TBP Balochi

یکشمبے ءُ دوشمبے ءِ میانی شپ ءَ سرجمیں بلوچستان ءَ بندات بیتگیں اُرشانی دْرچ برجاہ ءَ اِنت تنی وھدے گیس پائپ لائن، ریل لائن تراکاں چہ تباہ کنگ بیتگ اَنت وھدے کہ جتاجتائیں ھنداں چہ پاکستانی پوج سر ءَ اُرشانی ھال اِنت-

بلوچستان ءِ دمگ سبی ءَ ھال اِنت کہ سبی لم جی ءِ ھند سر ءَ ریل پٹری تراکناکیں شورواں گوں تباہ کتگ اَنت وھدے کہ اے ھنداں کڑک ءُ مٹھڑی ھوٹل نزیک ءَ پوج ءِ بُنجل نشانگ کنگ بیتگ-

دومی نیمگ ءَ چہ کوہ سلیمان موسی خیل ءِ نزیک ءَ پٹ پول وھد ءَ سلاہ بندیں مردماں بازیں مردمے آوار جتگ ءُ برتگ اَنت کہ بلوچستان ءَ چہ پنجاب شھر فیصل آباد ءَ نیمگ ءَ جنزگ ءَ بیتگ اَنت-

ھمے وڑ بلوچستان ءِ دمگ ڈیرہ مراد جمالی ءِ دمگ نو تال ھند سر ءَ پاکستانی پوج ءَ بُنجل ناشناسیں مردماں تُرندیں اُرشے کتگ-

اُرش ءِ وھد ءَ تیرگواری ءُ بمب تراکانی توار شھر ءِ دیر دیر اش کنگ بیتگ اَنت-

ھمے وڑ ڈیرہ بگٹی ءِ دمگ سوئی ءَ چہ کراچی ءَ رؤکیں سی شش انچ گیس پائپ لائن ناشناسیں مردماں بشا بور ھند سر ءَ تراکناکیں شورو پٹ کتگ تراکینتگ چریشی ءَ کراچی ءَ گیس رسگ بند بیتگ-

ھمے وڑ چہ بالگتر ءَ ھال اِنت کہ تربت تاں پنجگور سی پیک دگ سر ءَ بالگتر ھند ءَ سلاہ بندیں مردماں بستگ پٹ پول برجاہ ءَ اِنت-

بلوچ لبریشن آرمی ءِ جارکش جیئند بلوچ ءَ شنگ کتگین درشان ءَ گوشتگ فدائی آپریشن “ھیروپ” ءِ درچ ءَ بی ایل اے ءِ فدائی یونٹ مجید بریگیڈ ءَ زورگریں پاکستانی پوج ءِ بیلہ بنجل ءِ سر ءَ اُرش کتگ ءُ داں انگت ءَ 24 ءَ گیش پوجی کارمند کشتگ انت ءُ بنجل ءِ یک بھرگے دستیگ کنگ ءَ سوبمند بیتگ اَنت-

جارکش ءَ گوشتگ مجید بریگیڈ ءِ اُرش ءِ بندات شورواں پریں دو گاڑیاں گوں بنجل ءِ بنجاھی دروازگ ءُ نزیکین چوکیاں ٹکر جتگ ءُ چریشی ءَ بنجل ءِ پترگ ءِ راہ سرجم ءَ تباہ بیتگ ءُ بنداتی وی بی آئی ای ڈی اُرشاں پد مجید بریگیڈ ءِ ھیروپ فدائین یونٹ بنجل ءَ پترگ ءَ سوبمند بیتگ انت اُرش ءِ بنداتی لڑ ءَ 24 پوجی کشتگ انت ءُ بنجل ءِ یک بھرگے دستیگ کتگ ءُ آپریشن ءِ دومی لڑ بندات کنگ بیت اِنت-

جارکش ءَ گوشتگ سرجمیں بلوچستان ءِ شھدگاں بی ایل اے ءِ سرمچاراں ناکہ جتگ ءُ وتی دستیگی ءَ کتگ انت کہ ایشانی اھوال زوت شنگ کنگ بنت اِنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں یک کسانیں درشانے ءَ گوشتگ سرجمیں بلوچستان ءَ فدائی آپریشن “ھیروپ” ءِ بندات کتگ چریشی ءِ درچ ءَ بی ایل اے ءِ ایلیٹ یونٹ مجید بریگیڈ ءِ فدائیناں بیلہ ءَ زورگریں دشمنیں لشکر ءِ بنجاھی بنجل ءِ سر ءَ اُرش کتگ ءُ تہ ءَ پترگ ءَ سوبمند بیتگ اَنت ءُ ھمے ڈول بی ایل اے ءِ دومی باسکاں سرجمیں بلوچستان ءِ دگ بند کتگ ءُ کنٹرول وتی دست ءَ کتگ اَنت-

