TBP Balochi

روکپتی بلوچستان ءِ دمگ سرباز ءِ جھمنندیں بلوچی زبان ءِ مزن نامیں لبزانکار آبد آسکانی ماں کراچی ءَ آغا خان ھسپتال ءَ بیران بیتگ-

آبد آسکانی نوزدہ ءُ پنجاہ ءُ سَے ءَ ودی بیتگ ءُ دوھزار ءُ بیست ءُ چار ءَ ماں کراچی ءَ آگا خان ھسپتال ءَ برین ٹومیر ءِ نادراھی ءَ بیران بیتگ-

آبد سکانی بلوچی زبان ءَ ابید آئی ءَ پارسی زبان ءَ ھم ندکاری کتگ ءُ آ بلوچی ءَ گیشتر تنز لچھی ءُ بچکند ءَ نامان بیتگ –

ھمے زوت ءَ آئی ءِ دو مزنیں کتاب کلیات ءِ نام ءَ چھاپ بیتگ اَنت ءُ ایشی ءَ ابید آئی ءِ دگہ کتاب ھم بلوچی زبان ءَ چھاپ ءُ شنگ بیتگ اَنت-

آئی ءِ نزیکیں مردمانی گوشگ اِنت بازیں وھدے بیتگ کہ آ نادراہ بیتگ ءُ مروچی آئی ءَ اے کوڑھیں امروز یل داتگ ءُ وتی ابدی جاہ ءَ شتگ-

آبد آسکانی ءِ بیرانی ءَ بلوچی لبزانکی پھناتاں دلپدری درشان کنگ ءُ گوشگ بوگ ءَ اِنت کہ لبزانک ءِ پڑا آئی ءِ جاہ ھورک انت-

آبد آسکانی ءِ بازیں کچے ءَ کتاب چھاپ بیتگ انت کہ لھتے کتابانی نام تنز لچھانی کتاب ،چشیں شوم ءُ شانزدہ ،چشیں نیک ءُ نیگبھت ،بے لِٹکیں بُراک ،تنز لچّہانی کُلیات ، دستونکانی کتاب ، مسکیں میدان، سریمگیں بازار ،دستونکانی کُلیات ، دادشاہ ، کیچ ءِ چنال ، فقیر ءِ کچکول ، بلوچ بلوچی ءُ بلوچستان ، ماہ ءِ ایرگوری ءُ گُل سسا ءُ دگہ باز کتاب چھاب بیتگ اَنت-

آئی ءِ کل ءُ کسارات بلوچستان ءِ واپاری شھر ھب چوکی ءَ بوگ ءَ انت –

ایرانی لشکر ءَ تیرگواری کتگ ءُ دو پرپٹ سواریں مردم ٹپی کتگ اَنت-

گیشیں اھوالانی رد ءَ روکپتی بلوچستان ءِ دمگ راسک ءَ ایرانی لشکر ءَ راہ روکیں یک پرپٹے ءِ سر ءَ تیرگواری کرتگ کہ چریشی ءِ سبب ءَ دو مردم ٹپی بیتگ اَنت-

ٹپی بیتگیں مردمانی پجار سھیل سپاھی ء کادر ءُ اھمد سپاھی ء مھمد ءِ ناماں زانگ بیتگ اَنت کہ ھردول شستون ءِ جھمنند گوشگ بوگ ءَ اَنت-

وئیل ءَ پد مھلوک برانز گپتگ ءُ زھرشانی اش کتگ ءُ اود ءَ واکداراں گوشتگ اے مردمانی سیادی جیش العدل ءَ انت بلے آیانی سر ءَ دارگ ءَ ابید تیرگواری کنگ بیتگ –

