TBP Balochi

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءَ گوشتگ کہ دُژمن ءِ سر ءَ کُرتگیں یک بمب تراکے ءَ آواران ءِ میتگ کنیچی ءُ ھوٹان (کولواہ ) ءِ میانجی ءَ کپ ءَ پاکستانی لشکر ءِ گاڑیانی کاروانے نشانگ کُرتگ۔

آئی ءَ گوشتگ اے اُرش ءَ پاکستانی لشکر ءِ یک گاڑی یے سرجم ءَ آدرہ ءُ یک گاڑی یے ءَ کمو تاوان بیتگ۔اے اُرش ءَ دُژمنیں لشکر ءِ ھپت کارمند جاھی مُرتگ ءُ باز ٹپی بیتگ انت۔

گوھرام بلوچ ءَ گوشتگ دژمن ءِ بگیری ءَ اے کار آدینگ ءِ بیگاہ ءِ پنچ ءُ نیم ءَ بیتگ۔ گوں چیرکُرتگیں شورھاں پاکستانی لشکر ءِ گاڑیانی کاروان نشانگ کُرتگ۔

آئی ءَ گوشتگ پاکستانی لشکر ءِ سُر ءُ پُرانی گیش بیگ ءُ مردمانی بگیری ءَ زوراکیانی گندگ ءَ پد آئی ءِ بگیری ءَ اے اُرش ءِ شور کنگ بیتگ داں کہ دُژمن ءِ آزاتیں سُر ءُ پُر کمتِر بہ بنت۔

آئی ءَ گوشتگ پاکستانی لشکر بلوچستان ءِ سر ءَ وتی زورگری ءِ برجاہ دارگ ءَ لس آبادیاں تُرس ءِ آماچ کنگ ءُ بلوچ راج ءَ چہ بلوچ گلزمین ءِ سیاسی ءُ چاگردی جیڑھاں نادلگوش کنگ لوٹ ایت۔ ھمک روچ آبادیانی سر ءَ اُرش کنت ءُ ورنایانی زور بیگواہ کنگ پاکستانی لشکر ءِ بازیں زوراکیانی دْرچ اِنت۔ بلوچستان لبریشن فرنٹ دُژمن ءِ چِست ءُ ایراں سرپد اِنت ءُ مدام بلوچ راجی سیتانی پھریزگ ءَ جاڑی اِنت۔ دژمن وتی زور ءِ ناز ءُ سرمست بیتگ بلے مئے مھکمیں اُرش آئی ءِ دیمروئی، پندل ءُ شوربندیاں گوں ھاک ءَ ھوار کن اَنت۔

آئی ءَ گوشتگ بلوچستان لبریشن فرنٹ پاکستان لشکر ءِ سر ءَ اے اُرش ءِ زمہ واری ءَ منّ ایت ءُ اے اُرش داں بلوچستان ءِ آجوئی ءَ برجاہ بنت۔

بلوچستان ءِ دمگ کیچ ءُ تمپ ءَ پاکستانی پوج ءَ دو کسان سالی ئیں ورناہ زورانسری آوار جنی ءِ نشانگ کتگ ءُ بیگواہ کتگ اَنت-

گیشیں ھالانی رِد ءَ گوستگیں شپ ءَ کیچ ءِ بُنجاھی شھر تربت ءِ ھند صلالہ بازار ءَ ریاض میتگ ءَ پاکستانی پوج ءُ چیریں ادارھاں بیڑبرتگ ءُ یک ورنایے آوار جتگ ءُ بیگواہ کتگ-

آوار جنگ بیتگیں ورنا ئے پجّار عامر ء امجد جھمنند کولواہ ڈنڈار نام ءَ چہ بیتگ ، دمگی مردمانی گوشگ اِنت کہ عامر گاڑی ءِ ڈرائیورے ءُ آئی ءَ زمبادے گون بیتگ ءُ وتی گریبی ءَ کنگ ءَ بیتگ-

ھمے وڑ تمپ ءِ دمگ دازن ءَ مروچی سُھب ءِ ساھت یازدہ ءَ سنوکر کلب ءَ چہ پاکستانی پوج ءَ یک ھپدہ سالی ئیں ورناہ براھمدگ ء نواز زورانسری آوار جتگ ءُ بیگواہ کتگ-