جارکش ءَ گوشتگ بی ایل اے بلوچ مھلوک ءَ ھال.دنت کہ آ دگانی سر ءَ دور بہ بنت ءُ بلوچ سرمچارانی گون ءَ کمک بہ کن انت ءُ ھمے ڈول ما پولیس ءُ لیویز کارمنداں سرپد کن ایں مئے جنگ زورگریں پاکستانی پوج ءِ گون ءَ انت پولیس ءُ لیویز وت ءَ ھوار مہ کن اَنت اگاں ناں گڑا پولیس ءُ لیویز ءِ سر ءَ ھم اُرش کنگ بیت اِنت-

جیئند بلوچ ءَ گوشتگ سرجمیں اھوال زوت شنگ کنگ بیت اِنت-

بلوچستان ءِ تیاب دپی شھر گوادر ءَ پد کیچ ءُ کلات ءَ ھال اِنت کہ مزنیں کچے ءَ سلاہ بندیں مردماں دمگ انگر ءَ کتگ اَنت شھدگانی سر ءَ پٹ پول کنگ ءَ اَنت-

کیچ ءِ دمگ مند تاں تربت ءِ بُنجاھی شھدگ ھوت آباد ھند سر ءَ مزنیں کچے ءَ سلاہ بندیں مردماں انگر ءَ کتگ وھدے کہ آؤکیں ءُ رؤکیں گاڑیاں پٹ ءُ پول کنگ ءَ اَنت-

ھمے وڑ کلات ءَ ھم ھال اِنت کہ سلاہ بندیں مردماں شھدگ مھلبی ھند سر ءَ بند کتگ پٹ ءُ پول کنگ ءَ اَنت-

چہ کلات ءَ رستگیں ھالانی رِد ءَ سلاہ بندیں مردماں لیویز کارندہ دزگیر کتگ اَنت-

بلے اے دوئیں پٹ پولی درگت ءَ ھچ وڑیں گپ دیم ءَ نیتکگ-

زانگ بہ بیت اشی ءَ ساری تیاب دپی شھر گوادر ءَ مزنیں کچے ءَ سلاہ بندیں مردماں کوسٹل ھائی وے بند کتگ اَت-

گوادر ءَ پٹ پول ءِ میان سلاہ بندیں مردماں پولیس چیک پوسٹ سر ءَ اُرش کتگ اود ءَ ساڑی ئیں سرجمیں کارندہ دزگیر کتگ ءُ برتگ اَنت ءُ آیانی سرجمیں سلاہ ءُ گولہ بارود ھم وتی دستیگ کتگ اَنت وھدے کہ سلاہ بندیں مردماں مڈی بروکیں کم چہ کم چار گاڑی مانداشتگ اَنت-

چَہ پنجگور ءَ ھال شنگ بیتگ کہ پروم ءِ نندوکیں مردمے سلاھبنداں آوار جتگ ۔

گیشیں رد ءَ پنجگور ءِ تار آپس چتکان ءِ دمگ ءَ موٹر سائیکل سواراں چہ دکان ءَ تیر ءِ نشانگ ءَ نزر ءِ چک اللہ نزر نامیں ورناہے چست کتگ۔

یات بہ بیت کہ اللہ نزر پروم تحصیل ءِ نندوک اِنت ءُ اے وھد ءَ سوردو ءَ جاہ منند اَت۔

آئی ءِ سیاداں رسانکدر ءَ گوں پون کتگ ءُ گشتگ کہ اللہ نذر ءِ نہ رسگ ءِ زھرشانی ءَ سی پیک ءِ روڈ داں مرچی شپ ءَ بند کنگ بیت۔

کیچ ءِ دمگ تربت ءَ تیرگواری ءِ یل وئیلے ءَ زورانسری آوار جنی ءَ پد یل بیتگیں ورنا ٹپی بیتگ-

پولیس ءِ رد ءَ آپسر مھرے ھوٹل ءِ نزیک ءَ گوستگیں روچ ءَ ناشناسیں مردماں تیرگواری کتگ ءُ یک مردمے زدگ کتگ-

پولیس ءِ رد ءَ زدگ بیتگین مردم ءِ پجار عابد ء وشدل جھمنند آپسر ءِ نام ءَ زانگ بیتگ کہ پنچر ءِ دکان ءَ کار ءَ بیتگ-

