کازی مُرگے بِلّے بال انت، کبس ءَ کنگ مہ بیت
نبشتہ کار : عرفات بلوچ
دی بلوچستان پوسٹ
کماش لبزانک دُوستیں مردمے اَت۔ من ھردے کہ وتی چم پچ کُت انت مئے آتراپ ءَ کتاب اِت انت، نثری کتاب، شائری کتاب ، سْیاسی کتاب ,شھزانتی کتاب ، تب زانتی کتاب ھر چوناھے بنگپے ھست، آ کتاب کماش ءِ برکت ءَ مئے لوگ ءِ شان اِت انت، کماش ءَ ھر پَیّکیں وھد ءَ مارا لبزانک ءُ سْیاست وانینت، وت گپ جَت ءُ ما گوشداشت، آ وھدءَ مئے سنچ چش شاھیگان نہ ات کہ چشیں ڈَلگیں بنگپاں گوں زوت پجاروکی بہ کنت۔بلے کماش ءِ جھد ھر وھد ءَ ھمیش اَت کہ منی چُک گوں بلوچی لبزانک ءُ بلوچ ءِ سْیاست ءَ گوں آشنا بہ بنت۔ وڑے نہ وڑے گوں بلوچ ءِ جاوراں گوں ھمگرنچ بہ بنت دانکے آ بہ زان اَنت اے زبان ءُ زمین مئیگ اَنت ایشانی دیمروئی ءُ رکینگ ءِ ڈُبہ مئے نزوریں کوپگان اِنت۔ آ کماش ءِ مھر اِت انت کہ آئی ءَ مارا سْیاست ءُ لبزانک ءَ گوں ھمگرنچ کُتگ ات۔
بلوچ ،بلوچی،بلوچستان ءَ چہ دور رَوگ ءَ نئیشت، آئی ءَ ھر وھد ءَ شام ءَ پَد مارا بْرات ءُ گھاراں یکجاہ کُت، مئے دیم ءَ شئر ونت۔ملا پازل ،مست توکلی ، مبارک کازی ءُ منیر مومن ءِ نام ما اول سر ءَ وتی کماش ءِ دپ ءَ اِیش کُتگ انت ۔
جنگ ءُ سْیاست ءِ سرا اگاں مئے بنگپ ءِ پَتّر پچ بیتگ ات، تہ نواب ھیربکش ، چیئرمین غلام مُحمد ،بالاچ ، اللہ نزر ، بانک کریمہ ، سنگت ثناء ءِ نام مدام آئی ءِ شھدیں دپ ءَ گوں رچوک اِتنت۔ ھمے دیوان ءُ آئی ءِ داتگیں گشتانکاں گوں مے دربرگ ءِ کسانکیں سپر بنگیج بیتگ اَت۔کماش ءَ مدام ھمے گپ جتگ ات کہ ھرچیز ءِ سر ءَ شمارا وت ءَ را دیدانکے بہ بیت۔ منی ھرگپ ءِ سرا ایمان میار ات چیزاں وتی چماں گوں بچار اِت شما چی گندئے چی سرپد بئے۔ دانکے باند ءَ رنگراہ ءَ مہ کپ ات پہ وت یک مادنیں راھے گچین کُت بکن ئِے۔۔
پد ءَ مئے زندگی سپر گوں وتی گاماں جنزان اَت۔ من گوں چیزاں ھُرتی ءُ باریک بینی ءَ چارگ ءَ اِتاں،تاں مبارک ءِ کازی ءُ واجہ چیئرمین غلام مُحمد ءُ سنگت ثناء ءَ منی زندگی ءِ پَلو ءَ وتی سان انچش دور داتگ اتاں گُشے کہ اے چیزانی سرا دیدانک منی نہ ات ھمایانیگ اَت۔ پدا من اشانی مرید جوڑ بیت انت یکے ءِ شئر ءُ آیانی گوشتانک ھرجاہ کہ دست کپت انت من گوں دلگوشے ءَ چارت ءُ ونت اَنت-
بلے اے کسہ دراج انت ءُ منی بنگپ مرچی دگرے منی بنگپ نہ مرچی لبزانک انت کہ سْیاست اِنت بلکیں منی بنگپ مرچی کازی ءِ اِنت آ چہ کسانی ءَ منی زند ءِ ھمراہ ءُ ھمسپر انت۔من اے گپ کدی نہ جیڑ اتگ کہ منی وڑیں لس وانوکے ملنگ تبیں واجہ کازی ءِ نام ءَ ھم یک روچے یک ءُ دو تاک سْیاہ کنت۔
مرچی ما لھتیں جست وت ءَ کنیں کہ کازی ءِ رپتن ءَ چہ پد ما چی مار اِتگ آرا چون چارگ ءَ ایں۔ کازی یے جند وت یک مارشتے ھیال ءُ لیکھے اشانی بابتءَ مئے دیدانک چی بوت کنت؟کازی ءِ رپتن ءَ چہ پد گوشے کہ مئے ھمرائی ءَ لبزانک ءِ پادانی چیر ءَ چہ ھم زمین در اَتک ءُ آزمان لُمب ات۔
من کازی ءَ چہ کسانی زاناں سکول ،کالج ،یونیورسٹی ءں زند ءِ اے دگہ سپراں منی مھروانیں ھمسپر کازی ات۔مئے زھری ،وشی ، گم ءُ رنج، جنگ ءُ مھبت ھر کجام سرھال ءَ کہ مارا وتی ھیال درشان کنگی ات انت گڑا ما کازی ءِ شئراں گوں کُت انت انچش بگش کہ کازی مئے ھر وڑیں جاورانی جھگیری ءَ کنگ ءَ ات۔
