پاکستانی پوجی کارندھانی دزگیری – بی ایل اے ءِ گچینی باسک چی اِنت؟
دی بلوچستان پوسٹ گچینی
نبشتہ کار: باھوٹ بلوچ
11 اکتوبر سَے شمبے ءَ پاکستان ءِ پیرا ملٹری لشکر فرنٹیئر کور ءِ دو کارندہ سوبیدار محمد خان ءُ سپاھیگ عبدالرشید سلاہ بندین مردماں ھما وھد ءَ بیگواہ کُتگ ءُ ناشناسیں جاھاں برتگ اَنت کہ آ چہ بولان ءِ ھنکین مارگٹ ءَ گوزگ ءَ بوتگ اَنت۔ دوئیں کارندہ یک بسے ءَ مساپری کنگ ءَ بیتگ اَنت کہ شھدگ ءِ سر ءَ سلاہ بندیں مردماں بس داشتگ ءُ پجار کنگ ءَ پد آ گوں وت برتگ اَنت۔
بلوچ لبریشن آرمی (بی ایل اے) ءَ دوئیں کارندھانی دزگیر کنگ ءِ زمہ واری من اتگ۔ بی ایل اے ءِ جارکش جیئند بلوچ ءَ یک شنگ کتگیں درشانے ءِ تہ ءَ گْوشتگ کہ اے بیڑ بلوچ لبریشن آرمی ءِ اسپیشل ٹیکٹیکل آپریشنز اسکواڈ (ایس ٹی او ایس) ءَ بی ایل اے انٹیلجنس ونگ ءِ داتگیں چیریں ھالانی سر ءَ کُتگ۔
چد ءُ پیسر 14 ستمبر 2023 ءِ بیگاہ ءَ چہ شال ءَ کساس 20 کلومیٹر دیر ولی تنگی ءِ ھند ءَ پاکستانی پوج ءِ نوک جوڑکتگیں پانگسانی سر ءَ بلوچ لبریشن آرمی ءَ اُرش کُتگ ءُ وتی دستیگی ءَ زرتگ اَت اَنت۔
ولی تنگی ءَ بیتگیں اُرش ءِ تامر بی ایل اے ءِ رسانکدری چینل ھکل ءِ سر ءَ ‘چاردہ دمان ءُ چاردہ جنگول’ ءِ سرھال ءَ گوں شنگ کنگ بیتگ اَت۔ تامر ءِ بندات ءَ پدر کنگ بیت کہ ارش ءَ بی ایل اے ءِ گچینی باسک ‘فتح اسکواڈ’ ءَ اے آپریشن ءَ بھر زرتگ۔
بلوچ لبریشن آرمی ءِ جتا جتائیں باسک جوڑ کنگ بیتگ اَنت کہ ایشانی درانگازی جتا جتائیں وھداں درشان، تامر ءُ بُتانی دروشم ءَ کنگ بیتگ انت۔
بی ایل اے – اسپیشل ٹیکٹیکل آپریشنز اسکواڈ (ایس ٹی او ایس) چی اِنت؟
بی ایل اے – اسپیشل ٹیکٹیکل آپریشنز اسکواڈ ءِ بابت ءَ دلجمیں درشان 21 اکتوبر 2018 ءَ ھما وھد ءَ دیم ءَ اتک وھدے بی ایل اے ءِ یک جنگولیں فتح قمبرانی پنام چیئرمین بولان ءِ ھند مَچ ءَ پاکستانی پوج ءَ گوں یک جنگے ئِے تہ ءَ نمیران بیت اِنت۔
بی ایل اے ءِ جارکش جیئند بلوچ ءَ وتی درشان ءِ تہ ءَ گْوشتگ اَت کہ فتح قمبرانی بی ایل اے – اسپیشل ٹیکٹیکل آپریشنز اسکواڈ ءِ کماندار ءِ بستار ءَ سُر ءُ پر کنگ ءَ بیتگ۔
گل ءِ شنگ بیتگیں لٹریچر ءِ تہ ءَ گْوشگ بیتگ کہ ‘ایس ٹی او ایس اگاں اسپیشل ٹیکٹیکل آپریشنز اسکواڈ بلوچ لبریشن آرمی ءِ مزن ھیلکاریں ھما گچینی باسک اِنت کہ آ شھری ءُ کوھی ھندانی تہ ءَ بلوچ لبریشن آرمی ءِ ھاسیں اُرشاں پیش داروکیں بودشتی ءَ گوں سرجم کنت اِنت۔’
بلوچ لبریشن آرمی ءِ کارانی سر ءِ بندوکیں تاک ‘دکّ’ ءِ تہ ءَ بی ایل اے – ایس ٹی او ایس ءِ گچینی دِرچ ھوار کنگ بیت اِنت، ایشانی تہ ءَ اے باسک ءِ کار ءُ نمیرانیں مردمانی کسہ ھم کنگ بیت، کہ آ اے باسک ءِ بھر بنت اِنت۔
