TBP Balochi

گوستگیں ھوراں چہ تاوان بوتگیں راہ انگت ءَ شر نہ بوتگ اَنت، بندیں راہ ءِ سر ءَ 14 کلاک ءَ درد ءُ دور ءِ کشّگ ءَ پد لاپ پُری زالبولے بیران بوتگ۔

بلوچستان ءِ دمگ آواران ءِ ھند جھاؤ ءِ دمگ دمب اللہ بکش چنال گوٹھ ءَ گوں سیادی داروکیں لاپ پُری زالبول ءِ زگ ءِ پیداک کنگ ءِ ھاتر ءَ کراچی ءَ دیم دیگ بوگ ءَ ات کہ اود ءَ بازیں ٹکریں راہ بند بوگ ءُ گیر آیگ ءِ سبب ءَ آ وھد ءِ سر ءَ نادراھجاہ ءَ سر نہ بوتگ ات۔

زالبول ءِ کھول ءِ گشگ ءِ رد ءَ آیاں لاپ پُری ئیں زال زمباد ءِ گاڑی ءَ گوں برت ءُ دیم پہ کراچی ءَ رھادگ بوت آں من چاردہ کلاک ءَ گام کپت آں ءُ سکیں درد ءِ سوب ءَ وتی جان ندر کت۔

پد ءَ لوگ ءِ مردماں جنین ءِ لاش پد ءَ جھاؤ ءَ آرگ بوتگ۔

اے بژن ءِ وئیل بلوچستان ءِ دو رند ءَ گچین بوتگیں سر وزیر کدوس بزنجو ءِ دمگ ءَ بوتگ۔ دمگی مردماں بند ءُ بست ءُ دمگی واکدارانی سر ءَ الان کتگ کہ آ ھرابیں راہ ءُ درانی جوڑ کنگ ءُ دوا ءُ درمان ءِ آسراتی ءِ دیم ءَ آرگ ءَ ناکام انت۔

یات بہ بیت کہ بلوچستان ءَ ناگیگیں مات ءِ بیرانی ءِ کیس باز گندگ بنت کہ اود ءَ مردم دمگی دمگاں دوا ءُ درمان ءِ نہ بوگ ءِ سوب ءَ شھراں رو اَنت۔

نوکیں رپوٹ ءِ رِد ءَ دمگ ءَ جسمانی آسراتی نہ بیگ ءِ سوب ءَ گوستگیں یک ءُ نیم سال ءِ تہ ءَ بلوچستان ءِ دمگانی تہ ءَ 23 جنین زھگ ءِ زھگ بوگ ءِ وھد ءَ بیران بوتگ اَنت۔

ایشی ءَ ابید بلوچستان ءِ دمگ ڈیرہ بگٹی ءُ کوہ سلیمان ءَ کارآمدیں دگ ءِ نہ بوگ ءِ سوب ءَ آسراتی ءِ نہ بوگ ءِ سوب ءَ زھگ ءِ پیداک کنگ ءِ وھد ءَ بازیں جنین ءُ چُک وتی جان ءَ گار کن اَنت

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں بیان ءِ تہ ءَ گْوشتگ کہ گوستگیں شپ ءَ چہ سوئی ءَ داں اوچ پاور پلانٹ ءَ روکیں 24 انچ ءِ گیس پائپ لائن ءِ تراکینگ ءِ زمہ واری ءَ من ایں –

بی آر جی ءِ جارکش ءَ گْوشتگ کہ گوستگیں شپ ءَ بلوچستان ءِ دمگ نسیر آباد ءِ دمگ ربی ءَ اوچ پاور پلانٹ ءَ روگ ءَ 24 انچ ءِ گیس ءِ پائپ لائن بی آر جی ءِ کارندھاں گوں تراکناکیں چیزاں تراک کتگ۔

جارکش دوستین بلوچ ءَ گْوشتگ کہ تراک ءَ پد اوچ پاور پلانٹ ءِ گیس سرجمی ءَ بند کنگ بوتگ ۔

روکپتی بلوچستان ءِ دمگ ھاش ءَ ایرانی لشکر ءَ دکانانی سر ءَ بیڑ برتگ ءُ دو مردم آوار جتگ ءُ گون وت برتگ اَنت-

آوار جنگ بیتگیں مردمانی پجار مولوی مھمد امین مراد زئی ء مولوی عبدالرحیم ءُ طارق مراد زئی ء عبدالرھمان جھننند اسماعیل آباد ھاش ءِ ناماں زانگ بیتگ اَنت-

اھوالانی رد ءَ ھردوک مروچی ھما وھد ءَ آوار جنگ بیتگ اَنت کہ ایرانی لشکر ءَ دکانانی سر ءَ بیڑ برتگ ءُ اود ءَ اے دویں دزگیر کتگ ءُ برتگ اَنت-