یات بہ بہ اِت کہ دو روچ ءَ ساری ھم پاکستانی پوج ءَ دازن ءَ عبدالحق ء ھپیز نامیں ورنایے آوار جتگ ءُ بیگواہ کتگ اَت-

زانگ بہ بیت بلوچستان ءَ زورانسری آوار جنی ءِ نہ کُٹوکیں دْرچ یکشلہ برجاہ ءَ اِنت ھمکروچ یک دو ورناہ پاکستانی پوج ءِ دست ءَ زورانسری آوار جنی ءِ نشانگ بیت-

بلوچستان ءِ دمگ آواران ءِ ھند کولواہ ءَ پاکستانی پوج ءَ بازیں کچے ءَ سُر ءُ پرانی بندات کتگ-

گیشیں اھوالانی رد ءَ کولواہ ءِ جتا جتائیں جاھاں پاکستان پوج بازین کچے ءَ سر بیتگ اَنگ – اود ءَ پوج بازیں کچے ءَ میتگ ءُ کوھی دمگاں پیش گامی ءُ مھلوک در ءُ ڈناں روگ ءِ مکن کتگ اَنت-

دمگ ءِ رھوتی اھوال بند کنگ بیتگ اَنت ءُ چریشی ءَ وھد پہ وھد ءِ اھوالانی گرگ تکانسری اِنت-

داں انگت ءَ ھچ رنگیں جانی ءُ مالی تاوانانی اھوال دیم ءَ نیتکگ اَنت ءُ نانکہ لشکری بنشون ءِ رد ءَ اے وڑیں گپ دیم ءَ اتکگ اَنت بلے گوست ءَ ھم اے دمگ ءَ پوجی بیڑ بیتگ اَنت کہ چریشی ءَ جانی ءُ مالی تاوان پیش اتکگ بیتگ اَنت-

پوجی سر ءُ پرانی گیشی گوستگیں روچ ءَ پوج ءِ سر ءَ بیتگیں یک بمب تراکے ءَ پد بیتگ اَنت- دمگی رد ءَ پوج ءِ یک گاڑی یے بمب تراکے ءِ نشانگ کنگ بیتگ ءُ چریشاں آیاں جانی تاوانانی دیمپانی کنگ کپتگ-

بلوچستان ءَ راجدوستیں پاٹی ءُ انسانی ھکانی گلانی گوشگ اِنت آپریشنانی وھد ءَ مردمانی زورانسری آوار جنی، کُشت ءُ کوش ءُ پُلپھانچیانی بھتام پاکستانی پوج ءِ سر ءَ بیتگ اَنت-

بلوچ ریپبلکن گارڈ ءِ جارکش دوستیں بلوچ رسانکدر ءَ شنگ کتگیں درشان ءِ تہ ءَ گْوشتگ کہ سوئی ءَ چہ کراچی رؤکیں سی شش انچ گیس پائپ لائن ءِ تراکینگ ءِ زمہ واری منّ اِتگ-

بی آر جی ءِ جارکش ءِ گْوشگ اِنت گوستگیں شپ ءَ سندھ ءِ دمگ خیرپور ءَ سوئی ءَ چہ کراچی ءَ رؤکیں سی شش انچ ءِ گیس پائپ لائن بی آر جی ءِ سرمچاراں تراکناکیں شور پٹ کتگ ءُ تراکینتگ-

جارکش دوستین بلوچ ءَ گْوشتگ کہ مئے اے وڑیں اُرش بلوچستان ءِ وتواجھی ءَ تاں برجاہ بنت-

اسکاٹ لینڈ ءِ سروزیر ءَ گوشتگ ھماس ءِ اُرش ءِ پژدر ءَ اسرائیل یکدم دیم ءَ روگ ءَ اِنت ءُ گزہ ءِ لس مھلوک ءَ تاوانانی دیم ءَ کارمرد کت نہ کن ئے-

عرب نیوز ءِ رد ءَ اسکاٹش ءِ سروزیر ھمزہ یوسف ءَ میان اُستمانی برادری ءَ لوٹ کتگ کہ آ گزہ ءِ جنگ بندی ءَ ستکی بہ کنت ءُ وتی جد ءُ جھداں ترند بہ کنت-

آئی ءَ گوشتگ کہ میان اُستمانی برادری انسانی کمک ءِ ھاتر ءَ کمکی ساز ءُ سامانابی راہ ءَ پچ بہ کنت ءُ آ شھریاں داں اود ءَ کش ات بہ کنت-