اھوالانی رد ءَ ھردوکیں ٹپی ئیں مردم ایرانشھر ءَ ھاتم انبیا نادراہ جاہ ءَ برگ بیتگ انت ءُ اود ءَ سھیل ءِ جاور ناگیگ گوشگ بیتگ انت ءُ ھسپتال ءِ ھاسیں جاھاں تھتیگ انت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گوشتگ آپریشن ھیروپ سرجمیں بلوچستان ءَ بنجاھی شھدگ دوازدہ ادارہ ءُ بیلہ ءَ پوجی بنجل بیست اداراں وتی کنٹرول کنگ ءُ کساسی رنگ ءَ 130 ءَ گیش زورگریں گیش پوجی کشگ ءَ پد سوبمندی ءَ آسر بیتگ – آپریشن ھیروپ وتی زیردستیں سرڈگار ءِ سر ءَ دوبر دستیگ کنگ ءِ چِن ءُ لانچانی بنداتی بھر انت، کہ سوبمندی ءِ گون ءَ وتی مکسد ءِ گرگ ءَ آسر بیتگ –

جارکش ءَ گوشتگ بلوچ سرڈگار ءِ سر ءَ اُرش ءَ پاکستانی پوج گوستگیں ھپتاد ءُ شش سالاں چہ زیردستی ءَ انت – زورگری ءِ بنداتی روچ ءَ بلوچ وتی سرڈگار ءِ پھریزگ ءُ پاکستان ءِ زورگری ءَ وت ءَ آجو کنت ءُ دوبر بلوچ وتن ءِ سر ءَ بلوچ کنٹرول ءُ ھاکمی ءِ واستا تاکتوریں دشمنے ءِ ھلاپ ءَ گھگیری کنگ ءَ اَنت-

بلوچ لبریشن آرمی ھمے راجدپتری گھگیری ءِ درچ ءُ نوکتریں دروشم انت – چُشکہ بلوچ مردین ءُ زالبولیں جھدکارانی گچینی دیمونی، بے کچوئیں مھنت، کھولداری ءُ بلوچ راج ءِ سرجمیں پلامرزی ءُ کمک ءَ یک مھکمیں بلوچ راجی لشکرے ءِ دروشم ءَ دیم ءَ جنزان اِنت ءُ وتی کساس، تاکت ءُ بنکی بودیشت ءَ گیش ءَ گیش کنگ اِنت – چریشی ءِ سبب ءَ بلوچ لبریشن آرمی وتی راجی پھریزگ ءَ ءُ زورگریں پوج ءَ کشگ ءَ وتی سرڈگار ءَ دوبر بلوچانی دست ءَ دیگ ءَ چن ءُ لانچاں ءُ تر ءُ گرد بندات کتگ انت – آپریشن ھیروپ ھمے چن ءُ لانچانی بنداتی بھر اِنت – آپریشن ھیروپ دومی بھر گیش ترند بیت اِنت –

آئی ءَ گوشتگ آپریشن ھیروپ ءَ بلوچ لبریشن آرمی ءِ فتح اسکواڈ ءُ ایس ٹی او ایس (اسپیشل ٹیکٹیل آپریشنز اسکواڈ) ءِ ھشت سد گچینی ھیلکاری ایلٹ جنگجول ءُ مجید برگیڈ ءِ ھپت فدائیناں بھر زرتگ – چریشی ءِ تک ءَ مجید برگیڈ ءِ ھپت فدائین وتی مشن ءَ سوبمندی ءِ گون ءَ سرجم ءَ شھیدی پہ وتی نام ءَ کتگ ھمے وڑ بولان دشمن پوج ءِ میان ءَ جنگ ءُ چوپ ءَ بی ایل اے فتح اسکواڈ ءِ یک سرمچارے ءِ شھیدی بیتگ – وھدیکہ آپریشن ھیروپ ءِ وھد ءَ دشمن ءِ یک سد ءُ سِی ءَ گیش کارندہ کشتگ انت ءُ بازین کچے ءَ زدگ کتگ اَنت – بازیں چیک پوسٹ ءُ یک بنجلے تباہ کتگ ءُ بازیں کچے ءَ دشمن ءِ سلاہ ءُ گولہ بارود دستیگ کتگ اَنت-