اھوالانی توک ءَ گوشگ بیتگ کہ ایشانی گرگ ءَ پد لوگاں برگ بیتگ ءُ اود ءَ آیانی زالبولانی موبائل یکجاہ کنگ ءُ چِک کنگ بیتگ اَنت-

ایرانی لشکر ءَ بھتام جتگ کہ اے مردم مئے سر ءَ اُرشکاری ءَ اُرشکارانی کمک اش کتگ ءُ آیانی کھولاں زھرشانیاں بھر زرتگ-

مولوی مھمد امین خلفای راشدین جامع مسیت ءِ اسماعیل آباد ھاش ءِ سروک انت ءُ اود ءَ زھگاں وانین ایت-

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں شنگ کتگیں درشان ءِ تہ ءَ گْوشتگ کہ سرمچاراں سے شمبے ءِ روچ بیست اگست ءَ کلات ءِ دمگ گزگ ءِ ھند جھکری ءَ تیل ءُ گیس شوھاز کنوکیں شرکت سر ءَ راکٹ ءُ وتکاریں سلاھاں چہ اُرش کتگ چریشی ءِ آسر ءَ اے پُلپانچیں شرکت ءِ کارمنداں سک باز جانی ءُ مالی تاوان چست کنگ کپتگ-

جارکش ءَ گْوشتگ کہ گوستگیں روچ ءَ سھب ءَ کساس ھشت ءَ مئے سرمچاراں دگہ یک اُرشے ءَ اے پُلپانچیں شرکت ءِ کاردارانی گاڑی چیرکتگیں بمب اُرشے ءَ نشانگ کتگ چریشی ءِ آسر ءَ گاڑی سرجم ءَ تباہ بیتگ ءُ اشی ءَ سوار پنچیں کارمند ھما دمان ءَ مرتگ اَنت-

مزار بلوچ ءَ دیمتر ءَ گْوشتگ کہ اے شرکت چینی انجیئنرانی ساڑی بیگ ءَ چہ اُرش کتگ زورگریں ریاست ءِ دستاں زورگپتگیں بلوچستان ءَ برجاھیں کدرتی مڈیانی لُٹ پُل ءَ ھواریں نوآبادیاتی مشینری ءُ ھرچ اے مردم ءَ کڈن کن ایں کہ آ اے پُلپانچیں نزام ءِ بھر مہ بنت اگاں ناں آ مئے نشانگ ءَ بنت-

بلیدہ ءَ ناشناسیں مردماں بند ساچی شرکت سر ءَ اُرش کتگ اود ءَ اوشتوکیں گاڑی ءُ سامان مانداشتگ اَنت-

گیشیں ھالانی رِد ءَ سھب ءِ نُھ نزیک ءَ سلاہ بندیں مردماں بلوچستان ءِ دمگ کیچ ءِ ھند سوراپی ءَ یک بند ساچی شرکت سائٹ سر ءَ اُرش کتگ اود ءَ اوشتوکیں سرجمیں گاڑی ءُ دگہ سامان مانداشتگ ءُ تباہ کتگ اَنت-

وئیل ءَ پد پولیس ءُ پوج ءِ کارمند وئیلجاہ ءَ سر بیتگ اَنت اُرشکار وئیل ءَ پد تتکگ اَنت-

زانگ بہ بیت کہ بلیدہ ءُ کش گور ءِ دمگاں اشی ءَ ساری ھم بند ساچی پروجیکٹس ءُ آیانی سر ءَ کارکنوکیں شرکتانی سر ءَ اُرش کتگ کہ آیانی زمہ واری بلوچ آجوئی لوٹوکیں سلاہ بندیں گلاں منّ اِتگ اَنت، بلے مروچی بیتگیں اُرش زمہ واری انگت ھچ گل ءَ نہ زرتگ-

بلوچستان ءِ دمگ مستونگ ءُ بولان ءَ پاکستان پوج ءِ ھیلی کاپٹرانی بُرز بالی ءُ بازیں جاھاں شیلنگ ءِ ھال اِنت-

ھالانی رِد ءَ مستونگ ءِ دمگ مرو ریشی ءُ کش گوراں کم چہ کم ھپت ھیلی کاپٹر گندگ بیتگ اَنت کہ آیانی روگ آیگ برجاہ ءَ اِنت-

زانگ بہ بیت گوستگیں روچاں مستونگ ءَ پاکستانی پوج ءَ بی ایل اے ءِ باسکانی جنگ ءِ ٹاہ داتگ بیتگ بلے تنی وھدی بی ایل اے ءِ نیمگ ءَ اے درگت ءَ ھچ اھوال دیم ءَ نیتکگ اَنت-