ھمزہ یوسف ءَ گوشتگ کہ اے تباہ بیوکیں انسانی ھلاسی ءَ ردوم زرتگ ءُ گزہ ءُ بیست ءُ دو لک مردماں ترندیں سزا دیگ ءِ منانک ھچ وڑ ءَ بوت نہ کنت اِنت-

آئی ءَ گوشتگ اسرائیل ءَ مروکیں دراھیں مردمانی گون ءَ پدردی اِنت بلے بے گناھیں فلسطیناں ناشریں گلیں ٹولی ءِ پژدر ءَ سرانی نھاد دیگی نہ اِنت-

اسکاٹش ءِ سروزیر ءَ اے درشان ھما وھد ءَ داتگ کہ آئی ءِ وسی الزبتھ النکلہ گزہ ءَ شنگ بیتگیں یک تامرے ءِ کلوہ ءَ میان اُستمانی برادری ءَ فلسطینانی کمک ءِ دزبندی ءَ کنگ ءَ اِنت-

الزبتھ النکلہ نرسنگ ءِ تک ءَ سیادی دار ایت ءُ وتی مرد میگڈ ءِ ھمراھی ءَ گزہ ءَ جھمنند اِنت-

ھمزہ یوسف ءَ گوشتگ کہ آئی ءِ وسی زھنی زور ءِ آماچ اِنت ءُ اے تامر ءَ گندگ بیت اِنت بازیں مشکلانی دیمپان اِنت ءُ وت بے وسی ءِ آماچ اِنت-

گوستگیں ھپتگ ءَ ھمزہ یوسف ءَ برتانیہ ءِ وزیر ھارجہ جیمز کلیورلی ءَ یک نمدی ءِ تہ ءَ گوشتگ کہ آ اسرائیل ءِ سرکار ءَ دزبندی بہ کنت ءُ لس شھریاں چہ گزہ ءَ رفاع بارڈر ءَ مسر ءَ روگ ءِ اجازت بہ دنت-

بلوچ نیشنل مومنٹ ءِ سروک ڈاکٹر نسیم بلوچ ءَ وتی شنگ کتگیں درشان ءَ گوشتگ تمن گورشانی ءِ مردماں پاکستانی لشکر ءِ زور ءَ پد ھم پہ موشک چکاس ءَ وتی ھلک ءُ میتگ یلہ نہ داتگ اَنت ، اے شریں گامگیج ءُ ناترسیں شورے۔ اے پہ مدامی دمگ ءِ دستیگ کنگ ءَ مزنیں ریپے بلوچ راج ءَ شیوار بیگ لوٹ ایت۔پاکستان مکارے کہ مدام جھان ءَ ریپین ایت ءُ پہ وتی چیریں مولاں مردمگری ءِ بگیر ءَ کار کنت۔ اے گپ بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ وتی درشانے ءَ شکساتگ اَنت۔

آئی ءَ گْوشتگ پاکستانی لشکر ءَ ماں راجن پور ءِ ھند تمن گورشانی ءَ ماڑی ، موزا گروزان ، دراژ تل ، موزا چمبڑی ، موزا لوٹ لڑ ، شم ، کلچاس ءُ ریکانی گھور ءِ مردماں گْوشتگ کہ آ چہ وتی ھلک ءُ میتگاں در بہ کپ اَنت داں آ اود ءَ زورگر وتی موشکاں بہ چکاس ایت۔ بلوچستان ءِ زور گرگ ءَ پد پاکستانی مھترھند ( ریاست ) اد ءِ مڈیاں پہ وتی لشکر ءِ والینگ ءُ پنجاپ ءِ دیمروئی ءَ ھرچ کنگ ءَ اِنت وھدے کہ بلوچستان پہ ایٹمی سلاھانی جوڑ کنگ ءُ ایٹمی تْراکاں آزمائشجاھے جوڑ کنگ بیتگ۔

