TBP Balochi

ما پرچا نہ جیڑیں؟

نبشتہ کار: نوید بلوچ

دی بلوچستان پوسٹ

ما پرچا نہ جیڑ ایں؟ کہ اے مارا ابید تاوان ءَ دگہ ھچ ندنت ما یکو ھمے ھسد ءُ کینگ داشتگ انگت ھمے ھسد ءُ کینگ ءَ چہ در نیائیں پرچا؟ اے نزوری ءَ پرچا وتی اندر ءَ چہ در نہ کن ایں-

اے وھد ءَ ما دُرست گُلام ایں ھمکروچ یک لوگے ءَ یک تیرسُپتگیں جونے کئیت ءُ ھمکروچ یک لوگے ءِ یک مردمے چِست کنگ بیت اِنت ایشانی چست کنوک ءُ کُشوک کے اِنت؟ مئے کُلّانی دُژمن اِنت اے نہ اِنت کہ منی دُژمن دگرے ءُ تئی دگرے من وتی دُژمن ءَ دگہ ھسابے ءَ چاراں تو وتی دُژمن ءَ دگہ ھسابے ءَ چار ئے –

اے ھما دُژمن اِنت کہ ما ایشی ءِ کاراں ارزان کنگ ءُ دست ءَ دیگ ءَ ایں راہ ءَ راھبنداں ساپ پلگار کنگ ءُ دیگ ءَ ایں دانکہ آئی ءِ کاراں ھم بکنت تاوان ھم مہ وارت-

نی من کایاں وتی اسلی بُنگپ ءِ سر ءَ ھر وھدے کہ من رسانکدری جھان ءَ سر جن آں الّم یک نبشتانکے دیم ءَ کپ اِیت ءُ نبشتانک ناں راج ءِ بزگی ءَ درشان کنگ ءَ اِنت نانکہ شھیدانی ریتکگیں ھونانی ستاشانی کنگ ءَ اِنت ناں بیگواھیں مردمانی کھولانی درداں ھوار بوگ ءَ اِنت بس تھنا یک دومی ءِ رد گْوشگ ءُ زاہ دیگ ایر جنگ دگہ ھچ نہ گنداں- شما انچیں جاھاں نشتگ اِت ءُ شما چی ھاتر ءَ شُتگ اِت ؟ شما یک مکسدے ءِ ھاتر ءَ شُتگ اِت بلے پرچا وتی ند ءَ آ مکسد ءِ ھاتر ءَ کارمرز کنگ ءَ نہ ئے؟-

شمئے ند ءِ رد کارمرزے ءَ چہ مارا دُژمن تاوان دیگ ءَ اِنت شما وت دُژمن ءَ را ھال دیگ ءَ اِت بیا واجہ اے ایش اِنت آ آ اِنت دُژمن وَ ھمے لوٹ اِیت کہ ایش وت ماں وت گُٹ ماں گُٹ بہ بنت وتکوش بہ بنت –

ما ھر وھد ءَ نند ایں ٹوئیٹر “X” اسپیس ءَ یکے دومی ءِ رازاں پاشک کن ایں پلانی کے اِنت پلانی کجا نشتگ ھمے ھاتر ءَ دُژمن تہ ءَ نشتگ ءُ سوب کنگ ءَ اِنت ھانی گُل بلوچ کے ءَ زانتگ آ روکپتی بلوچستان ءَ جھمنندیں؟ یک ھسابے ما بہ چار ھانی گُل بلوچ ءُ آئی ءِ لوگ ءِ واجہ کوش زمہ وار دُژمن نہ اِنت بلکیں ما ءُ شُما اِنت دُژمن نزانت کے کُجا نشتگ ءُ کے چی کنگ ءَ ایں ھمد ءَ دُژمن سوب زور اِیت ما ءُ شما آئی ءَ ھال دے ایں ھمے وڑ مئے مردماں یک یک ءَ کُشان کنت ءُ یک یک ءَ چست کنان کنت ھمے مئے ءَ شُمئے ناسرپدی ءِ سبب ءَ-

