TBP Balochi

متحدہ عرب امارات ءَ شارجہ ءَ مھکمہ ءِ نشھانی گروک ءِ ڈائریکٹر کرنل ماجد العسم ءَ گوشتگ شارجہ ءِ پولیس ءَ منشیات ءِ دری ڈیھاں برگ ءِ وھد ءَ بے سوب کتگ اَنت-

الامارار الیون ءِ رد ءَ کرنل ماجد العسم ءَ گوشتگ پولیس ءَ ھال سر بیتگ کہ یک میان اُستمانی ٹولیبیت امارات ءَ نشہ ءَ ھواریں چیزانی تالان کنگ ءُ آئی ءِ بھا کنگ ءِ ھاتر ءَ نشہ ءِ برگ ءِ جھد ءَ اَنت-

ٹولی ءَ عرب ءُ ایشیائی یے ڈیھانی سِی ءُ دو مردم ھوار بیتگ اَنت – ءک ھمساھگیں ڈیھے ءِ راہ ءَ نشہ ءِ برگ ءَ بیتگ اَنت- مارکیٹ ءِ ویلیو ءَ چاردہ ملین درھم ءِ کساس بیتگ اَنت- اسمگلنگ ءِ جھد ءَ برادری ڈیھ ءِ کمک ءَ بے سوب کتگ –

کرنل ماجد العسم ءَ گوشتگ کہ شارجہ پولیس ءَ میان اُستمانی ٹولی ءِ یک باسکے دزگیر کتگ ءُ ایشی ءِ گور ءَ پنجاہ سیر ھشیش ءُ چِل ءُ نُھ لیٹر سیال کرسٹل دزکپتگ اَنت-

جست ءُ پرس ءِ وھد ءَ سرپدی رس اتگ کہ جرمکار امارات ءَ چہ ڈن جاڑیگیں ٹولی ءِ سروک ءِ گوشگ ءَ برگ ءَ بیتگے – ٹولی ءَ بازیں ڈیھانی مردم ھوار اَنت ءُ ٹولی ءِ مردم ھمساھگیں ڈیھ ءَ یک گودامے زرتگ ءُ نشھی ساز ءُ ساماناں ایر کنگ ءَ بیتگ اَنت-

جست ءُ پرس ءَ پد ٹولی ءِ باسک ھم دزگیر کتگ اَنت ءُ آیانی گور ءَ یازدہ لک ءُ ھپتاد ھزار نشھی گولی دزکپتگ اَنت-

مھمکہ ءِ انسداد منشیات ءِ ڈائریکٹر ءَ گوشتگ کہ میان اُستمانی ٹولی ءَ نشہ ءِ اسمگلنگ ءِ کارمرد کنگ ءِ دو نوکیں دروشم کارمرد کتگ اَنت- ٹولی ءَ گیر کانونی رنگ ءَ کسٹم ءِ گور ءَ شتگ ءُ نشہ وردنی چیزاں ڈیھ ءَ آرگ ءَ کسٹم کلیئرنس کمپنی ءِ کمک زرتگ دانکہ کسٹم ءُ شک مہ بیت اِنت-

دومی رنگ ءُ دروشم اے وڑ بیتگ کہ چہ شارجہ آیوکیں یک گاڑی یے ءِ چیریں جاھاں سیال کرسٹل چیر داتگ ءُ برگ ءَ بیتگ انت بلے ما اے جھد ھم بے سوب کتگ-

روکپتی بلوچستان ءِ جتا جتائیں جاھاں ایرانی لشکر ءِ تیرگواری ءُ گاڑیانی رنگیری ءِ وئیلاں یک زھگے ءَ ھوار سَے مردم بیران بیتگ اَنت-

گیشیں اھوالانی رد ءَ روکپتی بلوچستان ءِ دمگ ایرانشھر ءَ ایرانی مِرساد یک گاڑی یے دمب ءَ کپتگ ءُ چریشی ءَ چہ گاڑی کپتگ ءُ اود ءَ یک زھگے بیران بیتگ-

