TBP Balochi

روکپتی بلوچستان ءِ دمگ راسک ءَ ایرانی لشکر ءَ تیرگواری کتگ ءُ یک تیل کشین مردمے زدگ کتگ-

گیشیں اھوالانی رد ءَ ایرانی لشکر ءَ راسک ءِ دمگ پیشین ءَ تیرگواری کنان ءَ یک مردمے زدگ کتگ-

اھوالانی رد ءَ زدگ بیتگین مردم ءِ پجار عبدالرزاق ھسن زئی ءِ نام ءَ زانگ بیتگ ءُ آ پیشین راسک ءِ نندوک گوشگ بوگ ءَ انت-

زانگ بہ بیت روکپتی بلوچستان ءَ ایرانی لشکر یکشل ءَ تیل ءِ واپار ھواریں مردمانی سر ءَ تیرگواری کنت ءُ چرے تیرگواریاں بازیں کچے ءَ مردم بیران ءُ زدگ بوگ ءَ اَنت-

روکپتی بلوچستان ءَ سیمسری دمگ ءِ مردمانی والینکاریں واپار تیل ئیگ انت کہ ایشی ءَ مردماں مرگ ءِ دیمپانی بوگ ءَ انت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ فدائی آپریشن ھیروف ءِ میان ءَ بلوچستان ءِ سیزدہ دمگاں چل ھندانی سر ءَ یکیں وھد ءَ چل ءُ چار اُرش کتگ انت- چریشی ءِ آسر ءَ دُژمنیں پوج ءِ یکسد ءُ سی کارمند کشتگ انت ءُ پنجاہ ءُ پنچ ٹپی بیتگ اَنت- ایشی ءَ اَبید دو ھندانی سر ءَ گیس پائپ لائن، ھپت ھندانی سر ءَ ریل پٹری ءُ دو پُھل تباہ کتگ اَنت – آپریشن ءِ میان ءَ سیزدہ مڈی بروکیں گاڑی مانداشتگ اَنت- اے میان ءَ بلوچستان ءَ چاردہ ھندانی سر ءَ بستگ ءُ ڈیتھ اسکواڈ ءِ سے کارمند کشتگ اَنت-

گوادر – جیونی کوسٹل ھائی وے، ھوت آباد ءِ دمگ ءَ مند – تربت شھدگ، تگران ءَ عبدوئی دگ، تربت – ھیرونک سی پیک شھدگ، شال – تفتان شھدگ، کلات – کراچی شھدگ، بولان ءُ کوہ سلیمان ءَ بُنجاھی شھدگاں، بالگتر – پنجگور شھدگ، سبی – مٹھڑی شھدگ سر ءَ ناکہ بندی کتگ انت-

جارکش ءَ گْوشتگ کہ اے میان ءَ مند – تربت دگ ءِ سر ءَ ھوت آباد ءِ دمگ دُژمنیں پوج ءِ یک کاروانے بلوچ سرمچاراں اُرش ءِ نشانگ کتگ، چریشی ءِ آسر ءَ یک گاڑی یے سرجم ءَ تباہ کتگ چریشی ءَ سواریں پنچ کارمند مرتگ اَنت-

گوادر ءِ دمگ جیونی ءَ کوسٹل ھائی وے سر ءَ ناکہ بندی کتگ، پولیس تھانہ ءِ سر ءَ اُرش کتگ کارمنداں آوار جتگ وھدے کہ اے سرجمیں سلاھاں دگہ جنگی ساز ءُ سامان دستیگ کتگ اَنت کہ آیانی تہ ءَ بیست ءُ سے تُپنگاں ھوار دو پسٹل ھوار اَنت- اے میان ءَ سرمچاراں مڈی بروکیں دو گاڑی مانداشتگ اَنت، پولیس ءِ چاریں گاڑی ءُ تھانہ مانداشتگ اَنت-

جارکش ءَ گْوشتگ کہ کلات گراڑی ءِ ھند سر ءَ بلوچ سرمچاراں ٹول پلازہ سر ءَ دستیگ کتگ ٹول پلازہ مانداشتگ اود ءَ ساڑی ئیں کارمند دزگیر کتگ اَنت ، کہ آیانی یل کنائینگ ھاتر ءَ آؤکیں دُژمنیں پوجی کاروان ءِ سر ءَ پیسر ءَ چہ سنگر گپتگ سرمچاراں اُرش کتگ کم چہ کم پانزدہ کارمند کشتگ اَنت-

جارکش ءَ گْوشتگ کہ کلات ٹول پلازہ ءِ نزیک ءَ پُھل تراکناکیں شورو پٹ کتگ تباہ کتگ –

جارکش ءَ دیمتر ءَ گْوشتگ کہ کلات ءَ سرمچاراں زورگریں پاکستانی پوج ءِ وتگڑیں ڈیتھ اسکواڈ ءِ ھاسیں کارمند ملک زبر محمد حسنی تیرگواری کتگ ءُ کُشتگ – زبر محمد حسنی ڈیتھ اسکواڈ ءِ سروک شفیق مینگل ءُ ذکریا محمد حسنی ءِ سروکی ءَ کلات شھر ءِ کش ءُ گوراں ڈیتھ اسکواڈز ءِ سروکی کتگ – اے کارمند ناگاھو ءَ زورگریں پوج ءِ زوراکی ءَ ھمگرنچیں بیتگ ءُ دْراجیں مدتے ءَ چہ بی ایل اے ءِ نام دپ بیتگ-

جارکش ءَ گْوشتگ کہ بولان ءَ بلوچ سرمچاراں ناکہ بندی ءِ میان ءَ ایف سی ءِ یک کاروانے سر ءَ اُرش کتگ شانزدہ ایف سی کارمند کشتگ اَنت کہ آیانی تہ ءَ کیپٹن رینک آفیسر ھوار اَنت وھدے کہ آیانی سلاہ دستیگ کتگ – اے میان ءَ پنچ لیویز کارمند دزگیر کنگ بیتگ انت، بلے آ بلوچ بیگ سبب ءَ کڈن کتگ ءُ یل کتگ اَنت – وھدے کہ اے میان ءَ بولان ءَ چہ گزوکیں ریل پٹڑی تراک ءَ چہ تباہ کتگ-