بلوچی ءَ گپے گْوش اَنت ” مار ءَ ھم بہ جن لَٹ ھم مہ پروش اِیت ما دُژمن ءَ انچش کتگ آ مئے راج ءِ پُسگاں انچش جنگ ءَ اِنت لَٹ نہ پُرشگ ءَ اِنت بلے مارا جنگ ءَ اِنت، اے گپ ءِ مکسد ایش اِنت کہ دُژمن مئے راج ءِ ھما ورناہ ءُ کماش سلاہ بند اَنت یا کہ ھما سیاسی گلاں گوں بندوک اَنت آیاں جنگ ءُ گرگ ءِ وڑ وڑیں شوربندی کنت ھُنر ساز اِیت ھرچ درچ کنت کوشست کنت کہ آیاں بہ جناں وتی دْراھیں مشینریاں کارمرز کنت بلے انگت بے سوب بیت بلے ما ءُ شما آئی ءِ کاراں ارزان کنگ ءَ ایں کہ آ ھرچ درچ مکنت ءُ تکلیپ مہ بیت ءُ تاوان مہ وارت بلے مردماں بہ جنت آیانی مستریں ما وَ شُما ایں دُژمن ھم ھمے لوٹ اِیت آیانی تہ ءَ وت ماں وتی جیڑہ ءَ ودی بہ بنت یکے دومی ءَ کُشگ ءَ ساڑی بہ بیت اِنت –

بلے ما انگت سرپد نہ بہ ئے وھدے کہ یک مردمے وتی لوگ ءِ تھی جیڑھاں ڈن ءَ تالان بہ کنت گُڑا آ الّم تاوان وارت اے مئے ءُ شمئے لوگی جیڑھاں مئے تہ ءَ ردی یے یا کہ دگہ گپے بیتگ یا کہ ھست باید ما ءُ شما اے جیڑھاں وت ماں وت بہ ننداں ءُ جیڑھاں بہ گشیناں نانکہ بیا سر ءِ بازار مھلوک ءَ را ھال دے کہ اے وڑ بوتگ آ وڑ بوتگ مردمانی جاگھانی ڈس ءُ نشاناں بد ئے گُڑا رند ءَ تاوان ورگ ءَ پد دستاں سر ءَ بکن تھنا بژنیگ بو رندگیں بژنیگ بوگ ءَ پائدگ نیست –

باید شما ھمے ند ءَ کہ یکے دومی ءِ سر ءَ کارمرز کنگ ءَ ئے اے ند ءَ دُژمن ءِ سر ءَ کارمرز بکن ایں وتی راج ءِ بزگی ءِ سر ءَ کارمرز کن وتی بیگواھیں ماتانی پریاتانی سر ءَ کارمرز کن وتی ندر بوتگیں پُسگانی سر ءَ کارمرز کن –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں اھوالانی رد ءَ روکپتی بلوچستان ءِ دمگ سراوان ءَ پٹاسکانی ترکگ ءَ دو کسان سالیں زھگ ستکگ ءُ بیران ءُ یکے زدگ بیتگ-

گیشیں آسپیچ سراوان ءَ کسان سالیں زھگاں پٹاسک زرتگ ءُ آروسی دیوان ءَ روگ ءِ وھد ءَ آیانی پرپٹ وئیل ءِ آماچ بیتگ ءُ چریشی ءَ پٹاسکاں آس لگ اتگ ءُ سے گونڈو ستکگ اَنت ءُ دو بیران بیتگ انت ءُ یکے زدگ بیتگ-

بیران بیتگیں زھگانی پجار محمد دھواری ء محمد صالح جھمنند کلاتک، مرتضیٰ دھواری ء شاہ مراد ءِ ناماں بیتگ اَنت ءُ زدگ بیتگیں گونڈو ءِ پجار حسیب دھواری ء یحییٰ جھمنند آسپیچ ءِ نام ءَ زانگ بیتگ-

اے وئیل گوستگیں شپ ءَ پیش اتکگ کہ گونڈواں وتی پرپٹ ءَ پٹاسک لڈ اتگ ءُ آروسی دیوانے ءَ روگ ءَ بیتگ اَنت کہ پرپٹ وئیل ءِ آماچ بیتگ ءُ آس کپتگ –

