TBP Balochi

میان اُستمان ءَ پاکستان ءَ را یک ترندیں جارے شنگ کنان ءَ گوشتگ ءُ سرکار ءَ کڈنی کتگ کہ آ ٹکی دروشم گیشتر بلوچستان ءَ انسانی ھکانی برجاھیں جیڑھانی دور کنگ ءَ زوت گامگیج بہ زیر ایت-

آدینگ ءِ روچ ءَ جنیوا ءَ برجمیں نیاد ءَ نسلی دروشمانی چارگ ءِ مٹ کنگ ءِ درگت ءَ میان اُستمان ءِ کمیٹی ءَ پاکستان ءِ درگت ءَ وتی درشان شنگ کتگ- چریشی ءَ اسلام آباد ءَ گوشگ بیتگ آ نسلی ءُ مزھبی رھشون، سیاست دان، مھلوک ءِ زورانسری آوار جنیانی دراھیں رپورٹسانی سر ءَ جیڑہ ھست اِنت ءُ ایشانی ھلاپ ءَ المی ءَ دراھیں کاروائی کنگ بہ بیت اِنت-

میان اُستمان ءِ پینل بنگپ ءَ گیشتر بلوچ رھشون، سیاست دان ، مھلوک ءِ اگدودار ءُ انسانی ھکانی پھریرزوکاں زورانسری آوارجنیانی سر ءَ کڈنی کتگ، کمیٹی ءَ پاکستان ءَ را کڈن کتگ کہ آ دراھیں رپورٹ بیتگیں کیسانی سرجمیں پٹ ءُ پول ءَ بہ کنت اِنت ءُ آیانی سر ءَ کیس بہ کنت اِنت ءُ اے گپ ءَ ستک بہ دار ایت کہ زمہ داراناں ھساب بہ گپت اِنت اگاں کسے ءَ گناھے بیت گڑا آ میان اُستمانی رھبندانی رد ءَ آمیدگس ءَ سزا دیگ بہ بیت اِنت-

زورانسری بیگواھیاں ابید، میان اُستمان ءَ پینل بنگپ ءَ بلوچستان ءُ دگہ ھنداں نسلی اقلیتاں پیش بیتگیں چاگردی جیڑھانی بنجل نامینتگ اَنت، کمیٹی ءَ پاکستان ءِ سرکار ءَ را لوٹ کتگ کہ آ بلوچ ھلکاں نیزگاری ءُ بے روزگاری ءِ کم کنگ ءَ گامگیج بہ زیر ایت چریشی ءَ روزگار ءِ درچ ءَ پچ کنگ ءَ دیمروی دیگ ءُ کسان کسانیں واپارانی دیمروی ءَ کمک کنگ ھوار بہ بیت اِنت-

میان اُستمان ءَ پاکستان ءِ سرکار کڈن کتگ کہ آ بلوچستان ءَ ابرمی دراتکگیں مڈیانی لٹ ءُ پلیان رس اتگیں مڈیاں بلوچستان ءِ مھلوک ءَ دوبر لگینگ ءَ گامگیج بہ زیر ایت-

کمیٹی ءَ وسائل کشوکیں واپارکارانی لائسنس دیگ ءَ پیش سانمندین دمگی مردمانی رزا گون بہ بیت اِنت-

گیش میان اُستمان ءَ گوشتگ بنکی آسراتی ءُ ساپ داریں آپ، ساپ کاری ءُ بجلی ءِ ڈولیں بنکی چاگردی آسراتی دلگوش دیگ بہ بیت اِنت-

گڈسر ءَ میان اُستمان ءَ پینل بنگپ ءَ گوشتگ بلوچستان ءَ پوج ءِ چوکی ءُ کانوندارانی نیمگ ءَ تاکت ءِ کارمردی، مھلوک ءِ ترسینگ ءِ لیکہ درشان کتگ، کمیٹی ءَ پاکستان ءَ را کڈن کتگ کہ آ دراھیں شکایتانی دور کنگ ءُ اے اے دابیں بدسلوکیانی دارگ ءَ سرجمی ءَ گامگیج بہ زیر ایت-

راجی مُچی ءُ شال ءِ کاروان

نبشتہ کار: راج بلوچ

دی بلوچستان پوسٹ

شال وَ چوناھیگا پہ بلوچ ءَ راج دپترے، شال ءِ برپیں بدن ءَ مدام هزاراں مردیں بلوچ پہ اے باگیں وتن ءَ پیداک کُرتگ، شال ءِ ھر راه ءُ رَند، هر کوہ ءُ سنگ اے گواهی ءَ دینت کہ چنچو ورناء ءُ کماشاں وتی ساہ ءُ سَر پہ اے ھاک ءِ وشبواں ندر کُرتگ، چنچو بانوریں سَر پہ مکهیں مات ءَ کرباں کُرتگ، شال ءَ پہ بلوچ ءَ مدام گھگیری کُرتگ۔

جولائی ءِ ماه اِنت شال ءِ موسم گرم ءُ سرد اِنت، لھتے سنگت گوں وانگ ءُ زانگ ءَ گوں ھم گرنچ اِنت، لھتے مات پہ وتی بَچاں چار راھان نِشتَگ انت، لھتے گوں زند ءِ وَشین ساھتاں دست گٹ اِنت۔

وھدیکہ بلوچ یکججتی کمیٹی جار ءَ جنت کہ بیست ءُ هشت جولائی ءَ گوادر ءَ یک راجی مُچی یے بیت انت، اولی رَند بیت پہ بلوچاں یک نوکیں مستاگے بیت انت، کہ بیست ءُ هشت جولائی ءَ درستیں بلوچ یکجاہ بنت، چہ شال ءَ بگر داں کوہ ءِ سلیمان ءَ بگر داں سراوان، جھلاوان، کراچی ءُ کُلّیں مکران روان کنت دیم پہ گوادر ءَ یکجاہ ءُ یک توار بنت پہ وتی ھک ءَ، پہ وتی نیلیں زِرا ءَ، پہ وتی راج ءِ ھما پُسگاں کہ ھما سالانی سال بندی جاہ آں بند انت، پہ ھما شیر بیمیں بَچ ءُ جَنک آں کہ وتی جند ندر کُرتگ، پہ اے سر زمین ءَ۔