آئی ءَ گوشتگ زورگریں پوج ءِ سر ءَ اُرش ءِ وھد ءَ بلوچ لبریشن آرمی ےَ پولیس ءُ لیویز ءِ تچک ءَ سرپدی بیھار داتگ اَنت کہ آ زورگریں پاکستانی پوج ءَ کمک ءَ ابید گستا بہ دار اَنت وت ءَ – بلوچ بوگ ءِ پژدر ءَ آیانی سر ءَ اُرش کنگ نہ بیت اِنت ھمے وھد ءَ بیست ءُ دو پولیس ءُ لیویز کارندہ دزگیر کتگ اَنت ءُ پد ءَ آپریشن ھیروپ ءِ سرجم بوگ ءَ آ سلامتی ءَ یل کتگ اَنت – ھرکجا پولیس ءُ لیویز ءَ گھگیری نہ کتگ آیاناں یک کسانوکیں تاوانے ھم نداتگ بلے کلات کراڑی ءِ ھند ءَ لیویز ءُ پولیس ءَ زورگریں پوج ءِ ھمراھداری کنان ءَ بلوچ سرمچارانی نیمگ ءَ پیشگامی کتگ بلوچ لبریشن آرمی ءَ زورگریں پوج ءِ ھوار ھواری ءَ پولیس ءُ لیویز پورس نشانگ کتگ – چریشی ءَ بازیں کارندہ مرتگ ءُ زدگ بیتگ اَنت – بلوچ لبریشن آرمی یک برے پد ءَ پولیس ءُ لیویز پورس ءِ درگت ءَ وتی پالیسی ءَ تچک کنت اِنت بلوچ بوگ ءِ سبب ءَ بی ایل اے پولیس ءُ لیویز ءِ سر ءَ اُرشاں دور کنگ اِنت ، بلے پولیس ءُ لیویز ءِ کارندہ مردمی رنگ ءَ بلوچ راجی زرمبشت آجوئی ءِ ھلاپ ءَ دشمن پوج ءِ ھوار بوگ ءَ بیتگ اَنت، ھمود ءَ ادارہ پولیس ءُ لیویز زورگریں پوج ءِ ھمراھداری ءَ پوجی الگاری ءُ آپریشناں ھوار بوت اَنت گڑا آیانی ھلاپ ءَ ترندیں کاروائی کنگ بندات بیت اِنت ھما داب کنگ بیت اِنت زورگریں پوج ءِ ھلاپ ءَ بوگ ءَ اِنت-

آئی ءَ گوشتگ آپریشن ھیروپ ءِ درچ ءَ شھدگ ءَ ناکہ بندیانی درچ ءِ وھد ءَ بلوچ لبریشن آرمی ءَ مساپر بریں بس پٹ ءُ پول کتگ اَنت – پٹ ءُ پول ءِ وھد ءَ چیکنگ ءِ وھد ءَ بازیں مردماں چہ زورگریں پاکستانی پوج، چیریں ادارہ ءُ فرنٹیئر کور ءِ سروس کارڈ دزکپتگ اَنت – موکلانی وھد ءَ دوبر بلوچستان ءَ زورگریں پوج ءِ کمپنی ءِ نیمگ ءَ روگ ءَ بیتگ اَنت – چریشی ءَ آیاں سرجمی ءَ پجار کنگ ءَ مرگ ءِ سزا داتگ اَنت-