زدگ بیتگیں حسیب بنداتی ءَ سراوان ءِ نادراہ جاہ ءَ درمان کنگ بیتگ ءُ گیشیں درمان کنگ ءَ زاھدان ءَ برگ بیتگ

روکپتی بلوچستان ءِ بنجاھی شھر زاھدان ءَ گوستگیں روچ ءَ بیتگیں زھرشانی ءَ پد بازیں مردمے گرگ ءُ بیگواہ کنگ بیتگ اَنت-

آوار جنگ بیتگیں مردمانی تہ ءَ دو مردمانی پجار عرفان شاھوزئی ءُ صالح ریگی جھمنند زاھدان ءِ نام ءَ زانگ بیتگ اَنت-

اھوالانی رد ءَ گوستگیں روچ ءَ بیتگیں زھرشانی ءَ پد کساس ھژدہ مردم دزگیر کنگ ءُ برگ بیتگ اَنت-

اھوالانی رد ءَ گوستگیں روچ ءَ زھرشانی ءِ وھد ءَ پولیس ءُ زھرشانی کنوکانی میان ءُ سینگ جنگ ءُ کائی بیتگ ءُ چریشی ءَ اود ءَ بازیں زھگے زدگ بیتگ اَنت-

زاھدان ءَ گوستگیں روچ ءَ بیگواھیں مردمانی یل کنگ ءِ ھاتر ءَ زھرشانی کنگ بیتگ اَت-

زانگ بہ بیت دو روچ ءَ پیش روکپتی بلوچستان ءِ جتا جتائیں جاھاں ھپت مردم آوار جنگ ءُ برگ بیتگ ات اَنت کہ آیانی درگت ءَ دگہ اھوال دیم ءَ نیتکگ اَنت-

روکپتی بلوچستان ءَ مردمانی بیگواھی ءُ گرگ ءُ برگ ھما وھد ءَ گیش گندگ ءَ اتکگ انت کہ گوستگیں سال ءَ ماھو نامیں زھگے ءِ گون ءَ پولیس ءِ زوراکی ءَ پد اود ءَ زھرشانیانی درچے بندات بیتگ ات ءُ چرے زھرشانیانی پژدر ءَ بازیں کچے ءَ مردم کشگ ءُ بیگواہ کنگ بیتگ ات اَنت-

بلوچستان ءِ بنجاھی شھر شال ءَ گوستگیں روچ ءَ ماں بلوچی اکیڈمی ءَ بلوچستان یونیورسٹی کمپیوٹر سائنس ڈیپارٹمنٹ ءَ این ایل پی بلوچی پراجیکٹ (Natural Language Processing in Balochi) ءِ درگت ءَ ورکشاپ ءِ برجم داشتگ –

اے ورکشاپ ءَ اکیڈمی ءِ سرکماش رفیق بلوچ ، کمپیوٹر سائنس ڈیپارٹمنٹ ءِ سرکماش ڈاکٹر عبدالباسط ءَ ھوار ڈیپارٹمنٹ ءِ فیکلٹی باسک ءُ نودربراں بھر زُرتگ –

این ایل پی پروجیکٹ ءِ درگت ءَ ہیبتان عمر ءَ اتکگیں مردم سرپدی داتگ ءُ چہ آیاں تکنیکی شور ءُ سلاہ کتگ –

مراگش ءِ سرکماش کماش رفیق ءَ تران کنان ءَ گوشتگ کہ بلوچی اکیڈمی ءِ مول ءُ مُراد بلوچی زبان ءُ لبزانک ءِ دیمروئی ءُ پھازگ انت- اے درگت ءَ اگاں بلوچی زبان ءَ را کمپیوٹیشنل لینگویج ءِ جھت ءَ آرگ مہ بیت گڑا پہ زبان ءَ دیمروئی کنگ گران انت –

آئی ءَ گوشتگ کہ بلوچی اکیڈمی ءِ واھگ انت کہ چوشیں تکنیکی مردمانی کمک زورگ بہ بیت کہ آ کمپیوٹر فیلڈ ءَ کار ءَ انت ءُ سرپد انت-