وھدیکہ اے ھبر دژمن ءَ سر بوت کک من 77 سال اِنت اِیشانی تھنا ءُ گِستا کنگ ءَ باریں چونیں پندل ساز اتگ، برے برات گوں برات ءَ،گِس ءُ ملکی جیڑہ ءِ سرا میڑینتگ انت، برے زبان ءُ مزھب ءِ نام ءِ سر ءَ بلوچ گِستا کنگ ءَ وتی سرجمیں زَرّ ءُ زور جتگ انت، گڑا اے ھبر اسلام آباد ءُ پنڈی ءَ بگر شال ءَ گوادر ءِ ھما بد بھتیں زمین کہ دژمن ءَ وتی کوٹ ءُ ماڑی جوڑ کُرتگ انت، دُوریں آس مان بیت، دیوان مہ دیوان ءِ چَکہ بیت کہ ھر رنگ ءَ بلوچاں یکجاہ بوھگ ءِ اجازت دیگی نہ انت، گڑا اے نیمگا دژمن گوں وتی زور ءُ زوراکیاں ءُ دومی نیمگ ءَ بلوچ ء ھر زھگ ءُ کماش، پیریں مات ءُ گوھار پہ گَل ءُ شادانی سرجمیناں سرگرگ بندات کُرت، دژمن ءَ روچے یک پندلے ساز اِت ءُ روچے نوکیں گپّے دیم ءَ آؤرت کہ ھچ وڑ ءَ بلوچاں یکجاہ بوگ ءَ نیل آں، بَلے اے پَدی بلوچاں گوں شیریں جگر ءَ دژمن ءَ پسو دات کہ تو مارا سکّ بَھر ءُ بانگ کُرتگ نوں بس اِنت۔

وھدیکہ بیست ءُ هشت جولائی نزدیک بوان بوت گُڑا سرکار ءِ نا پاکیں پوج ءَ بگر داں ایجنسی ءُ نام نھادیں سردار ءُ میر ءُ دلار دُرست نا کہ واب کپ اَنت، نا کہ آرام کُرت کن انت، دُرستانی چم گوں بلوچ راجی مُچی ءَ سکّ اَنت کہ ھر وڑ بیت گوادرءَ روگ ءَ نیلان اش، سرجمیں بلوچستان ءِ وڑ ءَ شال ءَ بلوچ چُکچینی گوں ترندیں وڑے ءَ بندات بوان بوت، مردم بِیھار دیگ بوت انت کہ کَسے شوت یا کہ پیسرا تچ ءُ تاگ آں گوں آوار بوت، آ زلم ءِ آماچ کنگ بیت، بَلے پہ بلوچ ءَ اے نوکیں گپّے نہ اَت، بلوچ ھما روچ ءَ اے زلم ءِ آماچ بوتگ کہ بلوچستان زورگیریں لشکر ءَ پہ زورانکی دستیگ کُرتگ، شال ءِ توک ءَ بازیں بلوچ پیسری وڑ ءَ سرکار ءِ چمچہ ءُ دلارانی دست ءَ زلم ءِ آماچ کنگ بوان بوت، مردمانی گِسانی سر ءَ اُرش کنگ بوت مردم چِست کنگ بوت انت، ٹرانسپورٹ والا بیھار دیگ بوت انت کہ کَسے کوچاں پہ بلوچ راجی مُچی ءِ واستا بَرگ بوت انت آ گڑا زلم ءِ آماچ باں، بَلے شُمیں بدواه ءَ نہ زانت کہ اے ھم بلوچ آں۔

اے درستیں اڑ ءُ جنجالاں چے پد وھدیکہ بیست ءُ ھپت جولائی ءِ سهب ءِ سر ءَ شاھوانی روڑ ءَ کوچ ءُ مردمانی مُچی بندات بوت کَسان ءُ مَزن، پیر ءُ کماش، ھر کَسے پہ وتی وس ءُ واک، کَسے گوں پَرپٹ ءَ کَسے گوں وتی گاڑی ءُ کَسے گوں ما کوچ ءِ ودار ءَ نِشتَگ ات، من ءَ یات اِنت کہ یک کماشے اتکگ اَت جندے پیر مرد ات ءُ وتی عمر ءِ ٹالوکی سائیکل ءِ گوں اِت ئِے گوشتے اگاں شما من ءَ کوچ ءَ گوں نه بَرے گوں من وتی ھمے ٹالوکی ءِ سر ءَ شمئے پد ءَ کایاں ھمدا من ءَ گُمان بوت کہ مرچی ھر بلوچ ءِ دل ءَ ھما درد اَنت کہ آ دژمن ءَ داتگ انت۔ ھمے وڑ ءَ مردم سوار بوان بوت انت، مردم انچو باز ات انت کہ جاہ نہ بوت، لھتے ما کوچانی بُرزا لھتے ما پَرپٹ ءُ گاڑی آں، کاروان کہ 12 بجا روان بوت دیم پہ گوات ءِ در ءَ (گوادر ءَ) سونا ھان چار راه ءَ کہ سر بوت سرکار ءِ پوج ءُ آئی ءِ دلاراں دَگ انچو بند کُرتگ کہ یکے گوں بمب ءُ توپ ءُ سلاہ آں دِگہ ملکے ءَ دور کنگ ءَ اِنت، ھمدا مردمانی رَشّ ءُ کَش ات، گڑا بازیں ودار ءَ پد سنگتانی ھمے سلاہ ءَ مشورہ ءَ پد کہ اے دَگ بند اِنت، بَلے بلوچستان ءِ زمین پہ بلوچ ءَ تنگ نہ اِن دِگہ دَگ ءُ راہ باز اِنت گڑا کاروان جنزاں بوت دیم پہ دشت ءِ راه ءَ وھدیکہ کاروان تیرا میل ءَ سر بیت گڑا سرکار وتی سپاهیگاں گوں دَگ ءَ بند کنگ ءِ کوشست ءَ کنت بَلے اے بری بلوچانی شیر زالیں جَنک گوں مزنیں جگراں ایر کپت انت شاه کوچ ءَ گڑا ھمدا چے پیر زالے پاد آتک ءُ گوں ترندیں توار ءَ گوں گوشتے نوں واتر نه باں یا شهید بنت یا غازی بنت، اے سرکار ءِ کرائی سِپاھی ءُ داشتگیں دلارانی دیم ءَ چو کوه ءَ مِک بوت انت دَگ اِش پچ کُرت سرجمیں کاروان راهی کُرت دیم په دشت ءَ۔

