شرکت ءِ نزیک ءَ پاکستانی پوج ایف سی ءِ چوکی سر ءَ بمب اُرشے بیتگ-

اِھوالکارے ءِ رِد ءَ ناشناسیں مردماں پوج ءِ پانگس گوں دستی بمب ءَ نشانگ کتگ ءُ تتکگ اَنت- تراک ءَ پد پوج ءِ مزنیں کچے ءَ کارندہ وئیلجاہ ءَ سر بیتگ اَنت-

دوئیں اُرشاں لشکر ءَ جانی ءُ مالی تاوان ءِ گمان اِنت-

دومی نیمگ ءَ بلوچستان ءِ بُنجاھی شھر شال ءَ سلاہ بندیں مردماں پاکستانی پوج پوسٹ سر ءَ اُرش کتگ-

پوج ءِ پوسٹ شال ءِ دمگ ولی تنگ ءِ ھند ءَ نشانگ کنگ بیتگ، واکداراں اے اُرش راست کُتگ گْوشتگ کہ اُرش ءَ یک کارندھے مرتگ ءُ سے ٹپی بیتگ اَنت-

دمگی اِھوالکارے ءِ گْوشگ اِنت کہ اُرش ءِ وھد ءَ پوج ءُ اُرشکارانی میان ءَ تُرندیں تیرگواری ءِ رِد برجاہ بیتگ-

زانگ بہ بیت اے دمگاں بلوچ آجوئی لوٹوکیں سلاہ بندیں گل پُرکار اَنت، ساری ھم اے بُنجل سر ءَ اُرش بیتگ ءُ آئی ءِ زمہ واری بلوچ لبریشن آرمی ءَ منّ اِتگ-

بلے اے سئیں اُرشانی زمہ واری انگت ھچ ءَ گلاں نہ زرتگ اَنت-

بلوچستان ءِ دمگ ڈیرہ بگٹی ، سوئی ءَ سلاہ بندیں مردماں دو مردم آوار جتگ اَنت-

دمگی اِھوالکارانی رِد ءَ پشمبے ءِ روچ ءَ درزنے سلاہ بندیں مردماں سوئی ءَ تاں ڈیرہ بگٹی ءَ رؤکیں بُنجاھی شھدگ ءَ ٹلی مٹ ءِ ھند سر ءَ بند کتگ ءُ بازیں گاڑی یے پٹ ءُ پول کتگ دو مردم ءِ پجّار ءَ پد آوار جتگ اَنت-

اے مردمانی تہ ءَ یکے ءِ پجّار باز محمد ء توڈو مندوانی بگٹی نام ءَ چہ بیتگ ءُ دومی پجّار نہ بیتگ-

گْوشگ بوگ ءَ اِنت کہ اے دوئیں مردمانی سیادی سرکاری پلامرزی کنوکیں سلاہ بندیں ٹولی ءَ اِنت-

بلوچستان ءِ بنجاھی شھر شال ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی پنچ ھزار ءُ یکسد ءُ شست ءُ نُھ روچ سرجم بوتگ انت – مروچی چہ ھزدار ءَ سیاسی ءُ چاگردی باسک رسول بخش بلوچ، دین محمد بلوچ ءُ دگہ مردماں بنجل ءَ اتکگ ءُ بیگواھیں مردمانی گھولاں گوں دلپدردی درشان اِتگ –

بنجل ءَ اتکگیں مردمانی میان ءَ وی بی ایم پی ءِ کمک سرکماش ماما قدیر بلوچ ءَ وتی ھیال درشان اِتگ ءُ گوشتگ کہ بلوچ سرڈگار ءِ سر ءَ بے کساس زلم زوراکیاں ابید ھم بلوچ ھلاس کنگ نہ بوتگ انت ءُ مروچیگیں دور ءَ کہ.جھان ءِ مپاد گوں ھمے ڈیھ ءَ بندوک انت بلوچ راج یک مھکمیں تاکتے جوڈ بوتگ ءُ بلوچ پرزندانی پُرایمنیں جھد مھکم کتگ –

ماما قدیر بلوچ ءَ گوشتگ کہ روچ مروچی بلوچ راج ءَ شریں وڈی ءَ جھد کتگ، پاکستان ءِ زورگیری ءِ بگیری ءَ بلوچ پرزندانی جھد برجاہ انت کہ آیاں ھر وڈیں زوراکیانی دیمپانی کتگ، بلوچ پرزندانی بے دروریں جھد ءُ دیمھونیاں بلوچستان ءِ تہ ءَ پاکستان ءِ درسیں ھُنر ھیلا پاشک کتگ انت –