جارکش ءَ گْوشتگ کہ کوہ سلیمان ءَ بی ایل اے ءِ سرمچاراں بُنجاھی شھدگ ءِ سر ءَ ناکہ بندی کتگ پاکستانی پوج ءُ چیریں ادارھانی بیست کارمند کشتگ اَنت-

جارکش ءَ گْوشتگ کہ بی ایل اے ءِ سرمچاراں گشت برجاہ داشتگ وھدے کہ اے وھد ءَ بازیں ھندانی سر ءَ سرمچاراں شھر ءِ تہ ءَ ناکہ بندی برجاہ داشتگ – بی ایل اے ءِ دگہ یک ٹولی ءَ ڈی بلوچ ءِ ھند سر ءَ یک بُنجاھی شھدگ ءِ سر ءَ ناکہ بندی اے میان ءَ دُژمنیں پوج ءِ سروائلینس ڈرون ءِ سر ءَ سرمچارانی چاروکائی ءِ جُھد کتگ کہ آ تیرگواری کتگ دور داتگ-

جارکش ءَ گْوشتگ کہ سرمچاراں تربت ایف سی ھیڈکوارٹر سر ءَ راکٹ ءُ گرنیڈ لانچر ءِ بازیں گولھے آس داتگ نشانگ کتگ-

جارکش ءَ گْوشتگ کہ آپسر آبدرک پوسٹ سر ءَ گرنیڈ لانچر ءِ بازیں گولھے آس داتگ ھمے وڑ سرمچاراں ایئرپورٹ اسٹاپ ءِ نزیک ءَ ایئرپورٹ فورس ءِ کارمندانی سر ءَ راکٹ ءُ گرنیڈ لانچر گولہ آس داتگ انت-

جارکش ءَ گْوشتگ بی ایل اے ءِ سرمچاراں سی پیک شھدگ ءِ سر ءَ ناکہ بندی ءُ گاڑی پٹ ءُ پول کتگ انت-

آئی ءَ گْوشتگ کہ جنتری پوسٹ سر ءَ سرمچاراں گرنیڈ لانچر ءَ چہ بازیں گولھے آس داتگ دُژمن ءَ تاوان دیمپان کتگ-

آئی ءَ گْوشتگ کہ عبدوئی سرمچاراں تگران دگ سر ءَ ناکہ بندی میان ءَ پاکستانی پوج ءِ ھاتر ءَ راشن سر کنوکیں گاڑی دستیگ کتگ مانداشتگ-

جارکش ءَ گْوشتگ کہ سرمچاراں بالگتر ءَ تاں پنجگور سی پیک دگ ءِ سر ءَ ناکہ بندی کتگ، اے میان ءَ مڈی بروکیں گاڑی مانداشتگ-

جارکش ءَ گوشتگ کہ ھاران شھدگ ءِ سر ءَ ناکہ بندی ءِ میان ءَ سرمچاراں یک گاڑی ءَ سواریں زورگریں پاکستانی پوج ءِ وتگڑیں ڈیتھ اسکواڈ ءِ دو کارمند ھما وھد ءَ تیرگواری کتگ ءُ کشتگ اَنت وھدے کہ آ تچگ ءِ جھد کنگ ءَ بیتگ اَنت-

جارکش ءَ گْوشتگ کہ شال تفتان شھدگ سر ءَ ناکہ بندی ءَ ھوار سرمچاراں لیویز فورس تختی چیک پوسٹ ءُ یازدہ چیک پوسٹ سر ءَ دستیگ کتگ کارمند آوار جتگ اَنت آیانی شش ایس ایم جی یک واکی ٹاکی ءُ وائرلیس بیس دستیگ کتگ اَنت- کارمند پد ءَ یل کتگ اَنت-

جارکش ءَ گْوشتگ نوشکی ءَ کشینگی ءُ گلنگور ءِ دمگاں ریل ٹریک ءِ دو جاگھاں چہ تراک ءَ چہ تباہ کتگ اَنت-

آئی ءَ گْوشتگ کہ سرمچاراں نوشکی ءَ زرین جنگل دگ ءِ سر ءَ یک گاڑی ءَ سواریں دو لیویز کارمند اوشتارینتگ اَنت دو ایس ایم جی دستیگ کتگ اَنت-

جارکش ءَ گْوشتگ دو شمبے ءِ سُھب دوازدہ ءَ سرمچاراں نوشکی شھر ءَ منڈی ءِ نیمگ ءَ چہ ایف سی ھیڈکوارٹرز بُنجاھی گیٹ ءِ سر ءَ اوشتوکیں کارمندانی سر ءَ گرنیڈ لانچر ءَ چہ گولہ آس داتگ ءُ وتکاریں سلاھاں چہ اُرش کتگ-

جارکش ءَ گْوشتگ کہ کیچی بیگ تھانہ آئی ای ڈی اُرش ءَ نشانگ کتگ، سرمچاراں دگہ یک بیڑے ءَ شال ءِ روکپتی بائی پاس سر ءَ اختر آباد ءَ پاکستانی چیریں ادارھانی یک گاڑی یے ریموٹ کنٹرولڈ آئی ای ڈی ءَ چہ اُرش کتگ ءُ نشانگ کتگ ءُ شال ءِ دمگ سریاب ءَ ماسٹر کالونی نزیک ءَ ریل ٹریک تراک ءَ چہ تباہ کتگ-

جارکش ءَ گْوشتگ کہ سرمچاراں کھڈکوچہ لیویز تھانہ کارمند دزگیر کتگ تھانہ سر ءَ دستیگ کتگ، اود ءَ ساڑی سرجمیں سلاہ ءُ جنگی ساز ءُ سامان وتی دستیگ کتگ – آیانی تہ ءَ پنجاہ کلاشنکوف، جی تھری، وتاس، دستی بمب ھوار اَنت- وھدے کہ اشی ءَ پد تھانہ مانداشتگ اَنت-

جارکش ءَ گْوشتگ کہ کھڈکوچہ ھند سر ءَ بُنجاھی سر ءَ ناکہ بندی ھم برجاہ بیتگ-

جارکش ءَ گْوشتگ کہ مئے سرمچاراں مستونگ شھر ایف سی بُنجل سر گرنیڈ لانچر ءَ چہ بازیں گولھے آس داتگ دُژمنیں کارمنداں نشانگ کتگ-