اے ھبر کہ دژمن ءَ سر بوت کہ کاروان در اَتکگ دیم پہ دشت ءُ مستونگ ءَ گڑا سرکار ءَ وتی سرجمیں پورس دشت ءِ پوجی چیک پوسٹ ءِ سر ءَ جَت بَلے کاروان ءَ نوں تو پہ دَگانی بند کنگ ءَ داشت نہ کن ئے، اِد ءَ ھم پوج ءَ وتی سرجمیں زور جَت بَلے بلوچ ءِ شیر زالیں جنک ءُ نرمزاریں بَچاں گوں مکھیں ماتانی همراهی ءَ لَٹ وران بوت انت بَلے پُشت ءَ نہ کنز اِت انت، ھمدا سرکار ءَ یک مزدا گاڑی یے دَگ ءِ سر ءَ داشتگ ات ءُ پوجی یے سیٹ ءَ نِشتَگ ات کہ دَگ پچ نہ بیت، بَلے یک شیر زالیں ماتے ءَ سیٹ پَچ کُرت ءُ وت توک ءَ پُترت ھمے بے مرادیں پوجی ءَ دِکہ دات ءُ گاڑی مردماں پُشت ءَ کُرت دَگ پچ بوت کاروان جنزاں بوت، گڑا ، دشت ءِ زیبائی چوناہ ءَ کم نہ اِنت بَلے مرچی دشت سکّ جلوھناک اَت، استاد میر احمد ءِ سوت پر اَت، استاد زاکر جان کوچ ءَ تاچگ ءَ اَت، سنگت پہ مرادے دشت ءِ کوھانی تہ ءَ جنزان ات اَنت کہ مستونگ ءَ سر بوگی ات اَنے سنگت ءِ چم کوچ ءِ کَشّے آدینک ءَ کپت انت گوشتے کہ بخشو زی مزنیں کَچّے ءَ مئے پُشت ءَ گون اَنت، کمو دیمترا شُت اِنت کہ کاروان اوشتات۔

دیم ءَ سر کَشّ ات کہ پوجی ءِ 3 گاڑی ءَ دیم ءَ دَگ بند کُرتگ ءُ بلوچ ءِ مزن جگریں بَچ ءُ جَنکاں پد ءَ گھگیری کُرت ءُ دژمن مجبور کُرت کہ پُشت ءَ بُرّو دَگ ءَ یل بکنت، بَلے ناپاکیں دژمن ءَ چو ھر وھدی وڑ ءَ اے رَندی گوں لگوری ءَ تیر گواری کُرت ءُ 3 بلوچ ءِ بَچ آوار جَت گوں وت ءَ برت انت۔ کاروان پد ءَ راهی بوت لھتے کوچ مزنیں دَگ ءَ سر بوتان 5 کوچ اَنگت مزنیں دَگ ءَ سر نہ اِت انت کہ استاد زاکر جان ءَ گوشت بخشو زی پوشت ءَ چو گنوک ءَ پیداک انت، گَپّ استاد ءِ دپ ءَ اَت کہ یک گاڑی چو گنوک ءَ دیم ءَ گوست، ءُ باکی پوجی چو سیستگیں بُز ءَ تچان ات اَنت کہ پُشت ءَ تیراں توار کُرت ءُ استاد زاکر جان ءِ کوچ ءِ ٹائیر ترکان بوت اَنت ءُ دیم ءِ 4 دِگہ کوچ ءِ ھم ٹائیر ھم شُوماں تراکینت اَنت، گڑا تیر چو ھور ءِ وڑا گوارگ ءَ ات اَنت کُکار ءُ جاک ءِ تہ ءَ یک توارے گوشاں کپت کہ پوجی ءِ گوشگ ءَ آں کہ “گاڑی پیچھے کرو مگر نا ورنہ گولی تمہارے سر پر چلاؤ گا” وھدیکہ سر چست کُرت چاراں استاد زاکر جان ءِ سر ءَ یک پوجی ءَ توپنگ ءِ نَل داشتگ، بَلے استاد زاکر جان اَت گوں مزنیں جگر ءَ پوجی پسو دات کہ ” گولی چلاؤ جیسا کے باقیوں کے اوپر چلا رہے ہو لیکن گاڑی پیچھے نہیں کروں گا” چمان ءَ کہ دیم ءَ شانک دات تیرانی توک ءَ نرمزاریں بَچ تیر وران ءُ سنگت تیر وارتگیں سنگت آں چست کنان انت بَلے لشکر پُشت نا کنز اِت، دژمن انچو مجبور کُرت کہ آ تیر جناں ءُ پُشت ءَ تچگ ءَ آں بلوچ ءِ شیر بیمیں بَچ گوں ھشکیں دستاں دُمب ءَ کپت انت ءُ دژمن اش تاچینت۔