ڈاکٹر نسیم ءَ گْوشتگ جھان سرپد اِنت کہ پاکستان مکار ءُ ریپ دئیں مھترھندے کہ ایشی ءَ ماں گْوست ءَ جھان ءِ چماں پر چنڈ اتگ ءُ ’ ڈاکٹر کدیر ھان ‘ ءِ پارست ءَ جھان ءَ ایٹمی سلاھانی تالانی ءِ میار کرتگ۔ بلوچستان ءِ دمگ دیرو گازی ھان ءُ راجن پور ھم پہ بیمناکیں سلاھاں آزمائشجاہ جوڑ کنگ بیتگ اَنت۔ اے دمگ ناپھریزیں رنگے ءَ زمین کوچگ ءُ یورینیم درکنگ ءِ پد ءَ تابکاری سانانی آماچ اِنت ءُ نی پہ بیمناکیں سلاھانی چکاس ءَ اد ءِ نندوکانی سر ءَ زور دیگ ءَ بیگ ءَ اِنت کہ وتی ھلک ءُ میتگاں یلہ بہ کن اَنت داں زورگر اد ءِ گواجناں ( معدنیات ) دستیگ بہ کنت۔

آئی ءَ گْوشتگ بلوچستان ءِ اے دمگاں سارتی ءِ زور گیش بیتگ ءُ پاکستان لوٹ ایت کہ مردم ابید کمک ، پہ نندگ ءَ ابید چہ بان ءُ کاپرانی بست ءُ بند ءُ ابید واترگ ءِ دلجمیں مانزمانی ءَ وتی ھلک ءُ میتگاں یلہ بہ کن اَنت۔ آیانی اے ترس ھم وتی جاہ ءَ راست اِنت کہ اگاں آ وتی ھلک ءُ میتگاں یلہ بہ کن اَنت گڑا پد ءَ آیاں نہ ھل اَنت کہ وتی ھلکاں واتر بہ کن اَنت۔ آیانی مال ءُ مڈی دستیگ کنگ ءُ آ پہ مدامی در پہ دریں زند گْوازینگ ءَ لاچار کنگ بہ اَنت۔ پمیشکا آنگْور ءِ مردم وتی ھند ءُ زمیناں یلہ کنگ ءُ روگ نہ لوٹ اَنت۔

ڈاکٹرنسیم ءَ گْوشتگ دوہزار ھژدہ ءَ ھم پاکستانی لشکر ءَ پواد کوہ ءِ ھم گْوراں موشک چکاس اتگ کہ آیانی چنڈ بارگ پواد ، مرنج، گزبوڑ ، دراگل ماڑی ، کلیری تل ، ساوڑی گھور ءُ جوپ پواد ءِ میتگانی سر ءَ کپتگ اَنت۔ مروچی ھم چہ اے ھنداں بیتگیں چکاساں مردماں تاوان رس ایت۔

آئی ءَ گْوشتگ 6 اکتوبر ءَ دیرو گازی ھان ءَ بھمانگیں تْراکے بیتگ۔ ھندی رسانکدر ءَ ھال داتگ کہ اے تْراک دیرو گازی ھان ءَ ’ ایٹمی کار جاھے ‘ ءِ نزیک ءَ بیتگ۔ چہ ایشی ءَ پد تندجاہ ءُ راھوتی تْرام ( نظام ) ماٹو کنگ بیتگ اَنت۔ رند ءَ پاکستانی رسانک ءَ اے پراسراریں تْراک پاکستانی واکدارنی گْوشگ ءِ رد ءَ چہ پاکستانی بالی توان ءِ جنگی جیٹاں ودی بیوکیں ’ سونک بوم ‘ لیک اتگ۔بلے اے گپ گیشینگ نہ بیتگ کہ آ کجام سکیں ناگیگیں جاور اَت کہ پاکستان ایپ شانزدہ ، ایپ ھپدہ یا جے دہ وڑیں سپر سونک جنگی بالیگے ءَ راھبند لپاشتگ اَنت ءُ شھر ءِ سر ءَ چہ توار ءِ رشت ءَ ھم تیز تر بال کرتگ۔ 6 اکتوبر ءِ تْراک شکی ئیں تْراکے اَت ، اے رد ءَ میان استمانی تْرامگیجاں پٹ ءُ پول کنگ لوٹ ایت۔ پرچا کہ پاکستان ءَ گْوست ءَ ھم ایٹمی سلاھانی جوڑ کنگ ءِ گپ چیر داتگ ءُ چیروکائی ایٹم بم جوڑ کرتگ۔ انی ھم المی ءَ اے دروگ ءِ پشت ءَ انچیں راستی یے چیر دیگ بیگ ءَ اِنت کہ پہ دمگ ءُ جھان ءَ بے تاھیری یے پارست بیت۔