گوستگیں شپ ءَ روکپتی بلوچستان ءِ دمگ گِھ( نیکشھر) ءَ زمین چَنڈ بیتگ ءُ چریشی ءِ آسر ءَ لوگاں تاوان رس اتگ –

گوستگیں شپ ءِ ساھت کساس یازدہ ءُ نیم ءَ زمین چَنڈ بیتگ ءُ چریشی ءَ نیکشھر ءَ ھواریں دمگاں زمین سُریتگ –

زمین چَنڈ پیما اسکیل ءِ رد ءَ زمین چَنڈ ءِ ترندی کساس چار ٹِک اشاریہ پنچ ریکارڈ کنگ بیتگ-

زمین چَنڈ اسکیل ءِ رد ءَ زمین چَنڈ نیکشھر ءَ بیتگ کہ اود ءَ آ زمین ءِ چیر ءَ دَہ کلو میٹر ءِ جھلانکی ءَ بیتگ-

زمین چنڈ ءَ مھلوک ءِ لوگ ترک اتگ اَنت ءُ آیاں تاوان باری بیتگ بلے دگہ جانی تاوانانی اھوال سر نہ بیتگ اَنت-

روکپتی بلوچستان ءِ دمگ سرباز ءَ دو ٹکانی میان ءُ وت ماں وتی جنگ ءُ چوپاں پد گوستگیں روچ ءَ دست ءُ دروھتی بیتگ اَنت-

گیشیں اھوالانی رد ءَ سرباز ءَ ھملی ٹک ءُ سھرابزئی ٹک ءِ میان ءَ سَے سال ءَ پیش بھتام جنی بیتگ کہ یک دومی ٹک ءِ مردمانی کوش ءَ دست ھوار اِنت ھمے میان ءَ سَے مردم کُشگ بیتگ اَنت-

ایشانی مردم ایرانی لشکر ءَ سلاہ بندیں ٹولیانی بھتام جنی ءَ کُشتگ بیتگ اَنت-

گوستگیں روچ ءَ کلات مرکز سرباز ءَ دمگی سروکانی سروکی ءَ ھردوکیں ٹکانی سلاہ بیتگ اَنت –

زانگ بہ بیت روکپتی بلوچستان ءَ وت ماں وتی جنگ ءُ چوپانی ناوشی وئیل دیم ءَ کاینت اِنت-

بلوچستان ءِ دمگ چہ سوئی اوچ پاور پلانٹ ءَ رؤکیں گیس پائپ لائن ناشناسیں مردماں ربی ھند سر ءَ تراکناکیں شورواں گوں تباہ کتگ-

اِھوالکار رِد ءَ چارشمبے ءِ شپ ءَ ناشناسیں مردماں سوئی ءَ سوئی گیس فیلڈ ءَ چہ اوچ پاور پلانٹ ءَ رؤکیں گیس پائپ لائن تراکناکیں شورواں تباہ کتگ-

اِھوالکار گوشگ اِنت اے تراک ءِ آسر ءَ پلانٹ گیس پُجارینگ مھتل بیتگ- وئیل ءَ پد پوج ءَ دمگ بند کتگ اُرشکارانی پٹ پول بندات کتگ-

بلوچستان ءِ دمگ چہ ھاران آوار جنگ بیتگیں مختیار احمد مینگل ءِ یل نہ کنگ ءِ ھلاپ ءَ مروچی ھاران شھر ءَ تھتگ بندیں ھڑتال ءِ جار پد ءَ بازار سرجمی ءَ بند بیتگ-

وھدے کہ چیف چوک سر ءَ زھرشانی مچی ءَ پد ھاران ریڈ زون سر ءَ زھرشانی ئیں نندانک جتگ-

زانگ بہ بیت کہ مختیار احمد مینگل گوستگیں ماہ پانزدہ جولائی ءَ چہ سراوان ءَ شھر آیگ ءَ بیتگ کہ روچانی رھم ءَ آوار جتگ برتگ، آئی ءِ یل کنگ ءِ مٹ دہ کروڈ کلدار ءِ لوٹ کنگ بیگ ءَ اِنت-

زھرشانی کنوکاں گْوشتگ کہ اگاں بیست پنچ فروری ءَ تاں مختیار یل کنگ نہ بیت گُڑا اے نندانک شال ریڈ زون ءَ برگ بیتگ، گوستگیں سی ھشت روچاں چہ اے نندانک پریس کلب ءَ برجاہ بیتگ مروچی اے ھاران ریڈ زون ءَ برگ بیتگ-

گوشگ بیگ ءَ اِنت کہ مختیار احمد مینگل ھکومتی پلارمرزی کنوکیں ٹولی ءَ آوار جتگ-