جارکش ءَ گْوشتگ سرمچاراں مستونگ بائی پاس ءِ ھند سر ءَ ریل پٹڑی دو ھندانی سر ءَ تراکاکنیں شورواں تباہ کتگ-

آئی ءَ گْوشتگ کہ ھُزدار شھر ءَ مڈی بروکیں گاڑی آئی ای ڈی اُرش ءِ نشانگ کنگ بیتگ-

آئی ءَ گْوشتگ کہ سرمچاراں سبی شھر ءَ پاکستانی پوج ءَ ھمے وھد ءَ دستی بمب اُرش ءِ نشانگ کتگ وھدے آ دگ سر ءَ پٹ پول ءَ دلگوش ءَ بیتگ اَنت-

جارکش ءَ گْوشتگ کہ سرمچاراں سبی ءُ بختیار آباد ءِ میان دو ھندانی سر ءَ ریل پٹڑی تراکناکیں شورو پٹ کتگ تباہ کتگ-

آئی ءَ گْوشتگ بختیار آباد نزیک ءَ دوسہ لاشاری ھند سر ءَ سرمچاراں ناکہ بندی ءُ اے میان ءَ مڈی بروکیں گاڑی مانداشتگ اَنت-

آئی ءَ گْوشتگ کہ ڈیرہ مراد جمالی ءِ دمگ نوتال ءِ ھند سر ءَ پاکستانی پوج ءِ پوسٹ سر ءَ اُرش ءِ نشانگ کتگ-

آئی ءَ گْوشتگ کہ سبی ءِ دمگ کُڑک ھند سر ءَ پاکستانی پوج ءِ چیک پوسٹ سر ءَ سرمچاراں کسانیں مزنیں سلاھاں چہ اُرش کتگ، دُژمنیں پوج ءِ پوسٹ سر ءَ بازیں دستی بم بے چگل داتگ ءُ آ سک تاوان ءِ دیمپان کتگ-

ھمے وڑ آئی ءَ گْوشتگ کہ سبی ءِ دمگ مٹھڑی ھوٹل نزیک ءَ پاکستانی پوج ءِ کاروان سر ءَ ھم اُرش کتگ چار دُژمنیں کارمند کشتگ اَنت-

آئی ءَ گْوشتگ کہ سبی ءَ چہ کراچی ءَ رؤکیں سی شش انچ گیس لائن بشا پور ءِ ھند سر ءَ تراکناکیں شورواں تباہ کتگ-

آئی ءَ گْوشتگ کہ پنجاب ءَ رؤکیں گیس پائپ لائن پنجاب ءِ دمگ روجان ءِ دمگ ءَ تراکینتگ-

جارکش جیئند بلوچ ءَ گْوشتگ کہ بلوچ لبریشن آرمی ءِ فدائی آپریشن “ھیروف ” لڑ بی ایل اے ءِ فدائی یونٹ مجید بریگیڈ ءَ زورگریں پوج ءِ بیلہ بُنجل سر ءَ اُرش کتگ، بی ایل اے ءِ مجید بریگیڈ بیست کلاکاں تاں وتی دست ءَ کتگ ششت ھشت دُژمنیں کارمندانی کشگ ءَ سوبمند بیتگ اَنت-

بلوچ لبریشن آرمی ءِ آپریشن ھیروف ءِ میان ءَ کُشتگ بیتگیں پاکستانی آرمی ءِ کیپٹن محمد علی قریشی ءَ ھوار چار کارمند ءِ نماز جنازہ وانینگ بیتگ-

پاکستانی پوج ءِ ھمگرنچیں ادارہ آئی ایس پی آر ءِ نیمگ ءَ چہ برجاھیں درشان ءِ تہ ءَ گوشگ بیتگ کہ بلوچستان ءَ کُشگ بیتگین وتی ھنکین ءَ کل ءُ کسارت کنگ بیتگ اَنت-

آئی ایس پی آر ءَ گْوشتگ کہ کیپٹن محمد علی قریشی لاھور وھدے کہ نائیک عطااللہ ضلع مردان ءَ سپاھی محمد سلیم میانوالی ءُ سپاھی محمد بشیر ملتان ءَ کل کسارت کنگ بیتگ اَنت-

زانگ بہ بیت کہ بلوچ لبریشن آرمی ءَ گوستگیں روچاں بیست شش ءُ بیست پنچ اگست ءِ میانی شپ ءَ سرجمیں بلوچستان ءَ آپریشن ھیروف بندات کنگ بیتگ، گل رِد ءَ اے آپریشن ءِ لڑ آیانی سرمچاراں بلوچستان ءِ سرجمیں بُنجاھی شھدگ وتی دستیگ کتگ اَنت وھدے کہ بازیں جاھانی سر ءَ پاکستانی پوج سر ءَ اُرش کنگ بیتگ-

بلوچ لبریشن آرمی ءَ آپریشن ھیروف بُنجاھی اُرش بلوچستان ءِ ضلو بیلہ ءَ پاکستانی پوج ءِ یک بُنجاھی بُنجل پدائین اُرش ءِ نشانگ کتگ چریشی ءَ پد بازیں کلاکاں تاں پوج ءِ بُنجل بلوچ سرمچارانی دستیگ بیتگ-

بی ایل اے رِد ءَ آپریشن ھیروف وھد ءَ دُژمنیں پوج ءِ بیلہ بُنجل بی ایل اے مجید بریگیڈ بیس کلاکاں تاں وتی دستیگ کتگ ششت ھشت دُژمنیں کارمند کشگ ءَ سوبمند بیتگ اَنت وھدے کہ بی ایل اے یونٹ فتح اسکواڈ ءُ ایس ٹی او ایس ءَ ششت دو پوجی کارمند کشتگ اَنت دوازدہ کلاکاں تاں بلوچستان ءِ سرجمیں بُنجاھی شھدگانی سر ءَ بستگ وتی دستیگ کتگ اَنت- یکجاھی ھساب ءَ یکسد سی دُژمنیں کارمند کشتگ ءُ درزنانی ٹپی کتگ اَنت-