ماما قدیر بلوچ ءَ گوشتگ کہ پاکستان ءِ داشتگیں چانیگ وار کہ بلوچ راج ءِ میان ءَ نشتگ ءُ وت ءَ بلوچانی ھمدرد زاھر کنگ انت ءُ ھک ءُ اگبال ءُ بلوچ راجی مڈیانی نام ءَ گپتگ ءُ بلوچ راج اسمبلیانی تہ ءَ برتگ انت تانکہ اودا نمیرانیں بلوچ، زورانسری آوار جنگ بوتگیں مردمانی دیمھونی ءُ بلوچ راجءِ ایردستی ءَ کیش کت بہ کناں –

ماما قدیر بلوچ ءَ گوشتگ بلوچستان ءِ بازیں ھند ءَ دمگاں بلوچ راج ءَ پُرایمنیں جھد کنان ءَ پاکستان چانیگ وارانی ھاتر ءَ وتی مراعات ءُ لالچ ءِ سیاست بے سوب کتگ ھمے دمگانی تہ ءَ ھمے چانیگ وارانی رھشونی ءَ پاکستان لشکر کشی کنگ ءُ بلوچ راج ءَ نشانگ کنگ ءَ انت آیاں زورانسری آوار جنگ ءُ بیگواہ کنگ ءَ انت –

بلوچستان ءِ دمگ مستونگ ءَ تراک ءِ آسر ءَ پی ڈی ایم ءِ جارکش ءُ راھشون جے ایو آئی حافظ حمداللہ ءَ ھوار پنچ مردم ٹپی بیتگ اَنت-

پولیس رِد ءَ دگ کش ءَ جمعیت راھشون ءِ گاڑی نزیک ءَ تراک بیتگ- پولیس ءُ کُمکی ٹولی ھما وھد ءَ سر بیتگ اَنت-

جے یو آئی ف ءِ جارکش اسلم غوری ءَ گوشتگ کہ حافظ حمداللہ تراک ءِ آسر ءَ کمو ٹپی اِنت، وھدے کہ حافظ حمداللہ ءِ دو ھمراہ ھم تراک ءَ چہ ٹپی بیتگ اَنت-

ڈپٹی کمشنر مستونگ عبدالرزاق ساسولی ءِ رِد ءَ وئیل پٹ پول انتزامیہ کنگ ءَ اِنت تراک وتکشے یا کہ اناں تنی وھدے زانگ بوگ ءَ نہ اِنت، تراک ءَ حمداللہ ءَ ھوار پنچ مردم ٹپی بیتگ اَنت-

آئی ءَ گْوشتگ کہ حافظ حمداللہ ءِ جاور چہ ھترہ ءَ ڈن اِنت- حافظ حمداللہ مستونگ نادُراھجاہ ءَ دوا درمان کنگ ءَ پد آئی دو ھمراہ ھم شال ءَ برگ بیتگ اَنت-

لیبیا ءِ وزارت داکلہ ءَ گوشتگ کہ دانیال نامیں زری توپانے ءَ بیران بیتگیں مردمانی کچ گیش بوتگ ءُ ھپت ھزار ءَ سر بیتگ اَنت ءُ سِی ھزار مردم بے لوگ اَنت-

سبق ویب سائٹ ءَ شنگ بیتگیں یک اھوالے ءِ رد ءَ وزارت داکلہ ءَ گمان پدر کتگ کہ بیرانیانی کچ دَہ ھزار ءَ گیش بوت کن اَنت-

لیبیا ءِ وزارت داکلہ ءِ درشان ءِ رد ءَ داں انگت ءَ دَہ ھزار ءَ گیش مردم بیگواہ اَنت کہ آیانی نام واکدارانی گور ءَ ھست اَنت ءُ دگہ ھزارانی کچ ءَ بیگواھیں مردم ھست اَنت آیانی نام داں انگت ءَ سرپدی نہ بیتگ اَنت-

وزارت داکلہ ءَ گوشتگ کہ مھلوکین ءَ چار سد درملکی ھم ھست اَنت کہ آیانی تہ ءَ گیشترینانی سیادی مسر ءُ سوڈان ءَ اِنت-

لیبیا ءِ واکدارانی گوشگ اِنت درستاں گیش سانمندیں شھر درنہ ءِ جھمنندان ئیگ اِنت کہ اود ءَ یکشل ءَ زر ءَ لاش دزکپگ ءَ اَنت-