بی این ایم ءِ سرکماش ءَ گْوشتگ دیرو گازی ھان ءُ راجن پور بلوچستان ءِ بھ گستا نہ بیوکیں بھر اَنت۔ بی این ایم ءَ ھوار سرجمیں بلوچ راج گوں آنگْور ءِ مردماں پجیگ اِنت ، آیانی بگیری ءَ چونیں ھم پندلے بہ بیت بلوچ راج تْرک ءُ نک نہ نند ایت۔

بلوچستان ءِ دمگ کیچ ءِ بُنجاھی شھر تربت سیٹلائیٹ ٹاؤن ءَ گوستگیں شپ ءَ ناشناسیں سلاہ بندیں مردمانی تیرگواری ءَ پنجاب ءِ جھمنندیں 6 مردم بیران ءُ 2 زدگ بیتگ اَنت، بیران ءُ زدگ بیتگیں مردمانی سیادی پاکستان ءِ اُستان پنجاب ءَ اِنت-

پولیس رِد ءَ گوستگیں شپ ءَ ناشناشیں سلاہ بندیں مردماں سیٹلائیٹ ٹاؤن تربت ءَ ٹھیکیدار نصیر احمد لوگ ءِ تہ ءَ پترتگ ءُ تیرگواری کتگ چریشی ءِ آسر ءَ اود ءَ جاڑیگیں 6 مردم ھما دمان ءَ بیران ءُ 2 زدگ بیتگ اَنت ، بیران ءُ زدگ بیتگینانی پجّار رضوان ء اللہ داد ، شھباز ء ممتاز ، وسیم ء ممتاز ، شفیق احمد ، محمد نعیم ءُ سکندر جھمنند ملتان ءُ نارووال وھدے کہ ٹپیانی تہ ءَ غلام مصطفیٰ ء نزیر احمد جھمنند ملتان ءُ توحید ء جاور خان جھمنند نارووال چہ پنجاب ءِ نام ءَ بیتگ اَنت-

پولیس رِد ءَ اے وئیل آدینگ ءُ شمبے ءِ میانی شپ ءَ پیش اتکگ – پولیس ءَ ٹاہ داتگ کہ کُشگ بیتگیں ٹھیکیدار کر ءَ بند ءُ ساچی کارانی درگت ءَ پوریاگری ءَ بیتگ اَنت کہ آ نشانگ کنگ بیتگ اَنت ، وئیل ءِ ھال سر بوگ ءَ پولیس وئیل جاہ ءَ سر بیتگ ءُ گیشیں چار ءُ ٹپاس کنگ بندات ات کتگ-

سر بیتگیں اھوالانی رد ءَ روکپتی بلوچستان ءِ دمگ نیکشھر ءَ ناشناسیں مردماں تیرگواری کنان ءَ یک اُستادے کشتگ-

کُشگ بیتگیں استاد ءِ پجار مراد مسئودنیا ء اشرف جھمنند نیکوجھان نیکشھر ءِ نام ءَ زانگ بیتگ-

اھوالانی رد ءَ مراد وتی مردمانی ھمراھی ءَ زھک ءَ گوستگیں روچ ءَ مھمانی ءَ شتگ بیتگ کہ اود ءَ ناشناسیں مردماں تیرگواری کتگ ءُ کُشتگ-

وئیل ءِ بارو ءَ دگہ گیشیں اھوال دیم ءَ نیتکگ اَنت ءُ نانکہ وئیلکارانی بارو ءَ دگہ سرپدی یتگ اَنت-

اوگانستان ءِ تالبان سرکار ءَ زمین چنڈ ءَ سانمند بوتگیں مردمانی ھاتر ءَ پاکستان ءِ کمک ءِ منگ ءَ انکار کتگ – چریشی ءَ ھردو ھمساھگیں ڈیھانی جاورانی نگیگی گندگ بیت –

اوگانستان ءَ گوستگیں ھپتگ ءَ اتکگیں زمین چنڈ ءَ کم چہ کم دوھزار مردم بیران بوتگ انت ءُ بازیں میتگے سانمند بوتگ انت ءُ آئی ءَ پد چارشمبے ءِ روچ ءَ پدا زمین چنڈ بوتگ کہ چریشی ءَ گیشتر تاوان بوتگ انت –

پاکستان ءِ نگران سر وزیر ءَ ھما دمان ءَ کمک دیگ ءِ ھاتر ءَ ریسکیو ءُ ریلیف ٹیم دیم دیگ ءِ جار جتگ بلے کابل ءِ نیمگ ءَ انکار کنگ بوتگ ءُ کمکی مڈی تنی وھدی اوگانستان ءَ سر نہ بوتگ انت –