بلوچ لبریشن آرمی ءِ جارکش جیئند بلوچ ءَ رسانکدر ءَ وتی سرجمیں بیان ءَ گْوشتگ کہ ”آپریشن ھِیرّوپ“ بیست کلاک ءَ پد جوانیں رنگے ءَ آسر بوتگ۔ اے آپریشن ءِ سرجمی ءَ آرگ ءِ وھد ءَ بی ایل اے مجید برگیڈ ءِ 9 جِند ندریں ءُ فتح اسکواڈ ءِ یک ھُنرمندیں سرمچارے ھوار شھید بوتگ اَنت، وھدے کہ آپریشن ءِ وھد ءَ دژمن ءِ 130 کارندہ کشتگ انت-

جارکش ءَ گْوشتگ کہ بلوچ لبریشن آرمی ءِ مجید برگیڈ ءِ جِند ندریانی آپریشن ھیروپ ءِشھید کنگ ءِ وھد ءَ آپریشنل کمانڈر پدائی شھید گوس بکش سمالانی عرف طالب ءِ زھگ میشدار سمالانی ءِ سیادی گوں شھر راگ ترکدی ءَ بوتگ ۔ تو چہ 2019 ءَ بلوچ لبریشن آرمی ءَ ھوار بوتگ ئے ءُ پہ راجی آجوئی ءِ گرگ ءَ بولان ءِ دیم ءَ ھزمت کنگ ءَ ات ئے۔ آئی ءِ پت میشدار سمالانی ھم بلوچ لبریشن آرمی ءِ یک بھادریں سروکے بوتگ کہ آئی ءَ نومبر 2022 ءَ کبزہ گیریں پاکستانی لشکر ءِ ھلاپ ءَ یک زھرناکیں جنگے ءَ گوں بھادری ءَ جنگ ءِ وھد ءَ شھادت رستگ۔ وھدے کہ آئی ءِ کستریں برات شھید پدائی سنگت مھمد بکش عرف ھالد چُک میشدار سمالانی ھم مجید برگیڈ ءِ جندندر بوتگ۔ سنگت پدائی گوس بکش ءَ 2022 ءَ بی ایل اے مجید بریگیڈ ءَ را وتی ازمت پیش کتگ ات۔ تو آپریشن ھیروپ ءَ بیلہ ءِ ھیڈ کوارٹر ءِ سر ءَ بی ایل اے مجید برگیڈ ءِ اُرش ءِ آپریشنل کمانڈر بوتگ ئے۔ آپریشن ءِ وھد ءَ تو وتی سنگتانی سروکی ءَ کن ئے ءُ وتی جنگی مھارتاں کارمرز کن ئے ءُ بازیں دژمن ءِ کارندھاں کُش ئے۔ تو جنگ ءِ بنداتی مرحلہ ءَ ٹپی بوتگ ئے بلے ٹپیاں چہ ابید بیست کلاک ءَ گوں دژمن ءَ جنگ کتگ۔

جارکش ءَ گْوشت کہ شھید پدائی سنگت ماھل بلوچ عرف زلان کُرد چک کُھدہ ھمید ءِ زھگ گوادر ءِ دمگ سربندر ءَ چہ سیادی دار ایت۔ بیست ءُ دو سالی ماھل بلوچ لا کالج تربت ءَ ایل ایل بی ءِ ھشتمی سیمسٹر ءَ وانگ ءَ ات۔ آئی ءَ 2022 ءَ بلوچ لبریشن آرمی ءَ ھوار بوتگ ءُ راجی گلامی ءِ ھلاپ ءَ سلاہ بندیں جھد ءِ راہ گپت۔ تو ھمے سال ءَ بی ایل اے مجید برگیڈ ءَ وتی ھزمت رزاکارانہ داتگ اَنت۔ آپریشن ھیروپ ءِ تہ ءَ بیلا ءِ ھیڈ کوارٹرانی سر ءَ بی ایل اے ءِ آپریشن ءِ بندات دژمن ءِ لشکر ءِ ھیڈ کوارٹرانی مستریں دروازگ ءَ گولہ بارود ءَ گوں پُریں گاڑی ءِ ٹکر کنگ ءَ بوتگ۔ کہ ایشی ءِ سبب ءَ مجید بریگیڈ ءِ وپاداراں کیمپ ءِ تہ ءَ پُترتگ اَنت ھمے موہ رست۔ تو بلوچ زالبولانی تہ ءَ بُرزیں سیاسی سما ءِ مجسمہ بوتگ ئے۔ تو یکبرے پد ءَ وتی کُربانی ءَ گوں اے گپ ءَ ثابت کت کہ بلوچ راجی آجوئی ءِ جنبش ءُ بی ایل اے ءِ تہ ءَ جنسی تپاوت ءِ گنجائش نیست ءُ کُل بلوچ اے جُھد ءَ گوں برابریں جنسی برابری ءَ بھر زورگ ءَ اَنت۔

آئی ءَ گْوشت کہ شھید پدائی سنگت رزوان بلوچ عرف مول بکش ءِ چک ھمل گوادر ءِ دمگ پنوان ءَ چہ سیادی دار ایت۔ بیست ءُ دو سالی رزوان بلوچ ءَ 2022 ءَ بلوچ لبریشن آرمی ءَ ھوار بوتگ ءُ ھمے سال ءَ بی ایل اے مجید برگیڈ ءَ رزاکار ءِ بستار ءَ وتی ھزمت پیش کتگ۔ اے آپریشن ءِ گولہ بارود ءَ پُریں دومی گاڑی دژمن ءِ لشکر ءِ بیلہ ءِ ہیڈ کوارٹر ءِ دومی نیمگ ءَ کپت ءُ دژمن ءَ کُشت ءُ بھادری ءِ یک مزنیں درورے پیش داشت، آئی ءَ شھادت ءِ شرپ زرتگ۔

شھید پدائی مھمد بلوچ عرف میرک ءِ چک سَید بلوچ جنگیزی ءِ سیادی گوں پنجگور ءِ دمگ سوراپ تسپ ءَ بوتگ۔ بیست ءُ دو سالی محمد بلوچ 2022 ءَ بلوچ لبریشن آرمی ءَ ھوار بیت ءُ راجی گلامی ءِ ھلاپ ءَ وتی کاراں برجاہ دار اِیت، وھدیکہ 2023 ءَ آئی ءَ بی ایل اے مجید برگیڈ ءَ وتی ھزمتانی پیشکش کت۔ تو بی ایل اے مجید بریگیڈ ءِ پدائی سنگت رئیس ءِ سیاد ات ئے کہ( 2018 ءَ چینی قونصل خانہ) ءِ سر ءَ اُرش ءِ بھر ات کہ کبزہ گیریں پاکستان ءِ شریک ات۔