وھدیکہ چپ کوچ ءَ ایر کپتیں اے ساھت پہ کیامتے ءَ چے کم نہ اَت، اِدے سنگتانی یکجاہ کنگ ءَ چے پد وھدیکہ نادراہ جاہ ءَ شتاں چاراں 5 سنگت وتی ھوش ءَ نہ اِنت گڑا نادراہ بلدانی (ڈاکٹر آنی) مشورہ ءَ چے پد شال ءَ راہ دیگ بوت انت، دِگہ 9 سنگتاں تیر وارتگ ات ھمدا آں بَلے وھدیکہ سنگت آں سوج کُرت کہ سنگت آں شما چون ات گڑا دلیریں بلوچانی بَچاں انچیں پسو دات کہ سرجمیں پریشانی چہ دل ءَ شُت آں، گوشت اِش کہ ” سنگت ما برابراں بس کمیں پَٹّی کنیں گڑا پد ءَ در کپیں دیم پہ گوادر ءَ” گوں اے گَپّ ءَ دل انچو وَش بوت کہ اے شیر زالیں ماتاں مزن جگریں بَچ پیداک کُرتگ اِیش انت دژمن ءِ تیر نوں کار نہ کنت ھمے رنگ ءَ روچ شپ بوت پد ءَ آتک آں ھما جاہ کہ مستونگ ءَ ھر بلوچ بے ھال نہ کنت ءُ اے سر زمین وت گواهی دنت کہ من چونیں نرمزارانی واھُند آں، ھمے وڑا شپ ءُ روچ جنزاں بوتان ھما نند جاہ ءَ، 3 روچ ننداک ءَ نِشتَ، اے وهد ءَ مستونگ ءِ ھر بلوچ ءَ وتی ھک اَدا کُرت ماس ءَ وتی، چُک ءَ وتی، پِس ءَ وتی،‌ سیمی روچ ءَ ھمے سلاہ ءُ مشورہ بوت کہ کاروان پد ءَ شال ءَ واتر بیت۔

گڑا وھدیکہ کاروان واتری دیم پہ شال ءَ جنزاں بوت لک پاس ءَ ھال آتک کہ لگوریں دژمن ءَ راه بستگ، کمیں دیراں گَپّ ءُ تراں ءَ پد دَگ پچ بوت ءُ کاروان جنزان بوت، وھدیکہ سونا ھان چار راه ءَ سر بوتیں گڑا مردمانی مزنیں کِساسے ءَ مُچی یکجاہ بوان بوت، وھدیکہ کاروان شال ءِ مزن شاه دربر جاہ ءَ سر بوت پیسرا مردمانی دست ءَ پُل ءُ ھار گوں آں، گوں جوش ءُ جزبگ ءَ ودار ءَ آں، کاروان سر بوت گوں پُل ءُ ھاراں وش آتک کنگ بوت انت، مرچی پد ءَ سریاب ءِ ھر درچک ءُ دار، ھر کشک ءُ راہ، ھر زھگ ءُ زالبول ھمے توار ما گوش ءَ کَپگ ءَ ات کک ” نارے بلوچستان، جی ءِ بلوچستان”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-

Metamorphosis

نبشتہ کار: آئیشہ بلوچ

دی بلوچستان پوسٹ

اے یک آزمانکے ایشی ءِ نبشتہ کار ‌‌Franz Kafka اِنت۔ کاپکا یک انسانے ءِ بدل بوھُکیں شکل ءَ سک وش بیان کنت-

ایشی ءِ باز کردار اَنت بلے درستاں چہ مستریں کرد گریگر اِنت- گریگر یک چیزے ءِ بھا کنوکیں مردے کہ آ چیز ءَ اد ءُ اود ءَ چہ دومی جاگہ بارت بھا کنت یک سُھبے ءِ وھد ءَ واب ءَ پاد کیت گڑا آ انچو سما کنت کہ آ پیسری مردم نہ انت آ بدل بوتگ ءُ یک لولوکے بزاں کِرمے ءِ دروشم ءَ انت۔

آ وتی چپ ءُ چاگرد کمرہ چار اِیت داں درستیں چیز وتی جاگہ ءَ یک ھساب ءُ شر انت ، گڑا آئی ءَ گُشت بلکیں اے یک وابے آ وتی چم ءَ مُچ کنت وپس اِیت ءُ پاد کیت دراھیں چیز شر انت آ لیٹگ ءِ کوشست کنت گڑا آئی ءَ اے نوکیں جُون کہ لولوکے ءِ دروشم انت لیٹگ ءَ نہ بیت –

ھمے دمان ءَ ماس کیت دروازگ ءَ ٹُکّ اِیت گریگر کوشست کنت کہ جواب بہ دنت بلے آئی ءِ آواز بدل بوتگ اَت ، آئی ءِ آواز کس ءَ ھم سر نہ بوت لوگ ءِ سرجمیں مردم پریشان بوت انت کہ بلکیں نادْراہ انت-

آیاں دروازگ ءِ پچ کنگ باز جُھد کت بلے آیاں گوں ھچ بَیگ ءَ نہ ات آ سوڑگ ءَ لگ اِیت تاں آئی ءَ اِش کت کہ Office Manager اتکگ ھال گرگ ءَ کہ باریں چیا کار ءَ نہ یتکگ چوناھا گریگر باز مھنتی ءُ کاری بچکے آئی ءَ ھچ بر موکل نہ کتگ ءَ – Office Manager گریگرءَ چہ جست کنت کہ آ کار ءَ چیا نہ یتکگ ءَ بیھار دنت کہ اگر آ کارا نہ یتک گڑا چہ کار ءَ کشّگ بیت ، گریگر گش اِیت کہ تو برو من کمیں وھد ءَ پد کایاں بلے گریگر گپ ءَ نا آپس والا سرپدی نیکہ کہ لوگ ءِ مردم –

