TBP Balochi

مروچی یکشمبے ءِ روچ ءَ بلوچستان ءِ بنجاھی شھر شال ءَ پریس کلب ءِ دیم ءَ زورانسری آوار جنگ بوتگیں راشد حسین بلوچ ءِ درگت ءَ مراگش ءِ برجم دارگ بوتگ –

مراگش ءَ بیگواھیں آصف ءُ رشید ءِ گھار سائرہ بلوچ ، بیگواھیں ذاکر مجید ءِ مات، بلوچ وومن فورم ءِ آرگنائزر ڈاکٹر شلی بلوچ، وائس فار بلوچ مسنگ پرسنز کے سرکماش نصراللہ بلوچ ، بلوچ یکجھتی کمیٹی ءِ ڈاکٹر ماہ رنگ بلوچ ، کوئٹہ بار کونسل ءِ جنرل سیکرٹری چنگیز حئی بلوچ ، نیشنل ڈیموکریٹک پاٹی ءِ بنجاھی ڈپٹی آرگنائزر سلمان بلوچ ، ایڈوکیٹ عمران بلوچ ، پروفیسر ڈاکٹر منظور بلوچ ءُ راشدہ حسین ءِ مات ءَ بھر زرتگ ءُ وتی ھیال درشان اِتگ انت – وھدیکہ ایڈوکیٹ ایمان مزاری، ایڈوکیٹ کامران مرتضی ءَ اونلائن بھر زرتگ ءُ وتی ھیال درشان اِتگ انت –

مراگش ءَ ڈاکٹر ماھرنگ بلوچ ءَ وتی ھیال درشان اِتگ انت ءُ گوشتگ کہ مئے دیم ءَ ھما مات کہ نشتگ انت اے اُمر ءَ آیاں مارا چہ گیش جھد کتگ ءُ جھدے بھرے بوتگ انت، مئے زمہ واری انت کہ ما بید لالچ ءُ سیاسی ایجنڈا ءَ اے ماتانی گوم ءَ ھوار بہ بہ ایں ءُ آیانی دوستگیں مردمانی ھاتر ءَ یکمشت بہ بہ ایں ءُ توار چست بہ کن ایں –

ایڈوکیٹ عمران بلوچ ءَ گوشتگ کہ یک نیمگے راشد حسین، زاکر مجید، زاھد کرد ءُ شبیر بلوچ ءِ وڑیں ورنا زورانسری آوار جنگ بیگواہ کنگ بوتگ انت ءُ آیانی کھول مات ءُ گھار زھگ ھر تک ءَ وتی توار ءَ چست کنگ ءَ انت، آیانی گس ھم تباہ بوتگ انت بلے آیاں بید تسلی ءَ دگہ ھچ نہ رس اتگ – دومی نیمگ ءَ چشیں بازیں مردمے ھست سر زاھر ءَ اے بیگواھیں مردمانی ھاتر ءَ توار چست کنگ ءَ بوتگ انت، اشانی کیسانی ھاتر ءَ جھد ءَ بوتگ انت بلے نوں ما کمے بہ چاریں آ کجا چہ کجا شتگ ءُ سر بوتگ انت، مال ءُ مڈیاں ھوار مزن مزنیں سرکاری اگدہ ھم آیاں رستگ، اشانی باروا ھم مارا جیڑگی انت –

نیشنل ڈیموکریٹگ پاٹی ءِ بنجاھی ڈپٹی آرگنائزر سلمان بلوچ ءِ گوشگ ات کہ زورانسری آوار جنی ءِ جیڑہ مارا راجی سیاسی جھدے چماں گوں چارگی انت – راجی جھد کہ پہ راج ءِ رکینگ ءُ پجار ءِ ھاتر ءَ انت، راجی گوستانک، راجی دودانی دیمروئی، زر ءُ مڈیانی وتواکی ءِ ھاتر ءَ جھد انت – زورانسری آوار جنی ھمے راجی جھد ءِ کنڈم کنگ ءُ ھلاس کنگ ءِ ھاتر ءَ یک ھُنرے – یک ھنچیں جاورے ودی کنگ بوگ ءَ انت کہ راجی مردم وتی راجی جھد ءَ دزکش بہ بنت – ھمے ھنر ھیلھاں ھوار ھوار بلوچ سیاسی جھد ءِ درگان درگان کنگ ءِ ھاتر ءَ بکُش ءُ چگل دئے پالیسی، سی ٹی ڈی ءِ دست ءَ دروگیں میڑاں کوش، سرجمیں بلوچستان ءَ ناشریں مردماں یک جاہ کنگ ءُ یک ھنچیں جاورے ودی کنگ تانکہ فرقہ واریت ءِ وڈیں جاورے ودی بہ بیت – ھمے وڈیں ھنر ھیلا راجی سیاسی جھد ءِ چیر ترینگ یا بلوچ چاگرد ءَ درگان درگان کنگ ءَ پہ کارمرز بنت –