بلوچستان یونیورسٹی ءِ کمپیوٹر سائنس ڈیپارٹمنٹ ءِ سرکماش ڈاکٹر عبدالباسط ءَ گوشتگ کہ کمپیوٹر سائنس ءِ فیکلٹی باسک ءُ نودربر مدام پہ چوشیں پراجیکٹانی سرا کار کنگ ءِ واھگ دار انت – اگاں بلوچی اکیڈمی آیاناں یک پلیٹ فارمے دنت گڑا الّم آ وتی کرد ءَ پیلو کن انت –

آئی ءَ گوشتگ کہ انوں کہ جھان اے آئی (AI) ءُ چیٹ جی پی ٹی (ChatGT) ءَ سر اِنت گڑا پہ زباناں زندگ بوگ باز گران انت، پرچا کہ ایوک ءَ ھما زبان زندگ مان انت کہ آ کمپوٹر مشین ءِ زبان ءَ سرپد بہ بنت یا کہ مشین آیانی زبان ءَ سرپد بہ بیت – اے درگت ءَ باز کار کنگ لوٹیت ءُ اگاں اے فیلڈ ءَ یلہ بدی ایں گڑا نہ زبان پشت کپیت ءُ نہ راجانی لبزانک ءُ ربیدگ پشت کپ انت –

گڈسر ءَ آئی ءَ سرکماش رفیق ءِ منّت گپتگ کہ ڈیپارٹمنٹ ءِ نودربر ءُ باسکاناں سرپد کنگ ءَ چوشیں ورکشاپ ءِ برجم داشتگ –

ورلڈ کپ ءِ ھژدھمی گوازی آسٹریلیا ءُ پاکستان ءِ میان ءَ بوتگ کہ آسٹریلیا ءَ ارزانی ءَ پاکستان شست ءُ دو رناں پروش داتگ –

بھارت بنگلور ءَ چناسوامی پٹ بوتگیں اے گوازی ءَ آسٹریلیا ءَ اولسر ءَ بیٹنگ کتگ ءُ سَے سد ءُ شست ءُ ھشت رنانی ٹارگٹ ایرکتگ کہ پاکستان لیبی چِل ءُ پنچمی اوور ءِ سیمی بالاں دراہ آؤٹ بوتگ انت ءُ آیاں بس سَے سد ءُ پنچ رن آؤرت کتگ –

امام ءُ عبداللہ شفیق ءِ ھواری ءَ جوڈ کتگیں یکسد ءُ سِی چار رناں ھم آسٹریلیا پروش دات نہ کتگ، عبداللہ ءَ شست ءُ چار ءُ امام ءَ ھپتاد رن جوڈ کتگ ءُ آؤٹ بوتگ انت –

پاکستان ءِ کپٹن بابر اعظم ھژدہ رنانی جوڈ کنگ ءَ پد ایڈم زمبا ءَ آوٹ کتگ، سعود شکیل ءَ سِی، افتخار ءَ بیست ءُ شش، محمد نواز ءَ چاردہ رن جوڈ کتگ انت وھدیکہ اسامہ میر ءَ رن ءِ جند جوڈ نہ کتگ ءُ پیسر ءَ آؤٹ بوتگ –

آسٹریلیا ءِ نیمگ ءَ ایڈم زمپا ءَ چار پاکستانی لیبی آوٹ کتگ انت، مارکس ءَ دو، ہیزل، مچل اسٹارک ءُ پیٹ کمنز ءَ یک یک وکٹ ءِ گپتگ –

چدوپیسر ءَ آسٹریلیا ءَ اول سر ءَ بیٹنگ کنان ءَ نُھ وکٹانی تاوان ءَ سَے سد ءُ شست ءُ ھپت رن جوڈ کتگ انت ءُ پاکستان ءِ دیم ءَ سَے سد ءُ شست ءُ ھشت رنانی ٹارگٹ ایر کتگ –

اوپنر ءَ اتکگیں مچل مارش ءُ ڈیوڈ وارنر ءَ پاکستان ءِ بولر الکاپ ءَ ششتگ انت ءُ وتی ٹیم سوبمند کنائیں اِتگ –

مچل ءَ مارش ءَ یکسد ءُ بیست ءُ یک رن جوڈ کتگ ءُ آوٹ بوتگ، گلین ءَ رن جوڈ نہ کتگ ءُ واتر بیتگ اسٹیو ءَ ھپت رن جوڈ کتگ ءُ پدا اسامہ میر ءَ آؤٹ کتگ –

مارنوس ءَ ھشت ءُ مچل اسٹارک ءَ دو رن جوڈ کتگ ءُ آؤٹ بوتگ انت -.