واکدارانی گوشگ اِنت کھر آماچیں شھر درنہ ءَ وبائی نادراھی ھم ودان اَنت کہ داں انگت ءَ اود ءَ لاش کل ءُ کسارات کنگ نہ بیتگ اَنت-

ایوک ءَ درنہ ءَ سِی ھزار مردم بے لوگ اَنت کہ آ شھر ءَ کشگ ءُ مھکمیں جاھاں برگ بیتگ اَنت- لیبیا ءَ زری توپان ءِ کھر ءَ پد سعودی عرب ءُ ھلیجی ڈیھاں بازیں کچے ءَ کمکی ساز ءُ سامان دیم داتگ اَنت-

عرب نیوز ءَ یک رپورٹے ءِ رد ءَ زرباری افریقہ ءِ دو ڈیھ گوستگیں ھپتگ ءِ سَے روچانی توک ءَ بازیں کچے ءَ انسانانی ھلاسی ءِ ود اتگ – آدینگ ءِ روچ ءَ مراکش ءَ زمین چنڈ ءَ سَے ھزار مردمانی بیرانی ءُ پد ءَ دو روچ ءَ پد لیبیا ءَ زری توپان ءَ وتی کھر ایر گپتگ اَنت-

اے ھردوکیں وئیلاں سانمندیں مردمانی کمک ءَ میانی اُستمانی کمک ھم روان دیگ بیتگ اَنت ءُ اے وھد ءَ لیبیا ءِ جاورھال سک ءَ ناگیگی ءِ دیمپان اَنت کہ اود ءَ گوستگیں بازیں سالاں چہ سرکار ءِ نیستی ءِ دیمپانی اِنت-

سر بیتگیں اھوالانی رد ءَ روکپتی بلوچستان ءِ دمگ بیرجند ءِ زندان ءَ ایرانی آمیدگس ءَ دگہ دو بندیگیں مردم پاھو داتگ اَنت-

گیشیں اھوالانی رد ءَ پاھو دیگ بیتگیں مردمانی پجار چِل ءُ ھشت سالی ئیں عبدالناصر قلجائی ء لال مھمد جھمنند زاھدان ءُ سی ءُ ھشت سالی ئیں مھسن سنجرانی ء پرویز جھمنند زاھدان ءِ ناماں زانگ بیتگ اَنت-

ھردوک چار روچ ءَ پیش ماں بیرجند ءِ زندان ءَ پاھو دیگ بیتگ اَنت ءُ ایشاں چہ پیش سعید سنجرانی ھم بیرجند ءِ زندان ءَ پاھو دیگ بیتگ ات-

عبدالناصر ایرانی سال سیزدہ سد ءُ نود ءُ نُھ ءَ نشہ ءِ باپاری ءِ بھتام ءَ گرگ بیتگ ءُ ایشانی ھواری ءَ آ ھردوک ڈیھ ءِ بگیری ءِ کار کنگ ءِ بھتام ءَ گرگ بیتگ اَنت-

روکپتی بلوچستان ءَ ایرانی امیدگس ءِ پرمان ءِ پاھو دیگ یکشل ءَ برجاہ اَنت کہ اے پاھو گیشتر نشہ باپاری ءِ پژدر ءَ دیگ بوگ ءَ اَنت-

روکپتی بلوچستان ءَ سیاسی پاٹیانی بھتام اِنت کہ ایران لس مھلوک ءَ کار ءُ روزگار نہ دنت چرے ھاتر ءَ مردم اے جان کُشیں کار کنگ ءَ لاچار اَنت-

بلوچ راجی آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل ھکل ءَ شنگ کرتگیں درشانے ءِ تہ ءَ کلات ءَ پاکستانی پوج ءِ سر ءَ بوتگیں اُرش ءِ زمہ واری منّ اِتگ ءُ گوشتگ کہ اے اُرش ءَ کم چہ کم یک کارمند ءِ مُرتگ ءُ بازینے ءِ زدگ بوتگ انت –

جارکش جیئند بلوچ ءِ رِد ءَ بی ایل اے ءِ سرمچاراں کلات ءَ زورگیریں پاکستانی پوج ءِ سر ءَ گوں وتکاریں سلاھاں اُرش کتگ ءُ اے اُرش شاہ مردان ءَ ھما وھد ءَ زورگیریں پاکستانی پوج ءِ سر ءَ کتگ وھدیکہ آ پانگس ءَ ڈن یکجاہ بوتگ انت ءُ اے اُرش ءَ کم چہ کم یک دژمن کارمندے مُرتگ ءُ بازینے زدگ بوتگ انت –