بیران بیتگیں زھگ ءِ پجار نُھ سالی ئیں بھرام ھملی ء شھداد جھمنند دراز ایرانشھر ءِ نام ءَ زانگ بیتگ –

اھوالانی رد ءَ مرساد ءَ گاڑی ءِ رندگیری کتگ ءُ گاڑی وئیل ءِ آماچ بیتگ ءُ چریشی ءَ زھگ بیران بیتگ-

ھمے وڑ ءَ نیکشھر ءَ ایرانی لشکر ءِ تیرگواری ءَ یک مردمے بیران بیتگ-

اھوالانی رد ءَ لشکر ءِ تیرگواری ءَ نیکشھر ءَ یک مردمے زدگ بیتگ ءُ نادراہ جاہ ءَ آئی ءَ وتی ساہ داتگ اَنت-

بیران بیتگیں مردم ءِ پجار آصف ماککی ء احمد علی جھمنند چشمہ زیارت زاھدان ءِ نام ءَ زانگ بیتگ –

ھمے وڑ ءَ زھک ءِ سیمسر ءَ ایرانی لشکر ءِ نیمگ ءَ ودی بوگ ءِ کاگدانی نہ بوگ ءَ ھلک ءَ گلینگ ءَ واتر کنگ ءَ پد کشگ بیتگ-

شیر آباد زاھدان ءِ جھمنند چہ ھلک ءَ گلینگ ءَ پد کشگ بیتگ-

کشگ بیتگیں مردم ءِ پجار رھمت اللہ براھوئی ء عبداللہ ءِ نام ءَ زانگ بیتگ –

اھوالانی رد ءَ رھمت اللہ ءِ سیمسر ءَ لشکر ءَ تیرگواری کتگ ءُ آئی ءِ پاد پروشتگ انت ءُ پد ءَ آئی ءِ لاش ما زابل ءَ نادراہ ءَ سر کتگ بیتگ-

زانگ بہ بیت روکپتی بلوچستان ءَ ھمک روچ مردم تیرانی نشانگ کنگ بوگ ءَ اَنت کہ اود ءَ بازیں کچے ءَ مردم جند ءِ جان ءُ ساھاں زبھر بوگ ءَ اَنت-

کرکٹ ورلڈ کپ ءِ چاردھمی گوازی سری لنکا ءُ آسٹریلیا میان ءَ ماں بھارت ءَ ایکانہ اسپورٹ سٹی لکھنو کرکٹ پٹ ءَ کنگ بوتگ کہ آسٹریلیا ءَ پنچ وکٹاں گوازی کٹ اِتگ –

آسٹریلیا ءُ سری لنکا ءِ میان ءَ بوتگیں گوازی ءَ سری لنکا ءَ ٹاس کٹ اِتگ ءُ اولسر ءَ بیٹنگ کنگ ءِ پیسلہ کتگ ءُ آسٹریلیا ءِ دیم ءَ دوسد ءُ دھ رنانی ٹارگٹ ایر کتگ کہ آسٹریلیا ءِ لیبیاں جوانی ءَ گوازی کناں ٹارگٹ پروشتگ ءُ دوسد ءُ پانزدہ رناں گوں گوازی کٹ اِتگ –

آسٹریلیا ءِ نیمگ ءَ مچل مارش ءُ جوش انگلس ءَ جوانی ءَ گوازی کنان ءَ نیم نیم سنچری کتگ، وھدیکہ مارنس لبوشین ءَ چِل ءُ گلین میکس ویل ءَ سِی ءُ یک رن جوڈ کتگ –

سری لنکا ءِ نیمگ ءَ اوپنر ءَ اتکگیں لیبی پتھم نسانکا ءَ شست ءُ ھپت بالاں شست ءُ یک کوشل پریرا ھشتاد ءُ دو بالاں ھپتاد ءُ ھشت رن جوڈ بلے گوازی ءِ کٹگ ءَ بے سوب بوتگ انت وھدیکہ سری لنکا ءِ ایندگہ لیبیاں آسٹریلیا ءِ بالرانی دیم داشت نہ کتگ –