وھدے دروازگ ءِ دپ پچ بوت گڑا گریگر ءِ بدل بوتگیں جون درستاں دیست آئی ءَ را درستاں آئی ءِ کر ءَ ترس اِیت، گریگر ءَ کوشست کت کہ کارگس منیجر ءَ داراں چہ روگ ءَ بلے آئ ءِی پت ءَ ھالتاکے رول کت ءُ آئی ءِ سر ءَ دور دات کہ آ واپس بروت وتی اوتاک ءَ گڑا آ دروازگ ءِ پُشت ءَ روت ءُ آئی ءِ پت دروازگ ءَ بند کنت گریگر ءَ انچو لگّ اِیت کہ آئی ءَ دم بند بوگ ءَ انت آ ھمود ءَ واب کپ اِیت چماں پچ کنت گند اِیت کہ یکے شیر ءُ نان ایر کنت بلے گریگر ءَ شیر ءُ نان دوست نہ بنت- ھر روچ آئی ءِ گوھار ھمے ھساب ءَ ورگ کار اِیت آئی ءِ کمرہ ایر کنت ءُ روت-

وھد گوزان بنت گریگر ءِ لوگ والا آئیءَ چہ شیزار بنت، یک روچے گریگر وتی اوتاک ءَ چہ در کیت ءُ روت بورچی ءَ ھمے وھد ءَ آئی ءِ پت نوکری ءَ چہ پیداک بیت گڑا آئی ءَ را ھمے لگّ اِیت کہ گریگر وتی مات ءِ سر ءَ برانز کنگ ءَ انت پہ ورگ ءَ آئی ءَ پت ءِ دست ءَ سروپ بنت آ ھمے سروپ ءَ آئی ءَ را جنت آئی ءِ پشت ءَ لگ اِیت آ ٹَپّی بیت ءُ تچّ اِیت وتی اوتاک ءَ روت – گریگر روچ پہ روچ نزور بوھاں بیت ءُ آئی ءَ لوگ والا آئی ءِ ھیال ندار انت ءُ آئی ءَ چہ شیزار بنت –

یک روچے گریگر وتی لوگ والاھاں گپ ءَ ھوش کنت کہ آ گش اِیت کہ نوں باید انت گریگر مارا یلہ بکنت بروت آئی ءِ سَوَب ءَ ما چہ باز پریشانیاں دیمپاں اِیں ھمے گپ ءَ آئی ءِ پس ھم منی اِنت کہ گریگر ھمے جاور ءَ بہ پَھم اِیت ءُ وت در بَیت ءُ بروت اے درستیں گپاں گریگر دلپروش بیت آھستہ آھستہ چہ وتی اوتاک ءَ واتر روت ءُ ھمے مار اِیت کہ منی سبب ءَ منی لوگ ءِ مردم سک پریشان انت من ایشاں یل بکناں ایشان چہ دور بے راھیں بلے اے وتی زندگی ءَ وش ھال بنت۔ ھمے ھیال ءُ پگر ءَ گریگر ءِ مجگ ءِ توک ءَ بیت ءُ وت ءَ وت ھلاس کنت ءُ آ مر اِیت۔ دومی سھب ءَ وھدے گوھار اوتاک ءَ روت داں کہ گند اِیت گریگر مرتگ ءُ لوگ ءِ مردم یک شری وشی یے بیت ءُ کار والا ماسی ءَ گْوش اَنت کہ گریگر ءِ مرتگیں جون ءَ ڈنّ ءَ دور بن ءَ بدے۔

آسر

وتی کتاب ءَ کاپکا Metamorphosis ءِ تہ ءَ انسان ءِ ھما شکل ءَ پیشدار اِیت کہ وتی پائدگ ءِ واست ءَ دومی مردم ءَ کارمرز بکنت یک براسے کہ گوھار ءِ گوم ءَ انچو نزیک انت بلے براس کہ وھدے سکیانی توک ءَ کیت گڑا گوھار ءَ بارے لگ اِیت وتی سر ءَ ماس ءُ پس انچو وھدے ھرچ پرزے پورا کتگ بلے مروچی کہ وت ءَ را زلورت انت آئی ءِ گوم ءَ کس نیست ءُ مرگ ءِ دوا ءَ لوٹ اِیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-

مکران مزن شھدگ ءَ بس وئیل ءِ آماچ بیتگ ءُ دوازدہ مردم بیران ءُ سِی مردم زدگ بیتگ اَنت-

وئیل بزی کنڈگ ءِ نزیک ءَ بریکانی نہ گرگ ءَ پیش اتکگ کہ اود ءَ بس کڈ ءَ کپتگ –

چہ ایران ءَ آیوکیں شیعہ زیارتیانی کاروان دیم پہ پنجاب ءَ روگ ءَ بیتگ ، شیعہ کاروان ءِ سیادی لاھور ءُ گوجرانوالہ ءَ انت-

پولیس ءَ زدگ ءُ بیران بیتگیں مردم نزیکیں ھسپتال ءَ سر کتگ اَنت-

زانگ بہ بیت بیست ءُ یک اگست ےَ ایران ءِ شھر یزد ءَ پاکستانی زیارتیانی بس وئیل ءِ آماچ بیتگ ات کہ چریشی ءَ سِی ءُ پنچ مردم بیران بیتگ ات اَنت-

روکپتی بلوچستان ءِ دمگ سراوان ءَ ناشناسیں ڈُنگاں یک لوگے ءِ سر ءَ اُرش کتگ ءُ یک مردمے کُشتگ ءُ سَے ٹپی کتگ اَنت-