پروفیسر ڈاکٹر منظور بلوچ ءِ گوشگ ات کہ اے دابیں مراگش کہ ھر وھد ءَ اڈ دیگ بنت گڑا زورانسری آوار جنگ بوتگیں مردم دراہ یات کائنت – زاکر مجید بہ بیت، زاھد بلوچ دراہ یات کائنت – اے دراہ یک انت، درسانی درد ھم یکتا انت بلے گپ پد ءَ ھما انت کہ انکس پاٹی ءُ انکس گلانی بوگ ءَ ابید ھم زورانسری آوار جنگ بوتگیں مردمانی جیڑو ھما داب انت – شش نکاتانی پیش کنگ ءَ ابید ھم آئی ءِ سر ءَ گامگیج زورگ نہ بیت – ششیں نکاتانی تہ ءَ اگاں یک نکاتے ءِ سر ءَ گامگیج زورگ بوتگ گڑا نیشنل ایکشن پلان انت، یک پاٹی ءَ وت اے ڈیمانڈ کتگ ات کہ نیشنل ایکش پلان ءَ ھمائی ءِ رد ءَ گامگیج زورگ بیت بلے مروچی وڈھ جیڑو ءِ سر ءَ اے نیشنل ایکش پلان ءِ سر ءَ شریں وڑے ءَ گامگیج زورگ بوگ ءَ انت –

مراگش ءِ گڈسر ءَ زورانسری آوار جنگ بوتگیں راشد حسین بلوچ ءِ مات ءَ وتی ھیال درشان اِتگ انت ءُ گوشتگ کہ منی زھگ راشد حسین انٹرپول ءَ چہ ناں بلکیں لٹ ءُ کٹ کتگ ءُ پد ءَ زورانسری آوار جتگ کہ آئی ءِ آوار جنی ءَ دبئی ءُ پاکستان ریاست ءِ دست مان انت –

آئی ءَ گوشتگ کہ منی زھگ ءِ دزگیری ءَ زاھر کنگ ءَ ابید ھم ھچ وڑیں آمیدگس ءَ پیش نہ کنگ مئے گوم ءَ زوراکی یے –

آئی ءَ گوشتگ کہ من ءَ پنچ سال انت کہ وتی زھگ ءِ پریات ءَ کنگ انت انساپ ءِ ھاتر ءَ جوڑ کنگ بوتگیں درسیں در ٹُک اِتگ انت بلے اود ءَ مارا انساپ دیگ بدل ءَ ترسینگ بوتگ – آمیدگساں من ءَ گوشگ بوتگ کہ تو وتی زھگ ءِ کیس ءَ واپس بہ زور بہ رو –

راشد حسین ءِ مات ءَ مروچی راشد حسین ءِ درگت ءَ برجم دارگ بوتگیں مراگش ءَ بھر زوروکیں مردمانی منت گپتگ ءُ گوشتگ کہ وتی زھگ ءِ یل کنائینگ ءِ امیت من ءَ چہ وتی راج انت ءُ ما امیت کنیں کہ بلوچ راج زھگ ءِ ھاتر ءَ مدامی ھمے وڑ مئے توار جوڑ بنت –

ورلڈ کپ ءِ سینزدھمی گوازی چیمپئن انگلینڈ ءُ اوگانستان ءِ میان ءَ کنگ بوتگ کہ اوگانستان ءَ گوازی کٹ اِتگ –

نئی دہلی ءَ بوتگیں گوازی ءَ انگلینڈ ءَ ٹاس کٹ اِتگ ءُ اولسر ءَ بالنگ کتگ –

اوگانستان ءَ جوانی ءَ گوازی کنان دوسد ءُ ھشتاد ءُ پنچ رنانی ٹارگٹ داتگ، رحمان اللہ گرباز ءَ پنجاہ ءُ ھپت بالاں درساں گیش ھشتاد رن جوڈ کتگ انت –