سری لنکا ءِ نیمگ ءَ دلشان مدھو شانکا ءَ سَے وکٹ گپتگ ، وھدیکہ آسٹریلیا ءِ نیمگ ءَ سپنر ایڈم زمپا ءَ ھشت اووراں چِل ءُ ھپت رن داتگ ءُ چار وکٹ گپتگ ءُ ’پلیئر آف دا میچ‘ بوتگ اشاں ابید مچل سٹارک ءُ پیٹ کمنز ءَ دو دو وکٹ گپتگ وھدیکہ گلین میکس ویل بھر ءَ ھم یک وکٹ ءِ کپتگ –

دی بلوچستان پوسٹ ءَ سربوتگیں ھالانی رِد ءَ گوستگیں روچ ءَ منگچر ءِ جھمنندے آوار جنی ءَ پد بیگواہ کنگ بوتگ، وھدیکہ مروچی بیگاہ ءَ تمپ ءِ دمگ دازن ءَ پوج ءَ گِسے ءِ سر ءَ بیڑ برتگ ءُ یک ورنایے آوار جتگ –

اھوالکار ءِ رِد ءَ مستونگ ءَ آوار جنگ بوتگیں ورنا پرپٹ ءِ سر ءَ چہ شال ءَ دیم پہ منگچر ءَ رؤگ ءَ بوتگ، آئی ءَ گڈی رند ءَ ماں مستونگ ءَ وتی کھول ءِ گوم ءَ ھال اھوال کتگ بوتگ کہ آ ترسگ ءَ بوتگ ھمے گوشتگ کہ من سنگتانی گوم ءَ آں ءُ ھمے گپانی کنگ ءَ آئی ءِ نمبر بند بوتگ ءُ ھما انت ورنایے گوانکو بند انت ءُ ورنا گوں پرپٹ ءَ بیگواہ انت –

کھول ءِ گمان انت کہ ورنا پاکستانی پوج ءَ زورانسری آوار جتگ ءُ بیگواہ کتگ –

دومی نیمگ ءَ بلوچستان ءِ دمگ تمپ دازن ءَ مروچی بیگاہ ءَ پاکستانی پوج ءَ گِسے ءِ سر ءَ بیڑ بُرتگ ءُ یک ورنایے آوار جتگ ءُ گوں وت برتگ –

پاکستانی پوج ءِ دست ءَ آوار جنگ بوتگیں ورنایے پجار عدنان ء طارق انت کہ تمپ ءِ دمگ دازن ءِ نندوک انت –

زانگ بہ بیت چدوپیسر مستونگ ءُ دازن ء ھوار بلوچستان ءِ جتا جتائیں ھند ءُ دمگاں ورنا آوارجنگ ءُ بیگواہ کنگ بوتگ انت، آیانی تہ ءَ گیشتر ورنا سی ٹی ڈی ءُ پھازگی لشکر ءِ دست ءَ دروگیں میڑاں کُشگ بوتگ انت یا نیم مرگ کنگ ءُ یل کنگ بوتگ انت –

دومی نیمگ ءَ پانک ءِ رِد ءَ پاکستانی پوج ءَ سیزدہ اکتوبر ءَ چہ آواران ءَ عادل ء نواب نامیں مردمے ھم آوار جتگ ءُ بیگواہ کتگ –

سربوتگیں ھالانی رِد ءَ بلوچستان ءِ باپاری شھر ھب چوکی ءَ پاکستانی پوج ءَ یک ورنایے زورانسری آوار جنی ءَ پد بیگواہ کتگ –

گیشیں ھالانی رِد ءَ مروچی ادار دوازدہ ءَ بلوچستان ءِ باپاری شھر ھب چوکی ءَ پاکستانی پوج ءَ تمپ ءِ دمگ دازن ءِ جھمنندیں ورنایے زورانسری آوار جنی ءَ پد بیگواہ کتگ –