شھید پدائی سنگت پزل گل زھری عرف شاویز پرزند گل محمد زهری جھمنند ھزدار جاگہ پیرشار زھری اش. آ 2022 ءَ بلوچ لبریشن آرمی ءَ ھوار بیت ءُ کوھی محاذ ءَ راجی گلامی ءِ ھلاپ ءَ وتی زمہ واری برجاہ داشت، ھمے وھد ءَ آ ھم ھمے سال ءَ مجید برگیڈ ءِ بھر جوڑ بوت۔ پدائی پزل گل زھری یک ٹِک تیر گواری یے بوتگ، بیلہ کیمپ ءِ سر ءَ اُرش ءِ وھد ءَ آئی ءَ دژمن ءِ درجن ءَ چہ گیش سپاھیگانی سر ءَ تیر جتگ ءُ ھما جاہ ءَ کُشتگ ءُ دگہ جند ندریاں دیم ءَ روگ ءِ موہ داتگ۔

جارکش ءَ گْوشتگ کہ بُرز ءَ گْوشگ بوتگیں سنگتاں ابید بی ایل اے ءِ مجید برگیڈ ءِ دو پدائی شھید پدائی مھمد آسپ نچاری ءُ شھید پدائی مھمد بکش سمالانی ھم آپریشن ھیروپ ءِ بھر اِت اَنت، ءُ آ دگہ پدائی بیلہ ءِ نیمگ ءَ روگ ءَ اِت اَنت وتی ھمکارانی ھمراھ بوگ ءِ ھاتر ءَ راہ ءَ شما دوئیں ھمراھاں دژمن ءِ لشکر ءَ گوں دچار کپت اِت کہ شما وتی ٹارگٹ ءِ نیمگ ءَ مستونگ ءَ سپر کنگ ءَ اِت اِت۔ 19 اگست 2024 ءَ کبزہ گیریں پاکستانی لشکر ءِ دیم پہ دیم بوگ ءَ پد شما دوئیں دژمن ءِ لشکر ءَ ھما ساھتاں جنگ کت ءُ 7 دژمن ءِ کارندھانی کُشگ ءَ پد شھیدی ءِ درجہ ءَ سر بوت اِت۔

شھید پدائی مھمد آسپ نچاری عرف نوید چک شپیک مھمد نچاری ءِ سیادی کلات ءِ منگوچر ءِ دمگ ءَ بوتگ۔ تو چہ 2023 ءَ بلوچ راجی گلامی ءِ ھلاپ ءَ سلاہ بندیں جُنز ءَ کنگ ءَ اِت ئے ءُ ھمے سال ءَ تو بی ایل اے مجید برگیڈ ءِ دیم ءَ وتی ھزمت پیش داشتگ اَنت۔ سنگت آسپ یک بھادریں سنگتے بوتگ، آئی ءَ دژمن ءِ ھلاپ ءَ بازیں ھاسیں جنگاں بھر زورگ ءَ کلیدی کرد پیلو کتگ۔

آئی ءَ گوشت کہ شھید پدائی سنگت مھمد بکش سمالانی عرف ھالد چک میشدار سمالانی ءِ سیادی گوں شھر راگ ءِ دمگ ترکڈی ءَ بوتگ۔ آپریشن ھیروپ ءَ مجید برگیڈ ءِ آپریشنل کمانڈر پدائی شھید گوس بکش سمالانی عرف تالب ءِ کستریں برات بوتگ۔ سنگت مھمد بکش ءَ 2021 ءَ بلوچ لبریشن آرمی ءَ ھوار بوتگ ءُ 2023 ءَ مجید برگیڈ ءَ وتی ھزمت ءِ پیشکش کتگ۔ وتی پت شھید میشدار سمالانی ءِ وڑ ءَ تو ھم سکیں محنتی ءُ مخلصیں ھمکارے بوتگ ئے ۔ تو چو وتی پت ءُ برات ءَ ھمکوپگ گوں دژمن ءَ جنگ کتگ ءُ شھادت رس اتگ۔

بی ایل اے فتح اسکواڈ ءِ تجربہ کاریں سنگت شپکت مینگل آپریشن ھیروپ ءِ وھد ءَ مستونگ ءِ کھڈکوچہ ءِ دمگ ءَ گوں کبزہ گیریں پاکستانی لشکر ءَ بوتگیں جنگ ءُ جیڑھاں گوں بھادری ءُ دلیری ءَ دژمن ءِ ھلاپ ءَ جنگ ءِ وھد ءَ شھید بوتگ۔

شہید سنگت شپکت مینگل عرف دیار ءِ چُک میر ھنایت اللہ مینگل ءِ سیادی واشک ءِ ناگ ءِ دمگ ءَ بوتگ۔ تو بلوچستان ءِ شھدربرجاہ ءَ وانگ ءُ زانگ ءِ پِڑ ءِ نودربرے بوتگ ئے، ھما وھد ءَ کہ تو بلوچ نودربر سیاست ءِ تہ ءَ ھم یک جْوانیں بھرے بوتگ ئے۔ آ 2023 ءَ بلوچ لبریشن آرمی ءَ ھوار بیت ءُ راجی آجوئی ءِ ھاتر ءَ سلاہ بندیں جُھد ءَ بندات کُت۔ تو کلات ءِ دمگ ءَ چہ ناگھو پرنٹ ءَ وتی زمہ واری ءَ پیلو کنگ ءَ ات ئے۔ سنگت شپکت وتی تاگت ءُ جنگی ھنر ءِ سوب ءَ زوت بی ایل اے ءِ ھر پرنٹ لائن ءِ فتح اسکواڈ ءِ بھر جوڑ بوت۔ تو بازیں ھاسیں جنگانی تہ ءَ وتی جوانیں ریپکاں پیش دارگ ءَ دژمن ءَ را ھلاس کن ئے۔