اوگانستان ءِ ایندگہ لیبی اکرام علی خیل ءَ ہنجاہ ءُ ھشت، ابراہیم زدران ءَ بیست ءُ ھشت ءُ راشد خان ءَ بیست ءُ سَے رن جوڈ کتگ، مجیب الرحمان ءَ بیست ءُ ھشت، عظمت اللہ ءَ نوزدہ ءُ حشمت اللہ شاہدی ءَ چاردہ رن جوڈ کتگ ءُ آوٹ بوتگ انت – اشاں ھوار محمد نبی ءَ نُھ، نوین الحق ءَ پنچ ءُ فضل الحق فاروقی ءَ دو رن جوڈ کتگ ءبوتگ –

عادل رشید ءَ سَے ءُ مارک ووڈ ءَ دو وکٹ گپتگ انت،وھدیکہ لیام لیونگسٹون جوئے روٹ ءُ ریس ٹوپلی ءَ ھم یک یک وکٹ ءِ بھر بوتگ –

پسوئی ءَ انگلینڈ ءِ سرجمیں لیبیاں اوگانستان ءِ دیم ءَ بس دوسد ءُ پانزدہ رن جوڈ کرتگ ءُ آل اؤٹ بوتگ انت ءُ اوگانستان ءَ شست ءُ نھ رناں چہ گوازی کٹ اِتگ –

بلوچستان ءِ دمگ کیچ ءَ آروسیانی گاڑی ءِ چپی بوھگ ءَ زھگ ءُ زالبولاں ھوار چار مردم بیران بوتگ انت ءُ ھپت زدگ بوتگ انت، وھدیکہ لورلائی ءَ پرپٹ ءِ ڈیکر کنگ ءَ زھگے بیران بوتگ –

گیشیں ھالانی رِد ءَ ھوشاپ ءَ چہ دیم پہ تربت ءَ رؤکیں زمباد گاڑی ءِ سامی پھلءِ سر ءَ چپی بوتگ کہ آئی ءَ سواریں چار مردم بیران بوتگ ءُ ھپت زدگ بوتگ انت –

ھمے گوشگ بوگ ءَ انت اے کُلیں مردم یکین کھول ءَ سیادی دار انت کہ ماں آروسے ءَ رؤگ ءَ بوتگ انت –

بیران بوتگیں مردمانی تہ ءَ زھگ ھم ھوار انت کہ آیانی پجار رحیم ء امیربخش، شاہ بخش ء حاتم ءُ نورداد ءِ ناماں بوتگ انت زدگ بوتگیں مردمانی تہ ءَ جلیل ء اختر، رگام ء جمعہ، شے نور ء چارشمبے، عابد ءحامد، سعید ء چارشمبے ءُ شاہ جان ء حاتم ھوار انت –

دمگی پولیس ءَ وت ءَ وئیل جاہ ءَ سر کتگ ءُ زدگ ءُ بیران بوتگ مردم نادراھجاہ ءَ سر کتگ انت –

دومی نیمگ ءَ چہ لورلائی ءَ پرپٹ ءِ ڈیکر کنگ ءَ ھشت سالی زھگے بیران بوتگ –

ھشت سالی زھگ چست کنگ ءُ نادراھجاہ ءَ سر کنگ بوتگ بلے آئی ءَ ٹپانی درد نہ سگ اِتگ ءُ بیران بوتگ –

پولیس ءَ پرپٹ سواریں عبدالحئی ءِ عبدالکریم دزگیر کتگ – اے درگت ءَ گیشیں پٹ پول کنگ انت –

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشان ءَ پاکستانی پوج ءِ سر ءَ اُرش ءِ زمہ واری من اتگ-

جارکش جیئند بلوچ ءَ گوشتگ گوستگیں شپ ءِ ساھت نُھ ءَ کولواہ ءِ ھند رود ءَ زورگریں پاکستانی پوج ءِ یک پوسٹے گرنیڈ لانچرانی گون ءَ اُرش کتگ ءُ چریشی ءَ کم چہ کم سَے کارمند زدگ بیتگ انت ءُ دشمن ءَ مالی تاوانانی دیمپانی کنگ کپتگ-