اھوالکار رِد ءَ پاکستانی پوج ءِ دست ءَ زورانسری آوار جنگ بوتگیں ورنایے پجار جھانزیب ء محمد جان جھمنند تمپ ءِ دمگ دازن ءِ نام ءَ بوتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ زورانسری آوار جنیانی درچ یکشل ءَ برجاہ انت ـ

ھمے یکیں ھپتگ ءَ بلوچستان ءِ جتا جتائیں ھند ءُ دمگاں اے ورنا ءَ ھوار دھ ورنا آوار جنگ ءُ بیگواہ کنگ بوتگ انت کہ آیانی تہ ءَ دو چہ آواران، گومازی ءَ دو، دازن ءَ دو، بلیدہ ءَ دو ءُ چہ ڈھانڈار ءَ یک ورنایے زورانسری آوار جنگ ءُ بیگواہ کنگ بوتگ انت کہ تنی وھدی آیانی ھچ ھال اھوال نیست – ھمے گوشگ بوگ انت کہ آیانی تہ ءَ گیشتریں ورنایانی اُمر ھژدہ سال ءَ کم انت –

اھوالکار ءِ رِد ءَ ورنایانی کھول ءِ گوشگ انت پوج ءِ دست ءَ آوار جنی ءَ پد وھدیکہ کھول ءِ مردم وتی دوستگیں مردمانی یل کنائینگ ءِ ھاتر ءَ پوجی بنجل ءَ شُتگ انت گڈا پوج ءَ آیانی آوار جنی نہ منّ اِتگ ءُ ھمے گوشگ انت کہ اے مئے گور ءَ نہ انت – ھالانکہ اشانی تہ ءَ بازیں ورنایے کھول ءِ مردمانی چمانی دیم ءَ پوج ءَ زورانسری آوار جنگ ءُ بیگواہ کنگ بوتگ انت –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ سرمچاراں یکشمبے ءِ شپ ءِ ھشت ءَ تمپ ءَ گومازی ءِ میتگ ءِ تہ ءَ برجاھیں پاکستانی لشکر ءِ پانگس ءِ سر ءَ گوں راکٹ لاچر ءَ اُرش کُرتگ۔چہ نزیک ءَ کنگ بیتگیں اُرش ءَ راکٹ پانگس ءِ تہ ءَ کپتگ ءُ دُژمن ءَ جانی ءُ مالی تاوان بیتگ۔اے پانگس میتگ ءِ میانجی ءَ اِنت پمشکا سرمچاراں اُرش ءِ زور کم کُرتگ داں بلوچ راج ءَ تاوان مہ بیت۔اے پانگس پمشکا میتگ ءِ تہ ءَ جوڑ کنگ بیتگ کہ پاکستانی لشکر ءِ کارمند چہ سرمچارانی اُرشاں پھریز بہ بنت۔

گوھرام بلوچ ءَ گوشتگ پاکستانی لشکر ءِ اے پانگس بلوچستان لبریشن پرنٹ ءِ شھیدیں سرمچار جبار پنام کیپٹن جھانگیر ءِ گِس اِنت کہ لشکر ءَ دستیگ کُرتگ ءُ وتی پانگس کُرتگ۔اے پانگس دمگ ءَ مئے گچینی نشانگانی تہ ءَ اِنت ءُ دیمتر ءَ ھم ایشی ءِ سر ءَ ٹوھیں اُرش کنگ بیت۔

آئی ءَ گوشتگ پاکستانی لشکر وتی مُچی سزا ءِ شوندات ءِ رد ءَ سرمچار ءُ آدگہ آجوئی لوٹوکیں جُھدکارانی کھولاں نشانگ کنت۔آیانی گِساں ماندار ایت،گِس ءُ جاگھاں دستیگ کنت ءُ پد ءَ آیاں وتی لشکری بنجل ءُ پانگس جوڑ کنت۔

جارکش ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت۔داں بلوچستان ءِ آجوئی ءُ زورگریں لشکر ءِ دراھگ ءَ مئے اُرش برجاہ بنت۔

