گوادر : تیرگواری، گیس آس دیگ ءُ دزگیریاں پد ھم نندانک برجاہ

بلوچ راجی مچی ءِ سر ءَ ھکومت ءِ زوراکی ءِ بگیری ءَ راج زھرشانی ءَ اِنت وھدے کہ ھکومت نیمگ ءَ چہ شھدگ چارمی روچ ءَ یکشل ءَ بند-

مستونگ، گڈانی ءَ تلار ءِ ھند سر ءَ بلوچ راجی مچی ءَ ھواریں مردمانی نندانک برجاہ ءَ اِنت دومی نیمگ ءَ ھکومت نیمگ ءَ چہ اڑان برجاہ ءَ اِنت-

گوادر ءَ جاور سک نگیگ اَنت ءُ زندمان ءَ ھمگرنچ ھرچیز سر ءُ چیر اَنت- داں گُڈی ھالاں تاں پاکستانی پوج ءَ نندانک سر ءَ گیس آس داتگ، تیرگواری ءَ پد مردمانی سر ءَ بکتر بندیں گاڑی سر ءَ گوازینتگ اَنت بلے پد ءَ مھلوک پدی زر ءَ مچ بیگ ءَ اَنت-

نیمروچ وھد ءَ نندانکجاہ ءَ سر ءَ تچکی ءَ تیرگواری کتگ بازیں مردمے ٹپی بیتگ اَنت – اود ءَ انڈس نادُراھجاہ ءَ پوج ءِ دست ءَ اِنت- چریشی ءَ بیران ءُ ٹپیانی تچکیں کچ زانگ نہ بیتگ اَنت کہ نو اے وھد ءَ پدی زر ءَ زرواکی ءَ پد مھلوک مُچ بیگ ءَ اِنت-

ھمے وڑ بلوچ یکجھتی کمیٹی نیمگ ءَ چہ مروچی سریاب دگ سر ءَ بلوچستان شھدربرجاہ ءِ دیم ءَ یک زھرشانی ئیں روانکے کشگ بیتگ کہ آئی ءِ تہ ءَ بلوچ راج ءَ راج ءَ مزنیں کچے ءَ بھر زرتگ-

یکجھتی کمیٹی ءِ جارکش ءَ گْوشتگ کہ اے وھد ءَ سرجمیں بلوچستان، ھب چوکی ءَ چہ شال ءُ گوادر ءَ سرجمی ءَ بند اِنت ءُ گوادر ءَ سرجمی ءَ کرفیو جنگ بیتگ- ریاست ءِ زوراکی ءُ ناشرکاری ءَ اَبید بلوچ راج ھرچ دمگ ءَ دگانی سر ءَ درتکگ اَنت ءُ راھبند ءِ سر ءَ وتی کینگ ءَ درشان کنگ ءَ اَنت-

آیاں گْوشتگ کہ ما بلوچ راج ءَ گوں دزبندی کن ایں کہ آ جوانیں وڑے ءَ زھرشانی ئیں روانکاں بھر بزور اَنت ءُ ریاست ءَ را کلوہ بدے اَنت کہ نو گیش بلوچ راج زُلم ءُ زوراکیاں اوپار نہ کنت-