جارکش جئیند بلوچ ءَ وتی درشان ءِ گڈسر ءَ گوشتگ کہ بلوچ لبریشن آرمی اے اُرش ءِ زمہ واری ءَ منیت ءُ زورگیریں پوج ءِ بلوچستان ءِ تہ ءَ سرجمی ءَ در آیگ ءَ تاں مئے اُرش برجاہ مان انت –

بلوچ راجی آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشانے ءِ تہ ءَ مند ءَ پاکستانی پوج ءِ سر ءَ بوتگیں اُرش ءِ زمہ واری منّ اِتگ ءُ گوشتگ کہ اے اُرش ءَ یک کارمند ءِ مُرتگ ءُ یک ءِ زدگ بوتگ –

جارکش میجر گوھرام بلوچ ءِ رِد ءَ بی ایل ایف ءِ سرمچاراں سَے شمبے ءِ بیگاہ ءِ شش ءَ کیچ ءِ دمگ مند ءَ چکاپ کور ءَ پاکستانی پوج ءِ نوک جوڑ بیتگیں پانگس ءِ سر ءَ اُرش کُرتگ ءُ سرمچارانی اُرش ءَ دُژمنیں پوج ءِ یک کارمندے ھما جاہ ءَ مُرتگ ءُ یکے زدگ بوتگ –

جارکش ءِ رِد ءَ سرمچاراں اے اُرش چکاپ کور ءَ برجاھیں پانگس ءِ سر ءَ کتگ کہ آیاں نزیک ءَ شُتگ گوں ٹوھیں ءُ وتکاریں سلاھاں نشانگ کُرتگ – اُرش ءِ دومی روچ ءَ پاکستانی پوج ءِ جنگی بالگرد ھم ھمے جاہ ءُ کش ءُ گْور ءِ ھند ءُ دمگاں تیرگْواری کُرتگ بلے دُژمن ءِ پسھی اُرش ءَ ھچ پیمیں تاوان نہ بوتگ ءُ سرمچار وتی مھکمیں سنگراں سر بوگ ءَ سوبین بوتگ انت –

میجر ءِ رِد ءَ بی ایل ایف دُژمنیں پوج ءِ چست ءُ ایراں چہ نزیک ءَ چارگ ءَ اِنت ءُ اے پانگس ءِ جوڑ کنگ ءَ پد اُرش کنگ بوتگ تانکہ دمگ ءَ دُژمن ءِ چست ءُ ایر کم کنگ بہ بنت –

جارکش میجر گوھرام بلوچ ءَ وتی درشان ءِ گڈسر ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ دُژمن ءَ کڈن کنت کہ آ زورگیپتیں بلوچستان ءَ وتی کلات، پانگس ءُ سنگراں تہ ءَ پھریز نہ اِنت – بی ایل ایف ھر کجا آئی ءِ سر ءَ اُرش کنگ ءِ توان ءَ دار ایت ءُ اے اُرش داں بلوچستان ءِ آجوئی ءَ برجاہ مان انت –

بلوچستان ءِ تیاب دپی دمگ گوادر ءَ پاکستان ءِ چیریں ادارھانی کارمنداں سوشل میڈیا ایکٹوسٹ عبداللہ رحیم نامی ورنایے زورانسری آوار جتگ ءَ بیگواہ کتگ –

اے ورنا بلوچستان ویدر فورکاسٹ نامی پیج ءِ ایڈمین انت کہ مروچی نیمروچ ءَ ادار یک ءَ چیریں ادارھانی کارمنداں ماں دھور ءَ یک ٹیل ءِ ڈپو ءَ آوار جتگ ءُ بیگواہ کتگ –

اھوالکار ءِ رِد ءَ عبداللہ سمیع اللہ ءِ مستریں برات انت کہ لھتے سال ساری آئی ءِ کستریں برات سمیع اللہ ھم ناشناسیں مردماں شپ ءِ سیمی پاس ءَ چہ جندے گس ءَ آوار جتگ ءُ گوں وت برتگ پدا سک باز لٹ شاپ کنگ ءَ ھپتگے پد یل کنگ بوتگ – بلے یل بوگ ءَ پد ھم ناشناسیں مردماں آ دلیساہ کتگ بوتگ کہ ھمے سوب ءَ آئی ءَ وتی وانگ ھم سرجم کت نہ کتگ ءُ در ملکاں شتگ –