آئی ءَ گْوشت کہ بلوچ لبریشن آرمی آپریشن ھیروپ ءِ سوبمند کنگ ءَ اے شھیدانی سکیں مزن شانیں کرد ءَ من ایت ءُ شھیدانی مزنیں کُربانیانی واست ءَ شگر ءُ منت پیش کنگ ءِ وھد ءَ وتی اے عزم ءِ پد ءَ پدر کنت کہ شھیدانی کُربانی ھچبر شموشگ نہ بنت، ءُ گوں ھمے کربانیانی زور ءُ زرمبش ءَ آزات ءُ آزاتیں بلوچ ڈیھے ءِ ٹھینگ ءَ شھیدانی اوستیں واھگ سرجم کنگ بیت اِنت ۔

بلوچستان ءِ دمگ کیچ ءَ سر بیتگیں اھوالانی رد ءَ پاکستانی پوج ءَ تربت یونیورسٹی انگیر کےگ ءُ انٹیلی جنس ایجنسی زالبول ھاسٹل ءَ پٹ ءُ پول کنگ ءَ اَنت-

نودربرانی رد ءَ پاکستانی پوج ءَ نودربراں گوستگیں روچاں بیلہ بنجل ءَ فدائی اُرش ءَ ھواریں ماھل بلوچ پنام ءِ زلان کرد ءِ درگت ءَ جست ءُ پرس ءُ کوٹی ءِ پٹ ءُ پولے کتگ-

نودربرانی رد ءَ پاکستانی پوج ءِ کارندہ ءُ چیریں ادارھاں ھمے وھد ءَ ماھل بلوچ ءِ ھاسٹل ءِ جاڑیگ بوگ ءُ دگہ جست ءُ پرس کتگ انت ءُ ھمے وڑ بازیں نودربراں جتا جتا جست ءُ پرس کتگ انت ءُ آئی ءِ زند ءِ بارو ءَ جست ءُ پرس کتگ انت-

ھمے وھد ءَ پاکستانی پوج ءَ ماھل بلوچ ءِ کوٹی ءَ بازیں ساز ءُ سامان گون وت برتگ اَنت-

زِر ءَ مُروارِدانی ٹیکیاں گون اَنت

(فدائی ماہل بلوچ ءِ نام ءَ)

الماس بلوچ

دی بلوچستان پوسٹ

ما ونتگ جنگ ماں تاکاں
کتابانی تہا زہم ءُ سِگارانی سَبک ونتگ
گِروکی شہم چِست بنت چہ زِھاں زہم ءِ
چہ پراھیں ملپداں جونانی جوھانے کہ سہرا بیت
ما ونتگ شہسواریں نَپت چو کہر ءَ کپ اَنت ڈیھ ءَ
ما اِش کُرتگ کہ گُل بی بی
سگارانی زِھاں گوں تیل ءُ زمزیلاں کروجاں کنت
ما اِش کُرتگ کہ ماھیں بانڈی پہ دژمناں بِیرے
لپاشان کنتّ زوراکی ءِ ماڑی ءُ کلاتاناں
من جنگ ھیروپیں، الگاریں
کتابانی تہا ونتگ
یا کوھنیں کِسّہانی دْروشم ءَ اِش کُرتگ چہ ماتاں
بَلے مرچی ما چمّ ء وت
وتی ڈیھ ءَ
وتن دیوانگیں گُل بی بی ءِ زھرگ سما کُرتگ
زمین شیدائیں ماھیں بانڈی ءِ جوزگانی رنگ وت دیستگ
ما دیستگ چہ زِر ءَ مُروارِدانی ٹیکیاں شِنگ اَنت
ما دیستگ جنگ ھیروپیں!
ما دیستگ ھار ملّوکیں لپاشان اِنت زوراکاں
ما دیستگ اے زِریں لشکر
پدا لیپگ کنان اِنت زَلم ءِ زمزیلاں
اے کرنی زنگی ئیں تئیلاں

زِر ءَ مُروارِدانی ٹیکیاں گون اَنت
زمین ءِ سبزگ ءِ پاکیں بشارت گِند! سہرا اِنت
چہ کوھاں بُرزیں آوازے کُلوہ بکشان اِنت واھُنداں
مبارک بات!
کہ جنگ ءَ نوک کُرتگ کِسّہ اھدانی
کہ ھیروپانی آتراپ ءَ،
ماں بیرانی تہا یک رژنے سہرا اِنت
ماں گْرندانی تہا دْرپشان اِنت آوازے
کہ ماھیں بانڈی اتکگ
نوں تئیلانی ھزاب ءِ بادگیرانی نہ مان اَنت پَد
نوں زمزیلانی بام ءَ جورکاں داتگ
بُہ لُڈِیت زِر پَھر ءُ شان
کہ “نوکیں بانڈی” ءِ شار ءِ لمب ءَ آجوئی ءِ رُژن سہرا اِنت
زِر ءَ مُروارِدانی ٹیکیاں گون اَنت۔

آشوبی ءِ تچکیں ھیال

نبشتہ کار: شَکّل بلوچ

دی بلوچستان پوسٹ

آشوب ءِ زلورت کجام ھم وھد ءَ بیت ءُ آئی ءِ مستریں مول وھدے کہ چاگردے ءِ تہ ءَ نا انساپی یے، زُلم ءُ زوراکی یے ءُ دگہ باز انچیں بدیں کار کہ چاگردے ءِ تہ ءَ ھست ءُ ودی بنت گڑا آ چہ زوراک ءِ نیمگ ءَ وتی جوڑ کُرتگیں، بدیں رھبندانی پَھک ولگوج کنگ ءَ بیت ءُ اود ءَ آشوپ ءِ بوگ یا آرگ المی بیت۔

درستاں چہ ساری مارا اے گپ الم زانگ لوٹ اِیت کہ چاگردے ءِ تہ ءَ ھما کار پہ آشوبی ءِ واست ءَ المی بنت کہ آ پیسر ءَ چاگرد ءِ لس مَھلوک ءِ تہ ءَ وتی باور ءُ سِتک ءَ ودی کنگ لوٹ اِیت کہ آشوبی مدام پہ آیاں دردوار اِنت، آ مدام پہ آیاں نوکیں زندے ءِ آرگ ءَ ھر چُشیں جیڑھے ءِ ءُ جنجالانی دیم ءَ اوشتوک اِنت۔