منگچر ءِ جھمننداں زورانسری ءِ نشانگ بیتگیں وتی دوستناکانی یل کنائینگ ءِ لوٹ کتگ-

بلوچ بیگواھیں مردمانی کھولاں بلوچستان ءِ دمگ کلات منگچر بازار ءَ نندانک داتگ شال ءُ کراچی بُنجاھی شھدگ زھرشانی کنان ءَ بند کتگ کہ اود ءَ دوئیں نیمگاں مزنیں کچے ءَ گاڑی ءُ ھزارانی ھساب ءَ مساپر پس اِتگ اَنت-

زھرشانی ءَ بیگواھیں شاھان بلوچ، نوید بلوچ ، محمد حسن لانگو ، مھر اللہ لانگو ، کفایت اللہ نیچاری ، قذافی نیچاری ءُ دگرانی یل کنائینگ ءِ لوٹ کتگ-

نندانک ءَ نشتگیں مردماں اے درگت ءَ گوشتگ کہ مئے سرجمیں دوستناکاں یل بکن اَنت ءُ آیاں آمیدگس ءَ پش بکن اَنت تانکہ ما اے گم ءُ رنجاں چہ بہ رکّ ایں-

زانگ بہ بیت اے اشی ءَ ھم بیگواھیں شاھان بلوچ ، کفایت اللہ نیچاری ، نوید بلوچ ءُ قزافی نیچاری ءَ ھوار دگہ بیگواھیں بلوچانی یل کنائینگ ھاتر ءَ منگچر ءِ ھند ءَ کھولاں زھرشانی کتگ – چریشی ءَ ھکومتی واکدارانی نیمگ ءَ آ باور کنائینتگ اَنت بلے اشی ءِ سر ءَ گامگیج زورگ نہ بیتگ-

گُڈی ھالاں تاں زھرشانی کنوکاں شھدگ بند کتگ ، انتزامیہ نیمگ ءَ چہ ھچ وڑیں زمہ وار گپ دیوان ھاتر ءَ نیتکگ-

بلوچستان ءِ دمگ کیچ بلیدہ ءَ سیادی داروکیں ازمکار ظھور فضل ءُ آئی ءِ سنگتانی تامر ’لولان‘ ماں بلوچی ءِ دومی مستریں زبان براھوئی ءَ ترینگ ءُ ڈبنگ بوگ ءَ اِنت –

بلوچستان ءِ نامداریں ازمکاراں ھواریں ازمکار ظھور فضل ءَ وتی پیس بک تاک ءَ شنگ کتگیں یک جارے ءِ تہ ءُ گوشتگ مئے جوڑ کرتگیں تامر بلوچی ءِ دومی مستریں زبان براھوئی ءَ رجانگ بوگ ءَ اِنت-

آئی ءَ گوشتگ اے رجانکاری ءِ زمہ واری ھلیل بلوچ ءَ پہ وت زرتگ ءُ ایشی ءِ کارانی گشادی ماں بلوچستان ءِ شھدربرجاہ ءِ براھوئی ڈپارٹمنٹ ءِ پروفیسر ڈاکٹر منظور بلوچ ءَ زرتگ ءُ ایشی ءِ کمک بلوچستان ءِ نامداریں ایڈوکیٹ عمران بلوچ ءَ کرتگ-

آئی ءَ گوشتگ کہ اے پمن ءُ بلوچی زبان ءَ وشی یے کہ آئی ءِ جوڑ کرتگیں تامر بلوچی ءَ ابید ماں براھوئی ءَ ھم شنگ ءُ تالان بیت اِنت-

زانگ بہ بیت اے بلوچستان ءِ توک ءَ اولی رند اِنت اے تامر بازیں کساسے ءَ چارگ بوگ ءَ اِنت –