کھول ءِ رِد ءَ عبداللہ وتی وانگے سرجم کنگ ءَ پد بے روزگار بوتگ بلے گوستگیں شش ھپت ماہ بیت کہ ٹیل ءِ ڈپو ءَ منشی بوتگ کہ مروچی سینزدہ ستمبر دوھزار ءُ بیست ءُ سَے ءِ ادار یک ءَ آوار جنگ ءُ بیگواہ کنگ بوتگ –

چہ دومی نیمگ ءَ تربت ءَ ھمے ھال آیگ ءَ انت کہ پاکستانی پوج ءِ دست ءَ زورانسری آوار جنگ بوتگیں نوشاد یل بوتگ ءُ وتی گس ءَ سر بوتگ –

زانگ بہ بیت نوشاد ء میا داد بجیر سِی ءُ یک جولائی ءَ چہ تربت ءَ پاکستانی پوج ءِ دست ءَ زورانسری آوار جنی ءَ پد بیگواہ کنگ بوتگ –

ھمے وڈ چہ گوادر ءَ زورانسری آوار جنگ بوتگیں بی ایس او پجار ءِ باسک جام جبار یل بوتگ ءُ وتی گس ءَ سر بوتگ –

آئی ءِ یل بوگ ءِ ھبر بی ایس او پجار ءَ راست کتگ ءُ گوشتگ کہ جام جبار یل بوتگ ءُ گس ءَ.سر بوتگ –

سی ٹی ڈی ءَ ٹاہ داتگ کہ آیاں مستونگ ءَ میڑے ءَ داعش ءِ مزنیں کماندارے جتگ –

کاؤنٹر ٹررازم ڈیپارٹمنٹ ءِ جارکش ءَ وتی درشانے ءِ تہ ءَ ٹاہ داتگ کہ بلوچستان ءِ دمگ مستونگ ءَ سی ٹی ڈی ءَ آپریشن ءِ میان ءَ داعش ءِ کماندار غلام دین شاہوانی کُشتگ –

جارکش ءَ گوشتگ کہ سی ٹی ڈی ءَ اے مرد ءِ دزگیر کنگ ءِ کوشست کتگ کہ اودا اشی ءَ کارمندانی سر ءَ تیرگواری کتگ کہ ھردونیمگ ءَ بوتگیں تیرگواری ءَ آ جنگ بوتگ –

جارکش ءَ ٹاہ داتگ کہ اے کماندار ءَ مستونگ ءِ تہ ءَ اُرشانی شور ٹھینتگ انت –

سی ٹی ڈی ءِ رِد ءَ غلام دین شاہوانی پنام شعیب بلوچستان ءِ تہ ءَ داعش ءِ مزنیں کماندارانی تہ ءَ ھوار بوتگ کہ آئی ءَ سال دوھزار پانزدہ ءَ داعش ءِ تہ ءَ بھر زرتگ وھدیکہ آئی ءَ ٹرینگ چہ تحریک تالبان پاکستان گور ءَ ماں وزیرستان ءَ کتگ –

سی ٹی ڈی ءِ رِد ءَ اے مرد ءَ مستونگ ءَ جمعیت علمائے اسلام ءِ رھشون مُلا عبدالغفور حیدری ءِ سر ءَ اُرش، سال دوھزار شانزدہ ءَ ماں شال ءَ وکیلانی سر ءَ اُرش، ملا سراج الحق ءِ سر ءَ اُرش، مچ ءَ ھزارہ کھن جنانی کوش، سبی ءَ پوج ءِ سر ءَ اُرش ءُ شال، مستونگ ڈھاڈر ءَ پولیس ءُ لیویز ءِ سر ءَ بوتگیں اُرشاں اشی ءِ دست مان بوتگ -.

سی ٹی ڈی اے ھبر چہ دگہ جاھاں تنی وھدی راست کنگ نہ بوتگ انت – زانگ بہ بیت بلوچستان ءَ سی ٹی ڈی کاروائی شکی نگاھاں چارگ بنت وھدیکہ گوست ءَ آئی ءِ بازیں اُرش دروگ بوتگ انت کہ پیش ءَ زورانسری آوار جنگ بوتگیں بلوچ ءُ دینی گلانی باسک کُشتگ ءُ چگل داتگ انت –