دک 2022 ءِ اھوال ءِ رد ءَ بی ایل اے – ایس ٹی او ایس ءَ گوستگیں سال ءَ سرجمیں بلوچستان ءَ 9 اُرش کُتگ کہ ایشانی تہ ءَ چہ زیارت ءَ پاکستانی پوج ءِ کرنل لئیق بیگ مرزا ءِ دزگیر کنگ، چہ ھرنائی ءَ پاکستانی پوج ءُ چیریں ادارگانی دو کارندھانی دزگیر کنگ ءُ ھمے نیام ءَ بیڑ ءَ ھواریں یک بالی پرگے تباہ کنگ ءُ اپسر ءَ ھوار شش کارندھانی کُشگ ھوار اَنت۔
وھدیکہ گوستگیں سال ءِ آسر 25 دسمبر ءَ بی ایل اے ءِ پیسریگیں سروک جنرل اسلم بلوچ ءِ نمیرانی ءِ سالروچ ءِ رد ءَ پد ما پدیں اُرشانی تہ ءَ دو ترندیں اُرش تربت ءُ کاھان ءَ کنگ بنت کہ ایشانی تہ ءَ ھواریں دروشم ءَ پاکستانی پوج ءِ یک کیپٹن ءُ کمیشنڈ اپسر ءَ ھوار 15 کارندہ کُشگ بنت۔ ھمے دوئیں اُرش ھم بی ایل اے ءِ ایس ٹی او ایس تَک ءَ کُتگ اَنت۔
ایشی ءَ ابید شھرانی تہ ءَ اے باسک ءَ سلاہ بندیں اُرشاں ابید بمب تراکانی پاکستانی پوج ءِ پلامرزیں مردم ھم نشانگ کُتگ انت بلوچستان ءِ شھرانی تہ ءَ ھمے تَک ءَ ‘مقناطیسی بم’ بزانکہ چکمکی بمب ھم بندات کُتگ اَنت۔
اے تک ءِ باسکانی تہ ءَ طارق مری پنام ناصر بولان ءُ ھرنائی ءِ کوھی دمگانی تہ ءَ 23 اکتوبر 2021 ءَ جنترو ءِ ھند ءَ پاکستانی پوج ءَ گوں یک میڑ یے ئِے تہ ءَ نمیران بیت اِنت۔ بی ایل اے ءِ درشان ءِ تہ ءَ گْوشگ بیتگ اَت کہ طارق مری پنام ناصر جھمنند کاھان، بلوچ لبریشن آرمی بولان دمگ ءِ اسپیشل ٹیکٹیکل آپریشنل اسکواڈ ءِ کماندار بیتگ۔
اے تَک ءِ شھری باسک تابش عنایت پنام ریحان جھمنند خدابادان، پنجگور 29 جولائی 2021 ءِ شپ ءَ پنجگور ءَ پاکستانی پوج ءَ گوں یک سلاہ بندیں جنگے ئِے تہ ءَ نمیران بیت اِنت۔
بلوچ لبریشن آرمی ءِ ھمے تک برجاھیں سال ءَ شنگ بیتگیں بی ایل اے ءِ سروک بشیر زیب بلوچ ءِ تامری کلھانی تہ ءَ ھم گندگ بیت کن اَنت، کہ اود ءَ اے تَک ءِ باسک گچینی پوشاکانی تہ ءَ ءُ نوکیں سلاھاں گوں گندگ بیت کن اَنت۔
بی ایل اے – فتح اسکواڈ چی اِنت؟
گل ءِ لٹریچر ءِ رد ءَ ‘فتح اسکواڈ، بلوچ لبریشن آرمی ءِ پنچمی باسک ءُ “پیشرُمبیں دستگ” اِنت۔ اکتوبر 2018 ءَ ھژدہ ءَ داں فتح اسکواڈ بی ایل اے ءِ چارمی باسک “ایس ٹی او ایس” ءِ یک مھکمیں بھرے بیتگ۔ البت 20 اکتوبر 2018 ءَ سرمچار فتح قمبرانی پنام چیئرمین ءِ نمیران بئیگ ءَ پد، بی ایل اے ءَ فتح قمبرانی ءِ دلیری ءِ منگ ءَ “فتح اسکواڈ” گوں آئی ءِ نام ءَ گوں بندوک کُتگ، یک جتاھیں باسکے ئِے بستار داتگ۔’
گیشتر گشگ بیتگ کہ ‘بلوچ لبریشن آرمی ءِ اے “ایلیٹ ونگ” پیش داروکیں بودشت کاری یے واھند، تجربگ کاریں سرمچارانی سر ءَ بندوک اِنت، کہ پیشرُمبیں دستگ ءِ کرد ءَ پیلو کنان ءَ دژمن ءِ بازیں پانگسانی سر ءَ دستیگی کنگ ءَ سوبمند بیتگ۔’
بی ایل اے ءَ 31 مئی 2021 ءَ بولان ءِ دمگ مارواڑ ءَ پاکستانی پوج ءِ غازہ بند سکاؤٹس 129 ونگ ءِ اویس پانگس یک ترندیں ارشے ءِ تہ ءَ نشانگ کُت، ھمے اُرش ءَ پاکستانی پوج ءِ 24 کارندہ کُشگ بیتگ اَنت ءُ یکے جنگولاں دزگیر کُتگ اَت۔