گیشیں اھوالانی رد ءَ سراوان ءِ ھند جوبلوچان ءَ یک لوگے ءِ سر ءَ ڈنگاں پہ دُزی ءَ بیڑ برتگ ءُ اود ءَ جاڑیگیں مردماں گھگیری کتگ ءُ ھمے میان ءَ دُزاں تیرگواری کتگ ءُ یک مردمے کُشتگ ءُ سَے ٹپی کتگ اَنت-

کُشگ بیتگیں مردم ءِ پجار مھمد گُل گمشادزئی ء گل مھند ءُ ٹپی بیتگین مردمانی پجار علی حسین زئی ء سراج، مسعود ارباب ء ابوتالب ءُ سیمی ءِ پجار نہ بیتگ ءُ سراوان ءِ جھمنند اَنت-

اھوالانی رد ءَ ڈنگ دو پرپٹ ءَ سوار بیتگ ءُ آ جوبلوچان میتگ ءَ یک لوگے ءِ سر ءَ اُرش اش کتگ ءُ اود ءَ جاڑیگیں مردماں گھگیری کتگ ءُ ھمے میان ءَ دُنگاں تیرگواری کتگ ءُ یک مردمے کشتگ ءُ سَے ٹپی کتگ انت –

ٹپی بیتگیں مردم ھسپتال ءَ برگ بیتگ اَنت کہ اود ءَ یک کَسے ءِ جاور ناگیگ گوشگ بیتگ اَنت-

بنوں ءِ دمگ چہ بکا خیل سوئی ناردرن گیس ءِ سے کارادر گوں ھمراہ گاڑی ءَ آوار جنگ بیتگ اَنت، آوار جنگ بیتگینانی سیادی چہ پنجاب ءَ گوشگ بیگ ءَ اِنت-

گیشیں ھالانی رِد ءَ بنوں ءِ دمگ بکا خیل ءَ سوئی ناردرن گیس ءِ کاردار گاڑی ءَ ڈیزل مان کتگ سیدگئی ءَ روگ ءَ بیتگ اَنت کہ آ سلاہ بندیں مردماں آوار جتگ ءُ برتگ اَنت- آوار جنگ بیتگینانی تامُر ھم شنگ کنگ بیتگ، آئی ءِ تہ ءَ آ گوشگ ءَ اَنت کہ من عنایت ءُ سلیم ڈیزل گاڑی ءَ مان کتگ سیدگئی ءَ روگ ءَ بیتگیں، ما سلاہ بندیں مردماں چمّاں گُد بستگ ءُ وتی ھمراھی ءَ برتگ اِت-

آوار جنگ بیتگینانی گوشگ اِنت کہ مارا سرپدی نیست کہ کجام جاگہ اِنت، ما ھکومت ءَ گوں لوٹ کن ایں آ اشانی لوٹاں سرجم بہ کن اَنت ءُ مارا یل بکنائین اَنت-

پولیس گوشگ اِنت کہ آوار جنگ بیتگیں کاردارانی سیادی چہ پنجاب ءَ گوشگ بیگ ءَ اِنت-

ڈی پی اوضیاالدین ءِ گْوشگ اِنت کہ چہ بکا خیل ءَ آوار جنگ بیتگیں کاردارانی یل کنائینگ ھاتر ءَ آپریشن برجاہ ءَ اِنت ءُ تھانہ سی ٹی ڈی ءَ ناشناسیں آوارجنوکانی ھلاپ ءُ ایف آئی آر نکش کنگ بیتگ-

ضیاالدین ءِ گوشگ اِنت کہ آوار جنوکاں اے مردمانی تامُر ھم شنگ کتگ، کاردار ڈیزل برگ ءَ بیتگ اَنت کہ گاڑی ءَ ھوار آوار جتگ اَنت، آوار جنگ بیتگیں مردماں زوت یل کنائین ایں-

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءَ گوشتگ مروچی نوشکی ءَ زورگریں پاکستانی پوج ءِ یک چاریگے ءِ سر ءَ تیرگواری کتگ ءُ کُشتگ-

جارکش ءَ گوشتگ نوشکی ءِ شھر ءَ مَل اسٹاپ ءِ ھند ءَ تیرگواری کتگ ءُ پاکستانی پوج ءِ چاریگ عبدالوحید ء عبداللہ بابر جھمنند سندھ کشتگ-

جارکش ءَ گوشتگ اے مرد ءِ سر ءَ بی ایل اے ءَ بازیں وھداں نگاہ ایر کتگ انت کہ آئی ءَ وتی دروشم مٹ کتگ ءُ نوشکی ءِ شھر ءَ چاریگری ءِ کار ءَ بیتگ-

جیئند بلوچ ءَ گوشتگ بلوچ لبریشن آرمی اے اُرش ءِ زمہ واری ءَ من ایت ءُ زورگریں پاکستانی پوج ءُ آئی ءِ شریدارانی سر ءَ اُرش برجاہ مان اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں آدینگ ءِ ￵روچ، بیست ءُ ￶سے اگست ءَ ￴یک ءَ ￴ھاران ءِ ￵ھند سرگردان ءَ ￴سی پیک دگ ءَ ￴کارکنوکیں بندساچی شرکت ءِ ￵سائٹ ءِ ￵سر ءَ ￴اُرش کرتگ ءُ ￶مشین ءُ￶ سامان مانداشتگ اَنت۔

جارکش ءَ گْوشتگ کہ چہ کاروائی ءِ ￵سرجم کنگ ءَ ￴پد سرمچار پہ سلامتی وتی بندر ءَ ￴سر بوگ ءَ ￴سوبین بوتگ اَنت۔