گیش گوشگ بیتگ آپریشن ھیروپ ءِ وھد ءَ بلوچ وسائل ءِ لٹ ءُ پول کتگ پاکستان ءَ بروکیں بازیں گاڑی بی ایل اے ءِ سرمچاراں مانداشتگ انت ، بلے ایشی ءِ ھواری ءَ بلوچ لبریشن آرمی ءِ اے درچ ءَ تچک کنت اِنت ناکہ بندیانی وھد ءَ انسانی ھمدردی ءَ بنیاد ءِ دراھیں ایمبولینس مھکمیں راھاں دیم داتگ انت سویلین گاڑیاں تاوان نہ داتگ انت، بلے بازیں جاھاں اے ھال انت ناکہ بندیانی ھلاس بوگ ءَ پد بلوچ راج ءُ سرمچارانی میان ءَ بدگمانی ودی کنگ ءِ دروشم ءَ پاکستانی پوج ءِ لس پوشاکی کارندہ ءُ وتگڑیں ڈیتھ اسکواڈ ءِ کارندھاں بازیں گاڑی مانداشتگ اَنت کہ بی ایل اے اے گپ ءَ تچک کنت اے بی ایل اے ءَ نہ کتگ اَنت-

جارکش ءَ گوشتگ بلوچ لبریشن آرمی وتی بلوچ راج ءَ گوں دزبندی ءِ کنت اِنت آ وتی راجی آجوئی ءِ اے جنگ ءَ برزشانی ءِ وھد ءَ وتی راجی لشکر بی ایل اے ءِ ھمراھداری ءَ بہ کن ات- ءُ اے آپریشن ھیروپ ءِ دومی بر ءَ درست وتی لوگاں در بہ کپ اِت بلوچستان ءِ ھمک دمک ءُ دراں دشمن ءِ ھلاپ ءَ گھگیری ءِ بھر بہ بیت ءُ راجی ءُ راجدپتری ءِ کرد ءَ پیلو بہ کن ات-

گڈسر ءَ گوشگ بیتگ بلوچ لبریشن آرمی، آپریشن ھیروپ ءِ اُرش ءُ شھیدانی درگت ءَ زوت رسانکدر ءَ درشان ءَ شنگ کنت اِنت-

سلاہ بنداں پشین، مستونگ ءُ کیچ ءِ جتاجتائیں شھراں چار اُرش کنگ بیتگ-

ھالانی رِد ءَ بلوچستان ءِ دمگ پشین ءَ ناشناسیں مردماں پاکستانی چیریں ادارھانی کارمرزی ءِ ماڑی سر ءَ دستی بمبے چگل داتگ ءُ تتکگ اَنت کہ ماڑی نزیک ءَ کپتگ ءُ تُرندی ءُ ترکّ اِتگ-

پشین انتزامیہ رِد ءَ اُرش ءُ چیریں ادارھانی دو کارمند ٹپی بیتگ اَنت-

ھمے وڑ چہ مستونگ ءَ ھالانی رِد ءَ سلاہ بندیں مردماں پاکستانی پوج بُنجل اُرش ءِ نشانگ کتگ وھدے کہ بُنجل نزیک ءَ چہ تُرندیں تراک ءُ تیرگواری ءِ توار اش کنگ بیتگ-

مستونگ ءَ اُرش ءَ پاکستانی پوج ءَ جانی ءُ مالی تاوان چست کنگ ھال اِنت-

ھمے وڑ بلوچستان ءِ دمگ کیچ ءِ بُنجاھی شھر تربت ائیرپورٹ نزیک ءَ چہ تُرندیں تیرگواری ءُ تراکانی توار اش کنگ بیتگ-

دمگی اِھوالکار رِد ءَ تنی وھدے کساس شش تراکانی توار ءَ سرجمیں تربت شھر جکستگ وھد وھد سر ءَ تیرگواری ءِ ھم ھال اِنت بلے دمگ ءَ پوج ءَ تُرند کتگ وھدے کہ شھر جتاجتائیں شھدگاں پوج شیوار کنگ بیتگ-

دومی نیمگ ءَ کیچ ءِ دمگ تمپ بالیچہ ءَ سے تُرندیں تراکانی توار اش کنگ بیتگ وھدے کہ پولیس ءُ پوج ءِ مزنیں کچے ءَ وئیلجاہ ءَ شتگ اَنت-

کیچ ءِ جتاجتائیں شھراں بیتگیں بمب تراک ءُ تیرگواریانی ھالانی آیگ پش کپتگ اَنت-

انتزامیہ ءُ پاکستانی پوج ءَ شھری لوگانی تہ ءَ نندگ ءُ دکانانی بند کنگ پرمان داتگ-