آ چہ چاگرد ءِ لس مھلوک ءِ دیم ءَ وتی آشوبی ھیالانی تہ ءَ ھچ وڑیں پیچ ءُ تابیں سَسّا درا مہ کنت چیا کہ آئی ءِ پگر ءُ ھیال چہ چاگرد ءِ لس مھلوکانی دیم ءَ چُشیں بے بُنیں گپاں چہ وتی اندر ءَ پھک ولگْوج بہ کنت۔

نوں ما کا ایں وتی بُن گپ ءِ سر ءَ کہ آشوبی ءِ تَچکیں ھیال کجام اَنت کہ پہ چاگردے ءِ ءُ یا پہ ادارھے ءِ واست ءَ ارزشتے داشت کُت بکنت:

آشوبی ءِ واست ءَ راستیں پگر ءُ ھیال درستاں چہ پیش ھما بہ بیت کہ آ وتی تہ ءَ کارانی سرجم کنگ ءِ ھاتر ءَ وتی (موقف) ءَ مُھکم بہ کنت، ءُ چہ وتی کارانی زمہ واری ءَ شری ءِ سر ءَ پَیلو کُت بہ کنت، چُش مہ بیت کہ زمہ واریانی زورگ ءَ پد کار ئِے ناسرجم ءُ گڑ ءُ منج ءِ تہ ءَ مان بہ گیشّ اِیت رَند ءَ وتی کُتگیں، ناسرجمیں کارانی نہ بوگ ءِ سَوَب ءَ دگہ سنگتے ءِ سر ءَ بہ مُشّ اِیت ئِے۔

دائم تَبی داروکیں لیکھے ءِ منّوگر مدام وتی کاراں شپ ءُ روچ کنت بلے پورا اِش کنت بِلّے کہ چاگرد ءِ تہ ءَ ھر وڑیں جنجالانی دیمپان بہ بیت بلے گوں سِتک ءُ مُھکمی ءَ وتی دْراھیں کاراں سرجم کنت بلے رَدیں اَمل پہ آشوبی ءِ واست ءَ تچکیں ھیال گُشگ نہ بیت گڑا آ وتی تاب ءُ پیچیں پگرے ءِ واھُند بیت۔

گَل ءِ تہ ءَ چُشیں اَمل نہ بوتگیں ھبرے کہ یک سیاسی سنچے ءِ داروکیں آشوبی سنگتے وتی زمہ واریاں پورا کُت مہ کنت پد ءَ وتی گچین کُتگیں زندے ءِ سپر ءَ مشکل اِنت کہ وتی گل ءِ مکسد ءَ سر بہ بیت۔

آشوبی ءِ تچکیں ھیال داروکیں سنگت مدام وتی تہ ءَ پہ کارے ءِ کنگ ءَ جاڑی اِنت آ سرپد ءُ پوہ اِنت کہ منی مکسد چے اِنت ءُ منی زند ءِ ھر تَک ءُ پَھنات ھمے مول ءَ گوں بندوک اِنت، آ مدام پگری ءُ اَملی پلسپہ ءِ منّوگر اِنت ءُ وتی پَھم ءَ دار اِیت۔

آشوبی ءِ تچکیں پگر ءُ تچکیں اَمل مدام کاراں ءُ زمہ واریاں گوں شَوربندی ءَ کنت، ھر کار ءَ پہ وڑے ءَ چار اِیت ءُ اَمل کنت کہ کجام کار ،کجام وھد ءَ کنگی اِنت اگاں آ ابید رِد ءُ بند ءَ وتی زمہ واری ءَ ھجبر پورا نہ کنت ءُ نیکہ ابید آسر ءِ گِندی ءَ وتی کار ءَ بندات کنت۔

اے گپ یات دارگ لوٹ اِیت کہ ھر آشوبی ءِ تچکیں ھیال داروکیں کیڈر ابید مول ءُ مرادے ءَ آئی ءَ را آشوبی یے گْوشت نہ کن ئے چیا کہ آشوپ وت یک جتائیں دگنیا یے دار اِیت ءُ آئی ءِ مستریں مکسد آزات چاگردے ءِ جوڑ کنگ اِنت کہ آ چہ بدیں کاراں چِہ دور بہ بیت، چہ زوراوریں رسترانی دست ءَ آجو بہ بیت گڑا آئی ءَ را آشوب گْوشیں۔

آشوبی یکشّل ءَ وتی یکین ءُ دلجم بوگ ءِ سر ءَ اَمل کنت ءُ وتی کار ءُ لیکہ ءِ سر ءَ پہ وڑ ءُ ڈولے ءَ ھورت چاری کنت ، دل ءِ سِتک وتی مکسد ءِ سر ءَ ایماندار اِنت بِلّے کہ آئی ءِ سر ءَ ھر وڑیں پریشانی ءُ جیڑہ بیا اَنت آ چو کوہ ءَ مِکّ بیت۔ آشوبی وتی مراگش ءُ زمہ واریانی سر ءَ گوں ھورت چاری ءَ اَمل کنت، آشوبی وتی پگر ءُ ھیال ءُ سما ءَ چِہ جُھدے ءَ گوں بندوک بیت ءُ آ ھمے گپ ءَ وتی مجگ ءِ تہ ءَ ایر کنت کہ منی زندگی ءُ مرگ دوئیں ھمے نوں جُھد ءُ جُنز ءَ گوں بندوک اَنت۔

بلوچستان ءِ جتاجتائیں دمگاں چار لاش دزکپتگ اَنت ءُ کیچ ءَ ڈیتھ اسکواڈ ءِ دست ءَ بیگواہ بوگ ءَ پد ورنا کشگ بیتگ-

گیشیں ھالانی رِد ءَ بلوچستان ءِ بُنجاھی شھر شال ءِ دمگ دشت سپیز نڈ ءَ بھٹے نزیک ءَ یک مردمے ءِ لاش دزکپتگ کہ بیست دو سالی ئیں جواد علی ء محمد گل جھمنند اوستہ محمد نام ءَ چہ بیتگ-

شال نادُراھجاہ کاردار رِد ءَ اے ورنا تیرگواری کتگ کشتگ-

ھمے وڑ بلوچستان ءِ دمگ چہ نصیرآباد ءِ دمگ مانجھو شوری ءَ دمگی انتزامیہ ءَ سے مردم تیرسپتگیں لاش دزکپتگ اَنت کہ پجّار ھاتر ءَ نادُراھجاہ ءَ برتگ اَنت-