جیئند بلوچ ءَ گوشتگ بلوچ لبریشن آرمی اے اُرش ءِ زمہ واری ءَ من ایت ءُ چہ بلوچستان ءَ زورگریں پاکستانی پوج ءِ درایگ ءَ داں اے اُرش برجاہ مان اَنت-

اسرائیل- فلسطین ءِ اَڑگ

ٹی بی پی شونگال

ھپت اکتوبر ءَ حماس ءِ جنگی تَک عزالدین القسام بریگیڈ ءِ کماندار محمد ضیف ءَ اسرائیل ءِ بگیر ءَ طوفان الاقصی آپریشن ءِ جار جت، القسام بریگیڈ ءِ دوازدہ سد جنگولاں غزہ – اسرائیل ءِ سیمسر ءَ بستگیں پھازگی واڑ بازیں جاھاں پروشتگ ءُ زرباری اسرائیل ءَ پوجی چھاؤنیانی سر ءَ مزنیں کچے ءَ اُرش کُتگ، کہ اے اُرش ءَ اسرائیل ءُ دگنیا پدراھینتگ۔ نوزدہ سد ءُ ھپتاد سئے ءِ کپور روچ ءِ یاتگیری ءَ کہ شام ءُ مصر ءِ اسرائیل ءِ سر ءَ اُرشانی پنجاہ سال ءَ پد اولی بر اِنت کہ چُشیں مزنیں کساسے ءِ جنگ ءِ بندات بیتگ۔

القسام بریگیڈ ءِ اُرش ءِ تہ ءَ سیزدہ سد ءَ گیش اسرائیل ءِ پوجی ءُ لس شھری کُشگ بیتگ اَنت، چریشی ءَ پد اسرائیل ءِ پوج ءَ غزہ پٹی ءِ سر ءَ ھلاس نہ بیوکیں بمب تراکانی درچ ءِ بندات کُتگ، کہ ایشی ءِ تہ ءَ داں انگت دو ھزار ءَ گیش مردم مرتگ اَنت کہ ایشانی تہ ءَ مستریں کساس جنین ءُ چکانی ئیگ اِنت ۔ اقوام متحدہ ءِ رد ءَ اسرائیل ءِ بالی اُرشانی تہ ءَ آیانی یازدہ باسک مُرتگ اَنت ءُ ریڈ کراس ءِ جارکش ءَ گشتگ کہ اسرائیل ءِ پوج پیرامیڈیکس ءُ نادراھاں نشانگ کنگ ءَ اَنت کہ ایشانی تہ ءَ بازیں پیرامیڈیکس کُشگ بیتگ اَنت وھدیکہ جرنلسٹ ود آوٹ بارڈر ءَ نُھ فلسطینی اھوالکارانی جنگ بئیگ ءِ جار جتگ۔

ہیومن رائٹس واچ ءِ گُشگ اِنت کہ اسرائیل ءِ پوج غزہ ءُ زرباری لبنان ءَ اسپیتیں فاسفورس بمباں کارمرز کنگ ءَ اِنت۔ اسرائیل ءِ سئے لک ءُ شست ھزار پادانیں پوج بکتر بند گاڑی، ٹینک ءُ ٹوپ ھانہ یاں گوں غزہ ءَ انگر کنگ ءُ پوج کشی ءِ چن ءُ لانچ کنگ ءَ اَنت ءُ دگ بندی ءِ نیام ءَ پہ شھریاں داں ورگ ءُ وردن، بُناس ءُ آپ وڑیں المی گزران ءِ چیزانی سر کنگ ءِ ھم پرمان دیگ بئیگ ءَ نہ اِنت۔

جھان ءِ جتاجتائیں مسلمانیں ڈیھانی سروک ءُ اود ءِ پاٹی فلسطین ءِ پلا مرزی ءَ توار چِست کنگ ءَ اَنت، بلے وتی وتی ڈیھانی تہ ءَ راجاں ھمے اگبالاں دیگ ءَ چہ چَک ءُ پد اَنت۔ ترکی غزہ ءَ بمب گواری ءَ ترندی ءَ گوں بگیری کنگ ءَ اِنت بلے دومی نیمگ ءَ شام ءُ عراق ءَ پہ وتی آجوئی ءَ جھد کنوکیں کردانی سر ءَ بُرزی بمب گواری کنگ ءَ اَنت۔