جارکش ءَ گْوشتگ بلوچستان ءِ سر ءَ ￴پاکستان زورگر اِنت ءُ ￶زورگر کدی زورگپتیں ھنداں دیمروئی نہ دنت بلکیں دیمروئی ءِ ￵نام ءَ ￴لٹ ءُ ￶پل ءُ ￶کشت ءُ ￶کوش ءَ ￴ترند کنت، بلے بلوچ راجی گل بی ایل ایف ھچ وڑیں شوربندیاں موکل نہ دنت کہ آئی مول بلوچ چکچینی ءُ ￶بلوچ ءِ ￵مڈیانی لٹ ءُ ￶پل بہ بیت۔

میجر گْوھرام ءَ گْوشتگ ما درسیں ٹیکداراں کڈن کن ایں کہ آ چہ ریاستی شوربندیاں وت ءَ ￴گستا بدار اَنت، اگاں نہ آسر اِش ھراب بیت۔

جارکش ءَ گْوشتگ بی ایل ایف اے اُرش ءِ ￵زمہ واری ءَ ￴من ایت ءُ ￶ھمے کول ءَ ￴کنت کہ ریاستی پوج، آئی شوربندی ءُ ￶کمکارانی سر ءَ ￴مئے اُرش برجاہ بنت۔

“گوادر ءِ بلوچ راجی مُچّی 28 جولائی 2024”

نبشتہ کار: میجر مجید

دی بلوچستان پوسٹ

کپت جارے کہ جھدوں پہ سر شُت
کینگ ءِ کارچ کئی دل ءَ در شُت
شال پیسر سگار ءِ ارجان اَت
دَیناں بے سیتیں گنجیں گْوادر شُت

سید

گوادر ءَ بلوچ ءِ اے راجی مُچّی ءَ دژمن سرین پروش کُت ءُ آئی ءِ دیستگیں پلیتّیں واب ماٹو کُت اَنت۔ دژمن ءِ دْروگ ءُ پندل ءُ بُھتام آشکار بوت اَنت۔ آئی ءِ داشتگیں چریک، چلوپگ کار ،دزرود ءُ کاسگ چٹّاں سک باز جُھد کُت کہ اے راجی مُچّی ءَ بے سوب بہ کن اَنت بلے مئے بلوچ شیرزالانی، ورنایانی، کماشانی ءُ گْونڈیں زھگانی ھمّت ءِ دیم ءَ دژمن وت بے سوب بوت۔ دنیگا دژمن اے بے سوبی ءَ ایر بُرت نہ کنت۔ بلوچ ءِ اے پدریچ ءَ دژمن انچیں شمتے گوش بُناں جت کہ دژمن ءِ گوش بُن دنیگا سُھر سُھر اِنت۔ سید اے وڑیں جاوراں گْوش اِیت۔

راہ اگاں بستگ مئے کوہ ءُ تلار ءُ گْریشگاں
گوں وتی سرپنجگاں شیری رھے بُرّاں کنیں
چو گروک ءُ بیر ءُ نپت ءُ آس گواریں جمبر ءَ
دژمنانی زید ءِ میتاپیں لداں سوچاں کنیں

بلوچ راجی مُچّی ءَ اے گپ منّارینت کہ گوادر ءِ واھُند بکشو نہ اِنت۔ گْوادر ءِ واھند بلوچ اِنت۔ ءُ گوادر بلوچ ءِ جدّی میراس اِنت۔ گوادر پناھگیریں مھمد الی جنّاھ ءِ گْوادر نہ اِنت۔ گْوادر سرمتابیں ھمّل ء جیئند، سید ھاشمی، ناھُدا ھالو، میر ھسین اشرپ، ابدلمجید گْوادری، شھید مھبوب واڈیلا، شھید کامریڈ کیّوم، شھید اھمد داد ءُ دگہ بازیں راجپھاز ءُ زِرپھازانی گْوادر اِنت۔ سید دگہ جاھے گْوش اِیت کہ۔

وشنیاتکانی ردیں کاراں سروں رھن اِنت انگت
تاں نہ موکان ئِے میاری چوٹواں رنداں چتور

بکشو ءَ راجی مُچّی دارگ ءِ واست ءَ گْوادر ءِ سرجمیں راہ ءُ در بند کُت اَنت کہ بلوچ گوادر ءَ سر مہ بنت۔

راجی مُچّی بے سوب بہ بیت. بلے گوادر ءِ ابدی جھمننداں وت ءَ گْوادر ءَ سر کُت ءُ پیش داشت کہ گوادر ءِ روگ ءَ بلوچ ءَ ھچبر کس داشت نہ کنت۔ گُلزمین پہ وتی راجپھازاں راہ ءُ در پچ کنت ءُ وتی امبازاں زیر اِیت۔ گْوادر ءِ مھلوک ءَ گْوستانک یکبرے پد ءَ زندگ کُت۔ گْوادر ءِ میار جلّی، مھمان داری ءِ شان بالا کُت۔ من یک نبشتہ کارے ءِ بستار ءَ گْوادر ءِ مھلوک ءِ ھمنچو ستا ءَ بہ کناں کمّ اِنت۔ اینچو مھلوک ءِ ماں گْوادر ءَ دارگ ءُ آیانی ھزمت کنگ یک بلاھیں کارے۔ کہ اے کار گوادر ءِ مھلوک ءَ پہ دل ءِ ستک ءَ کُتگ ءُ پرے کار ءَ گوادر ءِ مھلوک ھزاراں شاباش کرز اِیت۔ گوادر ءِ مھلوک ءِ اے کارست الّم بلوچستان ءِ راجدپتر ءَ مان اِیت۔

گوادر ءِ کسان، مزن، کماش، ورنا، زالبول، اھوالکار، نبشتہ کار، شائر، کوّاس ءُ رھشوناں وتی وتی نکان دات اَنت۔ ءُ سربُلند بیت اَنت۔ راجدپتر ءِ بھرے جوڑ بیت اَنت۔ اے وڑیں جاوراں شھلچّہ کار مُلّا پازل گْوش اِیت،