ھالانی رِد ءَ بیلہ شھر ءَ تاں انگت کرفیو برجاہ ءَ اِنت شھر ءَ ایمبولینس ءِ مزنیں کچے ءَ اوشتاتگ اَنت وھدے کہ انتزامیہ ءَ شھری لوگانی تہ ءَ نندگ ءُ دکانانی بند کنگ پرمان داتگ-

دومی نیمگ ءَ شھر ءِ سرجمیں نادُراھجاھاں ایمرجنسی جنگ بیتگ وھدے کہ چہ بیلہ ءِ نزیکیں دمگ اوتھل ءَ ھم انتزامیہ ءَ نادُراھجاہ ءِ کارادر شیوار کنگ ءَ گْوشتگ اَنت-

بیلہ کش گوراں اوتھل، ھب چوکی ءَ تاں موباھل نیٹورک ءُ دامگ اشی ءَ ساری بند کنگ بیتگ اَنت وھدے کہ بیلہ ءُ اوتھل ءَ اَبید دگہ شھراں دامگ ءِ پچ بیگ بندات بیتگ اَنت-

وھدے کہ بلوچستان ءِ سر وزیر بلوچستان ءَ ٹاہ داتگ کہ اُرشکار بُنجاھی گیٹ ءَ جنگ بیتگ اَنت – دومی نیمگ ءَ بی ایل اے ءِ جند چینل ھکل ءَ تامُر شنگ کنگ بیتگ اَنت اشانی تہ ءَ گندگ بیت کہ فدائین بُنجل تہ ءَ جتاجتائیں جاھاں سنگر اِش گپتگ-

دمگی مردمانی رِد ءَ بُنجل ءَ چہ مروچی بیگاہ ءَ تاں تراکانی توار اش کنگ بیتگ اَنت- وھدے کہ ھیلی کاپٹرانی تر ءُ گرد ھم برجاہ اِنت-

دومی نیمگ ءَ بلوچ لبریشن آرمی ءَ وتی درشان ءَ آپریشن ھیروف ءِ آسر کنگ جار جنان ءَ سرجمیں شھدگانی پچ کنگ جار جتگ-

گل ءِ رِد ءَ آپریشن ھیروگ ءِ لڑ تنی وھدے بیلہ ءَ ھوار جتاجتائیں دمگاں یک سد سی پاکستانی پوج کارمند کشتگ اَنت-

بی ایل اے ءَ آپریشن ھیروف ءُ بیلہ ءَ پاکستانی پوج ءِ بُنجاھی بُنجل سر ءُ فدائین اُرش ءِ گیشیں ھالاں زوت شنگ کنگ جار جتگ-

بلوچ لبریشن آرمی ءِ جارکش جیئند بلوچ ءَ گوشتگ بیست ءُ پنچ اگست ءَ بندات بیتگیں بلوچ لبریشن آرمی ءِ فدائی آپریشن ھیروپ سوبمندی ءَ گوں آسر بوگ ءِ جار ءَ جن ایں-

جارکش ءَ گوشتگ آپریشن ھیروپ ءِ درچ ءَ دشمن ءِ بیلہ بنجل ءِ سر ءَ مجید برگیڈ ءِ فدائیناں دستیگ ءُ سرجمیں بلوچستان ءَ بنجاھی شھدگانی سر ءَ ایس ٹی او ایس ءُ فتح اسکواڈ ءِ ناکہ بندی کنٹرول ءَ کتگ-