بلوچستان ءَ برجاھیں نسل کشی ءِ سر ءَ ھاموشیں توار فلسطینیانی کوش ءِ سر ءَ زھرشانی کنگ ءَ اَنت۔ پاکستان ءَ اسرائیل ءِ آپریشنانی سر ءَ ایرادگری کنوک ءُ حماس ءِ گھگیری ءِ پرچار کنوک وتی ھمساھگیں بلوچ راج ءِ گھگیری ءَ ھلاس کنگ ءِ ھاتر ءَ پوج کشیانی پلامرزی ءَ کن اَنت۔

دو ڈیھی توجیل ءَ ابید فلسطین ءُ اسرائیل ءِ اَڑ ھمے پئیم ءَ برجاہ مان ایت۔ جھان ءِ سانمندیں ڈیھہ اَڑ ءِ گیوار کنگ ءِ ھاتر ءَ کاربندیں گامگیج بہ زیر اَنت پرچاکہ فلسطین ءِ جنجال ءِ گیوار کنگ ءَ ابید میان رودراتک ءَ ایمنی برجاہ دارگ باوری نہ اِنت۔ اقوام متحدہ ءِ کراردادانی رد ءَ ءُ جھانی کانودانی سر ءَ کاربند بئیگ ءَ گوں فلسطین ءُ اسرائیل ءَ ھونریچی ھلاس کنگ بیت کنت۔

برتانیہ ءِ نامی ئیں وکیلے ءَ گوشتگ کہ فلسطین ءِ بیرک ءِ برز کنگ فلسطین ءِ شھریانی بنکی انسانی ھکانی جائز اِنت ءُ آیانی جد ءُ جھد سرجم بیتگیں ڈیھ ءَ نندگ ءِ ھک ءِ گون ءَ یکجھتی ءِ چیدگ اِنت کہ اے جرم مہ بیت اِنت-

عرب نیوز ءِ رد ءَ برتانیہ ءِ وکیل یاسین پٹیل ءَ گوشتگ کہ فلسطین ءِ بیرک برز کتگ ءُ ھمدردی، دومی وتی لیکھانی درشانی سیمی فلسطین ءِ شھری ءُ مشکل آماچیں مردمانی واستا وتی پلامرزی ءِ پدر کنگ ءُ اے کجام جرم اِنت-

برتانیہ ءِ وکیل ءَ ٹپاس کنان ءَ ھمے ھپتگ ءِ بندات ءَ برتانیہ ءِ وزیر داکلہ سویلا بریومین ءَ کلانیں پولیس ءِ سروکاں نبشتگ کتگیں نمدی ءَ پسو دیم ءَ اتکگ –

برتانیہ ءِ وکیل ءِ اے درشان برتانیہ ءِ وزیر داکلہ سویلا بریورمین ءِ کلانیں پولیس سروکاں نبشتگ کتگیں نمدی ءَ پسو دیم ءَ اتکگ کہ ایشی ءَ گوشگ بیتگ فلسطین ءِ بیرک ءِ برز کنگ زیردستیں دمگانی آجوئی ءِ اوگام جرم بیت کت کنت اِنت-

آئی ءَ سَے شمبے ءَ وتی نمبدی ءَ نبشتگ کتگ بیتگ کہ اے بس ھماس ءِ پلامرزی ءِ اوگام نہ اِنت ءُ ایوک ءَ پدردی ءِ سبب اِنت من لوٹ آں پولیس اے گپ ءَ شری ءَ دلگوش کنت اِنت ءُ چہ کور ءَ زر فلسطین ءِ آجوئی بیت اِنت- چوشین‍ اوگاماں اسرائیل دنیا ءَ ھلاس بوگ ءَ گندگ ءِ گھگیری ءِ واھشت ءَ پدری ءِ سرپد بوگ لوٹ ایت-

ھاں چوش اے اوگاماں لھتے گچینی ترگ ءُ پِرترانی کامرد بوگ ءَ پبلک آرڈر ایکٹ ءَ شَک ءَ پنچ ءِ تک ھوار اِنت ؟-

برتانیہ ءِ وکیل ءَ گوشتگ ایشی ءِ گال آجوئی ءِ پرکاری ءِ ھک ءَ جھلانکیں سان دور دے اَنت کہ اے بنکی ھک اَنت ءُ مئے گور ءَ اے بہ بیت دانکہ شما بہ زان اِت شمئے گور ءَ جمھوریت اِنت-