زانگ بہ بیت اے ورنا دوھزار ءُ بیست ءُ سَے ءَ پاکستانی پوج ءَ زورانسری آوار جنی ءِ آماچ کتگ پد ءَ دہ ماہ ءَ پد یل بیتگ ءُ وتی لوگ ءَ سر بیتگ- دمگی مردمانی رد ءَ ارشکارانی سیادی سرکاری ٹولہ ءَ انت-

زانگ بہ بیت گوستگیں دو ماھانی توک ءَ اے سیمی وئیل انت کہ کیچ ءَ بوگ ءَ اِنت کہ اود ءَ زورانسری آوار جنی ءَ پد یل بیتگیں مردم یا چاگردی کاراں دزگٹیں ورنا نشانگ بوگ ءَ انت-

جیونی ءَ کوسٹل ھائی وے ءِ سر ءَ سلاہ بندیں مردماں راہ بستگ، پولیس چیک پوسٹ ءِ سر ءَ اُرش کرتگ ءُ کارندہ سلاھاں گوں ھوار دستیگ کتگ اَنت، مڈی بروکیں گاڑی ماندارگ بیتگ اَنت-

بلوچستان ءِ دمگ گوادر ءِ ھند جیونی ءَ سلاہ بندیں مردماں بازیں کچے ءَ کوسٹل ھائی وے گبد کراس ءَ راہ بستگ ءُ گاڑیانی پٹ ءُ پول بندات کتگ-

اھوالانی رد ءَ سلاہ بندیں مردماں پولیس ءِ چیک پوسٹ ءِ سر ءَ اُرش کتگ ءُ اود ءَ جاڑیگیں کارندہ دزگیر کتگ انت ءُ آیانی سلاہ ءُ گولہ دستیگ کتگ انت-

دمگی مردمانی رد ءَ ھمے وھد ءَ سلاہ بندیں مردماں مڈی بروکیں گاڑی کساس چار مانداشتگ انت-

دمگی مردمانی رد ءَ یک ادارے ءَ گیش کوسٹل ھائی وے بستگ ات ءُ واکدارانی نیمگ ءَ انگت ءَ اے درگت ءَ دگہ اھوال نیتکگ اَنت-

زانگ بہ بیت ھمے سال ءَ بلوچ لبریشن آرمی ءِ سرمچاراں نوشکی ءِ شھر ءِ نزیک ءَ یک بیڑے ءَ بنجاھی شھدگ بستگ ءُ بسانی سر ءَ سپر کنوکین نُھ مردم پجار کنگ ءَ پد کشتگ انت-

بی ایل اے ءِ جارکش ءَ گوشتگ ات کہ اے مردم پاکستانی چیریں ادارھانی کارمند بیتگ انت ءُ چیریں اھوالانی رد ءَ کشتگ اَنت-

یک دگہ کاروائی بی ایل اے ءَ ھمے سال ءَ شال ءَ شعبان ءِ ھند ءَ دَہ مردم دزگیر کتگ انت-

گوست ءَ کوسٹل ھائی وے ءَ بلوچ سلاہ بندانی ھمسنتی گل براس ءَ دو جتا جتائیں کاروائیاں پاکستانی پوج،تیل ءُ گیس بروکیں کارمنداں ھوار پاکستانی نیوی ءِ سر ءَ ترندیں اُرش کتگ انت-

کوسٹل ھائی وے ءَ مروچی بیتگیں وئیل ءِ زمہ واری انگت ھچ گل ءَ پہ وت نہ زرتگ-

روکپتی بلوچستان ءِ دمگ دلگان ءَ ناشناسیں مردماں یک زھگے آوار جنگ ءَ پد بیگواہ کتگ –

گیشیں اھوالانی رد ءَ زھگ آدینگ ءِ بیگاہ ءَ ناشناسیں مردماں لوگ ءِ دپ ءَ آوار جتگ ءُ برتگ کہ چریشی ءَ پد آئی ءِ درگت ءَ اھوال دیم ءَ نیتکگ اَنت-

آوار جنگ بیتگیں بیتگیں زھگ ءِ پجار سلاالدین بامری پنام مھمد سلاہ ء جواد جھمنند دلگان ءِ نام ءَ زانگ بیتگ-

اھوالاں گیش گوشگ بیتگ کہ زھگ آدینگ ءِ بیگاہ ءَ لوگ ءَ ڈن امام رضا بیمارستان ءِ ھند ءَ ناشناسین گاڑی سواراں آوار جتگ ءُ برتگ-

آئی ءِ کھول ءَ گوشتگ زھگ ءُ مارا کسے ءِ گون ءَ زاتی دشمنی یا سیاسی لیکہ نیست اِنت مئے زھگ بے میار ءَ برگ ءُ گار کنگ بیتگ ءُ مارا مئے زھگ ءِ درگیجگ ءَ سرکار کمک بہ کنت اِنت-