ظھور فضل ءَ گوستگیں روچاں ماں دی بلوچستان پوسٹ ءَ یک جستے ءِ پسہ ءَ گوشتگ ات کہ اے تامر ءِ ھاسیں ندارگ گیشتر نودربراں گوں بندوک اِنت کہ چریشی ءَ مئے جھد ھمیش اِنت ما ھرکجا نودربراں اے تامر ءَ پیش دارگ ءِ جھد ءَ بہ کن ایں-

ظھور فضل ءَ گوشتگ کہ اے تامر ءِ توک ءَ ماں براھوئی ءَ رجانکاری ءِ ڈبو ھلیل بلوچ ءَ زرتگ ءُ ایشی ءِ توک ءَ سوجکار براھوئی زبان ءُ نبشتہ کار پروفیسر منظور بلوچ اِنت-

رجانکاری ڈبو ھلیل بلوچ ءَ زُرتگ ، ھلیل بلوچ ءَ براھوئی زبان ءِ جوانیں نبشتہ کار غمخوار حیات ءِ براھوئی ریزمانکی کتاب ماں بلوچی ءَ ” سریچک ،، نام ءَ ھم رجانک کرتگ-

تامر لولان ءَ ماں براھوئی ءَ ازمکاری ءَ آیان بلوچ، نسار شاھوانی، عطاء الرھمان، بیسم اللہ بلوچ، انور کمال بلوچ، پرمان اھمد، لئبہ سعید، منظور بلوچ،ازیز اللہ بیدار،سلطان رودینی،ایم ارپان،میر جان بلوچ، یاقوب بلوچ، وھید بلوچ،ھمید بلوچ،ورنا ھمید بلوچ، نواب، اشفاق اھمد ءُ بلوچ ھان ءَ زرتگ بیتگ اَنت-

آئی ءَ گوشتگ اے گچین کتگیں ازمکار جتا جتائیں ازمانی سر ءَ کار کنگ ءَ زورگ بیتگ اَنت-

زانگ بہ بیت لولان تامر بلوچستان ءِ دمگ شال، کلات،ھاران،مکران ءَ ھوار دری ڈیھ بھرین ءَ ھم اسکرینگ بیتگ ءُ بلوچ مھلوک ءَ بازیں کچے ءَ اے تامر چار اتگ ءُ ساڑاتگ –

بلوچستان ءَ ازمکاری ءِ کمی گندگ ءَ نئیت اِنت بلے ازمکارانی گیشتریں جنجال آیاں مالی آسراتی،شریں ساز ءُ سامان ءِ نہ بوگ گوشگ بوگ ءَ اِنت-

روکپتی بلوچستان ءِ دمگ میرجاوہ ءَ ایرانی بسیجی لشکر ءَ یک گاڑی ءِ سر ءَ تیرگواری کتگ ءُ چریشی ءَ چہ یک زھگے زدگ بیتگ –

اھوالانی رد ءَ تیرگواری ءِ آسر ءَ زدگ بیتگیں زھگ ءِ پجار ھشت سالی ئیں ماریہ ریگی ء رھمت اللہ جھمنند مھر آباد میرجاوہ ءِ نام ءَ زانگ بیتگ-

اھوالانی رد ءَ تیرگواری ءِ وئیل شمبے ءِ روچ ءَ پیش اتکگ کہ روکیں گاڑی ءِ سر ءَ بسیجی لشکر ءَ تیرگواری کتگ ء زھگ زدگ کتگ-

اھوالانی رد ءَ گاڑی ءِ دست دیگ ءَ ابید بسیجی لشکر ءَ گاڑی ءِ سر ءَ تیرگواری کتگ ءُ چریشی ءَ زھگ زدگ بیتگ-

زدگ بیتگیں زھگ زاھدان ءِ ھاتم النبیا نادراہ جاہ ءَ برگ بیتگ کہ اود ءَ زھگ آئی یو سی روم ءَ تھتیگ اِنت –

زانگ بہ بیت چِد ءُ پیش ھم روکپتی بلوچستان ءَ ھستی ناروی ءُ دگہ کسان سالیں زھگ ایرانی لشکر ءِ تیرانی نشانگ بیتگ ءُ بیران بیتگ اَنت-