چوش کہ ھردو ڈیھانی واکدارانی نیمگ ءَ اے گپ تنی وھدی تچک کنگ نہ بوتگ بلے ھمے گوشگ بیت کہ ھردو ڈیھ یکے دومی ءَ گوں وش نہ انت ءُ نگیگں جاوراں تالبانی نیمگ ءَ کمکی مڈی زورگ ءَ انکار کنگ بوتگ –

سروزیر انورالحق کاکڑ ءَ ایکس ءَ پوسٹ داتگ کہ کمک ءِ نہ زورگے سوب؟

رسانکدری ھالانی رِد ءَ تالبانی برزی تبک ءِ واکداری ءَ وتی نام زاھر نہ کتگ ءُ گوشتگ کہ پاکستان ءِ سر وزیر انورالحق کاکڑ ءَ چاگردی ترامجاہ ایکس ءَ یک پوسٹ ءَ کمک ءِ انکار کنگ ءِ سوب –

اے جیڑہ راستی ءَ روکپتی اوگان ءِ سوبہ ہرات ءَ 6.3 زمین چنڈے پد بندات بوتگ – اسلام آباد ءَ زمین چنڈ ءَ پد جار جتگ کہ کہ آ سانمندیں مردمانی ھاتر ءَ زمستان ءِ ھاتر ءَ کارمرز بووکیں پنچ ھزار تمبو، پانزدہ ھزار کمبل، وردنی سامان، درمان ءُ ڈاکٹرانی یک ٹولی ءَ ھوار ٹرانسپورٹ بالگردے دیم دنت –

پاکستان ءِ نیشنل ڈیزاسٹر منیجمنٹ ءِ اتھارٹیءَ کمکی مڈی تیار کتگ انت ءُ سرجمین ھال سرکاری ویب سائٹ ءَ داتگ –

آئی ءِ لھتے اداراں پد کاکڑ ءَ چاگردی ترامجاہ ایکس ءَ ٹاہ داتگ کہ اے کمک اوگان سرکار ءِ گوشگ پد ءَ دیم دیگ بوگ ءَ انت –

بلے تالبانانی گوشگ انت ما ھچ چشیں لوٹ نہ کتگ آیانی گوشگ انت درملکی کمک ءِ ھاتر ءَ تنی وھدی تچکی لوٹ نہ کتگ –

رسانکدری ھالانی رِد ءَ تالبانی سرکار ءِ واکدارے ءِ گوشگ انت کہ چشیں ھچ وڈیں لوٹ کنگ نہ بوتگ ءُ مئے سرکار ءَ گوں مزاک کنگ بیت –

وھدیکہ پاکستانی کمک ءِ انکار کنگ ءِ سوب جست کنگ بوتگ گڈا تالبان اگدہ دارے گوشگ ات پاکستان ءِ سروزیر ءَ بے نپیں درشان ءِ داتگ آئی ءَ پاکستانی رھشون گوشتگ کہ اوگانستان ءِ درگت ءَ ھر وھد ءَ کہ درشان ءِ دیگی بیت گڈا پہ ھوش اکل –

دومی نیمگ ءَ یک پاکستانی کارمندے ءَ تالبان رھشون ءَ چہ جست گپتگ کہ پرچا اسلام اباد ءِ کمکی مڈی اوگانستان ءَ سر بوتگ نہ کنت؟

آئی ءَ گوشتگ کہ کابل ناں ھئو کنگ ءَ ناکہ اناں –

پاکستان ءُ اوگان ءِ نگیگیں جاور

پاکستان ءُ اوگانستان ءِ میان ءَ ھمے زوتاں جاور نگیگ بوتگ انت ـ پاکستان ءِ سرکار ءِ نیمگ ءَ 1.7 ملین اوگانیاں تاں یک نومبر ءَ ملک ءَ در کنگے مھلت ءَ جاور گیشتر نگیگ بوتگ انت –

تالبان رھشوناں اسلام آباد ءِ اے پیسلہ ءِ سر ءَ ترندی نگد کتگ ءُ ھمے گوشتگ کہ وتی پیسلہ ءِسر ءَ چمشانک ءِ بہ دنت اے ھم گوشتگ کہ چریشی ءَ ھر دو نیمگانی سیادی ءَ مزنیں تاوان ءِ رست کنت –