ناھدا یے اگاں دریا ءَ روگ ءَ ات ، یا شپانکے ماں پساں، یہ کہ سرمچارے ماں جنگ ءَ روگءَ ات یہ کہ آشکے ماں دمکاں وئیل ات ھرکس ءَ کازی ءِ بستگیں گال اے ساھت ءَ دپ ءَ اتاں، کازی ءِ شائری پہ لس چیزانی سر ءَ ات لس مھلوک ءِ واستا ات۔پمشکا کازی ھر تب ءِ شائر انت کازی ھر پگر ءِ مردمانی سنگت انت۔
چش کہ واجہ مبارک ھر کسی یاداشت ءِ بھر اِنت اگاں من چُش بُگشاں تھرد نباں کہ واجہ مبارک کازی راجی یاداشت ءِ بھر انت۔ھیربکش ءُ گلام مھمد ءَ بگر تاں شے ءُ زاکر ءَ کجام رھشون چہ واجہ کازی ءَ متاثر نہ بیتگ، آ کجام زمین زادگ انت کہ آئی ءَ گوں کازی ءَ مھر نہ ات۔ مبارک کہ آئی ءِ شائری ءِ تہ ءَ ، سپر کنگ دمبرگ ،اھساس جزبات ،مھر ، جنگ ، راج دوستی ، وجودی درشان ، کجام بنگپ انت کہ آ نیست اَنت؟
الم بی ایس او آزاد ءِ داتگیں سرنامگ (شاعرِ آشوب )پہ واجہ مُبارک کازی ءِ کد ءَ چہ کستر انت ۔ چہ بی ایس او آزاد (کہ پہ مارا مُدام مُقّدس اِنت) آئی ءَ چہ شرتریں نام دیگے ما توکہ دارگ ءِ واھشت ءَ داریں اُمیت انت کہ اے دورچاریں سنگت وتی پاد ءَ یکیں بُٹ ءَ نہ کن انت ءُ وتی داتگیں نام ءَ مستر کناں ، اے چیز بایدیں سنگتانی اَنا ءِ جیڑہ مہ بیت وتی ردی ءِ زورگ بلکیں وتی شْرَپ مَنْد کنگ ءِ نام انت ۔ اے گپ ءَ سنگت وت بہ زانت انت کازی ءِ نمیرانی دومی روچ ءَ اشتاپ کاری اے نام دیگ کازی ءِ شائری ءَ گوں زوراکی یے نہ انت دگہ چی یے ؟ کازی ءِ سرا یک دلجمیں کارے بوت کنت، سنگت بایدیں کازی شائری ءِ سر ءَ پٹ ءُ پولی کارے بکن انت رند ءَ گڑا کازی ءَ یک لوگے ئِے تہ ءَ کُبل بکن انت۔
آشوبی شائری مُزاھمتی شائری ءُ راجی شائری ھر سئے جِتا جِتا مانادار اَنت ۔کازی انکلابی شئراں گیش مزاھمتی ءُ راجی رنگ گندگ ءَ کیت بگندے ما سئیں شے یاں یکے کالب ءَ تورگ ءَ ایں ۔۔ آشوبی شائری ءِ مانا بزاں کہ بدلی ئیگ انت، وتی تہ ءَ بدلی آرگ یا زمین ءُ جاورانی تہ ءَ بدلی یے سرا زور دیگ ئیگ انت آشوبی شائری ءَ چہ مستریں سِپت مزاحمتی بزاں کہ گَھگیری شائری ئیگ انت۔
گھگیری ءِ تک ءُ پھنات پراہ ءُ شاھگانتراں، مزاحمت ءَ چہ انکلاب درکئیت۔کازی ءِ شائری ءِ چریشاں مستریں رنگ کہ گندگ بیت آ راجی شائری ئیگ انت، آئی ءِ تہ ءَ بلوچ ءِ جغرافیہ ، زبان ءُ دود ربیدگ ، وتی مزن مردانی مزن شانی ءِ داستان دراہ گندگ ءَ کاینت اودا وتی زمین زبان ءُ راج ءَ گوں مھر کنگ ءِ یک یکشلیں داستانے سَھرا بیت اِنت۔
یاکہ کازی ءَ بِل ات کہ کازی اِنت چیا کہ درائیں چیز وت کازی ءِ تہ ءَ کاینت کازی ءَ کسے کہ زانت آ ،مزاھمت ، آشوب ءُ راج ءَ ھم زانت ، کازی سرجم انت کازی بلوچستان انت ءُ بلوچستان ءَ چہ مستریں نام چی بیت کنت ؟ نھنگ ءِ کئور کجا کسانیں درپے ءِ تہ ءَ پیم بیت کنت ۔
اے مانگیشگ ءِ تہ ءَ من ءَ کازی ءِ شئرے گیر پیداک انت کہ۔
“کسے مارا گُشیت کوہ ءِ مُراد “
“کسّے برّے کھیر کَنت مارا “
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