آئی ءَ گوشتگ آپریشن ھیروپ ءِ وھد ءَ دشمن ءِ بیلہ بنجل بی ایل اے ءِ مجید برگیڈ ءَ بیست اداراں وتی کنٹرول ءَ کتگ ءُ دشمن ءِ شست ءُ ھشت کارمندانی کشگ ءَ سوبمند بیتگ انت ءُ ھمے وڑ بی ایل اے ءِ یونٹ فتح اسکواڈ ءُ ایس ٹی او ایس ءَ شست ءُ دو کارندہ کشتگ انت ءُ دوازدہ اداراں بلوچستان ءِ سرجمیں دگ بستگ انت ءُ کساسی رنگ ءَ یک سد ءُ سِی کارندہ کشتگ ءُ بازیں کساسے ءَ زدگ کتگ اَنت-

جارکش ءَ گوشتگ آپریشن ھیروپ ءِ ھلاس بوگ ءَ مول ءُ مرادانی درچ ءَ پد دراھیں دگانی ناکہ بندی ھلاس کتگ ءُ بیلہ بنجل ءِ مکسد گپتگ ءُ آپریشن ءِ ھلاسی ءِ جار ءَ جن ایں-

سرجمیں اھوال زوت شنگ کنگ بنت اِنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ بلوچ لبریشن آرمی ءِ فدائی آپریشن “ھیروپ” ءِ درچ ءَ بی ایل اے ءِ فدائی یونٹ مجید برگیڈ ءَ زورگریں پاکستانی پوج ءِ بنجل ءِ سر ءَ اُرش کتگ ءُ18 اداراں چہ کنٹرول ءَ کتگ ءُ دشمن ءِ شست ءُ چار کارندہ کشتگ ءُ بازیں کساسے ءَ زدگ کتگ انت –

جارکش ءَ گوشتگ داں انگت ءَ چار بلوچ فدائیناں شھیدی پہ وتی نام ءَ کتگ کہ چریشانی توک ءَ مجید برگیڈ ءِ فدائی ماھل بلوچ پنام ذلان کرد ء کھدہ حمید جھمنند سوربندر گوادر ءُ فدائی رضوان بلوچ پنام ءِ ھمل ءمولابخش جھمنند پانوان گوادر بنداتی ءَ وی آئی ای ڈی اُرش ءَ ءُ پد ءَ دگہ دو فدائین دشمن ءِ بنجل ءِ توک ءَ دیم پہ دیمی میڑان ءَ شھید بیتگ اَنت- کہ ایشانی اھوال پد ءَ شنگ کنگ بنت اِنت-

جارکش ءَ گوشتگ ھمے ڈول سرجمیں بلوچستان ءَ بنجاھی دگانی بندگ ءخ بی ایل اے ءِ فتح اسکواڈ ءُ ایس ٹو او ایس ءِ ناکہ داشتگ ءُ دستیگی برجاہ دارگ ءَ پد شست ءُ دو پوجی کشتگ انت وتی مکسد ءَ پد بی ایل اے فتح اسکواڈ ءُ ایس ٹی او ایس ءَ ناکہ بندی ھلاس کتگ ءُ مھلوک ءَ ھال دیں نی آ دگاں سپر کت کن اَنت-

جارکش ءَ گوشتگ آپریشن ھیروپ ءَ داں انگت ءَ کشگ بیتگیں پوجیانی کساس یک سد ءُ بیست ءُ شش ءَ سر بیتگ اَنت- سرجمیں اھوال زوت شنگ کنگ بنت اِنت-

بلوچ لبریشن آرمی ءَ بیلہ ءَ پاکستانی پوج ءِ بنجل ءَ ارش کنوکیں دو ندر بیتگینانی اکس شنگ کرتگ انت-

گل ءِ رد ءَ مجید بریگیڈ ءِ دو فدائین ماھل بلوچ ءُ فدائی رضوان بلوچ ءَ شورو ءَ پُریں گاڑی پاکستانی پوج ءِ بیلہ بُنجل ءِ دروازگ ءَ ٹکر جتگ ءُ آپریشن ھیروپ ءِ بندات کتگ-

زانگ بہ بیت بی ایل اے ءَ بیلہ ءَ پاکستانی پوج ءِ بنجل ءِ سر ءَ ارش ءِ برجاہ بوگ ءِ آھوال شنگ کتگ اَنت ءُ گوشتگ کہ بنجلے یک بھرے دستیگی ءَ اِنت-