ھمے اُرش ءَ بی ایل اے ءِ 3 جنگول ھم جَنَگ بیتگ اَت، کہ اِیشانی تہ ءَ ھنگل مری پنام لیلا، آفتاب جتک پنام وشین ءُ شاویز زھری پنام سارنگ ھوار اَنت۔
بی ایل اے ءِ جارکش ءَ گْوشتگ کہ سئے مردم بلوچ لبریشن آرمی ءِ پیشرُمبیں تکے باسک بیتگ اَنت۔ جارکش ءَ گیشتر گْوشتگ کہ فتح اسکواڈ ءَ گل ءِ ھما گچینتگیں دلیریں سرمچار ھوار اَنت، کہ آ ھدادیں جنگی بودیشتانی واھند بئیگ ءَ ھوار آیاں اے ھاسیں ھیلکاری ھم رس اتگ کہ آ دیم پہ دیمی میڑانی تہ ءَ سرمچارانی رھشونی ءَ کنان دژمن ءِ سرپاں پروشان بنت ءُ تہ ءَ بہ پُتراَنت۔
فتح اسکواڈ ءِ بابت ءَ شنگ بیتگیں تاک ءِ تہ ءَ اسکواڈ ءِ 17 ٹِکانی سر ءَ بندوکیں رھبند ءُ پرمان ھوار اَنت، اے ٹِکانی تہ ءَ اے ھم ھوار اِنت کہ اسکواڈ ءِ باسک ھواری ءَ پد وتی وس ءَ نہ بنت، ءُ درستیں پیسلھانی تہ ءَ بنجاہ ءِ پابند بنت۔ تچگ، سرنڈر کنگ اگاں گل ءِ یل کنگ ءِ جاور ءَ ھما باسک کُشگ بیت اِنت۔ اسکواڈ رھوت ءِ ھاتر ءَ ٹیکنالوجی ءِ کارمرزی ءَ گچینی وھد ءَ ڈن کُت نہ کنت۔ اسکواڈ ءِ سنگتانی نمیران بئیگ ءِ دروشم ءَ، نامانی پدر کنگ مِشن ءِ رد ءَ گل ءِ زمہ واری بیت۔ اسکواڈ ءِ باسک وتی اگدہ ءَ ھچ پئیم ءَ پدر نہ کن اَنت۔
آسری
بلوچ لبریشن آرمی ءِ کارانی تہ ءَ بدلی گندگ ءَ پیداک اِنت۔ گوستگیں پنچ سالانی تہ ءَ کہ ھمود ءَ بی ایل اے – مجید برگیڈ ءَ وتی اُرشانی تہ ءَ تُرندی ءُ تیزی آورتگ، ھمود ءَ کوہ ءُ شھرانی تہ ءَ گل ءَ جتائیں دروشم ءِ اُرش کتگ اَنت کہ ایشانی تہ ءَ وڑ ءُ پئیمانی تہ ءَ بدلی گندگ ءَ اَتکگ۔
بی ایل اے انٹیلی جنس ءِ تک ءَ تربت ءَ پاکستانی پوج ءِ چیریں ادارگانی مزنیں اپسرانی اھوال درگیجگ ءَ ھوار گوادر ءِ مُھریں ھندانی تہ ءَ چینی شرکتانی کارندھانی سُر ءُ پُرانی اھوال ھم جم کنگ ءَ سوبمند بیتگ اَنت وھدیکہ ولی تنگی، مارواڑ، کاھان ءُ دگہ ھندانی تہ ءَ پاکستانی پوج ءِ کیمپانی سر ءَ دستیگ کنگ ءَ ھم سوبمند بیتگ ءُ بنجاھی شھدگانی سر ءَ دگ بندگ ءُ پوجی اپسر ءُ کارندھانی دزگیر کنگ بلوچ لبریشن آرمی ءِ باسکانی مھکمی ءَ پدر کن اَنت۔
ترندیں اُرشانی پدگرد ءَ پاکستانی پوج ءِ نیمگ ءَ پیسر ءَ چہ دزگیریں (زورانسری بیگواھیں) مردمانی کُشگ پوج ءِ بےسوبی ءَ پدر کنت وھدیکہ دیمتر ءَ اے باسکانی گیشتر مھکم بوھگ ءِ ھم گمان گندگ بیگ ءَ اِنت۔
بی ایل اے ءِ سروک بشیر زیب بلوچ ءَ وتی کلوہ ءِ تہ ءَ گْوشتگ کہ ’مارا وتی جنگ ھمود ءَ داں سر کنگی اِنت کہ اسلام آباد، پنجاب، پنڈی، لاھور ءُ گجرانوالہ ءَ مھلوک ڈن ءَ در بہ کپ اَنت، پریات بہ کن اَنت ءُ پاکستان ءَ بگش اَنت کہ نوں بس کن بلوچستان ءِ تہ ءَ جنگ ءَ بند بہ کن۔’