وھدے کہ راج ٹکّر اَنت بیر ءُ ھون بیت
برات ھما اِنت کہ ستک ءِ دل برات ءَ گون بیت
لانک ءَ بند اِیت ءُ ھَمک کار ءَ شون بیت
چو نہ چار اِیت کہ دیمتر ءَ باریں چون بیت

چوناھا اے بلوچ ءِ اولی راجی مُچّی نہ اِنت۔ پیش ءَ ھم اے وڑیں راجی مُچّی بیتگ۔ چوش کہ دسمبر 1932 ءَ جیکب آباد ءَ راجی مُچّی یے بیتگ۔ دسمبر 1933 ءَ ھیدراباد ءَ راجی مُچّی یے بیتگ۔ بلے گوادر ءِ راجی مُچّی گیشتر سوب مند ءُ تواناتر بیتگ۔ پرچا کہ مرچی رسانکدر توانا اِنت۔

زانت ءُ پگر ءَ ھم مرچی گیشتر دیمروی کُتگ۔ مرچی اے شیرزالانی جُھدانی سبب اِنت کہ ماں میان استمانی جھان ءَ بلوچ ءِ توار سر بیتگ۔ بلوچ ءِ راجی مُچّی ءَ سرجمیں بلوچ راج ءَ گُلامی ءِ ھلاپ ءَ جُھد ءِ سکین داتگ.

مولانا روانبد گْوش اِیت کہ
جھ نہ جنت تاں کہ کاپلہ سالار
مَھری ماں راھان نہ بنت کتّار
شانک دنت پونڈے کہ جنوزامے
چو کہ یک بمبے ءَ بہ کنت کوکّار

مرچی رسانکدر ءِ سبب اِنت کہ جنوزامے ءِ شانک داتگیں پونڈے ءِ توار ماں میان استمانی جھان ءَ سر بیتگ۔ بلوچ راجی مچّی ءَ گوادر ءِ دنز ءُ مجاں اندیم بیتگیں گْوستانکی جاگہ گوناپ داتگ ءُ جڑکّینتگ اَنت۔ چوش کہ پُرتو، نھادیگ یا گلگ، باتیل ءِ کوہ، میدی ءِ کوہ، مُلّا پازل چار راہ، ساد ءِ کنڈگ، پاسار، کانجل، ٹُنگی ءِ کوہ، کونر ءِ کنڈگ، پراک، کسیپ کشی، لونجان کرد، ادّیرہ ءِ ٹکانہ، سالونک ءُ بانور ءِ دیمدار، چارپادگو، گوادر ءِ شاھی بازار، کمٹّی، پٹوک ءُ دگہ بازیں کْوھنیں جاہ دُبر نوک بیت اَنت۔

گُڈسر ءَ من گوں بلوچ راج ءَ دزبندی کناں کہ اے جُنز ءِ بزاں بلوچ یکجھتی کمیٹی ءِ پلیٹ پارم ءَ مھکم بہ کن اَنت ءُ آئی ءِ ھمراہ بہ بنت۔ اے یک پارٹی یے یا کہ گروپے نہ اِنت۔ اے سرجمیں راج ءِ دردانی جھگیر اِنت۔ گْوستگیں دلرنجی ءُ آزاریاں بہ شموش اِت BYC ءَ مھکم بہ کن اِت۔ BYC ھرچ ھما بلوچ ءِ جھگیر اِنت کہ وت ءَ بلوچ گْوش اِیت ءُ بلوچستان ءِ درد ءَ مار اِیت۔ اگاں کسے BYC ءِ پلّامرزی ءَ گپّے نہ کنت تُرس ءَ بے توار اِنت ءُ نشتگ۔ دژمن ءِ ھمراہ نہ اِنت بزاں کہ آ بلوچ ءِ دوزواہ اِنت۔

چہ BYC ءِ رھشوناں منی دزبندی ھمیش اِنت کہ راج ءِ ھرچ مردم ءَ وتی ھمراہ کن اِت۔راج ءِ ھرچ مردم ءَ سر ءُ سوج کن اِت۔ راج ءِ ھچ مردم ءَ چہ وت ءَ ءُ چہ وتی کرداں دلگران مہ کن اِت۔ وتی راج ءَ وتی ھمراہ کن اِت۔سر ءُ سوج ئِے بہ کن اِت۔ بلے الّم گوں وت ءَ ھوار ئِے کن اِت۔ کہ اے راج ءِ گُڈّی امیت شما اِت۔

(من وتی سنگت سدّیک رمزان ءِ منّتواراں کہ من ءَ اے کْوھنیں جاگھانی ناماں کُمک ئِے کُتگ)
تپاکی آجوئی ءِ مانزمان اِنت
بلوچستان آجو بات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-

بلوچستان ءِ جتاجتائیں دمگ کیچ ءُ مستونگ ءَ تیرگواری ءَ چہ دو مردم بیران بیتگ اَنت-

گیشیں ھالانی رِد ءَ تربت ءِ دمگ آپسر مھرے ھوٹل ءِ نزیک ءَ ناشناسیں سلاہ بندیں مردماں تیرگواری کتگ ءُ یک مردمے کُشتگ کہ آئی ءِ پجّار عابد ء وشدل جھمنند آپسر نام ءَ چہ بیتگ-

پولیس رِد ءَ اے مردم پنچر دکان ءَ کار ءَ بیتگ –

ھمے وڑ مستونگ سلاہ بندیں مردمانی تیرگواری ءَ چہ یک مردمے بیران بیتگ-

تیرگواری ءِ وئیل نوشکی بازار مل اڈہ ھند سر ءَ بیتگ-

اِھوالکار گْوشگ اِنت کہ کُشگ بیتگین ءِ سیادی چہ سندھ ءَ اِنت کہ نوشکی ءَ ٹوپی باپاری ءَ بیتگ-

بلے تنی وھدے وئیلانی سوب زانگ نہ بیتگ اَنت-