دومی نیمگ ءَ پاکستان ءِ گوشگ انت کہ گڈی رمس 1.4 ملین سرکاری رجسٹر بوتگیں باھوٹی ءُ ھشت لک ءَ گیش اوگانی پجار کارڈ ءِ واھندانی واست ءَ نہ انت کہ ملک ءِ تہ ءَ کانودی نشتگ انت –

بلوچ یکجھتی کمیٹی ءَ بیگواھیں سیاسی باسک راشد حسین زورانسری آوار جنی ءُ کھول ءِ نیمگ ءَ ماں شال ءَ بوؤکیں مراگش ءِ پلامرزی ءَ وتی شنگ کرتگیں درشانے ءِ تہ ءَ گوشتگ کہ راشد حسین مروچیگ ءَ چہ پنچ سال ساری ماں دبئی ءَ در کانودی آوار جنگ بوتگ ءُ پدا پاکستان ءِ دست ءَ دیگ بوتگ وھدیکہ پاکستان ءِ دست ءَ دیگ ءَ پد آئی ءِ ھچ ھال اھوال نیست – آئی ءِ کھول ھچ ءَ سرپد نہ انت کہ آ ھست ءُ سلامت انت یا ناں کہ وت یک کانودی ءِ بگیری دارگ انت – راشد حسین اے وھدی بندیگ ءُ بازیں ازیت ءِ سگگ انت ءُ ریاستی ادارہ آئی زاھر کنگ ءَ نہ انت ءُ درکانودی آ بیگواہ کنگ بوتگ –

جارکش ءَ گوشتگ کہ راشد حسین ءِ زورانسری آوار جنی ءَ نوں کساس پنچ سال سرجم بوتگ انت – اے میان ءَ آئی ءِ کھول ھاسکر آئی ءِ مات ءَ بلوچستان ءَ ھوار سرجمیں پاکستان ءِ تہ ءَ وتی زھرشانی نبشتہ کنائینتگ انت – بلے بژنی گپ ھمیش انت کہ زورانسری آوار جنی ءَ پد ھنگت زاھر کنگ بوگ ءَ نہ انت – زھرشانی ءَ نندانکاں ھوار کھول ءَ آئی ءِ یل کنائینگے ھاتر ءَ درسیں راہ کارمرز کتگ انت، آمیدگس ءِ دروازگ ٹُک اِتگ انت، برزی تبک ءِ واکداراں وتی پریات سرکتگ بلے اے درسیں کانودی راھانی کارمرزی ءَ پد ھم یک بیگناھے مردمے بندیگ انت کہ بلوچستان ءَ انسانی ھکانی لگتمالی ءَ پدر کنت – بیگواھیں مردمانی کھول مدامی ھمے گپ ءَ جنگ ءَ انت کہ آیانی دوستگیں مردم اگاں درکانودی کارے کتگ گڈا آمیدگس ءَ آرگ ءُ سزا دیگ بہ بنت بلے بدبھتی ءَ ریاست زورانسری آوار جنی ءَ وتی سلاہ ءِ کارمرز کنگ ءُ بلوچستان ءَ ھلوچ کنگ ءِ پالیسی ءِ سر ءَ روان انت –

بی وائی سی ءَ وتی درشان ءِ گڈسر ءَ بلوچ راج ءَ گوں لوٹ کتگ کہ ماں شال ءَ بوؤکیں مراگش ءَ بھر بہ زور انت – بیگواھیں راشد حسین ءِ زورانسری آوار جنی ءِ بگیری ءَ آئی ءِ کھول ءِ نیمگ ءَ ھمے ماہ ءِ پانزدہ اکتوبر ءَ ماں شال ءَ پریس کلب ءِ دیم ءَ مراگش ءِ برجم دارگ بوگ ءَ انت کہ اودا راشد حسین زورانسری آوار جنی ءَ ھوار بلوچستان ءَ انسانی ھکانی لگتمالی ءِ بگیری ءَ ھر تک ءُ پھناتاں سیادی داروکیں مردم وتی ھیالانی درشانی ءَ کن انت – درسیں انسان دوست ھاسکر بلوچ راج ءَ گوں دزبندی انت کہ آ بیگواھیں راشد حسین ءِ کھول ءِ جھد ءَ گوں ھمراھداری بہ کن انت ءُ آیانی توار جوڈ بہ بنت –