پاکستان ءِ نیمگ ءَ شاھین شاہ آفریدی ءَ پنچ ءُ حارث رؤف ءَ سَے وکٹ گپتگ انت –

بلوچستان ءِ جتاجتائیں دمگ ھب ، آواران ءُ بولان ءَ تیرگواری ءُ دگ وئیل آسر ءَ سے مردم بیران یک لاشے دزکپتگ ءُ چار ٹپی بیتگ اَنت-

سربوتگیں ھالانی رِد ءَ آواران ءِ تھسیل گیشکور ءَ ناشناسیں سلاہ بندیں مردمانی تیرگواری ءَ چہ لوگ واجہ گوں لوگ بانُک ءَ بیران بیتگ اَنت-

ھالانی رِد ءَ پشمبے ءُ آدینگ ءِ میانی شپ ءَ آواران ءِ تھسیل گیشکور ءِ دمگ گشانگ ءَ ناشناسیں سلاہ بندیں مردماں دلمراد ء جان محمد لوگ ءَ پترتگ ءُ تیرگواری کتگ چریشی ءِ آسر ءَ دلمراد ء جان محمد ءُ آئی ءِ لوگ بانُک نور بی بی ھما دمان ءَ بیران بیتگ اَنت-

ھال سر بیگ ءَ لیویز وئیلجاہ سر بیتگ – لیویز ءَ گیش پٹ ءُ پول برجاہ کتگ- وئیل سوب انگت زانگ نہ بیتگ-

ھمے وڑ بلوچستان ءِ باپاری شھر ھب ءِ کور ءَ یک زالبولے ءِ لاشے دزکپتگ-

گیشیں ھالانی رِد ءَ زالبول سنگ ءُ ڈوک جتگ کُشتگ ، گیشیں پٹ پول ھاتر ءَ لاش ھب نادُاھجاہ ءَ برتگ- گیشیں پٹ پولیس کنگ ءَ اِنت-

دومی نیمگ ءَ بولان ءَ پکنک ءَ رؤکیں گاڑی وئیل آماچ بیتگ چریشی ءِ آسر ءَ یک مردمے بیران ، چار ٹپی بیتگ اَنت-

گاڑی تُرند روگ سبب ءَ وئیل آماچ بیتگ ، چریشی ءِ آسر ءَ یک مردمے بیران بیتگ ءُ چار ٹپی بیتگ اَنت-

ٹپی نادُراھجاہ برگ بیتگ اَنت آیانی تہ ءَ دو ءِ جاور نگیگ اَنت – وئیل آماچ بیتگیں مردمانی سیادی چہ شال ءَ اِنت-

سر بیتگیں اھوالانی رد ءَ روکپتی بلوچستان ءِ بنجاھی شھر زاھدان ءَ مھلوک ءَ بیگواھیں مردمانی ھاتر ءَ زھرشانی روانک کش اتگ-

روانک آدینگ ءِ نماز ءَ پد مھلوک ءَ بازیں کچے ءَ زھرشانی کتگ ءُ اود ءَ مردماں بیگواھیں مردمانی یل کنگ لوٹ کتگ-

اود ءَ مھلوک ءَ مولانا نقشبندی ءَ ھوار بندیگانی یل کنگ ءِ لوٹ کتگ ءُ اود ءَ سرکار ءِ ھلاپ ءَ اوگام جتگ بیتگ-