آئی ءَ دیمتر ءَ گوشتگ اگاں مردم فلسطین ءِ کاز ءِ پلامرزی ءَ روانک ءِ وھد ءَ وتی لیکھاں درشان بہ کنت گڑا اے داب ءَ ھک ءِ نیمگ ءَ اِنت پرچاکہ برتانیہ ءُ یورپ ءِ چارٹر ءِ تہ ءَ اے یک بنکی ھکے –

یاسین پٹیل ءِ رد ءَ پبلک آرڈر ءِ تک ھما وھد ءَ بیت اِنت کہ وھدیکہ پروشت ءُ پروشی بہ بیت اِنت – کانون لپاشگ بہ بیت یا دگہ کسے ءَ تنگ کنگ ءَ گیر کانونی کار بہ کنت اد ءَ ھرچ بھتامے جنگ بیتگ آ ایش اِنت بیرک ءِ چست کنگ اِنت ءُ اسرائیل ءِ شھری یا اسرائیل ءِ ھمدرد کنوکاں تورینگ ءَ اِنت-

آئی ءَ گوشتگ کہ ھماس یک ناشرین گلے بلے فلسطین ءِ بیرک ھماس ءِ نہ اِنت نانکہ ھماس ءِ فلسطین ءِ بیرک اِنت-

برتانیہ ءَ فلسطین انسانی ھکانی ھاتر ءَ ھستیں فریڈم آف الاقصیٰ ءِ این جی او ءَ برتانیہ ءِ وزیر داکلہ ءِ لوٹ ایر جتگ ءُ گوشتگ کہ چیرکائی بیھار دیگ ءُ وتی لیکھانی درشان کنگ ءِ نہ منگ ھچ رنگ ءَ مَنگ نہ بیت اِنت-

روکپتی بلوچستان ءِ بنجاھی شھر دزاپ ءَ لس پوشاکی کارمنداں یک ورنایے آوار جنگ ءَ پد ناشناسیں جاھاں برتگ –

گیشیں اھوالانی رد ءَ آوار جنگ بیتگیں ورنا ءِ پجار مھمد تیرہ گل ء عبداللہ جھمنند کریم آباد دزاپ ءِ نام ءَ زانگ بیتگ –

اھوالانی رد ءَ مھمد تیرہ گل سِی ستمبر ءَ جمعہ ءِ خونین ءِ سالگشت ءَ گرگ بیتگ کہ آئی ءِ نام کھول ءَ پیش ءَ دیم ءَ نیاؤرتگ-

اھوالانی رد ءَ آئی ءِ کھول ءَ جتا جتائیں ادارگاں مھمد تیرہ گل ءِ بارو ءَ جست ءُ پرس کتگ بلے درستاں وت ءَ ناسرپدی گوشتگ-

زانگ بہ بیت جمعہ خونین ءِ سالگشت ءَ بازیں کچے ءَ مردم گرگ بیتگ ات اَنت ءُ گوستگیں آدینگ ءَ پیش ھشتاد ءِ کساس ءَ مردم یل کنگ بیتگ اَنت-

میان استمانی ریڈ کراس ءَ اسرائیل ءِ ماں غزہ ءِ سر ءَ اُرش میان استمانی کانودانی لگتمالی گوشتگ، آئی ءَ گوشتگ کہ حماس ءِ راکٹ اُرش چُشیں نہ بوتگ انت کہ اسرائیل ءَ غزہ ءِ تباہ کنگ ءَ موہ بہ رسیت – ریڈ کراس ءَ لوٹ جنگ بندی ءِ لوٹ کتگ –

ریڈ کراس ءِ اے درشان اسرائیلی پوج ءِ اے بیھار ءَ پد دیگ بوتگ کہ اسرائیل ءِ نیمگ ءَ غزہ ءِ مردم گوشگ بوتگ انت کہ آ وتی لوگ جاھاں یل بہ دئینت ءُ زربار ءِ نیمگ ءَ بہ رو انت –

میان استمانی ادارہ ءِ رِد ءَ گوستگیں ھپتگ اسرائیل سر ءَ بوتگیں بیمناکیں اُرشاں اسرائیل ھچ جواز پیش کت نہ کنت – ما پہ ھما اسرائیلیاں پدردیں کہ آیانی کھول ءِ مردم جنگ بوتگ انت یا کھول ءِ مردمے ھلوچ کنگ بوتگ –