چہ شپ ءَ شھر ءَ تراک ءُ تیرگواریانی درچ یکشل ءَ برجاہ اَنت –

گیشیں اھوالانی رد ءَ بلوچستان ءِ دمگ لسبیلہ ءِ ھند بیلہ ءَ چہ شپ ءَ سلاہ بندیں مردم پاکستانی پوج ءِ یک بنجاھی بنجلے ءَ پترتگ اَنت کہ اود ءَ جنگ ءُ بمب تراکانی یک نہ کُٹوکیں درچے بندات بیتگ کہ انگت برجاہ اِنت-

اے بیتگیں اُرش ءِ زمہ واری بلوچ لبریشن آرمی ءَ منان ءَ گوشتگ مجید برگیڈ ءِ بازیں ھمراہ اے وھد ءَ پاکستانی پوج ءِ بنجل ءَ پترتگ ءُ کنٹرول اش وتی دست ءَ کتگ ءُ جنگ ءُ چوپانی درچ برجاہ اِنت-

بلوچ لبریشن آرمی ءِ آفیشل چینل ھکل ءَ بیلہ ءِ بنجل ءَ پترگی ءُ پاکستانی پوج ءِ گون ءَ دیم پہ دیمی جنگ ءَ دزگٹیں وتی ھمراھانی بازیں توار بند شنگ کتگ اَنت-

دومی نیمگ ءَ شھر ءَ جنگ ءُ چوپانی گر ءُ دار کنگ ءِ ھاتر ءَ انتزامیہ ءَ بیلہ ءَ روکیں راھاں بازیں کچے ءَ پاکستانی پوج داشتگ اَنت ءُ ھیلی کاپٹر ءُ ڈرون کیمرھانی گشت برجاہ اِنت-

گیش اھوالاں دمگی انتزامیہ ءِ ھکم ءَ بیلہ ءُ اوتھل ءِ دراھیں ھسپتالانی ایمرجنسی ناپز کتگ-

بلوچستان ءِ دمگ کلات ءَ بلوچ لبریشن آرمی ءِ آپریشن ھیروپ ءِ وھد ءَ پوج ءِ گون ءَ جنگ ءُ چوپ ءَ دَہ کارندھانی مرگ ءِ ھال واکداراں راست کتگ-

ایس ایس پی کلات دوستین دشتی ءِ رد ءَ تیرگواری ءَ پولیس ءِ یک سب انسپکٹر، چار لیویز کارندھاں ھوار دَہ مردم کشگ بیتگ اَنت-

پولیس ءِ بنشون ءِ رد ءَ ھائی وے ءُ شھر ءَ سلاہ بندیں مردماں شپ ءَ پولیس ءِ گون ءَ جنگ ءُ چوپ بیتگ، کہ چریشی ءَ جانی ءُ مالی تاوانانی دیمپانی کنگ کپتگ اَنت-

زانگ بہ بیت گوستگیں شپ ءَ بلوچ لبریشن آرمی ءَ جار پرینتگ ات کہ بی ایل اے ءَ سرجمیں بلوچستان ءَ آپریشن ھیروپ ءِ بندات کتگ چریشی ءَ پد بلوچ لبریشن آرمی ءِ سرمچاراں بلوچستان ءِ جتا جتائیں شھدگ بستگ ءُ پٹ ءُ پول بندات کتگ اَنت ءُ پوج ءِ گون ءَ جنگ ءُ چوپ بندات بیتگ اَنت ءَ یکشل ءَ برجاہ اَنت-

ھمے ڈول گل ءَ گوشتگ بیلہ ءَ پاکستانی پوج ءِ بنجاھی بنجل ءِ کنٹرول گپتگ ءُ اے اُرش ءَ بی ایل اے ءِ مجید برگیڈ ءِ فدائین بھر زیرگ ءَ اَنت-