زاھدان ءَ زھرشانی کنوک ءُ پولیس ءِ میان ءَ سینگ جنگ کن ءُ کائی بیتگ ءُ چریشی ءَ زھرشانی ھواریں کسان سالیں زھگ زدگ بیتگ اَنت-

زانگ بہ بیت روکپتی بلوچستان ءَ مردمانی بیگواھیانی درچ یکشل ءَ برجاہ اَنت ءُ اود ءَ مردم گرگ ءُ بندیگ کنگ بیگ ءَ اَنت-

زانگ بہ بیت گوستگیں روچ ءَ روکپتی بلوچستان ءِ جتا جتائیں جاھاں ھپت مردم گرگ ء بیگواہ کنگ بیتگ اَنت-

بیگواہ کنگ بیتگیں مردم زاھدان، دلگان، ایرانشھر ءُ دگہ دگہ شھراں آوار جنگ بیتگ اَنت، اود ءَ آوار جنگ بیتگیں مردم گیشتر ورنایانی لڑ اِنت-

روکپتی بلوچستان ءِ جتا جتائیں جاھاں ایرانی لشکر ءَ ھپت مردم دزگیر کنگ ءَ پد ناشناسیں جاھاں برتگ انت –

آوار جنگ بیتگیں مردم ایرانشھر، زاھدان ءُ دلگان ءَ آوار جنگ ءُ برگ بیتگ اَنت-

سر بیتگیں اھوالانی رد ءَ روکپتی بلوچستان ءِ بنجاھی شھر زاھدان ءَ ایرانی لشکر ءَ پنچ ورنا آوار جنگ ءَ پد گون وت برتگ اَنت-

آوار جنگ بیتگیں مردمانی پجار سید ریگی ،ھامد براھوئی،اھمد براھوئی،ناسر براھوئی ءُ الیاس ھاتمی نژاد ء شپی مھمد ءِ ناماں زانگ بیتگ انت-

اھوالانی رد ءَ ایشانی توک ءَ سید ریگی گوستگیں روچ ءَ آوار جنگ ءُ برگ بیتگ ءُ ھامد براھوئی اھمد براھوئی ءُ ناسر براھوئی دوشی آوار جنگ ءُ برگ بیتگ اَنت ءُ الیاس ھاتمی زاھدان ءَ نیکراھی مسیت ءَ یک نودربرے بیتگ کہ آ ھم گوستگیں روچ ءَ آوار جنگ ءُ برگ بیتگ-

ھامد براھوئی، اھمد براھوئی ءُ ناسر براھوئی نیمروز ءِ جھمنند اَنت ءُ زاھدان ءَ دستکاری ءَ روگ ءَ بیتگ اَنت سپید آبہ ءَ نیمروز ءِ ھند ءَ آوار جنگ ءُ برگ بیتگ اَنت ھر سئیں نیمروز ءِ جھمنند گوشگ بوگ ءَ اَنت-

ھمے وڑ ءَ گوستگیں روچ ءَ چہ دلگان ءَ یک مردمے ھم آوار جنگ ءَ پد ناشناسیں جاھاں برگ بیتگ –

چہ دلگان ءَ آوار جنگ بیتگیں مردم ءِ پجار مھمد بامری ءِ نام ءَ زانگ بیتگ کہ آ ایرانشھر ءِ جھمنند اِنت-

ھمے وڑ ءَ چہ ایرانشھر ءَ ھم نیکراھی وانگ جاہ ءِ نودربرے آوار جنگ ءَ پد بیگواہ کنگ بیتگ-

آوار جنگ بیتگیں ورنا ءِ پجار عبداللہ ھنزرانی ء آھرداد ءِ نام ءَ زانگ بیتگ-

زانگ بہ بیت روکپتی بلوچستان ءَ ھمک روچ مردم آوار جنگ ءُ بیگواہ کنگ بوگ ءَ اَنت-

گوستگیں روچاں آوار جنگ بیتگیں یاسین ریگی گوستگیں روچ ءَ یل کنگ بیتگ ءُ وتی گس ءَ سر بیتگ-

ائی سی سی کرکٹ ورلڈ کپ ءِ ھبدھمی گوازی بھارت ءُ بنگلہ دیش ءِ میان ءَ بوتگ کہ بھارت ءَ سَے وکٹانی تاوان ءَ گوازی کٹ اِتگ –