ما ھلوچ کتگیں مردمانی ھمے زوتاں یل کنگے لوٹ ءَ کنیں اشی ءَ ھوار ما پہ گند ءُ نند ھم گوں آیاں ھم کوپگ انت بلے اشی ءِ ھچ وڈا منوک نہ انت کہ اسرائیل غزہ ءِ تہ ءَ تباھی بہ کنت –

انٹرنیشل ریڈ کراس ءِ نیمگ ءَ گوشگ بوتگ ھردو نیمگانی جنگ کنوک کانود ءُ زمہ واریاں دلگوش بہ دئینت –

ریڈ کراس ءِ ادارہ ءَ اسرائیل ءِ نیمگ ءَ پہ فلسطینیاں وتی لوگ جاھانی یل دیگ ءُ در آیگ ءِ درگت ءَ گوشتگ کہ یک نیمگے اے مردم سرجمی ءَ بلاکیڈ کنگ ءُ آیانی ورگ آپ، لین ھوار آ چہ ھر چیز ءَ زبھر کنگ بوتگ انت کہ ھچ وڈیں میان استمانی انسانی ھکانی رِد ءَ نہ انت –

آئی آر سی ءِ رِد ءَ ھر ھما وھد ءَ کہ پوجے یک دمگے ءَ ھالیگ کنگ لوٹیت گڈا آئی ءَ پیسر ءَ ھر ھما درسیں گامگیج زورگی انت ھتاکہ پہ آیاں وردی ورگ چن ءُ لانچ ھم کنگی انت – او اے ھم اژدری انت کہ ھر کھول ءِ مردم یکجاہ بہ بنت –

ریڈ کراس ءِ نیمگ ءَ اے ھم گوشگ بوتگ کہ غزہ مردم نوں ھچ کجا پھریز نہ انت – آ اشی ءَ ھم سرپد نہ انت کہ باندا کجام کجام دمگاں بمبگواری کنگ بیت – ریڈ کراس ءِ ھمے لوٹیت کہ جنگ وھد وھد سر ءَ بند کنگ بہ بیت تانکہ اے شریں جاھے ءَ کار کت بہ کناں –

آئی سی سی کرکٹ ورلڈ کپ دوھزار ءُ بیست ءُ سَے ءِ یازدھمی گوازی ءَ بھارت ءَ پاکستان ھپت وکٹاں پروش داتگ ءُ گوازی کٹ اِتگ –

بھارت ءِ نیمگ ءَ جوانی ءَ گوازی ءِ بندات کنگ بوتگ بلے پدا ھم سیمی اوور ءَ شبھمن گل شاھین شاہ آفریدی ءِ بال ءَ شاداب خان ءَ کیچ کتگ ءُ آؤٹ کتگ، بھارت ءِ اوپنراں یازدہ بالاں چار چوکا جتگ ءُ شانزدہ رن جوڈ کتگ انت –

شبمن گل ءَ پد ویرات کوہلی ءَ ھم جوانیں گوازی پیش نہ داشتگ، کوہلی ءَ ھژدہ بالاں شانزدہ رن جوڈ کتگ ءَ حسن علی ءِ بال ءَ کیچ بوتگ –

بھارت ءِ کپٹن روہت شرما ءَ جوانی ءَ گوازی کنان ءَ شست ءُ سَے بالاں شش چکا ءُ شش چوکا جتگ ءُ ھشتاد ءُ شش رن جوڈ کتگ انت ءُ پدا روہت شاھین ءِ بال ءَ کیچ آؤٹ بوتگ ءُ واتر بوتگ –

گوازی ءِ بندات ءَ پاکستان ءِ لیبی بازیں اڈاندانی دیمپان بوتگ انت، اوپنر ءَ عبداللہ شفیق اتکگ ءُ بیست رن جوڈ کتگ ءُ محمد سراج ءَ ایل بی ڈبلیو ءَ آؤٹ کتگ وھدیکی امام الحق ءَ سِی ءُ شش رن جوڈ کتگ ءَ ہاردک پانڈیا ءَ آؤٹ کتگ –