نصیر آباد ءَ دزکپتگیں لاشانی پجّار ھاتر ءَ چار ءُ ٹپاس برجاہ ءَ اِنت وھدے کہ وئیل سوب زانگ نہ بیتگ-

ھمے وڑ کیچ ءِ دمگ چہ گردانگ ءَ بیست ءُ شش اگست ءِ شپ ءِ نُھ ءِ نزیک ءَ سلاہ بندیں مردم دکان تہ ءَ پُترتگ اَنت حکیم ء علی مراد نامیں ورنایے تُپنگ زور ءَ آوار جتگ ءُ بیست ملٹ ءَ پد دو کلومیٹر ءَ دیر شتگ ءُ گیشتک ھند ءَ بے دردی ءَ کُشتگ-

دمگی مردمانی گوشگ اِنت کہ حکیم بلوچ یک وانندھے ءُ باپاری ورنایے بیتگ- گوستگیں دہ سالاں چہ گردانک ءَ دکانداری کنگ ءَ بیتگ ءُ سک شریپ ءُ سادگیں مردمے بیتگ اشی ءَ ناں سیاسی پارٹی ءُ ناں گل ءِ ٹولیاں سیادی بیتگ-

دمگی مردمانی رِد ءَ اے سلاہ بنداں کہ چست کتگ اے سرکاری پلامرزی کنوکیں ٹولی ءَ چہ بیتگ اَنت ایشی ءَ ساری دو روچ ءَ پیسر شپ وھد ءَ حکیم بلوچ تربت ءَ چہ بلیدہ ءَ روگ ءَ بیتگ کہ راہ ءَ سلاہ بنداں آئی ءِ سر ءَ تیرگواری کتگ ، تیرگواری ءِ آسر ءَ آ رکّ اِتگ بلے آئی ءِ گاڑی ءَ تاوان رس اِتگ-

دمگی اِھوالکار رِد ءَ اُرشکار حسن بادشاہ نامیں صوبی دارے کہ گوستگیں بازیں سالاں چہ بلیدہ ءَ آئی ءِ پوسٹ بیتگ-

انچش گوشگ بیگ ءَ اِنت کہ لھتے روچاں چہ صوبہ دار حسن بادشاہ ھپت پرپٹ ءَ ھوار یک انچیں ٹولی ءِ ھمراھی ءَ بلیدہ کوچگ بزپیش گلی گردانک ءَ تر ءُ تاب کنگ ءَ بیتگ اَنت، اے ٹولی ءِ مردم زبان ءُ پوشکاں چہ ڈن ءَ اتکگیں مردمانی وڑ ءَ بیتگ اَنت-

گوستگیں شپ ءَ سلاہ بندیں مردماں نیوی بنجل راکٹ لانچر ءُ دگہ سلاھاں گوں نشانگ کتگ-

بلوچستان ءِ دمگ کیچ ءِ بنجاھی شھر تربت ءَ سلاہ بندیں مردماں بالی پٹ ءِ ھند ءَ نیوی ءِ بنجل ءِ سر ءَ ترندیں اُرشے کتگ –

دو شمبے ءِ شپ ءَ دی بلوچستان پوسٹ ءَ را دمگی مردماں گوشتگ تربت بالی پٹ ءِ نزیک ءَ ترندیں تیرگواری ءُ تراکانی توار پیداک اَنت ءُ ھمے وھد ءَ شھر ءَ پاکستانی پوج ءِ سر ءُ پراں ھم گیشی اتکگ –

شپ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءَ ھمے اُرش ءِ زمہ واری من اتگ ءُ تامر وتی آفیشل چینل ھکل ءَ شنگ کتگ-

تامر ءَ بلوچ لبریشن آرمی ءِ پند ءَ گشت کنوکیں باسک نیوی بنجل ءَ راکٹ ءُ گرینڈ لانچراں گوں نشانگ کنگ ءَ گندگ بنت اِنت-

بی ایل اے ءِ شھری سرمچار آجوئی ءِ رنگ ءَ بلوچستان ءِ بیرک ءَ برز ءَ کنگ ءَ تربت ءِ شھر ءَ مھلوک ءِ میان ءَ گندگ بنت اِنت-

ایشی ءَ پیش بیست ءُ شش اگست ءِ شپ ءَ ھم تربت ءِ شھر ءَ پاکستانی پوج ءِ بنجاھی بنجل راکٹ ءُ گرنیڈ لانچر اُرشاں نشانگ کنگ بیتگ ات کہ ھمے اُرش ءِ تامر ھم بلوچ لبریشن آرمی ءِ ھکل چینل ءَ شنگ کنگ بیتگ ھمے ڈول تربت ءِ نزیک ءَ سی پیک دگ ءَ بی ایل اے ءِ سرمچارانی نیمگ ءَ ناکہ بندی تامر دیم ءَ اتکگ بیتگ –

زانگ بہ بیت بیست ءُ پنچ ءُ بیست ءُ شش اگست ءَ بلوچ لبریشن آرمی ءَ آپریشن ھیروپ ءِ بندات کنگ ءِ جار جتگ چریشی ءِ لڑ ءَ گل ءَ بلوچستان ءِ دراھیں دگانی سر ءَ ناکہ بندی کتگ ءُ گاڑیانی پٹ ءُ پول، ریل ءِ پٹری ءُ پھل نشانگ کتگ انت ءُ ھمے وڑ بیلہ بنجل ءِ سر ءَ فدائین اُرش کتگ –

بی ایل اے ءِ نیمگ ءَ آپریشن ھیروپ ءِ لڑ ءَ بازیں جاھاں اُرش بیتگ اَنت ءُ بلوچستان ءَ دگہ استاناں ھواریں دگ بازیں اداراں بند بیتگ اَنت-

بلوچ لبریشن آرمی ءَ بیست ادار ءَ پد وتی آپریشن ءِ آسری ءِ جار جتگ ءُ آپریشن ءَ پاکستانی پوج، چیریں ادارھاں ھوار پولیس ءِ یک سد ءُ سِی کارندھانی کوش ءِ زمہ واری من اتگ اَنت-