بھارت ءُ بنگلہ دیش ءِ میان ءَ بوتگیں گوازی ءَ بنگلہ دیش ءَ ٹاس کٹ اِتگ ءُ اولسر ءَ بیٹنگ کُتگ کہ آئی ءَ پنجاہ اوورانی تہ ءَ ھشت وکٹانی تاوان ءَ دوسد ءُ پنجاہ ءُ ھپت رنانی ٹارگٹ ایر کتگ کہ بھارت ءَ اے ٹارگٹ چِل ءُ یکمی اوور ءِ سیمی بال ءَ پروشتگ ءُ سَے وکٹانی تاوان ءَ دوسد ءُ شست ءُ یک رن جوڑ کتگ –

بنگلا دیش ءِ کپٹن نجم الحسن شانتو   نے ٹاس کٹ اتگ ءُ اولسر ءَ بیٹنگ کنگ ءِ پیسلہ کتگ ءُ اوپنر ءَ تنزید حسن دیم داتگ کہ آئی ءَ 51رن ءُ لٹن داس ءَ شست ءُ شش رن جوڈ کتگ ءُ آوٹ بوتگ انت – اشاں پد نجم الحسین ، مھیدی حسن میراز ءَ سَے ءُتوحید ھراڈے شانزدہ ، مشفیق الرحیم سِی ءُ ھشت ءُ محمد اللہ چِل ءُ شش رن جوڑ کتگ انت –

بھارت ءِ نیمگ ءَ جسپریت بمراہ ، رویندرا جدیجہ ءَ محمد سراج نے دو، دو لیبی آؤٹ کتگ –

بھارت ءِ نیمگ ءَ کپٹن روہت شرما ءَ چِل بالاں چِل ءُ ھشت رن جوڈ کتگ ءُ حسن محمود ءِ بال ءَ کیچ آؤٹ بوتگ ءُ شبھمن گل پنجاہ ءُ پنچ بالاں پنجاہ ءُ سَے رن جوڑ کتگ انت – وھدیکہ شریاس ائیر نوزدہ رن جوڈ کتگ ءُ آؤٹ بوتگ – ویرات کوہلی ءَ نود ءُ ھپت بالاں سنچری کتگ ءُ 103رن جوڈ کتگ ،کے ایل راہول ءَ سِی ءُ چار بالاں 34 رن جوڈ کتگ ءُ ناٹ آؤٹ بوتگ –

بلوچ ندکار، پولکار، راجدپتر نویس ڈاکٹر حمید بلوچ ءِ کتاب “ساحل ء مکران” ءِ چاپ ءُ شنگ بوتگ –

ڈاکٹر حمید بلوچ ءِ مکران ءِ سرا راجدپتری ءُ پَٹ و پولی کتاب “ساحل ءِ مکران” چہ علم و ادب پبلشرز کراچی ءِ نیمگ ءَ چاپ ءُ شنگ بوتگ –

علم و ادب شنگ کار ءِ نیمگ ءَ گوشگ بوتگ کہ اے کتاب ءِ تہ ءَ مکران ءِ گوستانکی ھند ءُ دمگ ءُ بازیں راجانی گوستانکی پژدر ءِ سر ءَ چمشانک دیگ بوتگ –

شنگ کار ءِ رِد ءَ بلوچستان ءِ تہ ءَ اے اولی کتاب انت کہ شریں وڈی ءَ پٹ ءُ پولکاری کنگ بوتگ ءُ ھر چیز ٹپاسک ءُ نبشتہ کنگ بوتگ –

اے کتاب ءِ دو بھر انت کہ کم ءُ گیش سَے ھزار تاک انت – پہ نودربرانی ھاتر ءَ ارزانیں نھاد ءَ 50 % ءَدست کپیت –

شنگ کار ءِ نیمگ ءَ اے ھم گوشگ بوتگ کہ اے کتاب کراچی علم و ادب پبلشر ءَ ھوار شال، کراچی ، گوادر ءُ تربت ءَ دست کپیت –