بنداتی دوئیں وکٹانی کپگ ءَ پد بابر اعظم ءُ محمد رضوان اتکگ انت ءُ بابر ءَ پنجاہ رن جوڈ کتگ کہ آ سراج ءَ واپس دیم داتگ، سعود ءَ ھم شش رن جوڈ کتگ وھدیکہ افتخار ءَ چار رن جوڈ کتگ ءُ کلدیپ ءَ آ بولڈ کتگ –

چریشی ءَ پد پاکستانی وکٹانی کپگ بندات بوتگ، محمد رضوان ءَ چِل ءُ نُھ رن جوڈ کہ آ بمراہ ءَ کلین بولڈ کتگ وھدیکہ کمک کپٹن شاداب جسپریت ءَ آؤٹ کتگ – ایندگہ لیبیانی تہ ءَ حسن ءَ دوازدہ، محمد نواز ءَ چار، حارث ءَ دو رند جوڈ کتگ بوتگ انت –

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءِ تہ ءَ گوشتگ بلوچ لبریشن آرمی ءِ سرمچاراں کیچ ءِ بنجاھی شھر تربت ءَ بی ایل اے ءِ انٹیلیجنس ونگ ءِ چیرین اھوالانی پد ءَ بیڑ برتگ ءُ زورگرین پاکستانی پوج ءِ 6 کارندہ کشتگ اَنت-

جیئند بلوچ ءَ گوشتگ بی ایل اے ءِ انٹیلی جنس ونگ ءِ ھالانی رد ءَ پاکستانی پوج ءِ بازیں کمکار ءُ چاریگ تربت ءِ شھر ءَ سیٹلائیٹ ٹاؤن ءَ یک ھالیگیں لوگے ءَ وتی بنجل کارمرد کنگ ءَ بیتگ اَنت – ءُ مردم زورگریں پوج ءِ بنجل ءُ دشمن ءِ گاڑیاں سوار بوگ ءَ گندگ بیتگ اَنت-

آئی ءَ گوشتگ کہ اے مردم کارندھانی رنگ ءُ دروشم مٹ کتگ ءُ زورگریں پاکستانی پوج ءِ واستا چاریگری ءُ بلوچ دشمنی ءَ ھوار بیتگ اَنت – کہ وتگڑیں ڈیتھ اسکواڈ ءِ کارمند بنجلے شوھاز کار بیتگ اَنت-

آئی ءَ گوشتگ کہ بلوچ لبریشن آرمی ءِ سرمچاراں بیڑ بران ءَ گوستگیں شپ ءِ ساھت دوازدہ ءَ بنجل ءِ سر ءَ اُرش کتگ کہ اود ءَ دشمنیں شش کمکار ھما جاہ ءَ مرتگ اَنت ءُ تچگ ءِ وھد ءَ دو زدگ بیتگ انت ءُ ایشانی توک ءَ یکے سک زدگ بوتگ ءُ اود ءَ یک کسان اُمرے ءِ سبب ءَ سرمچاراں تاوان نہ داتگ-

آئی ءَ گوشتگ کشتگیں کمکارانی تہ ءَ رضوان ء اللہ داد،شھباز ء ممتاز، وسیم ء ممتاز، شفیق احمد، محمد نعیم ء اسلم ءُ سکندر ء رمضان جھمنند ملتان ءُ نارووال پنجاب ھوار اَنت-

جیئند بلوچ ءَ گوشتگ بلوچ لبریشن آرمی دمگی ٹھیکیدار، ھوٹل ءُ لوگانی واھنداں سرپد کنت کہ آ زورگریں پاکستانی پوج ءِ کمکارانی آسراتی دیگ ءَ دزکش بہ بنت ،اے کمکاراں وتی رنگ ءُ دروشم مٹ کتگ انت جتا جتائیں رنگ ءُ پئیماں تربت ءِ شھر ءَ ھوار کش ءُ گوری دمگاں زورگریں پاکستانی پوج ءِ چیردستی ءَ بلوچ راجی زرمبشت ءِ آجوئی ءِ ھلاپ ءَ کار کنگ ءَ بیتگ اَنت-

بی ایل اے ءِ جارکش ءَ گوشتگ کہ ما یک رندے پد ءَ ٹھیکیدار، ھوٹلانی واھند ءُ لوگانی واھنداں تچک کن ایں گوش ایں کہ آ زورگریں پاکستان ءِ کمکارانی آسراتی دیگ ءَ وتی جانی ءُ مالی تاوانانی زمہ وت بہ بہ اَنت-